KA LALBERA (CH 4 - 6)

*CHAPTER - 4*

Ahmangaihi violette khiangte

Kawngkhar a rawn hawng zau a, kawr ha loin pijama a ha a, a awm ruak kang chu  ka rinaiin a sek daih, a mitmeiin lut turin min sawm a ka zui lut ve nghal thuai a, a room chu ka vawikhat kal na a nilo, chaw kan eikhawm ṭuma kan luh hmasak ber chuan kan ṭhian hoin zau kan ti hle a, chhungkaw khat luahtham lawih a ni, sitting room, video games khelhna leh keyboard bakah Guiter paruk zet a nei a, a room bangah chuan Tv lian zet a inkhai bawk.

Bookshelf lianpui a awmbawk a, chu chu amah nen inhmehlo kan tih em vangin kan luh hmasak ber ṭum chuan kan fiam hlut a mahse, lehkhabu chhiar a lo ngaina viau a niang University Library ah pawh a lo ṭhu ve ran reng zel kha a nia, hei hi a mizia a ka duh ve lai awmchhun a ni mai awm e.

Ka hawikual chiah chu ka ner sawk mai  a hnawk tih piahlam a ni!

A thawmhnaw leh Beercan let rem rum nen, couch lah thlanglam tukverh bulah kawisawi zetin a inhunga, a khum lah chu Laptop lah headphone nen engthil thil emaw a connect kuala wire a inzam hnawk niai bawk. 

"Thil engemaw ka lo ti a" ka ṭhensak a hmuh rual chuan a lo ti zawi sup a, "I kawr va ha phawt  teh" ka lo ti ve thung a. 

Kawr ha tura a kal laichuan khuma a thil inchhawp hnawk zet chu ka lo en a, University kan kallai thlalak leh video vel te niin ka hria, note leh pen a lo inchhawp bawk a, a ni te nen lam a ziak thla diat diat a, tu tu emaw hming a tlar thla dul bawk.

Note ka la kang tur chiah chu hnung lam aṭangin min rawn kuah thut a, ka ding ngil zawt mai "Engthil nge i tih a?" ka tih chuan min chhangloin min kuah nghet salh salh a.

"Ka thluak hi a chawl vekin ka hria, ngaihtuah ka tum a piangin ka thaw a chham lo chauh zel, engthil emaw ni hian min block a ni" a ti sap sapa, amahin a lo bei ve nasa chu a nih hmel, inkalh khum tlatloin a Doctor hmusela a ṭhatpui daih zawk dawn a sin le.

Khumah chuan ṭhuin a thil tihlai chu ka enkual a, ani pawh ka bulah a lo ṭhu ve a. "I van lo kawl hnem em em" ka ti teh hluai a, University kan kal ṭantirh leh function eng engemaw a kan chet tlatna vel te chu thlalak leh video a lo nei ṭeuh mai.

"Ropuia khan minlo thawn ṭhin a, amah ka hriatchhuah theih nan" a lo ti a, Ropuia nena kan inbiak hnuhnun ber ka ngaihtuah lêt a "Lalbera awmdan hi ka hrethiamlo, min hrelo der nge mawni a mak lutuk" a rawn  ti a, ka lo hrilhfiah nghe nghe anih kha.

A thlalak leh video kawl te chu ka enkual a a lunglenthlak takzet, ka Bestfriend  Margareti nena class a kan muthlu lai te canteen lampana kan kal lai, laibrary leh kan Spot a kan ṭhutlai te. Khai! hepa hian minlo enthla ru char char ṭhin em mawni le? 

Ropuia thawn ho ah chuan Adventure club a kan hun hmanho lai a tam hle a, kan hlim hmel hlawm khawp mai, thlalak zawng zawng deuh thaw ah chuan Lalbera bulah ka lo ding zel tih ka hreve chiah bawk. 

Thlalak pakhat chu Khawbung bula Adventure club ho kal kal ṭum kha a ni a, zan a lak a ni nghe nghe, Lalberan min pawm a, mithi ang maia zawiin a awmah ka bei bawk, ka la hrechiang hle ka ṭhiannu nen Accident kan tawh ṭum kha  a ni, damdawia hrai ruih ka ni a, ka harhchhuah lai khan Lalbera malchungah ka lo awm anih kha.

"Kan inhmeh ngawt mai" thlalak en vung vung pah chuan a lo tisup a, amah chu enin ka chil ka lem ri khalh. "Phat tum tawh suh Ropuia ka zawt vek tawh" a lo ti leh mauh mai a.

"Enga...enge ani chuan a lo sawi a?" awihlo zeta ka tih chuan "En la heng te hi ama minlo thawn a lawm" tihpahin thlalak dang chu min hmuh a, Sport lai vela CR anga kan chettlatna vel a ni, thlalak pawh chu a lo va han fawmkhawm nasa em em ve le!

"Ka Attendence ka zawha min hrilh khan mak ka ti deuh a mahse, heng thil vel ka hmuh hnu hi chuan Mak ka ti tawhlo, nangmah hi i ni tih ka hria khatianga Attendance ṭha kha ka nei ngailo, Ropuia chuan Vli i zui kual char char zel a ti bawk, enge min huat thut chhan chu ka hrelo na a mahse, mi â ka ni lo ania aw Accident vangin ka insawh khawlo deuh hlek a nimaia reilo teah ka ṭha leh vat dawn, i awihloh chuan ka Doctor pawh i zawt thei ang, chuvangin min kalsan kha tum tawh miah suh, ka damṭhat hunah i inchhir mai thei a nia" a thil sawi lai chuan ṭawng nachang pawh hreloin ka lo en reng ringawt a, ka nuih a ti za lek lek mai.

A natna avanga hnar angah min lo ngai chu a nia, ka rilru hneh nan a ṭhat leh thuai tur thu a sawi bawk, ka hmuh tawh a zawnga ala inrintawkloh ber ṭum a ni, ka ṭha leh vat dawn a tih laia a hlauthawng hmel kha ka hmu chiang lutuk a, a landan khawngaihthlak zet vang chuan inthiamlohna min neihtir ringawt lehnghal a.

"Inchhir ka duhloh vang zawk a lawm" zawi sapin ka ti a, a natna vanga hnar chu ka ni tehmeuh mai mahse, ka hnar chhan leh ani rindan chu a inpersan daih thung. 

"I chhungte ti mangang zawngin awm tawh suh, Therapy la ṭha la i damvat theih nan beizawk ta che, i bialnu ka nilo ka tih kha dawt ka sawilo, keini chu ṭhian kan ni mahse, ka duhloh vang hrim hrim che a hnar che ka nilo, a chhan zawk chu nangmah pawh hian min duh hleinem, tunah hian inṭhian ṭhatna bak kan pel a nih chuan i damṭhat hunah kan inṭhianṭhatna a chhiat phah zawk dawn a sin...chu chu i duh ami?" ka sawi zawh rualin thawk ka la halh a, a hmel buainak chu ka en ran bawk.

"Ka duh takzet che, hriatsual palh chu a ni theilo thlalak leh video te kha chu thudang nisela ka duhna che hi chu a tak a ni tih keimah ngeiin ka hria" hriatthiam harzeta min en chungin a ti leh a, sawipui vak hi awmzia a awmlo. A hmel landan leh a mitmenga min duhna rawn langchhuak te hian ka rilru a tina deuh tlat.

"Ka haw tawh mai ang, i chhungten an ngaihtuah che, i room ah inkalh khum tawh suh" tih paha khum aṭanga ka tho tur chu ka banah a rawn vuan a, "Enteh, nangpawh ka lakah hian i beidawng ve tho a mi" chîk zeta min en chungin a ti a, chhan ngaihna ka hrelo ka dang a ro zo vek mai. 

"Nang i beidawng a nih chuan, keipawh ka beidawng ve ang" a lo ti leh hmiah mai a.

"Ka beidawnglo i dam leh dawn a lawm" amah en chung chuan ka ti ve a. "Anih chuan enga tinge?" a zawhna avang chuan ka tawt up up a, kuah thlawp mai ka chak a hnem pawh ka duh mahse, a dik theilo a ni. Tuna ka rilru put mek pawh hi a dik tawhlo, khawngaihna rilru ka put hi amah duhna rilru ah a inthlak thuaidawn tih ka hria, chu chu thil ṭhalo tak a ni bialpa ka nei mek bawk si.

"Ka dam ṭhat hunah chuan hetianga rilru buainuai hi ka neilo ang... i hria em" thinrim hmel pu lek lekin min en a "Ka hria lawm" ka tih rualin thawk a la hawk a.

"I hriat chuu...." ngenngawl zetin min en lehnghal zat a, hepa min ti â zo takngial dawn.

"Ngaihtuah ve la, tunah hian lo inkawp ta ila i lo damṭhat leh hunah i ṭhiannu chauh lo ni ta si ila engtin nge ni ang" ka kut a chelh tlatna chu phelhsak paha ka tih chuan "Min ring rawh Barbie, ka chiang lutuk ka duhna che hi chuti maia tawp thut thei a nilo, nangpawn min duh ve tho ti raw?" tiin min zawt leh khauh a, keichuan ka lu ka thinga, chutah min nuih chungin rang zetin ka kawngah a rawn vuana a awm si chêtin min pawthnai zui a.

"Min duh reng mahse, tinge i zep tlat" kan hmui a insilo chauh a kan infawh ṭum kha ka ngaihtuah chhuak lo theilo, ka lungphu a rang nghal dawt dawt a, hepa hi ka duh tak tak tawhin ka hria. 

Mahse, ka duh tur anilo.

"Ka duhlo che..." ka sawi zawh rual chiahin ka hmui a rawn khar a, min fawp nghal vawng vawng a, a fawhna chu a dam dup mai.

A mipa rim chuan min zem leh chiai chiai tawh, a duhthawh telh telh ka hnar thei ta biklo, ka chhang let a, mipa ka fawh tawh zawng zawngah a Special ber hial ang boruakah ka kang delh delh mai. Min chawikangin khumah min nghat riai riai a, zeizetin min fawh chhunzawm reng bawk a. 

Min fawhna  thlahin a hmui a la sawn thut a, khamlo lutuka en chungin ka lo thaw sak sak a, lungawi hmelzeta min enchungin a nui  thunga, a nui hmel chu a hmelṭha phian lehnghal a!

"Kha... min duh tih chu tikhan i hrethiam tawh mai em?" a rawn ti zawi sup a.

Ka hrechiang lutuk ka duh a ni, chuvang chuan ka inhaw em em bawk, ka mitchhingin thawk ka la vang vanga "Min duh tih han sawi teh, ka theihnghilh emaw ka hrechhuak leh anih pawhin a bul aṭangin kan ṭan ṭha leh mai dawn alawm" ka khabe a rawn fawh vang vang lai chuan  na zetin thawk ka la leh kawk a.

"Kan theilo...nang pawn i duhlo" sirlam hawi a inleh pahin ka ti a, a kuta ka biang rawn khuap paha "Min en teh" a tih chuan ka en duh lo; ka mit ka chhing lui tlata "Barbie" a rawn tih leh chuan ka meng chhuak riai riai a.

"Min ring rawh...keichu ka danglam lo ang" zawi deuh taka  tih pahin min fawp leh a, ka chhan let loh vang chuan min nawr na sauh bawk. Min fawh reng pahin min chul kual ruai a, a kuta min tawhna apiang chu a ṭek sawk sawk thei hialin ka hria.  

Ka kawr hlimin ka dul a rawn zut chho a, sexy lutuk maia a thaw ham ham ri te chuan ka ngaihtuahna a la peng lo theilo, ka chhang let leh ta nge nge. 

Kawngka kik ri ka hriat rualin ka nam sawn dawrh a, rang lutuka ṭhu chhuakin ka insiamṭha nghal mawlh mawlh bawk a. Amah pawh en tawhloin Bathlar lamah ka tlan chhuak zui thuaia, room chhunga a nu lo lut thawm leh a ṭawngri chu ka hre chawpchilh nghal a "Vîte-i chu chaw ei nghal sela" a tih lai te chuan ka lo ip ru ṭeuh a. 

Engthil nge maw ka tih le? Buaina ah ka inbarhlut chiang hle a ni.

"Vîte.." tih paha Nu siamtein ka lam a rawn pan lai chuan na zet zeta thawk la sek sek chungin ka hmai ka tuai a, a rawn lang chiah chu pangngai thei ang bera lan tumin ka lo nuih a "Zanriah ei ve nghal rawh aw" nelawm takin a ti a, a hnunga Lalbera lo lang ve nghal chu en pawh ka en ṭha ngamlo.

"Nu siamte ka eirihlo mai ang, bazar kal pahin ka lo kawi lawk a, haw leh vat ka ngai a" ka sawi laia ngun zeta Lalberan minlo en chu ka hmulo der a, "Chuti tur ami, i duh leh hma deuhah chaw kan ei anga" a la ti zui hram a.

"Chaw ei khamah ka thlah ang che" Lalberan a lo tih chuan ka melh hrawk a, Nu siamtei en pah chuan "Nidangah  ka lo ei zawk ang" ka ti nawn leh a.

"Anih chuan inrinni ah chaw lo ei ta che, Mampuia inentir ni a nia" Nu siamtein bawkin a tih leh chuan chhanna pek nghal mai dan tur ka bangbo hle a ni. Lalbera tihmawh lutuk hi ka control theiin an hre tlata, chuvanga min sawm chu a ni tih ka hre bawk, chhang lo chuan ka nuih ringawt a, a kal chhuak tur chu zui ve mai ka tum a, ka kawr hnungah pakhatin min lo pawt let rang nasa mai.

"Heihh...i thinrim a mi a?" tih paha min kuah mai a tum chu ka lo tawlh let vat a, a hriatthiamloh hmel kher mai.

"A tlai tawh ka haw a ngai" ka tih chuan "Ka thlah ang che" a rawn ti ve nghal zat a.

"A ngailo, ka thlen hunah ka lo bia ang che" chîk zeta min en chu ka nuih tawi tak a.

"Zanah ka lo leng ang" a ti leh a, Zanah Remtluanga a lo leng dawn, a van buaithlak tak, dinhmun laklawh zetah ka indah ta ringawt a nih hi.

"Ezra.." 

"Ummm.." zawhna mitmengin min en a, "Ka rilru i ti buai lutuk" ring deuh taka ka tih chuan alo nui ri suk mai.

"Ka hria a lawm, i hmelah khan a lang vek" ṭhensung chungin a lo ti a, "Engtia awm turin nge maw min beisei le, Bialpa ka nei a sin" ka ti leh ringawta.

"Mahse, min duh tih chu i hriat kha" awlsam zetin a lo ti leh hmiah mai a, hnehtu inti awm hrimin a la hawisang vah zui a, a ngei awm duh kher mai.

"Ka hria, ka bialpa pawh ka duh tho a lawm" ka ti leh hram a.

Ka bulah rawn kal hnaiin ka sam a rawn hui a, ka chalah a rawn fawp vang vang a, ka ngaihtuahna buaizet vang chuan ka hah hluah hluah a ni.

"Enteh Barbie....mi duh pahnih i nei anih chuan a hnuhnung zawk thlang rawh, a hmasa zawk kha chu i duh tak tak anih chuan a hnuhnung zawk a awm theilo" atih chuan a awmah namin ka tawlhsawn nghal vat a, "I zaktheilo lutuk" tih leh a room aṭanga kal chhuah ka rual a, "Lo ding teh" a rawn tih ri chu ka hrepha, ngaipawimawh duhloin kailawnah chuan ka pen thla hlawk hlawk a, a pu lo chho nen kan insu lo chauh bawk.

"I va hmanhmawh ve thingpui ka siam a sin" min hmuhruala Nu siamtein a lo tih chuan "Nu siamte ka nuin min lo phone a, nidangah ka lo kal leh ang"  tiin thildang a sawi leh hmain ka kalchhuak thuai a, In lampanin ka inkhalh haw nghal nal nal a.

In ka thleng chu ka rilru a buai nasa mai, engtin nge ka tih ang, Malsawmhlua thil sawi kha ka ngaihtuah ringawt pawhin ka ṭim sung sung thei, kei hian Remtluanga hi ka duh tak tak em tih pawh ka chiang tawhlo.

Duh pahnih ka nei a nih chuan a hnuhnung zawk thlang turin min ti a, ahmasa zawk kha ka duh tak tak anih chuan a hnuhnung zawk a awmtheilo ang a ti anih kha. Hrep chuan... Mahni hmasial lutuk Malsawmhlua khan a sawi dik chiah bawk si.

Engtin nge ka tih ang? Remtluanga hi ka ṭhen mai dawn tihna a mi, engtin nge hetiang hi a thlen theih zawk le! 

Remtluanga te chu kawng engkimah ka duhzawng a ni a, Malsawmhlua te chu ani ve hauhlo mahse, tinge ka hnar theih ngai miah siloh. Engtin nge hetianga buai taka a awm laihian duhna rilru ka lo put theih!? A dinhmun hrechiang ber tu ka ni a, ka kaltlangpui a nih chuan nakin lawkah min la haw dawn lutuk.

Zanah Remtluanga a rawn leng a, a hmel ka hmuh rualin inthiamlohna ka nei nghal ringawt a, han biak lum lam dan tur pawh ka hrelo, ka lo ngawi leh vung vung ṭhin a "I nuamsam lo ami?" min ti ta réng a, nidangah chuan titi vawrh tu zawkah ka ṭang hmasa ziah ṭhin kha a nia.

Ka pa inkhawm a lo banga, thingpui ka lum a chutih lai chuan an lo titi duna, Pathian thu bawk an sawi leh tawh, an inmil dun phian a Remtluanga pawh a tlangnel sawt khawp mai, Roman catholic a lo ni ve lehzel bawk nen, Biakin khatah kan lawia CTP ah nihna pawimawh tak a chelh bawk a, kohhran ah a inhmang bawk si, ka pa duhzawng tak a ni ti mai teh ang.

"Zanin chu i mood a dang riau mai" pawn bathlara kan chhuah hnu chuan a ti a, chîk zetin min en a. "Ka chau ve deuh a niang, tirawh kawt thleng ka thlah ang che" Stepa penthlak pah chuan ka ti a, ka hnunga a lo kal chu hawilêt lehin ka han nuih a.

Ka rilru a thil awm chu tih chi a ni em tih pawh ka ngaihtuah tawhlo, a dinna ah chuan pen chho lehin a kawr awmah ka pawt a, ka fawp ringawt mai!

