GOMENASAI (CHAPTER - 14)

GOMENASAI - Ahmangaihi violette khiangte

CHAPTER - 14

MAMBAWIHI -POV

Zingthawh ka hai vangin hmanhmawh takin eirawng ka bawl a, puar khawp pawn chaw ka eihman meuhlo, tlai deuhah Irene-i a lo tho a chawei dawhkan a lo kil lai chuan Patean "Va insiam rawh i û in a lo seng mai ang" a lo ti a, ka tlawmngai lui duhta biklo chutih laiin kawtah Alawmi Scooty a lo ding ve chiah a.

A lo luh hun chu ka nghak te te a "Mate, tukin chu chaw kan eitlai lutuka....Ekhai! Ila insiam nange?" a lo tilut bawng bawng a, "Lo ṭhu rawh, ka insiam reilo ang" tih leh ka room lam pan ka rual a.

Ka insiam zung zunga ka hmuh hmasak sak ka inthawlh a ni ber, ka sam chu ka bawk a darthlalang ah ka in en chuan ka hmai chu a lang bial riaua ka hriat vangin ka thlah leh rih a, ka kekawr hak chu ka tawt riau mai bawk mahse, a lang nalh deuh zawk chuan ka hria, ka thau belh ve hlek a nih hmel, nula piannalh ti a sawi tur ni lemlo mahila ka taksa ah hian thau chuang ka neilo ve hlauh a, cher ti a sawi tur ka ni lo bawk, nula dang te anga in enkawl hlarh hlarh hmanin ka khawsa ngailo a chuvang aniang ka thau leh cher hi ka hre mai ngailo.

Bag hrui suihṭhat mawlh mawlh paha Room aṭanga ka chhuak chu Irene-in min lo melh ran ran pahin  "Mitthi in a kaltur i va ang ve" a lo ti zauh a. Ka kawrchung dum hak leh ka kamis var chu ka en nawn leh rih a, kekawr leh pheikhawk dum nen ka inha dum viau em mawni le!

"I nalh lutuk, i hmui kha hnawih la a dik ani mai" Alawmin a lo ti ve vat a, Irene-i lo ner sak chu ka va melh leh hram a, nidangah pawh ka inchei dan chu min sawisel ziah tho nain tinge maw vawin tehreng chu ka confi loh phah viau ni, JH-a ka hmuh dawn vang te pawh a niang.

"Tlaiah bazarah thawmhnaw pek kan ngai ania aw, Bazarah ka lo nghak che anga ina mi hi i lo keng chhuak ve dawnnia" kan chhuahdawn chuan Nu Muanin a ti a.

Office panin Alawmi nen chuan kan inchhawm thla dun leh a "I unaunu kha chu ka unaunu ni sela chuan kan inngeihlo ngawt ang, hrilh miahlo la a mitmeng aṭang khan ka mil chi a nilo" nui hak hak chunga Alawmin a tih chuan "Ngaiah ka nei tawh" ka lo ti mai a, Irene-i nen hian kan chendun na rei tawh viau mahse unau inpawh tak hi kan la ni theilo, kawm ngeih pawh tum viau ṭhin mahila amah hian min kawmngeih duhlo ni berin ka hria. A ṭawngkam ngeiawm tak tak te hi chu ngaiah ka nei tawh a, hnial enah pawh ka en tawhlo zawk a ni.

"In inhau ngai miahlo ami?" Alawmi chuan a ti leh a.

"Inhau ve zeuh zeuh e, ngaih khatah ngaih ve deuh angaia, huata ka lo lak zel chuan nitin kan inhau mai dawn a" ka lo ti ve a. 

An hnena ka awmtirh khan Thingtlanga khawsa tih taka an nundan kha ka ṭawmpui thiamlo lek lek ṭhin a, hmusit rawngkai deuh deuha min ṭawngkhum chang pheichuan ka rilru a na ve ṭhin hle anih kha, hnamdang zingah khawsa kan ni bawk si a ka khawhar ṭhin zia te pawh kha ka la hrereng, chutih laiin Rinhlua kha ka tawng a, ka ṭhian kawm ber leh ka lunglen hnemtu ani zui ta bawk a. Tinge maw Lalrinhlua kher chu ka han hriatchhuah, ngaihtuahloh loh ka ngaihtuah chhuak a ni.

