POSSIBLE NIGHT (CH - 1)

POSSIBLE NIGHT - Ahmangaihi violette Khiangte

CHAPTER - 1

"Hadasi.." lehhawi meuhin ka va en a, U Zautea ka lampana a lo kal mek chu ka va hmu a, zanin hi ṭhalai hla zir zan a ni tak e. "Zanin i hman dawn em, ka rawn sawm dawn che a nia aw" beisei lawk ang ngeiin a lo ti a, Kohhran ṭhalai thiltih han phat hi chu rilru a nuam lo ṭhin khawp mai.

"Naupang ho Exam lai a nia, ka chhuah theih pawh ka van ring lo em?" inthlahrung taka ka tih laichuan ka Alu khai lai chu a rawn thlek a, "Bialpawn fehchhuah chu i kal dawn em?" tiin min zawt leh a, chhanna pek pawh a inthlahrun awm zozai tawh.

"Tunlai chu U Zopuii a nuamsam lo a, naupang ho ka kut zalah an tla a, ka tel thei pawhin ka ring lo" ka nuihtlawn deuh titih a, a hmel chu rei tak pawh ka en duh lo, U Zautea hi kan kohhran ṭhalai hruaitu te zinga mi; rawngbawlna a inpe zo tak leh keipawhin ka ngainat em em a ni.

"I U nupui hi chu a...." a ngawi leh daih lawi a, ka rual chuan a rawn kal ve nghal mai bawk. In lama ka buaizia a hria a, ka u fate pali vangin kohhran ah ka tal tam thei meuh lo, kan khua hi khaw lian ti a sawi tur a ni lo a, in 200 pawh kan la kai meuh lo, mi pawh kan la inhre chiang hlawm viau nghe nghe, U Zautea pawh hian inchhurkhura ka buaizia chu a hriat ve tho ka ring.

"Hla thiam sa tho ania kan zir dawn, Bialpawn fehchhuah te chu naupang Exam zawh ah daih a lawm, rawn tel ve hram tum rawh, nang ber i awm loh ten eng ruai kan ni nang" a ti bul bul a, ka kal ve chak zia hria sela chuan aw...chutihrualin ka kal theih loh zia pawh hi hria se ka ti.

"Inchhungkhurah ka buai rih em a ni, ka tel leh tel lohin awmzia vak a nei chuang nang.." tiin ka nuihsan a, ka pi te in kawt kan thlen zui tak vangin ka ding a, a la kalsawn mai bik lo.

"Anih, hla zir zawh ah lo len a rem em?" a ti leh khauh a, chu pawh chu ka hnar tho a ngai. "Lehkha kan zir rei deuh ṭhin a, Puia leh Hruaia ber hi an nia, an pawl a sang ve tawh a" ka tih takah chuan a bu ve ta nghat a, "Anih Exam zawh lamah ka la rawn leng dawn nia" a tih leh chuan ka hnial ta bik lo. Kar thar maiah an Exam zo tawh dawn a, tunkar chauh chu min lo hriatthiam rih mai a ngai a ni.

U Zautea kal hnuah ka pi te in lam ka pan a, ka pu chu tap bulah meilum hnungpuak zawngin a lo ṭhu a, a bulah ka piin vawkchaw a lo chan mawlh mawlh bawk.

"Dawrah i kal em ni?" ka piin a lo tih chuan ka aw liampuat a ni ber, Filter lam panin tui ka va in khawlh khawlh a, ka ni Hluni hmel ka hmu hauh lo.

"Ei in la rel ṭan nange?" ka tih chuan "Chaw chhum chiah a ngai a, zanin tlai chu a ṭhing kan her lum mai mai ang" ka piin a lo ti thuai a. Ka ni awmna ka zawh leh laimekin Bualin lama a thawm ka hria a, a inbual niin ka hria.

"Zopuii chu a la dam lo reng em ni a?" ka pi bawk chuan a ti leh a.

"A zia deuh tawh chuan ka hria" ti a ka chhanna chu a awih bik vak lo niin a lang, ka u nupui hi chuan damṭhat ni a nei meuh lo, han damlo tak tak phei chu a ni lem lo a; ama insawi dan a ni mah ang chu, englai pawh hian na hi pahnih thum a nei reng ṭhin a, keichuan ngaiah ka nei der tawh zawk.

