KA LALBERA (CH 13 - 15)

 CHAPTER - 13

@violette khiangte

A chhuah hnu chuan ka inngaihtuah zui nasa hle a inṭhen em kan sawidun ta lo chu a ni phawt a, engtin nge kan awmzel tih erawh hunin a la hril a niang chu. Lehkha ka chhiar ṭhina ka rilru ah a lut hleitheilo Lalbera fanu hmeltur te chu ka mitthla chhina hmuh ka chak rualin keimah ah hian hreawm tihna lian tak a awm run thunga helhkham nei ṭeuhin ka awm a ni ber e.

Margareti ka hrilh chuan kei aimahin mak a lo ti zawk a "Pawlnu...ka ṭhianpa mah ni se ka van duhpui lo che em, i chhungten rem an tihloh chu thuhran nise, naupang an awm tawh hi chuan neuh neuh hi a tam duh khawp mai a, i hriat angin hmeichhia hi chuan rilru kawih deuh chang hi kan nei fo sia kal tlangpui i duh anih chuan rilru zau tak i put angai dawn a nia" a rawn ti dap dap a, chu chu keipawh in ka lo ngaihtuah ve lai tak a ni.

Janet-i lah chuan naute chanchin min hrilh awllo a, Lalbera a chhun thu te chu hahipin a sawia, Emma-i chungchang te chu ka hre chak turah a ngai a ni chêk a niang titi tui berah a nei zui bawk a ka ning deuh lek lek ṭhin a, an chanchin a sawilaia nuamlo ka tih ṭhin zia a hrethiam pha hauhlo.

Zirtawp tlaiah Margareti te chhung tlawh turin ka kal a, min hmu chu an nufa in min lo bawr chuk chuk a, pawn an chhuak tamlo bawka kei ka buai bawk nen kan kan inhmu khat viau a ni. "Thil hrilh tur che ka nei a" nuisang chungin a lo ti a, thil ṭha lam a ni ngei ang a hmelah a phur zia a lang thei.

"I damṭha deuh tawh em ni, Therapy i la la em?" ka lo ti var a, "Umm ka ṭha lutuk harsatna ka nei tawh lo, ka dam var tawh e" a tih chuan ka lo nui a, a hmelah pawh a dam ṭhat hmel a ka awm a tinuam huai mai. "Enge min hrilh duh chu?" ka ti chuan nuisang chungin min en a "A mak...sawi vat teh, min ti hrechak a nia" ka ti leh chuan "Ka rai a" a lo ti vat a, ka lo au chhuak chiam mai.

"Tak tak maw...thla engzah nge?" ka lo ti nghal chul a "Thla pawh a la tling lo, kan pa pawh ka la hrilh lo a nangmah chiahin i la hria" nui hak hak chungin a ti a, kan ṭe teng tunga kan inkuah nghal chung chung bawk. 

"A nu Vîte enge min hawn" Cedd an a lo tih chuan ka eitur kensak te chu ka lo pe vat a "Joan-i a la tê bawk sia i van chhang chhe dawn ve" ka ṭhiannu lam hawi chuan ka ti a "Nia mahse, ka chhang chhe vaklo, Gabe hian naupang a buaipui peiha  naute kan neih hunah ka piin min awmchilh thei dawn bawk a" phur fêin a lo ti a, a nun chu a nawm hmel bik takzet a ni.

"Anih nang ve le, hman zana kan thilsawi dun te kha engtin nge nita zel?" a rawn tih chuan thawk ka lo la hawk a " Ka hrelo le" ka tih zawi sap chu ngun zetin min lo en a "I duh viau tawh a ni maw?" a tih chuan ka lo nui tawi tak ringawt. "Ka duh viau a niang, engtiang pawhin awmse ka haw phal lo chu a nih hi" ka ti hap a. 

Ni e hepa hi ka duh takzet tawh a ni, duhna leh khawngaihna a inpawlha ka telloin hun harsa a paltlang anga nun hreawm takin a awm ang tih ka hlau a ni, ruihtheihthil a a tlan leh pawh ka hlau takzet, a tan tihsak theih neilo mahila nun panngai tak a neih theihna tur a nih phawt chuan kei chu ka inngai pawimawh hmasa thei tlatlo a ni.

 

Gabriela a lo haw thlengin ka leng a, ka ṭhiannu in nau a pai thu a lo hrilha an nupa hlim dun lai chu hmuh an nuamin an awhawm takzet a ni. Keive lah ka hmabak a lo ko dawn chauh emaw anih hmel si a, nun hi ava in anglo ṭhin kher em!

"Zanriah i ei ve nghal ang chu tiraw?" Gabrielan a tih chuan haw mai ka tum tawh thu ka lo hrilh a "Ei la, ka thlah dawn che nia lawmtur te pawh kan neih chu" a ti leh tlat a "Ngawirawh tunlai chu chhungte bulah ka Score ṭha vaklo a haw tlai chi pawh a nilo"  uang zeta ka tih chuan a nuih a za kher mai.

"Anu Vîte min hawn daih rawh" Cedd-an a lo tih chuan phawk zetin kan en a "Enge ti maw ka naute?" a bianga chul paha ka tih chuan "Apa in anu bulah mu tawh suh a ti a" a lo ti reuh a "Ka tih loh kha.." Gabrielan a lo tih chuan Margareti nuih insum chu ka va hmu a ka hrethiam ve ta chiah. 

"Hemi te pafa tak hi chu a" tih pahin ka phun zui hlak a.

Eirawngbawl hun velah ka haw a, in ka thlen chuan ka pa pawh a lo thleng chiah a "Khawnge i chhuah a Rema a lo kal i awm siloa a chhuak leh chiah a nih kha" a lo ti a "Margareti te inah ka leng lawk, keimah min hmu tura lo kal pawh a nilo ang" Choka lampan pan pahin ka ti liampuat a, eirawng bawl ka ṭan nghal mawlh mawlh a, Remtluangan min lo text na ka en chuan ka sa pup pup mai.

Hmeichhe naupang thlalak a ni!

"Ti hian i hrethiam em, a bum che ka tih kha" a rawn ti zuia, Hmeichhe naupang chu ngo vir ver samkir lek lek a ni a, a hnar ngul leh a mitmengah Lalbera a chhun hle bawk, a hmel chu ka en ṭhina a duhawm tak zet a ni, chutih rualin ka rilru a tina vawng vawng a , ka mittui a rawn hnam nghal ṭiam ṭiam bawk.

Zanriah eikhama Remtluanga lo lut chu melh pawh ka lo melh ṭha peihlo, a lehkhabu lo ken min pek pah chuan awmze nei fein zawhna mitmengin min en a "I va ti lawmawm ṭhin ve" tih pahin ka lo laksak a, "Message kha i lo chhang silo a?" a tih chuan "Sawitur ka neilo a lawm" ka lo ti maia, Lalbera chung chang ani sawipui tehchiam hi ṭulin ka hrelo a ni.

"I la kawp zel dawn tho a mi? Nakin lawkah i rilru a tina mai mai ang, Naute nu lahin min la hel reng e a tih kha" nersawk chunga a tih chuan ka ngawi ngala, chu thil kher chu ka awih hauhlo. Lalbera ṭawng danah Naute nu nen chuan an inpawh tawhlo viau niin ka hre tlat a, Remtluanga aichuan a letin Lalbera ka ring zawk a ni.

Ka be lum lam peih meuhlo tih a hrethiam a niang rei awmloin a haw leh thuai a, a haw hnu chuan ka room ah ka chho vat a, ka Phone a hmeichhe naupang thlalak chu ka en ngar ngara, ka chawmawlh zo leh vek tawh, Lehkha chhiar lam a lang theilo ka vei run a, rilru zau tak put ka tum tehlul nen a harsa ka ti kher mai.

Inrinni ah Lalbera nen kan chhuak duna, Ruata te inah lengin a room ah kan inkawm a, Guiter chung chang ringawt an sawi avangin ka lo ṭhu ngawi reng ringawt a, Lalbera phone khuma awm chu ensak ka chak tlat peka ka ban lai te chuan min hmu reng tih ka hria, hrelo ang hmakin phone chu ka la a, Pattern a dah avangin ka en thei hauhlo lehnghala chan awmloin ka thinrim hlur ringawt.

"Pasta siam tur a awm a in eiduh em, in duhloh chuan ṭhenawm dawrah pawh a lei theih tho a" Ruatan a tih chuan "Alu chop ka eichak" ka lo ti vat a, "Ka va lei ang che" tihpahin Lalbera a tho nalha "Ka lo kal ve ang" tihpahin Ruatan a zui nghal bawk a.

Margareti nen kan in text a "Sunday ah chaw lo ei rawh u Vanlalbera lo sawm la a hmel hmuh te pawh kan chak ania" a rawn tih chuan ka nui var vara "Ka lo hrilh ang, lo kal kan tum dawnnia" ka ti a Margareti te In a kaltur hi chuan ka chhungten rem mintih saklo ngailo a, ka dil anih pawhin harsatna a awm ka ring lo.

Ka phone ka khawih mial mial laichuan ka bula phone chu a rawn eng va va a, lo call tu hming chu "Enge-i" tih a ni, hmeichhia chu a ni phawt a mahse, a Number a Save dan chuan minti bangbo lek lek a ni, la lo chuan ka Ring ral tir a mahse, a hnu lawkah a rawn ti nawn leh a ka la ta nge nge a.

"Enge Call i lak duh loh ve ziah a?" a rawn ti nghal tawng mai. 

"Enge i hriat min chhang ta che?" ka ṭawng ve hmachuan a rawn ti leh zat a, Enge-i tia a Number a Save chhan chu ka hrethiam nghal ta mai. 

Ṭi ang reng zet chuan "Tu nge aw?' ka ti a "Ehh..hei hi Ezra Phone a nilo a mi?" a lo ti hluai a, "Aw ni e, dawrah a kal lawka a ṭhiannu ka nia, a lo let hunah ka lo biaktir dawn che nia" ṭha deuh chuan ka ti leh mai a "Phone kha pe teh, sawitur pawimawh ka nei ania" lawmlo tih hriat zeta a rawn tih leh chuan ka lo ner nghalsawk.

"A awm hnailo a" ka tih rualin "Tumaw i nih?" a rawn ti veleh a "A ṭhiannu...." ka lo ti hap a, "A bialnu a mi?" a rawn tih leh ngat a, chhanglo chuan Phone chu ka melh run ringawt. "Engthilah nge i biak duh a?" lawm vaklo chuan ka ti ve ta a.

"Phone chu pe teh a fanu Nu ka nia" dawh theilo zeta a rawn tih chuan ṭawng leh ka tum chu ka tawp nghal chawt a Emma-i ka be mek tih ka hre nghal bawk.

"Lo hrilh rawh min lo Call vat rawhse, a fanu thil pawimawh ah biak ka duh" tih leh hmak pahin Phone chu a dah zui a, tih ngaihna hrelo lutukin ka hawi â heu mai.

"Ka phone a ri law?" Lalberan a rawn tih chuan ka hawi chhuak zawk a "Enge-in a lo Phone che" tih paha tum hmuk chungin Phone chu ka pe a, a Phone la a a hmet mual mual chu ka en ran bawk, a be dawn emaw ka tihlaiin Phone chu a ak ta daih a, a tihdan chu ka hrethiam lo hle mai, hepa hian ka awmloh huna biak a tum zawk emaw  ni.

"Call let ta che" ka tih chuan "A pawimawhlo nakinah a nimai" a eitur lei rawn phawrh chhuah pah chuan a ti a, tunge anih ka hrelo emaw a ti a ni ngei ang, ka dawhtheihna in a tlin leh tawhlo.

"Tunge anih ka hria, tunah Call la Speaker kha On bawk rawh" vin lek lek chuan ka ti a " A ho lutuk, thil ei ang" eitur minlo pek paha a tih chuan rum zetin ka lo melh a "I Call dawn nge dawnlo?" a lo ti chang fak a.

"Ninawm e aw..." tih pahin a Phone chu a la chhuak a, ninawm a la ti ngam vel chu ka haw hlur mai.

"Speaker kha On rawh" ka lo tih leh chuan hahthlak tih hmelzet hian min rawn melh a, chumi hnuah Number chu a call zuia, a ri pawh chiang zetin ka hre thei.

Rei a riallo, lehlam a mi chuan a rawn la nghal thuai a "Enge i Phone nangman ilo chhan loh a?" a rawn ti vin leh nghal hlar mai. Lalbera chuan min rawn melh zawka, ngun zetin keiin ka lo en ran bawk.

"Enge itih a, tunge Call lo chhang kha...?" lehlam a miin a rawn tih chuan "E le...ka bialnu" awlsam zetin a ti a. "I bialnu tih chu ka hre ve Malsawmhlu" a rawn ti bak leh hluka, ka ṭhuthmunah ka lo ṭang ṭung ringawt.

"I duh chu sawi mai rawh" Lalberan a tih chuan lehlam thawm chu a ri sat sat a "Zoteah Cake min lampui hman em?" a rawn tih chuan ka lo ner nghal sak. Lalbera chuan min lo ena ka lawmlo hmel chu a hmu thiam nghalin ka ring. 

