GOMENASAI (CHAPTER - 11)

GOMENASAI - By Ahmangaihi violette khiangte

CHAPTER - 11

"I ni tak tak...Hetah enge i lo tih a?" nelawm tak maia min nuih chunga a tih laichuan ngawirengin ka lo en tlawk tlawk a, ka ngaihtuahna chu a vir kual vel nawk nawk a ni ber, ka bulah JH-a a lo din takah chuan thawk ka la vak a, Lalrinhlua zawhna chu chhang lemloin ka nuih leh ringawt a, he chhungkaw vua leh vang zinga mi ani ang tih rin ngaihna ka hrelo reng reng.

"Engtik nge i lo thlen a?" JH-an a lo tih chuan "Kan lo thleng chiah, kan Princess-i a bazar rei lutuk a lawm mawle" a ti nghal thuai a, chutah JH-a chuan ka darah vuanin "Ka makpa nimai tur Rinhlua a nih hi" tiin min hmelhriat tir ta a!

Min ṭhawnglo ti ila chuan dawt chiang tak ka sawi ngei ang, ka â deuh chhulh ni ta berin ka hria, Lalrinhlua hmela inthlahrunna lang chu ka va hmu thei a, ani pawn nuam a ti biklo tih chu a hriat reng, kan inṭhen chhan ber Aizawla a bialnu kha Princess-i tiin a sawi tak kha mawle, kha nula kha JH-a farnu tihna maw! 

Ka lu ka thing nawk a, ka taksa te chu an hit mup mup maiin ka hria, kei hi ka awm loh tawpna tur hmunah ka awm a ni. 

Pa pakhat lokalin "Khawilam nula nge?"tiin ka hma ah chuan a lo dinga, JH-a nen an in ang deuha a pa anih ka ring, "Mampuia ṭhiannu anih hi" nuisanga JH-a nuin a lo tih chuan min chibai vata, "JH-a pa ka nia, i ril a ṭam tawh em kan laklawh lutuka kan tlai phah ta vek a lawm" nelawm takin a ti a, ka nui ve hleithei tawh meuh lo, a tu a te pawh chu a hmuh dan a dang zo vek tawh, ka awm an ti nuamlo takzet a ni.

"In rualin zanriah kan ei rihlo mai ang, mi an tam dawnlo i ti sia, hetiang hian i ti leh vak a" JH-an a nu en chunga a tih chuan a nu hmel chu a ner nang a, "Enge zahthlak awm" a lo ti hlak a. 

"A pawi reng renglo, inchung lamah han eidun rawh u" apa chuan a lo ti thung.

"Chho ila" JH-an a tihlai mek chuan "Engtin nge kan koh dawn che?" A pa chuan a lo ti leh a "Ah....Mam....bawihi" ka ti bah nak a, ka piah lawkah Lalrinhluan ngun em emin min lo en reng bawk.

A lam ka va hawi chuan minlo nuihsak a, Reny kha lo kalin "Ka ril aṭam tawh ania, lo kal rawh" tiin a pawt zui dawr dawr a, ka awmdan chu ka hrethiamlo, ka thin a tawt up up a, ka hah hluah hluah mai bawk.

Kailawna kan chhoh laichuan ngawirengin ka kal a, JH-an min enreng tih pawh ka lo hmu lo, "Tinge, i va nawmloh hmel ve?" inchung Common room kan thlen hnu chuan a ti a, "Engmah a nilo, vawin ka chau deuh aniang haw hma a mut ka chak tawh" ka lo ti ve vat a. Min enchik em vangin a hmel chu ka en rei duhlo.

Lalrinhlua nen kan inhriat dan min zawh ka hlauh tehlul nen min zawt ta lo hlauh a ka awm a nuam huai mai. Chutih rualin he in lianpui hi ka len ve na chi anilo tawp tih chu ka hrechiang tawh ngang mai bawk a, hetiang tehnuai karah hian JH-a lam hawi thei niin ka inhre tawhlo bawk.

