HELLO LOVE, GOODBYE (CH - 1)

 HELLO LOVE, GOODBYE - @ violette

Chapter - 1

Nipui a thaw ṭan a hetiang hunah hian kei leh ka unau Sandra leh Daniel te nen chuan tuipui kamah ka nu sumdawnna chu kan pui ṭhin a, tuicheng tur leh tuipuikama hawi khawthawng tura lo kal te dang hnawnna tur theitui leh eng ilo kan lo zawrh ṭhin a, School kan chawlh lai hian kan theih tawkin chhungkaw  tan kan tha kan seng ral vein hei hi kan ṭhan len chhoh dan a  ni. 

Chumi ni pawh chuan khua a lum hle a, Costa verde khaw lum tial tial chu keini naupang lam tan pawh a tawrh hlelhawm lam mah a ni, ka nau te pahnih chuan Ice cream cart nawrin an au dun lauh lauh a, kei tleirawl tawh chuan chutia han au vel chu zah ah ka la ta tlat pek a, an hnungah chuan kalin ka tawi khawmuang leh rih ṭhin a.

"Sandy vawikhat kual ula a tawk tawh ang" ka tih chuan ka nau Sandra chuan a lu a bu zauh a, saruaka ṭiauvuta mu ho awmna lamah chuan an in nawr phei bauh bauh a, chutih laiin kei erawh hla deuh taka tui chunga Ball beng ho chu ka lo thlir a, mipa lian leh sangṭha tak tak te aichuan nula bawpsei zet zawt rimawi rema han inthehṭhil vel chuan ka mit ala zawk mah a ni.

"Joshie, Daniel an tips a dawng a?" tih ri chuan ka beng a rawn verh zar a, a biang tai tek chungin Daniel chuan Dollar 10 hi a lo lek va a "A ṭha lutuk ka nu i hmuh dawn nia" tiin a Cart nawr lai chu hmanhmawh takin Restaurant lamah ka nawr zui a, chutih mek laichuan thawk lehkhatah engthil emaw hi a rawn thlawk fua a ka lu ri nghal chawrh leh leiah ka tlu khu luih tih chu ka thil hriat leh hmasak ber  a ni.

"I ṭha maw?" aw thum dut mai ka hriat chuan ka mit ka menga, ka hmai chu vutin a bawm luk vangin ka meng hleithei derlo.

"I lu a hai a nih kha ṭhu phawt teh" ka banah min rawn chelhin min ṭhutrem tir a. Thawk ka lak zawng chuan a khu luih hialin a nia ka hriat ni, ka hmai tuaifai chungin ka khuh zui kharh kharh a, ka hmaa tui Bottle a lo lek chhuah chu rang takin ka lo ban bawk.

"Rawn ti tawh reng reng suh" ka hmai phih pawk pawk chung chuan ka phun zui hlak hlak a, "I sam a bal vek" Sandra in  alo tih chuan thochhuakin ka sam chu ka tuai thuak thuak a, ka lu chu a â chhulh nimaiin ka hria.

"Tui Bottle kha ka lo la ange" ka hnunglama mi in a rawn tih chuan rang takin ka inhera, chutah chuan a lawm mipa ka hmuh tawh a zawnga hmelṭha ber mai chu ka hmuh tak ni.

Zeus castillo, a hunlai khan tunge a nih ka hre hauhlo, Feet 6 chuang laia sang  ani ngei ang, a awmbawr leh dul phiar fat te aichuan a mitmeng mawlh mai kha tawrh a harh a ni.

"I ṭha chiang maw, insawiselna i nei anih chuan mikhual ka nia a hnuah a remlo maithei a nia" nuisuk chungin a ti a, a va han nuimawi tehkher em!

"Miss..?" harh chhuak zawkin "Aw...ah..neilo e..ka ṭha" ka ti bah nak nak a. Sandrain hnunglam aṭangin aw alo thian nghal kharh bawk.

"Ka Bottle chu" mitko san ralhin min han en a, ka lo en leh veng veng tawh anih chu! "Kha.." a kut a rawn phar chhuah rualin Bottle chu ka lo pe vata kan kut intawh zawng te chuan ka hit za mem mem a, ka chhaw chhuih mai.

