KA LALBERA (CH 16 - 18)

 CHAPTER - 16

@violette khiangte

"Lo kal tura min duh anih phawt chuan tunah hian ka lo kal nghal ang" a rawn ti nawn leh a, ka rilru a insualbuai nasa tawh kher mai.

Pasal neih maw? Ka lo la ngaihtuah ngai miahlo, pasal neih duhna rilru ka la pu ngailo a tun tut tuta thlutlukna siam chi nipawn ka hrelo, ka ngaihtuah nawn leh ṭhin a Lalbera dinhmun ngaihtuah pawhin inruk ringawt chu kan buaina chinfel dan ṭha ber ni theiin ka hrelo bawk, heilo kawng dang hi a awm ngeitur a ni.

"Mahse, kan innei a ni ringawt dawn a sin" ka tih chuan "Ka nupui tur i ni ka tih kha" a lo ti leh hmiah mai a, a van chhang awlsam tehtawp ṭhin.

"I ngaihtuah tawi em mai Lalber keimah pawh min ngaihtuah teh pasal neithei dinhmunah pawh ka la dinglo, ka zirlai te ruahmanna ka lo neih ve te pawh a tawp vek dawn a sin" ka ti hluai a, duhthlan tur kawng zawh chakawm loh zet zet pahnih inkarah ka ding mekin ka hria.

"Ka chawm dawn che alawm, i career chu ngaihtuah lola min ring tawp mai rawh i tan pasal ṭha tak ka ni ang" damthlupa a rawn tih chuan 'Aw' ti a chhan ka chak takzet a ni. Mahse, ka ti leh pek ṭhin enge maw hian min dal tlat a ni. Pasal neih la ngaihtuah ngai miahlo tan chuan zan khat thilthua thlutlukna siam mai chu ka harsa kher mai.

"Nghak rih ang aw, hmanhmawh deuha thutlukna siam chu a ṭha lo ang" ka ti ta hram a, a ngawi ta vung vung chuan ka ngaih a ti ṭha zanlo a ni.

"Lalber" ka tih chuan "Ummm" that chhe aw zet hian a rawn ti a "Lungawilo suh aw diktak chuan kan pahnih hian kan inzui na pawh a la rei silo a, hetiang tut tut a inruk chu a tihchi ka tilo, kan dinhmunin a zirlo chho zel anih tak leh kan ngaihtuah leh zawk anga, tunah chuan kan inkar hi thuruk angin kan kalpui thei tho a lawm" ka tih chuan "Ṭha i tih ang zel kha a nimai,  lungawilo ngam tur pawh ka nihloh hi" a rawn ti a.

Ka beiseiloh dan deuhin min chhang tlat, kan inbiak zawh hnu chuan ka ngaihtuah zui rauh rauh a, inṭhen kher chu ka duhlo ta hulhual mai, ka chhungte laka ka thup theih chhung chu thuruk anga kalpui ka duh a, lohtheihloh chin a thleng ta anih leh ka inruk tir tawh mai aniang chu mahse, chu erawh tih ngaihna dang a awm ngang tawhlo hunah ni rawh se.

Kar tluanin Class pawh ka kal ngai ta lo a, inlamah in enin ka Room ah ka tawm chawt renga, khawi ilo dawr vela kal pawh ka pan rem a tilo chhunzawm a, a hlimchhawn a lo ni vei bawk nen tihngaihna tak pawh ka hrelo. Lalbera nen erawh kan inbe renga a hun hmandan te pawh min hrilh ṭhin, zanlamah Nsa bulah a tap chawta ngaihtuah a na duh kher mai.

Kar hnih zet hnuah chuan kan inbe khat deuh viau tawh a, ka va biak pawn a ṭhiante bula a awm lai anih loh leh pawn lama a chhuah lai a ni deuh zela reitak kan inbe thei ngailo, a zan chhuak hawin min lo call meuh chuan ka lo muthilhsan leh tawh te emaw a ni ṭhin. 

Kan inkar erawh la ngai rengin lang mahse, kan inhlat ta vawng vawngin ka hria, hmuh ka chaka ka ngai thei viau bawk. Zirtawp zana min lo biak chuan Bike racing na ah a kal thu min rawn hrilh a, zan tin a inkhalh chhuak niberin ka hre tawh a a khawsak dan chu ka lawm zawng a ni hauhlo. 

"I nun dan hi i simlo anih chuan keini chu inneih kan hlat ang" ka lo ti ram hmuk a "Kan inkar tichhe thei zawngin ka awmlo" bung zetin a rawn ti ve thung.

"Anih hetia i awm hian a ṭhat phah a mi?" vin lek lek a ka tih chuan "In a ka awm pawn a ṭhat phah chuang silo a lawm" a lo ti leh mai a, han chhan zui vak ngaihna pawh ka hrelo, "Hetianga i awm zel vang hian a nia zui mai che hi ka hreh em em ni, ka ngaihngamna turin i khawsa silo a, zui che ila ka hmakhua tur ka ngaihtuah hian nangnen hian ka hma hun a thim lutuk" ka ti hap a.

"Engtin maw i sawi?" thawk la hawk chunga a rawn tih chuan a aw ah a lawmlo hle tih ka hre thei, zurui te pawh a ang lek lek lehnghal.

"Zu i lo in lehpek tawh ani maw?" ka ti chang fak a, ka thin a sa nghal phat mai.

"Enteh, engtin nge awmvak sela min tih a hmuh tak ngial pawh ka hmu theilo che a hmuh theihloh ngaihzawng neih reng hi enge a awmzia awm?" a rawn tih chuan ka beiseiloh lam daih a ni.

"Chu ilo inchhir viau tawh a ni maw?" ka tih chuan a ngawi ran a, a ṭawng zui duh lo te hlei hlei chuan minti thinur zual a ni, Tun maiah khan hmuh theihloh ngaihzawng neih chu awmze awmlo tih zawngin min ṭawngkhum a nih kha!

"Anih chuan i hmuh theih kha ngaihzawng nei ta mai che" ka ti leh ngat a, hah hmelzeta thawk la ri chauh chuan min chhawn thung. "Nge ni a ilo nei leh daih tawh zawk" ka tih leh chuan "Ngawi rawh" a rawn ti ram hmuk a, a awki vin lek lek te chuan min run kher mai.

"I nei a nih kha, i neih thu te chu zep loin sawi mai ta che kan tan inṭhen chhan tur chhuanlam dang zawn pawh a ngaihtawh chuanloh hi" thinrim inthunun theilo zet chuan ka ti leh a "Duhtawk teh, hmeichhia chu tam tak an awm ṭhin mahse, ngaihzawng nghet ka nei tih tupawn an hria, ka kut hmawr pawn ka tawk ngailo, kan inkar ti chhe thei zawngin ka awm ngailo tih ka hrilh tawh che kha i ngaihtuahna chhe zet kha paihbo rawh" a rawn tih chuan ka lo inpetruh nasa mai a. 

"Zantin hmeichhe zingah ilo chhuak ṭhin a maw" rapthlak tih hmel fe hian ka lo zawt a "Ti teh suh khai..." chek hlak paha a rawn tih te chuan ka tawt up up tawh.

"Khatiang vang kha a lawm inneih ka ngaihtuah ngamloh, i nun dan hi....." ka sawi zawng te chuan ka hnuk a ulh ṭun a, ka sawizawm mai theilo kan inkar kaltlangpui zel pawh a harsat tawh tehlul nen ho lam taka a nun a hmang zel anih chuan engtin nge kan inkar hi ni ve ang.

"Min ring chhe lutuka a hahthlak emai" a ti hluai a, "Rin ngam turin i awm silo a lawm" ka lo ti ve thung.

"Anih engtin nge ka awm?"

"Enge kei min zawh, ka hmu thei hleinem che i awmdan te chu i hre zawk ang chu" ka lo ti vin hlar a.

"Chu reng...ka awmdan hreloin min ringhlel ringawt tawh suh, i tan ka rinawm lutuk tlat" nui deuh chunga a rawn tih chuan "Hmuh theihloh ngaihzawn i duhloh thu i sawi zawh chiah kha" ka lo ti a. "Huiha...." a rawn ti leh hluai a, ṭawng leh ka tum laitak chuan thawm a rawn ri nak nak a, hmeichhe ṭhenkhat nui awr awr ri te pawh ka hre thei.

"Tunah khan khawiah nge i awm? " ka ti chang fak a, "World bank road ah" a rawn tih chuan "Tu te nen nge inkal pawh ka hre lo e" ka lo ti vin hlar a.

"Nsa nen kan chhuak tih ka sawi tawh kha, hmeichhia ka hruailo engatan mah ka tilo bawk, nelawm loh lutuk" tih leh call chu tih tawp a rual a, min ti hamhaih kher mai. Ka thin tawt lutuk chuan min hnawh urh a ka ṭah a chhuak hle bawk.

A lakah lawmlo hle mahila ka ngaihtuahlo theilo, tunah hian innei niin nupa nita ila hetianga hian zantin amah ngaihtuah reng renga awm ngai dawn ta sela, tu nen nge an chhuah? Khawi ah nge a awm? Enge a tih? chutiang ngaihtuah reng renga hun hman angai anih hlauh chuan ka chantur chu ka hrechiang hle a ni. 

Ka bialpa ka duh ngawih ngawih hi pasal atan ka iai tihna em ni?!

Inṭhen ka ngaihtuahna ah a langlo theilo, ṭhen phallo eng ang mahila pasal atan em ka iai lehsi anih chuan kan inlaichinna vawn nun reng hian enge  sawngsawhlawtna a neih ang le? Ka rilru a buai takzet a ni.

Ka muhil chu phone ri in min rawn ti harh a Lalbera a ni, sana ka en a zinglam dar 2 a ri thuak tawh a, mengchiang manglo chuan call chu ka chhang a tumah ṭawng ri a awmlo, thawm a ri ṭuk ṭuka Bike tlan ri vawk vawk thawm ni maiin ka hria, a kekawr ipte velah a ak anga alo indelh call palh anih ka ring.

Dah leh ka tum laitak chuan hmeichhe aw ruih hmelzet hian "Tah sawn ka lo chhuk ang" a tih ri ka hria a "Sir lam kha hawi rawh min luak khum ange" vin fahrana Lalberan a tih ri chu ka hre nghal zat bawk. "Hello..." ka ti nawn leh a Bike tlan ri leh a ding ri hrawih ri bak hriat tur a awm lo.

"Laltekheuh chhukvat ta che" Malsawmhlua aw chu ka hrechiang ngang mai, "Ka chhuk dawn reng" hmeichhia chuan a lo ti vin hlar a, kei erawh ka awm hmunah ka lo inpetruh ṭeuh thung.

"Naktuk chu minlo sawm la" nulain a tih chuan "I duhthusam leng thlawk kual vel a nih chu" nui hak chungin Malsawmhluan a ti a, an inhuatloh hmel kher mai "Ka lo nghak tho ang che, ka ring dawn che a nia" hmeichhia in a tih chuan a chhang ri ka hre pha tawhlo, Bike a rum vung vunga phone aṭang chuan a ri chu a chher hle bawk. Bike tlan ri ngaithla a ka phone ka hum laichuan ka mittui a lo hnam ṭiam ṭiam a, zep tur a awmlo min phatsan a ni tih hi ka hria a ni.

Phone chu ka ngaithla ta renga minute 20 dawn chu chutiang chuan ka ngaithla a, chutih chhung zawng chuan hrehawmna hlirin ka khat a ni, Bike thawm a reh a engemaw ri deuh rawk rawk ka hre nghal a an In a thleng tawh a ni ngei ang khawngkhar khar ri in a zui zat bawk.

"E khai âw!!...." tih ri ka hriat rualin call chu a tawp ta hmiah a.

Tukverh darthlalang aṭanga nizung lo lut chuan ka hmai a rawn chhun a, ka lu na ngut ngut bawk si nen ka meng chhuak hleitheilo, meng mangloin Bathroom lam ka pan a, ka hmai ka phih zawh a darthlalanga ka in en chu ka mit a bui in ka mit hnuaiah Dark Circle a lo val kual raih bawk. Ka pawhdawha nachhawkna chu ka hmawm te te a, ka khum ka siam leh zet hnuah inhnuai lamah ka chhukthla a, ka nu eirawng bawlna bulah chuan phak fêin ka va ṭhu tau bur a, ka mit leh bek bawr vel na lutuk chuan min tur ut ut reng mai. 

"Ka kawng a nuamsamlo emai, nangmah va bazar teh" ka nuin a tih chuan phur lo tak ka ni, nidang nisela ka han phur dawn tehlul nen a.

Tukṭhuan eikhama ka insiam laichuan Lalbera phone call a lo lut a, ka melh renga lak pawh ka tum chuanglo, tun dinhmunah hian biak chakna ka nei hlawllo a ni. A ri nawn tluk tluk a ngaihsak loin thildang ka tihsan mawlh mawlh thung.

