GOMENASAI (CHAPTER - 15)

GOMENASAI - by Ahmangaihi violette khiangte

CHAPTER - 15

A zawhna chu ka chhanglo chhang thei dinhmunah pawh ka dinglo, min ti hamhaih hle ringawt, a ti awm anglo pawh ka ti, tun dinhmun ah ngat phei chuan engvanga chutiang thu rawn sawi ringawt nge anih chu ka hrethiamlo hle a, min khawngaih anih ka ring a ka zak zual telh telh zawk a ni.

"Zan dangah lo leng mai rawh" a kut lakthlak pahin ka ti a, tunah tak hi chuan keimah chauh a awm rih ka duh, ka thawk a pika mahni chauha inngaihtuah harh ka mamawh. "Reilo te..." a tih laimek chuan lu ka thing vat a "Zan dangah zawk le" tiin ka luhsan ta thuai a. 

Heihi kan chhungkaw boruak dikdak chu a ni, a lang a pauin kan inhau ngai zen zenlo mahse, boruak rit tak hian min delh chûk renga chhungkaw nuam leh hlim tak kan ni hauhlo bawk. Mamawh tu zawk ka ni a lungloha  la thei lah ka ni heklo, ngawi renga tawrh hram hram chu ka tan a ṭha ber a, tun ṭum pawh ngawirengin ka tuar leh anga reilo teah hetiang boruak hi chu a zia veleh mai ang chu.

Choka ah lut tlangin thaw chhamlo chauh khawpin tui ka in a, JH-a motor tlan chhuak ri chu ka ngaithla ran a, ngaihtuahna a fimlo in ka â deuh chhulh mai. Nichin lawka Nu Muani leh JH-a thil sawi te engkim mai chuan ngaihtuahna fim hmang thei loin min hnawh tawt urh a, rilru a na veng veng bawk.

"Nidangah chuan sawi lawklo in kalchhuak tawhlo ang che" ka hnunglam aṭanga Nu Muanin a lo tih chuan ka hawilet zawk a, a lawmlo hmel chu ka enrei duhlo.

"Mipa hruai chhuah theih a awm fo te hi thil zahthlak a nia, inkawp reitawh pawh inla nilo lehnghal a, nangtê hi ilo nghal ru zek anih dawn hi  i pu han Phone nghe nghe ila a ṭha ang, hetiang anih dawn chuan Lunglengah awm la aṭha zawk" amah en tawhlo chuan ka tui Bottle ken lai chu ka chhin ṭha mawlh mawlh a, Fridge ka hawnlai te chuan dawhkan bula ding chungin ka che zia chu min lo en reng bawk a, awm a ti nuamloin minti zam chhe lek lek hial. 

"Thingpui han lum nghal teh aw" Sitting room aṭanga Patean a lo tih chuan Nu Muani chu ka va melh leh zawk a, kei nge Nu Muani zawk a biak ka hrelo. A che chang zui mai bawk silo a min phut a ni maithei.

Dawhkanah ka Bag dahin ka che zui sawk sawk a, kalsawn tawh se ka ti ru kher mai, chîk fe a ka che min en reng hi chuan ka khawr zo vek ṭhin, thleng silloha lo la awm thur ka hmuh rualin "Irene-i ala haw nange?" ka ti vat a, ka zawt chu ka inchhir leh ram ram mai.

"Inchhung chêt vel chu i u in a ti ngailo tih i hrereng" a lo ti vin hluk a, zawhloh tawp tur ka lo zawt a ni, Irene-i chu awm pawh nise thleng a sil ngailo a, Allergy a neih vangin tui khawih ngai lam chi reng reng chu ka awl vek ṭhin, a chêt peihloh chhuanlam tih erawh ka hre tho a, engthilah mah phutloh hi ka tan a finthlak ber bawk. Thingpui chhuan laiin thleng ka sil mawlh mawlh a, min hauh inpeih ata Nu Muani dingreng chu ka haider lui bawk.

A kalsawn ta hram chu ka thaw huai mai, thingpui ka va pek lai chuan alo la ang hlak hlak a "Ka pa te pawh hi han phone ka duh, an unau hian rawn zilh ve rawh se" a ti barh barh a, engtak han sawi tum ang maw, irene-i rawn zilh ve dawn sela chuan a huatpui ber ber tu ani leh awm tho sia hahthlak chuan, ka pi leh ka pu chuan min ṭan zawk dawn tih hre tho mahila ka chanchin ṭhalo hriattir a an rilru tih hah hi ka duhloh ber a ni.