"I u in hlawh a la tawh em, Alu Bag inlak ṭawm te in duh lawm ni?" ka ni lo chhuakin a tih chuan lu ka thing a, "Tun thla ah chuan a lak hman pawh ka ring lo" ka tih chuan min chhang loin pindan lam a pan a, ka u hi Kohhran shool ah a thawk ve a, Kohhran chuan hlawh an la pe thei rih lo a, thla hnih zet chu hlawh a la tawh lo bawk nen sum lama kan harsat vanglai tak a ni.

"I u zawk lehkha kan lo zirtir hi chu a pawi ngawt mai, nupui a duh hma leh lutuka, nuamsa pawn a dah hman hleinem che, mipa fa tiin beisei kan han neihsan tehlul nen" ka pi chuan a ti hlak hlak a, he thu hi vawitam a sawi tawh, pawl 12 ka zawh hlim khan ka U Dika hi College a kal mek a, pi leh pu thlazar hnuai aṭanga lehkha zir kan nih vangin kan pahnih chuan kan zirzawm thei ta tlat lo a, khang hun laia ka rilru natna te pawh kha ka la hre reng mai, ka ṭhiante ka hmuh apiang hian ka rilru ah a rawn thar leh ṭhin a, heti hian ka piin a lo sawi chhuak leh zauh ṭhin nen; ngaihtuahna a vak kual nasa ṭhin khawp mai.

"Eirawng bawl ka ngai a, ka va phei a nge" tiin ka chhuahsan thuai a, kan in lampana ka kal laichuan ngaihtuahna a vak kual leh ruai tawh.

Lehkha ka zir ve laichuan kan pawlah a thiam thei ber ka ni ṭhin a, ka U Dika pawh a zirlaiah a tichhe pawl a ni ngai lo, theihna chu kan nei a, ka mamawh ber zir zawmna tur pawisa kan nei lo a ni. Kan unaua pakhat zawk chauhin lehkha kan zir zawm theih tur thu kan hriat khan ka tawpna tur chu ka hmuthiam tawh a, ka pu chuan ka u chu mipa anih vangin zir zawk turin a ti ta reng bawk.

Beisei loh tak mai thil kan tawng zui a, ka u chuan College a zawh rualin nupui a rawn ru ta kha ania, beiseina ka lo neih ve hram hram ṭhin chu a tawp chiang hle, tunah chuan fa 4 naupang te te a nei tawh a, a thawhna School lahin hlawh an pek theih loh chang a tam a, kan pawisa neih ang chu kan nitin khawsak na daih chang chang a ni bawk, Primary School ah chaw chhumin ka inhlawh ve ṭhin a, chu chuan ka mamawh ka inphuhruk ve ṭhin.

Naupangte kan nih laiin ka pain min boralsan a, ka nu chuan khawdangah pasal a nei leh tawh a, kan inbiak pawh lohna pawh kum tam fe chu a ni tawh, nula kum 25 mi niin ka u leh a nupui te kiangah ka khawsa a, hmalam hun suangtuahna hi engtik aṭang khan nge ka bansan ka hre tawh lo, ka nunah hian ka lungawi chu ka ti thei hauh lo, beisei tur dang ka hre lo mai chauh a ni.

Kan in peng ka thlen dawnah Amawii nen kan intawk hlawl a, "I va inngaihtuah muk ve, saw ta ṭang khan ka rawn hui tawh che" a lo ti var a, Amawii hi ka ṭhianṭha ve ber a ni a, kan ṭhenawm lawka khawsa an ni bawk. 

"Kan inah i lo kal em ni?" Ka tih chuan a ner nang a, "I u nupui pawh a lo phun leh char char tawh khu, i thang rei a ti deuh che aniang" a tih zawm zat a, a va han zia lo ṭhin tak.

"Zanin kha ka thei dawn lo a nia, naupang lehkha zirtir ka ngai a" tih leh kal ka rual a, "Anih ka rawn sawm dawn lo che a nia" a ti chu ban ka vai thuak a, hmanhmawh deuhin kan in lam chu ka pan a, ka thlen rualin U Zopuii chu a lo ang hlak hlak a, ngaipawimawh loin kei ka che zung zung bawk.

U Dika a lo haw chuan eirawng ka la bawl a, nidang ang bawkin zu rim a nam leh huam tawh a, zu a in chang hi chuan ka be tuitam ngai meuh lo, a thinchhia a; phunna tur a zawng reng ṭhin. An pindan a a luh hnu lawkah inhau thawm ka hre zui a, hei hi kan tlaitin dan a ni ta.

