LETTER TO EPHRAIM ( P - 2)

LETTER TO EPHRAIM - Ahmangaihi violette Khiangte

P - 2

"Ephraim, ka ṭhian duhtak.... ka awmna rel chhung pindan tereuhte aṭang hian i natna chu ka rawn hmuhpui ve che a, min van ti lungngai em ve le! Nimin thleng kha chuan engkim kha a kaltluang vekah ka lo ngai a, i duhthlan pawh ka duhthlan a ni ve ang tiin rilru pawh ka siam hman a sin, i rilru a na tih ka hriat aṭang khan ka na ve a, naktuk hnu lam ka ngaihtuah hian ka lungngai bawk.

I thutlukna erawhin beisei na chhete chu min pe a, i lo puitling tawh hle anih hi tiin ngaihtuahna ka nei a nia, i ko a mawhphurhna awmah i tlan chhe ngai lo a, tunah pawh i tih leh tak hi, tunah chuan lungngai rih mahila; engmah reng hi kumhlun tur a awm lo, lungngaihna pawh an kiang leh thuai anga, hun hian thil ṭha zawk min la her chhuahsak ngei ang, ngaihtuahna hrang hrang ka thluakah hian an lam kual a, i hnena sawitur pawh min hrilh thei se ka ti hle mai.

I la hre ve reng em pawl 7 Board Exam i Fail ṭum kha, i pain i Fail vangin a hau che a, i ṭhinrim khan in in chhuahsanin kan inah i rawn tlan a nih kha, zankhuain inchung zawlah kan titi a thla bial zan anih nghe nghe kha. "School ka bang dawn?" i ti hmak mai bawk si a, i bang tak tak ang tih ka hlauh zia te pawh ka la hre reng mai.

"Class khatah kan ṭhu dun thei tawh a nga, kan inpui thei tawh dawn a lawm, vawi khat chauh chu beinawn leh rawh" tiin ka ngen che a, a hunlai khan ṭah pui ṭeuh chungin ka hnem che a mahse, khata ṭang khan nitin kan pahnihin engkim kan ti dun thei tawh a, Exam result ṭha tak pawh ka nei dun ta anih kha. Kei aiin pawlsang zel ta la, Class khatah ṭhu dun loin kalchho zel ni la kan hun hlimawm tak tak te kha kan tawng awm si lo, vawiin ang hian i ṭhian ṭha ber ka la ni reng tho a ngem tih pawh ngaihtuah tham tak a ni.

Kan hun hman liam tawh kha han ngaihtuah let la, tun hun nena khaikhin rual chu a ni lo ang, a chang chuan 'Hma hun ah hian thilṭha reng reng a awm tawh lo ang á' tiin rilru kan ti hah ṭhin a, a aia ṭha dang kan hma a awm hi kan va hmu pha tawh ṭhin lo a, ka thilsawi awmzia hi i hria a ang em le? Ka sawiduh ber chu maw, tuna i lungngaihna hian nakinah lungawina tur a la siam sak leh ang che, ring tawp la, huaisen takin paltlang ang che."

 

Rel kiu ruai ruai thawmah ka harh hlawl a, ka Sana ka han en chuan dar 9 a lo ri tawh a, vai ho pawh an chiar leh nak nak tawh, kan thlen chin ka ngaihtuah laimekin Dodo-a kha a lo kal a, "I la inpeih na nge a, kan thleng dawn tawh a nia" a rawn ti hlut a, ka tho chhuak rang khawp mai.

"Engtin nge i awm dawn, lo hruai tur che an awm em?" a tih chuan ka rilru a buai ta nak a, vawiin hi inneih ni a ni tawh a, ka chhungte chu inneih na lamah an kal vek dawn a, min hruai tura ka pun ber ṭhin lah nupui neitu tur a ni bawk si.

"Mizoram House a awm ti raw? Ka chhungte lo nghah a ngai dawn a" ka tih chuan "Awm e, ka pa te pawh nizanah an riak a, i duh chuan kan rualin haw ve ta che" a ti ta hlauh a, hnial der tur pawh ka awm lo a ni e.

Silchar Train Station aṭangin Auto kan la a, kawngah chuan Coconut leh Grape tih ang reng leiin kan ding zawk a, ka nu Phone ka tum ṭhin a, a tlang mawh khawp mai, tukin chu an buai viau anga, min hruai tur pawhin lo kal dawn se zanin chu helai hmuna ka riah tho a ngai dawn a, Dodo a te ruala haw chu ka tan pawh a remchang ber zawk ang.