Ngaihṭhatloh hmel fe a min en hnuah a kal a, a hnunglam aṭang ringawt pawh chuan Film star emaw khawilai Company Model chhawrlai nimai awma pianthiam a ni.

Ball a pawm danah Sportmen pawh a ni thei tho, "A van chhelo em em tiraw, Irish mi a ni em i hre ngai em?" Sandra chuan a lo ti vat a, ka hriat ngai a ni hauhlo henglaiah pawh ka hmuh vawikhatna chauh a ni, amah pawhin mikhual ka ni a tih tak kha maw.

A hmel chu ka mitthla leh ṭhin a, ka hawilet leh hnu erawhin ka hmu zui tawh hauhlo. Irish aw phawi a nei a, a mitmeng nalh lutuk tak mai vang pawh khan Irish mi anih rinna lian deuh ka nei a, henglai lo kal ṭhin mipa tam tak te hi hmuhnawm ti taka thlir tur ka la hmu ngailo, piannalh leh hmelṭha chu ka hmu zel zula khapa erawh kha chu a danglam bik a ni.

"Joshie lerh miah suh, ka nuin Senior high school i chhuah hmaa i lerh chuan  a vaw mai ang che" a lo ti kha kha a, hetiang hian Sandra hi kei aiin a felin a intipuitling ziah ṭhin a, mi zawng zawngin ka u zawk emaw an ti fo ṭhin.

"Ngawi mai mai rawh thla reilo teah Senior high school chu ka chhuak dawn a lawm chutih hunah chuan midang te kaldanin ka la kal chho ve ang" hawi sang vah chunga ka tih chuan a hmui a petsawi nang nang a.

"Naute u a lum em, chawl hahdam ula in intifai dawn nia, vawin hi Aunty Shanon-i a lo let ni a nia, dawr kharin kan haw hma a ngai ang, zanriah ka  buatsaih sak tur thu ka lo sawi tawh si a, Joshie leh Sandra te pawh min puih ka ngai ang" Cart a Ice cream cup lakthlak mawlh mawlh pahin ka nu chuan a ti a, hei hi a ni, kan unaua rual kan pawl ve theihloh chhan chu.

Ka rualpui dangte chu tun ang hunah chuan an ṭhiante nen intihlim turin Capitala emaw hmun fianrial mawi tak tak awmna ah te kan zin chhuak ṭhin a, kei erawh chu Summer camping tak ngial pawh kal theiloin ka nu Restaurant ah ka tap thung a, nun hi a fair lo takzet a ni, engvanga ka pa leh ka nuhrawn chenna LA a kal min phalsak lo tlat nge anih lah ka hrethiam der lo, ka nun pum hi he khua Costa verde ah hian hmangral turin min duh a ni ngei ang.

In kan thlen chuan kan ṭhenawm nu ṭhin leh ka nu ṭhian ṭha ber ni bawk Aunty Shanon-i mikhual tur chuan kan inbuatsaih a, ka khua an chhuahsan na pawh a rei ta kum 10 chuang lai chu a ni ve tawh ngei ang.

"Mom..Zeze lo tel ve dawn em?" hrechhuak zawkin ka nu eirawng bawl lai chu ka zawt a, "Dawn e, i first love nen reunion in nei dawn a nih chu" ka nu in a tih chuan ka ang phuau a, Zeze a tel dawn tih hre ngat ila chuan phur takin ka che daih tawh zawk ang mawle.

"Ka inthlak lawk dawn" tih leh ka room lampan ka rual a, Zeze hmuh chu ka phur kher mai, ani chu ka naupan lai ṭhian ṭha tak a ni a, kan ṭhenawma an awmlai chuan a mah nen chiah kan inkawm ṭhin nghe nghe a, ka nuin ka first love a tih kha chu a sawi ang em em chu a nilo kan inkawm nasat em vanga dem bel kan ni zawk mah a, inngaihzawnna thil vel chu kan inkarah a awm hauhlo thung.

Ka sam khuih ṭha thlapin Cream te ka inhnawih ve nial a, thawmhnaw fai ha a ka chhuah leh chuan Sandrain lerh mintih hmel zetin min lo melh a, ka ngaipawimawhlo kher mai.

