HELLO LOVE, GOODBYE - by Ahmangaihi violette khiangte
CHAPTER - 6
"Enge kha thil kha a awmzia ni a, Zeus nen khan ṭhian in ni ah ka lo ngai a?" Diana chuan a ti, kei aimah chuan Eva chu chhuah chhal a ang zawk mah. "An ni a lawm" Eva chuan a lo ti sam et a.
"Ṭhian chiah chu an nih loh kha mawle!" Diana chuan a ti leh a, "Ka sawi ang kha a ni mai" Eva chuan a lo ti ve leh vat a. "Ka awm ve ania" ka lo ti hluai a, ka awmve lo ang maia ka chungchang an sawi chu ka ngaitheilo, Jaiden lah a ding ngawi renga, min rawn melh leh zeuh ṭhin bawk nen a tu a te pawh chuan awm an tinuamlo zo a, inah haw a ka khumah mut veng veng ka duh tawh, anih loh pawhin Attic ah fianral hun neih ka duh, tunah tak hi chuan mahni chauh a awmfal ka mamawh rih a ni.
"Joshie, Zeus nen in inkar ka hriatloh vang a nia, Eva bulah Jaiden hi hmelhriat tir che ka duh thu ka lo sawi ve ringawt a" inthlahrun hmel takin Diana chuan a ti a, "An inkawp tawh hleinem, nilawm ni?" Eva chuan a lo ti leh hman hmawh a, "Nia, inhmuh ang kha a ni mai" dar chhin ak in Diana chu ka en a, Jaiden-a lo nui ri suk lam chu ka hawi nghal thuai bawk.
"Inthlahrung duh mahta che, zanin ka hmu che hi ka lawm viau a nia mahse, i bialpa kha i va biak vat a ṭha zawkin ka hria, mipa hi chuan kan sa hauh hi kan pe na ṭhin ania, va kal rawh" nelawm taka tiin a jacket chu a ha ṭha zui mawlh mawlh a.
"Lo kal rawh" tih leh Eva chuan min kaih a rual a, inchhung lamah kan inzuilut a, enge maw a ngaihtuah ni, Beer no hnih rawn la lehin min pe a "Zeus chu a haw tawh a nih hi" ti sapin meinei zet chuan min melh a. "Haw ve tawh i la a ṭha ang" keiin ka lo tih chuan "Kan thleng ve chiah sia hmanhmawh lo zawk teh ang, in inah ka riak dawn tih ka nu hnenah ka sawi tawh a lawm" a beer sip zauh pahin a ti a, kan in en ren rawna, ka inngaitheilo dun hle tih chu kan mitmeng aṭang chuan kan inhre tawn ve ve in ka ring.
Diana leh jaiden ten min lo pawh leh hnu chuan midang ho titi na kiangah chuan kan ṭhu ngawiran a, ka hawi kual ngiala Zeus hmel chu hmuh tur a awmlo, lungawilo chungin a haw ta a ni ngei ang, a pawilo a awm ve lo chuan boruak a ti thaw veng huai zawk a lawm, awm sela chuan thil ni lo lo a thleng leh lo ang tih pawh a sawi theih hleinem mawle.
Ka bag khai chhung lam aṭanga ka phone nghawr dar dar ri ka hriat rualin ka bih vat a, Zeus a hming ka hmuh vang chuan chhang loin ka hum renga, Eva chu Mason-i nen an inbiak vangin min ngaihsak lo hlauh a, Zeus chu message ka thawn a "I hriat thiam ka beisei, ka tan thil ti harsa lo hram teh" ka va ti tawng a, reilo teah min lo chhang let a "In bia ang, pawnah lo chhuak teh" tih hi a lo thawn a, a la haw lo tawp mai.
"Mason-in riak khawm ang u a tia, kan thei dawn em?" min nghawk zauh pah a Eva in alo tih chuan ka phone chu Bag ah ka dah lut thuai a, "Ka riak chhuak theilo ang, ka nu in riah chhuah rem a ti lo a, i duh chuan riakla" ka lo ti awlsam mai a, ka tello a riah chu a duh bik der lo. Mason-i bulah chuan "Joshie nen riah dun kan lo tuma" a ti leh a, a ruk tak chuan riak sela haw san nghal mai ila ka ti rilru hle a, engmah phei chu ka sawi zui lo.
Ka phone chu a ri leh ṭhin a, a la kalsawn ta lo fo a nih hmel, chhuah lawka va biak tur em mawni aw ti a ka ngaihtuah laiin "Haw i la a ṭha ang, i nu in min lo ngaihtuah a nge?" Eva chuan a lo ti khauh a, ka hniallo nasa mai, Beer ka lem sek vang chuan ka lu pawh a rit ṭan lek lek tawh a ni.