"Hman pawh ka ringlo" a tih chuan lehlam a mi chu a rawn ṭeu leh hlar a "Anih tak chu a" tih pahin call chu a titawp nghal hmak a. Hahhh...kha kha enge a awmzia, kan inbe ngailo kha a ti ve sia, tunah Cake lampui turin a rawn sawm a maw?

"Inla inbe fo ṭhin a ni maw?" rum zeta melh chunga ka tih chuan "Teuh nang" tihpahin eitur bawm chu a hawnga, Alu chop min rawn barh a tum laichuan ang duhloin ka lo inpetruh vak a, min nuihtlawn deuhin ka hre tlat bawk.

"Ei rawhhh...a lum lai hian" nuisuk chungin a ti a, lo vaithlak sak tawp mai ka chak et et a ni.

"Engvanga lo sawm che nge anih a?" awki zawi leh chang fe a ka tih chuan "Ka hrelo" tih zawngin min lo changa, ṭha tetea min chhang lo chu ka ngei ta kher mai "A rawn sawm ngam danah che in in pawh viau anih dawn kha..." nui hak chungin ka ti a, ṭawng tuma a ang zuau chu lo khapin "Nge ni a inlo chhuak dun fo zawk?" ka ti leh sak a.

"Aruati Birthday ania..chuvang chu aniang" a tih chuan ka lo thaw hak a, chupawh chu nise kan inpawhlo tive si tinge amah kher a rawn sawm, hetiang thil ho teah pawh a rawn sawm a nih si chuan eng thil thil ah emaw an insawm chhuak foin ka ring a ni.

"Engmah anih loh khaa...ka kal chuanloh hi" a rawn tih te chuan thinrim luatah ka ṭah a chhuak rum rum mai.

"Enteh Lalber, i fanu Nu ania i la duh anih chuan keichu ka kiang ang, inpahnih inkarah naute a awm tawh a bul ṭan ṭhat leh in duh anih chuan in fanu tan pawh a ṭha a lawm, chhungkua ni thei maitur lo pawt hrang tu nih ka duh hauh lo ania" ka ti a, chu chu ka tih awm reng ni pawhin ka hria, kei ka lo awm ve avanga inrem theilo mai an nih phei chuan a ṭhalo lehzual ngawt ang.

"Barbie, duh ni ila chuan hman hman ah khan ka nei tawh ang chû" tum deuh bar chunga a rawn tih chuan nur zetin ka lo en a ka lungawi hleithei meuhlo, ka rilru a ti hrehawm ngawih ngawih a ni.

"I duh tawhlo takzet amaw, in tawp fel tak tak anih loh chuan keichu ka tel ve duhlo"  ka Phone tuai niap niap paha ka tih chuan ka kut a rawn vuan vat a "Nangmah chiah hi ka duh che a, ka mamawh bawk che hmeichhe dang chu ka tan engmah an nilo" tihpahin min rawn fawp a, a hmui chu a lum veng veng mai, thaw ṭha theilo hial khawpa rei min fawh hnuah a inla hranga ngun zeta min enin min nuiha a lungawi hmel chu chawmawlh zetin ka lo en reng thung.

"Ei tawh la" nuisuk chungin a ti a kei erawh ka thil eichakna a reh nghal vekin ka hria. "A hming chu Aruati maw?" Alu chop ban pah chuan ka ti a. 

"Remruatsangi a nia, vawiin hi a kum 4 na" a lu buk nghat pahin a ti a, zep loah chuan ka thik takzet a ni, ka hmangaih em em hi kei aia fa hrinsak hmasa tu an awma engvangin enge ka han thikloh tehlul ang ni, ka thik lutuk chuan ka chhungril lamah min ti na hle bawk.

"Min ngaidam tiraw..?" zawi deuh taka a rawn tih leh chuan ka lo hawi chhuak vat a "A pawi ka ti a tira ka hrilh nghalloh vang che khan, diktak chuan kan inkar a chhiat phah ka hlau a" dar kan ak chungin a ti a, a mitmengah chuan a inthlahrun zia ka hmuthei.

"I zep khan kan inkar a ti ṭhalo zual zawk a lawm" eitur chawhlet mawlh mawlh pahin ka ti a, a kut lianpuia ka biang rawn dawm pahin "Barbie.." a rawn ti leh sap a. 

"Engthil pawh thleng se ka ta nireng ang che" a tih ri chuan min fan raih raih mai. A uanglo a a thutak em em a ni. "Anih nang?" ka lo ti let a, "Nang i rinawm te chuan keichu a ngai ve zel a mi?" a rawn tih chuan ka thil ei ka hak lo chauh a ni.

"Khaih khaih....ka uang anih kha" tih pahin ka hnung a rawn chum a, a kut chu ka lo nam sawn dawrh thunga, rum zetin ka melh zui bawk.

"Amak ka uang a ni khaaaa.." a rawn tih chuan "Uan hun pawh ania mi?!' ka lo ti vin hlar a. "I tan ka rinawm em tih zawh ka ngai hleinem..min ring tawp rawh mi zawng zawng hnenah hian itan ka piang tih ka hriattir dawn alawm" nuisang chunga a tih leh chuan ka lo thaw hak a "I over e a" tih pahin ka lama a rawn phei chu a bekah ka lo nam sawk a, khumah chuan letthla in a nui zui kiah kiah a, amah vanga ka rilru a hrehawm tehlul nen engah nge a lo la uan viau ni.

"I duh chuan uang rawh hetianga awm vel hi ka peih ve lo, midang i duh anih chuan min hrilh vat dawn nia...keichu ka kiang hmak ang" ka tih chuan tum hmuk chungin min rawn en a "Ka ta inih kha" tih pahin a sir ah chuan min pawt thlu nghal tawpa nghet lutukin min kuah zui bawk. 

"Min thlah teh a lum si" tih paha ka tal chu ka kawr a rawn hlim a, ka inrin hma a ka dul a rawn fawp chu ka ip chawih mai. "Heih...tawp teh" ka lo ti nghal chula, a tawp duh mailo, a kut lianpui chuan ka awm lamah a rawn zut chho a, ka thil ei tur la keng ṭun bawk si nen a thil tih chu a hunlo takzet a ni.

A hmui chuan ka dulah a rawn nul chho dan dan a, Ruata a rawn luh thut ka hlau bawk si, ka Alu chop ken mawm chu ka thlauh ka hlau bawk nen ka kiuin khumah chuan ka inbeng khalh ṭung bawk.

Ka dul zawnah chuan a rawn thaw lum haka..ka hit deuh seng seng lehnghal a, ka thawlak erawh a rang phat thung, a kut lianpui chuan ka nghawng a rawn chul a, a kut zungpuiin ka khabe a rawn tuaipah hauh hauh bawk. Khai leh.. He pa em em hi...Mi inah, mi Room-ah, mi khumah kan awm tih a hrelo em maw ni le!

"Heiii...a tawk tawh" tih pahin ka kiuin a lu chu nem kan ka tuma..awmzia a awm hauhlo. "Lalber..." ka tih leh rualin ka hmui a rawn khar hmiah a râwp zetin min rawn fawh chhunzawm a, ka ngaihtuahna chu a vakkual nghal ruai mai, ka thil ngaihtuah mek chu ka duhlo hle bawk.

Hrep chuan a!!

A hmui ka seh sak takah chuan a tho kang uaih a, rum lutuka ka lo melh chu min la nuihsuk zui a, chuveleh tho kangin khumah chuan ka namthlu nghal dawp mai. "Tinge, i duhloh zawng ka ti a mi?" a tih chuan ka lo melh rum zual sauh a.

"Tiang khan Emma-i i fawp ṭhin em?" ka lo ti bak hluk a. "Teuhlo mai a" tih pahin a tum nghal hmuk. "Dawt sawi sawi suh kha aia thui kha in kal dun fo tih a hriat vek tawh tho a lawm" thil ei mawlh mawlh pah a ka tih chuan thinchhe zeta a lu a tuai vut chu ka hmuh hmaihlo.

"I ngaih ang kha a nilo" tih pahin a rawn ṭhu chhuak a "Ka ngaih ang mai bak a nih dawn chu" ka lo tih leh chuan a ner nasa ngang mai. "Inhauh ka peihlo, tumah hmeichhe dang duh ka neilo bawk" ka biang rawn tuai zauh paha a tih chuan "Ṭah vak ka chak a nia" ka lo ti hap a. 

"Ṭap lo ang, ṭah chhan tur a awm lo" a tih chuan beidawng zetin ka lo en haw a. "Ka bulah ṭah ka phal hleinem" a tih chuan ka lo thaw chhuak hliai a. "I mak ve ngawt mai hmeichhia hian an bula kan ṭah hlawp hlawp theihna tur mipa kan mamawh zawk, nang chuan ṭah pawh i phallo a nia" ka thil eilai khung hmak pah chuan ka ti a.

"Aaa...chu chu ka sawitum a nilo, i ṭah ka phallo a lawm hlim reng la ka duh a chu zawk chu a lawm ka sawi" tih pahin min rawn kuah a "Anih lokal la, ka awmngheng hian ṭap rawh le mahse, ṭah chhan ṭha tawk tak neilo chuan ṭah ka phal chuanglo ania aw, i ṭap anih chuan min ti â zo vek ang" nghet zeta min kuah hlu hlu chung chuan a ti a, a awm ngheng chuan ka mit ka chhing vang vanga, ṭah chhan tur ṭha tawk tak nei chuan ka inhre tlat silo mahse, ka tawt urh reng chuan min ti hreawm em em thung a ni.

"Lalber.." 

"Umm.." tih pahin ka koki ah a khabe a rawn nghat dat a. 

"Min hmangaih tak tak em dawtsawi miahloin min han hrilh teh" a hmel chik zeta en chunga ka tih chuan ka biang a rawn nawk a, "Tehreng mai, ka hmangaih lutuk che, ka hrilh tawh che kha ka nupui tur i ni a lawm" min kuah ngheh salh pahin a ti a, a hmel a uang tawh hauhlo.

"I uang lo maw..ka ring thei che a ngem?" ka ti zawisap a "Min ring rawh, kal tura min ti anihloh chuan ka kalsan ngailo ang che" mitmeng damthlup a min en chungin a ti a. "Chutiang ka duh lo, hmeichhia chuan min kalsan rawh kan tih lawm lawm pawh a kan kianga awmlui tlat tur a lawm kan duhthusam zawk chu" ka lo ti vat.

"Barbie chutiang chu ka duhdan a ni mahse, i tan hian ṭha tawkloin ka inhre ṭhin, ka awmdan hi ka hrethiamlo ka inthlahrung a niang, ka theihtawp ka chhuahhnu pawh hian i tan hian ṭhat tawk tih ka nei theilo ang tih ka hlauthawng bawk, a chhanchu hmeichhe ṭha famkim lutuk hi ka bialnu ini bawk si a" nuisak chungin a ti a a mitmeng erawh a thuk raih mai a a thutak em em bawk.

"Ka tan rinawm la, min hmangaih bawk la, min hmangaih a nih phawt chuan kan inkar ti chhe thei thil te chu i ti duh hauhlo ang, ruihtheihthil chenin..." a bianga khuap pah chuan ka ti a, "I ti thei a ngem?" ka tih chuan a lo bu nghat a, dimtea a hmuisira ka fawh chuan ka kawngah nghet zetin min lo kuah thung, kan âm dun kher mai.

"Ruata a lo lut ang" ka kawr chhung a rawn zen laichuan ka lo ti vat a, a zen luita tho mai, ka ṭang ṭung a ka awmdan a nuam hlawllo a ni. A phone a rawn ri a a lak chuan inlak hranna remchangah ka lo hmang ve thung a "Aw..lo lut tawh rawh" a tih chuan phawk zetin ka lo en a, lo call tu kha Ruata a ni tih ka hria, hepa hian a ṭhianpa bulah Chance a lo dil leh em maw ni dawn le?

"Chance min pe rawh iti lehpek a ni maw?" ka tihchuan a lo nuisuk a, a dil chiang a ni. "Enteh Lalber " ka ti hluaia a, ka sawi tim leh deuh tlat thung mahse, nakin lawka harsatna kan neih mai lohnan hrilh vat ṭha in ka hre bawk si, a tir aṭanga hrilh nghalloh chuan nakin lawka buaina min siam mai mai thei zawk tlat a ni.

"Englo a nia Sex chungchang hi?" ka ti dek deka "Tumah ka tawklo" ban phar hluai pahin a rawn ti a, a insawithiam hmel chu a ṭha kher mai, hetianga a hawisang vah lai hmel hi alawm amah ka ngaihtuah chang apianga ka mitthla ṭhin chu.

"Chutiang lam a nilo.." nuisak chunga ka tih chuan a mitko a san ralh a "Enge a?" phawk fea a rawn tih chuan ka heh ka lo pet fan a ka hmuiah chuan a mit a fu chiang hle bawk. A bing sum lang ralhin a nuia tunah hian a nui hmel chu ṭha tizetin ka thlir mek a ni.

