GOMENASAI (CHAPTER - 17)

GOMENASAI - by Ahmangaihi violette khiangte

CHAPTER - 17

"Mate, i naute thil chu kan lei lehlo mai dawn em mawni zawk le?" chhuak tura ka insiam mawlh mawlh laiin ka nuin a lo ti a, ka thiltih lai ṭhulh meuh a enin "Tinge?" ka lo ti haw a, a inthlahrung leh tawh tih ka hrethiam nghal mai.

"Aa....Lehkhabu chu a hlui leitur a awm mai ka ring a" a lo ti ta reng a, "Nu pawisa ka nei a lawm, an Uniform te pawh kan lei nghal vek ang chu, ṭhuisa kan lei anga saw lamah a buaithlak lutuk loh nan" ka Nu ngawiran chuan ka awm a ti nuam bik chiahlo. "I hek dawn emai ti duhlo mai ang, Uniform pawh midang hak hlui a awm tho ang" a lo ti zuai raih a. 

"A pawilo, hetiang hun atan hian alawm pawisa ka khawl, chuloah tihsak ve reng reng pawh ka duh a, inzai te chu chutia hautak em em tur a awm hleinem, zaipui a ni chuanglo a JH-a pawn a sawi kha, i duh leh nang chu lo mu la leitur ṭul ho kha min hrilh la keiman ka va enkual ange" ka ti leh vat a, a hmel chu a ngui nghiai a a rilru a hahhmel viau bawk, ka tihluih ve tlat vang chuan min hnialzui ta em biklo. 

Nilengin naupang ho mamawh lamkhawmin ka phar buai a, Exercise Bu pawh rei deuh hlek an tla turin Dozen nga ngawt ka leisak a pawisa pawh ka inseng ve nual mai, thil eia dawra ka ṭhut laiin ka Nî in min lo bia a, "I pi hi tunlai chaw a eitheilo riau a Vitamin ṭha deuh hlek chaw eituina tur chi rawn leisak teh, sumo ah emaw i lo thawn mai anga" a lo ti a, eng enge maw  sawiin kan inbe luama ka nu lo zin thu erawh ka zep rih, a damlo a zai angaih thu te pawh chu han hrilh ve awmtak pawh ka ni a mahse, ka hrilh anih chuan ka nu nena kan inbe pawp leh ringawt pawh a helh leh emaw ania nga, a buaithlak zual mai mai zawk dawnin ka hria.

Ka thil lei ka nuin a hmu chu a rinaiin ka lei tam aniang a chek tlat tlat reng a "Hetiang em em lei a ngailo a sin, Lehkhapuan man tlawm chi bak an hmang ngai chuanglo a" a ti niah niah a, a hmel hahdam huai erawh ka hmuh hmaih biklo, alo zin chhan ber zawk kha ani a inzai a ngaihdawn vangin a inthlahrung vek tawh a ni ber, a sawizui lohnan keiin Box ah ka lo khung nghal zung zung a, mut hmunah titi dunin ka nau te lehkhathiam theih dan te, an chhungkaw chanchin te chu min hrilh a, hmuh ve hlan ka nghakhlel takzet a ni.

Ka nu an zai hun leh Interview ni a in nang buailo hlauh a; a tihzia ngang mai, Alawmi bawkin min kalpui leh a, zinga kan chhuak tur chu ka nuin ṭawngṭaina nen min thlah thlap bawka, chuvang te pawh animahna ṭha tak chuan ka va tlingtla ve chuan ka hria.

Haw kawngah ka zam zia te chu Alawmi ka hrilh ve mawlh mawlh a, "Lungngai suh ka mumangah pawh i lo tlinga kan lo lawm a" awlsam fe hian alo ti a, "Thlasik a liam tawh em, i mumang chu a letling daih ang tih ka va hlau e aw" nuihak hakin ka lo ti ve a,  tlinglo ta ila kei aimahin a lo ui hialin a nia ka rin ni.

Inrinni zan ka inkhawm bang chu kawtah JH-a motor a lo ding ran a, a zawn ka thlen hmain kawngkhar a lo hawnga ka lam lo hawiin minlo nuih a, phur fe in keiin a lam ka pan a a bul ka thlen rualin ka kut a lo hum chawt a, alo kaldawn thu a sawilawk silo; chutia alo lang thut chuan minti lawm em em lawi si.

