WHY DID YOU GO? (CH - 21) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 21

"I thawmhnaw chu hak a hrehawm em, i duh chuan ka t-shirt ha zawk mai ta che?" 

"A ngai lo, thawmhnaw mawi hak a khât tawh alawm," ti chung chuan ka kawr chu ka pawt ṭha mawlh mawlh a, a puan chu a pan viau pawh a ni lo, a fan thei chi a ni a,  taksa pianhmang a lang thei rûak a, ka awmbawr lian lo ve tak pawh a ti langsar ve khawp mai. Zohera melh ralh ralh pah chuan a hoodie khai chu ka ban a, "A vawh ka ring, nangpawh inthuam lum rawh," tiin pindan chu ka chhuahsan zui a. 

A car rawn hawh chu maruti 800 var, hlui deuh tawh hi a ni a, a hmelhriat pakhat ta a sen chi um khat pein a va hawhsak a ni awm e. Kan tlai palh ka hlauh vangin eirawng ka bawl lo a, chhun lama ka alu chop siam chu ka tilum a, Zohera lo chhuak chuan a ei chak loh hmel khawp mai.

"Tlem tal ei rawh, i ril a ṭam palh ang," ka tih vangin pakhat chu a rawn ei ve. Dawhkan kilin a phone a bih a, a nui suk suk reng a, zanina kan thiltih tur chuan a ngaihtuahna a luah lian vak lo a ang. Ka tibuai duh lem lo a, keipawh chuan ka message dawn chu ka chhang a, inbe loin rei dawn chu kan ṭhu dun bawk.

"Minai chuan eng nge a rawn sawi a?" ka va ti thut chu min rawn melh vut a, "A ṭhiannu pawh a sawm diam tawh, i ṭhianpa chuan eng nge a rawn sawi zawk?" tiin min zawt let a, "Ani ka be hleinem," ka tih chuan engmah min zawh pawh a tum lo.

"Thil a kal tluan loh takah tiin mi dang puihna ka dil a," ka va tih leh pawh chuan a phone a la hmet mawlh mawlh. "Tu maw?" ti chung chuan min en lem hlei lo a, a nuih danah message hlimawm deuh a dawng a ang viau bawk.

"Kal a hun tawh lo maw?" ka tih leh takah chuan phone chu a ak ṭha zui a, "Thlen hma a ṭha ang, an ngaihtuahawm riau," a ti a, pawi ka ti lo khawp mai. Tukverh leh kawngka te chu kan kalh ṭha sawk sawk a, chumi hnuah a car hawh hmang chuan kan inkhalh chhuak dun ta a, car ṭâwng lam tawh a ni bawk nen khaw chhung tlan chhung pawh a rei a, kan thlen hma loh hmel khawp.

Lawmsanga nen rei lote kan inbia a, a inpeih tawh thu te a rawn sawi a, "Kan lo thlen fel hunah i che chhuak chauh dawn nia," tiin ka hrilh a. A rawn sawi danah chuan kan pitari chu tlaiah khan a kal chhuak a ni awm a, "An sawi dun nghal anih hmel, a kal fuh hmel khawp mai," a rawn ti a, kei erawh ka phur zan lo, kan tum dan chu kan duhthlan tur awmchhun a ni miau a, hetiang aia ṭha zawka tih dan awm se ka ti a ni.

"Chanchin thar a awm em?" ka bula miin a rawn tih chuan, "Aih, a kaltluang vek; mahse, hetiang lo deuh hian kal thei se ka ti, thil eng emaw thleng turin ka la beisei deuh a, a thlen hmel loh anih hi," tih pahin phone chu ka dah a, ka ke hlangin mit ka han chhing vang vang a, ngaihtuahna a vak thui khawp mai.

"Eng nge thleng tura i duh chu?"

"Ka hre bik lo, kan tum loh dan ang deuh hi a ni mai,"

"I duh dan angin thil a kal a, i duhdan a ni leh vak lo tihna maw, hriatthiam a awlsam lo ṭhin hle mai," Chhang loin ka ngawi ran a, ani pawh eng emaw chen chu a ngawi. Mahse, a rawn ṭawng leh chuan ka beisei loh deuh thil a rawn sawi a, a lam ka hawi rang hle bawk.

"Buaina a awm palh anih chuan ka kalsan dawn lo ania, kan rualin ka hruai ve ang," a ti mauh mai a, min râwn a ang lo a, thutlûkna a siam fel tawh tih a hriat theih.

"Zanina fel nghal duak thei a ni hleinem," ka tih chuan a ner nak a, mi pawh a en lem lo.

"Min hre chhuak tawh anih chuan kan awmdan tur a chiang tawh, farm-a kalsan chi a ni lo, kan zinga tel ve a nia, a tan a him tawh bik lo," a ti bul bul a, hei vang hi alawm hetiang lo deuha thil kal tura ka duh chhan chu. Hun kan ngah tawh lo takzet, zanin thleng bak hi kan thu a rual dawn lo tih ka chiang a ni.

Phone a hmang zui a, a biak danah chuan tunge a biak ka hre nghal a, rei lote chu ka be ve. Lawmsanga thu ngaichang tura ka ti chu a lawm vak lo aniang rei pawh ka biak hmain phone a dah a, tihmawh leh luhlul tak angin a han awm ṭhin naa thu a awih ve phian zel a, keimah zawk hian ka deal thiam lo zawk em mawni ka ti.

"Kan che fuh anih chuan nangpawn nghah deuh i la duh ka ring," Zoa lam hawi chuan ka'n ti leh hram a, "Kan chêt fuh i ring vak nange?" a lo ti ve leh vat.

"Rinlawk dan ka thiam lo, an awmdan a zirin ruahman dan ka thiam chauh ang," Min rawn melh zawk a, "I thil sawi dan hi ka hrethiam lo, plan dang i nei em ni?" ngaihṭhat loh hmel fe hian a ti a, plan ka nei pawh a ni chiah lo, an chêt dan tur zawk a ni ka buaina chu.

"Rinhlelh ka ngah lutuka, thil kaldan a inthlak apiangin rinhlelh an dang zel a, wine pawh hi khawiah ber nge kan tawktarh dawn ka hrethiam tawh lo; mahse, min umzuitu chu an awm ngei ka ring," 

"An chet dana innghah chu a fuh ka ti chiah lo, keini chauh inngaihtuah thei kan nih loh hi aw, min puitute dinhmun pawh kan ti derthawng ve ania, a fuh emaw fuh lo emaw Jeminai chu ka hruai tel ve angai tawh," a ti leh khawl a, an pahnihin an lo sawi dun tawh niin ka hria. Hei leh chen hi min thlenpui tawh a, an nun dan tura thuneitu lah ka ni hek lo, tunah chuan haw pui tur a nei tawh a, min nghah kher a tum tawh pawh ka ring lo a ni.

"Ka hnial lo ang che; in ruala haw hman ka tum ang," tia ka chhanna chuan a tilungawi aniang a sawi zui ta lo a, inbe loin kan tlan zel bawk.

Thinghmun kan va thlen chuan Lawmsanga chu kan thlen tawh thu ka hrilh a, "Awm hnai lutuk suh u," a tih vangin motor chu nimbu huan thlen hmain ka dintir a, Zoa pawn message a dawng nge ni a phone a bih ve reng a, kan inngaichang tawn vek a ni ber. 

Thâwm chu a reh tlawk tlawk a, thli thaw ri leh rannung hram ri bak hriattur a awm lo. Sana chu ka bih leh ṭhin a, minute 10 vel chu a liam tawhin ka hria. "An che chhuak tawh ang," tiin ka bula ṭhu chu ka hrilh a, "Kan awm hla lutuk lo maw?" tiin min zawt ve thung.

A awm a nuam vak loa ka hriat vang chuan, "Kein va kal hnai deuh ang hmiang," ka ti ta ngawt a, a chhuk rang khawp mai. Mahse, nimbu huan awmna zawn kan kal laichuan call ka dawng ta thut a, "Minai a ni em?" ka hmaa kal chuan a lo ti vat a, "Lawmsanga" tih leh phone lak ka rual a.

"Ka pa kha in awmna lamah a lo kal ania, engkim a lo hre vek," a rawn ti ta mai.

"Engtin nge a hriat theih?" tia ka zawh laichuan ngaihdan ka nei fel der tawh. Rin ang ngei chuan, "Pi Lalpuii an hrilh lo, pu Chama'n ka pa zawk a hrilh daih, kan thil tum zawng zawng a hria, tunah Jeminai te an lut mek a, engtia tih tur nge?" a rawn ti zung zung a, a tlan nge mawni a thaw deuh hlawp hlawp.

"Khawiah nge i awm?" ka tih chuan, "A hnungah ka rawn um, ina ka luh hnu lawk khan pindan aṭangin a rawn chhuak a, pawnah min pawt chhuak nghal alawm, ka dang dawn nge, in biru mai dawn?" a ti leh sawk sawk a, birukin awmzia a nei tawh lo, "Lo kal rawh se," ka ti ta ngawt a, "Jeminai chu..?" a tih leh chuan ka biak nghal tur thu hrilhin phone ka ti tawp a, Minai chu ka call zui bawk.

A ṭhiannu nen chuan an lo lut tawh ngei a, wine pawh an hmu ngei anih hmel. Chhuak tura ka ti chu a hrethiam lo khawp a, thil a danglam tawh thu hrilhin insaseng vat turin ka ti zui a, chutih laichuan ke pen thawm kan hre pha tawh. "Mi an lo kal," tih pahin Zohera chuan min pawt let titih a, Jeminai chu ka biak leh tur thu hrilhin phone chu ka dah ta rih a, thawm lo kalna lam chu ka en ran bawk.

"An man chhuak em ni?"

"Aih, min puitu tur a lo kal dawn,"

"Tu maw?"

"Lawmsanga pa,"

"Eng nge a awmzia?"

"Ka rinhlelh hi a dik anih chuan min pui nasa viau ang, lo en tawp rawh," tih leh hmalam pan ka rual a, "Sawi chiang teh," tih pahin min rawn um dawr dawr a, ngaihtuahna a buai viau e ti lovin ka lawm zawk mah a ni. Plan dang kan nei thei dawn tih ka chiang ta chiah a, plan tharah chuan an chêt hmasak kan nghah a ngai tawh lo bawk ang, a hrilhfiahna chiah kan mamawh tawh.

"Duhawm.." ka darah rawn vuanin min pawt her lawp a, "Hlauthawng suh, Minai te chu an chhuak tawh ang, a ṭhiannute pafa khan Putara zawk an hrilh a, engvang nge ngaihtuah rawh," ka ti sar sar a, "Engvang nge?" dawhthei lo fein a ti a, ka kal hlau niawm takin ka banah a chelh tlat.

"Thil ni thei chu hrilhna tur dang an awm lo tihna," 

"Eng nge chu chu a awmzia?"

"Kan hre mai dawn alawm, zaninah kan hre vek ang, naktukah misual chu kan man thei tawh maithei,"

"Tu nge ni ta?" 

"Tu nge ni lo tih hre phawt ang aw," tih pahin a kut chu ka la lawk a, gate awmna lamah ka kai phei hlawk hlawk a. Pên sawm vel bak kan pen hman awm lo e, kawng kawiah putara lo kal nen kan intawk ta hlawl a, min hmu chu a phu nasa deuh nge ni a ding chawt a, a tawlh let hrutin ka hria.

"Naui leh..nang hi ka ringhlel ru reng che a, i lo phusa nasa hle mai lehnghal a.." a aw a pawr ang aiin a che zia chu a zûm zûih a, Zohera a hmuh tel vangin a hlau ve deuh nge mawni?

"I thil rûk kan tum chhan chu tualthattu hriatnan ania, kan phiarrukna che a ni lo ania aw," ka tih laimek chuan Lawmsanga a rawn thleng a, a hmanhmawh bawk aniang a thaw hlawp hlawp mai.

"Khawiah nge Minai?" ka bula ding chuan a lo ti hmanhmawh.

"In bia a ni lawm ni?" Lawmsanga'n a tih chuan, "Ka bia, an chhuak fel tawh ang," tiin Zohera chu ka hrilh a; hlauh ang ngei ngeiin a awm thung. "Khanu bulah khan a awm asin, ka zuk hruai dawn," a ti a, kal nghal a tum ringawt. Rang lutukin ka pawt lêt a, "Dawhthei deuh teh aw, sawifel ngai kan neih hi," ka ti vin ṭhak a, a ban chu na deuh takin ka hmer sak bawk. Ka lawm lo tih a hrethiam aniang ka kut a phih thla hlawk a, 'Sawi rawh u,' minti niawm tak hian mi a din hlat a, min en run mai.

"Kan thil tum i hria a, tinge i lo nghah ve kher a?" Putara lam hawia ka tih chuan, "Khawiah nge Biakliana chu a awm?" a lo ti pawr hlur a, khai aw....kan Pu-a hian a hmuh tum tak a hmu lo anih hmel.

"Kan zingah awm se engvangin kan thil tum hi an hrilh ang che, nang aichuan pu Biakliana lam an ṭang zawk a ni lawm ni?" ka tih leh zat a, putara chuan Lawmsanga lam hawiin, "Anni hi tute nge an nih, eng nge zep i la neih?" a ti vin leh hlur a, Lawmsanga lah chuan, "Police an nih hi," a lo ti hmiah mai a, Putara hmel chu ka hmu chiang thei lo nain a hawi buai angreng khawp mai.

"Po..police i ti elo?" a ti bah nak a, "Tualthahna kha kan chhui mek ania," tiin ka lo tuihnih ve leh.

"Police in ni thei lo, police ni ula ka wine rûk in tum lo ang," a ti mauh mai a, a hrethiam ve tlat.