"I ril a ṭam tawh em?" a zawhna chu ka chianglo, engmah eichakna ka neilo a, ka ipik hluah hlauh ringawt tawh, ṭhutthlengah ṭhuin ka khup ka tuai  sek a, haw vat vat  mawlh mai chu ka duh tawh a ni.

"Ṭam lo a mahse, haw vat ka ngai a ka hmanhmawh tawh a" ka tih chuan "Lo awmla eitur chu ka zuk la ange" tiin a kal nghal vut a, a pen thawm hla tial tial chu ngaithla chungin engthil thil emaw ka ngaihtuah kual a, helai hmuna Lalrinhlua nen kan i hmu leh nawlh mai hian ka hriat chhuah duhtawh miahloh thil te kha min hriat chhuah nawn tir awn awn mai.

Mumbai ah khan thla engemaw zat kan inzui ve hman a, ka ringin ka duh em em ṭhin a, ka ngaihzawng anih mai piah lamah ka ṭhianṭha tak a ni tel bawk, Mizorama haw a tum thu min hrilh pawhin zui ka hrehloh thu ka hrilh ve hial anih kha, khatiang khawp khan a tan ka lo inhuam ṭhin a mahse, a hnen aṭanga ka hmuh chu bumna leh hnawlna thu chauh a ni.

Zui ka tum thu ka hrilh hnu maiah min ṭhen a duh thu leh Mizoramah ngaihzawng nghet a neih tawh thu min hrilh a, khatih lai khan ka kehchhe tak meuh a ni, kei chu a lungleng hnemtu tura a kawp mai mai lek ka lo ni a, a duh hunah a nuna a seng luh a a thehchhuah leh mai tur atan chauh a a kawppui ka ni. 

Ka ngaihtuah let a piang hian ka na thar leh ṭhin, tunah ngei pawh thinlung hliam a rawn kaitho leh a ni ber. Amah hnaiha awm ka duhlo a, a hlat thei ang bera awm ka duh laiin JH-a lam hnaitak a lo ni leh zel a, hetiang anih laiin JH-a nen kan inkar hi ka kaltlangpui zel thei a ngem ka chiang tawhlo, engkim hi a diklo vel vek tawh.

Ka chal a rawn dawm rual chuan ka hawichhuak vat a, ngun fe maia min en chungin ka chal chu a dek vang vang a "I khua a sik lo" a ti zawi ruih a, a lo let leh thawm reng reng ka hrelo a, thil ka lo ngaihtuah nasa deuh anih hmel.

Ka hma ah eitur tui hnai tak tak lo chhawp pahin ka ep chiah ah chuan a ṭhu a, reilo te ah Fiona-i kha lo lang ve nghalin chawhmeh chi hrang hrang a lo keng a, "Umambawih Buh ka lo laksak ve tawp mai che a sin" inthlahrun hmel deuhin a ti a, "Aw ka duh zawk a lawm" ka tih chuan nui var var chungin min kalsan a, Buh lo te chu chaw tak tak angah keichuan ka ring ve thei kher lo ang, hetiang vang rinagwt pawh hian an chhungkaw ho nunphung chu ka ṭawmpui chakloh zawng tak a ni hrim hrim tawh.

"Engthil emaw sawi duh i nei a ang ka ti" chawhmeh min suah sak mawlh mawlh paha a tih chuan ka thinphu a rang nghal dup dup mai, "Engthil?" rang deuhin ka lo ti a, "Ka hre biklo le, nichin lawk aṭang khan i awmdan a dang riau" kiai suk chungin a ti a, min zawt thui ang tih ka hlau kher mai, dawtsawi ka thiam silo a, engkim hrilh tlang vek lah ka duh bawk silo.

