KA LALBERA (CH 19 - 21)

 CHAPTER - 19

@Violette khiangte

Nu Siamtei nen kan inbiak zawh hnu chuan ka ngaihtuah zui rauh rauh a, engtia han awm tur nge pawh ka bangbo riau a ni. Ṭawngkam chhe tak nena min rawn tawng chu ni hauhlo mahse, min deng na em em a kan ṭah a chhuak hle bawk.

Lalbera ka call zui a a rawn lak veleh "Khawnge i awm, enge itih a?" ka lo ti vat a "Nsa nen.." a tih rualin a thil sawi tum ka  lo hre nghal mai a, zan dang ang bawkin Nsa nen an chhuak dun leh tawh a nih hmel. "I haw dawn tawh em?" zawi sapa ka tih chuan "Ka haw ṭepa ila mut dawn loh chuan ka lo tlawh kawi ang che aw" a lo ti a, chu chu aṭha khawp ang inhmuh a enge maw sawidun ka duh a ni. 

Kan inbiak zawh hnu chuan khumah ṭhuin engtia awm tur nge tih mawlh mai chu ka ngaihtuaha, inṭhen ka duh thu hrilh ringawt ila a chhan min zawt ngei anga, engtin nge ka chhan ang? Chhuanlam awm thei hrang hrang te chu ka ngaihtuah kuala ka thawk a ipik kher mai.

Emma-i leh a fanu nen chhungkua dina awmdun tur ang tein ka mitthla thul, ngaihtuah zawng ringawt pawhin thikna in min rawn tuama, ka tuar thei meuh a ngem tih ka chiang lo a ni. A nu lah khan ngen tak tê in min rawn ngen a, an ina  ka kal changa min lo biak ṭhat lai te khan ka chungah hetiang rilru hi a lo pu daih tawh a ngem tih chu ka ngaihtuah zui ruai bawk a.

Lalbera lo thlen chuan hman hmawh takin inhnuai kailawnah ka chhuk thla a, ka chhung te an muthilh vek tawh avangin inchhung chu a reh ṭhap a, dimtea kawngkhar hawngin pawnlamah ka chhuak zui a, kawta Lalbera lo ding chu ka zuk hmu nghalzat bawk a ka lam hawiin a lo nuisang mai.

A bul ka thlen rualin ka kut a lo vuan nghalthuai a, a hmel hlimsarh aṭang chuan engmah ka rilru tibuai tu thil hi a hre velo tih a hriat hle bawk. "Min zui la reilo te Ride lawk ang hmiang" nuisang chungin a tih chuan ka lo bu nghat a. A bike ah lawnin a tinung vat vat a, rangtakin ka lawn kai ve nghalthuai a. 

Zan reh takah chuan khawpui fangin kan tlankuala, thla a engin a reh nuam em em bawk, thlafim  thaw heuh heuh te leh kawtthler reh ruih te, a Bike tlan ri te chauh lo chu thawm dang hriat tur a awm meuhlo. A kawngah nghet taka kuahin a hnungah chuan ka bei thlam a, a taksa lum vung vung te chu chiang takin ka hre thei a ni.

"A vawt em, i duh chuan ka Jacket hi i ha dawn nia" a tih chuan ka lo kuah nghet sauh sauh a, a kawnga ka kuahna kut chu a kut lehlamin a lo hum vang vang a, la kanga a hmui a tawh tir lai te chuan rilru buai em emin ka lo ṭang ru ṭeuh thung.

Vanduai bik riaua inhriatna ka nei a, chu chuan ka lung a ti chhe riau mai bawk a, enge kan tihsuala heti taka kan inlaichinna hi dodal a nih bik mai le, kei emaw ani emaw a tu ve ve pawh chuan tihsual kan neiin ka hre hauh silo.

Kawtthler zau laiah dingin a Bike chu a hung ṭha a, min kaiin kan piah lawka Waiting shed lam chu min pan pui a, "Lo ṭhu la Coffee ka va lei a nge?" a jacket hak lai phelh mawlh mawlhin pahin a ti a.

A jacket min pek chu ka lo ha nghal thuai a, a lum vung vunga Lalbera Perfume rim a nam chem chem bawk. 

Dawr inhawng lampana a pen phei hlawk hlawk chu ka thlir zui a, a nu thil rawn sawi chu ka bengah a rawn ri nawn tluk tluk niberin ka hria.

Reilo teah coffee no pahnih chawi chungin a lo let a, "I mut a chhuak tawh a mi i va tum lian ve?" Coffee min pek pah a tih chuan ka lo nui mai a, "Ka hmel ve hrim hrim a lawm" ka tih chuan a nuih a za kher mai.

Min si chêtin ka bulah chuan a rawn ṭhu a, a kut lehlamin ka kut a hum ran bawk. Street light eng hnuaiah chuan a hmel chu ka en chiang a, a khabe bawr vung deuh lâk chu tuai sak zoh pahin "Hei hi  ti nge a?" ka lo ti vat a.

"Hruaisanga te ṭhianho nen kan inhmu a lawm mawle" a tih chuan thawk ka lo la hak a, "Ti nge maw in insual reng mai le, mipa naupang pawh in nih tawhloh hî....inrui a ni lo maw?" ka ti vin nghal hlak hlak a.

"Tihpalh aw" ka lam hawiin a ti zawi ruih a, a hmel chu a thu tak hle bawk, han thimrim viau ka tum tehlul nen a hmel chuan min ti tîm a ni.

"Zu ruih te, insual te, heng i nun dan vel hi keichuan ka duhlo, i sim thei lo anih chuan kan inkawp rei tak tak hma hian tawp mai a ṭha zawk" hma lam hla deuh thlir pah chuan ka ti a, ka kut a hmer na salh chu hrelo ang maiin ka melh ngai ka melh ngar a, inṭhen chungchang han sawiluh pui chu harsa ka ti takzet a ni, a chhanchu inṭhen ka duhlo.

"Ka rui ngai tawh lo tih i hriat kha" a tih chuan ka melh zawk a, inthlahrun hmel zeta minlo en chuan ka khawngaih leh tlat tawh.

"Ka hre hleinem dawt pawh min lo hrilh char char thei" ka la ti hram a, "Hrilh lo" tih pahin ka kut chu a hmui a tawh tir leh vang vang a, mitmeng damthlupin ka mitah tak min en ran a. "Ezra kum sawm thum i ni ve ṭep tawh, engtikah nge puitlin i tum?" chang fek fawka ka tih leh chuan thawk a la hluai a "Ka hria" tih leh a lama min pawh hnaih a rual zat a.

"Inhnial ka peihlo ania, i coffee kha in tawh rawh a dai a nge" a tih chuan sawitur hrelo fein Coffee no chu ka la a, ka rilru tawt lutuk chuan ka ngaihtuahna zawng zawng a la peng a ni.

Ngawi rengin coffee kan in duna, a lam ka hawi chuan dak meuhin van lam alo thlir a thla êng la bial chiah lo chu vanlaizawlah a lo êng ut a, kawtthler chu ati lang mawi em em bawk. Nu siamtei thil min hrilh chu sawi chhuah dan a vang kher mai.

"Ezra..." ka tih chuan  "Lalber tirawh" rang fahran hian a ti a, ka lam a rawn hawi leh chuan nui hmel a pu a, a hmel hmuh a nuam hle bawk.

"Lo inṭhen ta ila engtin nge i awm ang?" chhanna beisei nghala ka tih chuan  zawhna mit mengin  min  rawn en a "Kan in ṭhen dawn hleinem, i telloa ka awm theihloh zia chu i hriat kha"  a lo ti awlsam et a, sawizui ngaih a minti hrelo kher mai.

"Eng thil emaw vanga kan inṭhen lo ngai ta se?" ka tih leh chuan a meng taltapa "Ipan sawi a nei a mi?" a lo ti vat bawk.

"Neilo e mahse, a rilru chu i hriat kha kan chhungten kan inkawp an remtih loh chuan tilui zel pawh niila kan tluang chuanglo ang" ka tih chuan a lamah min kuai her sawk a, a hmel tum hmuk chu ka hmu nghalzat bawk.

"Inṭhen i duh a maw?" ner sawk chunga tiin ka mitah tak min en a, chhan mai chu harsa ka tih vangin a hmel chu ka en tlawk tlawka, chhanna ka pek mai loh vang chuan a lawmloh hmel hle bawk.

"Min chhang rawh?" tih pahin min thing nawk a, "Um ....inṭhen mai ang aw, a buaithlak emai" ka sawi zawh rual chuan ka ban a rawn hmer na riai riai a, a hmel chu a rumin huat hmel zetin min en a.

"Inṭhen ka duhlo tih i hria mahse, i chhungte vang anih chuan duhlo hle mahila ka pawm a ngai miau a lawm, a chhan chu i kalsan duh silo a" thawk lak hawk pahin ka bana min chelhna kut chu a thlah a, lu a tuai nghal vut a.

"Chhungte thu zawm mai hi kan tan pawh a ṭha zawk ang" zawi tea ka lo tih chuan ka lamah rawn thle nghutin a ṭhenzui sak a "Hmanlai mi an ni, thil pakhat lo ti ta che ipa chuan engtianga awm turin nge min duh zawt rawh a duh ang a piang chu ka ni thei ang, sawrkar hna a duh a nih pawn neih ka lo tum dawn nia" nui lek lek chungin a ti a, a awki ah chuan chapo na a lang tel hialin ka hria.

"E.....ngawi teh kha a makpa hual inti Raja deuhin a tih theih chu ka ti ve thei tih hrilh zawk rawh, khatiang mipa tuai hmel lutuk kha....." tih pahin a nui deuh hak a, a hmel  chapo hmel taka hawisang vah ah chuan hmana ka hriat ṭhin Lalbera kha ka hmuin ka hria.

"Ka dinhmun ah hian han inchan la nangin engtiangin nge i tih ang" thawk ipik zet chung chuan ka ti a.

"E le.. ka kawppui chu ka zui mai ang chu, ka duh anih te chuan" vin deuh hluk a lo  ti chu phawk fêin ka en a, a va han sawi awlsam tehtawp ve le, hepa hian ka rilru tur engmah a hrethiam phalo a nih hi!

"Chu reng chu i buaithlakna ania lawm Ezra, nanghi ka tana innghahna tlak leh rinngam turin i khawsa ngai silo a  engtin nge i he loa zui tur che a min beisei theih zawk a" vin zeta ka tih chuan a lo nuisuka, a nuih dan chu a huatthlala awm hle bawk.

"Ka beisei hleinem che, chuvang a lawm ka nawr ngailoh che, han inzawt teh kei hi min duh takzet em?" zawhna mitmenga min en chunga a tih chuan a mi en dan chu dang riauin ka hria a, min ti hamhaih lek lek a ni.

"Duh takzet lo che ila hei leh chen hi ka tawrh peih i ring em ni?" ka lo ti hap a.

"Ka hrelo le i luhlul vang ringawt anih loh ka beisei" a lo ti chu ka haw kher mai. Ṭha tete a kan inkar thu ka sawipui laiin engtin nge ka duh tak taklo ang zawnga thu a lak kual daih theih le! Ka ring theilo zawk a ni, amah ka duh em vangin Remtluanga pawh ka kalsan a, a chhan chu ka thinlungah amah duhna a awm reng vang kha a nia, ka chhungte duhloh zawnga ka awm luih ngar ngar na te kha amah ka duh em vang a ni bawk, ka luhlul vang ringawtah min chhuahsak chu ka tha a na takzet a ni.

"Nang pawn min duh tak tak nila i nundan hi i thlak daih tawh ang chu, ka thei ti reng siin tun thleng hian zantin fawr ila ṭhulh hleinem ti raw" ngeiawm zeta melh chung chuan ka ti a.

"Tun dinhmunah hian chhuanlam i zawng kual em?" min en ran chunga a lo ti chuan   ka thin a ti sa phat mai. "Chhuanlam zawn buai a ngai a mi, nangmah zawkin min pe zat zat a nih hi, zan rei tak tak thleng enge itiha khawiah nge i awm a, tu bulah nge i khawsak ṭhin pawh ka hre hrep lo e, innei ta ila hetiang i nih si chuan ka chan tur ka ngaihtuah lawk ve bawk a sin" ka thinurna vang chuan ka aw chu a khur titih der mai.

"Kha kha chhuanlam chu a nih kha, ka kalna ka hrilh ziah che a, min rinloh vang zawk a nih kha, che tisa viau turah min ngai a i laka ka rinawm zia hi engmah i hre lo, ka ṭhianten Call girl an awmpui vek laipawhin keichuan ka kut hmawr pawhin ka tawk ve duhlo tih hre rawh, chutih laiin nangchuan i theih tawkin min ringchhia a nih hi....mai mai chuan" a lu a tuai nghalvut chu che chang loin ka lo en reng a, "Call girl a?" phawk zeta ka tih chuan tum bur chungin ka lam a rawn hawi a.

"Theihnghilh rawh, i tan chuan mirinawmlo ka ni leh tho ang mahse, ka khawihlo, an thawm ka hriat phak rengah ka ṭhianten hmeichhia an khawsakpui laipawhin keichu i tan ka insum thei a sin, kha nula bulah khan ka hmangaih thu che hi ka hrilh bawk" a tih laichuan ka chhungrilah hian engthil emaw hian min rawn ṭham ut ut nimaiin ka hria.

"Chu chu engtikah maw?" zawi tein ka lo ti sap a.

"Ka hre tawhlo" a lo ti hmuk chu "I hria ang ngaihtuah let rawh" ka lo ti vin hlar a, maktih hmel zeta min lo en pahin "Kar hmasa a nimai thei?" a dar kan ak chungin a ti a, za lo zeta ka lo nui hak chu zawhna mitmengin min rawn en nghal a.

