GOMENASAI (CHAPTER - 10)

GOMENASAI - BY Ahmangaihi violette khiangte

CHAPTER - 10

Ka awmdan chu nuam ve mai mai tak a ni, thawhpui te pawh an lo nuisung hlawma Alawmi mawlh chu a lo phur leh tawh, ka bula rawn ṭhuthnaih sawt sawt pahin "An In ah chaw i ei dawn a maw? La chiang lo ang khan i sawi sia in va kal sâwt leh si ve, awi....nang hi i zêp ṭhen a ni zawk lo maw?" a ti zung zunga. 

"Engmah ka hre biklo, a sawi ve mai mai anih kha ka ei ngam teuhlo mai" ka tih chuan a awihloh hmel kher mai, JH-a thil rawn sawi chu ka ngaihtuah lêta thil nithei pawh a ni lo, an Ina chaw va ei ringawt te chu a zah pawh a zahthlak ka ti, a tih tak tak ka ringlo phawta lo ti tak tak pawh nise ka hnial tho ang.

Tlai banah chuan Alawmin min nghak ran a, ka Bag ka ah ṭhat mawlh mawlh laiin "I be tawh em, be vat vat rawh ka en liam phawt che u anga ka kal chauh ang" a lo ti leh mauh mai a, va biak hmasak chu hreh viau mahila ka awmdan tur chu ka buai ve deuha, ngawirenga lo ngah ringawt lah nitheiin ka hre silo a, hawsan mai lah ka hreh ve deuh tlat bawk a. 

Biak tuma Phone ka phawrh chiah chu amah zawkin min lo be ta hlauh a, ani chu a lo hman der tawh a, pawnah min nghak mek hi a lo ni a, inhnuai lampana kan chhuk laichuan ka zam riau lehnghala, ka kalpui nu lah a phur nasa mai a "Chhuah reng reng suh" a ti deuh chhen mai a, a hmeichhia zawkin chutiang rilru lo put hmasak te chu zahthlak ka ti.

JH-an min lo nghahna kan panlai chuan Paliani kan tawk hlawla "Bike a phurtu che nen khan in nilo tih ka hria aw" min kalpelh thuak pahin a ti a, ka va lehhawi chuan a kutzungpui min lo hmuh vah a, a kal zui nal nal chu Alawmi nen ka ho chungin kan en a! "A va ngaihtuah thui peih e" Alawmin a ti zui hlak a, Paliani sawi chu Uzodina nena hman deuha Bike a kan inphur lai a lo hmuh kha anih ka ring.

"Awi....saw thilsiam mawi saw" lei chhuah tat chungin min ena, henu em em ṭhin hi! 

"Â...ṭhiante ngaihzawng star hi chu ka tha a na tlat, ka ex i nihpui ang talin ka ngai dawn" nui hak hak chungin a ti leh a, kan piah deuha a Motor nghenga JH-a lo ding lampan chuan kan nui leh rih a, kan thilsawi chu a lo hrepha ang tih pawh ka hlau zawk.

"Pen kawi na tur kan neia, kal nghal mai ang u aw" a lo tih chuan Alawmin min lo melh leh ralh a, "Ka tel ve inphal em ni?" JH-en chung chuan a ti zui zat a, JH-a lo bu nghat a hmuh rualin min rawn siai zauh a. "Lut rawh, ka enliam dawn che u" a tih takah chuan ka ṭhulut thuaia, kan tlansan dawn thleng chuan nui var var chungin min en a, hmeichhe fel ve tak chu a ni chiang a lawm, miṭhenkhat ang chu nisela tuna ka khawsak dan hi chu atan a huatthlala awm viauin ka ring a ni.

"I ṭhiannu kha chu a dangdai ve ngawt mai" nuichunga JH-an a tih chuan "I hre ngai a mi?" ka lo ti vat a.

"Hre ngai e"

"Engtin?" Alawmi a hriat dan chu ka hre chak nghal et et.

