GOMENASAI (CHAPTER - 9)

GOMENASAI -by Ahmangaihi violette khiangte

CHAPTER - 9

"In In hi ka tlanpel tawh em mawni le?"a tih leh lai chuan chêt mai nachang pawh hrelo chuan ka ding ngawi renga, "Mambawih" a rawn tih leh takah chuan "Ka lo chhuak dawn lo tlan zel rawh" tih leh pawnlam chu pan ka rual a.

Ngah nge maw alo kal kher kher le, hepa awmzia hi ka hrethiam pha tawhlo, ka bialpa nisela chuan ngaih hnathiamna te pawh ka nei thei mai anga mahse, chutiang chu kan ni bawk silo a, tunah lah kan khuaah min hruaitur ringawtin a lo kal a, duhai chuan a inpe zo mah mah ta in ka hria,  kan inlaichinna lah a hming vuah dan tur pawh ka hrethiamlo.

Kawngpui chhakah chuan dingin Motor kawng lam chu ka thlir renga, hla deuh hlek kawngkawia Scorpio var lo tlan ka hmuh rual chuan ka zam deuh riaua, phurna deuh erawh ka nei ang lawi a. Ka bul a lo thlen chuan a ding ri dat a, Motor aṭanga a lo pen chhuak lai chu ngun em emin ka lo thlek a. Tlangval hleitling leh pianthiam tak zawk a ni a lawm, ka lam hawia a rawn nuisang hmel chu hmuh a nuam hle bawk.

"A khu lutuk a" nuisuk chungin a ti a, a Motor chungchang a sawi tih hre tho mahila amah ngawt chu ka lo en thung.

"Tinge i lo kal?" ka lo ti thawr a, ka hmel nur nang a hmuh rualin a nui tawp nghal hmak a, chutah "A pawi em?" inthlahrun hmel zet hian a ti leh a, a mak ka ti hle tihlo ah chuan a pawina em em phei chu ka hrelo a, tlem chuan a zahthlak ve deuh a, ka chhungten zawhna min zawt ngei dawn bawk si a.

"I duh ka ring ve tawp a" a inthlahrun hmel tawh kher mai, a inthlahrung hmel chu a lawmawm viau lehnghal a, a nuih loh theihoh. "Pawi chuanglo e, lo sawi sa ve tal tur che ania, min ṭhawng tehthut lutuk a lawm" nui chunga ka tih takah chuan thawhuai hmel a pu a.

Inchhunga kan inzuilut a chu ka ṭhiante pathum chuan min lo en phawk hle a, sawifiah dan ka khawr ru riau a, rilru a buai ve map mai. "JH-a a nih hi" ka ti mawl tawp a, an hmelah chuan mak tihna a lang hlawma JH-a lah chuan min rawn dinhnaih nghal hrut a, ka ṭhiante ngaihdan tur chu ka hrethiam pha riai ruai.

Kawmchar lam aṭanga ka pu lo lut chuan ka ṭhiante aimaha phawk hian JH-a chu a en a, "I dam em?" pakhat lah chuan alo ti nghal vut a, an inchibai laichuan ka pu chuan a ngaihna a hriatloh hmel hle a, a mitmei hmangin min lo zawta "Ka ṭhianpa JH-a anih hi" ka tih chuan a bu ta nghat nghat a, 'ṭhianpa' tih chu eng ang takin lo ngai ang maw?

 Ka ṭhiante pathum chu an awmreilo "Zanin inkhawm ang aw"Hriatpuian atih hnuah "Ka lo sawm ang che" Nutein a ti a, an chhuak zui mai a, ṭhutthleng seia JH-a ṭhu khawng auh chu ka pu nen chuan kan melh dun seka, ani lah a ngawi ran a, biak dan tur ka haihchham kher mai. "I chau em, intihfai te i duh em?" lai angreng zeta ka tih chuan a lu a thinga, thingpui ka siam sak laite chuan ka chezia chu ngun em emin min lo en a.

