GOMENASAI (CHAPTER - 7)

GOMENASAI - Ahmangaihi violette khiangte

CHAPTER - 7

"Mambawihi tiraw i hming kha, lo ṭhu rih la kan inpeih ṭep ania" ka Bag ak a ka ding reng chu ka lampana lo kalpahin pakhat chuan a ti a, chutih laiin Irene-i erawh mipakhat nen inṭhutchilhin an titi siam siam a, la haw chu a tumloh hmel kher maia keilah ka hman hmawh tet tet tawh.

"I hmanhmawh hmel ê" ka bula rawn din pah a a tih rualchuan "Dar 9 ari dawn tawh a, a tlai ve tawh a lawm" ka lo ti vat a, "Jonathan ka unaunu kha va hnimhnai daw daw suh, a duh chuanglo ang che" nui har har chunga Irene-in a lo tih chuan ka lo melhrum nghek a, a inthlahrung leh deuh aniang "8:30 a pel chauh a lawm, a la hma em hi" a ti leh zata, "I pa in lo haw hma rawh u a tih kha" tum bar chungin ka lo ti thung.

A hmelah chuan ninawm min tih hmel hle lehnghala, min ning leh tur si te chu min hruai ve lo tawp mai sela ṭha mai tur. "Lo ṭhu ve rih la, kan misawm te ho an haw fel hnuah ka thlah ang che" Jonathan-an a lo tih leh chuan phurlo zetin ṭhutna awl chu ka pan a.

"Irene-i nen hmun khatah min thlah dawnnia" ka bula a lo ṭhut ruala ka tih chuan a meng tal deuh tap a, "Irene-i chu Zuala rualin a haw dawn a lawm, ngaihtuah duh suh" nui ṭhaw chunga a tih leh chuan ka tûm lian viau tawh a ni, a mala inthlah kher an tum chu ka helh ru ngang mai a, thawh lawka mahnia haw nal nal tur em mawni dawn ni. 

"Taxi pawn ka haw thei tho chuan ka ring, thlah kher pawh ka ngaih ka ringlo" Irene-i en pah chuan ka ti zui niah niah a. "Chutiang te a chi nang, inveng a hla hlawm sia kan thlah thei che u a lawm, kan chhuak har dawnlo nia, mahnia haw te chu kawnglakah tawhsual intawk ang tihte pawh a hlauhawm a lawm" Jonathana chuan a ti leh vat a, inhre nelsa kan ni bawk silo a zui chu hrehtak tein ka hreh a, ka awm anuam thei mawlhlo.

Midang ho nen chuan titi pahin zu an in a, thil pawimawh engmah ti pawh ni silo a an tawi khawmuang chu ka lo ngaimawh hle a, Model ho lah chu a tu a temah haw mai tum hmel an la pu lo a, fiamthu thawha an nui ham ham te chu ka ngaihdan a ni tawhlo, kei hi ka awmve miahloh na tur hmunah ka awm nita berin ka hria, Irene i hi ka zuichhuak leh tawh ngailo ang.

"I ṭhu ngawirenga nang chu i inthlahrun hmel ê" Jonathan-an a lo tih chuan ka lam an lo hawi ṭhap a, "Inthlahrung lo e" tiin zahzelah ka nuilui a, Irene-i lo ner nang nang chu ka va hmu leh hram bawk a, a awmdan vanga ka lawmloh ang chiahin ka awmdan chuan a ti lawm tehchiam biklo ti chu ka hre mai, midang ho pawn kan unau inkar chu an hrethiam ve hialin ka ring bawk, Irene-i mitmeng leh min melh ṭhin danah chuan alangchiang thawkhat viau a ni.

"Engmah i in velo a a nuamlo hei tal hi inve teh" tihpah hian Model zinga pakhat chuan ka lamah Beer a rawn lek a, engtin nge ka tih dawn hriattum niawm taka ngun hian Irene-in a lo thlek a, a rin ang chiahin ka chhang aniang a ner sak a, "Ka in ngailo a" nui chunga ka tih leh lai te chuan 'I ṭhing bik mange' tih melh hian minlo melh a, eng he hu ah ka ngai duh biklo, an niho ang ka nilo miau a, an bula ka awm vang maia an tih ang apiang tih ve zel chu ka  tum hauhlo bawk.

