ZUNZAM (PART - 2)

ZUNZAM - by Ahmangaihi violette khiangte

Part - 2

Famkima chu ka lainat reuh khawp mai, U kimkimi sawi danah mipa fel, zaidam leh pasalṭha tâwp a ni mahse, a nupui Rosy leh a nu Pi Nghaki te chu an inmil hleitheilo a, chuvang chuan an lo inti taurau ni awm tak a ni, Famkiman a nu a thlauhthla thei silo a, a nupui nen chuan an lo inṭhen phah ta a ni awm e.

"U Famkima nu pawh hi hrawn harsa chi mi khirh lutuk a ni hrim hrim a, Rosy te lah hmeichhe modern lutuk an lo ni ve bawk nen" U Kimkimi chuan a ti zui barh barh a, keichuan Famkima chiah ka lo ngaihtuah a, a rilru a na ngawtin ka ring, hman deuh a kan dawra an lo kal pawh khan a hmel kha a ngui nghiai a nih kha mawle.

"Pathlawi lungleng hnem tum kan awm lo turah ngai ang" Umawipuii a lo ti zauh pek a, "I ti awm anglo e a" ka lo ti ve hlak a. 

"Mimite a Number i duh chuan ka pe ang che, YMA group ah kan awm ho tak a lawm" a phone rawn phawrh pah a a tih chuan ka lo hnial a, "A...Ukimkim ka duh lo mai, mi nupa inkar buailaia lo inrawlh tum te chu, ka hmelhriat ṭha pawh a ni silo a" ka tih chuan Umawipuii zawk chu a lo nui hak a, "Ka nau hi chu a fel a nia, a reng rengah vawikhat nulat ve manah pathlawi lo deuh te pawh kan zawng ve phawt ang chu" tih pahin a darin min rawn nek talh talh a. Chutiang zawng kher a a sawi erawh ka helh deuh a, Famkima te chu a ṭha famkim ve em a sin.

Ukimkimi chu rei deuh a lo leng a, chawhma chhung zawng chu Prof.Famkima chungchang kan sawi ho a ni ber, veng khata awm an ni bawk a, a chanchin lah a hrehnem na ngiang mai. A sawidanah chuan a nupui nen pawh inngaizawng em em lo a chhungte sawirema in nei an lo ni awm e, Famkima chu mipa ṭawngtlem leh zakzum chi a ni a, a nupui Rosy erawh Professor mi ze letling thawk a ni thung. "Tu nge thu zawk tur pawh i ring thiam mai em Mimi?" tiin min zawt zui a. "Mipa zaidam tak leh damthluam chi a ni ang tih chu ka ring a.." tiin ka lo chhang ve.

"Mahse Rosy te pawh lehkhathiam an nia, mi hmuh ah pawh a pasal hi a zah der thiam a sin, a fing bawk a, bel chiang tak tak lo chuan an inkar hria an awmlo ang, a hmelṭha bawk sia mi hausa chhungkua aṭanga seilian a lo ni ve bawk nen mi zawng zawngin nupa inhmeh an tia, mize in ang lo deuh si hi an pawnlam landanah chuan an inhmeh thlup lawi a" a tih leh laichuan ka lo bu nghat nghat a, Prof nupui kha a hmelṭha ve bawk em a ni, tupawn inhmeh ti se ka demlo ang, kei ngeipawn inhmeh ka ti.

"Bia la, i kawm ve mai mai dawn a lawm, a lungleng te pawh i hnem ve a ni maia, va ngaizawng kherlo pawn ṭhianah a siam theih a lawm" Ukimkimi chuan a ti leh a, ka lo nui mai mai thung, kum kha leh chen kha ka lo vei tawh a, va biak te chu ka chak lutuk, ṭawngkam khat lek pawn min lo chhang sela ka lawm tawk leh em em ang mahse, enge maw hian min dal tlat a, ka hrelo le; ka zuamlo a ni ber ang chu.