Ahnuah chuan message a lo thlenga "Tinge i biak theihloh message i hmuh veleh min lo call teh" tih a ni a, ner sawk chungin phone chu ka dah a, va biak chu ka tum hauhlo ngaihtuah zawng ringawt pawhin nizan thil khan ka awmchhung a la vilh ngut ngut thei mai.

Chawhmeh ka bazar zawhah Lehkhabu dawrah ka kal a Discount awmlo mahse, pahnih chu ka lei ta hram a, Dodo-a thil min chah zawnga ka kal leh tur chu J.mala nen kan intawk hlawla tunge anih hrelo a kalpelh ka tum chu min lo pawt let lehlo sela chuan ka hrelo chiang ngawt ta ve ang.

"I va bazar nasa ve a?" nuisang chungin a ti a, "Nia inrinni hi chu.." tihpahin ka lo nuihsak a.

"Nangmahin a mi?" 

"Umm...nang zawk?" ka lo ti var a, a lu a bu nghat a "Kan inṭhen a" nuihui chunga a tih chuan "ohh..." ka lo ti hap a, chhan dan tur ka bangbo riau mai 'Tinge?' han tih chi ni pawhin ka hrelo. "A zialo hle mai" ṭhensak chunga ka tih chuan a lo nui mai a.

"Thingpui in teh ang?" a tih tlat vangin kan bul maia Thingpui dawrah chuan kan inzuiluta, eitur a chaha a bula awm a nuamin a dam dup maia Khawbung a Accident ka tawh ṭuma min ṭanpuitu alo ni kher nen J.mala hi chu engemaw zawng tak hian ka ngaina a ka ngaisang bawk. "I damlo em ni?" chîk zeta min en paha a rawn tih chuan ka lu ka thing vat a "Ka tho nuamlo satliah mai mai mawle" ka lo ti thuai a.

"Kan Lalbera chu aṭha zel maw? Hmanni ah an inah ka kala a lo awmlo a" a tih chuan "A ṭha khawp anih chu" ka lo ti hlak a, a nuih a za kher mai.

"I ṭhiannu te pawh nau an nei leh dawna nupui duat thiama pawh a chhuahpui leh hleihtheih tawh loh" nuisang chunga a tih chuan ka lo nui haka, Gabriela ang vek hi mipa te hi han ni hlawm sela ṭha tur, kan Lalbera ve lah hi.....

Thil kan eizawh chuan ka thil lei te chu min khai chhuahpui a "Khawi ka lo khai tawh ang" ka tih chuan "Taxi stand thleng ka lo khai ang" a ti tlata, ka laksak a phal hauhlo. "Remchangah chaw la eikhawm teh ang u, lung tepawh a leng alawm" a tih chuan "Ni e..kan la ti dawn nia" ka lo ti var a. Taxi stand kan thlenphei hma a min tawk zawnga Bike lo tlan vang chuan ka ding dat a, min hmu emaw tiin ka lo en vat bawk.

Min hmu hauhlo, chak deuhin min tlanpela a hnungah hmeichhe samsei hniang mai hi a phur bawka, amah ngei a ni tih lah phatrual a nilo "Malsawmhlua a nih khâ" ka bula mi chuan a lo ti ve chiah bawk a, ka chawmawlh zo vek maiin ka hria ka sa pup pup a ka awmdan chu a dik hauhlo mai! 

"Tu nge a phurh kha i hriat zawng a ni em?" J.Malan a rawn tih chuan lu ka lo thing a, kha hmeichhia kha ka la hmuhawm ka hre miahlo a rindan erawh ka nei, tu pawh chu lo ni tehreng se nizana a hmeichhe phurhchhuah kha a nih ngei ka ring, nizanah pawh khan hmeichhia khan "Naktuk chu min lo sawm la" a tih tak kha mawle.

Ngaih ti ṭhalo duh suh, amah kha zawt chiang phawt la" J-a chuan a lo ti a "Engmah ngaihṭhatloh chhan tur a awm hleinem, a ṭhian emaw a chhungte emaw a nih ka ring" nuisang chunga ka lo ti chu a hmelah a awih chiahlo tih a hriat theih a, engmah phei chu a sawizui hranlo.

"Anih ka kal ange aw, nidangah kan la inhmu leh dawn nia" tiin Taxi ah chuan ka luhsan a, kan tlanchhuak chu ka ngaihtuahna a vakkual leh nasa viau tawh, ka phone la chhuakin a Message ka chhanloh ho te chu ka enkual a, Message chu a Phone call ka lak loh vanga a lungawiloh thu deuh hlir a ni. Ka call zuia a la thei hauhlo Bike a la khalh anih ka ring.

In ka thlen hnu chuan vawithum lai ka call leh a, ala chhan theihloh cheu vangin eirawng ka bawl san a. Ka ngaihtuah nasat poh leh ka lungawilo zual ting mai. Ngaihzawng dang neia min kawp tur em chuan ka ring phal tak taklo mahse, he ti chung hian ka ringhlel reng thung lawia, keimah ngei pawh hi ka inhrethiam tawhlo a ni.

Ka phone ka enreng laichuan a rawn ri a ka la rang kher mai "Tinge i biaktheih miahloh?" a rawn ti vin nghal hluk a, min rawn thinrim khalh hlauh nia!

"Eh...nangpawh vawi engzah nge ka lo call che?" ka tih chuan "Vawi li lek" a rawn ti awlsam leh et a. Huhh...Bazara min rawn tlanpelh laikhan min lo hmu ve miahlo anih ka ring. "Tunah khan enge i tih a In ah i awm em?" awki panngai  zawk chuan ka ti ta a, kan indawp ṭan leh ta der mai.

"Tun dinhmunah hian maw?" a rawn ti leh kher chu ngaitheilo zetin ka lo chek hlak a "Tun dinhmun anih lohin Malsawmhlu tunhma dinhmun ka zawt dawn che a mi?" ka lo ti vin hlar a.

"Karei leh! Dragon heart-i" a tih ri chu zawi viau mahse ka hre pha tho. Ka thinrimna thup ka tum tehlul nen min rawn cho chhuak leh nge nge ṭhin.

"Ka chhuak lawka" a rawn tih chuan thawk ka lo la hak a, hepa hi Inah a awm ngai mang pawhin ka hrelo, ka biak apiang hian ka chhuak lawk a ti thei ziah mai, a mutlai chiahin Inah a awm ṭhin a nih ka ring hial tawh.

"Khawiah maw i chhuah?" lawmlo awka zetin ka ti a "Johana te inah ka kal lawk" a tih chuan awih tur nge awihloh tur ka hrethiamlo, hmeichhia nena an inphur lai ka hmuh kha sawichhuah law law zawk tur em maw ni?

"Nangmahin  a mi?" ka tih leh chuan "Aw....ka haw lamah ka lo tlawhkawi ang che kawtah lo awmla, thil pek tur che ka nei a" awki zangkhai vahin a rawn ti a,  sawi ngaihna pawh ka hrelo chhungril aṭangin min rawn hnawh tawt up up a; ka awmdan chu a hrehawm vel vek a ni ber e.

"Hmeichhia nen inchhuak dun miahlo maw?" ka hmu tih la sawifak duhlo chuan ka han ti leh a "Dun lo" rangzetin a rawn ti a. A ṭha e, he thil hi hmaichhanah kan sawidun ngei angai anih hi, nizan chung chang te pawh a sawifiah ngei chu a ngai ang.

"I lo kal dawnah minlo hrilh la kâwnah ka lo chhuak phei ang" tiin kan inbiakna chu ka titawp zui a, chumi hnu chuan hmanhmawh deuhin eirawng ka bawl zung zunga, min lo call leh lai chuan ka lo inbawl zo diam tawh a "Ka lo chhuak dawn chiah" a rawn tih vang chuan ka thawmhnaw  ka thlak sawk sawk a ka nu dawrah chhukin kâwnah thil ṭhenkhat Xerox ngai ka neih thu ka hrilh a hmanhmawh takin kâwn lam chu ka pan zui a, ka va thlen chuan a lola thleng biklo.

Waiting shed ah chuan ṭhuin ka nghak ta ran a a rei phian mai, engemaw chen chu ka phone khawih pahin ka ṭhu ta ngar ngar a, ka hawi chhuah leh laichuan kan In lampana ka pa Motor tlan liam chiah ka va hmu a, a lo thlen hmaa ka chhuak hman hlauh chu a tihzia kher mai, chuti nilo sela chuan ka kalna tur min zawt chîk leh khawp ang chu. Lalbera chu ka call nawn leh a a laktheih loh vangin a lo tlan mek a nih ka ring.

"Barbie.." tihri ka hriat chuan ka hawi chhuak vat a, ka chân lohna lam aṭangin a rawn kal daih mai, a Bike a hung ṭha te te a enge maw khai chungin a rawn pheia a lampanin ka kal ve nghalthuai bawk.

"Johana te inah ka kal i ti emaw ka tia" ka lo tih chuan "Nsa ka ti zawk lo maw?" nur zeta min en chungin a ti a, hepa hian engtia tam nge dawt min hrilh a tum le!

"A bengchheng emai hmun fal deuhah inbe teh ang" a Bike dahna lama nam lêt pah chuan ka ti a "Khawiah nge niang?" nuisanga min en chunga a tih chuan chhangloin ka melh ngar a, inthlahrun hmel zetin a Bike a tinunga a inthlahrung hmel te hlei hlei chu a rinhlelawm zualin ka hria.

Khawpawn lampanin a tlan a World bank road lama a tlan lai chuan duhaiin kan kal thui ka ti mah mah tawh. "Kal tumna sa i neihloh chuan remchang laiah khan ding mai la" a dara ben dat pah chuan ka ti a, reilo teah thingin lian vaklo awmna kawt kan thlenga chutah chuan dingin In te kawtah chuan ka chhuk a, a hmun chu a reh ṭha kher mai Motor veivak takngial pawh hmuhtur a awmlo.

Ka lampana a rawn kallai chuan a thil khai chu ka lo melh zawka chuveleh "I ta tur" tih pahin a rawn lek kang a, ngawi reng chuan ka lo la ve mai a a chhung ka en chuan hmai hnawih chi hrang hrang leh Perfume a lo awm a, a thilpek min pek hun kher kher chu ka ngei rum rum mai, tun hunah ber kher inhauhpui hrep ka tumlai meka thilpek min pe chu a lawmawm dan a fumfe theilo a ni.

"Thil sawi duh ka nei a" tih leh thilkhai chu a kuta hmehbel ka ruala "Sawi la" awlsam zeta tih pahin ka bulah chuan a rawn ding hnai a, a hmel hlim sarh chuan awm a ti nuamlo viau bawk.

Ngun zetin a hmel chu ka en a, chutihlaiin nuihza insum hmel lek lek hian min lo en ve thung a "Ngaihzawng dang i nei a mi a?" ka tih rualin a lo nui chhuak hawk mai!

"No no...."lu thin vut vut paha a tih chuan "Fiamthu ka thawhlo ania" ka lo ti hlak a, ka thu tak em em laia a lo uang chu ka lawm hauhlo. "Awle, ngaihzawng dang ka neilo, ka neih chhun liau liau i ni e" ka sam rawn chul thuak pahin a ti a, a la nui cheu mai!

"Vawina i hmeichhe phurh kha tunge a?" chiang kek kawka melh chung chuan ka ti ta nghat a, "Vawinah hmeichhia ka phur em ni?" a rawn tih chuan ka lo sa phat mai, hepa hian dawt min hrilh a la tum ngar ngar anih hmel.

"Bazar a inlo inphur kha ka hmu che u" ka tih chuan ka meng tal tap a "Tunge ka phurh?" a la rawn ti ngam cheu nia?

"Enge kei mi zawh i phurh a nia i hre zawk ang chu?" ka tih chuan mak tih hmelzet hian a inngaihtuah vung vunga chutah ka lam rawn hawi lehin "Min hmusual a nilo maw?" a la rawn ti tak deuh deuh a, ka thil hmuh ah ka chiang a ka hmusual hauhlo bawk, a insawithiam dawn tih chu ka rinlawk a nia mahse, hetiang kher kher a  a phat hi chu ka lo beisei hauhlo.

"Ka hmusual lo che, ka mit hi chutiang khawpa chhia chu a ni tawhlo aw" vin lek leka ka tihchuan thawk a la hawk a "Barbie tinge tiang hian i awm reng le, hmeichhe dang ka mamawhlo ka tih kha keichuan nupuiah nei che ka duh...." a sawilai mek chu lo pawt chatin "I duhthusam leng thlawk kual vel a nih chu" ka lo ti hlak a, a meng rang ralh chu ka hmuh hmaih lo, a ṭawngkam hman ngei ka sawi chu a hrechhuak te pawh a ni mahna.

"Enge maw i hriat le?" mitko san aka min en pahin a ti a, "Nizanah dar engzat ah nge i haw?" ka tih chuan a lu a tuai leh vut a "Min chhang rawh" ring zeta ka tih rualin "Ka hrelo" a aia ring mah hian a rawn ti a, min ti phu nasa em em lehnghal!

