GOMENASAI (CHAPTER - 41)

GOMENASAI - by Ahmangaihi violette khiangte

CHAPTER - 41

Kar khat hnuah chuan ka tan bawm a lo thleng a, thei leh Vitamin chi hrang hrang bakah chhang ka duh em em chi te, chocolate leh chips tih angreng a ni. Ka pa huan kal tur chuan min lo tlawh pahin min lo kensak hi a lo ni a, han lawm vak ngaihna pawh ka hre rih lo, "Apuiin eichak a neih chuan lo sawi zel rawh se a tih che kha, ka lo kal ziah dawn a i mamawh chu min chah dawn nia" ka pa chuan a ti a, ka pu nen huan chungchang sawiin an ti ti zui luama. Mahse, JH-a chungchang engmah a sawilo a, tun thlenga a la haw loh chu ka ring bik silo, thil awmzia chu hrethiam lo viau mahila rindan erawh ka nei thiam a rilru a na em em bawk.

Heti mai te hian min ṭhen a tum ta anih hmel e, engmah inṭhen thu a la rawn sawi lo a, a inngaihtuah mek anih ka ring a, chuti a nihloh chuan keimahni lampang min nghak pawh a ni maithei. 'Lalthanpui mâk tawh nge sumchhuah chu inṭhen nan i duh zawk?' tih zawhna ka inzawt fo a, a eng zawk zawk pawh chu ka duhlo, inṭhen ka duhlo a, ka naute vang tal pawhin lêt leh ka duh a ni.

Ka kawng zawh ang kha ka fa chuan lo zawh ve turin ka phallo, fahrah dinhmun ka hria a, ka natna ṭhin angah khan lo na ve turin ka phallo a ni, nu hmangaihna chu ka pe thei mai anga mahse, pa hmangaihna dawnglo tur chuan ka ngai ngamlo.

Ka haw aṭangin Nutei nen kan inkawm chawt a, ka haw chhan chu min zawt chik thei hle a, a reia reiah chuan keipawn ka zep reng thei ta biklo, kan nupa inkar zawng zawng erawh hrilh loin pehhel deuh takin ka sawi a, ka pasal nen kan inkar a ṭhatloh vanga heta min lo dah a nih thu te chu hrilhin min lo hruai leh ka rin tawhloh thu te pawh ka hrilh a, min lainat nang mai.

Min hnem in min fuih sauh sauh a, thurawn te pawh min pe ve fo ṭhin mahse, kan nupa inkar thil thleng zawng zawng hre ve lo ta nafam chu kan ngaihtuahna erawh a inpersan thei hle thung.

"Naupang pakhat chauh te chu tun laiah enkawl zawhloh tur thu a awm hleinem, lungngai duh reng reng suh, i pu hnenah hrilh la sum chhuah tir tawp rawh, a telloin i awm thei lutuk ang, i pi leh pu te an la hrisel bawk a nau an pawmpui thei dawn tho che a i tan lungngaih vak tur a awmlo ania, lehkhathiam i nia hna te pawh i zawng leh anga, a êng zawngin thil thlir zawk rawh" Nutei chuan a ti mai a, chuzawng ka ngaihtuah dan a ni velo, fahrah ka ni a, nu leh pa thlazar hnuaia khawsa velo te nun chu ka hrechiang hle a, ka fain a rawn tawng chho ve tur chu ngaihtuah ringawt pawhin ka na a ni.

"I la naupang bawka i han i tuaihnum anga ila hmelṭha dawn chauh lehnghal, nakinah in pa chu a la rawn inchhir ruai anga, chutih hunah chuan i lo hawisan hmak tawh dawn a lawm, keiin ka lo nuihzat bawk anga, Ṭhamawla chu kan hawi tir lawl lawl dawn nia" fiamthu ti tak deuh hian a ti bawrh bawrh a, kan nui dun leh hak ṭhin, a duhthawh ṭhin bawk si a, a duhtawka a khabe a han sep tawh hi chuan a nuihloh theih ṭhin loh.

Nutei chu mahni inringtawk em em a ni a chu chu kan danglamna a ni, keichuan hma hun thim chauh hmachhawn dawna ka inhriat laiin ani thung chuan hmahun eng tak min hmuhsak a, amah anga huaisen leh paukhauh chu ka ni ve lo tih a hrelo a ni mahna.

Nitin inah ka awm a, ka mu chawrh chawrh a ni ber, raino luakchhuak ka nei nasa hle a, thil ka ei hleithei loin ka BP a hniam reng bawka, inchhung chet takngial pawh ka ti hleitheilo. Ka pi leh pu ten min duat a, ram damdawi leh eitur hrisel kan hmuh phak ang tawk te min dap sak ve zela, taksa chau viau mahse, an kianga awm chu a hahdamthlak hle thung.

Zanah Nutei a lo leng thla a, ka khawhar lutuk tur pawh min hnem ve deuh a chhunlam ah hnathawka a feh chhuah daih ṭhin vangin chhunlam erawh ka pi nen kan awmdun rek rek a, ngaihtuahna kawm vak vak bak tih tur ka nei meuhlo.

