MEET ME HALFWAY (CHAPTER - 1)

MEET ME HALFWAY

- by Ahmangaihi violette khiangte

CHAPTER - 1

Zinkawng thui tak a ni, Dallas leh Houston inkar chu darkar 3 leh a chanve tlan chauh a ni a mahse, ka tan chuan chatuan tluk zetin a rei thung, kum 20 kalta khan he zinkawng hi tuna ka zawh mek chhan vang tho hian ka lo zawh tawh a, hun chauh chu danglam awm chhun em ni ang aw ka ti hial a, a chhan chu kum 20 kalta a ka phur ang tho khan ka la phur a, hman ang tho khan ka ti rilah helhhawlhna leh zamna ala in ṭham ru reng bawk.

'Welcome to Centerville' tih intarna ka thlen chuan ka ding a, rilruin nunhlui a chhuikir lo theilo, kum 10 chhung teh meuh July ni 4 a lo thlen a piang hian he hmunah hian ka kal ṭhin a, tunah kum 10 dang a liam leh hnu ah a hun ngai a hmun ngaiah, kei ka awm a; ani kha a awm ve thei tawh a ngem?

Kawngkam chawlhna dawr lian vaklo awmah chuan ka pen luta "Howdy...lo leng lut rawh ka pu?" nula la upa lo tak hian lo ti varin ṭhutna min kawh hmuh a, "Leeno i ni em?" ka tih chuan a lo hawi let rang kher mai.

"Aw ni e, engtin nge min hriat?" 

"I nu ṭhian ka nia, i nu a awm chuan i ṭhian hlui Zander Lozano a lo kal han ti rawh" ka lo ti var a, phawk lek leka min en chungin an choka lamah chuan a kala, a thang hlan chuan thlanglam Wine Barrel  an dahna bula thlalak intar chu ka lo thlek kual a, keipawh ka awm ve vang mai, kum 10 liam ta a kan hlimthla te pawh.

"Karei!...nangmah tak tak e law?" rawn ti hlut tu chu ka lo nuih a, min rawn kuah nghal chung mai. 

"Billy khan a thi tawh a niang a ti che a, hei i lo la damṭha lutuk a lawm, i hmel pawh a ṭhat ngaiin a la ṭha reng, kum 10 dawn min tlawh lo chhan chu enge ni a?" vui hmel pu lek lek a tiin ṭhutna lamah chuan min pawt phei dawt dawt a, a fanu Leeno chu ko in "I Uncle Zande hi i hre tawh lo em ni?" a ti a, Leeno chuan min en vang vanga min hrechhuak leh a niang lai deuh chuan a nui a, "Tunah chuan nula tak tak a lo ni ve tawh anih hi" ka lo ti ve a, ka hmuh hnuhnun ber kha chuan naupang chumchiap mai ala  ni.

"Engthil nge ni Bawiha?" a mitmeng fing ker kawr hma ah chuan engmah zep theih a ni lo. 

"He tah a lo kal dawn?" 

"A lo kal ang maw?"

"Thil tam tak a thleng Millie mahse, vawin chu a lo kal tawh ngei ang" min beisei pui loh zia chu a hmelah ka hmu thei a, mittui tling pamin a lu a bu nghat nghat a, min kuah leh rih ṭhin.

"I lo kal leh hunah chuan i nupui leh in fate nen lo kal tur khan ka thlah che kha a nia" a ti tham ṭiak a, nui hawk chungin a darah chuan ka lo chul a, ni e...khang kum chhung zawng khan beidawng turin vawi tam min hrilh ṭhin a nih kha.

"Engpawh nise zanin chu tlaivar huamin kan nghak aniang chu" nui hak chungin a mittui chu a hru hula, "In tur ka lo lak ang che" tiin a tho zui thuai bawk.

In tur min pek ka  in zo a, chu mi hnuah pawh engthil emaw no dang ka in leh tawh a ka thlen chin aṭangin darkar 1 dawn chu a ni ta reng mai, ka phone chu ka en leh ṭhin a a thim hmuk reng mai a, rilru in ar bo a zawng ruai tawh. 

"Houston ah chuan i kal mai duhlo em ni?" Millie zawhna chu ka duh dan chiah a ni mahse, Layla tan thil hlauhawm a ni tlata chuvang ania helai hmunah hian lungdam lo taka ka lo nghahreng ṭhin ni. Mahse, tun ṭum chu a lo kal lo anih chuan Houston chu ka thlen mai a ngai dawn a ni.

