A DIFFICULT JOURNEY OF LOVE by Ahmangaihi violette

A DIFFICULT JOURNEY OF LOVE

by Ahmangaihi violette

Special story of Vss  

November 2016

"I rui tawh em, damdawi i ei leh duh em?" ka bengbulah lo kun hniamin a rawn au lang lang a, kan chuanna Bus buk lui lui reng chuan lu a ti hai a, an zu rim pawh tawrh a har tawh tehlul nen; ring lutukin zai an play a, thawk pawh a har lam mah a ni. 

"Insawn tawh suh" tih pahin Ruthi thawh tum uaih chu ka pawt ṭhu leh a, "Hmangaihsanga saw.." a tih vang chuan hnunglam ka hawi thuai bawk, ka bialpa chu kan Class hmeichhe luruh ring zet zet ho bulah khan a lo la ṭhu a, an nui ham ham ri te chu ka kham hle tawh, Rih dil aṭang khan kan inbe leh ta miah lo va, a Beer in nasa lutuk ka hau kha a la thinrim reng aniang, min ngaihsak lo a, kei lahin ka be duh bik lo.

"Ngaihven suh, a awm awmin awm rawh se, class ṭan leh hunah a hre mai ang" ka tihsan ta hmak a, Ruthi chu a la hawi zauh zauh reng.

Ka Earphone vuahin zai ka ngaithla ta daih a, tukverh lam hawiin mit ka chhing ta bawk a, Ruthi tho leh chu ka ngaihsak zui duh lem lo. Mizo Department hoin Rih dil tlawh an rawt khan ka kal lo ang tiin rilru ka siam a, Hmangaihsanga thlahfal ka duh loh vanga kal leh ta chauh kha ka ni a, kal lam aṭang khan ka inchhir ṭan tawh. Hetiang hian min ngaihsak lo viau dawn tih hre lawk ila chu; titau tur ringawt hian ka kal buai lo zawk tur.

Bus a din rual chuan ka meng chhuak hlawl a, zinglam dar 2  a lo ni reng tawh a, hma lama hmeichhe ṭhenkhat ṭhu an muthlu ve tih loh chu hnunglamah an inhawr khawm a, ka bula Ruthi ṭhu pawhin hnunglam ngawt min la chhawn a, ani pawh hi a phawvuaka kal ral chi ve bawk a ni. A duh angin min thurual pui thei si lo a, hnunglama hmeichhe ṭhu ho chu pawh ve a chak tih pawh ka hai lo, Hmangaihsanga chu awm ve lo sela a insawn daih tawhin ka ring.

"I zun a chhuak lo em ni, chhuk ve lawk ila?" a rawn tih chuan ka puan sin lai chu ka bat ṭha sauh sauh a, "A vawt em mai, ka chhuk peih lo" tiin mit ka chhin san leh thuai a, a kal ta in ka hria. Rei vak loah thawm a rawn awm a, pawnah chuan mei te chhemin an ri ham ham a, khua a vawt bawk si a, zuk in ailum ve pawh chu chakawm duh tak a ni.

Ka phone ka en chuan signal a lo awm va va a, zan reh lai anih vangin biak tur erawh an vang hle, kan thlalak ṭhenkhat te chu ka han enkual ve ngial a, ka lanna a awm mang lo, Ruthi thlalak a ni deuh ber, Hmangaihsanga nen vawikhat chu kan la dun ve a, chu pawh ka bula a awm fuh ve lai kha a nia, titau rilru nen thla ka la ve peih ta mang lo a, kan zingah chuan nuam ti lo ber ka nih ka ring.

Darkar khat dawn kan din hnu chuan duhtawk an ngah ta hlawm aniang an rawn lut khawm ṭak ṭak a, dar thum a ri hnai thuak a, kan zinkawng chu a la thui  hmel khawp mai. Champhai ah khan riak leh tur kan ni a, mipa ṭhenkhat insual buai an awm vangin kan haw tlang phah a, engkim takmeuh chuan min ti lungawi lo. Lawm lohna tur thil ka hmu thei bik lutuk chu ka thiam loh te pawh a ni mahna.

Kan tlan ṭan leh hnu chuan tlemin thawm pawh a reh ve ta deuh. Muthilh ka tum laimekin ka bulah chuan tu emaw hi a rawn inthawlh sat sat a, ka va thlek rualin Hmangaihsanga hmel ka hmu nghal zat a, hnunglam ka va hawi chuan Ruthi kha tlarhnung berah a lo han ṭhu tawh a, en pawh ka en rei duh lo, Rih dil aṭang khan sawng ho zinga tel dan ngawt saw a zawng tawh a, ka bula awm hi nuam a ti lo tih pawh ka hre reng. 

"I rui em ni a?" a tih chuan "I rui zawk em?" ka ti let fak a.

"A reh leh tawh zawk" pehhel lo zet hian a ti a.

"Ka muhil dawn, han chho leh rawh" tiin tukverh lam ka hawisan hmak a, "I va han Boring ngawih ngawih tak, Ruthi te saw kawm ve ta che, i bulah nuam a ti lo anih saw" a tih pawh chuan ka chhang buai duh lo, nuam an tih dan danin awm hlawm teh se.

"Hmangaihsang, kan hawng dawn" hnunglam aṭanga an rawn tih chuan a tho leh rang khawp mai. A kal hnu chuan tukverh lam hawiin ka meng reng a, khawkar thing hmuna kan tlan mek avangin khaw hawi a zim a, rilru a tawt riau mai bawk a, ka lung a chhe lek lek hial a ni.