A hrilhhai deuh a mahse, a reilo min chhanglet nghalthuai, uar deuh tak chuan ka fawp leh a kan infawhdan chu a damthlup a. Phurna emaw keimah a danglamna mak deuh awm ang kha ka nei hauhlo! 

Ka hre ta, tisa thil takin Malsawmhlua kha ka lo duh anih dawn hi, ka van tenawm tak, a fawh ringawt vang te khan thawk pawh la mumal theilo khawp te khan ka lo awm vel kha ania..Awi leh, zahpuiawm lutuk.

Remtluanga lak aṭang chuan ka inla hrang thuaia, ka zak thar riau a, ka inthlahrung ru veng veng bawk. "A van tui ve" tiin min fiam zauh a, zah luatah ka hmai a sa nghal hat hat a.

 "Naktuk chu inkhawm banah lengchhuak ila" Step a kan chhuk rual chuan ka kut a rawn vuan a, "Khawiah maw?" zawi sapin ka ti a "Ka ṭhiante inah, thil tih lawk tur ka neia min kalpui la" a ti leh mai a, "Ka lo tum dawn nia, khua te han var phawt sela" nuih let sak pahin ka ti ve a, Step tawp kan thlen rual chuan ka hawikual nghal ruai mai. A awmlo tih ka chian hnu chuan ka thaw huaia, engvanga a lo awm ring ringawt nge ka nih pawh ka hre biklo, ka â tawh a niang!

"Tinge a..?" ka hawikual ahmuh chuan mak tih hmel zetin min en a, "Aahh..Engmah...anilo" ka ti bah nak .

"Anih ka kal ang aw" a Scooty a chuan pahin a ti a, a hmelchu ka lo thlek vang vang a, "Ka lo bia ang che" tih paha a ban a vai zauh hnuah a tlan chhuak zuia, ka dinna ngaiah chuan ding rengin a tlan liamna lam thlir chu ka thlir zui vawng vawng a.

Remtluanga hi chu ka mipa duhthusam thlap a ni, a nungchang a ṭha a, a zaidamin a zahawm hliah hliah a, chubakah School kan kal ho lai aṭang tawha ka duhruk em em ṭhin kha a nia mahse, tinge maw amah hi duh tak tak lo a ka inhriat tak tlat ni! Vawiina Malsawmhlua thil sawi vang khan ka rilru a buainuai mai. Ka duh viau anih si chuan engtin nge Malsawmhlua duhna rilru hi ka put theih zawk le!?

"Awi...ka â zo dawn" 

"Ka hrilh ziah che kha ât i duhloh chuan hawi harh ve ta reng che" ka hnunglam aṭanga Nau-a aw ka hriat rualin ka hawi nghal vat a.

"Zan zanah khawiah nge kal leh i tum, chhuah hun pawh anih tawhloh hi" rum zeta melh chunga ka tih chuan mitko san akin min nuihtlawn a "Kawngka lo kalh miah suh aw" a ti zui zat a.

"Khawiah nge kal i tum?" ka lo ti chang leh bul a. Mipa tleirawl zawt chauh a ni a, zan chhuah a ching lutuk hi ka duhlo, Dodo-a takngial pawn weed zukruk a ching ṭan a, anmahni vang hian ka rilru hi a hah ṭhin, kan chhungkaw innghahna ber tur an ni bawk si.

"Zorina nen saw tah kan kal lawk dawn" a ti liampuata, vengthlanga a ṭhianpa Zorina chu ka hria, zu a in zauh zauh ṭhina Nau-a nen a an inkawm tam chu ka duhlo nasa, "Enge in tih dawn?" phawk zeta enchunga ka tih leh chuan "Kan ṭhiannu te inah kan kal lawk dawn, kawngka chu lo theihnghilh miah suh, ka nuin a kalh hnuah min lo hawn run sak mai rawh" min kalpelh vut pahin a ti a, "Ka men laia i rawn haw hman lo anih chuan ka hawng dawn miahlo a nia aw" ka ti zui hram a.

"Lo ti mai mai rawh, chuan hman zana Garage a i tawmpui kha ka sawi chhuak lo ang" mit min sial zauh pahin a kal zui nghal nal nal a, ka hau chungin ka en liam ringawt mai! Nau-an min lo hmu reng a maw? Tih chiloh lutuk, tinge maw tunlai hi ka chêt khir viau mai ni, ka nau te pawn min zahlo zo takngial dawn.

Inchhunga ka luhhnu chuan Sitting room ah ka pa in lehkhabu a lo chhiar a, hmun ka hawl fai thuak thuak a, Tv en tura ka ṭhu chiah chu "Tunlai i inchhiar ngai meuhlo a nimaw?" a lo tih vang chuan a lam ka hawi vat a "Chhiar ve tho e" ka ti zawi sap a, min zawt zui vak ang tih phei chu ka hlau ang reng.

"In buatsaih nasa rawh, mi fate meikawhin an ṭang a nia inthlahdah miah suh, kha i ṭhianpa pawh kha ka lo sawipui a a thlawp khawp mai che " a ti leh sap sap a, Ka pa hian Competitive Exam hmachhawn turin min duh a, min nawr sek sek reng mai a ni.

Zep loah chuan ka pa hian min chhuang  ve ṭhin a, a ṭhiante an lo lenkhawm chang pawhin a ti lang fo, Exam na reng rengah a langsar ber pawl ka ni thei zela, chuvang te pawh a niang ka lakah beiseina sangtak a nei a, a hmai pawh a uang ṭhin hle, kei erawhin Sumdawnna bul ṭan emaw, hna nghet hlawhṭha pangngai ve tawk tak ka neih theihna a nih chuan ka duhtawk der a, sangtak thlen tumna rilru ka pu lemlo. 

Chuloah ka mit vang hian lehkha chhiar ka harsat zuala, ka inbuatsaih nep em em bawk, Exam hun a hnai telh telh a, Question hlui leh a pawimawh thei tura a rin te, lehkhabu chi hrang hrang min lakkhawm sak ṭeuh a, a tam zawk phei chu ka la bih hlek lo lehnghal a. 

"Coaching chu i kal dawn nia" a tih chuan  TV lam hawiin ka inhumruh vak a, lehkhazir hi ka ning tawh takzet a ni, ka hun zawng zawng lehkhazir nan ka hmangral ṭhin, ka zirnasat luatah ka mit pawn ka tawrh phaha, University ka zawh hlim khan hna te thawkin engthawl takin ka awm ve tawh ang chu tih rilru ka put laiin Exam ah pawh har lutuk tak mai hmachhawn turin min ti leh nghal a, Lehkhazir sawi ringawt pawn ka luak a ti chhuak nghulh thei tawh. 

A bula ka ṭhut reng chuan a sawibelh zel dawn tih ka hriat a vangin muturin ka chhohsan nghal thuai a, Dodo-a bulah "I u leng a lo la haw lo a kawngka lo hawnsak rawh" tiin ka room ah ka lut zui a, khumah muin ka inngaihtuah vang vang a, Tha tholo zet chung chuan ka lehkha chhiarna dawhkan lam ka pan leh ta nge nge a, Ka chhiar ṭan dawn chauh tih ah Remtluangan minlo call a, a thlen tawh thu leh ka lehkha zirlai tibuailo thei ang bera awm a tum thu te a rawn sawi duah a, ka pa khan min tihbuai a hlauh vangin a sawipui tih ka hre chiang hle a ni.

Kan in mangṭha a, keipawn GK lam ka bih zuia, reilo teah ka mit a kham a ka mut a rawn chhuak nghalthuai a. Sana ka en a dar 10 a ri ṭep tawh, mutnan chuan a la hma mah mah a ni. Ka hmai beng thawk thawkin ka inti harh deuh a mahse, rei ka tlin leh chuanglo, ka chalin dawhkan ka tauh bur rual chuan ka harh chiang ta ngang mai, ka tauh na chu ana hle bawk.

Inhnuaiah chhukin tuivawt ka la a, kawngkhar ka en chuan a lo inkalhṭha thlap, Nau-a a la haw lo tih ka hria a, rang takin ka hawng nghal a Dodo-a tirh hi chu tirhloh ang hlauh a ni.

Dar hnih, dar thum thlenga lehkha chhiar hi chu ka tihṭhan a nia tunhnu hian ti ila University aṭangin a nimah ang chu ka ti hleithei ta meuhlo, Exam hun lah a hnai tawh nasa mai si a Main Exam ka paltlang zo lo anih teh chuan ka pa a sa khawp ang le ka tling ta lo anih pawn Prelims tal ka thlen ve ngei ngei a ngai.

Darkar chanve zet ka chhiar leh hman ang chu tih ah ka phone a lo ri a Malsawmhlua  a ni. Lak loh ka tum zet nain thil ṭhalo engemaw a awm anih ka rin vang chuan a rik zawh dawn ṭepah ka la hram a "Muang lutuk, Balcony ah khan lo dak teh" a rawn ti vin nghal hluk a.

Hmanhmawh takin Balcony ah ka chhuak phei a, kan kawt kawngpuiah a Bike a ṭhu chungin minlo nuih vur vur mai "I lokal ve duh em?" phur hmelzet hian a rawn ti a "Khawnge i kal dawn?" ka lo ti nghalthuai a.

"Ka ṭhianten Racing turin minlo sawm a, lokal ve rawh" a tih chuan "Tu i ṭhiante maw?" ka lo ti leh a.

"Ka hre biklo, min lo call a ka kal lo anih chuan ka record awmsa an paih vek dawn thu an sawia hriatchian ka chak mawle" a hmelah leh a ṭawngdanah a phur zia a lang reng, min ti hlauthawng riau lehnghal. 

"A tihchiloh emai a, i ṭhiante pawh i hre fumfe lo ania, i lu te kha sawh palh leh ta la dinhmun chhe zawkah i awm thei reng ania" ka lo ti kha kha a.

"I lokal dawn em?" ka thusawi ngaipawimawhlo zeta a tih leh takah chuan "Dawn mai mailo" ka lo ti hluk a.

"Anih vawina ka thilsawi kha ilo ngaihtuah em?" thutak zetin a rawn ti leh a, ka lama a rawn hawichho vuah vuah bawk.

"Eng..thil..maw?" ban charha ka tih chuan min en chungin a khisuk a. "Barbie..." nuihza aw lek lek si hian a rawn ti a, a hmel zawng zawng nen ral aṭang pawhin thinphu a tirang dup dup thei, hetiang hian engtik aṭang khan nge ka lo awm ṭan le. 

"Ka lo chho dawn" tih leh a Bike aṭanga chhuk a rual a, rang lutukin "A ngailo" ka lo ti chiam a. A bike nghenga ding chungin min rawn en chho leh a "Zan a rei tawh, midang pawh an mu tawh" chhuanlamah ka ti tawl a. "Anih chuan lo chhuk lawk la" nuichunga a rawn hawi chho chu enin ka nui tawi tak mai. Ka inchhir lehna tur thil tih chu ka tum tawhlo bur, tun hi ka tihsual te siam ṭhatna hun ṭha tak niin ka hre bawk.

"Remtluanga hi ka tana miṭha ber tur a ni, ani lo mipa dang reng reng hnaih tumna ka neilo bawk, chuvangin min lo tibuai tawh suh, ahma pawn nangmah vangin kan inkar a ṭhalo tawh a khatiang thil kha a thlen ka duh tawhlo, min be tawhlo la keipawn ka be tawhlo ang che, khawngaihin ka ngen che anih chu" Room lam hawia inher pahin ka ti a, a thaw hak ri chu phone a ṭang chuan ka hre thei a, a landan tur chu ka mitthla thiam mai.

"Lo chhuk teh...reilo te" a rawn ti leh laichuan rangtakin phone ka off a room ah ka lut zuia, a Bike tlanchhuak ri chu ka ngaichang reng a, a tlanchhuak lawklo a kawtah a la awm tih ka hriatchian em vang chuan tihngaihna hrelo takin chhuat dungah chuan ka vei tawn sek a,  engemaw chen hnuah chuan a tlanchhuak ve ta hram a, ka thaw huai mai.

Ka phone ah chuan a message a lo awm a "I thu ber" tih zawng minlo thawn a, eng a sawi tumna nge ka man pha hauhlo. Kan inrem ta thei ta tihna anih ka ring ringawt.

*

Sunday tlaiah Remtluangan min lo hruaia, a ṭhiante in a kalturin kan inphur chhuak a, kan va kalna chu veng tawp dawnah a ni, Unau hmeichhia leh mipa mi inluah a khawsa an ni a u mipa zawk chu Remtluanga ṭhian chu a ni nghe nghe a, College ah mi aikal ve tho a lo ni a, College Magazine a mi tur thil an lo buaipui dun niawm tak a ni.

Kan thlenhnu reilo teah chuan tlangval la upa lo tak tak pahnih hi an lo lut ve a, min hmu chu zamlo zetin "Sir Remtluang i bialnu chu a mi?" an ti nghal ham ham a, min ti lai deuh ringawt lehnghal a, banga thil intar lam chu ka melh daih a, Remtluangan min lo koh chuan ka hawi chauh a "Kan College Megazine Editor leh Assistant an nih hi" a lo ti var a,  bu nghat chungin chumi te lam hawi chuan ka nui a "Sir chu in va insawithei ṭha duhlo ve, ka hmuzo lo te itia nei ṭha hle si" pakhat chuan a lo ti leh kher a, ka nui chhuak teuh kher mai.

Ka phone a rawn rik vang chuan chhang turin pawn lamah ka chhuak a, kawngkhar ka pelh ruala "Sir ava hmelṭha em em ve" an tih ri chu ka la hre pha a, a nuam ve reng mai.

"Aw Usangpui enge nita?" tiin phur fahranlo chuan ka chhang a  "Tunah inah i awm em?" hmanhmawh hmelzet hian a rawn ti a, "Awmlo..tinge?" ka lo ti nghalvat a.

"Hei tukin lam kan tho fuhlo a, a chiang hleitheilo damdawiinah kan lut a, a thawk hi apangngai bawk silo a Ventilator kan hmang mek a" a rawn tih chuan hlauhthawnna hlirin ka khat a ni, "A va mak teh thut ve" ka lo ti hluai a, ka rilru in a chhan ka ni em tih ka inzawt nghal ruai bawk.

"A...hlauhthawn awm em em phei chu a nilo, ahma a a awmdan ṭhin tho a nia, amah hi chu a harh ṭha a, a thawk a panngailo mai mai mawle, ka lo hrilh ve mai mai che a nih chu inah ka haw a, ka kal leh dawna ilo kal ve duh takah ka tia" a rawn tih leh chuan ka lo thaw huai a. "Ka lo kal lo mai ang" han tih ringawt pawh chu ka hreh angreng viau, min rawn hrilh ve em em a ka kal theihloh tur thu han hrilh dawt chu ka hreh hle a ni.

"Usangpui, tunah chuan ka chhuak lawk a, In ka thlen hunah ka lo hrilh dawn che nia" ka ti ta ringawt a.

"Tunge a?" Remtluanga lo chhuakin a rawn tih chuan "Lokal teh tihpahin ka lo hui nghal vat a.

"Ezra kha damdawiinah a awm a, a U in minlo hrilha ka kal angaih hmela, kan inah min va dah lawk hman mai em?" a thu ngaichang tak chuan ka zawt a, min chhang ta mai lo chuan min en vung vung a, kan thlenna a la reilo bawk nen ka inthlahrung leh hnuhnawh a "I remchan loh chuan a pawilo Taxi ka la thei tho á" ka ti leh a, thinrim hmel zeta min melh takah chuan ka inthlahrung ta kher mai, ka sawi pawh chu ka inchhir rum rum a ni.

"Enge ani ringawt chu i ngaihtuah a, mi rilru buai ani tih i hrereng a nilawmni  i ngaihsak a hlawh theihnan lem a chang mai mai lo ang tih pawh a hriat hleihnem" a lo ti ram hmuk  a. Min chhandan vang chuan hamhaih zetin ka en reng ringawt a ala duhtawk mailo "Va kal ve pawh nila engmah tihtheih i nei chuanglo, amah vanga buai reng hi ka ning ania" tih leh hluk pahin inchhung lamah min luhsan ta daih a, tih ngaihna hrelo zetin kei chu ka ding ta reng a.

Ka ngaihtuah chianga kallo ila aṭha zawkin ka hre ta, va tih theih ka nei a zeng pawh a nilo a, ka bialpa lah a lawmlo nasa mai bawk si nen, tun ṭum chu anni pawn min hrethiam mai tehse, a hmaa a awmdan ṭhin tho a ni bawk a, damdawiin an thleng tawh tho a Pathian zarah eng em a ti lo turah ngai ang.

Inchhung ka lut chu tum bur chungin min lo en a nuamlo ka ti kher mai, midang chuan an hriatthiam ka hlau viau bawk. Nula awmve khan thingpui a lum a, midang ho chu Computer hmaah an kun far a, Remtluanga ṭhianpa leh Magazine Editor kha computer hmaah chuan an ṭhu a, Remtluanga leh pakhat zawk chuan ding chungin an lo en thung a.

Ka en leh ṭhin a, a rawn hawi duh tawh hauhlo lehnghal, keimahin ka ṭhu ngawi renga ṭha deuhin min lo bia sela chuan kal ka tumloh thu te pawh ka hrilh nghal mai dawn a sinle, "Rema.." ka tih chuan a lo hawi ta hram a, a la lungawiloh hmel nasa mai.

Hui zauh pahin ka nuihsaka; a nui ve lo. A lo phei dawn lai takin Nula khan thingpui a rawn chawi phei a, keipawh min lo pe vat a, thingpui no keng chunga a ṭhiante ṭhutna lama a lêt leh lai chuan min rawn melh zauh a, lawmloh hmel fahranin lehlam a hawi leh daih a, ka awm a tinuamlo takzet.

Ngaihtuah chiang mai hleiloa thingpui ka in chu ka rinaiin a lo sa a, ka phuhchhuak ṭhawt a midangho chu an lo nui hawk hawk a, a zahthlak duh kher mai, ka kawr hma a huh nasa hle zui a. Tho chhuak vatin ka kawr chu ka thing a, ka ká a kan vangin tui awmna lam ka pan nghal chung chung bawka, nula chuan minlo ngaihsak nghal thuaiin "A so hlim a nia, a sa ngawt ang i hmanhmawh mah mah anih kha" nuisang chunga tih pah chuan min lo hruk saka "Nia a daih hun nghah nachang pawh ka hre lo a tin ni" nui hak hak chungin ka lo ti ve a, ka awmbawr vel lah chu a ban chial zui lehnghala.