Sana ka en a, darkar 4 zet a la awm a lawm ti rilru chungin ṭhuthmun ka rem ṭha leh a, reilo teah khua a rawn dura, vanah chuan chhum dum a rawn invial tup tup a, ruah mal lianpui pui a rawn tla zuiin khua lah chu a dur thim nghal khup mai bawk. 

Kawngkhar leh tukverh kharin midang awmve ho chu an ri le lu a, pawn lam chu ka thlira thli a tleh tel tlat mai chuan rilru a ti buai viau a ni. Ka nu ka bia a Dallas lamah chuan khua a ṭha a, zanriah eitur a an chhuah dawn thu a sawi a, a bak chu ka vel thawm a rin em vangin a ṭawng ka hre hleitheilo.

Darkar 1 dawn thli a tleh hnu chuan a reh ve ta hrama, ruah erawh a la tla tam nangiang mai. Layla chu ka ngaihtuah hle a, Centerville lampana a lo inkhalh vel mek anih chuan kawnglaka Accident a tawh palh mai te pawh hlauh thawnawm tak a ni. Khualzin awm ve dang te chu an zinkawng zawh turin an kalchhuak phak phak a, kal ve nghal mai tur em mawni tiin ka ngaihtuah a.

Darkar hnih dang a liama khua pawh a thimfel der tawh "Zande, kan hnenah zanriah ei ang che, Billy pawn a nghakhlel tawh khawp che a nia" Millie  chuan a lo ti sawk sawk, an ni pawh chuan haw zai an rel mek a.

"A...zanin chu Hotel ah ka thleng rih anga, naktukah Billy chu ka rawn hmu dawn nia" ka lo ti mai a. "Chuti tur em ni, anih chuan Centerville thleng chu kan rualin i kal ang chu ti raw?" a zawhna ka chhan loh vang chuan min en chîk ngang mai.

"Vawin hi July ni 4 em ni?" a ti khauh a, "Aw" ka lo tih rualin thawk a la hak a, July ni 4 chu ka tan a awmzia a hrechiang viau a ni. "Anih chuan ka phone number la la, tlai deuh tawh mahse, min lo pan dawn nia, Leeno eitur la awm ang ang kha i Uncle tan hian han Pack sak rawh" tiin a fanu chu a au zui a.

Dawr an khar fel hnu chuan ka motor ah ka ṭhulut a, ka Denim jacket huh chu hlipin AC ka on a, zial zuk tuma ka intiang uaih laichuan ka phone a lo ri a, a ri reilo kher mai. Ka call leta a tlang theilo zui mai bawk a, thil ṭhalo a thleng anih ka ring hmiah.

Hmanhmawh takin Houston lampan chuan ka inkhalh chhuaka Centerville ka tlan pelh laichuan rilruah nunhlui a rawn lang zut zut mai, engkim hi ka tan a vawikhatna a nilo, hetiang hun te phei hi chu kum 18 ka nihlai khan ka tawng ngun lutuk tlat a ni. Tunah kum 40 ka tling dawn ruai tawh a, ui mei a ngil ngailo tih zawng zawng kan nei zo a ni ber.

20 years ago.

ODESSA, TEXSAS

"Keini hi Permian panther kan ni, sawng San Antonio marshall  zawng hmelchhe ho saw kan nuai chimit vek ang" Captain in a tih rualin kan ban chunglamah pharin ka au a, kan ṭan hmun tur ṭeuh lam kan pan zuiin rilru ṭawngṭaina nen tak meuh mahni awmhmun ṭeuhah chuan kan inring ta ran a.

Football final ka khelh tawh a zawnga hautak ber a ni, Quarterback ka ni a, ka teammate ten ka lakah beisei an nei sang hle bawk, kan tumpui Marshall ho nen chuan Point 4 chiahin kan inthlau a min lehthal nan hun a la tam lutuk, chaklo thei kan nilo, ka tan a pawimawh lutuk tlat   ni.

Kan piah veilam Cheerleading squad zing aṭanga ban min lo vai lauh lauh tu chu ka va en a, ani sawn he state championship a  chakna kan chang a nih chuan pasalah min neih a intiam a ni.