Ka chhungte chuan ka pasal nen inbe pawp reng turin min ngaia, an bulah chuan engmah ka sawi ngamlo, Alawmi bia in ka rilru buai thu ka hrilh mawlh mawlh reng a, "A va ti awm anglo ve, ka lo va be dawn a mi, a thiltih dan hi ka duhlo reng reng, inṭhen a duh anih pawhin ṭha takin sawi mai sela hetianga intih te chu" a ti zui hlak hlak a.

"A...be lo ang, a rilru a hah ve rih a niang, ka naupai hi a fa anih a ring bawk silo a" ka tih chuan "A awm anglo emaia, a reng rengah nupui te hriatloha Vasectomy pawh lo tih reng reng, amah anih chu buaina zawk, pawngsual i lo tawk em tih te pawh hriat tum sela, police hnenah te pawh report mai sela, khatia Lunglenga a dah ringawt che kha thil ṭullo tawp a ni, nupa in ni a harsatna engpawh tawk ula ṭang dun tur zawk in nia lawm" a ti leh hmak hmak a, chu tak chu a ni ka dikloh hmasak na chu.

"A tir khan ka zep a, lo hrilh tlang vek ila chuan kan ṭangdun thei zawk tur a nia" ka ti leh ringawt ṭhin. "Mate, i diklohna ka hre hranlo, kei ni ila ka hrilh mai hreh ve tho ang, JH-a te chuan enge thleng tur ngaihtuah chiangloin thil a ti buan buan zel a, a chhungte bula a lo sawi thawt thawt te pawh chu a ti awm anglo ka ti kei chuan, thuchiang zawng hmasa loin a burbun vek che a i thiamloh ni miahlo ah thiamloh a chan tir ringawt che a nih kha....an inah kalin ka va be dawn a mi?" ka ṭhiannu chuan a ti leh a. Lo va hmuh chu ka remti loh tlat vangin min hnial zui ta em lo.

Ka lakah chuan a inthiamlo hle a "Khami zan khan midang bula awmloin i bulah khan lo awm tlat ila engmah a thleng awm silo a, a pawi tak tak a ni" a ti zui vawng vawng a. "Inthiamlo duh reng reng suh, ka pasal kha min lo ngaihven sak la" tiin ka lo chah ve thunga, tih theih dang a vang takzet, min be duhlo a ka lak aṭanga inla hrang ta chu biak va tum luih ṭalh chu ka hreh bawk si a, ka ngaihven lo thei ngang chuang si lo a, Alawmi pawn tihngaihna a hrelo kher ang chu.

"Ka nu entir turin Vellore ah kan kal dawna, ka haw veleh ah ka lo tlawh ang che, in pa pawh chu ka lo ngaihven reng dawn nia, lo lungngai miah suh, i rilru te kha ti hah lo la, i naupai chiah kha ngaihtuah rawh aw, kha kha i dikzia tilang tu tur a nih kha, naute kha a lo piang anga a fa anih zia a hriat hunah chuan ala inchhir khawp ang...." a thilsawi lai chu lo pawt chatin "Alawm, a fa a nih i ring ve tho ti raw, ka ngaihtuah let ngial pawhin ka hre thiam tawhlo, ka mut laikhan min khawih ni sela hre tur ka ni a mahse, damdawi ten min chiu ta ang sela engmah ka hriatloh laiin..." sawi zo theiloin ka ṭap leh rih a.

"Chutiang a thlen ka ringlo, kha mi zan a awm ho kha i pasal vua leh vang hlir an nih kha, chutiang ni sela chuan thil tih tum engmaw neiin an lo inring lawk sa thlap tihna a ni dawn a, chu aichuan in pa Birth control kha ka ringhlel daih zawk, amah pawh hi ka ringlo, a awmloh lai khera thil thleng a nia, a chet zui duh dan te hi..." a ngawi dat a, rilru a ti buai nak mai.

"A unau ten i lakah an rilru put hmang a hre vek si a, a hma a nau in chhiat dan lah kha, zep lo ah chuan a ngaih a ṭha mah mah......" enge maw ngaihtuah nei tih hriat tak hian a ngawi leh vang vang a. Chutiang em tur chuan JH-a chu ka ring phallo, Alawmi thil sawi pawh chu ngaihtuah pawh ka ngaihtuah zui ngamlo.

"Ka lo thlithlai sak ang che, ka inbe zel dawn nia, nang chuan biak tumlo la, a duhdan ang hian thil han ti phawt sela enge a tum chu a rawn lang vek mai ang" ka ṭhiannu chuan a ti leh sap sap a, kan inbiak zawh chuan ka chau nghulh thei mai, ka ngaihtuah nasat poh leh thil engkim a hnawk zuala, tunge rinhlelh a rin tur ber pawh ka hrethiam tawhlo. 

