KA LALBERA (CH 31 - 33)

CHAPTER - 31

@violette khiangte

Thla khat lai a liam ta, Lalbera erawh a reh ta vang vang mai, a chanchin ka hriat chhun chu Bank aṭanga pawisa a lakchhuah thu chauh a ni, pawisa a lak chhuah thu Usangpuian min lo hrilh chuan a damṭha a ni tih ka ring hmiah a, ka awm a nuam ve sawt ṭhin, Christmas chu Margareti te bulah mal leh khawhar takin ka hmang liama, kumthar erawh Nsa te nupa bakah Lalbera ṭhiante nen kan hmangho a, rilru chhungrila khawharna erawh a tu a te mahin min hnem zo lo chu a ni.

Biak tumin ka Phone awllo a, tlang thei ngailo mahse ka tum nawn fo ṭhin, ka ngai takzet a ni, engtin nge a khawsak ang, ka hmuhphak loh ah a natna kha a tuar tlawk tlawk mai angem tih te ka ngaihtuah a, mahni inkhawngaihna rilru ka put dawn apiangin amah ka ngaihtuaha vannei zawk ka nih zia ka hre leh ṭhin.

Zingah Usangpuian min lo bia a, Ezra chu Mumbai a a awm thu leh ngaihtuah angaihloh thu min lo hrilh a, "Tekheuh-in minlo bia a, reilo te a tlawh zawka hmun dang apan leh niawm tak a ni" a ti a , "A hawi khawthawng ve lawk duh te pawh aniang, a lo haw veleh mai dawn chu" tiin ka chhang tak nain han beisei vak ngaihna lah ka hre der lo.

"Ni e eng em a tilo ang, mi rawn phone lah a tum mang silo a, a chanchin tal hi rawn sawi tur a sin mawle" a ti zui niah niah a. Kan inbiak zawh hnu maiah Nsa te nupa an lo lang a, chanchin ka hriat leh hriatloh an lo ngai chang a, ka hriat ang ang chu ka lo hrilh a, Nsan a ṭhian dang te a hrilh chhawng veleh a.

A ṭhiante chuan an ngaihtuah ngang mai, zantin an lo lenga kan inah chuan anlo inkawm khawm ṭhin a, rei tak lengloin an ṭin mai zela, ka khawhar lutuk tur pawh min hnem viau a ni, kar hnih hnuah ka nu leh Nau-an min lo hruai an tum a, ka lo duhlo nasa mai a, beidawng takin an haw a, zanah ka pa in min lo Phone a , a tuka haw turin minlo ti tawng maia, haw mai chu ka tum hauhlo,  a sawi zawh hmain Phone chu ka off zui ta daih a. Chuta chin chu minlo be leh ta lo vang vang a. 

Haw duhlohna chhan lian tak ka nei a ni, a chhanchu ka pa a danglam lo a, ka haw anih chuan a bul aṭangin kan ṭan leh angai ngei ang, haw ta ila ka haw hnu maiah Lalbera lo kir veleh si sela kan dinhmun a laklawh lehvek mai dawn a sin, chuvang chuan mualpho leh zah pawh dawnloin ka nghak fan fan mai a ni.

Lalbera chhungten In ka chhuahsan thu an hriat chuan hrehawm an ti hle a, Nu Siamtei leh Usangpuia min hmu turin an lo kal a, ka duh anih phawt chuan an inlama insawn phei turin min ti nghe nghe a chu erawh ka duh lo, ka tihtur ni pawhin ka hrelo.

Ni a liam a thla a vei a, ka mi nghah chu ala reh vung vung mai si, ngaihtuah lohlai ka nei ngailo, hna ka thawhlai te ka muthmunah te leh khawi hmunah pawh amah chu ka ngaihtuah a, kawtthler khawi hmunah emaw tawk thut tur ang te in ka inngaihtuah ṭhin a, beisei lo tak chung pawhin ka mit hian a zawng ruai reng thung si.

A damṭha a ngem? 

Vawikhat chauh tal min lo bia sela hetiang dinhmun hrehawm tak hi inpui tawnin tuar chhuak dun ila, kan phurrit te pawh han inchhawk dunin kan pahniha kan beih phawt chuan kan tuar chhuak thei em em ang tih ka ring a, chu erawh ka duhthusam mai a ni thung.

Zankhat chu rinloh lutukin Remtluang a lo lang hlawl a, ka hmuh rualin ka lo melh tur khai a, zan dangah chuan thim hlimah kawngkhar ka kalh a Nsa te ṭhianho an lo len duh chang pawhin an lo kik mai ṭhin a, ka kalh har zan berkherin a lo leng a ni, "Enge i lo tih dawn?" pawr zeta ka lo tih chuan "Veng ṭhenawmah sawn ka kala ka lo tlang lawk" a lo ti vat a, inthlahrun hmel deka ṭhutthlenga a ṭhu chu ka pawh duh lawklo a, inchhung sekrek ka khawih zui mawlh mawlh chu min lo en leh ṭhin a, lo biak luam chu ṭul chiah pawhin  ka hrelo.

"Hetia mahni a awm ringawt chu i hlau miah nange?" a rawn tih chuan "Hlauh tur a awm a mi?" ka lo ti bung nghut a.

"Tunlaiah misual leh rukru an tam alawm, mahni chauha chen te chu a himloh bakah nang phei chu hmeichhia i ni lehnghal a nia" chek hlak pahin a ti a. "Engmah ka hlau lo e" ka tih chuan a lo nui hak a.

"Nang hi chu i huai ve ngawt mai, nge ni a i luhlul ka ti zawk dawn?" nui ṭhaw chunga min lo en chuan "Ka ni ve ve a lawm" ka lo ti leh mai a.

"Haw tawh rawh, keichu i nunah ka lo inrawlh tawhlo ang, min duhlo chung chung te chu ka duh bik hleinem" a tih leh chuan ka lo ner saka, chutiang rilru chu a hma daih khan lo pu tawh sela tun hun te hi hetiang lo deuh hian kan hmang ngei ang.

"Nangmah vanga heta awm ka nilo aw, i buai lo anih chuan enge hetah i lo kal duh a?" ka lo ti leh nghat a. 

"Ka ngaihtuah vang che anih hi, tawhsual te tawk palh ta la ṭanpuitu tur che i nei miah dawn hleinem i bialpa lah a tawm bo hmak lehnghal a" meinei tak a lo tih chuan ka thil tihlai dah meuhin a hmel chu ka en a. "Lo buai duhsuh, ngaihsaktu te chu ka ve ngah lutuk i ngaihsak ka ngai miahlo a nia" ka lo ti a, ka sawilai mekin pawnlamah chuan thawm a rawn ri nak nak a, "Chu anlo kal mai alawm" ka tih leh rualin Nsa te ṭhianho chu kawngka ah an lo lang ve nghalzat a.

"Vîte ka ril aṭam lutuk, eitur engemaw siam teh" Ruatan a lo ti lut nghal lang lang a. Remtluanga hmel an hmu chu an phawk hra hlawm mai.

"Ehh..makpa hual kha elaw?" nui hawk chunga Johanan alo tih chuan chhang lemloin ka lo nuih a. "Amah chu hei hi maw, makpa hual inla Raja deuh chu maw?" Ruatan a tih leh chuan Nsa an mitmeiin a lo khap a, J.mala lo lut chuan "Inleng i nei elaw, bialpa i ngah bik emai ka seat ah te i ṭhuttir lehnghal" nui vur vur chunga a tih chuan midang ho chuan anlo nuih zui a, an eitur lo ken chu phawrhin thingpui an lum sawk sawk a, an pali chuan an titi bawrh bawrh a, Remtluanga chuan nuam a ti ta vaklo aniang, "Ka haw tawh mai ange" tiin a tho chhuak thuai a.

"Aw..la awm ve la, ila ninawm ve mai mai alawm" Johanan a lo tih chuan chhangloin kawngkhar lam a pan a, "Anih mangṭha mai aw" tiin kawngkhar thleng chu ka va thlah ta tho a.

Pawn a chhuah rual chuan min enin ten hmel zet hian min melh a "Hetiang vang alo nih hi mahni a awm ilo duh ni, tlangval hawklak deuh deuh ilo kawikhawm zantin anih hmel e, i lo thei ber anih hi i pa pawhin a chhuang khawp ang che" tih zauh pahin min hnungchhawn a, chhan pawh ka chhan hma a a pen zui hlawk hlawk vang chuan a kal liam chu thip fahranin ka melh a, a duh duh danin lo ngai tawh mai mai teh se, ani laka insawifiah kher chu ka tan a ṭangkai lo e.

"A hmel kha inlo hmu em, a phakar hmel zik zek e, awm rei deuh sela han piai hlak ka chak a sin mawle" Ruatan a lo ti zauh a. "I kuttum kha Hruaisanga hnek nan khek zawk rawh" Johanan a lo tih chuan an nui dar dar a. "Zanin chu a chaklo ang chu aw, a ṭawngtam tawh bawk a lu lam leh mawnglam hre lekloin ania ka khawih dawn ni" Ruatan a tih leh chuan "Enge inbuai leh tak" ka lo ti vin hlar a.

"Buai leh tak pawh anilo, buaina a la kaltluang a nih hi, Malsawmhlua chu awmve phei sela chuan a phur khawp ang" Nsan a lo tih chuan midang ho chu an ngawi ṭhap a, "Awm ve sela chuan in bulah ka kal tir lo ang" ka lo tih chuan an nui suk suk hlawm a. Tihian ka lungleng min hnem turin an lo kala mahse, ka lunglen an tizual leh ṭhin, amahni ka hmuh a piang hian ka ngaizual ṭhin a, an haw hnu ah hian ka inngaihtuah lungpuama ka ṭap lo chauh zel a ni.

Mahse, ṭah ka tum tawhlo, ṭah ka chak em em pawhin ka insum ṭang ṭang a, chhel taka awm turin ka infuih sauh sauh a, hrehawm ṭhin viau mahse ka tuar tuar ve fan fan ṭhin. Thil an ei zawh hnu chuan pawnah kan ṭhu khawma an tihdan ngai a ni, zial an zu a an ti ti barh barh a, kei muturin ka insiam thung a, ka muthilh tawh awm velah an haw chauh ṭhin a ni.

Kawngkhar kalh tura ka va dahlai chuan Nsa a lo let leh a, "Tui bottle ka lo la lawk ang" tiin a lo lut zui a. 

"Vawinah kan inbia a, midang awmlaiin ka sawi duhlo anih kha" a tih chuan "Engtikah, engthil nge a lo sawi" rang lutukin ka lo ti nghal chul a. "Rei tak kan inbe lo, i chanchin min zawt a ka lo hrilh a lo haw tir ngei ngei ang che u, a kir leh hma chu ka lo let lo ang a ti a" Nsan a tih chuan ka na vawng vawng mai.

"A lo haw hun ka nghak tih i hrilh lo ami?" ka tih leh chuan a bu nghat a, ka mittui alo hnam leh ṭiam ṭiam tawh. "Ka hrilh a lawm mahse, a ngaihdan a nilo a, haw la a duh ber a nih hmel, a kal dawn khan i pa nen an inhmuh thu a sawi a, an inremsiam leh anih ka ring" Nsan a tih leh chuan ka hrethiamlo kher mai, ka pa nen an inhmu amaw, engethilah nge an inhmuh ang le?