"Chutianga i hmu chak viau anih chuan va haw mai rawh" lawmlo tih hriat zeta Remtluangan alo tih nghut vang chuan ka hawi chhuak zawk a, dawhkan bula ding chungin min lo en ran mai a, midang te pawh chuan phawk zetin min en hlawm a, ka zak lutuk chu ka beng a sa nghal hat hat thei mai.

Mizinga a thinrimna a lanchhuah tir kher chu ka lo beisei hauhlo a sin, a tihdan chu ka lungawilo takzet "A ho emai Rema" a ṭhianpain a lo tih chuan ka nui tawi tak a, engmah sawi zui loin ṭhutthlengah chuan ka ṭhu a, ka phone rawn ri  chu enin Remtluanga chu ka va melh leh zawk a, min lo la en ngur a pawnah pawh chhuak tawh lemlo chuan Call chu ka chhanga, Remtluangan ka ṭawng ri hria sela ka duh ve reng reng bawk.

"Aw Usangpui, kan ṭhiante inah kan kal daih a, ka remchanglo emai ka lo kallo mai ang" awki pangngai thei ang ber chuan ka ti a, "Aw a pawilo, ka nu nen kan inbe zo chiaha, Ventilator pawh an la thla tawh a, lo kal kher duhsuh lo tih che ka tum zawk a" a sawi zawh hma hmain "Khawi maw  phone kha lo la teh" Remtluangan a lo tih vang chuan ka hawi chhuak vat a. 

Ka inrin hmain phone chu min rawn pawhthlaksak a "Enteh ṭhianpa ka bialnu hi lo tibuai tawhlo teh u aw, i nau vang hian kan buai tam tawk tawh" a ti ta hmiah mai a.

Ka zak bawk si, thinrim bawk si ka sa chhuak pup pup mai!

"Engthil nge maw itih le" tih leh phone chu chuh ka rual a, a lo phal awkawng lo, kan inchuh nghal buan buan a ni ber, midang ho lahin min thlir ṭhap bawk, "Rawn la rawh" ring zeta ka tih chuan a vawmin a rawn vawm a, chhuatah chuan a screen keh ṭhawt khawpin a tla tawp a. Thinrim vanga khur dawt dawt chung chuan ka chhar a, ka mittui a hnam sawk mai, inpetruh fan fan chungin ka Bag ka la a ka chhuak nghal nal nal a, tunah tak hian zah vanga khuk ral theih chu nisela ka ral riai riai in a nia ka rin ni.

*CHAPTER - 5*

Hmanhmawh takin kawngpui lampanin ka kal a, ka nun kum 25 ka hmanral tawh ah hetiang reng renga zahna hi ka la tawng ngailo ka bing chûk chûk a, ka rilru ana bawk. Ka awmchhung tawt zet chu chum dat datin ka ṭah a chhuak ṭeuh mai. "Lo ding teh" vin hluk a hnunglam aṭanga a rawn tih chuan ka hawilêt a Remtluangan min rawn umzui chu niin, thawk la sak sak chung chuan ka kallui zela, ka hnunglama a rawn pen ri hlawp hlawp chu ngaipawimawh duhloin Taxi phar tur ka melh kual nghal ruai a.

"Lo ding teh ka ti a nilawm ni" tih lehzat pahin ka banah a rawn phih sawk a, ka thinrim luata ka ṭawngchhuak hleithei derlo, thîp zetin ka melh ngar a, chutiang bawkin a nipawn.

"Ka ṭhiante zinga min tih zah zia kha i hria em" nelawmloh zetin a ti hluk a, tih zah maw? Chupawh keiman! Thaw la hak chungin ka en a, thinrim tur zawk ka nih laiin chutiang thu chu engtin nge a sawingam zawk, mi puitling tak niin ka lo ngaia mahse, ka ngaihdan ang chu a lo nilo kher mai.

"Min thlah rawh" tih leh ka ban a chelhna chu thinthlak ka ruala, kal mai tuma ka inher chu ka samah a rawn ṭham ṭawk a nih chu!

"Chutia kal i duh viau chuan lo kal rawh, ka va hruai ang che" a tih chuan ka tal vaka, ka sam a ṭham na chu  thlahin ka banah min hmer leh zat a, a hmel nelawm tak ṭhin kha hmuhtur a awm tawhlo. A ṭhiante In lamhawia min pawh phei a tum chu duhloin ka lo ṭang a, a thinur zual sauh bawk.

Ka zui duhlo ṭang leh anin min pawh luih tum chu kawngpuiah chuan kan inpawt chawt chawt a, kawngkal ho lahin min en duh nasa, ka thinrim bawk si zak bawk si, ka mittui a hnam ṭiam ṭiam a;  na zetin a banah ka chumsak nghek nghek ringawt a.

"Min thlahvat rawh hmela" ringzetin ka ti ta nghek a, midang mitmei a veng lo a keipawn ka veng reng thei bik tawhlo, ka sual lêt buan buan a hmaiah te chuan ka ham zui bawrh bawrh bawk, chutah min nam kat dawrhin thip fahranin min melh a, a biang thi ser ser chu khawih pahin "Rapthlak reuh lutuk, kal vang vang rawh" a ti vin hluk a, rum lutuka melh chungin ka hnungchhawn zui ve nghal a.

Khatiang mizia kha a nei ang tih ka lo ringpha hauhlo, amah ka ngaihdan chu a inthlak chiang hle bawk. Taxi hman tur ka hmu mailo a, ding khawmuang tawhlo chuan ke in ka kal zawm zel a, ka lungphu mumallo lutuk vang chuan ka ipik ṭup mai.

Motor pakhatin min rawn tlanpel a, ka hma lawkah chuan ding zuiin a hnung light a rawn ti êng a, ngaihsaklo duh loin ka kalpel thuak a, mipa naupang aw fiah zetin "Ânu vîte" a rawn ti tak lauh ah chuan ka hawilêt rang hle a, Gabriela Motor a ni!

Steering vuan chungin a ban a rawn vai zauh a, Chumi rualin ka dinna lamah a rawn tawlh phei zui a, a Seat aṭanga dingkang meuhin Cedd-an min lo ban bawk.

"Naute duat khawiah nge âpa nen in kala?" nuisang chungin ka lo ti a, min lo ban nghal chung avangin rem leh remloin ka pawm chhuak a, "In ina len angen a, lokal kan lo tum mek a" Gabrielan a lo ti a.

Cedric chu pawmin Seat hmaah chuan ka ṭhutpui a "Joani te nufa an tel ve nange?" ka tih chuan "An hritlang deuh a, kha i naua kha a ninhlei lutuka ka lo chhuahpui ringawt anih kha" a lo ti a, kan tlan chhuah hnu chuan "Ânu vîte i ṭap a mi?" hnai seta zeta min en chungin Cedd chuan a ti a, "Ṭap teuh nang a, keite chu puitling ka nia ka ṭap ve ngai miahlo" ka tarmit a rawn kawihkau deuh chu vauh ṭhat sawk sawk pahin ka aw ka thian zui kharh a.

"Khawnge i kal a?" Gabrielan a rawn tih chuan "Sawlai deuh lawkah sawn kan ṭhiante inah ka kal lawk" ka lo ti liampuat a.

 

Cedric-a ṭawng barh barh chu ka ngaithla a, a harh bawk a a che zawk zawk reng mai, a sam tuaisak ka tum chu a phallo nasa mai lehnghal a, an ni pafa ka hmu chu ka hahdam sawng sawng a ni.

"Champhaiah insawn kan tum thu kha a hrilh tawh che em?" Gabrielan a  tih chuan phawk zetin a lam ka hawi a, chutiang thu reng reng Margaret-in ka hnena a sawi awm ka hrelo "Engtikah maw Ti nge â!" ka lo ti nghal vat a. "Aman a rawn hrilhthuai ang che" tih zawngin minlo chhang a.

Kan In kan thlen chuan Ka nu leh Dodo-a an lo awm a, Dodo-an Cedd chu min lo lakthlaksak nghalthuai a, thingpui ka lum a sitting room ah ṭhuin TV en pah chuan kan in a, "Hna lam i tluang em?" ka tih chuan a bu nghat nghat a "I ṭhiannu zawk hi a buaithlak khawp a ni, Anxiety a nei a" a ti zawi sup a.

"Amak thei e..innu hi engmah ka hnenah hian a sawi ngai tawhlo, kan inbe khat lutuk tunlai phei chu" ka ti nghal mawlh mawlh a.

"Lo kal a tum ṭhin a, Joan-i a damṭhalo reng a nangmah zawkin rawn tlawh rawh" a thingpui inlai lem khalh pah chuan a ti leh a, "Nidawn tak, keimah zawk hi rawn kal tur zawk ka ni tak alawm, tunkar chho ah, chaw ei turin ka lo kal dawn nia" ka ti zui a, choka lama Dodo-a leh Cedd-a inchhaih ri chuan rilru a la peng thuai a.

"Doo...Ice cream kha a ngeihlo a nia tam deuh eitir suh" ka ti zui lang lang a "Ânu vîte ka eitamlo" a lo ti leh lauh mai, apa nen chuan kan nui zui haka.

"Hna i zawng tih ka lo hria a" a tih leh chuan  "Ka zawng deuh a mahse, ka pa in Competitive exam hmachhawn turin min ti leh bur sia" lu thing nar nar chung chuan ka ti a "I tan hna chu a tam viau tho anga, i mamawh anih chuan min hrilh dawn nia" a lo ti a.

Margaret- in ahmain a sawithawi thuak tawh, Gabriela Secretary hna aruak a interview turin min duh anih kha a tirah kha chuan ka tum hman ut ut a ka pa vangin ka ṭhulh leh ta kha a nia.

"Vawin chu khawiah chiah maw i kal a?" nuisuk chungin a rawn ti leh a, min rinhlelh hmel riau lehnghal. "Ka sawi tawh khâ" ka tih lai chuan ka ban a rawn melh zauh a, ka ban ka en chu a lo vual sen tât a, Cedd a ka pawm lai khan a na veng veng ka ti reng a ni.

"Malsawmhlua nen inchhuak a mi?" dilchhut zet hian a ti leh a, a bula han sawi vak ka duhlo tehreng nen min zawt chîk mai bawk si.

"Midang zawk a nia, Lalbera chungchang vangin kan inhau a?" ka tih chuan "Ngaihzawng i nei tak" a lo ti hlut a.

"Kut a thlak che a mi?" chîk zeta min en chungin a ti leh a "Thlak lo e, ka ṭha lawm" zangkhai thei ang berin ka lo ti a, a awih loh hmel nasa mai "Engemaw ti tura min duh a nih chuan....." a sawi zawh hmain ka lo nui hak a "Engmah chutianga lak serious tur a awmlo, a hrim hrimin buaina hi cho viau zel suh, Jail luh leh te kha hlau hle rawh, i lut leh a nih teh chuan " ka lo ti zui duah a, a ni pawh a nui chhuak hawk hawk a.

"Lalbera in tlawh ngai em, tukinah damdawiinah an lut a" tiin ka zawt a.

"Ka kal zeuh zeuh, min hrelo bawk nen keiphei chu kan inmilloh hunlaiah khan a cheng bawk si a, a chhungte hnenah a chanchin ka zawt ringawt mai" a lo ti a, an ni nupa tan hi chuan han buaipui vak ngaihna a awmlo ve em ani, Margareti erawhin a tlawh fo a, naute nen an nih vangin a buaipui zui thei chiam silo a "Ka awm alawm, ka kutah dah rawh" a bulah ka lo ti nghe nghe a nih kha.

Tlai chaw ei dawn ṭepah an haw a, an Motor dahna thlengin ka thlah a "Lo be fo rawh tunlai chu a talbuai ru riau a, i hriat angin hun harsa tak a paltlang a, apa thlan helamah sawn kan tuma, keini kan chhoh leh mai angai bawk si a" a tih chuan "Zaninah ka lo be dawn nia" ka lo ti vat a, Motora Cedd- a muthlu lup lup tawh a hlan luh lai chuan "Champhaia awm kher chu a ngai a mi, helamah pawh i buai viau sia" ka lo ti a.

"Keima rawt a nilo ama rawt a nia, ka pa hnenah a lo dil a, amah sawipui rawh Branch pumpui hi heta ṭangin ka enkawla, hunawl  ka nei manglo, Champhai Branch ringawta insawrbing thei pawh ka nilo" a lu tuaivut pahin a ti a, a rilru a buai hmel viau mai.

"Anih chuan ti nge in awmchhoh kher angaih a?" hrethiamlo tak chuan ka lo ti leh a.

"Keipawn ka hrebiklo Maggie zawt rawh" nui suk chungin a ti a, "Ânu vîte ilo chhuang dawnlo a mi?" Cedd-an a rawn tih chuan a biangah ka lo piaisak a, a mutchhuak chu a meng siar siar tawh "Ka naute tunkarah chawei turin ka lo kal ang, thil tui tâwk ka lo ken ang che aw" tiin a biangah ka fawp zauh a, a bu ve nghat mai.

Inchung ka luh leh hnu chuan ka nu eirawngbawl ka pui a, chhung inkhawm kan nei zui nghal bawk a, "Zanin chu ka chau emai, ka inkhawmlo mai teh ang" chaw ei laia ka tih chuan ka nuin min melh rum nasa viau a ni. "I lehkhazir chhung zawngin  kohhranah  i inhmang manglo a, i zir zawhhnu te hi chuan CTP lam hi belbul ve chawt rawh" a ti zui ta rêng a.

"A pawilo chhunah a inkhawm tho alawm, Exam hmachhawn tur a nei a, inkhung tam a mamawh zawk, CTP member hnathawh neilo kohhrana Active hlur nih aichuan a ṭha zawk daih" ka pa in a lo ti ve thung, kei erawh ka ngawi reng a "Naupang thuṭha hrilh laihian a engemaw zawng hian lo fuihpawrh teivet ṭhin suh, inkhawm tura fuih sauh sauh zawk tur i nih kha kohhran Leader ve lai si" ka nu chuan a ti zui hlak a.

"Ka sawidik alawm Exam a han bei anga, a tling a nih teh chuan khîtah ania miin an hmuh dawn ni, kohhrana a inhman leh inhman loh lam tuman an ngaihtuah dawn lo, Officer chin chu e kohhran ah pawh an lal nghal em em dawn" chaw bar mawlh mawlh paha ka pa in a tih chher chher lai chuan ka lo nui tawi tak a, ka inkhawm peihloh chhan chu thildang daih a ni, Remtluanga hmuh ka peihlo a, inkhawm banah ṭawngṭai hona neih ani dawn zui bawk nen lohtheihloha kan inhmuh a ngaidawn a chu chu ka hreh vang a ni.

Ka chhungte inkhawm tura an kalhnu chuan ka room ah ka chhozuia, lehkha chhiar pawh ka tum hranlo, ka phone ka hmet kuala, Remlalan a fapa thlalak minlo thawn te chu ka en a, keimahin ka nui suk suk mai, ṭhiante fa kan pawm kual sek tawh mai chu a nia, chulai karin keiin ngaihzawng ka la ṭhen chêk chêk thunga.

Usangpuia ka call a, vawin lam chungchang vanga pawi ka tih thu te ka thiam ang tawkin ka va sawi a, amah zawk a lo inthlahrung ngang mai "Vîte kan ti buai nasa mah mah che a ni, kha lampang kha ngaihtuah nachang pawh ka lo hrelo a, keima thiamloh liau liau ani, i bialpain a hrethiamlo pawh kha ka dem hauhlo ania" a rawn ti damthluam a.

Remtluanga mizia diktak ka hriat phaha pawi ka ti ta lo zawk mah tawh, Usangpuia rawn inthlahrung zawk lutuk chu han chhanlêt vak ngaihna pawh ka hrelo "Ezra chu enge a an tawh a?" ti a ka zawh chuan "Aṭha lutuk, inah pawh a awm leh tawhlo, Nancy te ṭhianhoin an lo kan a an rualin a chhuak anih kha" a tih chuan ka nuisak a, a serious viau anga khumah a mu zawi reng turah ka lo ngaih laiin chutia a fawr leh thei tawh a nih chuan ṭawngṭaipui chiam pawh a ngaihloh chu ka lo ti rilru hmanhmawh a.

Kan inbiak zawh chuan ka ngaihtuah zui a, khawiah nge an kal anga, enge an tih ang tih te thlengin ka rilru ah a rawn lang zut a, Nancy a tel a nih chuan Faktei pawh a tel ngei ang, Faktei kha atan tu chiah nge maw a nih tak tak le? Margaretin a hriat ka ring deuh tlat.

Ka ngaihtuah laimekin a call a rawn lut a, phur zetin phone chu ka la a "Vawin kha rawn kal ve ka tum viau nain Joan-i a tleilo lutuka, ka hritlang ve bawk si a an pafa in ka rawn kaltir ringawt mai anih kha" a rawn ti nghal duah a.

"Tui huin in steam la damdawite i ei em, inchhungkua khan inhritlang mai ange in enkawl dam vat rawh" ka ti ve nghal thuai a, Gabriela thil min hrilh kha ka hrechhuak zawk bawk.

"Pawlnu Champhaia pêm in tum em ni?" ring deuh tak chuan ka zawt a, "Hrilh che ka tum mêk a " a rawn ti zawi sap a.

"Enga tinge, inpa pawn pêm a chak miahlo ania, nangma thuin i ti hmiah hmiah tih ka hrereng" ka ti zui bawrh bawrh a.

"Lawk aw..." zawi te in a rawn ti a, fianrialah a kal anih ka ring.

"Vi....ka rilru hi a hah a ni, Donna-i kha i la hria em...Gabriela case a thuhretu kha" a aw aṭangin Bathroom ah a lût tih ka hrethei, Donna-i chu a hmel ka hre chiahlo nain a hming chu ka hre khawp mai, ka hriat thu ka hrilh chuan thawk a la zui ham ham a.

"Ka pa Saian thuhretu a hman dawn khan thil engemaw tihsak a lo tiam a, chu chu remchangah lain Gabriela hnuaia a rawn thawk a, a ngaizawng deuh tlat lehnghal a, buaina kan nei dawnin ka hria, an niho mizia leh pawisak an neihloh zia chu i hriat kha, a hma ang buaina kha kan neih leh ka hlau a ni, naupang an awm tawh bawk si a" ṭap titih hian a rawn ti a.

"Pawlnu...inpa chu i ringhlel deuh ami, tinge i hlauhthawn nghal em em a?" ka lo ti vat a, a awmdan vang chuan ka lo hlauthawng ve ringawt bawk.