Ka phone a lo ri a, number ka hriatngai nilo mahse ka ṭhutna aṭanga inthiarfihlim chhuanlam a tana hmantum rilru chung chuan chhan paha thawh ka rual a, "Hello" ka tih laichuan lehlama thawm ri deuh sat sat chu ka hre nghal a.

Bathroom lam pan paha Phone ka ngaihthlak laitak chuan aw thum deuh dût hian "I buai em?"a rawn ti ta mai a, min ti hamhaih kher mai, ka penlai chawl datin ka phone chu ka han en leh rih a, min lo be tu chu tunge anih zawh hran ka ngai hauhlo.

"Buai..lo e.."ka ti bah nak a.

"Inveng lamah ka kal a, ka lo kawi lawk dawn emaw ni ka tia" a lo tih leh chuan ka rilru a buai nak a, a zin a lo haw tawh chu a ni ngei mai a, a hmel hmuh pawh ka chak rilru viau nain ina ka awm lohlaitak a lo ni  kher chu a pawita a ni.

"Inah ka awmlo a" ka ti ta ngawt a, "Ohh.." hamhaih hmel angreng zet hian alo ti a, a ngawi vung vunga, ka inthiamlo rilru kher mai, len ka phal loh vangah a ngaihloh hram ka beisei.

"Ih.. Tunah khan khawiah nge i awm mek a, ka lo haw ṭep tawh a" ka tih leh chuan a thaw ham ham ri chu ka hre thei. "Inveng piah lawkah ka awm, nang zawk?" tiin min zawt lêt khauh a. 

"Ka unaunu nen kan kalchuak a, Chaltlangah ka awm daih" inthlahrung rilru tak chuan ka ti leh a, min lo chhân dan tur chu ka ngaichang nghal ran a "I lo haw dawn tawh em?" damthlupa a lo tih leh chuan chhân dan tur ka buai leh nak tawh.

"Ih maw, Irene-i hian haw ala tumlo aniang, keichuan haw ka duh tawh a, a ṭhiante min lo thlahtir a tuma" ka aw ah chuan ka hreh zia alang reng a, engvanga han hrilh ve kher chu nge ka nih pawh ka hrethiam chiah biklo.

"Anih chuan ka lo nghak ang che, i lo thlen hunah min lo hrilh la" a rawn tih leh chuan ka ner zui nang a, ka haw huntur ka hre silo a, reizet min lo nghak ang tih pawh a hlauhawm.

"An muang angreng sia min nghak rei lutuk angê" min nghak lo mai sela ka duh, ka inngahrei tir chuan a inthlahrunawm leh dawn emai. "An buai em ni?" a rawn ti ta daih a, "An..buai..lo" ka lo tih chuan a ngawi vung vunga, enge a ngaihtuah ang le?

"Zu an in ho a" ka tih chuan a thaw hawk ri chu ka hre thei.

"Ka lo hruai dawn che em?" a rawn ti chu ka nui nghal var var mai, Irene-in min lo thlek reng tih ka va hmuh chuan lehlam hawiin ka inher thuai a, engtin nge ka chhan ang, 'Aw min lo hruai rawh' ka ti mai dawn em maw ni? 

"I duh chuan ka lo hruai ang che" damthlupa a lo tih leh chuan nuam ka ti veng veng mai! "I peih chuan min lo hruai la, ka ning tawh lutuka" tinge pangchang deuha ka ṭawng ringawt le, ka zak leh hnuhnawh a, mahse, ka sawizo vek tawh si.

"I awmna chu lo sawila" a tih chuan rang lutukin ka lo hrilh zung zunga, ka phura ka helhhawlh tel bawk!

"Ka lo kal ang" tiin Phone chu a dah a, ka thinphu rang nghal dawt dawt chu ka phur vang anih ka ring, nge ni a ka zam vang pawh ka hrethiamlo, dinhmun laklawh deuha ka awmlai hian a lolang ve ziah a, a chhan pawh ka hrelo vannei ka inti ve ringawt nia mawle!

Midang kianga ka lêt lehlai chuan min lo enṭhap a "Tu nge i biaka?" Irene-in  alo tih chuan "Ka hawsan mai ang che u, ka ṭhianpain minlo hruai dawn a" intithei ru zet hian ka chhang a. 

