ZUNZAM (PART - 17)

ZUNZAM - by Ahmangaihi violette khiangte

PART - 17

Thawhṭan tuk chu ka thawhtlai deuh vangin Umawiin min kalsan a, ka insiam laimek chuan min lo phone in kan dawra Ufamkima a awm thu min lo hrilh a, ka Phone ka en lah chuan Ufamkima Message leh Call a lo awm ṭeuh a, Silent ah ka lo dah daih chu niin, ka inthiamlo zawk ang reng khawp mai.

Ka tho nuam em tih leh enge ka an te min lo zawt a, a Message hnuhnung lamah chuan "Ka lakah lungawilohna i nei em ni?" tiin min lo zawt hial a, ka awm dan chu a tan pawh ngaihṭhat thlakloh ve tak tur chu a ni.

Ka call zui nghal thuai a, "Ka lo kal dawn chiah a, i hmanhmawh tawh em?" ka va ti nghal tawng a, aw ki dam thluama "Ka lo nghak ang che" a lo ti takah chuan ka insiam zung zung a, in aṭanga ka chhuah chuan dar kua a pel fel der tawh a, a hna kal tur chu  ka ti khawtlai viau dawn anih hmel e.

Taxi in ka kal a, ka thlen chuan dawhkan thlanglamah tukverh lam hawi hian Coffee a lo in mek a, "Taxi ka hmu mai lo a" tiin chhuanlam ka va siam a, a hmelah chuan lungawilo hmel ka hmu lemlo, ka hah dam phah deuh huai bawk a, nimin lama ka rilru leh tun dinhmuna ka awm dan chu a inpersan leh viau mai, tih lungawiloh ka hlau em em si chu a nia, enge maw kei hi ka awmzia le!

"I phone i en em?" a tih chuan ka bu nghat a, min zawt zui loin a ngawi vung vunga, a khat tawkin a Coffee in lai chu a lem leh hlak ṭhin, engthil emaw ngaihtuah ve rauh rauh hmel a pu a, keilah chu ar khawi ngam loh ang maiin ka ṭi dek reng mai bawk.

"Sawi duh te i nei em?" dar kan ak chung hian a rawn ti a, sawi duh kha ka nei ṭeuh a mahse, tunah tak hi chuan an bo duak mai, ka ang zau ringawt a, chhuna Rosy nena kan inhmuh tum kha ka hrechhuak leh a, ka ngawi leh ta zawk.

"I banah i lo peng dawn em?" ka ti teh daih a.

"I duh a ngem?" kiai sukin a nin a lo ti let ve a.

"Duh e" ka tih chuan ngaihawm zet hian min lo nuih a. "Tun kar chho chu nitin rawn tlawh che ka tum dawn nia" damthluam hian a ti leh a, chu chu a ṭha tak ang, inkawm tam kan mamawh, kan la innel tak tak lo tih chu kan hre ve ve anga, chu mi vanga inṭhen lo ngaihtuah nghal ringawt pawh a ṭha lo ang.

A kal dawn chuan pawn thleng ka va thlah a, "Ka lo haw hunah kan bazar dun dawnnia" a tih chuan ka lo phur ve takzet   ni, pangngai taka len chhuah dun sawi tur pawh kan la nei mang hauhlo, ngaihdan thar ka nei zui a, kan inlaichinna hum him tura theihtawp chhuah tur ka ni zawk lo maw? Beih ve hma hawta beidawn ringawt chu ka tih loh tawp tur niin ka hre ta bawk, Ufamkima pawn a tum em hi maw.....theihtawp kan chhuah dun zawk aniang chu.

"Enge in awmzia, in va ṭhat hmel leh tawh si ve" inchhunga ka luh rualin Umawipuiin a lo ti a.

"Ka lo thlen hma khan sawi a nei em?" ka lo ti let thung a, "Nei hran nang, a ṭawng mawh angreng sia i ṭhen thu i va hrilh tawh a nih ka lo ring ve ringawt a, engtin nge i tih taka?" zawhna ngah tih hriat tak hian min en zui a.

"Aumawi, kan la awmdun tlem lutuk vang hian kan inpawhlo niin i hre ve tho em, awmdun tamin in hmu zing deuh ta ila, kan buaina hi a zia mai lo maw ka ti deuh a" ka lo ti ha a, a hmui a pet sawi duh vel lek a ni.

"A nupui hlui vangin inbuai emaw ka tia" a lo ti zauh a.

"Buai ka tih loh kha, i hriat sual a nih chu, chuloah aman a la duh a nih loh chuan buaiphah nan ka hmang tawh dawnlo" ka sawi laimek chuan "Ni chiah e" a lo ti ve hluai a.