Inchhungkhur nuam lo, nunphung danglam chuang lo, engkim hi ngaiah ka nei a, midang lakah ka inkiltawih tial tial bawk. Ka ṭhiante chuan khawpui ah lehkha an zir a, a ṭhen chuan nupui pasal an nei tawh a, eng ngemaw chang chuan an nun hi ka awt ṭhin, fahrah niloin chhungkaw pangngai taka seilian ni ve ta ila ti a ngaihtuah chang pawh ka nei ṭhin, ka zep lo ka awt ve ṭhin miau a ni.

Pindan lam thawm chu a ṭha ta khawp mai, ka vah te ho chuan min rawn melh leh hrak hrak ṭhin a, ngaihthah luih tum pawhin a tih hleihtheih tawh lo, kut a inthlak lo chauh tawh chu a ni ber e. 

"Pawisa kan nei lo tih i hre vek, Hruaia pawh pheikhawk thar kan lei theih loh laiin hetiang thil hi i lo ba a maw, khawi lamah nge lerh kawh i lo tum?" ka u chuan a ti chher chher a, "I pek a tan ka ti lo, aman chu keiman ka pe thei" pawr zetin U Zopuiin a ti a, "Khawi rawn la teh, kan sat sawm vek teh ang" ka u in a tih leh rualin thawm chu a ri rawk rawk a, eng thil emaw an inchuh niin ka hria.

"Âni...." a naupang ber Sangtean a lo tih takah chuan hmanhmawh deuhin Gas ka Off a, pindan kawngkhar lam chu ka pan thuai bawk.

"Hadasi pawn a duh duh a lei a, i sawisel ngai em ni..." kawngkhar bulah chuan ka ding ran a, ka tha a khur nasa viau tawh.

"Hadasi chu nula a lawm, a thil neih te chu i hman ṭawm fo a ni lawm ni" ka u chuan a ti leh a, ka hming ri tel ve kher chu ka duh lo takzet.

"A uikawm zia i hre lo anih chu, engmah hman ṭawm theih a ni hleinem, a dah thukru zel a lawm" U Zopuiin a tih chuan ka hrethiam lo tak zet.

"Engmah a dah thukru lo ang, darthlalang bulah khan a neih ho a dah vek, a bak leina a nei bik lo, nang angin engmah a ba ngai lo bawk" ka u chuan a ti leh a, U Zopuii chuan a la duhtawk mai bik lo "A Foundation leithar pawh a mutna bulah a dah daih saw en ta che, ka hman a hlau a nih saw, keichuan ka neih ang ang hetah hian ka dah chhuak vek, a tih dan hi min huphurh tih a hriat reng, tun aṭang chuan ahranga kan neih angai a ni mai." a ti leh zel a, engthil nge maw ka lo tih le, a sawi ang rilru chu ka pu hauh si lo.

Ka u lo pen thawm ka hriat rualin choka lam ka pan ruak a, dawhkan bul ka thlen rualin ka u chuan min lo ko a, ka va hawi chuan a hmel dur khup chu ka hmuh hmaih lo, ka lakah a lungawi lo tih a hriat hle bawk.

"I incheina ho hi i u Zopuii hman hlauin i lo thukru ṭhin em ni?" a rawn tih chuan min ti hamhaih khawp mai. "Thukru lo e, ka neih ho chu Darthlalang bulah khan ka dah vek kha" ka sawi rualin ka hrechhuak a, nimin inkhawm ka kal tur khan ka khum bulah engthil emaw kha chu ka dah ngeiin ka hria, ka insiam hmanhmawh em vang a ni a, chutianga thuhruk tum chu ka ni lo.

"In thil neih chu inṭawm rawh u ka tih fo kha, Zopuii hi huphurh reng reng suh, ani pawn i tan a ui ngai loh hi" a tih laimekin Uzopuii a lo chhuak a, "Engmah ṭawm theih a ni lo ka tih kha, mi phal mang lo lo ṭawm te chu ka duh bik hleinem" a lo ti hmarh hmarh a, ka u chuan min melh rum viau tawh.

"Engmah ka ui hleinem.." ka ti zawi sep a, ka u chu rui kher lo sela chuan ka chhang huai ve deuh mahna, tun dinhmunah hi chuan ka ngawih theih a ṭul tih ka hria, hetiang hun a awmdan tur chu ka hrechiang viau tawh a, buaina pumpelh nan ngawi zawk ka nih a ngai.