 

"Amak em em mange, duhtawk tawh rawh" Patean a lo tih takah chuan a ngawi ve ta hram a.

Keipawh ka room ah ka lut a, ngaihtuahna erawh aluah zui reng thung. Ka chunga a lungawilohna chu ka tuar thei mai ṭhin a  mahse, ka chhungte hming a lam tel kher kha ka rilru tina zual tu ber chu a ni, ka nu lo zin tum laimek a ni vei nen, ka pi leh pu ka ngaihtuah ringawt pawhin ka ṭah a chhuak tet tet mai. 

Patea ngawireng zel hi nep ka ti bawk, ka pa boral hnuah chuan Inpui chang tur leh ka pi leh pu te enkawl tur ber a ni zawk a, chutih a hnekin a nupui in buhfai bag khat pawh min la thawn lo tih ang zawngin ṭawngkam a nei a, a hnial buai hauhlo lehnghal, a duhna ah chuan Nu Muani thu te chu a hnial ve fo a mahse, Nu Muanin hetianga ṭawngkam a han neih chang hian a ngawi leh tlat zel lawi a, ka thinur ve ṭhin a lawm, haw mai chak chang lah ka ngah, haw ta ila ka pi leh pu te bulah chuan eng chhuanlam nge ka han siam ang?

Ka pu chuan thingtlanga awmlo turin min duh ve tlat a, ka hmakhua a ngaih vang a ni pakhata "Heta i awm chuan i tan hma hun êng a awmlo, thingtlang tlangval pasal ah i nei anga nuamsa in i awm heklo ang, i fate tan pawh harsa taka bul i ṭan ang kha an hmachhawn tur a ni mai a, nang chu rilru nei takin awm rawh" tiin min hrilh fo anih kha, chuvanga Patea te kianga min awmtir pawh a ni nghe nghe, ka pi lahin chuti bawk, khawpuiah pasal ṭhatak ka hmuh a beisei ve tlat a, hrehawm ka tih chang pawhin an hnenah ka thlen ngailo, keimahin ka pai dam mai ṭhin. An hnena ka han thlen anih chuan min ṭan ngei dawn tih chu chiangsa a ni a, chu chu chhungkaw inkar chhiatna mai mai tur a ni bawk.

'Ka tuar hram hram tur a ni, a lo berah kum hnih thum bak angai tawh biklo ang' tiin ka infuih ve sauh sauh a, ka ṭawngṭai bawk. Pathian hnenah chhelna ka dil fo ṭhin, midang te tana harsatna thlentu nilo tur leh thil ṭha lam kawng ka thlan thiam theihnana finna min pe tur pawhin. 

Khum bula ka Bag khai aṭang chuan ka Phone a lo ti riai riai a, JH-a a ni. Biak dan tur ka hreloin ka huphurh ru ṭeuh a, lakloh mai ka duh rum rum, ka phone eng zak zak chu enin ka inhumruh a, thawk ka la leh rih ṭhin, lak tur nge lakloh tur ka ngaihtuah chhungin a ri zo ṭhak a, ka thaw huai mai. Mahse, a lo ri nawn leh a.

"Bawihno......" tih chu ka hriat hmasak ber a ni. 

"I ṭha em?" min ngaihtuahna aw ri chu ka haibiklo, a aw ka hriat rualin ka dang a ro zo a chhan mai nachang pawh ka hrelo lehpek a, thawk ala hawk ri te chu ngawi rengin ka ngaithla a ka hnuk a ulh lek lek mai, ti nge maw tiang hian ka awm ka hrethiam biklo!

"Lokal turin min duh em? I duh chuan sawila ka lo kal dawnnia" ka awmdan vang chuan thil ṭhalo deuh a thleng emaw a ti ani maithei, ka insiamrem thuaia ka aw ka thian zui kharh bawk. "Ngailo e, ka lo mu tawh a" pangngai thei ang berin ka ti a, a bula pangchang rilru ka pu tlat ṭhin hria se engtin tak ngai ang maw.

"Ka ngaihtuah deuh che, ka bulah hian engmah i zep angailo, ka ngaithla ang che" thutak zetin a ti leh a, inbunruah vek ka chak kher mai, ani chu kan chhungkaw mi leh sa a nilo a, a hnena ka vui thu ka thlen chuan ka chhungte ka rel tihna a ni mai dawn a, thil tih chi niin ka hre silo.