"In siam la" thingpui ka pek laichuan a lo ti sup a, min hruai haw chu alo tum tak tak anih hmel, ka chhungte bula sawi ka huphurh nghal em em ringawt lehnghal, ka rin ang ngeiin ka pu chuan "Chawlhni ah chuan kal chhuak lo e, tawhsual tawhpalh a hlauhawm" a lo ti mauh mai a.

"Mambawihi ṭhianpa anih hi, lo lam turin a lokal a ni awm e" ka pi leng lo haw hnena ka pu in a tihlai chuan JH-a nen chuan kan inmelh ralh a, "I van tlangval ve" tiin ka pi chuan a lo chibai ve a.

'Ka bialpa a nilo' tih chi pawh a ni tawhlo, helai thleng thleng min hruai tura lokal chu ka ngaihzawng a nihloh thu ka chhungte chu hrilh ila chuan mak min ti ngawt zawk ang chu.

"Chu Vala kan sawi ang chuan chawlhni chu haw a theihloh ang aw, zanin riak la naktukah muang marin in chhuak dawnnia" ka puin a tih leh chuan ka va melh zawka, "I tih dan dan a nimai"a lo ti chu awihlo fe hian ka en a, ani pawh chu.. Ka bialpa awmin a awm ve hmiah mai nia mawle!

Tap bula ṭhu chungin ka pu chuan a be seuh seuh renga, a nu leh pa hming te, an  veng te leh a lehkhazir san zawng te chenin a zawt a, a chhanna dawn ho chuan a tihlungawi hmel viau mai, a tunu duat hian Officer a ngaizawng emaw a ti tlat mai chu a nia, nihna lopui angin lang mahila JH-a belhchian dawl zek mai chuan ka awm a tinuam takzet, ka pi lahin a ngaihsan hmel nasa mai si. 

"Chhangban i ei duh em?" tiin a lo chhawp sak sawk sawk a, ka pu lah chuan "Hetah meilum bulah hian lo ṭhu hnai rawh" a la ti tak ang deuh deuh a. 

Thuawih fe mai chuan ka pu bulah chuan a ṭhu hnaia, ka pi in chhangban leh kurtai a lo pe sawk sawk a "Mambawihi Ni te kurtai her anih ve hi, Lungleng ah hi chuan  an kurtai tluk a awm biklo ania" chhuang fein kurtai tlang lian zet leh chhangban ah lianṭha nelh nawlh chu a lo pe a. JH-a chuan a thil ken laichu a lek vut vuta a ei hreh hmel deuhin ka hria. A ṭhial lai te chuan thil duhloh chunga tihluih tir hmel a pu a, a tum deuh bur a chuti chung chuan a ṭhial ṭawlh ṭawlh tho a, a nuih loh theihloh, ka nui hmel a hmuh chuan phawk zetin min la rawn en ta zui a.

Ka pi leh pu te bula a ṭawng thum dut dut chu ka ngaithla ve renga hetiang tak hian JH-a hi alo ṭawng duh ve ang tih ka ringpha lo, ka pu chuan Arpui tuilai talhsak a tum mauh mai a, ka rinai daihin ka chhungte chuan an ngai thutak ta tlat a, rilru a nuam lo ru reuh reuh a, JH-a lahin engmah a sawi duh mang derlo a, chu a hnekin a awmdan chu makpa interview te pawh a ang dawn dawn in ka hria, chutia an lo ti ṭha viau si chu ka tan lah han huat theih a zeng pawh a nilo.

Kan pu nen chuan Ar an talh a, ka puin Ar  ke leh a lu a rawh tir a, tap bula thlan tla hluama a chevel chu chawhmeh chan pahin ka va en ṭhina, a buai hmel ngang mai, a Ar lu rawh lah chu vawi 3 lai meituah ah chuan a thlauh tawh a, a sei zuar bawk sia a zeilo ṭet ṭut lutuk chu ka nuih ru leh ṭhin a, mei a tuah alh hluah a, a hnaih ṭha ngam leh silo a, hla deuh ah ṭhuin a phar ang duai a, ka pu pawn zeilo a ti deuh aniang "Khawi keiman ka lo ti ange, sa hi lo chan rawh"a tih lahin alo duh bik der lo a, "Ka thiam alawm, in chaicheh hi chher ṭhat angai anih a cheh ṭhat theihloh" a lo ti ve hmiah a, thiam lo nih chu a hreh ve ngang mai.