"Ka ringhlello, Gabe hi chu ka ring lutuk ka hrethiam tawh biklo, thihna hi a hnaiin ka hria, a hma pawn" a ṭap zui ta ringawt a, Anxiety a neih thu Gabrielan a sawi kha ka hrethiam ta kuar.

"Margaret i pasal kha ring tawp rawh, i harsatna te kha engmah zeploin sawipui la, i ngaihdan leh duhdan te pawh sawi la, a thu kha awih hram hram bawk rawh aw" keiin a ka lo sawipui ve chiam aichuan a pasal bulah sawi sela a ṭhain ka hria, Gabriela aia amah hmangaiha ngaihsaktu an awm chuanglo.

"A rilru tih hah ka duhlo alawm, a hna ah a buai bawk si a, a lo haw a naupang ho nen kan chimbuai reng bawk si, zan rei tak tak thleng hna a thawk a, a hah lutuka lo belhchhah ka duhlo a lawm" ṭap ṭiau chungin a rawn ti a, a rilru tur chu ka hrethiam tho mai.

"Anih Donna-i chu enge i hlauh ringawt chhan ni a?" ka ti leh ringawt a.

"Thiltum leh beisei engemaw neiloin ka pa kha a pui ringawt hleinem, Hotel ah hna a dil a, chu pawh Gabriela Office ah kher leh nghal, a Secretary hna kha a beiseia ka pa lahin a lo pe mai bawk si a" khai a! Hei vang hi anih chiah hi hman ni deuh khan "Gabriela Secretary hna a ruak a, lo dil rawh" ti a min lo tur sek sek chhan kha.

"Chuan engtin zel?"

"A rawn call ziah, hnathawh hunbi nitawhlo zan rei hnu ah te hian, a call pawh ka lo chhang fo mai, Gabe pawn duhtawk turin a hrilh tawh a, diktak chuan maw ṭhiannu chân tur thil ka ngah tawh lutuka hlauhthawnna hlirin ka khat, Donna-i te chu i hriat kha, Gabriela pawh silaiin a kap tawh a" a ṭap leh ta, a va han buaithlak tak, chhuat dungah chuan ka veitawn seka awm ngaihna min ti hrelo zo vek a ni.

"Hlauthawng suh chutiang engmah a thleng dawnlo, inpa kha ring em em tawp rawh" ka ti leh ringawt ṭhin a, Champhaia chhoh a duh chhan chu ka hrethiam deuh ta kuar mai, Donna-i lak aṭanga awmhlat a lo duh lek chu niin, hetianga thil a ngaihtuah tluk tluk a nih chuan a hriselna atan pawh a ṭha dawnlo, Doctor rawn ve sela a ṭha ang.

"Margaret...Doctor ṭha deuh.." ka sawilai mekin "Maggie..." Gabrielan a tih ri ka hria a, ka ṭawng tawp chawt a, ka ṭhiannu ṭap insut pawh a hreh hmiah mai, tui herhhaw riin a zawm a "Bawihte...kawngkhar lo hawng teh le" thumduta Gabrielan a tih ri ka hriat chuan ka lo nuisak a.

"Inpa kha engkim i rilru a awm zawng zawng kha sawipui vek la, a hnenah khan inbun ruak rawh, i hlauhthawnna te pawh hrilh la " ka ti nghal zung zunga "Umm...kan inbe leh dawn nia" tiin Call chu a ti tawp a, kan inbe zo chu ka thaw chhuak huai mai.

Ka awmdan chu ka sawithiamlo ka ni deuh nghulh! Rilru tih thawven tumin zai ka Play-a ring deuh deuhin ka zaipuia, heng Anxiety/panic disorder, Depression tih vel a talbuai hi ka hlau takzet, hetiang natna vei te hi ka lainat bawk, chuvangin keichuan rilru hrisel tak ka put reng theihnan theihtawp chhuah ka tum a ni.

Ka chhungte inkhawm bang an rawn haw a, ka nuin inhnuailam aṭangin min rawn au lawng lawnga, zai rât rât chunga ka chhukthla chu Remtluanga hmel ka hmuh rualin ka tawp chiang kher mai, hmaipilh deuh nian chungin minlo en a, "Nu Zomuan pem thar damdawi in kawl mial em?" min en rân chungin a ti deuh kher chu eilo zetin ka lo ner khum a.

Ka pa inkhawm bang a rawn lut ve chiah bawk a "Eh...Remtluanga chu minlo thlen khalh a ni maw, zanin in zaihruai chu mipui in ṭhâp ṭha hle mai" a rawn ti zui luam a.

"Bawihi thingpui han lum la, Rema nen kan lo in a nge" ka pa in a tih leh chuan tum bar chungin Choka lam ka pana, ka thingpui siam ka va pek laichuan Ka nuin pemthar damdawi a lo hnawihsak a "Engtia i tihpilh nge ni a?" ka nuin  a ti a, nuisuk chungin min lo en a, ten zetin ka lo en lêt ve bawk, engtin nge a lo la kal leh ngam zawk le! Kan ina damdawi a rawn lam kher te chu Over ka ti a, a landan inla Cool ruih te chu ka ten hlur ringawt tawh.

"Ka chho dawn  ania lehkha chhiar ka ngai a" ka pa lamhawi chuan ka ti deuh kher a, Remtluanga lo hawi vut chu ka hria, "Han chhiar rawh, chhiar tam luat a awmlo inbuatsaih sauh sauh mai rawh" ka pa chuan  alo ti ta rêng a, ka nu chuan ti âwm anglo min ti deuh nge ni min melh tûr viau mai a, Remtluanga hmel tum bar ka hmuh chuan tifuh inti zetin ka chho zui nghal thuai a.

Ka room dawhkana ka ṭhufel chiah chu Message ka dawng a "Vawin kha ka tihpalh anih kha, khatiang kha ka ti tawhlo ang" tih Remtluanga hnen aṭangin a ni.

"I tih tawh hauhlo ang, a chhanchu kan inkar a tawp tawh" tih ka thawnlet a, Message dang a rawn thlen belh nghal zung zung a, phun hluk chungin ka phone chu ka dah a, a Screen khi ka hmuh ringawt pawhin thin ati rim thar leh tut tut thei a lawm mawle.

Dar kar chanve zen zawn a liam tih a Call a rawn lut leh zui a, ka ngei lutuk chu ka sa pup pup thei mai, ka chhang duhlo a en pawh en duhloin ka thil chhiarlai ka bih ngar a, a rawn ri nawn a; a ri nawn leh ṭhin. Ka thintertek a chhuak a, ka lehkhabu chhiar lai hnawl tawm nawk pahin dawhkan sira ka phone chu ka ban a "Enge i duh.....rawn call rawn call pawh a ngai tawh ami ka sawi tawh kha" ring lenglawng chuan ka ti nghek a "Khaii...i aw han sexy dan chuh, ava rorum em em ve le" nui hawk chunga a rawn tih chuan ka Phone Screen chu phawkzetin ka en a!

"Vanlalber...!!"

"Pawnah ka awm..." a lo ti vat a, Balcony a ka chhuak phei chu kawtah a Bike chunga ṭhuin a lo hawi chho vuah vuah a, damlo hmel a pulo a rawn nui vur vur mai.

"Lo chhuk la thilpek tur che ka nei a nia" engthil emaw ni hi a rawn leka ka hmuchiang thei mailo "Lo awm rawh" tihpahin room ah ka lut a, kawrchung hain inhnuailamah ka chhuk zuia, Remtluanga pawh a lo haw fel der tawh, sitting room ah ka pa chu a muthlu lup lup a, midang tumah ka hmulo.

Dimtein kawngkhar ka hawnga, kawngpui ka thlenthlak chuan a Bike a lo hungfel ve meka, a bul ka thlen hmain a rimtui inkah rim chuan min zem nghal chem chem mai.

Thawmhnaw dum vekin a inthuam a, han en mai pawn khawilai mihausa fa emaw ani tih chu a incheina aṭang ringawt pawn a hriat theih a, ka lamhawia a lo inher chiah chu ka hmu hmelṭha hrep mai.

Ka hau chungin ka lo en a, ka bul a rawn thlen rualin min rawn kuahnghal ringawt bawk a, lai zeta a kut lo pawhthlaksak pahin ka nuih a "Enge min pek tur chu" tih pahin ka kut ka dawh a, ka kut chu la kangin ka hmui atawh tir vang vanga, min ti lai chhe der a ni.

"I nuih hian i hmelṭha chiang mawle" a la ti tak deuh deuh a.

A jacket ipte aṭangin thilfun engemawni hi a rawn phawrh chhuak a, ka kutah rawn hmehbel pahin "Minlo ngaiviau la, min lo ngaihtuah char char ang che" tih pahin a hmui chu a tipawrh a, a va han mawl thei vuk vuk tak. A thil min pek chu ka en a Chocolate ka hmu rual chuan ka nuichhuak hak a.

"Naaa...Nuts tel chi kha ka duh zawk a sin" phurtak chunga Chocolate kheh rak rak paha ka tih chuan rawn kun hniamin ka hmai zawnah phawk zetin minlo en a "Creamfills i duh a lawm" a ti leh mauh  mai!

"Teuhlo....ahma pawn i lei ṭhin kha lianpui Nuts leh Raisin telna khâ" ka lo tih chuan a ṭhen ṭha a "Engemaw i hriat le?" ka ti zui bul bul a.

"Ka hre leh si...i tan chocolate ka lei ziah ṭhin tiraw..." a tih takah chuan ka awm a ti nuamlo zo leh ta vek. Class kan kal ho lai khan nitin deuhthaw a Chocolate lei kha ka ei ṭhin, a chhan chu Margareti khan a ngainalo a, a eiduh ngailoh vangin keiman ka chang hlauh ṭhin a.

Min en reng tu vang chuan khang Chocolate zo zai kha lo ei miahlo ila ka ti hnuhnawh hle a ni. Za lo zet chuan ka kiaisak a, ka chocolate ken lai rawn tuaithlak zauh pahin a hmawm tharh a, a chezia chu ka lo en reng a, a mit thuar chhahtap te, a hnar ngul sang vah leh a khabe bawr invuah nalh zet te, hetianga hmelṭha deuh hi engtin ka lo enkan daih theih le, Ohh...chapo hmeltaka a hawisan daih ṭhin vang a nimahna. Mmmm...ani ngei ang, a chapona tlangsanga a ding kha ka han hmupha ngailo miau a lawm.

"Enge i nuih?" ka hmai bula hnai zeta arawn kun chuan ka lo phu deuh zawk lehnghal a,, a lo nui ri suk mai, ka Chocolate ken lai chu a tuaithla leh a, min barh dawn emaw ka tihlaiin a hmawm leh daih a.

Reuh chuan!

"Creamfills a nemin a thlumtui hle mai, i hmui ang mai" tih leh min rawn fawh arual a, a Chocolate eilai chu ka ka ah arawn hnawlphei veka, chhak theih pawh anilo min fawh chhunzawm mial mial a, hamhaih lutukin ka lo meng kawk kawk ringawt a. Ka lem ta khawlh mai, tihtheih dang awm heklo, a va che ṭhing tak "I tenawm lutuk Malsawmhlu" tih leh a sama kheh ka ruala, chuveleh min chawikang nghal nawlh a.

"Min lo ngaiviau ang che" tihpahin ka biangah a rawn fawp leh tâwk a.

"Aiii...an zahtheihloh zia chu le.." Naua aw ka hriat rualin ka tal nghalchul mai, leia min nghahrual chuan Step tawpa Nau ding chu ka va melh a "Uakkk.." a lo la ti zui.

"Heii...Buddy" ka bula miin a lo tih chuan "Zuheh..." tih pahin step ah a chho zui nghal daih a, ka zak lutuk chu mit chhing sawk chungin ka ṭhen zui nghek a.

"Chho la han mu tawh rawh, ka thlen hunah ka lo hrilh ang che" min melh ralh paha a rawn tih leh chuan "Chhurbur" tih pahin a awmah ka lo chum dawp a.

"Chhurbura bialnu"

"Ka ni bawk lo e"  ka lo ti hlar a.

"Anih leh Nahaia bialnu"

"Kan inṭhen daih tawh e a" tum loh deuha ka sawichhuak chu ka ip leh chawih a mahse, ka sawi zo vek hman tawh, ka hmaa ding chuan ngaihven fahranin min rawn en nghalzat bawk.

"Tak tak maw..?" a mitmenga phurna lo lang chu ka hmuh hmaihlo.

"Vawinah kan inhau alawm mawle" ka ti liampuat a, a nui hmel chuan ka nuih a ti za ve deuh tlat a ni.

"A ṭha lutuk Barbie...naktuk zan aṭangin kan inngaizawng thei anih chu zanin chuan duh leh han Single ve rih la" atih chuan ka lo nuichhuak hawk a, hepa ringawt hi!  A ngaihna pawh ka hrelo e a.

"Ka kal a nia" tih leh inher ka rual a, "Naktuk chu aw" a la rawn ti hram pek a, chhan pawh chhang buai peih tawhloin ka luhsan a, inchung ka lut chiah chu Nau-an min lo melh tûr nasa mai.

"Laptop min lei ang" min en run run chungin a ti a, lehpek chuan he nau hian min vau nan hman atum anih lehpek tawh hi "Pawisa ka nei ngawt ngawt lo" ka lo ti bak hlak a.

"Anih Phone thar"

"Khawi aṭangin nge pawisa nei sela min tih a, hna ka neih hunah ka la lei dawn che nia, i sawichhuak anih teh chuan i thi a nimai" kut tum hmuh zauh pahin choka lamah ka luhsan a, min rawn umzui nghalthuai a.

"Pawisa i khawl ṭeuh kha, i Scholarship bakah Semester fee 50% an off che kha i khawl zel tih ka hre vek, nuai i nei tling" a tih chuan ka tui inlai ka hak lo chauh a ni!

"Nang mai mai hi, ka Passbook ilo check leh hman tawh a ni maw?" tihpahin a mawngah ka ben sak nghalzawt zawt a, a rak chul zui a.

"In infawp lai kha Pic ka nei a nia aw, phone min lei loh chuan i mualpho ve viau ang" tlanchhiat pahin ala rawn ti hram a, "Min va han ti mualpho awmlo tak" ti a phun hlak hlak chungin room lamah ka chho zui a, chu nau mai mai chuan ka awm a tinuamlo zo vek tho mai, lehkha ka chhiar a ka rilru ah alut thei hlawllo, kan infawp laikha Nau an thla a lo la tak tak anih teh chuan a mawl bawk si a, chhungkaw group ah te lo Post leh ringawt ta se! Awiii..ka thi a ni ringawt, ka pa in min vaw hrep duh ang.

Tih dan tur ka ngaihtuah ngut nguta a muthilh hlana Delete sak chu a ṭha berin ka hria, a mu nghet thei bawk a, a harh teuhlo emai a, ngaihtuah chhuakfuh inti zeta nui ruh ruh chungin Lehkha ka chhiar zawm a, ka ṭan deuh chauh tih ah Lalbera Message a lo thleng a , In a thlen tawh thu min rawn hrilh thlap a.

Chhang lêt loin phone chu ka dah a, reilote lehkha ka chhiar lehzet hnuah Naua a muthilh tawh ringin a room lam ka pan phei ṭhem ṭhem a, a lo la muhillo nasa mai, khum ah ṭhuchungin Games a lo khel a, earphone a vuah a vangin ka thawm a hrelo hlauh.

Lêt leh mai tuma ka inher chu "Heih..." a lo tih thut vang chuan ka phu dawta, awmdawm meuhin ka hawilet a, minlo en awzawng lo "Ka thi ka thî..." tihpahin khumah chuan a ke a leng vela, ka lo meng rang nasa. "Mawla ka ruang kha hai ta che, nang aiin silai ka neiṭha zawk, ka zung lawk anga lo Chicken ngei ngei ang che u" tih pahin a thokang hluaia, chu veleh kawngkhar phenah chuan ka biru nghalvat a.

Bathroom a luh veleh thawmdim lutukin ka lut a, khum chunga a phone dah chu ka la vata, a lo la êng va va bawk. A phone Gallery chu ka enkual zung zunga, kan thlalak chu alo awm chiang ngei mai, Delete tuma kut ka tin vang vang laichuan ka han bih nawn leh kher a, kawngpui reh laitakin Street light hnuaiah Biker chhelozet leh nula samkir inpawm kang meuha an infawp lai chu a lang Romantic in Delete mai atan chuan a uihawmin ka hre ta tlat pek anih chu!

"Hrep chuan leh! Vanlal i â tawh a nih hi" ti rilru mawlh mawlh chungin ka inthawn ta tho a, Nau-a Gallery aṭangin ka Delete nghalzat thung, Bathroom lam thawm a rawn awm a, phone chu khuma thehthlak leh tlanchhuah ka ruala, ka room ka thlen chuan ka nui kur kur a. Thlalak chu ka en a ka ennawn leh ṭhin, a nalh takzet, en ringawt pawhin minti mur uai uai thei lehnghal, a hunlai ang maiin ka feel thei a ka biang a sa nghal hat hat bawk. 

Hepa hi ka duh ringawt ta anih hi!!

Ka rilru zahve chuan nuamlo tihna ka nei a, ka inthlahrungin ka hlauthawng bawk mahse, a zahve erawh chuan ka hlim veng veng, tleirawl star nei thar hlim ang maiin a lawm ka awm le, ka ngaihtuah chhuah a piangin zak takin ka ṭhen nghek a ka hik chhuak mup thei zel lehnghal a, a nawmdan chu a hrehawm dangdai vel niberin ka hria.

Ka muhil chu ka phone ri vangin ka harh hlawl a, Side table a ka tarmit chu meng mangloin ka ban nghal rawk rawk bawk. Min lo call tu ka hmuh chuan aw thian lehzetin ka chhang a "Good morning ka bialnu" zangkhai fe hian a rawn ti a, ka lai lehta ringawt nia!

Insum zet chunga ṭhutchhuah pahin "I bialnu ka ni ngawt lo e" ka ti hlak a, hmuhloh lamah ka ṭhenzui sak bawk. "Ahh...nizanah kan sawifel tawh kha" a rawn tih chuan ka lo nui hak a.

"I sawi avang mai khan ka ni tihna a ni hleinem, bakah ka bialpa nen niminah kan inṭhen ve chauh a, ngaihzawng neih pawh ka peihtawh lo" ka ti leh chuan "Hmmh" a lo ti deuh hmuk a.