Awm dawm meuha en chungin "A ṭha e, zawh duh che engmah ka nei tawh lo e" ka ti ta hmak a.

"Haw ang" tih leh pahin a Bike dinna lam chu ka pan a, che changlo a a ding reng chu rum zetin ka va melh a "Lo kal ta che" ka tih chuan phur loh hmel zetin a rawn kal a "Ka thil leisak che hi ila dawn lo a mi?" a rawn tih chuan lehlam ka hawisan thuai a, eng rilru nge a put ni tun hi thilpek in pek hun pawh a nilo a awmdan hian min ti hah a min ti beidawng hle bawk.

"Ti nge ka lakah hian i lungawiloh reng mai le?" thawk la hak chunga a rawn tih te chuan ṭah khum vak mai tur em mawni ka ti rum rum mai.

"Engmah a nilo haw tawh ang" ka ti zawi sap a, ka thinrimna chu thunun hram hram ka tum bawk, hepa thinrim khum hi thil awmze neilo mai mai a ni.

"Lungawi phawt la kan haw dawn nia" hnunglam aṭanga min rawn kuah pah chuan a ti a, ka ti hleithei meuh tawhlo insawifiah chu khawilam a hrelo der hmak duh a nia, engkim hre vek si a lungawi chu tu hmeichhia in nge thei tehlul ang!

"Haw tawh ang a tlai tawh" min kuahna aṭanga tal chhuah pah chuan ka ti a, "Duati..." tih paha minla rawn ban chu a kut ka lo man chawt a "Inṭhen teh ang" ka ti chhuak ta hlawl mai.

"Engvangin maw?" zawhna mitmenga min en chunga a tih chuan "Inṭhen ka duh" ka lo ti leh hmiah a. Enge maw sawi tumin a ang zuau a chutah a lu tuaivutin lawmloh hmel fahran hian min rawn melh a, "Engvangin nge inṭhen chu i duh?" a ti chang bul a.

"Ka tuar thei tawhlo, nang nen hian kan inmillo a nih hi" ka tih laichuan a hmel chu a rum tawh kher mai. "Chutiang engmah ka hrelo, enge i lungawiloh chhan chu tlang takin sawi rawh" inhumruh ṭeuh chungin a ti a.

"A ṭha e, sawi vek kher tura min phut a nih phawt chuan ka sawi ang, nanghi ka duh tawhlo che, nang ang mipa hi ka duhzawng i ni ngailo hrim hrim, rui a fawr kual reng ṭhin hi ka duh lo a, dawt sawi hrat pawh ka duh lo, a bik takin mi lerh leh rinawmlo hi ka hua chuvang chuan inṭhen vat ka duh" thinrim a vanga thaw sak sak chung chuan ka ti a, chutih laiin rapthlak tih hmelzetin min lo en reng thung.

"I hria maw?" ka tih leh nghek rual chuan a che vut a, min hnung chhawna  a Bike a lawn chu ka en zui a, engmah a sawilo te chuan min run kher mai, thinrim engphiara inṭhen thu ka sawi laiin engtin nge a ngawih mai mai thei zawk, engah mah min ngailo tak zet tih chu a lantir chiang hle a ni.

"Lo chuang rawh" damthlupa a tih chuan ka la ding ngawi reng a, "Ka thinrim ve lo, lo chuang rawh le" tih paha a nuisuk te chuan min ti na vawng vawng mai.

Muangchangin a Bike hnungah chuan ka lawn a, amah hlat thei ang berah ka ṭhu bawk, ka lamah rawn thle hnaiin "Barbie.." a rawn ti a, amah en loin kawngthlang lam ka hawisan vat a, "Lo ṭhu hnai rawh" a rawn tih pawh chuan ka che sawn chuang  eihlo.

"I duhloh zawngin ka awm tawh dawnlo aw, a ṭha em?" nuichunga a rawn tih leh chuan ka thaw a ipik hluah hluah a, chhan pawh ka chhang buai pheih tawhlo. Inṭhen thu ka sawi tawh a, nem leh vat tura kha thu kha sawichhuak ka nilo bawk.

Seat hnungah chuan ka invuan bet ṭanga, ṭha te te in a tlan chhuak  mai dawn emaw ka tih laiin a ding leh dawt a  chuveleh a hnungah chuan ka bei nghal thlawp bawk. Chak zetin a tlanchhuak zuia ka chêt ngam tawh miauloh vang chuan a Leather jacket  chu ka vuan ṭai a, a Helmet chhungah chuan anui vur vur in a nia ka rin ni.

Kan kawt kan thlen hma deuh chuan a ding a, rang lutuka ṭum thla nghalin a Helmet a phel lai mek chuan ka kalsan hmawk hmawk a, ka hnunglam a ṭanga min rawn auh zui chu hrelo ang hlauhin ka ngaihsak duhlo zui bawk.

 Ṭhen turin amah ka râwn kher ngaiin ka hre tawhlo, ka sawi tawh a tikhan kha kha kan tawp na chu ni mai, a lam ka hawi tawhlo anga ama sawidan taka ka rilru leh ngaihtuahna a la cham te hi chu zawi zawiin a ral riai riai mai ang.

*CHAPTER - 17*

*Ezra - Pov*

In ka thlen chuan pawnah ka nu leh ka u an lo awma "Enga tinge nangmah chiaha i lo haw a?" ka Bike ka hun ṭhat lai meka ka nuin a lo ti chuan "Tinge a?" ka lo ti let haw a.

"Tekheuh-in Ezra rualin ka lo phei ang a ti sia i rawn lam kawi leh dawn emaw kan lo tia" Ka U-in a lo tih chuan ka hrechhuak zawk mai, Tekheuhi nen kan chhuak dun tih ka lo theihnghilh hmin der a ni.

"Ka va lam leh nghal ange" ka tih chuan "Lam tawhlo law law mai rawh Taxi lo hmang turin kan hrilh mai ange" ka nu-in a lo ti vat a, engtin nge maw ka theihnghilh theihni a interview zawh hun tur pawh dar 2 daih tawh kha a nia, min hmuh hun chu a sa khawp ang le.

"Ka la hmu ve reng reng hleinem, nizan chu i nghak rei viau lo maw?" Ka U-in a tih chuan "Dar 2 velah an lo thleng" ka lo ti a. Kawngkhar lampana ka kal lai chuan "Motor a rui nasa em?" a rawn tih leh vang chuan ka ding dat a "Ka hrelo a rui a niang a zawi emai" tih pahin ka luhsan a.

Tekheuh-i chu ka Patea fanu Guwahati a awm a ni a, hna interview tura lo zin chho lawk niin nizan zan reiah an rawn thlen vangin ka nuin ka leng min rawn Phone a ka va lam chuk chuk kha a nia, zanin tlai hian kan ina chaw lo eitur a ni nghe nghe, tette aṭanga Guwahati awm leh seilian a ni a, Aizawl khaw chhung a hre chianglo a, va lam tur ka nih laiin ka lo theihnghilh daih pek a ni.

"Bawiha, Aruati hi i va dah dawn nge an lo lam dawn?" inchhung ka luh ruala ka pa-in a lo tih chuan "Ka hrelo" ka lo ti leh ngawta, "Anu kha bia la han zawt teh" a lo tih leh chuan "Ka nu biak tir rawh" tih leh inchung lama chhoh ka rual a, ka ngaihtuahna buai nuai nuai chuan min ti chawmawlh zo vek mai.

Ka room ah lutin thawmhnaw pawh thlak tawhlo chuan khumah ka letthla hnawk a  vawin chu ka chau takzet a ni. Ka lu na ngut ngut vang chuan nachhawkna ka hmawm vat a, hetiang anih chuan zanin chu ka chhuak peih hauhlo ang.

Inhnuaia ka chhuk leh chuan Dintei te unauin chawiei an lo siam mek a "Ka duatte u chaw ka ei dawnlo a nia" ka tih chuan phawk zetin min lo en a "Ti nge Nu Siamtein i chawhmeh duh chi hlir a siam a sin" Mite-in a lo tih chuan "Nakinah ka ei mai dawn nia, ka mu dawn a Nsa a lo kal chuan a muhil tawh lo ti mai rawh u" ka ti a, inchung lama chhoh ka tum laimekin ka nu leh Tekheuhi an lo inzuiluta "Malsawmhlu min rawn lam leh dawn emaw tih a, minti mangang lutuk" rum fêa min melh paha Tekheuh-in a tih chuan ka lo nuih a, rawn kal phei pahin ka lu ah min rawn beng nghal lawlh mai.

"Ee...Tê-i lu ah in ben ṭhin loh tur" ka U-in a lo tih chuan "Nidawn tak" tih pahin ka hnungzangah min rawn beng leh dawp a, hmeichhia si a kut thlak ana zek lehnghal. "Chaw ka eidawnlo a, Nsa a lo kal chuan ka muhil tawh tih lo hrilh rawh u" Dintei lamhawi chuan ka ti a, "Umam i sawi zo chiah a lawm" nuisanga a lo tih chuan ka hrechhuak leh hnuhnawha, "Nitak ka sawi tawh tak e" tih pahin inchhunglam ka pana "I damdawi kha ei theihnghilh suh" ka nuin a lo tih chuan ka ban ka vai zauh a, damdawi ei tih ang reng hi ka kham riau tawh a ni, paih ru zel lo ila chuan eizo vek tawh tur ka ni zawk a.

Ka mu fel chiah tiha Ns-an min lo call a, chhuah puiah min rawn sawm a tum tih ka hriat lawk avangin ka chhang duhlo a, inbual turin Bath roomah ka luhsana engtia rei nge ka inbual ka hrelo, ka thiltih a piang hi ka theihnghilh remrum vek mai.

Bathroom aṭanga ka chhuah leh chuan ka khuma hmeichhe hmaihnawih lo let phung chu phawk zetin ka en a, a ngaihna ka hre hauhlo, engvanga hmeichhe thil hi ka room a chhar ziah nge maw ka nih le? 

"Heng thil hi tunge ka room ah lo dah a?" ka chhungte chaw ei laia ka zuk tih chuan phawk zetin ka lam an rawn hawi ṭhap a, "Enge a ?" tiin ka nuin a lo ban thuai a.

"Awi ha...Estee lauder product hlir a nih hi" tihpahin Tekheuh-in a lo ban vat a "I ta a mi, min pe ve teh hetiang te chu kan hmang pha ve reng reng hleinem" tih paha min rawn en chuan ka lu ka lo thinga "Ka ta a ni lo" ka tih chuan a ngaihna an hriatloh hmel hlawm kher mai.

"I lei a nilo maw vawinah kan Join account aṭangin pawisa i la chhuaka engatan nge i hman?" ka U-in a lo tih chuan ka rilru a buai leh nak tawh, "Engvangin nge hmaihnawih leinan pawisa ka hman tehngawt ang" ka lo ti hluk a, ATM ah kalin pawisa ka la ngei chuan ka hria a mahse, ka hman lai awm reng reng ka hrelo.

"Umam tukinah hmeichhe hmaihnawih ṭha ber chi min zawh kha" Mite-in a lo tih chuan an vai chuan min rawn en haw hlawma "Anih chuan ka lei anih dawn chu" tih leh Tekheuhi kut aṭanga pawh thlak ka rual a.

"Hei...Malsawmhlu pakhat tal kha min pe ve teh" a rawn tih chuan hawilet loin inchunglam ka pansan a, keihi ka â tawh a nih hi hmeichhe hmaihnawih ber kher enga tan ngemaw ka lei ni! 

Khumah ṭhuin ka thil khai lai chu ka bun chhuak a, a man lah chu a to hlawm zek a, ka tana ka lei chu a nilo phawt ang, Barbie tana ka lei em mawni dawn ni? 

Ka call a a ring rei kher mai, vawi thum ngawt ka call ṭhat hnuah a rawn chhang a "Enge lehkha ka chhiar a nia" vin lek lek hian a rawn ti a "Vawinah thil ka leisak che a, hei ka pek theihnghilh daih che a nih hmel" ka tih chuan a ngawi reng a, "Barbie" ka tih leh chuan "Engmah ka duhlo, anih phawt" tih leh phone dah a rual a, engemaw a hriat chu le? Ka thil leisak pawh ka la sawi hman hauhlo lehnghal.

Call nawn leh ka tum laitakin Ns-an a rawn call leh a, hepa hi a pehhel leh theih dawn hauhloh mai, call ka chhan rualin "Ṭhianpa Hruaisanga te ṭhianho nen kan inti buaia an pawr khawp mai hei, Racing ah pawh i hnehloh thu te a sawi zuah zuah hi, engtin nge ni dawn?" a rawn ti nghal  zung zunga, ka thin a lo sa phat mai Hruaisanga ber kher laka tlawm hi chu ka ti thei ṭhaklo, chak zawk anga alo inngai ringawt pawh chuan minti thinur tawk viau a ni.