"I lo chhuak dawn nge ka lo lut dawn?" Zeus a message en chung chuan ka inhumruh ṭeuh a, chhan let ngaihna pawh ka hrelo, Eva lah ka bulah a awm chawt a, min thlah fal duh der bawk silo a, kan awmdan chu a hahthlak lam mah a ni, min veng chawt ni berin ka hria.
Beer no khat ve ve kan tlak leh hnu chuan haw turin kan inzui chhuak dun ta a, pawnah chuan Zeus a hmel hmuh mai ka hlau ru hle a mahse, vanneihthlak takin kan hmu lo hlauh mai, garage ah chuan a bike a awm a, huan bul khawi emaw lai velah chuan amah chu a awm anih ka ring.
"Jaiden kha enge ang i tih?"tiin haw kawngah chuan min zawt khauh a, " A fel khawp mai mahse, ṭhian ang bak tur chuan tu mipa mah ngaihven thei ka nilo, Final exam turah ka rilru ka pek a ngai" pawn lam hawi vang vang paha a tih chuan "A ṭha a lawm" a lo ti zawi sap a.
A ṭawng tui tam ta vaklo a, kei lahin be tang e ka ti bik lo, in kan thlen chuan ka nuin min lo la nghak a, rei min lo ti tawh ngang a niang "Zan dangah chuan a chin chhunzawm chi loh ang" a lo ti kha kha a, Eva chu a lo riaka kan pahnihin ka room ah kan mu a, Home coming neih hun tur chungchang sawiin kan titi dun a, kan mengrei ang reng viau mai.
Zeus an min lo text leh ṭhin a "I haw a ni maw, in inah ka lo kal ang, kan inbiak a ngai" a la rawn ti tak deuh deuh a, biak ka duhlo bik a nilo, Eva awm lai kher anih vanga pehhel zawk ka ni a, chu chu hrethiam thei sela ka duh hle bawk.
"Pawnah ka awm lo chhuak lawk teh, kan chung chang hi sawidun kan ngai"
"Zeus, kan sawi tawh kha, haw phawt la naktukah kan inhmu zawk dawn nia" tiin ka la pehhel ta fo a.
"Joshie, in kawng khar bulah ka awm mek, minute sawm hnu a i lo chhuah loh chuan kawngkhar hi ka rawn kik dawn" a ti leh mauh mai, a ti duh tak tak dawn tih ka chiang ngang mai bawk a, ka ṭhiante pahnih luhlul leh mahni hmasial lutuk hian min va han tibuai hnehsawh tehreng em.
Eva lam ka va hawi chuan a lo mutui viau tawh, ka sawi deuh hlek a a muhil nghet hlauh a, remchangah lain ka tho chhuak nghal thuaia, inhnuai ka thlen chuan thawm ka ngaichang leh rih a, a reh ṭhap mai, dimtein kawngkharpui chu ka hawnga, Zeus nen kan inhma chhawn nghal zat bawk.
Lo pen luh mai a tum chu a awmah ka lo nam rawk a "Ka lo chhuak dawn" tih leh pawn lama nam chhuah chu ka rual a. "Hetah a la awm em ni?" a lo ti he haw a.
"A lo riak a lawm?" ka sawi rual chuan a lo phun zui hluk a. "A khawsa zia hi ka ngaihdan a ni hauhlo a nia, engtin emaw ka tih a ngai a nih chuan ka hreh hauhlo tih hre rawh joshie, ka tan ṭhian a nilo a, i tan pawh a nilo lehzual, a hmangaih hauhlo che tih hi i hmu thiamlo em ni?" a ti hluk hluk a, keiin ṭawng ringlo turin ka lo khap chul a.
"Min lo zui rawh" tiin ka nu pangpar huan lam chu ka pan a, ka room tukverh eng dul riai lam chu ka hawi chho vang vanga, chuta ṭanga hmuh phakloh tur chin pangpar bukin a hliah laiah chuan ka ṭhu hniam thuaia, ka bula Zeus a lo ṭhutrual chuan "Dawhtheihna tlem i mamawh a ni" ka lo ti hap a.
"Kha hmeichhe lakah khan ka dawhthei mah mah in ka hria" bung fe mai hian a lo ti duh lek a.
"Ka hria, ka thiamlo reng reng lo che mahse, Eva mizia chu i hriat tawh kha, a ti zualkai zawnga khawsak hi buaina pun lunna tur zawk a nih hi, reilo te i lo nghak ve thei mailo em ni, hetiang reng hi a ni bik nang" ngenngawl zeta ka tih chuan min en reng ringawt a, a pawm lemloh hmel hle bawk.