"I mu tawh em?" ka ti let ve a, "Mu lo e, minti muhil theilo mek a ni" ka lo nui hak a, ani pawh a nui ri ve suk mai.

"Ka thilsawi kha....lo ngaihtuah rawh"

"Engthil?" ka lo ti phawk hra a. "Min nei rawh" a rawn ti leh tawl a, amak tehsek mange!

"I tak tak elaw?" nuih pawh a za tawhlo, a ti tak tak anih hmel.

"Ka ti tak tak, neih che ka duh" tehtawp ṭhin a. "JH....ala hma iti ve thoin ka ring chutiang sawinan chuan" ka ti a, ka lawmlo lek lek tawh zawk. "Eng tikah nge a hun ang, tunah ka sawm che anga hun itih hunah kan ti mai dawn em ni?" chhan ngaihna pawh ka hre tawhlo, thutak zetin thil a sawi a thlakhat leh ni tlemte chauh kan la inkawp tih hi a theihngilh em mawni!

"I chhungte khan an hau che em?" a tih chuan thawk ka lo la hak a, min khawngaih vang a ni tih ka hre ta, hetianga zawnga tih kher hi chu a ngailo a sin mawle.

"Hau lo e, i ngaih ang kha engmah a awmlo, min ngaihtuah suh" zangkhai thei ang berin ka ti leh a, ani erawh a ngawi ta vung vung a, awm ati nuam kher mai. Nupui atan min duh tih lah a chiang renga  tunge han lawmlo phal tehlul ang.

"Pasal neih i la duhlo em ni?" a rawn ti leh a.

"Nupui neih i duh tawh em ni?" ka lo ti ve thung.

"Aw" a chhanna chu a tawi ṭha tek tawk viau, "Nui suh" a rawn tih leh rual chuan ka nui tawp hmak a, insum erawh a har a ni. "Tinge i hmanhmawh em em a?" nuih insum ru tak chuan ka zawt leh a, a hmel hmuh ka chak hle bawk.

"Nupui atan ka duh che a?" ka nuihchhuah loh nan ka insum ngar ngar a ni ber "A....chhan dang i neih ka ring tlat" ka tih chuan a nui leh suk a "Kum 32 ka ni tawh, nupui neih ka duh nangmah ngei kha neih che ka duh bawk" ka nui chhuak lo theilo.

"Nui rawh" a rawn tih chuan ka nui ring sauh a, a za ve em a ni.

Lehlam thawm reh vung vung chu ngaithlain aw ka thian leh rih a "Tlangval senior nih hlau te kan awm em ni?" zawi te in ka ti a, "Ummm...." a lo tih chuan keimahin ka dir leh ngar ngar, hepa zet hi chu fiamthu thawh miah silo hian min ti nui reng zel mai.

"Ka nghak ang che mahse, ka sawm che tih hi theihnghilh miah suh" damdupin a ti leh a, a sawmna chu han pawmsak nghal theih pawh a chakawm viau mai mahse, keipawn tlang taka ka hrilh a ngai tih ka hre ve bawk.

"Pasal neih lam hi chu ka hmanhmawh vak lo a, ka dinhmun i hriat tawh kha, ka pi leh pu te, kan In te pawh i hmu vek tawh a, chuti maia pasal nei thei ka nilo tih pawh i hrethiam ang chu tiraw?" thutak zawk chuan ka ti ve ta a, a hriatthiam ka beisei hle bawk.

"Tinge, i chhungten pasal neih an la phallo a maw?" a lo ti leh mauh mai.

"Nilo e, keimah zawk hian nuamsa deuha ka chhungte ka dah theih hma chu neih ka duhlo zawk a, ka pi leh pu te bulah ka intiam a lawm" min chhanglo in a ngawi zui vung vung a, a lungawilo emaw ka ti hman rum rum a ni.

"Anih chuan min nei rawh, i chhungte chu kan pahnihin kan enkawl thei a lawm" a ti leh hmiah mai a, kei ka lo nui hawk thung. 