"Ka lo kal ang" tihpahin call chu ka titawp a, ka insiam nghal sawk sawk a, inhnuaia ka chhuk chu "Khawnge kal i tum a?" ka pa in a lo ti a, "Saw tah..." ti ringawtin ka chhang a, banga ka Helmet khai ka ban nghalthuai bawk. "Haw harsuh aw, i ngaihtuahawm ṭhin emai" ka pi in a tih chuan ka lo bu nghat a.

"Apa khawiah nge i kal dawn?" tih ri ka hriat chuan kal mai tuma ka inher chu ka ding leh chawt a "Tinge hetah a la awm a, a nu phone ta che u" ka ti hluai a, hmeichhe naupang lungleng hi tinge maw an kawl luih tlat ni?

"Zingah lo dah mai rawh u an tia lawm" ka nuin a tih chuan ngun zeta min lo en tu samkir te chu ka en a, a mitmeng lian kiau chuan min ti zam lek lek thei mai. 

"Khawiah maw i kal dawn?" ka U-in a lo tih chuan "Kan insual lawk dawn" tih leh tlan chhuah ka rual a "Malsawm..." ring fê a ka nuin a rawn tih ri chu ngaipawimawh loin kawtah chuan ka pen phei hlawk hlawk a, ka Bike a ka lawn ruala "Rawn haw tlai hlek suh" a rawn tih chuan ka lo nuihsang a a haw leh mai mai teh ang chu.

Tlan pahin Nsa ka call a, a awmna hmun a sawi lampan chuan chak fein chu lam chu ka pan a, ka helhhawlh riau mai bawk. Barbie te inzawn ka thlen chuan ka ding data, Balcony ah a zimar ṭalh ṭalh ka han hmufuh chat mai, a rawn hawithla chu ban ka lo vai zauh a ngawi rengin min en a a lawmloh hmel viau bawk.

Ka call a a phone chu en in a rawn hawithla leh a, a chhang mai dawn emaw ka tihlaiin inchhungah a lut ta daih a, ka ngaihdan a ni hauhlo mai, ka Bike chu kawngsirah chuan hung ṭha tetein ka call nawn leh ngat a, alak rualin "Lo chhuak teh" ka lo ti vin hluk a, thawk a la hawk ri chu ka hrechiang hle bawk.

"Eng ti khan sawi rawh" a rawn tih chuan "Lo chhuk lawk teh" zaidam deuh zawk chuan ka han ti a "Ka hmu peihlo che i kal tumna ah khan kal mai mai teh" a rawn tih chuan ka lo ner sawk a, helai chen chen amah hmu turin ka kal a, chutiang mai maia min lo chhang chu ka lawm hauhlo.

"I lo chhuk duhloh chuan ka lo chho mai ang" tih leh call chu dah ka rual a. An step a pen chhoh rual chiahin a rawn call a "Lo awm rawh ka lo chhuk dawn" chang fek fawk hian a rawn ti a, ka lo nuisuk thung.

An dawr kawt ah chuan ka ding ran a, stepa rawn pen thla hlak hlak thawm ka hriat chuan ka hawivata, min rawn hmu chu tum bur chungin ka lam a rawn pan a "I inla value a mi?" ka lo ti chu rum zetin min melh a "I sawi duh chu sawila kal leh nghal rawh" a ti vin hlak a.

"Enge ka tih?" ka tih chuan phawk zetin min en a "Ka sawi zawk chu enge i lungawiloh chhan?" ka ti ṭha leh a, ner sawk chunga lehlam a hawi chu kuah mai tumin ka ban a a duhlo nasa mai.

"Enteh, min chhaih kual mai mai suh aw ka thin i tihrim zual hma hian kal vat zawk rawh" min melh rum kha kha chungin a ti a, a han mengrum vel chu a hmelṭha ngang mai. Tunah hian a hmuiah fawha kuah ka chak hle bawk.

"I lungawiloh chhan chu sawi la, kan sawifel phawt lohchuan ka haw lo ang" ka tih chuan min la melhrum cheu a..

"Dawt sawiloin min chhang ang che?" hmai zangthal haw a min en chunga a tih chuan ka lo bu nghata. 

"Ngaihzawng i nei em?"

"Umm" ka lo ti chu a meng phar awk a "Nangmah" ka tih leh chuan a tum nghal hmuk thung.

"Vawina i hmeichhe phurh kha tunge?" a mi sawi chu Tekheuhi a nih ka ring ringawt a, anilo midang phurh ka neiin ka hre miahlo. "Ka cousin a nih kha?" ka tih chuan min melh rum leh viau tawh. "Chutiang thu common leh ṭhing lutuk chu chhuanlamah hmang hlek suh" a ti vin khar khar a, engah nge maw min han awihlo ringawt chu le!

"Dawt ka sawi lo, ka patea fanu Tekheuhi a nih kha" ka tih chuan "Cousin tihvel hi chu maw mipa ho chhuanlam Common lutuk mawle, ka nutei emaw ka Nî te pawh ti zawk tal la" za lo zeta nuichhunga a tih chuan sawizui chiam ngaihna ka hre tawhlo, a hnial hrat mah mah deuh chu a ni.

"Tekheuhi interview tur ka hruai a lawm Guwahati aṭangin nizanah dar 2 vel khan  a lo thleng a, khawchhung a hrechiang silo a ka kalpui a nih kha" ka ti leh chuan tum bur chungin min en a "Dawt i sawilo maw?" min rinhlelh hmel fêa min en chungin a ti a. "Sawi hauhlo" ka tih chuan a meng nur nang a.

"I duh leh naktukah ka hmuhtir ang che, zaninah kan inah a riak dawn a lawm" ka tih chuan "Chutiang ka duh kher kher lo" a ti leh hlak a, tum hmuk chunga lehlam a hawi chuan a rilru ka hmin deuh tih ka hre thei. "Thil hrechiang loin thinrim tawhlo la min zawt hmasa tawh ṭhin rawh aw?" nui chunga ka tih chuan "Vawinah pawh ka zawt che a i pha kual vel anih zawk kha" a lo ti leh hlak a. 

"Nia...Tekheuhi chungchang i sawi tih ka hrelo a tin a lawm, hria ila chuan ka hrilh nghal ang che" ka ti leh var a, muangchangin a kut chu ka ban a ala sawn ta biklo. "I lungawi em?" ka tih chuan "Hmmmh" tih zawngin min chhanga, a tawk viau tho mai.

"Nui bawk suh, dawt i sawi leh sawiloh chu ka hre leh vat tho ang" min melh rawm pah a a tih chuan ka nui tawp hmak a "Dawt ka sawilo i duh leh min Check la" tih paha ban ka phar chu a lo nui hak a "I Over lutuk" tih nghek pahin ka awmah a rawn nam a; a kut chu lo man sakin ka lamah ka pawt hnai zui zat bawk, hlauhthawn hmelzeta min en pahin "Khawlai anih hi.." a ti leh hluai a, khawlai mah nise ka fawplo theilo.

"A tawk tawh miin min lo hmu ang" tih pahin min nam sawna, a mizia pawh ka hrechiang ve thawkhat ta, a rilru a awm ang ang hian a langchuak pawp pawpa, a thinrim hma ang bawkin a lungawi leh hma a; hmeichhe mizia a ka duh zawng chi tak niin ka hria, amah ah hian ka duhthusam ang zawng zawng chu ka hmu a ni. 

Mahse, ka thil zep hi a hriat hunah eng angin nge min ngaih ang ka hrelo, ka theih chen chen zep ka tuma, hetianga ka tilo anih chuan ka lam a rawn hawi ṭha duh mang silo a zep lo thei loin amah hian min siam bawk si a ni.

"Khawiah nge kal i tum reng reng a?" a tih chuan "E le...nangmah hmu tur chein ka lo kal" ka ti vat a, a nuisak chu lungawi zetin ka lo en bawk.

"Anih chuan va haw tawh rawh lehkha chhiar ka la ngaia" a tih chuan ka lo bu nghat a, kal mai ka tum chu ka banah min rawn vuan leh a " Enteh, vawina ka thilsawi ho kha ngaihloh lamah ngailo la mi tupawn kawppui atana duhthusam kan nei vek a, nangpawn i duhdan min hrilhla i duh angin awm ka tum anga" a tih chuan vawinah enge a sawi ka hrethei tawh hauhlo, min hau hrep nita maiin ka hria.

"I duh dan sawi zawk la" ka tih chuan a nuisak a "Ka duhdan mai mai a nia mahse, mahni nihna lo anga lan kha chu a ṭha chuanglo a a tlo lo bawk a" lai angreng zeta a tih leh chuan "Han sawi teh le" ka lo ti vat a.

"Fawr kual ṭhin mi hi ka duh lo a Party ṭhin te pawh mahse, tlangval i nia ka pasal ila nilo a thunun che ka tum pawh a ni miahlo a nia.." a ṭawng tawp lam chu a zuih ral hle a a inthlahrun hmel viau bawk.

"A dang..." ka tih chuan a nui a "Ruihtheihthil tih te, lerh leh dawt sawi te" a tih chuan awm a ti nuamlo lek lek mai, thildang kha chu harsa ka ti pawh a nilo mahse, dawt kha ka hrilh ngei mai si a.

"Sawi ve tawh rawh" a tih chuan sawi ve tur ka hrelo kher mai. "I awm ang ang kha ka duhvek" ka ti chu nuihza insum zetin min en a, a awmdan chu a lai deuh tlat a a hmelṭha hle bawk, fawh leh mai ka duh a ni.

"Kal tawh rawh, ka chho dawn" tih leh min nam a rual a, "Chho hmasa la ka kal ang" ka tih ve tlat avangin a kal hmasa ta zawk a, a liam hnuah keipawh ka inkhalh chhuak ve nghal a, In ka thlen chuan ka chhungte chu an lo bengchheng hlut a Aruati an lo zaitira midang ho chuan video a laksakin phone an lo lek far hlawm a. "Zaithiam lamah kan lam a kal anih hi" ka piin a tih chuan ka lo nuisuk a.

"Tinge i va lo let hma ve in chak talo a mi?" Tekheuh-in a lo tih chuan ka hrechhuak leh zawk mai, "E khai aw! Hruaisanga kha!" tih paha tlan chhuah leh mai ka tum chu ka nuin ka hnunglam a ṭangin min rawn pawt bet rawk a "Chhuah a ngai tawhlo" a lo ti chang bul mai.

"Ka mu tawh mai a sin, mengrei lutuk suh aw i chau ange" tih Message ka hmuh chuan ka nuisak a, a duh hi chuan a van Sweet thei tak, chhan ka tum laimek chuan a Message dang a rawn thleng leh nghalzat a "Ka wish dawn che em Duati?" tih a ni, a van inla zei thei chiang minti zak lek lek a lawm le!

"Min wish la" ka tih hnu reilo teha  a selfie thlalak a hmui a tihpawrhna a rawn thawna "Muttui suk suk" tih nen, a thlalak chu enin ka nuichhuak haka, a wish chu ka chhang let thuai bawk.

October thla ka hnaih telh telh a lehkha chhiar leh room a tawm chawt chawt chu ka hna a ni deuh ber mai, tlai lamah ka Nu dawrah ka ṭhu zawk ṭhina  eirawng a bawl zawhah min lo thlak veleh mai ṭhin. 

Remtluanga a rawn kal zeuh zeuha, ka pa nen pawh an la inbe ṭha tluang a kei nen erawh a hranpa taka inkungkaihna kan nei tawhlo a alo kal chang pawhin ka be khat khawp mai. Kohhran lamah pawh ka inhmang chho ve ta zela, zanlam inkhawm pawh ka peih chho viau a thurualpui turin Zari a lo awm hlauh bawk nen ani nen chuan kan inzui chawt ṭhin a ina awm chawt chawt ka nin vang te pawh a nimahna CTP in khawm pawh ka ṭhulh ngai meuhlo, ka pa erawhin ka zirlai dah pawimawh hmasa turin min hrilh cham chi thung.

Lalbera nen chhun lamah kan inhmu zeuh zeuha Gym lamah a tap deuh chawt ṭhin avangin ka chhuah remchang chuan ka tlawh kawi ṭhina, chaw chhun te eidunin rei vaklo chu ka ṭhu khawmuang ṭhin a kan inkar pawh a ṭha chho viau mai, an Gym a ka kal chang chuan Usangpuia a lo awm ve fo a innelsa ka ni bawka ka chungah a nelawmin a ṭha em em reng a ni.

Ka Birthday September ni 18 thlen nan ni hnih chiah a awm tawh a Lalbera nen len chhuah kan tum a, ka phur a ka helhhawlh ṭan der mai. Kan chungkua hian Birthday lawm tih vel hi an nei ngailo a kan unau Birthday ah chuan thawmhnaw emaw kan duhzawng leina turin ka pan pawisa min pe mai ṭhin a, chuvangin han lawm en ah pawh ka lo en lemlo a mahse, Lalberan lawm a rawt tlat a "Hun lo in siamla Sialsuk tlangah ka hruai dawn che nia" a tih chuan ka phur takzet a ni.

Vanneihthlak takin inrinni a lo nilehzela Khawzawl lamah ka pa leh Dodo-a an zin dawn vangin hunthawl tak ka nei thei dawn a, haw tlai deuh pawh ni ila ka nu bulah chuan chhuanlam ka siam thei maiin ka ring. 