"Tenawm lutuk, kei ka room ah i bialnu rinawm tak ni chunga min lo call hun ka ngahlai khan Call girl ilo awmpui a" ka nui leh hak a, "Vanlalhlan..." a rawn tih chuan rum zetin ka lo melh a.

"Ka khawihlo tih ka hrilh che kha" vin hluka a tih te chuan ka thin a tirim telh telh mai. A khawih emaw khawihlo emaw Call girl kianga a awm ringawt pawh a huatthlala awm tawk tawh.

"I nun hi a ṭawp takzet a nih hi Lalber" ka tih chuan "Engtin maw i sawi a?" lawmlo zet hian a lo ti a.

"Engtin nge Call girl kiangah chuan i thlen theih? I pan zawk nge an pan che, i duhlo chung chung chu a bulah chuan i awmlo tawp ang, zan rei thleng thleng i leng chhuaka engtin mah in awm dunlo tih i sawi vang ngawt khan ka awih che ring suh, engmah keichuan ka rawn hmu ve lo" thinrim thaw sak sak chunga ka tih chuan "Engvangin nge i rin mai loh ang, Call girl bulah ka awm tih thu pawh keima sawi tho" bung zeta a lo ti leh chu a hmaia ka ben sawk lohnan ka insum ngar ngar tawh a ni.

"Ka sawi sei peihlo i nun hi buaina hlir a nih hi ka tel peih tawhlo, i sawi zawng ringawt pawhin ka luak ati chhuak" ka sawi laia min rawn ban a tum chu a kut ka lo vai thla tawp a, hepa hian insawifiah a tum lutuk na lamah a chet khawloh thu a rawn sawi chhuak ta zawk a, engtia tam nge hetianga ṭawp hnawk tak taka a nun lah ka hre derlo chu a nia.

"Barbie....min ring teh" tih paha min rawn ban leh chu ka lo tawlhsawn dawrh a, tihngaihna hriatloh hmelzeta min melhin "I tan ka rinawm reng ṭhin" a ti a, tunah hian a thilsawi engmah hi rinsak chi niin ka hrelo.

Ka lama a rawn tawlh hnai chiah chu a awma lo nam pahin "Ka peih tawhlo inṭhen ang" ka ti tawl a, "Engvangin? Ka phatsan ngai miahlo che a, ka bula hmeichhe ṭhu ringawt chu inṭhen chhan tur a tlinglo lutuk" nur zeta min en chungin a ti a. Ka thawk te lam lam a ti buai zoin ka hria, tinge maw hepa hi Essay type a chhanna pek kher a ngaih ṭhin le!

"Inṭhen duhna chhan chu tam tak ka nei, ka chhungte vang a ni a, i chhungte vang pawh a ni a bul ber erawh chu nangmah hi i ni, chhan tam tak infawk khawm vangin kan inṭhen a ngai tihna a nih chu" a mitah tak enchung chuan ka ti sak a.

"Tinge ka chhungte i sawi tel an ni chuan an duh che  a an ngaina bawk che, min nei duh anih phawt chuan keini lam chu kan inpeih reng a sin, a ṭha...i duh anih phawt chuan ka nundan hi ka thlah vek ang, ka tiam a che" tih paha a kutzungte a rawn tihpir chu phawk fein ka lo en a, ka awih theilo zawk, kan thilsawi a inpersan takzet a ni.

Ka thinrim luatah Nu siamtei min lo biakna pawh ka sawichhuak teuh kher mai. "Haw tawh ang" tih paha ka tho chu min pawt ṭhu leh a "Lungawi phawt la kan haw dawn nia" damthlupa a tih chuan a kut chu ka lo thinthlak sak a.

"Engmah ka sawi peih tawhlo inṭhen ka duh" ka ti chang leh bawla, a hmel chu ka hawisan nghalthuai bawk.

"A ṭha i duh tlat chuan ka tilui lo ang che, i pa duhthusam thlap kha i nei dawn nia" tih paha a  ding hluai chu ka melh zawk a, ka lam rawn hawiin "A makpa hual tuai deuh nen khan an inhmeh tawk chiah" a rawn ti leh kher chuan min ti lawmlo  hle bawk.

"Nia nia...nangpawn i nu duhthusam thlap kha neila, i fanu tan pawh a ṭha ber tak ang chu" ka ti ve ta ngat a.

"Ka chhungte sawiluh tum suh" bung zeta a rawn tih chuan "I fanu chiah ngaihsak mai teh " ka lo ti leh sak a, a huat hmel kher mai.

"Nang hi fanu ka neih vanga min nei duhlo te ini hial lo maw?" a rawn tih chuan ka lo inhumruh vak a, a teh hlauh chuan a!

"Nang leh i fanu ah hian ka buai peihlo tih i nu kha hrilh rawh, kan inṭhen thu te hi i haw veleh i hrilh nghal vek dawn nia" ka ti vin nghal hlaka, chutih laia a hmel chu dur ṭha tak a ni.

"A ṭha e...nang hi ka rin ang ilo ni biklo tawp a nih hi" a tih chuan "Tumah hi kan rin ang an ni lo" ka ti nghal vat a. A lu hawisangin thip zetin min melh a, min melh thluk tawp tum te pawh a ang.

"Enteh...Aruati hi ka fanu a ni a, ka enkawl pawh a la ngai maithei, anu pawn pasal neih leh te pawh a la duh anga chutih hunah chuan ka hnena a awm ala ngai ang, chuvangin kei leh ka fanu nena min pawm theitu hmeichhia ka neih a ngai, hei hi i buaina a nih chuan tlang takin sawila keipawn ka chelhlui biklo ang che" ka mitah tak chiang taka min en chunga a tih chuan ka na vawng vawng mai, ka ṭah a chhuak a  au chhuah chiam mai te pawh ka chak a ni.

A fa neih vanga harsatna nei ka nilo ti dawn ila kan inkar buaina siamtu a nih na chen a awm ve tlat si, anu khan Aruati fahrah hlauin naute nu nena suihzawm leh an duh thu min rawn hrilh anih si kha maw, ka hma a ding lah hian engmah a hrethiam ve der silo a ni.

"Inṭhen chu i duh takzet a maw?" zawi deuh taka a rawn tih leh chuan ka ngawi ran a, ka ngawih reng na chuan chhanna a pe a niang a che zui vat a, a Bike lampana hmanhmawh hmel taka a kal chu a hnungah muangchangin ka zui a, a bul ka thlen chuan Bike a ṭhu chungin min lo en a "A hma aṭang khan ne ne kual loin engkim sawitlang tur a lawm" a lo ti leh nghata ka sa pup pup in ka hria, Aruati duhloh vanga amah hnar angah min puh letder mai chu a nia!

Ka mittui a rawn hnam ṭiam ṭiam a chutihlaia "Lo chuang ta che mawle" vin zeta a rawn tih chuan ka phu nasa kher mai! 

Min vin kher kher chuan min runa a Bike a chuan pawh ka duhlo "Kal rawh" a dara nam pahin ka ti a ka ṭap lek lek bawk.

Hmalam pan chuan ka pen phei hlawk hlawk a, kawtthler reh ruih te chu hlauh tinah pawh ka tin tawhlo, chak deuhin ka kala ka awm tawt lutuk chu dawmin ka lungphu rang zet chu ka hre thei bawk.

Ka sirah chuan Bike a rawn ding zawt a "Luhlul chhuahlo khan lo chuang mai mai teh" a rawn tih chuan haiderin ka kal lui zela min rawn umzui ve zel bawk.

Ka hnunga a Bike a din rual chuan ka kal chak sauh a, thui ka kal hmanlo hnunglam aṭangin min pawt her sawk a ka lo rak zui ṭhat a. "Ana min thlah rawh" tih leh a ban chu chum ka rual a. "I â em ni, zan rei a nih hi" a tih chuan thip zetin ka melh a.

"A ṭha i duh ang chuan kan awm dawn a nia, ka rawn tibuai leh tawh ngailo ang che, chu vang chuan ṭha deuhin lo chuang mai rawh" chang zetah a tih chuan ka rilru a na zual sauh mai, amah ngeiin inṭhen thu a sawi hian ka na leh tho si a ṭhen chu ṭha ti viau mahila min ṭhen pawi tilo anga a ṭawng ve hlek pawhin ka rilru ana a ka ṭah a chhuak takzet a ni.

Ṭhen ka duh takzet anih chuan kha thu a sawi khan pawm viau tur ka ni zawk lawm ni? Mahse, ti nge chutiang chu ka nih siloh?

Anuin min rawn biakna te kha ka hrilh ve vek zawk dawn em ni tiin ka rilru chu a buai hle a, hrilh ve mai aṭha in ka hria, hei chu kan inkar a ni a kan pahniha kan buaina te pawh kan sawidun zel mai hi a ṭha ber zawkin ka hria, chutiang nilo a alaka ka zep hi a ṭhalo zawkin ka ring ta bawk, ani pawn ka pain a duhloh thu chiangtakin a hria a a chhungten ka lam an hawi biklo tih hi a hriat ve ngei angai a ni. 

Ka banah kai a a Bike dahna lam min pan pui hlawk hlawk lai chuan "I nuin min lo bia a" ka ti ta ngawt a.

"Enge ka nu chu?" maktih hmel taka min lo enchungin a ti a, chhan ka tum laimekin "Enge a rawn sawi a?" a ti leh zat a. 

"Nupui neiturin a duh che a" a mitah tak enchunga ka tih chuan chiang fein min en ran a "Ka hrilh che a nilawmni ka chhungte chu an inpeih tawh tih kha" lawmlo awka zeta a tih leh chuan thawk ka lo la hak a, ka hrilh hi ka inchhir leh loh hram ka beisei. 

"Ih e...I nu chuan Aruati nu nen innei turin a duh che u a, i lak aṭanga inthiarfihlim tur hian min duh bawk" sir lam hawia inher pahin ka ti a.

"Eng maw i sawi?" tih pahin ka ban a rawn pawt sawk a "Ka sawi chu i hria a lawm" ka tih chuan a hmel chu a nur nang a, a landan chu a nelawmloh hle bawk.

"Nu leh pa kara seilen chu Aruati tan pawh a ṭha ber ang keimah vanga a fahrah " ka tih laimekin "Chu chu ka buaina tur zawk a nih chu, ka nu chu ka bia anga kan sawidun leh dawn nia" a lo ti   a.

"I nu chuan hrilhlo tur chein min ti a mahse, nang nen hian kan sawidun ngei ngaia ka hriat vangin ka hrilh che a nih chu, a chhan chu i fa neih vanga pawm duhlo che angah min ngaih i tum tlat bawk si a" ka tih chuan min rawn din hnaih a, "En teh nanglo midang neih tumna ka neilo, ka chhungte chu ka bia ang, he thil vang anih chuan inṭhen tih vel kha chu theihnghilh daih rawh" tih pahin ka dar tawn tawnah chuan a rawn vuan a, ngenngawl tak min enin ka chhanna a ngaichanga, chutihlaiin ka rilru chu a buai nuai nuai ni berin ka hria.

"Kan pahnih hian inkawp tura ruat kan nilo aniang" ka ti zuai raih a, chu chu ka ngaihdan tak pawh a ni, mi inngaizawng dang te ang pawhin ual au takin kan inkawm ngailo a, khawlaia inzui chhuah phei chu kan nei khat hle, a tu ve ve mahin chhiatpui leh enge maw nana kan inhmang miahlo chung pawhin dodalna kan tawk renga, ahmasa berah ka pa a ni a, ani pawh a tawrhhlelhawm tawh tehlul nen tunah Lalbera chhungte an ni veleh a,  heti chunga kan inlaichinna kaltlangpui zel hi kan tluang  pawhin ka ring tawh meuhlo a ni.

"Khuanu ruat tih velah ka buailo ka nu chu ka lo sawipui ang, harsatna dang i la nei em?" a rawn tih leh chuan "I sawipui theilo ang, i sawi a nih chuan ka hrilh che tih a hre dawn a sin, ka tan a nuam hleinem" ka lo ti ṭeu hlar a.

"Anih chuan inru mai ang" a lo ti chu phawk zetin ka en a, inruk hi tinge maw a sawi awlsam em em le, tun dinhmunah ngat phei chuan a chhungten min lawm dawnlo nasa mai a, chutiang chiahin ka pa pawn.

"Kan inru ngawt thei hleinem" ka tih chuan "Enge a theihlohna tunah min zuila thingtlangah kan kal dawnnia" a la ti tak tak deuh deuh a. 

"Ka duhlo, ka thaw iti ipik ania" ka bana a chelhna phelhsak pah chuan ka ti a, ka ngaihtuahna a buai a ka tawt up up mai, inṭhen leh inruk chauhah duhthlan tur kan nei ta mai chu a nia, a khawi ve ve pawh chu thlang ila inchhir leh dawna inhriatna ka nei a ni.

"Anih chuan engtia awm nge i duh, min nei duh lo a, chuti chunga i chhungte remtilo kara inkawp reng hi ka tan pawh a tha nat thlak ve a nia" awki chang zeta a rawn tih chuan ka ngawi ngal a sawi mai tur pawh ka hrelo.

Zui ringawt ila engtin nge kan awm zel ang, hlauhthawnna in min ṭham a a laka innghat pumhlum tura zui chu hreh taktein ka hreh a, a chhungten min lawm dawnlo tih ka hriathnu phei hi chuan ka zuam hlawllo a ni. 

"Aṭha e, kan inṭhen dawn nia" a rawn tih chuan rang lutukin a hmel chu ka en a, thinur hmel pu lek lek chungin a hawisang vah a kan piah hla taka street light lam chu a thlir bawk a, a thilsawi chuan min vilh ngut ngut maiin ka hria.

