WHY DID YOU GO? (CH - 2) by Ahmangaihi violette khiangte

WHY DID YOU GO?

by Ahmangaihi violette khiangte

Chapter - 2

"Damlo na deuh an awm a ni maw?" 

"Thi an awmin ka hria, ka lo chhoh laikhan ṭap thawm ka hria a, "Azoi'n a tih chuan ding chungin damdawiin tualzawl lam chu ka thlek vang vang a, ambulance ding leh mi ṭhenkhat lungngaih hmel tak tak te ka va hmu a. 

"Let leh phawt ang," tih leh inher ka rual a, "Lo han chho la, keiman ka zuk lei mai ang," a tih chuan ka hnial lem lo. Ka cabin lamah ka let leh a, Azoi awm loh vang nge mawni ka ṭi dui mai, damdawiin hi ka ngaina lo takzet. He ka awmna pindanah pawh hian mi engzah nge boral tawh ang ni, hmuh theih loh thlarau te hian min hual reng angem le?

Ka pa ka han call a, a chhang thei lo, call nawn leh ka tum laitak chuan kawngkhar pawn lamah ṭap thawm niawm tak hi ka hria a, ka ṭhu ngil nghal awt mai. Ka pa bawk chu ka call ṭha leh a, rei dawn a rik hnuah hmeichhe aw hian a rawn chhang a, mak ka ti angreng viau, aw chu a thamin a la naupan hmel hle a, nu Nguri aw a ang tlat lo a ni.

"Tunge aw?" ka tih chuan, "Lo call an awm em ni?" hla deuh aṭanga ka pa'n a tih ri ka hria a, "Mina-i..." hmeichhe aw chuan tiin rei loah ka pa'n a lo chhang zui bawk.

"Aw Bawihte, chaw kan eikham chiah a, bathroom-ah ka lut daih a," a rawn tih chuan, "Inah i awm nange, tunge phone lo chhangtu kha?" ka ti ve vat a, "Kan thawhpui a nih kha," a tih chuan, "Eng nge in tih a?" tiin ka lo zawt leh.

"Staff hoin chaw kan eikhawm a, eng nge i an, naktukah chuan in chhuak thei dawn ta em, lo haw tlang nghal te i tum em?" a lo ti zung zung a, "Zing lama kan chhuah chuan lo haw tlang ka duh, Azoi pawh a khua a har tawh ang," ka ti a, ka pa chuan motor a lo ngaihtuah nghal tur thu a rawn sawi a, a ṭhianpa a rawn tir dawn niawm tak a ni.

"I nu Nguri pawhin a ngai tawh khawp mai che, i tlukna chhuat pawh tile dang a phah ṭhattir vek tawh ania, i lo haw huna talh turin kel pawh kan thlung reng tawh.." tih angreng a rawn sawi zui luam. Kei chuan thil dang daih ka lo ngaihtuah a, vawiin nilenga ka biak theih loh vangin Lawmsangpuia chanchin zawh ka duh a ni.

"Lawma hi ka be thei miah lo, vawiinah i hmu em?" 

"Zingah kha chuan ka hmu, ka la haw leh lo a, vawiin chu a pa nen huan an samin ka hria," a lo ti a, tinge maw a biak theih miah loh le, vawi 6 zet chu call ka tum tawh a, a tlang thei lo reng reng a ni.

"Naktuk chu bazar te in duh lawm ni, Azoi pawh kha thil leisak kan ba asin, duh leh ni khat cham pui la, a thawmhnaw duh zawngte lei sak ve la a va ṭha ve.." a rawn tih chuan, "Ka lo zawt ang," ka ti ve mai a, cham leh erawh ka chak lo khawp mai, kar hnih zet kan cham tawh a, haw ka chak hluah hluah tawh.

Kan inbiak zawh hnu chuan khumah ka ṭhu ngawi reng a, Azoi chu a thang rei ka ti tawh khawp mai. Tho chhuakin kawngkhar chu ka va hawng dek dek a, tumah hmuh tur an awm lo. Ka hlau deuh chuan pawna lo zuk nghah ka rilruk a, ka tiang hawl chung chuan hmanhmawh deuhin step-ah ka pen thla a, tualzawl ka zuk thleng chu mi an lo reh ṭhuap a, ambulance pawh a lo tlan chhuak tawh a, gate duty pahnih bak chu hmuh tur an awm lo.

Azoi call pah chuan tualzawla ṭhutna lam chu ka pan a; mahse, ka thlen phei hma deuh thim chinah chuan hmeichhe pakhat ding hi ka va hmu a, van lam hawiin a dak vung vung a, a phun sep sepin ka hria. Ṭhut pah chuan ka en leh ṭhin a, a khat tawkin a hmai a tuai zauh zauh reng a, a ṭap anih hmel.

Va pan hnaih ka tum laitak chuan, "Jemina.." tia min ko thawm ka hria a, ka lehhawi rualin Azoi a rawn lang hlawl. 

"Thli a tam si, i hritlang mai tur asin.." tih pahin ka lam a rawn pan a, ka bul a lo thlen rual chuan, "Saw nu saw a ṭapin ka hria," ka lo ti ru sar sar a, a va melh ve zawk naa engmah sawi zui lem loin ka banah a rawn vuan a, "Lut vat ang, i damdawi ei a hun dawn.." tiin min kalpui nghal a. Kal pah chuan hmeichhia chu ka ve thlek leh hram a, damlo awmpuitu em mawni ka ti rilru neuh neuh.

"I cabin bul chiaha damlo kha a boral a, an chhuak fel chiah anih kha, a la naupang si a; a lainatawm tak tak a ni," Azoi'n a tih chuan, "Eng na nge a?" ka ti ve vat a.

"Thin lian a niin ka hria, a chuap lam a fel lo bawk a," a ti a, an lo awm tirh khan a awmpuitu a nu khan min lo kan ve zawk a, Azoi nen chawhmeh te an inpe ṭhin a, ka lo ngaihven lem loh avangin an na zual tih takngial pawh ka lo hre lo.

Ka pa nena kan inbiak dan ka hrilh chuan, "Bazar ka ngai lo ang, nimina ka chhuah khan lei ngai ka neih ho chu ka lei tawh alawm, pawisa ka mamawh zawk daih," a ti sam et a, ka lawm ru khawp mai.

Azoi hi kan ṭhenawm nula farm-a hnathawk ve tho a ni a, kei aiin kum 15 zetin a upa a, nula senior, phawk angreng tak leh taima zet mai a ni. Inentir turin ka pa'n min kalpui thei si lo a, ani hi hlawh neiin kan sawm ta ngawt a, kan ina inhlawh reng ṭhin a ni bawk a, a lo awlsam angreng khawp a, heti hian kar hnih zet chu min awmpui tawh a, kei ang lo takin lunglen pawh a sawi ve ngai lo, a lung a leng em ka zawh pawhin, "Tu mah ngaih tur ka nei lo," a ti mai zel a, an in lam pawh a thlahlel ve vak lo aniang.

Cabin-a kan luh hnu chuan mut nghal mai a duh ka rin nen, "Oil-in zut leh lawk ang aw," a rawn ti a, "Thei ka lo velsak ang che," tih pahin apple chu ka ban zui a, kei khumah ṭhuin ani ṭhutthlengah a ṭhu thung a, ka ke zut pahin a ti ti leh bawrh bawrh tawh.

"Tihian kan han haw anga, ni thum velah kei chu ka dum leh vek ang, engtin nge i no sur reng theih bik le, in tui tlan khi a ṭha bik nge mawni, in chhungkua hi in ngo vuk vek mai a," a tih chuan ka lo nui hak hak.

"Keite chu kum 3 chauh alawm ka la awm, hostel aṭanga ka chhuah hnuah phei chuan kum 2 pawh ka la awm tling hleinem," ka tih laiin, "I chawn te hi a va han nalh bik tak, ser takngial pawh i nei lo ania, i ke ruh tliak lo phei sela chu ser nei lo i ni mai tur," a ti leh bal bal a. 

"Ka ban hi en ta che, thosi min sehna a dum thluah hi, hei pawh hi vangvat zukna anih hi aw.." tih pahin ka ban ka lo hmuh sawk sawk a, "A hriat mang hleinem, khawpui nula tamtak aipawhin i vun te chu a la nalh daih zawk alawm," a la ti ve fan a, fakna ṭawngkam a ui lo lutuk hi a nelawm zualna a ni ve a, Azoi hi chu tupawh hian kan ngaina em em vek mai a ni.

"I pa bula awm reng aichuan khawpui lamah lehkha te zir leh daih la, anih loh pawhin hnate thawk la, khi laiah chuan pasal zawnna a zim si, pasal ṭha deuh i neih theih loh phah ang tih a hlauhawm," a tih chuan ka nuih a za leh thut. 

"Bialpa ka nei rengah.." ka nui hak a, ani a lo hawi â hu..

"Tu maw, kan khuaah maw?"

"Ka hrilh duh che angem aw...."

"Min hrilh vat teh, kan khua ami anih chuan ka hriat ve ngei ngei a ngai," a thil tih lai chawl meuhin min melh a, "Lehlam pawh hi a kham lutuk.." tih pahin ka ke na lo lam chu a malchungah ka hlang zui a, 'Sawi rawh,' tih melh tak hian min la melh a.

"Ka bialpa chu....sang deuh, hmelṭha deuh mai ania, ran te a ngaina a, a taima a, a chak em em bawk a, a kut khing khat chauh pawhin min pawm zo.." ka mitthlaah Lawmsangpuia hmel a rawn lang a, ka nuihpui nghal var var...

"Umhmm...pa Zuia fapa kha a ni lo maw?" a rawn ti phawng..

"Awi, engtin nge i hriat nghal theih a?" phawk fea ka tih chuan, "Ran te a ngaina i tih aṭang khan a hriat vek alawm, varak a pawm ṭhin te ti tel law law la, aawi ha...i duh mak e, a hmel chu a ṭha lo pawh a ni lo; mahse, kan khaw tlangvalah rau rau pawh ani aia ngaihzawn awm an tam ang maw le, lehkhathiam sang deuh leh awm thei deuh te i ngaihzawn ka ring ania," a ti duah a, ka lo ner nang mai.

"Keichuan hmel hi ka en hmasa zel alawm.."  ka tih chuan a nuih a han za khawp a, "A chut hmel ka lo ti asin," a tih rualin a darah ka beng tawih.