"Min enthla zuk zuk reng a lawm" a ti chu ka lo nuichhuak hak a. "Dawt ka sawi hleinem, min enthla a lawm" a lo ti leh vat a. "Awih awmloh ani te chuan bialpa a nei a lawm" ka ti tak nain ka nuilo theilo, Alawmi khan a enzui nasa ve bawk em a, JH-an a lo hre ru vek tih hria sela a zak ve ram ram ang chu. 

"Taka nichina i thilsawi kha, chaw i lo eidawn min tih kha ka duh miahlo ania aw" ka tih chuan min lo en zawk a, "Dawn e, ka chhungten hmuh ve che an duh a, i chhungte kha phone in hrilh hma la, kan haw tlai lo ang" thutak fe mai hian a ti a.

"Na....i ti tak tak turah ka lo ngailo a, in Ina lo kal nan chuan a la hma deuh mah mahin ka hria" kal chu ka hreh lutuk tlat, amah nen pawh inpawh em em kan la nilo a, hetiang chauh kan la nih laia an Ina chaw ei nghal ngawt te chu ka hreh zawng tak a ni.

"I hreh deuh a mi, vawin hi ka Nu piancham a nia, sawm tur che in min ti a, ka unaute pawn an kawppui te an hruai vek ang, engmah zahthlak a awmlo a nia, i bulah ka awm reng dawn a lawm" a thutak bawk si a han hnial zui chiam chu ka hreh ve deuh. "Ka van zak ê" ka ti leh vawng vawng chu ka kut rawn hmer salhin "Zak lo ang" tih pahin min nuih a, ka hnial zui tawh em bik lo.

Nu Muani ka phone a ka ṭhiante ina chaw ka eidawn thu leh ka haw har dawnloh thu ka hrilh a, a dila ka va dil chuan a phal chiahin ka ringlo, chhuahvah ka dil hian min phalsak ngai manglo a chhuanlam neuh neuh hi a lo nei ziah ṭhin a, chuvanga va hrilh deuh thawr chu ka ni bawk. "Thawmhnaw buaipui tur a tam a sin le, i unaunu a la haw bawk silo" a lo ti niah niah a, aw leh aih phei chu min pawh chiahlo nain,  "Ka lo haw harlo ang" tiin thildang a sawi leh hmain Phone chu ka dah vat a, ka thaw huai nghe nghe.

"A ṭha vek em?" ka bula mi in a lo tih chuan "Ṭha e mahse, in Inah chuan min ngaihsak viau ang che aw, tunah lo kal hi ka duh dan ani lo a, i chhungte ka hmuh vawikhatna tur a ni bawk a, a zahthlak dawn ania diktak chuan ka phur lo reng reng" ka ti sap sap a, ka rilru tak tak ka sawi a inzep ṭit ṭet hi ka thiamlo.

"Ka ngaihsak ang che" a lo ti leh mai a, ka kut rawn hum lehin a hmer zui vawng vawng a, tlem chuan ka awm a ti nuam ve deuh.

Dawr pakhatah kan penga ice cream leh Frozen fruit engemaw zah a leia "Thil eichak i nei em?" tia min zawh chuan lu ka thing vat a, tun dinhmunah hian engmah eichak ka neilo tak zet, chu a hnekin ka chhungril lam aṭang hian ka sahal niberin ka hria a ka huphurh a ni, a bula awm chak tho mahila an ina kal kher kher chu ka chaklo hulhual.

JH-a te in kan thlen dawnah chuan thir Gate sen lar tak, sang leh lianpui mai hi kan hma ah chuan a ding luah a, Gate bangah chuan rawng var hian 'Zahau Colony' tih a inziak kalh bawk a, Security form ha pakhat hian Gate a lo hawnga, kan tlan luh lai chuan ka zam ru kher mai.

An colony a in ho chu inchhawng nalh leh changkang tak tak a ni hlawm a, kawt zawlah chuan Motor manto hmel tak tak a in hung fur bawk a ka enthuak chung pawhin sawm chuang daih a niin ka hria. 