"Inṭhen i duh tak tak maw?" zawi te a ka tih chuan "I duhdan a nilawm ni?" bung zetin a lo ti thung a, min en duh miahlo te chuan min run a ni.

"Ni e, ka duh dan a nia lawm, kan vaia tan pawh a ṭha zawk" ka ti ve ta ngat a, ka chungril lam erawh a na vawng vawng thung, ka rilru zahve chuan inṭhen chu ṭha ka ti a mahse, tunah hian inṭhen a duhloh thu sawi sela min leh ngen tlat sela tihna rilru ka pu lawi si a, mahni hmasial tak leh chapo tak ka lo nih dawn hi.

"Lo kal rawh ka thlah ang che, a tawpna a ni tawh dawn bawka ṭha deuhin lo ṭhu mai mai teh" tih leh hnunglam aṭanga ka dara vawn a ruala, a Bike dinna lamah chuan min nam phei dat dat a, 'A tawpna' tih thu a sawi te chuan min run deuh deuh a ni, engmah sawibuailo chuan a Bike ah chuan ka ṭhukai a, a hnung thei ang berah ṭhuin ka invuan ṭunga, a taksa dehloh hram ka tum bawk.

Chak deuhin a tlana, kawng kawiah te chuan a hrut hniam lui vak vak a min runluih nimaiin ka hria min ngaihsakna nei maploa chutianga a tlan chu ka hua a mahse, engmah sawi erawh ka tumlo bur thung.

Ka be lo a  ani pawn min be biklo. Min bia sela ka ti, chu chu ka rilru a ni.

Min bia sela ṭha deuhin a biakna ka chhang ang, nidangah chuan ka tihtauh pawhin min thlem char char ṭhin a, a Bike hnunga ka invawn chang phei chuan ka kut lain a kawngah min kuah tir ziah ṭhin a mahse, zanin chuan a ti hauhlo. Tawpna tak tak kan siam dawn a ka hriat vangin a tawt up up a, ka awmdan chu a hrehawm vel vek a ni ber mai.

Kan kawt kan thlen chuan a ding dawt a, a hnungah ka va bet chawt a ni ber e, engmah sawisel loin ka insiamrem zui a "In mangṭha na a nih kha" nuisuk chunga a rawn tih chuan chhan let ka tum zuau a mahse, kan inhnial leh mai dawna ka hriat vangin ka ngawi leh ta zawk a.

A Bike aṭanga chhuka kal mai ka tum chu ka kut a rawn vuan a, a hmer vawng vawng a a hmel ka en chuan  Helmet a khum vangin a mit chiah ka hmu thei a, a landan chu ka hrethiamlo a nui nge a tum tih takngial pawh.

"Hlim deuhin awmla keimah ang hi chu ngaizawng duh tawh suh, ngaihzawng ṭha deuh i nei tawh dawn nia" awki zang vahin a ti a, chhang lo turin ka insum hram hram a chhan let erawh ka chak takzet, sawi ve duh pawh ka ngah mahse, inṭhen a zuam lutuk hian ka tha a ti na deuh tlata ka luhlul chhuahin ngawih ka chuh lui hram hram thung.

"Mangṭha aw" nui lek lek chunga a rawn tih leh chuan "Mangṭha le" awki dam thei ang bera tihpahin ka inhersan a, pen hnih awrh ka pen hman ang tih ah "Ka rawn tibuai lo ang che ka thei nge theilo chu i lo en dawn nia" chapo aw zeta a rawn tih leh vang chuan ka ding dat a, inhumruh ṭeuh chungin ka hma lamah chuan ka pen zui hlawk hlawk a, step ka thlen ruala chak lutuka a tlan chhuak ri chu ka hre zuizata, inherin kawng kawia a tlan liamna lam chu ka thlir zui a, ka tawt lutuk chu ṭah chhuah hawm hawm ka chak a ni.

Ka chhungte chu an reh ṭhapa, ka chhuah hlanin tumah tho chhuak an awmlo a nih hmela a tihzia hlauh e,  choka ah lutin tui vawt ka in khawlh khawlh a, ka sa pup pup chu a tihzia phah chuang hauhlo. Chawmawlh zetin dawhkan sira Chair ah chuan ka ṭhu a, ka ngaihtuahna tawi tup vang chuan che changloin ka ṭhu ta reng a, engtia rei nge ka ṭhut hman ka hrelo ka phone rawn eng zawk chuan ka ngaihtuahna a la peng a, tu dang niloin Lalbera message a  ni.

"Barbie" tih te mai, a message ka chhiar zo chu thawk ka la hawk a, dawhkanah ah chuan bawkin turverh darthlalang aṭanga thla engin inchhung a rawn chhun en lam chu ka melh ngawt ngawt a, Lalbera nen kan inbiak dan zawng zawng te chu ka ngaihtuah let leh a ka mittui a rawn hnam zui ṭiam ṭiam a. Ka insum buai peih tawhlo, ka hmui hupin ka ṭap a, ka insut zui hlawp hlawp a, tihian ka ṭap anga ka rilru tawt lutuk hi ka in ṭap thawl huai thei mahna.

Ezra - pov

"Bawiha i harh tawh em?" ka room kawngkhar pawnlam aṭanga ka u in a rawn tih chuan ka inkhuh ṭha sauh sauh a, Hmeichhe naupang aw in "Âpa" a rawn tih ri vang chuan ka harh chiang hle thung. Zing zingah enge hetah a rawn tih chu le?

"Ezra, rawn tho la inkhawm kan duh a chawiei hma a ngai a nia" kawngkhar ben leh dawp paha ka u in a tih chuan ka tho chhuak ve nghal thuai a.

Ka inphih harh hnu a inhnuaia ka chhuk chu Sitting rooma Emma-i leh ka pi lo in be mawlh mawlh chu ka va hmu a, chutih laiin choka lam aṭangin ka U in Aruati a lo pawm chhuak mek bawk a, chawlhni tuk zing hma taka an nufa a ka hmu chu ka hamhaih lek lek a  ni.

"Âpa kawr mawi ka nei a" tih paha ka fanuin min lo nui var var chu ka nuih tawi tak a, "Lokal teh" tih pahin ka U chu choka lamah ka pawt phei zui a.

"Enge an lo tih dawn a?" Aruati en paha ka tih chuan "Chaw an lo eidawn a nih hi" a lo ti sam et a, ka nu hian a sawm a ni ngei ang, engvanga a thu thu a thil lo tikual vel nge maw  anih le? Min rawn eihlo lehnghal!

"Ka nu hian enge a ngaihtuah a hetiang thil hi tih a ṭul miahlo a sin" lawmlo fe a ka tih chuan ka U chuan min lo mitmei zauh a, a hmeichhe naupang pawm laichuan ngun fêin min lo en ve kiau chu niin.

"Reuh chuan a" tih hluk pahin Fridge ka hawng a, tui ka in mek laiin choka Bathroom aṭangin ka pu a lo chhuak a "Mapui in inpeih tlan chuan chhung inkhawm nei ila" a ti a. "Inpeih a ni mai Mitein kawr ala nawt laklawh a nih kha" ka U chuan a lo ti vat a. Chutihlaiin an chawhmeh siam enin bel ka lo hawng kual dan dan a "A hrana ei tawhloh tur aw" ka u in a lo tih chuan ka chhanglo a, an ruala chawei erawh ka chaklo hle thung.

"Sunday tuka vawksa hmeha UPC nihloh bawk hi chu..." ka U in a tihlai mek chuan ka lo nuichhuak hak a, "Aruat vawksa i ei ve duh em?" ka fanu lamhawi chuan a ti zui a "Um..ei duh" Aruatin a lo tih chuan ka lo nuive suk a, chutah ka lam hawiin min rawn nuih var var a, a hmel hmuh a nuam kher mai.

Ka pa Envelope sem rawn haw chu Sitting room ah a lut tlanga "Emma inlo thlenna a rei tawh em?" a tih ri chu ka hre pha a, an tih dan teh hluak chu ka duhloh zawng tak a ni.

"Âpa chuan maw a tetlaiin vawksa a ti thiamlo a Savawk a ti ṭhin a" ka fanu en paha ka U in a tih chuan Aruati chu a lo nui ve hak hak a. He hmeichhe naupang duhawm zet hi ka enkawl hreh hauhlo ka chhungten an zuam anih phawt chuan mahse, a nu telloin.

A chhanchu hman aṭanga tun thlengin Emma-i hi duhna ka la nei hauhlo a ni, kan inhriat ṭan tirh kha College ka kal lai ania, kan Basketball khelhna ah an ṭhiante  an lo ṭawiawm ṭhina chuta ṭanga inhria chu kan ni, kan Spot ho fo a nula hmelṭha pangngai tak leh hawisang ve larh mai a ni a, an ṭhianho chu college ah an lar viau bawk a chhan pawh tumah zah em em an neilo a khawiah pawh leng em em vek chi an ni.

Min ngaizawng hmasa a khatih laikhan nula kawp kual ka chin lai ani a, Lalfakawmi tiamin hmeichhe hrang hrang ka kawpkual a, chutih laiin Emma-i a lo rai a, tum lawk leh beisei hauhlohin pa ka ni zui dera, a hunlai khan eng he hu ah ka ngai ngailo mahse, tun hnu hian ka nun pawlawh lutuk kha ka inchhir ṭhin, ka bialnu bulah pawh hmai a uang thei meuhlo chu a nih kha.

Ka fanu tan erawh pa ṭha tak chu ka la nih ka inbeiseia harsa erawh ka ti ṭhin, a hmel ka hmuh hian tlingtawklo intihna leh insitna ka nei fo a, midang kianga ka awmdan anglo zetin ka inthlahrung bawk a ni, hetianga ka awm chhan hi ka hrethiam bik tawh biklo Magic ang mai a ni.

"Vitei te kha Adventist an ni em khah?" ka u in alo tih chuan Roman Catholic kohhran an nih thu ka lo hrilh a, "Ala zia chu vawksa eitheihlohna kohhran ah chuan keichu ka awm dawnlo reng reng " nui ruh ruh chunga ka u in a tih leh chuan "U mama chu Catholic ah a la lut dawn chiang lutuk" Dintein a lo ti a, zaizirin sawilo turin ka lo hrilh a, Sitting room atanga lo chhuah paha ka nu in rum zeta min lo melh chu ka lo nuihtlawn a, Catholic ho tihdan phung an Office aṭangin a lo hria a tunlai chu ala vung thar ngang mai.

Catholic kohhran chu inneihna thilah an  strict a, hmeichhiain kohhran pawn mi pasal a neih dawn chuan mipa chuan Catholic kohhran a zawm ve a ngai a, chutiang an theihloh a inneih ṭal an duh si chuan Hmeichhe lamin nula man chu an dawng theilo a inhranga an chhungten an dawn sak mai ṭhin niawm tak a ni. 

Ka pu hi Presbyterian kohhran upa a ni a, Synod executive committee member a ni bawk, ka pa lah pavalaiah nihna eng engemaw a chelh ziaha chutiang bawkin ka nu pawh, ka chhungte hian ngaihdan nghet tak mai an neia, ka pu rawngbawlna hi kan zui turah an ngai bur a, Vîte nen kan inkawp tak si ah chuan kohhran danga ka pelhe mai ka nu leh ka pi hian an hlau a, ka nu hian engemaw chang hian sawichhuah zauh a chinga, a thawhna School lama mi titi aṭangin Catholic dan leh hrai te a lo hre ve leh zel bawk nen hetiang meinei deuh deuha min chhaih hi a ching ta a ni, engahmah phei chuan ka ngailo.

"Rosary hi ka ta tur lei ve ka duha, Mîte an zawrhna i hre mial em?" ka tih chuan ka hnung lamah ka nuin min melh rum tih ka hre thei, a chawhmeh chhuanglum tur thawm chu a reh hmak a, ka farnu te chuan nui tet tet chungin ka hnunglam an en bawk.

"Malsawmhlu pâwt loh loh khan pâwt pâwt suh, ka vaw zuang ṭawk tur che nia" a rawn ti zui zat a, a la duhtawk mailo "Mipa zawk hmeichhe kohhrana lawi te phei chu apa loh thlak emai" Gas thuk kah alh phat phat pah chuan a ti hlak hlak a, keini ho chu kan lo nui ṭhaw thung a.

Ka pi leh Emma-i sitting room aṭanga lo chhuak mek vang chuan ka i her daih a, ka nu dara kuah pahin "Ka U ṭawngṭai hun a nia aw" a beng bulah ka ti sar sar a. "I zah theihloh chu a" tih paha ka naka min nghawksawk chu chhanna ka dawn a ni.

"I hre viau ang" ka kutchang elh rik khap paha ka tih chuan min phun khum leh hluka, min ṭawngṭaitir a nih chuan a sa khawp ang le, enge ka tih chu a hre mai ang.

Sitting room ah chhung inkhawm neiturin kan kal a, ka Pa hun hman tuk a ni a, kei ka ṭawngṭai hun a ni bawk, ka u- chu ding turin ka mitmeia a ding duh ṭhaklo, a naupang pawm chiah a ni a ngaihtuah ni.

"Ezra ṭawngṭai sela, a ṭawngṭai zawhah zinglam ṭawngṭaina sawiin kan hun kan titawp dawnnia" ka pan a tih chuan "Ka u hun a nia" ka lo ti vat a, Emma-in min lo melh reng vang chuan ka hawisawn rang hle bawk, mikhual awmlaia ṭawngṭai chu ka duh hauhlo, ka ṭawngṭai hian ka dang a awk deuh ṭhina, kan chhungkua nilo te hriata ṭawngṭai ka duh lo a ni.