"Pathlawi a ni tih hresa in i nihpui a, khatiang thuartham kha chu i tawn ve tur rengah ngai rawh, bialnu hlui nena neuh neuh hi chu tlangval ngaihzawn pawn a tam a, ani phei chu nupui leh fa nei tawh a nia, rilru zau tak put i ngai a lawm, let but but reng lo la a ṭha ang" a ti leh chu ka lo thlawp khawp mai, keimah hi insiamrem thiam tur ka ni, kan inṭhen chhan tur thil ngaihtuah tawhloin kan inṭhenloh dan kawng ka dap zel tawh ang tiin rilru ka siam a.

Rosy nen kan inhmuh tur thu ka hrilh chuan "A van ṭullo reuh" a ti deuh hluk a, aman min hmuh a duh thu leh min lo Phone thu ka hrilh chuan "Khatiang lam kha chu buaipui vaklo la a ṭha a sin" a ti niah niah, ka kal tur phei chu min hnial zui hranlo.

Chhunah Ukimkimi a lo kal a, ka lo hau nghal tawng chu a nui hauh hauh renga, kei a hauhna ve chu eng he hu ah min ngaihsak duh derlo a, "A nuam em, Pathlawi ngaihzawn chu zun an ngah an ti bawk sia, a zunah i uai viau tawhin ka ring tlat" tih angreng chuan min chhaih zuk zuk a.

"Rosy bialpa kha i hria em?" ka tih chuan a bangbo khawp mai. Rosy IG enin a bialpa thlalak chu ka zawng a, vengkhat te an ni bawka engemaw tal a lo hriat beisei vanga zawt ka ni.

Thlalak pakhat chu ka hmu ta hlauh a, mi panga vel an ni a, khawilai Hotel emaw a an lak a ni, a bialpa chu a sir berah a dinga, Ukimkimi ka hmuh chuan "Hei te chu BZA a nih hi" a lo ti sam mai a, a lo hre chiang nasa mai chu niin.

"Ṭhian anni lawm ni, Bz-a te chuan bialnu nghet a nei a lawm, an innei ṭep tawh zawk maithei a ni" a ti leh zel a, Rintei a tih Bza bialnu ni a a sawi thlalak min hmuh lah chuan; nimin piah a Phone dawra  Bza ruala ka nula hmuh kha a lo ni reng mai a, rilru a ti buai leh ta nak mai.

"Rosy nen chuan an inngaizawng lo ang, i hriatsual mai mai aniang" a tih leh chuan chhang tawh lemloin ka ngaihtuah zui rauh rauh a "Taka Mimite, Lucy nen in in ti ṭha thei maw?" a tih erawh chuan ka beng a verh viau thung.

"Lucy kha maw, a mizia a mak lutuk" ka ti deuh hluai a.

"A phutkhat deuh tiraw" nui hak chungin ani lah chuan a lo ti leh mai a, a hrechiang viau anih ka ring.

"Ufamkima bialnu hlui a lo nia" ka tih erawh a awih vaklo a, "Ṭhian inkawm reng an nia lawm, tleirawl lai aṭanga inkawm an nia mahse, an lo inngaizawng tawh tih pawh ka lo hre hleinem, Ufamkima KṬP a a inhman lai kha chuan an inzui ve nasa ṭhin a mahse, an inngaihzawn tak chu ka hrelo" a ti niah niah a.

"Regina-i i hre ngai em?" ka tih erawh chuan a bangbo khawp mai, "Tu nge chu chu?" a lo ti he haw a, ka sawi zui duh ta lo. "Zawt zawt suh" Umawiin a lo ti leh ṭhin a, UKimkimi bulah chuan ṭawngkam fimkhur turin min lo mitmei deuh reng bawk.

Ukimkimi haw hnu lawkah keipawh ka kalchhuak ve a, Rosy dawr ka va thlen chuan Customer an lo awm huang a, lut ta mai lo chuan pawnah ka lo ding rih a, ka phone ka bih laimekin "Mimi" a lo tih ri ka hre zui a.

"Eh...i lo thleng tawh a law, lo lut ta che" a lo ti var a, ṭhutna min khawhhmuh lam chu ka pan zui thuai a, a la buai em vangin a thil zawrh te  chu ka lo thlek kual ve a, a  dawr nghak dang nula pahnih chu ka piah deuhah ṭhuin an titi dun melh melh a, Rosy lo hawi leh ṭhin nen chuan kan innuih leh ngawt zel a, "Min lo nghak lawk rawh aw, ka laklawh deuh a" a tih chuan ka lo bu ve nghat a.