Mipa ka duhthusam ka lo suangtuah ṭhin ang. Mahse, ka neih phak loh tur a ka ngaih ang kha ania, biak buai loh ka thlang zawk, ka inti  khawngaihthlak mai mai dawnin ka hria, ka huaisenna in a tlin lo. Chulo ah inchhungkhur buaina nasa tak a tawh laia lo va inrawlh ve chu thil ṭha pawh a nilo ang, ka rilru a thianghlim silo, ngaizawng rilru pu chung lehnghal phei chuan Ukimkimi thilsawi ang pawh chu ka ti theilo tawp ang.

In a kan haw hnuah Umawipuiin min chhaih leh zuk zuk ṭhin a, "Kimkimi pawh khan a star ṭhin a nia, i lo infuihpawrh tir a nge, hmeichhia in a va biak hmasak te kha a zahthlak teh a nia, bakah an inṭhen hlenlo ang fa an nei tawh lehnghala, karah fa an awm tawh chuan a buaithlak tawh  ṭhin a, pathlawi fa nei tawh aichuan tlangval ngei neih a ṭha zawk, buaina a awm lo a a hahdam thlak zawk bawk, mahni hrinloh naupang hmangaih te hi mi nazawngin kan theilo a nia" a ti sap sap a.

Pathlawi a nihna leh fa  aneih tawhna lamah phei chuan engmah a laka ka rilru a danglam lo a, a heti chung pawhin ka cho nganglo zawk a nia ka laizawnnu hi chuan hrilh chiam pawh ni ila ka rilru put hmang hi a hrethiam phakin ka ringlo.

Zanah chuan ka nu nen Mochi kan siam laiin Ukimkimi message a lo thleng a Professor famkima number chu min lo thawn tak tak hi a lo nia, a number ka hmuh ringawt pawhin engtin emaw riau hian ka awm a, ka thinphu te thlengin a rang thei!

Number chu ka save ve ta tho a, a whatsapp dp erawh ka hmu thei tlat lo. A last seen ka en sek a, a online khat hle a niang a last seen chu dar sarih ah a tang tlat a, dar sawmpakhat ka mut dawn thleng pawhin a danglam leh tawhlo.

Zinga ka en leh chuan '10 minutes ago' a lo inti kalh a, ka nui nghal var var mai, kan van online rual teuh em. Ka status ah '10 Minutes ago' ka ti ve nghal thawr a, UMawipuiin a lo la en hmasa ber zui.

Dawr ka thlen chuan "10 minutes ago chu enge?" a lo ti var a, ka sawi duhlo min hau palh ang. Nileng mai chuan a last seen ka check a ni ber, darkhat ah a online a, darhnih leh a chhanve ah leh dar li ah nen, ka hlimpui a sin aw, a thiltih ka hriatpui ve chhun kha a ni miau a.

Ukimkimin ka biak leh biakloh min lo zawt a "Ka ngam teuhlo" ka lo tih chuan min nuihzat hle ringawt, "Be mai mai rawh, enge a tih te zawt la, anih loh pawn 'In damṭha maw?' te va ti satliah mai mai la, a hre dawn chuang hleinem che" nui kar kar chunga a tih chuan "Ka zak e a, min lo reply lo ta se ka rilru a na dawn emai" nui chungin ka lo ti ve a. 

"Mimite, nanglo hmeichhe tam tak hian an be dawn tih ring tawp mai rawh, pa anih lai pawn a luck a tunah a pathlawi tawh lehnghal ania, a intatlut thiam thiam leh a zei zei a ni tawh mai, U Famkima te zawng nula han chhai hmasa chi a ni miahlo a nia aw bia la i inchhir lo zawk ang" a rawn tih leh chuan reilo te chhung chu ka rilru a buai ve hman a mahse, ka ṭhulh leh nghal thuai. 

Zirtawp zanah Umawipuii bialpa Usangzuala a lo lenga, ka nu leh pa te an mut tawh avangin keipawn mutsan tumin room lamah ka luhsan a, ka muhil dawn siar siar tih ah Umawipuii chu ka bulah lo muin min lo kuah nghal sawt sawt a "Mimite pasal ka neihsan dawn che" tiin a nui var var a.

