HELLO LOVE, goodbye (CH-4)

 HELLO LOVE, GOODBYE - 4

Chiang fahrana min enlai chuan mitmeng lian kiaua lo melhin thawk ka la halh halh a, a thilsawi chu phatrual a nilo ka awmdan chuan a ti chiang vek miau a, a fawhna pawh ka lo chhang ṭha mah mah tawh tlat a ni, pha pawh ni ila a awih tawh kher nang.

"Khapa kha keimah hi ka ni em?" a ti zawi sup a, anih thu ka hrilh nghal mai dawn em ni, ka zak deuh ta tlat mai. Chuloah Zeus chuan hmeichhia angah si a min Date duh dawn tih ka chian loh laia lo inphawrh mualpho chu a ṭha berin ka ringlo, keimah a a rilru tak tak ka hriat ve hma a ka duh tih hi a hria nih chuan a buaithlak zual mai mai dawn.

'He thil hi chu ka ruih vangah ngai mai mai teh se' ti rilru chungin ka fawp leh ringawt a min hnar biklo, min hnar a hnekin a hma aia uar chuan minlo fawp let a, infawh a zei zia chu Eva hnen aṭangin ka hre tawh a feeling nawm zia erawh sawi mai aiin a taka tawn chuan a nuam leh zual zawk.

Ka kawr hlima ka awmbawr a rawn dap takah chuan duhaiin kan kalthui dawn tlatin ka hria a, ka inla hrang nghal thuai a, a beiseiloh dan deuhin ka che nge ni maktih hmel fe hian minlo melh a. "Ka haw dawn" tih zawngin ka lo chhang thung.

"Ka thlah ang che" a tho ve nghalthuai a, kan awmdan chu zak ru viau mahila zak anga lan ka duhlo, harhfimlo rui tak angin lang ila nakinah insawifiah na tur pawh ka neih tlem phah deuh zawk ang.

Min biak chuan a rul tawk lek lekin ka chhang a, rui mengṭha hleitheilo ang maiin ka chhing siar siar bawk a, kan kal chhuak dun ta chu ka tluk mai hlauin min kuah bet chawt reng a nuam chu ka ti alawm, a kuah te a mi fawh te pawh, mahse, infawh leh inkuah tih te mai mai chu ani tan chuan thil holam lutuk a ni tlat. Zanina min fawh pawh hi atan chuan Popsicle in eiṭawm ang lek pawh anilo ang tih ka hre der hleinem.

Bike in kan inphur a, kan inkawta a Bike a hun rualin chak deuhin ka kalsan nghal daih a "Goodnight, Joshie" a rawn tih pawh chuan ka hawilet tawhlo, ka room ka thlen rualin thawk ka kawk a, ka hmui chu ka tuai ringawt bawk a, ka va han hlim veng veng tehreng em, hmeichhia angin minlo en ve reng tho a ṭhian mai bak anga min lo hmu chu a pawi ka ti lo kher a sin. Mahse, naktukah chuan thil ka hriatloh der hmak a ngai ang, engtin nge angaih tehreng pawh ka hre chak a lawm.

Zingah ka inpeih hma hle a, nidang aiin ka Mood a ṭha a ka helhhawlh deuh tlat a ni. "Joshie i thil eina kalsan suh" ka nuin a rawn tih chuan nui ruh ruh chungin ka tifai a, "Vawin chu i tho a anilo maw?" Sandrain a lo ti ve bawk. 

Class ah Eva nen kan inhmu a, min hmuh rualin Cafetaria ah min pawt thla hlawk hlawk a "Jade leh Nicholai te an inṭhen a, min puih ka ngai ania" eitur lam mawlh mawlh pahin a ti a.

"Engtia puih maw?" phawk fe in ka lo ti a, Nicholai nena min sawizawm alo rilruk anih chuan ka ngei khawp ang.

