SAWININ LOH MK (CH - 11)

SAWININ LOH MK - By Ahmangaihi violette khiangte

CHAPTER - 11

Ka beisei loh lam daih min zawh avang chuan ka hamhaih hle a ni. "Aih!" tih zawngin ka chhang a, a zawhna erawh ka bengah a ri nawn tluk tluk thung.

"Nizanah Zoramliana palai te an kala, keipawh ka hnathawk haw kan nuin min lo hrilha ka hre ve chiah a lawm" ka ṭhianpa in a tihlai chuan ka ngawng deuh chhulhin ania ka hriat ni.

"An inkawp tak tak ka ring lo a" ka aw chu a zawi hle a, ka rilru a na deuh tlat tih chu ka ṭhianpa chuan a hrethiam nghal ngei ang. "Nia, keipawh ka lo ring lemlo a, an lo inkawp anih pawhin an inzui ṭanna chu a la reilo khawp ang" a lo ti leh mai a, Mki chu hlauhthawnna ka neihpui ringawt lehnghal a, thikna rilru chu sawiloh a lum a ni, pasal a thlang fuhlo anga a vanduai leh ang tih ka hlauh pui bawk.

"Han inzui rei deuh phawt sela ṭha tur" ka ti leh ngawt a, engthil emaw hian min hnawh tawt up up a, sawi tur ka haihchham riau mai bawk. 

"Pawi ka tihpui hle mai che" ka dara ben thawk pahin ka ṭhianpa chuan a ti leh a, "Ehh...Engvang ngawtin maw?" nui hawk chunga ka tih chuan "I pathlawi ṭep tawh sia, ani alo la nula anih chuan insawirem leh theih dan a awm te ka lo beisei ve leh hman deuh a" nui put put chungin a ti a.

"Chutiang ka beisei hleinem, Mki chuan nunthar leh mithar ṭha zawk a phu a lawm, kei ve tehthlawt aia ṭha zawk tawngin chhungkaw hlim tak din sela a tan a ṭha ber zawk" ka lo ti ve thunga, chu chu ka rilru tak tak pawh a ni. Mal leh khawhar takin a lo awm tawh ṭhin a, a nuna hlimna thleng tur chu lawmpui tur zawk pawh ka nia lawm.

Zanah ṭhalai inkhawm na ah chuan Mki inleng neih chung chang chu an sawi neuh neuh hlawm a, nula ho titi ser ser ri chu a ring ṭha duh viau mai. "Delhi ah khan an inzui hrep hman tawh a lawm" a ṭhenin a ti a, "Zorama leh Mki û Hruaia hi ṭhian inkawm ngeih tak an ni hrim hrim a, a U in a tihpui te chuan Mkin a hnial ngam teuhlo mai" a ṭhenin an tih laiin "Mki pawn a duh ve reng a lawm, an inphur chhuak pawh ka hmu fo" ṭhenkhatin an lo ti ve thung a.

Duhlo teh mahila a ngaihtuah zuiloh theihloh, mitthla ah Mki hmel a lo langa, hlim taka a nui tur te, inneih kawrfual var mawi em em mai a ha tur te, ka ngaihtuah nasat poh leh ka thawk a hah ṭûp reng ringawt mai a ni, kei hi ka awmdan hi a dik dawn tlat lo.

Zo-a bulah pawh ka sawi a, "Midang tawnga hlimtaka a awm ka duhsak" ka ti a nih kha, anih si chuan tinge ka hlimpui hleih theih hauh siloh le, enge maw hian min mawlh tlat a, ka ṭhut ngai pawn ka ṭhu hle hle thei meuhlo.

Banah chuan Biakin Cooler bulah Mki te ṭhianho nen chuan kan i hmu ta ngei a Zorama erawh ka hmu tel ve lo thung, midang an awm ve nuk avangin melh lemlo chuan Coolera tui chu ka dawh a "Mapui, kan van hmu khat che ve" pakhatin a lo ti tak si ah chuan an lam chu ka hawi a, kan mit a intawng chiang kher mai.

Min lo be tu chu Tetei a ni

 "Chawlh ka la zuai a lawm" nui chunga ka lo tih lai chuan Mki chu a lo nui ve sak a, chutah ka lam lo hawi lehin "I dam vak nange, i van thlan nasa ve a?" tiin minlo zawt khauh a. "Khua a lum em hi" awlsam zeta ka lo tih chuan an awih loh hmel viau hlawm a, "Englo...." ka ti zeta ka ngawi leh ta zawk a, chîk zeta Mkin min en reng avang chuan kal mai tumin ka inhera chuti anih loh chuan a ṭhiante awmlai khan ka sawi tum loh pui ka sawi dawn tlat, tunah mai pawh khan a chanchin ka lo hriat tawh thu sawia duhsakna hlan ka tum uk hman a ni.