"Coffee i duh em?" a lo tih leh chuan ka hnial ve tak nain min lo thlitsak tho a, ka bulah chuan lo ding hnaiin "Hman zan khan kan inbe lem silo a, ka inthiamlo hnuhnawh lutuka, rilru buai deuh chang hi chuan ka hawihhawm lo ṭhin lutuka" a lo ti sap sap a.

"A ho lutuk" nuisangin ka lo ti ve a, hman zan thil vel chungchang kha min sawipui a tum chuan ka ring silo, engthil chiah nge a sawi duh chu rindan ka nei thiamlo khawp mai. Ufamkima laka inthiar fihlim tur te hian min lo ti mai ang a tih te ka ngaihtuah a, lo ti ta se tiin chhan let dan tur ka ngaihtuah rauh rauh bawk.

Customer an chhuah hnu chuan "Tirawh helamah ṭhu ang" tiin chhak lama dawhkan awmna lamah chuan a kal a, a dawhkan anih ka ring, ka va ṭhutphei hnu chuan parda in kan ṭhutna chu a zar hliah zui a, nula pahnih te nen chuan kan ṭhutna chu a inhlat deuh bawk a, an ṭawngthawm pawh ka hre pha mang meuh tawhlo.

Chutih laiin a Chair chu ka lamah lo herin inhmatawn chuan kan ṭhu ta ran a, nelawm taka a nui chu han nuih let ve pawh ka tan a mawi in ka ring mahse, ka awm a nuam tehchiamlo khawp mai.

"Ihh...englo ania, hmuh che ka duh chhan chu.....thil min tih sak tura ngen che ka duh a" a rawn ti hmasa te te a. Ka Coffee no dah chuan ka lo insiamrem ve nghal thuai a.

"Ka inthlahrung viau nangin tihdan kawng dang ka hre tawh mang silo a" a tih leh chuan a thil sawi tum chu ka la bo viau mai.

"Inneih chu in tum hnai viau tawh em?" chu zawhna teh daih chuan min ti hamhaih zawk a ni, chutiang em em Ufamkima nen pawh kan la sawi dun hauh silo. Ka lo nui ringawt chu hnual rawih hmelpu hian min lo en a, ka nui tawp riai riai thung.

"Engtik nge in tum a?" a lo ti leh a.

"Chutiang pawh engmah kan la sawi hleinem" ka tih laiin "Tum chu intum hnai tho ti raw" a ti leh hram a. "Enga ti teh daih nge chutiang te min zawh a? Ufamkiman a sawi a mi?" tiin ka lo zawt let ve zat a.

"A...ka lo hriatdan a nia" bah deuh naka a tih leh chuan "Engtin nge i hriat a?" ka lo ti leh zel a, Ufamkiman a bulah chutiang chuan a lo sawi em mawni ka ti deuh, hman zana an inbia ka ngaihthlak pawh khan chutianga ngaihtheih tak tur chuan aṭawng tawh anih kha maw le.

"Kiman Lucy bulah a lo sawi a, ka nu pawhin a duh viau che anih hmel" a sawilai chuan a kiai sak a, dawhkana a kut a chet dat dat chu ka hmu reng bawk, ka mitah chiang takin min en duh hauhlo tih te pawh ka hmu thiam bawk a, kei ang thoin helhkam nei ṭeuhin a awm ve anih dawn hi.

"Engmah chutiang...." ka sawilai chu min lo pawt chat lehin "Fumfe deuhin in la sawi lo a mi?" a ti leh zat a.

"Sawilo e" ka ti ṭha ve mai bawk.

"Eng lo a nia, Christa hi enkawl ka duh a" a rawn ti ta a, a ngaihna hrelo deuh a ka lo en laiin "Min lo sawipui la" a lo ti leh a, engthil nge maw min beisei hi le, keia sawi ve phak tur thil pawh ni nghallo chuan.

"Urosy....awi...engtin nge keiin ka lo tih theih ang" ka ti hluai ringawt a. Chutah min lo ṭhut hnaih sauhin "Kima bulah lo sawi la, ka hnena awm tir turin i lo ti anga, nangin i sawi te chuan a rilru pawh a dang ve deuhin ka ringa" a ngen tak te hian min ngen a ni ber tawh, chhan ngaihna pawh min ti hrelo.

"A remti lo viau khan ka hria" ka ti leh hap a.

"Nia, tinge mawni mi hi a ring duh tlat lo a mahse, nang chuan min pui thei ang chu...." Urosy hian engtia ka puih theih ring ringawt mai nge a nih hi ka hrethiam theilo, Ufamkima nena kan inkar lah heti te mai kan la nih laiin Christa chung changah ber kher phei chuan, a....a ngaihna chai ka hrelo!