"Zeus, kan graduate zawh ah chuan nitin kan inhmuh a ngai tawhlo anga, kan tum lam ṭheuh kan pan tawh dawn a lawm, chutih hunah chuan keini pathum tan pawh thil a awlsam tawh zawk ang, tunah chuan nitin kan inhmu a, Eva tan pawh a hrehawm dawn em a sin" ka ti leh a.
"Chutiang chuan i sawi nghal mai theilo em ni, inṭhen ka duh i ti tawp a, kei aia Eva ringawt i ngaihtuah..." a hmui ka lo hup chawt a. "Chutiang a nilo, nang chu ka rin tawk vang che a lawm, Eva chuan intihhlum a tum tih kan hriat kha" a mitah en chungin ka ti leh a, ka ngenna aw ka chu a hrethiam ve ta a niang a bu nghat nghat a "Anih chuan inṭhen kha ka bulah sawi tawhlo ang che, ka pawm miahlo a nia" a lo ti ram hmuk a.
"Awle..Mahse, thuruk aw, Eva hmuh laichuan min haw tak angin awm la, inbiak loh hram hram kan tum dawn nia, keini pahnih inlaichinna vanga midang nunna in a tuar a nih chuan keimahni bawk hi a nia buai tur, ka ṭhianṭha ber a nia" ka sawilai chuan ka kut a hmer vawng vawng a, hrethiamlo tlat hmel chu a pu tawh biklo a, thawk khat chu a veng deuh.
"Anih hetiang hian engtia rei nge kan awm ngai ang?" ti a min zawhna chu chhan fak dan tur ka hrelo.
"Eva inpeih hma zawng chu a ni mai, rei tak chu a ngai biklo ang, kan graduate vat dawn a lawm" ka ti mai a, nitin inhmuh a ngaihloh hunah chuan tun ang reng hi chu kan ni biklo ang, Eva pawn ngaihzawng te a neih ve leh mai ka beisei a, chumi hma zawng chu Zeus nen kan inkar erawh kan thup a ngai dawn tihna a ni mai.
"I duh dan a nih tlat chuan ka hnial lo ang che" a ti zawi sup a, ka lawm teh e.
"Va haw tawh rawh" a bianga fawh sak zauh paha ka tih chuan a lamah min kuai herin a kut pahnih chuan ka biang a rawn khuap a, "Hetianga kan awm anih pawhin ka mit tikham tur zawngin mipa i hnaih tur a nilo, i lakah hian i rin aiin ka thikthu a chhia a nia" min vau awka zet hian a ti a. Zanin a Jaidena nena kan awmdun vang kha anih ka ring thiam mai.
"Chutiang a thleng lo ang" ka tih rual chuan ka hmui a rawn chhilh a, a duhthawh ngang mai bawk, a tawpnan ti ni awm hrima rei min fawh hnuah a inla hrang ve ta hram a, a hmel ka en leh chuan a lungawi hmel hliah hliah tawh. Ka kut chu la kangin a hmui a tawh tir leh vang vang a.
Hetiang khawpa mipa hmelṭha leh nula te ngaihzawn rawn hian kei ang ṭhat falna em em pawh nei velo, hmeichhe simple tak hi min duh tlat mai a, a mak tih lam aimah chuan a phu tawk ngaihsakna ka pe lo chung pawha min vuan tlat duh hi lawm viau tur ka ni zawk a sin mawle. Mahse, tunah hi chuan a harsa rih em a ni, nakinah hun ṭha tak kan la nei leh thei turah ngai mai teh ang.
Zeus nena kan inkar thup chu sawi ang ngawta awlsam a lo nilo, hlauthawng reng rengin ka hun ka hmang zo a ni ber, Eva chu ka bulah a awm chawt reng avangin Zeus chu ka be ngamlo a, ral aṭanga innuih emaw melh tak ngial pawh ka inthlahrung zo vek nia mawle, Eva chuan a lo ngai kawi a ngem, a huat tawk a lo tling a ngem tih mawlh chuan ka rilru a kap ṭun renga, min ti hahdam hleitheilo.
Ka nu chuan Zeus nena kan inkar chu min zawt fo a, pangngai taka thil a kal loh vang chuan a lakah ka lo zep ṭang ṭang thung mahse, Zeus chuan a nu leh a farnu a lo hrilh a chuta ṭang chuan ka nu chuan a lo hre veleh a, Eva chung chang thlenga ka sawi chhuah a ngaihphah ta a ni.
"Thil liantham tak a nih chu Bawihte, i rilru pawh a buai viau ang tih ka hria, ka hrethiam lutuk che a nia mahse, thutlukna siam fel manglo a hetia awm reng chu a van ṭha lo ve" min râwn chungin ka nu chuan a ti a. "Eva chuan intihhlumah min vau a, ngaihtuah chiang manglo a ti ka ni biklo a nia" kei in ka ti ve thung.