"Zeus nen hian in inkawp angin Jade bulah ka sawi a, min ngaidam teh ṭhiani tih dan tur thlawt ka hrelo a lawm, Home coming hma a Jade nena inremlohna neih chu ka duh hleinem" a ka a Cheese burger hnawh ṭawlh ṭawlh chunga a tih chuan ka lo melh nur nang a, henu hi mi rawn miahlo hian thil hi a lo ti phawr phawr zel mai.

"Chu chu ka buaina tur anihloh chu, puih theihna che ka neih pawh ka hrelo" ka lo ti chang hmak a.

"Jade chuan a rawn be dawn che a lawm, vawinah emaw a rawn be thuai ang che, a bak chu thil awmdan tur chu i hriatlawk kha" meinei zeta min melh ralh ralh chungin a tih chuan ka ner sak a, ama buaina tur zawkah keimah min tal awhtir der a ni.

"He thilah hian ka buai ve peihlo Jade hnenah chuan kan inngaihzawnloh thu ka hrilh mai ang" ka tih chuan a ter nghal at a. "Chutianga i tih te chuan Zeus nen kan inkar kaltluang tak hi a ti chingpen vek dawn a sin" a lo ti ṭung a, hahthlak chuan a.

"Keiin lo aw ringawt ila Zeus hnenah a zawt veleh dawn tho a thil awmze awmlo lutuk anih chu Eva" chang fek fawk ka tih hnu chuan a ngawi ta kar a. Class room pana kan kal laichuan "Zeus kiang ah awm tam la Homecoming hma tal chu lo tuar mai teh, Homecoming zawh ah keiman Jade chu ka hmachhawn ang" a la ti ta ṭalh a thil atthlak tak a ni, a mipa berin a duh thlang sela a fel nimai tur engah nge Eva hian hetiang zawnga khawsak a duh ziah chhan hi ka hrethiamlo, kei ka duhloh zawng tak a ni. 

Mipa in kan ngaihven tih an hre tawh a min lo duh ve anih chuan chet la maiturah ka ngai a, Zeus lahin an inkar a tichiang pawh ani silo a, Eva chu niila tlawmah ka la tawh ngawt zawkin ka ring.

Banah Zeus chuan min lo nghak ngei a "In inah ka lo kawi ang, ka nuin i nu thil tur a rawn thawn a" min hmuh veleh chuan a ti a, "Jade leh a ṭhiante an lo kal" tih pahin Eva chuan Zeus a lamah min nam phei dat a.

"Zeus inkhelh en i duh chuan ticket chuang ka nei ania" Jade chuan lehkhathem rawn lek vah pahin a ti a. "Zirtawp zan a mi tur a nia, la rawh a dang chu lei tum mahla i hmu tawh kher lo ang" Mason-in a lo ti bawk a, Jade chuan min melh rum khawp mai.

"Ka lo lei dawn a mi?" Zeus an a tih chuan "Thil pek" nuisanga tihpahin Jade chuan a kawrawmah a rawn nam bet chawt a, ngaihawm lutuk hian a nuihzui sak bawk a, han melhno vel pawh a hnehsawh kher mai.

Eva ka mangṭha hnu chuan Zeus a Bike ah chuan ka lawn a, Jade-i hmel chu ka melh leh tawhlo, ka lam an rawn hawi ṭhapa ngeitheilo zetin min enin ka ring.

"I tho nuam maw, nizan kha chu i lem tam ve deuh a nih kha" Bike a kan chuan laichuan a ti a, "Mut dawnah ka luak a, nizang thil thleng ka hre mumal lo reng reng no engzat nge ka in a" ka lo ti let vat a.

"I in deuh nual, ruih awl chi a nilo hlauh a i vannei anih kha" a lo tih chuan "Ka rui sual anga ka nuin min vaw hrep ang tih ava hlauhawm ve" nui hak hak chungin ka lo ti a.

"Tinge nizan kha min be lo a i kal daih a?" rawn hawi let zawk paha a tih leh chuan "Chutia law, ka rui lutuka engmah ka hrelo" ka lo ti vat a.