Ka hma zawna in chu kan pan ding a, an In  anih ngei ka ring, a bula In dang anglo takin chhawng sangpui a ni ve lo a, lianpui mai niin chhawnghnih vel chauh anih ka ring inhnuai a awm leh te anih ngawt loh chuan, in hmalam bang chu leirawhchan hmanga sak a ni a, Cement a zut a nilo a rawng an hnawih tawp aniang a uk kharh a, pangpar zam chiin bang chu a bawm luk bawka han en reng reng pawhin a In chu a lang zahawm khup mai.

Kawtah ka dinrual chuan ka khawng vek tawh a ni ber e, ka kut thlandap chu tuai nauh nauhin am zetin thawk ka han la leh rih a, JH-a lam ka hawi chu nui chungin min lo en reng a, ka nuih tawitak ringawt. "Chhuk ila" ka sam rawn chul thuak paha tiin a che zui vut a, a chhuk fel hnu chuan muangchangin ka chhuk ve chauh a, chutih laimekin kan hma a In aṭang chuan Nu lianpui ngo suah mai hi a lo phei hlak hlak a, a nu a ni ngei ang!

"Ka thil chah che kha i lo hawn em?" a tih chuan "Ka theihnghilh daih" JH-an a lo ti a, a nu chu a meng thip nghal hlar mai a, awm nawmloh sa nen min ti zam lehzual. "Ka uang anih kha" JH-an a lo ti leh rual chuan ka va melh deuh kawk a, ka lam lo hawiin mit min rawn siai zauh a, a nu tumbur chuan "Lo lut vat teh u, i Unau ten i thil hawn kha an nghak ania" tiin a inher nghal hmaka, keichu min melh chhin eihlo, ka awmloh tawpna tur hmunah ka awm anih ka ring nghal rum rum mai.

"JH..." kal mai a tum chu a banah ka vuan ṭang a "Sawm rawh an ti tak tak em?" ringhlel zetin ka zawt a, "Ti e" a lo ti chu ka awih zan lo.

"Min hre bawk silo a, ka van awihlo e" ka tih chuan ka hnar a rawn piai hlak a "I bialnu sawm rawh min ti" tih pahin ka darah min kuah leh salh a, In chhung lampanin min kalpui zui zat bawk.

An inchhung chu a zau ṭha kher mai, a fel fai thlarh a, thil intar chhiai chhuai leh chei mawina ang chi hmuh tur a awmlo, Furniture man to hmel tak tak a inhunga bangah lemziak tlem a zawng nen, Marble chhuat hnum hlurh chungah chuan kan pen phei zela Sitting room lai taka inchung kailawn inphah chho zui chu a hmuhnawmin a nalh hle bawk.

Tumah hmuhtur an awmlo erawh mak ka ti deuh a, ka rilru hria niawm takin "Choka lamah an awm aniang, ka inthlak lawk dawna i lokal ve duh nge midang bulah ilo awm duh?" a tih chuan ka en phawk nghal hle. "Ka bulah awm reng rawh, min kalsan reng reng suh" tih leh nghet lutuka a kut hum ka rual a, nui ruh ruh chungin ka kut chu a hmer leh salh a "Ka inthlak ringawt dawn a lawm" a tih leh pawh chuan "Inthlak lo mai rawh" ka la ti ta ṭalh a, a fala awm ka hrehzia a hrethiam aniang buk nghat pahin choka lam chu min pan pui a, midang ṭawng nak nak thawm ka hre zui zat bawk.

Choka kan luh rualin nula nui hawk hawk thawm ka hre nghal a, min hmuh rualin phawk fe mai hian min lo en hlawma eitur siamin an lo buai hmel hlawm viau mai, mipa pakhat chuan "An lo thleng ve ta hram e" tih pahin keichu min rawn melh a,  "I thil lei kha kan mamawh tawh lutuk ania" nula samkir hian a lo ti nghalthuai bawk a. Kan lampana lo kalin JH-a thil khai lai chu a rawn laksak rawk rawka, min melh pahin min nuih leh var var a, midang awm ve ho pawhin min nuihsanga a tira ka zam ang em em chuan ka zam lutuk ta biklo.