"Veng ṭhenawmah ka kal lawka, ka lo lutkawi hmanlo ang, ka lo hmu lawk ang che" ka kut hmer vang vang pahin a ti a. "Kan van in nang fuh ve" ka lo ti ve vat a.

"Karleh ah maw i nu chu an zai dawn?" 

"Aw, i Doctor ṭhian khan min duhsak a; a tihzia tak tak a ni" ka tih chuan a lu a bu nghat nghat a,  lut kawi tura sawm chu ka duh viau, a hmanhmawh hmel angreng si a, khawlaia han indinchilh reng chu inkhawm ban lai tak ani vei nen kawngkalin min en leh hrek hrek ṭhina a nuam duh tehchiam lo.

"Thingpui i lo in dawn lo maw?" ka ti ta tho a.

"Tih tur ṭul ka nei a, zan dangah aw, reilo te lo ṭhu lut lawk la, ka fawp duh che" tih leh min kaih a rual a! 

A thil sawidan tehtawl chuan min ti hamhaih angreng, Passenger side kawngkhar chu min hawnsak nghalzat a, a thiltum a sawilawk vang nge ni ka zam ru kher mai.

Driver seat a a rawn ṭhut luh rual chuan ka beng a sa nghal hat hat a, ka lam a rawn hawi te chu ka melh ṭha ngam meuh lo, "A vawt em?" a ti zawi sup a, a aw ri te chuan min ti zam chhe zo vek, chhan mai nachang pawh hreloin ka en reng ringawt tawh, chil ka lem daka ka zam tih a hria aniang a nuisuk lehnghal. "Kan lang thei vek ang" ka lo ti ringawt bawk.

"Lang theilo ang, rei deuh ka fawp lo ang che" ala ti tak deuh deuh a, tinge a chet dan tur a  sawilawk kher le, a che zui lawk bawk silo, min en reng vang chuan ka lai chhe zo vek tawh. 

"Hmanhmawh la" ala nui cheu, min chhaih em mawni zawk le? Â.....a uang ve anih dawn hi, a van ti ho e âw.

"Khawiah maw i kal?" tiin thildangah ka pakai ta daih a, chutah rawn che hrutin "Veng piah lawkah sawn" tih leh min fawh a rual a; a duhthawh angreng si, ka che ve ngam der lo. Ka puanbih chhanah chuan ka mal a zut kual ruaia, thawk a rangin tiril a khur dar dar a, uar taka min fawh paha  Sexy zeta a thaw ham ham ri te chuan ngaihtuahna a tifimloin min ti vai riai mai!

A Phone a rawn ri a, a ngaihsak duh bik mai lo, chutih a hnekin uar fein min fawh chhunzawma, pawn lamah mi ṭawng nak nak thawm ka hrezui bawk nen, kan awmdan chu a fuh dawn tlat lo, a awmah beng dat datin tawp turin ka ti a, phun hluk chunga a inlak hran rualin keiin thawk ka lo la kawk thung.

Ka sam hui ṭhat mawlh mawlh pahin ka hawi kual nghal ruai a, tuman min hmu lo hlauh chu ka thaw huai mai. Ka bula mi ṭawng vin hluk vang chuan ka phu deuh zawk a a nipawn ka lam a lo hawi a, a inthiamlo hnuhnawh leh ang viau a, mitmei hmanga thil min hrilh chu a awmzia ka hrethiam maplo.

"Engthil nge tih an tum leh tak a, Zosangliana a tel em ni?" vin zetin a ti leh a, ka bo tulh tulh mai!

"Anih chuan kawngka kha kalh mai la, ka lo lam kawi dawn che nia" aw ki pangngai zawka a tih chuan hrethiamlo zetin ka lo en ve reng a, kan infawhna vanga a hmui huh hliam mai chu tuaiin ngaihtuahna buai tih hriat tak hian thawk a la hawk a, thinrim hmel a pu tlat chuan ka ngaih a ti ṭhalo viau bawk.

"A Number i neih chuan lo thawn nghal rawh" tiin phone chu a dah a, ngawirengin a inpetruh vak a, a awmdan chuan ka awm a tinuamlo zo vek, a landan vang chuan a chhan zawh pawh chu inthlahrunawm zawk tak a ni.

"Thil pawimawh deuhah ka kal vat angaia" ka lam hawiin a ti a, chhuak thuai thuai se min ti a ang, "E...ole" kal mai tuma ka inher chu ka banah a rawn vuan a, "I hman chuan lo kal ve ta che, a rei dawnlo a" a ti leh ang lawi a.