"In tifai la tuilum a awm a sin" a Ar rawh zo thlan dup chu nuih tat tat chungin ka lo ti a, a kekawr haklai khup lah chu a dum paw phual a, a ṭhingṭhi pawhin ka hresilo.

"Inbual ta che i duh chuan, Mambawih ka thawmhnaw kha inbel mai rawh se, a inchei tehzuar emai mutna a hak nuam deuh tur kha va thlansak tawh" ka puin a tih chuan ka lo ṭhensak a, 'A ngailo e' te pawh alo tih ve ka rin nen ka kal hun min lo nghak veng veng zawk a, nuihzatthlak chuan!

Ka pu thawmhnaw chu a tan chuan a te mah mah chu a ni, High neck fan duh deuh chi a lo awm hlauh a, a thawmhnaw dang ho chu a dar leh banbulah a leng hlawmin ka ringlo, kekawr erawh a tawngchham ve deuh tawh anga ani mai, engah nge min rawn risk teh ngawt ni. 

"Hetah hian lo ha rawh" choka a a ding chu ka va ko lang lang a, room a rawn luhrualin min en vung vunga, chutiang bawkin keipawn. Min nuiha keipawh ka nui ve tho, chutah a kawr a pelh ta thut a, thawk a ti chham lo chauh zah te pawh ka zak deuh e a! Mahse, zaklo ang tak chuan ka awm lui ve ngar a, ka lampan a lo kal chuan ka hit deuh seng seng hialin ka hria!

Ka thawmhnaw ken lai chu muangcharh hian a rawn ban a, hnai set sawta kan han indin chilh chu a awm chen chauh ka lo ni ti ka hre ve chiah, Feet 5 leh inches 4 lai ka ni ve sin mawle! 

A awmbawr chu ka hmaizawnah tak a awm avangin a melhloh theihloh, ka zak chem chem lehngha, ka beng a sa hat hat a ka lungphu lah chu a phu rang dup dup mai bawk a, ka kut aṭanga thawmhnaw a ban chhung chu a rei ka ti takzet!

Ka biang a rawn khawiha, a rawn kun hniam lai te chuan ka meng tawh lo reng reng, damthlup mai hian ka hmui a rawn tawk a, ka kut lain a awm chu min tawh tira, a kut lehlamin nghet zetin ka kawngah a kuah zui bawk, ka thawmhnaw kenlai kha khawnge a awm pawh ka hre tawhlo.

Ka mipa fawh hmasak ber chu anilo a mahse, hetiang renga infawh laia zam hi ka la neilo, ka lungphu rang lutuk chu rawn zuan chhuah an tum ta mai emaw tih tur a ni, ka hnungzang a hit thla mup mup lehnghal a, JH-a fawh chu Magnet lianpui in a hipbeh tlat ang vel ka ni ber e, ka chesawn ngam tawh derlo. 

Ka hmai bul cheta thawk a lak ham ham lai pawh chuan mengloin ka mit ka la chhing tlat a, min en leh vung vung tawhin ka ring, ka meng tur chiah chu min kuah nghet thut a, a hmel chu ka hmu hman thuak, ka hmui rawn chhilh lehin am zetin min fawp a, chhan lêt te chu khawilam angam hian ka ngamlo hrim hrim mahse, chuti chung chuan a fawhna chu ka hnar hauhlo a, a chhan pawh ka duhve tho tih hria sela ka duh a lawm, amah ka hnarloh ang chiahin a fawhna pawh ka hnarlo, kan inkar erawh tihchian vat ka duh thung ang.