Kar a liama thla hial a vei ta, ka pa pawh a lo kal khat ta hle a, Aizawl lam chu an reh ta vang vang mai, ka Nî chuan ka haw hun tur min zawt leh ṭhin a, Manuntei a ngaihtuah thu a sawi leh zauh ṭhin. Engmah chhanna ka pe mumal thei silo chu a ngaih a ṭha bik vak tawhlo.

Alawmi Vellore ah a kal daih a, kan inbiak chang lahin a buai thei si a kan titi ṭha hman meuhlo, a chang chuan ka inngaihtuah lungpuam a ka pu chu hrilha sum chhuah mai chu duh thut thut chang ka nei ve ṭhin a mahse, naute vang bawkin ka rilru ka thlak leh ṭhin.

Pathian zarah ka pai tirh ang em emin ka insawisel ta lo a, taksa ala chakvak lo deuh e tih lohah chuan luakchhuak leh tih pawh ka nei ta lo. Tun ṭum chu pai puitlin ngei ka tum ruh hle a, keia duhthlan theih ni hauhlo mahse beiseina sang tak ka nei bawk, ka pain min lo tlawh hnuhnun ber khan "A lo pian chhuah hunah a hmel aṭang pawhin kan thisen kai a ni em tih chu keiman ka hre thei ang" tiin a sawi zauh a, a tir khan a thilsawi dan vang khan ka lunghnur hle a, mahse tunah chuan chu chu beiseina min siam tu ber a ni ta.

Internet ah te ka en kual a Vasectomy pawh a fail chang a awm ve tho a, eng damdawi inenkawlna mah hi  za ah za a chiang a awmlo, za ah pakhat lek pawh Chance awm dawn sela ka pasal thisen kai ngei anih chu ka la beisei fan a ni.

2nd Trimester, ka naupai pawh a rit ṭan viau tawh, "Mipa anih ka ring, ka rin aiin a lianchak tlat" Nutei zan lo leng chuan a rawn ti hluta, "Tunlaiah chuan hmeichhia pawh an lian tawh lutuk a lawm" ka piin a lo ti ve a, ka pum rawn khawihin "Mipa a ni chiang lutuk" Nutei chuan a la ti ṭalh a, ngaihdan ka neih thiamloh lam tak a ni, ka mut laihian a rawn che ve ṭalh ṭalh ṭhin a, a damṭha tih min rawn hriattir ṭhin ni ah ngaiin a lo chet tawh hi chuan ka nui leh var var ṭhin.

Ka theih tawkin ka inenkawla, rilru tih hah loh hram tumin ngaihtuahna pawh ka kawm vak duh tawhlo, rilru lak pen nan tiin Nutei te fu herna ah te ka kal ve ṭhin a, mahni chauha awmlo a midang kianga ka awm chuan ka inngaihtuah lungpuam hmanlo a a tihzia ta phian mai. 

Anxiety vangin ka talbuai leh ta miahlo a, Nutei ngaihdan te pawh ka ṭawmpui ve lek lek tawh.

Ni e, nu ka ni a, ka fa lo la piang tur tan chhel taka ka awm angai, pa chan ka chan kawp angai anih pawhin hnual mailo a chhel turin ka infuih sauh sauh bawk. Eng hun nge kan tawn chhoh dawn chu ka hrelo, Pathian hnenah innghah tawp chu ka tihtheih ṭha ber a ni, a remruat ang zela hma hun thlir turin rilru ka siam a, a hnenah ka inhlan tawp mai a ni. Bible chhiar in ka ṭawngṭai fo a, ka dilna chhanna pawh ka dawng ta ngei e.

Suangtuah ram ka bansana, a nin ka dawn phakloh ramah min hruai thung, a thu ah lungawina ka hmu a, chu chuan hlimna ka la tawn ve ngailoh min neihtira, engkim a kaltluang leh vek dawn tih min hriattir bawk.

Ka innghahna ka pasal kha ka lak aṭangin a dah hla a, ka ruahmanna te thlawnin ka beiseina te min laksak a; a ruahmanna kawng hi ka zawh zawk theih nan beidawngin min siam a, amah chauh ka beisei theihnan. 

Ka ke te phehin an awm a, a ke chauh ka rin chhan theih nan, chutah chuan a ni a laka mikhual ang lek rilru pu ṭhin hian amah ah hahchawlhna ka hmuh tak ni. Ka nun kaltawh zawng zawnga min enkawlna  ah khan vuina tur reng reng alo awmlo.

Nu leh pa karah seilianlo mahila an hmangaihna aia nep chuanglo tur pi leh pu te hmangaihna in min tungding a, ka patea te hnenah khan awmlo ila thingtlang nula mawlmang tak chauh ka ni ang, hmangaihna awmzia min hriattir turin pasal ṭha tak mai min pe a, chân ni a ka inhriat hnuah pawh damchhan tur ṭha tak naute min la pe cheu bawk. Vuina tur reng a awmlo, lawm a hlim em em tur zawk ka ni.