Biakin Gate ka pelh dawn chuan ka hnung lam aṭangin min lo au a "Min lo nghak teh" tiin Mki ngei mai chu ka lampanin a lo pen phei hlak hlak a, "I va hman hmawh ve, thil hrilh duh che ka nei a sin" ka bul a lo thlen rualin a ti a, a sawitur chu ka hresa in ka ring.

"Sawila" ka lo tih chuan "Tirawh haw pahin kan sawi dawnnia" a lo ti vat a, kan piah deuh a Zo-an min lo zui a tum pawh a tawi khawmuang leh rih tih ka va hmu ve nghal a.

Han sawi ṭan mai na tur ka hrelo kher mai, Gate pawnah chuan kan inzui chhuak dun ta hnak hnak a "Mapui" a tih leh rualin "Umm" ka lo ti leh vat a, a thil sawi tur chu hriat ka chak lo kher a sin.

"I hre tawh tiraw?" a zawhna chu changin ka lu ka bu nghat a. A ngawih leh tak daih vang chuan keimah zawk ka ṭawng a hun tih ka hria. 

"A hun te inruat fel tawh em?" ka ti ve ta nge nge, "La ruat lo e, kar tawp ah an lo kal leh dawn chauh a" zawi sapin a lo ti a. "Ka lawmpui che  ania" ka lo ti hul hak a, "Lawm hmel i pu silo a" a lo tih chuan ka pen lai tawp chawtin a hmel chu ka en a, "Lawm e, i hlim na a piang chu ka lawmpui zel ang che" tiin ka chhang a.

"Nia, min lawmpui dawn tih chu ka hria alawm, anih chuan ka lo pawm ve mai dawn em ni?" tiin min zawt leh khauh a, a nui lo a a hmel a thutak hle bawk. Engvanga chutianga min zawt nge a nih erawh ka hrethiamlo.

"Zorama chu pasal ṭha tak anih ka ring" ka lo tih leh chuan "Engvangin?" nui sak chungin a ti a. "I duhthusam mipa ang kha ania, kohhran mi, hna ṭha tak nei leh....a.. zahawm tak" tiin ka riat nawi deuh niai a.

"Nia....anih i pawm thei maw?" tiin min zawt nawn leh a. He thilah hian keiin sawi ve theih ka nei reng reng em mawni le?

"I duh dan a piang chu ka pawm pui thlap che" a zawhna chhanna atana a duh tak anih beisei chunga ka tih chuan thawk la hak chungin min en ran a, "Ka rilru hi ala buai deuh a" zuai raih a tih chuan chhân dan tur a vang kher mai.

"Tinge, i duh vak lo ami?" ka tih leh chuan nui chungin a lu a thing a "Ka hrelo" tih zawngin min chhang a. A awmdan chuan ka rilru a tibuai deuh tlat.

"Mk...i chhungten an nawr lui che em?" ka ti nghal thuai a, a ṭawng danah pasal neih chu a chak vaklo niin ka hria. "Nawr luilo e, ka chhungte chuan ka thu an ngaichang khawp mai" a ti leh mai bawk si a, ngaihdan ka nei thiam ta hauhlo.

"Ih maw...tiang hian ti rawh, nangmah chiah kha inngaihtuah rawh, midang chu ngaihtuah duh lo la, i tana ṭha ber tura i rin dan zelin awm rawh, keichuan ka thlawp zel ang che, hlim i phu lutuk ania" a mitah enrei duhloin ka pen zui leh thuai a, kan ngawidun ta vang vang mai, ka thilsawi chu min chhang tawhlo a, a ngaihtuah zui ve anih ka ring.

Inhnaih taka kal kan nih vangin kan kut chu a intawk thawi leh thuak ṭhin a, engthil emaw hian min ṭham a ni. Min en zeuh zeuh tih pawh ka hria, sawifiah thiam siloh min mawlh tu chuan thunun harsa khawpin chhunglam aṭangin min nawr et et reng mai bawk.

Kawtthler thim chin kan thlen chuan thawk lehkhatah kan kut chu a inhum chawt a ni ber mai, ka phu chiang hle a ani pawh chuti bawk! Ka vuan nge aman min lo vuan hmasa zawk ka hre hauhlo.