Engtik laiin nge ka lo muthilh leh aw, thawm a rawn awm thut a, chuveleh ka ṭhutna aṭangin ka kang zawt a, ka insawhthla leh nghal hnawk mai! Thil dik lo a awm, thawm a ri nghal hlut a, kan chuanna Bus chu kawngthlang lamah a tlan thla vuk vuk tih ka hre nghal a, mangang au ri chuan beng a luh nghal chuah chuah a, invawnna tur ka dap nghal chul bawk.

Kan thi dawn, kan thi ngei dawn! Minute rei lo te chhungin ngaihtuahna a mang vek a, kan thi dawn tih chu chiang tak ka ni!

Bus chuan engthil emaw hi a su ri bur a, ka invawrh kang lawp a, ka nak leh nghawng ruh na chu ka hre thei! Mit khapkar lek a ni, ka thidang a ni ngei ang, ka harh leh chuan Bus chhung chhuatah ka bawk phek reng a, na tuar rum ṭiah ṭiah ri leh ṭap thawm te ka hria a, ka sam leh hmai te chu thisenin a bual huh vek a, ka rilru chu a fim; mahse, ka taksa chu che leh tur a awm tawh lo.

Thei leh thei loin midang chu ka han melh kual a, ka piah deuh Bus seat nghenchhana Ruthi inbang hnup chu ka va hmu a, "Ruthi" ka han au dawn ṭhin a, ka aw a chhuak hleithei lo, ka hrawkah chuan min hnawhtu a awm a, chawp lehchilhin ka thinphu a rawn rang a, ka mittui a luang zung zung bawk.

"Ruthi..." seat nghenchhanah chuan a la uai reng a, chet pawh a che eih lo. A thi em ni! "Ruthi..." ngaihtuahna fim ka put a ngai tih ka hria, tu emaw ṭanpuitu ka koh a ngai bawk. Ka Phone...ka Bag ah ka Phone a awm, ka Bag lah chu ka hmu tawh der lo a, chu mai a ni lo...ka ke chu tu emaw hian a delh bet tlat a, min delhtu chu rit tak a ni.

Che lo changloin rei dawn chu ka bawk reng a, ka khur nasa viau tawh, ka chal aṭang chuan thisen a rawn luang reng a, ka khua a sik hluah bawk a, tuichhunga pil riai riai hi ka inchan ber. Kan accident aṭang khan engtia rei nge ni tawh ka hre lo a, ka damchhunga hun kal muang ka la tih ber ṭum a ni. 

A rei telh telh a, ka na chu a na zual telh telh a, min ṭanpuitu tur an lo kal hma a ka thih hman ka ring hmiah tawh. Rilruin ka ṭawngṭai a, mitthla ah ka nu hmel a rawn lang bawk a, ka hmaia tui luang chu mittui nge thisen anih pawh ka hre seng tawh lo. Ka lu chu natakin ka sawh hliam tih ka hria a, ka taksa chu na lo lai a awm zeuh zeuh maithei, ka chet apiangin tawrh tham khawpin a na a, ṭanpuitu lo kal hun nghah bak chu ka tan tihtheih a awm lo.

Ka thinphu a rawn ranga, ka harh leh kawk ṭhin a, inthin harh hram hram ka tum ve nain ka tihleithei lo, ka mit ka chhin chuan ka thi dawn tlatin ka hria a; mahse, ka khawhmuh chu a thim leh zel lawi a, ka thi anih ka ring ta, ka mit chu ka meng thei ta reng reng lo a, ka taksa na te pawh thawklehkhatah an reh ta vek a, hla tak ṭawng ri chu a khat tawkin ka hre leh ṭhin.

"Mi engzat nge an nih?"

"17"

"Hliam leh thi engzat nge?" Thawm chu a chiang lo ruai a, boruak aṭanga ri lo chhuak ang mai a ni. Khawiah nge ka awm a, engtin nge ka awm ve, ka thi nge ka la dam...? Ka ngaihtuahna te hi mihring ngaihtuahna nge an nih a, thlarau zawk?

Ka bianga mittui luang ka hriat rualin thawk la kawk a, tui chhung aṭanga inhaichhuak hlawl hi ka ang ber, thaw hlawp hlawp chungin awm ka dawm a, chunglam ka han en chuan Ceiling var ka hmu hmasa ber a, damdawiinah ka awm tawh tih ka hrethiam nghal a, ka thaw huai huai mai!

"A rawn harh e?" mipa aw in a tih ri ka hria, chuveleh ka bulah chuan an rawn ding huang a, ka han melh kual ngial a, tu te nge an nih ka hre hauh lo. Min hmu chu lawm hmel takin min en hlawm a, an mangan zia thu an lo sawi te chuan ka bang bo telh telh!

"Duati, Damdawiinah i awm ania aw, kan vaiin kan awm vek, pawnah naupang te pawh an awm" ka sam rawn chultu mipa in a tih chuan phawk fein ka lo en a, min hai anih ka ring rum rum, chupa lah chuan min en hnai nasa mai si a, min hai chu a ang lo chiah lo.

"Engtin nge ka awm a? Khawiah nge ka awm?" zawhna hlirin ka khat a, ka chiai chhia va a ni.

"Bathroom ah i tlu sual a, i lu i sawh na deuh aniang nizan zan khuain i harh thei lo a" ka sam rawn chultu mipa chuan a ti leh a, hlauhthawnna ka nei chawpchilh a, ka thil hriat hnuhnun ber leh tuna thil thleng chu a inpersan lulai deuh a ni.

"Ruthi te kha engtin nge an awm, midang ho kha an ṭha hlawm em?" tho kangin ka zawt nghal chul a, chupa chuan min chhang mai lo, ka mitah tak min enin min melh ngawih ngawih a, min khawngaih hmel takin a nia min en mek ni.