Zirtawp zanah Zari nen zaipawl hla zirna ah kan kal a, kan bula Remtluanga lo ṭhu chuan Zari chu a rawn bekbawr nghal sar sar a, chutah ka lam rawn hawiin Zari nen chuan ṭhutna an inthleng zui a, hla zir kan la ṭanloh avangin Hall chhungah chuan mi ṭhu kan tamlo. 

Ka bula Remtluanga rawn ṭhu chuan "I inchhiar hnem tawh bawk em?" tihpahin min rawn nuihsak a. "Chhiar tam tawk tih a awm theilo" ka lo ti var a.

"I Birthday chu Bazar ang hmiang thil ṭha deuh ka leisak dawn che nia" a tih chuan mak ti fe hian ka  en a, "A...chutiang... pawh a ngailo" ka ti bah niai a, chhan dan tur pawh minti bangbo riau a ni.

"Ka lo lam ang che, thil tui deuh ka leisak bawk dawn che nia" a tih chuan "Tih tur dang ka nei a" ka lo ti ta vata, engvanga chutiang thil te ngaihtuah nge maw  anih ka hrethiam hauhlo, ngaihzawng ka nei tih lah a hre ve reng sia.

"Chawhnu lamah i hman lo maw?" a tih leh chuan ka lo bu nghat a "Anih chawhma?" a la ti ta hram a. 

"Hmanlo Inrinni chu, tihtur dang ka lo nei tawh a" ka tih chuan "Ṭhulh mai la itih tur chu, ka rualin chhuak la i kawr duh ber ka leisak dawn che nia" min rawn nek salh pahin a ti a, lawmlo  awka fe hian "Ka hmanlo" ka lo ti leh hmuk a.

"Kawr i duhlo maw..." nuisuk chunga a tih leh chuan ka ngei deuh ta tlat mai, "Ka mamawhlo" vin lek lek hian ka ti a, "Sorry...i Birthday present pek che ka tum mai a nia" nuihzat hmel lek lek hian a ti a, "Ka bialpa in min pe dawn a lawm" tih pahin Zari lam chu ka hawisan hmak a, a phone khawiha Zari lo kun ngur chu "Tlar hma lamah khuan kan insawn dawn a mi, Conductor-in insawn turin min ti leh tho ang" tih leh thawh ka rual a.

Remtluanga ngawi ngul chu kalsanin tlar hmasa ber dawtah chuan kan ṭhu thla a, reilo teah midang pawh an lo lut thuai a, hla zir kan ṭan tak avangin Remtluanga hmel chu ka hmu zui tawh lo a ban thleng pawhin ka hmu leh ta lo.

"Vanlal...tinge Rema nen hian in inkawp leh mai loh a fel tehlul nen a la duh hmel em em bawk che sia" kan haw kawnga Zarin a tih chuan ka lo nuisak a, a tu a te pawh hian Remtluanga hi chu an ngai fel em em vek maiin ka hria.

"Âw...bialpa dang ka nei tawh a lawm" nui chunga ka tih chuan "Chu pawh nise Rema nen hian in inhmeh daih zawk, i bialpa kha chu a chhelo zawk viau nangin a innghahna tlakloh emai a, Rema te ang han hnar phahna tur chi ah ka lo ngai hleinem" a ti zui zat a.

"Remtluanga pawh i hrechiang chuang a mi?" ner sak chunga tih pahin ka ṭhiannu chu ka en a "A...a ni te chu tupawn a felzia an hria alawm, bakah sawrkar hna nghet a nei tawh lehnghala kohhranah a inhmang bawk si, i chhungte pawn an ngaina viau a ni lawm ni, tuna i bialpa lah in Inah i lentir ngam der silo, ka nu pawhin 'i ṭhiannu a nia hrilh rawh tuna a bialpa hi chu kan kohhran mi a ni bawk silo a, vengkhat tlangval awmṭha duhlo an ti lehnghal a ṭhen tum daih teh se' a ti a nia, Pa Thanga nen tal inmil sela chuan ka hrethiam a, kei chu Rema hi a letin ka duhpui che" kawnga kan kal lai chuan ka ṭhiannu chuan a ti phei bawrh bawrha, kei erawh ka ngawi ta reng ringawt.

In kan thlen hnu thleng chuan Zari thilsawi chuan ka ngaihtuahna a luh a, Lalbera laka ka rilru phei chu a dan phah haulo nangin  awm a ti nuamloin thawk a ti ipik riau a ni.

Khuma ka mut hnuah Lalbera nen kan inbia a "Zanin chu ka chhuaklo nimin tuk a ṭang khan ka lu hi ana riau a" thatchhe aw zet hian a rawn ti a "Tinge i hritlang ami?" ka tih chuan "Hritlanglo, nimin khan ka Bar bell chawilaiin ka inherh deuha chuvang chu a niang" a rawn tih chuan ka lo nui hak a. 

"Mahni zawh tawk tur te chu hriat ve tur a lawm" ka ti chu a duhlo kher mai "Ka zo ve chiang emai a" bak hlukin a rawn ti a, "Inherh damdawi i ei em?" ka lo tih chuan "Ei e..ka dar chu a zia tawh, ka lu hi ana reng a min ti buainuai mai, lu na benvawn hi ka nei a nih ka ring ni hnih khat dan vela chhuak ṭhin lu na ang hi..." a tih lai chuan ka lo nui chhuak hak a.

"Ti nge i nuih a..?" phawk fêin a rawn ti a. 

"Tlangvala pumpa lu na benvawn neih te chu a.." nui kar kar pahin ka ti a, "Anih duh hmel em a lawm a rawn na a a reh hmak zel a ka hrethiam biklo, ka na a rawn chhuah hian ka buainuai zel...aa i hre ve thiam chuanglo ang patlingin lu na ka sawi hi chu na ve deuh mai a nia" uang angreng zet hian a rawn ti a, "Patling i nia maw?" ka lo tih chuan "Teuh nang..." a tih hluaia a hnu ah "Ni ve deuh tho..." a rawn ti ṭha leh a, ka phone vuanin kei ka lo nui kar kar renga.

"Enge ka nih pawh ka hre tawhlo" a rawn tih leh rualin "Pathlawi" ka lo ti zauh a. "Chu kher chu ka nilo, pathlawi atan chuan ka hmelṭha mah mah" a lo ti nghut mai.

"Naktuk chu ka lo lam ang che?" a tih chuan "A pawilo kawnah ka lo nghak dawn che nia" ka ti a, rei vaklo kan inbiak leh hnuah call chu kan ti tawp a. Ka phone ka dah rualin Remtlunga message a lo lut ve nghalzat bawk.

"Naktuk i chhuah dawn chuan zanah ka lo kal ang, Birthday present chu enge i duh lo sawi la" tih a  ni. Ka phone en chuan thawk ka la hak a, enge maw  a hriat le a la buai ve sek ringawt mai, thil min lei turin ka dil pawh a nitawp silo a.

"Engmah lei angailo, Birthday lawmrual pawh ka ni tawh hleinem" tiin ka chhang lêt ta hram a. "I duh i sawiloh chuan ka duh la lei anga i vui thei dawn miahlo a nia" a la rawn ti tak deuh deuh a! "Engmah a ngailo" tih thawn lehin phone chu ka lukham hnuaiah ka thawlh lut ta daih a.

Zing ka thawh chuan ni a lo tlangsang hman viau tawh a, inhnuaia ka chhuk dawn chuan ka pa leh Dodo-a te zin tur an lo insiam buai mêk bawk. "Bawihi in phih harh vat la, i nau thil ken te kha lo en pui rawh" ring fêin ka nuin a rawn ti lang langa.

Inphihharh hmasa hranloin Dodo-a thil ken chu ka enkual sak a, a mamawh tur chu alo kengkim ve thlap mai. Chaw eilaiin ka pa chuan pawisa ka mamawh em tih min zawt a, "Mamawh hranlo engmah leitur pawh ka hrelo" ka lo ti vat a.

"Thil eina tur" tiin za nga min pa ta tho a, Lalbera nen Tiffin pai kan tum sa avangin ka pa pawisa min pek chu lehkhabu leinan hman ka rilruk a. Tukṭhuan eikhamah ka nu dawr ka hawnpui leh te te a "Nangmah va bazar mai teh" a tih chuan ka rilru a buai kher mai, tunah dar sawm a ri dawn tawh a, Bazarah chawhmeh leia ka kal leh hmasa a nih chuan ka tlai dawn lutuk tlat a ni.

Dodo-a leh ka pa zin tur an inkhalh chhuah hnu chuan hmanhmawh takin chawhmeh Bazar tur chuan ka chhuak a, kan veng kawn ka thleng phei chiah chu ngaihdan thar ka neia Bazar thleng kherlo a heta Bazar mai hi a fuhin ka hria. Sa bakah thei leh thlai engemaw zah ka lei a, ka let leh chuan ka nu buailai tak a ni a, ti hi chuan duhtawka rei ka insiam hman  zan a ni.

Ka insiam zawha ka chhuk thla chu phawk fein ka nuin min lo en a, a sawi hma hmain "Ka bazar zo tawh" ka lo tih khalh a "Khawnge chhuah i tum a?" a tih chuan Margareti te ina kal ka tum thu leh chaw ka ei nghal mai theih thu ka hrilha, ṭullo a tih hmel kher mai. "Ka chhuak dawn a ka lo thlah dawn che a mi?" Nau-an a lo tih chuan rang lutukin "Aih..." ka lo ti a, an pahnih chuan min en phawk hra a "Pen kawina tur ka nei a" tih leh kal ka rual a.

"I bialpa kha va hmuh te i tum a nilo maw?" ka nuin a tih chuan ka hawilet duh tawh lo.

Kawn a Lalbera ka va hmuh chuan Dar 11 a la rilo a, kan thawmhnaw hak var ve ve chu a inrem dun kher mai. A bike hnungah chuan percel lianvaklo a dah a kan Tiffin a nih ka ring, "Pawm mai rawh" a tih chuan ka lawnkai nghalthuai a.

Boruak a dai nuam a a lumloin  thli a thaw nuam em em bawk, Sialsuk chu ka rinaiin a lo hla daih mai a, a hmun hma erawh a nuam em em thung. Phul hmunah chuan puan phahin ka ṭhu a, a percel a a thil dah ho chu eitur lam chi hlir a ni.

Thla te kan la dun a, selfie tuma ka phar lai takin ka ngawngah ṭhi minlo awrh tir a, a locket ah chuan Arsi lem a awm a mit tereuh te te a nei bawk a, a nalh ngang mai.

Bag khai te hi min pe tel a, chu bag khai chu hmanni lawka min pek a tum kha niin ka hria. Ka hawnga alo ti tak tak a "I duh zawng a ni em pawh ka hrelo, Tetei ka pek aikhan a to zawk a nia" a lo tih chuan Bag chhung a mi chu ka en vat a. Estee lauder product  hlir a ni, a man pawh a to hlawm kher mai, hmaihnawih leinan keichuan hetiang zah zah sum ka la seng ngai hauhlo.

"Hetiang em em te chu tlawm deuh zawk pawh lei tur a lawm, pawisa i ti uihawm emai" la ti zui hlak hlak a, lawm tak a ruanga chutia ka chhang chu ka inthiamlo leh hnuhnawh viau bawk.

"Kiss ka dawng dawn em le?" awmze nei zeta min melh chunga a tih chuan "Lo kal la" tih pahin a kawr awmah ka ṭham a, ka chet ngai hauh loin a rawn che chhunzawm a, kan awmdan chu a nuam duh  kher mai, a romantic hle bawk.

Dar 1 velah kan in eipuara a, a thil rawn ken ho chu a tui tak zet a ni. "I siam chu a nilo phawta" ka tih chuan a nui ruh ruh a, a nu siam a nih ka ring nghal hmiah a. 

"Engtikah nge kan inneih dawn?" ka thil eilaia a rawn tih chuan ka theituiin ka phuhlo chauh a ni, a lam ka hawi chuan ngun fê hian min lo thlek a, min ti lai kher mai.

"Ka hre nang" hmai sen deuh ṭan ṭan chung chuan ka ti a.

"I pa dil ta ila?" a tih chuan thawk ka lo la vak a, chu kher chu thil huphurhawm tak a ni. "A hmanhmawh thlak hleihnem" nui chunga ka tih chuan "Ni e.." tih zawngin min chhang a, a phone en zui daih mahse, rilru a nuam duh hauhlo.

Ka mal chungah muin Games a khel a, keiin ka phone-ah video ka en thung a, thaw ri sak sak ri ka hriat a a hmel ka en chuan tui  fahranin a lo muhil a, a muhil hmel chu hmuh a hahdam hle bawk. A chalah chuan ka zuk fawp de de a a harh hauhlo, ka phone la chhuakin a thla ka laksak mawlh mawlh a, a hmuiah chuan lipstickin hmuihmul lem ka siamsaka a mu nghet deuh a niang a che eihlo.

