GOMENASAI (CHAPTER - 8)

GOMENASAI - by Ahmangaihi violette khiangte

CHAPTER - 8

Urlawkni ah ka Nî te nupa nen chhang kan dêng a, ka deng thiam ve silo chu ka Nî pasal Pa Tluanga chuan a baw tur kha lo hui rawh min tih vangin an chhang denna bulah chuan ka lo vil ve ran a. "Ka pa pawh hi khawla her duh ve mai sela nitur, ti hautak mai mai lutuk" ka Nî chuan a ti hlak hlaka, "A inban hleih a lawm mawle" kawngka biang nghenga ṭhu chungin ka Pu in alo ti charh charh a.

"Good friday-a kan chhum pawh khawla her a nia i hriat hran tawp loh kha" ka Nî in a tih leh chuan "Ka hre hrang renga ka sawi duhlo mai mai alawm, a mú hrup reng a lawm" ka Pu chuan a lo ti leh a.

Ṭhenawm tlangval pahnih lokalin kan chhang dêng chu min lo puia, an kutthlak ana dun bawka karloah an dêng zo thuai a, Pa Tluangan zanah chhang eiturin a sawm zuia, nui ruh ruh chungin a lian zawk chuan "Kan lo kal tak tak dawn nia, khawpui nula urlawk pui tur an awm bawka" tiin a lo chhang a.

Zanah Nutein inkhawm turin minlo sawma, inkhawm ban zaikhawm chu kan thingpuilum hun anih vangin keipawh a lûm thei ang berin ka inthuam a, Biakin kan thlen chuan dar ala ri lo deuh a, pawnah nula leh tlangval an lo ding fara min en hrek hrek reng avangin a nuam duh fahranlo, ka naupan deuh laia ka kawm ve ṭhin te ho pawh a ṭhenin pasal neiin fa te an nei tawh hlawma, a tam zawk phei chu ka hre fumfe meuh tawhlo, chutiang bawkin an tan chuan mikhual nula ka ni ber tawh.

Nutei nen tlar hmasa berah kan ṭhu a, zaipawl kan zai a, haw khawm tak meuh kan nih vangin kan zaiṭha fahranlo a a tam lamah kan tam hneh ema kan zai ring ṭha viau thunga a ruallo mai pawh a ni. Thusawi chhung zawngin Nutei chu a muthlu tluan ṭhak a, ban hla sak dawnah ka kaitho a a zai ring ringah aṭang leh a, thawh phan a nei hauhlo.

Banah chuan inah kan lut kawi leh rih a, ka piin tlaia kan chhang den kha alo chhum meka "Zanin Carol na ah i tel ve dawn em?" tiin min lo zawt a, "Ṭhalai nih chuan tel ve zel tur, kha i ṭhiannu pawh a tel ve dawn lawm ni?" ka pu in a tih leh laichuan "Dawn e, kan pahnihin kan tel ang" Nutein a lo ti vat a.

Zaikhawmna in pan chuan ka pu hoin kan inzui chhuak a, hâr mei aiin pa ho an lo ṭhu khawm laiha, chutih laiin kan thingpui lumpui tur te pawh an lo thleng ve hlawm a, tlangval ho an che zung zunga nula ho erawh kan awlthawng viau mai, meilum kan kal hlatsan phal meuh lo, ṭhutthleng dawhzawmin kan ṭhu ṭhapa, tleirawl deuh ho chuan pawisa thawh khawma eitur lei an rawt a, kan leader berin a pawisa a lo thawh vangin phur fe chuan dawr lampanin an inzui hlawm a.

Eitur pack chi hrang hrang lo leiin an pawlh khawma titi leh fiamthu thawh pahin kan eiho laih laiha, inchhung lam pawh thawm a ṭha viau a, Nutein lamtura min luhsan zawk zawk avangin midang zingah chuan ka ṭhu ngawi reng a, tlangval hoin min chhaih leh zuk zuk ṭhin chu zahzelah ka phone en mai ka tuma ka lo ken theihnghilh daih chu niin, Alawmin min lo biak a tum ngeiin ka ringa ka keng lo chu a zialo ka ti kher mai.

Thingpui kan sem zawh hnuah Nutei nen no kan sila, kan inremfel laimekin tlaia kan chhang denpui te pahnih kha an lo lang ve hlawl a. "Mambawih zanin chu Ar kan hem ve dawn ami?" a lian zawk chuan a lo ti a. "Lalhriatpui mikhual nula hi chu i hlahlo ve mawle" Nutein nui hak hak chunga a tih laichuan "Tlaiah kan sawifel vek tawh" a lo ti awlsam then a. "Ar rawn thawh la ka hoin kan hem dawnnia" Nutein a tih takah chuan an phur hmel ngang mai.