"A chut lo, a ṭawng tlem ringawt alawm, tunah phei chuan a ṭawng duh ve tawh lutuk.."

"I nu Nguri'n a hria em?" a lo ti zauh a, lu ka thing vat.

"A duhpui miah lo ang che, an huan enkawltu fapa a ni bawk sia," a tih chuan, "Chungte chu ka pa thu thu alawm, ka nu tak tak pawh a ni lo a," ti maiin ka chhang a. 

Ka pa leh nu Nguri hi an inneihna a la rei lo, kumin nena chhiar chuan kum 4 chauh a la ni. Kum 16 mi ka nih laiin ka nuin min boral san tawh a, Aizawlah hian mi in luahin kan awm a, khawsak harsa kan ni lem lo. Chutih rualin ka pa hi a zik a bul ve angreng a, ka nu chhungte hian an ngaina lutuk lo bawk a, hetia nupui a han neih leh hnu phei hi chuan an inchukha ta vak lo bawk.  

Ka pha hnathawhna khuaah hian nu Nguri te hi a awm thei ber pawl an ni a, seventh day adventist kohhran an lo tlem bawk nen ka pa hian a awmtirh aṭangin a belbul a, chhungkaw hung leh intodelh tak mai an ni.  Heti hian an lo inhmel duh chho a, mante inhlanin ka pa hian a chenchilh ta rawt a, an inneihtirh kha chuan makpa chhungkhunga a awm kha ka hrethiam bik lo, amaherawh chu nu Nguri te lam hi an fel a, an theihtawkin ka pa hi an duat a, duhsakna vang zawkin in hrang a chantir phal lo ti ila a dik ang chu.

College ka zawh veleh ka han fin ve ta rawih a, an inah chuan lalfanu ang maiin min lo duat a, a nuam ka ti viau aniang khawpui lam ngaihna ka nei ngai lo. Ka kal hmasak ber ṭum chuan an chenna chu fal ka tiin nuam lo ka ti khawp mai a, fianrial hlauhna hi ka nei tlat ṭhin a, ramhnuai te hi ka ngaina ngai lo. 

Nu Nguri te chuan huan zau zet an nei a, thei leh thlai chi hrang hrang a awm a,    serthlum leh balhla, lakhuihthei tih angreng phei chu kumtin an hralh chhuak ruih ruih ṭhin. Ran an vulh ṭeuh a, an grape tharte chu umin wine te an siam ṭhin a, hnathawk an chhawr hnem danah an sum lut chhuak hi a tlem chhe lo tih a hriat theih, sawrkar hna thawk an awm ve lem lo a, mahni kutkawih liau liaua tun dinhmun thleng hi an ni a, an ngaihsanawm viau a ni.

Azoi mut hnuah phone khawih pahin ka la meng reng a, Lawmsangpuia nena kan inbiakna te ka chhiar let a, kan titi chu inngaizawng titi pawh kan ang lo, hnathawkin a pi zah deuh chunga a be ṭhin ang mai hian ka lakah a inthlahrung ṭhin a, mi dang anga min ngai lo turin ka ti fo mai. 

Nikum hmasa serthlum seng hunlai kha kan inhmuh hmasak ber ṭum a ni a, ka pa nen an serthlum lo tur kan zui ve kha a nia. Ka iptepui ah laikha a lo ṭet pek a, kawng thlang lamah ka tilum ruih ruih a, Lawmsangpuia chuan min lo chhar puiin a ipteah min ahsak a, khata ṭang khan ka ngaihtuahna luahliantu ber a ni ta.

Tlangval hmelṭha leh pianthiam tak a ni, a zaidam a, a taimain a thawkrim em em bawk. A nu hi a hrisel lo a, chumi enkawl nan chuan a pa nen hna an thawk nasa a, lehkha pawh high school thleng chauh a zir a, naupangte a nih lai aṭangin kut hna a thawk a, ngaihzawng a ngaihsak hman meuh lo, kei takngial pawh min ngaihsak ṭha hman loin a buai nitin ṭhin.

Chet la hmasatu zawk leh bul ṭantu ka ni a, ka tih ang angin ani chu a awm tawp a ni ber, min hnar duh lo nge min hnar dan a thiam lo zawk ni, engmah hi a duh dan sawi a nei ngai lo a, a chunga thleng apiang hi a pawm ni maiin ka hria. A nun tlawm lutuk leh pawi a sawi lo lutuk hi ka khawngaih fo mai, an tir kat nasa a, a changin a hau bawrh bawrh a, ka lo huatpui lek lek chang lah a tam. Ani thung hi chuan ngawi rengin a tih tur a ti miah miah a, a ṭul hunah ngaihdam a dil mai a, vui thu a sawi ngai lo, thli dawng lo tuipui reh ruih ang mai a ni.

Zingah ka pa nen kan inbiak laimekin doctor a rawn lut a, min en thuak thuak hnua, "In chhuak thei e," a tih chuan Azoi nen kan phur ngang mai. Doctor chhuah hnuah kan insiam zung zung a, lehkha pawimawh tifel tura Azoi a kal chhungin ka lo insiam fel diam a, kan chhuah chuan dar 10 a pel awrh chauh. Damdawiin gate thlangah ka pa ṭhianpain min lo hmuak a, an driver a lo hruai bawk a, driver chuan min thlah dawn anih hmel.

"I pa'n kum 10 um tawh grape wine min thawn dawn a, lo kal ve pawh ka duh tehlul nen chawlh ka la thei lo alawm maw le," pa Siama'n a tih chuan, "Remchangah i lo zin ve dawn nia, ka pa chu a awm nghet tawh lutuka, pan tawp a ngai tawh," ka ti ve hlut a, "A head tawh bawk si a, nuam a ti khawp ang, sangha dil chungchang te a rawn sawi a, ka kal chak tak tak a ni, ka chawlh theih veleh ka la rawn zin dawn nia," a ti ve luam a, an veng kan thlen hnuah min chhuksan zui a, Azoi chu seat hmaah insawnin kei seat hnungah ka ṭhu thluang duai a, boruak a thiang nuam bawk a, rilru pawh a thar vuk mai hian a hriat a, mahni in tak taka haw turte pawh ka ang tain ka hria.

Tlai lamah khua kan luta, ka pa chuan an school pengah min lo hmuak a, a rawn chuang ve nghal bawk. Kan chenna nu Nguri te in hi khawdaifema awm a ni a, khawchhung aṭang chuan km 1 vela hla a ni. Tih tur ṭul bik an neih loh hi chuan khuaah hian an kal meuh lo a, khaw chhung mite erawh an rawn kal fo thung a, a bikin naupang hian lennan tak an rawn hmang a, thei tla chhar turte hian inrininah an lo kal leh huk ṭhin.

'Sailo Fram' tih intarna kan thlen chuan ka dakchhuak vat a, mipa tleirawl pali hian huan an lo sam a, pakhat chu a rawn hawi nasa viau bawk.

Tualzawl kan zuk thlen chuan nu Nguri leh a nu an lo chhuak nghal a, "In va lo thleng hma ve, in chau em, motor te in rui lo maw?" ka pi Lalpuii'n a lo ti zung zung a, nu Nguri chu a ṭawng ve lem lo thung. Ka pa chuan Azoi chu chaw ei nghal turin a sawm a, "Inah ka va phei phawt ang," a lo ti thung a. Azoi pa hian bawng a enkawl a, a hmunah hian an awmchilh a, an awmna pawh a hla vak lo a, he khaw mi leh sa dik tak an ni lo bawk nen helai hi an chhenna hmun nghet a ni ve tawh mai a, hnathawk dang awmchilhtu hi chhungkaw thum an awm a, kan ṭhenawmte tiin kan sawi mai ṭhin.

Lawmsanga ka zawng deuh a, an in lam ka han hawi chuan a lo inkalh ṭhiap a, hnathawkin an chhuak vek nge mawni ka tih rilruk laiin in chhungah a nu a lo awm a, thaw ri barh barh chungin zial a lo zu hlat hlat mai. Kan nula pahnih Biaki leh Remi ten thingpui min lo siam zung zung a, ka bag te pawh in hnuaia ka pindanah min zuk dahsak thlap a, nu Nguri pain a lalkhuihthei um thlum tui tawk chu a bel chawpin a rawn chhawp hluai a.

"Zu ah a chhuak ṭep anih hi le!" ti chungin Azoi nen kan hawp bawrh bawrh a, "In pum a thip ang e," tiin nu Nguri'n in tam a lo phal lo va. 

Thingpui kan in zawh hnuah ka inbual a, ka inpeihfel meuh chuan khua a lo thim ruih tawh a, current a awm lo aniang pindan chhung chu a thim khup mai. In chunga ka han chhoh laichuan pi Lalpuii'n a fapa pa Dinpuia a lo au lang lang a, "Generator lo on rawh, petrol rawn la phei nghal la.." a ti a, pa Dinpuia'n, "Lawmsangpuia kha lo tir rawh, a thiam vek kha," kawmthlang inte aṭangin a lo ti ve thung a, Lawmsanga chu a lo haw tawh anih hmel.

Hmanhmawh deuh chuan pawnah ka inhawl chhuak a, Lawmsangate in lam ka hawi chuan eng va va hi ka han hmu a, kawngka erawh a la khar ṭhiap tho. Tualzawla ka chhuk thlak laimek chuan tuikhur lam aṭanga bucket a lo khai chho lai hi ka zuk hmu hlawl a, min hmu chu a phu ve zawkin ka hria. 

A lampan chuan ka bai phei suih suih a, "Tinge i biak theih loh?" ka ti nghal thawr a, ka zawhna chhang loin, "I thlenna a rei tawh em?" a lo ti ve thung.

"Aw, i nuin a hrilh lo che em ni?" ka tih chuan, "Hrilh tho e," a ti a, ka ke chu a rawn en chik viau bawk.

"I tlukna pawh kan siamṭhat tawh kha," a ti leh tlawng a, keiin "Tinge i biak theih loh a?" tiin ka lo zawt ve leh a.

"Ka phone ka ti chhia a," 

"Engtin nge i tihchhiat a?"

"Dilah ka thlauh palh a,"

"A va zia lo," tih leh ka phone phawrh ka rual a, "Hmang rih rawh," ti a pek ka tum chu, "Ka siamtir leh mai dawn alawm," a lo ti nghat a, thilpek hi chu har ve ṭalh ṭalh tak a ni.