"I ṭawngṭai hun a nih kha" ka Pu in a lo tih chuan ka U chu ka va melh leh a, a mitko san ralhin ding turin min lo Signal a, an tihdan mai mai chu le...

Ka nuin ka naka min rawn nghawk tak sawk vang chuan phur lo fê chuan ka ding ta nge nge a, ka ṭawngṭai chu ka ngaihtuahna a tawi vek mai, ka ṭawngṭai ve changa ka sawi ziah ṭhin te chu ka han dil nawn leh a a chang pawh a khat ṭha leh viau mai.

"Ropuina chu pa leh fapa leh thlarau thianghlim hnen ah awm rawh se, a tira awm angin tunah leh chatuanin Amen" ka ṭawngṭai zo chiah chu ka lam a rawn hawi ṭhap a, ka nu hmel ka en chu a lawmloh hmel nasa ngang mai bawk a, kei erawh ka lo nuisuk thung.

Chhung inkhawm kan zo chu ka nuin  ka hnungah min rawn sik hlawk hlawk a "Kha kha a zir tir che em ni?" vin kha kha chunga a tih chuan chhangloin ka lo nuih liama, a huat tawk chu a tling leh viau a ni.

"Chaw eikham veleh min thlah angai dawn ania aw" Emma-in a tih chuan "Car in inhaw dawn nia" ka lo ti sam et a, ka sawm a nilo a duhleh a sawm tu ten an thlah mai aniang chu.

Chawei laia ka bula Emma-i te nufa ṭhu chu melhin pahin ka nu chuan "Chhungkua in ang tawh emai, tiang khan han awm thei tak tak ula ka duhthusam a thleng a nimai" nuisang chungin a ti a, ka U lo nui hak chu enin "Over i ti ve tho e law?" ner sak chunga ka tih chuan "Ezra, chaw eilai a nih hi" ka pain a lo tithuai a.

"Ka duhthusam ka sawi anih chu" meinei zeta ka nuin a lo tih leh chuan "Aw....i duhthusam leng thlawk kualvel" ka lo ti hluai a, min melh rum ram ram chu enin ka nui duh bik hauhlo, nizana ka thil hriat chung chang kha engmah ka la sawipui hauhlo tih ka hrechhuak chiah bawk.

*CHAPTER -20*

Engtin nge maw ka lo theihnghilh daih theih chu le, nizan te kha chuan ka lawmlo hle a, In ka thlen ruala ka nu muhil tawh chu thil awmzia zawt tura khaihthawh mai te pawh ka duh rum rum a nih kha!

Muthmunah pawh insehruhin ka muhil theilo a,  zan rei tak thleng ka men phah bawk kha a nia, engtin nge maw ka han theihnghilh theih zawk ni!

Keihi ka â tawh takzet a ni.

Tukṭhuan eikhama ka nu insiam tur chu an pindan lamah ka zuilut a "Inkhawm i tumlo leh pek em ni?" ti a maktih hmel taka min lo enlai chuan tum bar chungin an khumah chuan ka ṭhu a. "Puitling anga kan inbiak a ngai a nia" melh rum râm râm chunga ka tih chuan min nuih duh lek a, "I inkhawm dawnloh chuan Aruati te nufa khan inkhawm an duh kha lo va thlah rawh" min hnung chhawn a a thawmhnaw bawm hawn  pahin a ti zui a.

"Chu chu a nia ka sawitum chu engvanga chaweia sawm ngawt nge maw inih le? Ngaihloh lamah a chhungten an lo ngai thei a sin, min suihzawm tumna rilru te inlo nei anih ngat phei chuan ka duh hauhlo a nia" ka ti a, ka beisei anga anlo inngaih chu ka duhlo, chutiang anga an lo ngaih chu ka hlau a Aruati pawh ka tlawh pawhloh phah fo ṭhin.

"Ngaihtuah chiang mangloin ṭawng mai mai suh, i pi leh pu te nena inrâwn khawma kan thutlukna a ni, Aruati hmakhua pawh ngaihtuahla, nu hrawn emaw pahrawn kara seilian turin i fanu hi i phal a mi, keini chuan kan phal reng reng hleinem" ka nu in a tih chuan ka lo nui hawk a.

"Bialnu ka neih kha i theihnghilh a mi?" pawr fe a ka tih chuan ka lam a rawn hawi a, "Kan thu awihla Emma-i hi ngaihven zawk rawh, Vîtei chu keiman ka lo hrilhfiah ang, hmeichhe fel tak a ni a a hrethiam lutuk ang che" a tih chuan awihlo zetin ka lo en a, tinge maw  hetiang rilru hi a put thut le? Tunah khan hmeichhe fel tak a nih thu a sawi a mahse,  min ṭhen turin alo va hrilh leh lawi bawk si a. 

"Emma-i chu theihnghilh rawh, engvanga Vîtei hi duhlo thut nge i nih a?" hrethiamlo fe in ka ti a. "Â â suh,  i len ṭumin a pan alo ṭawng khum hrep che a nilawm ni, ka fapa hmelṭha leh fel lutuk hi alo duhlo ngam vela mai mai a. Tum tawk leng an bo lo a fanu changlo pawh kan hmu ve lutuk a lawm" a ti zui hmarh hmarh a, min ti dang lek lek a ni.

"Engtin nge i hriat a?" ṭi deuh dai a ka tih chuan " Emma-i u in min hrilh a lawm, a tirah ka awihloin i ṭhianpa Ropuia kha ka lo zawt a, in lendun ṭum pawhin a lo ti zak hrep tawh che u a niawm a kha, induhtawkna te pawh nei ve ta che, a len pawh va leng tawh hlek suh" a aw ah chuan a lawmlo hle tih a hriat theih, ka nu hi chu hetiang hian a thinur lai hian a ri hluaia a pai rei ngai lemlo thung.

"Ka leng ngailo e a" ka lo tih chuan "Len len angailo" a lo ti leh hluk a. Ṭhinrim deuha biak tum zawk ka nihlaiin amah zawkin min la thinrim khalh char char zawk chu le. "I va bia a nimaw, tinge khatianga i va tih a keimah min sawipui zawk tur i nia sin" lawmlo fe chuan ka ti ve ta a, min melh zawka lehlam a hawi lehnghal thuai bawk a.

"Ka be lo" ṭeu zetin a ti a.

"I biak kha" ka lo ti ve nghalzat. Rum fahranin min rawn melh a "Iak iaklo khan thu awihla a nimai, i tana ṭha ber tur a nia kan ngaihtuahsak che, Vîtei pain a hmuhsit che ka phal reng reng hleinem" a tih leh chuan thawk ka la hawk a "Va kal duh tawh miah suh, Sawrkar pisa a thawk pakhat ve maiin ka fapa a hmusita ka lawm hauhlo, sawrkar hna te chu ipa nen kan thawk ve reng a lawm, inla Officer lian viau mahse, a neih theih ang chu kan nei ve thei vek" a thinrim inhrosa vel chu nur nangin ka lo ngaithla a thawk a ti ipik riau a ni. 

"A induhtawk theihloh a nih hi" bung zetin ka lo ti a, "Engah ngawt chuan maw?" a puan bih ṭhat mawlh mawlh pahin min lo en "Engah nge ka lo huat ngawt ang, a duh dan danin ka lakah ngaihdan a nei thei a lawm, ka nihna anih miau chuan ka huat theih a ni hleinem" ka tih chuan ka nu hmel chu a ngui bar a.

"Mahse, Vîtei hi chu a danglam a sin, a pa nen chuan an mizia a danglam a lawm, chulo ah a niin tihsual a neilo a, he thil vanga kan inkar tawpsan a nupui dang neih tihvel chu tumna ka nei lo a nia, min nawrluih tum miah suh" ka nu en chunga ka tih chuan ner sawng chungin min lo en a.

"Thil dang zawng zawng aichuan Aruati i ngaihtuah zawk tur a ni" chiang fek fawk hian a ti a.

"Chuvang a lawm nupui ṭha tak neih tuma ka buai reng ni" awlsam fe a tih pahin ka nu lamhawi chuan ka nui a, a nui ve duh hauhlo "Aruati hi nuhrawn hrawn turin i duh chiah maw?" zawhna mitmenga min en chungin a ti, enga tinge hetiang zawng hian angaihtuah fo mai le, kan sawilai mek hi Vîtei a ni a hmeichhe fel tak anih piahlamah Aruati pawh a nelin a duat bawk a, nuhrawn sual tak tur ang maiin ka nu hian a ngai nghal ngawt nimaiin ka hria a ni.

"Vîtei pa chu ka la hneh thei em em ang, chuvangin nangtal chuan kan dinhmun lo ti harsa lo teh" ka ti nghat a.

"Bawiha i va thlah dawn a ni lawm ni?" pindan kawngkhara lo dah pahin ka U in a ti a, "Motorin va thlah mai rawh" ka lo ti vat a. "I inkhawm dawnloh chuan nangman va thlah rawh, i u inkhawm tura insiam angai a buaithlak" ka nuin a lo tih chuan phurlo fein ka U chu ka zui a.

Kawtah Emma-i nufa chuan ka nu pangpar  chin an lo enkual a, min hmuh rualin "Enge i tih reng a i va rei em em ve?" a lo ti nghal tawng a. Chhanglo chuan ka Bike chu ka tinunga, an nufa chuan an lo ṭhu kai ve nghalthuai bawk a.

"Malsawmhlu kan lo kal hi i va lawm awmlo ve a?" Emma i chuan a ti a, ka chhang buailo. Chak deuhin ka tlana ka fanu te chuan ka kawngah min lo kuah ṭai a, kan tlanchhak chu nuam a tih hmel viau bawk.

"I bialnu nen khan in la ṭha maw?" Ka Bike aṭanga chhuk pah a a tih leh chuan "Ṭhatloh lai kan neilo" ka lo ti nghat a, ṭhensak chungin "A nih ka ring" a lo ti a, nuihza hmel a pu lek lek bawk. 

"I bulah ka nuin engthil pawh sawi sela ka hriatpui vek lemlo tih i lo hre dawn nia" awki pangngai zawka ka tih chuan "Nula bak ngaihtuah ila neilo a nih hi" nersak chungin a ti a, ka ṭawng leh hmain Aruati kaiin inchhunglam a pan zui vat a.

In ka thlen leh chuan ka chhungte chu an lo chhuak diak tawh a, ka ngaihtuahna ah chuan thildang a leng hleithei meuhlo a ni. Nizan lam thil thleng te ka ngaihtuah a, engtia han tih tur nge tih chuan ka rilru a luah a, Barbie nen kan inkar hian hetiang ngawt chuan hma a sawn thei dawnlo tih ka hrechiang hle bawk.

Enge maw ka tih a ngai a rilru buai zia ka hria a, chutih rualin inṭhen tak tak a duh biklo tih chu ka hria, a rilru zahve chuan ka lam a awn a, a bak zawng erawh hlauhthawnna in a uai bet thung, keimah a rinna nei turin engtin nge ka siam theih ang? Engtia hma han lak chi nge tih chu ka bangbo riau a ni.

A hmasa in ka chhungte nen inlaichinna ṭha zawk ka siamsak a ngai a, a pa rilru ka hneh a ngai bawk, chu mai niloin a rinna ka hlawhchhuah a la ngai cheu! Ngawi teh chumai ala nilo nizan khan kan inṭhen daih a lawm mawle. Ngaihtuah rawh Malsawmhlu engtin nge i inchinfel dawn?

Hrep chuan a....Ka ngaihtuahna buai lutuk chuan ka lu a rawn tina thei hialin a nia ka hriat ni.

_________________

VLI - pov

"Rema a lo lenga lo chhuk ta che" ka nuin a lo tih chuan ka lo meng rang hle a, "Ka chhuak lawk dawn a, thingpui te lo zuk lum sak rawh" a tih vang chuan peihlo zetin ka tho zui a, inhnuai ka thlen thlak ruala Remtluanga hmel ka hmu chuan ka thawk a ti ipik deuh deuhin a nia ka hriat ni.

"Question hlui ka lo Collect a" nuisanga a tih chuan za lo zetin ka nuih a, a lehkha min pek chu ban pahin phur fahranlo chuan lawmthu ka hrilh a, ani erawh a hmel a hlim sarh a, a ṭawngkam a zangkhai hle bawk.

"Thingpui kan lum ange" tiin choka lam ka pan a, ka let leh chuan ka pa inkhawm bang a lo thleng ve chiah a, kan bulah chuan lo ṭhuin Remtluanga chuan a lo be nghal bawrh bawrh a, Kohhran chung chang a sawi vangin Tv ka en san ta daiha an titi chu ka ngaithla peih meuhlo a ni.

Nau-a leng lo haw chuan kailawn bul aṭang chian min rawn signal zauh zauh renga, enge a awmzia ka hrethiamlo, a kut zaizir meuhin a sawi a, ka pa hriat a hlau a ni tehchek a niang chu.

Thingpui no senga choka a ka phei leh chu min lo zuia "U vîte, pawnah a awm a nia, min lo koh sak lawk teh a ti" Nau an a tih chuan phawk fein ka lo en a, Lalbera chung chang a sawi ang tih ngaihna reng ka lo hrelo.

Thlanglam tukverhah chuan ka daka, kawta a dinna ṭhin chu a lo ruak huaia a hmel hmuh tur a awm hauhlo. "Khawiah nge i hmuh a?" ka tih chuan "Dawr kawtah khuan a awm mahse, a rui maithei a nia, a  nam deuhin ka hria" a ti a.

"Enga tan nge min tih a?" ka tih leh chuan "Ka hre bik nang?" a lo ti vin hluk a ka rilru a buai kher mai, tun ang zan la hma takah tinge maw a lo kal reng reng le, ka pa a la menga a ni zu rim a nam lehnghal a nih phei chuan hmu tura zuk chhuk chu thil atthlak ber a ni hial ang.