Zaikhawm ban veleh ah inah kan inzui haw hlawm a, tlangval pahnih te chu an ṭawng duhin kawm an nuam phiana Nutei nen chuan a lian zawk chu an inhnial leh rap rap ṭhina an inngamtlak viau anih ka ring, tlangval te zawk erawh a naupang zawk hmela ala zakzum deuh anih mai hmel.

Kan pi te in kan thlen hma deuh chuan kawiah an penga "Rei suh u aw, Lalhriatpui i Ar sualhuai te kha i rawn ṭhamchhuak ringawt ange, insual mi ka duh miahlo ania" nui hak hak chungin Nutein a ti zui a. 

In ka thlen chuan a vawt kher mai, ka piin ṭhutthlengah Torchlight nen Bible a lo chhiar ri bal bal a, reilo teah ka pu zaikhawm bang a lo thleng ve a. "Tlani te chhung an lo leng phei nange?" ka pu in a tih chuan "Tluanga te inlamah Ar kan kang dawn e ati a nih kha, naktukah chaw an lo eiphei ang" ka pi chuan a lo ti var a.

Kan Ar kan pui tur te chu an lo thleng thuaia, Zo Ar lian ṭha angreng zet hi an lo pawm lut a, Hriatpuia chuan "Ar ka tum tawh a, a puah lam chu Lalnui leh Lawma tih ve tur" mit min rawn siai zauh zauh pahin a ti a, Nutei a lo ner nanga, Lawm erawh hmanraw awmna ka pu zawtin a che zui sat sat a, Nutei nen puih kan tum zet nain Ar puah chu a hnehsawh ngang maia han puih vak pawh angailo.

Ar an hem vat vat laichuan khuma ka phone dah chu ka va la a, Alawmi Message chu alo awm ngei a "Mate ka zin na hi a vawt lutuka ka ke na a zuala zanin phei chu a hrehawm ania, mut hma daih ka ngai, ka wish hmanloh tak hlauh chein Christmas chibai aw, ka ngai tawh tehmai che ania" tih a lo thawn chu ka chhang let ve nghal thuai a. 

Ka pi leh pu chuan rei meng tawhloin min mutsan maia, kan pali chuan Arsa hem hmin chu kan eia, Nutei leh Hriatpuia titi chu kan nuihpui deuh renga, Lawman "Vengthlanga Pi Zokungi fate kha dawhthlak tur pek ka duh tak asin" a rawn tih chuan a lam kan hawi ṭhap a. "Ka lo mangnghilh daih a, hmanni ah ka nuin a sawi tak a sin"Nutein a lo tih ve chuan "Tinge a?" ka ti nghalthuai a.

"An pa ber kha kumtir lam khan insakna aṭangin a tla a, a insawh na deuh a a bawksawp renga, Nu Zokungi lah chhul lam fello a ni bawk sia, an harsa ve lutuka, hmanni deuh khan kohhran ṭhalaiin an buh pawh kan seng sak a lawm, kum thar lamah an in sakṭhat sak te pawh kan tum mek a, taka an fate khan Christmas thawmhnaw an nei angem le?" a ti zui niah niah a.

"Christmas thawmhnaw chu an neiin ka hria, kar hmasa khan Nu zokungi U khan Upa Thangkhuma ten an leisak thu a sawi tlatin ka hria" Hriatpuian an lo ti ve vat a. An sawidan mai aṭang chuan ka khawngaih nghal khawp maia, titi dang an sawi leh hnuah pawh ka vei zui renga, thildang ka ngaihtuah hleithei meuhlo.

"Nûte naupang ho chu dawhthlak tur leisak ka van duh e" ka ti ta hlawl a, an pathum chuan an lo phur ngang mai, "Thawhkhawm ila a hrana peloin" Lawman a lo tih chuan kan phul hlut a, zanlai Carol hun hma chuan kan inzui chhuak ṭham ṭham a, Dawrkawnah dawhthlak tur chi eitur chi hrang hrang kan leia, inkhaibawr ṭeuhin vengthlang lam chu kan pana, kan zuk kalna In chu Râpin hlui ve tawh lampang hi ani a, Hriatpuian kawngkhar a kik karh karha, an mu tawh hlawm nge ni thawm a awm lawklo a, khua a vawt bawk si a Nutei nen chuan kan ding khur hlak hlak tawh.

Kawngkhar chu a kik nawn leh a, rei vakloah chuan thawm a rawn awm ta a, kawngka kan hawn ruala kan mi hmuh vang chuan kan phawk lek lek hlawma, puitlingin a lo hawng tura kan ngaih vang nge ni mipa naupang tereuh tein Stool dawhsang meuha kawngkhar alo hawng kan hmuh chuan tumah chu ṭawng nachang kan hre lawklo.