"Zeze chuan ṭhian te pawh a rawn nei dawn a, Aunty hoin pathum an rawn kal ang, Salad kha lo chan belh te che Duhtak" ka lam hawia ka nuin a tih chuan phur takin ka lo ti nghal thuai a, Zeze a hmuh hlan mawlh chu ka nghakhlel a ni, Colarado a an pem tirh khan Email kan i thawn ve fo a mahse, mahni buai buaia kan buai dun tawh vangin zawi zawiin kan intheihnghilh ta kha a nia, hriat chhuah chang hi chu ka ngah ṭhin, a hnua Email ka thawn leh chuan an awm hmun an lo sawn tawh a, a chanchin ka hriat zuiloh vang vang hnu ah, TEXAS ah a awm tih ka nuin min hrilh a, chumi hnu a a chanchin ka hriat leh hmasak ber chu vawin hi a ni.

"Zeze a ṭhian chu mipa nge hmeichhia a bialnu te a nilo maw?" ka zawhna chuan ka nu nuih a ti za a, "Ti teh duhtak, kum tam fe in inhmu tawhlo a, midang lo hawi tawh pawh nise huatah lak tur a ni hleinem, nangpawn tlangval pahnih lai chu inṭhen ve tawh a nilawm ni khah" fiamthu titak deuh hian a ti a, ka sawitum a la kawi daih mai.

"Ka zawt mai mai che a lawm, Zeze nen kan inkarah engmah chutiang lam a awm ngailo hrim hrim" lawmlo fe a ka tih chuan min la nuih cheu a "Hmeichhia a nilo, a ṭhianpa a nia a lo hruai dawn tlangval hmel ṭha tak pawh a ni maithei a nia" a ti zui zat a.

Zanriah kan peih fel awrh tih ah Door bell a rawn ri ta ral ral a, Sitting room aṭangin Sandra-in ka nu a lo ko nghal chul bawk a, ka nu kalta chu zuiloin ka dinna ngaiah ka ding reng a, ka zam riau a ka lai deuh ṭut bawk. Zaze hmuh chu ka chak ṭhin tehlul nen tinge mawni ka huphurh leh tak em em ni.

"Ohh..Shanon..ka hmu leh thei che chu ka van lawm tehlul em, hei hi Zeze em ni" ka nuin a tih ri te chu ka hre pha a, Kitchen Cabinet bulah chuan dingin an in chiauau thawm chu ka ngaithla kar a, ka nuin "Lo kal teh, i ṭhianpa hi rawn chibai rawh" ring fahrana a lo tih chuan ka insang mar ṭeuh a, ka zak ru kher mai.

"Joshie duhtak.." Aunty in a rawn tih takah chuan engah nge maw ka han zah ngawt ang le ka ṭhianpa a lawm ti rilru chungin ka chhuak phei ve ta nghal a.

Ngun zeta Zeze an min lo en chuan ka nuihseih a, a hmel chu ka tum aiin ka hmu ṭha a, ka rin ang chiahin a sang lutuk lo bawk "I damṭha maw?" ka tih chuan "Dam ṭha e, i dam zawk em?" alo ti var a, "Joshie i ṭhianpa hi i hmuh kan em ni, han chibai ve rawh" Aunty in a lo tih chuan phawk fein ka lo en a.

Chutah ka nu hnung chiaha ding mipa sangṭha zet ka hmu chu ka thawk a chham lo chauh a ni!

Tuipuikama ka hmuh tlangval ngei mai kha!

Zeze a nen chuan ka entawn sek a, a ṭhianpa chu zanin pawh a chhelo uchuak hle mai, hetah kan inah ngei a lo kal chu mumang te pawh ang rum rum zawk a. Ka zah zelah Zeze chu panin "Ka ngai thei lutuk che" kuah thlawp pahin ka ti a, Hmelṭhapa lah chuan chal chuar tapin min lo en a, a hmel chu ka en rei ngam hauhlo.

"Aa...englo" ka kuahna phelh paha Zeze an a tih chuan ka inla hrang thuai a. "Min haiin ka hria" a tih chuan phawk zetin ka lo en a.

