BLUE BAYOU (LAST CH - 40) by Ahmangaihi violette khiangte

BLUE BAYOU 

by Ahmangaihi violette khiangte

Chapter - 40

Christmas hmangin kan khaw lamah ka haw chho a, tun ṭum ka haw chu ka chhungte in danga mi te pawn min lo lawm nak nak viau a, ka nu Sangi pawh ka kal hma ang kha chu a ni ta lo. Ka pawisa thawn an hman dante min hrilhin an thil leite min lo kawhhmuh sawk sawk a, a awh ruk em em double door fridge an lo lei hi a lo ni a, a kawr tur ka hawnsak ka han pe pawh a hlim var var viau a ni.

Ka pite chhung leh nu Remi te chhung bakah ka nuin chaweiah min sawm a, ka thlen tuk aṭangin inlamah chaw ka ei hman meuh lo. Ka nau pawn mi a ngaina ve ta deuh aniang biak a nuam ve ta khawp a, an ina chaw ka eiṭum chuan a home work te ka tihpui a, a ṭawng ve barh barh mai a, ka chak loh ang aiin kan khuaah chuan hun ka hmang nuam ti ila a dik ang. 

Kumthar ruala chhuk leh mai tum ka nih vangin ka nu Sangi'n hmarcha pickle hawn turte min siam sak a, ka pa'n vawksa min rep sak ṭeuh bawk a, Thantei a haw ve loh avangin ka thawn ṭhen nghe nghe a, a puten  aizawl lamah christmas an hmang thla bawk nen a lung a leng lutuk lo turah ka ngai. Christmas leh kum thar vuak vet hi inhralh vanglai tak a ni a, keipawh chu let leh har lo turin min chah mawlh mawlh reng.

Zan khat kan inbia chu thu mak deuh a rawn sawi a, Zodina kha serchhip lama a bialnuin a lo zin chilh a ni awm e. "A inluah aṭanga an lo inzui chhuak hi ka hmu leh ṭhin a, a farnu emaw ka lo ti mai mai a; mahse, kan biak in lama an khaw nula pakhatin kum 4 lai an inkawp tawh thu min hrilh alawm, ngaihzawng nei chungin a lo beisei reng che tihna ania, zak lo ka ti lutuka, biak pawh ka be ṭha peih tawh lo, lo biak a tum che pawn lo chhang duh reng reng suh" a rawn ti luam a, message min rawn thawn zauh zauh chu a la ching a, christmas tuk te pawh khan mi a la rawn chibai thlap a, a rul tawkin ka chhang let ve nghe nghe anih kha, chutia a chanchin ka han hria chuan ka rilru a ti danglam tehchiam lo a, beisei awma ka awm lo erawh ka lawm viau thung.

Ka hawsan dawn thleng khan Awmpuia nupui chu a la chhuak duh lo a, Awmpuia hnena a sawi dan chuan a fapa tel loa chhuah a tum lo niawm tak a ni. Noeli chuan, "Ṭum dang ang chu nisela Caleba tel loin a chhuak leh daih tawh ang, an pa nena in inkar vang hian a awm lui ngar ngar anih dawn hi, tlawmah a la laklawh a, a tuar rei thei chuangin ka ring lo a, enliam tawp mai rawh u" tiin thu min rawn a, lungdam lo eng ang mahila tih ngaihna a awm ngang si lo a, Awmpuia erawh ka khawngaih ṭhin. Ka kianga hun hman a thlahlel ngawih ngawih a, pangngai taka inngaihzawn leh pawh a duh a, an inneihnain a la phuar tlat avangin a rem rih si lo, message kan inthawn a, chutah pawh chuan insum a la ngai zel a, inngaizawng anga biahthu han inhlan ang kha rem lohna tam tak a la awm.

Keichuan, "Ka nghak ang che, i rilru tina suh, khuanu ruat kan lo ni tak tak anih chuan hun ṭha kan nei dun leh mai ang, thil fel lo te pawh a inher rem leh mai turah ngai ang" ti a thlahin ka hawsan rih kha a nia, kum a thar anga, eng nge kan an zel ang chu ka hre phak lo; beisei neihsan pawh a har ṭhin viau mai.

Zan khat chu min lo call a, kum hlui thlah zanah a ni. Zangkhai deuhin ka lo bia a, engtin nge kum hlui an thlah te ka lo zawt zung zung a, a mut tawh thu a rawn sawi vang chuan an hmang nuam lem lo tih a hriat theih. Kei zaikhawm turin ka kal dawn chiah a, kan kawtzawl thim laiah rei dawn chu kan inbia a, a aw aṭang chuan a hlim hlawl lo tih a hriat a, damlo chau tak hi a angin ka hria.

Tuin nge Caleba mutpui ka zawh chuan a pi bula a mut thu a lo sawi a, Juni chu an nupa pindanah a riak thung a, Awmpuia erawh mikhual pindanah amahin a mu a, Caleba hian a nu hnute a hnek loh vangin a pi bula a mutna a rei tawh a, a kuah tamtu zawk na na na chu a pi hi a ngai a, a nu aiin a pi hian a awmtlei zawk a nih hmel. Chhun lamah Juni a hnaah a kal a, chung hun chhung zawng chuan a pi nen an lo inawm a, awmpui nula an neih bawk avangin Juni hi chuan a buaipui tam lo viau a ni awm e.

"Ka haw hnuah insawi dun leh tawh em?" ti a ka zawh chuan, "A sawipui theih loh, engmah a ngaithla duh lo, a chang leh min ankhum a, a ṭap bawk a, tih dan ka hre lo, ka nu hi chuan Caleba hi hruaitir mai a pawi ti lo a, 'Hetianga in awm tawh tho si chuan inṭhen fel a ṭha ang' a ti ve tho a, hruaitir lah hi an ngaihtuahawm bawk si a, a nu hian hna a thawhsan emaw a nia nga, saw lamah a chhungte an buai ve bawk si, an awmpui kuta dah tho tur chuan hruai lo zawk sela ka duha" a ti charh charh a.

"Hruai ta sela a lo dah let leh vat mai lo ang maw?" ka tih chuan, "Ka hre lo, a zia hi a danglam ve a, ka rilru tihbuai hi a duh ber zawkin ka hria" a ti halh a. "In inneih tirhin a fel reng reng em, tun hnuah hetiang hian a awm chauh em ni?" ka ti leh a, an nupa kar chhia hi Awmpuia vang a nihna chen a awm ang.

"Kan inneih tirh kha chuan ka enliam mai ṭhin a, inhauh hi chu kan nei zing, Matei damlaite khan eng emaw chen chu kan awm hrang a, a chhan pawh bazarah a hruai a, a tihbo vang ania, ka nu kha a lawm lo khawp a, an inhau khan ka nu kha kut a thlak lek lek mai a, khata ṭang khan kan inkar hi a ṭha thei tak tak tawh lo, Caleba pian hnu khan kan zia veleh deuh dawn emaw ka tia, a ziaawm thei tak tak chuang lo anih hi" tiin min hrilh ve duah a, chutiang thil te ka han hriat tak zelah chuan inṭhen se ka duhna a lian tawh hle a, amah Awmpuia ka duhna vang hrim hrim pawh ni tawh loin ka khawngaih vang a ni tawh ber ang chu.

"Keichuan ka rilru ka siam tawh a, i nupui chu a chhuak emaw, chhuak duh lo emaw i tan ka awm reng dawn ania, ualau takin inkawp lo mahila nupui nei lai ka ngaizawng che a, a nih tur ang chu kan ni zo tawhin ka hria" tiin ka rilru dik tak ka hrilh a, mitmei ven tur ka neih pawh ka hre tawh lo a ni, khati khawp khan ka mualpho tawh a, ka hmelhriatte pawhin an hre vek tawh a, Awmpuia ka thlah dawnte anih ngawt loh chuan thui tak thlenga inhuam mai chu a ṭhain ka hria.

"Keipawn ani ngaihchan reng hi chu ka thei bikin ka ring lo" a ti ve tawl a, a rilru ti hah zual tura nawr  loh hram ka duh vangin, "Ka lo chhuk phawt anga, tih dan kan ngaihtuah ṭha dawn nia" tiin kan inbiakna chu ka ti tawp a, chumi hnu chuan zaikhawmna lam ka pan a, zan rei thlengin ka va tel ve nghe nghe.

Kumthar kan hmang liam a, Thantei'n min rawn chah mawlh mawlh tawh, "I lo chhuk hunah ka pi leh pu te thlah pahin ka han haw ve zawk ang" a tih vang chuan ticket ka la hma a, chutih laiin Hruaizeli'n min lo la chelh ve teh a tum a, a chhan lah a sawi ṭha duh si lo. Mahse, Aizawla ka chhuk dawn zana a lo leng ka lo dawp chuan a rai thu min hrilh phawng mai a, min ṭhawng angreng khawp mai.

Naute pa erawh a sawi duh miah lo a, "Ka chhungte pawh ka la hrilh ngam lo, ka pa'n min vaw hrep dawn" tiin a lungngai khawp mai a, keichuan, "Anih tur ang a ni vek tawh, hrilh tlang vek rawh, a ti sualtu i nia, a tuar lam pawh inhuam mai rawh" tiin ka chunga thleng nisela ka tihdan tur ang takin thu ka rawn a, thil tisual leh daipelh phung ṭhin ka nih vangin a let tawrh hi inhuam mai ka duh ṭhin, ka tuar mawlh mawlh viau bawkin ka hria.

A tuk zing tukṭhuan eikhamah Aizawl lam kan pan a, ka sumo chuanna ngaiah hlir hian ka chuang a, driver pawn min duhsak ve viau tawh. Seat hma kawngkhar bula ka ṭhut vangin khaw hawi a nuam zual a, a vawt deuh tih mai chauh a ni. "Rinte, he khua hi a i la hria em, motor ke kan siam tir tawh kha" kan driver-in a rawn tih chuan ka hawi chhuak vat a, engmah pawh ka sawi ve hma chuan, "Boruak hralh ngai lo te khua kha" a ti zawm leh a, amah zawk chu a nui hawk hawk.

"Workshop kha an siam leh tawh em?" ka tih laimek chuan kan hma lam kawngsir chu a kawk a, "A lian tawh mah zawkin ka hria" a ti zauh a, a kawhna zawn kan thlen chuan workshop kawtah mipa ṭhenkhat hi an lo ṭhu a, zial an pet far hlawm. 

Kan chuanna motor chu a ding dat a, "Ka ke spare ka dah a, ka va la lawk ange" tiin kan driver chu a chhuk a, zun ram thiarin midang pawh chu an chhuk sap sap a, kei erawh ka chhuk ve duh lem lo. Chutih laichuan ring fahrana, "Over" tih ri ka hria a, ka hawi phawk viau mai. Dawr chhak aṭang chuan hmeichhe pakhat hi a lo chhuk a, mipa ho ṭhutna zinga tu emaw ber chu a ko aniang, "In zun thui siak ila, min cho em?" tih pah chuan a bottle ken lai chu a kap zawnah a dah sauh sauh a, a hmet chik tuar tuar a, mipa ṭhenkhat a va per ho chu an tho sap sap mai.

"I va han ṭawp e aw Thuli" pakhatin a tih laichuan midang chu an nui dar dar a, nula lah chuan pakhat chu tih huh ngei tumin a um zui a, kan chuanna sumo hma lamah chuan an in um phei bawk nen ka lo nuihpui ve hak hak a, inngaizawng emaw nupa an nih ka ring. 

Rei loteah midang ho an lo lut a, kan tlan chhuah leh hnu chuan ka muhil ta vang vang a, thingpui ina kan chawlh pawh chuan ka chhuk ve peih ta lo. Chawhnu lamah Aizawl kan lut a, Thantei'n dawr a nghah vangin dawr lam ka pan a, a pi leh pu te an awm tho a, 'Ka piin eirawng a bawl mai ang' a tih vangin a ruala haw mai ka rilruk a, a tuk lama Champhai chho ve nghal turin ticket pawh an lo la fel diam tawh.

"Awmpuia nupui kha a lo kal leh asin, i awm si lo a, engmah sawi loin a kal leh daih alawm, customer dang awmlai ni lo sela chuan ka lo kamkhat hlak tur ania" Thantei'n a ti chu phawk fein ka melh a, "Engtikah" tiin ka zawt vat.

"Kar hmasa khan, kawngkaah sawn a lo dak zuai chauh" 

"Eng nge rawn tih a tum le?" 

"Aw, rawn tawng leh che a tum aniang chu maw le, a mizia hi ka ngei zawng tak, nang chu i insum thei em mai, kei ni ila ka runluih nasa ngawt ang, mi nupuiin khatiang khan min ti ve sela chuan ka duh vak loh mipa pawh ka chhai lui chiam duh ang" a ti zui hlak a, ka lo en dan vang chuan a han nui leh rih a, "Ka ze hlui ka'n chhuah lawk anih kha, tunlai chu ka da riau mai, ka sumdawng nasa deuh aniang, han haw ila kohhranah han tal tam ka ngai" a ti leh zung zung a, ka chhang let tawh lem lo.

Thim hma deuhin kan haw a, Thantei pi leh pu te chuan min lo lawm thiam khawp a, ka thil hawnte pawh min lo phawrh pui zung zung mai. A pu chuan keimaha awm ka hreh leh hreh lohte min zawt a, a piin an khuaa zin ve turin min sawm bawk a, Thantei'n christmas leh hun chu dawr khara Champhai lama hman chhoh a rawt bawk. Kan inthlak zawh hnuah zanriah kan ei nghal a, kum upa lamte an ni tawh bawk a zanriah eikham chuan mut an duh mai a, keini ṭhiandun erawh kan mengrei viau a ni.

"Engtia hmalak nge i tum tak?" ti a min zawh chuan, "Amah ka ngaichang rih ang, tlan chhe thei pawh ka ni tawh lo, a nupui nen ṭha leh thei dawn nisela chuan inhnuhdawh pawh ka hreh chuang lo a; mahse, kan hetih takah chuan a inpeih hun nghah chu ka duh" tiin ka hrilh ve sap sap a.