Chawhma chhung chu mahni hna ṭeuhah kan buai leh mam mama, kei aimahin Alawmi a buai zawk, chaw chhun eihunah chuan ka tihtur pawimawh zual chu ka zo hrama Alawmi erawh ala insam buai ngang mai "Thil min lo eisan rawh" a ti tak nain nidangah pawh min nghak ziah si a eisan mai chu ka duhbik lo "Zo phawt rawh ka lo nghak ang che" ka ti ve tlat a. 

Uzodina te eitur chah a lo thlen laichuan chah ve mai ka rilruk tawh a, ka chah dawn laitaka Alawmi a lo inpeih ve chiah vang chuan Canteen lampanin kan inzui chhuak ta zawk a, Canteen a kan kal ziah chhan pawh Alawmin Zarda a leiduh vang a ni ber.

"Victora khan hmanzanah min lo bia a, JH-an a hrilh che em?" 

"Tu Victora?" ka lo ti vat a.

"I bialpa Assistant Victor Liansangzuala kha mawle, i hna dil chungchang kha ka hrilh a?"

"A va zahthlak e.." ka lo ti hluai a. "Zahthlak loh e, JH-a a thu alawm tihdan a awm thei maitheia, Minister tihpuitu pawh kan nei silo a, tihdan tur avang em alawm, engtik nge Uramtei chuan ka kal thei dawn a tih a?" tiin min zawt leh nghalzata. "Kar leh lamah chuan a theih tawh mai ka ring, Liansanga nen chuan in inhre ṭha em ni eng chungchangah nge alo biak che a?" ka lo ti ve a. 

"Kan inbe ve tawp, thil min lo zawt a remchang tiin i hna dil chungchang kha ka lo hrilh ve mai mai" a ti a, a bak chu a sawi ṭha duh derlo. JH a nen kan inbiakin hna chungchang engmah a sawi silo a, chhan sawitur em em awmsilo in awm a nuam duhlo riau a.

 

Thil kan eizawh chuan Alawmi Zarda leichu ṭhuchungin ka lo nghak a, ka Phone   message lo thleng ka en chuan JH-a a lo ni a "Thil i eitawh em?" tih hi min lo zawt a, ka chhan hmain min lo Call nghalzat bawk.

"Thil i eitawh em?" angai ang chiah chuan a rawn ti a, ka ei tawh thu ka lo hrilh ve vat a.

"Tlaiah ka rualin i haw dawn nia, zanriah eiturin chhuak dun teh ang" zangkhai zeta  a tih chuan ka rilru a buai ru nak mai, nizan lawkah Irene-i ka chhuahpui duhlo a zanina kei ka chhuak leh anih si chuan, chhungte hmaizah a na duh dawn lutuk tlat a ni.

"Tinge i duh chiahlo a mi?" 

"Ka hrelo, ka hman ka van ringlo" Nu Muani nen bazarah thawmhnaw sem kan ngai bawka, eirawngbawl ka ngai leh ngei bawk ang, hun chu ka neilo takzet.

"Enge itih dawn, i duh chuan tlai deuh hlekah pawh ka rawn lam mai dawn che alawm" dam ruih hian a lo ti leh a, a bula kalchhuah te chu ka chak tehmeuh mai, In lam buaina kalsana a bula awm te chu engah nge ka han thlakhlelh loh tehlul ang.

"Ka nu nen bazarah thawmhnaw pek kan ngai dawn a, chuan eirawngbawl te pawh ka ngai a" tiin tlangtakin ka hrilh a. 

"E....." a ngawi vung vung a, hman ila ka ti takzet a ruala kalchhuah chu chak tak ka ni.

"Tihian ti ang, i tihtur ṭul te iti zawh ah ka lo hruai ang che, a ṭha mai em?" a lo ti leh a, chupawh chu ka chiang chiah lo, chhuah dil hrim hrim chu ka inthlahrung, nizan boruak vang pawh khan.

"Ka chhungte ka lo hrilh phawt anga a rem dawn chuan ka lo hrilh leh zawk ang che aw?" inthlahrung rilru tak chuan ka ti a, alo ngaithiamlo viau ang tih phei chu ka hlau angreng.

"Aw le" ti a min lo chhan chuan ka awm a ti nuam huai mai, inchhungkhura ka dinhmun chu a hrethiam viau tawhin ka ring bawk, a pawilo kan inkawp chho zel dawn anih chuan a hriat ve pawh angaih na chen a awm alawm.

