ZUNZAM (PART - 12)

ZUNZAM - by Ahmangaihi violette khiangte 

Part - 12

UFamkima lo haw laichuan ka thawmhnaw sukfai ho chu ka lo thlep ṭha mek a, "I chau em?" tiin Sitting room a a lo lut phei chu ka lo be vat bawk.

"Ka khua a sik a, a vawt ka ti riau mai" tih pahin ṭhu khaw muanglo chuan room ah a lut tlang a, ka thawmhnaw thleh sa dah tura ka va luh laichuan khumah bawkkhup zawngin a lo mu a, a khawsik chu a na viau em mawni dawn ni?

"Damdawi i ei tawh em?" a hnungah chuan ka va beng dat dat a.

"Ei tawh e, min chhawk ṭan dawnin ka hria" zuai ruiha a tih laiin a pang chu ka lo dehsak a, a lo la sa vur tak tak a, amah lah chu a thlan hluam mai bawk. A bula ka va ṭhut rual chuan lo insiamrem sawt sawtin ka malchungah a lu a lo nghata, "Insuk ka la thlep zo lo a sin" ka tih pawh chuan ka kal mai a phal tlatlo, "La awm rih rawh" a ti deuh tlat a, Prof.Famkima pawh a damsamloh meuh chuan a lo pangchang ve ṭhin tho anih dawn hi a.

"Thingpui ka lum ang che aw" ka tih leh pawh chuan min chhangloin ka dulah a hmai a rawn nawr tlat a, a thaw lum ham ham bawk a, kei chu ka ṭhu ngil at reng ringawt tawh a, ka awmdan chu a hahdam lo kher mai chuti chung chuan rilru erawh a hlim ru veng veng thung.

"Inthlak la mu ṭha zawk la" lai ru deuha ka tih chuan a che zui ve mai bawk a. Ka awm lairenga a kawr a phelh vang chuan kei ka lo lai leh pek tawh a, hmanhmawh deuhin a thawmhnaw chu ka lo laksak zung zunga. 

"Chaw chu ei ve mai la ṭha tur"

"Engmah ka sawi lawk bawk silo, a buaithlak  rih emai" ka tih chuan ka banah rawn vuanin khumah bawk chuan min pawt ṭhu leh a, chutih laia Room kawngkhar inhawng thawmah chuan kan hawi rang khawp mai. Christa chu kawngka ah a lo dak dek dek a, a pa nena inkuah deuh titih a kan lo ṭhu min hmu chu ṭi dek hian min lo en a, han tal hran mai ka tum lah chuan pakhat zawk chuan min lo la chelhbet tlat bawk si.

"A zak a nih saw" ka beng bulah a rawn ti zawi sup a, "Bawiha lo kal ta che" a ti zui zat a, Christ a chu a lo lut hreh a niang kawngka ah chuan a ding reng a, a inthlahrung hmel chu ka khawngaih zawk ang reng. "A ril a ṭam a niang, thingpui ka va lum ange" ka tih takah chuan min thlah ve vat a. 

"Christ thingpui lum ang aw" ti a ka chhuak phei chu min lo zui ve mai bawk. Thingpui ka lum saka, eirawng ka bawl bawka, ka inpeih meuh chuan dar 5 a ri dawn thuak tawh, an pafa chauha han kalsan chu ka hreh deuh riau a, pa ber a damsam lo vei nen, Ufamkima  lah chuan ka haw tur chu min ui bet ngam chiah silo hian a ne ne kual reng a, "Ka thlah ang che" a ti thul. 

"Chhuak chi pawh i nih loh kha, chaw ei hma ula, mu lum leh vat zawk rawh" ka lo tihsan a, "Naktukah lo kal hma rawh aw" a ti leh hram a, ka haw tur chu Step bul thleng min lo zui chhuakin pawnah chuan kan han indinchilh leh ren rawn a. 

"I thlen hunah min lo hrilh dawn nia" a hmel ngui bur chu enin ka nuih var var a, damdawi ei tura kan inchah leh zet hnuah ka hawsan a, an pafa chuan ngaihtuahna an luah renga, an inenkawl thei ngut a nge maw? Rilru an ti nuamlo khawp mai.

Dawr ka thlen chuan Umawipuii chauh a lo awm tawh a, "I va tlai angreng ve, i phone tlang theih bawk siloh a, tlaiah khan i ṭhian pakhat a lo kal a, a nghak reng che a" a lo ti luam a.