"Chhuk duh suh, ka pa a awm bawk sia Phone zawk mai rawh" Nau an a tih chuan ka lo bu nghat a, Sitting rooma ka let leh chuan Remtluanga leh ka pa chu an lola titi mawlh mawlh a, Pathian thu aṭangin Politics lam an lo sawikai der tawh.

"Ka chhoh san mai dawn che a sin, tih tur neuh neuh ka la ngah a" a paper min lo kensak lek chhuah pah chuan ka ti a. "Awle...ṭha deuhin i inbuatsaih dawn nia" nuisanga a lo tih chuan kailawn lam chu ka pan zui a.

"I lo enpui thei ṭhin chu a tih zia hle mai" ka pa in a tih ri chu ka zui zat bawk.

Ka Room Balcony aṭang chuan thlanglam chu ka thlir a, amah awm reng reng tumah ka hmulo a , a haw tawh anih ka ring. Luh mai tuma ka inher laichuan ka phone a lo ri a, tudang a nilo amah Lalbera ngei a ni.

"Aw.." zawi tein ka ti a, chumi rualin "Barbie" a lo ti ve chiah bawk.

"Enge nita...?" awki pangngai taka ṭawng ka tum viau nain ka aw chu a zawi hle tho. "Tun dinhmunah hian khawiah nge ka awm i hre duh em?" zangkhai zet a tih chuan kawt lampang chu ka hawithla leh a, hmun dangah a awm a nih ka rin vangin "Khawnge i awm a?" ka lo ti ve mai a. "Inkawtah i nu dawr bulah hian ka awm a, reilo te inhmu lawk ila" a lo tih takah chuan ka thinphu a rang nghal dut dut mai.

"Lehkha ka zir a" tiin chhuanlam ka siam a, hmuh chu ka chak ngei alawm tunah ngat phei chuan ka ngai em em a ni, a chhan chu kan inkawp tirh aṭanga kan inṭhen hmasak ber na a nia, nikhat chauh la liam mahse, a hrehawm lutuk tlat a ni.

"Ka lo chho mai dawn aw" a rawn tih lah chuan "A ngailo, a chiloh" ka lo ti tlat lawi a,  "Reilo te hmuh che ka duh a" a tih leh te chuan a aw ri chuan min fan rawih rawih a ni.

"Nizanah kan inṭhen tawh kha.." ka lo ti zawi sap a. 

"Kan la kir leh thei lawm ni?" muang raih hian a lo ti a, a aw ah chuan zu rui chu a ang hauhlo.

"Tinge..?" ringhlel rum rum chuan ka ti leh a, ka awm ang tho hian alo awm ve em mawni dawn le? Hlimna mak deuh ka nei a, chutih rualin ka lungchhe tel bawk.

"A chhan chu maw ka ngai lutuk che Barbie" a tih chuan sawitur hreloin ka ngawireng ringawt a, ka lungphu ri dut dut te chu ka hre pha hial a ni.

"Min ngai ve em?" thawk la hak chunga a rawn tih chuan ka heh ka pet fan fan a, tunah hian ṭawngkam khat lekin chhang ila kan ṭha leh thei mai dawn tih ka hria, mahse, kan hmabak hun tur chuan thawk a ti zing em em si a ni. 

"Inṭhen mai hi kan tan a ṭha a sin" ka ti zuai raih a "No no....Idea ṭhalo tak a ni" nui lek lek chungin a lo ti a, nuihza aw erawh a lang hauhlo.

"A tawi zawngin ka hrilh ang che aw...inṭhen ka duhlo, i tello a ka awm theihloh zia i hriat kha" a tih ri chuan min fan raih raih mai, ka lungchhe lek leka  a mittui a hnam ṭiam ṭiam bawk.

"Anih engtin nge kan awm ang han sawila, kan chhungte rilru kan inhre tawn ve ve a..." ka sawilai mek chu minlo pawt chatin "Lungngai suh kan pahnihin engkim kan paltlang dun dawn a lawm, min ringlo anih chuan i tana ka inhuamna te hi fiah rawh" inringtawk tih hriat zet hian a ti a.

"Lalber, ka zui che anih chuan nangmah chiah rinchhan tur ka nei dawn tih i hria em?" ka aw chu a vin lek lek a ni.

"Ka hria a lawm" damthlupin a ti a, tunah  hian ka ngaihtuahna buai zia te hi a rawn hre phak ve a ngem le?

"I rilru i thlak leh anih chuan ka chan tur chu i hrethiam em, ka pa mizia i hria a let pawh ka let leh thei tawh kherlo maithei" 

"Barbie..i ngaihtuah nasa lutuk a nih kha, let leh turin ka ti dawnlo che min ring hram teh" a ti a, ka ringlo a nilo ka hlauthawng a ni. A chhe ber thleng ka dawn a, thil ngaihtuah lemloa ti puat puat mi ka nilo bawk, ka thil tiha inchhir leh hi ka hlau em em a ka duhloh ber te zing a mi a ni.

"I la rui ṭhin em?"

"Aih..ka sim tawh ka tih kha" 

"Ruihhlo vang mai maiin i nunna thap tawh suh aw, ka tan i hlu lutuk a nia" ka tih chuan "Ka hmangaih che, min zui ang tiraw?" chhanna mamawh tih hriat zetin a ti a, ka tan thutlukna siam a hun takzet ta.

"Barbie..."

"Aw.." ka ṭawng chu a zawi kher mai.

"Min zui angem?" a ti leh a. "Aw ka tih chu" ka lo ti vin hlar thung, a nui hawk a ka tum aia vina ka ṭawng chu keipawh ka nuih a za lek lek a ni.

"Lo inpeihla ka lo hruai dawn che nia" a rawn ti a, chu thu chuan ka pum hian min ti mur sung sung thei hial a ni.

Dar 11 a ri tawh a ka roomah awmin ka mamawh tur a ka rin ang ho chu ka  Bag ah ka khung a, han ken tur awm chi pawh ka thliar hrang thiam meuhlo, ka phili buai a ni ber a, ka let leh vat angem tih lah ka chiang derlo bawk, engang hun nge ka hmachhawn ang tih lah ka ngaihruat chhin mai pawhin a thaw ipik thlak a ni.

"I mamawh zualpui chiah keng rawh aw, Bike a kal a ngaidawn a nia" Lalberan a tih vangin mamawh zual tura ka ngaih ho chu ka lawr dan dan a, ka insiam nghal thuai bawk, a vawh ka rin vangin thawmhnaw lum lam ka ha a, chutih laimekin ka phone a lo ri ve chiah bawk a.

"Ka lo thleng aw, i inpeih tawh em?" a tih chuan ka chhuk nghal tur thu hrilhin ka phone chu ka dah a, ka room chu ka hawikual leh vang vanga na zeta thawk la in "Inchhir loh tur" tiin ka inhrilh ru mawlh mawlh bawk a. 

Dawhkana ka lehkhabu inchhap hnawk niai te chuan lung a ti zing zual nimaiin ka hria, ka nun leh ka hma hun engkim kalsana ka mipa hmangaih lam ka pan hi a tihsual lian takah a chanloh hram ka beisei a ni.

Sitting room thim leh reh ṭhuap ah chuan thawm dim thei ang berin ka pen thla a, kawngkhar lampana ka inher tur chiah chu choka aṭanga Nau-a lo chhuak nen kan intawk hlawla, kan i hmu thut chu kan meng phawk dun kher mai!

"U Vîte enge i tih dawn a?" ka Bag khai leh keimah min entawn zak zak pah a a tih chuan bengchheng siamlo turin ka lo zaizir nghal thuai a.

"Sawi miah suh aw...naktukah chiah i hrilh dawnnia" ka tih chuan meng phawk hra chungin "In inru dawn maw?" a ti a, a hmelah chuan a hlauhthawn hmel hle bawk. 

"Aw Nau...kan awmdan hi ka hne tawh, duhthlan tur dang a awmlo a nih hi" a hiatthiamna beisei ru tak chunga ka tih chuan mitmeng nur nangin min en a "Ka pa in a hriat hunah chuan a sa viau dawn a nia aw" tiin min sawiṭhaih zui zat a.

"Ka hria a lawm, lo han hrilh nghal miah suh aw" a sawi nghal mai hlau ru tak chuan ka ti a, Dodo-a chu nise pawisa pein a ka a hup theih mai anga, Nau-a erawh a duhna te ah lo hi chuan tu thu mah hi a awih ngai tlatlo a ni.

"Anih khawnge in kal dawn a?" a tih leh chuan ka hman hmawh ru tawh ngang mai, "Ka la hre biklo, an hriat chhuah hma chu min lo zep sak tawp mai rawh, ka nau fel inih kha" a dara ben thak pahin ka nuih tlawn a.

"Ka kal a nia aw, kawngka hi lo kalh rawh" tih leh kawngkhar lampana pen chu ka rual a. "Chhung lama kan kalh daih ten keimah zawk ka tal awk dawn a sin, kan muthilh hlanin i chhuak ru a, kawngka  te chu a kalh chi nang" tih bul bul pahin ka hnungah chuan a lo kal ve zel a.

"Ka lawm e aw" ka tih leh chuan engmah sawi duhloin a ngawi ngal a, a hmelah chuan a lawm tehchiamlo tih ka hre thei, mi erawh a dang ṭalh biklo a min zep sak dawn tihna anih ka ring.

Kawt la thlen thlak chuan a Bike nghenga ding chungin min lo nghak a, thawmhnaw dum vek a ha a,Helmet full face a khum bawk. Za vakloa ṭhensak chungin a lam chu ka pan phei a, a bul ka thlen hmain a kut a lo phar chhuak thuai a, a Bag ah lianlo te ka hmu chu ka rilru ah zawhna a lo lut zui a.

"Tinge thawmhnaw i ken ve loh a, khawiah nge kan kal dawn?" ka kut aṭanga ka Bag ken lai lakthlak pahin  "Thingtlangah zanhnih khat kan riak anga kan inah kan haw ang" awlsam zetin a ti a, sawibuai tur ka neilo mai niloin ka hrelo a ni, engtin nge kan khawsak zel dawn tih tak ngial pawh ka ngaihtuah zawm theilo, ka chawmawlh vek a ni ber e.

"I ṭha maw, i rilru i thlak leh lo ang chu ti raw, kawng laka kir rawt leh kha ka phal dawnlo a nia" ka bianga rawn tuai zauh pahin a ti a "Tlan chhuak vat zawk teh ang, ka pa a rawn tho a nih teh chuan min hnuk let nghal dawn a nia" ka lo ti a, nuisuk chungin a Bike ah chuan a lawn a, a che vel chu ka lo en a engtin emaw riau hian min thlamuan a ni, tunah ngat phei chuan ka innghahna a ni ta mai chu a nia, heng a pian ṭha tak te, a dar rinawm hmel tak te hi ka tana rintlak leh innghahna tlak a nih ngei ka beisei a ni.

"Lo kal rawh le" ka chuan rem tura a  Bike rawn ti âwn in ka lam a lo hawi a, ngawi rengin ka lo en a chet mai nachang pawh ka lo hrelo ka ngaihtuahna te chu a tawi tup niberin ka hria.

"Barbie, i hreh em ni? Anih chuan ka  la nghak leh thei tho a nia" ka kuta a rawn vawnna chu ka lo hmer vang vang a, ka rilru chu a buai nuai nuai a ni ber mai, tunah hian ka In chauh hi ka kalsan a ni dawnlo tih ka hrechiang em a ni. Mahse, nakin hun pawh nghak ila hetiang bak hi duhthlan tur kawng dang kan nei chuanglo ang, tun hun a ni emaw nakin hun pawh nise a danglam phah chuangin ka ringlo a ni.

Bike ah chuan ka lawn zui thuai a, ani pawh a lungawi a niang, ka kut chu hum vang vangin a Jacket inteah a  dah luta amah si chêtin min pawt hnai zui bawk a, khawiah nge min hruai dawn ka hrelo, amaha rinna nghat chung chuan a hnungah chuan ka bei thlam a. Ka mit chhingin  rilrua mahni inthiam chawp chung chuan thawk ka la leh kawk ṭhin a, ngaihtuahloh tum pawhin a ngaihtuahloh theiloh a  ni.

"Khawiah nge min hruai dawn?" khawpui kan tlan pelh laichuan ka ti a, "Ka ṭhianpa te khua ah kan kal dawn nia, an mahni pawh ka hrilh lawk tawh" a lo ti var a, tlem chuan ka awm a nuam ta deuh.

Thla chu a êng ṭha hle a, khawkar kawng reh ruih chu thla êng chuan  a ti lang  Romantic viau bawk, a Bike tlan thawt zawng chuan a vawt ve lek lek ṭhin a, vawt ka tih a piangin ka va kuah nghet salh salh a ani pawn a khat tawkin ka kut a rawn hum leh zauh ṭhin a, kan awmdan chu thu a sawizui chiam a ngailo, kan inhrethiam dun em em a ni.

Khawkar Hotelah thil eiin kan chawl zawk tihloh chu kan tlan char char a, kan thlen chin chu a thui ka ti tawh viau mai. Kan kalna tur ka zawh lahin "Kan thleng ṭep tawh, kan thlen hunah i hre mai ang" a lo ti mai zel a, ka zawt lui ṭalh duh ta biklo.

Serchhip kan tlan pelh laichuan ka mut a chhuak lek lek tawha, a hnungah beiin ka mit ka chhing leh siai siar ṭhin a, Bike a chuang nilo ila chuan ka muhil daih tawh ngeiin ka ring.