"I nui leh maw?" a lawmvaklo tih a aw ah a hriat theih. "Chutiang te a chi hleihnem" nui chunga ka tih chuan "Ti teh Bawihno, ka lakah i hlauhthawn angailo, ka duh takzet che, i tan pawh ka ṭha tawk em em ang....ahh....ka sawi awmzia chu.......ka tum ang" a ti bah nawk a, chumi hnuah a ngawi vung vung a "Pasal ṭha tak ka ni ang" a rawn ti nawn leh a.

Ka lungphu rang dup dup chu chiangtakin ka hria, thawk a ranga ka hit pup pup mai, "Ka nghak dawn che anih chuan chhan ṭha tawk tak nei chunga nghah che ka duh, chhanna ka beisei ang hi min pe dawn anih phei chuan i duh chen chen ka nghak thei bawk che" a aw rilruih te chuan min fan a ni. Ka nui sak a, ka hnuk a ulh lek lek bawk. 

"Min nghak rawh" tiin ka chhang thei hram a, ka aw chu a lawi hle a ka mittui a parawl ringawt lehnghal.

"Engkim ka rawn hriatpui lo che a mahse, ka ngaihtuah reng che ania, i tan ka awm tih hria la min mamawh chuan min ko ang che" 

"Tlan tauh nan ka hmang ang che" ka lo ti vat a. "Aih, tlan tauh nan chuan ka ṭhalo ang, i lêt leh ka phal kherlo maithei" a nui lek lek aw chu ngaithla chungin ka bu nghat nghat a, tunah chuan ka mal tawh dawnlo, mipa fel tak min ngaihtuah em em tu ka nei a, ani chuan eng hunah pawh min neih a inpeih thu min hrilh mek a ni, chutiang taka thilṭha hria chu ka ṭap lo theilo. 

Ka insut faih faih ri a hriat rualin "I ṭap em ni? Hrep chuan! Engthil nge thleng a?" thawm ri hrawkin a zui a, chuveleh keipawh ka inhruhul nghal thuai thuai a "Ṭap nang, ka mu dawn chiah" ka ti vat a, a thaw huai ri chu ka hre thei.

"Kha inchhung aṭanga lakchhuah che kha ka duh tawh a ni" a hmel chu hmu ila a tum hmukin ka ring, "Chutiang sawi suh" ka lo ti a, ka rin ang ngeiin kan inchhung boruak chu a hre ve chiang tawh a lawm, a pawilo kan pahnih inkarah danglamna a siamlo a; chu a hnekin kan inpawh phah zawk a, a ṭha vek mai e.

****

Office ka lut chiah chu Interview tura ka tlin thu Alawmin min lo hrilh a, a phur kher mai; chutiang bawkin keipawh. Kan ṭe teng tunga kan phi cheng a ni ber "JH-an engmah a sawi lo ami, alo tihpui che  aniang" thlanglam bathlara min pawh thlak sawk sawk pahin a ti a. 

"Engmah hna chungchang kan sawi ngailo" keiin ka lo ti he haw a, tunmai khan JH-a nen chuan chaw chhun eiturin kan kalchhuak a, engmah ka hna dil chung chang chu sawi a neilo. Interview chu huphurhawm viau mahse phur tak ka ni, Alawmi nen chuan kan in ena kan nui leh rih ṭhin.

"Ka nu a lo zin dawn a, tlaiah i rualin ka haw ang, alo thlen hma a ina ka lo awm loh chuan nuamlo a ti lutuk ang" ka ti a, "A ṭhat chu nizanah Rina nen kan inhaua vawin chu kan inhmu dawn lo" a lo ti hmak hmak a, a khat tawk hian hetiang hian an inhau ve renga chawrualin kar khatah vawikhat tal hi an intitau ngei ngei a, an inṭhen thei tak tak chuanglo, an induh lutuk hi awmngaihna an hrelo niberin ka hria.

"I nu chu eng titur berin nge a lo kal?" ka dawhkan lam pana kan kal laichuan a ti a, "A pum anuamlo reng a, a rawn inentir lawk dawn" tiin ka chhang mai a, ka nu chanchin hi chu thui tak ka hrilh lemlo, "Naktuk ilo la kal dawn em?" a ti zui zat a, ka ring chiahlo, Uramtei a kal thei tawh dawn a, thla a laklawhlo chiah chiah bawk nen, vawin hi ka ni tawpni tur a ni dawn ta reng mai.

"Kar khat hnuah interview innei dawna, ui... Mambawih inhmuhloh chhung a rei dawn e, ka ngai awm che, i rawn zawm leh hunah lah Department dangah daih i awm anga" a chek zui tlat tlat a leh ringawt ṭhin a, a engamah hma hian tling turah hian mi hi angai nghal ringawt mai a.