In kan thlen chuan Aunty shanon-i thil thawn chu ka nu a pe a, ka nu chu a lawm khawp mai, a bawm chhungah chuan thlasik pangpar chi leh tlai lampang chi chihrang hrang a lo awm a, Aunty chu lawmthu hrilhin a Phone zui a Zeus pawh chu zanriah eiturin a sawm a.

Zanriah eikhamah chuan Sandra hoin Attic ah zial kan zu ru a, Sandra erawh rei awmloin a chhuk lehnghal thuai a, kan pahnih chauha kan awm takah chuan sawitur  a vang ta kher mai, nidangah kha chuan amah emaw keimah zawk pawh kan ṭawng bawrh bawrh ṭhin a, nizan thil thlen hnu a ṭang kha chuan titi a sak ṭalh tawh.

"Nizan chung chang kha kan sawidun angaiin ka hria" a rawn ti ta. Phawk zetin ka lo en a, pehhel tur em mawni dawn ni.

"Ka nu hrilh miahsuh a bulah chuan Beer pawh in ngailo ka ni" ka lo ti vat a, ngawi rengin min en run a.

"Nizan thil thleng kha i hrelo tak tak maw..ah.. harhfimlo lutuk ini pawn ka hre silo" a ṭawng bah deuh nak avang chuan a chiang bik vaklo tih ka hre nghal a, ka bum theihmai ka ring.

"Ka ruih vawih khatna ania,  tluang takin inah ka haw theia a ṭha ani mai" nui chunga la tih leh chuan a kiai sak a, sawitur helhkham nei ṭeuh te pawh a ang, keilahin ka sawi chhuak duh der mai silo.

"Jade hi Date ka tum a" a rawn tih chuan ka en zawk a, a thutak hmel ngang mai.

"Tak tak maw?" ka ti zawi sap a, Jade-i Date a tuma nizan lawkah kei min fawp a, ka ngei ru kher mai, ka thika, ka thin a rim tel bawk.

"Nia Jade chu a chhelo a lawm, Cheerleader leh Baseball player chu in inhmeh khawp ang chu" za lo fahranin ka nui hak a, alo kiai ve suk te chu ka haw hlur ringawt tawh. "Mahse, nupui a tana i duh chi kha anilo ani lawmni khah?" nersak chunga ka lo tih leh chuan nui chungin min en a.

"Ka nuin mo tan a duh leh duhloh ani mai ka mitah tu hmeichhia pawh hi an in ang vek pakhat tihloh chu" tukverh lam thlir vang vang chungin a ti a, pakhat atih chu tu a sawina nge hriat ka chak kher mai, Jade chung chang kan sawilaia a ni a, chuti anih chuan Jade chu a ni lo phawt.

Eva a ni thei mai angem? 

Ka ring chiahlo Eva hi chu a ngaihsak ṭha peihlo emai, duh nisela chuan a kawp daih tawh ang chu.

"Tunge?" a dara hnek salh pahin ka ti a, a lu a thin vang chuan hnek leh mai tumin ka ban a mahse, ka kut a lo man chawt a, ka che chu ka tawp chiang hle a ni.

"Tunah khan Jade kha i thik a ni tiraw?" a ti sap a, chik lutukin zawhna mitmengin min en bawk.

"Enge maw i sawi le?" phat tuma ka nui chu ka thutak em vang chuan ka tawp lehta riai riai a. "Ka thiklo" ka ti ram hmuk mai.

"Anih chuan tinge ka sawi veleh khan i sen ṭan ṭan a?" a zawhna chu awihloh hmel fein ka en a, a thutak bawk si a awm a ti nuamlo zo vek.

"Nizana kan infawh kha ka hrelo tih sawi tum miah suh, dawt sawi i thiam hlawllo Joshie" a la ti tak deuh deuh mai.

