GOMENASAI (CHAPTER - 13)

GOMENASAI - Ahmangaihi violette khiangte

CHAPTER - 13

Kawngkhar bula JH-a nen kan dingdun min hmuh rual chuan phawk lek lekin Nu Muani chuan min en a, engmah phei chu a sawi zuilo nain JH-a erawh a en chîk ngang mai, pakhat lah chuan biak lumlam pawh tum miahlo leh ngaihsaklo zetin keimah chauh chu min en reng a, a ngaihṭhalo hmel mawlh chu.

"Lo ṭhula hmun ka phiat laklawh lutuk a" ka ti a, a lu buk nghat pahin Sitting room a pan zui a "Inleng ilo neih dawn vang lek a nimaw?" zawite chang zeta Nu Muanin a lo tih leh chuan chhangloin ka ngawireng a, thip zeta min melh zui rawm rawm chu ka hmulo der tlat bawk. Eng angpawn lungawiloin chhuanlam nei ve ṭhin mahila hetiang nikhua ah hi chuan ka dikna ah ngei pawh a ngawizawka ka ṭan angai ṭhin, chu chu ka tan pawh aṭha ber reng a ni, an awmpui ve mai ka ni tlat a.

Sitting room a ka phei laichuan Irene-i nen inhma tawna ṭhuin engthil emaw hi an lo sawidun a, ka thawm an hriat rualin ka lam an lo hawi rual zawta, Irene-i nuisang hmel chuan min ti bangbo viau!

"Lalmambawih U JH-a nen in inkawm ṭhin tih tinge min hrilh miahloh a" a lo ti nghal sawk sawk a, chhan mai ngaihna ka hrelo. Chutih laiin JH-an a bula ṭhu turin min lo mitmei zauh a.

"Jonak te nen pawh kan inkawm ho reng ṭhin a lawm, Reny chu a damṭha maw?" Irene-i chuan a ti zui leh zat a, "A damṭha e" tihpahin a bula ka va ṭhu chu min lo melh ralh a, "Nang i lo dam em?" tiin tawi tein min nuih a.

"Awi!...amak e....Mambawihi nen hian engtin nge in inhriata?" Irene-in a ti leh hluai a " A rei deuh tawh" tih zawngin a lo chhang a, a chhanna duhkhawp lo zeta Irene-in minlo en chuan "Kan inhre ve tawp" ka lo ti ve hmak a, a nui var var reng chu awih harsa ka ti, nichin maia kan boruak khan min la chenchilh deuh nge ni tuna Irene-i nui hmel chu ka awih tlatlo.

"I lo inthup thei hle mai a" nui rah rah chungin a ti leh a, ka inthup hranlo engkim kan inhrilh ngai a zeng pawh a ni heklo, min nuih var var reng mahse nuihlet ve chu harsa ka ti rih em a ni. 

Nu Muani lo kal phei lam chu hawiin "Nu, hei JH-a kha i la hria em, Apuii leh Reny te U kha" tiin a nu chu a lo hrilh leh vat a, "Chutia law, Pu Zaithana fapa upa zawk kha maw?" Nu Muanin a lo ti he haw a, engtia inhria nge an nih ka hre miahlo, ngaihdan takngial pawh la nei thiamlo.

"I nu leh pa an damṭha em, kan inhmuh loh na a rei tawh lutuka nangpawh ka hai mai dawn che alawm, nichin khan ka hmuh hnu i ang ka ti deuh reng a ni" ka hma a rawn ṭhut paha Nu Muanin a tih laichuan JH-a hmel chu ka en a, a hmel ah engmah danglam a awmlo.

"An damṭha e, in dam zawk em?" thum dût hian a lo ti ve a, keimah ber chu ka bo deuh huih mai.

"I pa retired hnu ah khan kan inhmu leh miahlo a, i nu pawh angaihawm hle mai a, i farnu ten pasal an nei tawh em?" Nu Muanin a ti zui zat a.

"Apuii zawkin Mumbaiah pasal a nei a, an hnenah Michaela a awm bawka helamah kan te ber nen kan awm ve thunga" JH-an a tih chuan Nu Muani chu a ṭawng zui barh barh a, an chhungkaw chanchin leh a hnathawh thlengin zawhna a zawt zui mawlh mawlh a, keichu awm ve lo ang mai ka ni, JH-a te chhungkaw chanchin erawh ka la hriat ngailoh ka hriat phah nual thung.