"I van hmanhmawh ve, i duh chuan tunah ka thlah dawn che nia" Jonathan-an a lo tih chuan ka chhang tawhlo, "Ka ṭhianpa chu alo kal meka ka lo va nghak ange" Irene-i en paha ka tih hnuah pawn lam ka pan nghal hlawk hlawk a, "Tu i ṭhianpa nge?" a rawn tih zui pawh chuan ka chhang tawhlo, ṭhian ka neih loh zia a hria a, tunah chuan min ngaihsak em em tu ka nei angah ngai sela ka duh, hriat chian a chak ru kher ang chu.

Pawna ka chhuah laichuan kawngpui pawh ala reh vaklo, Motor park na bulah chuan dingin ka nghak ran a, a lo kal dawn chauh tih hre mahila anni ho kianga lo va ṭhut reng aichuan mahnia awm chu ka duh zawk reng reng a ni.

A thangrei bik vaklo, a motor ka hmuh rualin kawngpui lampan chuan ka tlanthla hlawk hlawk a, a lo chhuah hun pawh nghak lemlo chuan Passenger side lamchu ka pana, kawngkhar ka hawng chu ngun fe mai hian min lo en a, min ti lai kher mai. Ka ṭhutfel hnu chuan a lamhawiin ka nui var var a, huiha..a pawi ṭhin, min nuihlêt ngailo tih ka lo theihnghilh daih a ni.

"A vawt em?" tih paha min lo ban chu a kut ka lo man chawt a, kan kut chu kan inhum chiang hle a, lai zeta thlah ka tum leh chuan anin min lo hum nghet sauh thung a, ka biang sa hat hat te ka thinphu rang dup dup te chu a rawn hriat ve loh hram ka beisei. Hmalam hawichuan nui tawhlo turin ka inpetruh fan fan a, tlan chhuak mailoa min en reng bawksi avangin ka awmdan chu alai vel vek tawh.

"I kut a van vawt ve, thawmhnaw lum i ha bawk silo" ka kut hum ngheh sauh paha a tih leh chuan a hmel chu ka en vat a, ṭum dang zawng aiin zanin hian ka hmu ṭha, ka hmuh ngun poh leh ka hmu ṭha zual nita berin ka hria.

"Inchhung chu a vawt lo a" nui chunga ka tih chuan "Pawn hi a vawt hle thung a" a lo ti zauha, lerhin khawvawt an hrelo tih thu min hrilh a tum em mawni le! min ti zak ram ram. Chutah nuisuk chunga "Ka uang anih kha" a rawn tih takah chuan ka kut chu ka la sawn nghalthuaia, uan hun a hrelo si, tlangval zei tak hi chu a nilo ve chiang a lawm, a duh hun hun ah a nui theilo nge, a duh hunah tê chauh a nui ṭhin tih pawh ka hrethiam tawhlo.

Chutah a kawrchung phelh sawk sawkin min rawn tuamṭha mawlh mawlh a, a chetdan chuan minti hamhaih lek lek a mahse, a nuam ka ti takzet, hepa hian min duat hmel riau a a bulah hian engtin emaw tak hian ka hahdam a, ka awmna hmuntur diktaka awm ta ang mai hian ka thla a muang a ni.

Kan tlan chhuah hnu chuan sawitur hrelo zetin kan ngawi ran a, engemaw sawi sela ka ti kher mai, keimah zawk ka ṭawng chhuah hmasak angai dawnin ka hria, sawi tur erawh a vang a ni.

"Office chawlh chu anuam bawk em?" a rawn tih takah chuan ka thaw huai mai. "Nuam ve tho mai, nang zawk?" alam hawia nuihsak pahin ka ti a, a lu a bu nghat nghat a, "Nuam chiahlo" a ti daih ang lawia, a van letling thei tak.

"I zin a mi?" 

"Vawinah ka lo haw chiah" 

"I van zin ngun hmel" sawi tur avang a ni. "Kuminah chuan ka zin tawpna tur ania" ka lam hawiin a rawn nui a, a nuih hian a hmelṭha zual, a zaidam hmel hle bawk. 

Kawtthler mawi tak tak a an chei kan tlan pelh laichuan "Christmas hmanpui tur i nei em?" a ti sup a. "Thingtlangah ka hmang dawn a" ti a ka lo chhang chu min rawn en zawk a, "Tinge?" bung zetin a lo ti a.