"Nei daih rawh, keima pualin dawr saw ka nei anga ka hausa thur thur anga a nuam khawp ang" ka lo ti hlak a, zep loah chuan ka laizawnnu pasal neih chak lutuk hi ka lungawilo ṭhin, ka ngai ṭhin si a ka khua a lo har lawk em em zel, ani lah hian min ngai ve ngai hauhlo ni mai awm hian "Pasal ka neihsan dawn che" a ti thla zen zel mai a. Mahse, kum sawmthum a hnaih ve ruak tawh a neih hun tak a ni ve tawh bawk si.

"Palai a lo tir dawn a, ka nu leh pa ten an lo remti dawn chiang bawk sia, inbuatsaih ruk nghal a ngai ang" tiin a titi siam siam a  "Dawr pawisa lo hmang ru miah suh" ka ti leh hram a, chu lam erawh a enghelh ve vaklo "Engtik thla hi nge inneih nan ṭha ang aw, September emaw November vel hi ni sela a ṭha angem?" a ti leh a, ka chhang buai peih tawhlo.

Ukimkimi nen kan inbe zeuh zeuh a dawrah pawh a lo leng ve ta fo mai, kan awmdun tawh hi chuan Prof.Famkima chanchin ngawt kan sawi ṭhin a, Umawipuii thung chuan a ning ru riau tawh, be tur hian min ti ve ziah bawk si a Umawipuii chuan "Kawm tamlo teh, Kimkimi chu mi pa nupui neilai biak zuk zuk te a ching a nia, in lo inkai ve reu reu a nge" a ti kha kha zel a, ka va be buai hranlo bawk a ka nui liam mai zel thung.

Nikhat chu an rawn lang leh ta hlawl mai, a nu leh a fapa leh tlangval la naupang deuh pakhat nen dawhkan palina ah an ṭhu a, hmuh a nuam kher mai, a cher ve deuhin ka hria mahse, a la hmelṭha em em reng tho, hnathawk nula ho pawn an en duh viau a, an piah dawhkan pathumna a ṭhu nula ho pawn an melh hrek hrek tih ka va hmu thei, a phone a khawih rualin a online em tih ka lo en ve vat a, a online chiang bawk, tunge a biak ang aw?

Umawipuiin order ka va lak a phallo a, keipawn ka duh vaklo ka zak deuh titih tlat, engmah lah chu an hre ve der silo a, order kan lak hun nghaka a lo hawi chu counter aṭanga kan lo thlir deuh ṭhap min hmuh chuan a laih hmel ngang mai. A hrethiam a nih ka ring a keipawh chu ka lo lai ve em em ringawt mai a ni.

Ka laizawnnu lah chuan min tirh bo na ringawt a ngaihtuah a, enge maw a rilru ah awm le? Choka aṭanga ka chhuah leh laichuan an thil eizo chu eiman pe turin an lo phei ve mek a, hmanhmawh deuhin counter ah chuan ka lo ṭhu a, a wallet  phawrh lai chu ka lo nghak ran a, a hmel ka lo en reng laia a rawn hawi chu kan mit a intawng leh ta siah mai.

Ka lo nuih ringawt a, ani pawh a nui ve tho. "I eitui em?" ka lo ti pek a, ka ṭawngsual chu ka hre leh hnuhnawh a ka zak ram ram, 'in eitui em?' ti tur zawk ka ni a sin, a va pawi....

"Insiam tui khawp mai" tiin polite takin min chhang a, zah zelah "Ka pi nang i eitui em?" tiin a nu chu ka zawt leh ta ringawt. Mipa naupang a buaipui vangin pitar chuan min en lo a "Kan puar khawp mai, in thilsiam a tui bawk" a lo ti ve a, ka zah zualpui chu tlemin a zia. An kalchhuah hnu chuan thawk ka la hawk a, Prof bulah zawng thawk a chham thei mai dawn a lawm mawle!

Ka mumangah lah hian ka la hmu fo mai a; ani zet zawng ka vei tawp thei dawn lo niin a lang, mipa dang min be tute lakah hian rilru ka pe hleithei der bawk silo. Hetiang taka mipa vei hi ka la nei ngailo a,  ka ralkhat hmelhriat min hre ve hauhlo tu lakah hian engtin nge heti taka ka han luanliam theih zawk mai ni! Kan inhmuh ṭum khan eng angin nge minlo hmuh ve ang aw tih te nen lam ka ngaihtuah ṭhin, hmelṭha a tih zawng te han ni ve tal i la titen duhthu ka sam fo a, suangtuahna mai mai chauh chu a chauhthubarawh ṭhin ngei mai.

