GOMENASAI (CHAPTER - 12)

GOMENASAI - Ahmangaihi violette khiangte

CHAPTER-12

Ka hna dil Exam kan neih ni chuan Alawmin min kalpui a, kan ṭhutna room ah ringawt pawh exam chu kan ṭhahnem khawp mai, ka theihtawka ṭha chuan ka chhang ve chuan ka hria a beisei erawh a sang lo viau. Alawmi lahin tling turin min han ngai nghal tehngawt a "Department khatah kan thawk tawh dawn silo a hrehawm dawn e" a ti sek sek reng a.

"Ngawiteh sawipuitu pawh kan neih ve loh hi" beidawng ru zetin ka lo ti a, ka rilru tak pawh a ni, tunah hian tlingsa te pawh an awm ka ring hial zawk, hei hi kan ram kaldan phung leh kan ṭhanmawh bawk pakhat a ni, thiamna vang nilemlo Minister leh sawipuitu neihṭhat vanga hna hmu an kat nuk a, mithiam tam tak an chuang lehlawia, hmelhriat ṭha neive lemlo keini ang tan chuan beisei a bo takzet.

Ka haw lamah Uramtei ka tlawh kawia, a lo zia sawt khawp maia, hna a ṭan leh vat theih a inrin thu te a lo sawi siam siam a ka lawmpui kher mai chutih rualin ka hna erawh a tawp dawn hnai tihna ani mai thung, rilru a buai ru nak a, eizawnna tur engthil emaw ngaihtuah vat vat ka ngai a ka rilru a hah ru riau mai bawk.

Uramtei te In aṭanga ka chhuak chu Nu Muani bungraw sem tur lo chhuak chiah nen kan intawk hlawl a, "I pa leh i unaunu an awm lo a, eirawng lo bawl rawh" a lo ti var a.

Ka inthlak sawk sawk a, eirawng ka bawl laichuan ka nuin min lo be ve tehhlawla, Christmas vuak vetah khan kan inbe miahlo a, kan inbia chu sawi tur neuh neuh a tama darkar khat dawn chu kan inbe awm e, pawisa an harsat thu leh a damsamloh thu a lo sawi a, ka nauten(a pasal nena an fa te) School an ṭan leh tawh a, lehkhabu leh eng ilo lam khawmna tur pawisa puk min lo dil a, ka lo remchan chuan kartharah Aizawl lo kal  nghal a duhthu a sawi bawka, a inthlahrung em em bawk si a, ka pawisa khawl ang ang chu hman tir ka hreh hauhlo, ka lo neilo anih pawhin engti kawng zawng emaw tala tihdan ngaihtuahpui chu ka tihtur pawh ani ve reng rengah ka ngai, min hringtu ka nu a ni miau a.

Ka nu pasal Pa Rema hi Lawngtlaiah Forest Department ah Master roll-in a thawk ṭhin a, kum kalta mai khan a hna chu hotu lam aṭangin a lo tawp deuh thut a ni awm e, a aiah an khua ami tho sawrkarlai party mi leh sa ten an lo sawipui nitur a ni, chutia a hna a tawp hnu lawkah chuan Nerve ṭhalo vangin a awngrawp zui mai bawk si a, ka nu alo hrisello zui ve zel bawk nen an khawsak a harsa chho viau a, Christmas dawn khan ka nu te nupa chuan angailo an ti chungin ka naute mamawh leina tur pawisa chu ka thawn tawh nghe nghe.

Lunglenga kan In sakna tur atana ka pawisa khawl kha ka Bank Account ah khawih chet lohin ka la dahṭha ve ngar ngar a, Christmas dawn khan ka pi leh pute mamawh leinan ka hlawh kha ka hmang lehta daih a, a pung mawh ang reng viau a, pawisa khawl thei viau e tiloin lakchhuah leh hi ka ui ngailo, tunah pawh a ṭulna in min nang lehta a ni mai.

"I remchan hmasak berah lo kalla, i pum nuamlo pawh chu kan entir nghal dawnnia" tiin ka nu chu ka hrilha, lawm tih hriat taka a ṭawng te chuan ka hnuk a ti ulh lek lek ṭhin, ka lakah hian inthlahrung viau tur a nilo mawle, heng te avang hian mipa nih ka chak ṭhin, mipa niila chuan tun ang ngawt ka nih hi chu ka ringlo ve ṭhin a lawm, hun te hi an kalmuang ka ti takzet, liam zung zung sela nakinah chuan ka dinhmun te pawh a zia ve mahna, ka chhungte ṭanpui thei dinhmuna din hi ka duhthusam a ni, chutiang hun ka thlen hma chu pasal nei thei pawhin ka inhrelo.