Dawhkan lianpui kila an lo ṭhutna bulah chuan JH-an ṭhutna min hunsaka, a Blazer phelhin ka bulah a lo ṭhu ve nghal thuaia, "Fifi i u te an lo kal dawn em?" tiin tleirawl pakhat chu a bia a, lo chhang tu tleirawl te chu ria lam deuh hmelṭha zet mai a ni. "Kal dawn a tih kha, kan kawtah a Motor a awm tawh em ilo hmu lo ami?" tiin a lo zawt ve a.

"Ka Cousin te ho an nih hi" tiin JH-an min hmelhriat tir hlawm a, an bulah chuan "Mambawihi anih hi" tiin min hmelhriat tir bawka, an paruk chuan a pa unau fa te vek a ni. Nichin lawka samkir leh mipa min lo be hmasa ber tu kha unau an ni bawk.

English hlirin an in be hlawma, hrethiam ve tho mahila awm an ti nuam zanlo, JH-a English Accent erawh ngaihthlak a nuam viau, Mizo ṭawng hmangloa English an hmang erawh ka ngaitheilo lam mah a ni. An thiamlo pawh ani silo a hnam dang ṭawnga an inbe tlat chu ka hrethiamlo.

"Bawiha i ṭhiannu chu engtin maw kan koh dawna" Choka a rawn luh paha JH-a nuin a tih chuan nelawm thei ang ber turin ka lo nuih a "Mambawihi anih hi" JH-an a tih chuan chik zetin a nu chuan min lo thlek a. "I van fel ve, enge i hmingpum?" a ṭawng chu a bul viau nain a nelawmloh hran chuangloh "Lalthanpuii ka nia" ka tih lai chuan midang pawhin min en ṭhap a, "Mambawih kan ti ve mai ang che, U Tluangtea koh dan che nge i hming ve hrim hrim" samkir khan a lo ti leh a, "Midang pawhin min koh ṭhin dan ania" ka lo ti ve vat a.

Choka aṭanga a nu chhuah leh hnu chuan "Ti hian lo ṭhu la, ka han inthlak lawk ange" thawh mai paha JH-an a tih chuan  hnial ngam pawh a ni tawhlo. "Ka lo lêt leh vat ang" tiin min kalsan a. Dawhkan kil chuan ka ṭhu a ka Phone ka tuailet sek reng ringawt a, mizo ṭawnga an ṭawng ṭhat duhloh chu thuhran min biak an tum bawk silo a, keilahin ṭawng mai mai ka tum duh bik derlo.

"Enge i ei ve ang?" Tleirawl khan a lo tih chuan ka lo hawihai lek lek a, an zinga sambuang pakhat nui ring ber chuan "Salad leh fruits, Pasta, i duh chuan sa lam pawh" a lo ti zung zung a. Ka zanriah tur min zawt anih mai hmel.

"Utluangtea leh ka pa chuan buh an ei ṭhin a, i duh ve tho ang a?" Samkir khan a lo tih leh chuan ka lo aw rang kher mai, heng ho hian buh an ei ngailo vel a nih dawn hi a.

"Keichu Buh ka duhlo aw Fiona, Meatball emaw Sausage tam deuh lo siam teh u" Tlangval pakhat zawk chuan a ti leh a, samkiri unaupa erawhin eng thil emaw hi a chawk mawlh mawlh a "Kan unaupa hi ngaihzawng anei hmelṭha thei bik mange" a lo ti sup a, hmeichhe ho chuan nui ruh ruh chungin min en a. "Hemi Colony a cheng vek hi kan nia, Utluangtea hi he ina fapa upa ber hi ania, Unau pianpui pathum a nei bawk a, tunah tak chuan an awm rihlo, Reny a lo haw ve ṭep ang"  min dinhnaih pahin Fiona chuan a lo ti sap sap a.