"Ka ruih vang anih kha" ka tih chuan nui chungin a lu a thing a, "Nilo joshie, nang hian min duh a lawm i mitmengah te khan ka haiin i ring em ni?" a ti leh mauh mai a, chhan ngaihna pawh ka hrelo ka dang lel mai a, a chhan chu ka nihna dik tak a sawi miau si a ni.

"Kha mipa duh i neih thu i sawi kha keimah hi ka ni" a tih chuan ka kut a vawnlai chu ka la sawn vat a "I inngai ropui mah mah aw" ka sawi zawh hma hmain min rawn ṭhuthnaih sauh a, a chetdan chu hrethiamlo takin ka lo en a, nuihza lek lek hmel a puin ka hria.

"Min date duh angem Joshie?" 

Phawk fein ka lo melh a, uang hmel phei chu a pu lo nain a thilsawi chu ka ringhlel a ni.

"Engvangin maw?" pawr angreng zet hian ka ti a, hmeichhe dang anga min chhaihkual a tum nimaiin ka hria a, ka lawmlo lek lek bawk.

"A chhan chu maw ka duh che Joshie, in Date ang" a ti leh tawl a, a mit paw ram mai chuan chiang takin min en kal a, ka awih theilo he tlangval hmelṭha leh chhelo uchuak tak hian Date ah min sawm ania, a uang em ni?

"In Date ka duh lo.." melh rum ram ram chunga ka tih chuan ka dar a rawn nawk salh a "Tum chhin teh, ka ti beidawng hauhlo ang che" a lo ti leh a, khai... a ti tak tak nia, a uang miahlo Date ah min sawm tak tak a lawm.

"Hey..Jade i te ang ka nilo tlangval lerh ka Date duhlo" ka tih chuan "Ka hria, chuvang chuan kan in Date ang" tih leh nghat a,  ka bianga piai a rual a, aw phei chu ka pawhlo ring hlel viau mahila nuam tihna chu ka nei tho, ka duh ve em a sin.

"Tum chin ringawt aw, ka duh zawng inih loh chuan kan tawp leh nghal ang" ka ti a, mahni induhtawk tak anga lan ka duh ve tlat.

"A ṭha a lawm kan in Date..." a sawi zawh hma hmain "Thil pakhat" ka lo ti vat a.

"Hmeichhe dang nena kawp ka duhlo ania, Jade emaw midang hrim hrim pawh" ka tih chuan a lu a lo bu nghat a, angai awlsam khawp mai.

"Zeze.."

"Zues ti rawh tlangval ka nih tawh hi" a tih chuan ka nui chhuak hak a, ka tan chuan Zeze a ni reng tho ang.

"He thil hi Eva in a hria a nih chuan alawmlo khawp ang" ka ngaihtuah zawng ringawt pawhin Eva lawmloh dan tur chu ka ngaihtuah thiam mai, min hua a nga min be duhlo ngei bawk ang.

"Eva chuan a hrethiam ve mai ang" ka dara kuah pahin a ti a, ka ṭawng leh hmain min fawp turin min rawn hnaih nghal zat bawk a.

***

Zeus nena kan Date chu a kaltluang khawp mai, a ruk thei ang ber a ni a Eva pawn min rinhlelhna a nei eihlo, Jade vangin Zeus nena kan inzui tam chu a lawm zawk emaw tih tur a ni. 

Zingah kan kal dun a tlaiah min thlah leh a, a chang chuan Justin nen an Apartment ah chuan ka kal ve ṭhina, Justina awmloh lai chauhin ka kal thung. Ṭhian inkawm ngeih tak kan nih sa vangin kan inkar boruak chu a damdup maiin ka hria.

Kartawpah Baseball en turin kan chhuak dun a, inkuah rialin kan ṭhudun a ka bawp pakhat chu a mal chungah hlangin a dar ka ngheng chiala kan awmdan chu ngaihzawng ka neih hun atana duhthu ka lo sam ang chiah a ni.