Pasal!

Ka rilruah JH-a a rawn langa, thlakhat dawn chu ka inzui ve tawh, ka pasal tur ang hian ka ngaihtuah ngamlo kan dinhmun inthlau lutuk mawlh mai hi, amah hrim hrim ah hi chuan harsatna ka neilo, chu a hnekin ka duhthusam thlap mipa ka tawng zawk in ka hria, a indahsang ngailo te, ka thil tih ho te te pawh min phur pui thiam ṭhin te, ka sawi a piang a ngaithla peih zel thei te, a bula ka awm chuan ka hahdam sawng sawng ṭhin anih kha.

An Department a ka hna dil chungchang kha ka hrilh lo a, a zinna ah Signal a ṭhatloh vangin ni thum zet chu kan inbe mumal tawhlo bawk, a sawidan ah vawin hi alo haw hun tur a ni tawh a, engmah chanchin a rawn nei zui ta silo a, alo haw ta lo em mawni dawnni?

"Zanin chu lo kal ve la" Irene-i aw ka hriat rualin ka ngaihtuahna a lapeng a, dawhkan bawhin a rawn thle zawi nguai a, tunlai chu a leng chhuak hi arawn rui haw deuh phual zelin ka hria, kartawp a thlen tawh hi chuan chhuahvah na tur hi a nei thei ziah bawk, hetiang hian min sawm ve ziah a mahse, ka inhman ṭangkai tir tawhlo ang.

"Ka inkhawm dawn" tih zawngin ka chhang a, a ner nang nang chu ka chetsan mawlh mawlh a, chutihlaiin phone a hmanga zanlam chu hman nawm an la tum hmel kher mai, an ṭhian tu emaw piancham an lawm dawn anih hmel.

"Lalmambawih min kalpui ang che" pawr zeta a rawn tih chuan "Ka hman lo alawm" ka lo ti leh mai a. Zan lam phei chu Patean kan inkhawm anihloh chuan kal chhuah a khap tlat tawh a, kei ka tel ve dawn hi chuan min phalsak veleh khauh ṭhin, chu vang chuan Irene-i hian min hman ṭangkai a tum fo a, han zui ila a hmunah min thlauhthla leh theuh a,  a hmapawn ka talbuai lek lek fo a, tunlai ruih a ching ta zui bawk nen a ruala kal chhuah hi ka tan a him lo a ni ber.

"Min kalpui ang che, ka pa in keimah a kal chhuah a phal dawn hleinem, kan rei lo ang darkar hnih a rei berah ani mai" a ti zui mawlh mawlh a, a hmuhloh lamah kei ka lo ṭhensak a, mi tihluih hi chu a chindan ṭhan a ni mahse, kalpui chu ka tum hauhlo.

"I bula kal ka peih tawhlo, a hmunah min kalsan daih zela hmelhriat ka nei ve ngai silo, in rui thei hlawm si..." ka sawizawh hma chuan a lo phul hlut a. "Teuhlo mai, i in ve ngaisiloa bakah ka ṭhiante kha i nel ve bawk silo a, awmhran i duh ka rin vang alawm, zanin chu kan inzui char char dawnnia, ka kalsan miahlo ang che" phur zet hian ati leh barh barha, ka ring zo lo nasa mai, a hmun thleng chiah ila chuan tuna a thilsawi te hi chu a theihnghilh leh vek tawh ang chu. 

Phone hmang lehin a tho zui a "Pahnih kan ni dawn a nia, Michael-an a car-in min lo lam rawh se, kan In piah kawnah khan kan lo nghak ang" a ti phei lang lang a, ka ngei ru kher mai, a duh ang anga min kaih kawi hi a tum ziah a tunah chuan ka ngaihdan ani em em tawhlo, a ṭanghma a hai bawk a tum eng ang mahse, keipawn ka ṭanghma haiin ka kallo kher ang chu.

"Ka kal ve dawnlo ania" a ti zui leh hram chu a hre duh tawh ṭhaklo, a thawm ka hriat leh chu a room kawngkhar  khara a zai ri a ni. Patea lo haw chu thingpui ka lo pe vat a "I nu ala haw nange?" Sitting room aṭanga a rawn tih laichuan Nu Muani pawh a lo thleng ve chiah a.

"Matei a haw tawh em?" Patea hriat hlau zetin a rawn ti sar sar a, lu ka lo buk chuan thaw huai hmel a pu bawk, la haw lo pawh nisela engtin tin emaw chhuanlam a siampui thiam leh thoin ka ring, nufa ṭangdun thiam ve tak chu an ni.