Mizoram House kan thleng phei chu House kawtah pa pakhat tawi leh thau lam deuh hian min lo hmuak a, ka ṭhianpa chuan a pa anih thu sawiin an ruala ka haw tur thu te pawh chu a hrilh a, "Nau-an min lo hrilh tawh a, tukṭhuan va ei phawt ula, kan chhuak thei a ni mai" a lo ti var a. Silchar kan thleng ta bawk a, Mizo hmuh tur an tam tawh vangin keipawh in thleng tawh ang riakah ka in ngai a, pawisa nei lo viau mahila thla a muang ve takzet tawh.

Tukṭhuan eikham ah ka nu chu ka be thei ta hram a, "Ka rin aiin inthleng hma leh sia, i pa leh i pa Dinga (Kan ṭhenawmpa) te an lo kal dawn a, an insiam mek" a lo tih chuan "Lo kal a ngai leh dawn lo, mizo haw chho tur an awm ve a, an rualin ka lo haw dawn, inneihna lamah lo va kal vek zawk rawh u" ka lo ti zung zung a.

"Tukinah a lo kal a, a penṭawng aniang chu thei a rawn lam ruai a, a hmel pawh a pawr khawp mai, 'Duhi chu pawisa thawn ula let leh nghal mai rawh se' a tih che kha" nui hak hak chungin ka nu chuan a ti a, a sawi dan tur awki pawh ka ngaihtuah thiam ve mai, a tum bur ang chu maw le.

"Nizanah kan inbiak laiin Phone a dah daih a, a titau aniang min la rawn be leh miah lo" ka lo ti sep a, "Nizanah pawh a haw lo an tia, Pastor in Rehearsal nei turin a nghak reng a, an nei ta lo nge ni?" ka nuin a tih leh chuan ngaihtuahna a kal thui ve viau tawh.

Ka nu ka biak zawh hnu rei lo teah Mizoram lampanin kan tlan chhuak ta a, kan hnungah hian College Bus eng lianpui mai a tlan a, an Banner tar aṭang chuan T.Romana College Mizo Department an nih hmel e. Kawngtluanin kan inchhawm chho a, thingpui in in kan chawl ho bawk a, kan chuanna Rel-ah tho khan an lo chuang ve hi a lo ni a, lo in hrepawh ila ṭha tur.

Aizawl kan thleng chu ka chau ngang mai, Pa Thanga te pafain kan inthlengin min thlah a, thingpui in a rei lo te an ṭhut hnuah haw leh mai a tum chu ka pain pawisa pek a han tum a, an la duh tlat lo. "A Ticket man tal hi la rawh u, in zarah damtakin in a rawn thleng thei a, ka lawm takmeuh a nia" ka nuin a tih pawhin "Kan tihtur a lawm, ka u phei chu a cham leh theih phah a a lawm zawk khawp a nia, harsatna engmah min thlen lo reng reng" Dodo chuan a ti ve tlat a, engmah an lakduh tak si loah chuan lawmthu kan inhrilh mawlh mawlh a, chumi hnuah min hawsan zui a.

"Pathian mi i tawng anih kha" ka nuin a tih chu ka ringhlel hauh lo, thilmak hi ka ring a, Pathian thilmak tih hi vawitam ka lo hmu tawh, tun ṭumah pawh ka harsatna min chinfel sak turin Pathianin a mi te a lo tirah ka ngai thlap a ni.

Ka mu chu tu emaw hian min rawn tung tho lawp a, ka han enchian chuan Ephraima a lo ni a, "Ka chau lutuk" ka tih laimekin ka chalah a kuttumin min rawn nawr a, khumah ka let thla tawp nghe nghe. "I va zawi tehreng em?" tih leh pahin min rawn tung leh nawlh a, min thing nghal nawk nawk mai.

Sana ka han en chuan chawhnu lam dar 2 a lo ri tawh a, ka chau bawka ka mu phawt anga Ephraima hmu turin ka kal chauh ang ka ti kha a nia, amah zawk a lo kal hmasa ta anih hi. 

"Nimin chu engkim a tluang maw?" a lu a thing a, "Engthil nge thleng?" ka lo ti thuai a.

"Engmah hi a ṭha lo, keipawh ka ṭha lo, zankhat naah kan inhau nghal pang mai" a hmel chu hnual rawih hmel a pu a, nizan pawh a mu ṭha lo hle tih a hriat theih.

"Ti nge in in hauh a, buaina dang a awm em ni?" ka tih chuan "I hrethiam pha lo ang, buaina dang a awm lo" a ti leh mai a, khumah chuan sir lam min chhawn zawngin a ṭhu a, a khupah a kiu nghatin a tukkhum a dawm a, han sawipui dan tur pawh a vang duh angreng.

"Insiam la chaw lo eiphei rawh" a tih leh hnuah a tho nghal vut a, "Min lo nghak rawh, ka rei lo ang" ka tih chuan min chhang tawh lem lo.