"JH-a elaw, ko ve ta che" Phone ka dah rualin Alawmin a lo ti hlut a, ka hma a rawn ṭhutpahin a Zarda lei chu min pek a tum a "Ei lo mai ang ka pumin a ngeihlo lutuka" tiin Papermint zawk chu ka lo ban a, nitin Zarda a eichung hian a pum hi a sawisel ve ngai miahlo, ei insum anei bawk silo a kan inanglo ngei mai, keichu tui ka intlem hlek pawhin zunkawng lamah harsatna ka nei thuai ṭhin a, Zarda phei chu ngeihlo tak ka ni...

"Enge alo sawi a?" hriat chak hmel takin ka lamah a rawn awn a, a phur cheng chawng ṭhin ania. "Hmmmm....induhpui suh aw, ka chuhpui dawn lo che" kan nui dun hak hak a, ka ṭawng hma hma hian min ṭawng khalh zung zung zel mai.

"Zanriah eiturin chhuak dun ila a tia mahse, ka hman pawh ka ring lo zanin tlai chu ka buai dawn a Bazarah thawmhnaw pek kan ngai a" ka tih chuan a ṭhu ngil nghal hluai a.

"Sad vê....nâ.... kal dan ngaihtuah rawh, keichu ni ila âww....." hrechhuak lehin "Ka thiklo e a, chhuak dun ru..." a ti leh lawi a. Ka nui hmel a hmuh chuan amah zawk chu a nuih aza leh a, a rilru a awm ang ang hian a ṭawng phawng phawng mai ṭhin a a rilru erawh a chhe chuang hauhlo, mize in anglo tak nimahila kan inpawh em em thei tho a Alawmi hi chu midanglam ve tak chu a ni.

"Nizanah Irene-in chhuahpuiah min sawm leh a ka kal duhlo a kan inti thiamlo deuh hleka, Pate-an zan lam kalchhuah a phal vak tawhlo bawk nen ka dil ngam chiahlo" ka ti a. 

"I chhuak leh si anih chuan Irene-i chu a lawmlo ve hle dawn anih chu" alo ti ve a.

"Ummm...min haw ngawt ang?" 

"A sual ve ngawt mai chhuanlamah a hmang ziah che a nia, ani kal na te chu itan kal nuam ani ngai bawk silo, ka van haw reuh e aw...JH-a bulah chuan engtin nge i sawi?" 

"Ka theih dawn chuan ka lo hrilh leh ang che ka ti tawp mai" ka lo ti a. Hmel nur nanga Alawmin min lo en chuan "Hetiang vel hi ka thei vak dawn lo tih hi hrilh lawk angaiin ka hria, anihloh chuan a buaithlak chho dawn tlat, a ngaihdan anih tak loh leh kan tawp mai anga bul kan ṭan chauh bawka....." ṭawng leh ka tum laitakin a kut a lo phar vut a. 

"Inṭhen lam kha ngaihtuah reng reng suh, JH-a hi uaibet tlat zawk rawh, i chhungte  mitmei ven chu a ṭha tho a mahse, i hma hun ngaihtuah zawk rawh, an hnenah i awmreng thei dawnlo pasal i neih te pawh ala ngaidawna, JH-a tluka ṭha hi an awm tawhlo ang" thutak fe mai hian a ti a, a thilsawi chuan ngaihtuah a ti thui khawp mai.

Hna ah kan lêt a, Alawmi thilsawi te chu ka ngaihtuah lêt leh a, kei hi ka dik lo tawp mai hetiang rilru hi pu mai tur ka nilo a sin le, ka pi leh pu te  innghahna ka ni a ka nu tan lah harsatna a tawh laia a pûr tur neihchhun ka ni bawk. Pasal neihlam la ngaihtuah thei ka ni miahlo mahse, tunhnai hian pasal neihlam ka ngaihtuah fo maia, tinge maw hetiang em em hian ka tuar a lo zuau tak le! Ka thiltum te kha ka lo ngaihtuah mang tawhlo a, keihi inngaihtuah harh ka ngai anih hi, ka hma chauh sial thei ka nilo takzet.

Tlaiah chuan JH-a pawh hrilh tawh lemloin Alawmi rual chuan ka haw a, in ka thlen veleh ah inthlak tawhlo chuan Nu Muani thawmhnaw sem tur nen ka inkhaichhuak leh a, ka Bag khai a rit bawka Bazar ka thlen chuan ka thlan hluam tawh. 