Ka sana ka en a zan tlai tak a la nilo bawka; a rei dawnlo anih chuan zui ve pawh ka hnial hranlo. "Ka haw tlai thei dawn lo ania" ka ti vat a, "A reilo ang, kan hmanhmawh dawn nia"  Motor tinungin a tlanchhuak nghalthuai a, engthil nge kan tih dawn chu hrelo mahila thilṭha lam chu a nilo phawt mai, a hmel landanah a chiang reng á.

"Khawnge kan kal dawna?" inthlahrung lek lekin ka ti a. "Ka farnu Reny leh Fiona-i te kan va lam lawk dawnnia" a lo ti ve mai a, tehdaih chuan a thinrim hmel bawk si a, thil ṭhalo tak a thleng emaw ka ti hman a ni.

"Khawnge an awm a?" 

"Fiona chu chawlhhmuna kan inah khan a awm a, a unau ten Bathroom a luh hlanin an lo hawsan niawm tak a ni" ka lamhawiin za lo zetin a lo kiaisuk a. Kan kalna tur chu hla ka ti angreng kan haw tlai ang tih mawlh ka hlau, ka nu khan ka awmloh chuan nuam alo ti lo ang.

"Rei lo ang aw" ka ti leh hram a.

"Reilo ang" ka kut a rawn hum a, keiin ka lo vuan ve vat a, a kut chu a lum vung vung bik mai. "Ti nge min hruai ve kher a?" ka ti leh a, hmalam enin a nui a "Ka ngai che a" a tih ri chu hriat anuam viau. 

Chawlhhmun kan thlen chuan vengchhung chu a reh duka, an In lam panin kan tlan zela, nula leh tlangval Spot hmuhtur an awm zeuh zeuh, uluk taka JH-an a thlek chuan mi zawn anei tih ka hrethiam nghal a, "Reny te chu khawnge an kal a?" ka ti leh a. 

"Ka hre biklo, Zosangliana hoin an kalchhuak a ni maithei" tih pahin kawngsira ṭhalai ṭhukhawm laih chu ngun zetin a thlek zui a, chungho zinga an awm chu a ring a ni maithei ka enzui ve nghalthuai a. Tlan muang deuhin a en ngiala an lo nilo aniang a tlan ve leh mai bawk a.

An In kawt kan thlen chuan Motor tidingin a chhuk sawk sawk a, kan piah Gate aṭang chuan nula pakhat hi a lo tlanchhuak ve chiah bawk. "Umam..."a lo ti nghal lauh a, Motor hmaa indinchilha an inbia chu ka en renga engthil tak sawi ang maw, Motor lampana an lo pheilai chuan JH-a hmel chu a rum ṭha kher mai.

"Engmah an sawilawk silo a ka hrethiamlo" hnunglama lo ṭhutluh pahin Fiona chuan a ti a, JH-a lo ṭhulut lah a ngawi hmuk a hnunglam ka han lehhawi laichuan Fiona chu ṭap zo hlim hmel a pu a, thil awmzia hrevelo ta nafam chu ka ngaih aṭhalo ve em em ringawt.

 

"Zosangliana chu i phone thei em?" ka bula mi chuan a lo ti hluk a. "Tuman phone an chhang duhlo" Fiona-in a tih chuan thil awmzia chu ka hrethiam ve riai ruai. "Inah kan dah phawt ang che" JH-an a ti a, kan tlanchhuah leh hnu chuan kan ṭhu ngawiran hlawma, JH-a chu a va melh leh ṭhin, a thinrim hmel tak tak ka vawikhat hmuhna a ni a a ngainatawmloh takzet.

Hnunglam ami chuan tute emaw a phone kuala "Reny te inlo hmu mial em?" tiin a zawt hlawm a, "Judy ka zawt maidawn a mawni le?" a rawn tih chuan JH-a chuan a chhanglo, a ngawih vang vang hnu ah "Zawt rawh" a lo ti ram hmuk a.

Fiona chuan a call nghalvat a, a biak danah a zawt fuh ta aniang "Kan lawm lutuk, hei Umama nen kan ngaihtuah deuh a, kan rawn lam ang" a sawilai mekin JH-an "Kan kal tih lo sawi suh se" a lo ti khur khur a.

"U Judy, an mahni lo hrilh rih suh a ti anih chu" Fiona chuan a ti leh vat a. An inbiak zawh hnuah JH-a bulah an awmna Hotel hming chu a hrilh a "U Judy chu chawlhhmunah alo kal ve miahlo, a hrangin an sawm aniang, hmun dangah an lo tum sa anih ka ring" a ti sap sap a.