"Avan thlum ve" ka hmulbul cheta a rawn tih chuan laizetin ka lo nui a, ka hnar rawn tawh leh zauh pahin "Lungleng kurtai ang mai" nui suk chungin a ti leh a, na... hepa hi a van sualthiam tak, kurtai berkher han intehkhin chu, ala nui lehta nghal a!

"Awihawmloh" ka lo ti chu min rawn fawh leh zauh pahin "Zak miah suh, hetiang hi chu ngaiah i neih vat angai ang" awihlo fe in a hmel chu ka ena, chutiang thu a sawi chu ka nuih a za lek lek!

"Engvangin maw? I bialnu pawh ka nih loh hi aw" chhuahchhal awka zet chuan ka ti a, ka sawi awmzia manthiam sela ka ti hle bawk.

"Hetah ka awma i bialpa ka nilo tih chu i chiang ngam chiah a maw, keichu ka chiang ngam tawhlo" a ti leh a, zep loah chuan ka chiang bik tawh lo, kan awmdan hi a atthlak tak zet. Mawihnai deuha sawmna ka phut em mawni zawk le, mahse, kan inbiak dan ah te tuna kan awmdan ah te inngaizawng te awmdan ang vekin kan awm reng tawh chu a ni sia.   

"Mambawih i ṭhianpa chu buhchiar a duh em han zawt teh" choka lam aṭanga ka puin a lo tih chuan ranglutukin ka namsawn rawk rawk a, chhuata ka thawmhnawm thlauh chu pek leh pahin "In ha vat vat rawh" tih leh chhuah ka ruala, Sitting roomah chuan ding khawmuangin  a lo chhuah hun chu ka nghak leh renrawna, a lo chhuak mailo.

A thawm a ri sawt sawt renga a phun bul bul ri pawh ka hria "I ha thei em?" Ka tih chuan "Thei ang" alo ti thum dut a. A lo chhuak ta chu le, nuih insum a van har teh reng, a kawr hak chu a fan ṭhat vangin a taksa Fit thlapin a tawnmara a dul thla pawh a lang thei riaka han sawisel tur a awmlo a inhmeh angreng viau, a kekawr hak mawlh mai chu a ni, a khup a khuh pha ṭawk a, a chhing tui maia amah lah chuan a pawt a pawt a, a tan chuan ka pu kekawr chu a tawi ve lulai bawk em a  ni.

Chaw eihma zawng chu kawmcharah archaw pek pahin kan ṭhu duna, ka kut a hum rauh rauh reng a, ka piin chaw ei tura min lo koh takah chuan kan inzuiluta, chaw kan kil ho chu ka pi leh pu chuan an duhsak ngang maia, chaw hmeh pawh a suak hman mang meuhlo, amah pui lah chuan han hnar der ve eih pawh aneilo a, an suahsak mawlh mawlh a ni ber.

Zanriah eikham ah chuan Nûtein inkhawm turin minlo sawm tak nain ka kal ta loa, ka pi leh pu inkhawm zantin an ni bawk nen kei ka awmloh chuan kan mikhualpa chu ka ngaihtuah ve lo thei silo a.

Inpawhtaka kan inkawm hmasak ber zan a ni hial awm e, fiamthu thawh ve zauh zauh te pawh a lo ching a, a nui ngailo tih kha chu a hmelhriatloh leh a ngamtlakloh te bula a awm dan ṭhin reng a lo ni tih te pawh ka hre ve lehzel a, mi zakzum tak angin lang mahse, chutiang a ni hauhlo bawk, kutṭang hi a lawm anih ka ring, a khal neuh neuh reng a, thil ṭullo sawia tlak duah chi a ni miahlo ka duhzawng tak a ni mahse, heti hian kan inkawp tihna em mawni le?

Ka pi leh pu inkhawm ban hnu chuan a mutna tur ka phahsak a, muthmunah chuan a thawm a reh ṭhiapa, kei ka la muhil ve thei mailo, ka piahlawkah a mu tih ka hrerenga chu chuan engtin emaw hian min mawlh tlat a, muhil theilo chuan ka inlet tawn sek reng ringawt mai. 