"I mut a chhuak tawh em?" min kuah pahin a ti a, a lam ka hawi chho chu hnai deuhah min lo en a, a thaw lum ham ham te pawh ka hre pha hial a, chutihlaia min fawp tura a lo kun chu a nghawngah lo kuahin a malchungah ka ṭhukai thuai a, duhtawh takin kan infawp zui a, midang mitmei chu kan venglo dun kher mai.

Ka ṭhutna a ka ṭhu ṭha leh chiah chu ka sir lehlam aṭanga phawk zeta min lo en tu vang chuan ka thokang zawt a, kei leh Zeus te chu huat hmel lutukin min melh tawn a, ṭah insum ṭeuh hmel a pu bawk.

"Eva tah khan lo ding rawh" tia a lampan ka tum lai chuan "Thlawk bo rawh" tih leh min tlansan a rual a, ka umzui tak nain mipui karah kal a har em a ka va hmu zui ta chuang lo.

Kawngpuiah chuan hawikualin  ka Call a, a la duh bawk silo a, a laka ka inthiamlohna chuan min tuam hlawp hlawp a ni, ka hrilh ang ka ti fo ṭhin a, a rilru nat ka hlauh vangin ka hrilh lo leh ṭhin a mahse, tunah a rilru chu ka tina ta tho a, chupawh amah zawkin min man chhuak a ni lehta nghal a, a dinhmunah ka indah a min hua pawh nise dem thei niin ka inhrelo a ṭhiannu hian ka phatsan miau a ni.

"I hmu em?" ka lampan lo kal paha Zeus an a tih chuan beidawng takin lu ka thing a, "A ngaihtuah awm lo ang inthiamlo suh, naktukah keiman ka lo be dawn nia" a ti mai a, Eva chu ka hrechianga awlsam tea lungawi thei chi a nilo, tunah tak phei chuan min huatna a sosang khawp ang le.

"Keima thiamloh ani, a duhzia che hre reng chungin hethil hi ka kaltlangpui a, ka hma ka sial em a ni" ka ti a, chu chu ka rilru tak pawh a ni, Zeus ka thlakhlelh luatah Eva ka ngaihthah hmak a, ka tum reng vanga tina nilo mahila hetiang hun hi a thleng dawn tih ka hre lawk vek bawk.

"In thiamlo suh, a hlimna chauh ngaihtuah tur ini hleinem nang pawh i pawimawh ve alawm, bakah ani kha ka duhlo hrim hrim a, chu chu amah pawn a hria a lawm" a lo ti leh mai a a tan chuan a awlsam a ka tan erawh a ni velo, Eva in a hriat chhuah takah chuan hrehawm ka ti takzet a ni.

In kan thlen chuan dar 8 a ti tawh a, ka nuin min lo la nghaka Sandra tuition pe tu pawh a lo haw deuh chiah a ni, ka nu ho chuan Chocolate lum kan in a, Tv kan en ho laia ka phone lo ri chu Mason-i call a lo ni a, thochhuakin choka lamah Call chu ka chhang a a thil rawn sawi chuan min ṭhawng na kher mai! 

Eva chuan intihhlum alo tum a, Diana i party ah damdawi a bar ṭeuh niawm tak a ni, Mason-i chuan "Tunah damdawiinah kan awm mek" tiin min lo hrilh a, mak ka tiin min ṭhawng hle a, ka rilru a na takzet bawk.

Keimah vang vek a ni, kei hian Eva rilru ka tina lutuk a ni.

CHHUNZAWMNA

Damdawiin kan thlen chuan Eva chu alo muhil a a nu leh a u ten an lo awmpuia, min hmuh veleh  a nu chu a lo ṭap  a, an lakah chuan ka inthlahrung takzet a ni.

"Hei hi tunge ni?" Eva nu Mrs. Simmons chuan dak deuh vah a Zeus en chung chuan ahan ti a, "Kan ṭhianpa Zeus Castillo a nih hi" ka lo ti thuai a. "Nangmah hi maw Zeus chu" tihpahin Mrs. Simmons chuan a chibai a, Eva u Laura pawn a lo en rang kher mai. 

