HELLO LOVE, GOODBYE (CH - 7)

HELLO LOVE, GOODBYE - by Ahmangaihi violette Khiangte

CHAPTER - 7

Dil bul ka thlen phei chuan Zeus chu tui chhungah a zuanglut tawh a, ka kawng thleng vel ka va dai lai chuan Eva emaw Zeus hmel reng reng hmuhtur a awm lo, ka theihtawpa ringin an ni pahnih hming chu ka lam a, tui luang ri bak chu thawm a reh vung vung thung.

"Saw ta saw" Nicholai a au ri ka hriat rualin ka hawi kual thuai a, ka piah deuh li thuk lai aṭanga Zeus rawn inhaichhuak chu ka va hmu chawpchilh a, Eva a rawn pawmchhuak tel bawk, ka pan phei ruak a, Eva taksa chu nunna nei tawh lo ang mai hian a zawi a, chu chuan min ti hlauthawng zual a, mittui a sur zung zung reng.

"Eva, Bawihte...thi miah suh, ka tihpalh aw ka tihpalh a ni, lo meng lul teh" ṭap chungin ka ti mawlh mawlh a, mahse, leia an mut hnu pawh chuan a che eih lo.

Nicholai chuan min lo namsawnin a bawihsawm zui a, Zeus-an min lo kuah lai chuan ka va ban leh ṭawk ṭawk ṭhin, "Ambulance call vat rawh" vin takin Nicholai chuan a rawn ti a, ka taksa khur nasa lutuk vang chuan ka che thei der lo, Justin-a kalsawn chuan a Call a nih ka ring.

A theihtawp chhuaha Nicholai-an a buaipui chung pawhin Eva chu a che chang lo a, thawk a rawn la hek lo, a awmah chuan Nicholai chuan nemin a ka ah thawk a han pe ṭhin a, ani erawh mitthi ang hmiahin a mu reng a, thil awmzia zawt tur pawhin ka aw a chhuak thei tawh lo, Zeusa min kuahna chu ka hmer ngat ngat a, "A thi tawh" Nicholaian a rawn ti chuan ka nghilh dup mai, ka mit chu mittuiin   a chim hneh em avangin ka khaw hmuh a fiah lo a, ka hrawk chu hnawhtu awm ang maiin ka ṭap chhuak thei hek lo.

"Khawi maw keiman" tih leh Zeus chu thawh a rual a, CPR a pek laichuan Justin pawh a lo let leh tawh "Minute sawm hnuah Ambulance a lo thleng ang" a rawn ti a, "A tlai tawh" Zeus an a rawn ti ve chiah bawk.

Lei chara Eva mu chu ka va kuah thlawp a, a taksa chu a vawt hle a, a hmel dang lep leh a hmui duk vek ka hmuh rual chuan ka awmchhung chu na taka chhun ang maiin a na a, ka thawk a buai titih der mai. "Joshie hi kalpui rawh" ti a Jade ṭawng ri pawh chu hla tak aṭanga ri lo chhuak ang mai a ni.

Keimah vang a ni, keimah vang...Eva, ka ṭhian ṭha ber a thi...chu pawh keimah vangin...!

"Min en teh" ka biang tawn tawnah rawn dawmin Zeus chuan hnai takah min en a, "Thawk la vak rawh..min en la han ti teh le" Zeus aw chu ka bengah a kiu vung vung a, harsa lutukin thawk ka la zui a, "Aṭha..muangchangin thaw chhuak leh rawh" a tih ang chuan ka ti ve tak na a awmzia a awm lo, ka vai riai ringawt mai.

A awmah min pawm bet thlawp a, Eva hmel ka hmuh phal tawh loin min din hliah bawk, Jade-in ka sam a rawn chul laichuan ka lungphu chu a zawi hle tawh, ka mit sulh sulh a, rei lo teah thawm chu a reh ta vek a, a bak chu engthil nge thleng mumalin ka hre ta lo.