Inphih harh hmasa loin ka thawmhnaw ka thlak a, pindan aṭanga ka chhuah laichuan thlanglam tukverh bulah a lo ding a, lunglen hmel tak hian kan kawmthlang lam chu a thlir a, a landan chu enliam harsa ka ti takzet a ni, hetiang mize nguai lutuk hi a pu ngai lo a, nidanga ka haw chuan a phur ber berah ṭangin min lo lawm chung chung ṭhin a, tuna a landan erawh a dang hle tawh.

An inah chuan kan in zui phei a, a nupui pawh ka va chibai ve ta ngei a, kan hmelhriat sa tho anih vangin engthil danglam tehchiam mah a awm lo, a pum chu a puar ve tawh hle a, min hmu erawh lawm vak hmel a pu lo a, mo thar a la nih vang nge ni a ṭawng mawh angreng khawp mai. "I kawr hak tur ngaihtuaha kan buai tehlul nen i rawn nang hman ta si lo a, thlalakna ah tal rawn tel hman la ṭha tur" Ephraima nu chuan a ti sap sap a, ka aiawhin U Hminga, Ephraima cousin a lo ding a ni awm e.

"Duhi, engtikah nge i kal leh ang?" ka puin a tih chuan kar thar lama ka kal leh mai tur thu ka hrilh a, Exam hmachhawn mai tur ka nih vangin chawl thei ka ni tlat lo.

"Zuk awm hlen daih rawh" bung zeta Ephraim an a lo tih chuan Nu Rinkimin  min lo nuih var var a, chupa pui lah chu a chaw thleng chawiin a tho nghal daih a, ka hmuh tirh aṭang khan a nui hmel ka la hmu lo reng reng.

Kan chawei kham hnu chuan ka awmna chanchin sawiin ka pu nen kan titi dun a, Ephraima te nupa erawh an pindan lamah an inzuilut a, an rawn chhuah leh mai loh vangin keipawn haw ka rilruk a, ka haw tur chu Nu Rinkimin min lo zui chhuak thuai a, Veranda ah chuan min ko dingin kan han indinchilh leh rih a, "Nizan pawh a rui leh a, engtia tihtur nge maw ni, a pu thu hi kan han zawm ringawt mai pawh a, kan tihfuh loh ka hlau riau tawh" a ti sap sap a, min en danah chuan min zawt te pawh a ang lek lek a ni.

"Engmah a sawi ṭha duh lo a, tunah an innei fel tawh bawk a tihvak ngaihna pawh ka hre rih lo, a la hlimchhawn ema kan en liam rih mai a ngai anih hi, naute te han nei sela hetiang reng a ni bik lo ang" ka tih chuan a bu nghat a, "Ni e tiraw, i ṭawngṭaina ah te lo hre ve reng la, ruihtheihthil ber hi khawih lo sela a ṭha a ni mai" a ti zuai leh raih a.

Ka haw hnu rei vak loah Ephraima chu   a rawn lang veleh nghal a, ṭhutthlengah chuan a ṭhu ngawi ngul a, thingpui chawia ka va ṭhutve laichuan min lo en vung vung a, ka han nuih tak nain min nuihlet ve hauh lo. "Dam lo te pawh i ang a lawm le?" a mitmeng sen ram chu ka en a, ruih  a nei a ni ngat mai. Zu rim ka hre lo a, engthil nge a ruih ka hre hek lo.

"Ka damlo a lawm Duhi" chiang fek fawk hian a lo ti a, a chal ka va dawm sak chu a duh vak lo.

"I awmdan hi ka rilru i ti buai riau a nia, i chhungte pawn hrehawm an ti lutuk ang" ka tih chuan "Kan vaiin hrehawm kan ti a lawm, nang pawn hrehawm ti ve rawh" min ti tehdaih a, eng a sawi tumna nge maw ni?

"Hrehawm ka tih zia hi i hrethiam lo zawk ang, ka ngaihtuah tak tak che a nia, hetiang leh tur si chu engah nge..." ka sawi zawh hmain "Ka inchhir lo bikin i ring em ni?" a lo ti hlur a, ka sawizawm ta lo.

"Nangni pahnih chu in inhau e law?" pindan aṭanga ka nu lo chhuakin a tih chuan ka ngawi ran a, ka va melh lah chuan rum deuh hian min lo enlet a, thil tih sual nei ta ang mai hian ka in hria, ka tihsual lah chu ka der si lo.

"Tinge ka lakah i lungawi loh daih a, ka duh reng vanga lo tlai ka ni hleinem, harsatna ka tawk tih i hriat ve vek kha" thingpui in pah chuan ka ti hlak hlak a, thawk a lo la hluai ringawt.