"Kan khua a nia, ka pi leh pu te bulah ka hmang ang, nangzawk Christmas hmanpui tur i nei em?" tiin ka zawt let veleh a. A ngawih tak vung vung vang chuan zawh chiloh ka zawt emaw ni ka ti hman a.

"I sawi hma kha chuan ka nei dawn emaw ka ti a" a lo ti a, ka beiseiloh lutuk vang nge ni ka beng a sa hat hat nia, ka nui ringawt a, ani pawh a nui ve tho, min nuihlet vawikhatna, nuihdun hi anuam tih ka hre leh ta.

"Khawi khua ah nge?" 

"Lunglengah" ka sawi laichuan min lo melh ralh a.

"I cham rei a ngem?" a lo ti a.

"Ka hrelo le, kum thar pawh ka hmang nghal ang" ka ti a.

"Ka ruahmanna a chhe vek anih chu" nuisuk chunga min rawn en paha a tih chuan ka lo ṭhen vak a, hepa hi ka ringtheilo, keimah nena hmangdun turin ruahmanna a lo nei tihna em ni!

"Enge i ruahmana chû?" ka zawhlai chuan ka lamhawiin a rawn nui leh a "Thingtlangah chuan han hman ngei ngei a ngai em ni?" tiin min zawt leh a. "Umm..ka pi leh pu ten min ngai ve tawh a" ka tih chuan hmalam enchungin a nuisuk suk a.

"Lo let leh thuai ang che" awki zawi ruiha a tih chuan engtin emaw tak hian min fan raih raih thei, ka let leh hun a nghakhlel tihna anih ka ring hmiah. Ka ngaihtuah laimek chuan "Cham hlen lo la" mit min siai zauh pahin a ti a, hepa hian minti â thei takngial dawn!

Kan veng kan thlen dawn ṭepah a Phone a lo ri a, a biak mawlh mawlh laichuan ka lo enrenga, sir zawng pheichuan a langpa lehzual a, a hnarngul sang lam deuh leh a mitkhur thuk lam deuh te a khabe kual te chu an dik velvek mai. Ka lam a lo hawi thut vang chuan rang lutuk tak maiin hmalam ka en a "Bawihno.." a tih leh rualin ka lo nuichhuak hak a.

"Mambawihi.." ka tih chuan hrechhuak thut niawm tak hian a bu nghat a. "Ni tak.. Mambawih, thil pawimawh ka nei thut a, ka lo lutkawi hman dawnlo anih hmel" a ti zui zat a.

Kan inkawt kan thlenga, ka chhuk dawn chuan "Ka lo bia ang che" a ti a, ka chhang mailo. "Text emaw call-in" a tih leh takah chuan ka lo nuiha ani pawn min nuihlêt ve, a vawihnihna.

Muthmunah ka ngaihtuah nasa ngang mai,  ka tal seka a, ka za cheng ringawt. A thilsawi zawng zawng te, kan inbiak dan te chu ka theinghilh ṭhenlo reng reng. A nui hmel pawh. 

A tukzanah min lo bia a, zanriah eikhama  min lo Call laichuan Irene-in tunge ka biak hriat tumin min lo ṭhuthnaih nghal sawt sawt a, rang deuhin ka thawhsan a "Ngaihzawng i nei chiang lutuk, min hrilh ve rawh" tiin a rawn au zui lang lang a.

"Engtikah nge inkhua ah chuan i kaldawn?"lehlama miin a lo tih chuan "Naktukah sumo ticket ka la anga, a tuk leh ah aniang anih loh pawn Seat ka chan dan ani maithei" tiin ka chhang a.

Sawitur a hre vaklo, keipawn a bulah chuan sawitur ka van riau zel, kan la inhriatchian loh vang anih ka ring. "Lunglenga i kal hunah chuan ka lo bia ang che" zawi ruiha a tih chuan "Min lo be dawnnia" ka lo ti ve vata, "Ka hrat viau maithei" thutak zet hian a ti leh a, engthil emaw vei riau nei hi a ang.

"Tunah khan i nui em?" 

"Nui e" ka lo ti vat a, a hmel landan tur ka ngaihtuaha a tum deuh barin ka ring. 

"Tinge nui hmel hi i put reng zel?" a thil min zawh chu chhandan pawh ka thiamlo, a bulah khan ka lo nui reng ṭhin em mawni?