"Ka hrethiam tho che, i hmingchhe tawh ta sa sa sa neih ngei tum la a ṭhain ka hria, nupui fel tak nei sela chuan ka khap tho maithei che keipawn" a ti ve nghat a, Awmpuia thil min hrilhte pawh ka hrilh ve vek a, ka nghak ve rih ang tih chu kan thutlukna a ni.

A tuk lamah chuan Champhai lampanin min liamsan a, chhunah dawr ka nghak a, ka buai ve angreng bawk nen Awmpuia pawh ka be ṭha hman lo. Mahse, tlai dar 4 bawrah sawilawk pawh awm loin a rawn lang hlawl a, engthil emaw hi min lo kensak bawk. Customer an awm vangin counter bulah a lo ṭhu ve mai a, a va en laichuan phone a hmang a, tu emaw hi chawlh a pe niin ka hria.

Customer chhuah hnua a bula ka va ṭhu chu eng emaw hi min lo pe vat a, "Kawngah an lo zuar a" tih zawng a sawi a, ka han en chuan ka soft toy duh em em ṭhin little pony hi a lo ni a, pinkie pie ngat a ni nghe nghe.

"Khawilai kawngah nge an zawrh a?" 

"Saw lai lawkah sawn" awih lo deuhin ka melh a, sawlai lawka an zawrh chu ka ring chiah lo, a lo ken ang berkher phei chu a man to chi a ni a, a hranpa a dawra a lei tih a hriat reng.

"Ka lawm e aw" ka tih chuan, "I la ngaina em?" a lo ti ve vat a, tun hma ang em em kha chuan ka ngaina tawh lo a, a lo la hriat reng pawh ka rin tawh loh laiin. "Hmanah khawlaiah i ngen kha i la hria em?" a tih chuan ka hrechhuak uar uar. 

"Ka lehkhabu leina turin ka leisak che anih kha" a tih leh chuan kan inmelh vang vang a, a rei tawh tehlul nen, a lo ngaihtuah let ve ṭhin a ni ngei ang.

"Inlam boruak eng nge a an?" ka ti ta daih a.

"A nu ka bia ang" a tih chuan zawhna ka ngah nghal khawp mai. "An lawm lo viau ang a, an lo hruai nghal i ring em?" ka ti zung zung a, a chiang ngam zan lo aniang, "Ka beisei" a ti zawi ruih a, ka kut rawn banin a hum rauh rauh bawk.

"Sual ka inti ve khawp mai" a tih chuan ka lo nui hak a, ani pawh a nui ve tho. "Ka dinhmunin a zir loh vanga ka duh loh thil kan tih chang a awm alawm" ka ti chu pawm tih hriat takin lu a bu a, "Mahse, ka inchhir lo ang, ka bulah i ding dawn alawm tiraw?" ka mitah tak min en chungin a ti a, a thil sawi chuan minti hnim ruih theih, a beisei anga hlimna thlen sak loh ka hlau a, a duhthusam ang ka nih loh mai pawh ka hlau a ni.

"Ka thlah ang che" a ti nain ka hnial ve tlat a, "In lamah an lo nghakhlel tawh ang che, keichu thim dawnah ka haw chauh ang" tiin min hawsan mai turin ka hrilh a, keimah chauha ka awm tur chu min ngaihtuah ve khawp mai, "I hlauh deuh chuan min lo be dawn nia" a ti ve thlap a, a haw tur chu veranda thlengin ka va thlah bawk.

Zanah chuan a reh veng veng a, min biak loh hi chuan va biak hmasak hi ka hreh ṭhin, ka inthlahrungte pawh a ni mah zawk ang chu. Ka muhil lah chu ka pum a na riai riai reng a, ka mu nghet thei meuh lo. Ka rilṭam vang anih ringin chawte ka va bar leh rih a; mahse, zing thleng pawhin a la reh thei lo. Hma deuhah dawr ka va hawng a, chumi ni chu nilengin ka nuam lo a ni ber, Thantei'n min lo biak chuan, "Damdawi ei ringawt lo la, inentir zawk rawh" tiin thu min rawn a, pum damdawi lei phawt chu a ṭhain ka hria. Tlaiah pawh ka inkhar hma deuh a, haw pahin damdawi dawrah ka kawi bawk. 

Ka damdawi man pek ka tum laichuan "Nangmah e law?" tu emaw hian a rawn ti hlawl a, ka han enchian nak chuan Ruatkima a lo ni reng a, minti hamhaih angreng khawp mai.

"I damṭha em, kan va inhmu khat ve?" tih pahin min chibai sawk sawk a, keipawh chuan a chanchinte ka lo zawt ve luam a, nupui a lo nei tawh a ni awm e, a nupui a han koh lah chuan Brendai a ni miah lo lehnghal a, Brendai chanchin zawh ka duh tehlul nen.

"In la inkawm ngai em?" tiin ka zawt ta hram a, a nui vur vur ringawt.

"Roma te ho pawh ka hmuh lohna a rei tawh, an damṭha hlawm maw?"

"Roma chu a lo haw khat lutuka, keipawn ka hmuh lohna a rei tawh" a ti ve vat a.

"Anih Brendai?"

"Ani pawh ka biak lohna a rei tawh, Bena nen inla inbe ngai zawk em?" tiin min zawt let heu a, lu ka thing rang khawp mai.

"Brendai number te i la nei mial em?" ka ti leh a, Benja chanchin han zawh vak chu ka zak deuh a, Brendai hnen aṭanga ka hriat theih ka ring a ni. A phone a rawn phawrh a, "A number hlui kha a la hmang angem aw" ti nuah nuah chungin a hmet kual a, chutih chhung chuan ngaihtuahna a lo vak thui hman khawp a, an induh ve tehlul nen khan engvanga inṭhen ta mai nge maw an nih ang le, mihring hian hma hun hi kan han hre lo khawp a, duhtaka kan pawm ṭhin te nen pawh heti khawp hian kan inhlat leh ṭhin chu ania.

Number kan inpek zawh hnu chuan, "Ka pe che tih i hrilh dawn nia" a ti zauh a, an nu a lo kal avangin, "Kal tawh rawh" a ti sawk sawk a, ka kalsan rang khawp mai. In ka thlen veleh eirawngte ka bawl a, chaw ṭhing a tam avangin artui ka kang a, mahni a awm hi chuan eirawng bawl hluah hi ngai ka ti hran lo a, ka awlsam ṭhin viau a ni. Thantei nen rei lote kan inbia a, bungrua a chah thu leh a cham rei deuh tur thu a lo sawi a,  kan inbiak zawh hnuchuan inchhung ka ti fai a, insuk ngaite ka su zung zung a, ka inbual meuh chuan dar 9 a pel tawh. Ka damdawi kha ka ngeih a ni chek ang pumna pawh ka hre ta rih lo a, ka chau deuh e tih chauh a ni.

Ka lo theihnghilh veng veng a, ka mut hnuah Brendai number ka neih kha ka hrechhuak leh zawk a, a tlai tawh angreng si a a mu tawh hialin ka ring. Beisei nei sang lem lo chung chuan ka call ta tho a, phone a khawih mek aniang chu a rawn chhang rang khawp mai, kei lah chuan a aw ka hre thut chu ka hamhaih leh rih a, sawi tur pawh ka hre lawk lo, "Hello, aw..Brenda' ka ti bah nawk.

"Tunge aw?" a tih chuan, "Rintei" ka ti tawl a, "E he...." tih riin a zui zat.

"Min la hria maw?"

"Engah nge ka hriat loh ang che, i thi tawh emaw tih a, i va han reh rei vawng vawng ve le" a rawn nui hak hak a, "I dam em, i va ngaihawm ve" ka tih chuan a phul leh hlut a, "Lungte pawh i ti leng dawn alawm, engtin nge ka number i neih, Bena nen in inhmu em ni?" a ti zung zung a, ka neih dan ka hrilh takah chuan, "Hmela chu, a lo la nei a ni maw?" a ti a, a lawm vak loin ka hria.

"A pawi em?" ka ti leh erawh, "Pawi teh nang" a ti leh lawi a, zawhna min rawn zawt nghal mawlh mawlh mai, eng nge ka tih ṭhin te min zawt a, keipawn ka lo hrilh ve luam a, ani pawn MC-ah dawr a lo siam a, pheikhawk dawr a ni awm e.

Ka pehhel duah hnuah Benja chungchang chu ka zawt a,  "A damṭha em, tunlai in inhmu ngai em?" ka ti chu min lo chhang phur khawp mai a. "A damṭha tawh e, nikum lawk khan a tonsil a vung a, an zai alawm, tunah chuan a ṭha leh tawh e, fa pawh a nei tawh asin, fanu harh deuh leh fapa ngur chuai tawk a nei alawm" tiin a nui hak hak a, fa pahnih a nei tawh tih ka lo hre miah lo.

"Pakhat chauh an la nei emaw ka tia, nikum khan MC-ah ka hmu a" tiin ka hmuh dan te chu ka hrilh a, "A damloh lai anih dawn chu,  a pu boral thu te kha i hre tawh em?" a tih leh chuan ka bo map.

"Engtikah nge a boral?"

"Nikum lawk khan, kum hmasa khan a nu a boral bawk a" a sawilai chuan ka ṭek sawk mai hian ka hria, mit ka chhing vang vang a, thawk a sak nghal ṭalh mai, kan Benjamina chuan nun nuam tak a lo nei bik lo anih hmel.

"Kan van khawngaih reuh e, amah tal a damṭha erawh a lawmawm anih chu" ka aw chu a zawi sawt hle a, lehlama mi pawn a lo hrethiam aniang, "Buaina hi a ngah ve ṭhin ania, inchhungkhurah a mawhphurhna a sang bawk si a, a patea chanchin pawh i la hre lo ang a, in la inbe leh lo hrim hrim ti raw, i chanchin ka zawh hian 'Engmah ka hre bik lo, hriat dan lo ngaihtuah teh' a ti ringawt zel a, tih ngaihna ka hre bik si lo a, i number kan nei bawk si lo' a ti ve vang vang a.

A thilsawi zauh kha ka lo hre fuh khawp a, a patea chungchang kha a ni, a pu a boral tawh anih chuan chhungkaw lam engtin nge an awm tih chenin ngaihtuahnaah a lo lut a, zawhna hlirin ka khat. "A patea chanchin chu engtin maw?" dilchhut zetin ka ti leh a, a thil min hrilh chuan min ṭhawng takzet.

"AIDS a vei a?" a ti tawl, eng thil chiah nge maw thleng le.

"Engtin, a va mak awm ve"

"Nia, mak chu ka ti ve vak lo, Bena min hrilh ania, hria pawh kan tam lem lo. In inṭhen hnu lawk khan a patea nupui khan a chhuahsan a, Bena chuan a chhan a hria a, engmah a sawi duh lo a, ka rindan chuan a patea khan a lerh san anih ka ring, an nu chhuah hnu phei kha chuan a che ngap lutuk, hotel velah nula a kawp kual a, model  tih angreng te, AIDS a vei bawk sia, a kai darh ṭeuh maithei a ni, a khawsak dan hi ka ten ania aw, a inthup tlat bawk si a, mi hian hre darh se ka ti ania" a ti bawrh bawrh a, sawi tur pawh ka hre ve lo, a patea chu a nupui khan a man chhuak em mawni le tiin ngaihdan ka nei a, 'Bena chuan a hria' a ti bawk si a, ka rindan hi a dik maithei a ni.

"A pu a boral chuan an buai nuai lo maw, ro chungchangah te khan buaina kha an nei sa bawk si a" 

"Um, a tir kha chuan an buai ve deuh a; mahse, Bena chuan a pa ro zawng zawng a chang vek alawm, aman chanpual a nei ve bawk a, midang ho ania buai zawk chu, tunah phei chuan Bena hi an chhungkaw khaidingtu ber a ni tawh, Joshua khan nuthlawi a luhkhung daih a, inpui pawh Bena'n a chan ka ring, a patea saw a damrei pawh ka ring lo, zu a duh em mai, a na zeuh zeuh tawh lehnghal a" a sawi mawlh mawlh laichuan zawh chak deuh ka nei a, ka zawt hreh ru angreng viau thung.

Ka rilru hria niawm tak chuan, "Rosalyni chungchang min zawt dawn emaw ka tia?" a lo ti zauh a, ka lawm ru angreng khawp mai.

"Nia, eng nge an an zel, an nupa an hlim dun ang chu ti raw?" ka lo ti ve vat a.

"A tir khan kan huphurhpui lutuk a. Rinte, eng emaw zawngin lo ngai lo la, nang pawn i duhsak ve tho bawk a ka hmuh dan diktakin ka sawi tawp mai ang aw" a ti leh te te a. "Sawi tawp tawp rawh, a chanchin hriat hrim hrim kha ania ka duh" ka lo tih chuan, "A fel angreng lutuk, a fel thlawt ti zawk ang, a hna kha a bang a, inlamah a awm chawt a, Bena a zah thiamin a ngaihsak bawk si a, Bena pawn hian a hmangaih ve tak tak tawhin ka hria, an inneih tirh lam kha chuan a hel ve reng a, a tihtauh khum reng bawk a; mahse, Rosalyni hian a dawhthei em a, kan ina a rui chatthla te hi a rawn lam fo mai, henu hi ka beisei ang aiin a lo ṭha, a pasal pawh hi ṭhatnain a hneh niin ka hria" a ti sap sap a, chung thu ka hriata ka hlimzia chu aw, ka hnuk a ulh lek lek a ni. Benjamina chu a hlim a, nupui ṭha tak neiin fa pahnih lai a lo nei tawh a, an chhungkaw khaidingtu a ni mek bawk a, chu tluka duhsak chu ka nei bik lo, ka tawn ve phak loh hlimna zawng zawng nei sela tih hi atana ka duhthusam a ni.

"Kan inbia tih hi ka lo hrilh dawn em, a number te i duh lo em ni?" a rawn tih chuan ka lo hnial vat a, "Hetia a chanchin ka hria hi a tawk mai, be chak viau mahila ka insum zawk ange" zangkhai deuhin ka ti a, Brenda thung chuan, "Be mah la a pawi hleinem, ani pawn a be chak ngawt ang che, i chanchinte pawh a hre ve chak ang, hrilh tal ila a pawi angem?" a ti teh ṭalh a, "I tih dan dan ni rawh se, i hrilh anih chuan a chanchin ka hriata ka lawmzia thute i lo hrilh dawn nia" ka ti ve ta hram a, hrilh lo zawk sela ka duh ru hle thung.