"Keiman ka lo be dawn em ni?"
"Tu maw i biak ang?" ka lo ti zat a.
"Ka hrelo le, amah emaw a chhungte a maw?" ka nu chuan a ti leh a.
"A tih chi loh ang nu, Zeus nen kan sawi dun tawh a lawm, kan inchingfel thei ang" ka ti mai a, ka nu chuan zawhna ngah tih hriat taka min en hnuah ka chal a rawn fawp a "Engthil pawh thleng se ka fanu hlimna chiah hi keichuan ka ngaihtuah" min nuih var var chungin a ti leh a, Zeus nen kan inkawp tak dan te chu eirawng bawl pahin min zawt siam siam a, Aunty Shanon-i nen chuan an lo sawiphur hlut a ni hmel a, College pawh kaldun turin min lo duh ni awm tak a ni.
"Mom, Zeus nena kan inkar hi hre miahlo angin awm ang che" tiin ka chah zui mawlh mawlh a, "Eva chu a ṭha veleh mai ang" a bulah chuan ka ti bawk.
Zirtawp tlaiah Zeus chuan inkhel en turin min sawm a, keiin Eva ka sawm thung, inhmu pha rengin kan ṭhu a, kan inmelh zauh zauh renga a rukin kan intext reng bawk a, a leh nawm phian mai. Eva thung chuan kan phuh phaka Zeus leh Nicholai te ṭhian ho ṭhu chu a hmu mawh hle a "Joshie a runluih vel che anih saw Jade saw i thik turin a lo hruai anih saw" ka beng bulah a rawn ti sar sar a, chutih laichuan Jade chu Zeus leh Nicholai te inkarah a ṭhu a, Zeus nen engemaw sawiin an inbekbawr mek bawk.
"Ka thik hleinem" Eva lam hawia ka tih chuan "Thik reng renh suh, keipawn engah mah ka ngailo, mipa lerh a nih saw" a ti leh hmak hmak a, Eva rilru hi hriat thiam harsa ka ti a ni, Zeus nen kan inkawp a duhloh chhan hi Zeus a duh vang nge a huat vang tih hriatthiam a har lam mah tawh.
Kan haw hnu chuan Zeus chu kan inah a lo kal a, Sandra nen kan pathumin Attic ah kan ṭhu ho a, zial zuk mai tuma ka lek uaih tawh chu min lo pawh thlaksak vut a "Enge i tih?" mak ti zeta ka lo tih laichuan amah zawk chuan a ṭan zui mawlh mawlh a, laksak ka tum chu a phal hauhlo lehnghal a.
Nui kar kar chungin Sandra chuan min chhuksan a, a kalliam ta maw tih ah Zeus chu min si chet a lo ṭhu hnaiin ka kawngah a rawn kuah a "Hetia kuah che hi ka chakna a rei tawh khawp mai" ti supin ka nghawng bulah a rawn thaw lum ham hama, a hmuiin ka taksa a rawn nawk rual chuam thawk ka lo la ve hak a, lungphu a ti rang nghal dup dup mai.
"Prom ah hruai che ka duh a, engtin nge ni dawn?" a zawhna chu changloin ka en ran ringawt, ka chak zia lah chu turu tak a ni 'mahse' tih a ngai leh pek a.
"Eva hi?"
"A ninawm" a lo ti hluk a.
"Midang i hruai mai a ngai dawn a ni" ka sawi zawh rualin a ner nang a, "Tu rualin nge i kal dawn?"tiin min zawt ve thung a.
"Ka lo la ngaihtuah ngai miahlo a mahse, Prom aṭanga kan haw hunah i tan hun chu insiam ka lo tum a" nui var var a ka tih chuan a nui ṭha ve duh mang lo, zep lo ah chuan Zeus nena prom kaldun chu ka duhthusam a ni, hun kan hriatreng tawh tur a nih vei nen Eva vanga a hranga kan kal a ngai chu ka haw ru kher mai.
"Eva nen chuan kal ula, mipa dang i kalpui ka remti miahlo a nia, chuan ka rualin i haw bawk ang" thu pe aw zet hian a ti leh hmuk a, hnial phal chi pawh a ni nang. Mahse, Eva laka chhuanlam han siam pawh chu a har leh dawn khawpin ka hria.
"Eva chuan kalpui tur a neih hram ka beisei" ka ti sap a, "Tih dan ka hre mai ang" nui suk chunga a lo tih leh chuan ka lo en haw a, "Engthil nge tih i tum?" ka lo tih chuan min chhang ṭha duh derlo "I hre mai ang" tih zawngin min chhanga, enge maw thil ṭha tak ngaihtuah nei chu a ang viau bawk.