An Colony ah Fiona chu dah phawtin kan tlanchhuak lehnghal vat a, chutih laiin ka bula mi chu biak a inthlarunawm ngang mai, "Vawi iti em?" tih min zawh bak chu kan la inbe leh ta lo vang vang, Zemabawk kan thlen chuan "Tihpalh aw, i awmve tih ka theihngilh miahlo ania" tiin min rawn melh a, "A ho lutuk" ka lo ti ve vat a, chutah ka kut a rawn huma "I kut a va vawt ve" a ti zawi sup a.

Kawngsirah Motor tidingin a Jacket a phelh nghal mawlh mawlh a, "Motorah hian min lo nghak rawh" tiin a Jacket chu min sin tir sawk sawk a, hmanhmawh zeta a chhuak zui chu ngawirengin ka thlir a kan piah deuah "Four season Hotel" tih intarna Buildingah chuan a lut a, ka sana ka en chuan dar 9 a lo pel thui viau tawh.

Ka nghak rei phian a Minute sawmhnih dawn chu ka nghak awm e, ka phone ka tuailet sek reng tawh, ka nu pawn vawihnih ngawt min lo call hman bawk, "Hla kan zir lawk a" tiin chhuanlam ka siam ringawt lehnghal a, rilru erawh anuamlo ru ṭeuh reng. Thawm ka hriatrualin ka hawichhuak vat a,  tukverh darthlalang tihniamin ka dak chhuak nghalthuai bawk.

Reny chu JH-an a pawh takmeuhin a rawn pawtchhuak a, pheikhawk pawh a bun lo lehnghal! A hnungah Lalrinhluan rawn zuiin midang an lo chhuak sap sap bawk a an ruih hmel hlawm ngang mai, buaina an nei tih hairual anilo, kawngkal ho pawn an thlir  ṭhap a Reny lah a ṭe ring nasa mai a, JH-a pawh a thinrim takzet tih ka va hmu thei.

"Min thlah rawh, naupang pawh ka nilo, i thuhnuaia awm tur pawh ka nilo, ka nu ka hrilh dawn" a ṭe teng tunga, a tal zui chiam chiam bawk.

"Ngawirengin kal ringawt rawh" JH-a lahin a ti hmiah mai.

"Ka duh hunah ka lo haw ve mai ang, nangpawh i duh hun hunah i riakchhuak lo bik a mi, hetah ka riak dawnlo Chawlhhmunah kan chho leh dawn" a au hian a au hi ani ringawt. Ngaipawimawhlo zetin JH-an Motor lampanin a lo nam phei dawt dawt a, chutih laiin "Kal tir rawh" pawr fein Lalrinhluan a lo ti ve a.

"Lo ngawi hmak rawh" JH-an a tih ri chu ka hrepha, Lalrinhlua chuan engthil nge a sawi leh erawh ka hrechiang theilo, JH-a awmah chuan a nam sawk midang awmve ho chu an lo thum nghal hak a, chumi rualin Lalrinhlua bek chu a ri nghal chawrh! A pai ṭiang ṭiang chu a kawr awmah ṭhamin JH-a chuan a hnek nawn leh a an thawm a ṭha ta kher mai.

Ka tlanchhuak ve vata, Lalrinhlua lo chhan tawk leh insual lo ṭhelh tawk an awm a ka hnaih ṭha ngam meuhlo, zu rui na na na chuan a khawiṭha ve vak theilo a JH-a hnek an dawng mawlh mawlh a ni ber. Reny lah alo chiau chula "Misualpa, thlah vat rawh, khawih tawh suh" ṭawngkam chhe pui puiin a û chu a lo hrawk a, kei erawh an insual chuan ka thau ah min man a ka hlauthawng lutuk chu ka khur chhe nasa tawh mai a ka bing chûk chûk a ni ber e.

"Nangkha a bialnu i ni lawmni, ka û hi tawp tir rawh" ka lam hawiin a rawn ti vin leh tuar a, inthingharhin JH-a chu ka pan ve nghalthuai bawk. Lalrinhlua a hnek leh tur chiah chu a banah ka va uai titih a, "Duhtawk tawh rawh" aw khur dar darin ka ti chhuak thei hram, chutah mitmeng huatna a khat ka hmachhawn zuizat bawk.