"Ei rel i peih chuan lo tilum la, ka intleuh zuai ange" a chawhmeh rawn khai haw chu dawhkana dah sawk sawk pahin a ti a, Fridge a ka khung mawlh mawlh laichuan inbual turin Towel nen a lo chhuak leh a "Zanin kha haw har su aw, i unaunu hi i control a ngai ania" phun ser ser chungin a ti leh a, chhangloa chawhmeh ka khung mawlh mawlh chu min en zui vung vungin ka hria.

"Ka ril a ṭam aniang i thingpui siam chu ka in tui hle mai" choka lampana patea lo phei laichuan ka lo ding chhuak vat a, tun hun hi sawihun tak niin ka hria, a no ken lai dawhkana a dah chu ban vatin " Pate kar leh hian ka nu inentir turin a lo zin lawk dawna hetah kan thlen tir thei mai angem, ni hnih khat vel chauh a ni dawn tho a" zawi deuh tak chuan ka ti a, Nu Muani bula sawi hmasa zawk tur tak chu ka ni na a mahse, ka pa chhungte lam hian ka nu hi an ngaithei vak silo a, Patea zawk hi ka rawn hmasak angai tlat a ni.

"A enge a entir dawn a?" lawm vaklo hmelpu a a tih chuan inthlahrun a na duh kher mai, "A pum lam ania, a ulcer anih ka ring deuh, anihloh pawn a rilphir vel te pawh ani maithei" ka ti niah niah a. 

"Pawisa a rawn dil che ani lo maw?" a tih chuan ka ip ru ngar a, ka nu pawisa ka thawn hi vawihnih lai chu a hre tawh a min hau chiahlo nain a lawm vaklo, ka nu a lo ngaitheilo sa bawk nen inhnim hnailo tawp sela min duh zawk tih pawh ka hria a, an bulah hian ka nu chanchin hi ka sawi ṭha ngam vak ngailo a, an ngaihtheihloh chhan ber pawh ka nu hian ka pa boral hnu reilo teah pasal aneih leh mai vang a ni, Pa Rema leh ka nu inneih khan ka pa lung kan la phun lo a chu vang chu a ni deuh ber.

Ka Ni phei chuan "I pa mitmu pawh a la keh hman em lo a, uire nen danglamna a awm lo" tiin ka hnenah a sawi hial a, ka pi leh pu chuan sawi an neih awm ka hrelo thung, kan intlawh pawh tam lo bawk a, ka nu chanchin pawh kan sawi ngai meuhlo, Mizorama kan awm hnua kan inbe pawp hi ka Patea lo ka chhungte dang chuan hria an awm kher lo ang.

"A pasal te khan helamah chhungte an nei nange?" ṭawngkam dam deuh zawk chuan a ti leh a, "Neilo aniang" ka ti leh mai a, lo nei pawh nise ka nu chu hmuh ka chaka kan hnenah rawn thleng thei sela ka ti takzet.

"I Nu Muani zawt ve phawt la, a ngaihdan dan ani mai a lawm" a ti ve ta hram a, Nu Muani thu thu atih takah chuan keipawh ka thaw huai a, amah rawn ve hrim hrim kha angai ani maia, a thu zawk chu Nu Muani tho a ni, ka nu nen an inhre chiang ve em em lo bawka harsatna a awm ka ringlo.

Nu Muani inbual zawh chuan chawei ka siam zui thuai a, chawei lai chuan ka sawi lehta ngei bawka, Patea erawh a ngawi reng thung. "Aw.....lo thleng sela, chutiang te chu lo thleng rawh se a hmel hmuh pawh a khat a lawm, pasal neih a hmanhmawh leh lutuka a vanduai phah mange, harsa deuhin thingtlangah a awm chu ania" a ti zui barh barh a, a sawi tawp lam chu a ṭul lo ka lo ti ru kher mai, Patea ṭhu ngil hluai chu a melh zui ralh bawk. 

Irene-in min mitmei ru zauh zauh chu ka hmu lo der tlat a, titi dang sawiin "Uramtei pawh a zia deuh tawh a, hna pawh a zawm leh thei tawh dawn anih hmel" ka tih chuan Patean min lo bengkhawn rang kher mai. "I hna i chawlh angai dawn a ni maw?" a lo ti khauh a.

"Ummm nia...hna dang zawn ka ngai ang" ka ti a. 

"Zawn zawn a ngai hleinem, min pui anga ka indaihlo bawk sia a tihzia khawp ang chu" phur zetin Nu Muanin alo ti ve thung a, chu kher chu ka chakloh zawng tak, engmah ka tan hlawkna a awm ve dawn hauhlo bawk, chu aichuan kan khuaah haw ila ka ti fuh zawk mai thei.