Nikhua ka hriat leh chuan Damdawiin khumah ka lo mu a, "I lo harh ta hram e" ka nu in a tih ri ka hre hmasa ber a, ka lu chu vuak hrep ang mai hian a rit a, na em em sawitur awm si loin ka chau hluah hluah thung. "Khawnge Eva?" ka nu chuan min chhang mai lo.

"Khawiah nge kan awm?" ka ti nawn leh a.

"Methodist Hospital ah kan awm a, pawnah Zeze leh i ṭhian te pawh an awm" thawh nghal mai ka tum chu min lo vuanin, "Mu rih rawh, Doctor kan ko a nge" tiin ka nu chu a kal chhuak nghal a, ka thiltawn ka ngaihtuah let chuan Minute tlem te liamta ang mai hian ka la hrechiang a, ka thaw a hah leh up up mai.

Ka kuta Venflon chu pawt thla hlawkin ka ṭhu chhuak a, chutih laichuan khawngkhar rawn inhawngin Zeus leh Nicholai te an lo lut a, "Tho suh, i mut a la ngai a nia" Zeus chuan a lo ti thuai a. 

"Eva kha khawiah nge a awm?" ka aw ah chuan hlauhthawnna a lang a, a thi tih ka la ring phal lo, a ṭhat thu min hrilh ka la beisei fan a ni.

"A chhungte an hruai tawh" thawk ka la hak a, "A ṭha chu ka van lawm em?" ka awm dawmin ka han ti a, min en mek tu te mita ka thil hmuh chuan min ti hahdam rei lo kher mai, Zeus chu ka en vang vang a, "Eva chu a ṭha em?" tiin ka zawt nawn leh a.

"Naktukah an vui ang" ka hriat sual chu a ni hauh si lo, engkim hi mumang vek nisela ka ti a ni. Thawk lehkhatah ka khur hlawk hlawk a, ka awmna pindan chhung chu a vir muai muai bawk. "Joshie, in ngaihtuah harh teh" tih pahin Zeus chu ka khumah lo ṭhuin min rawn vuan a. "Police ho hian thil awmzia hriat an duh a nia" Nicholai chuan hlauthawng takin a lo ti bawk. 

Doctor leh ka nu lo lutin ka Venflon paihthlak kha min rawn vuah ṭhat sak a, "Thaw hah a nei a, a ṭhianṭha ber a chan mek a, a tuar thiam lo anih hi" tiin Doctor hnenah ka nuin a lo hrilh a; mahse, a ni lo....ka ṭhianṭha ber chu ka tihlum zawk a ni. 

Ka phatsan a, a rilru ka hliam bawk, thih duh hial khawpin ka ti na a, duhthlang tura min tih laiin ka hnawl bawk a nih kha, Eva...min van haw nasa dawn tehlul em, hetiang hian i ti duh tak tak dawn tih hria ila chuan i duh ang apiangin ka awm mai tur, i thlarau chuan ka chungah zahngai sela i ṭhiannu hi min ngaidam lul teh. Ka inchhirna hian tawp chin a nei tawh ngai dawn lo, engtikah mah i thihna vanga ka thinlunga hliam leh ser hi a dam thei tawh lo ang.

Zingkar hma takah Zeus a lo thleng a, Sandra lo hruaiin ka inthlakna tur an lo keng a, nizana an haw hnu khan Police in thu an lo zawt fiah niawm tak a ni, "Victim lamin chhuichian an duh ka ringa, chuvangin engkim ka hrilh ta mai" a tih chuan ka hnual rawih a, Eva nu leh a laizawnnu lakah eng nge ka sawi tak ang, chhuanlam tur ka nei dawn lo, an ni lehzel pawhin min haw dawn ta a nih hi.

"Kal i hreh anih chuan Sandy nen kan kal anga, lo awm hahdam mai ta che" ti a ka nuin ka ngaihdan min zawh chuan kal ngei ka duh thu ka hrilh a, Eva hun hnuhnung berah hian tlan chhia a pehhel thei ka ni lo, a nu hnenah ngaihdam ka dil ngei a ngai bawk.