A kut nemthep leh dai riai chu ka hmer vawng vawng a, "Enteh, thilṭha engkim i tan ka duhsak che tih i hria em?" a mitmeng mawi taka en vawng vawng chungin a ti a, ani a bu nghat nghat thung.

"Pasal neih chu ka tum, a chhan chu i lakah hian ka inthiamlo ru tlat ṭhin a, ka awmdan hi ka hrethiamlo, hetia ka nulat reng chuan miten in nupa inṭhen hun nghak angin min sawi zel a, tunah pawh i nupui nen in inkar aṭhalo a, a chhanah min puh a, heti ngawt zawng hi chu a diklo ani" ṭah insum awka zet hian a ti a.

"Hrep chuan....tunge chutiang chuan lo sawi a?" ka aw chu a chang lam mah a ni. "A sawitu hriat kher chu aṭangkai lo Mapui, pasal ka nei anga heng min sawizui na hi chu a reh mai ang, chuzawng aia ka duh chu maw mi nupui ka nih hunah chuan nangpawn keimah vanga i tawrh reng angai tawh dawnlo a" aw tham ṭiakin a ti leh a. He hmeichhia hi ka hrethiam theilo tinge amah intheihnghilha midang hmakhua hi a ngaih pawimawh hmasak tlat ṭhin mai le?

 "Keimah vang chauha pasal neih i tum anih chuan ti miah suh, i duh reng vang anih chuan ka ṭha lutuk a  mahse...." ka sawi lai mek chuan ka hmui a lo hup chawt a "Ka duh reng vangin a lawm ka neih dawn, engkim ṭhat zawk nan pasal chu ka nei ang" a ti leh a, a bianga mittui luang chuan rilru a tina vawng vawng a ni.

"Min hrilh teh, tunge i chungchang mawilo taka sawi tu chu" ka tih leh chuan a lu a thing a, "Ka tan chuan engmah a nilo, nang leh i chhungkua ngaihtuah zawk rawh" ka kut thlah mai a tum chu ka hum nghet sauh a, "La kal teh suh, i sawidun lawk teh ang" tiin kan piah School Building lamah chuan ka pawt phei a, a ṭang deuh a mahse, ka pawh luih tlat avang chuan a ṭang rei biklo.

Corridor kan thlen hnu chuan "Tunge min hrilh rawh, engtin mah ka ti dawnlo a hming ka hre duh a animai" ka ti nawn leh a, tu pawh chu nise a chaklo khawp ang chu. "A hming mala sawi tur an awmlo, miin an sawi sep sep hian ka beng a lo thleng ve mai a lawm" tiin a ṭang ve tlat thung.

"In ngaihtuahfim rawh aw, chutiang vang ringawta pasal i nei anih chuan i hlim thei tak tak dawn lo ania, i pasal tur kha i duh tak zeta em tih te ngaihtuah zawk la, a kiangah i hlim dawn em tih te pawh" a kut ka chelhna hmer vawng vawng pahin ka kut lehlamin a bianga mittui luang chu ka tuaisak a, a mit a chhing tlat a a hmui duhawm lutuk mawlh mai chu en kan a harsa a ni.

 

Engkim hi hrilh ve vek mai tur em mawni dawn le, kan nupa inkar buaichuar zet te hi hrilh ta ila a rilru ka tina zual ting mai lawng maw?

"Zorama hi i duh tak tak em?" ka tih leh chuan rawn mengin min en vang vang a "Ka hrelo"  tih bawkin min chhang leha, 'Nei rawh' ka ti dawn nge 'Nei suh' ka ti dawn pawh ka hrethiam tawh hrep lo.

"Rilru i van ti hah reuh tak em?" a sam chulsak thuak paha ka tih chuan "Chuvang tak chuan a lawm pasal ka neihvat a ngaih" a lo ti leh mai a, a pasal neih tum chhan mawlh chuan rilru a ti buaizual ting mai si.

"Hetah awm renglo ang, midang inkhawm bang an lo chhuak ve mek ania" Biakin lam hawi sek sek paha a tih takah chuan School compound aṭang chuan kan inzui chhuak leh thuai a, kawng peng kan thlen thlengin kan inbe zui leh tawhlo.

A kal tur chu "Ka thilsawi kha i hriat kha aw, i hlimna tur chiahin thil iti dawnnia" ka ti zui hrama, chutah mawi zeta min seih pahin "Nangpawh hlim ve ang che" a lo ti a, a kalliam ta chu ka en zui vawng vawng a, ka hmangaihna hi hun a rei telh telha a zual zel zawk nimai hian ka hre tawh.