"Ruthi chu a thi em ni, khawiah nge ka nu?" min chhan lawk loh vang chuan ka hawi kual ruai a, "Ka phone in lo hmu em?" ti lehin ka puansin chu ka thehhlim zui a. Mahse, ka chet leh hmain chupa chuan min lo vuan vat a, "Mu leh rih rawh, i lu i sawh na deuh a, a la thawh chi loh" awki damthluam hian a ti a, khumah min nem mu lehin puan chu min rawn sin ṭhat tir a, keiin zawhna ka lo zawt mawlh mawlh thung.

"Khawiah nge ka nu? Min lo koh sak lawk teh" a ngenin ka ngen a ni ber tawh, Ruthi chungchang a sawi duh loh vang chuan a thi a nih ka ring bawk.

"Doctor, ka nu chu a awm em?" ṭah aw ṭeuh a ka tih chuan ka khum tlangah lo ṭhuin ka kut chu a rawn hum a, "I nu chu  kum 6 kalta khan a boral tawh a lawm, nikum hmasa khan a lung pawh i phun daih tawh a, i lu i sawh vangin i theihnghilh anih dawn kha, awm hahdam la, i ṭha leh mai ang" a ti chu ka hau chungin ka en a, eng nge thil awmzia! hei hi ka mumang em ni?

"Ka van hrethiam lo ve, nizan khan kan chuanna Bus a accident a, engtin nge helai hi ka lo thlen theih, ka nu a boral tawh te i tia, tlaia kan chhuah dawn pawn ka nu chu ka la be reng a lawm" ka ti mawlh mawlh a, chupa chuan ka biangah a rawn dawm a, hnai deuhah lo kun hnaiin "Mangchhia i nei leh tawh anih kha, Accident in tawh kha chu a rei tawh a lawm, kum 10 chuang fe a ni tawh ang" thutak zet hian a ti a, a ngaihna ka hre lo telh telh.

"I phone ka lo hmang lawk?" ka tih chuan a kekawr ipte a dap rak rak a, min lo pek rualin ka lo laksak vat a, ka Nu Number ka hmet nghal thuai bawk, Phone chu a tlang lo chiang khawp mai, rilru buai deuh chungin Hmangaihsanga Number ka hmet leh a, chu pawh a tlang thei chuang lo. 

"Tu nge biak i tum?" a tih chhan hrilhhai fein ka lo en a, Phone bawk chu en lehin ni zat chu ka han bih a, ka thil hmuh chu rin a harsa a ni! November ni 4 ah Rihdil  kal turin kan chhuak a, kan accident ni kha ni 6 a ni a; mahse, sana ah chuan July ni 25 a ni thung a, chu mai a ni lo kum 2032 a ni. Min ṭhawng, min ṭhawng takzet!

 

"Kum 2032 a ni tawh tak tak maw, eng nge hei hi a awmzia..2016 a ni lo maw?" ka bula ṭhu chuan lu a thing mat mat a, hrehawm tih hmel deuh hian a nui bawk a, ngaihtuahna fim neih pawh a har, eng nge ka chungah thleng tih takngial pawh ka hre lo, ka thi anga ka thlarau kha midang taksa ah a lut em niang tih te thlengin ka ngaihtuah!

"Tu nge i nih? engtin chiah nge ka awm a?" ka sawi laichuan nelawm tak hian min rawn nuih a, midang awm ve ho kha an kal chhuak diak tawh a, pawn lamah erawh thawm a awm nak nak a, a khat tawkin an rawn dak leh zauh zauh ṭhin.

"Min hria em ni?" ka tih chuan ka sam rawn chul leh mai a tum a, a kut chu ka lo dah sawn rang hle.

"Doctor i ni em?" ka tih chuan lu a thing a, "Anih tu nge i nih?" ka ti leh ta fak a, ka chhungte pawh tumah an awm loh laia amah ngawtin min lo buaipui chu mak ka ti deuh tlat!

"I pasal" a tih chuan ka awih lo hle ringawt, "Dawt sawi suh" ka lo ti let hlar a, chutah ka kut chu lakangin ka zungbun bun lai chu min en tir a, "Kan inneih zungbun anih hi, J&J...Jacob leh Juliet " zawi deuh tak hian a ti a, a hmelah chuan dawt sawi hmel a lang lo.

Thawk ka han la vang vang a, ka â thei mai dawnin ka hria, kan Accident lai kha nichin lawka thil thleng ang maiin ka la chiang a, engkim kha ka rilru leh taksa te hian a la hrechiang a, ka harh chhuah leh na hmun erawh a ngaihna ka hre ta hauh lo, 2016 kuma mit ka chhin kha 2032 ah ka meng chhuak hlawl a, ka nu a boral tawh a, pasal te pawh ka lo nei reng tawh tih hi ka tan chuan pawm harsa tak a ni.

Rilru buai taka ka awm laichuan kawngkhar an rawn hawng a, mipa naupang leh hmeichhe naupang pakhat hi nu upa lam deuh hian a rawn luhpui a, ka pasal inti khan lo huiin ka khum sirah chuan ṭhu turin a lo hrilh vat a, "Anu hi a lu a sawh na deuh a" tiin a han hrilh zui a, hmeichhe naupangin ka kut a rawn vawn rual chuan keimah ah hian mak danglam riau hi a awm a, ka hamhaih em vang anih ka ring. Fa pawh pahnih lai ka lo nei tawh a, lawm tur nge lungngaih tur pawh ka hrethiam lo!

"Anu, chaw i ei duh tawh em, chaw kan lo keng a, api nen Cookies te kan siam sak che a" hmeichhe naupang chuan a ti siam siam a, chhan pawh ka chhang hleithei lo, min biakna apiang chu ka aw e liam a ni ber.