"I wine rûk tumtu kan ni lo, i wine rûk tumtu man chhuah nana rûk tum der chauh kan ni, tu nge i wine rûk tumtu chu i hria a ni lawm ni?" 

"A mi tirh in ni leh pek ang chu maw le, i lo awmtirh khan ka ringhlel daih tawh che, mi mawl ka ni reng reng lo," a kutzungchal a rawn lek vah a, "I wine pawh a nih tak tak loh kha," ka lo ti zauh. Ka thilsawi chu a dawng fuh bawk aniang ka lamah a rawn hnai nghal ruak mai, Zohera'n a lo dang vut a, Lawmsanga a banah a rawn vuan rang hle bawk.

"Ka wine a ni lo a..? Ka siam chhuah liau liau anih hi, i pu Biakliana khan a siamdan chu a hmu chhuak ngei a, ani siam ve kha chuan a nih tur ang a ni phak reng reng lo, tuna mi hi chu ka ta liau liau a ni," a ti bawrh bawrh a, wine chu a hauh bur anih hmel e.

"Anih, i siam chhuah ni mai rawh se; mahse, engvangin nge i hlauh em em si a?" ka tih chuan, "Tu maw ka hlauh, chupa chuan ka hlau emaw ka ti elo, a ngam chuan rawn kal sela, a duh duh a la thei em kan en ang chu?" a ti pawr leh hlur a, chu tak chu a ni ka zawhna chu.

"I nupuiin a thlawp a, a fate leh a ṭhianpa pawn nang an ṭan lo che a, engvangin nge a rawn kal loh, a hlau zawk che em ni a?" tia ka zawhna chu a buai rûkna anih ve tho ka ring. A han inthlah dul deuh a, "Amah zawt ta che u, a rûk a ralin engah nge a chet reng, a hma lawk pawhin mi a rawn tir a, a mi rawn tirh lah a ka hup nan a tihlum hmak a, police in nih te chuan engah nge amah chu in zawn zawk mai loh, helaiah a awm hleinem," a ti a, a ṭawng pawh a vin tawh lo, zawhna awka a lang zawk mah a ni.

"I sawi chu zirtirtunu kha em ni?" ka tih chuan, "Ni phiangsen e maw le," a ti bul hmuk a, a thil hriat chin pawh a chiang tain ka hria, Veroi kha hotel lam tirh zawk tih a hre lo a, pu Biakliana tirhah a ngai tihna a ni.

"Anih i makpa kha formula rutu a ni tih i hria em?" ka tih leh chuan, "Engtin nge chungte chu i lo hriat ve a?" tih pahin Lawmsanga a melh zui a, "Nang aiin hriat a ngah zawk," Lawmsanga'n a tih chuan ka lam a rawn hawi leh a, "Biakliana thiltih vek anih kha, ka makpa kha chuan a thil duh kha pek a, kan inkar siam ṭhat a tum a, a hmu turin aizawlah khan a kal bawk; mahse, a thil ruk kha a lem ania, a lo hriat rualin a that a nih dawn kha," lawm lo awka zet hian a ti a, ka rindan a ni ve lem lo thung.

"Lawmsanga nen in hriat dan a dang hle mai," kan ti zauh chu, "Hepa hi chuan min kalh dan a zawng ngar ngar reng alawm," tiin a fapa chu a va melh a, a melh rum deuh nge mawni.

"Jail tang la i inhmuhchhuah theih ka rin vang ania," pakhat lah chuan a lo ti sam et a, "Tu fuihpawrh nge maw i nih chu le," Putar chuan a ti zui khar khar a, thil danga kan pen leh hmain ka lo inrawlh leh vat.

"Khawiah nge a awm hriat i duh em?" ka tih chuan, "Duh ang chu, khawiah nge a awm?' rang fahran hian a rawn ti a, "Min pui la, kan hrechhuak vat mai ang," tia ka chhang chu a ngaihdan a ni vak lo. "Mi bum kha tum teivet lo mai rawh u, ka in leh a velah hian engmah in ti lo ang, um chhuaktu ka ni lo tih hre rawh se," a ti leh khar khar a, kan buaina leh a buaina chu inhnaih tak anga lang siin a inpersan reuh khawp mai.

 

"I puzawn khan nangpawh a bum ve tho che anih hmel, i nupuiin nge nangman hrechhuak hmasa?" ka tih chuan, "Kan nu chu a rawn biakna a rei tawh," tiin min chhang a, "Pi Ringzuali i va hmuh khan pi Lalpuii chuan a hre tawh a ni lawm ni?" tiin Lawmsanga'n a lo zawt ve a.

"Hre tawh, lehkhathawn pawh a fate tan a ziak a, a pasal thiam loh anih loh thu a hrilh a, kei min mawhpuh faivek a, a fate pawn mi an huat phah viau lehnghal," a ti a, a ṭawngkam aṭang chuan a rilru a na ve deuh niin ka hria.

"In nu chuan engtin nge a hriat mai theih?" ka tih chuan, "Ringzuali a va hmuh chu, nangpawh i va kal nghe nghe kha," a ti leh hluk a, chu ngawt chu a ni lo tih ka hria.

"Pi Ringzuali a va hmuh chhan zawk ania ka zawh che?" ka tih leh chuan a hrethiam ta chhiah lo aniang, "Biakliana'n zawt turin a ti aniang chu, Rochama nen eng eng emaw an inhrilh ru sur sur a, Rochama pawh khu a dik lo, ka makpa khan ring lo turin min ti a, a chhui viau bawk a, Biakliana awmna pawh kha a hrechhuak aniang Aizawla a kal dawn khan a zawn tur thu a sawi alawm," a ti a, dawt sawi ang mai hian a dang a awk a, dawt a sawi erawh ka ring lo thung, a thil hriat tlem dan ngaihtuahin dawt sawi chhan  tur a neiin ka hre lo a ni.

"Tunah hian rinhlelh kai ber zinga mi i nia, kan hrechhuak thei anih chuan wine chungchanga i buaina pawh hi a fel duak thei ang, chuvang chuan min pui la, kan tih turte kan ti anga, nangpawh i fihlim theih phah zawk ang," thlem awka deuha ka tih chuan, "Engtin nge maw ka han puih ang che u le, in duh leh wine chu la fai vek ula ka pawiti hleinem," a ti leh lawi a, nichina a'n han hauh nasat tehlul nen.

"I buaina hi wine vang ngawr ngawr pawh a ni lo, i chapona leh chak lo zawka ṭan i duh loh vang zawk niin ka hria," ka ti ta khawl a, a dik khawp aniang chu, "A duh duha a rawn khawsak ka rem ti hleinem, engkim hi ka ta vek a ni tawh," a ti ve hmiah a.

"Anih chuan min puih ngei a ngai a nih chu," tiin ka va kal hnaih ta bawk.

"Engmah hre lo angin lo awm la, i in chhunga thil thleng te pawh hre lo der la, kan tan mit leh beng i ni thei ang ti raw, rei lo te chiah a ni mai," Mamawh ngawih ngawih anga lan ka duh loh vangin ka aw chu a chang lek lek, min mamawh zawk tih hria se ka duh vang a ni.

"Hriat loh der te chu thil har pawh va ni suh, mit leh beng erawh ka ni thei kher lo ang, a rûkin an phun ser ser a, ka kal hnaihte chuan a tûm buau reng hlawm alawm," a ti bal bal a, "Hriat loh der kha a tawk mai," Lawmsanga'n a lo tih chuan ka hnial bik lo.

"Zuk haw pui rawh, Jeminai lo ngaihven bawk la, in lo chho leh dawn nia," tiin Lawmsanga chu ka hrilh a, "Biakliana awmna chu in hre lo tak tak em ni?" Putara chuan a lo ti leh bauh. "A rawn inlan thuai ang," ka ti ve mai a, chumi hnu chuan Lawmsanga chuan a pawt sawn a, gate lam pana an kal lai pawh chuan Putara chuan zawhna a la zawt mawlh mawlh a, Lawmsanga chhanna erawh ka hre pha tawh lo thung.

"Enthlatu ah hman i tum amaw?" Zohera a ni.

"Tumah enthlakna hun a awm tawh lo, pi Ringzuali khan ka chungchang chu a hrilh tawh, tunah chuan Minai thiltih pawh an hre tawh ang, zanin chiah hun kan nei," 

"Anih engtin nge i tih dawn?"

"Mi kan nghak lawk anga, kan luhchilh ang,"

"Tute nge kan nghah a, kan kal hma pawh khan i sawiin ka hria?"

Ka phone ka phawrh a, message ka thawn chhuah rual chuan, "Police leh police puitute, khawvar hunah chuan an rawn thlen ka ring, kan inpeih tawh thu ka hrilh a," tiin ka chhang a, "Thil tum rûk dang i nei em?" a rawn tih chuan ka nuih a za deuh.

"I lakah zêp neih a ngai hleinem Zoherlian, nangmah zawk khan thil zêp ruk chu i châkin ka hria," nui chungin ka ti a, a nui ve em ka hre lo. "I message chu a lo chhang che em?" ka tih chuan, "Aw, a ṭhiannu nen an la awm," a ti ve mai a, pu Muana kan biak laikhan a phone a en leh ṭhin a, an inbia tih ka hria, a ngaihtuahna luah lian bertu a ni tlat tawh a, kan Romeo hian zanin chauh chu a la nghah theih ka beisei.

Kan ṭhiante chu an rawn lang mai lo, ka ṭhiana lah chuan, "Thil dik lo a awm aniang," a ti leh ṭhin a, zuk kal a duh tih ka hre reng naa, "Mut reh hun an nghak aniang, motor-ah lo va awm ang," tiin ka pawt lui a. Motor-a ka ṭhut luh hnuah pawh pawnah a la ding reng a, a phone a en reng bawk a, a chhanna dawnin a zir aniang zialte ṭanin a kal ta bik lo a, kan nghak rei viau thung.

Keipawh chuan message ka dawn leh dawn loh ka en leh ṭhin a, number hriat loh hnen aṭanga, "I duhna hun leh hmunah kan rawn hmu ang che," tih ka dawn chu ka mi nghah hnen aṭangin a nih ka ring a, tu ber nge min chhangtu erawh ka hre lo.

"An lo chho dawn," Zohera'n a rawn tih chuan dar 10 a pel tawh. Ani pawh chu motor-ah a rawn ṭhu lut a, hnunglam seat aṭang chuan eng emaw hi a va ban zui a, jacket dum a chhung lum hi a rawn phawrh hlawl. Ka hak tur anih ringin ban ka lo lek hman zuau; mahse, a beng fai phurh phurh a, a mal chungah dahin a phone a bih leh daih a, ka hriatthiam hnu chuan lehlam hawiin ka nui ta ringawt.

Minute 5 vel a liam leh hnu chuan kan lampana lo kal thawm leh ṭawng thawm kan hre ta a, chuveleh Zohera chuan motor light a ti êng a, an rawn lang rang khawp mai. Jeminai chu a rawn pen phei hlawk hlawk a, motor bul a rawn thlen rual chuan ka ṭhutna lam seat chu a rawn bih duk duk a, "A hnungah," ka lo tih chuan a kalsawn rang viau a ni. 

"A va den ve," tih pahin seat hnungah a rawh ṭhu lut a, "Thil danglam vek chu eng nge, Lawma sawi bak kha a la awm em?" tih pahin a rawn kun hnai sawt sawt a, kei leh Zoa chu min melh tawn zak zak. "Hei hi ha rawh," tiin Zohera chuan a kawrlum kenlai chu a lo pe a, "Sawi thuai thuai teh u," tih leh pahin kawrlum chu a ha zui a, Lawmsanga lo ṭhu lut chu ka lo en reng.

"I pa chuan sawi a nei zui em?"

"Zawhna a ngah khawp mai, pu Biaka awmna kan hre turah a ngai a," tiin dar a kan âk a. "A muhil thei dawn lo anih chu," tiin ka chhang ve mai bawk.

"Wine kha kan la thei reng asin, pu Muana'n kha in sawifelpui thei tho sia, engatinge kan lak mai loh?" Jeminai'n a tih chuan, "Kan mamawh tawh dawn lo a ang, wine vang a ni lo tlatin ka hria," ka ti a, an hrethiam lo tlang aniang ka lam an lo hawi ṭhap a, 'Sawifiah rawh' tih melh tak hian min melh hlawm.

"Wine lam chu dah ṭha rih ila, Azoi pa kha pi Lalpuii nen an inthurual lem lo tih a chiang ta a, pu Muana a hrilh daih chhan kha han ngaihtuah ve teh u, wine kha ru chhuak turin min duh lem lo a; tin, pi Lalpuii lam a ṭang lo tihna a ni bawk a, hepa hi thawk palai a ang khawp mai," sawi zawm leh ka tum laimekin Jeminai a lo inrawlh a, "Pi Lalpuii lam ṭang chu a nia lawm, a pasal hlui be bawptu ber pawh kha a nia, zantir khan pi Lalpuii leh pa Dinpuia inbe lai ka ngaithla ru a, an sawidan chuan pa Chama'n pi Lalpuii pasal chu a be ṭhin a, chanchin an inhrilh tawnna a nih hmel," a lo ti zung zung a, ka ṭhu ṭha rang khawp mai.

"Thil dang sawi an nei em?" hnai set sawta ka va kun chu phawk lek lek hian min en a, "I hriat zawng zawng sawi rawh," ka ti leh zat a, Zohera pawh a rawn ṭhu rem ve rawk rawk.

"Pi Lalpuii chu aizawla kal a tum a, ka nu Nguri inentir tura hruai a tum a, pu Muana'n kal ve a tum pawh khan a remti lo bur a, amaha kalpui a tum bawk a, pa Dinpuia bulah chuan 'I pa chu zuk hmuh ka tum ang' tiin a sawi a, pa Dinpuia khan 'Tinge maw min biak duh loh le?' a ti bawk a, pa Chama kaltlang vekin an be ṭhin aniang," 

"Chuan...?"

