GOMENASAI (CHAPTER - 16)

GOMENASAI - by Ahmangaihi violette khiangte

CHAPTER - 16

JH- POV,

"I phone tawh em" ka lo ti nghalthuaia, a ṭap nghal ṭiau mai bawk si a rilru a ti chîai lek lek mai. "La phone lo, an lo haw ve ṭep tawhin ka ring; hei khua a thim dawn tawh a" a aw ri chuan min ti hrehawm ve ṭeuh a, han tih vak ngaihna lah ka der lo.

"Zanriah eikham veleh ah ka lo phei dawn nia" ka ti ta ringawt a, aw min pawh chiahlo nangin a nu hmel hmuh ve hrim hrim pawh ka duh, "Vawin lam i buai bawk sia, i chau lo a mi?" inthlahrung takin a lo ti a, an ina ka leng khât viau chung hian tun thlengin ka len hi remti tak ang hian a lang ngailo, a tir kha chuan ka hrethiamlo dawn dawn a mahse, inchhungkhura a dinhmun ka hriattak hnu hi chuan ngaihdan ka nei thiam tawh thung.

"Ka lo kal harlo ang" tiin kan inbiakna chu kan ti tawp a, a nun leh ka nun dan inpersan lutuk hi ka khaikhin fo mai, retheihna hreloin kei ka seiliana ka farnu te lahin pawisa hlutna an hre heklo, mahni hmakhua ṭheuh ngaihtuahin kan kalhrang vek a, Mambawihi erawh midang tan a hun a hmang nitin niberin ka hria, hmeichhe khawngaihthlak tak a ni, engtin nge ka hnena awm tura ka hmin theih ang tih mawlh chu ka rilru tibuaitu ber a ni.

Ka lakah rinna a nghat pumhlum ngamlo a chu chu ka sawmna pawh ala hnar chhan tih ka hre bawk, ka belhchian poh leh hmeichhia ka lo hriat ṭhin dangte aia a danglamna ka hmu tam telh telh a, ka duhna a zual zel bawk, kawppui tura ka duhthusam ang hmeichhia ngei ani tih lah ka chianga a tan keihi ka ni ve angem tih chu zawhna a ni. Kei hi ka hmanhmawh viau em mawni le, midangte anga kum hnih thum inzui phawt hnua inneih chu a ṭha zawk angem, inhriatchian vak ngai kan  nei tawh pawhin ka hrelo a, tleirawl inngaizawng anga hun khawhral mai mai chu a ṭul tehchiam na ka hre hauhlo.

"I hman tawh chuan lo chhuk la, ka nu nen kan nghak che a nia" phone hmang chunga ka room kawngka a lo dah zawk pahin Princess-in a lo ti a, khawngkhar kharin a kal leh mai a, inhnuai kailawna a phone hmang ṭawng ri lang lang chu ka la hrepha.

Zanriah eilai chuan "Umam, In chahbi kha min pe teh kartawpah Hlutea te ṭhianho nen Birthday kan lawm dawn a, naktukah eitur stock sa ka duh dawn" ka phalsak loh hlau tih hriat takin min en duh miahlo lehnghal a, "A kum engzahna nge ni?" ka nuin ka lo ti vat a, "28 na, enge ka pek ang pawh ka hre tawhlo thawmhnaw chu a duhtawh ka ringlo a, pheikhawk a mamawh tawh bawk silo, enge ṭha ang" ka nu lam hawi chuan a ti chul a "Chocolate"ka lo ti zauh chu a duhloh kher mai.

"Scooty ka pe mai dawn a maw ni le?" a mitsira min melh ralh pahin a ti a. "Tu pawisain?" ka lo ti leh kher chu ka nu lam min hawisan hmak a, "Enge ka pek ang, thil ṭha deuh common si lo" ka nu nena an titi chu ngawi rengin ka ngaithla a, ka nuin alo phurpui thei zel hi chu ṭha ka ti lo viau, "Nupa in la nilo a, i nei kher angem pawh ala chianglo, amah zawk kha thilpek pe ṭhin tutur ani zawk lo maw?" ka sawizawh rualin an nufa chuan min melhrum kher mai, ka nu chuan a mitmeiin min lo khap a, "Ka pawisa a hmang dawn alawm" a lo ti leh hmiah a.