"Lalnunsang ka lakah zep nei miahloin i hriat zawng zawng min hrilh rawh" ṭah chhuak inpetruh fan fan chungin ka ti a. "Abak engmah ka hre biklo, amah pawn min hrilh mumal bik hleinem, thil a theihnghilh kual reng tih te chu i hriat ve tho kha, a thil min hrilh te pawh a chhumbung nuai zel a nia" a ti a, rilru hi an ti hah hlawm takzet a ni, ka pa chuan eng thil tak sawipui ang maw.

Nsa chhuah leh hnu chuan ka mu thei lawklo a, tukverh bulah ṭhuin a Guiter hnutchhiah chu ka kuah ran a, zanin chu ka ngai thar takzet a ni. Guiter chu perhin ka zai dawn a, ka ṭah chhuak lutuk vang chuan ka ti hleithei meuhlo, min hnawhtawt up up reng ringawt mai. Ṭap ṭeuh chung chuan ka zai lui a, a van har kher em.

Kum a liam leh ta, kum a thar a kei erawh ka chuai rawih rawih mai, ka beidawng a ni. Tunah chuan ṭap tur pawhin chakna ka nei tawhlo, hna ka kal a ka eiin ka mu tawp a, ka chawmawlh zo vek ni berin ka hria, Zawltlingvawnnat an sawi chu hetiang hi anih ka ring.

'Zawltlingvawnnat' ka ngaihtuah zawng ringawt pawhin ka nuih a za ṭhin, mi nep tak leh tuarzuau fal te chauhin an neih tura ka ngaih ṭhin kha a taka han tawn chuan a lo ni hauhlo, he natna hi hmangaihna thuk tak aṭanglo chuan koh chhuah mai mai theih a ni tlatlo, hmangaihna in a hliam thinglung keh chhia aṭanga lo chhuak a ni, he natna vei tur hian maw tlangsang tak paltlang angai a a duh apiang neih theih anilo bawk, ka dem ta lo he natna in mihring thinlung a chim tawh chuan thinlung buluk ber mai Heathcliff a te, lady of camelias te pawh a sawr tui zawih zawih mai anih kha.

Mahse, vanduai ka inti ngailo ang, he natna hi mi nazawng neih theih ani tlat lo a, chuvang tak chuan Ezra kha ka lo hmangaih tak zet a ni tih ka inhriat chian phah a ni.

Tlai khat ka hna bang ka haw chu ka nuamsamlo a eirawng pawh bawl peihloin ka mu tawp a, tlang hrileng ka dawng fuh a nih ka ring, zanah thil eiturin ka tho chhuak peih ṭawka Nsa te ṭhian ho lo kal pawh ka chiau au peih meuhlo.

Zingah chuan khuh bur bur reng mahila ka tho nuam leh deuha, hna pawh ka kal zawma, ka ke na ut ut reng chu ka hrethiam chiahlo, hna han chawlhpui nan em chuan damin ka inhre bawk si. Mahse, ni thum vel zet chu khawsik ser ser ka neih zui tak avangin ka inentir a ka result a lo chhuah chuan TB ka lo vei hi a lo ni a, a tir te anih vangin inlama inenkawl turin Damdawi min chawh a, ka nu hrilh ka tum rum rum a mahse, a rilru ka ti hah mai mai dawna ka hriat vangin ka ti leh ta lo a, Pathian zarah eng em ka ti biklo ang.

Ka hna chu chawlh ka la a, chhun lamah Margaretin min awmpui deuh chawt ṭhin a, zanlam erawh naupang nen an nih avangin a lo kal theilo a, an ina insawn rih mai tura min sawm lahin ka duh bik silo a, an chhangchhe bawk si a ka tibuai mai mai dawnin ka hria a ni. Nsa nupui leh ṭhenawmnu in min tlawh awllo a, ka mamawh ang chu min dap sak nghal zung zung a, an chunga ka lawm zia chu sawia fiahzo thei mai a nilo.

Kar thum zet chu khumah ka mu ta, ka cherin ka dawl dang em em a, ka na zualpui erawh a reh tawh rualin tha erawh a beitham viau thung. Dam kawr chungin hna ka kal leh a, a taksa a chau ngawih ngawih a chutiang bawkin ka rilru pawh.

Zantin hian zing khua a var hun hi ka nghakhlel ṭhin a "Naktukah chuan a lo haw tawh ngei ngei ang" ka ti rilru fo a, beiseilo tak chunga ka beisei luih chu khawthim rualin a eng a reh ve leh a, mahse zing khua a var hian ka hnaih leh sawtin ka hria a chutiang chuan ni ka chhiar tuk tin a ni.

Ka nu nen kan inbiak ṭumin TB ka vei thu ka lo hrilh a, a dam leh ṭan tawh tih ka hrilh ve tak nain a chiai buai nghal chung a ni ber e. "Lo haw daih mai rawh, i pa pawn a rem ti lutuk a nia" a lo tih chuan haw ka duhloh thu ka lo hrilh leh mauh mai a, min ngaihtuah si a ka rilru hi chu kan tih hah ṭhin teh e.

Zirtawp tlaia ka haw chu ka pa in ka bungrua zawng zawng a lo la fai vek mai a let lo theiloin min siam a ni, zanah chuan Nauan min lo hruai a, ka let leh chu ka inchhir mai ang tih ka hlau bawk.

Ka pa chuan a ngaite bawkin min zilh a, ani nen hi chung bung thar kan kai dun thei meuh lo chu a ni, kan inhnial thinrim leh ta nghala Father hnena sualpuanna nei turin min ti zui bawk, ka pa nena hetiang boruak neih reng mai pawh hi ka kham ta, a chang chuan hetiang reng renga nun aichuan thihna chu hahdamthlak zawk hialin ka hre ṭhin.

*End of flashback*

"I la muhil nange, naktukah inentir tura thawh hma kan ngaih kha" ka room kawngkhara lo dak chungin ka nuin a lo ti a, "Ka mu dawn chiah e" tiin ka Guiter ken lai chu khumah chuan theh phei a, ka mut a chhuaklo viau nangin ka taksa erawh a chau hluah hluah a ni.

"Zingah minlo kaitho mai rawh aw" khumah muin puan ka sin ṭha sat sat a, ka bula Guiter chu ka kuah ran mai bawk a, ka nu chhuah leh hnu pawh chuan zawitein ka tuai ri reng a, zanin chu ka ngaizual a ni, engkim an awmna hmunah an awm leh tawh a, kei pawh ka let a ka kiangah ka chhungte an awm bawk, kan intawn hma a ka  nun danah khan ka let leh a ni ber a mahse, ani kha engtin nge a khawsak ve ang?

"Hun harsa tak kan paltlang dun a, lungngaihna tuifawn karah pawh invuan tlatin harsatna kan paltlang dun a nih kha, kan chhungte kalsan ve vein pumkhatah kan insiam a, khatianga inring tawn khan, invuan tlatin, chhel taka tuar dunin, lungngaihna inṭawmin.... Chutiang chuan kan ti leh thei lawm ni?

I chunga ka lungawilohna zawng zawngah khan ka inchhira, i ngaihsakna tam tak ka dawna lawmthu sawi nachang ka hriatloh te nen, keichuan zui tawp che bak tih engmah ka lo nei ve reng renglo tih ka hriat hnu hian, i mi dawm theihna leh i mi ngaihsakna zozai te kha ka van tluklo che em, i damlo chungpawh khan nang chuan nitin i hmangaihna i lan tir ṭhin a, lungngaihna ka tawn ṭum te, dawhtheihna ka tlakchham laite, rulhlet nachang ka hriat loh lai te khan ka tana i hlutzia ka ngaihtuah ngai derlo,

Chapona in  min hliah lai te khan ka tlin lohna i haider ṭhin a, keiin i tlinlohna ka zawng ṭhin, Ezra hun liam tawh hnu kha chu a kohkir theih tawhloh tih ka hria a, boruak ṭha a awm leh theihnan engkim tidanglam turin vawikhat chauh hun min pe leh ta che, lo kir leh rawh aw ka dikloh zia ka hria a, min lo ngaidam ang che"

"Ka ngai takzet che a ni Ezra" ka bek rawn lum thla pap pap chu ka tuaihul sawk sawk a, ka ṭahlohna pawh a rei tawh asin, kum khat zet chu chhel takin ka tuar a, ṭaplo tur pawhin ka insum thei tawh a, vawin zet zawng insum turin chakna ka neilo, chhungte kianga ka awmbik ringawt pawh hi ka inthiam thei meuhlo zawng a ni.

Zingah chuan ka chau zual hle a, Doctor hnena ka nu nen kan va kal chuan damdawi engemaw zat min chawh a, eitur hrisel thei leh thlai lam eitam hle turin min ti bawk a, kan haw kawngah chuan ka nu in bazar nghal a rawt a, thei chu a lei duham ngang mai, In kan thlen hnuah Apple leh Persimmon te chu min vel sak a, ka theih anga tam eiturin min ti mawlh mawlh a, damṭhat laia kan ngainat em em pawh hi damsamloh chuan kan eithleithei meuhlo a ni. 

Ka damloh vang nge ni ka pa pawn min duat ve ta deuhin ka hria, min vin ngai ta lo a, nge ni a min vin leh chuan ka chhanglet leh zat zat dawn tih a hriatlawk vanga min vin ngai talo zawk anih chu ngaihdan ka nei thiamlo. 

Kar hnih a liam hnu chuan ka zia viau tawh a, ei in te ka ti ṭhain ka inenkawl uluk bawk a ka taksa ah pawh hmuh theihin hma ka sawn a ni. Hna ka kal a inchhung chet lam chu tleirawl awmpui kan neih avangin ka awlthawng hle a, hunawl ka neih chang chuan Bathlarah ṭhuin Guiter ka perha ṭhin, nuam ka tia amah ka ngaihzual changin ka tifo mai, chuloah mizinga khawsaka ṭhian han kawm vel pawh ka chak lo a phurna ka nei hauhlo bawk.

Nsa leh a ṭhiante an lo lenglut fo a, ka pa awmloh lai an nang fuh thei em em mai lehnghal a, an hmel ka hmuh hi chuan  ka hahdam phah huai ṭhin, zankhat chu an lo lo leng an ṭhu fel awrh tih ah ka pa inkhawm tur kalchuak chu a lo let leh hlawl mai a, ka nuin a chhan a lo zawh chuan a pum a nawmloh thuin a lo chhang a,  Ruata pek chuan "Ka pu chu inkhawm tur ang deuhin i chhuak ve uk a a ruk in ilo haw leh daih ani maw?" a lo ti pek a. Ka pa chu a lawmloh hmel kher mai.

Room a inthlak tura a luh laichuan ka ṭhian te chuan Ruata chu an hau sap sap a, "Ṭawngkam i thiamlo ropui si lo be tawh miah suh" Johanan a tih chuan "Anih min biak pawn ka chhang tawh miahlo ang" a lo ti then a, ka pa lo chhuak leh chu an ep chiah Sofa ah chuan ṭhuin ka inleng te chu chîk lutukin a melh kual dan dan a, ani ho chuan an lo hmulo der hmiah mai a, an awmdan chuan nuih a ti za lek lek a ni.

An ti ti barh barh a an ṭawng duh hlawm ngang mai a, zu chu an in chuan ka ringa rui hmel phei chu an pu lo, a ṭawng duh tawk velin an kai anih ka ring, kan TV enlaiah chuan hmailai lo neihdan vel a lo langa, chu chu sawi chhunzawmin lo neih leh luikal chung chang vel sawiin an inhnial rap rap a, an titi chu ka pa chuan awihloh hmel zetin a lo ngaithla a anni ho lahin ka pa chu a ṭhu ve reng tih hrelo ang hmakin an pali chuan an titi a, J.mala pawh a ṭawng duh kher mai.