A rawn harh chuan ṭhutchhuah pahin a hmai a tuai pawk a, a hmuihmul lem ka thai chu a tuai pherh sen nasa ngang mai. "Aibawkah chaw kan ei anga, zanlam i la awl thei angem?" tih paha ka lam a rawn hawi chuan ka lo nuisanga, a hmui bawr vel sen tai tuk chu ka nuih lo theilo.

Engmah hrelo chuan a helmet a khum hnan hmiah a, Aibawk kan thlena a helmet a phelh chuan Hotel a nula hnathawk ho chuan an en duh hlawm ngang mai a, thil i hrilhrua an nuiru tet tet chu ka hmuh hmaih lo.

Kan lam an rawn hawi leh ṭhin chu en pahin "Hmelṭha an hmu ngailo a nih saw" ka bul a miin a tih chuan ka lo nui hak a, "Tlangval lipstick inhnawih pherh deuh anla hmu ngailo pawh a nimai thei" ka tih chuan hriatthiamloh hmel zetin min lo en a.

Tho lehin khawngkhar bul banga darthlalangah chuan ava in ena, a rawn let leh chu a hmui a rawn hup ṭut ṭut a "Ti nge tihian i tih, mipa ka nih hi" pawr zeta a rawn tih chuan ka lo nuih tlek tlek a, a lawmlo nasa a ni.

Chaw kan eizawh chuan khua a thim lek lek tawh a, in lampana kan inkhalh haw lai chuan "Vawin i hmang nuam em?" a rawn ti a, "Nuam tehreng mai, thilpek ṭha deuh min pe a ka lawm bawk" tih pahin a kawngah ka lo kuah salh a, reilo te ka kut a rawn hmer zawk a, a kut chu a sa hiam in ka hria.

A kawr hlimin a dul chu ka dek a, a sa vur mai a a awmbawr phei chu a thlan deuh dapin ka hria "I nuam lo a mi i va sa ve" ka tih chuan "A lum em alawm" tih zawngin min chhang a, boruak a lum pawn ka hre hauh silo, jacket a hak ṭup bik vang em mawni dawn ni!

Zari te in kawta din a tum chu "Kan kawtah sawn ding law law la" ka lo ti a, ka pa zinlai  a nia, zanin chu a duh leh lo lut kawi mahse, pawi tihna ka nei lemlo.

"I lo lut duh em, thingpui lo in ta che" ka tih chuan a helmet phelhin kan inlam chu a thlir chho a, a meng phi deuh chialin ka hria.

"I lo lut dawn em?" ka tih leh chuan "Maw?" tih pahin phawk fêin min en a, a meng sen deuh rum bawk si a, min ti hamhaih lek lek a ni.

"I nuamlo emaw ni le?" tih leh a chal chu deh ka rual a, a sa deuh vur a a khua a sik hluah mai, eng a awmzia nile, tlaiah te kha chuan a damṭha viau kha a ni sia!

"I khua a sik a nih hi" ka tih chuan "Ka kal ange" a lo ti zawi ruih a "Lo lut la damdawi te lo ei la" ka tih leh chuan a lu a thing a, "Anih phawt mai" tih pahin a Helmet a khum, engmah ka sawi leh hmain chak lutukin a tlanchhuak zui a, a awmdan kha ka hrethiam hauhlo, hmelhriat ngailoh ang maiin a lawm tunah khan min biak le!

Hrethiamlo fe a ngaihtuah zui neuh neuh chungin Step ah chuan ka chho a, a khaw sik hluah ringawt kha enge a chhan ka hre thiam hauhlo, ngaihtuahna a tibuai takzet a ni.

Step tawp ka thleng chiah chu ka mi  hmuh vang chuan ka rak chhuak lo chauh a ni!

"Pa.." ka ti hluai a, chutih laiin mitmeng huatna a khatin min lo en thung.

A kut lehlamin luggage a khaia, tunah an lo let leh tihna em ni, khawzawl ah Dodo a nen an kal bawk sia tinge hetah ka hmuh leh thut si? Nge ni a tunah kalchhuah a tum zawk. 

Mahse, a luggage ken chu ka ta a ni bawk si a!?

Phawk zeta ka en lai chuan ka lamah luggage chu a rawn nawr phei a "Ka fanu i ni tawhlo e, i tlangvalpa kha va um rawh" tih leh min hnung chhawn a rual a.

"Pa..ngawi lawk teh.." ka tih leh rual chuan kawngkhar a khar a, chhunglamah a kalh nghal hmiah bawk a. Ka au zui a mahse, min chhang hauhlo, ka rilruah chuan thil pakhat a rawn awm a, keihi hnawhchhuah  ka ni!

*CHAPTER - 18*

Tihngaihna hrelo lutukin kan veranda ah chuan ka ding ran a, inchhung lam thawm chu a reh tlawk tlawk mai. Nau-a ka phone a "Nau, ka nu a awmlo a mi?" ka tihlai chuan ka aw chu a lawi lek lek a ka lungchhe hle bawk.

"U Vîte  ka nu chu room ah a awm a, ka pa nen an inhau  mek a, an bengchheng lutuk, zanin chu i ṭhiante inah riak rih mai rawh tunah chuan ka pa a thinrim rih lutuka zingah kan lo hruai mai dawn che nia" a rawn tih chuan thawk ka lo la kawk a, han tihzui vak ngaihna ka hre chuang derlo.

"Ka pa te kha ti nge an lo haw leh a?" inpetruh ṭeuh chungin ka ti a "Ka hre biklo tukin i chhuah hnu lawk khan an lo lêt leh a, i awmna pawh kan hrilh lo tlaiah khan ka nuin 'Margareti te inah chaw a ei' a tia mahse, chaw eikham khan URemtluanga a lo lenga a haw hnu khan ka pa khan i thawmhnaw a han siam ringawt a nih kha" Nau an a tih chuan thil thlen dan chu ka hrethiam ta kuar mai. Heng thil hi Remtluanga thiltih  vang a nih ka ring nghet bur bawk.

Step ah chuan darkar khat dawn ka ṭhu a ka nu thawm emaw pawh hriattur a awmlo, ka phone chu ka en leh ṭhin a Lalbera tak ngial pawhin min ngaihven lo chu ka vui a ni. In a thleng daih tawhin ka ringa tun dinhmunah hian enge tih tur ka hrethiam lo, biak hmasak mai tur em mawni le? Mahse, a hnena kal ka thlang a nih chuan engthil nge thleng ang? Thil thleng thei tam tak ka ngaihtuah zuia Lalbera pan ringawt chu thil ṭha ber ni theiin ka hre silo, ka rilru a buai takzet a ni.

Ka sana ka en a zan a rei telh telh a kan inchhung lam chu a reh hmuk mai si, Nau-a takngial pawh a rawn chhuak ngamlo  chu a nia, ka nu ka ngaihtuaha ka lungchhia chu ka mittui a rawn hnam nghal ṭiam ṭiam a, ka hmai hupin ka insut zui hlawp hlawp bawk.

Step ah chuan muangchangin ka pen thla a, ṭhenawm ten min hmuh ka hlau kher mai, min hmu anih chuan khawi khawiah emaw an sawizui anga zahna chauh  ka hmachhawn dawn tih ka hria a ni. Pan tur ber pawh hrelo chuan Step tawpah chuan ka dinga, Margareti te ina kal mai chu a ṭha berin ka hria.

Taxi lo tlan hmasa ber chu pharin Margareti te inlam chu ka pan zui a, ka thawk a ipikin ka awm dan chu a hrehawm hle bawk. 

Ka ṭhiannu te In ka thlen chuan an muthilh tawh hlau ru tak chungin kawngkhar chu ka kika, tun ang zana an Ina ka kalchhan chu a zahthlakin thilsawi nuam tak  chu a nilo ve chiang a ni.

Kawngkhar chu ka kik nawn leh a, reilo teah kawngkhar lampana rawn pen ri ka hre zui a. Khawngkhar a rawn hawng ri raka, thawh phan hmel zeta Gabriela lo dâk nen chuan   kan inmelh fuh chat bawk.

"Tehhlawl che chuan?" tih pahin kawng min kiana, Luggage nena ka lut chu maktih hmelfêin min en a "Thil diklo a awm em ni?" a tih chuan ka dar ka kan ak a, nuih luih ka tum ngiala ka thei derlo mai.

"Lo ṭhu la, i ṭhiannu kan kaitho ange" tih leh room lampan a rual a, a kalhnu chuan ka mittui rawn hnam chu ka hruhul nghalthuai a, ka aw ka thian zui kharh kharh bawka chutihlai chuan "Pawlnu" rawn tih ri vang chuan ka hawichhuak vat a, ka ṭhiannuin maktih hmel taka min lo en chuan za lo zetin ka lo nuih a, ka awmdanah chuan a hrethiam nghal a niang engmah min zawt buailo.

"Chaw i ei tawh em?" a tih chuan "Umm..ka ei tawh a lawm" ka lo ti var a, ka room tur min kawh hmuh lamah chuan kan inzuilut nghal thuai a.

"Pa Thanga ṭhin hi chu aw..a rilru hi tinge maw a sak viau mai le!" ka mutna tur awngphah timar vat vat pah chuan a ti a, "Naupang ho chu an mutna a rei tawh em?" ka lo tih chuan "Rei vaklo, zanin chu kan mu hma hlawm khawp mai" tihpahin ka kut a rawn bana khumah chuan ṭhu dunin "Enge thil thlen dan han sawi chiang teh" a tih zawm zat a.

"A thleng thut a nimai, min Warning ngun tawh a ka thuawih duhloh man a nih hi" nuisak chungin ka ti a, ka lungchhiatna chu thup hram hram ka tum thung.

"Lalberan a hria em?" a tih chuan ka lu ka lo thing a "Hrilh ka duhlo, a hria a nih chuan min rawn hruai a tum emaw a nia nga, kan tum loh dan deuhin kan khawsak a buai  zo vek mai ang" ka lo ti a, Lalbera chu hrilh ngat ila chuan min rawn hruai a tum chu ka ring nghet hle a, chutiang a nih chuan inru kan ni anga, holam lutukin nupa ah kan i siam ringawt bawk ang, hmangaihin duh viau mahila hlauhthawnna mak deuh ka la nei tlat a tin a ni.

"Vîte amah hi i duh tak zet em? chhungte nena inremloh phahna hial khawpa i thlang a nih si chuan rilru mumal tak i put a ngai ania" ka rilru hria niawm takin ka ṭhiannu chuan a rawn ti a, "Ka awmdan hi ka hrethiamlo ka ṭhen theilo mahse, ka hlauthawng a ni" ka tih chuan  hriatthiamloh hmel fêin min en a.

"Engthil nge i hlauhthawn chu?" chik taka min en chunga a tih chuan "Engkim hi sawingaihna pawh ka hrelo ka pasal tur anga ka ngaihtuah hian nakinah ka inchhir lehna tur thutlukna ka siam ang tih ka hlau a, ani chu i hriat ve tho kha a nunphung leh khawsak dan te, a nuna hmeichhe awm dang te thleng hian awm nuam takin min awmtir theilo" ka kut  tuai nauh nauh pah chuan ka ti a.

"Chu tak chu i nia i rilru siam fel i ngaihna chu, i ṭhen phal silo a, a tan i inpumpek duh chiah silo a, nangmah leh nangmah i inti hrehawm mai mai a nih kha, i hmangaih anih chuan i theihtawp chhuahin ring tawp mai rawh, mi pahnih inkarah chuan inrintawnna tluka hlu a awm lo a nia" ka dara min rawn kuah paha a tih chuan ka rilru a buai viau mai.

Ka ṭhiannuin mutura min chhuahsan hnu chuan mut hmunah ka ngaihtuah zawma, zeploah chuan pasal neih rilru hi chu ka la hlat deuh chu a ni, hmabak engtak ka nei a, ka thil zir duh leh ka thawh chak te  ruahmanna ka lo neih ve zawng zawng leh rilru a duhthu ka lo sam ṭhin te kha pasal ka nei a nih chuan ka ti thei tawh dawn hauhlo tih ka hria a ni.

Mahse, engtin nge ni ang Lalbera hi....

Ka telloin engtin eng a awm ang? Hriat ka chaklo ka tello chuan nun kawng thim tak zawh tur angin ka ngai nghetbura chutiang thil a thlen chu ka phal lo a ni, a chungah engthil ṭhalo mah a thlen ka phallo chuvangin ka ṭhen theilo ang, ka hmangaih tak tak anih chuan ka duhthusam leh ruahmanna ka lo siamve  te chu ka kalsan ngam tur ni bawkin ka hria.

Ka muthilh theihloh vangin zing hma takah ka tho a, tukṭhuan kan eilai chuan ka nu in min lo Call a "I nauin a lo hruai ang che" a rawn ti a, ka pa thu awih tawh turin min rawn hrilh zui mawlh mawlh bawk a.