A chanchin ka hriat leh ah chuan a nupui hlui te khan bungrua an la fel ta a ni awm e, a hmeichhe lam chuan Prof chu indan a duh a nihloh chuan tiin an nawr a mahse, Prof chuan a lo hnar ni ngei tur a ni, a nu leh a nupui inkara duhthlan a ngai chu ka lo khawngaih hle a ka mumang ram thlengin ka lo hmuh zawm a, mumang ah pawh ka lo hnem ve nasa mai. Ngaihtuah let pawn nuihzatthlak zawk tak a ni, midang bula sawi chhuah chi pawh va ni suh.

Inrinni ṭum khat, an nufa ho a anlo kal hnu rei vaklo ah a ṭhianpa nen dawrah an lo kal a, chumi ṭum chuan ka lo awm lo a mahse, Umawipuiin a lo haw hnuah min hrilh a "Damlo a ang lutuk, a lang upa sawt bawk si" a ti a, ka lo rilru hahpui ve em em ringawt a, thildang ka ngaihtuah thei meuhlo.

Chawlhni ah Ukimkimin min lo text a "Mimite, vawin hi i forever crush birthday a nia, va wish ve hnap rawh, huat theih miahlo lai chance a nih hi" a lo ti a, a piancham a ni tih ka hria chu engtin emaw hian ka awm a, helhkham nei run hian ka awm a, ka rilru a insual buai hle ringawt.

Khumah ṭhuin ka phone chu ka hum rauh rauh a, ka wish ve ang nge ve lo ang tih ah chuan ka la inkhap buai hle, dar 9 a ri tawh a, a piancham a pel har tawh dawnlo, va wish ve ngei ka duh si a, ka zak bawk si, a tawp a tawpah chuan ka huaisenna zawng zawng sawm khawmin "Happy birthday" tih ka va thawn ta, mitchhing chungin a nia send button pawh ka hmeh ni.

A hmulo 'engtikah nge a hmuh ang aw' tih mawlh ka ngaihtuah leh ta. Dar kua, dar sawm, a la hmu chuanglo. Awi aw, keihi ka tifuh dawnlo in ka hria.

Dar sawmpakhat a ri ta; Tick pakhat chiah a la awm. Ka muhil thei silo a ka nghak chhuak dawnin ka inhre chuang bawk silo. Khumah chuan ka tal sek a, ka inlet tawn chhen mai bawk. A pawilo, ngaiawh a ni mai a lawm ka rilru chuan a ti ve taknain min mawlh reng mai bawk si. 

Ka phone chu lukham bulah dahin ka khum lu lam banga thlalak intar chu ka melh reng a, ka thin phu dup dup ri chu ka hre thei, a ring ṭha hle mai, ka thisen te hi a rawn so ta mai em mawni le, ka taksa chu a lum pup pup a, ka ṭah a chhuak ringawt lehnghal. 

Hei chu a ṭhalo hle mai, vawikhat mah ka text tawh tur a ni lo, keimah ka inti khawngaihthlak mai mai dawn tih kha ka inhre sa reng sia, tinge Ukimkimi thil sawi vanga ka lo phul ve hlut ni, ka ti leh tawh miahlo ang.

Mu turin ka insiam a, ka ṭawngṭai melh melh laichuan ka message tone a rawn ri ta ṭat mai a, ka phu dut lehnghal! Ka thinphu a rang nghal zaih zaih a mahse, ka ṭawngṭai laklawh si, thawk ka la hak a ka thil chham lai ka theihnghilh daih bawk.

Ka chil ka lem dak a, naa...nakinah ka ṭawngṭai ṭha leh mai dawn emaw ni le, 'Mimite Pathian hrem i duh loh chuan ṭawngṭai leh vat rawh' tiin keimah chu ka inhrilh a, a bula ṭangin hmanhmawh hlau tak si thinphu rang dat dat chungchuan ka ṭawngṭai ṭha leh a, ka ṭawngṭai zo ka meng chiah chu ka taksa pumpui hi a hit mum mum maiin ka hria.