"In tihhnawk thianfai leh ula, zan inriak tur a nilo, tumah inchung roomah chho bawk suh se" ka tih chuan a ner nang nang a, min hnialzui erawh angamlo, kartawpah an lo kal ru fo a ṭhianhoa riahkhawm nan te an lo hmang ṭhin tih ka hriat hnu aṭang khan chahbi hi ka pe chhuak ngai tawhlo, naupang chumchiap ang maia ka enlai khan nulat rilru lo puin tlangval alo tawmpui der tawh.

Ka thil ngaihtuah chhuah vang chuan ka thil eichakna a tawp nghal hmak mai, ka farnu te lakah hian ka strict em em ṭhin, Apuiin hnamdang pasala a neih dawn te khan theihtawp takmeuhin ka dodal anih kha mahse, ka nu leh pa khan mihausa tak chhungkua an nih vangin rem an tihsak a, enge sawitheih ka neih, nu leh pa berin rem an tih miau chuan.

Tunah Reny, hmanni lawka ka telloa zan pawh muhil thei ngailo khan a duhtawkin a ngaihzawng chanchin min sawikhum ngam tawh a, min dodal zawngin a awm ta fo mai chu ania, chutah ka nu hian a tihsual a thup sak ziah a, hetia ka lo inlak fekfawn ve tehchiam hian awmzia a nei thui leh tawhlo, chu chuan min ti thinur a ni. 

"Tu tu nge ni dawn che u?" a ṭawng barh barh laichu tawpin ka lam alo hawi a "Kan unau ho leh ka ṭhian tlem a zawng a ni mai, Jonak te unau pawh ka sawm ang" Jonak a hming a lam chuan inthlahrung hmel a pu a, kawm tam ka phalloh vang a ni. "Fifi te kiangah awm la Zosangliana chu sawm kher a ngailo" ka sawi zawh hma hmain "Fifi ka sawmlo" a lo ti leh hman hmawh a.

"Kan unau ho iti sia" Fiona hi a nungchang a ṭha a, a kawm leh duh mang miah silo hi ka hrethiamlo, thil an tih ho dawn reng reng hian an thlim ziah zel a, an enhrang bik emaw tiin ka Nî tha alo na deuh tlat ṭhin.

"Sawm ang che, Fiona-i telloa thil tihkhawm chu a remlo ang" 

"Excuse me!" awrawl vin hlar hian a lo ti a, chiang zetin ka mitah min en kal bawk.

"Ka party ania, ka duh duh ka sawm ve ang chu" ka nu lo inrawlhin "I u vin suh" a lo ti vat a, "A hma ang thil kha a thleng leh tawh tur a nilo"chang fek fawka ka tih chuan  mitmeng lian kelkawlin min melh ve ran a, a thinchhe bawk a a sen nghal ṭan ṭan a min chhan zui pawh  a chak hmel ngang mai, ka nu leh pa aimahin min hlau zawka ka thinrimna cho chhuah chu thil ṭhalo tak a ni tih a hrechiang bawk a, eitur suasam lamah a ṭuan tihloh chu min chhang zui ta biklo.

Dawhkan ka thawhsan laichuan "Judy leh a bialpa thar pawh ka sawm ania i duh chuan lo kal ve rawh" a la rawn ti zui hram a, ka huat tura sawi ve mai mai a ni tih hre tho mahila ka inhumruh ve ṭeuh mai. 

Ka roomah chhoin ka insiam zui mai a, inhnuai lamah chuan Patea fa te ho an lo thleng khawm leh tawh aniang an ri laih laih reng a, ka chhukthlak laichuan Sitting roomah Monopoly an lo khel a, an thawm pawh aṭha hat hat viau, chutih laiin choka lam aṭangin Fiona-i chu eitur tray chawiin alo chhuak phei mek a, a lampanin ka kal nghalzat bawk.