"Vairam chu a nuam em?"

"Nawm vak pawh ka hre lo"

"Nuam i ti aniang, i tlei emai"

"Ka tlei tih i hria em ni, ka lung te pawh a leng ve viau maithei a sin" min rawn melh ralh a, "Keichu min ngai lo phawt anga" a tih chuan ka nui hak a, "Engah nge ka ngaih loh ang che, 'Lo haw rawh' i tih chuan hei ka rawn tlan haw dawr dawr mai a lawm" min en ran a, sawiduh nei ṭeuh te pawh a ang a, a ṭawngmawh hle lawi thung a.

"Ka lo haw chu min lo lawm viau ka ring a nia, i lawm hmel vak si lo a, chhukthla leh vat ila a ṭha ang" ka tih chuan a hawi sawn hmak mai.

"I thingpui chu in ta che" ka tih hnuah a ban ve ta hram a, ka en reng laichuan lo hawiin "I thingpui siam ka in loh na chen pawh ka hre tawh lo" a ti zawi sup a.

"January thla khan ka kal dawn zanah i lo lenga, i rawn in reng kha" ka lo ti vat a, a ner nak thung. "Duhi.." a rawn tih leh chuan "Eng nge?" ka lo ti he haw a.

"Ka ngai thei lutuk che" thutak deuh hian a ti a, "Kei tak hian ania ngai che, hetianga i hlimloh chuan rilru nuam pawhin min kaltir thei nang" kan in en deuh vang vang a, "Rilru nuam deuha kal kher a ngai em ni?" a tih chuan min ti bangbo hle, zanin chu a ṭawng duh dan a dang hle a, chhan let dan tur pawh ka hre mai ṭhin lo.

Thingpui kan inzawh hnu pawh chuan rei deuh a ṭhu a, ka pa lengchhuak pawh a lo haw tawh a, kan inlengpa ṭawngmawh lutuk chu ka pa pawn   be ṭawng hleithei lo a, kan inmelh leh hrek hrek ṭhin. Ka pa mut hnu chuan kan pahnih ngawtin ka ṭhu dun leh chawrh chawrh a, sana chuan dar 10 a kawk va va tawh a, haw tum awm pawhin a lang lo.

"Inchungah thla eng kan han thlir mai mai dawn em ni?" ka tih chuan a tho tharh a, inchhung chhohna lam a pan zui zat bawk, Ber thla a ni a, thla chu kan inchung aṭang chuan chiang takin a hmuh theih a, khawpui eng chu thla eng hnuaiah chuan a lang dam ruih a, thlasik inṭan tur boruak chuan eng rau emaw hi a nei a, lung a leng veng veng thei.

Kan ṭhutdun fo ṭhinna thir ṭhutthleng inhungah chuan kan ṭhu dun a, "I harsatna te chu sawi la, ka theih ang angin ka lo hnem ang che" tiin dilchhut leh zawhna mitmengin ka en a, chutah min rawn kuahin van lam chu a thlir vang vang a, "Thla khi vawi engzat nge i hmuh tawh?" a lo ti khauh a.

"Vawi za chuang fe aniang chu" tih pahin a thlir mek thla chu ka han en ve a, ngaihtuahna a kalthui em em laiin engmah ngaihtuah chhuah tak tak ka nei lo, ka hnim ruih a, ka ipik a, lunglenna tawrh nuam lemlo tak a ni.

"Kum khat chhungin vawi tam tak khi thla khi i hmu tawh a, i ning ngai em?" a tih chuan chhan ngaihna ka hre leh ta lo, hriatthiam theih hian thil hi a sawi tlat ṭhin lo a.

"I rui anih kha" a nakah ka nghawk zauh a, anin min kuah nghet sauh thung.

"I bulah ka lo awm ve tawh mai dawn em ni?" a tih chuan a fiamthu tih ka hre thei a, "Ka hruai thla ve mai dawn che em mawni?" ka lo ti let a.

"Ka uang hleinem, i bulah ka awm duh tak tak a lawm, helaiah hi chuan engmah hi a nuam tak tak lo" a ti halh a, ka nui hleithei ta meuh lo.

"Engtin nge maw ka han tih dawn che le..." beidawng zeta ka tih chuan ka biang a rawn dawm thut a, a mitah chuan mittui a tling tih ka hmu chawpchilh a, "Ti nge i rilru a nat em em a, thil hi a nilo zawngin i thlir mai mai anih hi, nakinah chuan i tana ṭha zawk tur a ni tih i la hre mai dawn a lawm, dawhthei ve hram hram ta che" ka tihlai chuan ṭah chhuak insum lutukin a inpetruh ṭeuh a, hetiang hian vawikhat te mah ka la hmu ngai lo, min ti hrilhhai tak zet a ni.