Inkhel kan ṭan a, Marshall ho chu inbuatsaihna an nei ṭha tawk tih a lang chiang leh ngang mai, kan team chuan Austin hills nen kan intum ṭumin player hliam kan nei nuala, kan player ṭha ṭha hliam vangin an khel theilo a; A list player ngat phei chu 3 chiah kan awm a ni, tuna kan tum mek Marshall ho hi chu Team tenau Midland ang mai maia zuam chi lah an ni heklo. 

Kan in nawr tawk hle a, mipui thawm pawh a ṭha ngang mai, player te hming lam rual ṭhat ṭhata Odessa Permian Cherious te au ri chuan 'we are Marshall' tih thawm chu a hliah hneh hle bawk a, chutiang bawkin keini pawn hnehna kan chang ta a ni. 27- 14 in, kan beisei aia ṭha leh ropuiin.

Engkim ka duh zawng zawng chu pek ni ang hial ah ka in ngai, Trophy ka la a, chumi rualin ka hmeichhe hmangaih ber nupui ka nei dawn bawk, kum 18 mi thinlungah hian a bak hlimna dawn belh leh tur chuang a awmlo.

"Hallway ah ka rawn hmu ang che" a hmuiah fawp vawng vawngin ka kalsan a, Cheerleading Squad ho chu field chhungah an lut ve thung a, mipa awmkhawm chu kan thawm a ṭha viau mai, "Zanriah ka tum ang" Coach in a tih chuan phur ang tak chuan kut kan lo beng a, zanin angah te hi chuan party kan duh zawk vek a ni. Coach kianga zanriah kil chu a tu amah chak kan awmlo, hun hman dan tur ruahhmanna lah kan nei sa diam tawh.

"I propose dawn ta em?" Hector-an a rawn tih chuan ka lo bu nghat a, ka lockera zungbun ka dah chu ka en leh rih a, Lunghlu man to tak leina ka neilo a, hei hi  alo pawm hram ka beisei. 

"A mit kha lunghlu em ni?"

"Ni e, a te mah mah em?" ka lo ti a.

"A ṭha tawk lutuk, i dinhmun aṭang chuan a ṭha mah mah a lawm" a lam ka hawi chu a inthiamlo leh deuh a "Ka sawi awmzia chu...." inthlahrung deuhin a ti zui a.

"I sawi dik a lawm" keiin ka lo ti ve thung.

"Enteh ṭhiana, Layla hian a phu bik lo che a nia, hmeichhe tam tak hel rawn Permian panther Quarterback i nih hi, hmeichhia te zawng duh duh thlang thei i nih laia amah chauh kum 3 chhunga i kawp hi a vannei zawk ka ti ngawt mai" ka darah min rawn kuahin min sawi nawk nawk a, "Inbual phawt teh ang" tiin min pawt zui a.

Ni e, Hector a sawi ang kha ka nih ve na laichen a awm, Permian school a mipa lar ber ka ni a, hmeichhe tam tak ngaihzawn rawn ka ni, ka tan erawh Layla chiah a awm thung, Layla chu hmeichhia ka hmuh tawh a zawnga nunnem leh hmelṭha ber mai a ni. 

Dallas aṭangin Odessa ah ka nutei hnenah ka awm a, Ani Houston aṭangin a chhungte kiangah kan ṭhenawm hnai maiah a rawn awm ve thung, a chenna Mansion  chu ka chenna aṭang chuan ropui takin a lang thei a, mihausa tak chhungkua aṭanga seilian a ni tih hairual a nilo. Chutih laiin kei ve thung chu Sport Scholarship vang chauha Permian shool a lut thei ka ni.

Ka nutei chuan Dol Mansion a cheng a nih  vang hrim hrim chuan a ngaina lo a, Layla thung hian ngainat a tum em em reng ṭhin "Amah te hi chu a fel renga, a chhungte hi ka ngaina lo" ka nutei chuan a ti mai zela, ka nu bulah pawh "Kan enkawl zo ve lo ang" a lo ti nghe nghe a.

Dallas lama ka chhungte chuan min duhpui ngang mai thung, kan thlalak ka thawn ni chuan min lo be nghal a "A hmelṭha hle mai, lo hruai haw vat teh" ka farnu Rosa in a  lo ti chul bawk a, ka nutei chauh chu lawmlo a ni ta ber a, a inthiamlo nge ni engmah phei chu a sawizui duh ta vak lo.