Anu kha Skin Doctor a ni a, apa IAS retired a farnu Apuii leh anau Michaela chu ka la hmulo, Irene-i leh Nu Muanin an biak ṭhat dan tehhawrh aṭang chuan an hausa tih a tichiang zual hle bawk, zawhna an zawh chhen takah chuan JH-a chuan a ninhmel deuh riauin ka hria a, an titi lo pawt chatin "I zinna chu anuam em?" tiin ka lo zawt vat a.

"Signal ka neilo tihloh ah chuan" ka lam hawia nuisuk chungin a dar a chhin ak a, "Khawi ah nge i zin a?" Irene-in a lo ti leh a. "Vaphai leh a chheh velah Anganwadi hawn thar kan han enkual a lawm mawle" a lo ti ṭha ve mai a, an titi chhunzawm leh mawlh mawlh a, keichu sawi ve vak tur hreloin ka ngawi leh veng veng a, Nu Muani te nufa telloa a fala kan pahnih chauha awm ka chak takzet, biak hun pawh ka chang ve lo a thawk ipik sa nen an kiangah chuan ka leng ve lo riauin ka in hria. 

"Mate, I u JH-a hi thingpui tuideuhin va lumsak rawh, inhmuh a khat emai" ti a Nu Muanin Irene-i a tir chu ka ngei ru kher mai, ka inleng ani tih an hre duh hauhlo nia!

"Ngawirawh, lum duh suh inah tlangloin ka lo peng kawi a, ka ṭhu rei hman tawh lo ang" tih pahin JH-a chuan minlo en a, "Zan dangah ka lo leng leh ang" tiin keimah zawk chu min bia a, la haw lo se ka ti takzet, a awm ve hian ka awm a tinuam a chuloah a haw hunah an ni nufa hian zawhna min zawt chiam dawn tih lah a chiang renga, ka be chaklo ve bawk em a ni.

"La leng rih la" ka tih chuan "Nia, thingpui te in phawt rawh, bawihi va lumsak rawh" zangkhai zetin Nu Muanin a lo ti leh vat a, thawh mai tuma Irene-i che zui chu "Ti duh suh, ka phei phawt zawk ang" a tih chuan ka chelh zui duh ta biklo. 

"Pawn thleng min lo thlah ta che, motor ah i thil tur ka dah a" awki damthlupa a tih chuan ka ding chhuak rang teh e, kan inzui chu nur fein Irene-i te nufa chuan min en zui ngeiin ka ring.

Pawn kan chhuah rualin min pawt ding chawt a, chutah hnai fahranah min rawn enin "I ṭha meuh maw, thil diklo a awm em?" ngaihṭhatloh hmel fe hian a ti a. 

"Awmlo e" nui chunga ka lo tih chuan ngun zetin min thlek vung vung a, a awih vaklo aniang ka sam rawn chul thuak pahin "Zanin chu i landan a dang riau mai, nichin khan i ṭap em?" a aia chik zawkin min en leh a, tunah tak hian a awmah bei hle hle ka chak takzet, kan chhungkaw boruak erawh a hriat ve a remsilo a engmah ka hrilh thei tlat lo.

"I lo haw talo emaw ka lo ti hman a, min lo be bawk silo a" ka tih chuan a kiaisuk a. "Rawn ṭhawn che ka tum alawm mahse, ṭhawnsa hmel ilo pu lâwk a?"zawhna mitmenga min enchunga ka biang rawn dawm pahin a ti a, a mitmenga min ngaihsakna lang leh a ṭawngri a min duatna lo lang te chuan ka rilru no a ko chhuak lo theilo.

"I reh daih bawk sia ka lo ngai hman che a" aw tham ṭiaka ka tih chuan a nui ve ta suk a, "Ka ngai daih zawk ang che" tihpahin a rawn kun hnaia rang takin a awmah ka lo nam nghalvat thung, kawtkai maiah kan dinga ani pawn hrechhuakin a insiamrem vata, ka kut humin a motor dahna lam min panpui nghal hlawk hlawk bawk.

"Haw hmasa in lo leng zâwk nila chuan rei deuh hlek i lo leng thei tur" ka tih chuan tum hmel a pu lek lek a, "Zanin chu a fuhlo anih hi, zandangah i thingpui lum ngei in turin ka lo leng ang" tiin min chhang a, a sawi awmzia chu ka hrethiam deuh riai ruai.