"Buhtuh te chu a harlo e, a sir ah ṭang ila han vau chho hmiah hmiah mai ila" Ruatan a tih chuan an nui dar dar a, "Hepa hi lo pawh a la hmu tawp lo ang, hmani kan spot na pawh chul atan a va it awm te ati mawle" Johanan a tih chuan a lo ṭang nasa mai a, an inhnial tui chho a an ṭawng ring larh larh hlawm tawh viau a ni.

"In va bengchheng bawrh bawrh e aw, ralte awmkhawm nghalloh chuan a" ka pain a lo tih chuan ka pa lam chu an hawi ṭhap a. "Eh..ka pu eng hnam nge inih a?" Johanan a tih chuan "Khiangte"a lo ti ṭha ve mai a.

"Khiangte ho ve mai mai hi a, kan ṭhenawma khiangte pa chu a thinchhe bawrlawk lutuk a hminga koh pawn zuk mengrum nghal ringawt chuan " nui hak chunga Ruatan a lo tih chuan "Khiangte chu an huaisen a sin" ka pa chuan a lo ti zauh a. "Ka awihlo e a, hmanlai pasalṭha hmingthang deuh ah pawh khiangte an awm awmpawh ka hre ngailo reng reng" Ruatan a lo tih leh chuan an inhnial ṭan leh der mai, an pali chuan ka pa chu an hnial rawn a, thil an hre tlem ve ang reng bawk si a, ka pa chuan a zilh deuh nek a, a hnuah chuan Bomb vawm dan leh luikal chung chang sawi chhoin ka pa titi chu an ngaithla ṭhap a, ka pa ṭawngtui lutuk chu mak ka ti hial mai, a thilsawi paha amah ahan in fak tel zauh ṭhin chu ka ṭhiante chuan an ngaihsan hmel ngang mai bawk a, ka pa titi chu an ngaithla dauh dauh ringawt mai a ni.

An haw dawn chuan "In la rawn leng leh ṭhin dawn nia" tiin ka pa chuan a thlah ve thlap a, mak ka ti lek lek a  "An mawl hlawm hle mai" nui hak hak chunga ka pan a tih chuan ka nu nen kan in melh ralh a, engmah phei chu a sawizui hranlo.

Chuta ṭang chuan an lo leng ngun ve ta viau a, zan an chhuak tur hi innghah khawm nang tak hian anlo hmang tawh ni berin ka hria, ka pa awm lai anih chuan an titi a kal thei hle a, ka pa lo insawithei uang ve bawk nen, a hnuah phei chuan an nui ho dual dual a ka pa chu an bawl deuh tlatin ka hre bawk.

Nikhat chu office a ka awmlaiin Usangpuian min lo phone a "Vîte hei ka pa nen Mumbaiah kan kaldawn a, Ezra kan hruai dawn anih hi" a rawn tih chuan chhan mai ngaihna ka hrelo a, ka hamhaihin la lungchhe nghal lek lek mai.

"A lo bia che ami, a damṭha em, enge alo sawi a?" ka lo ti nghal thuai thuai a. "A....zep lohah chuan a damṭha vak lo aniang, ka thleng thla phawt anga chanchin ka lo hrilh dawn che nia" tiin min chhang a, kan inbiak zawh hnu chuan thil dang ka ngaihtuah hleithei tawh meuhlo, a damṭha vaklo a tih chu ka ngaihtuah tluk tluk renga, hmuh hlan nghakhlel viau e ti loin ka nguai ru hle thung a ni.

A tuk zanah chuan Usangpuia chuan min lo be leh a "Enge a an a, amah a biak theih em?" ka lo ti vat a. "A ṭha e, ngaihtuah duh suh naktuk lamah kan lo haw leh dawna, hmai chhanah i be zawk dawnnia" a lo ti a, biak ka chak tehlul nen nghah ala ngai lehta fo mai.

A lo haw tur thu a ṭhiante ka hrilh chuan an phur ngang mai a, a lo thlen huna chaw eikhawm an rawt a, "I pa pawh kan sawn ve dawn nia" Ruatan uang fahrana a lo tih chuan kan nui dar dar a, heng ho hian ka  pa chêng chu an man tawh hlawm fu a ni. 

"Tlaiah kan lo thleng a, inah kan innghat fel tawh e" tih Message ka dawng chu thinphu a rang nghal zaih zaih mai, a zan a zana va kal mai ka nap a, chu em chu nitheiin ka hre silo a, Johana ten kal nghal an tum thu an lo sawi chuan zui ve chak tak ka ni.

Hma deuh ah thoin Office ka kala nilengin ka hlehhawlh a, a hmel la hmulo mahila ka awm anuam ru veng veng thung. Tlai ban veleh ah hman hmawh takin Lalbera te in chu ka pan a, ka va thlen chuan  inleng anlo nei nual a, Usangpuia nen inchhung lamah kan inzui chho a, a room kawngkhar ka hawng tur chu ka zam rinagwt mai, kawngkhar bulah chuan ka ding renrawna "Lut ta che" Usangpuian a lo tih chuan muangchangin kawngkhar chu ka pawt hawng a. 

Thlanglam tukverh bula min hnungchhawn zawnga ṭhu chu ka va hmuh chuan ka mittui alo hnam a, alo hawilo a ka thawm a hrelo a nih ka ring, Usangpuia lam ka hawi leh chuan min lo zui lo a, keimah chauhin ka lut a ni tih ka hre chawp chilh a.

"Ezra.." ka tih chuan a lo hawilo. Pan hnaiin a hma ah chuan ka va dinga a, Chair nghenchhan nghengin a lo muhil mek a, a landan chu danglam tak a ni. A tih ṭhan loh dan deuhin a sam chu a met kawng a, a mitkhur leh biang cher deuh kuam te chu ka hmu nghal a, a kut chu vuanin ka hum vang vang a ka ṭaplo thei lo.

Chutah rawn mengin min lo en a, a mitmeng chu a buai nak mai!

Ṭap pur chungin keiin ka lo kuah a, a ṭang ṭunga chu ka kuah nghet sauh sauh a, chutah min enin maktih hmel deuh hian min thlek a "I lo haw ve ta" tiin ka ṭahnuih hak a, a biangah chuan kut khing hniha dawmin ka en vang vang a chutiang bawk a ni pawn.

A lo ṭawng chhuah erawh chuan ka beiseiloh tak mai zawhna min zawt a. 

"Tunge i nih?" tiin min zawt a! Ka nghing lawih mai in ka hria. Min hre chhuak theilo, chumai niloin  min lo theihnghilh hmin der tawh zawk a ni.

*CHAPTER - 32*

"Keimah ka nih hi, min hrelo a mi?" ka tih chuan ngun zet mai hian min thlek leh a "Hria e" zawi deuh taka a tih chuan ka ring ngamlo, min hriat thu sawi mahse, a mitmeng chuan hmelhriatloh ang maiin min en thung si a ni.

"Min hre tak tak maw, min han enchiang teh" a kut lain ka biang chu a tawh tir a, ngaihtuah nei niawm taka a meng taltap chu beiseinei takin ka lo en a, min hrechhuak lo ang tih ka hlau lutuk chu ka thinphu a rang dup dup thei hial mai.

"Ka hria che a lawm Assistant" a rawn tih chuan ka nui tawk tak a, min hria! Mahse, ka van chianglo em.

"Ka chau lutuka ka lo muhil a lawm mawle, i lo thlenna a rei tawh em?" a tih leh takah chuan ka lo thaw huaia. Aw Lalpa.. ka lawm e Ezra hi min la theihngilh tir loh avangin. Ka van hlauthawng hman tehlul em.

"Tinge minlo biakloha, tinge i kal bo daih? Engmah i lo sawi bawk silo a ka rilru hah theih zia kha i hria em?" ka ti zui mawlh mawlh a, "A zialo hlemai" a lo tih rualin "Chutiang ringawtin sawi suh, min ngaihtuah ve miahlo anih kha" ka lo ti leh vat a.

"Min ngai a mi?" tiin a nui deuh suk suk a. "Ngai e, i awmloh hlanin ka lo thihsan lo chauh che a lawm" ṭah nuih hak chunga ka tih chuan nuisang chungin min en a. "I lu te ilo met a, i lang dang vek i cher bawk sia thil i ei ṭha lo a mi?" a khabe ah vuana ka thlek vat vat laichuan ka kut lo manin "Nangpawh i danglam a lawm, tarmit i vuahlo a tikhan i hmelṭha mahse, i samkir kha i inhmeh zawk" nuisak chunga a tih chuan ka rilru a tibuai leh map tawh.

"Ahma pawn hei te chu i hmuh tawh khâ!" mak ti lek lekin a hmel chu ka en a, "Chutia law?" tih ringawtin min chhang a, "Ezra, min hre chiang chiah a maw?" ka tih leh chuan "Lalber ti rawh, ka hria che a lawm chiang takin" fiah angreng tak a a tih leh takah chuan ka rilru chu a inkhâp buai telh telh mai.

"Min hriat chuan a ṭhat chu" ka ti zawi sap a, ka inhmuhlohna a rei tawh em vangin a mal chungah ṭhuta kuah vawng vawng ka chak a. Mahse, engmah chêtlak a tum silo a, chêt ka thawh hmasa hreh ve deuh ṭung bawk si a, lai zetin a bulah chuan ka ding a, ani lahin min en reng bawk a. 

Ka insum thei tawhlo, a hmel chuan ka lung a ti chhe zual a ni. "Ka ngai lutuk che, i lo haw har lutuka" tih pahin a malchungah chuan ka ṭhu thla a ka kuah ta nge nge a, dimtea min kuahin ka hnungah chuan a beng thek thek a keiin ka kuah ṭha sauh sauh a.

"Ka hmangaih che Vanlalber, khawiah mah ka hriatlohin kal tawh suh aw" ka sawilai chuan ka mittui a hnam ṭiam ṭiam a, ṭah chak viau mahila a rilru ka tih chiai ka hlau si a ka insum ve ṭang ṭang rih a ni.

"Min hmangaih maw?" maktih hmel taka min nam sawnin chik fe hian min en a, kei ka lo bu nghat nghat thunga ka mittui a lo luang zung zung bawk. "Nangmah hi i ni tiraw, ka chân tak kha?" tiin min zawt a, a zawhna awmzia chu ka hrethiamlo!

"Aih, min chân hleinem i tan ka awm reng ṭhin a lawm, tun aṭang chuan i bulah ka awm reng tawh ang" tih leh kuah ka rual a, "I ni ngei mai, nangmah ngei hi i ni" tiin min lo kuah nghet salh salh a, ka ṭap lo theilo. 

"Ka mumangah ka hmu ṭhin che a sin mahse, engthil nge ka chungah hian thleng le, engkim hi a diklo a ni" a hmel chu enin ka kut pahnihin a biang chu ka dawm a, "A pawilo, ngaihtuah duh miah suh keiman engkim ka hria a lawm, i theihnghilh anih pawhin a pawi reng reng lo, i rilru ti hah miah suh aw" ka ti sap sap a, min en vung vung bak chu engmah a sawilo.