"Inneih hmaa Sex hman ka duh miahlo ania aw Pathian hnenah ka intiam tawh a, bakah hei en la" tih pahin ka kuta Purity ring ka bun lai chu ka hmuh zat a, a lo nuirisuk mai. "Engee..?" chhuahchhal awka zeta ka tih chuan "A ṭha vek e" tih zawngin min chhanga a ṭha vek a tih chhan chu ka hrethiamlo lehpek tlat, ka thutiam te min ngaihpawimawh saklo anih chuan a buaithlak viau mai dawn a sin.

"A pawi i tih chuan duhleh midang nei mai rawh" ring angreng tak chuan ka ti a, bengcheng min tih hmel zetin a lo chek nghal hlak a. "A ṭha vek ka tih kha, pa zawk i nia i thu ber a lawm" nuihza insum zeta a tih chuan ka lo melhrum leh khai a, a hmela nuihza insum chu ka hmuh hmaihlo.

"A nuihzatthlakna ka hrelo a nia" lawmlo fe in ka lo ti a, "Ka nuih aza lo" tih pahin a tum leh nghal hmuka, a uang leh tawh emaw ni!

"Anih i bula awm a him ang maw, ahh..i lo..... tem vir... ve tawh sia" ka ti chuan a rawn nui chhuak hawk a, chutah pum dawm meuhin min nuih zui a Ruata lo lut chuan mak tih hmel deuhin kan pahnih chuan min entawn a "Inva hlim ve engthil nge a?" a tih chuan Lalbera chu a la nui cheu mai.

"Kan nu hian ka sazu ka ven hnehloh a hlau deuh anih hi" Lalberan a lo tih chuan phawk zetin ka lo en a, engtia chutiang thil te a ṭhianpa bula a sawi ringawt chu le!

"A khai Vîte hlau hle rawh...a sazu a veng theilo teh a nia" Ruatan a tih chuan ka lo lai awp awp mai. Ruata chhuah leh hnu chuan ka lamah rawn tawlh hnaiin nuihza insum lutuk hmel hian min en a "Ka bialnu hian min hlau deuh em ni" a rawn tih chuan "Teuhlo" ka lo ti bak hlar thung.

"Lungngai miah suh aw..ka veng thei lutuk alawm..." nui chunga a tih te chuan min ti lai riau mai, "Ka sawiduh zawk chu ka duhdan te min zahsak la ka timai a nia, bakah i hmeichhe kawp tawh ṭhinte anga awmturin min beisei lo bawk la" ka tih leh chuan a lo bu nghat nghat a.

"Ka chhuang hle mai che..ka phulo che chu ka tiduh hauhlo nain nang erawhin min phu mah mah a ni" awki hniam ruih a  a tih chuan ka lo nui chhuak hak a.

Dar thum velah kan haw a, in ka thlen veleh eirawng ka bawla zanriah eikham chuan ka room ah ka cho nghal nal nal a. Lalbera ka text ṭhina a chhang thei hauhlo, ka call pawn a la thei miahlo bawk . Minute 30 vel dan teteah ka call ṭhina, a chhang thei miahlo leh a hnua a in switch off ta daih chuan minti bangbo riau a ni.

Ka intihfai dawn laitakin Remtluanga Message a rawn thleng a, a thil min rawn thawn chuan minti hamhaih takzet!

Lalbera a ni! A bulah chuan hmeichhia la upa lo tih hriatzet hian hmeichhe naupang a pawma engemaw sawia an ding dun lai a ni a, bang vel an cheidanah Birthday lawmna a ni tih a hriat theih mai bawk, ka biak tlang theihloh chhan chu a fanu Birthday lawmna ah a lo kal vang a nih hmel e.

Ka lawmlo kher mai, a fanu Birthday lawmna a a kal chu ka lawmloh chhan ber a nilo a, a kal avanga min be duhlo leh a phone a switch off kher te, a kal tih takngial pawh min hrilh duh miahlo te chuan min ti thinrim a ni, a ruk a rala thil ti loin ṭha takin min hrilh sela ka phalsak loh a ring em mawni zawk le?

Keichuan fa a nei anih phawt chuan naupang chu ngaihsak sela ka duh, naute Nu tel kher loin a fanu laka a mawhphurhna a hlenna tur kawngah chuan dal tumna emaw lo inrawlh ve tumna ka nei hauhlo, mahse, zanin  a a tih dan chu ka lung a ti awilo tak zet a ni.

*CHAPTER - 14*

Dar sawm dawna minlo Call chuan ka phone êng chu ka hmu rang hle a, lak tumna ka neilo vawi 12 lai ka call tlang theilo a Message engemaw zat ka hnutchhiah bawk, enge maw tak chhuanlam chu a rawn nei ngei dawn tih ka hria a chhuanlam chu ka ngaithla peih hauhlo.

Min rawn call nawn sek sek reng chu ngaipawimawh loin inhnuai lamah ka chhuksana tui Bottle kenga ka chhoh leh chuan ka phone eng thim chiah chu ka va hmu a, a beidawng ta a ni ngei ang. 

Lehkha ka chhiar a ka phone chu a reh ta vung vung mai a, ka ngaih a ṭha leh chiah silo, awmnuamlo ṭun chung chuan  a message a awm leh awmloh ka ennawn chhen reng lawi a, haw viau si e tiloin tinge mawni hetianga ka awm tehfo ni!

Darkar a liam hnuah phei chuan awm ngaihna ka hre tawhlo kawtah a lo awm reng te ringin Balcony ah chuan ka va hawi vel thul a, ka thaw lah a ipik ṭup mai bawk a ka awm a nuam hlawllo a ni. Minlo call leh a nih chuan ka la anga ṭha taka a sawi a nih chuan huatah ka la biklo ang, a fanu lakah chuan mawhphurhna pawimawh tak a nei alawm a mawhpurhna a hlen chhuahna tur kawnga daltu nih ka duhlo a ni.

A rawn call leh ta ngei maia mu tura ka lo insiam laimek a ni nghe nghe, rei deuh ka rik tir phawt hnuah phone chu ka chhang a "Biak i van har ve" dam dupin a rawn ti a "Nangpawh" phurlo hmelzetin ka ti ve a "Nia ka phone Battery a lo Low daih a lawm mawle" a rawn tih chuan awih tur nge awihloh tur ka hre mailo.

"I leng chhuak a mi?" awki pangngai thei ang ber chuan ka ti a, a chhuahna hmun hria anga lan chu ka la duh hauhlo. "Nsa te inah ka kal lawka ka haw na a la reilo" a rawn tih chuan ka kut ka lo humruh vak a, dawt min hrilh a la tum ta hram chu a nia, a thlalak nen lam ka neichiang em  em mai bawk si.

"Anih chu..." ka ti zuai ta raih a, hetiang reng reng a dawt min hrilh reng tu kiangah hian lungmuang takin ka awmthei ngailo ang, tuna a awlsam laihian engkim ka tihtawp mai angai a ni.

"Call i chhang thei silo a i Lehkhabu  chhiar i muthlu a nih ka ring a, haw lama rawn tlawh kawi che ka tum nen ka haw tlang ta ringawt a lawm" thatchhe aw zet hian a rawn ti a, dawt bak a sawiin ka ring tawhlo. Enge maw a rawn sawi leh laichuan ngaihtuahna thar ka neia, awki zangkhai vahin ka chhang zui ta a.

"Aruati birthday a ni sia i kal velo a mi?" panngai thei ang ber chuan ka ti a, "Teuhlo, a chhungte nen kan inpawh siloa tel ve chi a nilo" a tih chuan daw thei ziah zuah lutuk ka lo ti rilru mawlh mawlh a. Mahse, ka la sawichhuak duh mai biklo "A Birthday te  a ni sia Present te tal pek ve tur che a lawm i ti mak emai a" ka lo ti hlak a, a nuisuk te chu ka ngei kher mai.

"Ka nuin thil a leisaka, Bazar-na tur te pawh a pe a lawm, i ngaih ang khan kan inpawh tehchiam hleinem Barbie an ni lam pawn kan va ngaihven vak an duhlo" a tih lai chuan ka mit ka lo chhing vang vang a, hepa hi ka ṭhen tak tak a ngai a ni ka rilru pawh hrehawm viau dawn mahse, ka ṭhen ngei angai chuti lo chu nakin lawkah boruak chhe tak nen kan inṭhen ala ngai dawn tho tho in ka hre tawh tlat a ni.

"Mu turin ka insiam a nge" tiin kan biakna chu ka titawp a, Remtluanga thlalak minlo thawn chu ka va thawn a "Min hrethiam dawnnia, dawt ringawt min hrilh ṭhintu hi ka ring thei tawh lo che  a ni e mangṭha" tih ka thawn tel bawk a, ka sawi sei duah lo nain chhan tam tak infawk khawm vanga ṭhen ka ni ber zawk, kawng khatah chuan kan nunphung in anglo lutuk leh rinngam a ni ngailo hi a ni.

A rui em? A ruilo em? Chutiang ngaihtuah reng pawh chu ka kham, dawt min la hrilh ta zui a chu a chhapah ka chhungten min duhpui miahlo bawk. Kan hmakhua tur ka ngaihtuah hian thuitak ka thlir thei ngailo ani nen hian hmahun engtak neiin ka inhmu theilo bawk.

Chuvang chuan a awlsam lai hian ka ṭhen mai a ṭha zawk a ni, a Number chu ka Block zui a, tunah hian ka message te chu a hmu tawh ngeiin ka ringa min call pawh a tum ngei ang, ka thiltih zawh chiah chuan ka thaw ipik zet chu a ti thawl deuh huaiin ka hria a mahse, awmze neilo deuh hian ka ruak riauin ka inhre thung, ka awm a nawm phah chuang hauhlo.

Chawlhni ah chuan keimah chiahin Margareti te inah chaw eiturin ka kala, Lalbera ka hruai ve lo chu enge a chhan min lo zawt a, ka ṭhen thu ka hrilh chuan min pawmpui khawp mai, tuar angin ka lang lemlo a ani pawn  a sawizui vak biklo.

"Tun dinhmunah chuan inkawp rihloh kha a ṭha a lawm han damfel phawt sela..." Gabrielan a rawn tih chuan ka ṭhiannu chuan a lo mitmei zauh a "Enteh pawlnu amah hi ngaihchan deuh ngai chi a nia, a mizia chu i hriat sa vek kha, khawvel a lo chen ve nasa tawh a kawng ṭhenkhatah chuan nangpawn ngaihthiamna chin chu i neih angai a, hun kal tawh inhriat reng sak hi a ṭha lo. Mahse, ka ṭhiannu i nihna ang chuan ani kherlo hi chu tawng la ka ti" ka kut rawn hmer salh paha Margaret-in a tih chuan ka ngaihtuah leh ta ngut ngut mai. 

"Hubby...Joan-i chaw i pe lawk hman em?" Margaretin a tih chuan "Khawi keiman ka lo pe ang" ka lo ti var a "A buaithlak a sin, chaw a eiṭha duhlo a pa hian a pe thei bera" a lo ti leh a. "Han tum ve reng reng teh" tihpaha Gabrielan naute chaw minlo pek chuan ka lo ban ve vat a.

Ka pek chuan a eiṭha duh phian mai a, min enchungin a nui ver ver ṭhina, a tlei bawk nen a nu sawi ang ni miahlo a min nel chu nuam ka tiin fa neih min ti chak zo ve ta vekin ka hria.

Fa neih ka chak maw? Ka ngaihtuah rualin Lalbera fanu kha ka mitthla ah a rawn lang a nih chu! Atthlak lutuk tihpahin ka lu ka thing nawka , chutihlaiin dawhkan kila rawn ṭhu ve Gabriela chuan  a Laptop khawih lai dah meuhin min rawn thlek a "In ṭhiandun hian tinge in lu hi inthin chiam ṭhin" a rawn tih chuan "Ngaihtuah kan nei tihna" tihpahin ka lo nui chhuak hak a.

Zanriah kan eikhamah chuan ka pain min lo call a, hruai ka ngaidawn em tih min rawn zawt a "Ka thlah dawn che nia" Gabrielan a lo tih chuan ka pa chu ka hrilh vata, "A ṭhat chu lo haw harlo la" tihpahin Call chu a titawpa, rei ka ṭhu hmanlo kawtah chuan Bike a rawn ding ri hrawk mai a Margareti nen kan in en haw a, Gabriela chhuah tum chu "Ka awmlo tih hrilh rawh" tihleh pindan lama tlanluh ka ruala "A va ho e aw" tihpah a penchhuak chu pindan kawngkhar aṭangin ka bih zuia, Rei vakloah chuan kawngkhar a rawn inhawnga Lalbera leh Gabriela ṭawng ri chu ka hre nghalzat bawk.

"A nau nen nichin lawk khan an kawtah kan inhmua in Ina chaw a ei thu a sawi sia" a tih chuan ka lo inhum ruh vak a, enge maw kan inah te a lo va kal chu ni.

"Zanriah i eitawh em hetah ei nghal daih la" ka ṭhiannu in a tih chuan thawm chu a rehzui daka, Sitting rooma Cedric-a games khel thawm bak hriattur a awmlo.

"Ka einghal mai ang" a tih chuan ka lo hawi phawk hra a, kal leh nghal mai sela ka tih tehlul nen "Vli chu i zawn chhunzawm dawn em" nuihza insum tih hriatzeta ka ṭhiannuin a tih ri chu ka lo ngaithla kar a "Zawng tawhlo mai ang, a duh duhna ah kal mai mai tehse, nula dang ka rîm mai ang" ring leng lawnga Lalberan a tih chuan ka thin a tirim hlur ringawt tawh, chhuah lawka va pet pawp mai ka chak a ni.