"Zamte, i pa te an mu tawh ami?" Lawman a lo ti thuai a, Mipa naupang chu a bu nghat nghat a, kan thil khai chu a en duh ngang mai bawk a, chutih laiin pindan puanzar piah lam aṭangin patling hi a rawn khuh kharh kharh a, an la muhil vek lo anih ka ring.

"Hei dawhthlak tur kan lo ken sak che a, i nau nena in ta tur" awki damthluama tih pahin Nutein kan thil khai bawr ṭeuh chu a pe a, mipa naupang hlim tih hriat taka a nui var var chuan hnuk a ti ulh ṭeuh mai.

Rei awmloin kan chhuak leh thuaia, Mipa naupang Zamtean a nau nena an thlênga an dawhthlak tur a dah laite chu ka mitthla ah a cham renga, ka ṭah a chhuak em em reng bawka, ka ṭhianten min biak pawh chuan ka chhang mumal meuh tawhlo.

Carol turin Biakin lam kan pan nghala, ka ngaihtuahna a vak thui kher mai, mihring nun leh dinhmun in an loh zia te, vanduai viau emaw kan intihlaia kan lo la vanneih zia te chu ka hrenawn awn awn a, fahrah riau a ka lo inngaih laipawhin kei aia dinhmun chhe zawk an lo awm veleh zela, Pathian hnenah hian lawmthu sawi ngawih ngawih tur zawk niin ka inhre ta.

Biakin thlen dawn ṭepah ka Bag a ka Phone ah lai chu a lo ri a, ngaihtuah mang hleiloin Phone chu ka la chhuak a, min lo call tu hming ka hmu chu a ding chiang hle, ka rinloh lutuk maiin JH-a a lo ni a, ka lo beisei tawh hauhlo laiin!

"Hello" ka aw chu a lai rût maiin ka hria.

"I mutui lai ka lo ti harh che em?" zawi sup hian a rawn ti a, kei ka lo nui var var thung. "Carol kan neidawna Biakin lam kan pan meka" ka tih chuan inthiamloh hmel fe hian a rawn chek deuh hlak a.

"Anih chuan naktukah ka lo be leh ang che" phone dah mai a tum chu "Aahh....ka hman a lawm" ka lo ti bah naka, ka zak ru ram ram bawk.

"Kan...la...thleng dawnlo deuh a" ka tih leh laichuan ka dang a awk lek lek lehnghal! 

"A vawt ve em?" damthlupa a lo tih leh takah chuan ka thaw huai a, "Vawt lutuk" ka lo ti nghal vat a, chutih laiin hla deuh hlek a ṭangin ka ṭhiante pathum chuan minlo en ṭhap hlawm chu niin, zaizirin lo va lut tur chuan ka hrilh a, muangchangin kei ka kal ve bawk a. 

"Helam pawh a vawt khawp mai, i intilum ṭha em?" min ngaihsak hmeltaka a rawn tih chuan ka lo nuisaka. "Intilum ṭha e, Christmas hmanpui tur chu i nei ta em?" zangkhai thei ang berin ka lo ti let ve thunga.

"Hei unau hoin kan lengchhuak a" thawm awm nak nak ka hre zuia ṭawng barh barh leh nui ri te pawh, "A nuam bawk em?" ka tih leh rualin "Nuam teuhlo"a lo ti hluk a, ka zawt fuhlo kher mai.

"Ka sawi awmzia chu unau ho a lenchhuah hi a nuamlo ka tihna  nia" dam deuh zawk chuan a lo ti ṭha leh a "Tinge a?"ka lo tih chuan a nuisuk ri ka hre nghal a, a nui hmel tur awm ang chu ka mitthla thiam nghal mai. 

"Engtik nge ilo haw dawn?" ka zawhna chhanglo chuan a ti leh daih a, "Kum thar lamah aniang"ka tih chuan "A va hla ve" tih zawngin min chhang nain hriat a nuam viau.

"Lo haw vat rawh...." Nutein min lo koh zui tak avangin a ṭawng tawplam chu ka hre mumal lo, "Dar ri ka hria, i lut tawh dawn em?" a lo ti ve nghal thuaia, "Umm..ka lut tawh mai dawn a sin, kan inbe leh dawnnia" ka ti a, inkhawm dawn ah berkher min be lo sela rei deuh tal han inbe thei ila ṭha tur.

Kan inbiak zawh hnu chuan Biakinah kan luta, Hruaitu ten ṭawngṭaina an neih zawhah kan inzui chhuak leh dam dama, Carol kan neih chhung zawng pawhin ka ngaihtuah tluk tluk a ni ber, "Lo haw vat rawh" kha min tia, min ngai a ni thei mai angem? Aaa....ngaihtuahloh loh ka ngaihtuah a ni.