"Duhtak, kha chu Mateo a nih kha ka bula mi zawk hi ka fapa Zeus, Zeus castillo a nih hi" Aunty in a lo tih chuan ka nghing lawih maiin ka hria.

Engtin nge anih theih!?

Hepa hi Zeus a ni maw mahse, ka hriat ṭhin nen khan an va inang lo em em ve, Mateo hmel chu ka en leh rih a, ani hian Zeze ..ka ṭhianpa kha a ang daih zawk a lawm.

Zeze kha naupang  chawr che lutuk mai a ni a, chawhrualin englai pawha tlang hrileng kai reng ang vel a ni a, a hnap hruk reng angaih ṭhin vangin a hnar a sen tet reng ṭhin a, a rualpui te zingah pawh a te pawl a ni zel ṭhin kha a nia, tuna Zeze a inti ka hmaa ding tlawn zuar hi chuan hmana ka ṭhianpa kha an na chhete mah a neilo reng reng, ka en chian ngial pawhin a ang hlawlo a ni.

"Kuah ka dawng ve dawn na nge?" nui chunga atih chuan ka sen ṭan ṭanin ka ring, ka beng a sa hat hat mai.

"Tiru, zanriah kan peih tawh ania" Ka nuin a tih takah chuan choka lamah kan inzui phei a, Aunty chuan ka hun hman dan min zawt mawlh mawlh a, kan school  chungchang te pawh ka hrilh nual mai, zanriah kan buatsaih lai chuan Zeze leh Mateo ten Daniela ball an lo pet pui a. "Joshie ball a pet per tu che kha" Sandra chuan mak ti fein a lo ti ve bawk.

Zeze nen kan inkawm ṭhinlai kha chuan Sandra chu ala te deuh a, Zeze naupan lai chu a mithla thiam ve kher in ka ringlo. Hmelṭha a ti ve tho tih erawh a mitah chuan ka hmu thei thung.

"Joshie duhtak, Zeus hi in school ah lo kal ve sela a ṭha ang" zanriah kan kil laichuan Aunty chuan a ti a, Zeze nen chuan kan mit a intawng nghalchat mai, zak lutukin ka hawisawn nghalthuaia hepa hi Zeze angin ka ngai theilo, amah an na pawh aneilo a ani hi chu hmelhriatloh mikhual tlangval Zeus a ni.

"Costa verde a school ṭha pawl iti em khah?" Aunty in a tih leh chuan ka lu ka bu a, engvanga heta rawn kal chu duh nge maw anih reng reng le!

"Shanon, Odessa ah chuan zirna a ṭha zawk daih lawmni?" ka nuin a lo ti a, Zeze leh Mateo in bekbawr sar sar chu ka lo mitsir a, chutihlaiin Aunty ṭawng chuan ka ngaihtuahna a la peng rang kher mai.

"Hills high school Basketball captain hnawhchhuah hmasa ber ani hi ka chhuanglo teh a sin, chuvangin api leh pu te bulah thingtlang zawka awm hi a tan hremna hlawk thlaktak a nih ka beisei" Zezea melh ralh paha Aunty ṭawng chu ka beiseiloh lam daih a ni. School aṭanga hnawh chhuah a nih thu sawi chu a lawm hmel tehchiamloh hle a, a tho zui vut chu "Zeus i chaw ei zo rawh" Aunty chuan a ti zui a, choka kawngkhar aṭanga a rawn mengrum chu ka lo melh ve kar a, "Mikhual hawih hawmlo nih kan duh loh kha" chang fek fawka Aunty in a tih leh chuan Mateo bulah chuan a rawn ṭhu leh a, a chaw chu a eizui nghal mawlh mawlh a, a lungawilohna chu eiturah a hrithla ni maiin ka hria.

Sandra in dawhkan hnuaiah ka ke a rawn tlawh a, rum zetin ka lo melh a, a hmelah chuan nuihza insum hmel ka hmu zui zat bawk.

"Engvang ber maw Zeus chu hetah a kal dawn a?" ka thleng sil laia ka nu leh Aunty te inbiakna chu ka ngaithla a.