"Nge zanin chu nula rîm loin ka lo leng rih zawk dawn" a la ti tak deuh deuh a "Thingpui kan in dawn nia, Bawihte min lo thlitsak ta che" Gabrielan a tih hnu chuan thawm a reh vang vanga, chutah ring leng lawng hian Cedd-an " Anu Vîte i phone a ri" a rawn ti lauh lauh mai...Reuh chuan a tihchi loh lutuk.

"A phone a theihngilh a ni maw, ka lo hawnsak nghal ange" kan Lalbera ber bur chuan a lo la ti zui a, "A ṭullo ang" tih leh chhuah ka rual nghal. Ka hma Chair a ṭhu chunga min lo nuihsang tu chu rum fahranin ka melh a, a hmel ah chuan Room ah ka awm tih a hresa vek tih chu hairual a nilo.

"Enge i lo tih dawn a?" Sitting room lampan pah chuan ka tiliam puata, Cedd-a bula ka phone ka ban laimek a"Ka lo hruai dawn che mawle" a rawn tihchuan thip zetin ka melh  a, a hnar tuai zauh paha a nui vel te chu ka ngei takzet a ni. 

"Gabrielan min thlah dawn, va haw leh rawh" ka lo ti bak hlar a "Anu vîte mi nen in inhau a mi" Cedd-an a lo tih chuan ka awmdan chu ka tidanglam nghalvat a ka awki a lo vin mah mah niawm tak a ni "Naute hmelṭha Room ah apan games a khel a nia" Margaretin a lo tih chuan Cedd chu phur fein a kalsawn a, a kalliam hnu chuan "Haw rawh" ka ti vin leh nghal hluka, ngeiawm zetin hmui a lo petsawi vel  duh chauh a ni.

Thingpui kan ina Margareti nen chuan Cedric te Unau chanchin sawiin an titi a, ka lam a lo hawi apiangin ka hawisawn hmak loh leh rum fein ka lo melh ṭhin a, midang awmlo ngat sela chuan ka an a chhe leh tek tek viauin ka ring.

"Kan phei mai dawn a sin lenkawi duhna te kan la neia" Lalberan a tih chuan phawk zetin ka lo en a, ka ṭhiannu chuan a mitmeiin min lo rawn ve mek bawk. "Thlah chu i ngaihhmel loh hi a" Room aṭanga lo chhuah pahin Gabrielan a rawn ti a duhlo viau mahila hepa hi ka zui tho tho chu a ngaih hmel e.

Pawna kan inzui chhuah hnu chuan ngawi rengin ka kal mawp mawp a, min kaih tuma ka kut a rawn ban chu melh rum leh nghek pahin ka kal chak sauh bawk "Lo ding teh" a rawn tih pawh chuan ka hawilet duhlo a, a Bike bulah dingin ka phone chu a en a "Barbie" a rawn tih pawh chuan ka hawichhuak duhlo.

"Nizan kha i ngaih ang ani miahlo ania" a rawn tih chuan ka phone khawih pahin ka lo nuih hak a "Nia...engmah hi ka ngaih ang a nilo" ngaih pawimawhloh hmel fein ka lo tiliampuat bawk.

"Nsa te ina ka kallam a nia, ka nuin a thil leisak pe kawi tura min tih vang a nia, i duh chuan ka nu pawh kan zawt dawn nia" a tih leh chuan ka rilru a tibuai deuh nak mai mahse, awih mai chi nipawhin ka hrelo.

"Insawifiah a ngai hleinem, kan inṭhen tawh" amah pawh en hleilo chuan ka lo ti nghat a "Inṭhen lo" vin lek lek a a rawn tih chuan ngaihna hrelo lutukin ka lo en a, a hmel chu a lawmloh hmel nasa mai. 

"Nizanah te kha chuan dawt ila sawi zuah zuah kha tiraw" ka tih chuan a lu a thing a "Dawt ka hrilh hauhlo che Birthday lawmna ah ka kal lo a, thil ka pe zawk chauh a ni" thutak zet hian a ti leh a, awm a tinuamlo ta lek lek. "Thlalak kha khawi aṭanga i neih nge tih chu ka hrelo a mahse, i ngaih ang kha chu a ni miahlo" ka dara rawn vawn paha a tih chuan ka ngaituahna a buaita kher mai.

"Dawt i sawilo maw?" a mita en kal chung chuan ka ti a "Sawilo i duh chuan Nsa kan zawt dawnnia" a ti leh a, engah nge maw midang kan han zawh kual dun dun kher a amah pawn thudik a sawi em tih ka hriatloh laiin a ṭhianpa a mah aia lakthlakloh veleh chhawng chuan engah nge dawt a sawi duhlo bik ang ni.

"I biak theihloh hmaka, khang thlalak te kha ka hmu leh si a, eng angin nge lo ngai sela min tih a" zawt em em pawh ka nilo ka lung ala awi thei zan lo a ni. "Ka hrethiam lutuk i ngaihdan tur chu, ka phone kha a Low daih a ka hmuh chuan a lo thi hman a, ka haw a ka charge veleh ah ka lo call nghal che a lawm" ngenngawl zeta min en chung hian a ti a, ka rilru a tibuai zo leh vek tawh.

Ka ṭhenchhan te kha ka ngaihtuah let a, kan inkar hi ka sawifiah thiamlo nizan thil thleng vang te chauh a inṭhen duhna rilru pu kha ka nilo tlat a ni, kan hmalam hun beiseibo lutuk vang chauh pawhin hepa hi ka hlat a ngai tih ka hria.

"Lalber diktak chuan rin che hi a har ka ti, rin chhan tur che ṭha tak ka neilo, aaa..ka awmdan hi i hrethiam lo ang Break ka mamawh a ni" ka ti chhuak hlawl a, a hmel chu a ngui nghiai mai. 

"Engtia rei?" a ti zuai raih a.

"Ka hrelo chutiang ka ngaihtuahlo, hahdam leh lungmuang taka awm ka duh ani mai" ka tih chuan ka kut a rawn hmer vang vang a. Enge maw a sawidawn emaw ka tihlaiin ka kut chu lakangin a hmuiah a chuktuah a, a  mitmeng fim zet chuan min en kal bawk. Inher vutin a Bike a tinung zui a, ka lawnna tura a rawn tihawn lai te chuan a hmel tum bur vang chuan minti inthlahrung lek lek zawk a ni.

Ka be lo a ani pawn min be biklo, amah hlat thei ang berah chuan ka ṭhu a, hnunglamah ka inpawt bet ṭung bawk. "Aruati i hmu duh em?" a rawn tih chuan chhan ngaihna pawh ka hrelo, hmuh chu ka chak mahse, kan dinhmun hian a zirlo em a ni.

"Duh hranlo" ka ti zawisap a.

"Naktukah ka nuin lakphei a tuma, a nu zin hlanin kan kawl ang" ka thilsawi hrelo ang hmak chuan a rawn ti a, ka ṭhu ngawi ngal ta ringawt a, a lak aṭanga inlak hran hi ka rinaiin a harsa daih mai.

Kan kawt kan thlen chuan a dinfel hma hmain ka lo ṭum thla a "Fimkhur rawh" a rawn ti nghal hluk. A awki vin chu makti fahranin ka lo en a a in thlahrung leh deuh aniang "I tlusual a nge" a rawn ti leh zat a. "Muttui" tihpahin ka chhohsan ta nal nal a.

Sitting room a Remtluanga leh ka nu leh pa te lo ṭhu ka hmuh chuan min biak hmain choka lam ka pansan a "Thingpui lo lum rawh" ka nuin a rawn tih chuan ka lum nghal sawk sawk a, Thingpui ka pek zawh hnu chuan choka lamah bawk ka let leh a, ka inngaihtuah nasat poh leh ka tawt zual ting mai a ni.

"Heii..."tih ri ka hriat rualin ka inher vat a, ani pawh biak chakna ka nei chuanglo. "I ṭha maw?" nuisanga tihpahin chawei dawhkan ah thingpui inna no a rawn dah a, a sira Chair ah chuan a rawn ṭhu nghalzat bawk. 

"Min hmuh ang hi" tihpahin ka lo ṭhensak a.

"Engtin nge nita" a beisei hriat zeta a rawn tih leh chuan "Enge thleng se i lo tih a" ka lo ti bung nghut a. "A...ka hrenang thil kaldan chu nangman i hre ber ang chu, i ngaithiam zel a nih leh i thu thu ania, keichuan ka hmuh ang ka rawn hrilh mai che a nia" a tih chuan ka lo ngawi ngal ringawt.

"Vîte...ahma a  i bula ka awmdan kha pawi ka ti lutuk a nia, midang duh i nei tih hre tho mahila keichuan nangmah chiah hi ka la duhreng che" zawi deuh sapa a tih chuan ka lo thaw chhuak hliai a, amah hnung chhawnin tihtur hrelo zet chuan Fridge chu ka va hawng ringawt bawk.

"I chhungte pawn kha pa kha chu an duhpui lo che" a rawn tih leh chuan "Duhtawk teh" ka lo ti hlak a a ṭawng tawp nghal chawt,  "Lo inrawlh ve suh hei chu i buaina tur a nilo ania" awki pangngai zawka ka tih leh chuan ngun fe hian minlo en a "I pa hian hria se a lawm hauhlo ang, ruihtheih thil a tih bakah fa nei tawh a nih kha Drugs a khawih tello ang tih pawh a hriat miahlo keichuan a khawih tel hial ka ring a nia" a rawn ti chu ka ning ta kher mai. 

"I sawi zo tawh em?" thinrim urh a melh chung chuan ka ti leh fak a, hepa hian ka chhungte alo hrilh pawh ka hlau rum rum tawh "Ka pa bulah i lo sawi anih teh chuan i chaklo ang" ka ti zui kha kha a.

"Ṭhen chu iva la tum hmelloh ve, khapa khan i Career a ti chhe mai mai dawn, ka hrilhlawk ang che Vîte engmah thil ṭha a thlen dawnlo che" bung zeta a rawn tih chuan ka insum hram hram tawh a ni. "I lo buai angailo, nangpawh hian eng thilṭha mah min thlen bik chuanglo chu a nih hi" tihpahin sitting room lampan chuan ka kalsan ta hmak a. 

Kei min kawm loin ka pa ngawt a kawm ṭhin bawka ka inleng ang pawhin ka ngai tawhlo, a rawn chhuah ve rual chuan Room lamah ka chhosan zui zat a "Bawihi inleng i neih hî" ka nuin a rawn tih pawh chuan ka hawilet buai peihlo, "Ngawi rawh Nu Zomuan, keihi tihtur pawimawh ka neih ka lo theihnghilh daih a  haw mai ka ngai" Remtlungan a tih ri chu ka hre pha a, engtin nge inchân zui zel phei chu ka ngaihven tawhlo.

Atukah chuan class ka kal a Ramropuia pawh alo kal veleh hlawl mai "I lo dam maw?" ka bula rawn ṭhut pahin a ti a, "Dam e i va chawl rei ve" ka tih chuan an buai deuh thu leh Class a kal ṭhat theih tawh thuin min lo chhang var a. "Saw pawh a rawn thleng ve ta e" kawngkhar lam hawia a tihlai chuan nui var var chungin Janeti a lo lut ve mek bawk.

Ka sir lehlamah chuan a rawn ṭhu a "Hman zanah Emma-i nen in inbia a law?" ka beng bulah a rawn ti nghal sar sar a, aw tihnan a ka lo nuih sak a "A sawi a, in inbe ṭha vak nange?" a ti zui zat a.

"Inbia a inbe ṭhalo tur pawhin engmah kan sawi hleinem, Ezra call ka lo chhang a; biak a duhthu a rawn sawi mai a lawm" ngaihsak fahranlo chuan ka lo ti a.

"Fimkhur rawh inpa hi i ngaih ang a nilo a nia ka rin aiin a lerh tlat, nang kawp chung chein Emma-i beiseina a siam reng tho a, inpahnih chauh pawh hi anuna hmeichhe awm in ni kher nang, in nihna a la reilo bawk si, in nih hma pawhin tute te emaw chu a phur kual fo a nia" a rawn tih chuan ka lo sa nghal pup pup mai, ka rilruah  chuan thikna leh huatna a rawn inṭham a, Lecture pawh ka ngaihtuah hleithei meuhlo a ni.

Lalbera chuan ka bulah Emma i duhlo hul hual ang khan a insawi a, engtiang chiah nge an inkar hi hriatchian ka chak a ni. Ka rin ang hi nilo hram se ka ti takzet bawk.

Kei hi ka ṭhen tawh reng si a tinge mawni amah hi ka la ngaihtuah tluk tluk mai le?

Kan ban hnu chuan Janet-i chu zawh chian ka chak riau mai a, a lehkhabu a khung mawlh mawlh laichuan "Janet thil zawh lawk duh che ka nei a" awki zang vah hian ka ti a. "Sawila" tih pahin thawh a tum uk chu ka lamah a rawn tawlh hnai a.