Zeus hming anlo hre tawh anih chuan Eva in a atchilh zia pawh an hre tawh ngei ang, thil thlen dan zawng zawng an hria ang tih pawh ka hlau ta rum rum, an hria a nih chuan min huat dan tur thlengin ka ngaihtuah a ka awm a nuamlo lehzual a ni.

Zanrei deuh thleng Eva chu kan awmpuia, ka haw chuan zinglam a ni tawh, Zeus nen chuan kan inbe tlem khawp a, Eva ringawt ka ngaihtuah avangin Zeus-a min biakna te pawh chu ka lo hre mumal lo, "Joshie, engthil nge maw i ngaihtuah le! Mahni inthiamloh kha angai miahlo a nia, engmah tihsual i neilo" tiin a lamah min pawt her lawp a, "Ka ti diklo a ni, keimah vang vek a ni" tiin thawk ka lo la halh a, ka bing chuk chuk a ni ber.

"I tih dikloh a awmlo, Eva nen kan inkawp lo a keipawn ṭhian ang chiahin ka en a, hrep chuan Joshie! I ṭhian anih vang chauhin a lawm a lakah ṭhat ka chhuah" ka darah vuana min sawi nawk chuan ka ngaihtuahna thuk tak a ta chu ka harh chauh a ni.

"Zeze i fawp a ni lawmni, he thil hi kan pahnih tih dikloh a lawm, a bikin keimah Eva khan a duh zia che hrerengin ka hnar lo che a, nangin beiseina siam zawngin i lo awm bawk a" ka tih chuan a lu a tuai vut a.

"Tihdikloh ka neilo, infawh satliah mai ania lawm kan fimlo tlat a mahse, a aia thui kan kal hauhlo a a thleng nawn leh tawhlo bawk" thutak zeta a tih chuan thawk ka lo la leh hak a,  "Mahse Zeze Eva chuan thil ho tea kan ngaih kha a nat pui a lawm, intihhlum a tum a nih si hi" ka lo ti ban charh a.

"Tiang zawng khan ngaihtuah lui tlatlo la" a tih leh chuan ka chhang zui tawhlo, kan In kawt kan thlen chuan min lêtsan a, ka nu in ṭhutkhawmna pindanah min lo la nghak a, "Eva chu enge a ana a chhungte chuan thil awmzia an lo hrilh che em?" tiin min zawt a.

"An hre chianglo a, a harh veleh ah ka kal leh ang" ka ti mai a, ka nu bulah chuan thil awmzia hrilh vek mai ka nap a mahse, Zeus nen kan inkawp thu hi ka hrilh ngam chiah lo a tin a ni, Aunty Shanoni pawn engtin nge a lo ngaih ang?

Zing ka thawh veleh ah insiam sawk sawkin Damdawiin lam chu ka pan leh ta nghala, a khuma Eva ṭhu ka va hmuh chuan ka nuih var var a, a hmel hmuh pawh anuam kher mai a dâng deuh tih mailoh chu. Chutah min lo  enin "Enge i lo tih dawn a?" chang zetin a lo ti a, ka kal chu min lo lawm hauhlo mai!

A zawhna chhanglo chuan ka nui tawi tak a,  Cabin chhungah chuan ka penlui zui thuai bawk. "Enge i an a?" zawi sep ka lo zawh pawh chuan min chhang duhin min en kal ringawt a, midang te pawn mak min tih hmel viau mai.

Laura chuan dawra kal lawk a ngaihthu sawiin lo awmpui tur chuan min ti a, a chhuah hnu pawh chuan Eva chuan min la melh tur khai a awm a nuam mawlhlo, ngaihdam dil chiam mai tur nge ni a, thiamlohna neilo ang hmakin ka awm zawk dawn tih chu ka ngaihtuah buai hle a ni. 

Hai der lui thei ka nilo, ka ṭhianṭha ber a ni a chân thei lah ka ni hek lo "Eva engthil emaw i hriatsual palh a.." ka ti dek dek chu "Phatsantu" min lo ti bak hluk a.