"Min hnar deuh bur elaw?" hah hmelzeta thaw ri hrawih hrawih chunga a rawn tih chuan " Vanlalber..engtin nge i awma i ṭha maw?" ka lo ti nghal chul a, "Ka ṭha chiahlo, hnawl zawh chiah ang hian ka awm" a tihlaia a aw ri te chu a diklo nasa mai. Ka hlauthawnga minti chîai bawk!

"I bulah i chhungte an awmhnailo ami?" tih leh khum aṭanga thawh ka rual a.

"Chutiang ka mamawhlo nangmah a lawm ka mamawh che" a rawn thaw ring zual sauh a, a rum chhuak hrawih bawk a. A va han buaithlak tak "I u call la" ka ti leh rih.

"Min duh ve maila" thawk pangngailo zet chuan a rawn ti leh a, lo duh ve sa tho bawk nen ka aw lo theilo. "Nia, nia...kan tum dawn nia, a ṭha em?" ka ti ta ngawt a.

A ngawi vung vung a, nikhaw hreloin a awm anih ka ring deuha ka hlauthawng lutuk chu ka thinphu a ranga, chhuatdungah ka vei tawn sek ringawt tawh.

"Lalber i ṭha em, engtin nge i awm?" ka ti mawlh mawlh a, chutihlaiin mi tute emaw inbe thawm chu chianglo zetin ka hre pha a " Barbie...Ka u Gym ah ka awm a tunah tak hian Barbell rit lutuk takmai ka chawi mêk a, nakinah ka lo be leh ang che" a rawn tih chuan ka pen lai ka tawp chawt a!

Phiangsen chuan "Hmel varung...." ring zetin ka ti ta ngheng a.

"I au ring lutuk, ka bengah ka vuah a nia" ala rawn ti zui deuh deuh a, reuh chuan a! Tu emaw biain  "Ka Earpod vuahlai hi minlo lakthlak sak lawk teh" a ti zui leh zat a, ka ngei lutuk chu ka lo inpetruh ṭeuh mai, duh ringawt mahila inngaihzawn pui kher kher hi chu ka tum hauhlo a sin mawle.

Chawhma lamah Coaching class ka kal a,  Maths lam kan zir a ka tithei zul vek mai a, rinai takin a phurawm bawk. Ka bula ṭhu nula samtawi nen chuan kan inmil phian a, hming te inhrilhin kan titi zui luam a, reilo teah inbe tlangnelin kan phone number te kan inpe a, Class banah thil eiturin kan inzui nghal chawt bawk a.

"Nangchu ka hre sa tawh che College khatah kan kal ho tawh a, Political Science Department ah khan ka awm a" a  tih chuan college khatah kan kal tawh tih reng reng ka lo hrelo "University i zawm lo mi?" min ti zui a, "Zawm e..ICFAI ah ka kal a nang le?" ka lo ti ve nghal var a.

"MZU ah ka kal a college ah te kha chuan a ilar em a kan hrefur che alawm" nuisang a tih leh chuan ka ṭhensak a "Min hai anilo maw?" ka lo ti ngawt a.

"Hai teuhlo SU member i nia, Top ah i lang ziah bawk sia i chhelo bawk si i lar ve e" nui hak hak chunga a tih chuan ka lo nui tawi tak mai. "Ka hawi zaulo lutuka, ṭhian ka kawm zim bawk sia mi ka hrelo thei lutuk"  inthlahrung angreng tak chuan ka ti leh a, kan eitur chah lo thleng chu ka lo ban zui sawk sawk a.

"I ṭhiannu sang deuh College Miss kha engtin nge a awm ve tak" thil ei mawlh mawlh pah chuan a ti a, "Pasal ṭha deuh neiin fa pahnih anei tawh" ka lo ti vata.

Ka phone a rawn ri a "Kan mimawla" tihsap pahin ka la a "Khawilai Coaching class ah maw i kal?" ring fe maihian a rawn ti a, ka chhuah dawn khan kan intext a ka hrilh reng a sin mawle, chhang ṭha ta mai biklo chuan "I message kha chhiar nawn leh mai la" ka lo ti deuh kher a.

"Vawi 4 ka chhiar tawh, i sawina hmunah khan ka awm a, i va awmsi lo ve" lawmloh hmelzetin a rawn ti a, rang lutukin pawnlam ka hawichhuak nghal a.

"Tinge a?" ka ṭhiannuin a lo tih chuan "Traffic point chhaka dawrah khan thil kan eimek" ka ṭhiannu lam hawia nuihsak pah chuan ka ti a "Ok" tihpahin call chu a ti tawp zui a.

"Min hruaitu tur a lo kal a" ka tih chuan "Scooty i neilo a mi?" a lo ti nghalvat a.

Ka lu ka bu nghat a, Scooty chu kan nei ve ngei maia, mahniin a pumbilh theihloh tlat thung, ka nau te pahnih pawn an inchuh rap rap reng a nia. Mamawhna tehchiam neiin ka inhrelo vei nen lei enah ka lo en ngai lemlo bawk a.

Lalbera chu a rawn thleng ve mai dawn emaw ka tihlaiin a rawn thleng ta lawklo a, thil kan eizawh hnu pawh a ala rawn lan loh cheu avangin pawnah lo nghah mai ka rilruk a, ka ṭhiannu nen chuan inzui chhuakin Traffic point chhak Bus stand ah chuan kan ding renrawn a "I duhleh min hawsan la" ka tih chuan "Naktukah kan inhmu dawnnia" tih pahin a Scooty dahna lamah min kalsan zui thuai a.

Ka phone a rawn ri a amah ani, a lo lang mai dawn emaw tih tawh laia min lo la Call cheu chuh!

"Khawnge i awm..." pawr zetin ka lo ti a "I thlangah" kei aimaha pawr chuan a lo ti a.

Ka hawikual ruai a "Kha lam nilo i hmazawn lo en rawh" a rawn tih chuan ka inher vut a "Traffic point opposite chiah" nuihak chungin a ti leh a, ka hawi vung vung a ka hmu hleithei derlo mai, ni a sa ṭang at mai bawk si a, min chhunkalh deuh tlat bawk nen thui tak chu chiangkuangin ka hmu theilo.

Ka en ngial a a phe deuh ruai ringawt a, mihring ding te chu ka hmu nawk tho a amah tak chu tuber nge ka hrehrang derlo, lu thaklo pui hiat chung chuan ka hawi veng veng a "I va chhelo ve a, bialpa nei tharnu" a la rawn ti zui a.

Ka tarmit chu ka tuai thuak thuak a ka vuah ṭha leh ngawt a, awmzia a awmlo. Beidawng zetin ka nui ta ringawta "Lalber...khawiber kha nge i nih pawh ka hrelo" ka tih chuan, "A hmelṭha ber i hmuh kan dawn a maw?" uangzetin a la rawn ti ham ham a.

"Nî khian min chhunkalh tlat a lawm" ka tih chuan a ngawi vung vung a " Lo en la" a tih rual chiahin ka hmazawn tak kawngpui thlanglam a ding chuan a ban a rawn pharchhuak vah mai, ka bula ding te pawh an lo nui hak a "I hmu thei tawh em?" a rawn ti lawng lawng a, Motor horn ri tuar tuar karah pawh a ṭawng chu a ring em em lehnghal a, ka zak ram ram mai a ban chu dahthla mai loin a rawn vai zui lauh lauh a "Mawla khatia i ban phar vak vak lo khan rawn phei ve mai ta che mawle" ka phone thukru ṭut ṭut chung chuan ka ti a, ka bula miten min nuih tet tet vang chuan ka hawichhuak ṭha ngam tawhlo.

"Hetah ka Bike ka dah a, kawng lo kan la a awlsam zawk" a rawn ti ve leh tlat. Phunhluk chung chuan kawngpui chu ka kan a, Motor kawng kan hi ka thil nuam tihloh zawng tak a ni, kawngpui sir lehlam ka thlenphei rual chuan thawk ka la huai a.

Ka hmaah rawn dingin ka sam a rawn tuai thuak a "Duhawm thei lutuk mai" tih pahin ka darah min rawn kuah deuh sawk a. A incheidan chu ka lo en chho diat diat a, Sleeveless var leh Pants dum pheikhawk manto hmelzet nen, a ban puam sek ṭalh ka dara arawn nghah chu ka lo enzui vat bawk a, a sang ṭha bawk si vawin zet chu nidang zawng aiin ka la hmu hmelṭha zui, min rawn enrualin rang lutukin ka mit ka la sawn nghal a, ka en leh lai chuan hma lam enin a lo hawisang vah a, hmeichhe tleirawl kan kalpelh ho chuan an enduh hlawm nasa mai.

 

"Ui..a chhelo lutuk" ti a an inhrilhru sap sap pawh ka la hrepha.

A Bike dahna kan thlen rualin "Khawiah emaw ni ka hruaidawn che a nia" a ti zauh a. "Khawi ah maw...?" ka lo tih chuan lu thing nar nar chungin a mit a tizim raih a, hmeichhe hmuia awhawm khawp hian a hmui lah hi ala hrisel hmel zui lehnghal a.

"Bruuuuhhh" ngaihtuah loh tawp tur ka ngaihtuah lehta. Ka phone Gallery a ka thlalak neih chu ka hrechhuak zui rauh rauh a. "Hlân kher i phut em?" a rawn tih chuan ka hawi chhuak zawk a, a Bike ah a lo ṭhu fel der tawh.

A  Bike Seat a sang bawk si, kekawr tight ka ha bawk nen lawn mai ka tum chu ka kar hleithei meuhlo, ka bawp ka hlang zuau tawh chu ka tlin ta tlatlo a, hawi kualzuk zuk chunga ka bawp la thla lehin Seat chu ka vuan ṭung ringawt a.

"Hahh...Sorry" tih pahin Bike chu a rawn ti awn a "Thanks " a dara benthawk pahin ka lawnkai zui a, "Welcome my dear" tih leh tlanchhuah a rual a, a tlanchhuak thut bawk a a hnungah ka bei thlawp mai.

"Ṭang ṭung suh ka khalhchak dawnlo" a rawn tih chuan ka inthlahdul riai riai a, a kawngah ka vuan ṭai bawk, heti te mai hian kan inngaihzawng ta ringawt tihna em mawni le!?

"I ṭhu hnung lutuk" khawchhung kan pelh hnu chuan a rawn ti lawng lawng a, hnunglam aṭanga melh rum nghek chungin ka tawlh hma a, ka kut rawn banin amah sichet khawpin min la pawt zui ta hram a, a Steering vawn lai thlah chuan ka kut chu a a dulzawnah min suihtir a, "Chelh rawh, chelh rawh" ka lo ti nghal chul a, thlamuang takin he Bike ah hian ka chuang thei hlawllo.

A dul ka vawnna kut chu a thlandap tawh, ka zam ru riau lehnghal "Robot ang maia ṭhu khawng auh renglo khan ka hnungah khan han bei deuh hnap teh le" uang zeta Side glass aṭanga min rawn thlek pah chuan a ti a, "Hma lam en rawh" ka lo ti vin hlur thung a.

"I thu ber" tih nghut pahin hmalam a en a, thui pawh kan tlan hmain a ding ri hrawih a, mawng kang dawrh khawpin a hnungah chuan ka bei leh thlawp anih chu! 

"Uang uang suh Vanlalber..." ring zetin ka ti leh nghek a, eng he hu ah a duh der lo.

"I tawlh hnung leh anih chuan ka ti leh dawn a nia" a la rawn ti tak deuh deuh a.

Min hruai tumna hmun kan thlen chuan "Lo che suh" tih pahin Bike a hung ṭha a, kan piah lawka kham niawmtak lam chu phawk fein ka lo en a "Lokal rawh le" tih leh min chawithlak a rual a, kut khingkhat chauh hmanga min chawi kher chu eilo zetin ka melh zui rawm a. "Kg 45" a lo tih chuan ka melh rang nasa mai a ala sawidik chiah lehnghal a!

Ka banah kaiin min kalpui hmawk hmawk a, khamko sang zeta kan ding chiah chu thawk ka la zui ham ham a a mawi tak zet! Khawpui chu kan chhuk thlir thei a, a pe un mai. Ral lehlamah tlang sang deuh deuh a ding ngirkhup a Romeiin a bawh chiai bawk a, thlifim a rawn thaw heuh heuh zui bawk nen, khawthlir nuam tak hmun a ni.

Ka hnunglam aṭangin min lo kuah a, ka darah a khabe rawn nghatin ngun fahranin min thlek a, a lam ka hawi chiah chu kan hnar a insi lo chauh a. Aw thian kharh chungin hmalam ka melh zui nghalthuai a, ka thinphu a rang nghal dawt dawt mai!

"A mawi em?" zawi te a tih pahin ka biang a rawn nawk a, min kuah nghet salh salh bawk, vawt ka ti hauhlo mahse, ka khur lo chauh chu a ni.

"I chanchin tam tak ka theihnghilh a, kan hun hman ṭhin dan te pawh mahse, reilo teah ka hrechiang leh thuai ang che, Margareti hnenah ka zawt a lehkha i zir nasat lutuk vangin hawi khawthawn na hun takngial pawh i nei ngailo a, tunah chuan nun hi engangtaka nuam leh hlimawm nge anih theih ka entir dawn che nia" nui suk suk chungin ka biang a rawn fawp a, kei erawh ka lo ṭang ṭung ringawt mai.

"Ṭhianpa" ip ngar ngar chunga ka tih chuan "No" a lo ti nghut a.

"Ṭhian chu ti lo teh khai...." uangzeta tih leh pahin ka nghawng a rawn nul nghal thuak a.

Kan inngaizawng tak tak tawh a nih hi, kan awmdan hi ṭhian awmdan chu a ni tawh hlawllo, ka rilru hria niawm takin "Ṭhian kan nilo" a rawn ti ta chiah a.

"Vanlalber..." aw khur dar dar chunga ka tih chuan "Barbie" tihpahin alamah in kuaiher a.

*CHAPTER - 6*

Min pawm kangin dimtein min fawp a, Mint rim a nam chem chem mai, ka ngaihtuahna ah zawhna chhan sen loh a rawn lut nghal zung zung a zawt pawh niila ani chuan chhanna anei lo ang, kan huntawn in ala hril chhoh tur chauh a ni, ka rilrua thutlukna ka siam mekah chuan ka inchhirloh hram ka beisei bawk.

Ni e, vawin aṭang hian Lalbera bialnu ka nih tawh dawn, phurna mak deuh ka nei a chutihrualin ka huphurh ru ṭeuh thung. 

"Nakinah min dem miah suh ang che" amah en ran chunga ka tih chuan nui chungin a lu a thing a, "Lerh miah suh" ka ti leh ta hram a "Lerh dawn lo" nuihzat hmel zetin a lo ti a, ka ring ngam chiahlo mahse, a pawilo ka rilru ka siam laklawh tawh "I lerh teh chuan i chaklo ngawt ang" melh rum kha kha chung chuan ka ti leh a, a mitmeng a phurna rawn langchhuak chuan minti hlim viau bawk.

Rei awmloin kan haw lehvat a, a kawngah nghet zeta kuahin a hnungah ka bei hle hle a, a ni pawh a lungawi a niang a ngawi ran mai, a khat tawkin ka kut chu a rawn vuan leh ṭhin a, a tlan chak poh leh ka lo kuah nghet salh salh a, ka bialpa a nih tak vang em mawni hlauhna pawh ka nei tawhlo, a dar lianpui te chuan min thlamuan riau tawh zawk.

In kan thlen chuan tlai a ni tawh a, a Bike aṭanga ka chhuk laichuan dawr aṭangin ka nuin minlo thlek vung vung a, Lalbera ka mangṭha hnuah peng khawmuang loin inchung lamah ka chhohsan nghal daih a, Naua College bang a lo thleng ve chiah bawk a.

"U vîte hmanzanah ka phone i khawih chiang lutuk" a tihlaia a hmel nur nang chu chalâk fahrana melh pahin ka lo ṭhenkhum ṭha a. "Delete eng ang mahla maw ka thluak ami hi chu i Delete thei dawn chuanglo, ka sawi chhuak palh hlauh maithei ania"  chimawm zeta a rawn tih leh rual chuan ka tui Bottle ken laiin kalo vawm zui ṭawk a.

"I sawi chhuak anih chuan phone thar i nei dawnlo tihna a ni mai a lawm" tihpahin choka lama luhsan a, a bengkhawn rang kher mai "Tak tak maw?" tih leh min rawn umzui a rual nghal a.

Lalbera nen kan inkawp thu hi ka nu leh pa te hriat ka la duh rihlo a, a ruk thei ang bera kalpui ka duh rih, Class kan kal ho laikhan a rawn leng ve fo a, zu rim a rawn nam ziah vang khan ka pa in kawm tamlo turin min hrilh fo, a damloh hnu a a rawn len leh chang hi chuan ka pa nen an innang fuh ngailo a, ka nu erawhin ṭhian satliah chauh kan ni tih a hriat avangin a ngaimawh ngai hranlo a, tunah erawh ṭhian mai kan nitawhlo chu chu an hriat ngai ve bawk mahsela kan inlaichinna hian engtia rei nge a daih dawn ka hre lawk lo a rei tak daih tura ka beiseiloh vang te pawh a ni mahna thuruk anga kalpui chu a ṭha berin ka hre rih a ni.

Ka pa hian ngaihzawng neih duah a remtilo a, tunah phei chuan Remtluanga nena inkawp turah min la ngai bawk "Pasal atana i duhloh tur chu ngaizawng lo ang che, hmeichhe tan ngaihzawng neih duah a ṭullo, pasal i neih hunah a ṭangkai dawn lo lutuk" tih thu hi min hrilh chamchi ṭhin.

Eirawng ka bawl laiin min lo call a, a call ka chhang tur te chu ka phur sarh nia, mak tak a ni! Nula han chaikual vel zei tak ani tih chu ka hria keimah ber hi alaka âwn duai duai turin ka lo inring ngailo mahse, a thleng mek si!

"Video ka lo thawn che a lo en rawh" a ti a, a sawi zawh rualin a ti tawp leh vat a, engmah ka sawi ve hman lo. Phun hluk chungin whatsapp ka en a, a Message ka hmu chu ka bai chhuanlai  hrechanglo lekin ka en a.

A zai! Aw nalh tak a nei a, a zaithiam hle tih chu Margareti te inneih zana kan zaidun aṭang khan ka hre tawh. Video ah chuan Guiter a perh a; a aw thian kharh kharhin a nui leh rih a "Barbie tan" tih pahin hnuailam a bih a, a lai ve deuh emaw ni, reuh chuan! C. Vansanga hla 'D rûnah' tih a sa a, a aw chu thum viau mahse, a sânglai pawh a tlin hrep mai.