Eng eng emaw sawiin kan inbe zui luam a, Ruatkima nena an chungchangte a ni, an inṭhen chhan pawh Brendai nuin Ruatkima a duh loh vang a ni awm a, Ruatkima lahin rui chungin a lo va rim fo anih hmel, an inṭhenna a rei tawh a, Brendai pawn ngaihzawng dang a nei leh tawh a, a sawi danin pasal neihte pawh a hawi ve ṭan niawm tak a ni. A khat tawkin Bena chungchangah kan lut leh ṭhina, an dawr leh sumdawnna neuh neuhte a enkawl a, a picnic spot lah a larin a lun em em reng a, eizawnna kawngah pawh a hlawhtling viau a nih hmel. 

Kan inbiak zawh hnuthlengin ka ngaihtuah zawm a, chhungkaw tana ṭangkai lo ti a an kawh rawn, an hnualsuat leh an entleu ṭhin khan heti hian chhungkua a han khaiding ta chu a ni a, a duhthusam a sawi ṭhin ang khan chhungkua a din a, eizawnna lam thlengin a hlawhtling bawk a, ka chhuangin ka va han lawmpui tehlul e aw,  a phu ngawih ngawih reng a ni.

Zingkarah Awmpuia nen kan inbe zawk a, thil hi sawi tam duah ṭhin lo mahsela zingkarah hi chuan a tih turte sawiin chanchin min lo hrilh ve ziah ṭhin a, inngaizawng inbia aichuan chhungte hnena chanchin inhrilh hi kan ang ṭhin. Khua a ṭhat loh deuh avangin customer an tlem a, ka awlthawng khawp mai. U Muana inhralh thei lo pawh a lo ṭhu phei ve daih a, chawhma chhung chu kan titi a ni ber. Chawhnu lamah phei chuan ruah a sur nasa zual a, khua a thim khup mai a, ka inkhar hma viau bawk.

In ka thlen hnu lawkah Awmpuia Message ka dawng a, "I haw tawh em?" tih zawng a ni, ka hrilh hnu chuan a reh vang vang a, ka be zui tawh lem lo. Zanriah te eia ka inpeih chuan dar 9 a lo ri leh reng tawh a, ruah pawh a han duak tawh. Ka phone charge ka va en chuan message pakhat a lo awm a, "Lo la muhil suh aw" tih hi a lo thawn a, dar 8 bawra a lo thawn a ni. A lo kal dawn tihna nge ka hrethiam lo khawp a, khua a chhe bawk si a, zanah lehnghal chuan a lo kal ka ring chiah si lo. 

Rilru nuam lo deuh chung chuan ka nghak a, a khat tawkin kawngpui lam chu ka zuk thlek leh ringawt ṭhin a, ka message lah a chhang thei tawh bawk si lo. Sana ka en chuan dar 10 a pel tawh a, a lo kal dawn lo a ni phawt ang tiin mut mai ka rilruk a, ka mut tur thu chu message-in ka va hrilh bawk. Khuma ka mut hnu rei vak loah a lo call a, a thil rawn sawi chuan min pawt tho zawt a ni ber. "Juni chu a nuin a lo hruai a, an haw fel chiah" tih a ni. 

"A va awlsam angreng e" ka ti zawi sep a, a mak ka ti lek lek.

"An inpawt lui deuh a, a nu kha a thinrim em a, hruai chhuah luih a tum ve bawk a, naktuk zingah bungrua pawh an lo la ang" 

"Caleba engtin nge?"

"Caleba tel loin a kal duh si lo a, 'Kan la phei phawt ang' a nu khan a ti a, ka la leh har lo ang" a ti nghet charh a, a rilru a na tih ka hre thei.

"I ṭha maw?" ka tih chuan, "Ka fapa ka ngai, min ngen a, a nuin a pawmbet tlat si a" chu a thil rawn sawi chuan rilru a ti na ve vawng vawng mai.

"An lo haw tir leh em ang chu maw?" ka ti ve vang vang a. "A tel loin ka awm thei lo ang, lak leh vat ka tum" a ti hmiah mai a, ka inthiam lo leh ruai tawh. 

"A hrehawm e" ka tih laia ka aw chu zawi tak a ni, ani thung chuan, "I rilru lo ti hrehawm suh, an kawl rei thei pawhin ka ring lo, tumah sawn an enkawl hman tak tak lo ang" tiin min lo hnem let leh vat a, "I mu thei angem?" ti a ka zawh chuan, "Ka hre lo" a ti hul hak a, a bulah awma kuah vawng vawng ka chak a ni.

Rei deuh kan inbia a, kan beisei ang em em thil chu kan tawng lo ti ila a dik ang, thawl huai tur emaw kan intih laiin min delh rittu a awm tlat a, kan hmabak pawh a ko dun hlein ka hria. Kan inpahnih inkar pawh thuruk deuha kalpui kan la duh a, keiin ka nghah theih thu leh hmanhmawh a ngaih loh thu ka hrilh ve mawlh mawlh a, kan induhnate tih lan a, in hmangaih dangte anga zalen taka inchhai kha a rem lohna chen a la awm vang a ni.

Kan inbiak zawh hnu chuan Thantei ka han hrilh ve nghal a, ani thung chuan min lawmpui khawp mai a, "Hnara hlit phawi ang huai anih chu, an inṭhen theih loh mai te ka lo ring hman a, awm a nuam huai alawm" a ti siam siam a, kan rilru chu a inang lo deuh a ni, han lawm ve viau dan pawh ka thiam lo, rilru a pik churh zawkin ka hria.

Zingkarah Juni chhungten bungrua an la tih ka hre leh a, Caleba erawh an la kawl ta thung a, chumi ni nileng chu Awmpuia nen kan inbia a ni ber, min hmuh pawh a duh viau a, hna a ngah deuh avangin hun a nei thei lo thung a, tlai lamah insakna hmuna a kal a ngai bawk a, "Inrinniah ka lo kal hman ang" a ti chu ka hnial lem lo. 

Inrinniah chuan insaknaah a kal hmasa te te a, a lo thlen chuan dar 3 a ri hnai ruak tawh. A lo lut chu ka lo en reng a, thawmhnaw smart deuh ha loin t-shirt var leh denim kekawr a ha a, a lang naupangin a hmel a nung sar a, hmuh a nuam hliah hliah. Ka bula lo ṭhut pah chuan ngaihawm zet hian min nuih a, "Chaweiah min sawm dawn em?" a tih laia a awri ah chuan eng emaw riau a awm.

"Thil ṭha deuh tawng i va ang ve" ka lo ti fiamthu a, a nui hmel mawlh chu, hman ang tho khan a la nui mawi reng, a upa telh telh a, a hmelṭha zual telh telhin ka hre lehnghal, vawiin phei chu ka ṭha zualin ka hria.

"Thil ṭha lo engmah a awm lo va, ka blue bayou kiangah ka awm bawk a" ka kut a rawn vuan zui a, "Min sawm ta che" a tih zawm leh zat.

"Aw, chaw i lo ei duh em?" a lo nur nang a, hrethiam mang lo zeta ka en laichuan, "Ka nu chiah inah a awm a, chaw chu ka lo ei thei lo anga, rei deuh chu ka lo leng thei ang" a ti a, ka nuih a za angreng.

"Ka haw tlai dawn asin" ka tih lah chuan dar 7 vel thleng pawha a len theih thuin min chhang a, "Chutiang anih te chuan chaw ei nghal mai la" ka ti erawh min hnial ve tlat lawi a, a nu chawei chhuahsan a hreh anih ringin ka sawm lui ta lo.

Customer an tlem bawk nen inkhar hma ka rawt a, kan dawr shutter hi a sak deuh avangin ka inkhar dawn hian u Muana ka ko ziah ṭhin a, chutia Awmpuia nena kan khar dun chu kan thawm a lo hria aniang an dawr kawngka aṭangin min lo thlek a, a rawn nui vur vur bawk. "Hawna a dang tawh em le aw?" a rawn tih chuan, "Dang teuh lo" tih pahin ka relhrum der a, "Member kan pung zawk aniang maw?" a la ti tak ṭalh a, mi hi an ngai khaw lo zo ta niberin ka hria, nakinah ka la hrilhfiah mai ang.

Awmpuia chuan Bike a lo keng a, a motor chu a driver-in a kawl a ni awm e. Chaw ei a tum lo bawka tiin chawhmeh pawh ka lei haw duh lem lo a, eirawng bawl hran pawh a ngaih ka ring lo. Haw pah chuan a nu chanchin ka zawt a, "Tunlai chu a damṭha ve rih, Bawiha a ngai deuh a, vawiin pawh a lung a leng aniang mi a rawn phone zing khawp mai" a tih chuan ngaihtuahnaah thil dang a lo lut a, Awmpuia nu chuan min lawm lo angem aw tiin ngaihtuahna ka nei, kan hetih takah phei chuan a mitmei ka ven thiam viau a ngaiin ka hria.

"Ka chanchin i hrilh ṭhin em?" ka ti phawng a, an sawidun ngei ka ring.

"Hrilh ve vek e"

"Engtin nge a chhan che"

"Sawi vak pawh a nei lo, a hre sa che a, sawisel a neih loh danah a pawm che anih ka ring" a ti leh mai a, rilru erawh a nuam zan lo, a tupa lah a monuin a hawpui daih mai si a, min huat phah ang tih mawlh ka hlau.

In kan thlen chuan thingpui ka chhuang nghal a, "Ka inthlak lawk anga, a so hunah i lo off dawn nia" tiin pindan lamah ka luhsan a, ka va inthlak zung zung a, ka chhuah leh laichuan cabinet hawnga a lo thlek kual vel chu ka va hmu a, no a zawng anih ka ring.

"I hmu em?" a rawn lehhawi vut a, "Maida ka hmu a, eng nge i siam ṭhin?" a lo ti khauh a, Thantei pite awmlaia an lei kha a ni.

"Paratha" ka tih chuan, "Jelebi i ei chak em?" a ti leh reuh a, ka ei lohna a rei viau tawh.

"Min siamsak dawn em ni?" a bu nghat a, ka lo phur nasa, "Siam la, i siam ka ei lohna a rei tawh e, i la siam thiam ang maw?" a lam pan pah chuan ka ti a.

"Ka siam lohna a rei ve tawh, ka la thiam turah ngai ang, Dhoi leh elaichi awm sela ṭha tur" a ti bul bul a, "Ka zuk lei ange" tih paha kal nghal mai ka tum chu ka banah min lo vuan a, a lamah min pawt let rawp a, cabinet ngheng chuan kan indinchilh ran mai a, a rawn kun hniam chu phawk fein ka lo en bawk.

"I va hmanhmawh ve, Jelebi chauh chu em ni eichak i neih a?" awmze nei fea tih pahin a nui a, a mit chuan ka hmui a en tih ka hria, fiam ka chak tlat pek a, "Eizawh vek i phal dawn loh chuan ka tem vir lo zawk ang" tih leh nam ka rual a, a che sawn eih lo. Ka sir tawn tawnah chuan a kut a rawn nem khalh a, a rawn kun hnai leh sauh a.

"Ka phal maithei asin" tih pah chuan ka hmui bulah a rawn thaw lum ham ham a, thinphu a rang nghal dup dup mai. 

"Jelebi aipawn a thlum zawk maithei ania" ka hmui a rawn tawi thuak a, mit ka chhing ringawt, thaw lak a tawi mat mai a, a taksain min rawn tawh rualte chuan ka sa pup pup maiin ka hria.

Min fawh mai loh vang chuan ka han meng leh rih a, hnai lutuk tak maiah hian chiang fahranin min lo en a, a hmelah chuan lungawi hliah hliah hmel a lang. Ka lai deuh chuan a awmah ka chum dawt a, "A tlai chak ania, dawrah chuan ka zuk kal...." ka sawi zo hman lo ka hmui a rawn khar hmiah mai. Ka ṭawng tawp rual chuan ka thawlak pawh a tawp chawpchilh a, engkim chu a muang siai siai a, khawvel chu a chawl ṭhuap mai hian a hriat a, tuichhunga pil riai riai hi ka inchan.

Thawklehkhatah min chawikang lawp a, rang deuhin a kawngah ka lo kherhbet ve a, khawilam nge min panpui a tum pawh ka hre lo, min fawhna a chawl lo va, a duhthawhin dawnsawn a nuam viau bawk. Dawhkana min nghah rual chuan thawk kan han la dun halh a, kan inhlat rei lo kher mai. A vawi hnihnaah chuan ka chhang let ve tawh a, a tawpna atan ti nimai awmin kan am dun a, a tawpna atan erawh kan phal lo ve ve thung ang, mumang pawha kan la man ṭhat ngam loh hunah kan cheng miau a ni.

Ka kut a rawn bana, a awm chu min deh tirin ka hmui bulah a nui ri dat a, a lung phu dat dat chu ka hre thei. "I bulah chiah hetiang hian a awm ṭhin, nunna i pe leh ni maiin ka hria" zawi deuh ruih hian a ti a, a thil sawi chuan lung a ti awi ve hliah hliah. A hmui huh deuh hliam chu ka han tuai sak a, ka kut chu lo chelhin a fawp vang vang a.

"Ka infawh hmasak ber kha i la hria em?" ka tih chuan mawi fahran hian min nuih a, a hre chiang a ni.

"Classroom-ah i lo lut a, keimah chiahin tlar hmasa berah ka lo ṭhu anih kha, i ṭhutna tur ka lo kian che a, chuan..." a lo sawi zawm a.

"I zawhna chhang loin ka fawp che a...min an lo kal vangin rei lote chauh ka fawp hman che anih kha" ka nui hak a, kei aiin a lo hrechiang mah zawk.

"Nilengin ka ngaihtuah reng phah" ka kut fawh leh pah chuan, "Keipawn" a ti zawi sup a.