"A...sawi chhuah leh zahthlak khawp a ni, an Chemistry  zirtirtu nen an lo inkawp a, zirtirtunu bialpa kha school neitu fapa alo ni si a, an thlalak a darh hnuah School aṭangin an hnawt chhuak zui ta anih hi" Aunty in a sawilai chuan ka lo ner nang a, chutiang tehhrep chu a ni ang tih ngaihna ka hrelo, mipat hmeichhiatna thil lam daih chu!

Aunty chuan a pi leh pu te kianga khawsa tur angin a sawi a, chutiang a nih chuan Pu Bailey a kiangah a ni ngei ang, an ni chu kawtthler pathumna ah an awma kan awmna nen chuan kan inkarah kawtthler pakhat chiah a awm a ni.

Hmeichhe ho kan ti tilai chuan Zeze leh Mateo chu pawnah an awm a, An haw dawn chuan Aunty chuan Sandra nen kan chalah a fawp a, Zeze chuan min be lo, Mateo nen kan inmangṭha lai te chuan minlo en reng a, tawi te a min nuih hnuah an kal ta a ni.

Nipui chhung chu holam takin tuipuikamah kan hmang rala, Aunty Shanoni chu ka awmloh laiin kan dawrah a lo kal tih zawng chu a chanchin ka hriat leh chhun a ni, an chenna hmun Odessa, Texas ah an let leh a, ka nu nen Mail in thawnin an inbe fo a, Zeze a chanchin ka lo bengkhawn ru ve reng ṭhin, "Joshie kha ka lo bia" rawn ti thut sela ka ti a, a thengthawngah ka thawklo ania nge chutiang lam reng reng a sawilo.

Nipui kan hman zawh chuan School mamawh lamin Sandra nen kan buai hle a, ka nu buai avangin Daniela School luhna tur thil kan lam khawm bawka, ṭhian kawmna hun takngial pawh ka neilo, Eva ka ṭhianṭha ber chu Cheerleader ho camp na ah akal a, nipui chhung zawngin kan inhmu lo a, min lo biak pawh chuan ka buailai te a lo ni leh ṭhin bawk si a, kan inbe fuh hleithei meuhlo a ni.

Class ṭanni chuan hma takah Eva chu a lo thleng a, kal mai kan tum laiin "Zeus khan lo sawm che atum in ka hria" ka nuin a lo tih chuan ka lo hawi phawk hle a, a hma zawng khan a sawi silo.

"A lo kal tak tak dawn a maw?" awih manglo zet chuan ka ti a.

"Nimin khan a nuin minlo bia a, kar hmasa khan a lo thleng tawh" ka nuin a tih chuan ka ner saka, amahin a inngaihtuah thei ani mahna, min tlawhpawh a tum lemlo bawk a, ka ngaihven hmasa duh biklo, chuloah ṭhian angin min ngaitawh zanlo niin ka hria.

Eva chuan Zeus chu tunge anih min zawta, ka naupanlai ṭhian a nih thu leh kan schoola a lo kal ve dawn thu zawng ka hrilh a, Final year a a rawn insawn chhan erawh ka hrilhlo.

Ṭanni chuan holam deuhin class kan la a, mahni club lamah kan buai nileng a ni deuh ber, Zues chu ka mitmei ru deuha, a hmel awm reng reng ka hmuhloh vang chuan ka ngaih a ṭha lo a, ka nu phonein zinga a lo kal leh kal loh chu ka va zawt a, "Eva nen inchhuah hnu lawkah khan a lo thleng a, in kal tawh thu ka lo hrilh a, i phone number te pawh ka pek kha, khatah khan in inhmu lo em ni?" a lo ti  a.

Kawng a bo a nih ka ring ta deuh, kartawp inkhelh hun a tan Cheerleader ho Practice an ngaih vangin Eva chuan min kalsan a, Quad sirah chuan keimahin ka ṭhu a, Zeus  number neih dan ka ngaihtuah angaiin ka hria, ka nuin a lo neihloh pawn Aunty Shanon ka diltir mai a ngai a ni, mikhual a ni si a kei a ṭhian ve ber hian ka buaipui mai angai, ka nu call leh ka tum laitak chuan Baseball team ho chu mual lehlam aṭangin an lo chhuak a Zeus ang tak ka va hmuh vang chuan ka ding chhuak vat a, amah ngei a ni!