Reply ka tum laitakin min lo call leh a "In rîm lampang te hi enge i ngaihdan, Step by step a kal aichuan Shortcut duai mai ila" a rawn ti a. Hahh...hepa tak hi chu.

"Exam hmachhawn tur ka nei tih i hriat kha" ka ti a, kan ina lo lên chu ka inthup tum nen a tihchi chiahloh ang, a ngawih vung vung hnuah "A nihchuan kartawpah" a sawizawh hmain "Umm...pawn lamah kan chhuak anga" ka lo ti leh nghalthuai a. A pawm zawng tak a nih hmel, zirtawp zana lengchhuak dun turin kan intiam a, kan inbiak zawh hnuah ka mit Laser a kan kah tir tur kha ka hrechhuak leh hnuhnawh chauh a.

Thim dawnah ka nu dawr ka kharpui a, chawei ka siam mawlh mawlh laiin "I ṭhianpa kha a dam tawh a mi?" ka nu chuan a lo ti hlawl a, "A zia tawh lutuk, dam chu a nimai" ban charhin ka chhang a, min zawt zui lo hlauh, Nau-an min lo mitmei rulh rulh a engmah sawilo turin ka lo mitmei nghalthuai a, "Phone chu tun karah aw" ka beng bulah a rawn ti sa sa a, ka melh zui rawm rawm a min hlau ther te lo, a la nui tak ang vur vur lehnghal a.

"Coaching class chu enge a an?" ka pa in a tih chuan phur zeta ka lo chhan vang chuan ani pawh a phur hmel hle a, chawei chhung zawng min fuih a, Nau leh Dodo-a a zilh nek thung, ka naute pahnih hi zirna lamah an laktlak tehchiamloh a, chuvangin ka pa hian ka lakah beiseina a neih san phah a ni.

Lehkha ka chhiar ṭan hmain kan inbe leh a "Ropuia a lo leng a" a tih rualin ka lo ner sawk a. "Zu kha i in reng a nih chuan ka ṭhen leh daih ang che" ka ti bak hluk a, "Enga tinge tupawh hian zu heh lutuk treat a min treat vek hlawm le!" a ti nuah nuah a, chhan vak ngaihna pawh ka hrelo "In lo la ani mai" ka ti leh ringawt a.

Lehkha ka chhiar a rilruah a lut mawh kher mai, ka ngaihtuah tlut tlut a Remtluanga nen kan inkawp laiin hetiang hian ka awm ngai tawp lo, Remtluanga changlo ahma a mipa ka lo biak ve deuh ṭhin te pawh ka vei tluk tluk ngai lemlo a, khang hunlai kha chuan ka rilruah lehkha zir chauh a awm ṭhin, Lalbera erawhin ka rilru  zawng zawng a luahkhat a, ka ngaihtuah nasa lutuk chu ka hah vek thei hial a ni.

A chhan ka hrethiam biklo, kan hmalam hun ka ngaihtuah apiang hian thaw ati ipik riau a ni chuvang te pawh chu animahna heti em em a ka vei tluk tluk chhan.

Remtluangan min call sek renga, ngaihdam dilna thu min thawn chamchî bawk, a message te chu ka hawng duhlo a, a call pawh ka reject char char a. Ka lo duh ṭhinna zawng zawng bo ta vek erawh ka thiamloh hmasak niin ka hrebiklo. Lohtheihlohin aman tawpna siam turin min nawr zawk niin ka hria, kha a mize huatthlalaawm zet kha ka lakah a lo thup char char a, khatiang thil tehhrep kha thlenglo pawh ni tehreng sela nakin lawkah a lan chhuahtir thoin ka ring.

A tukah ka nu nen Clinic ah kan kal a, kan Doctor hmuhtum kha Delhi ah a lo zin daih chu niin a Assistant in kan Appoinment chu min sawn sak ta ringawt a, haw kawngah ka nu a phun bul bula kei erawhin tihzia ka lo ti nasa, Lalbera hnenah kartawpa ka chhuahpui tur thu ka lo sawi diam tawh tlat.

Nilengin inchhung sekrek ka khawih a, ṭhenawm nula Zari a lo leng a Remtluanga chanchin min zawt sek renga, kan inṭhen thu ka lo hrilh tawl mai "Engtin nge i ṭhen phal, khatiang mipa perfect lutuk CTP ah pawh leader chhuanvawr lehnghal, Mary te ṭhianho an va lawm dawn ve" a ti barh barha, Mary atih chu CTP a kan member pui a ni a, zaipawlah pawh a tel nghe nghe, Remtluanga bialnu hlui niin an sawia, chiangtak phei chuan ka hriatpui ve lo. Kohhrana ka tal tam loh vangin kan inhmu zen zenlo bawk a, ka ngaihven tehchiam ngailo bawk.

Nilai ah ka pa Khawzawl lamah a zin a, Social Welfare Department ah Secretary hna a chelha a zinchhuak ve deuh reng ṭhin, tunkar khera azin erawh ka lawm viau mai, chhungte lakah chhuanlam siamdan tur mawlh ka lo ngaihtuah lai mek a ni.

Class ka kal a, Nau-a nen chawhnu ah phone kan lei a, ka phone Screen chhia chu ka thlaktir nghal bawk "Ka thu i awihlo anih chuan ka chhuhsak lehnghal ang che" tiin ka vau zui a, a bu ve nghat nghat mai. A sawichhuak a nih teh chuan ka chhuhsak duh tak tak ang.

Zanah Remtluanga a rawn lenga ka Lehkha chhiar laiin ka nuin min lo ko a, Nau-a Games khellai TV enturin ka pawt thla lui bawk a. Ka nu chu Zari nu in Secondhand bale a hawngthara enturin a kal daih si a, Sitting room ah kan pathum chuan ngawirengin kan ṭhu a, min biak pawn a rul tawk lek lekin ka chhang a, Nau-a a awm vangin se se thulam a sawi ngam biklo a  chawh ka ti hle ringawt, TV ka ensan daiha nuam a ti biklo aniang rei pawh ṭhuloin a haw thuai a, a haw dawn chuan "Kawngkhar thleng minlo thlah la" a ti a, phurlo fahranlo chuan ka zui a, kawngkhar kan thleng chiah tih ah ka nu a lo haw hlauh a, a rukin ka nui ru ver ver mai.

"I va haw hma ve Rema" Step a lo chhoh pahin ka nuin a lo ti lawng lawng a, "Nia tihtur neuh neuh ka ngah a" a lo ti zawi sap a, amah pawh ngaihsak lo chuan ka nu thawmhnaw rawn pawm chu ka lo laksak sawk sawk a, "Anih muttui aw" tihpahin inchhungah ka luhsan lehta daih a.

Ka pa a awmlo bawka, sitting roomah mut dawr dawr pahin ka bialpa ka text a, ka awmdan chu nuam ve mai mai tak a ni.

"Enge i tih?" ka va ti deuh tawng a, Text hmasak hi ka zak lemlo, ṭhian kan lo nih tawh vang nge ni Remtluanga anglo takin han zah ṭet ṭut ka nei loa, a nawm ve na lai tak niin ka hria.

"Nsa'n lenchhuah puiah min sawm a, ka insiam mek" a lo ti a.

"Khawiah maw?" nersak chungin ka reply a, zan chhuah hi a va han hrat tak. Tun hma pawn zanvak ang chiah ania a damloh hnu te hi chuan a sim deuh ka beisei a sin mawle.

"Hotel Redstone ah ilo kal ve duh em?" a rawn ti vat a, Hotel Redstone ber kher lehnghal, ka lo hriatdan chuan 'Mihur bawm' an ti ṭhin, mihausa ho call girl te nena nuam an tawlna hmun.

Chutah chuan ka bialpa a kaldawn a maw? Rang zeta ka room a chhoh pahin ka call zui a, a lo la nghalthuai a.

"Nsa nen chiah ami innih dawn? enge in tih dawn?" lka lawmlo tih chu ka aw aṭang pawn a hrethiam ve iin ka ring

"Ṭhian dangte pawh an tel ang, an zinga ka tel tam angai alawm, hetianga inah ka tawm reng chuan engmah ka hrechhuak theilo ang" awlsam zetin a lo ti a, ṭhian dang atih te ah chuan Nancy te ṭhianho kha an tel ka ring deuh tlat.

"Hmeichhe ho an tel dawn em?" ka ti leh kher a, "Ka hrelo, ti nge?" nuihza aw lek lek hian a rawn ti a ka huat tawk a lo tling hle. "Mihur bawm an tih hmunah i kal dawn a, i kalpui tur te ka hre duh a lawm, Call girl zawng tura kal chu in nih loh ka beisei deuh ngawtah" ngeiawm zetin ka lo ti leh deuh kher a "Barbie" a rawn ti chang fak a.

"I duhchuan lo kal ve rawh" a tih chuan ka lo nui chhuak hak a.

"Khatiang hmun ṭawp deuhah ka kal duh i ring reng reng a mi, i hmeichhe kawm ṭhin te ang kha ka ni ve lo e" ka ti leh sak a, tinge ka awmzia pawh ka hrelo, ka thin a rim ṭeuh ringawt tawh.

"I kal duh bawk siloh chuan..."

"Duhlo reng e..." vin zetin ka lo ti leh, ka ti mah mah chu ka inti ve tho mahse, ka inhrethiam tawh biklo e a!

"Ole, ka thlen hunah ka lo hrilh che anga, ka haw hunah nen, a ṭha em?" awki zang vaha a rawn ti leh chuan a phur hmel riauin ka hre leh tlat pek a.

"I va phur hmel ve Faktei tel dawn vang ani maw?" ka tih leh laia ning hmel taka thawk ala hak ri chu ka hrepha. "Ka hrelo Barbie, ka tan a pawimawhlo"  a rawn ti a, ka hrelo a tih danah a tel ka ring nghet bur.

"I fawp leh dawn em?" deuh teh thlawt a, ka kâ aṭangin a rawn chhuak phawng mai mahse, pawipawh ka ti lo, nuam deuha zuk awm a tum aiah  rilru buai deuhin awm ve hrim hrim rawh se.

"Ziah a che....engthil nge maw i ngaihtuah hi le...bialnu nghet nei ka nih hi" a rawn ti leh hluai a, ka lo ner sawk thung, bialnu nghet nei te a in tia kar khat pawh kan la inkawp tling tawp silo a, ka va eilo reuh tak.

"Anih kal rawh" titau aw lek lek chuan ka ti ta hrama, a bialnu nghet anga min ngai erawh nuam ka ti ru veng veng tho.

"Kan ṭha chiah maw?" ngaihṭha zanlo hian a lo ti a "ka hre nang, zuk lerh lo la kan ṭha a ni mai" ka chhan dan vang chuan thawk a la zui ham ham a. "Anih ka awmchhungin ka lo text char char ang che ṭha em?" a rawn ti leh a.

Khai a, chutianga a tih te chuan ṭhiante mitmei ven a na duh awm e, ka kawm mek ten phone ringawt an ngaihtuah chuan keipawh ka thinrim ṭun ṭhin "Min lo text kher a ngailo.... Lehkha chhiar tur ka ngah lutuk" ka ti leh ang lawi a, a ngawi vung vung a, ka inthiamlo hnuhnawh a ni.

"Anih chuan Nsa lam kawi ka ngai a, ka kal dawn a nia" inthlahrun hmelzetin a rawn ti a, "Ole..fimkhur la i accident a nge" nui ru tet tet chungin ka ti a, kan inbiak zawh chuan Lehkhabu ka chhiar a, ani erawh a reh zui ta vang vang a.

"I thleng tawh em?" tih ka thawn a, min chhanglo, a online lo a last seen pawh zantir a mi daih a ni, ka thlen hunah ka lo hrilh ang che te kha a ti ve sia daw heh ziap zuap lutuk.

Khumah ṭhuin ka insawh tau nghawng nghawng a, ka ngei leh ṭeuh tawh. Lehkha chhiar te chu khawilam ka chhiarlai ngei ngei pawh enge tih ka hre lo, ka inngaihtuah ngur ngura ka sa pup pup thei mai. Faktei te Nancy te ho nen bak an awmlo tawp ang.

A khat tawkin ka phone chu ka en leh ṭhina, ka thinrim telh telh. Insehruh ṭeuh chungin ka call a, a la tlang theilo zui Fight mode ah a dah ani chiang mai, a van chak dawnlo tak.

Hetianga ngaihtuah leh tluk tluk tur te chu min sawm laikhan lo zui ve mai tur a nia, mawl ka inti hle. Mahse, Hotel Redstone berkher chu, kal nih pawh a zahthlak e a, hmel hriat te lo hmu palh ta ila, tih chi teuhlo lutuk.

Dar 11 ah pawh a la biak tlang theihloh cheu mai! Text leh call  a tlang thei bawk silo, hetiang chuan lehkha pawh ka zir thei chuang hleinem mawle, ka phone chu ka switch off sauh sauh a, ka mu nghal hmak a.

Zingah hma deuhah ka tho a, chaw eiloin Chhangthawp Butter tah ka ei a, nidang zawng aia hma ah class ka thleng bawk a, Class a ka ṭhiannu sam tawi te kha reilo teah a lo thleng ve a "Ka call tlang theilo che a, lo sawm phei che ka tum nen" a tih chuan ka phone ka la switch off a ni tih ka hre ve chiah a. Ka On nghal sawt sawt a, Notification a rawn thleng nghal zut zut bawk.

"Bawihte hmelṭha"
"Barbie tereuhte"
"Ka hmangaih"
"Ka lungrun" te a rawn ti, Awii..! A va tenawm reuh tak, rang lutukin ka phone chu ka Bag ah ka khung leh vat a.

Kan ban chuan Chaw chhun ei ahun chiah a, ṭhiannu Janet-in kan chawlhna ṭhinah chawlh a rawt a, a ṭhian dangten a lo auh vangin kan nghak leh rih a. Bathlarah  dinga kawngpui lam kan thlir lai chuan kan awmna Building kawtah chak lutukin Bike a rawn tlan lut a, kawta hmeichhe awm ho pawh an lo rak ṭhat hlawm a.

"I hman em?" rawn hawi chho a a rawn tih chuan hrelo derin kawngpui lam ka hawisan a. Tunge a rawn auh tih hriat tuma Janeti hawi kual ruai chu ka mitsir pah zauh bawk a.

"Samkir hmelṭha deuh tarmit bun kha" ring lenglawngin a rawn ti a, hmuhloh der tum eng ang mahila awmzia a awmlo ka sam ka pawhloh ni berkher lehnghal, "Barbie" a rawn ti leh ta kher a, mi zingah em em te chuan ti zahthlak lutuk, mipa mawl deuh deuh hlir hi tinge maw ka ngaihzawn le!

"Inpa mi?" Janet-in a rawn ti a, ka lu ka thing mat mat a. "Anih tunge?" phawk fê mai hian a ti a  Lalbera lam ka hawithlak chuan a Helmet a lo phelh mek a "Tumah a nilo" ka ti leh ringawt a.

"Awi...ani te chu Ezra anih khu" a lo tih chuan makti zetin a en a "Engtin nge i hriat a?" ka ti vat a.

"A rawn chho" tih leh ka bana min sih a rual a, kailawn lam ka hawi chuan a lo thleng fel der tawh, a hmai lah chu hmun thum velah a la duk raih zui a, ka hmuh rualin ka lo ner khum sak a.

"Tinge i phone i off" ka bul a rawn thlen rualin a tih chuan "Class lak laiin ka on ngai hleinem" ka lo ti ve khauh a, a ner nang a engmah phei chu a sawi zuilo.

"Thil eiphawt in duh em?" Janeti melh zauh pah chuan a ti a, ka chhan hmain "Min hrelo ami?" janetin a lo ti hliai a, mak tih hmelzetin Janeti chu kan en ta ve ve a.

"Keimah Janetî... Emma-i ṭhiannu kha" a lo ti leh a, Lalbera hmel chu a buainak mai, tun hmain an lo inhre tawh anih ka ring ringawt.

"Emma-i ṭhiannu a?" a mitmeiin min rawn zawt a, ka hre bik lo nasa. A theihnghilh tak te zingah a tel a ni mahna.

"Mahni bialnu hlui te pawh han theihnghilh chuh, ngaihzawng i ngah lutuk a i buai anih kha" janetin a tih chuan phawk zetin kan in en leh a.

"Min hrethiam teh, ka pum a nuamlo" tih leh min pawh a rual a, "Hei...Lunch chu kan ei ho dawn maw tia" Janet-in a rawn tih leh lai chuan Step ah min kai thla dawr dawr a.

"Tu nge Emma-i chu?"

"Ka hre nang"

"I hre awm e, i hrelo der" rum zeta melh chungin ka lo ti a, a lo nuisuk duh chauh.

"I va han lerh kawh tak" tih pahin min vawnna chu ka lo thing thla sawk a. "In hauh ka peihlo, tute mah hi ka hrelo, nizanah pawh....." a sawi lai mekin ka lo pawt chat a "Aww...nizanah pawh bialnu dang i tawng a ni maw?" ka lo ti a, a ner nasa mai.

"Ka hmai hi en la, hmelma ka nei tih pawh ka hriat miahloh ten min sawisa a lawm mawle" A helmet khum pahin a ti nghut a.  "Mi nen in insual amaw?" ka lo ti vin leh nghek a.

"Ka sual hman reng renglo min vawthlu nghal tawp a lawm.. chuang rawh le" tih leh a Bike rawn tih awn a rual a, lungawilo zetin a hnungah chuan ka lawn a, a tlanchhuak zui chu  "Khawnge kan kal dawn?" ngaihna hrelo zetin ka ti leh a "Min sawisa tute kha kan zuk hmu dawn mawle?" a lo ti bak hluk a.

Khawpawn lampanin chak takin kan tlan a, lungawilo zetin a hnungah chuan ka ṭhu tum bur reng a. "Ti nge i phone i off nizan aṭangin biak che ka tum nasa lutuk" a rawn tih chuan chhanglo in ka ner khum a.

"Min ti lawmlo aw" a rawn ti leh a, teh hlauh chuan keipawh ka lawm biklo nizanah biak ka tum nasa a biak tlang theihloh a ka lawmloh thu ka sawi ka sawi biklo.

"Ka sawi i hria em?" a rawn tih leh rualin a darah ka lo beng zawt a, "Ka hria, keipawn nizanah biak che ka tuma i biak theih bikloh, tikhan kan inrul tawk chiah" ka lo ti ve nghat a. "Nizanah buaina ka tawk a, ngaihṭhat lohna te nei miahloin i induh zui hmak mai a maw?" nui hawk chungin a rawn ti a, "Thi chhawng ten lo awm ta ila i biak theihloh der mai dawn tihna a nia" a rawn ti leh kher chu ka sa ve phat mai.