Khumah ṭhuin kan titi melh melh a, thil engkim mai chu a hre phelh phung vek mai, University kan kal dun lai a hria a, a hnu a kan inkawp zui tak dan kha a hre mumal meuhlo. Hriat chhuahtir tuma thil hrilh chiam chu atan thil ṭhalo tak a ni, chutianga kan  tih chuan a natna a tizual thei a, rilru hahdam taka awm chu a tan a ṭhat ber avangin "Ngaihtuah duh tawh suh, engmah thil pawimawh a awmlo" tiin ka lo hrilh thuai thuai a. 

Khaw thim dawn ruaiah ka haw a, ka haw dawn chuan Nsa te ṭhian ho pawh an lo thleng veleh reng tawh, kan thlah ang che an ti na in ka hnial rih thung a, Lalbera a muthilh avangin keipawn ka hawsan ta rih a ni.

Usangpuia min hrilh dan chuan Alzheimer a ni em an la chiang lo a nih theihna Chance erawh a sang hle, Dimentia chi khat chu a ni ngei mai a, a thluak hi a sawng anih chuan reilo teah engkim a theih nghilh anga, thil ei leh ṭawng tak ngial pawh a tan a harsa tawh dawn a ni, hma hun a eng lo kher mai, ṭah loh tum chu har tak a ni.

"A natna ang vei ho hi an awmdan ka zawt kual nual a Vîte kei chu ka rilru ana lutuk, kum 28 chauh ala nia tlangval thothang ṭha tak leh fing tak a ni ṭhin a, hetiang natna ber kher hi....." sawi zawm theilo in a ngawi vang vang a, keilah ka ṭawng hleithei der lo.

"Ani chu heti hian a ral riai riai mai dawn a nia, ka nau mizia kan chhungkua tihlim em em ṭhin tu kha a awm tawhlo tura ka ngaihtuah hian a hrehawm ka ti ber, Therapy te han la zo sela a damṭhat veleh ah sumdawnna lianzawk kan khawih dun ang chu ka lo ti a sin mawle, mihring hian hma hun hi kan hrelo em a ni" insum tih hriat lutuka Usangpuia inpetruh fan fan kha ka ngaihtuah zui a, Taxi a ka chuan lai te chuan ka ṭap ṭeuh reng mai.

Ngaihtuahna a vak kual ruai renga, ka inngaihtuah lungpuam zel bawk. Google a ṭangin Dimentia chung chang chu ka enkual a, ka rilru na lutuk chu ka insum hleithei meuhlo, ka ṭah chhuah loh nan ka hmui ka hup ngar ngar a, mittui erawh ka dang senglo.

Reilo teah Phone hman te, thawmhnaw hak leh thlak takngial pawh a theilo thuai ang, mahni in enkawl takngial pawh a ti theilo thuai dawn a, tu emaw amah vil chawt tu tur a mamawh dawn a ni, a natna ang vei ho hian thil ei an thlah mai ṭhin a, chu chuan an taksa a tichhe hma em em bawk, engtin nge ka tih ang, enkawl chu ka duh takzet a ni. 

Ka thawmhnaw Bag nen ka pan tawp mai dawn em ni, mualpho leh zah chu ka hlaulo mitena min thlir dan tur chu hman aṭang khan ka ngaihtuah ngai tawhlo a mahse, ka nu leh pa duhloh zawnga ka khawsak apiang hian ka tluanglo zel chu anih si hi, tinge maw kan nun hi a harsat bik em em le Lalber?

Kan in ka thlen dawn chuan ka inhruhul sawk sawk a, Step ah chuan dingin thawk ka la te te a ka ṭah chhuak lutuk insum chu ka khur titih der a, thawk a sak ṭalh mai a thin a thip hlur bawk.

"Chibai Mari, eng kawng nge ka zawh tak ang le, kawng min han kawh hmuh lul teh, ka hmangaih kha a na ema heti mai chuan ka tawpsan theilo ang, nangpawn ilo hre ve ti raw, a damlo a...a tan engmah tihsak thei ka nei silo, engkim remruat feltu hnenah khan min dilsak ang che aw... " ṭawngṭai bak chu enge tih theih ka neih chuan le? a ṭul anih phawt chuan vawi sangtam pawh ka dil mai ang, a kianga ka awm theihna tur chauh tal pawhin.

Inchhunga ka lut chu choka aṭanga ka nu lo chhuak nen kan intawk a "I va tlai ve, Phone i la thei silo a" mak tih hmel taka min en chungin a ti a, ka nu hmel ka hmuh rual rualin ka lung a chhe thar a, ka ṭap chhuak nghal hlawp hlawp a, Sitting room aṭanga ka pa in min lo en reng ka hmuh chuan ka lungchhe zual ting mai.

"Enga ti nge a..?" ka pa aw ri a min ngaihsakna lo lang chu ka hailo. 

"Pa....ka rilru a na lutuk.." a lampana kalpahin ka ṭap hlawp hlawp a, a ṭhutna aṭanga a lo ding chhuak chu a awmah ka bei thlawp a ni ber mai. "Engti zia nge?" a tih pawh chuan chhang hleitheiloin ka la insut hlawp hlawp a, ka khur dar dar bawk a ka inthunun thei nganglo a ni.

"Khaw maw ṭhu la, enge i ṭah chhan chu han sawi teh?" ṭhutthlenga min nem ṭhut pahin a ti a. " Pa a thi mai dawn in ka hria a natna kha a tihdam theihloh a, reilo teah chuan amah kha a awm tawh dawnlo ..engtin.. nge.. ka tih ang......" a aw chu a khur nasa kher mai, ka ṭap zui a ka ṭawng hleithei meuhlo a ni.

"Pa...ka enkawl i phal ti raw, vawi khat chiah ka duh min tihsak rawh aw....tuna min la hriat ve ṭek ṭek chhung hi chuan enkawl a ka duh aaa.....khawngaih takin.." ṭah nasat vanga thawk pawh thaw ṭha theilo chung chuan ka pa chu ka en a, a hmel buainak chu ngen ngawl takin a ni ka en ni.

"A lo haw an tih kha tak tak elaw, tinge a zual a mi?" hlauthawng taka ka nuin a lo tih chuan ka chhanglo, ka hnar a ping ṭup a ka ka hmangin thawk ka la hak hak a, ka ngawng chhulh maiin ka hria. Ka pa chu ka en leh ṭhin a, chal chuar nangin min en vung vunga a hmelah chuan lungawilo hmel ka hmu lo, chu chuan beiseina sangtak min neih tir bawk.

"A natna i hria a, i la nei duh tho a maw?" ban charh hian a ti ta a, ka aw rang kher mai "Aw pa, rem i tih phawt chuan ka nei duh mahse, i malsawmna tello chuan ka tluang leh dawn silo a khawngaihin min phalsak hram rawh..." ka tih lai chuan ka mittui a sur zung zunga, ka ṭahna lama ka khabe sai dar dar chu ka kuta hup chungin ka pa hmel bawk chu ka en a, thawk la hawk chungin ka dar a rawn beng dat dat a, engmah phei chu a sawi zui lo. Tho chhuakin room ah a lut ta daih a, ka lung avan chhe kher em.

"Bawihi Ezra chu engtin nge a awm a?" ka nuin a tih chuan ka ṭap hliam hliam a, ka ṭap chhuak tak meuh a ni. 

"Kan...vanduai reng bik mai..." ti paha ṭap ri hliam hliam chung chuan kailawn ah ka chho a, ka chil ka haka ka khuh zui bawrh bawrh a, ka room ka thlen rualin khumah ka bawk thlawp a, lukhama hmai phumin ring lutukin ka ṭap chhuak a, keimaha hun ka hman chhung khan ka ṭap ngailo a zanin hian khang hun zawng zawnga ka ṭah aikha ka ṭap vek nitawh berin ka hria.

Duhtawka ka ṭah zawh hnu chuan ka muhil zuina, ka harh chuan dar 10 a lo pel der tawh, ka lu a na ngut ngut a ka rit luk mai a ka dul a na ṭhum bawk. Tho chhuakin ka hmai ka phih te te a, mu tura ka insiam laimek chuan ka Phone a lo ri a Nsa a ni, rang lutukin Phone chu ka chhang a, thil ṭhalo a thleng emaw tiin ka hlauthawng hle bawk.

"E..Vîte i mu tawh em?" zawi te chuan a ti sar sar a. "Mu lo e, enge ni ta?" ka lo ti thuai a, ka aw ah chuan ka hlauhthawn zia chu a lang thei ngei ang.

"Kan lo kal dawn a, kawtah lo awm lawk mai rawh a tlai tawh bawk si a, hei hmuh che a duh tut tuta, ka phi chung maia ka lo hruai lawk mai dawn" a lo ti a, kei chu ka lo thaw huai mai, chanchin ṭhalo engemaw a lo sawi kha ka lo hlauthawng hman em a ni.

Ka nu leh pa  an mu tawh  a Nau-a inkhel enin a la meng thung, ngawi rengin pawnah ka chhuak a, Garage bulah chuan ka lo nghak a, ka nghak reilo an lo thleng rang kher mai, Lalbera Bike chu Ns-an a khalh a, a hnungah Lalbera a lo phur bawk a, Bike aṭanga a chhuk rualin ka lampanin a lo kal hlawk hlawk a, ka bula bul alo thlen veleh a kawngah ka lo kuah chawt a, min pawm kang nghal lawp mai a, min kuah nghet salh salh bawk.

"I lo damṭha em? Vawin ah khan i lo kal a?" tiin ka biang leh hmuiah a fawp mawlh mawlh a,  'I damṭha em?' min ti nia, ka zawh tur zawk tak niin ka hria.

"Keichu ka ṭha a lawm, nangmah zawk?" ka tih chuan "Min ngaihtuahsuh, keichu ka ṭha lutuk" tiin min chhang a, a insawi angin a ṭha lutuklo tih chu tuna a awmdan ah hian a chiang viau a ni, vawina kan inhmuh khan hetiang hian a awm hauh silo a.

"Tuar hram hram rawh aw, i bulah ka awm tlat tawh ang" a mitah tak en chung chuan ka ti a, ka rilru dik tak pawh a ni, ka pan rem a ti talo anih pawhin ka hunawl neih ang zawng zawng chu a kiangah ka hmang anga, ka theih ang angin ka enkawl bawk ang.

"Ka ngai ṭhin lutuk che mahse, khang thil kha i tana ṭha tur tih i hrethiam ti raw?" a nui hmela lungngaihna inthup chuan ka hnuk ati ulh ṭeuh mai.

A zawhna chhanglo chuan "I bulah ka awm duh" ka lo ti thunga. "Aih, i awm theilo ang" nui sak chunga a tih leh chuan a en vang vang ringawt mai. "Khawiah mah kal tawh suh aw, ka duh duh huna ka hmuhtheih turin awm rawh" ngenngawl taka ka tih chuan  a bu nghat nghat a. A biang cher ta riak chu khawihin ka nuilui ngial a mahse, chungril lam a na veng veng a ni.

Hman ang thoin a la hmelṭha a ala ngaihawm reng bawk, zawimuang a ral riai riai turah ka ngaihtuah chhin ringawt pawhin ka thawk a pik ṭup mai.

"Naktukah ka lo hmu ang che, thil tui deuh a lo leisak dawn che nia" ka tih chuan a ngawi vung vunga "Tinge i duhlo a mi?" ka tih leh takah chuan "A zialo hle mai tih phal chi anihloh tawp chu" ka bianga fawh zauh pahin a ti a, "Let leh tawh rawh, naktukah kan inhmu dawnnia" ka ti a, chutah Nsa lamhawiin "Ruata let ila" tiin Bike awmna lam chu a pana, kei chu min kai ve zel bawk a.