"Hna a zawng leh ang chu, ani te chu api leh pu te enkawltu alawm, hna a neih ngei ngei angai" Patean a lo ti vat a, Nu Muanin thingtlanga awma Inpui nghah a hlau bawka chutah kher chuan min hnial hauhlo ang. "Hna ruak dil tur kan ngaihtuah dawn nia" Patea chuan a ti a, ka hna dil chungchang erawh ka la sawiduh biklo, ka hmuh ka inbeiseilo bawk nen sawi kher pawh chu ka duh ta lo zawk mai.

"Pa....Mambawihi nen Birthday lawmna ah kan kal dawn ania, kan ṭhian hnai deuh an nia" pangchang aw fe a Irene-in a lo tih chuan ka va melh zawk a, min sawi tel hram chu ka ngei ru kher angreng, loh theihloh hian zui leh nge nge hi angai ṭhin.

"Tinge zan lamah hian Birthday lawm hi intih ziah a?" Patea chuan min melh tawn zak zak pahin a ti a. " Mambawihi ṭhiannu ania, ka va kalpui ve lawk ang, min kalpui ziah sia, kan lo haw harlo ang" Irene-i chuan a ti zui leh zat a, Nu Muani a ngawireng thung.

"Tu i ṭhian nge, nang hi ṭhian iva nei chak ve" Patean chang fek fawka a tih chuan ka thin a sa ve phat tawh, vawitam hetiang hian a thiltihah keimah zawk min puh fo a, tunah chuan ka ning ve thawkhat tawh a ni " Ka ṭhian a ni lo" ka lo ti ram hmuk a, Irene-in min melh rum nghal rawm bawk.

"I ṭhian zawk a ni maw?" ti a Patean  Irene-i a melh chuan alo ṭeu hlar a, " Ni lo..  ka ṭhianbik pawh a nilo, kan pahniha kan ṭhian a lawm" vin zetin a lo ti a. "Va kal ula lo haw har lo ula" Nu Muanin dam diai a alo tih chuan Patean a lo khap vat a.

"Kal ngei ngei a ngai em ni, chhun lamah te a theih loh em ni a?" keimah zawk min en avangin thawk ka lo la halh a, " Ka kal peihlo, tihtur dang ka nei a" ka ti chiah chu Nu Muani leh Irene mitmeng chu melh zui ngam pawh an ni tawhlo. Dawhkan chu ka thawhsan hmasa ber a Patean Irene bula kal chhuah a phalloh thu a sawi ri chu Sitting room aṭangin ka hrepha a, awm anuamlo ve rauh rauh mai, an nufa chuan min haw ru viauin ka ring mahse, Irene-i han zui leh chu ka chaklo ve bawk em a ni.

"Keimah in ka kal tal ang, ka rei dawnlo darkar khat vel a ni maia, hetah min lo lam anga min lo thlah leh thei bawk a" Irene-in a tih pawh chuan Patea chuan a phallo bur a, amah chauha kal chu phalsak se ka ti ru viau thung, tichuan ka lakah buaina anei zui lo anga a tihzia khawp ang.

Nu Muanin "Kal rawh se hetiang hunah chuan angai ve alawm" a lo tih pawh chuan " Zan chhuah angailo" a lo ti bur a, fa enkawl chungchangah hi chuan Patea hi a thu leh em em lawi a, helamah hi chuan Nu Muani pawh hian a tilui hleithei meuhlo thung mahse, Irene-i sualna hi a nu hian a tam zawk hi chu a thup pui a ni ber.

Thleng ka sil laiin ṭhenawmpa a lo lenga, damlo kan puiah Patea chu alo sawm a, an kalchhuak dun chiah tih ah hnunglam aṭangin ka sam a rawn ṭham ṭawk a, ka inring lo bawk nen ka thleng kenlai chu ka thlauh keh chiang kher mai!

Ka thinrim chu ka insum zo biklo Irenei hmaiah chuan thlengsilna tui bal chuan ka theh ṭhawta, a ṭe ṭhata min rawn ban nghal ruak bawk.

Ka samah bawk chuan a rawn ṭham leh a, keiin a awmah ka lo nem ngar ngar a, "In va han zahpuiawm tak e aw" kan piah aṭangin Nu Muanin min lo ti tlawk tlawk a, min ṭhelh chu a tumloh hmel hle bawk. 