"I muhil tawh em ni?"tiin message ka va thawn a, ani pawh a mut a la chhuak biklo aniang a rawn tho chhuak rang kher mai. Ka khum bulah chuan indinchilhin kan infawp leh ngial a, kan inkarah chuan a tichiang tur chhanna chu kan mamawh tawhlo kher a sin.

Zing  thawh chu pheikhai a zang duh angreng viau, sitting rooma ka chhuak pheichu insiam peih at in JH-an thingpui a lo in a, choka lamah ka piin kan thil hawntur a lo siam mawlh mawlh bawka, ka pu in a sakhi sa rep dahṭhat pawh a hawn tir daiha, kei aimah chuan chawhmeh pawh a hawn hnem zawk awm e.

Chaw eikhama kan chhuah nghal mai avangin kan thleng harlo, kan ina lut kawi tura ka sawm chuan "Zan dangah ka lo leng ang" tiin min chhang a. ka bungrua te min hlan thlaksak vek hnuah "Ka lo bia ang che" ti lehin a tlan chhuak zui a. Ka bungrua chu ka hung fel tete a, chutah inchunglam ka han hawichho chu irene-in min lo enreng chu niin.

"Nichhin ami kha tunge a?"min hmuh veleh a lo ti nghal thuai a. "Pa te hi an awm nange" a zawhna pehhel tum taka ka zawh chuan "Ka nu a lo haw mek, khapa kha hman zana lo hruaitu che kha a ni em?" tiin min melh zui râm râm a. 

"Ka ṭhian anih kha" ti zawngin ka chhang a, a awih hmel tehchiamloh. "Jonak duhloa mipa dang i nei anih chuan mawl ka ti viau ang che, khatiang thingtlang tlangval lirthei nei ve satliah mai mai aichhan Jonak hi neila i inchhirlo zawk ang" ka hnunglam a ṭang chuan a rawn ti tan tana, tunge min thlahtu pawh hrechiang ve hawtlo chuan, a duh duhin lo ang vel mai mai teh se.

Ka pi phone-in ka thlen tawh thu chu ka hrilh a, chumi hnu lawkah Patea leh Nu muani an lo haw a, "I han hmang nuam bawk maw?" Nu Muani chuan a lo ti  var a.

Zanah JH-a nen kan inbia a, a zin dawn thu min lo hrilh a, khawchhak lampang thingtlang khuaah a zinkual dawn ni awm tak a ni. Mut dawn thleng chu kan inbia a, inngaizawng tak tak te tihdan angin. 

Kan awmdan Alawmi ka hrilh chuan "Chu bak baka chiang" alo ti mai a, keipawn a chang chuan heibaka chiang a awm chuanglo ka tia mahse, JH-a hi ka hreve ṭan chauh bawk nen ka la ringam chiahlo a ni ber.

Hna kan kal ṭana, ka lo rinlawk deuh ang ngeiin JH-a nen chuan hma kan sawn hleithei meuhlo, a zin renga biak tlang a har ṭhin hle bawk a, office ah lah inhmuhna hun kan nei ngailo, Message hi chuan kan inbe zeuh zeuh a, titi tak tak tur angin kan hman hun a inrual thei ṭhin silo a, a beidawnthlak angreng kher mai.

Chutih laiin Alawmin kan thawhpui nuho bulah kan inkawp angin a lo sawi mai bawk si a, min fiam laih laih a a zahthlak duh ang reng viau, amah JH-a an mi hriat leh an fak rawn ani hlauh zawka, a sawi phur phurah an ṭang a, kawng lehlamah chuan a nuam ve reng tho mai.

Nikhat chu Canteen piah ah kan inhmu hlawla, min rawn hmu ve ngei chuan ka hria, mipakhat inchei Smart deuh nen hian an lo kalmeka keini Alawmi leh kan Office  a mi tho Diki nen kan ni a, min lo enlaia ka lo nuih chu tawitea min nuih letin min kalpel ta daih a, min haw ta emaw ka ti hman rumrum a ni.