Ni reilo teah Eva chuan Justin-an Prom kalpuia a sawm thu min hrilh ta mai a, Zeus a remruat a nih ka ring hmiah, "Engtin nge nang i nih dawn?" tiin min zawt zui a. "Ka hrelo le" ka ti mai a, Justin nen chuan han inkawp ṭha leh thei se ka ti ru kher mai, chu chu Zeus nen kan inkara a fihlim theihdan ṭha tak niin ka hria.
"Zeus Castillo chuan Jade a sawm ka ring, an in hnim hnai khawp mai" min melh ralh pahin a ti leh a.
"Ka hriatpui ve lo" ka lo ti leh mai a.
"Lungngai suh, i kalpui tur chu keiman ka lo ngaihtuah ang" phur fe in a ti zui zat a. Tu tu te emaw chu a lo be kual a ni ngei ang min sawm tu ka nei ta nawk a, mi pali zetin min sawm a, a tu a te mah chu 'aw' ka pawh lo. Zeus chuan hria sela a lawmlo leh khawp ang chu.
Mahse, beisei loh deuhin Zeus chuan Nicholai nena inthurual turin min lo ti a, ka duhlo dawn viau a Nicholai zawk chuan "Jade leh Zeus te an kal dun anga, Prom aṭanga kan kalhran hunah nang leh Zeus chu in duhna ah in kal thei ang" a lo ti a, Zeus a remruat bawk a ni, ka beisei ang aiin thil a kaltluang ta phian a, ka hahdam huai mai.
Eva bulah Nicholai nen kan kal dawn thu ka sawilai chuan min nuih kar kar a, "An thil tih dan hi i man thiam ve lo em ni, Nicholai chuan Jade nilo a nang a sawm zawk chhan che chu Zeus leh Jade te inkawp vang a nih chu, a thik a tan a hman ṭangkai a tum che anih chu, ring reng reng suh" a ti hlak hlak a.
"A pawi hleinem, Nicholaia bula kal chu ka hreh hranlo" ka lo ti ve nghat a.
"Kalpui chu a pawilo mahse, fimkhur viau rawh, Zeus castillo hi mi phakar a nih hi hmeichhe pakhata lungawi chi a nilo, nang leh Nicholai te a hmuh dun che u chuan a en liam mai mai dawnlo che u a nia" a ti kha kha a.
"Enge maw i ngaihtuah le Eva, Nicholai nen kan kal dawn a, Zeus leh Jade an kal dun dawn a, nang Justin nen, a ṭha tawk viau lo em ni?" ka tih chuan "Ṭha e, ka ngaihtuah vang che in ka sawi ve mai mai anih chu, keichuan tumah hi ka ring ve lo, nangmah chiah ka ring che, Nicholai chuan a hmang ṭangkai che anih pawhin Zeus chu hlat viau rawh, i lakah thikthu a rawn pe anih pawhin i lo inveng reng dawn nia" a mitmeng lian kal maia min en chung chuan a ti a, Nicholaian kei min kalpui a duh chhan chu Zeus a thikah a ti niin a ngai a nih hmel, a ngaihdanah chuan Nicholai leh nen kan inkawp emaw tiin Zeus chu a rawn inrawlh anga kei min rawn lak pen a tum dawn niin a ngai bawk.
'I lo suangtuah ve nasa hle mai maw, i beisei ang kha chu engmah a awm der silo a" ka lo ti rilru neuh neuh a, nuih te lam lam a za.
Nicholai nena kan kal dun tur chu ka nu a lawm vaklo a "Tlangval hawk lak mai mai hi zuilo la ka duh a sin, Zeus nen in kaldun turah ka lo ngaia, Shanon pawhin thlalak min lo thawn rawh a ti a, engtin nge ka lo chhan ang" a ti niah niah a, zan hun kan lo ruahman dan erawh hrilh chi a nilo, inhmuh fal kan tum tih hria sela chuan a phal leh dawn chuanglo a "A himlo, inah lo haw tlang rawh u" a ti leh ngei ang.
Tuilo viau chung chuan Prom a ka nalh loh a hlau leh em em lawi a, kawr pawh nidanga min leisak aia man to min leisak a, ka han ha chhin te chu kei aimah chuan a lo phur hmel zawk a ni. "Zeus chuan kalpui tur nula dang a nei em ni?" ti a ka nu zawhna chu chhan nuam tak zawng a nilo.
Nicholai chuan hma deuh ah min lo sawm a, kan chhuak tur chu "Lo haw har suh" tiin Nicholai bulah chuan ka haw hun tur dar zat a hrilh mawlh mawlh a, Eva nen a hmuna inhmu mai turin kan inhrilh bawk.