"Eng nge, a bak ka hre tawh hleinem,"

"Pu Muana chungchang an sawi em?"

"E ni tak, pu Muana hi an haw khawp mai, an huan leh ram pawh hi pek an tum hmel loh, pa Dinpuia khan, 'A ta ni lo neihtir ka tum lo, ka pa chu inthlahrung lo turin i hrilh dawn nia' a ti," Lawmsanga lam ka va hawi a, "I rindan sa a ni lo em ni?" a lo ti sam et a.

"Mak deuh chu i hre lo em ni?" ka tih chuan a meng nur deuh. Mahse, a hrethiam ve leh vat a, "Tun thlengin an la hmu lo a, midang kal tlangin an be bawk a, an thu hlan chhawngtu lahin an lakah zep a nei tih kan hre bawk a," a tih chuan ka lo bu nghat a, "An inbum a ni maw?" Zohera'n a lo ti ve bauh a, inngaichang niawm takin kan inmelh kual ralh ralh hlawm.

"Pa Chama chuan a bum tihna maw?" tiin Jeminai a rawn ṭawngchhuak hmasa ber.

"Fiahna a la awm lo, a bumna kan hriat chhun chu zanina a thil zêp kha a ni rih. Mahse, a thurualpuite niawm tak laka a zêp hian chhan chu a nei chiang..."

"Eng nge i rin dan?" Lawmsanga'n a lo tih chuan, "A hrilh vanga danglam vak tur a awm lo te pawh aniang," ka ti tawl a, "I sawi awmzia chu..?" tih pahin a rawn kun hnai deuh a, Jeminai lah chuan hriat chian loh hlau niawm tak hian a beng a rawn dawh hnai bawk a, kan inkil hnai hlawm khawp mai.

"Pu Biakliana hi a la dam tak takin in ring em, la dam nisela chuan pu Rochama hi hetiang hian a awm ka ring lo a, a thi tawh anga ngaih chuan tuna a chetdan hi a tih awm tak niin a lang bawk. Pu Muana hi a bum niin kan ngai a; mahse, a mi bum hi pi Lalpuiite nufa zawk an niin ka hria," Eng nge an ngaihdan hriat tumin ka han en kual a, makti hmel an pu vek a, kei erawh ka thawveng huai, a bum chhan kan hria anih chuan thil a chiang kuar thei tawh dawn a ni.

"A mizia hi a mak e, pa fel leh zaidam deuh emaw ka tia, a lo van hlauhawm em em, tualthattu te hi a lo nih phei chuan..." Jeminai a ni.

"Tlaia kan inbiak hnu khan ka pa Taia ka zawt a, a thinchhiat thu leh a hmel en aia a phakar thu chu a sawi a, 'Hmanah pawh rukru pakhat a vaw hlum ṭep e' a tia lawm. Burma sumdawng pakhat tlereuh zuara lo kal ṭhin hi pu Muana hmelhriat a awm a, kan pianhma hian farm-ah a rawn thleng ṭhin a, chupa nen pawh chuan an intibuai niawm tak a ni, Burma pa chuan a ruih laia a thil ru ah a puh a, pu Chama chuan tualah kut a thlak hrep a niawm e. A tukah burma pa chu a haw ta vang vang a, a lo kal nawn leh duh tawh lo. A haw hnu lawk hian pu Chama nupui khan rangkachak ṭhi a rawn awrh a ti bawk a," Lawmsanga'n a rawn tih chuan, "Azoi awrh ṭhin kha aniang a, 'Ka nu ṭhi ka rochun,' a tia, rangkachak ṭhi lian deuh a nei alawm.." Jeminai'n a lo ti ve hlut.

"A ni maithei, a awrh ṭhin tak kha, rangkachak rawng ṭhi mai mai emaw ka lo ti a, da thei lo ang kha," Lawmsanga'n a tih leh chuan, "Aw.....kei pawh....anti-tarnish emaw ka ti char char.." pakhat chuan a ti leh hlut a, "Burma pa thil chu a lo ru tak tak anih dawn chu.." Lawmsanga'n a tih leh laiin, "Ruk loh ten khawia rangkachak mah Azoi nuin a nei lo ang," Jeminai'n a lo ti leh zat a, an pahniha an inbia chu Zohera'n a lo thîk deuh nge ni a ngawi run a, an thilsawi chu ngaihnawm a tih loh hmel khawp mai.

"Mi fel a ni lo tih a chiang ta viau mai, dawp ila a inpuang duh maiin in ring em?" ka tih chuan, "Police hoin an ti duh kher nang?" Lawmsanga'n a lo ti vat a, keipawn ka ring lo, engtia tih chi nge ni ang tiin ngaihtuahna a buai leh map a, finfiahna lah kan nei si lo.

"Thil zeldin mai mai chhin ang u," tiin rawtna ka han siam a, ka ngaihtuahna mai mai pawh hriat an duh tawh bawk a, ka insum duh tawh bik lo.

"Pu Rochama hi tualthattuah ngai ta ila, Minai pah a thah chhan tur kha eng nge ni ta ang? Minai pa khan thil eng emaw hriat ruk a nei anih ka ring deuh a, pi Lalpuii te a bum dan hi a lo hre chhuak anga, a ka a hup thei dawna a hriat loh vanga that ni ta se, a inmil thei viau lo maw?" tiin an pathum chuan ka melh kual dan dan a, an ngaihtuah ve rauh rauh hlawm.

"Anih Veroi a thahchhan kha eng nge ni ve ang?" Zoa'n a lo ti khauh.

"Veroi chungchang chu Minai pa thihdan kan hriattheih chuan a rawn tifiah mai ang, Minai paah rilru sawr bing rih ang u. Pu Rochama hi tualthattu ni dawn ta sela chuan aizawlah a kal ve a ngai dawn tihna ania, thil thlen laikhan farm-ah hian a awm em kan hriat a ngai, a awm tih hriatpuitu a lo nei anih chuan kan thu hi a dang leh daih thei," ka han ti leh dap dap a, Minai chuan sawitur a neih beiseiin ka en bawk.

"Khang laikhan ka mumal vak lo a, Lawma i hre zawk em?" tiin Lawmsanga lam a hawi a, "Ka hre chiah lo, kan hnathawhna lam a inang lo em a, kan inhmu khât ve bawk a," tiin a lo chhang a, "Ka tihtauh lai ania, Azoi kha a lo kal khât a, a buai viau a ni maithei," Jeminai bawk chuan a ti leh a, an chiang lo dun khawp mai.

"Heng zawng zawng hi kan hre tawh a, keini pawh min hre tawh ngei dawn a, engtin nge hma kan lak leh tak ang?" Lawmsanga'n a tih chuan, "Hun kan nei tawh lo," Zoa'n a lo ti bawl a, "Engmah thleng lo anga awm chu a theih tawh dawn loh ania?" tiin Jeminai'n min rawn melh a, "Tihdan pakhat chu a awm a, police ten rem an tih leh tih loh a ni mai, mi dâwp hi a nazawngin an duh lo a, a harsa deuh maithei a ni," ka ti nawi niai a, kan ṭhiante pahnih awmdan tur erawh kan sawifel nghal a ngai tih ka hria.

"Zanin chu haw lo phawt rawh u, naktukah kan rel ṭha dawn nia," ka tih chuan, "Kei chu ka haw thei alawm, Minai hi hawpui mai ula," Lawmsanga'n a ti a, Jeminai ka en chuan Zohera a lo thlek vung vung a, pakhat lah chu a bu ringawt a, harsatna kan nei lo a ang.

Police ka biak tawh thu leh an lo kal dawn thu ka han sawi chuan Lawmsanga pawn a nghah ve tur thu a sawi a, car-a khawvar hun nghah kan rel ta bawk. Zohera chu a han hawi chho leh zauh ṭhin a, a khât tawkin a phone chu a en leh ṭhin bawk a, message an inthawn nge mawni.

A hnu deuhah chuan, "Ka zun a chhuak," chhak lama ṭhu chuan a rawn ti ta a, sawm ngai loin ka bula ṭhu lah chu a chhuak thurh a, hnung lam ami pawh a chhuk rang khawp mai. An lo lut leh mai lo, motor hnung lamah chuan an phun bal bal reng a, Lawmsanga pawh chuan a hrethiam aniang engmah a sawi lo a, ka han hawi apiangin a lo nui leh ringawt ṭhin.

"I zung ve duh em?" lo kun hnaih pah hian a rawn ti a, "Aih, bottle ruak ka nei," ka lo ti fiamthu zauh. "Eng a?" tiin a nui ri hawk a, "Ka zun chhuah hunah ka sawm ve dawn che nia," tiin ka fiam leh a, a nui ruh ruh mai.

Darkar khat zenzawn an thang hnu chuan an rawn lut ve ta hram a, engmah ti lo ang deuhin an han inbe zui lo ngei bawk a, Zoa'n a hmui a tuai a tuai bawk. "Zan a va rei duh dawn ve," ka va tih chuan, "Ka khalh a ni miah lo," tawi tea min rawn nuih pah hian a ti a, "Hrehawm kan ti lem lo a ni lawm ni," zawi tein ka va ti leh. 

Ani pawh chu a rawn thle hnai a, "Nuam ka tih i ring em ni?" a rawn ti sar sar a, "Pawn a lum nuam zawk chu a ang," ka'n ti leh hram a, eng emaw rawn sawi leh a tum laitakin a phone chu a rawn ri a, a en vung vung lai chu ka hmu. "I nu em ni?' tia ka zawh lah chuan, "Ni lo," tih pahin tukverh lamah a thle sawn a, a phone pawh chu a thukru deuh ṭut a, hnai vai deuh aṭangin call a dawng anih hmel, hahthlak angreng tak an ni.

Chutia Zoherliana ka biak a rem lo niawm taka a lan takah chuan ka ṭhutdan ka siam rem a, mit chhing chungin ngaihtuahna ka kawm a, ka thil hriat ho chu remkhawm ka tum a ni ber e. Buaina pakhat ka la nei a, chu chu pu Rochama'n pi Lalpuii te a bum chhan chu a ni. Pu Biakliana kha a ṭhian a ni a, pi Lalpuiite nufa ho lahin a ring tawk hle a, heng thil vang hian eng hlawkna nge a neih ang tih chu zawhna lian tak a ni.

Pu Biakliana kha a be pawp tak tak angem, a awmna a hria angem, heng pawh hi dâwt vek em ni ang?

Dâwt ni lo ta se zanina thil thlendan nen a inrem thei miah lo. A awmna a hre lo anih loh vek chuan a thi tawh emaw a ni thei a, anih loh pawhin a rawn inlan a duh miah lo tihna a ni thei bawk. A eng zawk zawk pawh chu nita sela engvangin nge hetianga pi Lalpuiite nufa hi a bum ang le?

"I muhil em ni Jenus?" Lawmsanga'n a rawn tih chuan ka hawi chho vat a, "Thil ka lo ngaihtuah a," ka ti mai a, "Keipawh," a tih chuan ka han en chik deuh a, "Eng nge i ngaihtuah?" tiin ka zawt bawk.

"Pu Biaka kha a lo thi reng tawh angem ka tia, Azoi pa hian a awmna a hre tak tak pawhin ka ring chiah lo, " a ti bul bul a, ka ngaihtuah ang tho a lo ngaihtuah ve anih hmel e.

"Thi tawh ta se Azoi pa hian a hria angem, a chanchin hi tuman an hre zui lo zawk angem?" ka tih chuan, "Farm khawi laiah emaw te hian a ruang hi a lo awm reng mai ang a?" nui deuh chung hian a rawn ti a, "Thah a nih i ring hmiah mai a ni maw," ka tih laichuan, "Anih duh hmel alawm, pa Chama thah te lo ni ta se, farm-ah te hian a lo phûm reng maithei asin," Jeminai'n a lo ti ve leh hlut a, Zoa a lo nui huk.

"Farm hi ka lai chhuak dap mai dawn em nia," keipawh chuan uang deuhin ka ti a, "Ngawi teh u, bawng in thlangah khan a lo phum reng aniang a?" Jeminai chuan a rawn ti leh hluai a, Zoa nen kan nuih mai mai laiin Lawmsanga chuan a lo ngai thutak aniang chu, "I kal a phal lohnaah khan maw, khawi lai tak nge ni a?" tiin a lo zawt a, pakhat chuan a lo hrilh zat zat.

"Thangkam nan chuan a hnai vai lutuk, thang hlauhawm ania, hnathawk hoin an rah palh loh turin hmun ual auah kan kam ngai lo, bawng in lamah chuan mi an kal vak lo a, thil phûm ruk nan chuan a ṭha viau ang," Lawmsanga chuan thutak zet hian a ti a, awih zan lo chunga ka han hawi chuan, "En chiang ang u, thil eng emaw a lo awm maithei asin," a ti leh ta zel a, keichuan a ngaihna ka hre chiah lo a ni.

"I rinhlelh chhan chu eng maw?" tiin kan ṭhianni chu ka han zawt leh rih a, a thil tawn leh pu Rochama mize inthlak thut dan a sawi chuan mak ka ti ve deuh. "Bottle chu a ak zui daih a maw?" lehhawi meuhin ka han ti a, ani lah chuan, "Ak e, a thukru deuh tlata ka hriat vangin ka en leh kher a, thil zum hriam deuh chhunna hi a awm a, a pawp laikha a awmdan a inang vek, hmun li velah a pawp bawk a," a ti a, "A hma khan engati nge i sawi loh?" ka ti khawl, tum loh deuhin ka ṭawng ring viau lehnghal.