Locker room aṭanga kan chhuahlai chuan Stadium thawm chu ala ṭha ham ham viau mai a, Layla leh a ṭhiante rawn tlan lutin ka bul a rawn thlen rual chuan ka nghawngah min rawn uai chawta "Ka lawmpui che, i ti thei ta" ka biang leh hmuiah te min fawp mawlh mawlh a, "Zaninah ka lo lam ang che" ka tih laiin "Oak thing bulah dar 7 ah" a lo ti zat a, "Lutuk, ka rawn tlai lo ang" ka lo ti ve nghal a, kum 17 mi chauhin serious taka ngaihzawng a neih thu hi a chhungte a la hrilh duh loh laia inneihpuia lo sawm hi a fuh chiah angem ka hrethiam lo hle mai. 

"In chak chuan ka nei ang che" kha min ti ngei maia, nakin hun a sawina em mawni zawk dawn le?

Zan lam kalchhuah tuam  ka insiam lai chuan ka room kawngkhar bul aṭangin Nute Clara chuan min lo en reng a "I nuin i haw hun tur a lo zawt tawh che em, i hman hmawh hranloh chuan Tuckson ah kan kal dawn em ni?" tiin chawlh hun ka hman dan tur chu min zawt zui a. Tuckson ah chuan a pasal hlui leh a fapa Liam te an awma, nipui chawlh laihian tlawh turin  a kal ṭhin a ni.

"Ka hman ka ring chiahlo" dawhkana zungbun bawm melh zauh pah a ka tih chuan a lo pen lut rang kher mai. 

"Rilru fim tak puin i ngaihtuah em aw?" ka zungbun thlek vung vung chuan a ti a.

"Ngaihtuah e, Layla hi ka hmangaih a nupui nei turin 18 ka tling tawh bawk"

"Zander, i hma khua chiah ngaihtuah rawh, i ṭhian te chu  professional team tan khel turin contract an sign dawn chulam chu ngaihtuah zawk ta che" a sawilai chuan a biangah ka fawh sak zauh a "Ka ngaihtuah fel tawh, dar 10 ah ka lo haw ang" tiin a ṭawng leh hma chuan ka kalchhuak ta vat a.

Fapa mal Lozano thlah kal zela mipa awmchhun ka ni, inkhel tura duhthlanna siam chu ka tan Risk a sang lutuk, châk chu a chakawm teh meuh mai a ka tuina pawh a ni mahse, vawikhat chauh pawh duhthlang sual thei ka nilo. Dallas ah haw a ka chhungkua ka uap an ngai a, ka farnu te pasal neih tira ka nu hrisello tak chu ka enkawl angai bawk, loh theihlohin chutiang nun chu ka thlan a ngai a, ka ṭhiante anga hlawhtlinna um lo a nuam tih zawnga tlan thei ka ni velo.

Ka nundan tur chu ruahmanna tlem te ka nei a, a hmasa ber chu Layla neih a ni. Nupui ka nei anga eizawnna lam buaipui zuiin kan chhungkaw eizawnna ka nu dawr chu ka enkawl zui ang tiin thutlukna ka siam a, Layla ka hrilh pawn min pawmpui viau anih kha.

Dol Mansion leh ka chenna inkarah chuan Oak thing hmun a awm a, keimah zawkin ka nghak ang chu ka tih laiin min lo nghak leh veng veng tawh, a malpui khuh chang changin kawrfual a ha a, a sam uk khak mai chu a darah a uaithla siau mai bawk.  Ka lam hawiin a lo nui var var a, ka Bike hnunga a ṭhut hma chuan duhthawh zetin ka han fawp hmasa a a rimtui leh nu chek mai chuan min zem chiai chiai a, zanin tehreng chu tumsa ka neih lawk vang nge zan dang zawng aiin ka hmangaih zualin a nia ka hriat ni.

"Haw har lo ila, midang kianga awm aichuan kan pahnihin a fala awm ka duh zawk a" a ṭawng zawnga a biangsum khuar sek sek ṭhin hi ka en kham theilo. "Tehreng mai" a lawn theih turin ka Bike chu ka lo ti awn a, a rawn ṭhutfel rualin ka kawngah min kuah thlap a, ka hnungah a rawn bei thlam bawk a, a kutṭang sei sang maia ka dul a thai riak riak chu nuihsukin ka tlan chhuak zui ve mai bawk.