"Bawiha, i nau hi va chhuah pui leh rih rawh, i ni rual khan haw ula, tlaiah ka lo haw ang" Jacob an a tih chuan mipa naupang chu a tho vat a, "Anu hi a lo la haw thei lo a mi?" tiin a pa chu a zawt a.

"Naktukah a lo haw thei chauh ang" a pain a tih hnuah a nau nen chuan an inzui chhuak a, an kal liam thleng chuan ka melh mawl tawp a, ka fate an ni tih chu ka hria a, ka thinlung lam hian a pawm hleithei lo, an hmel ka la hmu ngai lo a, an hming takngial pawh ka hre lo ania, engtin nge an nu ka nih thut theih ang?

"Naktukah CT Scan tih a ngai dawn a, zanin chu i riahpui anga, zingkarah ka lo kal ang" Jacob an a tih laichuan "Tu nge awm dawn?" ka lo ti ve vat a. "Keiman ka awmpui dawn che nia" lo ti tu pawh chu ka hre leh ta chuang lo. Zawhna mitmenga Jacoba ka en laichuan "Ka nu a nih hi" a lo ti zawi sup a, engkim hrilhchawp vek ka ngai chu hrehawm ka ti, heng hi thil tak tak anih chuan ka dinhmun hi a ṭha lo takzet.

"Ka chhungte an lo kal ve em?" ka han ti leh a, ka nu a boral tawh anih pawhin min ngaihven tur chhungkhat laina ka nei ve a lawm, ka nutei te emaw ka pa lama kan chhungte pawh, ka Cousin te emaw tal pawh an lo kal ka beisei.

"Nizanah i nutein a riah pui che a, zingah khan a haw phei a, chhunah khan lokal chu an awm, ka lo thleng tlai deuh a" Jacob an a tih chuan ka ngawi ran a, rei deuh chu inbe loin kan awm zui a, ngaihtuahna a vak kual nasa khawp mai. Engtia khawsak zel tur nge tih te ka ngaihtuah kual a, rilru ah thildang a leng thei tawh meuh lo.

Muhil derin mit ka chhing tlat a, an nufa a an titi chu ka ngaithla pah ve reng bawk a, ka chungchang an sawi dan aṭangin thil chu ka hrethiam riai ruai tawh.  "Hetiang hian a la awm fo em ni a, mangchhia kha i ti mai khan ka hre si a, hriatna hloh te pawh a ang zawk a lawm, mi pawh a hre mang lo va?" nu zawk chuan a ti sap sap a.

"Kan inneih tirh khan a nasa deuh a, a zia viau tawh maw le, an Accident tawh kha a rapthlak ve bawk a ni, mi 5 chiah damchhuak an awm a, a ṭhiannu phei chu boral zingah a ṭang a" Jacob an a tih chuan Ruthi ka mitthla ah a lo lang a, ka bekah mittui a rawn luang nghal zung zung mai.

"Nang a hria che em?" a nuin a tih leh chuan "Hre bik chiah lo, a zia veleh mai ang, kan inhrilh pah zel anga" chupa aw chu a dam dup reng a, ka hmuhtirh aṭang khan mi fel leh nelawm tak niin ka hria.

"A va buaithlak e aw, a lu a sawh dik lo viau aniang, a heti hlen mai ang tih a va hlauhawm ve, naupang an hrilhhai dawn em mai" nu zawk chuan a ti leh hluai a.

"A ṭha leh mai ang, a rilru lam zawk niin ka hria. Pawn lam hliam engmah a nei lo a, CT scan result pawh a ṭhat tho ka ring, a Mental lam hi enkawl ngai reng ania" tih angreng a sawi luam a, kei aipawhin min hrechiang zawk ang tih tur a ni.

Ka muhil ka harh leh chuan khua a lo thim fel der tawh a, ka piah lawka Sofa ah chuan Jacoba nu kha a lo mu bam a, chhun lam ai kha chuan ka tho zangkhai ta deuh. Kelawngin Cabin chhuat chu ka rap a, tukverh thlanglam panin darthlalanga ka hlimthla lang chu ka han en vang vang a, ka landan chu a danglam ta vekin ka hria, hmeichhe puitling dik tak hmel ka hmu a, a chauh hmelin a derdep hmel em em bawk.

"I lo harh a ni maw?" tih ri ah chuan ka lehhawi vat a, muangchanga lo thoin a tarmit a vuah hmasa te te a, chutah min rawn thlekin "Na i nei em, i ril te a ṭam em?" awki dam diai hian a ti a, ka la hre ngai hauh lo nain ngainatna ka nei tlat a ni, ka nu min hriatchhuahtir lo thei lo.

"Engmah na ka nei lo, naktuk ah kan chhuak dawn ti raw?" pangngai thei ang berin ka ti let a, "Theih awm tak chu ania, Mapuia khan CT Scan tih a ngai chu a tia" chiang mang lo deuh hian a ti a.

"Khawi vengah nge kan khawsak a?" ka tih chuan min rawn en phawk deuh.

"Chanmari ah sawn" a sawi lai pawh chuan a la phawk reng.

"Chhungkua engzat nge kan nih?" zawhna ka ngah viau a ni, ka hriat ngei ṭul thil a ni ve tlat a.

"Kei leh nangni nupa leh in fate a ni mai, Madiki te inhnuaiah an insawn thla tawh a" ban deuh tak hian a ti a, tu nge Madiki pawh chu ka hrechuang lo.