"Min zawt hleinem," a lo ti pawr hlar a, "Zawh ngai loin sawi nachang hre ve ṭhin ta che, nichina i thil sawite pawh kha phone call-in emaw lo sawi tur i nia, a hnuah daih i sawi zel mai," ka ti ve leh a, "Zep pawh ka ni lo e, zep neih i ching lutuka zep ah min ngai anih kha," a lo ti ram hmak a, "Inhnial suh u, in duh leh zuk en ila, khawiah nge a awm?" Zohera'n a lo tih chuan kan chhang lo ve ve.

"En chu in duh lo em ni?" Zoa bawk.

Kan ngawih reng laiin, "Keichuan ka duh," Lawmsanga'n a lo ti mauh mai a, "Zan zanah, thang rah palh a hlauhawm lo em ni?" ka tih chuan, "A hnim viau loh chuan ka hmu thiam mai ang," tiin min chhang a. "A hnim lo, hnim awm chhun pawh a ro vek alawm," Jeminai'n a tih leh chuan mipate pahnih chuan an rilru an siam fel der tawh.

"Anih chuan kal ang u; mahse, hmanrua kan mamawh dawn," tiin Lawmsanga ka han thlek a, "Minai hoin lo zuk kal ula, hmanrua chu ka rawn la ang," a ti a, motor aṭangin a chhuk zui bawk. Keini pawh chu kan chhuk ve thuai a, Jeminai'n kalna tur lam a sawi chu farm in sir lam kawng ka la kal ngai lohna lamah daih a ni a, phone light kan tih ên ngam loh avangin a thim khawp mai.

Anni pahnih chu ka hmaah an kal a, thim zinga ka khawhmuh hi a han fiah lo khawp a, êng chhete tel lo chuan kal ka harsat ṭhin khawp mai. Mahse, an pen thawm aṭangin kalna tur ka hai bik lo a, ka inchhuih zing viau thung. "Ruang lo awm ta se, i hlau angem?" Jeminai'n a tih chuan, "Ruang a awm lo ang, ruhro a ni tawh ang chu," Zoa'n a ti bul bul a.

"Lo hrâng ta se, a thla pawh a lo awm thei asin," tiin pakhat chuan sawiṭhaih a tum a, "A hrân chuan ka vur leh daih ang," tiin pakhat chu a uang khawp a, an nui an nui mai.

"In kal chak deuh thei em?" ka va ti chu, "Min ti phu alawm," Jeminai'n a lo ti hluai, ka kal hnaih deuh bawk a, a koki zawnah ka va dak thut a ni ber.

"Kawng i hmu thei em?" tih pahin Zohera chuan ka ban a rawn vuan a, "Thei chiah lo, ka zui che u a, in kalmuang bawk si," ka ti ṭha ve mai a, "Ka kut hi chelh rawh," tih pah chuan ka kutah a rawn vuan a, "Jenusi hian thim hi a en thiam vak lo a," tiin Jeminai chu a hrilh zui a, pakhat chuan a chhang lo thung.

Rei vak lo kan kal leh hnuah Bawng in awmna chu kan thleng a, thing hmun a ni ta lo bawk a, a eng ve deuh uau tawh a, thla mang lai anih vangin hmuh thui erawh a har khawp mai. Vanah chuan arsi an de sep sep a, thli a thaw lo a, a vawtin a reh deuh tlawk tlawk. A khat tawkin bawng in lam thawm a rawn ri leh ṭhin a, ka ṭhiante pahnih lah chu an titi sar sar a, pakhat chuan a hlau deuh anih hmel. Lawmsanga lah chu a rei phian a, phone ka hmet êng sek tawh. Eng thil emaw hian min ṭham niin ka hria, ka hlau chu ka ti duh em lo a, chhungrilah min mawlh tu a awm tlat thung. Kan hlawhtling dawn em mawni le tiin ngaihtuahna ka nei a, ka zam ru riau bawk.

"Lawma a lo thleng," Jeminai'n a tih rual chuan ka hawi ve vat a, Lawmsanga aw ka hre zui zat. "Bawngtuthlawh leh suahdur ka rawn keng a, khawi nge i hman duh zawk?" tiin Zohera chu a duh a thlantir a, Zohera chuan bawngtuthlawh zawk chu a la a, Jemina sawina lamah kan inzui thla ta hlawm a.

Kawng chu a awih phian mai, mipa pahnihte chu kan hmaah an kal a, "Lo kal chak suh u, thang kan zawng pah dawn," Lawmsanga'n a tih vangin an hnung hla deuhah Jeminai nen kan kal thung. "Zawlah khan bottle chu a tang a, awih chin hi chu a him anih ka ring," Jeminai'n a tih laichuan eng emaw hi ka pal a, thang ka rap emaw tiin ka rak ṭhat, ka tluk rual chuan ka hmaa Jeminai kal chu ka tlawh palh a, han chelh beh ka tum viau nain ka chelh hman ta lo, thui lo te chu a lum a, "A na lutuk, ka ban i ti pilh," a tih ri chu ka hria.

"I na em?"

"Fimkhur ru," Zohera leh Lawmsanga'n an rawn ti a, "Ka tlu palh a, kan ṭha, nangmahni kha fimkhur ru," tih pahin ka phone light chuan Jemini chu ka zuk ên a, a hmel ka zuk ên fuh chu rum lutukin min lo melh.

"I ṭha maw, i insawh na em?" tia zuk kaihthawh mai ka tum chu a lo duh awzawng lo. "I tilui," a ti chang rap a, awmang lo ka ti lutuka, chhan ngaihna pawh ka hre lo.

 "I awmdan hi a ṭhing lutuk," tih pah chuan a tho zui a, a phone light chuan a kalna tur a ên a, a chhuk thla hmiah hmiah tawh mai. Mahse, mipa pahnih ten kal hnaih an phal loh vangin ko bulah a lo ṭhu a, keipawh chu ka zuk thleng thla ve thuai a, kan ṭhiante thil zawng buai laichu inbe loin kan thlir dun ta reng a, Lawmsanga chuan a zawng uluk viau a ni.

"Ka hmu e," a rawn tih chuan thawk ka lo la ham ham. Zohera chu rahna lai tur a hrilh a, a sût dan turte pawh an inhrilh zui a, "He ta pawh hi a awm," a tih ri leh, "A dang a la awm ania, a inhnaih hlawm lutuk, lo pen sawn suh," Lawmsanga'n a ti ri te chu kan hre pha ve reng a, "Fimkhur rawh u," tiin Jeminai'n a au deuh reng bawk.

"A va tam ve, a thangkam dan hian eng emaw hel kual a nei a nia," Lawmsanga'n a tih chuan, "A kualdan chhui ula, a laiah tinzawn rawh u," tiin ka'n hrilh ve leh a, an chetsual hlauin thin a phu dup dup reng.

Reife an beih hnu chuan an tinzawn tur an chiang thei ta a, keini erawh kal hnaih an la phal lo thung. "A zau hmel em?" tia ka zawh chuan, "Zau vak lo, thingkung hi a hel kual anih hmel hi, thingkung hi a ro tawh a, a puitlinna pawh a rei tawh ang, chuvang chuan thingzung awm lohna chinah kan lai dawn nia," tiin Lawmsanga chu kan lamah a rawn kal phei leh hret a, "Thang awmna leh thingkung awmna inkar lai tak vel aniang," a tihna laiah chuan a han ding ren rawn a, Zohera chu lai turin a ti zui bawk.

An han laidun ngat ngat a, pakhatin a vung a lo thehchhuak char char a, an kut a kham deuh hnuah an inlaih chhawk bawk a, mahse, rei fe an laih hnuah pawh engmah hmuh an la nei lo. "Tawlh sawn hret ang," tiin an laihna chin chu an tihzau belh zel bawk a, a changin thang an tiper thul, fimkhur turin kan inhrilh leh ṭhin a, engmah ti ve lo zawk chu kan hah zawk emaw tih tur a ni.

Rei fe an laih leh hnu chuan "Eng emaw ka chek fuh ania," Zohera'n a rawn ti ta. Rang lutukin phone light chu ka ti êng ve nghal a, khur aṭanga Zohera lo chhuak lai chu ka va hmu bawk. "Nangman zuk hai rawh," tiin Lawmsanga chu a nam a, khura Lawmsanga chhuk chu a rawn lang leh mai lo. Ka awmna aṭang chuan ka chhuk ve sawk sawk a, an thang sûtna hnu zelah chuan kalin an khur laihna ka va pawh a, Lawmsanga chuan a lo la hai mawlh mawlh. Ka zuk kun hnaih laitak chuan lu ruh niawm tak hi a hai chhuak a, "A khabe i chêk thlawn alawm," tih pahin a rawn lek kang a, "Ka en duh lo," pakhat chuan a lo ti khawl.

"Zoa, ka lo kal ngam lo ania," kan piah aṭang chuan a rawn ti lang lang a, Zohera chu a lehhawi vut a, "Lo kal suh," tih leh va pan a rual a, Lawmsanga chuan a la hai mawlh mawlh thung.

"I rawn en chiang duh em?" a tih chuan ka hnial lo, ka chhuk tur chu min lo pui a, "Mipa ruhro a ni em?" tiin ka zawt bawk. "Um, mipa ngei a nih hi, a luruh hnung lamah hi a keh a, a tukkhuma chhut hlum anih duh hmel," tih pah chuan a rawn lek hnai a, ka khawih duh lo nain ka en chik khawp mai. 

"Engtin nge kan tih dawn le?" a ti leh chu phur hmel tawh tak a ni. 

"Mu lo law law mai ta che," tih leh khur aṭanga chhuah ka rual a, "Kan la chhuak dawn em?" a tih chuan a ngaih loh thu ka hrilh a, kan hnuhma an hmuh a hlau deuh a ni maithei, "Vur leh tur nge?" tiin min zawt a, a ngaih loh thu bawkin ka chhang a, kan hnuhma hmu hman tur tumah an awm ka ring lo, hma taka kan chêt chhuah dawn vangin. "Lo ên rawh, thla ka lo la lawk ang," tiin ka han hrilh leh a, camera chu vawi khat ka hmet a, ka duhtawk viau a ni.

Kan car dahnaa kan let leh chuan dar 2 a lo ri va va tawh. Ka ṭhu fel deuh chiah tihah ka phone chu a rawn ri a, number hlang tawp a ni naa ka mi beisei a nih ringin rang deuh chuan ka chhang a, a lo ni ngei bawk. Ka thlalak thawn chungchang kha min rawn zawt a, "Hei, an ngaithla vek che," a tih bawk avangin kan hmuh chhuah dan leh kan mi rinhlelh mek chungchang chu kim thei ang berin ka han hrilhfiah a, zawhna an rawn nei mawlh mawlh hlawm. Min be tute chu mi pathum pali vel lai an niin ka hria, "Dar 5 velah kan rawn thlen hman kan ring," ka aw hriat ṭhan ber chuan a rawn ti a, midang aw chuan, "I ti ṭha lutuk, kan beisei phak bak a ni, i fing hle mai" an rawn ti bawk a, "Ka ṭhiante min puih vang chauh a ni," tiin ka chhang ve thung.

Kan inbiak laireng chuan ro an rel a, ṭhenkhat chuan khauh deuh taka dâwp hmasak an duh a, an vaia koh khawm an rawt bawk. Pakhat chu biak fal ka duh ru viau naa a ṭawng tam lo berah a ṭang thunga. Lawmsanga'n biak ve a duh thu a lo sawi chuan incharge niawm tak chuan a rawn chhang a, rei vak lo chu an inbia a, Lawmsanga chuan damdawi hman sual chungchang daih ania a sawi ni. 

"An be duh che?" a rawn tih chuan phone chu ka ban leh vat a, ka han chhân chuan, "Wine chungchang chu engtin nge i ngaih tâk?" tiin min rawn zawt a, min betu chu tunge a nih ka hai lo.

"Kan bul ṭanna ania; mahse, ani buaina hi chu wine leh chhungkaw thil neuh neuh chauh anih hmel, Hotel lam pawh khan wine chauh hi an buaipui niin a lang bawk," tiin pu Muana leh hotel lam inrawlh dan ka hriat ang ang chu ka hrilh a, "Tualthahna chu mipakhat thil thup duh vang niin i hria a ni maw?" tiin min zawt leh a. "A chhan tak hi ka la hrethiam lo khawp mai, farm neitute chhungkua hi a hua em maw ni dawn le?" ka tih chuan, "A letling thawk lo ni ta se?" a lo ti khauh a, a ngaihdan chu ka hrethiam ve nghal a, ngaihtuahna a buai map mai.

"Inngaizawng rim a nam riau," ka tih chuan, "Hmangaihna khingbai lam pawh a ni maithei," a ti ve thung a, chu pawh chu thil ni thei tak a ni. "I lo ngaihtuah dawn nia, naktukah chuan incharge i nih a ngai dawn a, i rindan ringawt ni loin a tak tak anih a ngai tawh ang," nghet charh hian a ti leh a, midang an lo ṭawng vangin ka chhang ta lo.

Kan inbiak zawh hnu chuan kan han sawi ho leh nak nak a, tum reng vanga tualthahna nge tihpalh thil tih vang zawk tih chu an zawhna a ni. "Pu Biakliana thihna chu tum reng vang emaw, tih palh thil pawh nise Jeminai pa leh in ṭhiannu thih dan zawk kha kan buaina ber tur a ni, pu Biakliana chungchang vang emaw wine vanga thi an ni thei a, dâwp thiam a ngai khawp ang," Lawmsanga'n a rawn tih chuan ka ngawi ran a, midangin ngaihdan an sawi laiin kei chu ka la inngaihtuah buai khawp mai. Police ho khan ka chinfel turah an dah dawn anih hmel a, mr.Know-a lah khan rin thu ringawt a tâwk dawn lo thu a sawi bawk a, ka ngaihdan apiang chu thudik anga ka pho chhuah a ngai tawh dawn tihna a ni.