"Tu ka ṭhian nge?" ka tih chuan "Tlangval chhelo deuh mai, a lehkha zirpui ṭhin ka nia a ti che a" a tih takah chuan rindan ka nei nghal a, engtin nge kan dawr te a lo hriat chat theih zawk le ka ti rilru a, a hming chauh kha ka hrilh a, a rei tawh angreng sia a hriat pawh ka ring tawh lemlo a nia.

"I Ex a ni maw?" a nui zui kar kar a, "A rei tawh lutuk, a hmel pawh ka hre tawhlo" ka lo ti liampuat a, kum 1 leh tih chauh la liam mahse, ka sawi ang tak takin Romawia hmel chu ka mitthla thiam mang tawhlo, ka vei zui loh zia chu chutah chuan a chiangin ka ring.

Haw kawngah chuan uang deuh deuhin min zawt a, keiin ka sawi ṭha duh manglo a, sawi vak tur pawh ka hrelo, Shillong a ka awmtirh thla reilo te chhung chauh a inkawp kha kan nia, a tu ve ve mah chuan kan inkar kha kan la thutak pawhin ka hrelo, kan inṭhen tirh khan ka chungah a lawmlo hle a, ka ngaihsak tawklo tiin a vui hle bawk anih kha.

In ka thlen hnuah Ufamkima chu ka Phone a, a lo la rang viau mai. "Chaw in ei dawn tawh em?" ka ti hmasa ber a.

"Bawihan a ei tawh a, keichu ka chak rihlo" a aw zuai ruih vang chuan a khua a la sik anih ka ring.

"Damdawi i ei dawn chuan tlem tal eirawh aw, pum ruak lutuka damdawi ei chu a ṭhalo a nia, inthuam lum la, mu hma daih rawh, hritlan chuan muttam tluk a awmlo a nia" ka ti ve luam a.

"I nau hi a muthilh loh chuan ka muhil thei mai bik lo ang" a ti leh a, a va buaithlak tak, Christa zan mengrei thei lutuk hi aw, hetiang tur tih hriata vawiin chhun khan lo muthilh tir loh tur a nia, an pafa chauhin an awm bawk si a, Ufamkima tak chu ka lainat, han buaipui thei ziazang ka ni bawk silo.

Zanriah eikhamah ka inbuala, ka inthlak laimekin Umawii ka room ah a lo lut a, "Mimite sawtah bungrua va Deliver lawk ila, i peih em?" thil min dil dawn leh min tirh duh hunah hi chuan a ṭawng nem thei diai diai ania.

"Khawiah maw, ka awm ana a ka chhuak peih vaklo a sin" 

"Kimkimi te inah, kan reilo ang" a ti leh zat a, a sumdawnna thil lam anih hmel e.

"Engin nge kan kal dawn, Taxi hman tur pawh a awm nang, zingah pe mai la" ka ti leh hram a, a zan a zana va dah kher pawh a ngai emaw ni ka ti deuh a.

"Zaninah a ngai alawm, naktuk zing sumo chhuaka thawn tur a nia, thingtlang lama kan Downline te ta tur a nia" chhang tawhloin ka insiam mawlh mawlh a, "Pa Hruaia Scooty kan hawh dawnnia" a lo ti leh zat a.

"A phal awmlo emai a, kein kan kal dawn nia, a hla chuang hleinem" ka tih chuan a phur hmel ta khawp mai, Pa Hruaia chu kan ṭhenawm pa a nia, mi uikawm lutuk tak mai a ni, Bike chu ka pa'n a nei ve a, mahse, keini pahnih tan chuan tih ngaihna chai a awmlo, ka pa pawn a khalh chhuak khat khawp mai.

Ka inthlak zawh hnu chuan muangchangin kein kan kal chhuaka, zanriah eihun bawr vel khan ruah a tlak leh sek vangin kawngpui chu a hnawng deuh viau a, Current a thim bawk nen tuitling dai palh ka hlau chu ka Phone ti engin fimkhur fe chuan ka kal den den a, Aumawii kalchak lutuk chu ka ngei lek lek zawk a ni.

Zarkawt kan thlen chuan Current a lo awm bik hlauh mai, Ufamkima te Building kan kal pel tur chu engemaw tih tak hian pen kawi ka chak tlat a, ka hma a Umawii kal vuk vuk chu auin ka ding ren rawn a. 

"Hetah hian ka lo peng rih ang, va kal la, i hman hunah min lo hrilh leh mai rawh" ka tih chuan a ner nasa mai a "Va han khawlo reuh tak" te chu min la ti zui a.