"Ih...ka nu...thil hi ka chiang lo riau mai a, mak deuh deuh ka zawt maithei che a ni" ka han ti a, "Aaa...a pawi hleinem" a tih chuan ka nui ta ngawt a, a bula ka va kalhnaih takah chuan ṭhutna min lo kian ve sawk sawk a, engtia an hnena lo tlu lut ve nge ka nih te pawh min hrilh theih ka beisei.

"Jacoba nen kan inneih lai pawh ka hre tawh lo, kan fate kha an lian tawh bawk si a, ka heti reng ṭhin em ni?" dilchhut takin ka ti a, a hmela min ngaihsakna lang chu ka hmuh hmaih lo chiang hle.

"Eng ber nge ka han hrilh dawn che ni, i  hriat duh chu min zawt mai la, ka chhang zel mai dawn che nia" a tih chuan zawhna a rawn lut zung zung a, engkim...engkim takmeuh a ni hriat ka duh.

Kan inhmuh hmasak ber ṭum te, mo fel ka ni reng em tih te, ka fate nena kan hun hmandan leh kan khawsak ho dan te, eng nge ka tih ve ṭhin tih angreng chu ka zawt mawlh mawlh a, ṭha takin min hrilh ve dap dap a, thawnthu inhrilh ang mai kan ni nain ka hun hman mekah chuan nun nuam tak ka hmang mek a, chhungkaw duhawm tak ka nei tih pawh ka hre thei.

"Kan ina i lo kal hmasak ber chuan Mapuian chaw eiturin a lo hruai che a, khata ṭang khan kan innel viau a, Mapuia chungchangah phei chuan kan inthurual thei ṭhin khawp a, a nun pawh i thlak danglam sak nasa tawh a, kan mo tur dik tak i niin ka hria a" a tih chuan ka bo leh viau tawh.

"A nun ka thlak danglam a maw?" ka han ti let ha a.

"Mapuia hi chu fapa mal duat rawn ngang hi ania, ruihtheih thil lamah a tlan ve nasa ṭhin a, nula khawsak ṭha lo deuh te hi a neih ka hlau ṭhin khawp a, in intawn hma a a ngaihzawng kha kan duhpui si lo a. Nang a nei che hi kan lawm khawp a sin, Madiki nena kan ngainat zawng tak i lo nia, nau i pai tih kan hriat pawh khan a neih loh mawlh che kha kan hlau a, kan lo nawr ve chuk chuk a lawm" nui sen sen chunga a tih chuan ka lo ip ru ṭun a, ka pasal neih hmain nau ka pai sa anih hmel e.

"In inneih hnu kha chuan khawlai a hnuchhawn ta hmiah a, zu a thlah a, a nun kha i siamṭhat sak a ni ber ang chu, tunah chuan hei kan chhungkaw innghahna leh chhungkua min khaidingtu ber a ni tawh a, nangmah vang liau liau a ni" a tih leh chuan rilru a nuam ve duh takzet. Jacoba landan kha ka ngaihtuah let a, pasala ka nei anih chuan engemaw tak amah ah hmuh ka nei ve anih ngei ka ring a, engtin nge hun kal tawh ka paltlang hre lo mahila; inchhir vawng vawngna tur thil ka ti lo tih hriat chuan min ti hahdam a ni.

Ka muhil leh ta miah lo, zinga ka chhungte an lo thlen lai pawh chuan  khumah ka lo ṭhu a, Nutei lo lut chu thil awmzia ka lo zawt mawlh mawlh a, ka nu chanchin han hriat chu hnuk a ulh ṭeuh thei. Ka nu chu Cancer vanga boral a lo ni a, ka fa hmasa zawk min hmuhpui hman a ni awm e. 

Kan Accident lai chanchin te ka zawt luam a, kha chhiatna ah khan mi panga chiah damchhuak kan awm a, an zingah chuan ka bialpa Hmangaihsanga pawh kha a tel ve nghe nghe a, Ruthi erawh vanduaiah a ṭanga, tunah chuan Hmangaihsanga pawn nupui fanau a nei ve tawh a, kan vengah an la khawsa reng tih thu te pawh min hrilh a, khang thil thlen hnu khan kan inzui leh ta lo em ni ti a ka zawhna erawh a chhang ṭha duh vak lo.

Dil chhut taka ka zawh hnuah chuan tihian min chhang a, "In inkawp rei a lawm, ni leh ni lo angin in awm reng a, ngaihzawng a neih san reng bawk che a, a tawpah i ṭhen ve thei hram a, i ṭhen hlen kha i nu a lawm ber ang. Jacoba pawh hi kan duhpui lo viau che a; mahse, ani hi chu i ti fuh ta phian a nih hi, kan ṭhenawm tlangval ka sawipui che kha chu nei la chuan Officer nupui i ni daih tawh tur a nia" tiin min fiam zui a, nutei thilsawi aṭang chuan thil pakhat hriat chhuah thar ka nei a, kan hun hmanral ho te te lo hlut zia hi.

Hriatrengna hi mihring te min ti mihringtu pawimawh tak a ni. Ka hun liam tawh ah chuan thil ropui engteh ual ka lo ti lo pawh a ni thei, ṭah pui vawng vawng tur thil te, hun hlimawm tam tak te pawh ka tawng ngei ang, bo hlen atan chuan uiawm ka ti a ni.

Ka Nutei haw hnu lawkah Jacoba a lo thleng a, thei leh eitur eng eng emaw a rawn keng nual a, a nu in a sawi danah khan Electronics dawr kan nei a ni awm a, Jacoba nen kan nghak ṭhin a nih hmel bawk a, chu chu hre ranin "In hralh a har em?" ka lo ti ve zauh a, ka zawhna vang chuan lawm hmel a pu a, min rawn ṭhut hnaih rang khawp mai.