"Star tu che an tam si a, khami ni aṭang khan ka bialpa i ni nghet ta chiah a, ka hlimzia kha i hrethiam ve lo ang, hmeichhe dangte star rawn khan min fawp ania" ka tih chuan lu a thing nghat a, "Khami ni aṭang khan i hmangaihna salah ka tang tih i hria em?" a tih chuan chhan dan ka thiam lo, ka duh ang em em khan min duh let ve ka ring ngai lo a, chan hlau reng rengin ka awm ṭhin anih kha. 

"Kan damchhungin awmdun tawh ang aw, buaina awm tawh loin, break emaw khaihlak awm tawh lo sela.." lu ka lo bu ve sawk sawk a, chutah ka tukkhumah rawn dawmin min fawp leh vawng vawng a, kan infawh hmasak bera ka hlimna nen khan a danglam lo maithei; mahse, kan inthlakhlelhna chuan dil belh tam tak a nei a, infawh chauh chuan a phuhru zo lo a ni ber. Tisa thilin ngaihtuahna a chawk tho a, kan taksa inhip tawnna chuan kan vel boruak thlengin a thunun a, kan kalthui ṭhelh a ni.

"Muangchangin, ngaihtuahna fimtak nen bul ṭan ang aw, inchhirna emaw, pawi kan tih vawng vawng tur thil engmah ti lo ila, vawiin chauh hun kan nei dawn hleinem, damchhungin inhmangaih ka tum dawn nia" ti a ka sawmna chu min pawmpui khawp mai, kan insum dun a, kan inhrethiam dun hle bawk a ni.

Dawra ka kal chhungin maida a lo chawkkawi a, ka han let leh chuan a lo che buai khawp mai a. Hman aṭang tawh khan buai deuha a che lai hi hmuhnawm ka ti ṭhin, a chetna dawhkan bulah ṭhuin khabe dawm meuh hian ka thlir a, a khat tawkin min lo melh a, a nui suk suk zel a, hmuh a nuam thlawt. A pianthiamna leh a hmelṭhatna aia min hiptu chu a zia mawlh hi a ni, a nun tlawm takte, a mize damdap rengte, heng a nui hmela a chhungril ṭhatna lang ṭhinte hi a ni ka luanliam pui ṭhin chu.

Mitmei ven tur awm ta lo chu kan indah zalen ve khawpa, a khat tawkin kan hmui a insi leh ṭhin bawk a, pahnihte chauh a awm e ti lo vin midang kan ngai bik lo. Ka rin aiin jelebi siam chhung chu a lo rei a, a siam zawh meuh chuan dar 7 a ri dawn thuak tawh a, a phone pawh a ri zing malh malh viau tawh. "Lo chhang la" a tih lah chuan ka ngam der lo a, a nu a ni bawk si a, ka be ngam tlat lo a ni.

"I hlau em ni, a hma pawn i biak tawh kha"  a tih chuan, "A zahawm em alawm, i nupui nen in inṭhenna a la rei si lo a, nang pawn la sawipui vak rih suh" ka ti teh thlawt a, chutih laia a phone lo ri chu chhangin "Ka lo haw dawn chiah e, min lo nghak kher duh a,  ka tlai dawn ka ti sa vek si a" a ti bul bul a, a nu chuan engthil emaw a lo chah aniang, "Ka rawn lam kawi dawn nia, ka lo thleng har lo ang" a tih hnuah phone chu a dah a, Jelebi ka lo eilai a hmuh chuan a rawn pen phei hlawk hlawk a, min chuhsak a tum emaw ka tih laiin ka biangah a lo chuk zauh a, a apron hren lai a phel sawk sawk mai.

"I kal nghal dawn maw?"

"Aw, ka nuin chaweiah min lo la nghak a" 

"Amah chiahin em ni a awm?"

"Kan nula nen"

"Anih chuan va phei mai rawh, naktukah i lo leng angem?" min melh ralh a, "Zanah nge tlaiah?" a tih chuan ka hamhaih deuh.

"I duh hunah a ni mai, zan pawh a pawi lo, chhunah inkhawm ka tum a"

"Zanah chuan haw duh lo ta ila" ka nui hak a.

"I duh chuan i riak thei alawm, Thantei khum a awl" nui chungin ka kawngah a rawn kuah a.

"Mahnia ka mutna a rei viau tawh asin, ka hlauhawm mai thei a ni" 

"Ka hlauh che i ring em ni" ka nui hak hak a, a lo inla thutak run a, a uang tih erawh ka hria. "Ka ngaihtuah ang hi i ngaihtuah a ni si lo" a'n ti halh a, eng nge a ngaihtuah ka zawh chuan a sawi chiang duh lo a, "Engkim tihpui che ka duh" a tih thu chuan a hrilhfiah viau thung.

A haw hnu chuan ka inngaihtuah nasa khawp a, eng chen nge atan hian ka inhuam tiin ka inzawt bawk. Ṭhen tawh ngai lo tur leh a lak aṭanga hla tawh ngai lo turin rilru ka siam a, a duh engkim chu pek ka huam bawk a, a tan anih phawt chuan tu mitmei mah ka veng zo lo ang tih pawh ka chiang, hei chen hi kan thleng tawh a, inhnukdawk zawka ṭan chu ka tum lo hle tawh a ni.

Mahse, Chawlhni zana a lo kal chu a lo thlen hnu lawkah a phone a ri a, a nupui hlui hnen aṭang a ni, speaker a on avangin lehlam ṭawng chu ka hre pha ve vek a, Juni chuan a fapa damloh thu rawn sawiin hmanhmawh taka an ina kal turin a lo hrilh a, ka dan theih lah a ni lo. "Chanchin ka lo hrilh ang che, ka hruai haw nghal maithei" a tih vang chuan kawt thlengin ka zuk thlah a, inah ka let leh hnuah Thantei'n min lo call bawk.

"Ka ṭhian pakhat China-a zin a lo haw a, Mc-ah khan ka thil chah min han lam sak lawk ta che, dawr a hawng tlai deuh ṭhin a, tlaiah i inkhar hnuah emaw i kal dawn nia" a lo ti zung zung a, eng eng emaw kan sawi luam hnuah Awmpuia chungchangte kan sawi zui a, kan chanchin ka han hrilh chuan a rilru a buai ve nak a. "Karah fate an awm tawh hi chuan neuh neuh hi a tam ṭhin a, mihrang ang hmiaha awm hi a theih tak tak loh, an nu khan a fapa chhuanlamin a tibuai zel duh ang, a kawl tlat chhan pawh kha anih ka ring, in inkar a ṭhat loh hlek chuan Awmpuia khan a pan leh duh mai loang tih pawh a hriat loh a nia" a ti zui luam a, a thilsawi chuan ngaihtuahna a ti thui khawp mai; mahse, hlauhthawnna erawh ka nei lo, hlimna hi a malte tea chhiar ka duh a, ka tawn chhun te pawh hi a rei emaw, rei lo emaw an hlu em em vek a ni. Awmpuia nena kan hun neih dun ang ang te pawh hi am tak leh a hlu thei ang bera hman liam ka duh a, beisei neih san loh hi a hahdamthlak ber bawkin ka hria.

Zingah chanchin min lo hrilh chauh a, Caleba chu a hritlang deuh a, ngaihtuahawm a nih loh thute a lo sawi a, a nu te lamin hruai haw an la phalsak lo a ni awm e. A piin a ngaih vanga a len phei tur thu min hrilh bawk a, ka awm nawm loh a hlau aniang, "I rilru ti hah suh aw, harsatna engmah a awm lo ania" tiin min hrilh leh thlap a, lung a awi ve em em mai a ni.

A office bang pawh a lo peng ve leh zawk a, eitur tuihnai deuh deuh hi min lo ken sak a, Caleba eitur a lei tel avangin a va tlawh kawi dawn bawk a, ka bulah pawh a zep lem lo. "Hruai haw ka duh si a, ngaih loh lamah i ngai lo aniang chu, ka hruai haw thei anih chuan kan pahnih inkar chauh hi chinfel ngai a awm tawh ang" inthlahrung deuh hian a ti a, keichuan ka laka inthlahrung lo tur leh sawi hreh pawh nei lo turin ka lo hrilh ve mawlh mawlh a, tun hma anga thikthu han pek chhiat viau kha ka rilru a ni tawh lo a ni. 

Awmpuia nena kan inkarah chuan inhriatthiamna thuktak a awm a, kan hun paltlang zawng zawngte khan hetiang rilru hi min neih tir a nih ka ring, kan harsatna sawi dunin a chinfel dan pawh kan ngaihtuah dun mai a, thuruk leh zep a awm tawh lo,  inhmangaih dan kan thiam tawh a, a tih lan kawngah pawh tun hma ngaihtuah chuan a danglam viau tawh.

A haw hnu rei lo teah keipawh ka inkhar a, Thantei thil lam turin MC lamah ka chho zui a, Brendai dawra pen a rem em avangin ka call a, ani lah chu chhawng chung lamah daih a lo awm a, "Lo kal ngei ngei rawh, inhmuh lohna a rei tawh" a lo ti chuk chuk a, ka kal tlai bawk nen dawr ṭhenkhat chu an lo inkhar ṭan tawh.

Chhawng chunga ka chho chu Brendai dawr ka thleng phei ṭep tiha min ko ri niawm tak hi ka hria a, ka lehhawi chuan tumah min ko awm chu ka hmu lo. Dawrah chuan ka va lut a, mi pali nga vel hian pheikhawk an lo en a, Brendai pawh a lo phar buai khawp mai. Ṭhutna tur min lo kawhhmuh vat a, customer ten an lo biak buai avangin kan inbe zawm lo; mahse, ka han ṭhu tur chu tu emaw hmanhmawh deuha rawn tlan lut vang chuan ka ding leh zawt a, beisei loh lutukin Benjamina hmel ka hmu hlawl mai.

Phawk lutukin kan inmelh a, ani lah chu a hah hmel nasa mai, min en chungin a awm a dawm a, "I nih ka ring reng a" tih chiah a sawi, thawk a la hluam hluam a, sawi mai tur pawh minti hre lo. Ṭawng ka tum laitak chuan midang thawm ka hria a, hmeichhia a ni, "I hmu hman em?" a lo tih rualin Rosalyni hmel a rawn lang ve zat a, ka hmel a hmuh chuan kei aimahin a hrilhhai hmel zawk a, ka hrethiam zan lo, min lo zawng an angin ka hria.

"Kan va inhmu khat ve, i dam maw?" Rosalyni'n a tih chuan, "Dam ṭha e, nangni zawk" hamhaih angreng deuh chuan ka ti a, Bena bawk chu ka en leh ṭhin. Chutih laia "In in thleng daih tawh ang chu tih laiin, in lo la awm reng a ni maw" Brendai'n a lo tih chuan Benja chu a lo pawr khawp a, "Mawli, ka chah ve mawlh mawlh che kha, a lo kal tih te chu rawn sawi ve awm alawm" a lo ti hlur a, hmeichhe pahnihte chu inmelhin an nui ru tet tet mai. 

"Nichina min au tu te kha in ni em?" ka lo tih chuan Rosalyni'n min lo chhang vat a, chhawng hnuai aṭangin ka kal phei lai kha min lo hmu a ni awm e. 

Ka en reng laichuan Benjamina chu a inher vut a, kawngka bulah dingin, "A lum lutuk" tih leh kal chhuah a rual a, min la be miah lo. A awmdan chu ka hrethiam lo khawp a, ka va thlek ve ngial bawk a, pawn kawngka zawn maiah chuan min hnungchhawn zawngin a ding a, a kawr hak laiin a inzap hluau hluau mai. 

"A lai e law.." Brendai'n a tih chuan Rosalyni a lo bu zauh a, a va buaithlak ṭhin, engtia tih chi nge mawni.

"Ko lut rawh" nui chunga ka tih chuan an nu chu a kal vat a, pawnah chuan an va phun deuh bul bul a, "Ka lo lut dawn reng alawm" tih paha Benjamina kawr ha ṭha laichu ka lo en ve reng a, a rawn inher rual chuan ka lo nuih var var. "Eng nge i tih dawn a, inhmuh a va har ṭhin ve" tih pah chuan min kalpel a, ka hnung maia ṭhutthlengah chuan a ṭhu zui a, a la hah hmel ngang mai. Mahse, a lam ka hawi chu chiang deuh hian min lo en tawh a, min lo nuih let var var bawk.

"In platnet-ah ka lo zin zuai a" uangthuang zeta ka ti chu, "Khawnge i spaceship i dah" a lo ti leh var a, kan innuih ve ve.

"Naupang in lo hruai lo em ni?" an nu zawkin min lo chhang a, "Vawiin chu Ni Mami'n a hruaichhuak a, an inah chaw an einghala, kan lam haw ang" a lo ti zung zung a, "Pahnih maw in neih tawh" ka tih laiin, "I va hriat tam hmel e, i chungchang sawi ve vat zawk teh, khawi planet-ah maw i awm?" Benjamina'n a lo ti hluk hluka, kan han nui ho leh rih.

Customer te an chhuah hnu chuan titi na hunthawl kan nei ta a, ka chanchin chu a tawi thei ang berin ka hrilh hlawm a, khaw danga kan chhungte hnena ka awm thu leh Aizawla ka awm tawh thu te ka hrilh a, hetia dawt ka sawi ta mai hi thil ṭha zawk anih ka rin vang a ni. Benja dinhmun leh a nun hman mek dan ka hmuh hian ka chanchinte kha hre lo zawk sela ṭhain ka hria a, thil kal tawh anih na anga liam tir mai chu kan vaia tana ṭha berah ka ngai, chuti anih loh chuan a rilru ka ti na thar mai mai thei a, inthiam lohna a neih phei chu ka duh hauh lo, chuvangin hetianga min hriat hi a pawi lo zawkin ka hria.

Ka ṭhiannu nen dawr kan siam thu te ka han hrilh chuan min lawmpui ve khawp a, an nu zawk chuan zawhna min zawt siam siam a, "Remchangah ka lo dawr ang che u, khung laiah ka kal ngun nen, i awm tih hriata lo kal ṭhin tur ania" a ti ve malh malh a, amah zawk chu ka hmelhriat ṭha zawk emaw tih turin a awm a, hmeichhe fel tak a ni, a laka ka ṭhat ngai loh tehlul nen.