"Mimi, theihtawp min lo chhuah pui teh, i tan pawh ka hnena Bawihpuia a awm chuan a hahdamthlak zawk ang, i chanah min han dawn pui ve la, Christa i lo enkawl tawh ṭhinna ah pawh i duhsak ve takzet a nih chuan nu tello a ṭhanlen chu i duh bik in ka ringlo" a ti leh sap sap a, a sawi zawnga a aw lawi lek lek te chu khawngaih viau mahila, an thil min dil ber kher chu ka tih theih piahlam daih niin keichuan ka ngai, ka tih a mawilo thil niin ka hre bawk.

"I bula a awm te chu a ṭha lutuk a lawm, a ngaih ṭhin zia che pawh ka hre tho a mahse, kei chu engmah ka nih loh hi, ka thu neihna lam a ni ve bawk silo a...." inthlahrung deuh taka ka tih laichuan "Kima chu lo sawipui chhin la, ka enkawl theilo ang te pawh ti mai la" a lo ti sawk sawk a, ka hau chungin thawk ka lo la hawk thung, a ti awm anglo ka ti deuh riau tawh.

"Mahni hma sial deuh angin ka lang dawn a sin" ka ti deuh hmuk a, ngaihtuah zawng ringawt pawhin ka thauah min man thei a lawm mawle, bialnu ve mai chauh hian engtin nge chutiang thil te ka sawi ngam zawk ang.

"I lo sawi anga keiman ka lo sawifiah sak leh dawn che nia, Christa ka enkawl min thlawp ang zawng talin ṭawngkam lo nei la" a ti leh zel a, ka thawk a ti ipik zo vek tawh, chhang tawhlo chuan ka ngawi ran a, a sawi ang chuan Ufamkima bulah sawi ta ila min ṭhen vang vang duh zawkin ka ring a ni, mahni hmasial lutuk leh a bialpa fapa ngaithei miahlo chan tak ka chang dawnin ka hre bawk a, mahni hma ka sial hrehlo dawn rau rau anih chuan a mi ngenna hi ngaihthah ila ka tan a ṭha zawk bawk ang.

"Min hrethiam mai rawh Urosy, hetiang thilah chuan inrawlh ka duh lo" ka tih chuan a nui tawi khawp mai, a hmui a seh neuh neuh a, a awmdan chu khawngaih viau mahila hethilah hi chuan ka pui thei tlat silo a ni.

Rei awm tawhloin ka chhuahsan thuai a, muang changin dawr lam ka pan a, ka chawmawlh zo vek maiin ka hria, dawr ka thlen chuan dawhkan hnung ber lampanin tukverh bulah chuan ka va ṭhu  a, Umawii min lo biak pawh chuan ka ngaihsak zui lo.

Ka phone Message lo thleng chu Rosy hnen aṭang bawkin a ni a "Mimi, kan thilsawi kha Ukima hrilh suh aw, i lakah pawh ka inthlahrung lutuk mahse, ka dinhmun chu i hriat ve tho kha, ka rilru a buai em a ni" tih hi min lo thawn a, ka chhang letlo mahse, ka awm a ti nuamlo zual deuh deuh mai.

Umawii lo kalin ka phone chu a rawn bih a, "Eng thil nge in va sawi dun a?" tiin min lo zawt bawk a.

Ka hrilh chuan a lo ṭeu leh viau ka rin laiin a ngawi rauh rauh a chutah ka beisei loh deuh thil a lo sawi a "Naupang vanga ti a ni chiah pawn ka van ringlo Mimite, inṭhen tir nan che u a hman a tum a nilo maw, Tihdanthiama bulah a sawi ang chuan ti ta la, a ṭhen duh mai dawn che tih a chiang reng a, a reng rengah a bialnu mai i nia, mi pangngai tan chuan i inrawlhna chi a nilo tih a hriat thiam theih vek a lawm, a rilru a kawi anih dawn kha, hmu duh tawh reng reng suh" a ti sap sap a.

Chutiang zawnga ngaihtuah nachang ka lo hre miahlo, sawi ta ila kan inṭhen phah hial lawng maw ti chuan ka ngaihtuah ve tho nain ka laka rilru chhia pu turin Rosy chu ka lo ngailo a, ka tan nelawm tak khan a awm ṭhin bawk si a, min lo ngaimawh ru ve hle a ni thei angem, hmanzana a thil sawi ka hriatah khan Ufamkima nena bul ṭan ṭhat leh a duh thu te kha a sawi anih kha maw, khai aw......ani hian min beih a lo tum reng em mawni dawn le...!