"Bungrua a lo thleng a, vawiin chu kan buai deuh, i hre thei tawh em ni?" beisei nei fe hian a ti a, lu ka lo thin pawh chuan hnual hmel a pu chuang lo.

"I hre chhuak veleh mai ang" ti lehin nelawm deuh hian min nuih a, a hmel ka enchian takah chuan ka neih chhan pawh ka hre thei tain ka hria, ka duhzawng tak hmel a pu a, hrechiang lehzual phei ila chu ka duh viau pawh ka ring, ka hmangaih viau maithei zawk a ni.

Zan khat dang ka riah leh hnuah inlamah kan haw ta a, hun rei tak ka lo chen ve tawh na kan in chu ka tan thil thar vek a ni, in chhawng li lai mai a ni a, kawngpui an chung chu kan chenna niin, a bak zawng chu midangin an luah a, khawsak nuam pangngai tak kan nih hmel. Ka fa te lah chuan min lo lawm thiam khawp a, a u zawk mipa chu ka nuin Lalrinfela tiin a hming a lo sa a, a nau zawk erawh Jacoba nuin Zorempuii tiin a phuah ve thung, thu lah chu an han awih dun em em khawp a, engmah chu vuina tur emaw hrehawm han tih tur a awm lo reng reng, a lungawi thlak hliah hliah zawk.

"Ka thil theihnghilh ho kha ka ui ngawt mai" ka pasal bula ka tih chuan "Nang aiin ka ui daih zawk ang, ka duat ṭhin zia che pawh i theihnghilh zo vek a nia, ka beih nasat ve tehreng nen; a thlawn ta vek anih hi" lungawi lo der tih hriat fahranin a ner a, thil thlawn pek ang maia ka dawn amah leh ka chhungkua te ka nei erawh ka lawm ve tak zet.

"Anih, engtin nge kan intawn, i nu khan zu i in nasa ṭhin a ti che a, ka duhzawng chu i nih hmel si loh a" ka han tih chuan nur fe hian min melh a, "Nangman min kherh buai char char" a ti chu ka awih lo nasa, mipa chhai hmasa chi ka ni lo tih chu ka la hrechiang ve a lawm.

"Chutiang mi ka ni lo" ka tih laiin "I nia lawm, bialnu ka nei ka ti chung pawhin min ngaizawng lui tlat a, a tawpah ka khawngaih duh che" a ti leh zel a, a nuih danah dawt a sawi tih ka chiang.

"Anih tak chu, ka chhai thluk theih che chuan min lo duh ru ve tho aniang" ka ti leh hram a. "Teuh nang, Valentines day ni tain ka hria, Restaurant pakhatah kan inhmu hlawl a, i lo lut tur leh ka lo chhuak tur kan intawk a, ka hmingin min rawn ko chat a, ral khat aṭangin min lo ngaizawng reng tawh a, ka hming pawh i lo hre sa tawh a" a tih leh phei chuan awih lo tak ka ni.

"Dawt phuah chawp vak vak suh, ka hriat chhuah leh hunah nuam i ti lo palh a nge" nui chunga ka tih chuan ngaihtuah let niawm tak hian hmui a pet a, chunglam a melh vang vang bawk.

"Chumi hnu chuan ka ṭhiante inneihna ah kan inhmu leh, ka bulah i lo kal a, thil mak deuh deuh i rawn sawi a, ka bialnu in a hau nghe nghe che a, khami ṭum kha chuan tlemin ka khawngaih ve deuh che" a ti leh a, ka nuih a ti za deuh riau, dawt a phuah chawp thiam lo ka ti.

"Engthil nge ka lo sawi a?" ka ti leh chu phawk lek lek hian min rawn en a, a thilsawi pahah a hmel a han siam danglam ṭhin chu a hmuhnawm ka tiin titi pui a nuam hle a, a bula awm chu boruak a zangkhai vuk mai hian a hriat a, ka nei pawh hi mak ka ti ta vak lo, ka ngaina tlat a ni.

"I thilsawi kha mak ka ti ṭhin lutuk, a tir phei chuan chhul lam ṭha lo emaw, mi pangngai zan lo ah ka ngai deuh che a, min rawn atchhilh bur mai sia, a chang phei chuan min zui ru tlatin ka hre ṭhin. Kan inhmuh fuh chang lah hian 'In duh vel khanglang a' te min tia, 'Nakinah chuan i la hre viau ang' te i ti bawk a, min vau khar khar zel sia; ka ṭih deuh ṭhin che a lawm" a sawi pahin hmui a pet sawi zauh zauh a, kei ka lo nui hak hak thung.

"I daw thei e, ka hriat chhuah theih loh vang maiin dawt sawi vak vak kher suh" ka tih chuan, "Dawt ka sawi hleinem, ṭum khat phei chu 'I bialnu kha ṭhen vat rawh, min ti khawtlai rei mai mai' i rawn tia, kha kha ka bialnu ka hrilh leh sia, Lza dawrah in insual lo chauh" a la ti tak deuh deuh a, Lza pawh ka hre tawp si lo.

"Mi inkar tibuai chi ka ni awzawng lo aw, mipa vanga insual te phei chu a awm ang lo em mai" ka lo ti ve pang pang a, "Kei kha chu min atchilh tlat a lawm maw le, khatiang em em a min ngaizawngtu kha ka la tawng ngai bik lo va, chuvang aniang min thlem thuk ni" a tih chuan ka melh rum kha kha a, ani erawh chuan nuam a tih hmel khawp mai.