"Kan chhungkua chu i hmuh ang hi kan ni mai, inchhungkua anga inpawh leh nuam kha ani ve lo maithei a, chuvang ania bul kan ṭan tak tak hma a heta hruai che ka duh chhan chu, i rilru i thlak daih loh erawh ka beisei" min en vung vung chungin a ti leh sup a, ka thil vei laimek a rawn sawi bawk si a awm a nuamlo rauh rauh a, chhang lo a ka ngawi reng chu ka kut rawn vuanin "Ka la hrilh miahlo che a tiraw?" zawi te in a ti leh a.

"Eng maw?" ka tih chuan min nuih chungin ka kut chu a tuai rauh rauh a "Ka duh em che a, i bulah hian tih tur leh tihloh tur ka thliar hrang thei meuhlo tih hi, a la hma i ti tih chu ka hria a ka nghak thei meuh silo a ni" thutak zetin a ti a, a thilsawi chuan ka awm a tinuamlo zual ting mai.

"A daih hma in eitawh rawh le" fian min pek paha a tih chuan ngawirengin ka lo ban a, kan chaw ei chu an siam tui viau nain ka eihleithei meuh lo. 

Kan eikham chuan bathlarah kan ṭhu a, chuta ṭang chuan an Colony pawh chiang takin a lang thei a, he hmun hian ka thawk a ti ipik hluah hluah tawh, hmun mawi leh nuam tak nisi ka vawikhat kalna aṭanga ka ngainat miahloh hmun ka la hriat chhun a ni mai awm e.

Kan hmuhphaka Buiding lianpui pui ding chu tute in nge tih min hrilh lai chuan a hmel chu ka lo en reng a, amah hrim hrim hi chu ka duhlo pawh anilo, tlangval hmelṭha leh ngainatawm tak a ni a, ka tan phei chuan a ṭha mah mah a chuvang zawk chuan ka zuam ta lo a ni ber mai. Lalrinhlua a lo awm ve kher bawk nen, bul kan ṭan tak tak hma a kiansian mai chu ka tan a ṭha ber zawkin ka ring bawk.

"Min thlah tawh mai la, ka chhungten haw har min ti lutuk ang" ka tih chuan min hniallo a, a room ah lutin Jacket a ha a, a lo chhuah leh laichuan bathlarah kei ka lo la dinga, ka kawngah min rawn pawmin nghet deuhin min kuaha, JH-a hi midang daih chhungkaw dang daih ami nisela ka ti, Lalrinhlua awmna nilo leh he chhungkua ami hi nilo sela ka ti bawk, chu erawh ka duhthusam mai mai a ni.

"Utluangte" tih ri ka hriat rualin a kuahna aṭang chuan ka inla hrang thuai a, Fiona-i kha lo kalin "Pa Sangmawian han ko lawk teh atia" a lo ti a, inhnuailamah kan inzui thla nghal a, midang pawh an lo ṭin tawh hlawm a. Room danga min luhsan laichuan sitting room ah ka lo nghak a, choka lamah thawm ala ri hat hat renga, ka rilru a hmanhmawh tawh ngang mai.

Pawna lo nghah mai ka rilruk a, kalchhuah mai ka tum laitak chuan ka hlauh ang ngeiin Lalrinhlua a rawn lang ta hlawl a "Lokal lawk teh" tih pahin min pawt nghal dawr dawr a, lo ṭanna hman a awmlo reng reng. Store room niawm tak thim deuh ruih ah hian min pawt lut a "Min thlah vat rawh" tih paha a kut thinthlak ka tum chu bangah min nam bet rawpin "Nang hi min rawn umzui em ni, JH-a te i rawn kawp a engthil nge tih i tum?" a ti vin kha kha a, a thil sawi dan kher kher chu ka ring theilo zawk, ka umzui angah a ngai a maw!