Dar 3 pelh hnu chuan khua a vawt zual khawp a, tumah muhil kan la awm lo. Kan mipate pahnih pawh chu an chau aniang an ṭhu ngawi hle hle mai a, Zohera erawh zial zu turin a chhuak leh zauh ṭhin. Sana chu ka en sek a, minute tin chu ka chhiar a ni ta ber. Rei vak loah chuan ruah a sur a, a tla tam lem lo thung a, kawng tinal tawk vel lek a ni.

Khaw var hnuah car aṭangin ka chhuk a, Lawmsanga'n min rawn zui ve nghal bawk. Nimbu huan lampana kan kal laichuan police hnena a thilsawi chungchang kha ka zawt a, "Ka tih tur dik tak ka tiin i hre ve em?" tiin min zawt lêt khauh a, ngaihdan ka nei lo, inrawlh ka tum lem lo a; mahse, ka thlawp thei viau thung a ni.

"Khalam chu excise and narcotics dept lam chanah ka lo ngai a," fiamthua ka tih chuan, "Minai pa duhdan pawh anih ka ring, heng thil hi awm lo se i ṭhiannu pawh kha a talbuai kher lo ang," tiin min chhang a, a dik reng mai, he buainaa Veroi tal luh ve chhan ber pawh a ni.

"I pa a awm loh chuan engtin nge i awm tak ang?"

"A tel loin kan awm reng ṭhin zawk alawm," 

"Nuam i ti chiah lo chu anih kha,"

"Nia, ka pa a ni miau a," zawi ruih hian a ti a, chhang zui loin tlanga ni chhuak tur lam chu ka thlir a, thawk ka la ham ham bawk.

Ka phone a rawn ri a, kan ṭhiante call a ni thung. "Police an lo thleng ania," a rawn tih vang chuan hmanhmawh deuhin kan lêt a, kan va thlen chuan jeep leh bolero pakhat hi  kan car dahna hnungah a lo ding vang tawh a, police ho chuan ka ṭhiante pahnih chu an lo be mek bawk. 

"Nangmah hi maw Duhawmi?" pakhatin a lo tih laichuan a hnung lama bolero chu ka va thlek a, tukverh aṭangin ban a rawn vai zauh mai.

"I chanchin kan rawn sawi kawngtluan a, kan rin aiin i la naupan hmel lehnghal," tih pahin min rawn chibai sap sap. "Changtunu ah kan ngai che ania, a hrilh tawh che tiraw, Chhuansanga nau i ni bawk a, kan ring tlang law law ang che," a thu hmel ber chuan a ti leh a, chutih laichuan bolero-a chuangte chu an rawn chhuak ve mek a, a lo kal hmasa ber chu mr.Know-a lem changtu kha a ni.

An lo kal hnai chu ka lo en reng a, kan ṭhiante pawh hnung lamah an lo ṭawng ve barh barh hlawm a, ruhro kan hmuh chhuah dan kha police ho chuan hriatnuam an ti viau anih hmel. Ka hmaa rawn ding lah chuan mi a nuih tawi tuk a, "A ni lo lam aṭangin i ṭan a ni maw?" a tih laiin a hnunga mi zawk chuan kutzungpui min lo hmuh zauh a, ka hmaa ding chu kalpelin ka va pan ta bawk.

"Hmangaihna khingbai chungchang kha..." tih chiah ka sawi hman, "Pitar chuan engmah a la hre lo anih hmel kha, a hmaa ka thil hrilh ang che kha tunah hian a tih chi chiah ang," a lo ti vat a, ka ruahmanna min pawmpui tih a chiang viau mai. 

"I lo ṭawng ve dawn em?" ka tih chuan, "Ngaithla tur chein alawm ka lo kal, inringtawk ta che," nui chung hian a ti a, a mak angreng, min ring tih ka hriat vang chuan ka inrintawk phah sawt a, han zâmna pawh ka nei ta lo, chuti chung chuan, "Ka tihsual lai tal i lo ti dik ang chu," tiin ka'n sawm ve leh hram a, min chhan loh danah min hnial lo anih ka ring.

"Ruahmanna han siam rawh le, i sawi ang ang kha kan awmdan tur a ni mai," a thu hmel ber khan a rawn ti leh a, "Mr.Know-a tih ṭhin dan em ni?" ka tih chuan a bu zauh a, pate rual an nih hlawm avangin han tirh kual chu a nuam chiah lo. Ka thlek kual thuak thuak a, police pakhat bula ding chu ka va en ran ran, ani lah chuan mithmul tikang ûr chungin min lo en let a, "Lawmsanga nen ruhro kha in lo zuk la chhuak dawn nia, Lawmsanga hi nizana laichhuaktu a nia, thang a la tam avangin a kalpui ang che," ka ti chu min rawn melh rum titih.

"A bâk zawng chu kan kal thei tihna em ni?" An hotupain a tih leh chuan, "Minai leh Zoa ten Azoi te pafa lo va ko ula, midang zawng chu inah kan tlang thei a ni mai," ka ti leh zat a, "Ti ru le, i'n che chhuak teh ang u," hotupain a tih chuan an motor lam an pan ta sap sap a. Mithmulpira khan mi chhuahchhal hmelpu fe hian min rawn en a, ka en rei duh lem lo.

A tlan chhuak hmasa berah kan ṭang a, farm kawt kan thlen chuan tho an awm tawh tih hriat takin an kawngkhar a lo inhawnga, motor thawm hriain Putara a rawn lang rang khawp mai. Chutia, a hmelhriat loh pui pui an kawta rawn chhuk ta chu phawk fe hian a lo thlir a, thil awmzia erawh a hriatthiam ka ring. Hotupa kha ka bulah a rawn kal hnai a, midang chuan min ngaichang ṭhap bawk a, in lam ka pan rualin min lo zui thuai bawk. 

"Tute nge ni hlawm?" Pu Muana'n a lo tih chuan, "Police an nih hi, midang an tho tawh em?" ka ti vat a, "La tho lo," a tih chuan kaitho turin ka hrilh a, Lawmsanga awmna min zawt leh zat. Chutih laichuan Lawmsanga te chu an lo kalsawn tawh a, "Thil an la dawn a, an lo thleng har lo ang," tiin pu Muana chu ka han hrilh ve leh a, a zâm ru deuh tlatin ka hre mai.

In chhung kan luh hnuah a chhungte pawh chu a va kaitho hlawm a, an rawn hrilhhai viau hlawm. Hotupa khan thil awmzia a lo sawi zung zung a, "Tualthattu kan hre tawh," a ti hmiah mai si a, chiang mang loa indâwp theih a ni tawh lo, keipawn pehhel loa ka sawi a ngai ngei ang, chu mai ni loin ka sawi apiang an rin theih nghal a ngai dawn a ni.

Pitari lah chu a han bangbo fal khawp a, "Tualthattu chu tu maw ni a?" tiin pu Muana a lo zawt sek sek a, "An la sawi lo," pakhat lah chuan a lo ti tlawng. "Kan chhungkaw zinga mi em ni a?" tiin nu Nguri'n hotupa kha a lo zawt ve bawk a, hotupa lah chu a lo insawi awk deuh tawh si a, ka lam rawn hawiin min mitmei zuk zuk a, a nuihzatthlak duh angreng.

Chutia kan lo rik barh barh laichuan, "An lo thleng e," kawngka lam aṭangin an rawn ti a,  chu veleh kawngka lam kan hawi ṭhap a, Azoite pafa lo lut chu an hrilhhai hmel viau a ni. Pu Rochama chu ka lo en chîk deuh a, a ṭawng hmain pi Lalpuii chu a va thlek hmasa zet phawt a, chumi hnuah, "Engtizia nge ni, zing zingah min rawn koh tak mai?" tiin pu Muana lam a hawi a, pu Muana chuan, "Hei...tualthattu an chhui chhuak tawh niawm tak a ni," tiin chiang ngam lo zet hian a lo chhang a, chuta pu Rochama hawina lam chu ka en rang khawp mai.

"Ṭhu chungin sawi ang u," hotupain a rawn tih chuan nu Nguri'n sitting room lam a lo kawhhmuh vat a, "Kan zingah hian a awm ve em ni?" tiin putarate nupa chu an la buai viau bawk. Midang ruala kal ve mai ka tum chu mr.Know-a khan ka kawrah a rawn pawt a, "Ding chungin, an mitmeng leh an chezia i chîk dawn nia," ka beng bulah a rawn ti a, nichina thil thleng kha a lo hmu ve tho anih hmel.

An han ṭhutfel hnu chuan police ho chuan ka lam an lo hawi ṭhap a, chutah hotupa chuan, "Kan nulatê hian thubul phochhuahna han nei hmasa rawh se," zangkhai zet hian a ti a, "Lawmsanga farnu chuh, eng nge a awmzia?" nu Nguri'n a lo ti he haw. Midang chu an ngawi ran mai a, an chhungkaw zinga thil hre ve lo awmchhun a nih mai hmel, Azoi te pafa takngial pawhin min hre tawh anih laiin..

"Police tana thuhretu ang ka ni mai, tualthattu kan sawi hmain thil sawi hmasak duh ka nei a, in beisei loh deuh deuh ka sawi maithei a, sawi ve duh in neih chuan in sawi nghal dawn nia, zawhna in neih pawhin min zawt thei ang," nu Nguri lam en chuan ka'n ti hmasa te te a, midang chu ka melh kual zui bawk.

Ka sawi tur ngaichanga min en rengtu Pitari chu ka va kal hnaih a, "Ka pi, i pasal kha a la dam tih fiahna i nei em?" ka'n ti ṭan phawt a, a hamhaih hmel hle. 

"Ka pasalte chu..." a tih rual rual chuan, "I pasal hlui ka tihna, pu Biakliana kha a la dam tih i chiang em?" ka ti leh zat a, "Ka hre nang, kan inbiak lohna a rei lutuk tawh," a ti ve vat a, dawt sawi ang pawhin a lang lo. 

"Mahse, midang kaltlang chuan in inbe fo a ni lawm ni, aizawlah pawh hmu tura kal i tum niin kan lo hria asin," A ṭhu ngil deuh at a, "I fapa nena in sawidun laikha hretu kan nei alawm," ka tih leh chuan a fapa lam a hawi a, keiin Minai ka va melh thung.

"A la dam ni chuan kan hria a, kan la hmu lo, chu chu eng nge a ṭangkaina?" Pu Dinpuia'n a lo ti hluk hluk a, "A bul aṭangin kan sawi ṭha ang," ka tih chuan tukverh zawna mr.Know-a ṭhu pawh a lo bu ve nghat a, ka sawi ṭanna lai tur chu rindan a ni ta.

"I pa khan fapa a neih loh vangin a makpa kutah a innghah a ngai a; mahse, i pasal kha a mil lo a, a zuin reng kha a ngaithei lo hle bawk a, tuna i pasal hi a duhpui zawk daih che a, in inṭhen theihnan hma a la ta anih hmel," ka han tih chuan min hnial hmel a phu lo, chung thil ka han hria chu mak a tih hmel hle zawk a, ka rindan pawh a la dik chhoh hmel hle.

"Tichuan, in farm-a hnathawk pakhat lo kal ve ṭhin kha i pasal dâwta puh turin a ruai ta a, chunu chuan i pasal chu hrai ruia pawngsual angin a puh zui a; mahse, police hnenah thlen loin i pa khan a sawifel pui leh ta anih kha. Khami hnua in nupa kar chu ka sawi kher ngai loin i hre sa a, inṭhen i duh takah chuan i pasal pawh khan a tlanbosan ta che niawm tak a ni.." ka ṭawng leh dawn laitak chuan pu Dinpuia a lo inrawlh a, "Ka pa kha dâwta puh a ni tih engtin nge i hriat?" a tih chuan ka chhang duh rih lo.

"Lo ngaithla zel rawh," tiin ka'n sawi zawm leh a.

"I pa thiltih kha tuna i pasal pawmlai hian a hriatpui lo a nih hmel, pi Ringzuali hnen aṭangin i hre ve chauh a ni tiraw?" tiin pu Muana lam ka va hawi a, "Aw, an nufaa an sawi dun lai ka hria a, ka va hmu nghal alawm, pawisa pawh ka pe nual," putara chuan a lo ti ve vat a, pitari te nufa hmelah mak tihna ka va hmu thei.

"I pasal kha thil a ruk hnua tlanbo angah rei tak chhung chu i ngai hman a, i huat vangin a chanchin pawh i ngaihven ngai lo a, pasal fanau te nen lungawi taka i awm tawh hnuah a chanchin i hre leh a, dâwta puh a nih thu hrilhtu che an awm vangin pi Ringzuali i va hmu bawk. Mahse, i pasal chu i hmu lo a, amah i be ngai lo bawk, a awmzia chu i mi rin em em hnen aṭanga thu i dawn ṭhin vang a ni," tih pahin pu Rochama chu ka va kawk zauh a, "Ani hian dâwt hlir hrilh ta che sela engtin nge i ngaih ang?" ka'n ti fiah fak a, chutih laia Pitari hrihhai hmel chu hmuh a nuam hran lo khawp mai.

"Chama nen chuan an inbe reng alawm, naupang ho chanchin te pawh a rawn zawt ṭhin a, a fate a ngaihtuah khawp asin.." Pitarin a tih chuan, "A bum che anih kha, i pasal kha a be ngai hleinem," ka lo ti khawl a, pu Rochama lah chuan, "Dâwt dâwtin min puh suh," a rawn ti ve ngawt a, "Anih chuan tunah i call thei ang chu ti raw?" ka lo ti vat a, a ngawi zui chiang hle.