"Emma-i leh Ezra te hi inngaizang pangngai an ni lo a mi?" ka tih chuan a meng taltap a "Inngaizawng e..inngaizawng lo sela chuan fa an nei teuh nang, Ezra nun pawlawh lutuk vang hian an inrem theilo mai mai alawm mahse, Emma-i ai hi chuan a ngaihven zawk che chuan ka hria" ngaihtuah ngun hmel zet hian a ti a. Ka rilru a tibuai nak mai Lalbera khan inngaizawng pangngai nilo tihpalh thil vanga chesual ang khan ka bulah a sawi bawk si a.

"Naa...nangmah a duh zawk che a lawm" min rawn nghawk sawk paha janet-in a tih chuan ka lo nui tawi tak a. 

"A hrim hrimin Vîte engtin nge i duh theih keichu vawikhat nulat manah thlangval hnahkhat ngatlo chu ka duh miahlo, tlangval fa nei pawh nise karah naupang an awm tawh hi chuan inpawh loh theihloh chin a awm ve a, i rilru a hrehawm duh ngawt ang" a tih chuan ka hrehawm tihna a zual sauh mai.

"An la inbe ṭhin in ka ring deuh a, i ring ve em?" ka tih chuan a lu a lo thing vat a. Zawhna mitmenga ka en chuan "Emma-i nen kan inkawm vak ngai tawhlo a, engmah min hrilh ngailo mahse, an inbiak ṭhat chu ka ringlo Emma-i pawn a duhtawh hleinem mahni fanu pawh ngaihsak duhlo zu leh nula chiah a lawm angaihtuah" a ti zui leh zat zat a, Lalbera laktlakloh zia hahipin a sawi zui nghal mawlh mawlh bawk.

"Kal ila" Ramropuian a lo tih takah chuan pawn lamah kan inzui chhuak a, Janet-i thil min hrilh vang chuan ka rilru chu Lalbera huatna hlirin a khat tawha, ṭhen fel hmak chu ka tihtur awmchhun ah ka ngai hmiah bawk.

Kawt kan thlen thlak chuan tualzawla ka mi hmuh vang chuan ka ding dat a, a Bike nghenga ding chunga minlo nuih sawng chuan ka thin a ti ur zual ting mai, engtin nge a hmel ala rawn lan ngam zawk ni.

"Hmeichhia hi chu a va han duh ve tak" ti a Janeti lo phun sap chu Ramropuia nen kan lo melh rual zat a, hetianga midang pawhin an ngaih hi ka lo kawp ṭhin chu ania leh, a zahthlak tak zet a ni.

"Tinge i lo kal a?" lungawilo fe chuan ka ti tawl a "Ka lo hruai dawn chê" dar kan aka tih pahin min nuih a, a hmel ringawt pawh hi ka hmu khawlo zo vek tawh, a lerh hmelin ka hmu ṭawmkailo hluah hluah ringawt mai a ni.

"Hruai ka ngailo Bazarah kawi ka ngai" tih paha kal mai ka tum chu ka banah a rawn vuan chawt a "Thil hrilh duh che ka nei a lawm" a tih chuan rum zetin ka lo melh a "Engmah ka hre peihlo a ninawm" tih paha min chelhna ka phih chu rawn che hrutin min chawikang lawp a, a Bike hnungah  dimlo fein min ṭhuttir nghal chawrh bawk!

"Mawla ...ana a nia" inpetruh ṭeuh a ka tih chuan "Tihpalh" a rawn ti zawi sup a, nuihza insum hmel ka hmu tel te chuan min run hle bawk. Chhuk tuma ka che zui chu ka mal ah a rawn nem bet leh hmiah a, kawngkalin min en zui hrek hrek tawh bawk nen ka thinrim lutuk chu ka sa pup pup mai.

"A rei dawnlo i duh leh Bazarah chuan kan kal hmasa dawn nia" tih pahin rang lutukin a rawn chuang nghal a, midang hmuh laia inbakkhaih vel chu thilnuam a ni hauhlo, lungawilo fe chuan ka inphurh tir leh ta nge nge a, a Bike khalh duh dan te chuan min ti lawm hlawllo a ni, kawngkawi a piangah uchuak zet zetin Bike a ti awna amah kuah lo theilo a min siam a tum tih ka hriat vangin hnunglamah theihtawpin ka inpawt beta, a Bike hnung a sang bawk si nen ka tla takngial dawnin ka hria!

"Min thah i tum a nih loh chuan tlanmuang nghal rawh" ka ti vin ṭhat a "Lo ṭhu hnaila min rawn kuah rawh" a lo ti ve thung. Ṭap deuh pur chunga a kawnga ka va kuah chuan a tlan muang ta hram a, min ngaihsakna a nei hlawllo te chuan ka ṭah a ti chhuak zual a ni. Traffic police in a rawn auzui tuar a kawngsira ding turin a rawn ti nghal bawk a, kan kiang vela miten min en ṭhap bawk nen ka zak lutuk chu ka hawichhuak ṭha ngam meuhlo.

"I va han tlan chak em em ve i rui a mi?" vin zeta Traffic police in a rawn tih chuan "Ruilo e..hei kan nu hi a pum ana a Emergency in damdawiin kan pan a nih hi" a lo ti zat a, ka hau chunga ka lo en chu Traffic police chuan min rawn thlek a, ka lo ṭap sa pur bawk nen min ring hlel hauhlo, "Anih chuan kal rawh u" tih pahin min kalsan zuia, kan tlan chhuah leh hnu chuan "Tihpalh aw ka ti tawh miahlo ang" tih pahin Side glass aṭangin min rawn en a, lehlam ka lo hawisan hmak thung.

"Bazarah chuan kan ding dawn em?" a rawn tih chuan "A ngailo" ka lo ti bak hlur a, engmah sawizui loin a tlan tlang a, reilo teah an in kan thleng zui bawk.

An compound a kan tlan chhoh laichuan Side glass aṭangin min rawn melh leh zawk a, na zetin a tukkhumah ka lo nam nghal chawrh a. Chutih rualin an gate ah kan tlanlut zui a, an kawta putar leh hmeichhe naupang lo infiam ka hmuh rual chuan ka thinphu a rang nghal dawt dawt mai.

Bike a hun lai chuan apu te awmna lam chu ka melh ṭha ngam rihlo, chutih laiin "Âpa" hmeichhe naupang chuan a rawn ti ta lauh a, engtin emaw ni ka awm ka awmdan chu ka sawifiah thiamlo, ka nghilhdup maiin ka hria a ni.

"Lokal rawh lut daih ang" tihpahin min kai nghal dawr dawr a, inchhung kan luh chuan thawk ka la kawk ringawt. "Lo ṭhu lâ.. Tui ka lo lak ang che" a tih chuan ka lo bu nghat a, ṭhutthlengah chuan ṭhuin pawnlam chu ka thlir a, hmeichhe naupang samkir bep mai chu a duhawm lutuk tlat, a hmel chiangtakin hmutheilo mahila a nui ri erawh ka hrepha, a hlim hmel tak zet a ni.

"Vîte i lo leng a ni maw?" tih ri ka hriat chuan ka hawilet vat a, inchung lam aṭanga Nu siamtei lo chhuk mek chuan min rawn nuihsang a "I lo dam maw?" ka lo ti var a, "Dam ṭawk ṭawk e i va lo leng duhlo ve" a tih chuan ka lo nuih leh ringawt a, tui bottle kengin Lalbera a rawn kal a "Nu Aruati Birthday lawmna ah ka kal lo tih han hrilh teh" a rawn ti nghal tawl mai.

Ka zak lutuk chu ka lo sen ṭan ṭan a, chhungte awmlaia sawi chi pawh a nilo ka thinrim bawk si chuan ka va melh hrawk a eng he hu ah a lo ngailo "Nsa nen chhuah kan tuma thil pe kawi lawk turin min tir tiraw?" a nu lamhawi chuan ala ti tak deuh deuh a "Aw ti e.." Nu siamtein damthlupa a lo tih te chuan minti zak zual ting mai.

A tui Bottle ken min rawn pek te chu ka lo phih sawk a "Min ti zak lutuk" ka hmui phunin la ti zui bawk, tikha chuan a chhungten ka thik tih te, Aruati Birthday lawmna a kal phallo angah te min ngai vek tawh ang, ti zahthlak thei lutuk. Hetiang zawnga a chhungten min ngaih hi ka duh miahlo a sin. 

Pawn lama Nu Siamtei a chhuak chiah chu a hnungah ka chum nghal dawp dawp a "Ana..." a lo ti nghal chul lehnghal. "A hmeichhia zawk hian kut min thlak ziah mai" tih paha a phun zui nung nung chu rum fahranin ka melh a "A ṭha i duh chuan min khawih rawh, i lungawi hma chu mahse, ka lu ah nilo aw" tihpahin a ban a rawn dawh a, a la uang cheu chu ka awih theilo zawk.

"I mawl a mi, tikha chuan i chhung ten eng angin nge min ngaih anga?" thawk hak pah chuan ka ti a "Tlai ah ka lo hrilh vek mai ang" a lo ti sam et a, hepa hi chuan engmah hi a la thutak lo.

"I thinrim thei tawhlo ang aw, Birthday lawmna ah ka kal lo tih i hre tawh bawk a" a rawn tih chuan a darah ka lo chum leh dawp a "Kha thil vanga thinrim ka ni hleinem, engmah min hrilhlo a a ruka i kal vang a lawm" ka tih chuan "Ka kal lo.." a lo ti leh hmuk a, Nitak...a kallo tak e.

"Engmah ti ru lo la a nimai" ka ti leh ngawt a, nuisunga min lo en chu ka la melh rum hram a "Pa berin itih te chuan ka hnial ngam hleinem" tihleh min rawn kuah a rual a, sawi tur hrelo zetin ka lo nui ta ringawt a. Chutih lai chuan pawnlam aṭangin hmeichhe naupang khan "Âpa" a rawn ti leh a ka bula mi lo phu zuk chu ka hrechiang hle.

Alu tuai vut vut chungin tui Bottle chu a bana, choka lam a pan zui nal nal bawk a, a tih dan chu ka hrethiam hauhlo. Aruati chu Nu siamtein a rawn pawmluta "Vîte  in eipuar ula bawihtei pawh hi a ril a ṭam tawh ang" a rawn tih chuan ka lo ding vat a, "Ezra kha eitur awmna va zawt mai rawh" a tihlai chuan Lalbera chu a lo chhuak phei meka, min rawn hmuh chuan ding datin a inher leh vut a "He nau tak hi chu aw..." a nuin a tih chuan ka hrethiam hauhlo. 

"A zak a nih kha Aruati lah hian a ngai bawk sia apa ve lah hi ala â ve bawk si â" a tih chuan ka lo nui chhuak lo chauh a ni. 

"Heyy...i nuin eitur siam rawh u a tia" ka va tih chuan Fridge bula a ding chu a rawn hawi zawk a "Chhuarah khan a awm, enge i ei duh ang" tihpahin min rawn pan a, ka kawnga rawn kuah pahin chhuar chu a hawnga Noodles siam theih chi a awm nual mai "I siam thiam em?" a tih chuan ka lo bu nghat a, "Ṭha lutuk" tihpahin ka biangah a rawn fawp zauh bawk.

Ka siam laichuan ka bulah a rawn dinga "I siam tui leh i hmingṭha a nimai" a la rawn ti ham ham a, a khat tawka ka biang a rawn fawp chhen chu "Lo va ṭhu mai mai teh" ka lo ti hlak a.

Aruati eitur chu athakloin ka siam sak , ka siamzawh hnu ah dawhkana ka chhawp lai chuan Nu siamtein a rawn pawm phei a, a thaklo ka siam chu ka lo kawhhmuh vat a Aruati chuan min en doh doh a min tilai lek lek a ni. 

"Ânu tirawh" Lalberan a lo tih chuan phawk fein ka lo en, hmui phuna ka hau zui chu a ngaipawimawhlo nasa mai. "I nu anih hi aw, a hmelṭha i ti em?" Nuisanga a fanu lam hawia a tih chuan Aruati chu "Ummm" tihpahin alo nui var var a, a nuihmel phei chu apa a ang takzet an biangsum neihna lah ala in ang chiah zui!

"A chhun che a nih hi a sam pawh a kir" Lalberan a tih leh chuan Nu siamtei nuih a za kher mai, kei aichuan Aruati sam chu a kir deuh zawka keiphei chu ka pawhngil tawh avangin akir tawh miahlo zawk.

"Lo eipui rawh u, puanpho ka han seng lawk ange" tihpahin Nusiamtei chuan min thawhsan a, "Ka tih daih sak ang che aw.." Aruati en paha ka tih chuan alo bu nghat nghat a, ka chawhdaih sak lai chuan an pafa chuan ngun zetin min lo enran a, kan awmdan chu chhungkua kan ang takzet a ni.

"Lo ei rawh" ka tih chuan "Zo phawt rawh" a lo ti ve tlat a, "A ei theih ta e" tihpaha Aruati ka pe chu la lo nui lehnghal var var a, a hmel hmuh anuam kher mai.