"Nangmah zawk kha tinge tum hmel i put reng zel a?" a zawhna chhang lo chuan ka zawt lêt a. "I nuih chuan a buaithlak ṭhin" tih zawngin min chhang a, eng a sawina nge mawni. 

JH-a biak chu hla lungkuai deuh ngaihthlak ang vel a ni, a damdup mai a awki sang anei miahlo, a zaidam hlein ka ring, a hmel landan anglo takin. 

Zingkarah Patea nen Sumo ticket laturin kan kal a, Seat alo full vek tawh a mahse, vanneih thlak lutuk maiin counter a kan la awmlai chuan pakhatin alo Cancel a, a tihzia kher mai. Kan khua chu hla lo te mah nise tun ang hun chho ah chuan Zirlai leh khual khuaa awm te haw khawm hunlai ani a, Ticket pawh an lo hauh lawk vek zel a lo ni a, nachang kan lo hre ve lo zawk alo ni a, Seat cancel awm hlauhlo phei sela chuan ka haw thei kher lo ang.

Chawhnu lamah ka mamawh lamkhawm turin Bazarah ka chhuak a, ka pi leh pute tan thawmhnaw lum leh, mawza lum tih ang reng ka leinuala, ka Ni fate lawmtur Toys engemaw zah nen, ka pu tan a cake duh ber chi Zote ah ka leisaka, ka pi Sweet min chah te pawh ka leinghala, haw lam chu ka bawr hle a, Bazar a tawt bawk si a ka chau ve viau mai. 

Zanlam pawh inkhawm tawhloin ka mu hle hle a, JH-an min lo bia se ka ti ngang mai a, Ka phone a rawn rik chuan phur zetin ka en a Alawmi a lo ni a "I haw dawn ta em, keini chu hei vawin ah kan chho a, ka thleng der tawh" a rawn ti lang lang a. 

Kan titi luama ani nena inbiak chu sawitur a tama karloah darkar alo liam hman reng zel, kan inbiak zawh chuan muturin ka insiam a, khuma ka lawn rual chiahin ka phone chu a lo eng zak zak a, amah a ni! Nui var var chungin Phone chu ka chhang a.

Kan inbe reilo, a chhan chu sawitur a hre hlawllo, Minute nga vel chiah kan inbia a " Tluang deuhin i thleng dawnnia" tiin min thlah ve thlap bawk. 

Tukṭhuan eikhamah kan khaw lampan chuan kan tlan ta vang vang a, ka haw lohna chin pawh a rei ve ta, Mumbai aṭanga kan chhuah tirh khan ka haw zawka, Nu Muani sumdawnna thil vangin kan chamrei ta lo a, tun hi ka haw lehna hmasa ber chu a ni mai awm e.

Ka Puin kawtkaiah minlo hmuaka, ka Ni fate pawh an lo awm nak nak a, ka thil hawnsak te chu ka sem hlawm a, nuam kan ti tlang ngang mai. 

Kar khat vel zet ka cham hnu chuan ṭhian thar te pawh ka nei ve ta a, a hming chu Nutei a ni a, kan ṭhenawm nula a ni nghe nghe. Mahni khua mah nise ka mikhual duk reng a, tunhma angin ka tlangnel thei tak tak tawhlo, khaw mi te lahin mikhual en in min en vek bawk si. Nutei a fel hlauh a inkhawmna ah leh kohhran ṭhalai pawl hnatlang an koh nikhua te chuan kan inzui dun ṭhina, a zarah chuan ka tlangnel ve leh chauh zawk a, kohhran huangah erawh khawpui aimahin nuam ka ti zawk thung.

A tu a te pawh an fel em em veka, mi an be seuh seuh reng a, Christmas zaikhawmna ah te pawh Nutei ruala thingpui lum ve turin min lo ruata, kohhran Zaipawl hla zirna ah te pawh ka tel ve zela, ka tlangnel sawt ta viaua, ka haw ta pawh ka inchhir lo kher mai.

JH-a erawh a reh ta vang vanga, ka lo bia ang che a tih vang khan min lo biak ka beisei ru deuh ṭhin a, mahse, ka thlen hnuah kan la inbe leh ta miahlo, min lo bia se tiru viau mahila va biak hmasak erawh ka duh hauhlo a, ngaihtuahna ah erawh a awm rauh rauh reng thung.

End of chapter - 7