"Muhil suh aw, kan thleng har tawh dawnlo a nia" dam thlupa a lo tih chuan ka inthing harh lehnghal thuai a, a hnu darkar tam vaklo hnu a kan thlen chuan khua pawh a var lam lek lek tawh a ni.

Kan kalna khua chu thingtlang khaw lian ve angreng tak hi a ni a, kawttler reh ṭhuap ah chuan a tlan zela kawng pengah tlan lutin thuilo te kan tlan chho a, chutah chuan In pakhat tual zawl zau leh pangpar vul khah chik chek na hmun hi kan va thlenga, thla eng dul lam tawh hnuaiah chuan an compound chu a lang mawi hle bawk.

Kawta kan dinlai chuan kan lampanin tu emaw hi a rawn pen phei hlawk hlawk a, a lo kal hnaih chuan Ropuia a ni tih ka lo hre vat a, helaiah a hmel hmuh ka lo inbeisei loh em vang chuan lo biak lawk nachang pawh chu ka lo hrelo a "I chau em?" amah zawk chuan tiin kan Bag te chu min lo laksak thuai a.

"Ka patea te nupa an zina, kei leh ka Cousin nen chiah kan awm rih a, inthlahrun miahlo tur aw Vîte" inchhung lampana kan kallai chuan a ti a.

An inchhung chu a lo reh ṭhuap a, Bathroom leh kan mutna tur room te chu Ropuia chuan min kawh hmuh nghal zung zung a, kan inbualna tur tui a lo lumsa diam tawh bawk.

"Helamah inkhua a awm ang tih ngaihna ka lo hre miahlo a" ka tih chuan a nui ṭha a, Ropuia hi tuipuiral lam khaw chhuak ni turah ka lo ngai a, a chhan pawh University kan kal laia kan zinho ṭum khan kan tlan pelh khua apiang kha "Ka kal tawh" a lo tih theih zel vang a ni.

"Ka mutsan dawn che u, zingah duh chen chen a muttheih aw, mitmei ven tur tumah an awmlo ania" Lalbera lamhawiin a ti a, Lalbera lo bu nghut ka va hmuh chuan chauh hmelfein a lo meng dul raih a, a sam chu a thur siang a a meng sen ram bawk.

"I inbual hmasa duh em?" ka tih chuan a lu a thing a, "Inbual hmasa rawh rei deuh awmlo la, i hritlang ang" tih pahin kan Bag chu room lamah a khailut a, ka towel leh thawmhnaw vel la tura ka va luh chuan khumah a lo ṭhu awn duai a, nui hmel pu lek lek hian minlo en a "I chau em?" tih leh a lama min pawh hnaih a rual zata.

A mal chungah min pawt ṭhuin min kuah hlun a "Tunah chuan ka ta tak tak i ni ta" ka dara a khabe rawn nghah pahin a ti a, "Kan la inneih em loh hi, hei te chu inneih kan ngenna hmanrua mai mai alawm" ka lo tih chuan a nuisuk a.

"Inbual rual ang" a tih chuan phawk fêin ka lo en a "Ka duh teuhlo mai a" ka ti chu a nuih a zat hmel kher mai.

"Ka uang a nih kha, va inbual thuai la i muhil vat dawn nia, i lu kha su rih lo la" min duat hmelzeta min melh paha a tih chuan ka lai lek lek a ni, a duh phawt chuan mi han duat vel pawh a thiam hmel kher mai, a tihzia nasa.

Tuilum sa ver vawra ka inbual chuan ka taksa rawl leh sil ṭhem ṭhum pawh a zia huaiin ka hria, ka thawmhnaw ka hak ṭhat laimekin Bathroom kawng khar chu a lo kik a "Barbie lo hawng la" pawn lam aṭang chuan a rawn ti thum dut a.

"Ka zo ṭep" tih pahin ka in ha nghal sawt sawt a, kawng khar ka hawn chuan Sleeveless pan te nen a lo ding a, a nghawngah Towel  batin Boxer chauh a ha bawk.

"Ka ruala inbual chu i duhlo maw?" min rawn din hnaih pahin awmze nei fe hian min melh a "Ka inbual zo daih tawh" ka tih chuan a meng rang ralh a, "Ka lo va mu mai teh ang, ka chau deuh tlat" lai angreng zeta ka tih chuan min chhangloin ka hmui a rawn nul thuak a, "I rimtui lutuk" tih leh min fawh a rual a, ka kawngah nghet zeta chelin duhthawk fahranin min fawp a, a inlak hran meuh chuan thawk a chham lo chauh a ni.

"Lo va mu rawh ka reilo ang" tihpahin min fawhna vanga a hmui huh hliam chu a tuai zauh a. Bathroom a a luh hnu chuan ka thinphu rang dup dup chu awm dawm meuha ngaithlain thawk ka la leh halh a, ka rilru nawmna leh nawmloh rukna chu a inzat thuak ta ve ang.

Khumah chuan muin kan awmdan chu ka ngaihtuah let leh ṭhina, naktukah chuan ka chhungte pawn thu an rawn nei tawh ngeiin ka ring. A hriatchhuah huna ka pa awmdan tur ka ngaihtuah zui a, midang tan pawha tawrh hlelhawm khawpin a thinrim chu a in hrosa ngei bawk ang chu.

"Muthilh tum rawh" tihri vang chuan ka ngaihtuahna aṭang chuan ka harh zawk a, a taksa huh hruk mawlh mawlh paha Lalbera lo lut chu en in "I chhungte i hrilh tawh em?" ka lo tih chuan alu a bu zauh a " Ka U chiah ka hrilh a, midang chu aman alo hrilh ang" ka mutna khum lam rawn pan pahin a ti a. Ka bula a rawn inthawlh takah chuan ṭawng leh ka tum chu ka tawp ta zawk a, ka lama a rawn tawlh hnaih laite chuan ka che ṭha ngam meuh tawhlo.

"Muhil rawh le, naktuk lamah chuan thu lawmawm em em lemloh te kan hre nawk dawn a nia" puan min sim ṭhattir pahin a ti a, a pang si chet a ka mut vang chuan ka khur ru  dar dar bawk.

"Ṭah ka phal lo ania aw" a hmui a ka nghawng rawn nul dan dan pah a a tih chuan ka kawnga a kuahna kut chu ka lo vuan vat a "Ka ṭap reng reng lo" ka tih laimek chuan ka nghawng bulah a rawn thaw lum ham ham reng a, ka zam chhe leh der tawh mai!

"Muhil tawh rawh le, thil ngaihtuah vak vak lo la lungngai miah suh i bulah ka awm tlat dawn a lawm" a tih chuan a lamah ka inher a "Engkim a ṭha leh vek mai ang" ka chala fawh vang vang pahin a ti a, a awmah beiin duat deuhin min kuah a, reilo teah mut chhuakin min rawn zem nghal chiai chiai a, chumi hnua ka thil hriat leh hmasak ber chu ring zeta ka phone ri a ni.

*CHAPTER - 21*

"I chhang dawn em?" thophang aw fea a rawn tih laichuan lak mai nachang hreloin ka phone chu ka lo melh tlawk tlawk a. "Ka nu call a nia" ka ti a, ani pawh a lo ṭhu chhuak ve nghal thuai a.

"Ka lo chhang mai dawn em ni?"  ka chhang hreh hmel a hmuh chuan a lo ti vat a, "Aih keiman kan chhang a nge" tih leh thawh ka rual a, ka nu nena kan inbiak laia a lo awm ve chu ka duh chiahlo.

Sitting room lamah chhuak in Bathroom ah ka lut zui a, Phone ka lak rual rualin "Khawiah nge i awm, min va ti mangang êm êm ve?" ka nuin a lo ti nghal a. A lawmloh zia chu a aw ri aṭang chuan a hriat theih.

"Khawdangah kan kal a" inthlahrung deuhin ka ti a, ka pa ṭawngthawm a awm leh awmloh ngaichangin ka beng ka chhi ran bawk a. "Mi puitling tak ini emaw tih a, hetiang zawnga i khawsak duh ka ring miah hleinem, i pa mizia engkim i hria a, i bialpa kan duhloh zia chen in i hre si a khatia i awm khan i hlim phah reng reng em ni?" ka nu zawhna chu chhan mai ngaihna pawh ka hrelo.

"Ka pa chuan enge a sawi?" ka ti a. "Enge sawi sela itih a" a sawi laimek chuan ka pa ṭawngri chu ka hre zui zat a "Amah em ni i biak, vawinah rawn haw nghal rawh se, anihloh chuan ka rawn hnuk haw nghal dawn tih hrilh rawh hmeichhe nikhualo lutuk" a phun zui hluk hluk chu ngawi rengin ka ngaithla a,  "Khawi khua ah nge in awm?" ka nuin a rawn tih leh chuan chhang tawhloin phone chu ka dah ta ringawt a.

Bathroom bang nghenga ding chungin thawk ka la leh halh ṭhin a, duh ber zui e tiloin ka awm a nuam thei chuang hauhlo, ka chhungte do zawnga ka khawsak vang  a ni. Ka phone chu a rawn ri nawn leh a tun ṭum erawh chu ka pa zawk a ni ve thung, ka la ngamlo ka pa biak chu hreh tak tein ka hreh a ni, Screen a a hming ka hmuh ringawt pawhin ka thinphu chu a rang zawih zawih thei mai.

Chhang lo chuan ka hmai ka phih sawk sawk a, ka phone chu ka silent zui ta bawk a, Bathroom a ṭanga ka chhuah leh chuan mipa tleirawl Nau-a te ang rual vel tur sang zet zawt hi room dang aṭangin a lo chhuak a, kan inhmu thut chu ka zak lek lek a Ropuia cousin chu anih ka ring, min hmu chu ani pawh a phâwk ve deuhin ka hria. "Ropuia ala mu a mi?" ka tih chuan bu nghatin pawnlam kawngkhar chu a hawng a, pangpar tuipekna a keng chhuak nghal bawk a.

Room a ka luh leh chuan thlanglam tukverh bulah Lalberan Phone a lo hmanga ka lut thawm a hrelo a ni ngei ang, khumah chuan ṭhuin a Phone hmanglai chu hnunglam aṭangin ka lo en a a ṭawngdanah a chhungte a bia niin  ka hria.

"Ṭha i tih dan ka zawt che  a nih chu, nupui ka ru tih ka hrilh che a, ka lo haw pui dawn nge dawnlo chu sawi mai mai teh?" pawr angreng zet hian a ti a, a tu ber nge a biak ang rin ngaihna ka hre hauhlo.

"Aṭhat chu naktukah kan lo haw ang" a tih chuan ka lo thaw huai a, anu bia se ka ti rilru kher mai. "Vawinah kan lo haw hmanlo tihtur kan nei" vin deuha a tih hnuah Phone chu a dah a, ka lam hawiin a rawn nui nghal sang a "Ka nu a nia, zaninah ngaihdam dilin an kal dawn a nih chu" a ti zui zat a.

"Engtin nge alo tih a?" ka lo ti vat a, a chhungte chu an lawm bik tehchiamin ka ringlo.

"Lo haw vat rawh u a ti" a hmelah chuan a hlim tih a hriat a, keipawh ka awm anuam huai mai, a landanah anu nen chuan an inbe chhe lemlo tih a hriat a, a chhungte lam talin hmel hlim min hmuh a nih chuan kan chan a chhe lutuk biklo ang.

"Chuan naktuk ah maw kan haw dawn?" ka tih chuan ka kut vuanin ka bulah alo ṭhu a "Vawin chu kan chau bawk sia awm hahdam ila, nge  kar tawpa haw i duh zawk?" a ti a. 

"A...a hma thei anga haw chu ka duh, mi In a ni bawk sia" ka ti a, ka rilru hrethiam takin a bu nghat a "Kan intifai ve lawk ange, i duh chuan mu leh rawh" tiin a tho zui a.

Room aṭanga ka chhuah leh chuan Ropuia nen thingpui in pahin an lo titi a, "Vîte eirawng i bawl peih angem?" Ropuian a lo tih chuan "Aw, ka lo bawl ang" Bathroom lam bawk pan leh chung chuan ka ti a, ka tai bawr leh kawng bawr na urh chu zankhua a Bike ka chuan vang a nih ring tho mahila chhan dang engemaw ka nei tlat a ni.

Ka rin ang ngeiin ka lo Period a engmah indanna tur Pads kawlsa ka nei hauhlo, kan Ina ka room ah kha chuan ka leikhawlsa ka nei ṭeuha, ka mamawh thut ang tih ngaihna ka hrelo a tin ni. Bathroom a ṭanga chuan dakin Lalbera chu ka au a, a thingpui no keng chungin a lo kal a.

"Mamawh i nei a mi?" a tih chuan inthlarung zetin alo nuih a. "Dawrah i kal peih em?" Ropuia hriat hlau tak chuan ka ti ru sar sar a. Zawhna mitmenga min en a "Ka period a" ka ti chu a lo nuisuk mai.

"Lo awm rawh ka lo lei ang" tih paha kal mai atum chu "Lawk.." ka lo tih chuan a lo hawi leh vat a. "Cotton aw..a thla nei" zawi sap a ka tih chuan a meng tal tap a. "Thla nei a?" mak tih hmel fein a rawn ti a, laklawh viaulo ila chuan ka tir hauhlo ang mawle, ka pen ṭha ngam tawh tlat silo a tin ni.