Thil a kaltluan hnu ah chauh hlim ka tum a mahse, a kal tluang reng silo a ka na ṭhin anih kha, Ni e, ka hlim hmasa anga, ka hlim phawt chuan engkim a kaltluang zawk ang, hlimna tur tam tak ka neih laiin tinge min ti lungngai thei tur thil chauh ka lo ngaihtuah zui ṭhin ni. 

'Lawngawina" chu chu ka zawh fo ṭhin chhanna kha a ni, ka lungawilohna khan ka chantawk te duhkhawp loin min siam a, hmeichhe khawngaihtlak takah min in ngaihtir a nih kha, Depression, Anxiety te chuan he thu mal Lungawina hi an lo ngam reng renglo, eng ang hun harsa ah pawh lungawina ka neih tlat chuan engkim ka tuar chhuak thei zel ang, 

Vellore aṭanga Alawmi a lo let leh hnu chuan ka tan thu thar lawmawmloh tak mai min lo hrilh a, ka pasal chuan nula a kawp a ni, hmeichhia chu tudang niloin Judy. Vanlalhmangaihsangi ngei mai kha, min ṭhawnglo ti ila chuan dawt ka sawi ngei ang, min ṭhawng mai niloin min deng dawt a ni ber.

Rilru a inpeih ve viau tawh hnuah pawh mihring rilru hi chu a nghet lo khawpa, rilru siam fel te, ka ti ang han tih mai te chu awlsam tak a ni a, a taka thil a han thlen meuh hi chuan kan rilru ngei pawh hi kan ta a ni ta lo emaw tih mai tur a ni ṭhin. Ka hlim anga thil a kal tluang mai ang ka ti a mahse, thil a kal tluan loh chuan ka hlim thei si lo, a chhan chu maw....mihring ka ni miau a ni.

Alawmi chuan keima thu a lêt mai turin min duh a, inṭhen ka duh tak tak anih loh chuan Lunglenga awm reng chu thil tih chi niin a hrelo, "I duh chuan ka lo hruai ang che, inṭhen in ni lo a, haw leh tawp mai rawh, mipa hi chu tihluih ve deuh te hi an ngaih chang a awm a, JH-a phei hi chu  a chêt hun nghah aichuan nawr chi a ni zawk a, hetia in awmdun loh reng chuan in inṭhen hlen tak tak thei maiin ka ring, inṭhen i  duh tho te anih chuan thuhran ania, i duh lemloh chuan nangma thu pawn lo lêt tawp mai rawh" tiin min hrilh a, chu em chu ni theiin ka hrelo. 

Aman hetah min dahin min lo hruai leh tur thu a sawi a, a sawi anga a awmlo anih chuan tihluih chu ka duh lo a ni, ka inti paukhauh lui a, ka ṭhiannu bulah chuan lêt ka tum tawhloh thu ka hrilh bawk.

"Pathian zarah kan dam a nih chuan eng em kan ti bik lo ang, ka pi leh pu ten remruat mai rawh se, keichuan ka duhtawk ka hmu tawh e, kan boruak ngaihtuahin han inkawl leh pawh niila buaina zakhua mai mai tur pawh a ni thei a, hei hi kan tana ṭha zawk tur pawh a ni  maithei a ni" tiin ka ṭhiannu chu ka chhang a, ka rilru tak pawh a ni. 

Keima thuin haw ringawt ila, nupa karah inrintawnna a awmloh chu thuhran tunah ngaihzawng a nei mek a ni a, tun hma pawha chhungkaw boruak hlim tak neih loh sa nen hei aia chhe leh chhawng hian kan tawp lo ang tih a sawi theihloh, tun hun hi inthiarfihlim nana hun remchang leh a awlsam lai ber a ni zawk ang.

"Mate, ngaihtuah chiang rawh aw, JH-an a hmangaih em che kha, ka lo hruai leh ang che pawh a ti che a ni lawmni, a rilru na chiai hian tihloh loh a ti te pawh a ni thei a, a mamawh laitak che ani thei ania, inhnem na tur a duh em em laia i awmloh tlat vangin Judy a bel ta te pawh a ni thei a" 

"Alawm, keimah zawk hi ka inngaihtuah angai a lawm, JH-a bulah khan ka hlim zel angem pawh ka chiang ngam tawhlo a, hei hi kan nupa tana ṭha zawk pawh a ni maithei...." ka ti hap a, ka rilru a insualbuai nasa hle a ni. 

"Vawinah khan Office ah Judy leh Apuii an lo kala, an pathumin an chhuak ho niin ka hria, ka ngaihdan chuan i lakah an chhungkaw ho hian Game an khel anih ka ring, nang chuan ral aṭangin i lo hria a, ka mit ngei hian ka hmu bawk si a ka lo thinrim lutuk hi...." thawk a la hak a, a lungawilo ngang mai, ni e... ka mit ngeia ka hmuh veloh vang chuan a lawm ka tawrh theih zawk, hmu ila chuan ka chi ai vek hialin ka ring.