"Thil pek tur che ka nei a" tiin a ṭhi awrhlai chu min awrh tir chawt chawt a, "Muttui le han chho hmasa la, ka lo en ang che" tiin Step lam hawi chuan min kuai her a, min nam zui zat bawk avangin a hnial theihloh.

Ka chhoh hnu chuan an tlanchhuak zui maia, a lo kala thinglung na a lo ti thar leh a ni hawt e. A hmel kha ka mitthla ah a cham leh ta reng mai. A chang chuan ka ngaihtuah fo ṭhin, Ezra nen hian inkawp tur niloa ral aṭanga inthlir tur ringawt kan lo ni zawk em maw ni dawn le.

Zinah chuan ka tho tlai hle a, inhnuai ka chhuk thla chu ṭhuthlengah ka pa a lo ṭhu a, kal pelh mai ka tum lai chuan "Nizan kha chaw i ei nange" a lo ti khauh a.

"Umm...ka lo muhil palh daih a" tiin ka chhang mai a, engmah a sawi zui ta lemlo. Chaw ei ka siam laichuan choka ah a rawn tei luta, min en leh vung vung ṭhin a, a rilru ka tihhah ve hle a nih ka ring.

Chawiei dawhkan ka kila tumah titi loin kan ngawi ṭhap a chutah ka pa chuan ka rinloh lutuk thil a lo sawi a. 

"I duh chuan i nei dawn nia, ka dang tawhlo ang che" a ti a ni.

Ka pa hmel en chuan ka inpetruh ṭeuh ringawt mai.

"I chaw kha eirawh" ka ṭah chhuak insum hmel ahmuh chuan a lo ti leh a, ka hnuk a ulh ṭun a chaw pawh ka lem theih rihlo.

"Ee...chaw eilaiin nula pui ṭah tur a nilo" ka nu in a lo tih chuan ka nau ten minlo nuih tet tet a, ṭah nuih hak chungin keipawh ka lo intuai hul thuai a.

"Engkim hi i tana ṭha tur hi i nu nen kan duh a, i luhlul ve ang reng bawk si a, i bialpa pawh kan han huphurhpui chhan ber che chu i hrehawm kan hlauh vang tho ania, tunah pawh natna damtheilo a vei a, nakin lawka i hmabak tur kan hria a,  a chhe ber dawna i dinhmun tur kan ngaihtuah khan kan pawmsak theilo chauh a ni e, mahse, heti khawp hian i duh bawk si a, engpawh nise i hlimpui zawk mauh mai chuan tiin kan pawm ta anih hi, i hlimna tur a lawm kan zawn duk duk tho ni" a ti charh charh a.  Ka hlim a ni, Lalbera hrilh hlan ka nghakhlel tawh tak zet.

Tukṭhuan eikham velehah ka Phone nghal a rei deuh a rik hnuah Mitei khan a lo chhang a "Umama chu a inbual lawk a" a lo ti a.

"A.....A zo ṭep tawh angem, hna kal hma a biak lawk ka van duh em?" insiam pah mawlh mawlh chunga ka tih lai chuan "Hei alo chhuak chiah" a lo ti leh vat a. Reilo teah Phone chu a lo chhang a "Vawinah inhmuh ngei ngei kan ngai ania, thil ṭha deuh ka hrilh ang che" ka aw ah chuan ka phur zia a lang thei hial a ni.

"Ka lo hruai dawn che nia in ban hunah minlo hrilh la?" zawi deuh taka a lo tih chuan "Aw le, ka lo hrilh dawn che nia" ka lo ti nghal thuai a. Vawin zet chu ka hlim lutuka keimahin ka nui leh ṭhin.

Siampuiin tlaiah Bazara kawipui lawka min sawm pawh chuan ka lo hnar a, Lalbera ka phone Usangpuian a lo chhang thung, "Kan chhuak lawka pawi itih loh chuan i lo va phei hmasa mai dawn em ni kan lo let vat ang" a lo ti a. 

Lalbera te in ka thlen chuan a lo reh ṭhiap mai a, ka hamhaih lek lek hman a ni. "In awm em?" ti a ka au lang lang laichuan kawmchar lam kawngka a ṭangin a pi a lo lut ve hlawl a, "I lo kal a ni maw, Mampuia te unau kha an chhuak lawk anih kha an lo let leh thuai ang, lo nghak rih rawh" a lo ti a min be seuh seuh a ka rilru chu a hmanhmawh tawh ngang mai, hrilh hlan ka nghahhlelh tawh tehlul  nena khawiah nge maw a lo kal  daih ni?

Ka nghak ren rawn a, an lo let har hrep mai a haw leh mai tur emaw ka tih rum rum laichuan an lo thleng ve ta hram a. "I lo kal a ni maw?" tihzawngin min bia a, lawmlo hmel a pu deuh tlata ka hriat vangin min kalpel zui mai chu ka thlek vang vang a, "Vîte, room ah han zui chho mai rawh" ka hriat phak tawk lekin Usangpuia chuan a lo ti a. Choka belbawm vel haia Lalbera che vut vut chu ka pan nghalthuai a.

"Enge i zawn a?" ka tih chuan "Ka chahbi" a lo ti bak hluk mai a, a bulah chuan dingin a thilzawng chu ka lo nghak leh rih a, mak ka tiriau mai tunah khan a U nen a Bike in an lo haw thleng zawt chauh a, Inchhungah lo lutin chahbi a rawn zawng nghal ruai mai chu ania, a  inhaibuai  em em laia a kawnghren  sira a thil khai ka hmuh chuan ka lo nuichuak hak a. "A nuihzatthlakloh ania, heng thil vel hi tinge maw a dah hnawk nuai chu le" tih leh pahin Drawer chu a pawt ri bur bur a. "Lalber i kekawr kawnghren ah khan i khai reng kha" ka tih chuan a inbih vut a.

Chahbi chu akin a la phun zui ta hram a. Fridge a hawnga a eiduh zawng a hmulo te chu a phun zui  niah niah a, tukverh inkhar te chu "Lum lutuk" tih pahin a nam hawng ṭhuai a, engthil emaw huat tur a zawng kual ni tawh berin k hria.

"Lalber.." ka tih laichuan "Eirawng ila bawl dawnlo a mi dar 4 a ri tawh a nia" a lo ti a, ka bo map mai! 

Hrechhuak leh ni awm takin a lu chu a tuai vut a "Ka ning lutuk" ti leh hlukin Bathroom ah a lut zui a.

"Vîte.." ti a sitting room lam aṭanga Usangpuian min lo koh chuan ka kalphei nghalthuai a, "Vawin chu kan lungawi vaklo anih hmel, nichin khan in inluah lama haw a tum a, ka va kalpui a midangin an lo luah tawh sia a thinur a nih kha" tiin min lo hrilh a. 

"Enge a awmzia, kan la chengdun emaw a ti em ni?" ka lo ti nghalthuai a, "Umm..ka va thlen khan a hrechhuak veleh chauh a, Margareti te inah kal a rawt bawk a, ka kalpui leh a kan lo haw chiah anih hi, tunlai chho chu amah hi buaipui deuh chawt angai tawh dawn a ang, a rilru a lang ang ang hian a che zung zung mai a" a ti a,  tihngaihna tak pawh ka hrelo.

"Usangpui thil thleng  hrilhfiah zel mai hi a tan a ṭhalo em ni?" ka tih chuan "A tihchi loh ang a rilru kan tibuai zual mai mai a, a ngaihtuah nasat lutuk chuan a natna hian a hneh hma lutuk ang, tihdam theih loh natna nimahse kan ti muang thei a lawm, a natnain a ei chhiat hma lutuk loh nan uluk leh venthawng tak chunga kan en kawl a ngai a ni" a ti charh charh a. 

Kan lampana Lalbera alo kal tak avangin Sitting room aṭang chuan ka pen chhuak thuai a, a lo kal mek nen chuan kan intawk chiang hle bawk, "Lo kal teh" tih pahin min pawt nghal dawr dawr a, inchung room lamah inzui chhoin a room chhung kan luh rual chuan min pawm bet chawt a, min pawm ngheh em vangin ka chesawm theih eihlo.

"I damlo a mi a?" tiin min zawt a, "Dam e!" phawk lek leka ka tih chuan "Dawt sawi suh, i damlo a lawm Margie khan i damloh thu min hrilh" tih pahin min kuah nghet leh sauh a, ka TB chung chang kha em mawni a sawi chu ni dawn le?

"Ka dam tawh a lawm, tunah chuan ka ṭha leh var tawh i lo haw ka ngeih a" nui hak hak chungin a hnungzangah chuan ka beng thek thek a, "Damlo tawh miahsuh ang che, nang tal chu hlim leh damṭha taka i awm angai a nia" aw zawih ruih a a tih chuan ka ngawi ran a, ka hnuk a ti ulh leh lek lek tawh a ni.

"Hetah pawh lo kal fo duh suh, i rilru a nuamlo mai mai ang, chu aichuan min theihnghilh theih nan i theihtawpin ṭan la zawk rawh" a tih leh lai chuan a awmah namin ka inlahrang a, "Teuhlo mai Lalber tunah chuan tumah midang tur an awm tawh hleinem, ka pa pawn kan inneih rem a ti tawh a kan inṭhen angai tawhlo" a biangah dawm meuhin amita en chung chuan ka han ti a.

"I pa in maw....?" ban charha a tih chuan ka lo bu nghat nghata "Innei ang aw, biakin tak takah, nupa dik tak kan ni ang" ka sawi rual chuan a mittui a hnam leh nghal der mai.

"I vanduai hle mai, kei min tawng hi i vanduaina phah a nih hi" tih pahin ka chal a rawn fawp vang vang a, tinge maw ka zawhna chhangloa chutiang thil te a sawi tehdaih ni?

"Inneih chu nangpawn i duh tiraw, nupa tak tak kan ni hunah chuan harsatna pawh kan pahnihin kan tuar dun zel tawh anga, a nuam emaw a hrehawm emaw kan inpui tawn anga, i damloh leh hunah pawh keimah ngeiin ka enkawl thei bawk che anga" thlem titih a a kut ka hum vang vang lai chu la thlain "Â viau mahta che, ka natna chu i hriat tawh kha" tiin a che sawn leh vut a, thlanglam tukverh bulah chuan dingin ral leh lam chu a thlir a, min hnar a tum tih ka hriat chian em vangin ka lungngai  hle bawk.

A bula ka va kal hnaih leh laichuan "Ka pa leh ka u khan min lo hruailo sela a ṭha zawk tur a nia" a lo ti sup a, "Engvangin? I lo haw hun ka nghahhlelh zia kha i hrelo em ni?" ka lo ti ṭeu hlar thung.

"Ka awm ve chuan buaina ka siam ziah che a, nizan pawh khan ka lo kal a, lo kal miahlo tur ka nih laiin ...Huhh...engthilah mah hian ngaihtuahna fim ka hmang thei tawhlo a nih hi" a kut a hum ruh ṭung a, la kangin nghet deuhin ka lo vuan a, "Engmah ka hlaulo i damlo emaw, min theihnghilh emaw, thil dang zawng pawh, ka duh ber chu i nupui nih zawng a nimai, chuan nupui ka nihna anga duatna leh ngaihsakna te ka pe thei che anga, i nupui ka nih chuan mangṭha kan tih fo pawh angai tawhlo anga, kan chhungte malsawmna nen eng hun harsa pawh tawng mahila kan hlim em em ang, ka hlimna i duh takzet a nih chuan nangpawn min hnial miah suh" ka ti ve ta tlat a.