"Tih tur ka nei ve chuang hleinem" ka tih chuan a kal tau zui hmawk hmawk a, a thinrimna hi a ho thei ka ti ngawt mai, ṭha deuha min kaltir ve mai awm a nia, phallo lui tlat chuang silo hian awm nuamlo deuh hian min siam kher zel a.

Ufamkima ka Phone a a mu tawh nge mawni Phone a la thei lawklo a, ka Call ṭha leh a a vawihnihna ah chuan a rawn la ta hram a.

"I mu tawh a mi?"

"La mu lo e, Room ah ka phone ka lo dah daih a, nang zawk" a lo ti var a, "Hei ka u nen Ukimkimi te inah thil kan dah dawn a, i phal chuan ka lo pengkawi lawk ang, Gate pawnah ka awm mek a" ka tih chuan  "Lo awm rawh" a lo ti vat a, a thawm a ri zui sat sat a, rei vaklo ah Stepa a lo chhuk chu ka han hmu nghal a.

Gate a lo hawn hnu chuan kan han in en leh ren rawn a, chutah ka banah a rawn vuana. "Khawiah maw i kal?" Stepah chuan kan inzui chho a, kan inkai a ni ber ang chu.

"Umawipuii bungrua kan dah lawka"

"Tinge nangmah chauh?"

"Ukimkimi te inah a la awm a, a hman hunah min lo hrilh mai ang" inchhungah kan in zuilut a, a pang ka dehsak chuan a khawsik chu a awmtawhlo anih hmel e, Christ a pawh a lo la menga, mu chungin TV a lo la en dauh dauh mai.

"Chaw chu i ei em?" min chhang loin min rawn fawp nghal tawnga, min ti hamhaih zawk ang reng. Christ an min hmuh hlauin choka lamah chuan ka pawt phei ta ringawt a, chutah dawhkan ngheng chuan uluk fein min han fawp ṭha leh a, tunah zet chuan ka chhang let ve ta, infawh a zeilo ka tih kha chu ka lo hresual chhiava a ni, a zei rapthlak!

Ka inrin hmain dawhkanah chuan min hlang chho nawlh a, ka malah rawn vuanin min hnuk hnai hrat bawk a, a mitmengah chuan thu neitu zawk anih zia ka han hmu theiin ka hria. 

A nghawngah ka lo kuah let chiala, ani dawhkanah chuan inbengkhalh runin a lo kun hniam bawka, a hun leh hmunin a zir bawk aniang, ngawirengin kan am dun mial mial a, inla hranga ka han inen leh chu kan lung a awi duh kher a sin.

"Chaw chu tlem tal ei la, chaw ei ka siam sak ang che aw" a lo aw ve mai bawk a, chaw ei ka siam laichuan min lo pui a, min rawn kuah leh deuh thuak ṭhin a, min thlahlel ve tak zet aniang, keimah ngawt chu min en reng bawk a, a chaweina bulah chuan ṭhu ve turin min ti deuh tlat bawk.

Umawipuiin min lo phone a "Pizza kan siama i ei ve duh chuan lo phei rawh" a lo ti a, "Ka eichaklo, lo hmanhmawh duh suh" ka lo tih chuan a phone chu a dah zui hmak a, kei ka lo nui hak thung. Chumi hnu lawkah Message a lo thawn a "VIRGIN IN LO HAW LEH ANG CHE" tih hi hrawppuia Type ngatin min lo thawn a, leh ta mai mai chuan a.

"I u chu a hman tawh a mi?" 

"La hman lo e, a rei deuh dawn anih hmel" tiin ka lo nuih var var a.

"Engin nge in lo kal a?"

"Ke in" ka tih chuan min en rang viau mai.

A sana a bih zawk a "Zanah chuan fimkhur tur a sin, i u chu hrilh la, ka va thlah dawn che u nia" a tih chuan ka hniallo khawp mai.

Chaw a eikham hnu chuan Sitting room ah ka ṭhu phei a, Christa bulah ṭhuin ka va kuah hluna, room aṭanga Ufamkima lo chhuak chuan puanlum a lo la chhuaka  kan pathum chuan Sofa ah ṭhuin puan chu kan inzawn a, tuna kan awmdan chu ka duhthusam ang chiah kha a ni, chhungkua ang mai a lawm maw kan nih le, keiin Christa ka kuah laiin hnunglamah Ufamkiman duat zetin min lo kuah a, a awm ngheng ar ar a han ṭhut chu a hahdam thlakin a nuam veng veng mai a ni.