"Tinge Vai muṭia i lak mai loh, pawisa i nei lo em ni?" min hmuh veleh ah Nu Muanin a lo ti vin hluk a, Dawrkai ho chuan min en ṭhap bawk si a a nuamlo duh kher mai. "Mamuan i fanu a mi?" Nu pakhatin a lo tih chuan "Ka fanu te zawk anih hi" a lo ti ve mai a. 

"Fanu i van nei hmelṭha em em ve, a u nen ang in anglo hle mai a, hei hi a hmelṭha zawk daih anih hi" nui var varin pakhat chuan a lo ti ve a, Nu Muanin min rawn melh ran reng bawk si a fakna thu dawng e tiloin a nuam duh tehchiamlo.

Thawmhnaw chu phelh darhin an duhtawkin an thlanga, an thlanloh apiang chu thlep ṭha in ka lo khung zela kan inpeih meuh chuan khua a thim leh dawn ruai tawh. Haw kawnga Taxi a kan chuan laichuan hrechhuak zawkin ka phone ka en thuai a JH-a missed call chu a lo tlar thla dul a, ka inthiamlo ru kher mai.

Ka phone lêt vata chutih laimekin kan inkawta Scorpio var lo ding vang chu ka va hmu nghal mai bawka, min lo thlen khalh der tawh mai, keilahin engmah ka chhungte bulah ka la sawi hauh silo. Nu Muani bulah chuan sawimai ka tum laitakin "Tunge maw kawt laiah tak Motor dah chu le" a lo ti vin hlur a, ka ngawi leh ta riha, Patea dil zawk mai ila a ṭha in ka hria.

Taxi din rualin "Gate ka lo hawng anga Bag kha lo pawm lut rawh" tih leh chhuah a rual a, Bag lianpui keiman ka ken chhuah leh ama ken chhuah a awm a keimah mai chuan ka inchawi zo hauh lo ang. "Engtin nge i ken dawna?" Driver in a tih chuan Bag pakhat chu a chunga chhuan rem thei tur ang ber in ka lo pawm ṭha sauh sauh a, "Hemi chungah hian min lo dah sak mai" ka tihlai chuan min huphurhpui hmel ngang mai.

Bag a lo chhuan rualin ka dar a na nghal ut ut a, ka inpetruh nghal ṭeuh bawk, Thailand T-shirt puan chhah chi hlir ani vei nen rit ṭha ve tak chu a ni. Nu Muanin kawngkhar min lo hawnsaka, a chungzawka ka bag chhuan chu kawngkhar biangah ka tauh thla hram a, ka innghat fel chiah chu Sitting room aṭanga JH-a lo chhuak nen kan inmelh fuh chiah bawk.

"Vawin chu in laklawh deuh ani maw?" Patean alo tih chuan "Lalthani a lo thleng har lutuka a lawm mawle" Nu Muani chuan awlsam zetin a lo ti a, nidanga ka kal hun ang aiin ka tlai chuang hauh silo.

JH-an min en renglai chuan sawitur hrelo zetin ka va nuih a "I lo kal tak tak pawh ka ringlo a, ilo thlen na a rei tawh em?" hah vanga thaw hliam hliam chunga ka tih chuan a hmel chu a nur nang a, lawm vak lo hmel a pu bawk si a Patea nen an lo inbe fuh vak lo anih ka ring a ngaih a ṭha zanlo.

"Bawihi insiam la kal nghal mai rawh u" Patean a lo tih takah chuan ka hamhaih leh ang lawi a, a lo dil fel tawh chu a ni ngei mai.

"Khawnge in kal dawn a?" phawk zeta Nu Muanin a lo tih chuan "Zanriah eiturin kan chhuak lawk ange" JH-a min lo tihkhalh a, sawi tur pawh ka hrelo, ka beiseiloh dan deuhin thil a kal daih mai, chu chuan a awm a tinuam viau bawk.

"Irene-i hi a la haw lo lehpek ami a, hnathawk chhuak kan awm hi chuan eirawng te hi lo bawl ve tur ania" choka lam pan pahin Nu Muani chuan a ti phei hlak hlak a, "Chaw an eikhawm dawn a nih kha, kan pahnih chauh kan nih chuan a ṭhing kha chhuanglum tawp rawh bawl vak angailo" Patean a tih pawh chuan "A ṭhing rin tur a awm ngawt ngawt lo" a lo ti vin hlur a, nuih a za duhlo viau Patean phal viau mahse, kalchhuah chu a inthlahrunawm viau tho.