Zeus hnenah a ruala ka kal theih loh thu ka hrilh a, ka sawifiah lo na a a hrethiam tho chuan ka ring. Ka nu Car in Eva an vuina thlanmual lam kan pana, kawnglakah te chuan ngaihtuahna a kal thui duh ṭhin khawp mai. "Min hmangaih anih chuan.." ti a min ngenna aw ri lah ka bengah a cham reng a, Zeus-a hmel ka hmuh a piangin ka na hi a thar reng dawnin ka hria, engtin nge hetiang tawh hnuah hian kan inkar hi ka kaltlang pui theih ang le, a ṭhian ṭha ber thihna a mawhphurtu ni chungin a ṭhiannu mipa hmangaih a la kawp thei tiin miin min sawi ngei anga, Eva thihna hian engmah danglam a thlen lo anih chuan ka damchhungin he phurrit hi ka phurh a ngai bawk ang.

Mrs. Simmons chu min hmuhrualin a mittui a tling pam a, ka melh ṭha ngam meuh lo chu a ni. "I ṭhiannu chuan a ti ta nge nge e, veng tlat tur ka nih laiin ka ngaihsak tawk lo a ni, vanglai hun a hmang ṭan ve dawn chauh a sin maw le" a ti vang vang a, Laura erawhin min melh thip hle thung, Eva khan engkim a hrilh ṭhin a, min dem hle dawn tih chu ka rindan sa a ni bawk. 

Midang kalsawn laichuan Laura chu ka bulah a lo kal a, ka Rose ken laichu rawn enin a ner sak a  "Engtin nge i rawn inlan ngam zawk, a thlarau tal chu zah ve a i hmel rawn lan leh tawh lo tur i nia sin" a ti khar khar a, "Pawi ka ti lutuk..Eva kha.." ka ti hman chiah  tih ah "I lei bawlhhlawh khan a hming lam ve tawh suh, sualna nei lo ang maia i rawn kal pawh hian a pawi chu i sawi fe tawh zawk a nia, amah tihlumtu ngei a vuina a i lo kal hi a lawm in i ring em ni?" a ti sak sak a.

Chhan ngaihna pawh ka hre lo, mahni inthiamlohna nen ka na em em tawh a, a ṭawngkam chuan min tina lehzual bawk. "Saw pa vang sawn maw ka nau chu i phatsan a" a melhna lam ka hawi chuan hla deuh taka Zeus lo ding chu ka va hmu a, a Side Pocket zen chungin kan lam a lo hawi ve mek a ni.

"Saw mihring nen sawn bumin inphiar ru a, dawt i hrilh laite khan a ring em em che a sin, han in enteh, hetianga Eva thih hnu hian inchhirna i nei em, nge inchhirna nei lo ang maiin saw mihring saw i la kawp zawk, van aṭanga ka nauin a lo thlir che a nih chuan a rilru a na zual hle dawn a nih hi" a mitmeng huatna a khat leh a ṭawngkam tin te chuan min hmet ngut ngut mai hian ka hria. Ka mittui chu ka hru zauh a, Zeusa lo kalphei ka hmuh chuan ka pen sawn thuai bawk.

Eva kuang chungah chuan Rose par dahin ka dinchilh vang vang a, mangṭha na hnuhnung ber ka sawi laichuan ka kha a chih zo a, ka kut te chu an khur dar dar reng. "I ṭha em?" ka bula Zeus lo ding chu rei tak pawh ka melh ngam lo, a hmel ka hmuh hian Eva kha ka hmu tello thei lo a, ka chungrilah hian min mawlhtu engthil emaw a awm a ni.

"Joshie, i lakah awmdan kan lo thiam lo ang tih ka hlau khawp mai, kan dem hauh lo che a ni aw, nangmah pawh in dem lo la, thil hi a nihna anga pawm thiam kan tum dawn nia" Mrs. Simmons chuan a ti charh charh a, ka nuin lawmthu a hrilh mawlh mawlh laiin keichu ka ngawi ran a, anih na ang taka thil ka pawm vang zawka na ka ni tlat si a.