"Eva..nizan thil thleng kha.." ka sawi zawm tur chu min lo pawtchatin "Zeus i fawp" a lo ti leh hmiah mai a, min ti dang lel mai. "Zep buai duh suh Joshie i ngaizawng tiraw?" a tih leh chuan chhan mai ngaihna pawh hreloin ka chil ka lem khalh a, ka dang a ro hulh mai.

"I ngaizawng ve tih chu ka hre daih tawh mahse, a ruka min phatsan kher chu ka ringlo a sin, ka tana hma la angin i insawia hnunglamah min lo phiarru reng zawk a ni" a ti leh sak sak a. 

"I ngaih ang kha a nilo Eva sawi ngaihna pawh ka hrelo, engmah ka hrilhloh vang chein pawi ka ti hle tihloh chu" ka ti zuai raih a, a lo nui hak duh chauh thung. "Fel hmel deuhin i awm a min tihnat i hreh chuang der silo a, Arâwn mawi tak chang hriam tak nei ang vel i ni, nge ni a Choak Ṭhuro thla tawn ka ti zawk dawn che" ner sak sak chunga tiin a nui leh hak a, hrehawm ka tih zia chu ka sawifiah thiam hauhlo ang.

"Nang nena inhuat hi ka duh miahlo a sin, khawngaihin hriatthiam tum hram teh" ka tih pawh chuan min bengkhawn ṭha duh hauhlo. 

"Eva engtianga awm turin nge maw min beisei le?" beidawng zeta ka tih laichuan "Zeus hi ṭhen rawh, kei nena inṭhian ila duh a nih chuan ṭhen ang che, keipawn ka bansan anga nangpawn i bansan ve tur a ni, hlim taka in inkawp ka hmuh a ka natzia i hre pha lo ang" a sawi lai chuan a mittui a lo luang thla ngial ngial a, a insut zui hlap hlap bawk.

"Joshie, thi tura min duh anih loh chuan kawp tawh suh, anihloh chuan nizan ang kha a thleng nawn leh ang, ka duh em em ka neih theihloh nena inhlim dun hmuh aichuan thih ka thlang zawk" Eva thil sawi chuan min deng dawt ni ber in ka hria, chhan mai ngaihna pawh ka hrelo!

"Eva, chutiang thil mai maiah chuan i nunna i hmatheh tur a nilo a sin" ka ti hap a. "Joshie min hmangaih takzet ani chuan ka thilsawi hi ngaipawimawh rawh, ṭhian kan nih kha ṭhian ṭha ber, mipa vang chuan kan inṭhian ṭhatna hi tichhe lo ang aw, kan duh a lo in ang palh a mahse, a pawilo thil thleng palh thei a nia lawm, ka inṭhian ṭhatna hum him nan kalsan ve ve zawk mai ang" a khum aṭanga inbeng kang meuhin a kut chuan min lo ban a, a kut chu ka lo vuan ve nghalthuai bawk.

"Ka thih i duhlo tiraw?" a mit meng lian kal a min en chung chuan a ti leh mauh mai.

"Duhlo" ti a ka lo chhan chuan ka kut chu a hum nghet sauh a. 

"Zeus hi i ṭhen ang ti raw, min tiam teh?" ngen ngawl zeta min en chunga a tih leh chuan thawk a sak ṭalh a.

"Joshie, thi turin min duh zawk em ni, thih hi ka hlau miahlo ania, nun hrehawm taka nun aichuan" rak nghek chunga a tih leh chuan ka hit mup mup tawh. Ka chhanna nghakin min en kal a, enge tih theih ka neih chuan le?

"Mawh...i ṭhen dawn em, tunah sawi chiang rawh?" a lo ti leh nghal sek sek mai.

"Umm..ka ṭhen ang mahse, vawi khatmah intihhlum emaw mahni intihnat lam kha tum tawhlo ang che" ka ti ve ta nge nge a.

End of chapter 4