Nicolai nen a hmasa berah i kuah thuakin anlo kala, ṭhian inkawmngeih tak te pawh an ang, Nicolai chu kan school Baseball team ah Quarterback niin Captain a ni a, school a mipa lar ber a ni, engtin nge Zeus nen an i hriat?

An lampana ka kallai chuan ka lam anlo hawi a "Ah..Zeze" ka thilsawi lai chu minlo pawt chatin "Heihi ka ṭhiannu chu anih hi" Nicolai lam hawi chuan a ti a, "Joshie chu ka hria a lawm" Nicolai chuan a lo ti var a. Kan inhre chiang khawp mai, Junior kan nihlaiin kan inkawp ve zuai tawh a, ani ang tlangval lerh tak kawp ka sim phah tak na kha a ni bawk.

"I lehkha i tifel tawh em, i subject lak tur te" ka thil sawi ngaipawihmawh lo zet chuan Nicholai nen chuan an in be mawlh mawlh a, a tuk a inhmuh an rawt zui bawk a, an i hresa anih ka ring.

"Kal ila" ka dara min rawn kuah pahin a ti a, chutia min kuah chuan ka te rawih maiin ka hria, chutin ka te chhe hauhlo asin le, Eva i erawh kei aiin feet 2 in asanga chuti chung chuan tawi ka inti biklo Feet 5 leh inches 4 lai chu ka ni ve alawm, Zeze a bulah erawh ka tawi riauin ka hria, hmeichhe naupang a farnu emaw ka ang lek lek mai.

"Tinge tukinah minlo nghahloh i nu kha kan hrilh si a, nangmah vangin kawng ka bo hrep a sin" min chhuk en ran chung a atih chuan thawk ka lo la hak a, "Kei min bia nila chuan ka nghak maithei che, mahse, Nicholai nen khan engtin nge in inhriat a?" ka lo ti a.

"Kawngah a Bike achhia a ka lo phur a, ka rinaiin he school hi anuam dawnin ka hria, naktukah Trial ka nei dawn a" intihthei hmel tak hian a ti a, Nicholai thilphal a chuan Coach hnenah a sawipui a ni ngei ang.

"Ka lawmpui a che" phur fahranlo a ka tih chuan ka biangah a lo piai a "Boring viau teh suh Jojo" a nui zui hak a, min koh dan chuan min ti phu deuh zawk a ni, ala theihnghilh biklo e.

"Nula hmelṭha an vang hle mai" nui hak chunga a tih leh chuan "Fimkhur rawh, hnawhchhuah i ni leh teh anih chuan aw" ka lo ti a, ka sawi chu ka inthlahrung leh kher mai, Hills aṭanga an hnawhchhuah chhan kha ka hria tih ala hrelo ngei ang.

Principal ka hmuh puia a class leh a subject lak tur te chu ka tih fel pui nghal bawk a, kan vei vahna apiangah an en zui a, a bikin hmeichheho mit chu alakah a fu ṭhup ni berin ka hria, mipa pawn an en zui duh viau mai, hetiang anih chuan Baseball team ah a tel dawn lehnghal a, hepa hi mithar ni chungin a vawk lallen nghal thei mai dawn anih hi.

Quad a kan let leh laichuan Cheerleader ho nen kan intawk a, kan lampana Eva lo kal vat chuan zawhna mitmengin kei leh Zeus chu min en a, inhmelhriattir na ka nei a, a teammate te nen chuan Zeus chu an chibai sap sap a, hmuhnawm an ti tih chu Zeus pawn a hai bikin ka ringlo.

Jade chuan a be ṭha fal bik hle a, henu lerh lutuk hian Zeus hi hnaih lo sela ka duh, ka ṭhiante ngaihzawng atan ka duh hauhlo, Cheerleading captain a ni a, Evai te boss a ni. Nicholaia bialnu a ni bawk, heti chung hian mipa tu tu te emaw chu a kawp kualnual a chu chu Eva hnen aṭanga ka hriat a ni, mipa ho hian a lerh tih hre reng mahse, a hnute leh mawngbawr lianṭha tak hi an do zo lo niber in ka hria.

@violette