In lamah ka let leh hnu chuan Attic ah ka chho a, ka bulah chuan Beer leh Cigarette te pawh ka inchhawp na a ka melh peih ṭawk chauh a ni, ka thinlung natna hi zu leh zial vanga veng hawk thei a ni lo, lungngaihna lipui ah keimah ngei inbarh lutin thihna aipawha hrehawm zawk natna ka tuar ve mek a ni.

Sandy chuan "Hun in a la hnem ang che, mahni inti hrehawm reng suh, awmzia a awm tawh dawn chuang lo" tiin min hnem a tum ve ngial a, min ti hrehawm zual ting mai.

Zanah Zeus a lo kal a, Room a ka tawm tlat vangin min hmu loin a kir a, a Phone call takngial pawh ka chhang lo, ka thei ngang lo a ni, Laura thil sawi te ka ngaihtuah let leh lek phei chuan Zeus hi hnaih tawh lo tawp tur niin ka inhria, kan inkawp chhunzawm anih chuan Eva thihna hi engmah lo mai a ni ang, Eva ka tana hlu em em kha...keimah vanga thi a ni.

Zan ka mu thei lo a, engmah ka ei thei hek lo, ka Room ah ka tawm chawt a, Sandy takngial pawh ka be sawm peih lo, Bazar leh pawn chhuah thlengin ka thlah a, Zeus erawh min hmu turin a rawn kal tluk tluk thung. Ka nu chu ka khawsak dan vang chuan a mangang hle a, Doctor hial min koh sak a, ka tan a ṭawngṭai reng bawk.

"Zeus a lo kal a, kartawpah an khua ah a haw tawh dawn a, rawn hmu ta che" ka pindan khawngkhar pawn aṭanga a rawn tih chuan ka rilru a buai khawp mai. Ṭawngkam ṭha tala thlah chu ka duh a, ani erawhin chutiang ringawt chu a duh dawn lo tih ka chiang. 

"Airport ah ka thlah ang tih hrilh rawh" tiin ka nu chu ka chhang a, rei vak loah Zeus aw ka hre zui a, "Inbiak kan ngai, kawngkhar hi lo hawng teh" a rawn tih chuan ka tho chhuak thuai a, khawngkhar bulah chuan dingin thawk ka han la vang vang a, "Joshie, lo hawng rawh bawihte" chu tak chu a hmel ka hmuh theih loh chhan a ni, min hmangaih a, kei hian hmangaih let ve turin huaisenna ka nei tawh lo.

 "Nangmah kha in ti hrehawm lo teh, thiam lohna i nei lo a nia, tuman an dem lo che" min ngaihtuahna aw ri chu ngawirengin ka ngaithla a, "Min kalsan rawh" tih bak chu sawi tur ka hre lo.

"Ka haw hma hian sawi dun tur kan nei a nia" a tih leh chuan "Engmah sawitur a awm tawh lo Zeus, kan thei lo, kan tawp angai" ka aw chu a zawi khawp mai.

"Ka hmangaih che Joshie, inṭhen i duh chhan kha min hmangaih loh vang ni loin i inthiamloh vang chauh a ni, kawngka hawng la sawi dun zawk teh ang" a aw chu a vin lek lek tawh, a bulah chuan ka nu a awm ve aniang phun sar sar ri ka hria a, "Hetiang chuan ka kalsan ringawt thei lo, ṭha deuhin min thlah anih loh chuan engtin nge ka haw theih ang" Zeus chuan a ti bul bul a.

"Hun a la mamawh rih anih hi, hrethiam rih mai rawh, a rilru a dam hunah a rawn be mai dawn che a lawm" ka nu chuan damthlap hian a ti a, chutih laiin Zeus chuan kawngka a rawn kik reng thung.

Ka beng hupin kawngkhar ngheng chuan ka ṭhu a, mahni chauha awma ṭha hawm hawm mai ka duh, ka thin tawt lutuk te chuan min hnawh hlum thei takngial dawnin ka hria. 