"Teuhlo mai, he In hi i Princess-i te in kha ani tih hria ila chuan ka lo kal hauhlo ang" ka lo ti vin hlar a, "Anih chuan i hre ta bawk a, tawpsan vat ang che, tunge i nih Reny leh midangin an hria anih chuan a pawi viau ang" min vau awka zetin a ti leh a, sawi ngaihna pawh ka hrelo, ka thinrim lutuk chu ka ṭawng hleithei tawhlo a, thip zetin a hmel chu ka melh ngar ngar ringawt  tawh.

"Duhsak deuhin ka hrilh ang che, hei hi i awmna tur hmun a nilo, i chanchin an sawidan hi hria la chuan i lo kal nawn duh tawhlo zawk ang, chuvang chuan JH-a lakah hian inham buai duh suh, ila inchhir mai mai zawk ang, ka duhsak vang chein ka hrilh che anih chu" a tih leh khar khar hnuah  min chhuahsana. Min duhsak vanga sawi anih chu ring kherlo mahila a thil sawi erawh ka ring nghet hmiah, he hmun hi ka awmna tur hmun a nilo chiang alawm JH-a bul pawh nise.

Pawnah dingin JH-a chu ka nghak a, zanin ngei hian hrilhvek mai tur em mawni dawnni. Sawidan tur mawlh mai chu ka bangbo a, an ina ka kal hnu lawka ka sawi anih chuan a chhungte vang angah a ngai ngei ang chu.

"I hman chuan kan kal dawn a mi?" ka hnunglamah a lo tih ri vang chuan ka inher vat a, ngaihṭhatloh hmel zeta min en in a Motor hunna lamah chuan a kal a, Motor kawngkhar min hawnsak laichuan khawngka aṭanga Lalrinhlua leh Reny te rawn inzui chhuak chu ka hmu a, an hlim dun hmel kher mai.

Kan tlanchhuah dawn thleng chuan an ni pahnih chu ka en zui a, ka thawk a pik takzet, ka duhtawh hauhlo a ka haw em em chung hian tinge maw ka rilru hi ala nat thar reng mai le!

"Zanin chu ka lo leng ang" ka kut rawn hum paha a tih chuan ka lo phu deuh zawk a, nghet zetin a kut  chu ka lo hum a, ka lam a rawn hawi zawk a tawitea ka lo nuih chuan a nui ve lo a, ka kut erawh a hum nghet sauh sauh thung.

Kawngtluanin inbe loin kan ṭhu a, chutihlai  zawngin ka kut a hum chu a thlah miahlo bawk, kan kawta a dinlai chuan che changloin ka ṭhu renga, "Bawihno" tih pahin ka kut chu a hmer salh a, "Reilo te ṭhu lawk ang, chuan i kal dawnnia" ka lo ti a, lo len a duh tih ka hria a mahse, tunah tak hi chuan lokal rihlo sela ka duh.

"Min ngai em ni?" a sawizawh rualin kan nuidun hak a, a lam ka hawi chiah chu min rawn hnaihin ka hmui a rawn khar a, muangchang leh damthlupin, chutah chiah chuan thil pakhat hriat chhuah ka nei, JH-a hi ka duh tawh takzet a ni. Mipa hmelṭha leh ngaihawm satliah chauh a ni tawhlo, min fawh rual hian engkim hi ka theihnghilh ṭhin a, tuna min fawh ang chiah hian, ka rilru hahna leh ka ipikna zawng zawng te kha an bo vek a, ka hriat chhun chu min fawhna avanga ka lungphu rang zaih zaih chauh chu a ni. 

Tawpsan mai chu ka tan a harsa tawh, he mipa ka tana ṭha chungchuang tak hi engtin nge ka han hnar theih tehlul ang, ka mamawh hunah ka tan a awm ṭhin a, a bulah hian ka thla amuanga, innghahna tur ka nei tih ka inhre hliah hliah ṭhin, chuti anih si chuan ka hlauhthawnna vang ringawta kalsan chu thil theih ani dawn em ni.