"Ka chhungte nen khan in lo inhresa a!" nui chunga ka tih chuan min chhang zuilo.  A motor hnung chu hawngin Box lian angreng deuh hi a lo phawrh a Serthlum rim a nam nghal chem chem mai. "I ta tur" tih pahin Box chu min hlan a, ka thei duh ber ani tih a hrelawk em mawni dawn le?

Phur fahrana Box chu la a ka bih dek dek laichuan ka sam a rawn chul a, a lam ka hawi chu ngun zetin min lo en leh veng veng tawh, ka nuiha ani chu anui veleh tawhlo.

"Signal ka nei tawh a, min mamawhna i neih phawt chuan min bia la rangtakin ka lo kal ang" thutak zet mai hian a ti a, min ti dang lek leka chhan mai ngaihna pawh ka hrelo.

A hawikual thuak a, tumah kawngkal an awmlo tih keipawn ka hmu ve nghal, chutah ka Box pawmlai chu rawn vuan chawtin rang zetin ka hmui a rawn fawp a, a duhthawh a a hmanhmawh hle bawk.

Tu emaw duat deuh tu nei ni a inhria hmeichhia te chauhin ka awmdan hi min hriatthiam pui ang, a bulah hi chuan ka thlamuang hliah hliah zel a sin, tun ang mai hian. A fawhna chu lungawi takin ka dawh a, a rim pa hrak mai te chu zan dang zawng aiin a rimtui zualin ka hria, hetianga rei leh duhthawh hian kan la infawp ngai miahlo,  thawk a chham lo chauh a ka Box pawmlai chu pawm nghet sauh sauhin thawk ka la leh kawk ṭhin a, mi min hmuh hlau viau mahila ka inla hrang phal bik chuanglo.

Mi ṭawng thawm kan hriat rualin a awmah ka nam vata, min thlah ve mai dawn emaw ka tih laiin Motor ngheng chuan min pawt hnaiin a ngai te bawkin ka hmui a rawn khar a, ngen nei ang maia uar leh damthlup si a  a mi fawhna chuan tuipui cham dulh chunga leng delh delh ang maiin min inhriattir thei nia! Ka velah chuan engthil in nge min hual vel tih pawh ka ngaihtuah thiam tawhlo, min fan hneh ngang mai, a inlakhran meuh chuan ka Box pawmlai kha amah zawkin a lo keng daih a, lungawi hmel zetin min en vang vang bawk.

"Lut tawh rawh le, ka thlen hunah ka lo hrilh ang che" Box chu a vawihnih nan min pe leh a, min en dan chuan min ti lai lek lek a ni, tunthleng hian a hmel hi rei tak ka la en ngamlo, a mitmeng thuk ruih hian min ti zam ṭhin a, chutihrualin ka thlamuanpui em em lawisi.

"JH..." Motor kawngkhar a hawng chiah chu a lo hawi let leh thuai a. Engvanga ko let nge ka nih chiah pawh ka inhrelo, a kal mai tur chu ka ui deuh tlat nia mawle!

"Kan inbe dawn nia" zawp sepin ka ti ta ngawta, bu nghatin Motor ah chuan a lutzui a, reilo teah Motor glass lo hawngin min lo nuih a, chutiang bawkin keipawn ka lo nuih ve a, a tlan liam tak hnu chuan ka ruak deuh huai maiin ka hria.

Inchhung ka luhrualin choka dawhkan nghenga lo ding Irene-i nen kan inhmachhawn nghal ran a "Va inthup thei deuh ve" nui hak chunga a lo tih chuan ka Box chu pawm ṭha sauhin a lam chu ka pan a, dawhkana ka nghah rual chuan a lo phih deuh sawk a Serthlum a hmuhrualin a ner nghal sak bawk.

"Engtin nge i thlem thluk ka hre chak" a ṭawngdan chu min ringhlel te pawh a ang lek lek. "Ka thlem pawh ka hrelo" zawi muangin Serthlum chu Fridge ah ka dahlut a, a pum a lian ṭhain a hmel a mawia a rimtui hle bawk. "Jonak khan a hre tawh em?" a rawn ti leh hluai a.

"A hriat ve kher angai hleinem" ka lo tih chuan min chek tlat tlat a, "Jonak-a cousin anih kha..." uar fahran hian a ti leh a. "Ka hre tawh a lawm" ka lo ti awlsam mai thung.