"Ti teivet suh, min ṭawng chhiat ange aw" ka lo ti chu a nuih a za kher mai.

Ban dawn ah JH-a chu text-in ka hawsan tur thu ka hrilh a, a buai aniang ka Message chu a chhanglo, Alawmi nen Gate a kan inphurh chhuah dawn laitakin Annexe building a a lut tur chu ka va hmu thuak a, a buai ngang a niang.

"Thil ka hrilh ang che" a beng bulah kun hnaiin ka ti a "Sawi la" ring leng lawngin a lo ti var a. "JH-an nupui atan min sawm a sin" ka sawi zawh rualin ring zetin a lo nui chhuak huk a. "Lalmambawih min awhthik ziah lo teh" nui hawk hawk chungin a ti a, a âwm ve tho mai a awihawmloh ve bawk em a ni.

Kan inkawta kan din rualin "Minlo nghak rawh i nu chu ka lo hmu ve ang" a lo tih vang chuan ka nghak a, kan kawta Bike inhung thluah ka hmu chu ka ner sawk a; hriatthiamloh hmel taka Alawmin min lo en chuan "Mihausa ho an lo leng anih hmel" ka ti zauh a; a nui ṭhâ a "Jonaka te chu a mi?" a lo ti ve mai a, kei ka lo bu nghat nghat a.

Inchhung kan lutfel hman awrh tih ah "Mambawih" sitting room aṭangin Irene-in a lo ti lauh lauh a, Alawmin nen ka va lutphei chu a inleng te nen an lo hawirual ṭhap a, ka mi hmuh tumloh lutuk ka hmu chu ka phu chiang kher mai!

Min lo nuiha "Hei a lo thleng ve mai alawm" Zosanglian-an a lo ti bawk, Lalrinhlua nen chuan kan inmelh rana, engvanga helai hmuna lo kal ve nge anih ngaihdan ka nei thiam hauhlo, Irene-i nen ṭhian an nih lah ka hre heklo.

"Ka inleng te an ni lo bawka thingpui i lum thei" Irene-in a lo ti hmanhmawh chu ka melhrum hrep ka chak  ngang mai. "Ngawi rawh hei Alawmi nen Counter-ah ka nu lam kan ngai a, chhuah leh mai kan ngai dawn" zah zela ka Bag dap rak rak chungin ka ti a, an kianga titi aichuan kal chhuah leh nghal chu ka duh zawk reng reng a, Lalrinhlua nena hmel inhmu thei renga awm chu reilo te chhung pawh ka chak hlawllo.

"Ka pheikhawk ka thlak anga kan kal nghal mai dawnnia" Alawmi hnena ka tih laimekin "I nu te chu a lo thleng tawhin ka hria" Irene-in a lo ti khauh a, min ti hamhaih viau.

"A lo thleng tawh a?" Alawmin a lo ti ve  bawk.

"Nichin kan haw tirh khan ka nu leh nu pakhat ṭhing ve deuh hi an lo inzui chhuak a, thil phur kual ṭhin emaw ka tia mahse, i nu a niang sawtah sawn Air bag bal deuh a awm alawm, ka nu nen Bazar ah thawmhnaw an dah dawn in ka hria" min ngaihsak manglo zet hian a ti leh a, a thil sawi chuan thawk a tisak nghal ṭalh a; an hmuhloh lamah kut ka hum ruh ngar ngar bawk.

Alawmi chuan ka awmdan hrethiamin min lo dinhnaih vat a "Anih chuan lo nghah pahin thingpui lo in ila tiraw?" ka hnung rawn ben dat dat pahin a ti zui a, "I nu a lo zin a maw?" ti a Lalrinhluan ngun zetin min lo en ve reng chu chhang lo chuan choka lam ka pansan a, Alawmin min lo zui nghalthuai a.

"Engahmah ngai duh suh?" 

"Engahmah ka ngai ngailo, engtin pawh min ti se ka tuar thei zel mahse, ka nu chungchang an sawi hi chuan ka tuar theilo" inpetruh ṭeuhin ka ti a, ka sa nghal pup pup mai, Irene-i ṭawngkam vang chauha thinur ka nilo bawk, ka nu kha a damsamlo a, vawinah Lawngtlai a ṭangin a lo thleng phei chauh anih laiin Nu Muanin Bazara thawmhnaw pe tura a lo kalchhuah pui hmanhmawh chu ka lawmlo a; ka tha a na bawk.