"Lo va kalsawn rawh" tih hluk pahin ka kut chu a phihthla sawk a, chumirualin a nghawngah Lalrinhluan a lo hnek ve siah a, midangin an lo bawr huk bawk nen, JH-a ber chu ka hre hrang thei mai tawhlo, reilo teah an pawt hrang a, chuti chung chuan an la tal dun fat fat a, an la duhtawk lo nasa a ni. 

"Min thlah rawh u, min hmusittu hi ka khawih dawn, i farnu kha ka bialnu ka nupui tur a nih kha, ka thu thuin a awm bawk ang, ilo inrawlh ve angailo" Lalrinhlua chuan a ti chher chher a, JH-a chu a ngawireng nain duhtawk mai ala tum biklo.

Reny chuan Rinhlua biangah dawmin a hliam lai te chu a lo hruksak nghal thuai thuai a, "Zui pawh angailo, sawpa saw mamawhna kan neilo kan hlim ve tawk, naia sen pawh a pawisa hi ka la hmansak biklo e" a ti bâwng bâwng a. JH-a tal leh phat chu va panin a kawngah ka va pawm chawt a, "A tawk tawh" ka rilruin ka ti mawlh mawlh bawk.

A chak bawk si a ka chelh bet hneh meuhlo, a awmah hmaiphum chungin ka pawmbet ṭang ṭang a niber. "Haw tawh ang" ka ṭap deuh pur tawh, ka hlauthau bawk si a mi insual atakah ka vawikhat hmuhna a ni vei bawk nen, JH-a kher kher alo ni bawk, ka thilsawi chu ngaipawimawh hram se ka ti takzet a ni.

Ka darah min kuah thutin min kalpui nghal hlawk hlawk a, a hmel ka en chuan a la inbengdai lo tih ka hre thei, Motor kawngkhar a hawng a, "Lo awm rawh" tih leh min namluh a rual a, "Lo lut rawh, haw tawh ang" ka tih chuan min en run ringawt a, a mitmeng chu dur ṭha tak ani.

"Hlauthawng suh" tihzawng a sawia, a inher lehnghal vut a. A pen phei hlawk hlawk chu ka enzui ṭawk ṭawk a, chutihlaia Reny ang hlak hlak chu a kawngah va pawmnawlhin a rawn phei pui a rangtakin Lalrinhluan a rawn umzui ven vat a Motor ah ka ṭhu hle hle thei biklo. Chhuk leh mai tuma ka inhawn buailai chuan thawm a ri leh hlut a lei chara Lalrinhlua thal huang chu ka va hmu hman thuak, ngaihsak zui maploin JH-a a rawn kalphei bawk.

Motor hnung kawngkhar hawngin a nau chu a thehin a rawn thehlut a ni ber, "Fuck you, ka hua che misualpa, i la hre ve dawn khawp" hnunglam a mi chuan a ti nghal ṭhat a, kawngkhar khar rik bur pahin ka bula tukverhah chuan a lo dak zawk a engmah a sawilo, Lalrinhlua te lamah bawk a lêt leh a, leia la let reng Rinhlua bulah chuan va ṭhuin engthil emaw ava sawi ni ngei tur a ni.

Hnunglam a mi lah ain sut fap fap reng, ka va lehhawi chu ka hmaia Bottle in a rawn vawm ṭhuai mai! "Min en hlek suh hmeli" a ti vin nghal ṭhat a, ka biang chu a thip nghal hlur a ana takzet, engthil zozai nge thleng ta hi ka hrethiam lo engvanga JH-a hi thinrim em em nge anih ngaihdan pawh ka nei thiamlo, a nau leh Lalrinhlua inkawp kha a hmapawn angai haw hauh silo a, zanin taka hetianga a awm hi ka hrethiamlo a ni.

"In la hria ang, nangpawh kha i banglo ang" hnunglam aṭangin ka samah a rawn ṭham ṭawk a, JH-a lo let leh mek a hmuh rualin min thlah lehnghal vat a, ka rilru ana veng veng mai; ka mittui ahnam nghal ṭiam ṭiam bawk, engthil nge tihsual ka neih ve, he nula rui tak hi insumna neiloin ka suallet ang nge a ruih vangah ngaihsakin ngawirengin ka enliam ang.  