"Nanghi ka rin ang i lo nilo hle mai" a tih leh chuan ka lo melh hrawk a, eng a sawi na nge tih phei chu ka hrelo. "Engvang chuan maw?" ka lo ti hlak a. "I huaisen ka ti, i dinhmun en hian JH-a te ang han kawp chu an chhungkua i hrechianglo a nih kha, Na....Reny chuan a u bialnu i ni tih hria sela engtin nge angaih ang le" min melh ralh ralh danah min sawi ṭhaih a tum tih ka hrethiam nghal.

"Kan inhmu tawh a lawm" ka tih chuan phawk fe mai hian min en a. "In inhmu tawh maw, khawiah nge in inhmuh a?" a lo ti nghal hluai a.

"An inah chaw ka eitawh alawm" ka ti chu a awihloh hmel kher mai, "I ti tak tak lo ang a!" ṭawng leh ka tum lai mekin Nu Muani a lo kal a "JH-a nen khan in inkawp em ni?" awki nelawm tehchiam loh hian a lo ti a, chhanna pek a nuam fahran lo mahse, ka chhang tho a "Umm" tih tê zawngin.

"I â lo hle mai" a tih chuan ka chhang let tawhlo a a sawi awmzia chu ka hrechiang ngang mai. "Nu, an inah te chaw a lo ei tawh nia mawle!" Irene-in a tih chuan rang fein ka inthiarfihlim nghal a, an kianga ka awm reng chuan ka thaw a chham thei mai dawnin ka hria, ka room ah lutin ka inkalh khum sauh sauh a, khuma ka lawn rualin ka phone Vibrate ri ka hre zui zat bawk.

Phone ka lak rualin "Ka thleng tawh e" zawi deuh supin a lo ti a.

"Umm.. ka mu dawn chiah a" ka lo ti ve a. 

"Kan mu rual dawn nia" a thil rawn sawi chuan nuih a ti za lek lek.

"I chau em?" 

"Chau ve lek lek e, zan dang aia darkar hnih vela ka mut tam chuan ka zia mai ang, nang lé?" min zawt let khauh a "Chau lo e, keite chu vawinah engmah ka ti hleinem" ka lo ti thuai a, an Department a ka hna dil chungchang kha a lo hre hman em lo ang chu máw?

"Ka lakah hian engamah i zep angailo ania" thutak zeta a tih chuan "Zep ka nei hleinem" ka lo ti vat a, engtia chutiang thu te sawi nge maw anih le!

"Naktukah ka rualin i kal duh angem?" awki damruih maia a lo tih leh chuan ka ngawi ran a, a ruala kal te chu ka chak alawm mahse, thil ṭha ber a nilo ang, thawhpuite hmuha kan inlaichinna tihlan chiam hi a mawi lo deuh chuan ka hria, hre ru vek tho mahse.

 "Alawmin min lo sawm leh ka ring" tuktin minlo sawma, min lo sawm leh ngei ang chu. "Ok....anih chuan ka rualin i haw dawn nia" a lo ti  a, chu em  chu ka hnial ta biklo.

*JH -POV*

"Pu Hruaikima zawk saw a laichin zawk anih chu  a pa nau ani awm e, i hriat tawh sa te an nih chuan an inchhungkhur boruak tur pawh i hre tawh lawm ni?" Cigarrete ṭan mawlh mawlh pahin Victor-an a ti a. Hriat chu hre tehmeuh mai, kan tet lai Mumbaia kan awmlai khan kan intlawhpawh ve fo ṭhin a, ka nu leh pa ṭhian ṭha tak an ni ṭhin bawk anih kha.

Mahse, ka rilru tibuai tu tak zawk chu zanin an ina ka va luh dawna ka thawm hriat kha a ni. "Kan hnen aṭangin hna i thawka i hlawh chhe te pawh kan dil ngailo che, chawei laia ka thil sawi te kha, min puih i hreh hmel em em lehnghal a, he inchhung tana i thawh hlawkloh zia hi ngaihtuah rawh, kum sawm chhung a thlawnin kan chawm che ania, heta hna thawh zel te i tum anih chuan i hlawh hi rawn chhunglut tawh la aṭha ang" tih thu kha.

"A ṭhiannu chu i bia em?" thatchhe zeta Victora ṭhu chu ka zawt a.