"A thla nei ti tawp la, an hre vek mai ang" ka tih chuan a la meng rang kher mai,  "Kal vat vat râwh ka mamawh tawh a nia" ka lo ti ṭûng a, Room ah lutin kawr pangngai ava ha a, hmanhmawh deuhin a rawn chhuak leh a min en zawk pahin "Lo tuar hram hram rawh" tih leh pawn lama kal chhuah a rual a, a chhuah hnu chuan kawngkhar chu kalhin Bathroom chhungah chuan ka ding ta reng a, ka tai na chu a mar ṭung tawh mai, a hunbi pangngai aiin a hma a, a hun a insawn dawn anih pawhin a tlailam zawng ani ṭhin si a ka Bike chuan rei lutuk vang te pawh ani mahna le.

Rei a riallo a lo thlen chuan kawngkhar a rawn kik karh karh a, ka hawn rualin a rawn lut nghal rawk rawk mai. "Eh..enge i lo tih dawn?" ka lo ti chul a. "Tinge puih i ngailo a mi?" a lo ti heu mai, engtia min han puih nge maw a tum le! Bawm ruk ngawt a rawn lei lehnghal.

"Ngai nang lo va chhuak rawh" tih leh nam chhuah ka rual a, inthlak mai ka tuma Underwear ka lo keng lut hauhlo mai.

"Lalber tah khan i la awm em?" ka tih chuan Bathroom pawn mai aṭangin "Mamawh i nei a mi?" a lo ti vat a, kawngkhar chu hawng lehin "Ka Bag-ah ka Underwear ka dah daih, min lo lak leh lawk mai teh Please in" ka sawi zawh rual rualin a in her vut a, a van zialo ṭhin tak, ka dahna te kha a va hmu em ang chu maw.

Ropuia ṭawng lawng lawng chu thawm awmchhun a ni rih, kawngkhar ka hawn leh de de chuan pindan aṭanga alo chhuak mek ka va hmu a, ka Underwear chu a te thei ang bera hum khawrin min lo pe a, Ropuia hmuh a hlau ve deuh aniang, ka zak ve ram ram mai.

Ka inthlak fel hnu chuan eirawng ka bawl a, chhunah tlanga len an rawt a, ka taina vang chuan ka phurlo kher mai, Ropuia Cousin chu a ṭawng mawh hle a, a chhungte dang an awmlo chu ka lawm rilru hle bawk. 

"Tetein a lo bia che em?" Ropuia chuan a ti a, Tetei a hrilh a ni ngei mai. Ekhai aw! Tetei a hrilh a nih chuan a nin Remtluanga a hrilh ngei anga, chutih anih chuan Emma i te lam pawn kan inruk thu chu an hre tawh ngei bawk ang.

"A na em, nachhawkna te i ei duh em?" Lalberan a lo tih chuan a hmelah hlauthawng hmel a pu a, "Na ve deuh, nikhatni hian a na ve ṭhin a, nachhawkna ka eichuan a tawp daih ang a ei chiloh" ka lo ti ṭha ve mai a. Kal lehloh mai a duh tut tut a, min ngaihtuah vang a ni. Ropuia nen an sawidun laia a chak zia ka hre si a ka ṭhulhtir erawh ka duh biklo. 

Ropuia nen kal mai turin ka ti ta ngawta min hnial biklo a, chhuna an chhuah hlan chuan kawta pangpar vel chu ka lo thlir kuala, Ropuia chhungte chuan huan an nei zau ṭha kher mai. Inchhunga ka  luh leh hnu chuan Margaretin min lo bia a, zingah ka nuin ka awmna chin zawtin a lo va bia ni ngei tur a ni.

Lalbera te lo let leh laichuan ka lo muhil a, ka harh meuh chuan an ṭhian dunin eirawng an lo bawl peih diam tawh a, ka chau bawka ka mutui ngang mai, an thawm takngial pawh ka hre hauhlo. 

Zanah Ropuia ṭhiante an lo leng ṭak ṭak a, zu an inho in ka hria, kei erawh room ah ka tawm renga, ka chhungte lam chu an reh ta vang vang mai, Nau-a Whatsapp ah ka text a, a online loh vangin min la chhanglo a, Lalbera lah an lola be bik silo a, a rilru a mawlh ve reng vangin khumah chuan ka inlet sek a, ka taina bawk si nen ka hui leh pap ṭhin a, chutih laia Sitting rooma tlangval ho thawm nei ham ham reng chu ka ngaitheilo viau  a ni.

An zinga Lalbera tel ve chuan a lo lem ve leh ngawt ang tih ka hlau hle bawk, "Monu tur chu lo chhuak ve sela" an ti lung lung ri chu ka hre pha a, chhuah erawh ka tumlo nasa mai, Zu an in ho ringawt pawh chu thinlung takin ka ngaitheilo a, Lalbera nui ring lutuk te chu ka haw hlur bawk, room a alo luh chuan Beer hawnsa a lo keng lut a. Rum zeta melh pahin "I in veleh ngawt alaw " ka lo tih chuan "Inlo hei Beer anih hi ka in" a lo ti a, Beer pawh zu tho ania, ti nge maw ngaihhnathiamna a neih tlat le.

"Beer pawh chu.." 

"Barbie zu ka inloh hi Beer mai mai alawm a pawi hleinem" ala ti hram a.

"Anih chuan keipawn Beer chu ka lo in ve ange" ngeiawm zetin ka melh pah a "Ti teh suh khai" nui hawk chungin alo ti a. A in thu a sawi khan thil holam tak angin a sawi a, ka in chu a phal leh chuang hauh silo.

"Zu a nichuanglo a nilawm ni, Beer mai mai alawm" Sitting room lampan tuma ka tho chhuak chu minlo pawt let vat a, "Beer in hmeichhia ka duhlo aw" chang fek fawk hian a ti ta a.

"Enge i duh loh chhan zu a ni chuanglo a" ka awki chuan mei a nei viau a ni.

"Hmeichhe Beer in chuan Zu an in thei vek, a tirah Beer a hnuah Zu ah an kai ṭhin, min ring rawh hmeichhia ka kawm nasa a ka hria alawm, mipa hian hmeichhe Beer in kan ngaisanglo, a bik takin keiman ka kawppui chuan Beer a in tur a nilo" nuisuk chungin alo ti a, a nui tak nain a mitmeng chu a thutak hle thung. 

"Beer in ṭha iti silo a, tinge i in si?" ka lo ti leh a, "Mipa leh hmeichhia chu a dang a lawm Barbie" khum lama min nawr phei pahin a ti a, enge a dan bikna ka hrethiamlo, hmeichhia ka nia mahse, keipawn ka kawppuiin Zu emaw Beer a in chu ka duh bik hleinem, a sawi ang takin Beer aṭangin Zu ah a kai leh ringawt mai dawn a sin.

"In tawhlo la, tun hma  ang khan Zu i in leh ang tih ka hlau teh mai a nia" mu tura a thawmhnaw a pelhlai chuan ka lo ti a, "Awle" a lo ti ṭha veleh mai bawk a, min chhang awlsam viau mai a tih tak tak beisei leh phawt mai teh ang.

Mu chungin kan titi a, inkuah riaiin duhthawh takin kan infawp a, a baka thui erawh kan kal lo, tunah chuan a remrihlo a ni. Insum erawh harsa a ti ngang mai a, taksa lamin rokhawlhna min siamlo phei sela chuan hei aia thui hi kan thleng tawh ngeiin ka ring.

A phone a lo ri a, a chhungte an nih ka rin vangin ka inbeng kang nghalthuai a, "Ka nu" hmuiphuna a lo tih chuan  thinphu chu a rang ṭha duh dup dup ngei mai, Phone chu lain a ngaithla vung vung a, enge a nu chuan a rawn sawi ka hrelo nain Lalbera hmelah erawh thu lawmawm lam chu a nilo tlata hriatna ka nei a.

"In tih dan dan a nimai, zingah kan lo chhuak anga  ka lo hrilh leh ang che" tiin an inbiakna chu a titawp a, "Engtin nge a tih?" ka lo ti vat a.

"In inah chuan an va kal a, i pa a lo awmlo a, ipa awmlaia ngeiin kal an duh sia naktuk zanah an kal nawn leh ang" a ti a, thaw a ti ipik zual sauh mai, ka pa chuan ṭha taka alo chhawn ka ring miahlo, "Ngaidam dil kher hi tinge maw a ngaih le, dilloh nen a in ang reng  ang" ceiling lam melh leh vung vung chung chuan ka ti a.

"Angai a lawm, chhungkaw thil hlu tak ka ru miau sia, ngaihdam dil chu kan tihtur ania lawm" min kuah pahin a ti a, Lalbera ka duh em em chhan hi ka chiang ta in ka hria, ka hre chiang telh telha a landan maiah chuan mipa tihmawh leh uang tak angin lang ṭhin mahse, a rilru ṭhatna hi ka hmu chiang telh telh a ni. 

Zingkar hmatakah tho in kan insiam a, Ropuian chaw eikhama kal tura min tih tlat vangin kan hmanhmawh duh ta bik lo a, "Chawhma a kan chhuah hman chuan kan thleng har lo ang, i nuamsam silo a muangchangin kan tlan dawn nia" Lalberan a tih chuan ka hniallo.

Dar 11 velah kan chhuak a, an in kan thlen chuan a pi leh pu chiah an lo awm a, minlo lawm thiam khawp mai a, kan Bag te dahfelin kan intifai a, eirawngbawl tura inhnuai ka chhuk lehlai chuan Lalbera Farnu te an lo thleng ve chiah a, kan inhre nel sa tawh bawka min hmu chu minlo be nghal bawrh bawrh a, an inah chuan ka mikhual lutuk biklo, titi pahin eirawng kan bawl ho a tlai deuh taka Usangpuia a lo haw a "Vîte, chêtpui angai hleinem awm hahdam rawh nula mawng zang deuh deuh an awm kha" nelawm takin a ti a. 

Engmah tilo a lo awm mai mai erawh ka duh biklo, Lalberan chawhmeh min chanpui a, an farnu ten an fiam leh zauh ṭhin chu uang deuh deuhin alo chhang let a kan nui leh dar dar ṭhin a, a nu leh pa lo haw hnu erawh chuan ka ṭi deuh duk a, Nu Siamtei chuan min be chhe hran miahlo na chu kan awmdan hi a lawm kherin ka ringlo a ni.

Chumi zan chuan ngaihdam diltur chuan Lalbera pa Pa Rina leh a Patea veng dang a mite chu an kal a, an kal hlan chuan Nu Siamtei hoin Tv kan en a, Lalbera eizawnna tur ruahmanna an neih te chu kan pahnih chuan min sawipui a, "A u hi a indaih silo a pui rih mai sela a ṭha in ka hria a" a ti siam siam a, ka beiseiloh dan deuha min be ṭha leh chuan ka awm a ti nuam sawt a, "Vîte i pawh kan fanu i ni tawh a" a tih ri te chuan min thlamuan viau  bawk.

Nau-an minlo Text a "Ka pa chu amak ka ti a sin aw, nangpawn mak i ti ve ngawt ang" a lo ti a. Min ti hlauthawng ru kher mai, "Engtin nge a lo tih a?" ka lo ti lêt vat a. 

"I hre mai ang, a ṭha lam a nia" tihzawng a sawi leh a, a ṭhalam a tih vang ringawt chuan ngaih a ngam chuanglo. 

Pa Rina te lo haw chuan ka beisei ruk ka beisei ṭhat ngamloh thu an lo hawn ta tlat mai. Ka pa chuan ṭha takin alo dawngsawng a,  lawmlo hmel a hmuhlo a ngaihmawh awm zawngin a ṭawnglo a ni ngei mai. "An heti ta si a, ro hran rel daih thei kan ni tawh hleinem, amah pawh lo haw ve phawt sela, thu kan inngaichang zel dawn nia" a lo ti niawm tak a ni. 

"Haw leh kher ngailoin a sawi fel nghal theihloh a mi?" Lalberan a tih chuan a Patea a nuih a lo za a,  ka pi leh pu in an lo hrilhfiah bawk a, a hmel tum bar chuan nuih a tiza deuh deuh a, ka haw leh tur chu a hrethiamlo nasa a ni.

Kan nu in min lo bia a, naktuka min lo hruai nghal tur thu a lo sawi a, a hma aichuan ka nu aw pawh a zangkhai ta. Inleng te ka pan a lo chhan dan chu ka zawt a, ka pain a rilru a thlak chu a ni pawh a lawm ve tho tih a aw ri ah a hriat theih a ka pa nena kan boruak kha a ning ve em a ni.

"Lo kal kher a ngai hleinem, kan dah zawk tur che pawh a nia lawm, i chhungte chu han hrilh leh tawh" ka puin a ti a, ka nu ka hrilh leh chuan "A ṭhat chu, naktuk ah ngei ngeiin lo haw la" a lo ti  a, keipawn chu chu aṭhat ka ring. Lalbera erawh a lawm vaklo a engmah phei chu a sawizuilo.

Mu tura room a kan chhoh hnu chuan "An let leh kher ṭhin tih ka lo hre miah hleinem, a ho hle mai a" a ti nang nang a, "Thlawi hnihna a ilo hmang dawn tihna a nia" ka lo ti zauh a. "Nia...Thlawi thumna em chu ka ni tawhlo ang chu" tiin a nuisuk suk a.

"Hun a duh reiin i ring a ngem, pailai kal chhung leh inneih buaipui chhung hi, ipa hian Exam tir phawt che a tum in ka ring deuh a" khuma kan mut hnu chuan a ti a, ka hrebik hauhlo ka pa rilru sukthlek lam lam ka awn tawh ang chu, ka ba ve tlat a ni. Tunah chuan Lalbera pawh a lo leng thei tawh anga, Exam hmachhawn a ngai anih pawhin ka huphurh hranlo chu a hnekin rilru a hahdam tak chung chuan a hma aipawn ka zir ṭha thei zawk bawkin ka ring a ni.