"Phone dang hman tur an neih ka ring, ka lo zawh sak ang che," ka tih leh pawh chuan, "A ngai lo, naktukah Puia te khuaah an kal dawn a, ka thawn ang," a ti leh tlat a, zanah pawh kan inbe thei dawn lo a ang.

Chutih laichuan pi Lalpuii'n a lo au a, "Generator lo va buaipui teh," a rawn ti a, "Ka han dah lawk ange," tia an in lama pana Lawmsanga kal tur, "Hmanhmawh rawh aw, thil dang ti hmasa loin lo ti thuai thuai rawh," a rawn ti leh lang lang a, Lawmsanga chuan a chhang lem lo.

Bucket dah tura a chho chu ka lo la nghak rih a, rei vak lo hnua a lo chhuk leh chuan, "I chau em?" a ti ve ta hram a, ka lo nuih nghal var var.

"Chau e, nang zawk, vawiinah eng nge i tih a?" ka ti zung zung a, "Sapthei zamna kan siamṭha.." tih pahin generator dahna in lam a pan a, ka zui ve zel bawk.

"Naktukah eng nge i tih ang?"

"Ka hre lo le, hna chu a tam mai, huan sam tur te pawh a awm a, balhla chi lak te pawh a ngai.." a kal chak angreng a, tiang hawl chung chuan ka um pha meuh lo.

Generator dahna bul a thlen chuan a rawn lehhawi a, "Chaw in ei dawn tawh kha, va lut rawh, ka lo ti eng ang," a rawn ti a, zawm duh lem loin ka pan hnai ve zel a, a chhungah lut ve loin pawnah ka lo nghak thung.

"Min ngai vak lo a ni maw?" thlek dak dak chunga ka va tih chuan, "I ring em?" a lo ti bauh a, petrol rim chu rimchhia a ti aniang a hnar a hup vat a, "Ring lo," ka tih veleh ka lam hawiin a rawn nui ve suk a.

"Zanah lo leng la.."

"A chi nang.."

"Engah maw a chi loh ang?"

"Ka hre nang.." ka lo chek tlak a, mi dang hmuh laia ka bialpa anga awm hi a duh ngai lo a, mi dangin an hriat hrim hrim hi a duh lo niin ka hria.

"Ka pa chuan a hrethiam vek tawh.." ka va tih chuan min rawn melh rang khawp mai.

"I hrilh em ni?" a ti zawi sup a.

"Hrilh lo e; mahse, i chungchang ka zawt zeuh zeuh a,"

"Engtin nge a tih che?"

"Engtin mah, engtin nge min tih vak chuan anga?" dar a kan ak a, "Mi dangin an hre ve em?" a rawn ti leh a.

"Hria se eng nge pawi?" ka tih rualin in lam chu a rawn eng ta pup a, ani chu a lo la chhuak mai lo, petrol bur vel a va hung ṭha a, chumi hnua a lo chhuak tur chu kawngka dal tur chiahin ka lo ding a, a lai aniang a kut min rawn hnimtir ringawt.

"A rimtui.." ka tih rual chuan a ner sak a, "Min ngai em?" tiin ka lo zawt nawn leh.

"Um, ngai khawp mai.." puanchhiain a kut a hrufai pah mawlh mawlh a, a thutak tih hriat chu har tak a ni.

"Eng nge min lo hawn te ti ve la..." 

"Engmah hawn ka ngai lo, an zawn hma chein va phei tawh rawh," a lo ti let heh a, tlangval zei lo ve tak a ni.

"Anih, chawei tui aw.." ka tih chuan, "Eitui le.." a ti veleh mai a, "Phone chu kawl la, ka pa phone ka hmang mai dawn alawm," ka'n ti leh hram a, lu a la thing cheu mai.

Ka kalsan hnu lawkah kawmthlang lam aṭangin pa Dinpuia a lo chho a, generator inah an inzui lut leh rih a, in chhungah ka luhsan ta thung. Kan nulaten chaw ei an lo siam mek a, kei chu "Ṭhutthleng seiah i ei duh em?" tiin min lo zawt a, ka ṭhuttheih thu hrilhin dawhkan ka kil zui bawk.

Chaw kan ei laichuan nu Nguri chu phone hman duh loh la ṭha ve si an nei em ka zawt a, "I phone a chhia em ni?" a lo ti he haw a, "A hang nasa a," tiin dawt ka sawi ta ngawt. "I pa Dinpuia hman hlui a awm ang," a tih laiin, "Ka ta hlui a awm, i duh chuan i hmang dawn nia," pa Tluanga'n a lo ti hlauh a, ani hi pa Dinpuia chhang chiah a ni.

Chaw eikhamah a phone hlui chu kan en dun a, "A battery a tlo lutuk tawh lo a, nileng te chu a la daih ve ang," tiin power bank nen min pe a, Lawmsanga chu ka phone zawk hi hmantir ila a ṭha ang. Mahse, a la duh ngut ange maw..?

Zingah hma deuhah ka tho a, ka thawh hma ve pawh hian ka pu Muana hi chu ka thawh khalh thei ngai lo. Thingpui in pahin veranda-ah a lo ṭhu luau a, a phone a lo bih leh mual mual tawh. "I va tho hma ve?" tih pahin a phone chu a thukru zuk a, "Vawk in lamah exer ka zuk la teh ang," ka tih chuan, "A chhuk chho deuh lo em ni, i tlu sual leh hlauh ange, kawtzawlah sawn tei kual mai mai zawk rawh," a ti bul bul a. 

"Tui bottle ka theihnghilh dawn alawm le," tiin in chhung lam ka pan leh rih a, ka va chhuah leh chuan a phone bawk chu a lo bih leh tawh. Kal pah chuan ka va thlek zuai a, ka kal pelh rualin ka ip chawih chawih mai, pu Muanthanga mai mai chu aw, sap nula thlalak te a en nia...

Muangchangin vawk in awmna lam pan chuan ka inhawl thla a, dar 6 a pelh chauh avangin a lo tho lo maithei a ni. Vawk in awmna zawl ka thlen chuan thawm an lo nei chuah chuah a, a ṭhen phei chu an tlan kual velin ka hria. "Ramhuai ka ni lo ania aw...ka lo kal mai mai, in pu vangin ka lo kal.." tih pah chuan thawm dim fahran chuan vawk chaw chhumna in lam ka pan a; mahse, kawngka a lo inkalh tlat a, ka lut thei lo.

Chutah, vawkpui no nei tur kha ka hrechhuak thut a, a nei fel tawh ngeiin ka ring. En tum chuan phur deuhin ka pan phei a, kan thlen hma hmain a note ngêk ri ka hria a, an tam hmel khawp mai. Va en ka tum lah chu a pui chuan a phal vak lo aniang a lo tho thurh a, 'Kalsawn rawh, lo hnaih hlek suh,' a tih ve na aniang min nguk khum hlawrh hlawrh a, ka note ho lah chu a pui phen lamah an ding khawm ṭai a, 'In va sual ve, nu sual nu, i fate i fuihpawrh elo, thinchhe nu.." tih pahin vawkpui chu ka tiangin ka zuk vaw tawih tawih a, a lo duh lo nasa, ring mangkheng hian a han nguk leh chiam chiam a, a piah lama vawk awm ho chuan thawm an rawn chhuah ve chuah chuah hlawm.

Tu emaw rawn tlan thla hlawk hlawk thawm hi ka hria a, kawng awmna lam ka han hawi chuan vawk ho pu chu a mut kawr nen hmanhmawh tawkin a rawn tlan thla a, "I va tho hma ve..." tia ka han au chu a phurna a bo zo emaw tih mai tur hian a ding  dat a, a rawn kal leh chu a kal muang tawh khawp mai.

Ka bul a lo thlen chuan, "Sakei a awm dawn emaw tih laiin.." a'n ti ve ngei a, vawk in chunga ek hawlhna tiang chu a ban zui zat bawk.

"I hraite hi an ril a ṭam aniang.." ka tih chuan, "An muhil lai i ti harh a, an ṭam hma reng ang chu, kaih thawh hma an duh bik hleinem, keipawn ka duh lo.." ti bul bul chungin vawk ek chu a hawlh thla tawp tawp a, a inthuam dan chu enin ka lo nui ru tet tet.

Ka lam a rawn hawi chuan, "Ek tharlam rim i rawn hip chak nge?" a'n ti vei nghat a, ka lo nui chu tawi tein min nuih let.

"I tho thut a ni maw?"

"I va inha bul ve, thosiin a seh mai tur che asin..." 

"Meizial zu khû la.."

"Ka keng hleinem.."

"I tihdan kha a nawm hmel, ka lo ti ve chhin," tih paha va ban ka tum chu ka kut a lo beng taih a, "I hawlh pherh ang," a ti teh tlat a, a sawi zawh rual rualin aman a hawlh pherh.

"Vawkpu, khawi keiman..."

"Tikhan min ko suh aw.."

"Mi pawh an awm chuang lo a," ka nuih var var laichuan, "A note khu i pawm chhin duh em?" a tia, phur tak ka ni.

"Duh e le," tih leh ka tiang dah ka rual a, amah zawk chu lut hmasain ka lamah a ban a rawn phar nghal a, ka lo ban rang khawp mai. Min chawi lut nawlh a, ka ke lehlam ka rah ṭhat ngam loh vangin min chelhbet ran bawk.

"A var khu..." ka tih chuan, "A zak ṭial chu a chum ber.." tih leh min thlah a rual a, ka tlu ṭep a, vawk in banah ka invuan bet hman hlauh. Ka phone ka phawrh zui a, a vawk pawm laichu thla ka lo laksak mawlh mawlh a, "Min lo laksak ve rawh," tih pahin vawkte chu ka ban zui a, ka rin aiin a rit a, a vun a nemin a lum thar thar bawk a, a duhawm ngang mai. Lawmsanga chuan thla min lo laksak ve mawlh mawlh a; mahse, a la hnai leh lutuk a, a nalh lo ngawtin ka ring.

Vawkpui lah chuan min lo ngaithei lo, min nawr a rawn tum ta mai a, ka ke na lam a rawn deh rualin sir lamah ka awn rawk, ka  vawkte pawm lai lah chu vawk in inkarah ka thlauh daih a, a ṭe rawng rawng a, vawk dang lo bengchheng ve bawk nen kan ri chuah chuah mai.