"Ka thlen hunah ka bia ang che i tia min be bik a mi?" ka lo tih chuan side glass a ṭangin min rawn melh a ka lo hawisawn hmak thung a.

"Nizan chung chang chauh ka sawilo, tukinah pawh.." a tih leh chuan ka lo thaw hak a.

"Class ah phone ka off ṭhin tih ka sawi tawh kha" kan sawi zo vek tawh emaw tih a a rawn thar thawh leh zel chu ka ngei lek lek a, amah hlat zawngin ka tawlh hnung zui zat bawk a.

"Kan la sawi zo reng renglo, i ṭhiante awmlai anih vangin ka sawilo mai mai anih kha, thinrim tur zawk ka nihlaiin tinge min lo thinrim khalh vek" a Bike a tidinga lehhawi meuhin min rawn en, hepa hian buaina a duh tak tak emawni le!

"Tunge thiamlo hmasa.." amah pawh en duhloa thlanglam hawi hmak pah chuan ka ti a, "Keimah.." a lo ti nghut a.

"Ni reng e..." rum zeta melh pahin ka ti leh a.

"Biak theihloha ka awm vang maiin i ti ve kher a, hetiang te chuan engtin nge kan inkawp rei theih ang, ka harsatna te pawh hriat i tum tur a ni lo mi?" min en vung vung chungin a ti a, huhh...biak theih pawh a awmlo chu engtin nge maw a harsatna te ka zawh theih ang ni.

"I sawi zo tawh em..?" chang faka ka tih chuan a ner zui nang a. "Kan inremsiam angai a ni" tih sup pahin a Bike a hung ṭha sauh sauh a, phawk zeta ka lo en lai chuan eng khaw sawi set set loin min hlangthla nghal nawlh a.

Bike nghenga ka ding chu ka sir tawn tawnah innemkhalh run chungin a lo kun hniam a, min hauh hrep tum awm hrima durin min en bawk.

"Enge..?" a awma lo nam bet ṭang chung chuan ka ti a, "Puitling kan nih hi tleirawl inngaizawng ang mai maia tihtauh hun pawh a ni tawhlo" thutak zetin a ti ta a, a sawi a mawilo a ni.

"Chu min puh deuh tawp mai elaw?" ka lo tih chuan "Ka puh hauhlo che, ho te te ah thinrim lo turin ka duh mai che a ni, chutiang anihloh chuan ka nunah hian lungawina i hmu lo ang" a ti leh sap a.

"Ka ngaihtuah em em lai chein i biak theihloh a ka thinrim a ni ve mai alawm" a hma ang chuan ka vin ta lo, inthiamlo lek lekin min la awmtir zawk zui lehnghal a, sawizui tawhloin min thinrim tir ve mai mai sela mawle.

"Ka hria, sawifiah tumin ka lo call che a i phone i lo off veleh a khatianga kan inrunluih nghalzel anih chuan kan inkar a chhiat phah zawk ang" thutak zeta a rawn tih leh chuan chhan ngaihna pawh ka hre tawhlo.

"A ṭha lawm..anih chuan biak theihloha i awm leh hunah chuan biaktheihin ka lo awm char char tawh dawn..." ka sawizawh hmain ka hmui a rawn khar hmiaha, ka ṭawng tawp chiang hle.

Zu rim a nam hiam lehnghal, hrep chuan zu rim nam chungte a min han fawh ngam zawk chu le "Zu ṭhingrim i nam" tih leh a awma nam ka rual a.

"A ṭhing a nilo, a thar a lawm ti ila i lungawi phah zawk a ngem?" nuisuk chunga a hmui tuai zauh pah chuan a ti a, min chhandan chuan ka thin a tirim zual sauh.

"Inṭhen leh daih ang kan inmil lo anih hi" thinrim thaw ri sak sak pah a ka tih chuan a mengrum lehnghal ul a. "Hmeichhia..." chang zeta a lo tih chuan "I zu inpui theih te kha nei daih rawh" ka lo ti leh nghek a. Amah nena inlaichinna siam tura ka rilru ka siam buai nasat tehlul nen ka duhloh zawng hlirin a la awm zat zat mai.

A phone a phawrh a min chhang zui tawhlo a a ngawi tlat chu ka ngei tawk a lo tling leh hman "Malsawmhlu.." vin zetin ka tih leh chuan nin hmel lutukin min melh zui râwm a.

"Inṭhen tih vel kha chu ka sawipui peihlo che, khatiang thu kha chu midang nen insawi dun dawnnia" tih paha kawngthlang lampana a kal zui daih chu enin thawk ka la hawk a. "Ṭawngthei ziah zuah lutuk mai" ka ti zui hlak a, phone hmang chunga a rawn hawi vung vung chu ka lo en reng bawk a.

"Nsa a lo thleng ṭep, nghak law law ang" ka lampana lo phei pahin a ti a "Eng chu maw kan tih dawn a?" zawhna mitmenga en chung chuan ka ti a "Nizana min tibuai tu te kha zirtirna chhete kan pe lawk ang" a jacket ipte zen rawk rawk chung chuan a ti liampuat a.

"Min hruai ve kher a ngai em ni?" ka vin leh viau tawh, an ni buaina a telve chu ka chak hlawllo, ka telve natur niin ka hrelo bawk. Mask rawn phawrhin min pe a "Vuah rawh, i hmel an hriat loh nan" ala ti tak deuh deuh a, "Engatan nge min hruai ve kher?" ka lo ti leh phawt a.

"Ka hruai ve zel tawh ang che, insawifiah reng hi ka peihlo i phunchiar tlat" tih leh ka mask ken lai chu pawhthlak a rual a, min vuah sak nghal sawt sawt a.

Reilo teah Car a rawn tlan a, ka dinna bul kawngsirah chuan a rawn ding a, Nsa leh midang pahnih lo chhuak chu ka lo en ran a, Nsa rawn hruai pakhat chu ka la hmuh ngai a nilo, pakhat zawk erawh ka hmuh tawh hnu a ni. Car bulah chuan an ding a, Nsa erawh kan lampanin a lo kal a, a ṭhiante chuan bai vaiin Lalbera chu an rawn nuihsang bawk a.

"Nangmahin i lo kal mai dawn emaw ka tia" kan bul alo thlen rualin Lalberan a lo ti vat a "Puitu kan mamawh takin ka tia, kan ṭhiante tho an nia lawm mahniin kan ṭanglo tih hi Hruaisanga hian hreve teh se" ṭhensak chunga Nsan a tih chuan ngaihna hrelo zetin ka lo en a.

"Tute nge an nih pawh kan hre silo a, an rin tlak ang maw?" Lalberan a lo tih leh chuan Nsa mitmeng chu a buainak mai. "Ehh..Johana leh Ruata an nih saw" a lo ti hluai a.

"Kan ring ngam ringawt dawn ami?" Lalberan a lo ti leh a, "Kan ṭhiante a lawm an nih engah nge kan rinngamloh tehlul ang" Nsan a lo ti leh zat a, Johana a tih te lamhawia Lalbera ngawi vung vung ka hmuh chuan ngaihdan ka lo nei hmanhmawh a.

"Vîtei kha mi?" min nuihsang chunga Nsa'n a tih chuan ka lo bu nghat a. Chutihlai chuan Johana te ṭhiandun pawh chu kan lampanin an lo kal mek a, engthil emaw ni an lo keng bawk.

"Kal hmain hetah hian ti lawk ila" pakhat zawk chuan a ti a "A pawilo khutah chuan hun kan neilo mai thei asin, zana mi tur chu i dah tho ti raw Johan" a sang zawk lamhawia Nsa'n a tih chuan Johana chu a lu a bu vat a.

"Malsawmhlu i duh chi" tih leh Lalbera chu rawn kuah a rual a, "Engthil maw?" hriatthiamloh hmelzeta Lalberan a tih chuan a jacket chhunglama a zu bur ken ruk chu a rawn lek chhuak nghal thuaia, hahthlak hlawm chuan a.

"Khai....zu kan in hmasa anih chuan kan che ṭhatheilo ange" min rawn melh zawk pahin Lalberan a ti a, kawngpui lam hawiin ka inher nghal daih thunga. Kawngthlang lampan chuan an inzui phei hlawm a, ṭhiante zinga lo hauh khûr khûr lah tihchi ni bawk silo, ama duhthlanna ngeia a hnar hram ka beisei.

Zu in paha an ṭhu bial laih chu ka va melh zawka min hnungchhawn zawnga a ṭhut avangin Lalbera hmel chu ka hmu theilo, an ṭawngri chu ka phone khawih pahin ka ngaithla kara, an chêtdan tur vel an rel a ni.

"Malsawmhluan a ko chhuak a nga, keiniin kan lo chang ang" Nsa'n a ti a, midang ho chuan ṭha an tih thu an lo sawi a, "Keimah chauh pawn bitum ka hreh hleinem" Lalberan a lo ti zauh a, hah...ve tak chuan a.

"Ni lo e, Hruaisanga te chu a dawih emai a ṭhiante a lo khawm leh tho ang, nizan ang mai mai chu kan ni tawh tur a nilo" Nsa'n a lo ti leh a.

"Engvanga min rawn tibuai ngawt nge maw a nih le, kan inhre ṭha viau ṭhin sia" Lalberan a tih chuan midang chu an lo chek hlak a "Malsawmhlu in inhmuh apiangin in insual ziah a lawm, tinge engmah hrelo ang maia i awm le?" Ruatan a lo ti a.

"A...ṭhiante u, kan Lalbera hian accident vangin a hriatna a hlauh ṭhen a" Nsa'n a lo ti vat a.

"Bottle a i zun Hruaisanga i intir pawh kha i hre tawhlo maw?" Johanan a tih chuan ka lo meng kang ak a. "Chutiang chuan ka ti maw?" Lalbera aw chuan ka nuih a ti za lek lek a ka thinrim bawk si nen ka nui ri teuh kher mai.

"Ani pawn camp kan neih ṭumin i eiturah sazu ek a lo thlak a, in insual hrep a lawm" Ruatan a lo ti ve leh a. Lalbera chu a ngawi vung vunga "Engmah ka hre tawhlo" alo ti bak hluk a.

"In inhuat chhan tak chu Hruaisanga bialnu ilo CK pui vang ania" Nsa'n a tih chuan rang lutukin ka hawilêt nghal a, min ep zawnga ṭhu Johana chuan min rawn melh zawk a, phunsup chungin a mit a lasawn lehnghal thuai a.

"Khanu kha chu a lerh hrim hrim a lawm, midang  theitu pawh ka hre ṭeuh" zu lem khalh paha Ruatan a tih leh laichuan ka lo inpetruh nasa tawh mai, hmeichhia vanga an buaina lek chu lo niin, hetiang nunhlui ṭawp lutuk neitu hi ka bialpa chu a ni sia maw!

Nsa'n ka lam a rawn hawizuk a, Lalbera lama kun hnaih pahin engemaw a hrilhru sar sar a, Lalbera rawn lehhawi rual chuan lehlam ka hawi nghal vat thunga, ka tawt up up mai, kan inkawp hma daih thil mah nisela ka thinrim hlur tho, ka bialpa anih hmaa a hmeichhe kawp te vanga thinrim tur ka nilo tih chu ka hria mahse, thunun theihloh khawpin chhunglam aṭangin min rawn hnawh tawt awp awp lawi si.

"Ti ru...kal ang chu kan tihbelh leh chuan kan che ṭha theilo ange" Johanan a ti a, "Gabriela kan lo hrilh ve mai mai lo a ni" Ruatan a lo tih chuan "Zoremsanga khâ?" eiloh hmelzetin Lalberan a ti a, "Ani te zawng sawilo maiteh kan tan tha a thawh duhlo tawp ang" a ti zui zata.

Ka lampana an rawn pen hnaih rualin thawk ka lo la sek sek a, "Barbie" a rawn tih chuan ka lo thaw chhuak huai a. Ka bengbula rawn kun hnaiin "No khat chiah ka in, ka ruilo ania" a rawn ti zawisup a, ka thinrimna thunun tumiin ka kut ka hum ngar ngar tawh.

"Tlan hmasa ru" Nsa'n a lo ti a, Bike a aṭhutfel hnuah ka lawn theih nan a rawn ti awn a, rum zeta melh ngar ngar chungin ka ding khawng reng a, mask ka vuah a; ka mitmeng a ṭang erawhin ka lawmlo nasa tih chu a hre ve chêk a niang "Lo chuang phawt teh, nakinah min hau dawn nia" a ti khauh a, Nsa ten kan tlan chhuah hun anlo nghak reng bawk nen thinrim ṭeuh chung chuan ka ṭhu tau bur a, amah pawh chelh duhloin hnunglamah ka invuan ṭung bawk a.

"Barbie ka rui lo ania" min rawn thlek leh paha a tih chuan "Ngawila hmalam kha en mai teh" ka lo ti vin hlar a. Sawi tur tam tak ka neia sawi chhuah ber tur pawh ka hrelo, ka awm ve reng laia zu a in vangin ka thinrim a, an insualna tur hmuna min hruai ve ngawt vang pawhin ka thinrim, an insual chhantur vang chuan ka thinrim lehzual.

Aa....a awmdan zawng zawngah hian lawmna tur ka hmu hlawllo a ni ber mai. Na zet zetin boruak ka hip lut a, ka thaw chhuak leh a, chutianga vawi engemaw zat ka tih hnu chuan ka thin tawt pawh a zia ta deuh a, amah hnaih deuh a tawlh pahin "Insual kher chu angai a mi?" bak hlakin ka ti a, side glass aṭang chuan min rawn thlek nghal thuai a.

"Ngai e...nizanah kawngah minlo changin minlo khawih rawn a, kan thungrul lo anih chuan kan tan a tlawm thlak" a lo ti awlsam hmiah mai a, a phur hmel viau lehnghal.

"Thu in a sawifel theihloh a mi?" ka tih leh chuan "Kut kan tawrh hnuah sawi tur a awm tawhlo" a lo ti leh mauh mai. 

"Min hruai ve kher loh tur a lawm, enge ti ve tura min beisei a" lawmlo fe a ka tih chuan a lo nui ri dawt a. "Barbie, engmah titurin ka beiseilo che, ka bulah awm la ka duh mai a ni, hlau suh i bialpa hian ka venghim dawn che a lawm" uang zetin a ti zui ham ham a.

"Lo chaklo ta ula, in chawh viau dawn a nia aw" ka lo tih chuan  a nuih a za kher mai "Lungngai suh, insual te zawng ka hnehsawh lutuk a lawm keimah chauh pawn ka hreh reng reng hleinem" a lo ti leh nghat a, mawl ti zetin ka lo chek hlak a "Min ring teh aw" nui hawk hawk chungin a rawn ti leh a.

"Ka ringlo che pawh a ni hleinem, in insual chhan tur lah kha.." ka ner nghal nang  a "Kan insual chhan tur chu nizana minlo tihbuai vang chauh a ni, abak chhandang a awm lo" a lo ti be leh khauh a.

"A bialnu i lo..."  ka sawi zawh hmain "Engmah chutiang ka hrelo" a lo ti ram hmuka, a thinrim a nih ringin ka thlek dek dek a, thil ri hrawk ka hriat rualin a hnungah ka bet nghal thlawp bawk.

"Engemaw i tih fo chu le?" tawlh hnun deuh tuma ka insiamrem chu ka bu leh dawrh a, "A ninawm ania" tih leh a hnunga chum ka rual a. "Kha kha bialpa te phurha chuan dan tur anih kha" tih leh chak lutuka tlan a ruala, ramhuai speed an sawi dik tak a ni, ka hawichhuak ngam tawhlo hrim hrim.

Bike aṭanga ka chhuk chiah chu ka lu a hai chhulh thei mai, kan hnungah Nsa car a rawn ding ve nghal a, hmanhmawh fêin an rawn chhuak nghal a, kan hma lawka in dingah chuan "Hotel Redstone" tih a intara, ka lo ral hriat ang aiin a nalha alang pangngai viau bawk.

"Jenny ka call a, a chhungah an awm panga vel a ti" Nsa'n a ti a, "Ka va lut ange" tih paha Lalbera kal mai tum chu a banah ka lo pawt ṭung a.

"Barbie, kan sawi vek tawh khâ..." mitmeng tizim sana min enchungin a ti a, tinge mawni hlauh thawnna riau ka nei, a lu ah te lo vaw ta sela a khawloh phah mai ka hlauthawng, Accident a tawh ṭum khan a lu ah hliam natak a tuar tih ka hria a Doctorin a hriatna a hlauhṭhen chhanah puh dawt lo mahsela keichuan a insawh khawlo anih ka ring bur thung.

"Vîte hetah kan lo nghak dawn nia, a zuk cho chhuak ringawt dawn alawm" Nsa'n a lo ti vat a, inpetruh ṭeuh chunga Lalbera ka en chuan a lo nui ṭhaw a, a lo la nui thei cheu chu ka ngei kher mai!

"Lo awm rawh ka lo chhuak leh vat ang" a tih takah chuan pawh beh tlat chi niin ka hre ta biklo, mipa ina an tum chu hlen chhuak ngei tehse ti rilru chungin ka thlah ta ringawta. Inchhungah chuan a lut a, reilo teah a rawn lang lehnghal maia. Hmanhmawh zeta a rawn kal vang chuan hlauthawng ru takin ka lo en a, kan bul a rawn thlen rualin "An inpeihsa anih chu, spot ngaiah" a rawn ti nghalzat a.

Chutihlai mek chuan Hotel chhunglam aṭangin tlangval paruk an rawn chhuak a, nuisang chungin kan lam chu an rawn hawia, an zamloh hmel nasa mai; pakhat chuan kuttum a rawn lek zauh a Hruaisanga an tih ber chu anih ka lo ring nghal ringawt a.

"Ṭhên rawh ha bal chungin i haw ang" tihpahin Lalbera chu a lo nuihsuk a, kei erawh ka rilru a lo hah tet tet tawh.

Pawr zeta rawn au lawng lawng chungin tlangval ho chu Bike-in an inphur liam a "Zui ve nghal ang u" Johanan a lo ti vat a.

"Ngawi teh u, an ni paruk an nia nangni pali, inhneh meuh ang maw?" ka lo tih chuan an pali chuan an nui sawnga, min ti hamhaih riau lehnghal.