Darkar chanve vel hnuah Umawipuiin min lo phone a alo kal mek thu min lo hrilh a, Ufamkiman min thlah dawn ṭhu ka hrilh chuan a duh vaklo "A ṭul kher kherlo, chhungte bulah engtia sawi nge i tum?" a lo ti kha kha a, a zawhna chu chhang loin "Kawngpuiah lo awm rawh kan lo chhuk dawn" ka tihsan thunga, engmah a sawi leh hmain phone chu ka dah hmiah bawk a, lawmlo viau mahse, ke a haw aichuan a duh zawk ve thoin ka ring, chu loah intihtheih khum ve hlak pawh ka duh a lawm mawle.

Kan pathuma kan inzui thlak laichuan dawr bathlarah Umawii chuan phone a lo khawih mual mual a, "Motor kan la chhuak lawk ange" ti a Ufamkima kal lai chuan nui pat pat chungin a bulah ka va dinga "I chhaw mai sia maw, vuak nek che ka chak a nia" a lo ti hlak a, Christ a a hmuh erawh chuan a nuih sanga, kei anglo takin Umawii hi chuan naupang a lawma, mi nau hmelchhe deuh deuh pawh hi a pawm a pawm peih zel.

Christ a chu a be siam siam a, chutih laichuan kan hma ah SUV a lo ding a, Seat hma hawn zat paha Umawii ka va melh chuan thawk la hak hian min lo ner khum a, huhhh....a bialpa Bullet ṭawng deuh a hriat chhuahloh hram ka beisei.

"Sumdawnna lam chu i tluang zel maw?" ti a Ufamkiman a zawh chuan ka Seat hnung rawn bawh urh pahin a rawn tawlh hnai ruak a.

"Tluang e, i thil chah kha i ei zo dawn tawh em?" a lo ti var a.

"A la awm nual mai, naupang ei chi kha kan duh leh ang" Ufamkiman a tih chuan a phur fal leh tawh. " Next ah chuan member rawn ni ve la, a tlawm in i lei thei dawn a" a ti a, a sawi chhunzawm nghal zat zat a, a thil sawi chu a By heart emaw tih mai tur a ni! 'Insum deuh teh' tih melh tak hian ka han melh a, insum chu khawilam Prof chu a Downline a luh tir ngei ngei a tum niberin ka hria.

"Kan tum dawn nia" Ufamkiman a lo tih chuan a khi vun vun tawh. Khabe sep thiami ka ti mai, a rik zaih zaih tawh hi chuan pawisa hi a hlawh leh nge nge ṭhin, a thawk rimin a tum ngar ngar ṭhin bawk a, hausak hi chu a phu ngawt hian ka hre ṭhin, hausak pui tham lah hi a la sawi chhuak thei bik der lo thung a.

Kan veng kan thlen chuan "Kawtah min thlah ringawt rawh aw, kartawpah i lo leng dawnnia" ka lo ti zauh a, Aumawii lo khuh kharh chu a chhan ka hre reng, min zahpui tihna. Mahse, tunah rih chuan ka chhungte bula sawifiah tur a tam dawn lutuka a tih chi rih vak lo.

"Mawiah lo leng lut rawh, thingpui te i lo in ang chu, sumdawnna thil te pawh chu kan inhrilhfiah anga" Umawiin a lo ti ve vat a.

"Hotunuin kartawpah a ni chauh sia, zanin chu ka lo lut rihlo mai ang, damdawi chu kan ei zawh hunah ka lo hrilh dawn che nia" damthluama Prof-an a lo tih chuan hmai a uang ve rauh rauh mai.

Dawr kawta a din dawn lai chuan "Kan in awmna i la hre nange" Aumawiin a lo ti hman hmawh a, min ti zak angreng mahse, Prof-a chuan engmah a sawi lo hlauh a, chutah kei chu min lo enin "Muttui aw" min nuih suk pah hian a ti zui a.

"Muttui le, i thlen hunah kan inbe dawn nia"  nuisanga ka lo tih laichuan seat hnunga ṭhu chu a lo nui huk a, ka han melh zawk laichuan hmui hup chungin a chhuak vut a, ka chhuk ve nghal thuai bawk.

An tlan liam thleng chuan kan thlir dun a, an tlan liam ta maw tih ah chuan ka hnung zangah tak a rawn bawng ri dawp a, "Ka rin aiin i nasa tlat, Pathlawia hian a bum che pawn ka hre tawhlo, i kherh et et anih ka ring tawh zawk" a ti kha kha a, "Ve leh ringawt che chuan a, aman min bem a sin aw" ka tih pawh chuan "I cho chhuak tal aniang" a la ti hram a.