Hmanhmawh tawkin Lawmsanga chuan min hlang chhuak a, chumi hnuah vawk man turin vawk in thlang lam a pan zui a, min hau eih lo. Ka vawkte thlauh lah chu a lo tlan sawn hman aniang a zuk hawi kual nasa khawp a, a hmu nge mawni kawlbahra hmun lamah a tlan thla a, "Rite rite..." a tih ri ka hria chu ka nui hawk hawk.

Vawkin inkar aṭanga ka zuk thlek laichuan a inum kuar zawr zawr mai. "I man thei nange.." ka ti lang lang a, "Man a har lutuk," tiin min rawn chhang ve lauh a. "Vawm thlu tawp rawh.." ka ti leh erawh chu min chhang let lo.

Rei fe an inum kual hnu chuan hah hmel deuhin an rawn inpawm chho a, a zuk tal na viau aniang a khup pawh a paw hrut mai. "Exer i la zo der elo?" ka lo tifiamthu chu min nuih chak vak lo aniang, "La ve la.." tih pahin min kalpel a, a hnung lamah ka nui ru tat tat.

Vawkte a dah luh hnu chuan a kekawr a zen rak rak a, ka phone kha rawn phawrin min pek let a tum a, "Hei a dang ka nei," tih leh ka phone ah lai chu lek ka rual a. 

"A ngai lo ka tih kha, ka siamtir dawn alawm.." a tih chuan, "Ka be chak tawh che alawm.." nuisangin ka ti a, min melh dan chu zei min tih hmel hlein ka hria.

"Intext char char ang aw.."

"Ka hman ngawt hleinem," a tia, phone chu hmeh pahin a nui suk suk a, a tho hlim hmel leh a nui hmel chu zingkara hmuh atan chuan a ṭha mah mah a ni.

"Thla la dun ila.." ka tih chuan, "Tu nge hmet ang?" a lo ti let heu a, "Vawkpui khu hmeh tir ila," ka ti let hlak a, tunge mawl zawk a ngaihtuah aniang chu a nui leh suk suk tawh.

A meichemna bulah ka lo ṭhutchilh ve reng a, kawlbahra hnah a mal a, eng tur nge ka zawh chuan, "Chaw eikhama an ṭhial mai maiah," tiin min chhang a, "Ka lo ti ve ang aw," ka tih chuan min chhang lem lo, ngawi reng chuan la malpui ve mawlh mawlh a, ani chuan mei a chhawm ṭha zauh zauh reng a, a khat tawkin ka thil mal lai chu a lo thlek bawk a, "A kuang no kha paih vek suh," a lo ti leh ṭhin a, paih tur chin hriat a har khawp mai.

Tam pawh ka mal hman lo tihah eng emaw dup niak hi ka kawih a, ka han en nak chian pangngang hring lu lian deuh hian min lo en kur mai! Ka rak ṭhat a, hnunglama ka eu tur chu ka ṭhutthleng a lo buk aniang a let thla hual a, ka ke lah chu a kan na em em khawp a, ka thil mal lai kha meiah ka vawm lut tain ka hria. 

Lawmsanga rawn tho chu, "Pangngang a awm, mit pahnih a nei ania, kha tah khan a awm," tih pahin thuka ka thil vawm phei chu ka lo kawhhmuh sawk sawk. "Eng rawng nge?" tih pahin min rawn tung tho a, a hring a nih thu ka hrilh chuan a hlauhawm loh thu a sawi sam et a, mi rap leh lutuka ṭhut pawh ka ṭhu hnai duh tawh lo.

Hla deuh aṭang chuan en pahin ka va be deuh sek...

"Nupui i neih hunah ran vulh lam hi i la ti tho angem?"

"Khua nge fram hi nuam i tih zawk?"

"Bawng nge vawk vulh hi hlawk zawk ang," tih angreng zawhna ho te te ka zawt a, ka zawhna tam zawk chu aw leh aih in a chhang a, min chhang tawi thei ngang mai.

"Nupui atana i hmeichhe duhzawng eng nge?" ka tih chuan, "No deuh lo," tiin min chhang a, min sawi chhan a ang ka ti.

"Vawk chaw eilai hi hmuhnawm ka ti.." ka tih laichuan min lo melh zauh a, "An lo zawng lo ang che maw," a ti teh daih a. Sana ka en chuan dar 7 a lo pel tawh.

"An tho tawh ang, i vawk chaw pe lai rei lote ka en anga, ka haw ang," ka tih chuan, "Hetianga awm fal hi a ṭha vak lo ania, chho har suh," a lo ti khauh a, mi mitmei ven tur awm lohna hmunah pawh a ṭi dui rengin ka hria. 

"Exer ka la dawn ti pu Muana ka hrilh alawm," 

"Pu Muana fapate lakah khian fimkhur rawh aw.." 

"Engati nge?"

"Nula an lawm riauin ka hria, pu Muana zu phuahchawp te kha inpui miah suh.."

"A lakhuihthei zu kha maw..."

"Lakhuihthei chauh anih loh kha.."

"Hmanah pu Muana'n kawlthei zu chu ka period laiin min pe tawh, a strong asin aw..." min rawn thlek vang vang a, "An thlah zinga mi niawm  tak i ni.." a lo ti teh daih a, hrethiam lo deuha ka va melh laichuan, "In tawh suh, pumin a ngeih lo, hmeichhe tan phei chuan thei um pawh nise ruih theih a nih chuan in loh a ṭha," a ti leh nghat a, "Min van humhalh em em," tia ka nui chu min ei loh hmel ngang mai.

"Lawma, chawlhniah khuaah va leng ve ila,"

"Chawlhni chu ka mut ve theih ni ania, tih tur pawimawh i nei em ni?" tiin min lo thlek zauh a.

"Nei hran nang, kan la kaldun miah lo a, ka kalpui chak mai mai che.."

"I ke a nat kha.."

"Anih ka ke dam hunah aw,"

"Khuaah chuan tlangval sual an tam lutuk, hmanah pawh Puia nen kan va leng a, kan tlanchhe haw alawm.." va thlek duk duk pah chuan, "I insual ve tawh em?" ka ti tawl a, a nuih a za khawp mai. "Mi chu ka hnek ve tawh," nui chungin a ti a, a chak bawk a, a hnek pawh a na viauin ka ring.

"Leng ila, tlangvalin min lo chhaih pawhin min chhan zel anga..." 

"I ho e a..." tih pahin a tui chhuan so chu a suan a, vawkchaw pek tur a siam zui mawlh mawlh a, bucket nena a inkhai chhuak chu a zui ve leh nghal a, ka ke chu na lo sela puih ve pawh ka chak viau mai.

A vawkchaw pe chu ka zui ve bawk a, a tei kual tam leh lutuka ka hah. Ka ning ta deuh chuan leiah ṭhuin ka lo thlir ta tawp a, ran a han enkawl thiam zia mawlh chu, chaw a pek laia an lo inchuh pawhin vawikhatte mah a vin eih lo, an phuhlip te a hiah sak a, a changin vawk note a va pawm leh lawp lawp a, nui chungin ka lo thlir dauh dauh reng.

Thosi leh tho mitchhaih a han tam khawp a, keimah chauh chu min zar bik nge mawni ka ti. "Lawma, thosiin a seh ve lo che em ni a?" ka va tih chuan, "A tam lutuk, han chho daih rawh, i inha bul si.." a lo ti then a, ka la chho duh mai lo. Mahse, rei pawh ka ṭhut leh hma chuan ka zun a chhuak ta tlat a, zunna tur ka melh deuh a, bathroom a awm loh chu thuhran, han zunna tur awm ang hi ka hmu lo reng reng.

 

"Lawma, khawiah nge in zun ṭhin a?"

"I zung duh em ni?"

"Aw, ka zun a chhuak lutuk.." ka tho zui a, ani pawh vawk in aṭang chuan a lo chhuak a, ka lam a rawn pan vangin min hruai a tum nge mawni ka ti hman. Mahse, ka bul a lo thlen chuan vawk chaw chhumna in lam a kawk a, "Sawlai tuizem awmna chhakah sawn va zung rawh," a ti ta mai a, ka duh miah lo, ka mawng a lang vek dawn.

"Ka haw mai ang, sawtiangah ka zung duh lo e a.." min chhang lo reng reng.

"Ka haw dawn..." tia kal mai ka tum chu, "Anih vawk in sirah sawn va zung mai rawh, ka lo en lo ang," tiin lehlam a hawi zui a, ka nuih a za deuh.

"Ka han haw tawh ange, ka awm rei tawh em mai, khilai thleng khi min lo thlah rawh," a banah ka va kuah chawt a, min en phawk deuh nain a sawisel hran lo a, min zui ve nghal mai bawk.

"Ka bula awm hi nuam i ti lo tlatin ka hria," kal paha ka tih chuan, "Ti e, i ṭawng ngaihthlak a nuam alawm," a ti ve ngei a, nui loa a sawi vang chuan a rilru dik tak a sawiin ka hria a, ka lawm ru hle bawk.

"Miin bialnu i neih leh neih loh an zawh chein engtin nge i chhan ṭhin?" min chhan nghal mai ka rin laiin, "Min zawt pawh an awm lo?" a lo ti teh daih a, min chhang beidawng angreng.

"Zawt ta che sela.." ka ti leh hram.

"Min zawttu a zir a ni mai, hnathawk ho bulah chuan ka sawi duh lo ang, an star em mai che.." a ti zawi sup a, ka beisei angin min chhang lo naa ka lawm a tling tawk em em thung, a bialnu ang chuan min ngai ve tawh a ni ngat mai.

"Keichuan ka bialpa i nih thu ka sawi hmiah zel asin, Azoi pawh ka hrilh tawh..." a lo chek tlak a, "An hriat ve vek angai hleinem, sawi tawh suh," a tih chuan ka nui chuai raih raih.

"Tinge, min zahpui em ni a?"

"Engahnge ka zahpui ngawt ang che, i tana ṭha tur ka ngaihtuah zawk alawm,"

"Eng nge chu chu ka tan a ṭhat zawkna tur awm a?"

"Engmah hre lo angin awm teh suh, kan dinhmun a inthlauh em hi," ka thlek vut a, "Chutiang rilru chu i lo pu elo, i dinhmun leh ka dinhmun ka khaikhin ngai reng reng lo ania," ka ṭawng ring angreng khawp mai.