Min ṭhamna a thlah hnu chuan rum zetin min melh zui a " A in la fel over vel hi ka ngei zawng tak, tlaiah ka hrilh lawk vek tawh alawm a duh leh dawnloh te chuan sawisa ve mai tur ania, ka pa bula khatianga sawi kher kha a ngailo" thinrim vanga khabe sai dar dar chung chuan min la melh ngar a. "Ka kal dawnlo tih chu ka hrilh che" ka lo ti ve sak thung.

"Dawt sawi suh" vin zeta a tih paha min rawn nam leh mai a tum chu ka lo tawlh sawn a, amah zawk chu a tlu ṭhelh nghe nghe, a thinrim zual sauh a min melh thluk tawp tum ang hrimin min melh zui bawk.

"A reng rengah Lalthani pawh khatia a inhek ang zawnga thil sawi kha ka ngaihdan a ni vaklo, ṭha te te a sawi ṭhin tur, i unaunu bulah i theihloh thu chu sawila, ani pawn a tilui lo ang che" Nu Muanin a tih chuan " Ka hrilh reng" ka lo ti  nghek a, thinrim ve tawh nen tum aiin ka ṭawngringa ka vin nghek ani ber, Nu Muani lawmlo hmel chu hmuh a nuamlo ngang mai.

"Khatin mi vin hlek suh, tun hnu ah chuan i unaunu hek zawkin ṭawngkam nei tawh ngailo ang che, mi biak dan te kha mi zahlo em em lutuk, vawikhat mah khatianga vin khan min be tawh suh" chhan zui chi a ni tawhlo, min bensawk duh mai tur hmel puin min en tawh.

Chhuata ka thleng tihkeh chu chhar khawm sawk sawkin ngawirengin bawlhhlawh bawmah ka paih a, sitting rooma Irene-i la phun hlak hlak chu ka ngaithla reng bawk a, ka chungchang hlir a sawi vangin a ngaihthlak loh theiloh, "Intih fel tum lutuk, ka ngei zawng tak, thingtlang nula inla strict satliah, khawpui nunzia man phalo" tih ang reng a ni a sawi ni, ngawi rengin thleng ka sil zawm mawlh mawlha, ka sa pup pup a ka thin a tawt urh mai bawk a, ka rilru a na veng veng mai.

Thleng ka sil zawh chuan sitting room phei ka hreh vangin choka chhuat chu ka phiat leh rih a, Nu Muani lo phei chuan ngaihtheihloh hmel zeta min melh vangin awm anuam lo duh ngang mai, ka thilsawi kha ka inchhir takzet tawh a, ka ṭah a chhuak hle bawk.

"Kan hnen aṭangin hna i thawka i hlawh chhe te pawh kan dil ngailo che, chawei laia ka thil sawi te kha, min puih i hreh hmel em em lehnghal a, tih em ah chuan he inchhung tana i thawh hlawkloh zia hi ngaihtuah rawh, kum sawm chhung a thlawnin kan chawm che ania, heta hna thawh zel te i tum anih chuan i hlawh hi rawn chhunglut tawh la aṭha ang" ka hmunphiah laichuan a lo ti barh barha, ka chhanglo, tunah tak hi chhan dan tur thlawt ka hrelo a, chhang thei dinhmunah pawh ka dinglo.

Ka lungchhe deuh tlat a, ka mittui a hnam ringawt bawk, Nu Muani la ṭawng mawlh mawlh laichuan Door bell a rawn ri a, Fridge hawn pahin Nu Muanin chuan min rawn melh zawk a, kawngkhar hnaih zawka ding ka nih vangin keimah chuan ka chhawn angai, ka hmunphiah keng chung chuan kawngkhar chu ka hawng a, JH-a hmel rinloh lutuk maia ka hmuh vang chuan ka hamhaih lek lek a ni!

Ka hmel a hmuh rualin min lo nuihsanga, min enchianga a nui tawp nghal vat thung, chutah ka samthur chu tuai thuak thuak pahin ka nuih ṭha veleh a, tun dinhmuna a hmel ka hmu chu ka hahdam huaia chutih rualin ka rilru a no riau mai bawk a, a awm nghenga ṭah chiam mai ka chak ber.

Lut tura ka sawm lai pawh chuan chik zetin min en a, a ngaih a ṭhatloh hmel kher mai. "Engtik ah nge ilo thlen a?" awki zangkhai thei ang ber ka tih chuan "Tlaiah khan" tih zawngin min chhang a, zawhna mitmengin min en reng a, ka sam chu ka tuai leh ringawt a.  Chutih laiin "Tunge lo leng a?" Choka lam aṭangin Nu Muanin a lo ti ve chiah bawk a.

(END OF CHAPTER -12)