"Ui....an van ti awm anglo tak, Nu Siampuii chu  damlo inentir tum a ni bawk sia, a chauh dawn tehlul nen" Alawmin alo ti ve bawka, ka nu chu ka ngaihtuah ngang mai, ka thinrim bawk nen hnuk ulh ṭunin ka inhumruh a; ka ṭap lo chauh a ni.

Titi pahin thingpui kan luma Alawmi nen chuan kan inhrosa dun a ni ber, thingpui ka siam mawlh mawlha, Sitting room lama thawm ri ham ham chuan thin a ti rim hlur a, thingpui va pek pawh chu ka chak neklo. 

"Khawi maw keiman" tih leh ka fian ken lai chu min chhuh a rual a, Chini a thlak belh mawlh mawlh lai ka ho chungin ka lo en a, a nui a nui a a nghal ve ngang mai.

"Irene thingpui kan siam zo" tiin ka au a, va pek kher kher chu ka tum baulo, ka inleng an ni biklo a; a duh leh aman sem ve mai rawh se.

Thingpui chu a lo la ve mai bawk a, Alawmi a awm vang aniang min en miahlo leh tum hmel min hmuh loin a kal leh mai a, a kal hnuah Alawmin min lo mitmei zuk zuka; an in hunah engtin tak awm hlawm ang maw, a ruk chuan an ner ve nak nak ang chu.

No ruak a rawn dah lehlam chu a rawn meng ling nasa mai, keichu thip zeta min rawn melhin "Thingtlangho thingpui siamdan a mi ava han thlum em em ve a, in pawh kan inthei hleinem" dawhkana no rawn nghah per chhuai pahin a ti a, Alawmi insum zo lo lo nuichhuak chu a huat hmel ngang mai bawka, rum zeta a melh leh hnuah Sitting room lamah a kal phei nghawng nghawng a, pum na urh khawpin keini kan lo nui thung.

Jonak te ṭhianho an lo chhuah phei laichuan chawhmeh siamtur kan lo chan mek a, Lalrinhlua lo ding deuh uk chu hmulo derin tuikhawihna lan ka pansan vut a, ka be chaklo tih a hrethiam ve a ni chek aniang engmah sawi zuita lo chuan a kalchhuak hna hna a. Alawmin hrethiam lo fein min lo en a, engmah Lalrinhlua nen kan chungchang hi ka la hrilh biklo, ngaihzawng hlui ka neih thu leh min phatsan thu chu ka hrilh ngei mai a, a hmel leh a hming a hrelo thung.

Thim dawn thleng chuan Ka nu leh Nu Muani chu an la rawn lêtlo, Alawmin eirawng min bawlpuia "Chaw ei ve mai rawh" ka tih lahin a duh mang reuh silo a "Naktukah ka lo hmu ve tawh mai ang" tiin min hawsan a, ka nu chu ka ngaihtuah takzet tawh, a inthlahrung thei bawk si a, a nat pawhin Nu Muani bulah a sawi ngam dawn der silo a, a rukin a lo tuar tlawk tlawk anih phei chuan....

Ka phone rik rualin ka mittui chu ka hruhul thuai a, "Hello" ka ti tham nghal ṭuak bawk.

"In ka thleng ve chiah a, i nu chu a lo thleng tawh em?" JH-an  a lo ti var a, ka hnuk a ulh ṭha leh a ka chhang thei lawklo. 

Bathroom ah lutin aw ka thian leh te te a "Ka khawngaih ê" ka ti zuai raih a, ka ṭah aw ṭeuh chuan a ti hamhaih ve viau ang.

"Engthil nge thleng a?" a rawn ti ta chiah a, ka zep ṭit ṭet peih tawhlo "Bazarah thawmhnaw sem turin  Nu Muanin  alo hruai daih a, ka rilru ana lutuk, a damlo a a chau dawn bawk si a" tiin ka ṭap ṭiau a, thawk la hawk riin min lo chhawn a, a tan chuan han tih vak ngaihna chu a awmlo ang tih pawh ka hria mahse, a hriat ve ka duh a ni, ka ringtawk viau tawh te pawh a ni mahna.

(End of chapter - 15)