"Reny chu tunge?" ka lo ti he haw a.

"I bialpa te unau zinga naupang ber, Princess Reny-i" a tih leh chuan an nui hak hak hlawm a.

"Princess-i hi a lola haw nange?" ka hnunglam aṭanga JH-an a lo tih chuan ka inher vata, suit nena a induang zuih loh hi chuan alang naupang sawtin ka hria. "Nichin lawkah min lo bia a, a sam an la khawih laklawh a tia" Fiona chuan a lo ti a.

"Lo kal rih la, tih tur a awm chuan loh chuan" ka ṭhutna chair nghenchhan vuanin ka hnungah a lo dinga, ka lo hniallo nasa mai. 

An in leh a room te min fan kualpuia, an in chu a lianin a zau ṭha kher mai, a room pawh a nuamin chhungkaw tam vaklo tan chuan chenna tham lawih a nih ka ring bawk. An colony chu an vua leh vang hlir an ni a, a pi leh pu te aṭanga Aizawl mihlun an ni nghe nghe a, an In a ṭang rengin rethei tak chu an awmlo anih hmel.

"Engzah nge cheng che u?" 

"Tunah rih chuan pali, nau mipa pakhat leh hmeichhia pahnih ka nei, mipa leh ka chhang chiah Apuii hi Mumbaiah an awm a, kan te ber hetah a awm thunga, a lo haw ve ṭep ang, in inkawm rual velin ka ring" a sawilai chuan ka lo bu nghat nghat a, an chhungkua chu ka awh zawng tak an ni, chhungkaw hung tak leh zahawm tak an ni tih a hriat mai a, kei anglo takin.

"Chhungkaw hung deuh neih hi ka chak ve thei a sin aw" ka lo ti zuai raih a, ka rilru ah ka nu alo lang zui zat bawk. Engtinge ka nu kha a khawsak ve zel ang le, kuminah ka la be miahlo a ka inthiamlo takzet.

"Hetiang hi i duh a nih chuan min nei mai ta che, i ta a ni mai dawn a lawm" a tih chuan ka lo nui chhuak hak a, a sawi awlsam thei mai bawk si.

"I duh em?" ka kawngah kuahin a lamah min pawt hnai dawrh a, ka inringlo bawka a awmah ka bei chawt a ni ber. "Ka nupui i nih hunah chuan ka ta zawng zawng hi i ta a ni vek ang" mitmeng damthlupa min en chungin a ti a, "I ti awmang lo lutuk, kan inkawp ve chiah a nih hi, chutiang sawi nan chuan ala hma lutuk" a awma chum dawp pahin ka ti a. 

"Nupui neih ka hun tawh a ka duhzawng tak nang ka tawng bawk che a, midang nghah ka neilo nang chiah ka nghak che" hnai takah rawn kun hniamin ka hmui a rawn nul thuak a, a thilsawi te, a chet dan te chuan ngaihtuahna a ti tawi tupa thildang a leng tawh rihlo.

A room ah kan pahnih chiahin kan awm bawk a, mitmei ven tur awmlo ta chu a duhthawh kher mai, min fawh mai duhtawk loin ka kawrchhung a rawn zen a, a kut lum hiam te a hmui lum veng vengin min tawh zawng chuan ka taksa pum chu a hit mup mup a ni ber, thawk a rang a thinphu a mumal lo hle bawk.

Zo zeta min pawmkangin ka nghawng leh awmbawr te chu anul kual dan dan a, thawk ka lo la leh hak ṭhin bak chu thawm dang hriat tur a awmlo, khum chungah min nghat riai riai a, duhthawh leh uar zetin min fawp reng bawk a, mumang ram ang mai a ni, engkim chu a fiahlo riai mai.