"Naktuk ah Reny te i zui dawnnia, chahbi hi kawl la, i thuloin an lut chhuak tur anilo, kartawp thleng chahbi hi kawlla a thu ber i ni ang " midang ho hriat tur ngei chuan ka ti a, an lo hawirual ṭhap chu ka va en leh chuan an phun sar sar hlawma, Fiona chuan hrehhmel deuhin chahbi chu a bana "Tumah pe suh" ka ti zui leh hram a.

"Mampui i kal chhuak dawn a law?" ka nuin a lo ti a, zan lam ka chhuah vak ngailoh avangin makti hmel a pu lek lek bawk, "Nula i rim dawn a ni maw?" Fiona chuan lo ti ve in min nuihsanga "Victora alo kal maithei, ka chhuak tih inlo hrilh dawnnia, ka phone ka kenglo" ti lehin ka kalchhuaka, pawn ka thleng chauh tiha Gate a Victora Bike lo tlanlut mek chu ka va hmu lehlawi a, ka sawm ve nghal law law zawk dawn emaw ni.

*MAMBAWIHI*

Chawei hun ṭepah ka Nu leh Nu Muani chu an lo thleng ta hram a, bawrluka kawngkhara an lo lut chu an Bag ka lo lalthlak sak nghal sawk sawk a, "Mambawih sangha hi chhum nghal rawh, i nu pawn a eichak ang, Dil sangha tharlam deuh kan hmufuh hlauh a" Nu Muani chuan a lo ti lut bawrh bawrha, ka nu hmel pawrfap mai ka hmuh chuan lo nuih pawh harsa ka ti lammah a ni. 

"I chau em?" zawitein ka ti sep a, min nuihsang chungin lu a thinga, a thlan hluam bawk si a a hmel en reng reng pawhin a chau tih chu hai theih rual a nilo. Sangha chu ka chhum leh phawt a ka nu inbualna turin tuilum ka siamsak nghalthuai bawk.

"Keichu chawei khamah ka inbual mai ang" Bathroom a ka nu awmlai chuan Nu Muanin a lo ti ve a, Patea nena Sitting room a an ṭawng dun barh barh chu ka ngaithla ve renga, ka nu chungchang a sawilo hlauh a ka lo thaw huai mai. "Chaw ei i la peih lo ami a, ka ril a ṭam tawh a sin?"Irene-i lo pheiin a lo tih chuan "Heihi lo met fai rawh" tih leh carrot lo theh ka rual a, "Aia upa te tir zawt zawt zel mai" ti nang nang chungin a lo ti ve mai bawk a.

Zanriah kan eilai chuan ka nu chu ka en leh rih ṭhin, a hmel thu that te, a biangki rat te leh a sam chul deuh rup te a landan hrim hrim chu khawngaih thlalaawm tak a ni. "Naktuk chu ba min khawn pui leh la, mahni chauhin ka tei nasa thei lutuka chhuahpui han neih te hi anuam ve a, kan peih tak leh thawmhnaw tlem kan pe pah bawk anga" phur fe hian Nu Muanin a lo ti a, ka ngaihdan ani em em tawhlo. "Naktuk chu kan inentir ang, ka nu pum hi anuamlo renga, inentir vat angai damdawi ei Risk tawp chi a ni bawk silo" ka lo ti hlak a, tum aiin ka ṭawng nelawmloh; Nu Muanin min rawn melh ralh tihloh chu engmah a sawizuilo.

"I khawilaiah nge anat a, Ulcer em ni?" Patean a lo ti ve a. 

"Ka nak sir deuh ah hian ania, Ulcer chu ka nei hrim hrim tho a" damdiaiin ka nu chuan a lo ti a, a aw ri te chu inthlahrung deka ka hriat vangin ka lo ipik ṭeuha, ka tawt urh mai bawk.

"I rilphir te anilo maw i nak bawrah daih a nat chuan" Patean a ti leh a, ka nu chu ka en a angaihna a hriat loh hmel viau mai, "Naktukah hma deuhah kan chhuak anga Private ah kan inentir daih dawn nia, Test ngai te pawh a awm maithei a" ka lo ti ve a.