"Khawvela pasal laktlakloh ber nupui nih i duh em ni, nakinah lawk a engkim a bo dawn tih i hriat kha?" ka mitah tak min en chunga a tih chuan ka mittui a far fap a. 

"Khawvela mipa laktlakloh ber ka nei dawn hleinem, khawvela ka mipa hmangaih ber alawm ka neih dawn che, nang chuan min theihngilh pawh nimahla khapa khan min hmangaih reng dawn a ni lawm ni, nangman i sawi kha?" a awma  nem paha ka tihlai chuan ka mittui a luang zung zung a, a bula ṭah hi insum tur ka ni a sin mawle, hetianga a rilru ka tihnat reng chuan keimah ngei hian thihna lamah chuan a nemliam zel zawk ang, insum ka tum ve tehlul nen.

Ka kut chu lain a awmah chuan a nem bet sauh sauh a, "Hmeichhe huaisen tak i ni Barbie, ka chhuang lutuk che, hepa pawh hian a hmangaih che" nuisak chungin a ti a. Ka kutin a dehna zawna a lung phu dut dut chu ka hrechiang hle a ni.

"Engmah tihsak theih che ka neilo tih i hria tiraw, pasal ka nihna angin ka enkawl theilo che anga, nupui inihna anga ngaihsakna leh duatna pawh ka pe let theilo mai che pawh niloin a thiam pawh ka thiamlo ang, ninawm mai ka nih hun a la thleng thuai anga......Nakinah chuan ka taksa thihna hi ka rilru thihnain ala rawn hmakhalh ang......." sawizawm theiloin a ngawi a, hnuailam bihin a heh a pet fan fan bawk, "I rin aiin chutiang chu a thleng hma ang Barbie" a ti zuai raih a. 

Ka awmah ka kuah bet chawt mai "A pawilo nangmahin ka tuar tirlo ang che "Aw" tih chiah sawila a bak chu ka ti vek mai ang, innei ang aw kan damchhunga nupa nih ka duh, thildang engmah ka duhlo i nupui nih chiah ka duh" ka ti sap sapa, a hmuhloh lamah chuan ṭah insumin ka inpetruh fan fan a ni ber.

"Aw" zawi sap hian a lo ti a, ka chiang ngamlo! Tunah khan ka zawhna kha 'aw' tiin min chhang tihna em ni?

"Engtin maw i tih?" inla hrang leh zetin a mitah chiang takin ka en a, min lo kuah leh nghalzat thung, "Aw ka ti anih chu, Lalbera nupui ini dawn a i khawngaihthlak hle mai" min kuah ngheh salh salh pahin a ti a, "Chutiangin sawi tawh reng reng suh, ka intithei dawn lutuk, Ka Lalbera nupui ka ni dawn a ka inchuang viau ang" ka lo ti ve thung a, nuihak chungin min kuah nghet leh sauh a. 

"Ka nei ang che, hun reitak neilo mahila reilo viau dawn mahse, ka theihtawkin ka hmangaih ang che" a tih leh sap a. "A zialo hle mai tih phal chi anihloh tawp chu" ṭah nuih hak chunga ka lo tih chuan min en in a nui a, chutah lungchim zetin min fawp a, hun hi chelh din theih ka chak a ni.

Min pawm kangin khumah chuan min nghat riai riai a, kan hmui chu a inhlat hleithei meuhlo, a thawmhnaw a phelh a min rawn hnaih leh chuan duat takin ka lo kuah a, duhthawh takin kan infawp zui bawk, kan inhmangaihna chu thu maiin a hrilhfiah zo lo a chetzia in kan lantir thung, hetianga kan awmdun lohna pawh a rei ta, a hmasak ber ṭum ang tho khan ala Special a ni, a chhan pawh engdang vang a nilo, ka mipa hmangaih em em Ezra, Ka Lalbera a la ni  tlat a lawm, ka hmangaihna a la danglam lo a, hman ang tho khan ka la luangliam reng a ni.

"Dar engzat nge?"  ka thawmhnaw hak ṭhat mawlh mawlh paha ka tih chuan" sana a en a, min chhang mai dawn emaw ka tih laiin a sana chu a bih vung vung a, a chal a chuar tapa a ngaihtuah buai hmel kher mai.

"Englo hi.." tiin a sana bun lai chu a bih ṭha leh a, a awmdan chu ka hriatthiam nghal mai avangin ka Phone ka ban ta zawk a, "Dar 5 a ri dawn tawh a nih hi, pawn thleng min lo thlah la" ka tih chuan ngaihtuah ngun hmel zet hian a ngawi vung vung a.

"Tinge diklo a awm a mi?" ka lo ti vat a.

"Awmlo e, nichina kan thilsawi kha i lo inngaihtuah ṭha leh dawn nia, i chhungte pawh râwn ve la" a tih chuan lu ka lo thin khum a, "Nangmah chiah kan nghak che, kan lo beisei reng dawn che nia" a bianga fawh zauh paha ka tih chuah tawi te in min seih a.

Usangpuia leh a pi in chaw eiah min sawm nasa viau nangin ka haw lui ta tho a, in ka thlen chuan ka pa pawh a lo awm tawh a "Tunlai chu i va tlai thei ve" a lo ti kha kha a. "Ezra te inah ka kawi a lawm" ka tih chuan engmah a sawizui ta lo.

Ni thum hnuah palai hmel chu kan hmu ta ngei a, an inthlahrung ngang mai. Ka nu leh pa chuan ṭha takin an lo chhawn a "A pi leh pu te ho thu kan han ngaichang ve phawt ange" tiin ka pa chuan a chhang a, a ṭawngkamah erawh beisei tur a awm tih chu an hai bik hauhin ka ringlo.

"Ṭhianah min hmang ang che" choka a kan awmlai chuan Zarin a ti sar sar a, "Teuhlo nangte chu ṭhenawmnu a lawm i nih" nui chungin ka lo ti a, a duhlo nasa mai. Inleng haw hnu chuan Lalbera nen kan inbia a, ka aw ah chuan ka phur zia chu a hriat theih a, a ni erawh a ṭawng zawi hle thung.

"I hlim chuan a ṭha vek a lawm" tiin min chhang a, "Nangpawh hlim ve la, i hlim loh chuan ka hlim thei bik lo" ka lo ti ve thung, min ti lungngai zo leh vek tawh. "Ka hlim a lawm, ka tawng che hi vannei ka inti bawk a nang erawh i vanduai a nih hi" inthiamloh hmel zeta a tih chuan "Chutiangin sawi tawh suh, keichu ka intithei lutuk a nia" ka lo ti vat a, ka nuilui ngial nangin rilru erawh a na veng veng a, a inthlahrung lutuk hian min ti hrehawm ṭhin, hmana a mizia inthlahrunna nei ngai hauhlo leh mahni induhtawk em em ṭhin kha hetiang tak hian a lo danglam thei hi mak ka ti a ni.

Ka pa chuan ka pu te leh kan chhungte dang khaw hrana awmho te chu a rawn khawm a, ka nu te zinga upa ber ka pu chuan minlo hrethiam khawp mai a, ka ni te lam erawh an lungdam zanlo. Mahse, ka pu berin a phal miau tlata, ka pa bulah chuan "A man chu keiman ka dawng dawn nia" a lo ti mauh mai.

Kar tharah palai chu an lo kal nawn leh ta ngei a, inneih ni leh dar zat tur nen lam an ruat fel ta a ni. Ezra dinhmun a ngaihtuahloh theihloh a, chuvangin thla thar mai November chawlhkar hmasa ber chu an ruat a, inbuatsaih lam erawh kan hmanhmawh viau angai thung.

Zanah Nsa nen min hmu turin an lo kal a, Sitting room thlanglam  bathlar ah chuan ṭhuin kan titi ho a, ka kut chu humin a khal niap niap a, Lalnunsanga ṭawng barh barh chu kan ngaihsaklo dun ngang mai, kan in en a kan nui leh ṭhina ka hlim ang chiahin ani pawh a hlim ve tih ka hria a ni, kan bul ṭan dan ka ngaihtuah a hmanah khan ka pa phalna kha lo dilin lo runluih lo ta ila tun ang hun hi kan tawng daih tawh angem tih te pawh ka ngaihtuah a, mahse, chutih rualin a hun takah Pathian in rem min ruatsak niin ka hre thung.

*CHAPTER - 33*

Kan chhungte khaw hrang hranga awm te pawh inneih ni min hmanpui turin an lo thleng ṭan tawh a, chhun zanin kan ri luih luih reng tawh, ka man eitur List ka hmu chu tam ka ti khawp maia, ka rinloh deuh deuh te pawh an tel nawk mai!

Ka pu chuan "He ti em em hi angai em ni, a eitur dik takin ei mai sela a tawk viau a sin" a tih nang nang laiin ka pa chuan "Fanu mal a nia, a lehpek tur laizawn a nei silo a tam lo theilo thawhpui te ka hmaih nual zawk a, a nu te lam an lo ṭhahnem ve bawk nen" a lo ti mai a, keichuan engmah ka sawi zuilo, an tih dan ang ang chu ka pawm tawp mai a ni, inneih min phalsak ngawt pawh ka lungawi tawk em em tawh, urhsun taka ka chhungte inbuatsaih chu ka beisei phak bak a ni bawk.

Ka nu nen ka chhawm tur thil leiin kan Bazar a, ka pa chuan bungrua pawh ṭha ber ber min chhawm tir a tum mauh mai si a pawisa pawh a seng hnem na ngiang mai, dan khatna a inneih kan tlin loh thu kan sawi chuan an hrethiamlo hle a "I rai em ni?" tih zawhna chu ka dawng tam hle bawk. 

"Ka railo mahse, dan khatna chu kan tlinlo" chu chu ka chhanna a ni tawp mai, an lawm viau lo tih erawh ka hria, "A zahthlak hle mai, chuti anih chuan zingkara invawn a tawk chiah anih chu" ka pa chuan a ti deuh hmak a, kei erawh ka ngawi renga, zingkara invawn chu Lalbera te lam pawn i he loin anlo pawm ve tho bawk a, chutiang tur chuan thu kan ti tlu ta chu a nia.

Zanah min lo Phone a "Vîte a be lawk duh che a" Nsan a lo ti hmasa te te a. "Hei ka ṭhianten i nupui man tur kan thawhkhawm dawn e an tia" nuihza insum aw zeta Lalberan a lo tih lai chuan midang ho chu an lo ṭawng nak nak a "Tea pawh tukin khan a lo thleng a, naktuk kan bazar hunah a lo kal ve dawn ania aw" a tih chuan "A ṭha a lawm, Margareti hi a chhang chhe si a Zari hi min dinpui turin ka sawm mai dawn em ni ka ti deuh a?" tiin ka lo râwn a.

"Kha lam chu i tih dan dan a ni mai, kei chu Nsan min dinpui ang, an phur lutuk a min neih khalh daih mai ang che tih pawh a hlauhawm tawh" nui suk suk chungin a ti a, "Anih nang i phur ve em?" ka tih chuan "Phur e ka zam deuh bawk" a lo ti a, ani meuh a zam chu a nia.