"Ka rilru hi engmah i hre tak tak lo, min hrechiang ber ah i inngaia, min hrechiang lo ber tu i nih hi" a aw ah chuan min demna ri ka hre tel ta tlat.

"Ka hriat ngai hriat loh ka neih chuan sawi mai la.." ka han ti leh rih a, ka pui thei anih phawt chuan puih ngei pawh ka duh.

"Nupui ka nei dawn tih ka hrilh che khan engtin mah i awm ve lo em ni?" a ti leh tawl a, a zawhna awmzia ka hriat takah chuan ka en phawk ta viau a, hei zet zawng, ngaihtuah pawh ka la ngaihtuah ngai lo.

"Tlem chuan min ṭhawng ve deuh... ngaihzawng.. i nei tih ka hre lo a" ka ti bah nak a.

"Ngaihzawng ka nei tih i hre ngai lo reng a lawm, heta i awm laipawh khan ngaihzawng chu ka nei reng ṭhin" ka mitah tak min la en reng a, tunge a ngaihzawng chu ka zawt ngam lo, a mitah chuan a lang chiang lutuk tlat tawh.

"Tunah chutiang sawi hun chu a ni tawh lo" ka ti vin hlar a, ka awmchhung te chu a tawt zo ta vek hian ka hria, ka lungphu a rang a, ka rilru a na bawk.

"Theihnghilh daih rawh" a rawn tih chuan ka chhang lo.

Rei deuh kan ngawihdun hnuah "Engmah min hrilh ngai si lo a, tunah kher i sawi leh a.." ka ti chhuak hap a, ka hrethiam thei lo a ni, kha chen a lo ngawi tawh a, tun dinhmunah hian a sawi chhuak leh lawi si a, sawi lo law law zawk se ka ti a ni.

"Ka ti lang reng ṭhin a, i haider lui zawk anih kha, a rukin i hriat vek ka ring zawk a sin" a ti leh mauh mai, rilru in nunhlui a chhuikir a, min duhna hi a lo ti lang reng em ni tiin ka ngaihtuah let bawk. Hun hlimawm leh harsa ka paltlang lai pawhin ka kiangah a awm reng ṭhin a, ka tan belh tur leh innghahna turin a awm ṭhin anih kha, hmeichhia ten an ngaizawng a; a duh let ve ngailoh laite khan ka tan a lo rinawm ṭhin tihna em ni ta ang, ka ngaihtuah thui ngam lo, thil thleng a tam lutuka, ka ngaihtuah tam poh leh ka hrehawm tih a zual mai mai dawn.

"Sawi tawh suh, tunah chuan nupui nei, mi pawmlai i nih tawh hi, ngaihtuah ringawt pawh sual a ni a, Pathian mithmuhah chuan uire i ni tawh, i inthunun theih em kha, i ngaihtuahna kha thunun tum zawk rawh" ka aw chu a chang lam mah awm e. Min chhang loin min rawn kuah a, a dar ngheng chuan thawk ka han la ham ham a, ka ven phah lo takzet.

"Hmaichhanah ngei ka hrilh che anga, min chhan dan a zirin eng pawh ka ti mai ang ka ti ṭhin a, nizan hmasa thleng khan ka lo la nghak che, nang lah chu i muang em em a, hre duh lo nimai awmin i lo lang thei lo a, kan chan tur ve reng a nia nge, kawngdik lo pawh ka thlang tam ta, tunah pawh ka hrilh hun che hi a dik chuang lo; mahse, engtikah mah i hriat loh hi ka phal si lo a, nakinah kan tar hunah emaw, hun rei tak a liam hnuah pawh a hun puma hmangaih reng ṭhin tu che i nei tih i hriat nan ka hrilh che anih hi, hria la, i thinlungah vawng la, a bak a ngai lo, min hriatsak tawp mai rawh" ka lo inhumruh ṭeuh a, ṭah chiam tur em maw ni.

"Nakinah chuan hla siamtu sawi angin 'Lungtum loh leng Vuaia' tiin min lo hrechhuak ṭhin a nga, ka lawm tawk em em ang" ka lo nui hak a, nuih erawh a za lo hle thung, 'Insum rawh' ti niawm takin a awm chu ka chul sak a, ka chalah lo fawpin duat deuh hian min kuah a, rei deuh chu kan ngawi dun ta reng a.

Min duhtute hi khawvela mihring duhawm ber an ni tih hi changvawn ta rût mai ila hmangaihna avanga natna hi kan hre awm si lo. Ani chuan ka chhanna a beisei lo a, a hmangaihna chu ka hriatsak chauh a beisei a. Chu hmangaihna chu ka tan chhanlet mawi a ni tawh lo a, engtikah mah chu hmangaihna chuan par a chhuang thei hek lo ang. Mit khap kar leka buhpawl meivapa chang ta duak ang mai hi a ni.