Chaweina kan sengfel laimekin kawngkhar an lo kik a, Nu Muanin a va hawn saka JH-a leh Liansanga an lo lang ve hlawla, ka thlengsil lai chu min lo melh zawka keiin ka lo nuih var var thung.

"Lo ṭhu ru, ka nu pawh sitting room ah a awm kha" ka lo ti vat a, an inzui phei chu ka enzui renga, chhan em em sawitur awm silo hian awm an ti nuam ve veng veng nia!

Sitting room a ka va luh ve laichuan Irene-i te nufa chu an lo inthiarfihlim daih a, Patea leh ka nu chu thlawhhma chanchin sawiin an lo titi a, JH-a te ṭhiandun pawh an lo ṭhu ngawi ran a, min hmuh rualin "Mambawih i ṭhian te a mi?" ka nu chuan a lo ti var a, inhmelhriattirna te ka han nei tete a ka nu chuan mak a tih hmel deuhin ka hria. 

"Kan Mambawihi chu hei tlangval Officer chin ngatin ania rawn rim ṭhin" Pate an a lo tih chuan ka lai ve ṭut mai. Ka inlengte pahnih chu ka nu chuan a en leh zauh ṭhin a, a tu zawk nge min rim tu zawk a hre hauhlo ang, a be lumlam vak ngamlo nge ni a ṭawngtlem hle a, Liansanga a titi barh barh renga Patea hoin an pathum chuan an titi a, JH-a erawh a ṭawngtamlo ngang mai.

Liansanga zawk chuan a nghawk leh zauh ṭhin a, chutah ṭhungil deuh hluaiin keichu min lo en a, eng thil emaw min zawh tum te pawh a ang. "Mambawih thingpui in ila" Patean a lo tih takah chuan ka thawhsan ta thuai a.

Thingpui chawia ka phei leh laichuan Liansangan min lo mitmei zauha, Center table a an thingpui ka va hunsak laitak chuan "I nu hi kohdan tur a hrelo a, enge a hming?" Liansangan a lo ti ru sar sar a. "Nu Siampuii" zawitea ka lo tih chuan a nui ṭhaw a, JH-a lamah awnin a hrilh ve nghalzat a, JH-an min lo melh rulh chu nuih a za duh ngei mai.

"Nu Siampui  i chau em, enge i an a?" aw thum dutin a tih rualchuan Liansanga nen inenin kan lo nuih ru tat tat a. "Chau vaklo e motor ka ruilo hlauh a, tunlai tak chu ka zia rih e" ka nu chuan a lo ti ve vat a, "Khawiah nge in inentir ang, Doctor rawn tum te in nei sa em?" pakhat zawk chuan a ti leh a, "Neisa em em lo, Mambawihi tih na na-ah ani mai" ka nuin alo ti  a. 

"Pum lampang a ni lawm ni, Doctor hmelhriat ṭha deuh ka nei tak asin" Liansangan a lo ti ve nghalthuai a. "Hrilh rawh" JH-an a lo ti phawng a, a tum aiin a ṭawng bung deuh nge ni a nui suk a, a lai deuh ṭutin ka hria.

Patea a ṭhu ve renga inkhel en pahin an titi luama, ka nu erawh rei min ṭhutpuiloin a mu a, JH-a te pawh reitak an lenglo, an haw dawn chuan pawn kawtkai thlengin ka zui chhuak a, Liansanga inthiarfihlim zui zatin an Bike dahna lam apan zui nal nal a,  an ṭhiandun chu an mizia a inpersan dun ngang mai.

"I nu chu ka rinaiin ala nula daih mai, i chhun hle bawk anih kha" nuisuk chunga tihpahin ka kut a rawn hmer vawng vawng a, "A hmelṭha em?"uang takin ka lo ti ve a, a bu ve nghat nghat tho.