A tukah chuan kan Bazar ho a, kei chu Zari nen kan ni maia ani erawh a ṭhiante zawng zawngin an lo zui a, mo kawr en tura kan kal pawh chu kan ṭhahnem khawp mai. Ka hak apiang a nalh an lo ti thei zela kan hlim dar dar viau a ni. 

"Suit man ka chu ka tum ange" Utean a tih chuan an phul hlut a, an ṭhianho a Necktie in ang awrh an tum avangin an rawng duh thlangin an buai ve hle bawk a, an phur hmel  chu hmuh an nuam takzet.

Margareti tan kawr ṭhui tur puanthan nalh tak ka leisak a "Ṭhianah i hman ve ta silo a, ṭhian man kha i rulh leh angai dawn ania" Lalberan a tih chuan ka hrechhuak ve chauh a, chutiang lam reng reng ka lo ngaihtuah hauhlo, an inneih a ṭhian a ka ṭan khan ṭhian manah J.malan cheng sanghnih ngawt min pe anih tak kha mawle.

Kan bazar zo chu ka chau ve hnap mai, zanah chuan ka mu zawi der a, lu a rit churh bawk. Mo kawr kan thlan chu ka nî fate hoin an ha chhin sap sap a thla te an lakpuia an che vel chu khuma mu diai diai chungin ka lo en a, Zari pawh a phur kher mai, a pheikhawk leh puan bih tur ka leisak chu nalh a tih thu a sawi seka, thil dang zawng aiin ka pa min buaipui dan mawlh chuan minti lawm a ni.

Zantirah chuan ka muhil sek a, dar sawm vel bawra ka harh chuan tui intur la turin inhnuaiah ka chhuk a, ka pu te nupa leh ka chhungte chuan Tv an lo la en a, choka ah lut tlangin tui Bottle ka la a, Chair ah ṭhuin Sitting room lama ka pu ṭawng lang lang ri chu ka hriat chuan ka ngaithla a.

"In sak i tum deuh em ni a?" tiin ka pa chu a zawt a. "Kum tharah ka Pension dawn a, Durtlanga ka inhmun khi ṭhenawmah insa neuh neuh an awm tawh bawk si a, in nek buai te a hlauhawm e ka tia ka sak ve vat aṭha ang" ka pa chuan a ti a. 

"A ṭha khawp a lawm, Muanpuia te unau pawh an tlangval ve tawh a nupui te an la nei duh anga" ka pu in a tih leh chuan "A Design tur pawh ka Phone ah hian ka nei tawh a lawm han en ve chhin la" ka pa chuan a lo ti thuai a.

"E...ava pui dawn lurh lurh ve le, luah hawh turin em ni i tih deuh?" ka pu chuan a ti zui zat a.

"Chawng 5 tur a nia, kaw khat hi chhungkaw hung luah tham zel aniang, kan fa te an la indang duh anga an la mamawh dawn a lawm" ka pa chuan a lo ti a. "A ṭha a lawm, nang zawng rilru i nei a, nakin zela tana inbuatsaih lawk hi a pawi miahlo kei ka fate indang ve chu puih pawh kan pui hleitheilo a, indap chawp tak meuhin an indang hlawm a an rethei ṭhin a sin" ka pu chuan a ti leh charh charh a.

"Kaw khat hi chu luah tur ang pawhin ka ti chiahlo, Muana tan ka ti deuh ber chuloah Vanlali pawh ala rawn haw veleh anga, a nau ten nupui an han nei anga alo let leh hunah mo te nena khawsak te a lo nuam zanlo thei a tih te pawh ka ngaihtuah a" ka pan a tih chuan ka ngilh dup maiin ka hria.

Lêt leh maw? Ka pa chuan ka lêt leh turah min ngai hmiah mai chu ania. "A...i ngaihtuah thui mai mai emaia" ka pu chuan a lo ti vat a.

"Ngaihtuah a thuilo theilo, kan makpa tur lah heti mai hi a nia, a lo lêt leh dawn tih a chiang em atin alawm, In kan sa anih pawhin a room tur chu kan siam tho ang" ka pa chuan a ti leh a, ka mittui a lo hnam nghal sawk mai.

Ka pa min ngaihtuahna leh min hmangaihna chu ka hria a lawm, ka pasal a boral a ka lêt leh angaih hun atana a inbuatsaihna erawhin ka lung a ti chhe tak zet a ka rilru ana hle bawk.

"I ṭawng chhiat mai mai ange, Ezra pawh a damṭha sawt viau a lawm" ka nuin a tih chuan "Engmah i hrelo anih chu" ka pa chuan a lo ti a, an thilsawi chu ka ngaithla zui ngam tawhlo.

Man hlan zan chuan Lalbera ṭhiante ho an lo kal ve a, kil khatah ṭhu khawmin an ti ti laih laih a anni leh nilo angin tumah an rui lo a, Ropuia tak ngial pawh a fim kar mai a, in la fel deuha an ṭhu chu nuih an ti za lam mah a ni.

"Hetiang hian mi kan tam dawn tih inhre vek sia Hall ah te man hlan te chu tih mai tur a lawm" ka nî chuan ka nu bulah a ti hlak hlak a, ka ni hi chuan sawisel tur a zawng kual reng mai a ni, ka pasal neih tur chu phur ve viau e tiloin "Officer neih tur te zawn zawk awm ania" a ti leh hram pek a, chhan zui vak chi pawh anilo, han hnial deuh lah hian mi hi alo ṭim lêt erh zel mai ṭhin a, ngaih khat deuha ngaih hi a ngai ṭhin.

Hun kan hman zawhhnu chuan thingpui kan in a, pawna an din khawm laihna bula ka va kal laichuan "Vîte Hotel in book dawn em?" Ruatan a lo ti a. "Dawn nang, zingah haw leh tho angai anga ka duh teuhlo mai" ka lo ti a, an nuih a za hlawm kher mai.

"In duh chuan ka lo book sak ang che u" Gabrielan a tih chuan lu ka lo thing vat a, "Zahthlak awm emai, ka duhlo" ka lo ti lehnghal thuai a.

Johana phone a ri a, chhang tur a a kalsawn chu a lo let leh nghalthuai a "Lo kal lawk teh" tiin keichu min rawn pawt hrang vut a. "Nsan a be lawk duh che" tiin a Phone chu min pe zui zat a.

"Enge ni ta?" ṭawng nak nak thawm a awm a, min chhan nghal mailoh vang chuan Phone chu ka hum ran a.

"Vîte naktuk zingah i insiam hmain lo hmu zuai teh, a chi ai deuhin ka hria" a lo tih chuan "Tinge , engtin nge a awm a?" ka lo ti nghal thuai a.

"Engtin a awm phei chu a nilo, a phi ruaia a kawr a lak chhuahloh leh chhuat dungah a vei tawn sek sek a, a awmdan hi a mumal lo riau, a sawi ngai lah hi a sawi nawn sek a, inneih te hi a ṭhulh leh duh rum rum mai ang tih te pawh a hlauhawm a lawm" Nsan a tih chuan ka bangbo viau a ni. 

Zingah ka hmuh tur thu ka hrilh hnuah kan inbiakna chu kan titawp a, muthmunah ka ngaihtuah zui a Nsa sawi dan takah engmah sawilo a alo ṭhulh ringawt mai chu ka  hlau viau bawk.

Zingah chuan hma deuh takah Nsan minlo biak leh avangin midang hriatloh chuan ka kal  ru a "Lo be lawk teh, kan inlama lo va awm daih a duh thu a sawi reng mai" a rawn ti ṭha leh a. A chhan tak sawilo mahse, thil diklo awm tlatin ka hria a ni, ka sam chu ka bawka lukhum ka khum vangin midang ho te chuan min hrelo hlauh a, Lalbera ka va hmuh chuan an inhnung lam kawmchar phulah Nsa nen an lo ṭhu a, min hmu chu a hamhaih hmel viau bawk. 

"Tinge ilo kal a?" phawkzeta min en chungin a ti a, "Kan kawr kha Mitei te kan nawhtir ange" tiin Nsa chu a inthiar fihlim zui thuai a.

"Ka ngai tawh che a" nuisanga tih pah chuan a bulah chuan ka ṭhu mai a, a mitmeng tlan chhe zet chu ka hmuh hmaih hauhlo. "Insiam i la tum nange?" ti a min zawh chuan ka lo bu nghat a.

"Lalber i rilru i thlak lo tiraw?" ka tih chuan ngawirenga min en chungin thawk a la te te a "Hruai tur che an lo kal ṭep tawh asin, heta awm tur i ni hleinem" a lo ti sup a.

A kut chu banin ka hum vang vang a, "Sawi duh i neih phawt chuan min han hrilh teh" ka ti leh a, a hmel ngui zet vang chuan ka phurna te kha a bo chawpchilh vek mai.

"Ka hah a ni, mi zawng zawng hi an phur a an beisei ang ka ni bawk silo a...eng thil nge maw ka tih hi le?....mi tam tak anlo kal a hmelhriat ngailoh vek mai mahse, min hre em em tu te kha, thil min zawt a darzat tak ngial pawh ka sawi theilo a, 'Engtikah nge ni dawn? Engtikah nge kan kal ang? Engtin nge ka tih dawn?' tiin zawhna min zawt cham chi a, ka lu hi a puak keh thei takngial dawnin ka hria" a kut ka humna rawn hmer vang vang pah chuan a ti a, a sawi zawnga a thaw lak rang zet chu ka hre thei bawk.

"I rilru ti hah suh engkim a ṭha leh vek mai ang, vawin aṭang chuan i bulah ka awm reng tawh ang, ka kut hi vuan tlat la" ka kut lehlam chuan a biang chu ka dawm a, a mit chhingin thawk a la vang vang a. "I lo thlenga ka nuam huai mai, nizan kha chu mangchhia ang mai a ni" a ti zawi sup a. Engtin nge a awm chu ka ngaihtuah thiam pha hauhlo mahse, hun hrehawm tak a paltlang tih erawh ka ring.

"In nei ang aw?" a rilru a thlak mai hlau tak chunga ka tih chuan a nui a "Va haw tawh rawh, Ropuia leh Nsan anlo hruai dawn che a nia, i tlai lutuk ange" a ti a, ka lo thaw huai mai.

In a ka let leh hnu chuan ka chhungte chuan chaw ei an lo pelh fel vek tawh a, min lo zawng nasa hman viau tawh, kan insiam zung zung a, kan inpeih fel hmain min hruai tur an lo thleng der a, ka incheina room a Nsa lo lut chuan "I lo kal kha a ṭha lutuk amah pawh a zia huaiin ka hria, nizan kha chuan a mengphi chial renga mipui huhang hi a zo lo em mawni dawnni" a lo ti a, chu chu thil ni thei tak pawh niin ka hria, "Thil an zawt nasa lutuka a chhang hleithei silo kha a buai nuai anih ka ring" ka lo ti ve a.

Biakin lampana kan tlan lai chuan mumang ram te pawh a ang rum rumin ka hria, kan inruk hmasak ber ṭum te pawh ka ngaihtuahlo theilo. Biakin chhungah chuan Nau-an min kai luta, maicham hma a minlo nghaktu hmel mawlh chuan min ti thlamuang a ni.

Kut insuihin thu kan tiama, damchhunga nupui leh pasal ni tawh turin, tunah chuan kan thinlunga kan in ta neihna ṭhin kha kan pahnih thinlungah chauh nitawhloin  Pathian leh kohhran hmuhah pawh pumkhat kan lo ni ta. Pawn kawngkhar kan thlen dawn thleng chuan nghet zetin ka kut chu a hum a, tunah tak hian hun hi chelhdin theih nisela chuan tun huna cham hlen hi ka duhthusam a ni ngei ang.