"Ka bia a lawm, engmah a hre vaklo a 'nuam chu a ti vaklo ang, keipawn nuam ka tilo anu leh a unaunu saw ka millo' te a ti mai mai" Victor-an a tih chuan ka duhkhawplo kher mai. Zanina a hmel ka hmuh dan khan ka awm a tinuam hauhlo, min mawlh renga tih duhdah a tuar tlata hriatna ka nei.

"E...a ṭhiannu khan LDC hna kan lak thar tur kha a dil ve e a ti tak asin, lo tihpui teh a ti che a nia, tunah mi ai a kalsaka a hna a tawp ṭep tawh ang khan a sawi a" Victora bawk chuan a ti leh a.

"A ṭhat chu" ka tih ruala a lo nui hawk chu ka va mitmei a "Zeilo viau mahla i la kaltluang ve zel chu ania" tiin a nui zui kur kur a.

"Thil pek i pe tawh em?"

"Pe tawh" rang zeta ka lo ti chu hriat chak hmel fein min lo en a "Enge i pek a?" nuihza hmel pu lek lek hian a ti a. "Serthlum" ka ti chu min nuihzat hmel kher mai.

"Enteh, hmeichhia chu thilpek hmangin hneh an harsa lo, i neih duh chuan pek uar rawh, chu chu tihdan ṭha ber" 

"I ṭawngtam hmain haw tawh teh, ka thluak iti na dawn" ka lo ti hluk chu ngaipawimawh lo fein a zial a pak khu talh talh a. "Ka sawi hi zawm vek la Officer Hmelṭhaa tih niloin Officer zeia i ni thei mai ang, Hmelṭhaa tih te zawng" amah chuan a nui anui a, ka ngaithei lehpek tawhlo. 

"Kan zin report kha naktuk ah i peih hman angai ania, tih tur i ngah hle mai" ka lo ti zauh a.

"Enteh ṭhiana, tihdan ka hrilh ang che, i thluak hi suk deuh hlek angai anih hi" tiin a han ṭhu ṭha ang sauh sauh a, peih lo eng ang mahila ngaihthlak leh tho chu angaih hmel e.

"Entirnan nangin cheng sang thum i nei a, Mambawihin cheng Sanghnih" 

"Ok..." zaizirin ṭawnglo turin minlo khap vat a.

"In awmdun rual chiah khan Mambawihin cheng sangnga anei a, nang chuan engzatmah" 

!!

Huhhhh...Hepa ṭhin hi chu!

"Hmeichhia zawng zawng hi i hmeichhe kawp ṭhinte ang vek turah i ngai em ni, pawisa hmanga thlem mai mai theih hmeichia ang kha ani ve lo, ka wallet incharge anih hun tur chu ka nupui anih hun ani mai" ka tih chuan "Nang hi nupui i neih hunah i thaibawih ngawtin ka ring" a ti leh kher a.

"Engvangin maw?" ka lo ti liampuat a.

"Ehh....i ngaihzawng laknat danah hian a hriat mai alawm, Judy i duat danah te pawh" Judy hming a sawilang kher chu ka lawm tehchiamlo, sawisual tih inhriain a ner deuh sawka, kei ka ngawi hmak thung.

"Ka sawitum zawk chu i nupui i duat thiam ngawt ang" a rawn ti ṭha leh hnuhnawh a.

Engah nge ka han duatloh tehlul ang, ka nupui niturin ka nei dawn miau a, ka chhiahhlawh turin ka nei dawn hleinem mahse, ka hmanhmawh lutuk hian a ti hlauthawng ang tih ka hlau a ni, amizia lah hi anemin tihnat awlsam tak a ni reuh bawk si a.

"Hmeichhe dang zawng zawng te awh tur khawpin ka siam dawn mawle" ka ti chuan Victora chuan ka thilsawi awmzia chu a hrechiang khawp ang.

"Judy hi tlem talin i la duh em?"

"Ngaihzawng dang ka neih tawh hi" ka lo ti vin hluk a.

"I sawm tak tak dawn ami, ala hma deuh lo maw, a hnawl che ka ring deuh tlat ...." a ṭawnglaia thip zeta ka va melh vang chuan a ngawi ta daih a, a la hma tih chu ka hre ve alawm, nghak thei niila ka nghak em em ang chu.

(End of chapter - 13)