"I thil thuhruk chu dahchhuak vek rawh, Zo-i nang pawh i ba kha rul ang che, ka rulh sak dawn hlek lo che a nia" pindan khar ri bur thawmin a zui a, zanriah kan ei rual leh dawn lo tih ka hre zui bawk.

Naupang ho chaw ka eipui a, ka u chu a muhil niin ka hria, U Zopuii kha khawnge a chhuah tak ka hre lo a, naupang ho lah chuan kan boruak an hrethiam ve aniang an ngui nghiai hlawm a, kan inchhungkhur boruak chu a rit hluah hlauh a ni ber, thaw a ipik a, hah a dam lo takzet.

Dar 10 vel thlengin lehkha ka zirtir a, a te ber mutchhuak chu a chiau hiar viau tawh a, an chhang a zing bawk nen kan chhangchhiat vanglai tak a ni, Sangtea ka puak laimekin U Dika chu a lo tho chhuak a, "Khawnge Zodinpuii?" a rawn tih chuan chhan dan tur a vang khawp mai. Ka chhan hma chuan pawn lam a pan vut a, chuveleh naupang ho chu indah fel turin ka hrilh a, an mutna pindan lamah ka phei pui thuai bawk.

"Âni...apa kha eng nge a tih dawn a?" Hruaia mitmengah chuan a hlauhthawn zia ka hmu thei. "I nu a ko dawn anih kha, lo muthilh san daih rawh u" ka tih chuan thil awmzia hrethiam in a nau Puia bulah chuan a inthawlh sawk sawk a, rei an rial lo, pawn lam aṭang chuan inhau thawm bawk chu a rawn ri leh a, ka thinphu chu a rang dup dup mai.

"Min thlah rawh, Vanlaldik...i duh duha kut i thlak tur ka ni lo, nanga zurui mai mai..." an pindan lamah an inpawt lut niin ka hria, kan mutna chu Plywood bang maia in pindan anih vangin thawm chu a chiang hle a, U Zopuii ṭap fiah faih thawm in a zui thuai bawk.

Naupang ho an muthilh hnu pawh chuan ka la meng ta reng a, pindan lehlama mi te pawh an la muhil bik lo, an phun sur sur reng a, a changin an ri leh hluai ṭhin, zan rei deuh hnu chuan thawm dang a lo awm a, nupa nun an hmang a ni, an inrem ta a ni ngei ang, ka tan erawh hriat nuam a ni lo, muthilh tumin mit ka chhing a, ka chhungril ipik lutuk vang chuan thaw a hah tet tet reng a, hah zetin thawk ka la leh ringawt ṭhin.

"Hadasi hian ngaihzawng a nei lo em maw ni, engtia rei nge kan hnenah a awm dawn a, naupang nen kan inchawm zo ṭawk ṭawk anih laiin.." U Zopuii ṭawng ri vang chuan ka meng hlawl a, hetiang zawnga a ṭawng ka vawikhat hriatna a ni a, min ṭhawng hle!

"Ani awm lo se engtin nge kan khawsak ang, naupang enkawl tu ber a nih hi.." ka u chuan a ti mai a, "Ka ti thei vek, a tih vangin ka ti lo mai mai a lawm, i Ni Hluni hi khirh viau lo sela chuan awm phei se a pawi lo a, ka khawngaih vangin ka sawi lo mai mai zawk a lawm" U Zopuii bawk a ni, min lo ngaimawh hle ang tih ka lo ring miah lo a, ka rilru a na veng vang mai.

"Ngaimawh viau lo mai teh, a duhna na ah a awm ang chu.." ka u chuan a ti leh hluk a.

"Ngaihzawng te hi a nei ve lo em maw ni, hmelṭha deuh hian a Luck lo riau mai, a awm chut chut ringawt a, tlangval tan pawn ngaihzawn awmin a awm lo, rawn rim ve tu ho te hi tlangval Senior deuh deuh Zautea te tih ang reng an nia" U Zopuii chuan a ti leh a, "Kan khua ah ngaihzawn tlak an awm loh hi, an rui dual dual a, tumah kawm chi an awm lo" ka u chuan a ti leh mai a, an thilsawi chuan thil dang daih min ngaihtuah tir a, Zomuansanga rilru ah a rawn lang lo thei lo.