"U...i awm em?" rawn tih ri ah chuan ka harh kawk a, JH-a inlakhran rualin ka thawmhnaw chu ka siamṭha nghal zung zunga, kawngkhar a hawn ruala ka lo dingchhuak chiah chu nula la naupang tak samtawi mitmeng fiahzet mai nen chuan kan inmelh fuh chiang ngang mai. Tawitea min nuih chungin  "Tinge  hetah in awm renga, ka pa a lo thlenga, patea te pawh an lo kal tawh" JH-a en chung chuan a ti a.

"Hei hi kan naupangber kan Princess-i a nih hi" nui suk chungin anau sam chu a tuai thur sak a, "Reny ka nia, i dam ṭha maw?" a hma aia nelawm zawk chuan a ti leh  a. Ka chhan hmain "Kan damṭha, lo zuk chhuk la kan lo chhuk nghal ang" tiin a nau chu pawn lamah a nam chhuak zui dat dat a, an lanphak loh china an thawm nak nak chu ka hrechiang theilo a, an invin kha khain ka hria.

A lo let leh chuan hmanhmawh deuhin a rawn pen lut hlawk hlawk a, engmah sawi set set loin ka hmui a rawn chhilh leh hmak a, a duhthawh lehpek kher mai, ka kawr a hlim leh tur chiah chu a kut lo man sakin "A chi loh min lo koh tawh kha" ka lo ti vat a, chutah nazetin ka nghawngah a rawn fawp ngawng ngawng a, a duk hialin ka ring.

Room aṭanga kan chhuah dawn chuan ka nghawng chu darthlalangah ka en hram a, a sen duk charha, kawr nghawng nei ka hak avangin a khuh theih hlauh zawk a, chuti nilosela chuan a lang fiah ṭha kher ang chu.

Sitting room ah chuan an lo awm nak nak tawh a, puitling hlir an nih vangin a zahthlak duh kher mai, "Choka ah phei tlang ang" tiin min kai phei hlawk hlawk a, kan thlen hma deuhin choka aṭanga lo chhuak pakhat nen hian kan i tawk chawt  a, "JH-i bialnu thar elaw a van chhelo ve a?" nui ṭhaw chungin a ti a, a chhang ṭha ve mai dawn emaw ka tih lai "I nunah chiah buai rawh" tih pahin min pawt nghal dawr dawr a, a chhan dan teh hmuk chuan min ti hamhaih viau a ni.

"Khapa kha tunge a?" 

"Ka pa u fapa" tih te zawngin min chhang a, zawhzui chu a inthlahrunawm duh kher mai.

"Mambawihi nen ka room ah kan ei ang, in peih hunah Fiona in min lo ken chho mai rawh se" choka a kan luh rualin a ti zung zung a, chutah ka lam lo hawiin Table ah sawn Menu a awma i duh va thlang rawh" a ti leh a, a thinrim ringawt chhan hi ka hrethiamlo, min vin hauhlo mahse, a landan hrim hrim pawh chu nelawm loh tak a ni.

"Buh ka ti mai dawn a mi?" Fiona in a lo tih chuan a inher leh thuai a, "Ni rawh se, Mambawihi tan a hrang hrangin lo ti mai rawh, rei viau lo la" ka lam rawn hawi lehin "Chho ang" tih leh min pawh a rual a, Sitting room a puitling ho awmna kan thlen dawn chuan min thlah rih a, anu in min enlaia kalpelh vuk vuk chu anuam duhlo ngang mai.

Ka hma ah kal a, ka zui zel em tih chu min rawn en deuh sek renga, kailawn awmna kan thlen dawn ṭep chuan "MAMBAWIH!" ka aw hriatṭhan tak maiin a rawn tih ri vang chuan ka ding dat a, tu aw nge tih chu hrilh ka ngailo, tunge anih ka hrechiang lutuk tlat!

Rang lutukin ka inher a, ka piah deuha LALRINHLUA ding nen chuan kan inmelh nghal ran a, hei hi enge a awmzia! Helai hmunah hian hepa hian enge a lo tih ve, ngaihdan pakhat chu ka nei.

(End of chapter - 10)