Thil kan eilai chuan "Apa ita kha a thak a mi?" Aruatin a rawn ti a, ka bula ṭhu chuan a thil ei phuh lo chauh. A khuh zui bawrh bawrh a a hnunga ka lo chumsak chuan tho vutin tui khawihna lam a pana,  a rawn let leh chuan a mit asen ram a "A thak lutuk a.. hrawk a thip nghal vek mawle" tih pahin a ṭhensak a. 

"Apa ka ta chu a thak ve miahlo" Aruatin a rawn tih leh chuan "A ṭhat chu" a lo ti zawi sap a, a awmdan chuan ka nuih a ti za lek lek mai. "Tomato i telh tam deuh a nih hi, mahse, a tui tho" tih pahin ka Bowl ah chuan min rawn suah rawk rawk a, a che lai deuh ṭutin ka hre lehnghal.

"Engtik nge exam inneih leh dawn?" a tih chuan "October ah" ka lo ti var a. "Nakinah chuan kan pi dut dut mai che angah" mitsiai zauh paha a tih chuan ka lo nui chhuak hak a.

"Apa ka puar tawh" Aruatin a tih leh chuan "Aw" a lo ti deuh hluai a, enge maw a hriat chu ni..."Ti ge a biak apiang che khan i phut zuk zuk renga?" makti zeta ka en chu ka lamah a rawn thle hnai a "Apa a ti sek sek a...awm a ti nuamlo a lawm..min rap deuh tlat" a tih chu ka chek hlak a. "Nang hi a, vuak hrep tlak inih hi" tihpahin a bengah ka pawhsak vak a Aruati nuih a lo  kher mai.

Tlai dar thum pelh hlekah min thlaha, ka pa ban hun awm vel anih vangin Zari te inhnaih lamah chuan dingturin ka hrilh a "Enge itih dawn?" hriatthiamloh hmel zeta a tih chuan "Thawmhnaw ka en dawn?" ka lo ti ve vat a, a awih hmel zanloh.

 Kal mai ka tum chu min pawt let dawrh a "Engê?" vin angreng zeta ka tih chuan "Ka number i block kha tunah unblock phawt rawh" a lo ti leh mauh mai. A hmuhlai chuan ka unblock a  a hlim a niang a biangsum lang ralhin a nui a, "Kal tawh rawh" tih pahin a darah ka beng thak a, chutih rualin kan kawtah chuan Car a rawn ding ve chiah bawk.

Tu dang a nilo, ka pa ngei a ni.

*CHAPTER - 5*

"Kal vat vat rawh" ka ti sek sek  a Garage ka pa Motor tlan lut lam chu thlirin "Tinge a?" hriat thiamloh hmel fê hian a ti a, ka chhang duhlo hrilh pawh ka duhlo zeploh ah chuan hetiang hi mipa tan a thanat thlak dawn tih ka hre ve tlat.

A dara ka nam sek sek vang chuan a tlan chhuak ta hram a chutih rual chuan Garage aṭangin ka pa a lo chhuak ve chiah bawk, a lam hawi duhloin step lam ka pan a hmanhmawh lutukin ka tlanchho zui a, kan dawra Nau-a lo ṭhu chuan min rawn thlek zui vawng vawng mai.

Ka nu lo chhuak tur nen kan intawk hlawla "I va hmanhmawh em em ve, khaw nge i len a?" a lo tih chuan "Nu la chhuk lo lawk ten ka pan min hauh a tum a nia" tih leh ka nu chu pawhluh ka rual a "Enga ti maw a hauh ang che?" maktih hmel zeta min en pahin a ti a, chhân ka tum laimek chuan kawngkharah ka pa chu a lo lut ve chiah a, a mengrum nasa leh tawh ngang mai.

"Vanlalhlan hetah lo kal teh" Sitting room lampan pah a a tihlai chuan ka thinphu a rang dup dup mai. Ka nu chuan a mitmei hmangin min zawt a, hreh zeta luthin ringawt pahin sitting room lam chu ka pan phei a, ka nu in ka hnungah chuan minlo zui ve nghal bawk a.

"I tlangvalpa kha ilo la thlahfel lo a ni maw?" rum fahrana min melh paha a tih chuan hnuailam bihin ka ding ngawi ngal a, "Ka va sawingun deuh ve mawle, ka thu  i zawm dawnlo anih chuan a pawi khawp ang, khatiang mipa laktlakloh lutuk kha kan chhungkua nena inhnim hnai turin ka duhlo ka ti vawitam a ni lawm ni" vin zetin a rawn ti leh a "Pâ...Lalbera a rui ngai tawhlo" ka lo ti hap a, a awihloh hmel nasa mai.

"Bawihi in inthlahfel tawh emaw tih a?" zawhna mitmenga min en paha ka nuin a rawn tih te chuan ka hit mup mup a, sawitur pawh ka hrelo ka bing chuk chuk ringawt mai a ni.

"Nu leh pa ten kan sawi chu a kawi a ngilin i zawm mai tur a ni, a rui ngaitawhlo te itih ngawt i hmuhloh hlan khan engtin nge a khawsak i hre reng reng em, thil chinchang hre zawkin kan sawi chu i he loin zawm mai tur, hei hi ka sawitawp na nirawh se i ṭhenfel hmak lo anih chuan ka tuithlar ang che, fanu thu awihlo hi ka mamawh hauhlo a nia" thip zeta a min melh chunga ka pain a tih chuan ka lo inperuh ṭeuh a, "Pa a..nangpawh insum deuh ṭhin teh" ka nuin a lo ti dek dek chu "Chhungkaw pain ro ka rel laiin hmeichhiain thu neih tum hlek suh u" a lo ti vin leh ṭhat a.

Ka lam rawn hawiin "Sawi chiang rawh khapa kha i thlah dawn em?" a rawn tih leh chuan ka mittui a lo hnam nghal ṭiam ṭiam mai. "Ava mak e aw, thu neih tum lam pawh a niloh chu enge maw sawi hlek hian i ṭeu nghal hluk zela, ṭha tete a zilh loa a invau zawnga thil tih ziah" ka nuin a tih chuan "Lo inrawlh lo la, lo va kalsawn rawh" a lo ti chang leh fak a, a aw ah chuan han chhan zui ngam chi pawh a nitawh lo.

"I tih tih khan titeh" tih paha phunzui hlak hlak chunga ka nu kalsawn ta chu ka melh ngam ṭawk a ni.

"Min chhang vat ta che?" a rawn ti leh ṭhawt chuan ka lo phu dawrh a, ka pa thinrim hmaisen chu ka melh ṭha ngamlo, ka hnuk a ulh ṭeuh a ka ṭawngchhuak hleithei derlo bawk.

"Khapa kha i kawp lui dawn anih chuan In hi i chhuahsan nghal ang, hria ang che hei hi ka sawi tawpna ni bawk rawh se" tih pahin a tho zui a, a kalsawn chiah chu ka mittui a rawn luang zung zung a,  ka rilru ana tak zet a ni.

Room ah ka chho a ka inthlak lai te chuan ka mittui a tla reng a, ka thaw a ipik in ka awmdan chu a hrehawm takzet. Ka tleirawl tirh aṭangin mipa lam ngaihsak ngai lemlo mahni tlat tlata tla chi leh inkhung deuh chawt chi ka ni a, pangngai taka ngaihzawng ka neih phei chu Remtluanga leh Lalbera chiah hi an ni. Keimah inthiam ve na liantak ka nei bawk a mahse, chu chu ka rilru tina zualtu chauh a ni. Fel ka intih ve na khan mahni inkhawngaihna min neihtir a, tuithlar hial a ka pa in min vau kha ka rilru a na zual em em bawk.

Lalbera nen kan inkar chu kaltlangpui zel ngam chipawh a nitawhlo, ka pa rilru sak tak mai hian engtikah mah a hrethiam duh dawn der bawk silo, a mizia ka hrechianga a mi vau na te pawh a duh anga ka awmlo anih chuan a ti tak tak duh dawn tihlah ka hming ka hriat chian tluk zetin ka hrechiang bawk.

Engtin nge ka tihtak ang? Tihian ka ṭhen ringawt mai dawn tihna em ni? 

Inhauh leh inhmuh thiamloh vanga inṭhen pawh nilo a chhungte vanga inṭhen phei chu anat dan a lehhnih takzet , a bulah chuan engtin nge ka va sawi ang? Ka ngaihtuah nasat poh leh ka rilru a hah a, ka mittui pawh ka dang theilo khumah chuan muin Blanket ah ka hmai ka phum sauh sauh chhuak lutukin ka ṭap nghal hlawp hlawp a.

Ka ngaihtuah tluk tluka a bula han sawi chu ka hreh kher mai, hmaichhanah chuan ka hrilh thei hauhlo ang a hmel ka hmuh rualin ka khawngaih leh anga anihloh pawhin inṭhen a lo duhlo emaw ania nga, ani mipa inla pa ve tak chuan ka pa biak a duh thu a sawi leh ngei bawkin ka ring, ka ngaihtuah a Phone call a ṭhen mai a ṭha berin ka hria mahse, min lo dawnsawn dan tur ka hriatsa vek avangin ka huphurh hle thung.

Lo inṭhen ta ila a nunhluiah kirin ruihtheihthil lamah a tlan leh mai angem, a nghei ve chauha amah pawn beiseina thar a neia a hlim em em lai a ni si a ka tih beidawn dan tur ka ngaihtuah zawng ringawt pawhin ka thaw ahah vek thei a ni.

Keimah avanga a nun a chhiat ka phallo a, keimah vanga a lungngaih pawh ka duhlo. Mahse, tih theih dang ka nei bawk silo. Lo inṭhen ta ila ani chuan nula dang tawngin hlimtakin a awm leh thei maithei bawk ka rinloh ang deuhin hlimna pawh a chhar mial maithei, chutiang chu lo nita tak tak se keihi engtin nge ka awm ve ang le? Hmeichhe dang nen hlimdun tur anga ka ngaihtuah ringawt pawhin ka thîk a ka na nghal vawng vawng mai, ka tello a a lungngaih a hlauh ang thoin ka tello a a hlim tur chu ka ngaingam leh chuanglo, amah anga duh leh vei em em hi ka nei tawh pawhin ka inringlo hial zawk a ni.

"Au Vîte chaw kan ei dawn a nia" ka room kawngkhar a rawn dah pahin Dodo-an a ti a ka hmel a hmuh hlauin ka lo i khuh ṭha sauh sauh thung, Blanket hnuaiah chuan ka mittui ka hru hul zung zung a ka ṭahna a vanga ka aw lawi zet chu ka thian zui kharh kharh bawk a. 

Dodo-a chhukhnu chuan che changloin ka mu ta reng a, chaw ei chakna pawh ka neilo, ka ṭahna lamah ka lu a rit lûk a ka taksa pawh a chau nghulh mai. "Rawn chhuk vat rawh" tih ri ka hriat rual chuan ka ṭhu chhuak zawt a, mitmeng tur khuia ka pain min lo melh run ka hmuh chuan ka tho zui nghal sawt sawt bawk. 

Zanriah eilai chuan kan ngawi ṭhap a, kan chhungkaw boruak rit zet chuan min delh rit churh maiin ka hria. Ka chaw bar chu ka lem hleithei meuhlo a  ka helh ul renga; ka rilru a tawtin ka ṭah a chhuak leh ṭeuh tawh, rilru nat laia thil ei kher kher chu a harsa ka ti takzet a ni.

"I rilru siam fel ang che, pasal atana neih tlakloh tur mipa laka in hnam buai lohtawp tur, khatiang mipa te zawng han nei pawh ni tehreng la reilo teah a ruihsan leh che anihloh leh a lerhsan che emaw ania nga, hna thawh mumal a neilo lehngal emaw ni kha" ngaihnep hmel zeta ka pa in a lo tih chuan "Gym a enkawl a lawm" ka lo ti zauh a a hmel erawh ka en duh hauhlo.

"Gym a enkawl tih te mai mai a ropuilo lulai emai, hmeichhia chu pasal thlan kawngah fin thiam tur mahni aia nep hi neih hauhloh tur, a bikin nang phei chu Officer chin ngat neih tum ang che, tuna i bialpa ve te zawng i thawchhuah ringa khawsak tum mai mai tur" chawbar mawlh mawlh paha kapan a tih chuan ka chaw bar lai ṭhulh meuhin ka hawichhuak a, a ṭawng duh dan chu a ngeiawm deuh  mah mah a ni.

"Khapa te kha an hausa lutuk asin" Naua lam hawi pahin Dodo -a chuan a lo ti zauh a "Dominic i kham tawh chuan tho rawh" ka pa in a lo tichang nghal bul a.

"Mihausa fapa duatsual chhungte thawhchhuah ringa nung ve mai mai ka ngaihsan zawng a ni hrep lo, inchei deuh deuh deuhin tikhan an fawr a nula an kawp kual duah a a ni ringawt, ani aichuan Rema te pawh pasal atan an ṭha zawk" min en ran ran chunga ka pain a tih chuan  ka lo thaw hak a Remtluanga hrechiang ber ang ziazanga a fak vak ṭhin hi ka ngaihtheihloh zawng tak a ni, Lalbera lah hre chianglo bawkin chhia tin reng a puh thung lawi a mak ve tak chu a ni.