Ibiza beach club kan thlen chuan Hector leh midang ho chu pawnah an lo awm ṭhap a, intihbuaina a thleng niawm tak a ni "Zanin chu hetah a tihchi dawn tlat loh fianrial hmun kan zawn mai a ngai dawn a ni" Hector chuan a lo ti zung zung a. "South lake lam a him ang, midang kha lo hruai rawh" ka tih chuan "I proposal tur kha?" a lo ti khauh a.

"Theihnghilh rawh, ice cream a zungbun dah tih vel kha ka duhzawng a nilo, amah a awm chuan a tawk" ka lo ti maia, Romantic deuh taka thil han tih vel kha ṭul ka ti hran lo, kan inhmangaihna a pun phah sawt dawn tihna a ni chuang lo a, ka duhdan phei chuan tumah midang awm ve lohlaia ka room ah emaw propose mai kha keichuan ka duh.

"Room i hauh sa tawh em?"

"Dar sawm hmaa ka dah let leh angai" ka lo ti hluk a. "Anih chuan hun thawl inneih theihnan i haw hma angai dawn tihna a nih chu" a lawm vaklo tih chu a aw ah a lang thei. 

"Ka lo let leh dawn a lawm" ka tih takah chuan a phur veleh ta deuh a, hmeichhe dangho kianga Layla nui lai chu ka va thlek a, ka jacket iptea ka zungbun dah chu rilruin a hre rauh rauh a, ka zam riau mai ka ti. South lake lampana kan inphurh chhuah leh laichuan thla a eng hle a kawngpui leh ral hla taka tlang te chu a lang mawi em em bawk a, rilruin Romantic lam a hawi ve lo theilo. Ni e, zan thla eng hnuaiah he nula hmelṭha eltiang hi nupui a tan ka sawm dawn, kei leh ka zungbun tlawm te hi min hnar loh hram ka beisei.

South lake kan thlen chuan meipui kan chhep hluah a, kan ṭhahnem ang reng viau mai, sana ka en chuan dar 8 a pel fel der tawh a, kan haw leh na tur ngaihtuahin hun ka nei tlem hle a ni, Hector an tihdan tur ṭha ni a a hriat chu min hrilh mawlh mawlh a, a sawi a piang chu "Aih" tiin ka lo chhang zel a, midang hmuh laia sawm mawlh mai chu ka hreh ta ber niin ka hria.

Layla leh a ṭhiante kan lampana a lo kal laichuan an lampanin ka pen phei mawp mawp a, engthil emaw sawi tuma a lo ang zuau chu lo khapin a hma ah chuan ka ṭhingṭhi ta ringawt mai a, ka zunbun chu ka phawrh a, a hmelah chuan mak tihna a langlo, zungbun a enlo a keimah ngawt chu min en a, ka mitah chiang taka min enin min seih a, "Layla, min nei ta che, ka damchhungin ṭha takin ka enkawl ang che?" ti a ngenngawl taka ka sawmna chu minute tlem te pawh ngaihtuah hauhloin chhanna min pe a ni.

A kut min rawn pe a, rangtakin keiin ka lo bun tira, midang awm ve ho chu an ri le lu a, min lawmpui thu min hrilh sap sap hlawma, engtia hma han lak zui zel tur nge tih hrelo mahila thawk khat chu a veng ta huai mai, kan tih tur hmasa ber ni a ka hriat chu kan chhungte inhmelhriat tir a ni, ka chhungte lamah chuan harsatna a awmlo tih chu chiangsa ah ka ngai a, chu vangin a chhungte hmuh hmasak phawt chu ṭhain ka hre bawk.

Dol Mansion ah ka va thlah leh hma chuan engemaw chen chu ka room ah hun kan hmang dun a, dar 10 dawnah Mansion ah chuan ka dah a, Oak thing hmun thleng bak kal min phalsak ngailo, a la in peihlo nihmiang ka ti maia eng he hu ah ka ngai biklo a mahse, hetianga inneih rilru te kan pu ve ta anih chuan hei aia thui thlen hi chu hun ve thawkhat viauin ka hria.

"Graduation day kan hman zawh ah Dallas ah hruai che ka duh ang" ti a ka sawi chu a phur kher mai. "Ka nghakhlel tawh hle mai, Rosa pawh hmuh ka chak a ni" ka kawnga min kuah sauh sauh pahin a ti a. "Anih kei ve hi le, engtikah nge i chhungte min hmelhriat tir ve ang?" ka ti a.