Rei deuh hnuah chuan thawm chu a reh a, min kalsan ta anih ka ring, khum lam panin khumah chuan ka bawkthlawp a, ka Side table inhung chunga Eva nen kan thlalak dun chu ka han melh vang vang a, Cheerleader kawr hain hlim tih hriat takin a nui a, chu thlalak chu Squad a a tel hmasak ber ni kha a ni bawk, Zeus kan tawn hma leh engkim pangngai lai kha a ni, Zeus hi kan nunah lo lang lo ta sela ti tein ka ngaihtuah ta hial mai.

Nithum hnuah Zeus chu Odessa ah a let a, a thlen thu Aunty Shanon-in ka nu a lo hrilh a, thlah tur takngial pawhin ka kal lo, ka chungah a lawm ta vak bik lo nge a reh zui ta vang vang a, kan inkar pawh a tawp chu a ni ta ber e, a kal ta erawhin engmah danglam a thlen lo a, Eva lah a lo let thei tawh hek lo, ka khua a har a, in ngaihtuah lungpuamin ka ṭap fo ṭhin.

"I pa in a lo hruai dawn che em tih a hre duh a, i awmdan vang hian keichuan kal lo mai la ka duh a, L.A ah chuan ngaihsak reng tu che i nei lo ang, i pa tana hmeichhe awmchhun i ni lo tih chu i hriat kha" ka nuin a tih chuan ka ngaihtuah tur thu ka hrilh a, High school ka Graduate veleh ah ka pa kianga awm tum kha ka ni a, kan boruak tawn vang chuan ka eng tih tha mah a tho tawh lo a ni.

"L.A ah chuan ṭhian thar te i nei anga, boruak dang hip paha hawi khawthawn chu a nuam zawk ang" Sandra chuan a ti ve bawk a; mahse, ka pa a rawn lan tak mai loh vangin ka nu kianga ka la khawsa ve ta reng a, Christmas pawh ho lam angreng takin kan hmang liam a, Jade leh Nicholai ten min rawn tlawh ve zawk ṭhin tih loh chu ṭhian dang ka kawm ta miah lo bawk.

Zeus a chin chin chu a khat tawkin ka hre ve reng ṭhin a, New york ah hna hnawk turin a kal a ni awm e, keipawh kum tharah chuan ka pain min rawn hruai ta a, chuta chin ah chuan Zeus a chanchin pawh ka hre ngai ta lo, ka nuhrawn Zoe chu ka lakah a ṭha a, ka pa aiin ka ti ti pui tam mah ang tih tur a ni. Lehkha zir leh lam ka peih tak loh vangin Zoe pangpar zawrhna dawrah ka thawk a, chhun lamah ka buai em em laiin zan lam chu lunglen nan hun awl ka ngah leh em em lawi a, Zeus pawh ka ngaihtuah chhuak fo ṭhin, tunah chuan hmeichhe dang tawngin hna ṭha tak a nei tawhin ka ring a, kei aichuan a nun pawh a hmang nuam deuh turah ka ngai.

Nikhat chu ka beisei loh lutuk thil ka hmuchhuak a, Zeusa khawsak dan tur ka lo ngaihtuah rauh rauh ṭhin chhanna chu ka hre chiang thei ta, Magazine kawma mipa pianṭha zet lem chuang chu Zeus Castillo ngei kha ni, tunah chuan Model lar tak a lo ni tawh a, Internet ah chuan a chanchin leh a thlalak a intar chiai chuai a, Holywood movie lam thlengin a lo luhchilh tawh, tlangval hausa leh hlawhtling tak lo ni tawhin Social media ah pawh ngaisanga zuitu an ṭhahnem khawp mai, rin ang ngeiin nula pawh a lo nei tawh ngei a, amah ang tho a Model lar TV ah pawh ka lo hmuh ve fo tawh thin a ni nghe nghe.

Kan nundan leh khawsak phung chu inthlau tawh tak a ni, Zeusa chu vansanga a thlawh chhoh delh delh laiin kei chu lei lamah ka bir thla ngut ngut thung, kei anga a tawp ve lo erawh ka lawmpui a, a laka ka inthiam lohna pawh a ziawm huaiin ka hria.

(Blogah ni loin fb post ah lo comment ṭhin ru aw, ngaihnawm in tih chuan kan ziak zel dawn nia)