Kan intawn dan te, kan inkawp zui dan te chu kan titi tui ber a ni, ka zawt mawlh mawlh reng a, phur deuh hian min chang duah zel a, dawt a belh ṭhin tih chu ka hre ve reng nain ka ngaithla reng peih a, tak tak ni vek se ka ti bawk. A chhan chu hun hlimawm tak tak kan hmang dun anih hmel a, dawt anga ngaih chu ka phal meuh lo zawk.

Mut hmunah kan inneih thlalak te, kan inngaihzawn lai thlalak hrang hrang te kan en dun a, thawnthu sawi tur hi a lo nei ve ziah a, keimah hi ka lo zak ru deuh ṭhin. Jacoba hi ka lo duh viau aniang a bem hmasatu pawh keimah ka nih thu a sawi tlat, chutiang ka ti anih  ngat chuan ka atchilh viau anih ka ring, ngaihtuah chhuak zo lo mahila ka zak ru chem chem thei...

"Anih ka zar buai vang ngawt chein em ni min duh a?" ti a ka han zawh chuan "Ni chiah lo, keipawn a ruk chuan hmelṭha ka ti che a lawm; mahse, bialnu kha ka nei ve a, bakah nang chu i zia a dang em a, kan inmil vak loin ka hria a, chuvang chuan ania ka hnar char char ṭhin che. Mahse, ka hriat chian hnu che kha chuan i lo fel ta zek a, kawp atan ka phal lo che a, ka bialnu ṭhenin ka nihpui ta che a lawm, he thlalak hi min bem hlawhtlin zana kan lakdun anih hi" tiin thlalak pakhat chu min han kawhhmuh zui a, ka nui ṭha ngam lo, ka lo zak...

Thlalakah chuan inchung zawlah kan ding dun a, Jacoban Phone a keng tih pawh a hriat theih, nghawngbah sen duk hi ka awrh a, chu chu kawkin "He nghawngbah hi ka ta, khami zan khan i bat haw a, i hnim zankhua ṭhakin ka ring tlat" a han ti zui a, lo hnim zankhua ṭhak pawh niila a pawi tehchiam lo ang, tunah chuan ka pasal a ni a, a fate nu ka ni bawk a, ka lo che zakthei lo deuh anih pawhin ka hlawh chhuah erawh a hluin ka duh ngawih ngawih tho a lawm maw le.

"Tuna kan awmdan hi ka mumang a ni ang tih ka hlau" a biangah dawmin ka en vang vang a, engeawm hriatchhuah a lo nei leh tlat. "I mumangah min hmu ṭhin a lawm, chuvang chu ania min atchilh" thu tak deuh hian a ti a, lo ni mai mai teh se, a sawi apiang hi ring ila a ni tawh mai, a hmui ka en vang vang laichuan min lo fawp a, ka tan chuan kan infawh vawikhatna ang mai a ni a, min fan hneh takzet a ni.

"Inneih hmain nau kan pai lawk ti raw, hei chu ka rawt anih ka ring miah lo" nur fein ka melh a, ka sawi dik aniang chu a nui suk suk mai.

"I nghal zek a ni maw?" ka han tih chuan "Ka fiah ve che a lawm" a ti mauh mai a.

"Khai a, fiahna ka paltlang lo a va nih hmel ve" ka tih chuan "Pass i tum hleinem, 'Min nei dawn tho' i ti hmiah a, neih che tum lo pawh ni ila min neih luih i tum tho ka ring" a ti a, min va han chhuah chhe thei tehlul...

Kan fa te muhil lai kan va thlir dun leh zet hnuah kan khum lam kan pan a, nun hlui te chhui kir chungin hmangaihna thu kan inhlan tawn a, a awmah beiin luangmuang em emin mit ka chhing a, a ṭawng ri chu chiang lo riaiin ka hre pha a, ka mang ramah pawh kan lo la inkawm zui a ni ngei ang.

"Duati, harh tawh rawh...i inti khawtlai rei tawh a nia, hmeichhe tuar chhel leh huaisen i nih kha.." chung thu chu ka bengah a ri ruai ruai a, a aw ka hre nain Jacoba hmel chu ka hmu thei lo.

Boruak chu a rawn inthlak hlawk a, khuar zim te, chirhdiak hlir awmna hmunah hian ka lo tang a, ko tlang aṭanga Jacob-an kut a lo phar chu chiang takin ka han hmu thei a, a kut chu vuan turin min mitmei bawk.

Mumang chhawng tam tak ka nei aniang, mipui zi nuaih nuaih karah ka lo awm a, kalna tur reng reng ka hre lo, chutih laichuan ka beng bul maiah phun ri ka hria, 'I bulah ka awm ania' zawi te a lo ti tu chu Jacoba aw ngei a ni. Ka kutah kaiin mipui tam tak zing ah chuan min kai a, ka hma a; a kal chu ka zui mawl tawp a, ka thla a muang hliah hliah mai a ni...

"Ṭang fan fan rawh, hetah hian ka lo nghak reng che" a tih chu chiang takin ka hria a, "Valentines day ah ka hmu ang che" a tih ri te, "I duh anih phawt chuan i ti thei vek.." tih te a ri nawk nawk a, thawm a tam em a, a bak chu ka hrechiang thei ta lo.

Thawk leh khatah boruak a rawn vawt thut a, ka hriat leh hmasak ber chu ka taksa na ngut ngut a ni, ka lu chu ka chet thei lo a, ka mit chu thil bana char ang hlauh a ni. 

"MATE...a na viau aniang, a rum reng a, ka van lainat tak e aw. Ka fanu hi a chhel lutuka, na i tuar rei tawh em mai ti raw, i kal kan phal bawk si lo a, ka nat tir reng che anih hi" chu aw chu...! ka nu aw ang chiah chiah a ni, Nu...ka ngai lutuk che sin....