"Mipa chuan thil thui tak kan ngaihtuah alawm, tun angreng hi i ni bik lo thei a, nakinah chuan i tan zahpuiawm te pawh ka la ni maithei, min sit hun pawh a la awm thei a.." ka ding chawt a, ka en deuh vang vang.

"Engtikahmah ka zahpui lo ang che, khatiang zawng khan ngaihtuah tawh reng reng suh, ka pa pawn a hrethiam tawh ka tih kha, enteh...inthup tawh lo ang, mi pawi kan sawi pawh a ni hleinem ti raw, kan induh tawn a, tihian a ṭha mai alawm, nupui pasal nei rual kan ni tawh tho a.." ani pawh chuan ka mitah min en ran a, rilru buai deuh hmel a pu bawk.

"Min duh tak tak ti raw..?" a lo bu nghat a, "I chhang awlsam thei em mai, min duh chhan eng nge?" ka ti leh ngat a, eng emaw awmze nei deuh sawi sela ka duh, heti ngawt lo deuh hian.

"I hmelṭha a.."

"A dang..?"

"I fel bawk a, mi zawng zawngin an duh ang che chu.." kan inmelh ren rawn a, sawi tur a vang angreng.

"A dang a la awm em?"

"Ka hre lo, ka duh tawp che,"

"Ka duh vang chein min lo aw tawp nge?" lu a bu leh nghat a, hetiang chu ka duh miah lo.

"Anih ka duh che tih hre lo ta la engtiangin nge min ngaih ang?"

"Ka ngaihtuah phak pawhin ka ring lo, min duh hi mak ka la ti reng zawk," ka mitah tak min en chungin a ti a, lawm tur nge lawm loh tur ka hrethiam map lo.

"Anih, nupui atan min duh em?" ka tih chuan, "Nupui tur atan chuan ka phulo mah mah che; mahse, ka nei thei che anih chuan a vanneihthlak ngawt ang," a ti ta a, ka thaw deuh huai mai. A bana vawn leh pah chuan ka nuih var var a, kalpah chuan ka melh zauh zauh reng.

"Ka tlaw bawk sia, hna ka thawk thiam ve mang si lo a, chawmhlawm ngai te ka ni maithei, min nei hreh miah lo maw..? No deuh i duh si lo a, ka no bawk sia," ka nui pah hak hak a, ani erawh nui loin lei lam a bih ngur a, ka thilsawi chu a hre lo emaw tih mai tur a ni.

"Min chawm peih dawn em ni?" ka tih leh chuan, "Peih e, i duh te chuan," a ti leh mai a, a awlsam riau zel hi mak ti loa lawm tur zawk a ni ta ve ang, zep loah chuan atan hian ka sitawm zawk mah, ani kut hnathawka eizawng a ni a, kei lahin hna thawh thiam engmah ka nei lo a, in chhung sekrek khawih pawh thiam vak ka nei lo, chhuat nawh leh insuk hi ka thiam ve chhun a ni mai a, eirawngbawl leh buhthlei takngial pawh ka thiam lo a, a tan hi chuan iaiawm tak tur zawk ka ni. Mahse, kan dinhmun ve ve kan inpawm sak theih a hnu tiin ka insit duh bik loa, mihring te chu inzira hmasawn chawp zel kan ni a, nupa pawh ni ila kan inhmangaih phawt chuan a nuam emaw, hrehawm emaw kan tuar dun anga, inpui tawnin kan hlim dun em em thoin ka ring a ni.

Zawl thlen chhoh hma deuh chuan min letsan a, tualzawl ka thlen rualin kawng chhak lam aṭanga Azoi lo chhuk ka han hmu a, "Tinge nimin khan chaw i lo ei leh si loh a?" tiin ka au lang lang a.

"Ka tum reng amaw; mahse, chakai kan lo hmeh a, ka kalsan phal ngang lo alawm..min hrethiam mai ru..." a rawn ti ve lawng lawng a, kawta pu Muana lo ding chuan, "Ka sam ṭuak pawh a ngai ania, i zin hlanin a ṭuak a tam tawh lutuk," tiin a lo be ve bawk a, Azoi chuan, "Putar i nih tawh kha, tikhan pu ve mai mai tawh rawh, i lerh lutuk nang hi.." a lo tifiamthu hlut a, "Chhunah lo kal ang che, nileng pawh tur a awm," pu Muana'n a ti leh zel a, in chhung ka luh hnuah pawh Azoi chu a lo lut mai lo. 

Pa Dinpuia fate an lo tho tawh hlawm a, fapa hi pali a nei a, a nau pa Tluanga hian fanu kum 10 leh kum 9 mi pahnih a nei thung a, an farnute pali hi khuaah pasal neiin an awm a, fa an nei ṭheuh tawh a, inrinniah inkhawm turin an lo kal dal dal ṭhin. Pu Muana makpate hi kohhran danga lawi an ni nain an nupuite hi an kohhranah an lut ve lem lo a, a chhan pawh an inneih hmain pu Muana'n thu a delhkilh sa a, an duh reng vang anih loh chuan an lut tur a ni lo a lo ti thlap a ni awm e.

Pawn lam ka va thlek leh chuan lu an lo inensak mek a, pi Lalpuii pawhin a rawn thlir ve dauh dauh. "I pate hi an la harh ve lo em ni, va kaitho teh.." a tih vang chuan ka pate pindan lam ka pan a, kawngka ka va kik rualin ka pa'n min lo chhang nghal a, an harh reng tawh anih hmel. Nu Nguri hi an unau zinga naupang ber a ni a, an duat rawn a, in chhungah hian a lal em em bawk a, hei vang hian ka pa pawh hi an zah phah a, ka tan a nawm phah viau bawk.

Ka pa lo tho chuan, "I tho nuam maw, vawiin chu min lo zui ve duh em, school-ah hna kan thawk dawn a, office-ah lo ṭhu mai mai ta che," a ti zung zung a. Mahse, nu Nguri'n, "In dim rih rawh se, vawiin chu awm mai mai pahin la phiar ka zirtir dawn che nia," a lo ti a, ka pa bula kal chu ka chak viau nain ka hnial ngam lo, ani hi chu a fel viau nain a tih tawh loh lama nek luih theih miah loh chi hi a ni a, nelawm leh zuam sual hlauhawm tak a ni, mi hi a ti ṭha hlauh zawk a, mi dang lakah erawh a khirh fat zel.

Tukṭhuan kan han kil chu pa Dinpuia fapa upa ber Duhsaka'n satui min tihbuak palh a,   amah lah chuan, "I lo chet vang anih kha," a ti sam et a, nu Nguri'n a lo ngaithei der lo, "Lalduhsak, i zak lo reuh mange ka ti, nangte hi i ṭawngkam a mawi lo thei riau mai," a lo ti khar khar a, Duhsaka chuan dêk pawh a ti ngam lo, a hrukna tur puan min lo lak a, chumi hnuah a naute chaw eina lamah a inchawi phei nal nal a, an phun ve ser serin ka hria.

Chaw eilai chuan vawiin lama an thawh turte an sawi ho a, pa Tluanga hoin hlawhfaten balhla chi an la dawn a, pa Dinpuia erawh huan samnaah a awm dawn a, hmeichhe hoin thingpui an lum dawn thung. "Jeminai ke chu na losela tui rawn sem la ṭha tur, tlangval hoin i tui sem hi an thlalel ṭhin ania, an indem fiam laih laih ṭhin che alawm," pa Tluanga'n a tih chuan ka pa chu a nui mai mai a, fiamthu anih vangin huat tur awm pawhin ka hre lo a; mahse, nu Nguri'n a lo haw leh pek.

"An va zakthei lo ve, tui sem mai maiin zuk kal tawh miah suh, mawl deuh deuh hi an awm a, fiamthu tlahawlh deuha infiamte hi ka duh reng reng lo ania, an lo fiam che chuan ṭim nek zel ang che..." a ti hluk hluk a, "I ngai kawi anih kha," pa Tluanga'n a tih leh pawh chuan, "An lo ngaihmelh vaih ange, ka nasa khawp ang.." a ti zui hram a, kei chu ka ngawi hle hle, lo nuih chi pawh a ni lo.

Ka pate ho hnathawka an chhuah bo diak hnu chuan verandah-ah mahniin ka ṭhu a, a reh tlawk tlawk mai, ni a sa ṭang at a, khua a har reuh reuh thei. Ka pi buhban pho chu savain an rawn thai leh zauh ṭhin a, an ngampa angreng a, engtin ka ti duh lem lo. Lawmsanga chu message ka thawn ṭhin a, hna a thawh vangin a la en hman lo thung a, ka tihtur hre lo chuan ka thawn belh zel bawk.

Dar 10 velah nu Nguri huan kal lo let chuan fu tlawn sei deuh hi a lo hawn a, pawn aṭang chuan in chhunga Biaki chhang hmet lai chu auin, "Fu hi Minai eiah lo vel sak rawh," a ti a, "Ka lo vel ang," ka ti nain min pe duh lem lo. Hetiang hian kan nulate hi ka eitur hranpa taka siam tur hian a tir ṭhin a, min ngei phah ka hlauh vangin ka lo inthlahrung ru viau ṭhin. 

"Lo lut la, la chu phiar dawn teh ang," a tih vangin ka zui lut a, sofa-ah kan ṭhu dun ren rawn a, a phiar dan min hrilh melh melh a, ka thiam chi niin ka hre lo, ka tihdan apiang chu a dik lo min tihsak a, 'A khât lutuk,' a tih loh leh 'I pawt rek lutuk, ti thawl rawh,' a tia, a duhkhirh leh lutuka a zirlai nih chu a hreawm angreng, tihsual hlekin a tum hmuk zel a, kei ang thil tih neuh neuh lam ti peih lo chi tan chuan zir thiam rual a ni lo e.

"Zai va play teh," a tih vangin woofer-ah ka va play a, joseph Zaia hla ho a ni. La phiar chawlh kan neih laichuan ka zai pui rat rat a, banga titanic movie poster lianpuia intar te chuan khua a tihar zualin ka hria. Lawmsanga ngawt chu ka ngaihtuah a, ka mitthlaah a lang reng bawk.

"Nang hi ngaihzawng i nei em mawni le, love song i tuipui riauin ka hria..?" nu Nguri lo ṭhu lehin a tih chuan, "Josepha hla ho hi ka duh lutuk," ka ti mai a, mi a la en chik khawp mai.