Zanah pawh chuan kan inbe chuanglo, vawinah kan in hmu si a minlo biakzui ka rin tehlul nen a reh zui vawng vawng mai. 

Kar tawpah Alawmi nen ka hnadil kha Admit card kan la chhuak a, exam hun tur pawh a lo hnai ve reng tawh keilah ka inbuatsaih mang miahlo lehnghal a. 

"A harsa lo ang Qualification an duh sanglo emai" Alawmin a ti tak nain a harsa dawn tih ka ring hmiah thung, Minister lehkha nei engemaw zah an han awm anga, chutah pawh duhsak bik an han nei ngei anga, keini ang tan chuan tlin chu a beiseibo hlauh a ni.

Nikhat chu chhun thil kan eizo a, kan dawhkan lam kan pan leh hnu lawka JH-a a rawn lang ve hlawl a, keimah min hmu tura lokal a ni emaw ka lo ti hman a, nuisanga ka lo enlai chuan min hmu miahloin min kalpel vut a, kan Director room ah alut zui zat a, rei vaklo hnuah a lo chhuak leh a, min la hmu ta chuanglo, min hmulo der tlata ka hriat vangin ka ngei ru hle bawk. Ka thawhpui te bulah lah ka  bialpa ang khan Alawmin an sawi mai bawk si a, hetiang a nih chuan ka tan pawh a zahthlak ve deuh a lawm mawle.

"Mambawih JH-a chu a hmanhmawh leh lutuka lo chhaih ka tum tehreng nen" Nu Rinpuiin a lo tih chuan ka nui tawi tak a, ka lam pana Alawmi lo kal ṭhem ṭhem chu lawm vaklo chungin ka lo en a. "Mam..in inhau ami a, tinge a biak miahlo che?" maktih hmel zet hian min zawt a, "Kan inngaizawng tak taklo ka tih kha" keiin ka lo ti ve ṭang ṭang ringawt a.

"Inkhua ah hruai tur chein a lo kala, chutah pawh in infawp hiala, inngaizawng lo tih te chu a" a ti kha kha a, "Sawi záwi ve deuh teh" keiin ka lo ti nghal chul a. "A van mak, a chhaih ve deuh che emaw ni dawn le, anih chuan ka ngei ngawt ang, phuba kan la nghal ang"a ti zui leh hlak hlak a, ngaihtuahna chu a ti kalthui ve deuh.

A tukah a lo lang leh a, tun ṭum chu min rawn enthuaka, ka nuih lo a ani pawh a nui heklo, ka lakah thinrimna anei emaw ka ti rum rum tawh mahse, chutiang tur angin engmah tih ka neih awm ka hre silo. Ka thawhpui te pawn min ringhlel deuh ṭanin ka hria, engmah boruak awm tak tak silo a lo insawithei te pawh ka ang deuh tlat.

Sunday ah chuan inkhawm  banah min lo Phone a, ka insuk lai ani  nghe nghe, ka la duh ta lo a, a lo Call nawn leh na pawh chu ka la duh tawhlo, tunah tak hi chuan alakah sawitur engmah ka hrelo.

Zan mut dawnah chuan a Message a lo awm a, "Tunlai chu ka buai khawp mai, ka ngai hle bawk che" tih thu hi min lo thawn a, ka ring ngamlo, chhanglo chuan chupawh ka dah leh maia, mahse, a lo call zui leh zat chu a chhan loh theih ta loh.

"I mu tawh em ni?" awki dam ruih hian a ti a. "Mu deuh chiah" ka lo ti ṭha ve mai bawk a. 

"Vawin ah ka lo call che a" ati a.

"Ummm...ka hmu a lawm" ka ti leh mai a.

"Tak tak maw?" a aw aṭang chuan mak a  tih hmel lek lek.

"Ummm...hmu e"

"Nichina ka Message kha i hmu em?" a lawm hmel vak tawhlo.

"Hmu tho e" ka ti leh mai, a lawmlo ve khawp ang chu.