Mut hmunah ka ngaihtuah a ka ṭap leh rih ṭhin, Judy a duh tawhloh thu chiang takin ka hnenah a sawi tawh a, tunah an inkawp leh nghal mai thei anih chuan ka hnenah khan dawt a lo sawi reng zawk a ni ngei ang, an lo la induh reng ṭhin tihna a ni dawna, khang hun chhung zawng pawh khan.

Zirtawp ni chaw chhun ei hun velah Alawmin min lo phone leh a, scooty khalh chungin min lo be nghe nghe a "Mate ka hma ah sawn an tlan a, henu hian nitin a rawn birh tluk tluk a nia, Canteen ka kal turin ka hmu fuha ka zui ringawt mai hei, ka hmu tih an hrelo aniang, motora an chuan dawnah pawh an infawp a, vawin chu ka chapchar tak tak tawh mai dawn, i duh tawhlo anih pawhin kamkhat ve reng reng ka duh" a rawn ti bawrh bawrh a, thawm a bengchhen em vangin a ṭawng ring hle bawk.

"An duh duhin awm rawh se, kei min ngaihtuah vang anih chuan tih a ngailo aw, ka na miahlo ania" chutiang chuan ka sawi ve tak nain ka awmchhung na vawng vawng chu a chhan ka hrechiang hle thung, ka na lutuk a thawk harsa khawpin ka thil hriat te chuan min vilh ngut ngut bawk.

"I rilru nem lutuk hi chu aw, keilah hi ka lo sa phat zela, kawng lehlamah chuan khatiang rilru i pu kha ka a ṭha tho mai mahse, Mate in inneih thutiam hriatpui tu che i ṭhian ka nihna ang pawhin ka mithmuh laia an awmdan hi chu kamkhat ve awm pawh niin ka inhria, nang nen in ṭhenfel ni ula chuan ka en liam thei anga, nang ala ṭhen lo che a, tunah hi chuan i pasal a la ni tlat a, a awmdan hi uirena a nih hi aw, a lakah sawiduh te i nei ve miahlo em ni?" tiin min zawt a.

Sawi duh chu ka nei teh meuh mai, zawh duh tam tak ka nei a mahse, chhanna ka natpui leh tur zawh chu ka duhlo, chu aichuan thil thleng mek vanga nalo tura lo insiamrem ka duh zawk. Mahni inhmangaihna min lo tihsak anih pawhin chu chu ka damkhawchhuah theihna tur ṭha ber niin ka hria.

"Anih nangin ṭul i tih tlat loh chuan ka ngawi mai ang, nangmah i rilru a dam zawk chuan a ṭha a ni mai" a rawn ti hap a, "Ni e ṭhiannu, tihian kan ṭha tlangah ngai mai ang aw" ka lo ti zuai raih a, "Umm, lo inenkawl ṭha la, enge maw chanchin a awm chuan kan inhrilh zel dawn nia, alo bia che  anih chuan min lo hrilh rawh aw" a ti leh a, ka hrilh nghal tur thu keiin ka lo hrilh ve bawka, kan inbiak zawh chuan khumah muin ka ṭap keuh keuh a, a ṭah zawh chuan ka thawl huai bawk, hei bak hi chu ka ṭap tawhlo ang tiin ka inhumruh a, ka pum lo che dat dat chu dawmin ka rilru ka siam nghet sauh sauh bawk.

Chawlhni ah Apuiin min lo bia a mamawh ka neih leh neihloh min lo zawt a, "Neilo e" tih zawngin ka chhang a, JH-a chungchang engmah ka zawt duh lo.

"Ka u in pawisa i mamawh em a hre duh a, eichak zawng engpawh i neih chuan lo sawi zel rawh, sumo ah ka lo thawn zel ang che" a ti leh a, Judy leh a unaupa inkungkaihna hrelo ang hmaka min lo be thei chu ka lawmlo ru hle a, ngawih ṭang ṭang chu a har ve ngang mai.

"Engmah mamawh ka neilo, min ngaihtuah duh suh se" ka ti tawla, ka lawmlo awka chu a hai bik hauhlo ang.

"I ning tawh em, i lo haw duh tawh em?" te chu a han ti ve sasawi a, eng rilru pu a min zawt nge maw a nih dawn ni.

"Haw duh hranlo" ka ti leh mai a, a ngawi zui rauh rauh a, tu emaw phun sar sar ri ka hria a, ka ṭawng ngaithla ve dang an awmin ka hria.

"Helai aichuan khalam kha a nawm zawk ka ring" sawitur hrelo zetin a rawn ti leh a, thil pangngailo chu a hai biklo, chuti nilo sela a unaupain min biakloh chhan chu kan sawidun ngei tur a ni a mahse, ka zawt lo a, ani pawn a sawi heklo, kan inbiak danah chuan mi mawl ber pawn ṭawng kan insum dun hle tih chu an hrethiam vek ang.

"Lo inenkawl ṭha la, kan ngaihtuah viau che a nia, naute nen khan hrisel deuhin lo awm rawh u, naute mamawh tur ka lo lamkhawm anga, i lo let leh hunah ngaihtuah buai ngailo turin" a ti leh sap sap a, chuzawng a thlen ka ringlo. Hmuhloh lamah chuan ka ner sawka, a rawn ṭawng leh hmain phone chu ka dah zui daih bawk.