Zawmna

Dar thum rik hmain Ufamkima a lo thleng hlawl a, "I hman tawh em?" a lo ti nghal mai si a, hmanhmawh deuh chuan ka intuai ṭha thuak thuak a, chutih laiin "Khawiah nge in kal dawn?" tiin Umawipuiin min lo zawt sek sek a.

"Kan han leng khawthawng ve lawk a nge" tiin Ufamkiman a lo chhang a.

Kan chhuah hnu chuan MC ah kan lut kawi a, kawr min leisak a tum a nih hmel, "I duh ber i thlang dawn nia?" a ti leh ta nghal a, bialpa te thil inleitir hi ka ti vak ngailo nain Ufamkima hi chu hnial hi ka hreh riau zela, thil inleisak chungchangah chauhlo thil dangah te pawh a niang chu.

Kawr nalh leh man to angreng deuh hi min leisak a, chumi hnuah tlereuh dawrah kan peng a, rangkachak ṭhi nalh deuh min leisak bawk a, a Locket ah chuan Fairy ang deuh tereuh te hi a awm a, ka ngainat zawng tak a ni.

A Motor dahna kan pan thlak laichuan ka Bag-a a sana tur ka leisak chu ka lo phawrh zal zal a, Motora kan luh hnu chuan a kut lain ka buntir mawlh mawlh a, a sana lo bun sa lakah chuan keia thil leisak ve chu engtham mah a nilo mahse, ka ti ve laklawh si a, ka buntir lui ta tho a, amah lah chu a lawm thiam khawp mai a, a sana bunlai chu a phelh nghal hmiah mai bawk a, ka buntir zawk a thlek vang vang laia a lungawi hmel chu hmuh a nuam takzet a ni.

"Enge tih i chak sawi la?" a rawn tih chuan ka inngaihtuah vang vang a, khaw pawn vela Ride ka chak thu ka hrilh chuan min hnial loin a tlan chhuak nghal a, "Kal duhna bik i nei em?" ti a min zawh leh chuan "I duh duhna lamah a ni mai" ka lo ti ve zat a.

Bawngkawn lam panin kan tlan vang vang a, "Beraw tlangah kan kal dawn ami niang?" ka tih chuan a bu nghat nghata, ka kal lohna a rei tawh khawp mai, Shillonga ka kal hma a ka bialpa nen khan kan leng dun fo ṭhin a, chu mi hnua ka kal lehna hmasa ber tur a ni nghe nghe.

"Tlaiah heti hian kan leng dun ṭhin dawnnia" min rawn en zauh pah hian a ti a.

"A nuam dawn hle mai" ka tih laiin ka kut a rawn bana, ka lo vuan let ve zat a, in enin kan innuih ringawt a, a bula ka awm takah chuan ka rilru tawt zawng zawng kha an bo ta duak mai hian ka hria.

"Tunlai i buai vak lo ami?"

"Buai tho e mahse, ka ngai che a" a tih ri chu hriat nuam tak a ni.

"Min lo ngai ve ṭhin em?" a lo ti leh a.

"Ngai ṭhin e, i buai sia ka lo be hreh ṭhin zawk che a" lai angreng taka ka tih chuan ka kut chu a rawn hmer salh a "Inthlahrung mah ta che, i duh hun hunah min lo be ṭhin dawn nia, i bulah hian ka nelawm loh ṭhin lutuk em aw?" a zawhna chu chhan vak dan pawh ka thiamlo, zep lo ah chuan chutiang chu kan ni in ka hria.

"Ka nel tho che" ka ti zawi sep a, a nui hmel chu ka hmu hmelṭha zual kher lehnghal.

"I thil tih chak te lo ngaihtuahla, hun kan neih chuan tihpui zel che ka tum dawn nia" a ti zawi sup a, tunah tak hi chuan a awma bei tluka chak ka neilo, duat deuhin anin min lo kuah bawk sela, ka thil ngaihtuah vang chuan ka nui sak a, min lo en rang khawp mai.

Beraw tlang kan thlen chuan Motor aṭanga chhukin khawthlirna lampanin kan kal chho a, tleirawl rual lo awm ho chuan min lo en duh hlawm khawp mai, Ufamkiman ka darah rawn kuahin min chhohpui zel a, khawthlirna ah chuan inngheng chialin kan ṭhu dun a, thli thaw heuh heuh chuan hah a ti dam sawng sawng mai bawk.

Puitling kan awm ve vang aniang tleirawl ho chu an kalsawn thuai a, kan pahnih te chauh chuan kan ṭhu dun a, ngaihawm zeta min rawn melh leh chang chuan ka lungphu a rang leh dup dup ṭhin.