Khua a tlai deuh tawh avangin rei ka awm hman lo a, ka kal tur chu Benjamina'n min lo zui chhuakin pawnah kan han indinchilh leh rih a, chutia a fala kan awm takah chuan zawhna a lo pairuk aniang chu min zawt tawl a, kei leh Awmpuia chungchang a ni. "Kan inhmuh hnuhnung ber ṭum khan kan inhau deuh a, 'Hetiang dinhmuna Rintei a awm chhan hi nangmah i ni' min ti a, i chungah thil ṭha lo a thleng emaw ka ti a, i ṭhiante ka zawh lahin engmah min hrilh tur an nei ngai si lo a, ka ngaihtuah nasa ṭhin che ania, i dam ṭha reng reng em, i cher riauin ka hria" tiin min thlek deuh vang vang a, "Ka lehkha zir zawm loh chungchang vang aniang" tiin ka pehhel ve fan a.

"A ni maithei, nupui a nei ta bawk si a, chuvang pawh chu aniang" a ti zawi deuh sup a, "A nei leh tawh lo" ka lo ti chu min en phawk khawp mai.

"Eng nge i sawi chu a awmzia?"

"An inṭhen a"

"Chutia law, a va zia lo, ti ila.....in inbia em?" zawhna ngah deuh hian min melh a, lu ka buk rual chuan thaw huai hmel a pu.

"Min ngei em?" a ti leh daih a, ka nuih a za deuh.

"Engah nge ka ngei ang che, Brendai'n i chanchin min lo hrilh nual a, ka lawmpui lutuk zawk che ania, i nupui lah a fel si a, chhungkaw innghahna i ni tihte ka lo hria a...." min lo pawtchat vat a, "Nangpawh hlim ve rawh aw, Zawlpala nen emaw, tu nen pawh, hlim ve la ka duh ania" thutak deuh hian a ti a, a rilru dik tak a sawi ka ring.

"I nu boral thute pawh ka lo hria a, a pawi ka ti hle mai, a hun laiin engmah ka hre si lo va" inthlahrung ru taka ka tih chuan, "Kan inchelh rei zawk khawp asin" a lo ti halh a, a naute chanchin ka zawt zui a, a nau hmeichhia kha phaiah lehkhazirin a dah a, mipa zawk kha delhi-ah inkhelin a awm bawk a, an pa ber erawh Kulikawn lama an inah a cheng a, a dam ṭha viau tawh a ni awm e.

"Phone number min pe rawh, buaina emaw harsatna engpawh i neih chuan min hrilh dawn nia" a tih vangin number chu ka pe ve bawk. "A ṭulah chauh inbia ang aw" ka ti erawh a nuih a za khawp a, "Patling ka nih tawh hi" a ti ve ngei a, an nu ṭhutna lam hawi pah chuan, "Ka lo kaltir ṭhin dawn nia, lo kawm teh, a hlau deuh lehnghal che ania" a'n ti zui a, a engti zia nge mawni?

"I nei lo ang tih ka hlau ta riau" fiamthu titak deuha ka tih chuan, "Ani saw nei lo ta ila tun dinhmun hi ka thleng kher lo ang, ka thi daih tawh maithei a ni" a tih laia a hmelah chuan lungawina a lang a, chu chu ka hmuh duh dan tak pawh a ni. Ka kal tur chu, "Kan planet-ah i lo cheng ve tawh ang chu ti raw?" a rawn ti zui lauh a, ban vai meuhin ka lo nuih a, a nui hmel chu hmuh a nuam takzet.

Zana Awmpuia nen kan inbiak chuan chanchinte ka hrilh a, "Be tam lo la ka duh" a rawn ti tawl a, sawipui vak theih pawh a ni lo. Caleba chungchang ka zawhna chu, "Ka la hruai haw thei lo, a pi lah hian a sawi reng a, a buaithlak khawp mai" a ti vang vang a, amah lah chu a damsam lo nge mawni a aw a zuai riau a, a hritlang dawn a ni maithei vawt a tih thu te a sawi a, a khur a khur a ni awm e.

Zinga ka biak leh chuan hna a kal loh tur thu leh a khua a sik thu a rawn sawi a, chaw pawh a ei peih lo. Chhunah pawh rawn len a duh viau a, a tho peih ngang lo a, thil ei tur leh damdawi ei turin ka lo chah ve mawlh mawlh. A nuin hritlang damdawi a eitir thu a rawn sawi a, amah chuan ka hritlang lo a ti thunga, a ngaihna ka hre chiah lo a ni. Mahse, ka haw dawna ka va biak leh chuan a pum lam a nawm loh thu a rawn sawi a, thil a ei loh vang a nih ka ring.

"Thil eng emaw tal ei teh, ral aṭang chuan tih theih a vang bawk si, ka rilru i ti hah em mai" ka va ti leh ngawt ṭhin a, a ei nge ei lo pawh ka hre chuang lo. Chumi zan chuan current a thim hmiah a, phone ka charge loh vangin ka batry lah chu a zo a, a thi hmiah mai bawk a, ngaihtuah a na duh viau a ni. 

A tuk zingkara ka va biak chuan a nuin phone a lo chhang a, Awmpuia chu nizan zankhua khan a pum a na a, damdawiinah an lo luhpui hi a lo ni a, a nu chuan, "Vawiinah an zai dawn a, a kalah lungte a lo awm leh alawm mawle" tiin damdawiina an awm mek thu a rawn sawi a, chaw pawh ei tawh lo chuan ka insiam zung zung a, damdawiin lam chu ka pan bawk.

Mahse, ka han thlen chuan a luh theih loh a, a nu bawk chu be lehin an zai hun tur ka zawt a, "Chawhnu lamah aniang, a thawhpui te pawh an haw leh rih a, an zai hun tur darzat hi a la hriat theih loh" tiin min lo chhang a, an zai dawna min hrilh turin ka chah ve ringawt mai. Dawr ka thlen hnu thleng chuan ngaihtuahna a peng lo a, a khat tawkin phone chu ka en leh ṭhin.

Dar 1 bawrah Noeli'n ka message a lo chhang a, damdawiin a thlen tawh thu leh an zai ṭep tawh thu te min lo hrilh a; mahse, "Juni te chhung an awm, lo kal duh suh, chanchin ka lo hrilh ang che" a tih vang chuan ka hnual leh rawih rawih.

Engpawh nise helai aṭanga chanchin ngaihven ringawt aiah tiin damdawiin lam chu ka pan ta tho a, ka lut em lo anih pawhin pawnah tal han awm ka duh a ni. Kal pahin Noeli chu ka call a, damdawiin thlang deuhah min lo nghak a, "Pawnah an awm vek ania, i kal ṭalh duh em ni, duh leh an haw hnuah te hmu zawk la" a tih vang chuan ka chho hreh ve leh deuh a, rilru erawh a dam lo khawp.

Darkar khat dawn chu an zaiin ka hria, Peka te pawh an awm tih ka hria a, an hmel ka hmu lo thung. Peka chuan Noeli a lo bia a, an zai hlawhtlin thu leh amah Awmpuia pawh a harh thu te a lo sawi a, cabin-ah an awm mek a ni awm e. Noeli chuan, "I dawrah let ila, tlaiah kan kal dawn nia" a ti leh tlat a, a hmel hmu loa let leh chu hrehawm duh tak a ni; mahse, an zai hlawhtlinga, eng em a ti lo ang tiin ka inhnem a, tlaiah tal chuan han hmuh ka tum thung.

Dawr kan thlen hnu rei vak loah Phone call ka dawng a, number hriat loh hnen aṭangin a ni. Bena emaw a nupui anih ringin call chu ka chhang a; mahse, ka beisei loh lutukin min lo chhang a, "I lo hria maw" a rawn tih phat aṭang chuan tunge anih ka hre nghal a, Juni a ni.

"Eng nge i sawi duh a?" lawm lo fea ka tih chuan, "An zai tihte i hre ve lo em ni, ngaihsak leh chuang tawp si lo, hmangaih ber angin i khawsa vel a, tenawm lutuk" a rawn ti bawrh bawrh a, an haw tawh aniang chu thawm dang ka hre lem lo. 

"Ka ngaihsak leh ngaihsak loh i hre lo e, kei min rawn hrilh a ngai lo" ka ti let ve hlak a, a rawn pawr leh khawp mai, a thil sawi chuan ka thin a khei zak a, ka bulah awm hnai sela chu kut ka thawh duh hial ang. "Uire a tluan theih loh, natna emaw chhiatnain a zui ngei ngei ṭhin, Lalawmpuia pawn a tawrh phah anih hi" a ti pek a, ka thinrim lutuk chu ka sa pup pup thei.

"I pasal hi enkawl ṭha nila chuan in nunah hian ka rawn tel leh tawh lo ang tih hre tawp rawh, heti khawpa nun hrehawm hi i lo siam sak a, i kianga a hlim loh reng aichuan tiin ka let mai a ni, in inṭhen chhan ka ni lo tih hre bawk ang che, Kum nga chhung zeta a hmangaihna i hlawh chhuak zo lo te hi inenfiah zawk teh" ka ti bawrh bawrh a, ka thinrim em a, ṭawngkam mawi leh sawi awm leh awm loh lam pawh ka thlu tawh lo. Noeli lah chuan, "Ti let hrep rawh" a lo ti ve sek a, chutih laiin lehlama mi chuan, "In tluang chuang lo ang, in damchhungin intluang ngai lo ang tih hre rawh" a la rawn ti tan tan a, ka biak zel chuan thin a ur zual mai mai tiin phone chu ka dah hmak a, a number chu ka block zui bawk.

Inkan hun awmah Noeli chu Awmpuia nu ka call tir a, tute nge awm a han zawh chuan Peka leh Awmpuia thawhpui te an la awm a, "Lo kal rawh u" a tih vangin kan inkhar sawk sawk a, kal pahin thei tui leh chhang te kan lei bawk a, kan han thlen chuan Awmpuia thawhpui te an lo haw chiah a, Peka leh Awmpuia nu chiah an lo awm tawh. Awmpuia chu a lo muhil mek a, a nu chuan min lo lawm thiam khawp mai, ṭhutna te min lo kawhhmuh zung zung a, ngaihtuahawm a nih loh thute a sawi a, rilru pawh a nuam ve deuh huai a ni.

A khat tawk hian a rawn harh leh ṭhin a, a nain a ti harh a ni ber, min hmuh chuan, "Ka ṭha ania, min ngaihtuah suh" a ti nuah nuah a, a meng hleithei meuh lo. In kan hun a zawh thleng chuan kan ṭhutpui a, Peka te nen pawh kan titi ve luam mai. Ani chu school-ah a lo thawk a, private school lian ve tawk takah political science teacher a ni a, a awmna veng pawh a lo sawn tawh. Kan haw tur pawh min thlah thlap a, number te pawh kan inpe ve nghe nghe.

Damdawiina an awm chhung chuan nitin ka han tlawh a, ka beisei aidaihin a nu chuan min dawngsawng ṭha a, ka han thlen tawh hi chuan chanchinte min lo hrilh siam siam ṭhin, Awmpuia thung chuan, "I buai kha, lo kal fo duh suh" a ti mai zel a, a thawhpui leh a hmelhriat ṭha ten an ngaihtuah bawk a, eitur leh kanna thil a dawng hnem ṭhin khawp a, kan tu pawh a nei hrawl viau zel.  Juni te lam pawn an tlawh zing viau anih hmel, inhmuh ka duh loh vangin ka kal dawn hi chuan a phone lawk a, tute nge awm ka han zawt kher zel a, mi awm loh lai ka chang a ni ber ang chu.

Kar khat dawn an awm hnuah an inla chhuak a, an in lamah erawh vawihnih chauh ka kal a, a ṭha chak angreng bawk nen amah zawk hi lo chhuah a tum ut ut zel a, ka la khap ve ṭang ṭang thung. Thantei lo haw lah chuan bungrua a rawn hawn ṭeuh a, kan buai ta bawk nen tlawhna hun pawh ka nei thei ta lo a, phone-ah erawh kan inbe zing khawp mai. Min ngai ngawih ngawih reng a, sawi tur vak a hre lo chung pawhin ka aw ngaihthlak a duh a, customer ka buaipui laite hi phone aṭangin a lo ngaithla reng zel a, phone bill chawi hun lai kha chu nisela bill a sang duh viau ang, ngawi reng hian rei tak tak kan inbe ṭhin, dah a phal ngai lo miau a.

Inhmangaihte hringnunah hian buaina chingchivet leh harsatna paltlang tur a tam poh leh an inhmangaihna a zual sauh ṭhin an ti a, chutiang chiah chu Awmpuia nena kan nih dan a ni, nitin hian kan inhmangaih zual niin ka hria, keipawn a aw ka hriat loh chuan ka ngai a, min biak loh karin ka ngaihtuah veng veng a, lungngaihna inṭawmin hlimnaah pawh kan lung a rual ṭhin. A han dam chho chu min thlahlel zual emaw tih tur a ni, "A tam thei ang ber i bula hun hman ka duh" a ti mauh mai a, chu tluka thlakhlelh chu a nei bik lo. Kar tawpah a lo leng a, a office bang hian min lo tlawh kawi ziah bawk a, a inah pawh chaw ka va ei ve tawh nghe nghe.

Chumi ṭuma a nu nen kan inkawm chuan thurawn te min lo pe a, "Hmingchhiatna awm lo thei ang berin awm tum rawh u, an inṭhenna a la rei si lo a, inneih lam in lo sawi tawh anih pawhin kumte a vei hma chu engmah ti lo zawk ula a ṭha ang, pawn lama inzui aichuan inah te inlen chilh ula a pawi lo zawk" tiin hmanhmawh lo turin min hrilh ve malh malh a, ka duhdan ve chiah pawh a ni. Awmpuia pawn inneih a sawi zauh zauh tawh a, mi a nawr lo nain a nghakhlelh viau tawh.

Thantei thung chuan, "Nei hmiah rawh, inṭhen leh palh a hlauhawm, an nu hlui sawn buaina te a rawn siam leh zawk ang nei vat la a ṭha" a ti hmiah mai a, Juni hian a tlawh zeuh zeuh a, Awmpuia nuin Caleba hmuh a chak vangin a va hruai ṭhin a ni awm e. Awmpuia hian a zep ngai lem lo a, kan inkar vang chauha hlauhthawng lo ka ni, min hmangaih tih ka chiang tlat a, Thantei min hlauhthawn pui ang kha chu hlauhna ka nei ve ngai lo.