Zawmna

In kan thlen chuan kan rei deuh aniang ka nuin min lo hau deuh hlak hlak a, mu tura ka Room a ka chhoh chuan dar 9 a lo pel thui viau tawh a ni. Ufamkima Message lo awm chu ka chhang a, ani pawh Christa nen an mufel deuh chiah a, rei tak kan inbe hranlo. 

Message a thil sawi hi a peih vak ṭhin lo a a lo phone mai zel a, Call a han inbiak hi chuan sawitur hi a vang riau zel a, nitin kan inhmuh vang te pawh a ni mahna, sawitur chu a paitam lo ṭhin khawp mai, amah lah se se thu lam han sawi ve duah chi a ni mang si lo a.

Zingah chuan ka thlengphei hma khawp mai, Ufamkiman thingpui a lo in mek a, ka Bag dahin ka che nghal zung zung a, "Lo ṭhu rih teh" a khat tawkin a lo ti leh ṭhin a,   "Lo va insiam rawh" ka tih lah chuan a che duh mai biklo. Chawhmeh ka siam laichuan min lo puih ṭalh chu a tum a, Christa lah chuan ka Alu vel sa a lo suasam bawk a, an pafa chuan an lo buai dun ve hle ringawt.

"Tlaiah ka ṭhiante dawrah chaw kan eichhuak dawn nia" a tih chuan ka hnial biklo, ka ni tawp ni tur a ni tawh bawk a, ka chhung te bulah chuan chhuanlam enge maw ka siam leh mai a niang chu.

Chhunlamah inchhung ka tifel fai a, bang leh inchung te pawh ka hawlfai thlap a, pawn pangpar ho pawh a hnah ro te paihin awmze nei deuh zawkin ka hung ṭha a, ka duh ang thala ka intihfai hnu chuan chawhnu her a ni ruai tawh.

Vawiin chu Christa pawh a mu miahlo a, tih mut ka tum lahin a muhil duhlo a, a meng kara, chhun mut a thlah ve ṭan a nih ka ring, Umawiin min lo bia a "Ka nu a lo kal a, engtin nge chhuanlam ka lo siam dawn?" a lo ti a, "A ṭhian te Pass lawmna ah chaw an eikhawm dawn  lo ti rawh" ka va ti leh thawr a, engmah a lo sawi zui tak loh ah chuan a sawifel ni hmiang ka ti mai.

Ufamkima lo haw chuan Christa ka lo bualfai zo chiah a, "Kal hma ila haw har lo ang u" ka lo ti var a, ani pawh a insiam nghal a, kan inpeih tlan chuan dar 4 chauh a la ri a, duh aichuan a la hma deuh chu a ni. 

"Kan kal mai dawn a mi?"

"Ala hma i ti em?" ka lo ti vat a.

"Ti hran chuanglo e, i duh chuan khaw en laiin i haw hman anga" a lo ti mai a, a pawi lo khawp ang, dawrah ka nu a kal tih ka hriat vang khan ka awm anuam bik zanlo, min lo Call hlauin ka Phone lah Flight mode ah ka dah daih a, phili chi tih takah min lo biak hlauh chuan ka chi ai leh ruai dawnin ka hre tlat, vawiin na na na chu luangmuang taka hun hman pui ka duh a, khaw en laia ka let leh theih chuan a ṭha zawk hlei hlei a ni mai.

Christa kawrlum ka hak tir leh zet a, Sitting room a kan awm laiin Ufamkima chuan Room aṭangin min lo ko a, "Lo kal lawk teh" a tih vang chuan ka pan phei thuai a.

Envelope hi min lo pe a, "Engthil nge?" tih paha ka en vut vut laiin "I hlawh a nih kha, en loin ak hmiah rawh" a nui lek lek chu enin thawk ka la hak a, inhlawh ka ni tak nain chutia hlawh min han pe chu a engmaw tih nawm loh riau a, ka inthlahrung nge pawh ka hrelo.

"Ka en dawn?" ka tih chuan a lu a thing tlat a.

"Ti nge?" ka lo ti hap a.

"I haw hunah i en dawn nia" a ti leh mauh mai a, ka thawh zatin a phu bak aia tam min pek ka hlau ru viau a ni.

"Engzah nge a?" ka tih leh hram a.

"Sawi chi loh" tih pah chuan ka kawngah a rawn kuah at a, a taksa thlawp zaihin min pawt hnai nghal a, chutihlaiin Envelope chu ka tuai rauh rauh a, ka en hram dawn a mawni, min pek tam viau chuan pek kir leh pawh ka duh ang ka tih rilruk laimekin min lo pawh thlaksak a, ka Bag ah laiah chuan a lo khung nghal hmiah mai bawk.