"I sawiduh kha sawi tawh rawh, ka ngaithla ang che" ka biangah dawmin min fawp leh vang vang a, engmah sawiduh ka nei tawhlo, tun ang hian engkim hi a ṭha zawk, Lalrinhlua a ni emaw midang vanga ka nun ka lo tih hrehawm chhan tur ka hre hauhlo bawk.

"Ka bulah awm reng ang che" tiin a nghawngah ka kuah chial a, "Ka awm reng dawn, khapa vanga i nat leh ka phal tawh lo ang" min fawh leh mai a tum chu a hmui ka lo hupsak vat a.

"Engtin nge i hriat?" phawk zetin ka lo ti a.

"Engkim ka hria" a rawn che zui leh chu a biangah dawmin "I hre tak tak maw?" ka ti nawn leh a. "Ka hriat chianloh hi ka duh viau thei dawn em ni" a biang ka dawmna chu kuaithla in min fawp leh nghalzata, a duhthawh ngang mai.

Thawk la dun hak hak chungin kan in ena chutah ka chal rawn tauh datin "Keimah chiah min ngaihtuah ang che" nuisuk chungin a ti a, pawm a nuam takzet, ṭawngka in chhanglo mahila ka thinlung hian a pawm thlap a, tun aṭang chuan amah chiah, amah JH.Lalhruaitluanga chauh hi ka ngaihtuah tawh ang.

JH -pov

"U....Victora a lo kal a, inhnuaiah a nghak che" ka farnu Reny in a tih chuan ka lehkhabu chhiar lai dahin ka hawichhuak vat a, Lalliansanga pawh chu engah nge tun ang hunah hian a lo kal ziah le, chhun zan zawma inhmuh reng hi a ning ve lo em mawni?

"Lo chhoh tir mai rawh" ka lo tih chuan kal ta mai loin a lo penlut a "Vawin a mi kha i bialnu tak tak maw, in nih na a rei tawh em?" ka dawhkan bawha rawn kun hniam in ka lehkhabu chu a rawn bawh that a, "A hmelṭha em?" ka lo ti chu a ner nang a. "Hmelṭha e mahse, ṭha mawl an tih ang chi hi a nih duh hmel" a chimawm chhuaha a mitko san ak ak chu a chalah ka lo kuksak a, alo ṭeu nghal hlar a.

"Nang ang hi a lawm ṭha mawl chu, pasal neih tum uaih uaih tawh hi chawmhlawm i la nih hi" ka ṭhutna aṭanga ka tho zui chu nui hak hak chungin min lo zui a.

"Tak tak chuan a chhelo khawp mai, a nu hnap mai a ka duhzawng chi tak a ni, thu a awih phei chuan ka duatsak viau ang che" ka banah rawn uaiin min zui dat dat a, "Enge min melh rum ngawt a, ka duatsak ang che ka tia lawm" nui hak hak chunga a tih leh chuan "Han in en teh, nangmah tê hian anih hi thu awih duhlo, i sam te reng reng hi" a sam tan thar leh rawng rualkhailo zeta rang nuaih chu tuai thur paha ka tih chuan min thlahin a tawlh hla zui daih a, "I sual emai, i bialnu chu ka duat miahlo ang" tih nang nang pahin ka hmaa kailawnah chuan a pen thla hlak hlak a, Liansanga lo chho nen an intawk a,  a lo chhaih zauh chu duhloin "Vic...lulian" a ti vin hlar a, nuihui chunga Liansanga lo thleng chho chu ṭhutkhawmna pindan lamah ka lêtsan a.

"Rinhlua nen chuan an inhmu maw?" a ti ṭan nghal thawr a, "Hmu e, i sawidan anglo hlira ka awm hian ka tifuh ziah" ka lo ti hluk chu anuih a za kher mai.