"Dâwt i hrilh ngai lo a, i be thei tak tak anih chuan tunah kan vaia kan awm laihian be rawh," Min chhang loin min en ngur a, min huat hmel khawp mai.

"Chama, han be teh," Pitarin a tih laiin, "Ka pa biak chu eng nge a ṭangkaina, in thil chhui lainen a inzawmna ka hre miah lo ania," pu Dinpuia'n a lo ti ve leh a, ka chhan hma chuan choka lam ka va thlek a, Lawmsanga ding ka va hmu bawk.

"I pasal hlui biak i duh thu i sawi apiangin chhuanlam a siam ṭhin em?" ka tih lehchuan Pitari chu a ngaih a ṭha vak tawh lo aniang pu Rochama chu a melh leh vang vang a. "I hriat chhuahna a rei tawh a, i rilru pawh a kir vek tawh a, in inkar ṭha leh thei reng anih laiin i beisei angin hma a rawn la lo a ni lawm ni?" tiin ka han zawt leh a, "I be lo em ni Chama?" a ti zawi ta raih a, pakhat lah chu a ngawi run a, a bula ṭhu a fanu pawh chuan a en ran bawk a, ani erawh chuan tumah a melh duh tawh lo. 

"A be lo, i pasal thiltih anga puh a duh vangin i pasal hlui chungchangah dawt a hrilh ṭhin che anih kha, pi Ringzuali pawh kha a thawhpui a nia, in nupa hian an bum char char che u, i pasal chu kan be tawh a, ani hnen aṭangin thil awmzia chu kan hre vek tawh e," ka tih chuan Pu Rochama chu a rawn hawi rang khawp mai. "Pu Biakliana kha a duhthua tlanbo a ni a, pawisa a ruk hnuah a tlanbo a, vawikhatmah a fate a ngaihven zui lo a, biak a tum ngai lo bawk, a nupui leh tuna a pasalte inkar tih chhiat nan dawt i sawi kual a, anni nupa inkar a chhe zui ta bawk anih hi," ka tih leh chuan, "Nang khan dâwt i sawi, ka thil sawiah khan dâwt engmah a awm lo, Ringzuali chungchang phei kha chu thudik tak vek a ni," a ti pawr hlur a, a thinrim bawk aniang a aw te chu a sehchilh lek lek a, a kut a hum ruh viau bawk.

"Amah pu Biakliana sawi dan hi a rintlak zawk," ka tih chuan, "Biaka'n a sawi lul lo ange, nangmah khan dawt hlir anih kha i sawi," a ti leh hluk a, "Engtin nge kan be lo tih i chian theih?" tia ka zawh chuan ṭawng a tum zuau a; mahse, a sawi zawm lo, a ṭawng sual tih a inhria a ni ngei ang.

"Kan be lo tih i hria," 

"In be lo maw...eng nge i thil sawi chu.." zaizirin Pitari chun ka lo khap vat a, "A chhan chu a awmna i hriat vang a ni, kan be thei lo tih i chiang khawp alawm ti raw?" tiin pu Rochama chu ka en kal a, min chhang duh hauh lo mai.

"Ka pi, ani hian i pasal hlui awmna chu a hre ngei alawm, han zawt ta che," Pitari lam hawi chuan ka han ti leh a, a fapa zawkin a lo zawt thung.

"Khawiah nge ka pa chu a awm?" pu Dinpuia'n a tih chuan, "Hei, bia anga insawi te hi zawt ta che," a lo ti vin hluk a, "Bia angin i insawi hmasa zawk alawm, nangman chhang rawh," ka lo ti ve leh zat.

"Ka dâwt sawi chu ka pha lo ang, a awmna ka hre lo, a tlanbo hnuah a chanchin ka hre zui tawh lo," a ti ve duh ta hram a; mahse, chu erawh ka thil chân a la ni lo, Pitari nena an inkar chinfelna chauh a la ni rih.

"I be ngai lo tak tak a maw?" a tih laia pu Dinpuia aw chu a chang ṭha khawp mai. 

"Dawt a hrilh chhan cheu hi ka ngaihtuah neuh neuh hian ngaihdan pahnih ka nei a.." ka tih leh laitakin pu Dinpuia chu a rawn ding vut a, "Hepa hian sawi zo phawt rawh se, ka pa chu a la dam i ti a ni lawm ni, a awmna pawh i hriat thu i sawi kha," tih pahin pu Rochama chu a va dinchilh el awl a, pakhat lah chuan engmah a sawi duh tawh si lo. "Ṭawng ta che?" tih paha zuk pawh thawh mai a tum chu police pakhatin a lo dang a; mahse, pu Dinpuia chu a la inbengdai hleithei lo. Ka rilru chu a buai ve map a, mr.Know-a ka va en ringawt.

A mitmei ka hmuh takah chuan, "I pa awmna a hre lo, a thil hrilh zawng zawng che kha dâwt anih kha," ip ru ṭeuh chungin ka ti ve leh. Chutah, pu Dinpuia chu a che leh thut a, pu Rochama bekah a hnek sawk mai. "Nangmah vang hian.." tih chiah a sawi naa rindan ka neih ruk erawh a fiahta vek thung.

"Minai pa thih chhan kha i hria a ni maw?" ka thusawi chu ngaihsak loin pu Rochama chu a pawt tho a, vawi hnih chu a hnek leh hman. Police chuan choka lamah an pawt phei a, pu Rochama pawh chu police dangin an rawn ṭhutchilh ta bawk. Ka sawi leh tur an ngaichang naa ka ngaihtuahna a mang angreng khawp a, sawi mai tur pawh ka hre lo a ni.

Ka awmdan hrethiamin mr.Know-a chu a rawn kal phei a, "Tualthahna thlen zan khan  farm-ah i awm lo ti raw, i awm tih hriatpuitu i nei em?" tiin a rawn zawt a, a fanu chuan a pa chu a en ve ran a, a hmelah chuan chhanna hlir a lang tawh.

"I awm lo, tualthat turin Aizawlah i kal daih alawm, choka ami sawn a hriatpui bawk che a, a pa vangin a zeppui bawk che a ni. I bum tih a hriat vanga thinrim a ni bawk," awki damdapa mr.Knowa'n a tih chuan an thum nghal huk a, han khapdaih mai pawh an har. Jeminai chuan a nu chu a rawn ṭhutchilh ve chat a, a monuin Pitari chu a rawn ngaihven bawk a, pu Rochama fanu ṭap erawh tumah hnemtu an awm lo.

"Engvang nge?" tih zawhna chu, "A hrechhuak alawm," tih ringawtin a chhang a. "I dang thei reng alawm, hre chhuak pawh nise i dawt sawi kha jail tan phahna khawp a tling lo a, tuna i pawm awlsam dan ngaihtuah pawhin kha thil vang ngawta that i nih hmel loh," mr.Knowa'n fiah fek fawka a tih chuan, "Thil pawi zawk hriat a nei tihna anih kha," ka lo ti vat a, "Ni e," mr.Knowa'n a lo ti ve zat . Anih chuan, pu Biakliana chungchang hi Jeminai pa khan a hria tihna a ni.

"I thil phûm chungchang kha a hria a ni maw?" ka ti chu min rawn en leh rang khawp mai. "Thirthanga i hual chhung ami kha nizan khan kan laichhuak a," ka'n ti zui leh zat a, a meng zau deuh kawk. "Headmaster khan a ringhlel chauh zawk anih hmel, a la dam em fiah tumin Aizawl a pan a, hepa hian thil awmdan tur a hriat vangin a zui ta bawk," tiin mr.Knowa'n ka zawhna a rawn chhang a, zawhna dang ka la nei tlat...

"Jeminai pa khan i thurûk a hria a, chuvangin i that ta a..mahse, engati nge Veroi kha i thah tel ve, a lakah khan eng buaina nge i neih a?" ka aw chu a lawi lek lek. Ani lah chuan min en kur a, engtin mah min chhang duh lo.

"Vuak deuh a ngai dawn a ni maw.." hotupain a rawn tih chuan a fanu kha a lo kal hnai sawk sawk a, "Sawi mai rawh pa, engtin mah an ti lo zawk ang che, in puang mai rawh," ṭap chungin a rawn ti ve lawm lawm a, police pahnih lah chuan a rawn dinhnai tuau a, kutthlak an hreh loh hmel khawp mai.

"Insawisaktir lo zawk teh..." a fanu chuan a ti leh tlawk tlawk a, chutah pu Rochama chuan thawk a'n la hluai a, a zam hmel erawh hmuh tur a awm tawh lo, 'Ka pawm vek e' ti hmel hi a pu ta mahin ka hria.

Chutah chiang zet hian min rawn melh a, "Roliana khan zirtirtunu kha a lo hrilh hman a, ka that ve lo anih chuan man chhuah ka ni nghal dawn a, hotel-ah khan ka ko phei ta a ni," a tih chuan mit ka chhing sawk.

"Tichuan a phone-in nula kha i ko chhuak a; hotel a lo thlen chuan mipa zawk kha chu i that fel tawh a, bathroom-ah aniang ti raw, i hnuhma pawh hmanhmawh lo takin i tifai a, anih nula kha engtin nge i thah, a rui a, a chi a chhuak bawk a, a chhan han sawifiah teh le..?" tia lo zawttu chu mr.Know-a a ni.

"A rawn rui sa, khuma Roliana mu kha a thi tih pawh a hre nghal mai lo, a rawn be bawrh bawrh a, a hnung lam aṭangin ka nem thlu a, ka vit zui ta mai a ni," tiin a chhang a.

"I khawih em?" tia ka zawh chuan lu a thing vut.

"Aih, a chi a chhuak in tih chu ka hre ve lo," a ti ram hmuk a, Zohera ka va melh ringawt. Ani lah chu bang nghengin a lo ding a, a ngaihtuahna a mumal loh hmel khawp mai.

n

Midang ho chuan thil an la hriatthiam loh vangin mr.Know-a chuan a han hrilhfiah dap dap a, pu Biakliana ruhro kan laihchhuah thu a han sawi chuan Pitari chu a ṭap vawng vawng mai. Pu Dinpuia lah chu a rawn tlan phei rawk rawk a; mahse, a chêt hman hmain an lo dang thung. 

"Engvanga that nge i nih?" hotupain a han tih chuan, "Tum reng vang a ni lo, a wine siam kha hralhna tur ka hria a, a phal tlat lo kha kan inhnial deuh a, ka thinrim khan ka nam thlu a, lungah a tukkhum a sawh a, tihpalh thil liau liau a ni," tiin felfai angreng deuh hian a chhang leh a.

"Tuma hriat loh turin a ruang i phûm a, tlanbo anga lang tura duh chhan i nei ti raw?" mr.Knowa'n a tih chuan Pitari lam a va melh a, "I tum angin thil a kaltluang thei meuh lo a ni maw?" mr.Know-a chuan a ti zawi leh sup a, hmangaihna khingbai chu anih mai hmel.

Pu Rochama chuan hetiang hian a han sawi zawm a, "Lalpuii hi ka tleirawl tirhin ka hre tawh a; farm-a ka awmchhan pawh a ni, ka ngaizawng tih pawh Biakliana khan a hria a, min tihpui tur anga insawiin a nei ta daih a, an inkar tihchhiat kha ka tum reng ṭhin, zu ka in pui a, zu ngawl a han vei hnu khan a puzawn khan a ngai thei ta lo a, a puzawn thil tihdan pawh kha ka hre vek; ka nei thei lo anih chuan nei bik lo sela ka duh vangin Biakliana kha a hrilh duh lo anih kha.." nghet charh hian a ti a, han sawi tîm leh sawi hreh vak pawh a nei tawh loin a lang.

"I lo va han tenawm em em ve maw le.." pi Lalpuii'n a lo tih laiin, "Ka pa nena i tihbuai chhan pawh a ni maw?" nu Nguri'n a lo ti ve khar khar a, pu Rochama chuan a melh duh lem lo thung.

"A thih takah chuan chance nei turin i lo inngai ngei anga; mahse, pasal dang a nei leh ta si a..." Mr.Knowa'n a tih chuan, "Chutiang rilru ka pu ngai lo, keipawn nupui leh fa ka nei alawm, phuba lak chiah ka duh," tiin a chhang reuh a, ka helh angreng khawp mai.

"Ka pi hi i hmangaih loa, i hua tihna anih ber chu," mr.knowa bawk a ni.

"Hua e, a pasal boral hnu lawkah pasal dang a nei leh a, a pasal laka inthiam lohna emaw, ngaih zuina nei pawha a awm ngai lo te kha ka hua alawm," pakhat lah chuan a ti ve hmiah a, Pitari pawh a thinrim ngang aniang a rawn tâwng ve nghal bawrh bawrh.

"I rilru a va chhe mai mai ve, ka pa nen kan lainat che a, inhlawhna te pe chein chenna tur inte kan sak sak che a, i nupui fanau te chenin kan enkawlpui che, hetiang hian ani maw mi i lo rulhlet a, mi rapthlak tak i lo nih hi.." pitar chuan a ti tawn tawn mai a, a khur dar dar bawk nen a khawngaihthlak reuh khawp mai.

"Kan zoin ka hria, zawh duh te i la nei em?" tiin mr.Know chuan min rawn zawt a, ka ngawih vang vang hnuah zawhna pakhat ka zawt a, "Veroi i that kha inchhirna tlem tal i nei em?" tiin.

Ani chuan, "Ka inchhir khawp mai, ani kha huatna engmah ka nei lo," tiin min chhang a, rilru a dam phah lo takzet. "I ṭhiannu tih ka lo hria a, min ngaidam dawn nia," a tih leh chuan ka hawisawn vat a, "A pasal tur hnenah sawn ngaihdam dil zawk rawh," tiin Zohera ka va melh a, Zoa chuan lu a lo thing ringawt. 