Pawl 10 aṭanga 12 ka zir thleng khan kan la inzui a, nitin khaw ṭhenawmah class kal turin kan inphur ṭhin a, ani chu ka tleirawl ngaihzawng; ka ngaihzawng hmasa ber a ni bawk, an hausa a, a pa pawh kan khaw ṭhenawm a Higher secondary ah Mathematics Teacher a ni, kei ka chawlh tak hnuah ani chu Shillong lamah zir zawm turin a kal a, a lo haw hun nghakhlel taka ka lo thlir laiin ngaihzawng dang a neih thu min lo hrilh a nih kha. 

Kan inhmuh hnuhnun ber chuan tlangval hmelṭha tak a ni tawh, ngaihzawng dang pawh a nei leh tawh a, kan nundan chu lei leh van ang anih loh pawhin chhim leh hmar ang vel kan ni, ka tana beiseiawm a ni tawh lo a, keipawh ka ni tawh hek lo, ka hmangaih em tih ka chiang lo chungin ka lunglen changa ka ngaihtuah chhuah fo ṭhin a ni.

Chhungkaw tinin kalphung leh chhin dan ṭhan kan nei a, kha kha kan chhungkaw chin dan ṭhan chhuanawm lem loh tak chu a ni, a chang hi chuan engkim hi a damdup a, a daih rei lo ṭhin mai pawh a. Heng ka chhehvela min hualtu te hian nitin min eiral mekin niin ka hria, Hadasi...hmeichhe hlim thei tak leh chantawka lungawi mai ṭhin kha ka ni tawh lo a, hmeichhe lungngai leh derdep tak chauh ka ni tawh.

Naupang ho in Exam an zo a, zanlam pawh kan mu hma ṭhin khawp mai, an nu leh pa te inhau thawm an hriat hlauin hma takah ka muttir ṭhin a, kei erawh ka tlaivar a ni thawthang ṭhin, mut hmunah titi ngaihnawm loh tak tak ka ngaithla ṭhin a, U Zopuii chuan min hnawh bo na a duh hle tih ka hriat takah chuan ka mangang ve lo thei lo. 

Pasal ka nei mai dawn em ni tiin ka inngaihtuah fo a, min duh der tu chu ka hmu ve na meuh mai; mahse, kan khaw tlangval ho chu ka u sawi ang kha an ni, duhzawng lah ka nei hek lo. Ka nun pum hi he khaw tereuh tea ka hman ral hi a ngai ngei dawn tih chu a chiang a, duhthlan tur a vang takzet a ni.

Zirtawp tlaikhat chu ruah a sur cherh cherh renga, khua pawh a vawt lam lek lek a, ka u te School pawh an lo bang hma khawp mai,  thlanglam tukverh bulah ṭhuin ral hla taka tlang ruah sur vanga paw chiai chu ka thlir a, ngaihtuahna erawh a ruak ngawih ngawih thung. Amawii nen Message kan inthawn a, "Zautean a duh che ania, ka bulah a sawi reng a, i duh ve em?" tih angreng min lo zawt a, fiamthu in ka lo chhang mai mai thung.

Ka Phone ka hmeh mawlh mawlh laichuan ka U Phone a lo ri a, ka pi te in lam aṭangin an lo Phone niin ka hria. "Tu mikhual nge, ka pa a hria a maw..?" ka u chuan a ti bul bul a, "Hadasi ka rawn kal tir ang" a tih takah chuan ka va en thuai a, chutah a Phone dahin ka lam a lo hawi a, "Mate...ka pu te inah kan mikhual tur va hruai lawk rawh, ka kai deuh emai.." a ti zui zat a.

"Tu mikhual nge a..?" ka tih chuan "Ka hre bik lo, Aizawl lam mi a ti, ka pa ṭhian a tia, tu nge mawni dawn ni?" ani pawn a ngaihna a hriat loh hmel khawp mai.

"Nihliap lian ber kha keng la, va kal lawk mai rawh" a tih leh takah chuan phur lo deuhin ka tho chhuak a, pawn ka chhuak chu ruah pawh a lo han deuh tawh a, kawng chu a nal ṭha viau thung a, tluk sual palh pawh hlauhawm tak a ni.

Ka pi te in lampanin ka kal nal nal a, a thlen hma a ruah a rawn tam leh deuh vangin ka tlan a ni ber tawh, Current lah chu a thim hmiah a, kawl a phe zawr zawr bawk nen ka thau ah min man a, ka tha te chu a khur lek lekin ka hria.