Rei vaklo ah Nutei leh mipa pahnih hi an lo inzuilut a, Lalhriatpuia leh Lawma te hmel ka hmu chu kan phul zui hlut a, ka haw tirh khan Lawma zawk chu ka hmu zauh zauh ṭhin a, Hriatpuia thung chu ka hmu ngai meuhlo, Falkawnah zirtirtu hna thawkin a lo awm daih tih ka hre leh ta zela, school chawlh hmanga a lo haw lawk lai a lo ni nghe nghe.

Nutein ka chanchin a lo hrilh ru nge ni, zantin deuh thaw hian an lo leng ta zut a, kawm an nuamin fiamthu an duh a, an bulah chuan titi ho tete sawiin kan nui leh dar dar ṭhin. "Ṭhiannu Hriatpuia hi nei daih mai la, a duhruk na  che a rei tawh nasa mai sia, a endanah che hian tun dinhmun ah pawh ala duh viau che a nia" Nutei chuan a ti sar sar a, min ti hamhaih let der a ni.

Chutiang zawngin Lalhriatpuian minlo en ṭhin ang tih ngaihna reng reng ka hrelo, "I hriat sual mai mai a nih dawn chu, fiamthu pawn sawi mai mai suh" ka lo ti hlak a. "Hman kuma Christmas kan hman ho aṭang khan a duh tawh che a lawm, ka bulah pawh i chanchin min zawt ziah a, pasal i nei tih ka hrilh khan 'ka van ui e' a ti che a lawm, keipawn khata ṭang khan a duh ru hle che tih ka hre ve chiah a, Ṭhamawla angin hausain hmelṭha velo mahse mi pangngai tak ania, ngaihven ve chhin rawh in lo inmil phian maithei" a ti leh charh charh a.

"Ngawiteh, pasal ṭhen ka la nih loh hi" nui chungin ka lo ti maia, dinhmunin zirlo viau pawh nisela mipa dang ngaihven hi ka tum tawhlo a ni ber, thinlung pakhat ka nei a chu chu mipakhat hnenah ka pe tawh a, ka duh a ka laklet leh theih lah a ni tawhlo, hetiang taka kan inkar boruak a awm tawh hnu pawh hian ka hmangaihna kha a la danglam chuanglo a, danglam tura beisei tlat aichuan inkawprem tur kan nilo tih pawm zawk chu ka tan awlsam zawk bawk.

"In inṭhen mai hmel em a ka han ti mai mai anih chu, engtin nge in awm zel dawn tak, naute neih hnuah ṭhen i tum nge in inhruai leh zawk ang?" tiin min zawt zui a, "Ka hrelo le" tih tein ka lo chhang a, a ngaihdan a ni leh ta vaklo aniang "Keichu niila ka ṭhenfel tawh ang mawle, i la duh hluah hluah lutuka i ṭhen phal nganglo a nih kha, i pi leh pu te pawh i la hrilh ngamlo ania" tih el awka deuh hian a ti a, ka chhang zui tawhlo, a sawi dikna chen a awm ve tlat.

Ka rilru hi a inkhâp buai renga, naute lo piang sela JH-a fa nichungin lo piang sela ka duh a, a fa ah a pawm lo anih pawhin chutiang sawibuai duh tur em chu a nilo tih ka hria, nau ka neih hma a kan inṭhen anih chuan a pa anga dah chu ka thei kher angem ka hrelo a, kan inṭhen chuan ka fa a rawn ti zui duh angem pawh ka chianglo. Pa hming put tur neilo a ka naute a awm chu ka duhlo a, chuvangin thutlukna ka la siamfel theilo a ni, thla tlem te chauh angai tawh a, kan awmdan tur chu hunin a la rawn hril chho mai ang chu.

Ka nu nen kan inbia a "Lunglengah i awm tho chuan helamah nau rawn nei ta zawk che, keiman ka lo buaipui dawn che nia" a lo ti a, ka pi leh pu ka zawh chuan an lo remti ve mai bawk a, 3rd Trimester a ni tawh a nau neih a hun ṭep tawh bawk nen ka nu hnena awm chu ka tan pawh a thlamuanthlak khawp ang.

"I pasal zawt la, a phal kher lo maithei ania, anin a tih vakloh chuan tilui lo la, nau i chhiat ngun si a, zinchhuah kha a remtih ka ring vaklo" chaw kan eilaiin ka pu chuan ti a, ka hrilh tur thu chu ka sawi ṭha ve mai a, hrilh erawh ka tumlo hulhual thung.

JH-an ka pu bulah ka hriselloh vanga thingtlanga awm ka mamawh thu a lo sawi a, ka pi leh pu in min lo thlahlel bawk si a i he loin an lo pawm hmiah mai kha a ni a, ka awmtak hnu a min lo tlawh miahloh chhan pawh engmah rinhlelh an neilo, an makpa hi an ring em em a, kan inkar boruak ṭhalo chu ka sawi bik siloa chuvang chuan a thawi pawhin rinhlelhna an neilo a ni.