"Aizawlah khan bialpate i zuk nei a ni lo maw....ka hriat ve i phal dawn nange?" a ti leh a, min nuih var var bawk. "A teuh nang, a hunah chuan ka la hrilh vek dawn che alawm," ka ti ve hlut a, sawi nghal mai ka chak viau naa, Lawma khan mi hriat a hlau bawk si a, ka la sawi hreh ve deuh a ni.

Chawhnu lamah chuan pu Muana a rawn haw a, a lukhum parh hnuaiah a meng sen leh rûm tawh. "I tem leh hlek a ni maw?" nu Nguri'n a lo tih chuan, "Tun ṭuma mi chu a ṭha ṭek ṭek dawn khawp mai, kum 10-na ho khu bottle nalh deuhah man to zawkin a zawrh chi ang, chhak lam kawngka bula barel ho khu lo khawih miah suh u, zawlaidi thar ka siam teh ang," a ti chuar chuar a, an grape sawrna hmun hi ka tlawh ve fo a, an umna hmun pawh ka lut ve tawh a, barel tam feah grape an um a, bottle chi hrang hrang a tam hle bawk. Naupang luh an phal lo a, chutih rualin in lama in an phalsak leh lawi a, keichuan tui ka tih loh vangin ka in ve ngai meuh lo. 

"Chawlhni hmasaah khaw chhung tlangval ho i lo inpui vak a, an zawngchhang leh ngei ang," nu Nguri'n a tih chuan, "Tem chhin a ngai alawm," pu Muana chuan a ti sam then a, "A man te chawi tir tal rawh, kham khawp hnapin an in zel bawk si," nu Nguri'n a lo ti leh.

"A teh nang, tem man pe zawk awm kan nia lawm, a thlawnin min tem sak a, zu in mi hian an hre ber, heng ho hi an ṭangkai lutuk," pu Muana'n a tih chuan, "Zu in mi kher i tia, zu zuar thanin kan thang vek, kohhran tan dawr pawh kan nuam lo zo ang," nu Nguri'n a tih pawh chuan, "Grape tui ve mai alawm," a ti leh zel a, an inhnial an inhnial mai.

Tlaia ka pa lo haw chuan thla thar lama Aizawl kal a ngaih tur thu a sawi a, school thilah office dawr a ngai anih hmel. Zanah lah chuan pu Muana nen khuaah an kal a, an rawn haw har khawp mai a, pi Lalpuii'n a va biak chuan nu Ṭhatei te ina an len kawi thu an rawn sawi a, nu Ṭhatei chu nu Nguri u chiah hi a ni a, khuaah chuan dawr lianpui a nei a, a pate thlai leh thei te hi zawrh tuin a rawn la ṭhin a, nu lianpui leh hmelṭha deuh mai a ni.

Ka pate lo haw lai chu ka hre lo, Lawma nen kan intext laiin ka lo muhil daih a, balhla chip siam dan a lo thawn pawh zingah ka hmu ve chauh. 

Ka pa zin tur chu zui ve ka duh khawp a; mahse, amah zawkin a rem loh thu leh office dawr ngai anih vanga thil dang a tih hman loh tur thu a sawi a, zan hnih khat chauh a cham dawn anih hmel. Nu Nguri leh pi Lalpuii'n puanthan an chah nual a, pi Lalpuii hian puan ṭhui a thiam khawp a, keipawh pathum lai min ṭhuisak tawh a, "I kawr kan ṭhui leh dawn nia," a tih vangin keipawn lace hring dal kawlfual tur ka chah ve a, a kal hun tur chu kar thar mai hi a ni.

Inrinni chuan khaw chhung lama kan chhungte ho pawh an fate nen an rawn lang leh ṭak ṭak a, cycle-in hmeichhia leh mipa naupang ṭhenkhat an lo kal nual bawk a, theimu lo tura lo kal an ni hlawm. Polythene an rawn pai far a, a pai lo ten pi Lalpuii an rawn dil bawk. "Thei in lawh hmain inkhawn ve phawt rawh u," pu Muana'n a lo tih chuan an peih loh hmel hlawm khawp mai, a hnial ngam loh vangin an lo lut ve sap sap a, chair-ah thuawih fahranin an rawn ṭhu ve ṭhap a.

Nu Ṭhatei'n thawhlawm a va sem a, kan zai ho laiin amah bawk chuan a khawn khawm leh a, pu Muana a sermon a, a han bei rei em em khawp a, kohhran lian inkhawm chen zet hi kan inkhawm ṭhin. 

Kan inkhawm banah chuan buhban chhang kan ei a, naupang ho pawh an thei lawhna tur lam pan tumin an chhuak sap sap a. Veranda-a ka va chhuah laichuan Lawmsanga an ko ni ngei tur a ni Lawma te in zawnah an ding a, "A muhil aniang, au leh teh.." tiin an ri nak nak a, mipa naupang pakhatin Lawma te in a pan laichuan kawngkhar a rawn inhawng rawk a, Lawma a rawn chhuak hlawl mai.

"In va bengchheng ve," tih pah chuan chempui a rawn lek larh larh a, "Kawng a fai em u Lawm?" pakhat chuan a lo ti vat. "In bawh en chawp a ngai ang," Lawma'n a tih chuan an phun ve nang nang. Chumi hnuah theimu huan awmna lampanin an inzui thla hlawm a, heti hian Lawma peih leh peih lo hi an sawm chhuak leh nge nge zel.

Ka din reng laichuan Puia leh a ṭhiante pathum hi tuikhur lam kawng aṭangin an lo chho hlawl a, "Jemina, artui kan chhar ṭeuh mai.." an rawn ti lang lang a, ka chhang let lem lo.

"I duh ve em?" Hriata'n a tih chuan, "Duh lo mai," ka lo tihsan a, ka zawn an rawn thlen laia ka lo en chian chuan artui chu an hum far a, arpui tla hrang a awm leh tawh anih ka ring.

Min kalpel ṭep tawh tihah Puia chu a lo nui ruh ruh a, "Ka hre ru ania aw," a rawn ti zauh.

"Eng maw?" ka tih chuan, "Nizanah a sawi vek ania...thuruk...thil te te.." tih pahin a nui ruh ruh a, Puia hi Lawma kawm ber a ni a, an lo inhrilh a ni ngat mai.

"I hre tlem awm em mai.." nui chunga ka tih chuan, "Hre tlem nang, kan sawi ril lutuk.." a ti ham ham a, a ṭhianten an lo zawh chuan a sawi duh bik miah lo. Nui tat tat chungin ka luhsan a, a ruk tak chuan ka hrechiang chak viau a ni, Lawmsangpuia chuan engtin tak min lo sawi ve ang maw.

Zan mut dawnah Lawma chu ka zawt a, "Aa...chutiang inzawh te chu.." tiin engmah min hrilh duh lo a, "A ṭha lam a ni em, ka ngaih a ṭha lo ania," tiin ka kar lui ve tlat a, "I hmelṭhat thu kan sawi," a tih chuan awm a nuam duh ngang mai, a ṭhianpa bulah chuan a hmai a lo uang ve te pawh a ni mahna. Puia mai ni loin hnathawk tlangval ho min en dan hi ka hai bik lo a, Lawma nen kan inngaizawng tih an hriat hunah chuan mak ti fe fe chu an awm ngei ang.

Chawlhniah chuan in hnuaiah lehkhabu ka chhiar melh melh a, thingpui min pe tura Remi a lo chhuk bak chu tumah lo chhuk an awm lo a, a reh bawk nen mut a chhuak ve lek lek. Ka muhil dawn siar siar tihah chuan   thawm ri deuh ṭawk hi ka hria a, chhuata thil tla ka en chuan lung tereuh te hi a lo awm a, tukverh pawn aṭanga lo vawm luh a ni. Hmanhmawh deuh chuan ka ṭhu chhuak a, tukverha ka zuk dak chu Puia leh Lawma theihai kung bulah an lo ding a, Puia'n ban a rawn vai lauh lauh laiin Lawma zawk chuan min hnungchhawn tlat thung.

Ka call-a, eng nge an tih ka zawh chuan, "Kan leng dawn, khua aṭangin mi an lo kal ṭeuh a, kan awm ve peih lo," Lawma'n a lo ti bul bul a.

"In tem ve peih nange?" ka tih chuan, "Peih lo, Azoi te inah kan va phei dawn a, i lo kal ve duh em?" a lo ti khauh mai a, hnial lo tak ka ni.

"Lo va phei ru," tiin ka insiam sawk sawk a, in chunga ka han chhoh chuan naupangho an lo ri laih laih a, tv-ah thlahrang film an en a, an inkhar thim ṭhiap bawk a, pa Dinpuia faten an farnute an lo tihṭhaih niawm tak a ni. 

Pi Lalpuii bulah ka kalna tur ka hrilh a, "Kalpui i ngai em, Biaki hi inzui tir ta che," a lo ti var a, "Ngai lo ang, ka kal thei alawm," ka tih pawh chuan, "I va tlu sual ange fimkhur la aw," a la rawn ti ṭawk ṭawk a, ka chhang zui tawh lem lo.

Muangchangin Azoi te in lam ka pan a, ka va thlen chuan Azoi pa leh Lawmate ṭhiandun chu pawnah an hnar hup chungin an lo ding far a, ka va thlen rualin thil awmzia chu ka hre ve nghal. "A va hun lo e aw..." ka tih laiin a pa chu a khuh kharh kharh a, Puia'n "A kang khu luih luih a, vawikhat te pawh zuk khuh lo chuan," a lo ti a, a sawi zo chiah tihah Azoi chu a rawn khuh kharh a, a bak chu a reh leh vang vang. 

"Azo, ti thuai thuai rawh," ka va ti a, keimah zawk chu ka khuh bawrh bawrh, a thiam thil ve ania, hmarcha muh hi a thiam khawp a, pi Lalpuii pawn a ko ziah ṭhin.

"Lo nghak ru ka la zo lo deuh," a rawn ti lang lang a, an ning ta deuh aniang, "Kal daih ang u, tawitaw kawnah zuk ṭhu daih ang," tih pahin Puia'n min rawn hui a, Lawma'n a zui vangin ka zui ve nghal mai bawk. Ka ke va vang chuan ka kal chak thei si lo a, anni ṭhiandun lah an zuan azangin an kal chak bawk si. An hnung lama ka ner ka ner laichuan Lawm chu a lo hawi thut a, engmah pawh ka sawi lo, a lo let a, ka hmaah a hnung a rawn dawh ringawt.