"Engtikah maw ka lo len dawn a?" beisei nei tih hriat takin ka mitah min lo en a, keiin ka lo nuih var var thung.

"Ka hrelo le, i hman remchan hun hun a ni tawh mai aniang chu" ka tih chuan a phur ve hmel khawp mai.

"Dam chuan zirtawp zanah ni rawh se" a tih chu hnialna ka nei lemlo, a tuk inrinni a ni a, a tan chuan a remchang khawp ang chu, inrinni hi chu dawrah kan awm rei ṭhin a, zirtawp zan chu ka tan pawh a remchang zawk mah ang.

"I sam hi thlah rawh aw" tih leh ka sam ṭawnna rawn pawh phelh a rual a, ka sam hi a sei em vangin ka ṭawn reng ṭhin a, a hmuh lai phei hi chuan ka la thlah miahlo zawk a, sam thlah a ngaina tih hriata lo thlah fo tur hi a nia.

"I inchei sia, ka ṭhing bik e" zanriah kan eichhuak dawn tih hria ila chuan ka inchei ve deuh tur.

"I hmelṭha tho a lawm, i ṭhing reng reng lo" ka hmai zartu ka sam chu lo hui kiangin ngaihawm zet hian min en vung vunga, chutah ka lamah a rawn kun hnai zui a, a rimtui inkah rim chuan min zem chiai chiai a, ka hmui a rawn tawh rual chuan ka ṭang at mai bawk.

Ka kawnga a vawnna chu thlahin ka biang tawn tawnah a rawn dawm a, lungchim zeta min fawh leh takah chuan ka inthlahdul ve ta riai riai a.

Room kawngka inhawng thawmah chuan kan in awmhlat rang kher mai, "Anu Mimi" a rawn ti nghal lauh a, zah zelah ka aw ka thian kharh chu ka bula mi chuan min lo nuih suk  a, Christa lo pen lut chhat chhat lam hawi chuan ka inher ve ta nghal a.

"In inchuk a mi?" mipa naupangin a lo tih chuan chhan ngaihna pawh ka hrelo!

Ka zak ram ram mai, ani te lah chuan phawk deuh hian min en chho ha mai a, Ufamkima ka va melh ralh ringawt a, ani pawh a hawihai ve hle tho. "Bawiha JCB kha ken loh tur aw, kal ang ule" a rawn tih takah chuan Christ-a chuan a JCB pawm lai chu a ngaihsak zawk ta hlauh a, kei ka lo thaw huai ringawt.

Room aṭanga kal chhuah pah chuan "A va tih chi loh ve" hmui phunin ka va ti a, a lo nui suk duh chauh thung.

Chaw eichhuak tura kan kal chu chhungkua tak tak hi kan anga, nu ber chan tak hi ka chang hian ka hre mai a, midang min lo hmu ve tu te pawn chutiang tho chuan min hmuh ve ka ring. Dawr chhungah chuan Cabin hran kan Book a, kan Cabin lah chu a nuamin a zau ṭha hle a, kan mamawh lam turin hna thawk pakhatin min vil bawk a, Ufamkiman chaw leh eitur tui hnai tam tham zet a chah chu keini pathum chauh tan chuan a lua deuhin ka hria, a in seng hnem viauin ka ring a ni.

Pawn lama chaw eichhuah chu Christa pawn nuam a ti viau a niang, a ṭhu hle hle theilo a, thlanglam tukverhah chuan a va dak leh ṭhin a, an Vase hun mawi te chu a khawih a khawih a, a tih tluk ka hlau chu ka ṭhu reng thei biklo.

A pa in a lo hauh takah chuan a ṭhu ṭha ta hle hle a, Ufamkima chu a inthlahrung ni ngei tur a ni "Nidangah kan pahnih chauhin kan la eichhuak leh dawn nia" a lo ti zauh a, "Hetia kan pathuma chhuah pawh hi nuam ka ti lutuk a lawm" keiin ka lo ti ve vat thunga, chutah ka kut rawn humin dawhkan chungah chuan a hmer rauh rauh a, a lungawi hmel khawp mai.

"Thla la ang u" tiin ka Phone ka phawrh zui a, ka hmeh mawlh mawlh laia ka Phone a rawn bih chian takah chuan ka dah thla zal zal thung, Flight mode ah ka dah tih a lo hmu a ni ngei mai, engmah phei chu a sawi zui lo a, chutih laiin kan eitur chah a lo thleng zui ve bawk a.