"An buai thei lutuka ka tan hun an neih theih veleh ah zanriah i lo ei dawn nia" ka awma bei hlan chung chuan a lo ti a, "Layla i nu leh pa tak tak te ania ka tih" ka ti ve tlat a, Dol mansion a cheng ho chu ka ral hriat ve fur a, pitar leh putar bakah nula upa lam deuh chauh an ni, Layla hian a chhungte chungchang ka hnenah a sawi ngailo a, keilahin ka zawt ngai heklo, a mimal nun chungchangah hian ka inrawlh ngailo tluk a ni.

"Engtikah nge Houston ah i let ang?"

"Kan graduate hunah kan innei dawn nia" min pawm ngheh sauh pahin a ti a, "I nu leh pa te pawh...." ka sawi laimek chuan dak vahin min lo en a "Houston ah ka kir thei rih lo a, kan inneih zawh hunah an ni chu kan hrilh mai anga, pawi i tih loh chuan an hriat ve kher ka duh lo a" a ti mauh mai a, ka lo beisei dan nen a in persan em vang chuan ka hamhaih lek lek bawk.

Keichuan a nu leh pa hnenah hawihhawm takin nupuia neih ka dil anga, ṭha taka chhungkua inrema inneih ka lo ngaihtuah a, chutianga rawtna a siam chu ka duhdan ni lo. "Houston ah kan pahnihin ka kal ang, kan graduate hunah" ka ti nawn leh ngat a, ngawirengin min kuah leh mai a, min hnial zuiloh vang chuan a pawm nihmiang ka ti mai.

Thla hnih hnuah kan graduate a, ka nu damloh vangin hmanhmawh takin Dallas ah ka let a, ani Odessa ah a la cham thung. Let leh vat ka inbeisei laiin ka nu chu a damṭha thei ta mailo a, thla ruk zet chu ka cham ta ang tih ah Layla chuan Houstona a kir tur thu min lo hrilh a, chutih laichuan Dallas Cowboys team a khel turin ka inziak lut a, Austine ah inkhel tura ka  inbuatsaih lai mek a ni.

Austine aṭang chuan Houston chu hnaite darkar 2 leh tlem tlan chauh a ni a, Layla chhungte hmuhna remchang tak niin ka hria. Chutiang tur chuan ka inbuatsaih a, ani pawh ka hrilhlawk nghe nghe.

"Austine ah chuan ka lo kal anga, inkhel chu kan lo en ang, ka unau te pawn hmuh che an duh a" tiin min lo chhanga, Houston a inhmuh lam reng a sawilo.

Austine kan thlen tukah min hmu turin kan thlenna Hotel ah  a lo kal ta ngei a, amah chauhin a ni thung. "Midangin min zui chuan hunthawl kan neih loh ka hlau a" a ti mai a, kan inhmuh loh rei avangin hun kan am dun hle a,  amah a a lo kal chu kawng lehlamah zawng takin pawi ka ti tehchiamlo a a chhungte hmuh ka tum ta lo tihna phei chu a nilo.

Ni thum Austine ah kan cham a, Houstona zui ka tum thu ka sawi chuan "Ka nu leh pa an zina kar leh ah an lo haw ang, chutah chuan i lo hmu dawn nia" a tih vangin ngaihṭha takin keipawn ka let san a mahse, thla khat dawn a liam hnuah pawh Houstona kal tura sawmna a hnen aṭang chuan ka la dawnglo a, ka ngaih a ṭha zan tawhlo, a rilru a thlak a nih te ka ring rum rum tawh. 

Ka nu chuan "I nawr lutuk chuan i ti chi ai mai mai ang, kum 17 chauh a la ni a, inneihna hi hmeichhe tan chuan khawvel inthlak hlawkna a ni a, zawldawh takin nghak hram hram rawh" a ti a, chuvang chauh chuan ka la insum thei hram hram a ni.

Centerville ah ka tetlai ṭhianṭha tak mai Billy Burton a awm a, Houston hnen a inhnaih em vangin tlawh ka rilruk a, Layla hmuh theihna remchang tak pawh a nih ka ring.

Layla hnen aṭangin engmah chhanna ka dawng lo a, centerville ka thlen hnu ah pawh a chanchin engmah ka hre zuilo, kar khat zet chu ka ngaichanga, engemaw harsatna a nei anih ringin Houston a va hmuh mai chu ṭhain ka hre ta, Billy leh a pa chu mamawh lamturin inrinni ah Houston ah an kal ziah ṭhina, zui ve mai chu ka tan a remchang hle bawk.