"Na a tuar rei lo, a lo lut khan dawhkana wine kha a in a, khuma mu kha a be mawlh mawlh a, kei parda phenah ka ding a, vawikhatmah hlauthawngin a awm hman lo," tiin Zohera chu a hrilh a, "Ngawi tawh rawh," a tih hnuah Zoa chu a chhuak nal nal a, Jeminai'n a um zui thuai bawk.

Police ho chu an inrawnkhawm a, Putara te nupa chu an titi pui bawk a, Pitari duhdan angin pu Biakliana ruhro pawh an kutah an hlan nghal a, keini chu kan haw thei a ni ta reng mai. Zohera ngaihven turin pawn lam ka pan a; mahse, veranda ka va thlen chuan Jeminai ṭap ka va hmu a, Zoa zawk chuan a lo hnem mawlh mawlh a, ka va pawh duh ta rih lo. Lawmsanga erawh police ho puiin a buai zar zar a, tuman min zawt lo nain ka ipik churh mai. Kan chinfel hunah chuan ka hahdam huaiin ka ring a; mahse, a ni hauh lo, ka chhungrilah hian eng thil emaw hian min ṭham a, ka hriatthiam loh min mawlhtu awm.

"Duhawm, kan rualin i haw duh em?" tia mr.Knowa'n min zawh chuan ka ṭhiante ka nghah tur thuin ka chhang a. Jeminai lo lut lah chu nu Nguri nen pindan lamah an inzui thla a, Zohera'n a zui ve bawk. Pu Dinpuia chu an hruai tel ve dawn avangin in neitute chhungkua pawh an la buai khawp mai. Tualthattu hrereng chunga a zep vanga hruai tur an ni a, a nu chuan a hrethiam lo hle a, hotupa hoin an hrilhfiah laih laih hlawm a, engmah ka tan va sawi ve tur a awm tawh lo.

An chhuah fel hnuah ka ṭhiante pawh chu an rawn inpeih a, "Aizawlah ka hruai haw dawn," tih chu Zohera thutlukna a ni. Nu Nguri chuan a remti vak lo anih hmel a; mahse, Jeminai'n zui a tum bur thung a, an in dang zui ta lo bawk.

Keipawh ka thlen inah chhoin ka han insiam ve a, Lawmsanga'n min lo khungfel sak diam tawh hlawm a, han insiam vak tur pawh ka nei hran lo. A nu leh pa chu ka mangṭha a, lawmthu te pawh ka hrilh ve luam a, ka lakah an lawm zawk fe emaw tih turin mi an ui der a, a nu phei chuan tlawh leh turin mi a chah lawm lawm mai a; mahse, ka kal leh erawh ka ring tawh lo a ni.

Lawmsanga chuan kan motor dahna bulah min lo nghak a, a bul ka thlen rual chuan, "Zanin lamah hotel an dap dawn a, helam pawh kan la buai ka ring, i la châm thei lo em ni?" inthlahrun hmel deuh hian a ti a, "Ka buaina tur a ni tawh hleinem," tih zawngin ka chhang a, kal mai ka tum chu ka ban a rawn vuan chawt a, sawi duh a la nei anih hmel.

Zawi muangin ka kut chu a thlah a, "Ka ngai ngawt ang che," tiin tawi fahran hian min nuih a, "Mangṭha aw," ka tih chuan min chhang let lo. "Ka lawm lutuk ania, nang awm lo la chuan tun hi kan thleng thei miah lo ang," tiin lawmthu kan hrilh leh rih a, min chhang loin min en deuh vang vang. "Kan inbe ṭhin dawn nia aw," ka tih chuan a bu zauh a, chutah tîm hmel zet hian, "Ka lo nghak reng dawn che ania, lo kal tawh lo mahla ka lo nghak ang che," a ti ta reuh a, tun ṭum chu dâwt leh zêp engmah a awm tawh lo, inthiam lohna ka nei ru rauh rauh a, ka awmdan chu ka sawi chhuak thiam kher awm lo ve.

"Min hrethiam tho ti raw?" ka tih laia ka aw ah chuan ka inthlahrunzia a hriat ka ring.

"Hrethiam e; nangpawn min hrethiam ti raw?" a ti ve leh a, han sawi leh mai tur pawh ka hre ta lo.

"Hmana ka zawhna che kha min la chhang miah lo a; mahse, zawh nawn i duh loh chuan ka zawt nawn lo ang che, chhânna i neih hun hunah min lo be tawp mai dawn nia," zawi ruih hian a ti a, chu chu ani nena kan inthlahna a ni ta. 

Haw kawng tluanin ka ngaihtuah zui a, chhânna engmah ka nei lo, ka khawngaih tih chu ka pha thei lo a, chutih rualin eng ruahmanna ka nei lo a ni. Ka nun dan tur, ka hmachhawp, ka khawvel, ka hringnun.....Ka ngaihtuahna chu tuipui zautak ang a ni a, chutah chuan ka awm si lo a ni! Eng hun nge ka thlen a, khawi hmun nge ka hre ta lo, tuipui thûk taka pil vang vang ang mai ka ni, ṭah ka châk a, ṭah chhan tur engmah neiin ka inhre si lo. Tu tan nge, eng atan nge ka ṭah ang? Ngaihtuahna a fîm telh telh a, nun a ruak telh telh thung a, hah a dam mawlh lo a ni.

Aizawl kan thlen tukah Lawmsanga chuan min rawn bia a, hotel neitu pi Julie man a nih dante, Aizawl lama a unaunu hotel pawh an chhui chian tur thute a rawn sawi a, pu Muana erawh dan lo anga thil siam tawh lo turin an ti a, a wine maksak kha an khapsak hmiah bawk. Engmah hralh chhuah a la neih loh vangin thubuai erawh a nei zui lo a, vaukhanna erawh a tawk viau a ni awm e. 

Keipawh ka nun pangngaia let tumin rilru ka siam a, ka chhungte lah chu ka thiltih a hriat tak avangin ka chungah an lawm meuh lo. Ka nu chuan ka Nî min biak sak a, a dawr ka rawk tih hre lotu ka Nî pawhin min lo la chhawr hreh bik lo va, dawrah bawk ka kir leh ta a ni.

Nitin dawrah ka kal a, ka hman changin Veroi leh Sangpuia thlan ka tlawh a, pangparte ka va dah a, a bak chu inah ka tawm chawt a ni ber. Han hlimsan lai ka nei lo a, ka nun chu ka hmang liam ve mai mai ti ila a dik ang. Phurna a awm loh chuan engkim hi a ho em em vek a, chhungrilah erawh khawharna ka pai reng ṭhin. A chang chuan ka inngaihtuah lungpuam ve lek lek ṭhin a; ṭah a sawt lo tih ka chian vangin ka ṭap ngai lo thung. Ka tana ṭha tur ka hriatna chuan ramri min khamsak ni ta berin ka hria, rilru mawlmang tak leh thlakhlelh ngah tak Jeminai te ang hi ni ila a nuam zawk hial tein ka ring a ni.

Kar thum zen zawn a liam hnuah Zohera nuin min rawn call a, "I ṭhianpa i va rawn tlawh khât ve, mo tharte kan neih hi, mi rawn lawmpui pawh i tum nange?" a rawn ti luam a, "Ka hman veleh ka lo kal dawn nia," ka tih mai laiin, "Chaw rawn ei ang che," a lo ti var a, ka chak lo ru khawp mai.

"Ka tum dawn nia," tiin ka chhang ve tho a, a dah mai dawn emaw ka tih laichuan, "Mampuia'n in inmil vak lo tih a sawi a," a rawn ti ta khauh a, chutiang thil a nu bula a sawi chu ka hrethiam lo hle. 

"A ti mai mai anih chu, inmil loh chhan tur a awm hleinem," ka tih pawh chuan, "I reh vang vang bawk si a, ka rilru a nuam lo teh ania, hei kan naui chu a fel viau hi, rawn kawm bawrh bawrh la, in inngaina ve maiin ka ring," a ti zui luam a, nu rilru ṭha ngang a ni bawk a kan ṭhianni pawh a pawm mai kha ka rindan sa a ni a, ka kal loh chhan a hriat dan erawh a zia lo ka ti viau mai. Aizawl kan thlen aṭangin Zoherliana'n min la rawn be miah lo a, chuvanga kal lo zawk chu ka ni.

"Keipawn ka ngai che a, lo leng thuai rawh aw," Zoa nuin a tih leh chuan ṭha deuhin ka chhang a, kan inbiakna kan titawp zui bawk.

Tlai dar 5 pelha kan ban ṭhin avangin va tlawhna hun remchang ka nei thei lo a, an hman zawk a, mi an rawh tlawh ka beisei ve deuh bawk nen ka be hmasa duh bik lo. Mahse, inrinni tlaikhat chu an pahnihin an rawn lang hlawl a, an bazar aniang an rawn inkhai bawr khawp mai. "Thil kan lo leisak che," tiin Jeminai zawk chuan funny face cake leh shoulder bag dum hi min pe a, bag chu ka han en vang vang a, ah na hun a vang dawn hlein ka hria.

"I va lawm loh hmel ve," tih pah chuan min rawn thlek hu a, "Hetiang te tih a ngai hleinem," ka ti chu min ner khum nak. "Thil pek anih kha, 'Ka lawm e' tih a har em mawni," a ti zui hlak a, chumi hnuah a bag a zen rawk rawk a, eng emaw hi a rawn phawrh a, ka hmai zawnah a rawn lek vah. Ka han en chian chuan pregnancy test kit hi a lo ni a, "Vawiinah kan hre chiah," tiin Zoa pawh a lo nui ruh ruh a, "A va lawmawm ve," tih bak chu han sawi vak tur ka hre lo.

"I lawm tak tak maw?" pakhatin a tih laiin, "Ka nuin chaweiah rawn sawm rawh u a tia, naktukah i lo ei dawn nia, chawhnu lamah ka rawn hruai ang che, " Zohera'n a ti ve thung a, ka kal loh chu fel dawn loa ka hriat vangin ka hnial lo a, ka tih makmawha ka ngaih vang a kal tum ka ni ber.

A tuk tlai dar 3 velah Zohera'n min rawn lam a, an in ka va thleng chu a nu a lo lawm khawp mai. "I cher lutuk, i damlo em ni?" a ti hlut mai a, a vitamin leisa leh ei tur eng eng emaw a va dap chuk chuk bawk. Jeminai nen lah chuan an han innufa reuh khawp a, an mo tur tak an mo niin ka hria, pakhatin fanu a awt ngawih ngawih a, pakhatin chhungkua a mamawh em em bawk a, ṭawng dam dap reng Zoa nu lakah hi chuan tumah sual leh rilru chhia an awm theiin ka ring lo.

Zanriah kan ei laichuan dawr siam an tum chungchang an sawi a, "I eizawnna tur hi kan ngaihtuah dawn em mawni kan tia," Zoa nu chuan a ti ta mai a, Zohera ka va melh a, "Minai'n cosmetics dawr a siam dawn a, nangpawn i duh thlang ve rawh," a lo ti pek a, ama rawt anih ngei ka ring.

"Kei chu ngaihtuah ka ngai hleinem, ka duh chuan loan te pawh ka la thei alawm," ka han ti naa, "Bul ṭan sak che kan duh alawm, kan fanu ve tho i nia, inla hrang tlat mah ta che," tiin Zoa chuan min nawr titih a, ka duh  dan a ni lo takzet.

"I chhungte lo râwn la, sumdawnna hlawk deuh tura in rinte lo sawi ho ula, bul kan tanpui che anga, i hlâwk deuh hunah tlem tlemin min rul dawn nia, a rulh lam kha enghelh lo ula, rulh theih loh chang a awm pawhin a pawi lo, vei run a ngai lo ang," tiin a sawi zui siam siam a, Zoa pa lah chuan, "Restaurant te i duh em?" tiin mi a lo zawt ve bawk a, an hnar theih dawn loh tawpin ka hria, ka nu an rawn biak zui thuai pawh ka ring.

Ka haw tur kawngkaa ka chhuak tawh chu Jeminai'n min rawn au a, rawn tlan phei hlawk hlawk pah hian eng emaw hi a rawn lek a, "Hei hi ka lo la kawl a," tih paha min rawn pek chu note bu lian vak lo, hlui hmel deuh tawh a ni.

Khawi ami nge ka zawh chuan, "Wine dahna pindan ami kha ania, engmah lak loh aia ka lak anih kha, pu Biakliana lem ziahna bu," tiin min chhang a, minti hrilhhai angreng khawp.

In ka thlen hnuah note bu chu ka en chauh a, varak lem hlir hi a ni a; mahse, thil mak deuh a awm. Varak thawnthu ni mai hian a hriat a, a thawnthuin min hrilh erawh ka hriat hnu a ni tlat.

Varak pakhat chuan tlereuh bawm niawm tak hi a hnuk a, chu chu varak pakhatin a ruk sak lai a lang a, phek dangah chuan varak te chu an insual bawk. Ka han keu zel a, varak sual chuan varak pakhat zawk chu a tihlum ta der a, a phek dang lehah chuan varak  ruang chu leiah a phum niawm takin 'RIP' tih ziakna kross chunga varak sual chu a dintir vang a, thingkung lianpui bulah a ni nghe nghe. 

A bul aṭangin note bu chu ka keu ṭha tluk tluk a, ngaihtuahna a buai map mai, heti anih chuan kan ruhro hmuh kha burma pa ruhro tihna anih mai hmel! Anih chuan pu Biakliana'n a lo hre vek tihna a ni. Mahse, engatinge pu Rochama khan pu Biakliana a nih loh thu a sawi miah loh mai le? 

Pu Biakliana a nih loh thu a sawi anih chuan Veroi leh Headmaster thihna kha a zep bo thei reng si a; mahse, zep loin a puang vek mai a, eng vanga la thup cheu nge a nih ang? Ka hrethiam lo hle mai.