Kan in ena kan mitmeiin inhmangaihna thu kan inhlan tawn a, mite chuan an hreve lo kan tan erawh sawi leh chuan ngailo khawpin a chiang thung.

Zanah chuan Balcony ah inkuah riala ṭhu dunin kan ti ti a,  kan nui duna, nupa tih thumal hi kan inhmeh bik hliah hliah em a sin. "Enge i ngaihtuah vung vung a ?" ka tih chuan ka kut chu a hum nghet sauh sauh a, "Ezra, hetiang hian ka kut hi vuan tlat la, kan damchhungin kan inthlah ngailo ang" a awmah bei chungin ka ti sap sap a. 

"Ka tih theih chhun a nia lawm" nuisuk chunga a tih chuan a aw a beidawna lo lang chu ka hre thei a, "Engmah thildang min tihsak angailo, min hmangaih tawp la a ni mai, a bak engmah ka duhlo" ka mittui lo hnai leh ringawt chu ka khap let sak sak a, a lungngai tih ka hriat hian intih pachan hi har ka ti ṭhin, ka hnem thiam lo nasa mai bawk si.

Ka hna chu bansan nghal mai ka tum a Lalberan a remti tlatlo, ka nu leh pa te chuan min hnialloh laiin  ka pasal berin a phal tlatlo a a chhan pawh amah enkawl ka duh vang tih kha a hre ve tlat a. 

"Inah tih tur a awmlo, hna kal zawk rawh, keimah vanga bansan kha a ngailo ka inenkawl thei a lawm" a ti ve tlat mai si a, a hnial luih theih bik der loh.

Hna chu ka kal nitin leh ta a, in ka thlen chuan a lo awm ngei ngei ṭhin, ka chau em tih min zawtin eitur min siam sak vat vat a, a che erawh a che phelh phung renga, thingpui a chini telh hmaih, a nilo zawk telh palh, no leh plate tihkeh tih angreng chu ngaiah ka nei harlo.

Ngawirengin a sulhnu chu  kan chhui mai ṭhin, thil a tihsual pawhin engmah tihsual neilo ang maiin kan ngawihsan a, a tihsual a hriat fo chuan a inrintawkna a hlauh mai Doctorin a hlauhawm zawk thu a sawi a, chuvangin a thiltih sual chang pawhin kan hrelo der ṭhin a ni.

Zantin ka mut dawnah ka ke hi oil in min zut sak ziah a, hei chu a hma a kan chendun pawha a tih ṭhan a ni a, min duatna a tihlan dan ve a ni. 

Christmas ah chuan ka pa ten an inlamah chawei turin min sawm a, chumi ṭum chuan chaw a eirei hle, a eihleithei meuhlo a ni ber. "I chaw ei a tui vak nange?" ka tih chuan "Tui e" a lo ti mai a, a eituilo tih erawh a eidanah a hriat hle thung. A tho tur chuan a thleng chu athlauh baw vek mai a, thleng chu  a keh chiang hle bawk, chuta a inthlahrung hmel chu ka ṭahpui lo chauh a ni.

"Ka tihpalh lutuk" tiin a thleng keh chu a chhar rawk rawk a, naupang hlauh nei ang mai a ni!

"Ezra khawi keiman" ti a ka lo ban chu meng phi ruai chungin min en a, a thaw lak a ranga a awmdan chu a dik hauhlo tih ka hre chawp chilh bawk.

Ka pa chaw eikham tawh chu lo kalin Lalbera chu a rawn kuah sawn a, ka pan a kalpui chung chuan inthlahrun hmel fe hian min lo melh ṭawk ṭawk a, "A awmdan kha a va mak ve" ka nuin a tih chuan ngawirengin thleng chu ka sengfel mawlh mawlh a, ka rilru a buai ru kher mai.

Zanah chuan muhil loin a meng leh reng a, chhuat dungah a vei sek a, engthil thil emaw a khawih kual sek reng bawk a, a chang leh kil khata a Guiter chu amelh leh tlawk tlawk a, a awmdan chu Usangpuia ka hrilh chuan "Naktukah kan checkup dawn nia" a lo ti a, rilru a hah duh kher mai.

"Mu tawh ang" tiin ka pawt lui ṭang ṭang a, aṭang ṭeuh thung. "Mut a hun tawh" vin ang reng zeta ka tih takah chuan hmanhmawh lutukin khum lam apan a, ka enreng laichuan rizai hnuai ah inthawlhin a inlukhuh hmak a, a titau em mawni dawn ni!

A bulah muin ka va kuah a, ka kut a lo vuan vat a, a inlukhuhna ka pawh thlak chuan chiang zetin minlo en a, a pangngailo tih chu ka hrechiang viau tawh, inpetruh ṭeuh chungin "Tihpalh aw, ka vin miahlo che a nia" ka lo ti a, engmah sawiloin min en reng thung, a hmuiah ka fawp a chupawh a dawh mawl tawp a, ka kuah ta vawng vawng ringawt mai, bul kan ṭan tawh dawn tihna em ni, a van la reilo lulai em kan inneih aṭangin thla tam pawh a la liam hauh silo.

Zinga ka harh chuan a mutna chu a lo ruak huai a, rang lutukin ka inbeng kang zui bawk. Khum aṭanga ka chhuk rualin Bathroom a ṭang chuan alo chhuak ve hlawl a "Morning  Barbie" zangkhai vah hian a ti a! 

"I tho nuam em?" ka tih chuan nuisuk chungin min en a "Nuam e, i kianga mu chungin thawh nawmloh a awm thei dawn a mi?" chimawm zeta min melh pahin a ti a, ka lo nuihak thung.

"Ka lo kuah lawk ang che aw" a lampana ka tih chuan a ban alo phar duai a, a awmah beiin nghet zetin ka kuah a, chutiang bawkin a ni pawn. 

Tukṭhuan eilai chuan "Kan in checkup lawk dawn nia" Usangpuian a ti a, a peihloh hmel kher mai. "Vitamin chawei tuina tur lam chi in chawh tir bawk ula" ka nu chuan a ti a, chawhma lamah Usangpuia nen kan pahnihin kan va hruai ta ngei a, a Doctor chuan MRI ti ṭha turin min lo rawn a, buaipui chhung a reizek mai. 

Result nghah chhungin thil kan ei a, kan bazar khawtlai bawk a, tlai deuh takah result chu kan va lam a, kan beiseiloh lutuk mai Result kan hmu chu Usangpuia nen sawitur reng kan hrelo.

"A thluak hi a sawng ṭan anih hi" Doctor in a tih chuan ka hit mup mup a ni ber mai.

"Engtia tih chi nge niang?" Usangpuia chuan a ti a, chutihlaia pawn lamah minlo nghaktu chu ka va thleka, ka ngaihtuahna  a tawi tupa ka bing chuk chuk ringawt.

"Damdawi ka chawh hi eiṭha sela, a timuang deuh thei turah ka ngai a" Doctor chuan a ti a. A van beidawnthlak teh tawp ve le, tih muan ringawt maw!

"Engpawh nise, rilru na leh rilru hah in awm miahlo sela, tih hlim in tum hram hram dawn nia, thil a lo theihnghilh anih pawh hrilh kher suh u, a rilru inti buai mai mai ang, kha kha a tan a ṭhalo ania" Doctor chuan a han ti leh a, keichu min lo en tak nain chhan nachang pawh ka hrelo.

"Kan kal tawh mai ange?" tiin usangpuia chuan ka darah minlo kuaha, pawnlam min panpui pahin min fuih a "A hmuhah tiang khan lang miah suh, amah zawk a lungngai leh dawn a nia, Doctor thusawi i hriat kha, engmah a hnenah hrilh chi anilo, engemaw hlekah buai thei reng a ni tawh" a ti zui mawlh mawlh a.

"Enge a an a?" min hmuh ruala a lo tih chuan inthunun tumin thawk ka la halh a, chhan mai dan tur pawh ka bangbo riau a ni. "I ṭha lutuk, Doctor in hma i sawn a ti' Usangpuian a lo ti khauh a, "Niang chu ṭhatloh lai ka nei hleinem" pakhat chuan a lo ti mai a, min rawn en chuan tawitein ka lo nuih a, ṭah vak ka chak a ni. Kan haw lam chuan a hmuhloh hlanin ka mittui ka hru zeuh zeuh reng a, ka pik ṭup mai.

Kan chhungte kan hrilh chuan ka pi leh ka nu chu an ṭap hlawp hlawp a, ka pu meuh pawh a ṭawng khur hlak hlak a, tun aṭangin kan inbuatsaih ṭan der ta mai chu ania. Inbuatsaih zawh a awm thei ange maw?

A damdawi angeih ve nge ni chuti maiin a natna chu a thawk vut vut biklo a, engemaw buai zual deuh chang a nei leh zeuh ṭhin a , a hawihawtin mi hming leh number a hrefuh hleitheilo a, phone phei chu a khawih hleithei meuhlo, chutiang neuh neuh chuan a thin a ti chhia a a vin hluk hluk ṭhin chu amah a danglam awmchhun a ni rih.

Kum thar kan chuangkai a, Emma-i hnen aṭangin thu kan dawng ta tlat, chhimlam thingtlang khaw lian ve angreng takah pasal a nei dawn a, chumi vang chuan Aruati chu kan hnenah a awm angai dawn a ni. Ka chhungte chuan min râwn ve thlapa, i he loin keiin ka lo pawm ve bawk.

"I duh leh duhlo zawng kha chiangla, i duh loh leh sawi hrehlo la" Lalberan a tih chuan "Duh tehreng e, a nuin pasal aneih dawn si chuan heta kan bula awm hi atan pawh a ṭha zawk a lawm" ka lo ti nghal thuai a.

Hmeichhe naupang a thawmhnaw Bag nena kan hnen lo pan chu a room tur ka lo kawhhmuh a, a thawmhnaw te ka rem chhuahsak lai chuan khumah ṭhu chungin minlo en reng a, han biak lumlam dan tur pawn ka bangbo riau a ni.

Chutah "Ânu, Âpa hi a damlo a mi?" a rawn ti ta khauh a, Ânu tih ri mawlh chu ka bengah chuan a cham reuh a!

"Dam e, a damṭha lutuk alawm" alam hawia nuisang chungin ka ti a, a bu ve nghat nghat mai. A bulah chuan ka sawi theilo ang, a nu in pasal aneih san a a pa a rawn bel ve ṭawk ṭawk anih laiin he hmeichhe naupang duhawm lutuk hi a rilru ka tina thei lo ang, 'Ânu' tiin min ko lehnghal a, kha aw sin leh mawitak hmeichhe naupang rilru thianghlim tak aṭanga aw lo chhuak khan amah venhim duhna thinlung min neihtir tlat a ni.

"Ânu ka ril aṭam tawh e" a rawn ti leh a, 'Âpa' a tih chang apianga Lalbera phu zawk zawk ṭhin kha ka hrethiam ta ruakin ka hria, min fan hneh lutuk tlat. "I thawmhnaw  ka rem zawh veleh hian thil kan ei dawn ania aw" ka tih chuan "Umm" tiin a lo bu leh nghat a, a ṭawng siam siam a, Ânu tiin min ko awllo bawka hnuk a ti ulh lek lek hial a ni.

*END OF CHAPTER -33*