"Ṭhian ka nei a lawm, i bialnu chu kan zawng chhuak thei mai ang" phur takin Billy chuan alo ti hlauh a, inrinni hmasa berah Houston panin kan chhuak a, kan thlen chuan zingkar hma tak ala ni.

Randall tih hmingpu sangha manna lawng nei hi kan va hmu a, Billy pa Pu Coltona mamawh lam chhungin Randall chu Layla te chenna hmuna min hruai turin Billy nen chuan kan lo sawm ve thung.

Layla chanchin ka hriat ang ang chu ka hrilh a, Lalyla sawi danin Houston khaw chhimlam daiah Lilacs cottage ah a ni a, Lilacs par a vul chikchek tiin min hrilh bawk. Hriat a har khawp mai, Randall chuan chhimlam daifemah chuan Mansion tam tak a awm a, mi hausa ho intawllenna  hmun niin a sawi a "Va arkhawthimdai ngawt aichuan nula chu zawt chiang leh zawk teh" tiin min lo rawn a, a hriat loh a  Houston ka thleng ta ro ro chu ṭhawn thut keiin ka lo duh ve thung.

"Enge a hming i tih khah, a hming aṭangin hriat a awlsam ang?" Billy chuan a han ti a. Layla hmingpum ka sawi chu Randall chuan phawk lek leka min en in "Gambino a?" a lo ti he haw a.

"Aw, Layla hming chu Layla Gambino a nia, a hming aṭangin i hre thei a ngem?" ka lo ti ve thuaia.

"Apa chu Karlo Gambino a ni em?"

"Ka hre hauhlo, i hriat zawng a ni em ni?" Randall aimah chuan ka bangbo zawk a ni.

"Ka hre deuh" tihzawngin min chhanga. 

"Tunge Karlo Gambino chu ni a?" Billy chuan a lo ti veleh a. "Mafia ania, Italian mi helaia awm hmun khuara in bengbel ta a nia, i sawi chu Gambino dang an nih ka ring" min en vung vung chungin Randall chuan a ti leh a, ngaihdan ka neih thiamloh lamtak a ni.

"Anih leh Karlo Gambino nupui chu Isabella civello a ni em?" ka ti leh a, Layla note bu ah ka hmu tawh a ka nu tiin min hrilh nghe nghe anih kha.

"Civello a?" a hma aiin mak a tih hmel zawk. 

"I hre ngai em?"

"Isabella chu ka hrelo mahse, Civello chu ka hria" engmah a hre chianglo a han zawh zui zel theih pawh a nilo. Chaw chhun eihunah chuan lawngpu dang an lo thlenga, Randall chuan a zawt kual hlawm a ni maithei, lawnga a lo let leh chuan thu thar a rawn nei ta a "Lilac cottage chu Gambino chhungkaw ta niloin Civello chhungkaw ta zawk a nia" a rawn ti ta a, ka lo thaw huai mai.

"Nau-a va kal hnai lo la ka duhpui che a nia" a ti zui leh mai a, a chhan ka lo zawt ve vat a. "Civello leh Gambino tih ang reng a nia i mi rawn sawi hi, italian mafia henglai mi ten an ṭih em em an nia, Civello chu ka hrelo a Gambino erawh dan palzut chhungkua an ni, chuvangin hnaih lo la ka duhpui che keichuan mahse, i duh ṭalh chuan Gilman sawn a kawhhmuh thei ang che" tiin a ṭhianpa pawn a awm chu min kawhhmuh zui a.

Hepa thilsawi hi rindan ka thiamlo, nichin lawk khan Civello chu ka hria a ti kha a nia, tunah ka hrelo a ti leh si a, engemaw a awmzia ni dawn le!

(End of chapter -1)

(Mafia romance te ka han ti ve thawr anga, he story hi Short story tur ang chauh a ka tih a nia, a plot hi ka ui leh deuh si a, aite chhin nan ti ang aw tlemin ka rawn pawt fan deuh a ni e, Mafia story inhriat ṭhin nen khan a danglam deuh dawn a, aaa...hei chu Violette story mafia romance nih dan reng ah lo ngai ve leh tawp mai rawh u aw.)