"Ka chungchang a ngaihdan zawt rawh aw" ka lo nui hak a, "Ka bialpa i ni tih pawh a hre hleinem" ka ti mai a, "Hrilh rawh, hrilh ve tur a lawm...ahh... i nu ania" a ṭawngbah nak chu ka han melh ralh a, a landan anglo taka hetiang mizia a nei hi ka ngainat zual phah nitaberin ka hria, ka rinaiin a zakzum lehnghal, a lai ve ṭut ṭhin te hi a tir kha chuan inhmehlo ka ti a mahse, alo inhmeh viau zawk a ni.

"Ka kal ange, mutui ang che" ka ṭawng ve hmain ka hmuiah a rawn fawp a, kan bul lawka Bike a lo din rualin a inla hrang leh nghalthuai a "Khawlai pawh a sawi leh ta lo" Liansangan a lo tih chuan ka zak ram ram mai, "A sawia sawi pawl leh chet la nghal mai ṭhin pawl hi kan awm ve ania, lo chhuk teh" tih leh Liansanga chu pawh thawh a rual a "Ava mak e aw, ka phurh ah te chuan i chuang ziah a, bialnu te awm ve vang maia" nui ṭhaw chunga Liansangan a lo tih chuan ka lo nuih ve var var a. 

JH-an a khalh a, a hnunga chuan pahin nghet zet hian JH-a kawngah a kuaha a hnungah a bei thlap bawk a, JH-pawh a tlan chhuak lawk thei biklo, keiin pum dawm meuhin ka lo nuih bawk.

"Tawlh hnung rawh" a tih lahin "Duat tlanchak suh aw" tih pahin a kuah nghet sauh sauh a "Ava mak e Victor" ka nui lai chu min rawn enin "Patling lianpui naupang rilru pu anih hi" kiaisuk chungin a lo ti a, "Tluang deuhin kal ru, tlan chak lo ula" ka lo ti ve vat a.

A tlan liam thleng chuan ka thlir zui a, an palian dun si a, an khawsa zia chuan nuih a tiza zual, Liansanga lah JH-a aimahin a lianzawk emaw tih tur a ni a, JH-a anga piannalh inkhaithli zaih ni ve lo mahse palian ti a sawi tur chi a ni ve hrim hrima,  khatianga an inpawm bet chawt kha midangin lo hmu ve sela chuan mak chu an ti ve ngawtin ka ring a ni.

Ka roomah ka luh chuan ka nu alo la menga, Phone-in naupang ho a lo be mek a, a bula va inthawlh sat sat pah chuan ka va kuah a, kan awmhran lai aimahin ka ngaizual hialin ka hria, a pangtilum te chen chuan ka thlahlel ngawih ngawiha ka lungchhe dawn dawn mai.

Phone a hman zawh chuan min lo kuah ve vat a "Lo leng te kha tute maw, i Patean Officer a ti mai sia, i bialpa te em ni?"a ti sap sap a, "Umm...JH-a zawk kha a nia, enge ang mintih zawt rawh a tia" nui hak chungin ka ti a, "A fel hmel viau kha, a zahawm khup mai a" ka nu chuan a ti ve a.

"Min duhpui em?" ka lo ti zauh a.

"Ka hrelo le, keichuan ka hre ve vak lo a, tlangval hmelṭha tak chu anih kha" a lo ti leh mai a, "Pasal tur angin han ngaihtuah la, makpa atan i duh em?" ka ti nawn leh ngat a.

"Mambawih, keichuan ka enkawllo che a, i pi leh pu leh i Patea ten an enkawl che a, kawng engkimah an ni hi rawn zawk rawh, i nu ve hi chuan maw sawi ve ngam tur pawh ka nilo" a hmai hupin a insut hlawp hlawp a "Nû...." ka ti hap a, a thilsawi chuan minti hrilhhai a ni.

"Pasal ṭha tak nangmah hmangaih em em tu che nei la, i nu hnung zui tlak ka awm silo a, chhungkaw dinhmun aṭang phei chuan i pasal neih hunah pawh ka rawn thuammawi zo kherlo ang che" 

"Chutiang sawi tawh suh, ka nu i la dam ve ṭek ṭek chhung chu engmah dang ka mamawh hleinem, "Nu" ti a kohtur ka nei ringawt che pawh hi min thuam mawi tu ania lawm" ṭap ṭeuh chungin ka lo ti a.