"Bawiha kha hetah lo ṭhuttir rawh, khati chuan i eipuar ve hman nang" Christa chaw ka barh laichuan a lo ti a, "Ka ti thei a lawm, lo ei rawh" ka tih pawh chuan min la ngaichang renga, kan inkarah Christa chu ka ṭhuttir ta ringawt a, an pafa a chaw an in eitir lai chu hmuh an nuam takzeta, hriatloh karin ka lo en leh reng ṭhin.

"Dawrah i kawi leh dawn a mi?" 

"Ka haw tlang ang, Umawii ka hrilh tawh a, min nghak lo ang" ka tih chuan a bu nghat nghat a, "Ka hmanhmawh hranlo a nia aw" ka ti leh hram a, min chhang lem hleilo a.

Chaw kan eikham chuan chaw eikhama eichi min chahsak leh a, Ice cream ei a phalloh vangin Vanilla Milkshake leh Chocolate Mousse min chahsaka, chaw ka eipuar tawh tehlul nen ka la ei ṭeuh thei tho mai. Ani erawh chuan a tem ve hlek chauh a, Christa thil ei berh ngawt chu a buaipuia, an thla ka lo laksak deuh reng chu min sawisel chiah silo hian min lo en leh zauh ṭhin, thlalak chu nuam a ti vak lo a nih hmel e.

Kan thil eizo kan ṭhut khawmuan laichuan Bill an lo la a, kan ei man bakah chuan Tips a dah tela, a hranpa in Bill la tu nula chu cheng Za a pe tel bawk a, nui var var chungin nula chuan a kekawr ip teah a ak nghal tharh a, a lawm hmel khawp mai. 

"Kal ang ule" tih pahin Christa chu a pawm nawlh a, Common Room a kan chhuah phei laichuan Countera ṭhu chuan lawmthu a lo sawi luam a, kan piah deuhah chuan thlalakna rem tak a awm a, tleirawl te te hian thla an lo la ka va hmu bawk a, pangngai taka thla lak ve reng reng a ṭhain ka hria.

"Ti ru, thla la ve ang u" ka tih laimekin Cabina min vil tu nula te kha lo kalin "Ka lo hmeh sak ang che u" a lo ti var a, Ufamkima banah chelhin Photo Booth lamah chuan ka pawt phei dawt dawt a, min hnial em biklo.

"In naute hi a hmelṭha e, a nu leh pa in hmelṭha bawk a, a chhun fuh hle mai che u" nula in a lo tih chuan ka lo nui var var a, a nu tak tak pawh ni ila heti bak bakin ka lawm chuanglo ang, Ufamkima pawn a hmel aṭang chuan pawm ve viau a nih hmel.

Pawn kan chhuak chu khua a lo thim fel der tawh a, ka rinai tak chuan hun a kal chaka, en laia ka haw hman ka rin tehlul nen, "Taxi ka la tawh mai ang" ka tih chuan min rawn melh ralh a, a ṭawngka in sawilo mahse a  remti lo tih a lang nghal pang mai.

Christ a min lo pek vut pah chuan "Lo ding rawh u" tih leh kal a rual a, rei vaklo ah kan hma ah chuan a motor a lo ding a, ka ṭhu lut ve leh ta nge nge.

Kan in thlen hma a dawr kawtah bawk chuan chuan ka din tir leh a, lengtura sawm awm tak pawh ka ni a mahse, ka dawt sawi laklawh khan ka dinhmun a ti lai rih riau a, ka sawm leh ngam ta peklo, Motor aṭanga ka chhuk chu min en zui vung vunga, a mitmengah beisei a neih zia lah ka hailo, ka nuihtlawn titih ringawt a, hmel hlim min hmuh duh pawh ka ring tawh meuhlo mahse, Gentleman a nih zia min hmuhtir leh ta zawk a.

"Anu Mimi-i mangṭha rawh le" Christa bulah a ti a, chutah ka lam lo hawiin "Lut tawh rawh, kan thlen hunah ka lo hrilh dawn che nia" a lo ti bawk a, lungawi tak chuan kan inthlah leh ta phawt mai. An tlan liam dawn thlengin Christa chuan ban min lo vai a, an tlan liam ta chu an ngaihawm nghal der leh nghala, naktuk aṭang chuan kan inhmu khat viau tawh a nia nga, Christa mawlh mai chu ka ngai dawnin ka hria.

Muang changin kan in lampanin ka kal a, inchhung ka lut chu thawm a lo reh dak a,  Sitting room a an lo ṭhu chu ka thawmah an lo hawi rual ṭhap hlawm a, an landan aṭang rengin engthil ṭhalo emaw a thleng tih haitheih rual a nilo.