A rawn nui deuh hawk a "Anih chuan min be duhlo lui a ni maw?" zawite fiahzet hian a rawn ti a, a aw ri chuan min ti mur sung sung thei hial a ni.

"Umm..ka chhang duhlo lui anih kha" ka tih leh chuan a thaw hawk ri chu ka hre pha.

"Bawihno....tihsual ka nei em ni?" 

"Neilo e, chutiang engmah a awmlo" ka ti chu a awih ta vak lo aniang "Han sawi teh le, ka lakah i lungawilo anih chuan ka hriat ve ngei angai ang" damthlupin a rawn ti leh a, ka zep buai peih ta lo.

"Ni hnih kan Office ah ilo kala, hmelhriatloh ang maiin min pel a, khatiang kan nih tho chuan langlo lama inpawh ruk vel hi keichu ka duh lo" ka ti hmiah mai, ka sawi thiamlo lutuk chu ka inngei lek lek, tiang lo deuha sawi tur hi ka ni mawle, Alawmi chu nise sawidan tur a hriat leh dawn tehlul nen.

"I duh dan anih zawk ka ringa" a lo ti a.

"Eng chu?" a sawi awmzia ka hrethiamlo.

"Ka ngaihzawng i ni tih midang hriattir hi i duh ka lo ringlo a, ka theihtawpin ka lo in thup zawk a sin, biak che ka chak zia leh midang hmuh laia ka bialnu ini tih lantir kha ka chak zia i hrelo ang" a thilsawi chu ka ring theilo. Mahse, hriat a nuam takzet, ka ngaihzawng tiin min sawi hmiah tawh lehnghal, keichuan chutiang em em chuan ka la sawi ngam miahlo, Alawmi sawi zarah ka lo nui liam ve mai mai chauh kha nia.

"Ka thil sawi te kha chu theihnghilh daih rawh" ka ti leh ang lawia, ka insawi buaizo vekin ka hria, midang hmuha min rawn pák huam turin ka phut emaw a ti ang tih ka hlau, inthup chu ka duh dan ani daih zawka. Mahse, tun ṭum kha chu kan inkar ka la chiang ngamlo lutuk leh min lo chhaih mai mai ka hlauh thawn vang te ah ka puh ber.

"Naktukah kan inhmu dawnnia" tiin kan inbiakna chu kan titawp a, ka zak deuh ram ram mai, min ngai khawlo ang tih phei chu ka hlau ang reng, a hmeichhia zawkin thawhpui te laka inthup chu duh ngawih ngawih zawk awm ka nih laiin, zahthlak zawk chuan a.

Monday chu kan buai ngang mai, chaw chhun pawh kan eitlai hle a, chumi hnuah pawh ṭhut khawmuanna hun kan nei meuhlo. A dawhkan kik karh karh ri ah chuan ka hawichhuak zawk a, ka hma a JH-a lo ding at ka hmu chu ka phu zawk nghe nghe, min lo nuih vang chuan tawi tein ka nuihlet a, a mitmeng thuneih hmelzet chuan min en ran a, a suit hak lah chu ala inhmeh em em mai lehnghal! Lai zetin ka hawikuala midang ho mit chu kan lakah a fu ṭhup tih ka va hmu ve chiah bawk, kil khatah Alawmi pawh a lo khi ṭhaw alawm.

"Tlai banah min lo nghak dawnnia" a tih chuan "Enga?" ka lo ti he haw a.

"Ka rualin i haw dawn nia" nuisuk chungin a ti leha, ka hriatsual miahlo!

"Tinge?" ka zawhna mai mai chu..huhh..min ti lai chhe em a ni.

"Kan inah chaw i lo ei ang, i ban hunah min lo hrilh la" a sana enzawkin ka chhanna pawh nghak lemlo chuan a inher vut a, thawk chhuahna chang pawh ka lo hre lawklo, tunah khan a van sawi chiang ve, ka thawhpui te zawng zawng hriatah kan inngaizawng tih chu a rawn puang ani ringawt a lawm le!

(End of chapter -9)