Zep loh ah chuan midang tan chuan ka phallo a lawm, ngaihtuah ringawt pawhin min ti hrehawm a ni, mahse, ka hmangaih takzeta a hlim ka duh anih chuan ka kaltir a ngai tih erawh ka hrechiang ngang si, a chhan chu ka kiangah hlimna tur a hmu dawn silo a, ka ngaihtuah chang a piang hian kha zan kan nun mangchhia ang maia chantir tu kha paihbo daih theih ka chak ṭhin a ni.

Ka inthlak fel mutura ka insiam laimekin Zothanpuii muhil tawh emaw ka tih chu a lo tho nulh a "Tinge ṭhutthlengah i mut ziah a?" phak zet hian a lo ti a, chhangloin ka kawr chung ka phelh mawp mawp a, hman zan aṭang khan a bulah hian ka mu leh tawh ngailo, amah aia ka thawh hmasak ziah a vangin a hre ngailo a, tunah a lo hre ta anih hmel e.

"LALMUANPUI....ṭhutthlengah mut leh i tum a mi a?" vin zet a a lo tih leh takah chuan inherin a hmel chu ka en a, "Murawh, lehkha chhut ngai ka nei" tih leh sitting room lampan ka rual a, reivaklo ah Unicky'n min lo bia a, ani teh meuhin minlo bia chu a pawimawh anih ka ring, rangtakin pawnah ka chhuak a, ka chhan rualin "I mu tawh em, ka tibuai che em?" a lo ti nghal thuai a.

"La mu lo e, enge ni ve tehmiala?" ka lo tih chuan a han chek hlak a. "Mapui, i mak ee!!" a rawn ti deuh tlawk tlawk chu ka hrethiamlo nasa mai.

"Enge ka mak na?" ka lo tih nghat a.

"Mki hi thlah zalen teh aw, haw kawnga in awmdan te kha, pasal a nei ve tawh dawn a khatianga i awm zel chuan engtin nge nia nga?" a lo ti lehnghal tawn tawn a, engtin nge maw a lo ngaih tehchek ni.

"Kan inbe ringawt anih kha, inbiak mai mai chu a theihloh a mi?" ka lo ti ve thung.

"In inkaih kha Zo-a nen kan hmu reng che u, tikhan a rilru i tibuai leh zo vek ang, i ninawm reuh lutuk Lalmuanpui" ring zet zet a a ṭawng chu nuih te pawh a ti za lek lek a ni.

"Pasal nei turin ka ti a lawm" ka tih chuan thawk a la hak a, "I tih makmawh ania, fel riauah te khan inngai reng reng suh i tih awm reng zawk anih kha" a lo ti leh hluk a.

"Chuvangin a lawm ka tih, a hlimna tur apiangin awm sela ka duh ber a lawm" zawi deuh taka ka tih chuan a ngawi ta dak a.

"Enteh, innu nen inṭhen intum ami a?" a lo ti leh sar sar a "Tunge ti?" vin zetin ka lo tithung, thuruk anga kan la kalpui laimeka chutiang ngaihdan anlo nei chuan ngaih a ti ṭhalo dawn dawn mai.

"Eh...innu ziap zuap khan Mki Phone-in a hau hrep a lawm le, ka ṭhiannu in minlo biaka a rilru natzia kha ka thinrim pui teh ania, innu pawh kha naupang te si a nasa lutuk, dawt ten a rawn puh a School ah intawm dun ang tein a lo puh a nih kha" a thil rawn sawi chuan ka thin a ti sa phat mai!

"Chu chu engtikah nge?" ka lo ti vin ṭhat a. "Ngawi teh a rei leh deuh tawh, chu aimah chuan maw a unaupa hmelchhe zet khan Mki u bulah in nupa inkar buaina a thlen thu a lo sawi a, chuvang ania u Hruaia pawn pasal nei tura a nawr ni, i mawl hi he si a ka hrilh vek che anih chu" a ṭawngkam tin chuan min dem fak fak a, a sawidiklo chuang hauh silo, chutiang em emin Muansanga te unau chu an lo che dun ang tih ngaihna ka lo hrelo reng reng a ni.

"Eng pawh nise ka ṭhiannu chuan pasal han nei sela a fel ani mai, ani pawh a hlim anga nangni pawh in hlim ang, i nupui kamtam lutuk erawh vengṭha tawh ang che anih loh chuan keimah hian ka beng duh mai dawn a nia, ṭan viau tum che pawh hian nang hi chu i ṭan hleihtheih loh reng reng mai" ti niah niah chungin Phone chu a dah zui a.

(End of chapter 11)