Mahse, ṭum khat ka dawr kal tur chu a ṭhiante dawr a sawi kha a ni maithei, kan dawr thlen hma deuh kawiah min lo chang a, ka kawng kal lai min lo pawt ding a ni ber. "Awmpuia nu i lo va tlawn ṭhin a ni maw, i zak lo ve ngawt mai" a lo ti khar khar a, "I lo buai ve a ngai lo" ti a kalsan mai ka tum chu, "Ka damchhung hi chuan i lawi lut lo ang tih hria ang che, i bialpa hi a fapa tel loin a awm thei lo, ka duh hun hunah ka lut leh thei ania" min tih khum leh sak a, duh duh huna lut leh thei anga a insawi chu awih lo sateh mahila ka huat tawk a tling khawp.

"Nang chu i lut lo ang, Caleba pawh a laksak vat dawn che, i lo en dawn nia" ka ti let ve ngat a, a thinrim lutuk chu a khur deuh hlak hlak a, a kutzungchala min kawkin, "Zawngi hre rawh, ka fapa hian nang ang nuhrawn hi a nei lo ang, fimkhur ang che, i la hre khawp ang" a ti chher chher a, kawngkal hoin min en hrek hrek avangin ka ding rei duh lo, hmanhmawh deuhin ka kalsan a, dawr ka thlen hnuah ka inngaihtuah buai hle bawk. Caleba vanga lut leh thei anga a insawi mawlh kha a ni, a hnena Caleba a awm chhung chu he nu hi kan thingthla thei dawn loin ka hria, Awmpuia hi chuan lak a tum khawp a; mahse, kan mihring nu hian eng nge a tih duh ang ka hre tlat lo, tih hreh lah a nei der si lo a.

Chumi tlaia Awmpuia lo kal chu Caleba chhuhsak turin ka lo nawr ringawt mai a, "A   nu awm loh hlanin va la mai rawh" tiin ka hrilh nghe nghe. "Ka nu hian a ruka lak hi a duh vak lo a, kan hmuh chak hunah kan hmu thei tho bawk a, han nghah deuh pawh pawi ka ti lo asin" a ti chung pawh chuan, "Juni hian rawn hnaih nan che a hmang mai mai, a la zar buai reng che hi, a duh hun huna a fapa chhuanlama a ko kal che hi ka duh lo" ka ti ve tlat a, a fapa hruai tur leh dah tura Juni te ina a kal chang pawh a tam, a hma khan ka lo ṭha en mai mai a, hetiang reng chu a fuh dawn loin ka hre tawh a ni.

A tuk chu Inrinni a ni a, Thantei nen counter-a kan lo titi mawlh mawlh laiin Rosalyni a rawn lang hlawl a, amah chauhin a ni. "Chawhmeh bazar pahin ka lo tlawh che" nui var var hian a rawn ti lut a, kan thawmhnaw khai te chu a enkual a, a chhuah khat thu leh a buai ṭhin thute sawiin a ṭawng barh barh mai. Fitting room-a a awm laichuan Thantei'n tunge a nih min lo zawt a, ka han hrilh chuan a ner nasa khawp a, Rosalyni lo chhuak leh pawh chu a lo melh rum titih.

Kawr chu pathum lai min dawr a, a kal dawn chuan, "Remchangah chaw lo ei rawh aw, amah ka rawn sawm tir ang che" a ti mauh mai a, thil tih chi pawh a ni dawn em mawni; mahse, "Kan la ei ho dawn nia" tiin ka chhang ve tho a, rei pawh awm loin a chhuak leh thuai bawk. Thantei chuan, "Buaina dang a hnai leh e" tiin min fiam zuk zuk a, an ni nena buaina neih chu ka inring lem lo, Rosalyni kha Juniperi ang a ni tlat lo a, ka hriat loha buaina an neih pawh ka ring lo a ni.

Dar 3 a pel zawt chauh ang tihah Awmpuia a lo thleng a, Caleba a rawn pawm lut ka hmuh chuan makti fein ka lo en a, "A piin min hruai tir" tih chiah a sawi, a fapa lah chu mu tho hlim tih hriat takin a ngui deuh lup a, a pa awmah a bei chial bawk a, ka han pawm tur te chu a zawi reuh khawp mai. "A ril a ṭam mai thei" a tih vangin thingpuiah chhang ka chiah sak a, a lo ṭam viau aniang barh a nuam khawp a, mi duh loh pawh a nei lo.

"I hruai haw tak tak dawn em ni?" ti a Awmpuia ka zawh chuan, "Ni mai ang chu, a nu awm loh laiin ka va la tawp" awlsam zet hian a ti a, Juni'n a hriat hunah chuan a sa khawp ang le.

"In in nufa dawn riau, in hmel te pawh a in ang deuh alawm kha" Thantei'n a ti chu kan nuihpui hak hak a, kan naute chuan mut a kham vak lo ni tur a ni ka awm nghengin a ṭhu hle hle a, thil a ei pah chuan mit a chhing leh siar siar ṭhin. "Ka'n paw mu ange" ka tih chuan an nuih a han za khawp a; mahse, an rin aiin ka paw muhil hma a, an len chhung zawng chu ka pua a ni ber. 

A harh hnuah chuan rei pawh awm tawh loin min haw san a, hmangaih ber te fa chu ngainat pawh a lo awl khawp mai, ka kut zala awm tur anga han ngaihtuah phei chuan a phurawm ve riau a, ka duat ngawt ang tiin duhthu te ka sam thul, ka zahtheih loh zia chu aw, a nu nih ka chak, ka tlin angem tih lam chu ka hre lo, mahse ka chak miau si a ni.

Kan haw tlai deuh avangin chaw kan ei tlai a, kan inpeih fel chuan dar 8 a lo ri fel der tawh. Awmpuia chu a reh deuh veng veng a, a fapa a la phei bawk si a a buai anih te ka ring. Ka mut tur thu message-a ka va hrilh chuan min lo call vat a, "Juni a lo kal a, Bawiha rawn lak a tum a, ka nu nen an inchuh nasa alawm" a rawn ti ta mai a, ka lo hlauthawng hman khawp mai.

"Chuan a hruai haw leh em ni?" hlauthawng ru fe a ka tih chuan, "Hruai haw lo e, Caleba'n a pi a ngen nasa a, kan inhnar haw thei hram, zanin chu hei ka bulah a mu dawn a, a muhil deuh chiah" a ti a, a ṭawng zawi angreng hle bawk. "I en deuh sek dawn a ni maw, i muhil thei angem aw?" ka ti fiamthu zui a, ani lah chuan, "Khum a zau teh ania, a sir lehlama i lo mut hun kan nghakhlel khawp mai" zei fahran hian a rawn ti a, ka lo nui ve hak hak.

Ka inbe rei angreng a, ka lo muthilh lai pawh ka hre lo, ka harh leh chuan zing dar 7 a lo pel tawh a, Thantei pawh a lo tho diam tawh. Chawlhni anih vangin chaw kan ei hma a, Thantei hian duhtawka insiam hman loh hi a hlau ṭhin a, heti hian uluk lutukin a insiam a, biak in thlen rualin a muthlu leh daih zel lawi a, a rawn harh leh hi chu a phak chhulh zel. Chawhma leh chawhnu ka inkhawm ve thlap a, zan lam erawh kan peih ta lo. 

Awmpuia'n inkhawm bana a lo len tur thu a rawn sawi a, sitting room-ah phone bih pahin ka lo nghak a, a bang har deuh aniang a lo thlen chuan dar 9 a ri hman der tawh. Thantei lah chuan, "Chance ka pe ang che u" tiin min mutsan hmak a, a khat tawkin pindan aṭang chuan min rawn be deuh reng thung a, a mut a la chhuak lo khawp aniang.

"In va ngawi rei ve, eng nge in tih a" fiamthua rawn tih te a ching a, kan nui kan nui mai.

Awmpuia chu ka malchungah a mu dar dar a, ka kut hum chungin a ti ti pah a, a nu nen inneih chungchang an sawi dan te min hrilh luam a. "Kum 2 tal nghak thei ula a tia, a rei mah mahin ka hria, kumin hi liam se, nakum kum tawp lamah chuan ti ve mai ila ka duh a, anih loh chuan fa neih ṭeuh te kan duh awm si a, kan nei tam hman lo thei tlat" fiamthu deuh hian a ti a, amah zawk chuan a thil sawi chu a lawm a, a nui leh ṭhin.

"Fa engzah nge i duh?" ka tih chuan, "Tam tak ka duh, hmeichhia leh mipa, a tlem berah pahnih ve ve tal" tiin a nui suk suk a.

"Anih chuan pathum ka hrin sak ang che, fanu pahnih leh fapa pakhat" ka tih chuan hrethiam lo deuh hmel a pu a.

"Caleba a awm a, mipa pahnih an nia nga, hmeichhia pahnih dang nen, Caleba anga naute hmelṭha" ka tih leh chuan ka kut chu a fawp vang vang a, duhthu sam vak vak hi ka lo bansan tawh a, Awmpuia nen erawh hmathlir a thui a, duhthu ka sam mawlh mawlh zel chu anih hi.

"Lo kun hnai teh" tih pahin ngaihawm fahran hian min melh a, ka zuk kun tur chiah chu a phone a lo rik avangin ka ṭhu tha leh vat thung. Phone chu a phawrh a, muangchangin a rawn ṭhu chhuak a, a chhang lai chu ka lo en ve reng bawk.

"Khawiah nge i awm?"

"Hruai lo turin ka ti che a ni lawm ni?" 

"Inbengdai teh, i rui zawk em mawni le?" a aw chu a vin hluk hluk a, tunge ka lo zawh chuan Speaker chu a on zui a, Screen-a Juni hming lang chu ka zuk hmu bawk.

"Ngaihdam pawh ka dil che a, ka insiam ṭha vek tawh ang ka ti mawlh mawlh a, i ngaihzawng i thlang zawk alawm ti raw, kei leh kan fapa hi chu min ngaihtuah tak tak lo, kan hlim pawh i duh lo" ti tu aw chu a ṭap anih loh vek chuan a rui a ni ngei ang.

"Khawiah nge Caleba, motor i khalh em ni?" Awmpuia aw chu a vin ṭha khawp mai, thinrimna aichuan hlauhthawnna a nei a ang bawk.

"Ka bulah hian a ṭhu, a nu uiresantu ṭawng pawh a ngaithla ve mek ania" a insut ri hraih a, "Motor kha tiding rawh" Awmpuia'n a tih ri chu chang ṭha fek fawk tak a ni.

"Aih, ka ti ding lo ang, ka thilsawi ngaithla rawh" a ngawi deuh vang vang a, motor tlan thawm bak chu thawm dang a awm lo.  

"Tunah chuan i dinhmun a lo sang tawh a, i duh duh i nei thei tawh a, i tana awm reng ṭhin pawh i theihnghilh tawh a nih kha, kan inhriattirha i nundan kha i la hria em, i khawhar ka hnem che a, depression vanga i indawm kun lai zawng zawng pawhin i bulah ka awm a, ka theih tawkin tih hlim che ka tum ṭhin, min duh lo tih hre chungin ka nei che a, i damloh leh i bawrhsawm laipawh khan keiman asin enkawl che, Lawngtlaiah i awm daih a, i awm loh laia i chhungte enkawltu kha tunge, keimah tho asin, fapa nangmah ang chiaha hmelṭha ka hrinsak che a, heng zawng zawng ka tihsak chung che hian phut pakhat chiah ka nei, min hmangaih ve theih mai ka lo ring a; mahse, min hmangaih ngai lo, kan pindan chhungrilah ngei pawh i thinlungin min phatsan anih kha" a ṭap zui hlawp hlawp a, a khat tawkin a khuh bawrh bawrh bawk a, Caleba ṭap riin a zui bawk.

"Lo bengchheng suh, muhil rawh" tiin a fapa chu a hrawk zui a, a awmdan chu a pangngai lo takzet, a rui niin ka hria.

"Juni, motor kha ti ding rawh, khawiah nge i awm sawi la ka lo kal ang" thlem awka zeta Awmpuia'n a tih chuan, "I rawn kal a ngai lo, ka fapa hi ka laklet tir lo ang che, kha mihurnu enkawl tur khan ka pe lo ang" a lo ti let hlur a, sawi tur a vang duh khawp mai.

"I fapa kha ngaihtuah rawh, naupang pawisawi lo anih kha, i hmangaih anih chuan...." lehlama mi chu a rawn nui hawk hawk a, a nui ri chu a rapawm lek lek.

"Juni....duhtawk la, Motor kha ti ding rawh" 

"Aih, ka duh lo, engkim ka pe che a; mahse, ka thil pek che aiin kha nu kha i thlang zawk a, tunah chuan ka pek zawng zawng che kha ka la let vek dawn, a vaiin ka la let ang" a ti bur mai a, a thil sawi awmzia chu ka hrechiang lutuka, hlauhthawnnain min fan chhuak vek.

"Ka tih palh, min ngaidam rawh, khawngaihin aw....Bawiha kha..." lehlam thawm chu a ri hrawk a, hmeichhe au ri leh naupang ṭap ri chu rei lo te chauh a ri a, thawm a ri dawt dawt a, chumi hnu chuan a reh tlawk tlawk tawh.

Eng nge thleng? Engtin nge an awm? 

Ka bula ṭhu chu ka melh a, a chhanna chu ka hmu chawpchilh a, a mittui luang te, ṭap hleithei loa thawk a la leh hawk ṭhin te, a taksa khur dawt dawtte chuan eng thil nge thleng chu a ti chiang khawp mai.

He hringnun hahthlak zet hi, engtikah nge heng tawrhna te hi a tawp ang le, thawklehkhatah kan beiseina a chuai a, kan khawvel, kan hmathlir, kan duhthusam zawng zawngte pawh mitkhap kar lekin min laksak leh ta si. Tuifawnin a thinurna a luanliam pui a, engkim a chim bo ta vek hi ka tehkhin ber. Kha zana thil thleng khan kan beiseina a liampui a ni mai lo, kan hlimna tur emaw kan tih ve, kan ban phak ve ni a kan ngaih, harsa chung chunga kan tum ve kha a thlawn mai a chantir a, chhungrila inthiam lohna leh indemna a khatin kan thinlungah ser a hnutchhiah a, kan tan hringnun parvul ve tur a awm ta lo.