Chaw eikham hnu reilo teah Nau-a chu scooty in a rawn thleng a "Harsatna i nei anih chuan min rawn hrilh hreh miah suh" ka ṭhiannuin a tih chuan ka lo bu nghat a "Thu tlukna ka siam tawh alawm" ka lo tih chuan a hratthiamloh hmel kher mai.

Kan haw kawngah chuan "U vîte i bialpa hi ṭhen mai teh, a buaithlak emai ka nu leh pa te an inhauh phah nasa bawk si a, bakah innei pawh ni ula kan kohhranah a lo lut a nihloh chuan i man pawh kan dawng thei dawnlo a nia" Nau-an a ti a. A ni meuhin chutianga ngaihtuahna a lo seng ve chu mak ka ti lek lek a ni.

"Engmah i hrelo, ka pain dawng theilo mahse,  kan chhungte dangin an dawng thei a lawm midang pawn an ti ve fo, ka pain a duh dan te a thil a ti hi ka duhlo, puitling kan ni tawh a inkhuahkhirh chin tawk a hrelo a lawm" ka lo tih chuan min chhang zuiloin a ngawi ngal a, ka thilsawi chu dik a ti ve thoin ka ring.

In kan thlen chuan dawrah ka nu a lo awm a "Ngawi rengin awmla i pan a lo hau che anih pawhin chhanglo ang che" ti a min hrilh hnuah Nau-a nen chuan kan inzui chho a, sitting rooma ka pa lehkha chhiar ka han hmuh chuan ka tawt up up mai, ka luggage nawr ri ahriat veleh ka lam a rawn hawi a, nizan anga thinrim hmel chu a pu tawh em lo nain a landan chu a nelawm fahran loh a ni.

Ka room lama chhoh mai ka tum laichuan "Enga tinge i zui leh siloh a?" a rawn ti bak hluk a, chhan tuma ka an zuau laiin Nau-an min rawn mitmei vang chuan ka ngawi leh ta zawk a. "Thu awih la i tan a ṭha a nimai, nidangah chuan sawi nawn leh ngai tawh suh se" Step a ka chho laichuan a la rawn ti zui hram a. Ka room ka thlen hnu chuan khumah ṭhuin thawk ka la vang vang a, kan inchhungkhur boruak chu a rit churh maiin ka hria.

Ka phone ka en a Lalbera message emaw call takngial pawh ka la dawng hauhlo, ani hi a lo damlo tak tak em mawni dawn le?

Ka call a message engemaw zat ka hnutchhiah bawk a mahse, zan thleng pawhin a enga mah mah chu a tlangtheilo a;  rilru buai ta viau mai. U sangpuia call-in a chanchin te ka va zawt a "Nizan a lo haw kha a khawsik a reh hlei theilo a" a lo tih chuan ka rindan vel chiah a ni, a lo damlo tak tak a tinge maw angawih tlat kher ni, a nawmsamloh thu te emaw tal min rawn hrilh sela ṭha mai tur a nia.

Thawhṭan tukah chuan lehkhabu lei chhuanlamin an In lamah ka  kal kawi a, a damloh thu engmah a rawn sawilo bawk nen ka ngaihtuah takzet a ni.

An kawt ka thlen chuan nu siamtei leh hmeichhe pakhat lo inzui chhuak mek hi ka tawk a "E..vite i lo kal a ni maw, i ṭhianpa pawh a rawn thawh harh peih tawh kha va lut rawh" nu siamtein a lo ti sawk sawk a. Chutih laiin a kalpui nu chuan ngun fêin min lo en a, chu nu chu ka la hmuh awm ka hre hauhlo.

Inchhunga ka lut chu kailawna a lo chhuk nen kan intawk hlawl a "Enge i lo tih dawn" phawk fe a min en chunga a tih chuan "Ka lo kan dawn che mawle" ka lo ti var a, min hmuh thut chu makti hmel a pu a "I va fel ve, lo ṭhu la" tihpahin min rawn kalpel a, a hmel chu ka lo chîka a pawr deuh fapin ka hria, choka aṭanga a rawn chhuah leh chuan "Ṭhu lâ..." nui deuh sâng chungin a ti a. "Enge i an? I khua a la sik em?" ṭhutthlenga ṭhutpaha ka tih chuan "Teuh nang chaw ei titui tham lek a lawm, ka hritlang deuh aniang" a dar kan ak paha min nuih chung chuan a ti a, a landan aiin a ṭawngdanah chuan a damṭhat hmel zawk daih a ni.

"Engmah i lo sawi silo a, i damloh te chuan min hrilh ve tur che a lawm" ka tih chuan min rawn melh zawk a, "Min kan duh dawn tih hria ila chuan ka hrilh tur che a nia" kiaisuk pahin a ti a. Nizan ka chunga thil thleng te kha chu hrilh ka tum lemlo, thil hriatnuam a ni lo bawk a hrelo sela kan pahnih tan pawh a ṭha zawkin ka hria.

"Chaw eive nghal la" a tih chuan haw leh vat ka ngaihthu ka lo hrilh a, "I ṭhiannu nen in inhmu ngai em?" a tih leh chuan nizana an Ina ka riah thu ka sawi chhuak teuh kher mai.

A tui Bottle ken lai chu dawhkanah chuan a dah a, a awmdan chu a laideuh ṭut in ka hria. "Tinge i call tlang theih miahlo a?" ka tih chuan a mengtal tap a "Ka phone awmna ka hrelo" mitmeng tlan chhe lek leka min enchunga a ti chu dawt sawi a  ang ka ti deuh a, ngun zeta a hmel ka lo en chuan a mit a la sawn nghal thuai bawk.

"Vawin chu i danglam riau mai" melhrum khâ khâ chunga ka tih chuan dawhkhana  a tui Bottle dah chu tuai leh pahin a nuisuka, a awmdan vel chu ka ngei lek lek a ni.

Nu siamtei rawn lut chuan "Bawiha enge in ei ang, chawhmeh bazarin ka chhuak daih dawn a sin, Vite eitur lo insiam leh mai rawh u aw" a rawn ti lut bawrh bawrh a. A nu lamhawi pahin "Restaurant ami chah mai la, ka siam thiam hleinem" lawmloh hmel fêin a ti a.

"Aw..Vîtein a siam thiam a nilawm ni, noodles te kha lo chhum leh ula i U pawh a lo haw ṭep ang i duh leh i u kha chah la" inchung room lama chhoh pah a  a nuin a tih chuan a lo phunzui hlak a. "Keiman ka lo siam mai ang" tih paha ka tho chu min lo zui nghalthuai bawk.

"Fridge ah khan a pawlh tur chi chu a awm ang" Kitchen Cabinet bula ding chung chuan a rawn ti a, mikhual ang maia ka bula a zum zuih chuan minti inthlahrung zo vek. "Ka duh duh ka telh mai dawn a sin" ka tih chuan a lo bu zauh a, eitur ka siam laite chuan che changloin a lo ding ngawi reng a, ka che vel chu minlo en a nidang anglo takin a ngawichawi hle bawk.

"I la nuam zanlo a mi?" a chala deh pah a ka tih chuan a lo a phu deuh zuk a, "Ka ṭha a lawm" tih leh Chair a ṭhut a rual a. Ka kal hi a lawm vaklo emawni ka ti rum rum mai.

"Tinge, min hmu hi i lawm vak nange?" tihpahin min hnungchhawn zawnga a ṭhu chu kun hniamin a nghawngah ka kuah a, a ṭhu ngil deuh hluai a "Chutiang a nilo, i thil chhuan kha a liam dawn a  nia" chiang zeta min rawn en pah chuan a ti a, nui chunga a bianga ka lo fawh chuan lai hmel a pu deuh a a nui tawi tak mai.

"Malsawmhlu...tun dinhmunah hian i in la value a mi?" ka tih chuan ṭhen ṭha chungin min en a "Kha chu ka ṭawngkam anih kha" a tihlai chuan a biangah ka lo fawp leh zauh a, hnai set sawtah kan inmelh dun kar a vawin chu a awmdan a naupang chhia riau a ni.

"Nang chuan i samkir kha i inhmeh zawk, i tarmit te pawh" a tih chuan nur zetin ka lo melh a, mi dang zawngin tuna ka lan dan sam ngil siau leh tarmit ka vuahlo hi lanṭhatpui min tih laiin a thil sawi chu ka pawm hauhlo. 

"Tuna i landan hi chu i zaidam hmel lutuka i inhmehlo" nui chunga a tih leh chuan a bekah ka lo nam thle lawlh a, chutihlai mekin Nu siamtei inchung lam aṭangin a lo chhuk a "Ka kal dawn a nia aw" a Bazar Bag lak sawk sawk pahin a ti a "I lo haw pahin Aruati rawn lam teh a" Lalberan a tih chuan ka lo en rang kher mai.

"Ka hman a nge maw inkhai rih nen chuan a buaithlak thei lutuka, i u lo thlen huna ka lo thlen hman loh pawn lo va kal ngei ngei ang che u sawtah khan, pawh dawha damdawi kha keng bawk ula" tiin Nu siamtei chu a chhuak zui a.

"Khawnge in kal dawn?" ka tih chuan "Clinic ah kal lawk kan ngai a mahse, tlaiah daih" a ṭhutna aṭanga rawn thawhchhuah pahin ka thil chhum lai chu rawn en duk duka "Tomato i telh a nimaw" nersak chungin a ti a.

"Tinge i duhlo a mi?" ka tih chuan "Duh lo" bung zetin a ti a, ka chhum hmasak te kha chuan a duh viau khan ka hre sia, enge maw tunah a han duh loh teh thut chu le!

"Anih chuan ka suak chhuak leh mai dawn a mi?" lawm fahranlo chung chuan ka ti a, engmah sawiloi loin min en vung vung mai. 

"Vanlalber...." 

"Min duh tak tak a mi a?" zawi deuh supa a rawn tih chuan "Enga..?" ka lo ti haw a. 

"Engmah a nilo" ti leh pahin Chair ah bawk chuan a ṭhu leh a, a hmel landan thutak viau si chuan min ti bo huih a ni.

"Hei.." tih pah a a tukkhuma ka nam chu rang fein a rawn hawileta "Nangin min duh tak tak em?" ka tih chuan chal chuar tapin min en a, min chhang lawk lo chu ka ngei a ka thin a tirim ṭun bawk.

"Thil hrilh duh che ka neia mahse, kan thil eizawh hunah ka hrilh ang che" a tih chuan ka lo tum hmuk a. "Min duh nge duhlo chu sawi mai la" titau awka zet hian ka ti a, "Ka hrilh dawn che a lawm" tih paha a inher lêt nghut chu a tukkhumah chuan han ben thlawp ka chak hle a ni.

Thil kan eilai te chuan ngaihtuah muk hmelzet hian a Plate chu a bih ngur a, "A tuilo a mi?" ka tih lah chuan a ei leh ang lawi a, a awmdan chu min runluih nimaiin ka hria. A..ka ngaihtuah peih tawh biklo, tui ti takin ka thilsiam chu ka ei a, ka kut lehlamin video ka en a bawk a, ka siam uluk vei bawk nen ka eitui kher mai.

 

Ka hawichhuak leh chiah chu min lo bih ngurtu vang chuan ka thil ei ka hak lo chauh a ni! 

"Enge maw i hriat le?" tihpahin ka awmbawr ka hup chawt chawt a, ka kawr nghawng zau lai a ṭangin ka hnute a lo bih nimaiin ka hria.

"Ṭhi kha ka pek che a nihkha" min en kar chunga a tih chuan "Enge chu chu?" ka lo ti bak hlar a, engemaw ngaihtuahin a chal a chuar leh tap tawh. 

"Ka thluak hi a phai telh telh in ka hria" lu thing nawk chunga a tih chuan ka lo nui chhuak hawk a. "A sâwngte zawk a nih kha" uang fe a ka lo tih chuan min rawn en a "Chu pawh chu a nizawk maithei" a lu tuaivut pahin a ti a, a awmdan chuan ka nuih a ti za telh telh mai.

"I hman ngailoh lutuk vang anih kha"  chek hlak paha ka tih leh chuan tum hmel pu chung hian min en a "Ka ngaihtuah theilo, ngaituah ka tuma a tawi tup zel a lawm, ka lungphu hi a rawn rang nasa thei lutuka ka thawk a ti hah tlat ṭhin" thu tak deuha a rawn tih takah chuan ka nui tawp riai riai thung.

"Enge chu chu a awmzia, a hma a i awmdan kha a mi?" ka lo ti vat a "Aw anih ka ring mahse, engthil thil emaw hi ka hrechhuak a ka lu hi ana ngut ngut zel, tunah pawh hian a na" a lu dawm vung vung pah chuan a ti a, a awmdan chu ka hrethiam hauhlo, "Nachhawkna i ei duh em?" ka tih lahin a duh bawk silo, min ti mangang takzet a ni.