Ka pi te in kawtah chuan Bolero var a lo ding a, kawngka ka hawn hma chuan inchhung lama ṭawng thawm chu ka hria a, ka pawt hawng chu ka lam an lo hawi ṭhap a, kawngka hnaih bera lo ṭhu mikhual pa chu patling upa lam tawh lek lek, palian pui leh thau lam deuh a ni a, a lu a kawlh tul mai. 

"Hei hi Thankima fanu chu a nih hi.." ka puin a lo ti thuai a, chuveleh mikhualpa chu lo dingin min lo chibai thuai a, "Hmuh loh karin an lo nula tlangval reng tawh mai a hei, ka hmuh lai kha chuan naupangte kha an la nia, a u mipa khan nupui a nei tawh maw..?" a ti nghal zung zung a.

"Fa pawh pali lai a nei tawh, mipa hlir an nei a, an chhang a zing bawk si a, an chhangchhe rih khawp mai" ka piin a tih laichuan mikhual pa chuan ngun thluk fahran hian min lo thlek a, Bati eng hnuaiah chuan a hmel chu ka en chiang a, a pa len chu thuhran a hmel chu a nelawm loh hle a, a aw thum leh zel nen ka ngainat loh zawng tak a ni.

"Tunge i hming Mami?" a ti deuh hmuk a, a aw ki pawh a nelawm chuang lo.

"Hadasi ka nia, ka pa ṭhianpa maw i nih?" hawihhawm taka ka tih laiin ka darah min rawn kuah salh a, a koki ka chen awrh chauh. Rang deuhin ka ding sawn leh a, ka ni nen an inbe zui chu ka ngaithla ve kar a, ka pa ṭhianpa Aizawla ka pa a awm ṭhin laia a zuk awmna te an ni awm e. Ka pa chu an Driver a ni ṭhin a, chu mikhualpa chuan a ngainat hmel hle bawk.

"Lawngtlaiah ka kal dawn a, remchangah ka rawn tlawh che u anih hi, zin chhuah hi a khat bawk si a, rawn zawn chhuah che u hi ka duhna a rei tawh, i u te pawh chu hmuh ve ka duh a, min va hruai lawk rawh, chawl rei hman pawh ka ni lo ang hei khua a chhe emai" mikhual pa chuan a ti zung zung a, ka inzui chhuah laichuan ruah pawh a lo han fel tawh a, Motor lam pan nghal mai a tum chu a Motor a chuan chu ka hreh ta tlat.

"Ka pu, a hla lo a, Motor dahna a awm chuang si lo a kein kal mai ang" ka tih chuan min hnial bik lo.

Ka hnungah a kal a, a umphak loh tawk vel turin kei ka kal thung, thli thaw chu a vawt kher mai, kawng chu a nalin tui tling a tam hle a, ka hnunga mi chuan a dai per leh chhak ṭhin a. Kan kal rei a ti ta deuh aniang a phun bul bul a, ka chhang duh lem lo.

"Eh eh eh...khai a...tiang te chuan kan tlu khaw lo mai dawn a lawm maw le" a ti hluk hluk a, ka va hawi laichuan nalah a lo tang ni ngei tur a ni rah tur zawngin a ke lehlam chu ka lek kang uaih a, "Lik hmawr de zawk khawpin kan tlu ang tih pawh a hlauhawm a lawm" a tih leh hluk a, a thinrim tak tak anih ka ring. Ka nuih a za viau nain ka nui ngam lo.

"Engah nge a hla lo te i tih mai mai le...mel khat dawn kan kal tawh a lawm" a tih leh chuan "Kan thleng ṭep" tih zawngin ka chhang a, a chil a chhak phurh phurh a, engmah phei chu a sawisel zui ta lo.

Kan in kan thleng chu a hah ngang mai, a khup dawmin Veranda ah a ding a, a thaw hlawi hlawi a, "Lo lut rawh" tih leh luhsan ka rual a, a lo lut chu a rawn hawi sang larh mai.

"Vanlaldika kha maw, i pa Thanglura ka nia, mi pawh i hre tawh ngut lo ang a" ka u darah chuan a kuah a; a sawi pah nawk nawk a, ka u chu a bang bo deuhin ka hria.

A han insawi zel takah chuan ka u chuan a hre ve ta deuh a, a chiang lutuk bik tawh lo, mikhualpa in kan inhmuh hun a sawi chu a rei ve tawh lulai em a ni, keiphei chu kum 4 vel chauh ka la ni ang chu.