Ka lehkhathawn ziah sa chu ka melh vang vang a, a hnena ka sawichhuah theih loh thil te khan min rawn hnawh tup tup a, sawi duh ka va han ngah tehlul em...

"Ephraim, ka ṭhian duhtak..

Ka tlaw ngawt mai ti raw, nitin i hmangaihna i lantir ṭhin a, i lak aṭanga thilpek ka dawn zawng zawng te, ngaihsakna ka dawn ṭhin te kha chhan leh vang nei an ni tih tun hnu hian ka hre ve ta chauh a, chhang let tur erawhin ka tlai ta si..

Hei leh chen hnuah hian engtia tam nge i lo beidawn tawh ang le.. keichuan ka ti lungngai fo che tih ka hriat hian i hmangaihna dawng tlak ka nih loh zia erawh ka hria e, nang chu ka tana mi hlu ber, ka ṭhian leh ka thinlung nei tu i ni kumkhua tawh ang, ka thinlungah ka vawng anga, ka theihngilh tawh ngai dawn lo tih tal hi han hrilh thei che i la aw, chu takngial pawh chu kan inkarah chuan a rem tawh si lo a, he hmangaihna tehniai hi, thaw a van ti ipik tak em..."

Ka lehkha chu ziak zo thei loin ka dah leh rih a, ka rilrua thil awm te pawh ka ziak chhuak thei lo chu a ni ber e. Keimahin rilru ah ka pai a, ka nat pui a, ka ṭah pui bawk. Kei changin ka tuar lo, Ephraima tawrhna pawh ka thinlung chuan a hre pha a, hnem turin tih theih ka nei lo mai chauh a ni.

Ka awm chhung chuan a rawn lang leh ta miah lo a, an in a ka kal lahin a hmel ka hmu ngai hek lo, ka zirna lama ka kal leh dawn zan chuan dar 8 bawrah a rawn lang hlawl a, a hmel pawr fap leh a sam buk lek lek te chu mit la lo lekin ka lo thlir a, engtin nge heti tak maia a tlakchhiat chak zawk le, kar kalta mai kha chuan a ṭhat leh mai ka beisei a, tuna a landanah hi chuan beisei ngaihna ka hre ta tlat lo.

"Christmas hmang turin i lo haw a ngem?" tiin min zawt a.

"A rem phawt chuan haw ang" a bu nghat nghat a, lawm hmel emaw lawm lo hmel hmuh tur a awm lo.

"I lo haw ngei ngei dawn nia" a tih hnuah min chhuahsan a, kha mi zan aṭang khan kan inkar chu a hla ta sawt em aw tih tur a ni, kan inṭhian ṭhatna thlengin kan inkara tlazep hmangaihna khan ramri a kham ta a, thudik puan chhuah kilh kelh hi a lo ṭha ber lo em ni ang ti tein ka ngaihtuah bawk.

Delhi ka chhuk leh hnuah pawh kan inbe lo ta vang vanga, tun hma ang chu ni sela ka thlen tluan thu te hrilhin nitin kan hun hmandan te pawh kan sawi dun leh ngei ang, biak chu duh viau ṭhin mahila nupui nei tawh anih vang leh kan inkara thil awm vang chuan ka thei tlat si lo, a khat thawkin a chanchin chu ka ngaihven ve reng a, chanchin lawmawm ka hre mang meuh lo.

Ephraima chuan ruihlo a khawih tam telh telh a, a tira chuan zu a in a, mahse zu ah chuan a duhkhawp a hmu lo a ni ngei ang "A inchiu ṭhin" tih thu chu a chanchin ka hriat hnuhnun ber a ni ta.

A tan ka ṭawngṭai fo ṭhin, a laka ka rilru, ka hmangaihna leh duhsakna te chu lehkhaphekah chauh ka tihlan a rem a, chu lehkha chu phek tam taka sei a ni tawh, zantin mittui nen ka ziah belh a, a phek tir lam leh a tawplam thu chu a inpersan thui hle tawh bawk.

Christmas hmang tura ka haw dawn chuan ka nuin chanchin min rawn hrilh a, "I ṭhianpa chu Home ah an dah ta anih kha, hmu ve la chuan i hai tawh maithei a ni, a cher tawh lutuka, amah pawh a ang tawh lo, a chhungten a thih mai an hlau a, Home a dah chu keipawn a ṭhat zawk ka ring, i lo haw hunah i va tlawh ve dawn nia" a lo tih chuan hnuk a ulh ṭeuh mai.