Chaw eina kan senglai chuan ka nu in "I pa thu kha awih la i tan a ṭha ber a nia" a lo ti ṭha ve leh a, ka nu ka aṭang meuh a chhuak a ni bawk a ka ṭah a chhuak nghal titih der mai. "Nu inngaih ang kha chu a nilo a sin mawlê" ka ti zuai raih a.

"Ka hria a lawm inngaihzawn lai hi chuan mipa pawh hian zia an lo thup khawp a sin, tunah zu alo inrihlo anih pawhin zu in mi hi chu neihlo hrim hrim tur zu inmi tamtak  inngaihzawn laia nghei an tih te pawh hi inneih hnuah hian an in nasa duh viau ania, i tana ṭha tur ngaihtuahla ani kha chu ṭhen daih mai rawh hmelṭha eng ang pawh nise kawppui tur hi chu hmelah thlan tur a ni ngailo " aw damthlup hian ka nu chuan a ti leh a, chhan ngaihna pawh ka hre tawhlo.

Ruah a sur cherh cherh reng a, ka biak a ngai a mahse, ka call hreh ngang a ni, ka room a ka chhoh hnuah amah zawkin min lo call a a aw ka hria chu ka ngai vawng vawng a, a hmel hmuh pawh ka chak takzet, aman min lo call hmasa  a ṭhen ka tum tihlah a hre der silo.

"Ka inbual zo chiah a, i bula muta kuah lum veng veng che ka chak khawp mai" a rawn ti ril ruih a. Sawiṭan mai dan tur ka van hrelo tehlul em, a thilsawi pawh hre mumal loin ka lo ngawi leh veng veng ṭhin a, a sawi ṭan dan tur chu ka ngaihtuah buai nasa a ni, eng chhuanlam nge ka siam tak ang?

"Zanin chu i ngawichawi riau mai kan duhtawk mai dawn a mi?" a rawn tih chuan "Aih ka be duh che" ka lo ti vat a, "I ṭawng duh bawk si lo a, i nuam samlo  nge? a rawn tih chuan ka ngai lutuk tih thu hrilh ka chak takzet.  

"Ka zai i ngaithla duh mai em?" a tih lai te chuan a hmuh theihloh lamah ka lo inpetruh fan fan a, a hriata ka ṭah chhuahloh nan ka insum ngar ngar bawk.

Engtin nge tunah hian inṭhenna thu ka sawipui theih ang, kan inkar a ṭha a ani pawh a hlim em em a ni si a. 

Guiter a rawn perh a a zai a 'Tennessee you in my dream' tih hla a sak lai chuan ka mittui a sur zung zung mai.

"Barbie...i ṭap a mi a?"  a rawn tih chuan ka hmui ka lo hup chawt a, "I muhil a mi?" ka chhanloh vang chuan a ti lehnghal zat bawk. "Aih ka ngaihthla che a lawm" aw thian zui kharh pahin ka ti a, chutih laia a nui deuh suk ri chu ka hre thei.

"A vawt em?" aw ki zangkhai vah hian a ti a, inṭhen chungchang sawipui chu ka thei thlawtlo a ni, mahni ka inthiam chawp ruai a puitling ka ni ve tawh alawm, hetiang thil ah hi chuan keima duhthlanna a pawimawh ber  tiin ka inhrilh mawlh mawlh bawk.

"Ruah a sur a vawt reuh lutuk?" khuma inkhuh ṭhat sawt sawt paha ka tih chuan "Ka lo kuah lum ang che aw" mutchhuak aw zawi deuh sap hian a ti a, "Umm..min kuah la" lai lek lekin ka lo ti a, "Duat deuhin ka kuah ang che, zanin chu Aruati a rawn riak a api bulah a mu a" a tih chuan "I bulah muttir ta che" ka lo ti zauh a.

"Chi nang a....ka delh hlauin ka muhil theilo tawp ang" a ti deuh hluai a ka lo nuih kar kar laichuan "Ipa khan enge a sawi?" a rawn ti chu ka nui tawp chiang kher mai. "Engmah....a sawilo" ka ti bah nak a ka aw chu a zuih ral hle bawk.

"Ka lakah engmah zep suh i sawilo chung pawh khan ka hrethiam tho a nia, lo len ka duh a i phal ngai silo a hetiang ngawt hi chuan kan inkar hi aṭha theilo ang, ngaihtuah chiang teh hetiang hi chuan i chhungte rilru pawh ka hneh thei dawn miahlo a nia" a tih chuan sawi tur hrelo zetin ka ngawi ngala, ka rin ang chiahin ka pa rilru puthmang chu a lo hre ve vek mai mahse, ka pa mizia erawh a hre hauh silo.

"Aa...englo a nia exam hmachhawn tur ka ni bawk sia chuvang chuan an strict deuh hleka exam zawh lamah i duhtawkin ilo leng dawn nia" ka ti ta ngawt a, ka chhuanlam chu keipawhin awihawmloh ka ti a ni, October ah daih exam ka nei dawn a tunah July thla a ni ek ek chauh a alo len phalloh chhuanlam atan chuan a tling tawklo hle a ni.

"Chutiang ka duhlo Barbie, vawikhat chauh tal chu hun min pe ve teh" a rawn tih chuan ka  ngawi dak a, "Naktuk zanah aw" a la rawn ti tak deuh deuh mai han hnial chiam dan tur pawh ka hrelo, a thlirna lam aṭang chuan awm ka tihpui viau lawi si.

"Mahse, ka pa nen chuan in mizia a inanglo lutuka" ka ti zawi ta sap a "Chuan i phal maw?" phur fêin a rawn ti zui a "Phal e" ka tih chuan a nui tih ka hre thei, kei erawh ka phurlo kher mai, phur a hnekin ka tawt ru ṭeuh zawk.

Naktuk zana lo leng tur chuan kan han in tiam ta chu a nia, kan inbiak zawh hnu te chuan ka ngaihtuah zui neuh neuh a "Tih theih dang a awm tawh chuang hleinem, inṭhen hmabak maiin kan awm tawh a hetiang hun hi kan thlen a hun ve reng tawh a ni, amah ngei lo kalin ka dinhmun te pawh rawn hre ve sela bangbo lutuka ṭhenna thu va hrilh ngawt aichuan atan pawh a Fair zawk ang chu" tiin a inhrilh mawlh mawlh a.

A tuk zanah chuan zan tirah minlo call a "Ka lo kal dawn chiah a i pa chu a awm em?" a rawn ti a, Sitting room a ka pa ṭhu melh ralh chung chuan a awm thu ka hrilh a, a lo kal nghal tur thu sawiin phone chu a dahzui a.

Ka awm a nuam theilo, hlauhthawnna in ka khat a Lalbera lo thlen hmachuan chhuat dungah ka veitawn sek reng ringawt a "Lehkha i chhiar dawn lo a mi?" ka nuin a lo tih chuan "Zanin chu dawnlo inleng ka nei dawn a" ka pa hriatphakloh tur chuan ka ti a. "Ehh...tunge lo leng dawn a?" phawk lek leka min en chunga tih chuan "Amah khá" ka lo ti zawi sap a.

"I pa thu i hnial lui ṭalh dawn a nih chuan ka ṭan dawn hauhlo che a nia, inrunluih hun pawh a nilo keipawn khapa kher kha chu ka duhpuilo che, ipa lahin a sawi chiang viau tawh bawk in inchhun pafa lulai emai tih ngaihna pawh ka hrelo che u" tih hlak hlak pahin Bathroom ah a lut zui a. 

Choka tukverh lam aṭang chuan kawngpui chu ka thlir reng a, ka phone nen chuan ka bih tawn chhen reng tawh, rei vaklo ah ruah mal lianpui pui a rawn tla phuar phuar a ka chhungril a ṭang hian vawtin min rawn ṭham er er bawk. 

Ka phone chu ka en a zan dar 7 a pel zawt chauh a ni, chutihlai chuan Bike ding dat ri ka hria a , ka hawithlak laichuan a  Bike aṭangin a lo chhuk mek a, hmanhmawh takin kawngkhar hawnsak turin ka kal zui ve nghal a, kawngkhar ka hawn laichuan ruah chu a tla nasa zual sauh a Step a a rawn pen chho hlawk hlawk thawm chu ka hre zawm zat bawk.

"Thingpui han lum la, ka lo in a ngê?" ka pain a lo tih chuan ka hawilet zawk a, pawn lam ka hawi leh chiah chu a rawn thleng chho ve chiah nen chuan kan inmelh dun ta ran a, a hmel ka hmu chu ka hau chungin ka lo en a; a landan chu a danglam takzet a ni!

A sam chu a dum hlap a meh pangngai takin a mêt a, a bek pawh uluk fahranin a ziah tir tih ka hmu thei. Chutianga tih chu a inhmeh em em bawk "Min nan hmanlo chiah chiah" tih pahin min nuih sak a "Lo lut rawh" kawngka hawn zau paha ka tih chuan ka ban rawn zut thuak pahin a rawn pen lut a.

"Sitting room ah lova ṭhu la thingpui ka lo siam ang" tih pahin choka lam ka pansan a, ka thawk ipik lutuk chu choka ka thlen rualin boruak ka hip kawk kawk a, Sitting room a thawm awm leh awmloh ngaichangin ka beng ka chhi kar bawk.

"Khawchhiat lai laiten i lengchhuak a ni maw?" ka pa in nelawm fahranloh tak maia a tih ri chu ka hria a, Lalbera chhanna erawh ka hre phalo thung, Bathroom aṭangin ka nu a lo chhuak a "A sen hêng kha ka lo duh ve ang" tihpahin sitting room lam a pan zui a, chuveleh kal hnaiin choka luhna kawngkhar bul aṭang chuan an ṭawng chu ka ngaithla a, Lalbera aw thian kharh ri pawh ka hrechiang hle.

"Ruahsur hnuaia nula han rim chuh mi hrat khawkheng an tih te pawh i ang dawn dawn a lawm le" ka pain bung deuh taka a tih chuan ka lo ip ru ṭeuh a.

"Nangni la i peih angem ka pu?" Lalberan a tih chuan "A teuhlo emai,  hmeichhia vang mai mai in ruahsur leh  khawvawt  ka tuar ngai lo, i tih awm tawk lek zawk a nih hi" ka pa in a tih chuan ka lo inhumruh nasa mai.

"Engmaw i thawh ṭhin a?" ka pa chuan a ti a pakhat zawk chuan "Tunah chuan ka thawhtur ka la ngaihtuah buai mek a ni" a lo ti khauh a "Eng thil nge i rilruk deuh a?" ngainep aw zetin ka pa chuan a lo ti leh a. "Sumdawnna lampang a nia" Lalberan a lo tih leh chuan "Chutiang te zawng thluak nei ṭha deuh ho tih chi anih chu" a lo ti nghut a.

"Chuvang chuan ania ka tih, i man tlat" fiamthu lek leka Lalberan a tih chuan ka lo ip chawih a, "Keini chhung hi chuan sumdawng hausa tih vel hi chu engah mah hian kan ngailo, sawrkar hna hi kan awn ber, ka fate ho pawh hi thawhtir vek ka duh a mo atan emaw makpa a tan pawh sawrkar hnathawk kher ka duh bawk" awmze nei fêa ka pan a tih chuan Lalbera chu a ngawi ren rawn a "Tunlai chhanah sawrkar hna aichuan sumdawn a hlawk zawk a lawm" a lo ti leh zauh a.

"Hlawk sawm sarih pawh nise keini chhung chuan kan awt lo e" ka pa chuan a lo ti deuh chiam a, "Kei chu mahni hna thawh ka duh zawk, sawrkar hna thawhsak chu ka tum hauhlo midang tana hun leh tha sen hi ka duhloh zawng tak a ni" Lalbera chuan a lo ti ve hmak mai a. 

An boruak chu a sosang dawn tlata ka hriat vangin ka thingpui lum pawh chu so chiang mangloin ka suan a, ka siam zui mawlh mawlh a. Sitting room ka thlenphei laichuan anlo ngawidâk a, ka pa lawmlo hmel chu a rum leh ul tawh mai.

"Chu sawrkar hna chu i hmusit ru riau a nimaw, kei hi sawrkar office ah Secretary hna thawk ka ni a keini chhung chu i mil vak chi kan ni dawnlo anih chú"  mengrum deuh ul chunga ka pa in a tih leh chuan "Ni biklo e, keipawh ka nu leh pa ten sawrkar hna an thawk ve ve a lawm mahse, kei chuan thawh ve tumna ka nei lemlo, mahni kutkawih ngeia dinchhuah ka tum a nupui atan erawh sawrkar hnathawk pawh ka iai chuanglo" ka lam hawia rawn kiai suk paha Lalberan a tih chuan ka pa chu alo rum deuh nghat a "Keini thung chu sawrkar hna thawklo chu kan iai riau a sin" ka pain a tih leh chuan ka nu chuan mitmeiin a lo khap a,  nuisak chunga Lalbera ngawi ngal chu ka va en a a inthlahrunawm duh kher mai.

"I thingpui lum chu a tui hle mai" min rawn nuih pahin a ti a, kan boruak uap churh kara hlim hmel a pu sang reng chuan min ti lawm takzet a ni. Chutih laiin ka pa chuan chîk em em in a lo melh ngar a, Lalbera pawn a hre ru rengin ka ring.