Kan thlen hnu reilo teah Eva leh Justin chu an lo thlenga, an inhmeh dun ngang mai, Eva hawi kual zak zak chuan zawn a nei tih ka hre thei, chutih lai mek chuan kawngkhar ah Jade a lo lang hlawla, a thawmhnaw chhing leh Sexy zet mai chuan a taksa chu a phuar mar nalhin mipa mitla tur hrim hrima duan ni mai awma mawi a ni.
Zeus an a rawn zui a, Jade kawngah kuahin a taksa ngheng chiala a lo kalpui chu ka thik ve rum rum mai, kei aimah chuan Eva chuan a thik zawk tih chu ka va hmu nghal mai bawk. Kan bul an lo thlen chuan ngun zetin Zeus chu ka lo en a, a suit pawl dak nalh zet mai te chu a inhmeh ngang mai, a lakah chuan hmeichhe ho mit a fu ṭhap a, nula nalh uchuak tak Jade nena an lo kal dun ngat phei chu Prom King leh Queen tur an ni ngei dawn tih hai theih rual a nilo, an inkawp chhan thil awmzia hrelawk vektu kei a tan tak pawh chuan thik loh theih a nilo, an inhmeh uchuak em bawk a ni.
"Zanin chu a ropui hle mai" Eva chuan a lo ti hlak a, "Ti rawh, ka dang a ro deuh tlat, thil va in teh ang" tiin Eva banah chuan ka pawt a, Justin leh Nicholai ten min lo zui nghal thuai bawk.
"I thik em?"
"Ka zawh tur zawk che niin ka hria?" ka lo ti sap a.
"Zep loh chuan thik e, saw hmeichhe tenawm zet saw pawh sawm vek mai ania ka chak ni" nui hak chungin a lo ti a, awm a ti nuamlo ru kher mai.
"Zeus a hmeichhe kawp a piang i haw dawn em ni?"
"Joshie nang ka huat loh che hi, Zeus ka duh hi keimah hi ka inhaw zawk, i tan pawh ka duhlo a lawm enteh...inkawp pawh ni ula reilo teah i rilru a tina dawn tih ka hria, min ring rawh ani ang hi chu ka hrechiang lutuk" thu tak zetin a ti a, Jade leh Zeus te midang kianga an nui dun lai chu a en leh vang vanga, a laka ka thil zep hi han hre ngat sela chuan min va haw nasa dawn tehlul em.
Music an play ri dup dup a, Justin an Eva chu lamtual lamah a kai phei a, Eva pawn nuam a tih hmel viau mai, darkar chanve dawn hnu ah Nicholai nen chuan kan va zawm ve a, Jade leh Zeus lo inkai phei chu Nicholaia dar ngheng chung chuan ka lo en ran a, Zeus chuan min lo melh chiang hle bawk.
Eva lam ka hawi a ani chu Justin nen an lo la tui dun viau, "Kal ang le" Nicholai an a lo tih rual chuan ka hawi chhuak vat a, ding meuhin Zeus chuan kan piah aṭangin min lo en reng a, Nicholaian an lamah min kalpui nghal hlawk hlawk bawk a, Eva chu ka va melh leh zeta min hnungchhawn zawngin a ding hlauh a, Justin an a mitmeiin min lo tur ve mek bawk a, an inthurual ṭha hlawm kher mai.
"Lo kal rawh ka Bike ah" tih leh Zeus chuan min pawh a rual a, ka hniallo nasa mai, Jade hmel chu a lawm vaklo tih ka hmu thei thung.
Kan tlan chhuah hnu chuan Nicholaian hma a hruai a, keinin an hnungah kan zui a, "Jade kha Prom Queen nih a tum si a, a kal daih chuan a va chân nasa dawn ve" ka tih chuan Zeus chu a lo nui hawk a.
"Midang ngaihtuah suh, zanin chu kan ta aw" ka kut rawn banin a kawr chhungah a dah lut a, a dul phiar fat mai chu ka khawih chiang ngang mai. "Min kuah nghet rawh" a tih rual chuan ka kuah nghet sauh a, a lungawi a niang ka kut chu a rawn hum leh rauh rauh ṭhin.
Dil pakhat bulah kan dinga, Nicholai leh Jade nen kan pali chuan kan ṭhu ho a, an ni pathum chuan zu an in a, ngawirenga ṭhut tawp chu ka duh bikloh vangin Nicholai chu zial zuk tur ka dila, Zeus an min lo melh ralh chu ka hmulo der mai bawk.