"Hadasi chu tunge i hming pum?" thingpui ka va pek laichuan a lo ti leh a, "Lalduhsaki" ka tih chuan a bu nghat nghat a, a inchei dan leh a hawiher, a ṭawngkam zawng zawng aṭang chuan mi naran mai chu a ang lo, mi thilti thei tak leh hausa tawk tak a ni ang tih a rin theih.

Ka u nen chuan an titi bawrh bawrh a, chaw kan la ei loh vangin chaweiah a sawm bawk a, mikhualpa chuan zuk hnar hauh lo chuan "Ei i la a ni mai a lawm" a ti nghal thawr mai.

Khua a thim tawh vangin chawei ka siam sawk sawk a, naupang ho nen dawhkanah chuan kan leng meuh lo. Ka U in naupang ho chu ṭhutthlengah a eitir a, U Zopui lah chuan mikhualpa chu a be siam siam a, eng hna nge a thawh ṭhin te a zawt luam a, mikhualpa lah chu a ṭawng duh em em bawk. 

A in sawi danah chuan sumdawng a ni awm e, dawr a neih thu bak chu a sawi ṭha duh vak lo, a insawithei lo a, a hmel erawh a chapo larh thung. "Aizawl in rawn kal chuan min rawn tlawh ngei ngei ula, kan vengah chuan ka hming an hre vek ang, 'Khawnge ka pa Lura te in' han ti ula, an hriat loh chuan "Thanglura lukawlh kha' in tia nga, an hre em em ang" chaw bar pah chuan a ti mawlh mawlh a, ka u chu ka va mitmei leh zauh ṭhin.

"Hadasi chu pasal i la nei lo maw?" ka lo bu nghat a, "Kum engzat nge i nih ve tawh?" a ti leh zel a, ka kum zat ka sawi chuan min thlek vung vung a, "Lehkha i la zir em?" a ti leh khauh a, ṭha tak chuan ka chhang ve mai bawk.

Zanriah eikhamah chuan rei a ṭhu tawh lo, ka u in a ka pu te in thleng a va thlah a, a lo let har khawp mai, a lo haw thawm ka hriat chuan dar 10 a pel tawh a, a leng tlang nghal a nih hmel.

Zing ka tho chu eirawng ka bawl mawlh mawlh laiin ka u a lo tho a, "Pa Lura kha ka pa sawi ziah ṭhin kha a lo nia, hmanah an inah pawh min hruai tawh, Aizawlah chuan a awm thei pawl an ni ang" a ti sap sap a, ka chhang lem lo.

Nithum hnuah Lawngtlai aṭanga a lo let leh lam chu a lo peng kawi leh a, kei in a ka awm loh lai a ni thung, chumi ni chuan Kohhran hnatlangah Amawii nen kan kal a, a hma a min hrilh tawh angin U Zautea chung chang mawlh chu min sawi pui a, "Val Senior a nia, a duat thiam ngawt ang che, a nu a fel bawk sia, in in a hrehawm deuha awm aichuan nei mai rawh" tiin thu min rawn a.

"Pasal ka neih daih chuan ka u te an buai lutuk ang, naupang ho hi ka buaipui an ngai bawk a" ka tihsan mai a, U Zautea te ang tlangval khirh lutuk chu ngaihzawng tur pawhin ka la suangtuah ngai lo, kan ngaina viau nain hetiang zawng kher hi chuan ka en thei lo a ni.

"Zomuansanga bawk a mi?" a tih chuan a nih loh thu ka hrilh vat a, Zomuansanga vanga ngaihzawng ngaihsak lo emaw min ti fo a, chu erawh ka rilru a ni lo, ka duh zawng ka la tawng lo mai chauh a ni.

Tlaia ka haw chu ka u a lo awm ve teh tlat a, "Vawiin chu i va bang hma ve, chawhnu in chawl a mi?" ka tih chuan "Pa Lura kha a lo peng a, min lo Phone sia ka haw hma a lawm" a lo ti a, kan Pa Lura chuan naupang ho pawh eitur eng engemaw a lo hawn ṭeuh a, ka u pawh cheng sang nga a lo pe a ni awm e.

Zanriah kan kil laichuan ka beiseiloh deuh thil ka u chuan a sawi a, min ti hamhaih zawk khawp mai. "Pa Lura khan fapa a nei a, a fa upa ber leh mipa awmchhun a nia, Hadasi nen hian sawirem mai ila a tia" a tih chuan  phawk lutukin ka va en a, U Zopuii nuih a lo za hle thung.