Naute duhawm Caleb, he khawvel nunrawng takah hian vanduai turin i lo pianga, i nu leh pate inhmangaihna tizual tura Pathian thilpek i ni asin, i laka ka inthiam lohna te hi min hriatsak la ka van ti tehlul em, ni rei lote kan hringnuna i lo cham chhung khan ka ngaina che a, ka duhthusam puitling lote zinga i tel ve tur erawh hi chuan min ti na a ni; mahse maw, i tan chuan khawvel hi a nunrawng em a, he leiah chuan i nu leh pa hmangaihna pawh a hrang ve ve a i dawn a ngai si a, i kalna turah erawh he leia i tawn theih baka nasa hmangaihna i dawng ngei ang, naupangte hmangaihtu Isuan a lo kuangkuah che anga, natna leh hrehawm a awm tawh lo ang. Mahse, I pa hi engtin nge ka lo hrilhfiah dawn le, zankhuain a thlir ngawih ngawih che a, i thlarau chelhtu awm lo i sakruang chu pawmin a kuah vawng vawng che asin, a khawvel chu sunna hlain a awi a, i tel loin engtin nge a hlim theih tawh ang le, damchhunga a nun hrehawm tur hi ka dawn ṭhin a, ka ngai ngam mawlh lo a ni.

Kha naupang duhawm Caleba kha, rei lo te chauh ka kuah ve hman a, vawi khat chauh ka ṭangah pawmin ka awi mu ve hman a; mahse, amah ka hriatreng dan leh a laka ka inthiam lohna hi chuan damchhungin min chenchilh tawh dawn a ni. A fapa thihna avanga Awmpuia tawrhna chu keia hnem zawh rual a ni lo, a khehchhe lai chu ka thlir a, thlir ngawih ngawih bak chu tihsak thei ka nei lo. A nunphung a buai zo vek a, hei bak hian mihring hi an kehchhe thei dawn em ni ka ti vawng vawng, a eiin a mu thei lo a, a hna a bansan hmiah bawk.

An accident na lai kha Aizawl khaw pawn mai a ni a, Juni khan tum nei sa a kha hmun kha pan a ni, Caleba chu ka pawh chhawn loin a hmunah a boral a, a ruang chu apa'n mittui nen a kuah vawng vawng a, en har ka tihzia kha aw. Juni erawh thla khat dawn ICU ah thih sualin a awm a, a kar li naah chiah chiah a kal a, a chhungte chuan chetsual palh tiin an sawi bawka, thu dik hretu chu mi tlemte chauh kan ni. 

Kum tawp a hnai telh telh a, mi ṭhenkhat phei chu christmas hun atan dawr bungrua te lain an inbuatsaih ṭan tawh a, keini pahnih erawh kan tha a za lo a ni. Thantei pu a damlo a, a pi ngawtin a buapui chu Thantei'n a ngaihtuah ve si a, keilah Awmpuia'n rilru zawng zawng a la peng a, ina a tawm chawt reng te chuan ngaih a ti ṭha thei lo, hlauhthawnna ka nei tlat a, thil ṭha lo a tih mai te pawh ka hlau ṭhin.

Nikhat ka va kal chu a nuin min lo chhawn a, "A pindan lamah a awm, thil a siamin ka hria" tiin lut ve mai turin min lo hrilh a, pindan a khar loh vangin kawngka aṭang chuan ka va thlek a, lawng lem niawm tak hi a lo siam mawlh mawlh a, kawngkhar ka kik pawh chu a hre mai lo. Aw ka han thian kharh a, a lo hawi ve chiah bawk.

"Engthil nge i siam?" luh paha ka tih chuan, "Lawng puanzar tur chah che ka lo tum a" tih zawngin min chhang a, a bulah ṭhuin a thilsiam chu ka han thlek a, Awmpuia hi kut themthiam tak a ni.

"He lawng hmang hian tlanbo i tum em lo ang chu ti raw?" ka tih chuan, "A chakawm khawp mai" ti maiin min chhang a, awmzia eng emaw tak hi a neiin ka hria.

"I tlan boin engtin nge ka lo awm ang?" ka ti leh vat a, ka thutak viau bawk.

Ka zawhna chhang lo chuan a ngawi deuh vang vang a, rei dawn a ngawih hnuah, "Tlanbo na tur a awm lo, khawi lai hmun mah hi a nuam chuangin ka ring lo" a ti chuai raih a, ka melh vawng vawng mai.

"Rinte...." a tih chuan ka lo chhang rang khawp a, chutah min enin ka kut a rawn hmer vang vang a.

"Eng thil mah hian min ti phur zo lo a ni, i bulah chuan a zia ṭhin ngei a; mahse, i hrehawmna belhtu mai mai ka ni dawnin ka hria, i tan innghahna tlak pawh ka ni tawh lo, ka ngaihsak lo che tih ka inhre ve reng a, a har ka ti tlat si a, min hriatthiam ka ngai a ni" a ti zawi ruih a, a thilsawi awmzia chu ka hrechiang khawp mai. "Break i duh tihna a ni em?" ka lo tih chuan min en reng a, a duh tih ka hai lo.

"I duh anih phawt chuan sawi hreh suh, keichuan ka nghak thei che ania, hunte han liam deuh sela, a ziaawm veleh mai turah ngai ang aw, kan inkarah inthlahrunna tur a awm lo ania" tiin ka rilru diktak ka hrilh a, tunah hi chuan hmachhawp neih pawh har a ti ang, thawklakna hun ka pek a ngai tlat a ni.

"Ka hmangaih ta lo sawt che tihna a ni lo ania" a tih chuan ka bu sawk sawk a, chutah chuan rinhlelh ka nei lo, ka lakah hi chuan ngaihṭha tak leh lungmuang takin awm sela ka duh ber a ni.

Ka haw hma deuhin Noeli a lo thleng a, "La awm rawh, kan haw rual dawn nia" a tih vangin Awmpuia nu ho chuan sitting room ah kan ti ti a, Awmpuia nu chuan an khawlama haw rih a duh thu te a sawi a, "Helaiah chuan hriat chhuah tur a pui a tam si a, insak kan chawl rih bawk nen khi lama hawi khawthawn te pawh a ṭhain ka hria, chhungte leh ṭhiante zingah te pawh han tal ve leh sela, a khawhar te pawh an hnem deuhin ka ring" a ti sap sap a, Noeli nen kan lo thlawp khawp mai, Thingtlang boruak zang vek vawk han hip sela, ngaihtuahna fim pawh a nei thei zawkin ka ring.

Juni chungchang kan han sawi chuan thil thlen dan te pawh ka hre chiang zual a, Caleba a va hruai zan khan Awmpuia nu chu kohhran hmeichhe ho comittee naah a lo kal daih a, an awmpui nula hnen aṭangin Juni khan a lo va la a ni awm e. Phone call a Juni thil rawn sawite kha ka sawi ve mawlh mawlh a, an pawm lo khawp mai. Noeli phei chuan a lo helh riau a, "A suahsual vang chauh a ni, midangte awm ti nuam lo turin ṭawngkam a nei reng a, chenpui nuam a ni ngai lo, a pasal hi mizingah pawh a zah ngai chuang hleinem, an ina ka kal chang lahin a ṭawngkhum fek fek a, a hmusit hial tein ka hre ṭhin, an chhungkuain an puihna vang chauha hetiang dinhmun thleng anih thute hi a sawi duh zawng a ni ṭhin a, a pasal hi a tel loa engmah a nih lohzia hriattir a duh tlat zel, Rintei a lo lang te hi tlawmah a la a, a chaponain a hruai khaw lo a ni ber, Awmpuia hian a dawh thei a, rei deuh an cheng dun thei mai mai alawm, mi nupui nisela mak a tawhna a rei tawh ang" a ti bawrh bawrh a, han thinrim thar leh dan pawh ka thiam tawh lo, min sawp chau hneh lutuka, kei tak pawh chuan Break chu mamawh vein ka inhria, thaw a pik mah mah tlat.

October thlaah Awmpuia te nufa chu an khaw lamah an haw chho a, awm hlen tur an ni lo va, rei tak cham erawh an tum a, an kal tur pawh Noeli leh Peka te nen kan thlah ve nghe nghe. Ka bulah chuan heti hian a sawi a, "Kan inhmuh leh hma chu i rilru lo thlak lo la, rei ka rial lovang, i chanchin ngaihven pawh ka ṭulh dawn lo a, khawiah pawh awm ila ka ngaihtuahna chu i kiangah a awm reng dawn a nia" a ti a, a hmelah chuan a tih takzia a lang a, a aw riah a ngenna a lang bawk.

An kal aṭanga ni rei pawh a la liam lo tih ah hlauhthawn ruk ang ngeiin thil a lo thleng a, Thantei pu a ṭha lo zual a, a lung lam anih vangin Doctor ten phai lamah an refer a, pawisa a hautak dawn avangin kan dawr pawh chu tihralna kan dap chuk chuk a, man toa hralhna pawh kan nghak hman meuh lo. Chutia Thantei lehzel pawhin min liamsan tur chu rilru a hnual ve rawih a, kan khaw lamah ka haw mai dawn em mawni tiin ka inngaihtuah buai a, Awmpuia hnenah erawh engmah ka hrilh lem lo, a rilru tibuai zawnga awm loh hram dan ka zawng a, ani aichuan ka dinhmun chu a la ṭha fe zawkin ka hria.

Christmas hmang nghal tura kan khua a ka haw chu ka thlen hnu maiah Nunsangi'n min lo be hlawl a, Thantei'n ka chanchin a lo hrilh a ni awm e. "Kan awmna Home-ah khan Volunteer an la mamawh a sin, keichu ka kal dawn a, i lo kal ve duh em, Pi Thansiami kha a damṭha lo a, tunah chuan enkawltu dang an awm tawh, hmanni khan ka va tlawh a, a hmunhma pawh an lo chei ṭha nual tawh a, tih tur em em i neih loh chuan rawngbawlna angah ngaiin lo kal ve ta che" a rawn ti a, ka chhungte ka han rawn chuan beisei loh deuhin rem min tihsak a, aw ka pawh hmain Awmpuia ka han hrilh ve bawk.

Ani chuan, "I thu thu a ni mai, kum thar kan cham anga, insak lai kan laklawh bawk si a, ka lo tlawh thei nghal lo maithei che a ni" a lo ti dam thluam a, duh duh hunah a intlawh theih loh thu ka hrilh pawh chuan, "A theih veleh lo kal ka tum ang" a ti ve leh mai a, phone ka kawl thei lo tur erawh chuan a rilru a ti buai deuhin ka hria. "Ka awmna tur i hrechiang dawn tho a, i remchan hunah i lo kal tawp mai dawn nia" ka tih pawh chuan a la inngaihtuah buai khawp a, thutlukna kan siam fel hmaa sawi nawn leh turin kan inmangṭha ta rih.

A tuk lama kan inbiak chuan ruahmanna te pawh a lo siamfel tawh a, "Lo va thawk ve phawt la, kan tur che ni loin hruai chhuak tur chein ka lo kal dawn nia, in ka sak zawh hun i lo nghak rih anga, inpeih sa a lo awm i tum dawn nia aw" awki zangkhai deuh hian a ti a, a ṭawngkam ka han hria chu ka zâng hawk mai hian ka hria a, hah a dam huai tawh.

Nunsangi'n Aizawl lama min nghah avangin rei pawh rial tawh lo chuan ka chhuk thla ve nghal a, nu Hlimi te inah zankhat ka riak a, a tuk tlaiah Taxi-in kan kaldun a, kan awmlai kha chuan a hmun thlengin motor a chho thei lo a, tunah chhan tualzawl thlengin motor a lo tlang thei tawh a, building thar te pawh a lo awm tawh nghe nghe. Keini chu hnathawk ho awmna hmunah pindan inṭawm mai turin min ti a, kan hmelhriat thawk an la awm nual bawk nen a nuam dawn khawpin ka hria.

Thawktu lam zawka han ṭan takah chuan mahni insit a na angreng a, ṭanpui ngaia center lo pan te hian keimahni ah eng emaw hmuh beisei taka lo kal an ni ṭhin a, chuvangin an beisei ang an hmuh loh hi ka hlau viau ṭhin. Ka ṭawngṭai tam phah a, Pathianah ka innghat nasa viau bawk a, ka awm hmasak ṭum aikhan ka hlawkpui ta mahin ka hria. Mahse, mite harsatna nitina han ngaihthlak chuan ka hmaah darthlalang lianpui hi hunin a awm leh ṭhin a, tling bik lo leh fel bik lo ka nihzia te ka hmu nawn awn awn a, inringtawk taka thurawn han pek te hi harsa ka ti ṭhin.

Nikhat phei chu zawhna ngaihtuah ti thui zet mai hi ka dawng a, min zawttu chu nula la naupang te, college zo hlim hlawt a ni a, drugs addict vanga lo awm a ni. A insawi dan chuan ngaihzawng a nei a, mi pasal pawm lai anih vangin an rem thei lo a, kum 3 zet chu a bialpa nupui neilai nen chuan an lo inkawp a ni awm e. "Nupui nei a nih vangin kan inhmangaihna hi a tenawm bik tihna em ni, hmangaihna nge hur sualna zawk?" tiin min zawt mauh mai a, a hmelhriat ṭhenkhat ten hursualna thil an lo tih sak a, an lo dem nasa viau hi a lo ni a, a rilru pawh a na tih a hriat theih.

Keichuan, "Hmangaihna chu a ni ngei ang, tuman hmangaihna a ni lo tiin an sawi thei bik lo; mahse, hmangaihna chuan kentel tam tak a nei a, thil ṭha zawk lam a awn tlat ṭhin bawk a, chutah chuan Pathianin duhthlan theihna min pe a ni, uirena leh inngaihna suala kan tluk loh nan te, duhthlanna dik kan siam theih nante finna min pe a, kan chhia leh ṭha hriatna hi kan awmphaw a ni, i hmangaih a, chutah chuan demna tur i awm lo; mahse, hmangaihna anih vanga khan engkimah a dik vek lo a, hmangaihna hming vuaha pawi lian tak khawihna zawk a ni thei" tiin mahni inngaihtuah let rauh rauh chungin ka chhang a.