Christmas hma ni thum a la awm tih ah Aizawl ka thleng chho a, ka thlen zanin Ephraima te in ka va tlawh a, a nupui rai puar pawh a lo awm ve ngei a, a ni pawh a hmel a ngui hle. An inchhung chu khawhar in ang mai hian a ngui nghiai a, min hmuh rualin Nu Rinkimi lah a ṭap titih der a, han titi luam pawh a remchang lo.

"I lo haw tih hria sela chuan lo chhuah a chak dawn lutuka, hrilh pawh ka huphurh emai, nangmah ngeiin va tlawh ve ang che aw" aw tham chhel hian a lo ti a, ka puin urlawk ni a kalpuiah min lo sawm bawk a, ka hmuh chak rualin keipawn ka huphurh a ni, a chanchin ringawt pawhin rilru a ti na a, keimah in demna liantak ka nei bawk.

Urlawk ni chu a lo thleng a, zingkar hma takah thoin bazarah ka kal a, Ephraima eiduh zawng thil chi hrang hrang leh thawmhnaw lum te ka lei a, dar 10 bawrah Nu Rinkimin min lo Phone in an inpeih tawh thu a lo sawi a, kei leh Nu Rinkimi, ka pu bakah Ephraima nupui te nen kan va kal ho ta a, mahse, a chhungte tumah a hmuh duh loh thu Duty te a lo hrilh a ni awm e. Kan thil kensak te chu dahin beidawng lutukin kan haw leh ta chu a nia, engtin tak Christmas hun te hi hmang liam ve ang maw. 

Kum thar leh Christmas inkarah Nu Rinkimi nen kan va kal leh a, chutah pawh chuan min la hmu duh ta chuang lo, a ṭhian kawm ve ṭhin ni ngei tur hi a chhungten an lo tlawh a, a chanchin kan zawt thei ta hlauh a, chuta a thil min hrilh chuan lung a ti chhe tak zet. 

"Duhsaki a lo kal a, min hmuh chuan a rilru a na mai mai ang, ka taksa a ṭhat deuh hunah ka hmu chauh ang" a lo ti a, "Dam a tum ve teh a nia, lo nghak hram hram rawh u" tiin chupa chuan min hrilh zui a, rilru na viau mahse min hnem ve takzet a ni.

Kum tharah kan Result a lo chhuak a, Pathian zarah Mark ṭha tak nen College pawh ka zo ve ta a, ka Document buaipui turin Delhi lam ka pan leh a, ka thlen thlak hnu lawkah ka nuin min lo Phone-in Ephraima chu Home aṭanga a tlan chhuah thu min lo hrilh a, a nu ten a tlawh hnuhnun ber khan Delhi a ka kal leh tur thu an lo hrilh niawm tak a ni, hun remchang a hmuh veleh ah a rawn tlanchhuak a, keilah ka lo kal leh hman chiah si a.

"A nu Phone rawh, amah chuan Phone pawh a nei rih lo, fuih la, a awm hun chhung tur a zawh hma chu awm leh rih turin ti la a ṭha ang" ka nu chuan a ti luam a, keipawn biak ngei chu ka duh.

Chumi zan chuan Nu Rinkimi ka bia a, "Lo biak che ka tum laitak a nia, hei kan inthlem ve tak na a i lo haw hma chu luh a hreh deuh a, thla khat chiah awm a ngai tawh a, an nu nau neih hma chu lut leh rih se a ṭha ang, naktukah hian lut leh sela kan duh a" a lo ti zung zung a, "Ka lo bia a nge" ka tih chuan a kal chhuah thu a lo sawi leh a, an dah let leh a hlauh vangin inah pawh a lo awm duh lo anih hmel.

Rilru nuam lo deuhin ka mu a, ka muhil dawn siar siar tih ah Number hriat loh hnen aṭangin Call ka dawng a, beisei loh deuhin Ephraima nupui a lo ni a, "A lo haw chiah a, i be duh em?" a lo ti reuh a, ka biak duh thu ka lo hrilh ve thuai bawk.

Rei lo te ka nghah hnuah Phone chu mipa aw hian a lo chhang a, "Hello.." a tih ri chuan mittui a ti hnai leh ruai mai, a aw chu a la ngai reng a, hman ang tho khan a la ngaihawm bawk.

"I dam ṭha em?" ka aw chu a ri chhuak che che chauh a ni.

"Damṭha e.." zangkhai deuh hian a ti a, ka mittui ka lo hru leh rih a.