A tuk zanah chuan min lo be leha, zan hmasa kan menrei a vangin muthma ka tuma, muttura ka insiam laimekin minlo Call a, ani pawh a chhuak biklo, eng engemaw sawiin kan inbe ve nual a "I haw huntur i hriat hunah min lo hrilh dawnnia" a tih ri chu ka bengah a cham renga, kan inbiak zawh hnu ah pawh ka ngaihtuah let rauh rauh a, hepa hian min ngaihven hle tih chu ka ringhlel buai tawhlo, min ngaihven chiang a lawm, Patea te in thlahlello viau mahila haw min ti chak zo ve vekin ka hria.

Kum thar kan chuangkaia, ka haw hun tur pawh a hnai ta, Sumo ticket ka chang thei lawklo a, kar khat zet ka nghah hnuah ka chang ve ta hrama, "Zirtawp ni ah hian ka lo haw dawna" JH-a bula ka tih chuan "Ilo haw veleh ah ka hmu ang che" alo ti hmiah a hriat a nuam ṭhin, thu tawi te hi a sawia min ti hlim veng veng zela, inngaizawng nimiahlo mahila kan inbiak dan hi chu ṭhian inbiak dan nen chuan danglam tak a ni thung.

Ka haw dawn zanah ka ticket chu an lo cancel leh thuta, damlo phurh ngai an awm avangin Seat lai zawng chu an lo cancel hi a lo ni a, vui viau theih ni heklo, a kar leha haw tur chuan ka ṭhulh leh ta ngawt a, ka pi leh pu erawh an lo lawm ngang maia, JH-a hrilh ka duh viau nain min lo be leh tawh mang silo a, va biak hmasak ka hreh tlat avangin min lo biak hun chu ka nghak a, ani lah a reh vung vunga, ka tihsual awm siloin ka inthiamlo ve reng ringawt.

Zirtawp zan chuan min lo be ta a "I lo thleng tluang em, vawin chu ka buai lutuka naktuk zanah ka lo leng ang" a tih chuan a hmuhloh lamah ka ṭhen chiam a, "Ka lo haw hleinem" ka ti chu "Min fiam em?" nuisuk chungin a lo ti a.

"Ticket ka chang leh lo a, kar leh lamah a ngaih hmel" inthlahrung fe a ka tih leh chuan a ngawi vung vunga, "Tunlai chu zirlai ho kal chhuak tur an tam lutuka, ticket chan pawh a har khawp mai" ka ti nawn leh a. "Enteh keihi...Hahh...Tur che ka ang deuh tlat, i duh hun leh a remchang hmasa ber ah lo haw la, hmuh che ka chak tawh hle tih i hre thung dawnnia" zawi ruiha a rawn tih chuan ka mur sung sung thei hial a ni.

Inrini chu ka pi nen ka thil hawntur kan buaipuia, huanah kalin chawhmeh chi hrang hrang kan la khawm a, ka chauh ve deuh avangin zanlam chu ka mu hma daiha Nutei lo kal lai pawh ka mang hriat riai ruaia, zinga ka thawh chuan JH-an min lo call tih ka hre ve chauh a, call let tur em ni ang tih ka ngaihtuah nasa ngang mai.

Message ka thawn ta zawk a "Nizan kha ka lo muhil daih a" tih ka ka thawn a mahse, a chhanna erawh ka dawnglo. Chawhma inkhawm banah chuan Hriatpuia leh Lawma an lo peng kawia, reilo teah Nutei alo lang ve bawka, thingpui te ina kan titi ho laichuan ka Phone a lo ri a, "Phone kan hmang lawk ange" tih leh thawhsawn ka rual a.

Ka lak rual rualin "Kawngah ilo ding lang thei angem in In awmna ka hrelo a" a rawn ti a, min ti hamhaih kher mai!

"Khawnge....i ...awma?" Ka ti bah naka.

"Khua ka lo tlan lut meka, kawngah chuan lo awm lawk rawh" a rawn tih leh a, Karei leh!!....JH-a lo kal.

"Enge i lo tih dawn?" ka aw chu a chang lek lek, ka hamhaih ve bawk a tin ni.

"Ka lo hruai dawn che?" a nuisuk ri chu phawk fein ka ngaithla ran a, "Engvangin?" ka ti leh hluai a "Haw na tur i nei silo a" a lo ti awlsam et thung, chutiang pawh nise tinge maw a lo kal kher kher le? Chhungte bulah engtin nge ka sawi ang!

(End of chapter - 8)