Rang lutukin lukham chunga ka phone chu ka ban a, Message min thawntu hming ka hmu chu ka au chhuak ṭhawt mai, ka chhungte an mu tawh tih ka hre leh hnuhnawh sia Bathroom ah ka tlan lut nghal hlawk hlawk a, engvanga Bathroom a tlanlut ringawt nge ka nih pawh ka inhrelo.

"Ka lawm e" tih te zawng a ni, a message en chuan ka nui var var a, tun dinhmunah hian khawvela thumal pathum mawi ka tih ber a ni hial ang, tu te emaw 'I love you' tih thumal aipawn ka tan chuan a mawi daih zawk.

Reply tur nge hetia duhtawk mai tur hi ni ta ang le? Awi aw...heti hian a tâwp tawp mai a, Reply chu ka duh a mahse, engtin nge ka va reply ang, Umawipuii ka zawt ngam bawk silo.

'I van meng rei?' Âa....a ni theilo 'I hmang nuam em?' Â...zahthlak e a, 'I kum engzah nange?' Awi....a chiloh hulhual....huiha.

"You're welcome" ṭhen ṭha chungin Send button chu ka hmet a, Minutes 4 liamta chauh a last seen a la nih vangin ala cham rih tur ah ka ngai.

Bathroom chhuatah chuan kelawngin ka ding khawng renga, ka Message chu a rawn Double tick ta chiah mai, thinphu dep depin ka phone chu ka en ran tawh a, second tin chu ka rilru in a chhiar bawk.

A pawlta....typing a rawn inti zui bawk, Bathroom chhuat vawt zetah chuan ka ke chu ka per at at reng, a type rei phian mai a, keilah chu ka ha hmai a lang ṭha reng a, ka kutzungṭang pawn mission pawimawh tawpkhawk tih a hria a niang, Message lo thlen ruala hawn inpeih atin a lo inring ran tawh.

Message lo thleng chiah chu ka hawng rang teh e, hei baka rang chuan tuman an hawng bik lo tawp ang, a message chu "Ka van hre mai lo che ve?" tih a ni.

A nuam eeee.......

Mahse, engtin nge ni leh ta ang?

'Mimi. Saitluangpuii ka nia' va ti ringawt ta ila min lo zawt chiang si se la engtin nge ka chhan zui ang, ka va inpuang ringawt dawn a sin, ka insawi theilo ang.

A buaithlak eeeee....

Mipa ṭhenkhat ka lo biak tawh ṭhin te ang a uang mai mai a va chhan chi ni bawk silo, ka va insawi awk dawn tih a chiang bawk si, biak zawm chak biak dan tur awm silo; a van hrehawm ngar ngar tak.

Ka chhang ta lo, ka rilru chuan a chhang mawlh mawlh 'Keimah Mimi-i ka nia,  ngaisang em em tu che' tiin, hre pha se engtin tak min chhang ang maw.

Mut hmunah kan inbiakna tawi te chu ka chhiar nawn tluk tluk a, ka message zawh khan reilo te a online a tunah chuan a last seen leh ka tana a message type tlem te chauh hmuh tur a awm tawh. Prof. Famkiman ka tan message a han type ve ngei a nia, a va nuam tak!

(End of part - 2)

* He thawnthu hi 'Phuahchawp rawk rawk rawk thawnthu' ti a whatsapp group ah ka ziah mai mai kha a nia, post chhuah tum deuh a ziak ka nilo a, part hmasa lam phei kha chu a kal vut deuh vut vutin ka ring, ka ṭhianten a chhiar tlak e an tih ve tak si ah chuan tihian ka rawn dah chhuak a, in ṭhian te ka story chhiar ve ṭhin, he story chhiar tur duhsak te inneih chuan inlo kawhhmuh ve zel dawn nia, chuan ka ban tha a ka ti fuhlo deuh a tun ṭum chu a tawi ta deuh a ni e.)