Chutah min rawn kuahin "Lo hnai teh" tih leh a awm nghenga min pawm a rual a, a rimtui inkah rim chu hip vang vangin thawk ka la zui a, a taksa lum ka nghen takah chuan keimah ah danglamna a rawn awm chawp chilh a, "Boruak a nuam hle mai" ti a a ṭawng zawnga a hrawk bawk che ralh ka hmuh te chuan ka mur sung sung thei hial a ni. A lo hawi thla nen chuan kan mit a intawng hnai viau mai, min fawp turin a rawn kun hniam nghal bawk a.

Thli thawin ka sam a chhem len chu hui kiangin am deuh tak hian min rawn fawp a, a thaw ham ham ri te chuan ka thisen kal lai chen hian a fan raih raih thei in ka hria, a kut lum vung vung chuan ka biang rawn dawmin hnai takah min en a, a mitmeng thuk ruih leh zûn nei fahran chuan ka mitah tak min en bawk.

"I hmelṭha takzet a ni" zawi deuh supa tiin min fawp nawn leh ngat a, ka hlim a ni, ka hlim takzet.

Rei deuh chutah chuan ṭhu dunin ka titi a, a zin tawh na hmun te min hrilhin ka kal chakna te min zawt a, "Shimla ah ka kal chak" ka lo tih chuan "Kan inneih hunah Honey moon hmang turin kan kal dawn nia" a lo ti zauh a, chuta min rawn en leh chuan awmzia a nei hle in ka hria.

"Engtikah nge kan inneih dawn a?" uang deuh tak hian ka lo ti a, a ngawi vung vunga chutah a jacket ipte zenin zungbun bawm hi a rawn phawrh a, awi leh.....engthil nge maw tih a tum le!

"U famkim!" a chet lak dan en chung chuan ka ti deuh hluai a.

Ani ka hma ah rawn ṭhu hniamin zungbun bawm chu a hawng a, "Lo hlauthawng viau lo la, a hun pawh i duh hunah ni sela.....i pawm thei ang ti raw?" thawk ka lo la hluai ringawt a, min ti dang zo vek a lawm mawle.

"Tinge hetiang te i tih a?" ka nui a, ani pawh a nui ve tho, ka malchunga ka kut dah chu rawn la kangin a hmui a tawh tir leh vang vang a, ka awmchhunga ka lungphu chu a  rawn ri dup dup tawh maiin ka hre hial a ni.

"I bun duh em?" a ti leh tawl a, a zeilo ti dawn ila hei bak a zei turin ka duh chuanglo, ka tan hi chuan Ufamkima hi a ṭha FAMKIM ve chiang em a sin.

Ka lu ka buk takah chuan zungbun chu phawrhin ka kutah a rawn rawlh lut a, Silver zungbun niin mit eng mawi tak mai a nei a, ka kutah chuan a de set set maiin ka hria. 

Kan haw meuh chuan khua a lo tlai ve lek lek tawh a, Umawipuii ka phone chuan dawra a la awm thu a lo sawi vangin chulam pan chuan kan tlan a, ka kuta zungbun chu ka bih khat tawk reng a, keimah te chuan ka nui leh ṭhin, Ufamkima Motor khalh ka va thlek chang chuan  min lo en ve nghal thuai a, chutah zahloh chhuahin inti tlangnel fahran chuan a beng ka va khawihsak niap niap a,  hma lam en chungin a nui ve suk suk mai.

Dawrah lo lut tawh loin min let san a, Umawii bula ka zungbun ka hmuh chuan "Ka ta nen inthleng ang" a lo ti ve leh thawra, a uang mai mai emaw ka ti chu ani a lo thu tak em em lehnghal a, tih tak meuhin a ni min dil ni, fing viau ṭhin e tilo hian a mawl leh huih ṭhin.

Ufamkima chu a tukah pawh a lo kal leh a, dawr thar changkang deuhah thil eiturin kan chhuak a, hun nuam tak kan hmang dun leh a, chutiang chuan kar tluanin tlai tin ka tan hun a rawn insiam a, kan inkara daidangtu awm ni a ka hriat kha a bo ve ta tial tialin ka hria.

Ni a liama thla a tawp veleh dawn ta reng a, Umawipuii te inneih hun tura ruat pawh ni nga chiahin a dang ta, dawr kan khar a inlamah inbuatsaihin kan buai hle a, ani Umawii bazar reng rengin hun a hmangral a, inchhung lam buai chu ka kut zalah vek a tla a, khaw danga kan chhungte an lo thleng khawm ve tawh bawk nen eirel pawh hna a tling thaw thang mai.