"Panga a lawm kan nih, lung in ilo vawm ve ang chu" Johanan a lo tih chuan ka meng phawk nasa mai. An tih tak tak hmel viau lehnghal "Ti awm anglo e a, min hnek thlu tawp anga sin" ka ti hluai a, min la nuihzat em em lehta nghal a.

"An uang anih kha, khangho kha minep mai an nih kha keimah chauh pawn ka hneh ang tih ka hrilh che kha" tih pahin Lalberan min kuah hrang nghal a, Bike a kan tlan chhuah leh hnu te chuan ka tiril a khur ru nasa tawh mai, keihi ka tihloh tawp tur thil ka ti anih hi, ka hma a ṭhu tukkhum chu rum zetin ka melh nghek a, awmzia erawh a awmlo nasa.

Kawng zau deuh lai kan thleng a, linkroad awmthla zuiah chuan kan penga, a hmun a fal hmel nasa mai bawk si, a che chhe zawkah an ṭang anih teh chuan ka chunga thil thleng thei tur ka ngaihtuah kuala, a sir aṭanga lo thlir mai mai thei niin ka inhre mawlh lo, ka thinphu a rang dup dup a, ka khur ru der der bawk.

"Barbie...i hlau a mi?" a rawn tih chuan chhan pawh ka chhang peihlo.

"Hlau suh engtiangin nge mipa kan insual ṭhin ka hmuhtir ang che" a la rawn ti ham ham a. "Hrep tak che hian Vanlalber, i chaklo anih chuan ka ban nghal ang che" ka lo ti vin hlar a.

"I hmuh laiin ka chaklo ngam dawn hleinem, ka hruai chhan che a lawm" a lo ti awlsam leh et a, ka awmdan chu hria sela chuan a thawveng lo tawp ang le, ka thawk zawng ringawt pawn ka thinchhung a za vek in ka hria.

Field tur emaw ni zawl zau deuh laih thar tih hriat zeta lei ban charh chhungah kan tlan luta, kan piah hla deuhah chuan Bike pali a lo inhung far a, tlangval ho kha an lo ding khawm laiha , an lampana kan tlan lai chuan "Hnaih lutuk chi a ni dawn a mi?" ka lo ti sek sek a.

Kan din rualin kan hnung maiah Nsa car a rawn ding ve nghal a, "Nsa Car-ah lo va awm rawh" tihpahin min hlang thla a "Kan milerhkawhpa chuan Chicks ala rawn hruai hram e law" nui huah huah chungin pakhat chuan a lo ti a "Kal vat rawh" Lalberan a lo ti nghal hluk a.

Hmanhmawh zetin Nsa te ṭhianho lo chhuahna Car lam chu ka pana "Mal leh malin aw niang" hnunglama tih ri vang chuan ka ding leh dat a, an ri huk a chuveleh Nsa, Johana leh Ruata ten min rawn tlanpel nghal thuak a!

Car-a luh nachang pawh ka hrelo, phawk zeta ding khur hlak hlak chung chuan tlangval ho inpheksual chu ka thlir reng ringawt a, an intam hleih vang nge kan ṭhiante lah chuan an hnehlo riauin ka hre lehnghala. Ruata a thal hlawm reng tawh a, Mi pahnihin Johana an chelh beta pakhatin a hnek mawlh mawlh bawk a, a hmai te chu a thi phung tawh, Lalbera leh Nsa lah an bitum ve ve sualin an buaia Johana chu an pui hman der bawk si lo.

Tihngaihna hrelo zetin ka lo inhumruh vak vak ringawt a, ṭhian chu kan ni hauhlo tun dinhmunah erawh lamṭang kan ni 'Thih leh thih' tih paha mahni infuih sauh sauh pahin ka hawikual nghal ruai a. Motor hnungah chuan lungchang ṭhazet kuttum tiat leng lawng ka va hmufuh ta hlauh mai , rang zeta chharin Johana hnek mektu hnungzangah tak chuan ka vawm nghal dawp a,  na a ti kher mai ṭhingṭhi hnawkin a kun zui ngawih ngawih a.

"Zawngi...mipa buaina ah te i rawn inrawlh ve chu le." tihpahin pakhat chuan min rawn pan phei nghal ruak a, Car lampana ka tlan tur chu ka samah min rawn ṭham nawk a, hnehsawh zetin min kuaikun a, ka sama a ṭhamna lah chu a la na em em zui.

"Ka bialnu kha thlah nghal rawh" tih ri ka hriat rualin leiah ka bawk thlawp a, ka sam ṭham tupa pawh a ṭhingṭhi rawp mai, ka inbengkang laichuan Lalberan  a hrawkah hnunglam aṭangin a lo rek bet a,  ka sam thur huikiang pahin thawk ka la zui hlawp hlawp a.

A hrawka Lalberan a rek chung chuan a ipte aṭangin Chemte a phawrh a, rang lutukin a banah ka lo chhir nghek a, a chemte ken chu a per sawn nghal nawlh a "Reh hlum i tum a mi, engtin emaw ti ta che" tih leh chemte awmna lama tlan ka ruala, chemte chhara ka let leh lai chuan chupa chu a lo zal der tawh.

"A thi a mi a?" phawk zetin ka va tih chuan "Thi lo" a lo ti ram hmuk a. Ka chem te ken lai rawn ban vut pah chuan "Car ah lut rawh" a ti vin leh ṭhat a, min vin ringawt chu ka hrethiam lo kher mai, tunah pawh khan puilo ila chuan chemte a vih a tuar ngei ang.

Ka chemte ken lai chu hnunglamah ka thukru vat a, phawk zeta min en lai chuan "Malsawmhlu" Nsa'n a rawn ti vin leh ṭhawt a. Talhtum lianpui hi a rawn thawi fua a, a lo bum hman hram, bum hmanlo sela chuan a bek a ri chawrh ngei ang "Chemte hi i duh em?" ka lo ti vak a, "Car ah lut rawh" vin zeta tih  pahin talhtuma rawn vuak tum tupa chu a hmachhawn zui a, Car a ṭhu chungin ka lo en mai mai thei bik teuh lo mai, lung ka zawng kual a, ka hmuh ang ang la khawmin Johana sualpui pa chu ka lo vawm a, "I ti ṭha lutuk" Johanan a lo ti ve bawk.

Thei leh theilo a Ruata lo ding chu ka lo pui vat a, a beng aṭangin thi a rawn luang chhuak ngiai ngiai a, a hawi â deuh ruai mai. Car lampanin ka kuah phei a, a la rit em em zui a.

"Ngawi teh kha thil kha chu i hmang tak tak dawn lo tiraw?" Lalbera ṭawng ri ka hriat vang chuan ka hawi chhuak zawk a. A sualpuipa nen chuan khup dawm meuha dingkunin thawk an la duh halh hlalh a, an hah duh hle tawh tih a hriat theih, pakhat zawk chuan nuisanga enchungin  "Hmang dawn" a lo ti chher chher maia, a chemte ken sei zet chu a rawn lek chhuak zat bawk a.

A fawngah vuanin leiah chuan a vit bura thawk ala zui leh kawk a, a hah ve tho a a che nghal mai thei biklo, Lalbera chu kal sawn mai sela ka tih rilruk laiin chetsawn pawh a tum bik chuanglo a, hmaichhanah hnai setsawtah an inbihrun reng ringawt a.

"Min vithlum thei mai dawn asin, nunna hlut zia te hi i hre ve lo a mi" Lalberan a tih chuan ka lo thaw hawk a, tihtak zeta insual pawh an ang lo zawk.

"I nunna te chu a hlu ve hleinem" pakhat chuan a ti a, ṭhen sawk sawk chungin an la inmelh run a.

"Lalhruaisang min huat chhan chu engpawh nisela, ka laka i rilru put ang zelin ka rul let ang che" Lalbera chuan a ti khur khur a "I bul ṭan zawk a ni" pakhat chuan a lo ti ve thung a.

"Ka ṭan lai pawh ka hrelo, engtin nge ka ṭan" Lalberan a lo ti deuh haw mai. "Nangpa hi i hriatna i hloh an tih kha tak tak a mi a?" Hruaisanga chuan phawk zeta en chungin a lo ti a "A vai chuan nibiklo e, nangpawh ka la hriat che hi" Lalberan a ti leh nghat a, "Anih chuan i hriatna chu i hloh tho a ni maw?" nersak chungin pakhat chuan a ti a, ṭhiandun ti ti an ang mah tawh zawkin ka hria.

"Tlem te"

"Kan inhuat chhan i hria em?" Hruaisanga chuan a ti a, "I bialnu ka lo mutpui an tia" Lalberan a tih chuan Hruaisanga chu leiah a ṭhu thla hnak a, a chemte ken laichuan Lalbera a tin vah bawk a.

"I che tenawm a, ka huat chhan che erawh kha mihur vang kha anilo, ka huat chhan che chu min thlauhthlak vang a ni, ka ngei zawngin i khawsa a ka hua che a ni mai" thawk la hawk chunga Hruaisangan a tih leh chuan Lalbera chu ahmaah a ṭhu thla ve nghalzat a.

Engmah sawiloin an in en ran a, chutihlaiin Johana leh Nsa te insualin an lo la buai hle thung, "Lalber" ka koh chuan a rawn hawi vat a, ka mitmei hmanga ka hrilh chuan Hruaisanga pawh hawichhuakin an ṭhiante ve ve chu an ko a, an insualna lamah an pilh phunga a vung hlawm ber bur bawk.

An ṭhu khawm laih chu Car aṭangin Ruata nen kan lo thlir a, an thilsawi pawh ka hre phalo, hriat erawh ka chak nasa ka chhuak leh vaih anih chuan Lalberan min vin leh hrep ngei ang. Ruata beng thi chu puanin ka hruksak a,  "A thi tam angreng si a damdawiinah tlang nghal ru aw" ka ti a, a na viau a niang a ṭhensak sak reng a.

"Lo chhuak rawh le" Lalberan a rawn tih chuan rang lutukin ka chhuak a, Hruaisanga te ṭhianho pawh an lo inphur chhuak ve mek a, Nsa leh johana hmel chu ka en a ka nui chhuak lo chauh a ni, Lalbera erawh hmun hnih velah a duk belh a a hmui sir tlem a pilh tihloh chu a hmuhtlak viau thung.

"Ka rinaiin i huai daih, lunga i rawn vawm tak tak ngam kha ka ringlo a sin" hmel bui chur a Johanan a tih chuan "Duhthlan tur dang min siam silo alawm" ka lo ti a, a nui tur chu a "Aiah" ṭhawt a, khabe dawm vung vung chungin kutzungpui min hmuh a, chuveleh Lalberan min rawn pawt hrang nghalthuai a.

A Bike dahna min panpui hlawk hlawk laichuan "I insawi cham tehreng nen sawi ang hu chu ava nilo ve" ka lo ti zauh a, rum zeta min enchungin "Ka hruai leh tawh ngailo ang che" a lo ti hluk a.

"Keimah chauhin ka hneh thei te iti vel a" ka tih leh chuan a Bike a a lawn tur chu a rawn lehhawi a "Hriamhrei tello chuan thei tehreng mai" hawi sang vahin a la ti zui hram a.

"Engtin nge in in biakfel a?" a hnunga ṭhut paha ka tih chuan Bike a ti nung vut vut a, "Lalber" ka tih leh chuan ka lama rawn thlek pahin "Ka hriat chhuah leh theih hun atan kan khek rih" a lo ti bung nghut a, hahthlak hlawm mange.

Nsa te an tlan hmasa a, an hnungah kan zui a kawngtluanin an insual laia ka lo che ve chu a lawmloh thu a sawi a, a thu awiha Car-a ka lo ṭhulo chu a lawmlo viau mai. Ka hnial peihlo a thleng vek tawh a, a ngaih ngaihin ngai mai mai rawh se.

Inrinniah ka pa zin a lo haw a, khawi aṭangin nge ni Remtluanga nen kan inṭhen thu a lo hria a, chawei laiin min zawt hlawla, kan inkar thil thleng te chu pehhel deuh takin ka hrilh a, a ṭhiante zinga min tih zah lai chu uar deuh takin ka sawi bawk. A ngawih vung vung hnuah "A va che ho ve mawle" a ti nghut a, a bak engmah a sawi zuilo.

Lehkha ka zir nasa a Lalbera nen kan inbe deuh reng bawk, khami hnu kha chuan pawn lamah a chhuak zuilo a, a u Gym a a kal loh chuan inah a tawm deuh chawt ṭhin a, ṭha te te a awm chuan kan inkar pawh a ṭha a, inhnial chiam pawh kan nei zui lo bawk.

Sunday zanah a Cousin Ahruaii te ina lenchhuah puiah min sawm a, "Johana kha Ahruaii pasal a lo ni renga" tiin mak ti deuhin min hrilha, panngai taka lenchhuah puia min sawm vawikhatna anih vangin ka lo phur hle a ni.

Tlai rawngbawl laiin ka nu hnenah ka sawi zauh a "I pa dil rawh" a lo ti mauh mai a, ka pa dil kher kher chu ka phur fahranlo. "Nangman hre mai la, khawiah nge a tih hunah i lo sawi mai anga" ka tih pawhin ka nu chuan dil turin min ti tlat a.

Huphurh ru zet chungin chaw eilai chuan ka sawi a, ka bialpa tiloin ka ṭhianpa tiin ka sawibawk a, Nau-an minlo melh run run a ka zam chhe em em lehnghal.

"Inkhawm phawt la, inkhawm banah inkal dawn nia, rei deuh chhuah erawh a theihloh ang" ka pa in a lo tih chuan dawhkan hnuiah Naua mal ka va sik zawk zawk a, min lo melh rang nasa mai.

Lalbera ka hrilh a "I inkhawm chhungin Nsa te inah ka lo awm ang, i hman hunah minlo hrilh dawn nia" a lo ti a, inkhawm turin phur zetin ka insiam zui a.

Inkhawm ban veleh ah, hmanhmawh deuhin inah ka haw a, ka insiam zui nghal mawlh mawlh a, Inhnuaia ka chhuk thlak rualin ka nu leh ka pa an lo lut ve chiah a, "CTP ṭawngṭaiho na ah i tel ve lo a ni maw?" ka pa in a tih chuan ṭawngṭaiho na neih tur a ni tih ka hre ve leh chiah a ni.

"Thingpui han lum phawt teh" a tih vang chuan hmanhmawh ru tak chungin ka luma, Lalbera hnenah ka inpeih tawh thu text- in ka hrilh bawk a. A lo kal nghal tur thu a rawn sawi a, amah nghah pahin sitting room ah TV ka en a, "Khawiah maw inkal dawn?" ka pa in a lo tih chuan "Kan ṭhiante inah naute enturin kan kallawk ang, chhun lam ka hman ngai silo a, sunday zan bak chu lehkhazir angai bawk sia" ka lo ti deuh duah a, ngawi vung vung chungin a lehkhabu chhiarlai a bih a, thingpui a in pah bawk a.

Ka phone a rawn ri a "Ka lo thleng in kawtah ka ding tawh, lo chhuk la" a rawn ti var a.

"A lo thleng tawh a, ka kal dawn a nia aw" tih leh kal mai tuma thawh ka rual chu "Lo chho sela, kan lo hmu ve phawt ang" ka pain a lo tih vang chuan ka ding leh dat a.

"Kan hmanhmawh tawh a sin" ka ti niah niah a, "A hmel te pawh lo inlan ve phawt sela" ka pain a tih tak tlat vang chuan awmnuamlo tak chungin ka Call a "Lo chho phawt rawh" ka zuk ti tawng a.

"Ok.." zawi sup a tih pahin call a ti tawp a, min hnial buai bik miahlo.

Reilo teah a rawn lang nghalthuaia, nalh leh changkang taka a rawn inchei vang chuan ka awm a tinuam huai mai, a sam pawh over takin a ti kawikual lo hlauh.

"Lo ṭhu rawh" ka nuin a lo ti thuai a, "Khawiah maw in lenchhuah dawn a?" a hre reng tho nain ka pa chuan a lo zawt nawn leh a "Ka ṭhianpa te inah a nia" zangkhai zetin a lo ti var a.

"In inkawp ve deuh em ni?" ka pa zawhna avang chuan ka ip chawih mai, in zawh phawng phawng chi pawh a nilo, ka pa mizia tak hi chu! A mitmeng fin hmelzet chuan Lalbera chu a en kar a, hre ngailo tan phei chuan nelawmloh tak tur a ni.

"Kan inzui ve ṭan chauh a ni" Lalberan nuisuk chungin a lo ti a, ka pa pawh za lo zetin a ṭhen ve sak a.

"Dar 10 hmain lo haw pui la tiraw" thutak zetin ka pa chuan a lo ti leh a, a va han ṭul kherlo ṭhin tak, dar 10 hmaa haw te chu kan tum sa reng a nia, naupang chhe treat lutuka min treat chu ka lawm tehchiamlo, ka nu bulah ka vui ngei ang mawle.

"Dar 10 hma chuan kan lo haw hman ang" Lalberan a lo ti leh vat a, hmel hlim sanga ka pa zawhna a chhang chu ka lo chhuang ru hle.

"Anih chuan intlai lutuk ange, va kal tawh ru" a ṭhutna aṭanga thawh tharh pahin ka pa chuan a ti a, kawngkhar thleng min zui dawn tih ka hresa, in leng kan neiha a tihṭhin dan reng a ni, "Kal ila" Lalbera enpah chuan ka ti a min lo zui nghalthuai a.

Kal pahin thingpui no chu choka ah ka dah phei a, ka let leh laichuan kawngkhar bulah Lalbera leh ka pa chu an lo indinchilh mek a "Zu rim i nam elaw?" ka pa in a tih chuan ka thinphu a rang nghal kher mai, ip ru ṭeuh chungin ka pan phei a, Lalbera pawh sawi tur hrelo zetin a nuisuk ringawt a.

"Kal ila haw hma kan ngaih kha" tih leh nam ka rual a, ka pa chuan min rawn zuia "Bike te kha khalh fimkhur tur aw" Lalbera lamhawia a tih chuan ka lo thaw huai a, Lalbera chu a bu nghata khawngka ah a chhuak zui nghal bawk a.

A chhuak chiah a, kei ka la chhuak ve hman lo ka pa chu ka hma ah lo dingin "Nidangah zu i nam loh hunah inla leng zawk dawnnia" tih leh kawngkhar chu khar a rual ta mai a, Lalbera hawihai zet chu kawngkhar a khar rual chuan ka va hmu hman ṭawk a ni.

End of chapter 6