"Lo haw harlo ula thingpui te pawh i rawn inkawi leh ang chu tiraw Tluanga duh ang pawhin kan la titi hman hleinem" JH-a lam hawiin Patean a ti a. "Ni e" JH-an a lo ti ve thuai a.

"Min lo nghak lawk aw, ka inthlak lawk ange" tiin hmanhmawh takin ka room lam ka pan a, ka hmanhmawh ngang mai, khua lah a thim chhulh tawh a, JH-a chu Office aṭangin a lo tlang anih hmel a chuti anih phei chuan minlo nghak rei tawh viau ang.

Insilfai thuak thuakin ka insiam zung zung a, ka hmai phei chu engmah ka hnawih hman tawhlo. Ka va chhuahlai chuan Sitting room ah Patea nen an lo titi mek a min hmuh velehah a lo ding chhuak vut bawk a tawi tein min nuih tihloh chu engmah a sawilo. Kan chhuah dawn thleng chuan choka a Nu Muani titau tih hriat zeta che ri bur bur chu ka hre thei a, rilru chu anuamlo ru ve ṭeuh mai.

Kawngka kan pel chauh tihah ka kut rawn vuanin ngawirengin min kalpui a, tui ka khawih zawh chiah vangin ka kut chu a vawt hle a; ani kut erawh a lum vung vung thung, "I nui hmel hmuh a khat hle mai" a tih rualin a hmel chu ka en vat a, chîk zetin minlo en ve ran a, ka lo nui tih ka inhre miahlo, chutah Motor kawngkhar min hawnsakin "Lut rawh le" a tih takah chuan ngawirengin ka ṭhuluta, Motor kawngkhar a rawn khar dawn laichuan ngun deuhin ka lo en bawk, a hmelah chuan hlimhmel lang miahlo mahse mipa hmelṭha tak zawng ani ngei mai.

A kal chu ka en zui renga Motora a lo ṭhutluh leh thleng chuan, ka lam lo hawiin "A vawt i ti em?" ngainatawm takin a ti leh a, ka lu ka thin lai chuan a kutin ka biang a rawn tawk a, minute reilo te chu ngawirengin kan in en, ka nuih a min nuihlet erawh ka beiseilo mahse, ka beiseiloh deuhin min nuih a "I van nalh ve" tih thu chu min hrilh bawk.

"Engmah ka inhnawihlo a" zahzelah ka lo ti vata, ka hmaichu mam tho mahse Cream takngial pawh ka inhnawih silo a, chiang takin anin min en bawk si nen min ti zam riau a ni. Ka biang a la dawm reng na kut chu ka vuan ve vat a, ka lama a rawn awn lai chuan ka thinphu chu rang ṭha dup dup tak a ni.

"JH..." ka hmui a rawn khar nghal hmiah a, chawp lehchilhin ka sawitum chu a bo nghal duak a ni ber, ka hriat chhun chu a thaw lum ham ham leh a hmui, a rimtui tak nen. A darah vuanin ka thiam tawkin ka chhanglêt ve a, a laka ka chet danin awmzia a neih ber ṭum a ni, khua a thim tawh bawka tuman min hmuh theih ka ringlo, hnai takah min rawn bih te anih hranloh chuan.

Dawr changkang takah min hruai ka lo ring deuh nge ni kan kalna hmun chu ka rinloh deuh hmun a ni, khawpawn bulah Hotel lianvaklo te fel ren rawn mai hi a ni a, "Ka hman chang chuan hetah hian ka kal ziah ṭhin, eisiam an thiam khawp mai" a ti a a phur hmel hle bawk, dawra lo awm te chuan an lo be sap sap a, a kal ṭhang tak tak chu anih hmela amah nen chuan a inhmeh lo riaua ka hriat vangin ka nuih a za deuh tlat.

"Mawite kan Officer-a hi Chakawk i la dahsak em?" ti a dawr neitunu in anau te a koh lang lang lai chuan awihlo lek lekin JH-a hmel chu ka va en a, Menu paper biha a nui suk suk ka hmuh chuan ka nuih a za ve tho. 