Ufamkima pawh ka sawm a, Inrinnia kan bazar pahin an inah ngei sawmna lehkha

ka va pe ve a, a nu pawn min lo be ṭha viau mai, Umawii chungchang te pawh min lo zawt ve luam a, chaw ei nghal turin min sawm zui nghe nghe a, ei phei chu ka ei lemlo.

"Hman zanah Ukiman i chungchang a sawipui a, nu ber lakah mark i score ṭha teh a nia, chuvang chuan lo leng ve fo rawh" Mamuanan a lo ti ru sar sar a.

"Engtin nge a sawi a?" keiin ka lo ti var a.

"Nupui a tan pawh a duh thu che a sawi a, Nu nghakin kan va rim dawn em ni a tia, Ukiman i u pasal neih tur thu hi a hrilh a, hmanhmawh lo ang a ti anih kha, kum thar lamah chuan in ti ve rup mai ang a?" a  tih chuan ka lo nui pat pat a, a nu bulah meuh min lo sawi tawh anih chuan a lo thutak hle a nih dawn hi.

Ufamkima inbual ka nghak a, a inbual zawh hnuah kan inthlengin min va thlah thingpui in a a lo lut kawi chu ka ni te ho in an lo fiam nak nak a "Makpa chet hun a nia, makpa hual interview hun a ni bawk a" tiin an nui dar dar a, Ufamkima chu a zak ru hle tih ka hre thei a mahse, zak lo ang tak chuan lan a tum ve anih hmel e.

Ka cousin te ho chuan hmelṭha an han ti em em khawp a, hmai a lo uang ve hle ringawt, rei awmlo in a let leh mai a, ka ni Hminglianin hahipin a chungchang chu min zawt zui a, "MZU ah Professor a nia" tih chu ka sawi hmasa ber a, midang pawh chuan an beng an rawn tun hru hlawm lehnghal a. Mahse, Umawiin "Pathlawi a nia" a lo ti zauh pek a, a kamtam thlak hi kan ti khawp a, keiin ka lo sawi changtupa ve mek lai lehnghal chuan, a sual ka ti tak tak a ni.

"A chhe lo a, a fel te chuan a ṭha tho a lawm" ka Cousin ten an lo ti hlauh mai. Ni Hmingliani lah chuan "Pathlawi hi an ṭha, tih sual leh an hlau tawh a, an fimkhur a, chinchang an hre tawhin mi duat dan an thiam zawk" a lo ti ve mauh mai bawk a, nui pat pat chunga Umawii ka va en laimek chuan Nute Thanzualin "I u aiin i nei ṭha zawk dawn anih hmel chu" a lo ti leh zel a, Umawipuii chuan a hmui a pet sawi nang nang ringawt tawh.

Thawhṭan zanah man inhlan an ti a, chumi ni nileng chuan Ufamkima biakna hun ka neilo a ni ber, zanriah eidawnah ka va Call a Phone a chhang miahlo mai a, a buai a niang tiin ka call zui duh ta lo a, a hmuh hunah min lo be ve maiin ka ring.

Man hlan turin mipa lam an lo thlenga, ka Cousin te nen keinin thingpui kan lum a, Umawii pawn nuam a tih hmel khawp mai, man hlan hun a zawh veleh ah Ukimkimi ho chuan an hmai facial tir turin Room lamah an chho a, thil ka tih fai zawh a ka han chhoh ve chuan ka room zawkah an lo awm a, reilo te ka lut zawk a, an rik luai luai vang chuan phone hmang turin bathlar lamah ka chhuak zui a.

Ufamkima chu ka la be thei ta chuanglo enge maw  atih dawnni, a Last seen lah chu chawhnu lam dar hnih kha a ni daih mai a, lehkhabu a chhiar nge ni ang aw, tun angah te chuan kan inbe ve ziah ṭhin sia, tinge min rawn hriat chhuah miahloh le ka ti rilru neuh neuh a, midang bula ka let leh hnu pawh chuan ka mood a ṭha lo zui khawp mai.

Mut dawnah chuan Mamuanan ka status a lo comment, "Min sawm ve dawn em?" tih hi a lo thawn a, "Inchhungin ka sawm vek che u a nia, rawn kal vek rawh u aw" ka tih hnu chuan "Ukima ai ka lo kal mai ang" a lo ti leh a.

"Rawn zui rawh, nalh tawkin aw" ti a uang fe a ka chhan leh chuan "Christa a Accident kha i hria em?" a rawn ti ta mai a, min ti bangbo hle ringawt.