Margareti nen kan inbia kan chanchin ka hrilh chuan kei aimahin a lawm a, ka pa khirh lutuk hi hrehawm min lo tihpui ṭhin a, kan inru pawh a rilru alo hah phah viau ni tur a ni.

"Margie a law...ka lo be ve ang" Lalberan a tih chuan Phone chu ka pe a, a awma bei chungin an ṭawng chu ka lo ngaithla a "I dam ṭha em..i pasal chut deuh khan a duat che em?" a tih chuan hawi chho meuhin ka han en a, min en loin minlo kuah nghet salh a. 

 "A ṭhat chu, in enkawl ṭha la nu i nih hnu hian i hrisello riau mai" duat leh ngaihsak hmel deuhin a awki a thlak a, ka ṭhiannu mah nise Lalbera tan erawh a Ex a ni ve tlat, a hunlai khan a duh ve ṭhin nasa mai si a, thik ena ka en ngai miahlo kha a thilsawi dan vang chuan ka thik deuh reuh tlat nia! A....kei hi ka rilru a ṭhalo anih hi, ka Period vang aniang tiin ka inthiam chawp  a ka nuih te lam lam a za.

A phone hmangzo ka lo en ran chu zawhna  mita min enpahin a mitko a san ak a, "Tlem te talin i la duh em?" ka lo tih chuan a nuih a za ngang mai. "Kan duh ber kawppui kan nei ve ve tawh a lawm" min kuah ṭhat sauh sauh pahin a ti a.

A tukah chuan ka haw ta ngei a, ka nu a lo awma ka pa leh ka naute an awmlo thung, Usangpuia leh Lalbera ten min thlaha ka nuin dawr a lo hawn avangin Ina chho nghal mailoin dawrah chuan kan peng a, ka nu chuan ṭha takin a lo bia a an unaua an kal hnuah keipawh inah ka chho nghal a, ka pa a awmloh vangin ka lawm rilru viau a ni.

Tlaia ka pa lo haw chuan min hauh nek ka rin laiin min melh thuak duh chauh a, hauh inring sa ren rawna kei ka awmlaia engmah a sawilo leh thinur hmel takngial pawh min hmuh miahlo chuan minti ham haih lek lek a, inchhungah chuan minti ṭi dek zawk a ni.

Zanah Zari leh a nu an lo kal a ka haw tih an hriat vanga lo kal a ni bawk a Zari nu chuan min hau nghal mawlh mawlh a, ka nuin a lo tuihnih ve bawka Zari lah chu alo nui kur kur a, ka pa erawh lehkhabu chhiarin a ngawi ran reng thung, biak ka hrehin ka zah thar em em a, chutia Zari nu leh ka nuin min zilh lai pawh chuan a mitmei chu ka veng ru hle reng a, ani erawh chuan a ngaihven hmelloh viau lehnghal a.

"Kan kohhran mi pawh a nilo em ni kha?" Zari nuin a tih chuan ka nu chuan anihloh thu a lo hrilh thuai a, "E..chu leh nghal Vîte , i ṭhiannu lahin tlangval fa anei tawh a ti emaw ni kha keichu ka tuilo emai, nanglah nula hnahkhat tleirawl tirh aṭanga lerh pawh hrelo tia kan lo chhuan em em i nia, zirna lamah lah i chungnunga hma hun eng tak i nei bawk a, nakin lawkah a la Officer luah dawn a nih hi tia kan beiseina che a san lai takin pasal neih lam i awn ta daih hi chu i pa Hruaia nen chuan kan ui emai che.

I la naupanga pasal nei rihloin zirna lam hi tileh zawk teh, pasal neih te chu tlai a awm tak tak hleinem" a ti zui bawrh bawrh a, ka pa lo hawi chhuak zawk chuan min rawn melh a, a lawmlo tih chu a hmel aṭang pawhin a hriat theih a engmah phei chu a sawizui lehta chuanglo. Sawilo mahse, awm a nuam mawlh lo a ni.

Zari te chhung nen hian tette aṭanga inṭhenawm rawt kan ni a, an In hi kan chuankai tamna ber a nih bakah chhungkhat ang tak taka in en kan nih vanga Nu Rami pawn chutiang taka min zilh ngam pawh chu a ni nghe nghe a, Lalbera fa neih chung chang a sawi erawh ka ngei deuh lek lek a mahse, ka pa in engmah a sawilo chuan minti thawveng huai thunga, ka zep reng thei dawnlo a nakin lawkah an hre dawn tho si a ka hrilh ngai miahlo a chutia a hria pawh chu a ṭha zawk mahna.

"Tlangval fa a nei i tia law, enge chu chu a awmzia Bawihi?" ka nuin a rawn ti ta chiah. "Fanu kum thum mi a nei tawh anih pek kha" ka chhan hmain ka pa chuan a lo ti hmuk bawk a, a hma in a lo hre lawk daih tawh anih hmel, sawitur ber pawh hrelo chuan kei chu ka lo ngawi dak a sawi chhunzawm a chakawmloh kher mai, ka pa chuan engtin nge a hriat le? Lalremtluangan a lo hrilh ani leh pek ang chu.

"In ti tak tak a law, engtin nge i lo hriat a?" ka nuin ka pa lam hawia a zawh chuan ka pa chu a lo ner sawk duh chauh a "Ka sawi buai peihlo e" tih pahin a tho chhuak zui zat  a.

"Fa nei tawh te chu a va tuiawmloh ve mawle, tinge ahma te khan i sawi miahloh a, a theih hram chuan tlangval pangngai neih tluk a awmlo a sin" beidawn hmel zeta min enin ka nu chuan a ti a. Nu Rami lahin a lo ṭawmpui veleh zat bawk a.

" Vîte palai an lo la kal nawn lehlo bawka inngaihtuah ṭha leh rawh, nakin hun thlir la i bialpa berkher hi chu i tlakchhiat phah vek mai ang thla leh ah Exam in neih dawn kha chulam chu ngaihtuah zawk rawh i tling hlauh anih phei chuan pasal te chu a lungngaih thlakloh reng reng i hma ah an la rawn intlar pet put dawn a lawm" a ti leh hmak hmak a.

Za lo tein ka lo nui sak a, an sawi vang ngawta in lamlet thei ka ni tawhlo tih an hrelo a ni, ka hmangaih laklawh tawh a thawk leh khatah chu ka rilru puthmang chu a danglam thut thei tlat silo a tin a ni.

Nu Rami te nufa haw hnu chuan ka nu chuan min sawipui ngial a mahse, ka lo hnial ve zel thung a, ka nu hian min hnar sak bur hranlo na chu ka rilru thlak leh se min duh hle a, ka tan  pawh chhungte duhloh tak mai vawn chu a hrehawm kher mai.

"Ṭhen daih mai ta che ala tlailo bawk a palai anlo kal leh hma hian, nau i pai chuang pawh a ni silo a" damthluam mai hian a ti leh ṭhin a. "Nû...amak thei e, ka pa pawh tih tawh naklaiin nang lehzel chuan tiang hian tilo teh, in ngaih anga misual kha ani hleinem hrechiang ula chuan in ngaina dawn lutuk a sin" ka lo ti ve vat a.

"A..amah hrim hrim te chu a sualna ka va hre emem pawh a ni chuanglo a mahse, nang ka fanu neih chhun i nia, ani ang ngawtlo te chu ka beisei ve alawm, i nawmloh hi ania ka hlauh zawk ni, vawinah pawh ṭha tak te chuan ka biak ve kha, amah ringawt pawh duhthu a sam tawhloh tehlul nen fa a nei tawh inla ti zuia keichu ka tui lo zual telh telh, hmelṭha ringawt hi zawnloh tur ania" a tih mek lai chuan ka lo pawt chat a.

"Nu, fa a neih te chu kan intawn hma thil daih ania, mitupawhin nun hlui te chu kan nei alawm, kan inhriatreng sak aichuan tumah ṭha famkim kan awmlo tih kan inhriat tawn sak hi kan tun hun atan leh nakin hun atan a ṭha zawk alawm" ka lo ti ve a.

"Chute chu ni tho mahse a nilo midang hi nei zawk daihla ka ti, a innghahna tlakin ka ringlo, amah phei chu a ṭawngkam aṭhain a hmel pawh a ṭha  reng a mahse, pasal a tan em chuan ka duhpuilo che a ni, i pa nen hian i dinhmun te i han siamrem phawt anga pasal ṭha tak i la nei ang chu kan tia kan beiseiloh ang deuh hian nangchu i awm ṭhin a" a sawizawng chuan a rilru a nat hmel hle a, chu chuan keipawh min ti na vawng vawng a ni.

"In ngaih ang kha a nilo a sin le" ka ti zawi sap a, ka ṭah a chhuak hlur mai. Ka mittui  rawn hnam titih ngawt chu ka nu TV enlai chuan ka hru zauh a, Nau-a leng a lo haw tak avangin ani pawn engmah sawi zui ta lo.

Lalbera nen kan inbiak chuan "Ka pa in kartawpah kan leng leh ang atia, kha lam enge in an?" a lo ti a, ka pa in engmah sawi aneih loh thu ka hrilh chuan a phur zual sauh a "A remti tihna a ni thei mai engem?" nui aw lek lekin a rawn ti zui a.

"Anih ka ring ka lakah a beidawng tawh anga a phalta a niang" ka lo tih chuan a nuih a za kher mai.

"Phallo na tehse, ka lo hruai leh nghal  ang che" a tih chuan ka lo nui ve thung a.

Kar tawp chu beiseina sang tak nen kan nghak dun a ni, Nu siamtein min rawn be zawk a "I pa te lam thu hi enge ni ve reng reng le, lo kal nawn leh hmain enge an rilru tak hi hriat hmasak ka duh a" a lo ti a, chhan ngaihna ka hrelo ngang mai, a thil min rawn zawh chu a ṭul ka ti lo viau bawk a ni.

"Engmah an sawilo Nu Siamte, palai te nen an inbe leh dawn a nilawmni?" ka lo ti ngawt a. "Anih i haw tirhin engtin nge an tih che an hau che em, Ezra chung chang sawi an nei reng reng em?" a lo ti leh a, "Neilo e, engmah min haulo" awki pangngai thei ang ber chuan ka ti a "Engmah an sawilo tak tak maw?" a la rawn ti leh hram a, kan inbiak zawh hnu te chuan ka ngei deuh rum rum mai.

Amah hian eng rilru nge a put zawk ni, ka chhungte ṭawngkam bah sual a ngaihven em em ringawt hi ka ngaithei viau biklo, tunah lah kan inkar do na lam engmah ka pa chuan sawi a nei tawh bawk silo a, sawi leh se ti niawm zia zanga chutia a rawn ti chuan ka awm a ti nuamlo vek thei mai. 

Zirtawp zanah Zarin a piancham lawmpui turin min lo sawm a zanriah kan eilai a ni nghe nghe a "Naua nang pawh lo tel ve rawh aw sawhchiar siam a ngai dawn a mipa kan mamawh tam a nia" nui har har chunga a tih hnuah a chhuak zui leh maia.

"Nang chu kal ve duhlo mai rawh i nau te pahnih kal sela palai an lo kal dawna i nu nen inah awm rawh u" ka pa in a lo tih chuan ka meng deuh awk a, ni dawn tak e kartawp a lo ni reng tawh tak a lawm.

"A pu te ho i râwn ve phawt dawn emaw ka tia?" ka nuin a lo tih chuan "Kan la râwn ang chu" tih zawngin a lo chhang a, Lalbera chungchang han sawi vel chu a chak vaklo anih ka ring.

Zanriah eikhamah Lalbera chu ka Call a a chhang thei miahlo a, Call nawn leh ka tum laitakin Remtluanga Message a lo lut a, a thil rawn sawi chu ka hrethiamlo kher mai, a hawi zawng tak ngial pawh ka hrelo.

'Vite, ti lo thei loin nangman min siam anih hi min dem miah suh ang che' tih a ni, eng a rawn sawi tumna nge ka hre hauhlo, a chungah thil ṭhalo tih a tum te anih ka ring rum rum a ngaih a ti ṭha lo duh kher mai.

'Mi puitling tak i nih kha engthil ṭhalo mah ti suh' tih tê chu ka va thawn let ve hram a. A rawn chhan letna erawh ka nuin min lo koh tak vangin inhnuai lamah ka chhuksana ka en zui tawhlo thung.

Patling upa ve lam lek lek tawh pathum leh ka nu leh pa te chu Sitting room ah thu tak hmel zet hian an lo ti ti a, palai an ni tih ka hriatthiam nghal vangin hman hmawh deuhin choka lam ka pan zui a, ka chhuklai minlo hmuh vang chuan ka zak ram ram bawk.

Fridge a tui chu ka lem khawlh khawlh a ka thinphu arang dup dup a ka mur deuh sung sung lehnghal, Lalbera call a hrilh ve ka tum zeta Room ah ka Phone ka dah daih a va chhuah phei kha ka zak deuh tawh si a, keimah chuan choka chhuat dungah chuan ka vei tawn sek reng a ka za cheng a ni ber e, chutih rualin ka hlim hle bawk a ni.

Ka nu lo kal phei chu choka a lo thlen rualin "Engtin nge an tih?" ka lo ti vat a, nur zeta min enin "I pa hi a ti mak khawp mai, ka duhloh zawng tak a ni" a lo ti a.

"Engthil nge a?" hlauthawng tak chunga ka tih lai chuan ka nu chuan "I bialpa in leng te an ni reng reng lo" a lo ti hlak a.

"Tu te nge a?" ka lo ti leh a, ka inleng te an ni emaw ka lo ti hman tak tak a ni.

"Remtluanga palai te an nih saw?" ka nuin a tih rual chuan ka lo hawihai nasa mai.

END OF CHAPTER - 21