"Ka rit ania aw..." ka tih laiin Puia a lo nui ruh ruh a, Lawma hnunga ka zuk bawk chiah chu min thawhpui lawp mai a, min zo nalh nalh tak a ni.

Kawn kan thlen thlak chuan thli a thaw heuh heuh a, a dai nuam khawp mai. Puia lah chuan rei pawh kan ṭhu hman lo tihah, "Lighter ka theihnghilh," tiin min letsan leh daih a, kal lam khan zial a ṭan lai ka hmu reng a, chance min pe tih ka hrethiam nghal a, Lawma pawh chuan a hriatthiam tho ka ring.

Mitmei ven tur an awm tak loah chuan inngheng rialin kan ṭhu dun a, ka kut a hum ve rauh rauh reng. A dar ka va nghen rual chuan min lo kuah ve vat a, chuta a lam ka hawi nen chuan kan inenhnai khawp mai. Ka han insiamrem deuh chu a hrethiam lo nge ni, "I muhil kan tiharh che a ni maw?" tih pahin ka sam a zut delh delh a, chhang loin ka la en reng thung.

"Ka mumanga ka lo hmuh laitak che.." tiin ka han nuih var var a, a khi ve sak. 

"Engtin nge min hmuh a?"

"Min lo kuah a,..." 

"Tiang hian maw.." min rawn kuah nghet salh a, "Chuan..." ka nuih var var laichuan mit tizim raih hian min melh a, "Chuan.." a ti zawi ve sup..

A hmuiah ka han fawp zauh a, "Min fawh laitakin min rawn tiharh," tiin ka tum zui bar a.

"Ngaihdam dil ka ngai a ni maw.." a ti zawi sup a, chutah ṭawng leh ka tum chiah chu min rawn fawp chawt a, ka chhang let ve thuai bawk a, bawlhlo tel loa thil tui ber chu hei ngei hi a ni ang, a manhla hliah hliah.

Rei tawk fang kan am dun hnu chuan thawk kan la dun ham ham a, a lungawithlak ngei mai. Puia lah chu a lo thleng thei lawk lo a, keini pahnih chuan lo kal tawh lo tawp mah se pawi kan ti teuh lo. A khat tawkin kan infawp leh zauh ṭhin a, a bak chu tih tur vak a awm lo a ni. Lawma chuan rei a ti ta deuh a, "Lo let a tum lo aniang, Azoi te inah chho ang," a ti a, kham lo viau mahila hmeichhe tan hnial tlat chi a ni lo.

Min puak chho leh a tum erawh ka hnial a, "Muangchangin chho ang," ka ti ve tlat a, a bula awm rei theih dan ka dap a ni ber.

Inkai chungin ka inzui chho a, pu Muana grape um chungchang leh chawlhnia grape tui hela rawn kal ṭhin ho a nin ziate a sawi ve sup sup a, a nin chhan pawh thlai an tih chhiat ṭhin vang te, insual buai an awm ṭhin vang te a ni ber a, ka awm hma lawk pawh khan ram an lo tikang hluah a ni awm e.

Azoi te in kan thlen chu pa Dinpuia a lo ṭhu ve run mai a, Lawma nena kan inzui lut hlawl chu makti fein min lo en bawk. "In va rei ve, eng nge in tih khawtlai, puan phah tur te in paipawn lo maw.." tiin Azoi lah chuan min lo fiam hlut a, Lawma chuan nuam a ti chiah loin ka hria. Keichuan fiamthuah lain, "Mi damlo ke na te min va puh chhe ve, i hmarcha khu kha kan hre thui lutuka, kan hnar pawh a thip vek alawm," ka lo ti ve luam a, rei loteah Puia lo lutin Azoi chu a rawn hau nghal bawrh bawrh.

"Inleng hnawt zawnga thil tih reng reng," a tih laiin, "In lo leng dawn tih hre hek lo, sawi lawk tur alawm," Azoi'n a lo ti then a, thingpui a rawn siam a, kan inho a, pa Dinpuia chuan kei leh Lawma chu min en chik hlein ka hria.

 

"I ke chu i hmang rim mah mah ange aw, dim viau a la ngai ang," a rawn tih chuan, "A zia tawh lutuk, ṭhut leh mut ringawt hi chu a ninawm ve ṭhin a," ka lo ti ve mai a, Lawma lam chu hawi lehin, "Lawma, i puin a zawn a zawn che kha, tui pipe a chhia a ni awm a, i pipe hman khu a ṭha lo aniang," a ti zui a.

"Engtikah nge a chhiat a?" Lawma'n a tih chuan, "Ka hre bik nang, zuk enpui vat la, khuaah pipe dang va lei pawh a ngai maithei," a ti leh a.

"Chawlhniah chuan lei tur a awm awm si lo a, pipe bung ho kha.." a sawi pawh a sawi zo hman lo, "Chawlhni pawh nise dawr i hawn tir mai ang chu," a lo ti hlur a, a vin em avang chuan Lawma pawh a ngawi hmak a, keini ho pawh chu kan inmelh hrek hrek mai.

"Zuk en pui thuai rawh," zaidam zawk chuan a ti leh a, Lawm chuan a ṭhianpa lam hawiin, "Ti rawh, zuk chhuk lawk ila," tih leh thawh a rual a, kei chu min rawn melh zauh a, a hmelah chuan a rilru tur chu a hriatthiam theih viau a ni, Puia pawh chuan engmah sawi loin a zui nghal a.

An chhuak fel ta maw tihah pa Dinpuia chuan, "Hmanni lawkah pipe thar kan lei tir a, man tlawm te a va lei aniang, heng ho hian thil tlawm hi an thupui hlur a, a ṭha leh tlo tur hi an ngaihtuah ngai lo, tlawm ringawt tur aichuan to deuh mahse tlo tur hi lei zel a fuh. A puin pawisa a kentir ṭeuh a, chhe deuh a rawn lei a, a hlep ru tein ania ka rin, beisei aiin a rintlak dawn loh a ang riau hepa hi," a'n ti zui hluk hluk a, ka ngei ru khawp mai. Lawma a han tirh nasat ṭhin tehlul nen heti em em han rih loh mai chu, Lawma'n a hre leh ang tihte pawh a hlauhawm zawk.

Azoi pa nen chuan bawngpui chungchang an sawi zui luam a, chumi hnuah ka lam lo hawiin, "I la haw dawn lo em ni?" tiin min zawt a, a ruala haw chu ka peih lem lo. "Azoi'n min lo thlah ang," ka ti nghat a, min hnial a chak hmel khawp mai. Mahse, min hnial bik lo chuan a tho a, "Lo haw har suh aw, chaw kan ei ṭep ang," tiin a chhuak zui a, a awm ta lo chu thaw a veng huai huai mai a ni.

"Awi..a van ṭawng tam em em, a rilru a chhe reuh ka ti," Azoi'n a lo ti hlut. "Lawma khan a hria ang tih a hlauhawm, a rilru a na ngawt ang," ka ti ve vang vang a, "Ani aiin an chhungkaw tan Lawma hi a ṭangkai daih zawk," Azoi'n a tih pawh chu pawm tak ka ni, che dawn hlek se..'Lawma'n a hria ang, Lawma zawt rawh u, khawiah nge Lawma?' an ti thlazen a, pa Dinpuia ngat phei chuan khatianga hmusit tur kha a ni lo, duat hliau hliau zawk awm tak a ni.

Tlai eirel dawnah Azoi'n min va thlah a, inah pawh lo lut loin a let lehnghal a, in chhung ka luh chuan naupang hoin tv an lo la en vangin in hnuaiah ka chhuk tlang a, ka muhil nghal bawrh bawrh.

Chutia ka muhil chu inhau ri niawm tak hian min kai harh hlawl a, ka han ngaihthlak chian chuan inhau chu an ni chiah lo, inzilh emaw inhnial satliah an ni zawkin ka hria. Ngawi teh, tu chungchang nge an sawi chu....!?

"Hnathawk ho ka zawt kual a, an lo hre fur tawh, 'A hmeichhia zawk hian a virpilh a, an zar nasa lutuka, Lawmsanga tan hnar theih chi a ni lo' an tih kha, Hriata phei kha chuan, 'Lawmsanga'n a bem lo, nula khan a rawn be hmasa a, a kherhthlu zawk alawm, Lawma chuan a tirah pawh a duh lo a, pite fanu anih vangin a hnial ngam lo aniang' te a tia nih kha, zahthlak tak a ni, kan fanu angin kan ngai a, hnathawk ho lakah min ti mualpho khawp mai, kan mi leh sa a nihnaah chhungkua min ti mualpho ve zel a, an lo thei nual hman ang tihte pawh hlauhawm zawk tak a ni.." ti bawrh bawrhtu chu pa Dinpuia ngei a ni.

"I ṭawng fimkhur rawh, i inrawlh thui mah mah ange?" pa Tluanga'n a lo ti zauh a.

"I fanu ania lawm, zilh a ngaihnaah chuan insum loin zilh bawrh bawrh rawh, ka tan huat tur a awm lo ania, in hmangaih zia ka hria a, a ṭhatnana zilh turin thuneihna pawh in nei ve alawm," lo titu chu ka pa a ni thung.

"Ka thisen zawmpui chu nise ka khung bet hmiah ang, fanu angin en mahila mi hrang chu kan ni tho tho a, bakah a nu leh pa in awm alawm, in khuahkhirh lo anih leh hnathawk hoin an sawi ser ser anga, kan hnung lamah min la nuih tet tet anga a ni mai a..." pa Dinpuia'n a tih leh laichuan, "A va mak e, i thisen zawm anga i ngai lo anih chuan a laka thuneih tum lo la.." pa Tluanga bawkin a lo ti leh a, "Lo ṭawng ve sek suh," tiin an invin let hlur mai.

"Ngawi tawh teh u, kan thisen a kai emaw kai lo emaw Minai hi ka fanu a nia, ka thisen zawm te nena kan endan a dang bik lo, ka fanu dik tak a nih vangin a ṭul chuan keiman ka khuahkhirh mai ang. Minai chu ka zawt anga, Lawmsanga pawh ka zawt ang, lo buai ve vak duh suh u. Ngaihzawng nei rual a nia, nula a la ni bawk a, 'An inngaizawng, a hmeichhiain a ngaizawng hmasa,' tih mai mai lo huat tur a awm lo, tihah chuan Lawmsanga zawk sawn rawn ngaizawng hmasa ngam tura beisei chi a ni lo a, Minai'n a dinhmun hriain chet a la a ni mai, Lawmsanga zawk hian rawn chhai hmasa nisela mak kan ti viau zawk ang chu..." nu Ngurin a tih chuan ka beisei loh lam daih a ni, min ṭhawng angreng a, rilru a buai nuai nuai bawk. Lawma nena kan chungchang an ngaihdan leh mi min sawi duh dan lah chu aw....Lawma'n hria se engtin nge a ngaih ve ang le?