Reilo teah an pahnih chuan an kalhrang ta daih a, Zeus nen chuan inkuah riala mu chungin van lam chu kan thlir dun a, a zu in vang nge ni a kut a hlei ṭan viau mai a. "An lo let leh ange" a kut chu ka lo man bet ṭung a, "An lo let lo ang" tih paha ka chunga rawn i beng kang uaihin ka kawr chu a hlim chho hrawk a, ka tan chet lak ve na hun a awm meuhlo, engtia min han sawngbawl tur nge tih chu hre tak a ni.
"Zeus" thawk ka lo la leh hak ṭhin. A kawr a phelh mawp mawp a, thla eng hnuaiah chuan a pian chu a lang nalh zual hle bawk.
"Hlau suh, ka tina dawn lo che a nia" nui suk chunga tih pahin ka kut chu a la kang a, a awm chu min zut tir riai riai a, ka dang a ro huam maiin ka hria, ka zam kher mai.
Min fawp a, duhthawh leh uar takin min zut kual ruai bawk, ka kawr a pelh lai te chuan a tihdan ang a piangin ka lo dawh a ni ber, hnar tumna lam reng ka rilru ah a langlo, engthil nge thleng zel tur chu hriat ka chak ve tlat tawh. Saruak ngalngata kan taksa a han intawh rual chuan ka hit mup mup maiin ka hria, ka vai riai mai a, Sexy zeta ka hming a lam ri leh tisa chakna sosang lutuk vanga thawk ka la leh hak ri bak chu thawm dang a awmlo.
A duhtawk a ngah meuh chuan ka chau chhe der mai, ka sirah lo muin min kuah nghet sauh sauh a, a lungawi hle tih a hmelah a lang thei a mahse, kei chu ka awm a nuam thei hauhlo, engthil emaw hian min mawlh a, min ti hrehawm ru ṭeuh a, ka hlau thawng ruai bawk.
Ka thawmthaw hak tuma ka ban chu "Hmanhmawh suh an lo la let dawn lo" a lo ti vat a, ngaihngamlo deuh chuan ka mu leh ren rawn a mahse, ka thei nganglo, tho chhuakin ka inha nghal thuai a, Zeus pawh chu muang changin a lo tho ve a, ka awmdan chu min en chik hle bawk.
"Tih dikloh ka nei em ni?" a lo ti khauh a.
"Nei ...lo e" ban charh a ka tih chuan mak a ti hmel lehzual. "I awmdanah kha chuan tih dikloh nei ka anga, sawi la" nelawm tak leh thu tak deuh hian a ti a. "Engmah a nilo" ka lo ti mai a, rilru bet manglo zet chuan kan in en renrawn a, "Ka hmangaih che Joshie" a tih leh takah chuan ka awm a nuam huai mai.
Nicholai a phone zui a, rei vaklo ah an lo lang ve leh mai a, an lo awm hnai reng tihna em mawni dawn le, ka zak ru kher mai. Mahse, Jade i landanah chuan min nuihzat thei bik chu an nih loh hmela, chu chuan tlemin ka awm a ti nuam deuh.
Kawngpui kan chhuak phei chu tumloh lutuk mai ka va hmuh vang chuan ka ding data, kan hma a kal te pahnih pawh an lo hawi let rang kher mai. "Chu nu mai mai chuh" Zeus chuan a lo ti hlak a, ka kawngah min rawn kuah zui hmiah mai bawk a, Eva hmel ka va en chuan kan inkar la hla viau mahse a lawmlo hmel chu hai theih rual a nilo.
"Hei ṭhiante u" Justin chuan a lo ti lauh a, hmanhmawh takin Nicholai chuan a pan phei bawk.
"Engtin nge hetah kan awm tih a hriat?" Zeus chu lawmlo fein ka melh a. "Jade-i niang" kawngpui lam hawi pah chuan a ti a, Nicholai pawh a ni zawk mai thei, a tu zawk zawk pawh nise min phatsan chiang hle a ni.
Kawngpui kan thlen rual chuan Eva chu ka lamah a rawn pen phei hlawk hlawk a "Eva..englo.." ka tih laimek chuan ka biang a ri nghal sawk a, a kutthlak a nain a benna chu a sa nghal hat hat a, chutah min ben leh mai a tum chu "A tawk" chang zeta tih pahin Zeus chuan a lo nam sawn dawrh a, a tlu ṭhelh nghe nghe.
"Zeus castillo...lo inrawlh ve suh" rak nghekin Eva chuan a lo ti a, a chet dan chu ka ngaihdan a ni em em tawh biklo, Zeus hi a bialpa a nilo a, ka chhuhsak a ni lo bawk a, hetianga a mitmei veng reng reng a ka awm hi a ṭul na ka hre tawh biklo, Eva hian a ti mah mah tawh a ni.