"I damṭha zel a mi Therapy te i la la em?" ka nu in a tih chuan a damṭhat var tawh thuin a lo chhang a. "Eng Therapy maw i lak a?" ka pa in a lo ti ve leh khauh a "Aa..mental lam a nia" a lo ti a sawizui vak a hreh tih ka hriat vangin "I dam ṭha tawh chu a lawmawm emai, damlo chi pawh i ni lo chhungte inngahna ber i ni sia" ka lo ti thuai a, kan boruak thlak tuma ṭawng chhuak ka ni bawk a ka pa chuan engmah lo zawt ve tawhlo sela ka ti takzet a ni.

 

Hlauh ang ngeiin "Tlangvala pumpa rilru lam harsatna han neih mauh mai chu i ruihhlo tih vang a nih dawn chu" a lo ti leh hmiah a, ka va melh nghal hrawk ringawt, "A teh ringawt che chuan" ka nuin a lo ti ve hlak a,  hnuailam biha Lalbera nuisuk chuan enge a ngaihtuah ang ka hrelo a zak viau mai thei a ni.

A rawn hawi chhuak chu ngun deuhin ka lo en a, zak hmel pu miahlo hian  "Zawltling vawnnat an tih ang hi ania" nuisuk chunga ka pa lam hawipahin a ti a  a hawisang deuh vah bawk chu mak ti lek lekin ka lo en a, a hmel ah chuan a uang deuh tlatin ka hre bawk.

"Eng á?" awihloh hmel zeta ka pain a lo tih chuan ka lamah rawn inherin "Vîtei ka ngaih vang ania" a rawn ti leh kher a. Ka pa hmel chu a dur ṭha khup khup ngei mai "Ka rin ang chiah a zahna tla chham i nih hi mawle" a rawn ti chang fawl a chuveleh Lalberan "I rinloh ang deuha zahna thup thei mi pawh ka ni zawk maithei" a lo ti ve leh nghat a, ka nuin min rawn melh zawka a mitmei hmangin engthil emawni hi a rawn sawi mawlh mawlh nimai hian ka hria a awmzia erawh ka hrethiam derlo.

"Mipa si iva dak thei ve mawle" ka pan a tih rualin "Patlingpui si i thu khel aho riau" a lo ti veleh zat a. "Lalber" ka lo ti hap a, ka pa thinrim ân a chhe si chhangzui tawhlo sela ka ti tak zet a ni.

"Thingpui kha i inzo tawh a nih chuan min hawsan mai la a ṭha ang" dinhluai paha ka pan a tih chuan "Tunah ka haw ange" tih pahin a tho tharh a "Ruah a la sur hî" inthlahrung deuha ka lo tih chuan ka lam an rawn hawirual zawt a, "Ka hrilhchian tawh che kha hetiang mipa hi buaipui tlak a nilo, min hmaizahna chhe te pawh a neih hauhloh hi en ta che" tih pahin ka pa chuan thip zetin min rawn melh a. Lalbera hawisang vah chu en pahin  "Haw vang vang rawh" a ti bak leh hluk a, pakhat lahchuan lu a lo buk khum nghat bawk.

"Ka kal ange" Lalberan a rawn tih chuan chhan ngaihna ka hrelo ka sa pup pup mai a ni, a kaltur chu thlah turin ka tho chhuak a "I room ah chho rawh" ka pan a lo tih chuan ka ding leh chawt a, Lalbera pawn lehhawi meuhin min rawn en a "Nang kha haw vat rawh" ka pa in a lo ti leh chuan "Pâ.." beidawng zetin ka ti a, tuna kan awmdan hi a hrehawm tak zet a ni.

"I pa thu awih rawh, thlah ka ngai hleinem" mitmeng damthlupa min en chunga Lalberan a tih chuan thawk ka lo la hak a "Kawngkhar thleng ka lo thlah ang che" ka luhlul chhuah chuan ka ti ta hram a, dar kan ak chunga a inher chu ka zui nghal thuai bawk.

Pen thum vel  ka pen hman awrh ang tih ah ka hnunglam aṭangin ka pa chuan ka samah a rawn ṭham ṭawk a "Min kalh zawnga i han khawsak ziah chu le" tih pahin inchung kailawn lamah min hnuk nghal dawr dawr a ka nu lo rak chul nen inhumruh ṭeuh a Lalberan min lo en chuan ka mittui a hnam nghal ṭiam ṭiam mai.

Tal chhuah tuma ka pa kut ka pawh ṭang ṭang laichuan "A tawk" a rawn ti vin ṭhat a,  kan lampana rawn pen phei hlawk hlawk pahin a pa kut aṭang chuan min pawt sawn dawrh a, ka lu vun a hit nghal mup mup bawk.

"I la rawn inrawlh ngam e law" ti ri ka hriat rualin Lalber bek chu a ri nghal chawrh a, ṭhinrim hmaisen urhin kei leh Lalbera chu min melh zui bawk a ka rilru na lutuk chu ka mittui ka dang theilo. 

"Ka thu i hnial dawn a nih chuan i tlangvalpa kha zui haw rawh" ka pa chuan a ti chang leh khawl mai! 

"A va mak em em ṭhin e aw" ka nu chuan a lo ti hluai a, chutihlaiin ka sam thur rawn tuai mam thuak thuak pahin ka bula mi chuan ngun zetin min en a "Ka kal ange, i chhungte thu awih la keichu ka ṭhat hi" tih pahin min nuihsak a, a mitmengah chuan  lungngaihna thuk tak ka hmu in ka hria.

La awm rih tura chelh ka duh a mahse, ka ngam thlawt silo, kawngkhar lampana a pen phei chu lungchhe zetin ka thlira, zui mai te pawh ka duh rum rum mai. "Tikhan vawikhatmah be leh tawh ngai suh, ka sawi nawn fo dawnlo i ṭhen theilo anih chuan zui la, i chhungte hnena awm i la duh anih chuan ṭhen hmak ang che" ka hnung lama ka pa dingin a rawn tih chuan ka heh ka pet fan fan a, mittui tlingpam chungin choka lam ka pan a ka nu âng hlak hlak ri te chuan ka rilru a ti  na zual ting mai.

Tui khawihna ah chuan ka hmai ka phiha darthlalanga ka mit sen ram ka hmuh chuan thawk ka la leh kawk a; ka tawt awp awp a, chutih lai mek chuan ka nu a lo lut a "Chhungte duhloh zawng ngaihzawn chu kha ti kha a nia, i pa pawh a thiamlo a nangpawh ka thiam chuanglo che, a tir ah kan hrilh sa che a i ṭhen daih tawh ang chu tih hnuah i lo la kawp a i pa zia i hrechiang viau si a nangpawh hi tinge maw i luhlul em em ni" ka nuin a rawn tih chuan chhangloin ka hmai chu tui nen ka tuai nawn sek a, ka ni nghulh a ka viai riai maiin ka hria.

"Nu..hmeichhia hian mahni pa te ang tak mipa an tawng ṭhin an tih hi a dik iti em?" ka ti zuai raih a, ka thilsawi chuan  ka nuih ati za lek lek zawk. Ni e..ka pa ang chiaha chimawm thiam mipa ka hmangaih miau a lawm,  choka a ka pa lo lut mek ka hmuh chuan mit ka la sawn nghalthuai a, dawhkan kila rawn ṭhut pahin "I zirlai bei ngawrh hle ringawt mai rawh chhun lam class kal pawh a ṭul tawhlo, tikhan inlamah in en la a nimai" a ti bul bula, "Class a kal lohin a thiam lo bik anga sin mawle aw?" ka nuin a lo tih chuan "Lo ti teivet suh, ka sawi ang chuan tirawh se" a lo ti ram leh hmuk a.

Chhan pawh chhang loin ngawireng chuan choka ka chhuahsan a, ka roomah chho tlangin khumah ka bawk thlawp a Lalbera ka ngaihtuah zui a In a thleng tawh ngeiin ka ring, ruah a sur nasa si a a huh vek dawn bawk si, a chhuahdawn a min en dan mawlh kha ka ngaihtuah a ka khawngaih tak zet a ni. Ka mittui a rawn far fap a rang takin ka mit ka chhing zui thuai bawk.

Va Call hmasak pawh ka hreh a ni,  enge ka va sawi ang? Ka pain a tihdan vang khan ngaihdam ka va dil ringawt mai dawn a mi, chutianga  ka va ti a nih chuan ka pa chunga rilru put dan tur ka va hrilh a ni ringawt dawn si a.

Engtik laiin ka lo muthilh hman ka hrelo ka phone ri nghawr dar dar ah chuan ka harh a, Lalbera call ka hmuh chuan ka ṭhu chhuak nghal hluai a "I muhil tawh emaw ka tia" zawi raiha a rawn tih chuan "Ka lo nghak che a" ka lo ti var a.

"Zanina ka awmdan vang khan min ngaidam dawnnia" a tih chuan mit ka lo chhing sawka, tinge ngaihdam min dil kher a thiam loh a awm silo, a tir aṭangin ka pa khan chaldelh deuh deuhin a ṭawngkhum fek fek reng kha a nia, a insum zo lo pawh kha ka dem hauhlo a sin mawle.

"A vawt em...ruah i do sia inti lum ṭha rawh aw" ka sawi zawng chuan ka lung a chhe thut a ka aw pawh a lawi rât mai.

"Keichu min ngaihtuah suh nangmah zawk kha inngaihtuah la, i tan ṭha tur ang apiang chu ti ang che, engtin pawh awmla itih ang apiang chu ka pawm vek ang" a rawn tih chuan ka heh ka pet fan fan a "Anih chuan inṭhen i duh thu sawi i tum tihna a mi?" ka ti tham ṭiak a.

"Ka hrelo le, keiin thutlukna siam ka tum hleinem i duh dan sawila engkim i duh angin ka ti ang, engtia awm nge i duh han sawi teh" a tih chuan duhdan sawitur hrelo zetin ka ngawiran a, enge ka duh ber pawh la hrelo.

"Barbie ngun takin ngaihtuah rawh aw, lo hruai tur che a min duh anih pawhin ka ti mai ang, inṭhen i duh zawk a nih pawhin..." a ṭawnglai chu a tawp leh vang vang a, thawk ala ri chu ka hre zawm zat bawk.

"Ka zui che anih chuan ka pain min tuithlar dawn a" ka sawizawng chuan ka hnuk a ulh nghal ṭun mai.

"Anih chuan kan..."

"Ṭhen che chu ka duh miahlo asin" insut hraih chunga ka lo tih chuan a ṭawnglai chu a tawp leh chawt a "Ka ṭhen dawn hleinem che, engtikah mah keichuan ka ṭhen ngailo ang che mahse, hei lo hi kawng dang a awm maithei a sin" a tih chuan "Eng kawng maw?" ka mittui tuai hul thuak pah chuan ka ti  a.

"Min theihnghilh theihnan ka pui ang che" a tih chuan ka bangbo hle a ni.

"Enge ithil sawi chu a awmzia?" ka ti hap a. 

"I rilru dam hun ka nghak thei a lawm, min duhloh chhan tur tamtak i hriat te kha ngaihtuahla i tana ka ṭhat tawklohna te pawh" a sawi lai chuan a ngawi leh vang vang a "Min mamawh hunah i tan ka awm zel ang mahse, hmu tur chein ka lo kal ngailo ang, ka be ngailo che anga. Hetiang hian......... zawi zawi in i thinlung aṭangin ka ral mai ang, chu chu ṭha i ti em?" a rawn tih chuan ka ṭah chhuah lohnan ka heh ka pet fan fan a, ka insut zui hlawp hlawp bawk.

"Ti teh Barbie, ṭah ka phal loh kha...hethil hi i ṭah fo loh zawk nana sawi ka nih hi aw" zangkhai zetin a rawn a ti a. Inruk puia min sawm  ringawt lo a chutiang thu a sawi chuan min ti na zual a ni.

"Ngaihzawng dang i nei dawn a mi?" ka tih chuan "Dawnlo.." a lo ti  vat a, sawitur hrelo chuan kan ngawidun leh vang vang a, thutlukna han siam mai dan tur ka hrelo takzet a ni.

"Inṭhen chu ka duhlo ka pa pawn a rilru a thlak ve leh maithei a sin hneh kan tum anga" ka ti leh sap a, ka rilru tak phei chuan ka ring hauhlo, ka inkawp thu a hre leh a nih chuan min tuithlar duh tak tak hialin ka ring, anih chuan ka inruk tir mai dawn em maw ni le? Mite pawn an ti fo alawm, a tirah an chhungte pawn duhlo viau ṭhin mahse, a hnuah an inpawh leh viau zel tho a nih kha, ka tihtura ka lo ruat chhin ngai miahlo thil chu tunah hian ka ngaihtuah mêk a ni.

"Lo hruai tur che in min duh em?" ka rilru hria niawm takin a rawn ti a, ka ngaihtuahna a buai kher mai. Aw nge aih? Ka chhang anih chuan engthil nge thleng dawn tih chu chiangtakin ka hria, ka rilru a buai takzet a ni.

(End of chapter 15)

*Kan ngawih tlat avanga engkim a fel zawk chang a awm ṭhin*