"In lo inrawlh ve na tur pakhat mah a awmlo" a tih leh rualin ka hawilet ve vat a, "Min puh hlek suh" ka ti ve nghal ṭhat chu min melh thip nghal rawm a, Driver side kawngkhar alo inhawn takah chuan kan ngawi ta dak a; ka sam thur ka siamṭha mawlh mawlh chu ka bula mi chuan nur zetin min lo en a, "Enga  tinge?" zawi te a a tih chuan ka chhanglo, tukverh lam ka hawisan a "Bawihte" a rawn tih pawh chuan ka en duh tawhlo, tunah tak chuan ka thaw a ipik takzet, mahni pawn buaina tur tawk ka ngah tehlul nen an ni vanga lo buai ve zel chu ka duh hauhlo.

"I la hre dawn alawm, i lo en dawnnia?" Reny-in a lo tih leh chuan "Ṭawng tawh suh" ka bula mi chuan a lo ti hluk a, kan tlan chhuah takah chuan kan ngawi ta renga a, zu rim nam huam leh boruak uap churh nen ka awmdan chu a hrehawm tih piahlam a ni, ka mitchhingin thawk ka la vang vanga heng buaina hi ka zo ve lo; a hahthlak takzet.

JH-a te Gate bul kan thlen chuan ka mit ka chhing tlat a, "Ka reilo ang" JH-an a tih chu hria angin ka langlo, phun hlak hlak chungin Reny a chhuaka , Gate-a an inzuilut ta chu ka thlir mawltawp bawk, reilo teah JH-a a lo chhuak leh a ka bula a lo ṭhutluh leh laichuan tukverh lam ka la hawi ta ngar a, ka malchungah kut nghatin min en renga "I ṭha maw?" ti a a zawhna chu "Aw" tih zawngin ka chhang a, "A zialo hle mai" a tih leh a, chu erawh ka chhang tawhlo.

Kawngtluanin kan inbe lo a ka kut a rawn humlahin ka hrelo der mai bawk, tunah hi chuan alakah pawh ka lungawilo, thil awmzia fumfe takin min hrilhlo a khatiang buaina tehhrep kha a awm dawn tih hre ngat ila chuan ka zuilo chiang ang chu, tun ṭum hi JH-a bula ka kal vanga ka la inchhir awmchhun a ni, lo zuilo tawp ila ṭha zawk tur ania, ka awmchhunga ka thinphu mumallo zet te chuan thawk a ti har lam mah a ni.

Kan kawt kan thlenga Motor dinruala chhuk mai ka tum chu min pawt let sawk in "Bawihte, ka lakah i thinrim em ni?" a ti zawi ruih a, lu ka thing ringawt thung. "Ka tihpalh aw, khatiang thil kha a thleng leh tawhlo ang, ka tiam a che" ka biangah dawmin min kuaidak a, a mitmeng chu chiangtakin ka hmu thei, mitmeng inthlahrung tih hriattak a ni.

"Engmah i sawi bawk silo" ka lo ti  a.

"Ka hre lawk biklo a, hruai haw ringawt kha ania ka tum ve tho" 

"Enge a chhan?" min chhang mai loin min en vung vung a, chutah ka lamah rawn awnin ka chal a rawn tauh dat a "Lalrinhlua kha ka hua" a ti tawl a, chu chhanna chu ka duhkhawplo kher mai.

"Ka kal tawh mai ang" ka che zui chu hnunglam aṭangin min kuahbet chawt a, "I bialpa hlui ani tih ka hria a lawm" a tih chuan ka che chu ka tawp chiang hle. Ka bialpa hlui a ni tih a hria! Chuvang ngawt chuan kut a thlaka anau lakah khatiang kha a ti a maw?

"Chuvang chuan....." ka sawilai mekin minlo pawtchat a, "Nilo e, zanin kha chu thildang a ni, ka farnu thiamloh pawh a nia, ka tumloh dan deuhin ka awm anih kha" thawk la hawk chungin a ti a, tinge a sawi chian mai loh?

"Ka hriat ve a rem lo a mi?" ka lo ti chang bula, a sawi hreh tih ka hria mahse, ka tan a pawimawh ve tlat.

"Hotel rooma ka han chho khan, Lalrinhlua leh hmeichhe pakhat khawsa dun lai ka han hmu a"

"Mahse, Reny kha chuan....." a thilsawi leh nichin lawka thilthleng kha chu a inpersan lulai lutuk.

"Aw.....Reny pawh a awm ve, hmuhnawm ti takin a lo thlir a ni" ner sawkin a inhumruh nghal ṭeuh a, a thilsawi chuan min ti hamhaih takzet.

(End of chapter - 17)