Lawngtlai kaltur chuan ka insiam a, Lungleng aṭangin Aizawlah ka let phawt anga, nau neih huna ka mamawh tur ang zawng zawng lei hmasain Lawngtlai lam pan chu ka rilruk a, Aizawla cham ngailo turin ticket pawh ka hauhlawk sa a, bazar na hun erawh ka nei tlem dawn viau thung, Lawngtlai sumo a chhuah hma angai si a, ka rilru a buai ru nak mai. Mahse, vanneih thlak deuhin Hriatpuia Aizawl kal a lo tum ve hlauh a, "Zingkar hma deuhah ka kalpui dawn che nia' a ti ta hlauh a, a remchang khawp mai.

A tukah Hriatpuia nen chuan an Motorin Aizawl kan pan a, ka dul a puar lian tawh bawk si Bag lianpui ka han ak kual tur chu min ngaihtuah nge ni "Ka hmanhmawh lo ani a aw, i phal chuan ka bazar pui che anga, Counter ah pawh ka va thlah dawn che nia" a khat tawkin a ti leh ṭhin a, chuti na na na chu ka hnial ta biklo.

Ka nuin "Helamah leitur a awm ve vek tho" a tih vangin mamawh zualpui leh ka naute ho thil hawn tur chu ka lei sawk sawk a, darkar chanve pawh ka bazar awm lo e, Counter lampana kan tlanlai chuan Zarkawt kan tlanpel chu ka lung a leng vawng vawng maiin ka hria, kan in awmna lam chu ka hawichho a, langphak lo mahse, engthil emaw hian min mawlh tlata, min tawk zawnga Scorpio var lo tlan ka hmuh lahin ka kimki chawih chawih reng bawk a, ka pangngailo nasa mai a, ka awmdan chu mak a ti deuh aniang Hriatpuia pawn min lo en leh zuk zuk ṭhin.

Lawngtlai sumo a ka chuang ta chu ka thaw huai mai, khaw dangah nunthara bul ṭan tur hi ka inchana ka nu bulah ngei mai ka khawsa dawn bawk a, buaina zawng zawng kalsan tur nimaiin ka inhria.

Sialsukah chaweiin kan dinga, Motor chuan hi chuan chaw ka ei hleithei meuh ṭhinlo, thui tak tlan tur anih vang erawhin ka ei luia, ka dawhkan kilpui pakhat chuan "I rai lian tawh si a, a hma ah sawn lo ṭhu rawh, i lo insawh khawlo palh ange" tiin a ṭhutna min thleng ta hlauh a, a hnung kan tawt si a, ka lawm kher mai.

Lunglei TNT ah zunram kan thiar zawka, Driver chuan ka vawikhat kalna anih vangin kan thlen chin chu uluk deuhin min hrilh zel a, kawnglah chu an laih vangin a khu em em maia, kan inkhar phui hmuk si a a lum duh kher mai. "Nau kha i lo cheh thut ange, a lian si a phir i pai a nilo maw?" tiin min fiam hlut a, "Pakhat chiah" zaizir meuha ka lo tih chuan an nui hak hak hlawm a.

Ṭawipui S ah thingpui kan inzawk tihloh chu kan ding leh tawhlo, Lawngtlai kan lut a "Hei hi AOC veng anih hi" Driver in a lo tih takah chuan ka nu in AOC veng in lo thlen hunah min lo be rawh  atih kha hrechhuak zawkin ka phone nghalthuai a. 

Driver nen chuan an inbia a, ka kalna tur veng an inhrilh a ni. "Mami, i thlenna tur chu Lawngtlai 3 ah a nih chu, hemi veng zawh ah hian ania" Driver chuan a ti var a. Rei vakloah Biakin bulah hian kan dingah kawngchhak lamah ka nu leh ka nau Sangsangi an lo ding ran bawk, kan inhmu chu kan hlim teh e, ka lungchhe lek lek hial a ni.

Kar khat zet ka cham hnu chuan an bulah chuan nau neih thleng awm ka tum nghet hle tawh, naute hoin min ngaiin ka bulah an awm chawt a, ka nuin ka chet a phal silo a nilengin TV kan en a, ṭhenawm nu ho an lo leng a kan titi ho a, chhunah eitur siamin kan inkawm khawm laih laih a, Lungleng aimahin nuam ka ti ta zawk a, nu te bul nge nge a dan a dang te pawh ania nge.

Thawhṭan tlaiah ka puin min lo bia a, "Hei i ṭhiannu a lo kal a, enge thil awmzia i pasal nen in intihthiamloh chungchang engmah i sawi silo a?" tiin minlo zawt tawl a, ka bangbo lek lek zawk a ni.

"Alawmi chu ka lo be lawk ang?" ka lo ti nghal thuaia, reilo teah Alawmin phone a lo chhanga, "Hmun dangah kal sawn phawt teh" ka lo ti leh sawk sawk a.