"Engtikah nge i lo haw dawn, ka lut leh vat dawn a sin" a tih chuan "Kartawpah ka lo haw lehnghal dawn a, lo va lut leh phawt rawh, ka thlen veleh ah ka rawn tlawh ang che" ka ti zung zung a, "Naute kan nei ṭep tawh, i awm bo reng chuan a buaithlak ang, hna i zawn dawn pawn hetah zawng rawh, kei chuan ka enkawl thei dawn lo a, ka nupui hi i puih zel a ngai a nia" a rawn ti duah a, rin aitakin a ṭawngkam pawh a pangngai daih mai.

"Tehreng mai, i buai ve ngai miah loin ka lo buaipui vek dawn nia, ngaiawh leh kha han tum phawt mai la, engkim a ṭha vek a ni mai" ka ti sap sap a, "Ka tum a lawm, a la buaithlak rih deuh anih hi, lo lungngai lo ula ka dam leh vat dawn a nia" a tih leh chuan tlemin awm pawh a nuam ve ta deuh, a tum a a bei ve mek tih hriat chuan beiseina thar min siam leh a ni ber. 

A tukah ka Document te chu ka buaipui fel a, Ephraim a pawh zingkarah a chhungten Home lamah an va dah leh tih ka nuin min hrilh a, a nupui pawn min rawn hrilh ve nghe nghe, kei ang thoin tih ngaihna a hre vak bik lo a, a rilru hahna chu ka hnena rawn thlen a duh tih pawh ka hria, ṭha takin ka lo chhang a, ṭawngtai tam turin kan inchah mawlh mawlh a, hmeichhe sual chu niin ka hre lo, a pasal pawh a hmangaih ve takzetin ka hria.

Mahse, ka haw dawn tukah chuan ka insiam mawlh mawlh laiin thu ṭhin ṭhawng takin min rawn deng dawt a, ka tliak hnawp a ni ber. Ephraim a zan mu chu a ṭhian ten an kai tho zo lo a, a muhil hlen ta a ni. Chu thu chuan thawk lehkhatah  ka khawvel chu a sawi nghing vek a, mu leh mal reng ka nei thei lo.

Mittui nen zinkawng ka zawh a, ka ṭap kawngtluan bawk. Dam tuma a beih laimek pawhin thihna kutvawt chuan a man tlat a, kan lak aṭanga pawt hrangin min chhuhsak a, a fa lo piang tur hmel takngial pawh a hmu hman ta lo. Kan inhmuh leh hunah chuan damṭha takin ka hmu tawh anga, a nui hmel pawh ka hmu thei tawh ang chu tiin suangtuahna ka lo nei hman a, ka suangtuahna erawh buhsi thliin a chhem len ang mai a ni thung.

A nui hmel ka hmuh hnuhnun ber kha Delhi ka kal dawn nikum kum tir lam kha a ni, Lengpui Airport ah min thlah turin a lo kal ve a, Airport chhung ka luh dawn thleng khan ban rawn vaiin min nuih var var a, kha mi ṭum kha a nui hmel ka hmuh tawp ber na tur tih hria ila chuan ka kuah vawng vawng tur.

Ka thlen chuan a boral dan pawh chiang zawkin a chhungten min lo hrilh a, zan a muthilh theih loh vangin mutna damdawi a ei ṭhin a, khami zan khan a lo eitam deuh nitur a ni, a taksa chak loh lai anih vangin damdawi chuan a lungphu a ti muang a, a muhil hlen ta a nih hmel. Mi beisei tur awm tawh lo leh na tak an tawrh hnua an thihna nge dam tuma an beih laimeka an thihna hi na zawk ang le. Ephraima khan dam a tum a sin, a dam hunah chuan tiin duhthusam te pawh a nei ngei ang, engah nge thihna hi a nunrawn viau mai le...!

Khawvela ka ṭhianṭha ber leh ka hmangaih Ephraima ruang chu leidaia zal turin kan thlah liam a, Pathian ang chhungah damna famkim nen a lawi lut ngei ang, kan thawnthu erawh a la tawp lo, a lehkhathawn pawh nitin ka la ziah belh a, chhiar thei dawn lo mahse, ziah ka bansan ngai lo, fapa hmelṭha tak amah chhun em em tu a nei tih te hi han hre ve sela chuan aw, lawm avangin a biangah mittui a luang ve ngeiin ka ring.

"Ephraim, Ka ṭhian duhtak...

I kal tak aṭangin kum a lo vei ve ta reng mai, thla eng kan thlir hnuhnun bera i zawhna kha ka la hrereng a, heti hian ka chhang ang che 'Thla chu her liamin a rawn lang leh ṭhin a, vawitam hmu tawhin hmu nawn leh pawh ni ila kan ngainatna a reh thei tak tak lo, nangmah ang chiah hi a ni,  liam tawh mahla rilru ah i rawn thar leh ṭhin a, ENGMAH DANGLAM RENG A LA AWM LO E."

(A tawp ta)