"Engtin nge a awm a! A na viau em?" ka ti nghal hlut a.

"Kawta a Cycle khalh kha Stepah a lum a, a lu a sawh kak a, thinsen te kan va pe a, tunah chuan a zia tawh, zantir khan ka haw san a, Ufamkiman a hrilh che anga i lo hre tawh turah ka lo ngai asin, i rawn lang lo pawh tinge mawni ka lo ti zawk a" a lo ti leh mai si a, ka hlauthawng lutuk chu ka phili ruai mai a ni. Thisen pek ngai khawp chu a na viauin ka ring a, engtin nge maw Ufamkima chuan min hrilh ve miahloh theih zawk le.

"Khawi Damdawiinah nge a awm a, tunah tunge awmpui?" ka ti lehnghal sawk sawk a.

"LRM Hospital ah mahse, va kal duh kher suh, a muhil a engmah tih theih a awm rih chuanglo, a nu in a riahpui dawna Ukima pawh a lo haw ṭep ang" a ti leh zat a, kan inbiak zawh chuan ngaihṭha lo deuhin khumah ka ṭhu renga, Ufamkima va call leh pawh chu ka inthlahrung ru riau tawh, min hrilh ngai a ti ve lo anih te ka ring thul, ka rilru a hah ṭun a, ka ṭah a chhuak dawn dawn mai.

Ka zing tho chuan ka phone ka en hmasa bera, Ufamkima Message ka hmuh chuan  rang lutukin ka hawng a, "Vawiin chu ka lo kal thei dawn tlat lo hei, min lo hrethiam mai rawh hna lam kan indaih lo deuh a" tih zawng hi min lo thawn a, ka rilru a na veng veng mai, message ringawt a min lo biak vanga na ka nilo a, a lo kal theih dawn loh vanga na ka ni hek lo, a nuna thil pawimawh leh harsatna liantham tak min hrilh loh vang zawk chuan ka na a ni.

Tinge min hrilh mai loh le, a tan inhnemna tlak ah min ngai nganglo tih na em niang? Ka tello a a tih theih vek thil mah nise, min hrilh sela ka ti takzet, hnem ka duh a, Chirst chu ka ṭawngṭaipui tur thu te, Pathian in a tihdam leh vat dawn thu te pawh hrilh ve ka duh a mahse, ka lakah a zep tlat si.

Aumawii chuan "A tan i pawimawh tawklo tihna anih dawn chu" a ti leh mai a, insumkarna nei lek lo hian a ngaihdan hi a sawi phawng zel a, ka rilru nat zualna tur tih hi a ngaihtuah ve leh ṭhin tawhlo.

Inneih inkhawm tura ka insiam pawh chu ka phurlo khawp mai, kan kal dawn chuan Ufamkima chuan Message min lo thawn leh a "Vawiin nuam deuhin i hmang dawnnia, i u pawh lawmpuina thu min lo hlan sak dawn nia" tih thu a rawn thawn chuan ka rilru a ti mang zo vek mai. 

Mamuana lah chuan Christa chu a khawsik a san thu leh Ufamkima pawn chaw a la ei miahloh thu te a rawn sawi tak deuh deuh a, ka awm a nuam thei tawhlo, inneih hunserh chu awm nuam manglo zetin ka tlingtla hram a, helhkam nei ṭeuh chung chuan mi hmuha hlim hmel han lantir chu ka ti hleithei meuhlo a ni.

Biakin aṭanga kan let hnuah Usangzuala te inlama lawiturin an inbuatsaih leh mawlh mawlh a, kei inchung room ah Umawii te ṭhiandun inthlak laichuan ka lo ṭhu kun tlawk tlawk thung. "Saitluangpuii pathlawi zun phur hi chu ka kham tak tak a ni, a unaunu min thlah mek tih pawh zuk hre chang hauhlo chuan" Umawiin chuan Ukimkimi bulah a ti hlak hlak a, "In inhau a mi a Mimite?" Ukimkimin a lo tih pawh chuan ka va uksak peih lemlo.

"Ufamkiman engmah min hrilh ve lo a mahse, ka lo kal tho ang aw" tiin Mamuana chu Message ka thawn a. Reilo te ah min lo chhangin "Lo kal duh rih lo mai rawh, hei kan boruak a rit reuh lutuka, Rosy chhungte lam hi an lungawilo a, Christa ngaihsak tawklo ah puhin Ukima hi khin an tum a, ngaihzawng a neih thu te an hre ve bawk sia, i lo inlan rihloh mai aṭha ang, chanchin chu ka lo hrilh zel ang che" tih thu hi min lo thawn a.

(End of chapter - 17)