"Mi ang vak lo te hi a lo ni lo maw, mihausa deuh an nih hmel a, Hadasi te ang mo atana a duh chuan mi pangngai tak a ni thei lo ang" tih pahin a nui kur kur a, "MBA zirlai a nia, mi pangngai tak chu a niang" ka u chuan a ti leh a, "Pasal neih ka duh lo" ka tih chuan min melh rulh ringawt.

A sawi zui tawh dawn lo emaw ka tih laiin kar khar hnuah a rawn sawi chhuak leh a, "Pa Lura khan min lo be ṭhin a, a fapa tan chuan a duh viau che a niang, 'Palai tirh a rem em?' a rawn ti sek a" tiin min rawn a, kan melh no lo hle ringawt. 

Tun ang khawvelah insawirema innei an awm tawhin ka ring lo, hnamdang chuan an lo ti pawh a ni mahna, inngaihzawnna awm lo a inneih chu ngaihtuah pawh ka ngaihtuah thiam lo, thil hlimawm tak chu a ni lo ang tih erawh ka chiang.

"Hadasi...lehkha zir leh te i chak em?" a tih chuan ka en vat a, chu thu kher chu ka chhanna tur a hresa a lawm.

"Lehkha i zir leh duh chuan Pa Lura fapa kha nei la, 'Lehkha te pawh a duh leh a zirzawm leh anga' a ti che a, eizawnna i duh leh a ngaihtuah sak vek thei dawn che a, a fapa a ro khawmtu tur i neih phei chuan i nuamsa tawh dawn a sin, kan chhungkaw dinhmun i hria a, lo ngaihtuah chiang deuh rawh" ka u chuan min nawr dawt lo mahse, ka lak aṭanga thil duh chu a chiang viau a ni.

"Lehkhazir chu i chak lo em ni?" a ti nawn leh a, "Chak e mahse, pasal neih kher chu ka chak lo, vawikhatmah ka la hmu bawk si lo a" ka tih chuan "Lo en tur chein a fapa nen lo kal an tum a" a ti leh mauh mai.

"Eng a...min rawn en anga..!" ka lo ti he haw a.

"Aw..a fapa pawn hmuh ve phawt che a duh a, a duhzawng pawh i lo ni bik lo maithei a, han inhmu phawt ula inngaihdan te in sawi leh ang chu" a tih chuan chhan ngaihna ka hre tawh lo. Zep loah chuan duhthlan tur dang hi ka nei lo a tih theih a, retheihna, inchhungkhur leh thil dang dangah pawh, pasal chungchangah ngat phei chuan keimaha ngaihdan siam hi ka harsat a ni.

"Tunge a fapa chu ni a, amah i hmu tawh em?" ka tih chuan a la hmuh bik loh thu a sawi a, "A hming chu Marcos  a tiin ka hria, tlangval fel tak chu a nih ka ring a, pa te duhzawng nupui neih mai a duh danah hian a chiang reng a lawm" ka u chuan a ti leh zel a, a rilru a lo hmin sa viau a nih hmel e.

Mut hmunah ka ngaihtuah a, ka chak em em ṭhin 'Lehkha zir leh' chu chu ka ban phak ah a awm a, ka khawvel zim tak aṭanga kal chhuahna Chance a ni, hma hun suangtuahna tawi tup ṭhin kha thui tak thlengin ka ngaihtuah a, ka ṭhiante ka awh em em ṭhin te ang khan ka awm ve thei dawn tih chu ka hria, ka unaupa tan dinhmun ṭha zawk pawh ka pe thei maithei a sin, naupang an rawn lian anga khawsak a harsa dawn chauh a, ka unaupa nun harsa lutuk hian ruihhlo a belh loh phah mial maithei, zawhna tam tak ka inzawt a, chhanna chu ka nei ta in ka hria.

"Tlangval chu ka hmu ve phawt anga, a duh zawng ka ni lo maithei a, keipawn ka duhzawng a ni em tih hriat ve phawt ka duh" tiin ka u hnenah ka hrilh a, Pa Lura chu a lo be nghal ni tur a ni, "Kar tawpah an lo kal dawn" tih chu ka u hnen aṭanga chhanna ka dawn leh hmasak ber a ni bawk.

(End of chapter - 1)