"I eiduh apiang kha chah rawh" Menu min pek pahin a ti a, he hmun kan thlen aṭang khan a hlim hmel riauin ka hria, hetiang hmun a akal ṭhin pawh mak ka tih tawh tehlul nen.

Tleirawl pahnihin Chawei an lo siam a, Changel hnah chungah ngei mai chaw min pe a, sa leh mizo thlai chi hrang hrang nen, an bai siam phei chu tui tak a ni. "Buh in eilo emaw ka tia" ka tih chuan "Ka pa nen hian Buh  kan ei ṭhina, midang hi chuan an ngaina ve vaklo" chawhmeh min suah sak mawlh mawlh pahin a ti a.

"Ka chawhmeh duh ber i hre duh em?" a tih chuan ka lo 'aw' vat a.

"Kha kha..." tih pahin ka hma a Bowl chu a kawk zauh a, khai!.....JH-a chawhmeh duhber chu CHAKAWK! Ka nuilo theilo.

"Ei ṭeuh rawh, haw lam kha chu ka buaipui vek ang che" 

"Na.....kha chu sawi kher lo lâ" ka tih chuan a nui hawk hawk a, a nuihzawng a mitsir chuar langralh chuan a thinlung takin a nui tih a tilang. Hetiang taka JH-a nui hmel hi ka la hmu ngailo, Satui ah chuan chi thlakin a chawk ri rak rak a, ei nachang pawh hreloin a chezia chu ka lo en ve renga, ka hmuh ngun poh leh ka hmu hmelṭha zual telh telh nia, zanin hian hmui sexy deuh leh khabe kual nalh deuh anei tih pawh ka hre ve chiah.

"Ei rawh le" alo tih takah chuan ka hrechhuak thut lehnghal a, ka phu zawk nghe nghe mahse, min nuihzat miahlo.

Reilo te kan ṭhu khawmuanga, chumi hnuah inthleng min thlah leh a, inchhung kan luh dawn chuan Nu Muani ang barh barh ri ka hre thei, kawngkhar hawn tuma ka vuan chiah chu JH-an ka kut a lo man a, keipawh ka tawp chiang hle!

"Kan hnen aṭangin hna a thawk a, cheng khat pawh inchhung khur tan a la senglo, tih em ah chuan a pi leh pu te pawn buhfai Bag khat pawh min la rawn thawn hleinem, anu lo zin tum te kha heta thlen pawh ka duh vaklo, pawisa a thawnru fo lehnghala, Muṭia laknan ringawt pawh a inseng phallo ania, nula si ah chuan uikawm ve tak a ni....." ka tê rawih rawih maiin ka hria, tun hunah kher kher tinge chung thu chu ka hriat angaih le, nidangah pawh ka hre fo a, tunah kher kher tinge!!

Ka mittui a hnam ṭiam ṭiam a, ka zaka ka rilru a na bawk, ka kut laksawn mai ka tum chu nghet zetin a rawn huma alamah min pawt herin min kuah a, ka mittui tlak loh nan kei ka inpetruh ve ṭeuha, inbe loin enge maw chen chu kan ding duna chumi hnuah "Lut ila" nuilui zet chuan ka ti a.

Min en vung vunga, lo luh chu a hreh tawh ani maithei, Nu Muani ṭawng ri erawh ka ngaihven duh tawhlo. Mahse, a la ṭawng ri barh barh tho a, ka hre duhlo lui mai chauh a ni.

Ka kut chu la kangin a hmui a tawhtir vang vanga, chiang zetin ka mitah min en bawk. "I hriat angin khatiang kha kan nia, engkim i hriat tawh hi" ka lo tih chuan a bu nghat a, min ṭhen a duh rum rum hialin ka ring tawh.

Mahse, ka beisei loh deuh mai a lo sawi a, ka hamhaih in ka awihlo hial zawk, a tih tak tak pawh ka ringlo mahse, uang hmel a pu lo a, thutak zetin a sawi bawk si.

"Min nei rawh, i pasal atan min duh em?" ka hriatsual emaw ka ti hial a, ka rilru a hria aniang "Ka nupui ni ta che" tiin min sawm nawn leh ngat nia, thlakhat leh kar khat kan inkawp hnuah heilai kan kawngkhar bulah mai hian, JH-an a nupui atan min sawm tih hi Alawmi takngial pawhin a awih bikin ka ringlo.

(End of chapter - 14)