"Duhtawk ula a ṭha ang, chaw ei a hun," pu Muana'n a tih hnu chuan a reh ṭhap a, han inhnial buai an neih chang hian pu Muana hi a ṭawng ve mai mai lo a; mahse, a ṭawng tawh chuan tuman an chhang let ngai lo.

Zanriah kan kil ho laichuan thawm a reh angreng a, naupang lahin dawhkan hran an kil daih zel a, puitling ṭhe ṭhaw chaw kil ho chu kan inmelh ṭha duh vak hlawm lo. Ka pa lam ka va hawi chuan min lo en ve chiah a, a rilru a nuam lo hle aniang a mitmeng chu a danglam a, lungngai hmel te pawh a pu lek lek. Pa Dinpuia lah chuan chaw a bar zung zunga a kham daih a, pu Muana leh pa Tluanga erawh an inbe leh zauh ṭhin. Ka nu Nguri chuan min han ṭan ve bawk tak naa ka chungah a lawm lo emaw tih tur hian min melh sir he mai a, en ṭhat vak ngam pawh a ni lo.

Chaw kan eikham hnua pa Dinpuia kalchhuah tum chu, "Lo la kalbo suh," nu Nguri'n a lo ti a, "Lawmsanga chu ka va ko teh ang," pa Dinpuia'n a lo tih chuan phawk fein ka va melh a, min rawn melh ren rawn hnuah a chhuak zui a, min huatna a nei nge mawni ka ti rum rum.

"Eng nge in tih dawn a?" tia ka pa ka zawh chuan, "In chungchang hi mawi lo deuha sawi a awm a," ti maiin min chhang a, "Lawmsanga nena kan chungchang maw, engtia mawi lo maw?" ka tih leh chuan, "Lo phei phawt rawh se, tih dan a awm mai ang," nelawm loh fahran hian nu Nguri'n a ti a, ka lawm bik lo khawp mai.

Pa Tluanga'n naupang ho chu in hnuaiah a chhuk pui a, an thawm aṭang chuan in hnuai kawt zawlah mei an chhem anih hmel. Pa Dinpuia chu a rei angreng a, sitting room-a kan lo nghah laichuan sawi dan tur ka ngaihtuah lawk ve thlap a, Lawma zahna tur emaw, a rilru natna tur a awm loh dan ka zawng a ni ber mai. A nih tur ang chu kan ni tawh a, kei chu ka thuah ka ding ang tiin rilru ka tipaukhauh a, inneih kan duh thu thlenga sawi mai a ṭhain ka hria, mualpho hlaute tan pawh chinfel dan ṭha ber anih ka ring.

Rei tawk fang kan nghah hnu chuan kailawna pen thawm a rawn awm a, kawngka lam kan hawi deuh ṭhap. Pa Dinpuia hnunga Lawma lo lut chu a ṭi dui mai hian ka hria a, hetianga hmuh hi ka duh lo asin le, ka lo hah nghal hluah hluah.

Heti hian thubul an han sawi ṭan a, "Hnathawk hoin in inngaizawng angin an sawi a, Minai hian a kherh nasa che a, i duh vak lo chungin a birh tluk tluk che an ti a, i hnial ngam loh vangin i lo ngaizawng ve chauh angin an sawi bawk a, chu chu a dik em han sawi hmasa ber teh, Minai mualpho theihna tur a nia, dawt a lo nih phei chuan hnathawk ho chu nangman hrilhfiah la a ṭha a, i ṭhiante an ni hlawm lehnghal a, thu dik a lo nih leh Minai pawn a tuar tur reng a tuar a ni mai..." nu Nguri'n a ti nghat nghat a, Lawmsangpuia lo hawi chuan eng nge a ngaihtuah hriat a har hle.

"Chhang ta che mawle, i ṭhiante khan fiamthu duk dak vak lo ten an sawi a, Minai hi hmeichhe lepchiah chhuah takin an chhuah a nia, ani chang mualpho loin kan chhungkua hi min ti mualpho a, hetianga kan chhungkaw mi leh sa fiamthu nana an hmang hi ka duh miah lo," pa Dinpuia'n a lo ti leh bawrh bawrh a, an thil sawi aichuan Lawma hmel chuan ka awm a ti nuam lo zual a, ka mitmei chu a hrethiam pawhin a lang lo.

Chutah, ka lak aṭang chuan a mit la sawnin ka pa lam a hawi a, a rawn ṭawng chhuak chiah chu a pawi ka ti vawng vawng, ka duh loh dan lutukin a chhang tlat. "Minai'n min ngaizawng lo, min zar buai ngai lo a, hmeichhe lepchiah pawh a ni chuang lo, hnathawk ho chu ka lo hrilhfiah dawh nia," a ti tlawng mai a, engati nge harsa a tih em em mai le, engkim ka huam tih hi a hrethiam lo em ni ang, ka thup ngai lo asin, a hriatthiam turin ka awm reng emaw ka ti a; mahse, Lawmsangpuia hian min lo hrethiam ngai reng reng lo a nih hi.

Thu dik i sawi meuh a maw?" tia pa Dinpuia zawhna chu, "Dik e, kan inngaizawng lo, engtikah mah kan inngaizawng lo ang, Minai hian min ngaizawng angin an lo sawi anih chuan dawt chiang bal an sawi tihna a ni mai," chu thil a sawi laia min en dan chuan min run hluah hluah. Ka rilru chu a han na em em khawp a, a chhan pawh a thil sawi chu min ṭhenna thu tluk zeta a khak vang a ni.

"Jemina, in inngaizawng lo em ni?" ka pa'n a rawn tih chuan min zawh chhan chu ka hai lo, ka duh zia a hre tlat a, chuvanga min zawt a ni.

"Keiman ka ngaizawng a; mahse, min hnawl a," Lawmsangpuia en reng chung chuan ka ti a, a dik a ni, tun mai khan min hnawl a ni.

Ani chuan min en rei duh loin a mit a la sawn vat a, he thu pakhat chiah hi a sawi a, "Hnathawk ho chu dawt sawi kual tawh lo turin ka lo hrilh ang," tih te mai hi. A kal chhuak tur chu va umzui tak ka nap a; mahse, eng nge ka va sawi ang le, kei chauh hian kan inkar suihzawm hi ka lo duh niin ka hria, a tlan chhe nghal a ni a, um zui ta ila ka ko kir thei dawn em ni?

A tuk aṭang chuan in hnuai pindanah ka tawm chawt a, ka pa zin tur pawh ka thlah ve lo, in hnuaiah a lo chhuk a, ka thil chah duh te min lo zawt a, engmah ka chah tawh lo. Chaw ei ṭha turin min chah mawlh mawlh a, nu Nguri nen an inzui chhuak a, khaw chhung thlengin ka nu Nguri chuan a va thlah dawn a niawm e.

Chumi tlaichuan Puia hnen aṭangin ka phone kha ka hmu kir a, Lawma'n min pe turin a lo ti anih hmel. "A tan a harsa ve em a ni, i chhungte vanga khawsa ve ṭawk ṭawk an nia, hrethiam mai rawh aw," tiin a ṭhianpa chuan min hrilh a. 

"Eng nge a hlauh a, kan inngaizawng tih sawi kha a har em ni, 'Jeminai hian min ngaizawng,' te pawh ti mai sela, engah nge dawt a sawi?" tia ka zawhna pawh, "I tan vek ania, i chhungte laka tih mualpho che a duh hleinem, a tir aṭangin hetiang hi in ni dawn tih a hre lawka, hnar che hi a tan pawh a har ve tho ania, i nu chhungte lam hian engtikah mah an pawm lo ang, in dinhmun hi a inthlau leh lutuk a ni," tiin min chhang a, eng dinhmunah nge maw ka lo din bik ni!

Ka inngaihtuah tluk tluk a, ka pawm thei hlawl lo, ka bia anga a rilru ka thlak tir theih nan engpawh ka ti ang tiin rilru ka siam a; mahse, a number ka call chuan ri tur eih pawh a awm lo. A tuk nileng pawh chuan ka hmu ta lo a, Puia hnena ka zawh chuan, "A nu nen inentir turin Aizawlah an kal," tiin min lo chhang a, an cham rei dawn em tih ka zawh lahin engmah chin a hre bik lo.

A awm lo chu nun a ruak ngawih ngawih, ka nu Nguri lah chuan ka pa a biak theih loh vangin, "Call ve rawh, naktukah a lo haw dawn em tih te rawn sawi rawh se, Aizawl a thlenga a reh hmiah mai, a buai viau anih pawhin chhungte hnenah chanchin sawi ve tur," tiin min ankhum hlak hlak a, ka pa chu ka call ṭhin a, a ri ve tak nain min chhang thei bik lo a, zan lamah phei chuan nu Nguri chu a thinrim hlur tawh.

Zar 10 a pel zawt chauhin ka hria, ka mu tur chu in chung lam aṭangin min rawn au chul a, mangang lutuka rawn au hi a ang. Ka tiang hawl chung chuan hmanhmawh deuhin ka han chho a, chuta ka thu hriat chuan min ṭhawng dawt!!

"I pa ruang an chhar," tih thu chu, eng nge a awmzia ni ngai?

Ka pa ruang an hmu! A thlenna inah pawh ni loin hotel pakhatah a ni. Amah maiin a ni lo lehnghal. A kiangah, a mutna khumah chuan hmeichhe pakhat ruang an hmu tel bawk a, nula la naupang te a nih thu an sawi a, an pahnih chuan chemtea vih an ni a, kan thudawnna chuan saruak deuhthawa hmu angin a rawn sawi bawk! Engmah hi ka man pha lo, ka tliak hnawp a ni ber a, thawk leh khatah ka khawvel chu a chim ni maiin ka hria..

Engati nge ka pa kher, tu pawi nge a sawi, engvang nge?...zawhna hlir, zawhna hlir a ni.

End of chapter - 2