"Pui lo che ila in inkawp ka ring lo emai" nui hui chungin a ti leh a, a Tactic ṭhing zet zet kha ka hmang ṭangkai a zeng pawh a nilo, engvanga hepa inla zei lutuk dawt phuahchawp hlir ngaithla tur hian a thurawn ka lakziah chhan hi ka hre tawh nek lo e.

"Chuan engtin nge i tih zel dawn a?" 

"Enge ka tih ang, tunah chuan ka bialnu ania, a bak a awmlo, mi bialnu hlui anih lam ka ngaihtuahlo" ka lo ti leh mai a.

Mambawihi hi Rinhlua bialnu ani tih ka hriatna a rei tawh, Reny vangin an inkarah ka inrawlh a, Rinhlua pawh ka vau nghe nghe anih kha, khatih lai kha chuan Rinhluan ngaihzawng anei tih chauh kha ka hria a, ka farnu vang chauha inrawlh ka ni bawk. A mimal takin Mambawihi kha ka va hrelo a, a hmel phei chu ka hmu hauhlo. 

Rinhluan ka farnu zawk a thlang a, haw viau mahila kan farnu hian a atchilh tlat si a, tuilo chungin ka pawmsak leh ta kha a nia, khatih lai khan Mambawihi hi ka la hrelo.

Ka hmuh hmasak ber na chu a ṭhiannu min enthla reng ṭhintu nena kan office kawt tual zawla an inzui laikha a ni, ka hmuhtirh aṭangin ka mit a la a, hriatchian ka duh nghal a, Liansanga hi lo ngaihven turin ka ti anih kha, khang hunlai pawh kha Rinhlua bialnu hlui kha ani ang tih rin ngaihna ka la hre chuanglo.

Ka office tukverh aṭangin tlai bana tualzawla an lo chhuak hi ka hmu fo a, Liansangan "I hmingin cake ka thawn dawn ania" atih khan a thawn tak tak ka ringlo a, a lo thawn tak tak chu niin, he ka Assistant inla zei lutuk chet dan hi ka duhdan ani ngailo reng reng, bul ṭan dan atthlak tak niin ka hria, cake kha a eita em tih pawh kan hre zui chuanglo ania.

Ṭum khat chu Canteen ah ka hmu tehhlawl a, hnai takah phei chuan a hmelṭha lehzual, biakpawh a inhmelhriattir ka tum laiin Lalrinhlua bialnu hlui ani tih ka hre zui a, chupawh Zosangliana vang liau liau in. 

Board game kan khelh ho laiin Rinhlua bulah "Hei hi I bialnu hlui kha a ni em, ka ṭhiannu nau a nia" tiin a phone a thlalak kha a hmuh a, ka ensak khan kha nula kha ani tih ka hre ve chauh a, Zosanglianan kawp a tum thu sawiin Ruatkima hoin a kawp thei chiah em tih ah an inchawi hlawm a, kha tah khan keichuan ngaihven loh ka rilruk ta zawk a. Mahse, kha zan khan Zosangliana nen khan ka hmu duna, beisei loh lutukin amah zawkin min lo pan a ṭanpuina min rawn dil anih kha, hmeichhe mal tak leh ṭanpui ngai ani tih ka hre ta chiah bawk.

Tunah zet chuan tunge anih tih chiang takin ka hre tawh a, ka chik poh leh ka duh zuala, Rinhluan a mizia Zosangliana bula a sawidan nen kha chuan a mizia ka hmuh dan chu inpersan tak a ni,  hmeichhe duhawm tak leh fel tak niin ka hria.

"I atchilh lo chauh tawh a nih hi a" Liansangan a tih chuan ka nui mai a,ka atchilh  hran ka hrelo mahse, ka duh hle tih erawh ka hria. Rinhlua ngaihzawng hlui anih lam ka pawisa tawhlo, tunah chuan ka bialnu a ni tawh, chutiang chuan amah pawh a inhriat ka beisei.

(End of chapter - 11)