"Min tiam a ni lawm ni, hepa hi i thlah tur thu i sawi a ni lawm ni, min bum leh si a maw?" a rawn ti zui chiam a.
"Eva, i khawsak dan hi ka ning tawh ania, tinge hriat thiam i tum mailoh, ṭhianṭha ah tak tak min ngai anih chuan hriatthiam i tum ve tur zawk a nia sin" ka lo ti ve hlak a, a ner nasa kher mai.
"Ṭhianṭha te chu engtin nge i sawi ngam zawk a, min bum a, dawt min hrilh char char tu hi ṭhianṭha i ni bik em ni?" a au in a au a ni ringawt tawh.
"Khatianga ka tih mai loh chuan nangman min vau si a, kawng dang engmah min siam hleinem Eva" tihngaihna tak pawh ka hre tawhlo. A lo nui hak a, Zeus chuan a ngaithei lo viau a niang "Joshie nen hian inṭhen tumna kan neilo, buaina lo siam tawhlo zawk rawh" alo ti ve khauh a, Eva huat tawk a tling teh e.
"Thi ila pawi i ti miahlo anih hi Joshie, min hmangaih miahlo" thinrim vanga aw khur dar dar chung chuan a rawn ti leh a, hahthlak chuan a.
"Khatiang zawng khan vau tawh suh, midang nunah i inrawlh tam tawk tawh" Zeus bawk a ni.
"Min chhang rawh Joshie, kei nge he mi tenawmpa hi i thlan?" a rawn ti vin leh ṭhat a.
"Eva.."
"SAWI RAWH"
"Aṭha e, nang leh Zeus a lakah hian duhthlan hi ka duhdan a ni ngailo mahse, nangmah zawkin min nawr vang chauh a nih hi...."
"I thlan chu sawi vat mai rawh..." a aia ring mah chuan a lo ti leh nghek a, hrep chuan.
"Aw...Zeus ka thlang" ka aw chu a ring ṭha kher mai, ka insum thei tawh biklo, a mi ngaihdan hi inṭhianna ni tawh pawhin ka hrelo, engkim hi a diklo zo tawh.
"Huhh....Zeus castillo i thlang a maw?"
"Zeus hi ka hmangaih, ka ṭhen lo ang, khawngaihin hriatthiam i tum dawn nia" ka ti nawn leh a.
"Ka nunna aipawhin i tan a hlu zawk a maw?" seh chilh rapin a ti a, thip zetin kan inmelh ran bawk.
"Eva...nang ang thoin Zeus hi ka hmangaiha ka tan a hlu bawk, i hlimna ka duh vang ngawtin ani hi ka tina reng thei biklo, nang pawn min hmangaih tak tak anih chuan ka hlimna hi i ngai pawimawh ve tur a nia lawm" ka ti leh rih a.
"I hlimna bak ngaih pawimawh i neilo, enga tan mah min ngailo tu hi nun nuamin ka awm tir biklo ang che, ka thi anih chuan ka thisen mawh phurtu i ni ang tih hre rawh" ka lam panin a rawn pen nghal hlawk hlawk a, chu veleh ah Zeus chu ka hma ah a lo dinga, engthil nge maw tih a tum leh tak ni!
Nui hak chunga min kal pelin thlanglam phul awmna lam chu a pan a "Enge tih a tum a?" Nicholai an a lo tih chuan bangbo zetin Eva kal chu kan en ṭhap ringawt.
"Hmeichhe mawl lutuk a nih saw" Zeus-an a tih laiin "Khawngaihthlak zawk chuan" Jade chuan a lo ti ve hlak a.
Karei leh!
"Zeus va dang rawh" tih leh Zeus chu nam ka rual a, hman hmawh takin Zeus nen chuan phul ah chuan kan tlan phei a, "Engthil nge?" kan hnung lamah Justin an a lo ti chul bawk.
"Eva, ti suh, tah khan ding rawh" ti a ka au lawm lawm ri chu a ngai pawimawhlo nasa mai, lei dawhsan a ṭang chuan kan lam a lo hawi a, tlan hlawp hlawp chungin "Zeus, tui ah zuan thlak a tum a nia" ṭap pur chungin ka hma a Zeus a tlan chu ka au a. Thawm ka hriat leh rual chuan ka pen tawk chiang kher mai!
Eva!
Tui ri bur ri ka hriat kha!
Dil a Zeus a zuangthla ve nghal chu ka va hmu a, hmanhmawh takin ka tlan a, ka mittui luang chuan ka khawhmuh a ti fiahlo ruai tawh, ka thinphu a rang a, hlauhthawnna hlirin ka khat bawk.
(End of chapter - 6)
Comments
Post a Comment