"Saitluangpui, hetah lo kal teh" ka nu aw chu a chang ṭha khel khawl khawp mai, 'Mimite' ti lo a, 'Saitluangpui' a tih fak tawh hi chuan ka chungah lungawilohna engemaw tak a nei tih ka hrethiam bawk.

Bangbo angreng zet chuan Sitting room lam chu ka pan phei a, ka pa hmel pawh chu hmuh a nuam fahran biklo, Aumawii lah chuan min en hrak hrak duh chauh a, ka nu lahin min melh thip hle mai bawk si.

"Enge a?" ka va ti he haw a.

"Khawiah maw i kal a?" ka pa a ni, a vin bawk si a, min ti phu chiam lehnghal!

"Chaw...kan ...eikhawm" ka tih laichuan Umawipuii chu ka va melh a, TV lam ringawt a hawi chu ka ngei kher mai, eng thil nge maw  a lo sawi le!

"Khawiah nge chaw in eikhawm?" ka nu zawkin a lo ti ve leh a.

"Sawtah, Nunmawii... te inah" ka ti bah nak a, Nunmawii chu ka School  kalpui ṭhin a ni a, tunah rih chuan kei aiin a pawl hniam zawka, MZU ah a kal ve mek bawk.

"Nunmawii te inah i kal tak tak a maw, dawt i sawi lo maw?" ka nu aw ki chuan hriat engemaw chu a nei phawt mai.

"Zep lo khan i nu kha ṭha deuhin hrilh rawh" ka pa chuan a lo ti leh a, sawi tur chin tal Aumawii chuan min lo hrilh sela ṭha tur, min phiarru ang hrima a ngawi tlat chu enge a awmzia pawh ka hre tawh lo.

"In tih dan chu enge in hriat a?" zamlo ang tak chuan ka ti let ve nghat a, ka nu chuan min melh tur khai ringawt tawh. 

"Pathlawi i ngaizawnga, a fapa i awmsak ṭhin a ni maw?" a rawn ti chang ta fawl a, ka lo ip ru chawih mai a, Umawipuii chu ka va melh nghal hrak bawk. 

Phat ngaihna pawh ka hre tawhlo e a, Aumawiin a lo sawi vek tih a chiang reng, Sitting room chhuat laiah chuan ka ding ngawi renga, ka nu leh ka pa in min en reng laiin keiin Umawipuii ngawt chu ka melh a, ani lah pek chuan a Phone a en loh leh TV a en a, min en duh hauhlo lehnghal a.

"Nitin min bumin i kalchuak a, i u i pui emaw kan tih laiin i khawsa zia mai mai chu ka va lawmlo em em ve, nula lehkhathiam i ni lawm ni, mi chiahhlawh ni turin lehkha kan zirtir che em ni, i zirna hautak zia te kha ngaihtuah ta che, kan lo inseng thlawn mai mai a ni maw...!" ka nu chuan a ti hlak hlak a, a thinrim bawk a niang khabe sai dar dar chungin min melh a, chhang let ngat ila chuan min bengthlu tawp duhin ka ring hial a ni.

"Tu maw i bialpa chu ni a?" ka pa zawk in a lo ti ve leh a, an pahnih hniha min chhuah chhal vang leh ṭan der tu eih pawh ka neihloh vang chuan ka rilru no a lo chhuak a, ka hnuk a ulh ṭeuh mai.

"Vawiinah ka bang tawh a lawm" ka ti zawi sep ringawt a, a tu amah mah chuan min chhang lo.

"Ka hmelhriat te an nia, reilo te chhung ka pui lawk a lawm" ka ti leh tawl a, Ufamkima chungchang zawng zawng a lo la hrilh loh hram ka la beisei fan chu a nia.

"I awmdan chu ṭhenawm khawveng ten an lo hria ang tih a hlauhawm hle mai, khaw hawi ngaihna pawh kan hre dawn hleinem hetiang te chuan" ka nu chuan a ti leh hlak hlak a. 

Chutih laiin "I bialpa chu ṭhen ang che, i u in Pathlawi a ti lehnghal a, a tih in a tih chi loh reng reng, in lo kal thui hman em lo turah ngai ila, thlah fel hmak ang che, ṭhenawm khawveng ten an hria ang tih pawh a hlauhawm a lawm, a zahthlak lulai lutuk emai" ka pa chuan a lo ti ve leh a, zep rual lohin an hre fai kelh tawh a nih hmel e, tih ve theih nei ta lo chu hah zetin  thawk ka la hluai ringawt tawh.

(End of part - 12)