Lawmsanga ka han call a, Burma pa chungchang a hriat theih ang ang lo hre turin ka han ti a. Mr.Know pawh message-in ka hrilh a, note-a thil inziak pawh thla lain ka thawn nghe nghe. 

Thawhṭanni tuka Lawmsanga'n min lo call chuan heti hian a rawn sawi a, "Azoi pa nen an insual hnu lawkah a haw a, a rawn kal leh tawh lo, a chhungte chuan vawikhat chu pu Muana an rawn call a, ani'n a haw daih tawh thu a lo hrilh a, a bak chu a chin an hre zui lo a ni awm e," tiin min rawn hrilh a. Eng atan nge ka tih min zawh chuan zep loin ka hrilh ve nghal a, "Anih chuan pu Biakliana a la dam tihna a ni em?" a rawn ti a, chu chu zawhna lian tak a ni.

Chawhnu lamah mr.Know message ka dawng ve chauh a, "Thil enliam theih zir rawh, engkim hi kan ban phakah a awm lo ania, i duh ber chhanna i hmuh tawh kha," tih hi a rawn thawn a, "I chhui dawn lo em ni?" ka tih chuan, "A mitmengah khan a chiang reng alawm, pitar kha a haw lutuk tlat, a pasal awmna kha hre tak tak pawh nise a hrilh duh lo ang, a tawpah ṭan a khawh anih kha," tiin min chhang leh a, ngaihtuahna a tithui khawp mai.

Eng emaw chen chu chanchin hriat belh ka nei lo a, Lawmsanga erawh chuan a ngaihven niawm tak a ni. Mahse, farm aṭang ringawt chuan engmah a hre thei bik lo aniang mak a tih thu a rawn sawi leh ṭhin a, chhanna awm lo zawhnaah a chang dawn ta a ang. 

Zohera nu chuan dawr chungchang kha ka nu a lo sawipui a; mahse, ka nu pawh chuan a duh vak lo a ni ang, "I duh em ni?" tiin min zawt a, ka duh loh thu ka sawi pawhin mi han nawr a nei lem lo. Ka Nî dawra ka thawk erawh min khawngaih deuh a, "Hetiang ngawt lo hian awm thei la ka ti khawp mai," a ti vang vang a, ka tih chak min zawh lahin engmah sawi tur ka hre lo. Ramdanga kal bawk kha a sawi zui leh a, chu pawh chu ka châk meuh lo a ni.

September thla a rawn inher a, Lawmsanga a rawn lang hlawl. Pu Biakliana chanchin a rawn ken lah chu beisei loh dan lutuk a ni. "Pi Lalpuii'n phone call a dawng a, pu Biakliana fanu hnen aṭangin a lo nia, kan khua amite zawtin an rawn zawng chhuak a ni awm e, pu Biakliana chu ICU-a a awm thu an rawn sawi a, alzheimer natna a vei a, a thaw a hah nasa bawk a, a daih rei an rin tawh loh vangin a fate rawn hrilh a tum hi a lo nia, nizan khan ka rawn chhuk pui a, a hmel an hmu anga an let leh mai ka ring," tih angreng a rawn sawi luam. 

"A fanu chuan a pa chanchin chu a hre ve vek em ni?" tia ka zawh chuan, "A sawi danah chuan an naupan deuh laiin kan khuaah chhungte a neih thu leh a fate an awm thu a lo hrilh ṭhin niawm tak a ni," tiin min chhang a, pu Biakliana chuan fanu pahnih a lo nei a, kan veng ṭhenawm maiah an lo cheng ve nghe nghe.

Lawma lo kal hnu lawkah hian a boral thu ka hre zui leh a, an venga ka hmelhriatte ka va zawt luam bawk. "Pa fing deuh mai ania; mahse, a natna khan a tibuai hmaa, pakhatin vil chawt a ngai ṭhin, a pawn chhuak meuh lo," tih angreng chu ka hre zui leh a, chutiang anih chuan wine formula zawnga miss Mathani tibuaitu te kha Hotel lam chauh an nih hmel a, pu Biakliana chuan inrawlhna a nei ve lo tih a chiang ta bawk.

Ngaihtuahna luah tam ber thil a han reh ta chu rilru la peng thei a vang ta khawp mai. Eisiam te ka han zir ve bawk a, ka tuipui lo hle mai si a, nilenga plate chawi kual leh thlengsil tur ringawt chuan ka nun hi a uiawm ka ti ve ṭhin. Pasal nei turin ka nunah mipa ka seng lut ngam lo a, rilru nat ka hlau te pawh a ni mahna, tun thlengin Lawmsanga pawh chhanna ka la pe ta lo. Ani lah chuan min nghah thu a la sawi ve reng a, a dawhthei viau bawk.

"Sumdawn i duh loh chuan eng emaw zir leh ta che, a senso ka lo tum vek ang," tiin Zohera nuin rawtna dang a rawn nei leh a, chu pawh chu ka hnial nghal pang a, ka awmdanah hian kei chauh hi lungawi lo awmchhun ka ni lo, ka nu pawh a rilru a buai a, Zohera nu rawtna hnuhnung zawk chu a thlawp viau tawh. Chutianga ka chhungte rilru kaptu nih chu a hahthlak chang a tam a, khawi emawa kal bo daih mai te ka chak ṭhin, kalna tur hria ila chu ka kal duh tak takin ka ring.

Zirtawpni a ni a, a tuk lam atan a hlawma order kan neih avangin kan bang har khawp mai. Dawrah eirawng kan bawl a, eitur pack pahin chanchin thar kan ngaithla bawk. Chanchin tharah chuan nausen thla 9 mi thihthu leh rinhlelh thil thua a nu leh pan an man thute an rawn puang a, a pa zawk chu rinhlelh kai zawk a nih hmel e.

"Facebook-a an rawn post dan chuan naute pa zawk hi a rui a, thil thlen laihian naute nu pawh hi a awm ve reng a; mahse, engmah a sawi duh lo an ti," kan thawhpui pakhatin a tih chuan, "A hlau aniang," ti maiin ka chhang a, "A nu tak tak a ni lo em ni?" tiin midangin an lo zawt ve bawk.

"A nu tak chu ni e, a pasal hi a hlau lutuk an tia lawm, an ṭhenawm te chuan naute rak ṭhawt thawm an hria, a bak chu a reh hmak a, thawm vawikhatmah a chhuah leh tawh lo an tia, naute ring ruh chu a tliak a, a luruh a dup bawk a, dawhkan aṭanga thehthlak anih te an ring," pakhat chuan a ti leh a, "Mr.Know-a a che leh angem aw?" an tih vang chuan ka thiltih lai chawl meuhin ka va thlek a. Hepa hian engzat nge a hlawh ṭhin ang tih lam daih ka ngaihtuah, a chanchin hi hriatchian ka chak khawp mai, police nena an thawh ho dan hi a mak ka ti deuh tlat a ni.

 

Kan inpeih fel meuh chuan dar 8 a pel tawh a, taxi ka hmu mai lo bawk nen kein ka haw a, eng eng emaw ka ngaihtuah kual a, ka kalmuang khawp mai. Kan veng peng ka thlen hma deuh chuan short cut lamah ka kawi a, thui pawh ka kal hman lo, gate pakhat aṭang hian ui a rawn tlan chhuak thut a, "Lo man teh," a neitunu niawm takin a rawn tih vang chuan ka um ve nghal a, ka hnunga mi pakhat khat rawn kal chu ka tlan pel thuak. Ka ui um pawh chu ka piah lawkah a lo ding a; mahse, a thlunna hrui ka va pawt tur chu mi a rawn zuan ta mai a, ka lu ah a rawn hap ni mai hian ka hria, ka bakkilh a keh rawp a, han paih thlak ka tum chu mipa pakhatin a rawn chawi thla nawlh. 

"E khai aw," a tih ri ka hriat rualin chupa lu chu a hap sak nghal bawrh bawrh a, lukhum a lo khum chu a vannei khawp mai. Ui neitunu kha a rawn thleng chawpchilh a, ṭha te te chuan an inhlan zui a. Kal lehnghal mai ka tum laichuan, "Kan thluak ei a tum a ni lo maw?" ka sira ding chuan a rawn ti a, ka pen uk tawh chu ka inher leh rang viau a ni.

"Ei ta se, a ei ṭha awm mange ti raw?" a'n ti zui a, "Min lo zui em ni?" ka ti he haw thung.

"Dawr aṭang khan ka zui tawh che," a ti hem mai a, ka hrethiam map lo.

"Tinge min biak si loh a?"

"I inngaihtuah nasa em alawm, kal rawh, ka zui thui vak tawh lo ang che," tiin ka darah a rawn nam a, sawi buai hmain min nawr kal dawt dawt. Kan in kawng panthlakna step bul kan thlen chuan ding chungin kan han inen leh ren rawn a, "I message pawh i en lo a," a tih vang chuan ka phone ka phawrh a, a message a lo awm vang mai.

"Engthilah nge min sawm a?" Dar a kan ûk a, "Nausen thah chungchang a nia," a ti a, dawra thawhpuite nena kan sawi ho kha ka hrechhuak zawk.

"Hlawh ka pe ang che, ka ai awh tur ka zawng a, ka rawn hrechhuak che a, ka rawn  sawm che anih kha," a tih chuan, "Tinge i ai awh chu a ngaih a?" ka ti ve vat a. Chutah, a kut a rawn lek kang a, ka lu zawnah chuan min si lo tawk velin a dah a, "A hlimthla chu dang thei a, khi ta mi khi chu ka khawih phâk lo," zawi angreng zet hian a ti a, eng a sawi tumna nge ka hrethiam lo.

"Pu Biakliana chanchin chu ka hre tawh alawm, inhnamhnawihna a lo nei lo anih hmel," 

"Chutia law..." a ti mai a, step-ah chuan a ṭhu zui bawk. 

"Wine vang emaw tiin a ni lo lamah kan lo buai vak a, hmangaihna khingbai lam daih a lo ni leh si a, Veroi thih chhan a han ni leh zel hi chu ka lawm lo lehzual..." tih pah chuan a bulah ka zuk ṭhu a, "Hmangaihna chu i ngainep viau elo?" tiin a lo nui suk suk.

"A ho i ti ve lo em ni, hmangaihna khingbai vangin a hmangaih chu a hua a, tihhrehawm a chak ta em em a..." ka chek zui tlat tlat a. "Hmangaihna hi a hlauhawm reng asin, a ṭhenin an at phah a, mi engzat nge a tihhlum tawh i hria em, hmangaihna vanga an nih tur ang ni pha lo pawh an tam alawm," tih pahin a lukhum a siamṭha a, a lu um a mawi reuh khawp mai, thla êng hnuaiah chuan a hmel chu a lang thutak ruih a, a sawi thutak hle bawkin ka hria.

"Bialnu i nei em ni?"

"Nupui ka nei,"

"I hmangaih em?"

"Tehreng mai,"

"Chuvang chuan i nih tur ang i ni pha lo a ni maw?"

"Hre dik leh ta..." Ka nui ve hak a, "Mahse, hmangaihna chu i hlau lo anih hmel kha," nui chunga ka tih chuan, "Thla khi a bial reng lo va; mahse, a duhawm tih tuman kan hai hleinem," tiin min chhang a.

"Hna dang ka nei asin," ka tih chuan ka darah a rawn nêk salh. 

"Eng hnain nge min mamawh tih lam aichuan eng hna nge ka mamawh tih hian awmzia a nei zawk daih ania, tuna i hna kha i mamawh tak a niin i hria em, a chawkphur zo lo hle chein ka ring," min hriatchian hmel fê hian a ti a, sawi dik loh lah chu a nei hauh lo.

"Lo inngaihtuah la, sawmna pangngai mai anih kha, i duh dawn chuan rawn sawi hma la, i thawhpui tur nen in sawidun vat a ngai ang, naktukah chuan chhanna rawn nei hman rawh aw," tiin a phone a phawrh a, case chungchang ziahna niawm tak file hi a rawn thawn a, naute thlalak leh a nu leh pa thlalak te pawh a tel nghe nghe.

"Khaw dang daih an ni sia," ka tih chuan, "Naktukah zin chhuah nghal a ngai ang," a ti sam leh et a. "Ka lo inngaihtuah phawt ang, ka chhungte pawn an remti kher lo maithei," ka tih chuan min hnial lo.

"I thluak kha eitur sem nan chuan a ṭha mah mah tih hria la, ngun deuh khan i ngaihtuah dawn nia," tih leh thawh a rual a, "Message-in ka lo sawi ang," ka ti chu min chhang zui tawh lo, hawi pawh rawn hawi loin kut a rawn vai thuak a, chak deuhin a kal nal nal bawk.

In ka thlen veleh ka inbual a, ka mutfel chuan dar 10 a pel tawh. Mut hmunah ngunthluk zetin ka inngaihtuah a, ṭawngṭaia Pathian râwn awm tak pawh a ni a; mahse, ka rilru chuan âwn lam a neisa tlat lawi a, midang ka râwn hmain thutlukna ka siamfel chu a ni der mai. 

Zing hma takah ka tho a, ka chhungte an lo thawh chuan ka hna thawh lai ka bansan tur thu ka hrilh a, ka thil tih tur pawh zep loin ka hrilh tlang nghal a. Ka pa leh ka nau chuan min phurpui viau laiin ka nu chuan a han duh lo khawp a, "Hmeichhe tih chi a ni lo, i kal lo ang," a ti bur mai a, a hlauhawm loh thu ka hrilh pawhin min hnial tlat.

Chutih laichuan message ka dawng a, "I inpeih em Duhawm?" tih mr.Know-a hnen aṭangin a ni.

...A tawp ta...