Ka thil hriat chhuah thar chu hringnun hi zirlai harsa ber a lo ni tih hi, zir zawh a awm thei lo, thiam tik lah a awm thei lo, dai pelh hnuah ṭhenkhat chu kan zir chhuak chauh a, a rahbi dang lah rinthu mai mai a ni, mi zawng zawng hi kan kawng zawh a inang lo a, thurawn ṭha leh dik bera kan ngaih pawh miṭhenkhat tan chuan awmze nei lo mai a ni ang, he hringnun zet hi chu, tunge zir chhuak awm tawh ang le?!

Pathian hnenah nun tuihalna ka dil ṭhin a, a chhanna ka beisei hle bawk. Zan reiah chapel-ah mahniin ka ṭawngṭai fo a, a thla a thla chutiang chuan hun ka hmang liam a; mahse maw, ka beidawn lek lek tawh laiin mak ka tih lutuk thil a thleng tlat a ni. Chhanna ka beisei dan kha a lo dik lo a, a aw hriat tuma ka auh lawm lawm laikhan chhanna chu ka lo hmu reng tawh, ani chuan thlamuanna min pe a, ngaihtuahna ṭha zawk nei thei turin ka ngaihtuahna te min tih fim sak a, a lam hnaih duhna thinlung min lo pe reng tawh a, nasa takin keimahah hna a lo thawk tawh zawk a ni.

Chumi ka han hrethiam ta chu lawmnain ka thinlung a fan chhuak a, chapel-ah tlan lutin mittui nen takmeuh Pathian hnenah lawmthu ka sawi a ni. Ka rilruah chuan hla thu pakhat hi a lo awm a, "Chatuan lungpui, aw Krista, I phenah min hum ang che." tih thu kha a ni. Ka rilruin chu hla chu ka sa a....

 

Kut ruak maia lo kalin,

I kraws bul chu ka vuan mawi;

Saruak leh bawlhhlawh chungin,

I khawngaihna ka rawn thlir;

Faina lui ka rawn pan e,

Chhandamtu, min sil fai la.

A hla thu chu ka thiam kim lo; mahse, ka hriat chhun chhun chu ka rilruah a rawn lut zut zut a, ka sa chhuak hial a ni.

Thil hi ka ngaihtuah let nasa ṭhin a, khang ka nun hman liam takah te khan khatiang thil zawng zawng kha tawng lo ni ila vawiina ka rilru ang hi ka nei thei kher lo ang. Pathian min hruai dan ka ngaihtuah a, a lam ka pan theihnana kawng min zawh tir te pawh ka hmuthiam ve ta. Kei tehlul hi a hnen ka thlen loh a hlau a, ka dai sual ṭhin chung pawhin hun ṭha min pe nawn fo a, khang ka thil tawn zawng zawngte, hrehawmna leh natna ka tawrh zozai te pawh kha amah ka hnaih theihna tur zawk a lo ni.

Christmas kan hmang liam a, ka christmas hman tawh azawngah a la nuam ber hial awm e, kumhlui thlah zanah pawh chuan pawnah meipui chhepin kan zai ṭhap ṭhap a, kan harsatna leh buainate kan inhrilh tawn a, choka lamten thingpui an lo sem deuh reng bawk a, khawpui angin halmawite nen ri ve le lu lo mahin keimahni tawkah chuan kan hlim tlang ve hle a, tumah mutzai rel tum pawh kan awm lo.

Chutiang chuan kum thar chu kan han chhiar chho leh ta bek bek a, mithar an lo lut a, a ṭhen an chhuak bawk a, kar loah hun a liam zung zung mai. In kanni a lo thlen hian Awmpuia hmel hmuh hi ka inbeisei ve ṭhin a; mahse, lo lan tih a nei thei lo, in a sa mek anga, a buai aniang tiin ngaihtuahna chu ka nei a, ka mumangah lah hian ka hmu fo bawk. Hei hi Pathian min hruai duh dan zawk em ni ang, helai hmuna a rawng bawl tur hian min duh a, Awmpuia hi ka lak aṭangin a dah hla ta em ni ang ti tein zawhna ka inzawt ṭhin.

Kum chanve a han liam a, Nunsangi pawn haw a rawt ta zauh zauh a, kei erawh rilru a buai em em ringawt a, chhuah chu ka duh lo a ni bik lo a, ka awmna tur dik loa awm mawlh hi ka hlau a ni. Ka harsatnate chu Pathian hnenah ka thlen mawlh mawlh reng a, he hmuna awm tura min duh anih chuan min hruai tur hi lo lang lo mai sela, ka beiseina te pawh ti thlawnin beidawnga min siam mai turin ka dil ṭhin. Ka hma hun chu Pathian kutah ka hlan a, anin ṭha a tih danin ka chungah ro a rel anga, a rorel dan apiang chu pawm thiam turin rilru ka siam ta bawk.

September thla kan chuangkai a, chawlhni hmasa ber chu inkhawm ka ṭan ni a ni a, ka inbuatsaih ve nasa khawp mai. Bible chhiarin ṭawngṭaina ka nei a, chawlhni ah hi chuan programme dang neuh neuh hi a tam ṭhin avangin kan inkhawm rei ngai lo a, darkar khat zenzawn chu hun kan hmang awm e. 

Kan inkhawm bang chapel aṭanga kan chhuak chu gate bulah mi an lo awm nak nak a, choka hnathawk ho an niin ka hria. Nunsangi chu ngaihven turin a kal a, keini ho erawh midangte nen chapel kawtah kan lo ding a, chutih laia Nunsangi lo kalphei chuan min rawn hui zauh zauh a, ka hmingin min rawn au bawk. Ngaihṭha vak loa ka va pan phei chu, "Gate pawnah sawn Jeep a ding a, visiting day loah lo kan tum che an awm anih hmel" a ti ta mai a, zawhna dang pawh zawt tawh loin gate lam chu la pan hlawk hlawk a, midang ho awmna ka thlen ruala ka mi hmuh vang chuan ka ke pen a tawp chiang khawp mai. 

Jeep aṭang chuan a lo chhuk a, ka dinna lam chu a lo thlir vang vang a, amah Awmpuia ngei a ni. 

"I hmelhriat em ni?"

"Kan luh tir dawn em?"

"I chhuak dawn tawh em ni?" zawhna ka dawng mawlh mawlh a, a chhanna chu 'Aw' tih a ni fai vek. Nunsangi lah chuan, "Engati tut tut nge, engmah min hrilh bawk si lo?" a ti nuah nuah a, a mi biakna chu ka ngaihven hman tawh lo, Awmpuia lo kal phei chu ka lo en reng a, min hmu chu hahdam huai hmel a pu a, a hmel chu hmuh a nuam hliah hliah.

Ka bul a lo thleng chu an en duh hlawm khawp a, ṭhenkhatin an lo chibai bawk a, tunge anih pawh an hre chuang lo. "I insiam thei nghal em?" min tih avangin Hotunu pindanah lamah ka inzui chho a, chhuah ka duh nghal thu ka hrilh chuan Hotunu chu a lawm vak lo a; mahse, Awmpuia'n "Inneih kan tuma, a lo chhuah vat a ngai" a ti mauh mai a, Hotunu pawn min hnial ta bik lo. Nunsangi ten min nghah avangin rei kan awm lo a, kan mutna pindan pawnah ka insiam lai chu min lo nghak ṭhap a, chutih chhungin Awmpuia chuan kan awmna hmun chu a lo en kual a, tukverh aṭang chuan ka va thlek leh zauh ṭhin.

Kan insiam zawh hnu chuan gate lamah kan inzui phei dam dam a, mi an ui der ve ngang mai a, "Min lo tlawh ṭhin rawh aw" ti a min chah lawm lawm pawh an awm. Awmpuia chuan ka bag khai chu motor hnungah a dah a, jeep kawngkhar min hawnsak laite chuan an lo nui dar dar a, min ti lai ve lek lek mai. "In lo chhuah hunah kan inhmu vek dawn nia" tiin ka mangṭha hlawm a, kan tlan chhuah hnu thleng chuan ban an rawn vai lauh lauh a, lunglen vang ni hauh si loin rilru a hnim ve ruih thei.

"Ka lo kal har i ti em?" ka lam hawia rawn ti tu chu ka lo nuih let var var a, a lam hawi chuan ka ṭhu rem sauh sauh a, ka hlimzia a hre lo mai mai a ni, gate pawna a ding ka hmuh khan min hruai tura Angel lo kal ang maiin ka hmu a, Pathian lo tirh a nih ka ring hmiah a ni.

"A huntakah i lo kal alawm hei" ka tih chuan, "Kar hmasa khan lo kal tawh tur ka nia, kan rawng hnawih a lo kai rual lo deuh a, ka hnawih ṭhattir leh alawm maw le" a ti bul bul a, ka nui a hmuh rualin ka kut a lo ban thuai bawk.

"Thla hmasa khan i pa ka han tlawh a"

"Chutia law, eng thilah nge i han tlawh a?"

"Kan chungchang ka sawipui a, palai tir turin a phalna ka han la maw le" a sawi zawh rual chuan hmui ka hup a, lehlam ka hawi ringawt.

"Lo hawi teh" a tih chuan ka hawi duh lo, ka hnuk a ulh ṭun a, ka mittui a luang zung zung bawk a, ka rilru no a chhuak laklawh tlat.

"Aw le, ka duhdan chuan i chhuah hmaa palai pawh tirh fel ka duh a; mahse, biak theiha i awm loh vangin ka nu'n a remti si lo a, i thu hriat ve phawt a duh vang a ni, 'Aw' i tih chuan naktukah palai an kal nghal dawn a, inthar pawh kan inneih huna luah ho kan duh avangin kan la luah lut lo, kan nghak che a nih ber chu" a motor thawm a rin vang aniang a ṭawng ring khawp mai, amah hnungchhawn zawng chuan ka la ṭhu tlat a, lawm vanga heti em em a lungchhiat hi ka la nei ngai lo, beisei loh thil thleng chuan minti hlim vawng vawng em a ni. Motor chu a ding dat a, inhru sawk sawk chunga ka inher chu ka biangah lo dawmin chiang fahran hian min en a, a nui hmel chuan min vel leh mai dawnin ka hria. 

"Min nei duh em?" a ti khawl mai a, beisei ve bawk mahila a sawmna ri han hriat takah chuan a dan a dang a ni, chhungril a fan rawih rawih thei. Ka biang a rawn chul riak riak a, mipain a hmeichhe hmangaih tak a thlir ang hian a mitah chuan engthil emaw ka tana danglam bik a awm. 

"Min nei duh ti raw?" a tih ri leh "Aw" ti a ka chhanna chu a inrual zawt a, kan han nui dun leh rih.

"Ka ngai lutuk che" a aw chu a zawi ruih mai.

"Keipawn ka ngai che" ka sawi zo chu lungchim zetin min fawp a, a hlimawm a, a lungchhiatthlak bawk a, a famkim hliah hliah a, duhthusam thleng dik an sawi chu ka tawng ve tain ka hria. 

Hmanah khan duhthu kan sam dun a, he hun hi ka beiseina nen kan thlir ṭhin, Rinsangpuii duhthusam chu Awmpuia nupui nih a, hmeichhe vannei nih zawng kha a ni a, tunah pawh chubak chu duhthusam dang a la nei ta chuang lo. Awmpuia nupui ni chungin damchhung hun hmang liam ila, nupui ropui tak ka ni lo anih pawhin nupui ṭha tak ni thung ila...

"Enteh..." ka ti hluai, ka lam a lo hawi vat a, "Engtin nge kan inchawm ang" ka ti tawl, thiam thil lah chu ka nei ve mang bawk si lo. Ani chu a lo nui deuh suk a, ka tih ngaihna hre lo chuan, "I hna kha lo bang lo la ṭha tur" ka ti leh ringawt a.

"Lungngai suh, hna ka nei leh har lo ang, thla hmasa khan prelims ka exam zo a," ka lamah a rawn thle nghat a, nui chung hian "MIS nupui nih aichuan a aia sang te pawh i duh zawk ka ring a, officer nupui tur khan ka tiam che em khah?" a'n ti zui a, thil hi a va han hre rei thei tak, lung lah chu a ti awi viau zel bawk si.

"Caleba lung i phun tawh em?" ti a ka zawhna chuan kan boruak a rawn thlak hlawkin ka hria, a ngawi deuh vang vang a, ka sawi chhuak chu ka inthiam lo lek lek.

"Aih, awlsam takin a hming pawh hi ka la sawi thei lo, ka la phun thei rih lo ang" a ti zawi ruih a, a rilru ka ti thar leh a ni ringawt mai.

A hmel chu ka en vang vang a, hmathlir eng tak nei chungin he natna hi kan pai reng dawn chu a ni si, duhthusam famkim hi a lo awm thei tak tak lo, kan chhuikir chang a awm anga, kan na nawn fo anga, kan damchhungin a sawhkhawk hi kan tuar tawh dawn a, a ser pawh kan thinlungah a awm reng tawh ang. 

Hun hi ko kir theiin kha hunah khan let leh thei ta ila, eng duhthlanna nge ka siam ang le, ka chhia leh ṭha hriatna hmangin ka indantir ang nge, a ngai ang tho khan ka ti leh zawk ang, chu zawhna chu ka inzawt mawlh mawlh a, zawhna chhan harsa tak a ni, Juni kha lo dang thei ta ila vawiina ka hlimna hi ka tawng kher ang em, ka hlimna nge midangte hlimna pawimawh zawk tih hi chu zawhna a zawnga ngeiawm leh huatthlala ber anih ka ring. 

Thil pakhat erawh zir chhuah ka nei a, tute pawh hi keimahniah ṭhatna lai leh chhiatna lai a awm ṭheuh a, mahni thiam leh dik ni a kan inhriat lai hian midang tan chuan mi sual hlauhawm ber, chhiatna thlentu kan lo ni thei tih hi.

..The end..