"Mate, i zin tih ka hrelo a, a zialo tak tak. Hei i pu nen kan inchhang buai vek lehnghala thil nilo pui pui ka sawi a, engtin nge niang" inthlahrung deuh hian a ti a. Keima thiamloh zawk tak pawh a ni, kar leh ah ka lo tlawh ang che min ti a, ka zin tur thu pawh ka lo hrilh derlo.

"Eng chin nge i sawi, naute chungchang i sawi em?" hlauthawng fe in ka lo ti a.

"Aih khalam chu sawi teh nang, Aizawlah lo haw vat sela a ṭha ang tih ang zawngin ka sawia, JH-a ngaihzawng neih kha ka sawi chhuak palh a, i awmreng chuan a buaithlak tih thu sawi ka tum kha mawle, awi...a pawi e, ka tibuai zo vek dawn che anih hi" a ti zui vawng vawng a.

"A pawilo, thil diklo i sawi chuang hleinem, keipawn ka zep rei tawh reng reng emai, anih nih kan ni tawh mai ang chu" ka lo ti ve a, ka chuti ta rau rau anih chuan hrevek tawh mahse pawi ka ti tawh bik lo.

Ka pu chuan "Chumi vang chu em ni hetah a rawn dah che?" tiin min zawt a, "A nih ka ring" ka lo ti chu a lawmlo nasa mai, "I va han ngawi thei ve mawle, Tlan-in inpa nen inti thiamlo anga a sawi khan ka lo awihlo a, nang lah i ngawi tlata, kum a tling mai dawn anih hi hei, mawl em em lutuk" a ti zui hlak hlak a, chhan zui dan vak ka hrelo, an rilru ka tih buai hle ringawt mai a ni.

Ni Tlani chuan Manuntei ka aṭangin a lo hre sa deuh tawh a, kan  buai chhan tak tak phei chu a hre biklo, ka pu chuan "Bungrua kan la anga, sum kan chhuah nghal ang" a ti tawl mai.

A zan a zanin chhungkua an inrawn khawma, a tuk zingah kal nghal turin thu an ti tlu a, a tukah chuan Alawmi pawh ka puin a ko tel a, kan inbe pah reng bawk. "I ruahmanna ka ti buai vek lo maw, a lo haw tir vat che ka rin zawk nen, a buaithlak ee...inṭhen lampang daih i puin  alo rilruk a" a ti zui niah niah a.

"A pawilo, inṭhen ka duh a lawm" ka ti tak nain ka lung a dam zan lo hle mai, thla tlem te nghak leh lawk ila naute pian hunah ngaihtuah chauh ka duh kha a ni a, thil a thleng rum rum ta mai si a, ngaihtuahna a mang hle ringawt tawh.

Ka nu chuan thil awmzia min zawt chîk hle a, a kip a kawiin a lakah chuan engmah zep awmloin ka hrilh a ni. "Inṭhen kher chu in ngaih ka va ringlo em aw" min en vang vang chungin a ti a, engvanga chutiang thu sawi chu nge a ni ka hrethiamlo hle.

"Ngaihzawng a nei tawh bawk sia!" ka lo ti hap a. "Mahse, engemaw vang a ni thei a lawm, i awm bawk siloa, i ṭhiannu sawi ang khan haw tawp zawkla a ṭhat ka ring, nangma thu a haw loin hruai tur chein i ti zawk anga" ka nu chuan a ti leh a. Enge maw a awmzia le.

"Nu, JH-a lakah chuan ngaihdan dang i nei zawk a mi?" ka ti he haw a, a thil sawi dan chuan min ti bangbo riau a ni.

"I laka JH-a awmdan zawng zawngah inawm hrang rei mah mah tihloh chu sawisel tur ka hrelo, a rawn be lo che a, nang pawn biak i tum biklo a ni lawmni, ngaihzawng nei angin in inngai thawthang chu a ni ve ve a, ih e....hmeichhia hi chu pasal tello hi chuan kan lo mawi zo lo khawp a nia, sum ngah viau in thiamna sang tak nei mahila, pasal tello hi chuan miten min hmuh dan hi a dang tho tho a nia bawihi, in inṭhen chhan tur ngaihtuah ṭalh loin in inṭhenloh chhan tur ngaihtuah ṭang ṭang zawk la, inhmu hlawllo anih hunah chauh thutlukna siam zawk rawh u.

Lunglengah a dah lai che khan 'Ka lo hruai leh ang che" a ti a ni lawmni, 'Awm hlen rawh' ala rawn ti reng reng hleinem che, nupui ṭha tak chuan i lo nghak ngar ngar mai tur a ni, kum em pawh a la vei hleinem, a unau ten an lo bia che a, i mamawh te an lola zawt che a, nau neih hun tur atan pawh an inbuatsaih a ni lawm ni?" 

Ka nu thil sawi chuan ka rilru a ti buai zo vekin ka hria, tunah ka bungrua la turin ka chhungte an thang mek bawk a, eng rilru nge put tur ka hrethiam tawhlo.

(End of chapter - 41)