"Barbie, zeploin ka hrilh ang che" a rawn tih chuan phawk fein ka lo en a. "Tunlai chu hetiang hian ka lu hi ana deuh reng ṭhin, chuan ka hriatna hi a chianglo lutuka  a changchuan engkim ka hria a, achang chuan ka theihnghilh leh vek ṭhin, engkim ka hrechhuak tawh ka tihkhan dawt ka hrilh che anih kha, a chang chang chauhin ka hria a, engmah hi ka ngaihtuah khawm theilo ka thluak ah hian an lam vel nimaiin ka hria, thilhlui ṭhenkhat chuah hriat chang te pawh ka nei, nichin lawk pawh khan ka inkawp tawh tih ka theihnghilh a, khatiang reng kha ka ni" nazeta thawk la chung chuan a ti a, a hmelah chuan rilru buaitak hmel ka hmu thei nghalin ka hria.

"Ka lo luhtirh pawn min hriat kha?" makti fe a en chung chuan ka ti a "Hre tehlul mai mahse, university a ka assistant angin a nia ka hriat che, ka bialnu ang maia i khawsa kha mak ka ti hman viau a sin" a tih chuan nur zetin ka lo en a, ka la hrethiamlo.

"Anih chuan tunah khan i hre bawk sia" ka lo ti leh chuan "Hre leh e, hetiang hi alawm ka buaina engkim hi ka hre phelhphung mai, ka haihawta ka thil tih zawh chiah te pawh ka theihnghilh ṭhin, enge maw hi keimah ah hian diklo a awm a ni, i kut min pe teh" tih leh ka kut rawn ban a rual a, a awm zawnah chuan dahin a lungphu chu min ngaihthlak tir a  a rang ṭha kher mai!

"Doctor hmuh i ngai anih hi" ngaihṭhalo zeta ka tih chuan "Vawitam ka hmu tawh a lawm, damdawi min chawhin ṭhu ṭha deuh deuh an sawi a chubak chu engmah a nilo" a lo ti bung nghut a, a ṭawng zawnga a thawk rang chu ka hrechiang hle bawk.

"I damṭha vek tawh emaw ka ti a sin le?" lainat taka en chung chuan a kut chu ka hmer vang vanga "I lakah ka zep a, min ṭhen daih ka hlau a" a tih chuan ka lu ka lo thing a. "Ṭhen dawnlo, lungngai miah suh aw i dam leh vat mai ang, engmah ngaihtuah buailo la i rilru pawh ti hah suh" ka tih laichuan lungngaih hmel takin min en a, enge angaihtuah hriat ka chak takzet a ni.

"Ka lo theihnghilh thut che pawn min hrilh la ka hre ve leh mai ṭhin ania" a ti zawi supa, a inthlahrun hmel ngang mai. 

Ka haw dawnah Usangpuia a lo thleng ve chiah a, Doctor hmuh an tum thu te a sawi nuala  "La awm rawh" an ti zet nain ka haw san ta rih a, In ka thlen chuan ka nu dawrah Remtluanga leh Zari an lo awm a "Khawnge i chhuah a?" Remtluangan a lo tih chuan chhangloin ka kal pel hmak a, kan In leh a vela a rawn lang chhen pawh hi ka haw hlur tawh a ni, inrinni zan thil thleng pawh amah vang liau liau a ni a mahse, a tum ang chuan engmah ka thlen tirlo khawp ang.

In a chhoh nghal mai ka tum chu "Min lo nghak rawh ka lo chho ve dawn" Zarin a lo tih vang chuan ka ding leh rih a, ka nu leh Remtluanga titi mawlh mawlh chu ka ngaitheilo ru viau mai, ka chhungte a rawn ti ṭha hluak hi ka ngaimawhlo thei tawhlo a ni.

Zari ṭawng zawt zawt laichu "Eirawng bawl ka ngai a nia aw" ka ti hlak a "Nu Zomuan keipawh ka va haw phei tawh ange" tih paha Remtluanga tho zui chuan min rawn melh  a, rang takin inchung lamah ka chhohsan thung. Zarin min rawn zui nghalthuaia "I van chhuak rei em em ve, Rema khan alo nghak ve ṭang ṭang che a be ve tal ta che" a tih chuan ka lo nui hak a.

"Enge minlo nghah ve ngawt a, a hmel pawh hmuh nin nak alaiin" ka lo ti zui hlak hlaka. Inthlak buailoin eirawng ka bawl a Zari ṭawng bawrh bawrh chu a bengchheng lam mah a ni. "Kha heihi lo thian teh" tih pahin a hmaah chuan Anhnah tel chu ka thehphei a, ṭawng pahin a thian zui mawlh mawlh a, a bulah chuan ṭawng hun hi ka chang ve ngai meuhlo chu a ni. 

"Engtik nge min hrilh i tuma?" a rawn tih chuan "Eng chu maw?" ka chawhmeh kan chawhleh pah chuan ka ti a, "I bialpa khan sâwn a nei tih ka hria a nia" a rawn ti chiah chu ka thil chawhlai ka tawp chawt mai. Remtlungan a hrilh a nih ka ringa ka ngei kher mai, mipa si a dakthei ka ti hle bawk.

"Vanlal...ka duhpuilo che emai, midang ṭha deuh zawk zawng teh, tlangval pangngai nilo lehnghal chu nakin lawkah buaina neuh neuh a awm duh a nia, hmeichhia hi chu fel tum viau mahila rilru chhiat chin hi kan nei vek a nia, a fa a enkawl hun te ala awm anga ho teah intih thiamloh a awl ania aw" a tih chuan "I experience tawh mi?" ner sawk chungin ka lo ti a.

"Ka cousin hian pathlawi fa nei tawh a nei alawm, an intihbuai phah fo asin, a theih tawkin a duatpui ve a fa ang tak tak pawn a en a amah chuan mahse, engemaw thila a han hauh ve hlek hian an pa chhungte hian an lo huatpui zela, ani lahin duhsak vanga hau angah a inngai a, chutiang chuan midangin an ngaihsak silo a an buai fo mai a sin chuvangin nangpawh pathlawi chu nei duh reng reng suh" a ti leh hmarh hmarh a, a thilsawi chuan ngaihtuahna a ti thui duh kher mai, thil ni thei tak pawh a ni a mahse, chumi avanga lo inhnualsuat ngawt chu thil ṭha niin ka hrechuanglo.

Tu te pawh hian kan inlaichinna a ṭhat lehzual theihnan  ṭha famkim kan awmlo tih ka inhriat tawn sak hi a pawimawhin ka hria, hmalam hun harsa zawng ringawta thlir lahin thil ṭha a thlen lo a, enghun pawh hmachawn thei tura rilru tih paukhauh a ṭha zawkin ka hre bawk.

Zanah chuan Lalbera nen kan inbia a, damdawi dang Doctor-in a chawh thu te nitin Therapy la tura a tih thu te a rawn sawi a, a aw ah chuan a peihloh hmel hle a. 

"Rilru buai chhuah a min chhuah hi ka duhlo, keimah ah hian rilru lam thil nilo fello an hmuh hmaih aniang" a rawn tih chuan ka lainat kher mai, Mental problem lian tak anei tih chu a chhungte leh amah hrechiang tute chuan ka chiang hle thung si.

"Lalber lungngai miah suh aw, ka lo ṭawngṭaipui reng che a nia i dam ṭha leh vat mai ang" tiin ka ṭawngthlamuan ve a engtin phei chuan min chhanglo. A ngawih vung vung hnuah "Ka bialnu i ni hi a mak ka ti" a rawn ti chhuak phawng a, "Engvang chuan maw?" rang zeta ka lo tih chuan "Ka hrelo kum hnih kan inhrawn chhung khan kan inngaizawng silo a engtin nge ka duh theih che a, nangpawn engtin nge min duh ve theih mai le?" a rawn tih chuan min ti zak ram ram a, a rawn nui deuh hak chu ka huat tawk a tling em em bawk.

"I phili em a lawm, min zar cheng a ka khawngaih duh che a nih kha" pawr fe a ka tih chuan a rawn nui ring sauh a, "I duh leh nui rawh, ka dah daih dawn a nia" ka tih chuan "Ngawi rawh la dah suh" nuihza insum aw lek lek hian a  ti a.

"Enge...min nuihzat dawn chuan ka be peih lo che a nia" titau awka zeta ka tih chuan "Ka nuihzat lo che ka hlimna ber i nih vang a lawm" zawite fiah angreng deuh hian a ti a. "In la zei viau suh " ka lo ti leh nghal hlak a. 

"Min duh hi ka inchuang lutuk ania aw " aw damthlupa a rawn tih chuan ka lai chhe lek lek a ni.

September thla chanve lai a liam leh tawh a, Exam hmachhawn tura ka inbuatsaihna pawh ka beingawrh ve zel a, Lalbera pawh a damdawi ei a ngeih aniang a ṭha sawt viau a, lu na pawh a nei ngai ta lo chutihlaiin kan inchhungkhur boruak erawh a pik  ṭun a, ka pa inla strict chu a ninawm takzet a ni. Pawn ka chhuak ngai meuhlo a, inkhawm lam pawh Exam a hnaih avangin tlemin ka inthlahdula Exam zawh lama tha thar a inhman leh erawh ka tumruh hle thung. 

Nikhat chu Nu Siamtei hnen aṭangin Phone call ka dawng nawlh a, ani meuhin min lo bia chu thil pawimawh tak anih ring ka la nghalthuai bawk. 

"Vîte, thilsawipui duh che ka nei a mahse, Ezra hnenah ka lo bia che tih hi sawi lo la aw" aw damthluam hian a  ti hmasa tete a, Ezra hnena ka sawi loh tur thu ka hrilh hnu chuan "In inkawp thuk viau tawh em?" a rawn ti leh hlawl a ka hamhaih lek lek mai, inkawp thuk a tih awmzia tak chu ka hrethiam lo hle bawk.

"Aa...ka hrethiamlo.. enga tinge?" ka lo ti bah nak a, "Englo a nia, inpahnih hian in inngaizawng tak tak turah ka lo ngai lemlo a, amah chu hrilh kher lo la Aruati Nu nen hian insawirem leh sela kan duh a nangmah kan duhloh vang che phei chu a ni miahlo a nia, karah naupang an awma tih fahrah hi kan duhloh ber a nia chhungkua a kan han inrawn tlan hnuah ka rawn bia che a nih hi, i tan pawh ani hi chu phurrit mai a ni tihlah kan hre ṭheuh a, amah be lo a nangmah zawk kan han biak chhan che pawh chu chu a nia, Aruati hmakhua tur te pawh min han ngaihtuah pui ve la" a rawn tih chuan ka beiseiloh lam daih a ni.

"Nu Siamte.." bangbo angreng zet chuan ka lo ti hluai a "I hriatthiamna kan rawn ngen tak meuh a nia Vîte Aruati hi enkawl kan duh si a, nu leh pa kar loa seilian tur chuan kan phallo em a ni" a rawn tih leh chuan sawitur reng ka hrelo.

"Anih chuan lo inthiarfihlim turin min beisei tihna a ni maw" ka lo ti zawi sap a, min chhanglo mahse, a thil rawn sawi danah a chiang reng tawh.

"Emma-i te chhunglam nen pawh kan inrawn a, insuihzawm mai hi kan duh a mahse, nang leh bawiha inkar hetiang hi a lo ni ve bawk si a, inthlahrung takin ka rawn sawi ringawt mai a nih hi" aw damthlup a a rawn tih leh chuan chhan pawh  ka chhang theilo ka hnuk a ulh ṭeuh mai. Ka zak a ka lungawilo a ka thinrim bawk a ni.

"Amah sawipui zawk la, keiin enge ka tih theih chuan ang" lawmlo fe in ka ti a, ka laka a thil beisei chu ka hria a lawm Lalbera ṭhen turin min duh a; a chhan chu Lalbera rilru an hmin thei dawnlo tih an hriat vang a ni.

"Huatah la lo la ipa in bawiha a duhlo zia chu tute emaw ka aṭangin kan lo hre ve a, chuvangin intana ṭha ber tur ngaihtuah ula Ezra hmakhua pawh hi ngaihtuah ve bawk la, rilru nat theihna tur thil reng reng laka inthiarfihlim hi a tan pawh a ṭha zawk a, chhungkua a nei tawh a nangpawn hriatthiam tum rawh" a rawn tih chuan a aw chu a ring hauh lo a a chang hle thung. 

"Nu Siamte ka ṭhen anih chuan a rilru ana dawn a nia, a Sensitive zia pawh i hriat kha"  ngen aw ka taka ka lo tih chuan "Kan hria a lawm mahse nangman a tih dan tur chu i hre mai ang chu, heng ka thil sawi te hi chu hriat tir hauhlo la" a rawn ti leh tawl a.

Tihngaihna hrelo zetin ka lo inpetruh a ka bing mup mup maiin la hria "Lo ti rawh aw, kan chhungin kan ngen che anih chu" a rawn tih leh te chuan lo ṭah khum hrep mai ka chak a ni.

"Vîte...hello...ka ṭawng i hre thei em.."ka chhanna beisei a a rawn tih chuan thawk ka la kawk a, "Umm..Ka lo tum dawn nia" ka ti ta hram a.

(END OF CHAPTER 18)