"Pathian hnenah pasal ṭhatak i neih theih nan leh keimah anga i vanduai ve loh nan ka ṭawngṭai ziah ṭhin" a insut zui hlawp hlawp a, inhnem thei chuang kan awmlo.

Zanrei deuh thleng kan ti ti a, a chauh dawn tehlul nen a tuarchhel ka ti ngang mai. "Pawnlam mawina te hi chu engmah an nilo, mipa hmelṭha thlang ngailo la, tu pawh nei dawn la nangmah hmangaih em em tu i neih phawt chuan keichu ka thla a muang a ni mai" a ti sap sap a, engtik laiin nge a muthilh ka hrelo, ka ṭawng leh laiin a lo muhil der tawh a, puan ka sin ṭhat tir te te a, a hmel pawrfap chu lungchim takin ka en bawk, inhnaih takah awmloin inhmu ngai manglo mahila thinglungah inzawmna ka nei a, ka nu anih bak ka tan engmah a tih angai tawhlo ka nu anihna chauh pawh ka tan chuan thil ropui tak min tihsak tawh a ni.

"Min dampui reng ang che aw Nu" tiin a chalah ka fawp vawng vawng a, engtikah tak nuamsa takin dah ve thei ang i maw?

Zing ka thawh chuan ka phone ah message a lo awm va va a, JH-an Doctor number leh Address min lo thawn a, hming min lo ziahsak vek tawh hi a lo ni a,  a tih zia kher mai. Chaw eikham veleh ka nu nen kan chhuak a, kan va pan Doctor chu thiam leh lar deuh mai hi a lo ni nghe nghe a, inentir tum pawh an lo tam naniang mai, darkar khat dawn chu ka va nghak ve awm e.

Test chi hrang hrang minlo tih tira, tlaia result kan va hmuh leh chuan ka nu chu a kalah lungte a lo awm hi a lo ni a, zai angaih dawn thu min lo hrilh bawk. 

"JH.Lalhruaitluang chhungte a mi innih a?" tiin Doctor chuan min zawt nawlh a, "Aih" ka ti duh biklo, "Aw ni e" ka ti ve hmiah mai, a ṭhat zawkna a awm ka beisei deuh tlat.

"Hmun dangah chuan kal ula chuan thlakhat hnu velah an zai chauh ang che u, JH-a lah khan lo ngaipawimawh tur che u in min ti nasa mai lehnghala kha, Pathianin rem a tih chuan kar lehlamah inzai kan tum dawnnia" tiin Appointment min siam sak a, lawmthu han hrilh chiam ngaihna pawh ka hrelo, ka lawm takzet a ni.

Zanah chuan amahin a lo leng a, lawmthu te ka lo hrilh ve luama, min chhang duh miahlo lehnghal a, ka nu nen an titi lai chu ka enreng a "Keipawh ka mîtah lungte a awm tawh alawm" tiin a chanchin te a sawi ve luama, hlauthawnglo tur tein a fuih ve nasa mai, ka nu pawh a ṭawng ve barh barh a, Nu Muani te nufa erawh TV an ena min bengkhawn lemloa, JH-a an bia tih loh chu kei leh ka nu chu min be lumlam meuhlo, tunkar chhung ka nu chu ala cham angai dawn tih ka hrilh aṭang khan an Mood adang daihin ka hria.

Ka nu chuan JH-a chu a fak ṭan ta viau mai "A ṭawngkam aṭang rengin miṭha tak anih dawn kha, i chanchin engkim hrechiang che a neih a hrehlo che anih chuan keichu ka hmin thlap mai" mut hmunah chuan a ti sap sap a, JH-a te chhungkaw dinhmun leh kan dinhmun inthlauh zia han hre ngat sela chuan chutiang tak chuan min pawmpui thei angem tih te pawh ka ngaihtuah rauh rauha, hlim viau e tiloin minti hrehawm ru ṭeuh bawk si.

(End of chapter - 16)