"A thawlak a rang hle mai a!"

"Enteh, a mittui a tla leh tawh"

"Doctor va ko vat rawh" Ṭawng ri chu ka hre chiang viau a, ka nu aw erawh ka hre zui leh tawh lo. 

Thawm ka hriat leh hmasak berah chuan mipa aw ka hria a, "I fanu hian thih a tum reng reng lo ania, a tuar chhel lutuk ringawt, a dam chhuak em em ang" chu mipa chuan a ti charh charh a, a sawi laia lo ṭap chu ka nu niin ka hre tlat! Ka mengchhuak hlawl a, boruak ka hip lut nghal kawk a, ka lu a na ngut ngut bawk.

Kum 2016, November ni 6 zana kan Accident ṭum khan ka thi ni ngeiin ka inhria a. Mahse, keichu mi vannei panga zingah telin hmeichhe damchhuak awmchhun ka ni. Thla hnih dawn Coma in ka awm a, ka khingkhang ruh a tliak a, ka luruh na takin ka tauh bawk. Ka malpui chu hmun 12 laiah thui a ni a, hetia nikhaw hreloa ka awm chhung hian ka ban ruh tliak pawh a lo dam fel hman a, kha mi zan ka harh hlawl zan kha kan Accident aṭanga ka men leh hmasak ber na a ni.

Rei tak ICU ah ka awm a, a chang chuan ka thi lek lek fo ṭhin an ti a, kan in pawh an lo singsa vek hman a ni awm e. Ni e, ka thi ṭhelh a ni, thihna nen chuan hmaichhanah, hnai teah kan indinchilh tawh a, ka taksa natna khuma a awm lai khan keimah tak chu hmun hla takah ka awm a, hun lo la awmtur kum 2032 ah daih a ni ka awm ni.

Ka thih phal lo tu a awm a, ani chuan dam thlakhlelhna ka neih theih nan ka hun tawn theih tur leh ka awh ngawih ngawih tur thil te min hmuh tir niin ka hria. Chakna min pe turin tawnmang Lasi a rawn tir a, Jacoba kha Pathian hnen aṭanga vantirhkoh ka dawn ni ah ka ngai hmiah bawk.

Thilmak hi ka ring a, hma hun hlimawm suangtuah pawh ka bansan ngai lo, ka ṭawngṭai a, Pathian hnenah ka dil ṭhin, vawikhat tal Jacoba kha ka tawn theih nan te, mihring a lo ni ve lo anih pawhin tu emaw tal Jacoba anga siam danglam tur te in. 

Thla khat dawn damdawiina ka awm leh hnuah in lama inenkawl turin kan inla chhuak ta a, kan chhiat tawh na chuan min nghawng na hle a, vannei zinga ka ṭang chu inthiam lohna lian tak ka nei ṭhin. In lamah Hmangaihsangan min rawn tlawh fo a, a hnen aṭanga ka hriat danin kan Bus kawngthlanga a tlan laikhan mipa pakhat nen an lo zuang chhuak hman a, midang pahnih kawngkhara vawrh chhuah a nei bawk. Bus thlen tawp thlenga chuang zingah keimah chiah ka damchhuak a, min ṭanpui tura lo kal te pawh kha Hmangaihsanga te vang liau liau a ni. Kan ṭhian boral ta te chu rilruin a hrereng a, ka damchhunga ka theihnghilh theih tawh loh tur hun ka tawng a, Ruthi vangin ka ṭap nawn leh fo ṭhin.

Ka dam hnuah pawh zirna chhunzawm tawh loin in lamah ka tap chawt a, ka nu kiangah a tam thei ang ber hun hman ka duh a, a hriselna aia ngaihpawimawh dang ka nei hek lo. Mahni chauha ka awm chang chuan Jacoba kha ka ngaihtuah rauh rauh ṭhin a, tawnmang Lasi mai niloin a tak ngei nisela tiin duhthu ka sam fo a, ka kawngkhara lo lut hlawl tur ang tein ka ngai a, ka Cousin te ka hrilh lah chuan 'Ramhuai' min tih sak a, ka tan erawh Pathian hnen aṭanga vantirhkoh ka dawn liau liau a ni. Natna ka tawrh laikhan ka kiangah awm lo se tun hun hi ka thleng zo kher angem ka hre lo.

Nikhat chu ka nu nen TV kan en dun laiin fakna a lo lang a, Lz restaurant thar lo langin nula hmelṭha zet hi khualchhawn ah aṭang a, chu nula chu ka hmuh tawh hnu a ang riauin ka hria a, sam dum nu hnep mai leh ngo var mai a ni a, ka hmuh tawhna ka hre chhuak mai thei lo.

A hnuah ka ngaihtuah let neuh neuh a, thil ni thei niin ka hre ta, Calendar ka en chuan Valentines day a hnai tawh hle tih ka va hmu a, rilru in tinzawn a nei ran bawk. Social media ah te Jacoba chu ka zawng kual ta chuk chuk a, a hmel awm ang reng reng ka hmu zo lo, fakna a Model ka hmuh lah kha a hming ka hre si lo a, tih ngaihna a vang duh khawp mai.

Hetia ka zawn chiam chhan hi chu fakna a nula kha ka mumangah khan hmu ve tlatin ka inhria a, thlalak ṭhenkhata Jacoba kianga ka hmeichhe hmuh kha ni ngeiin ka hre bawk. A lo ni anih ngat chuan Jacoba chu a awm ngei ka ring a, ka ring mai niloin ka beisei sang hle zawk a, ka vei ta tluk tluk a ni ber.

Valentine's day a lo thlen chuan zing hma takah ka chhuak a, Restaurant kawt ka va thlen chuan an lo la hawng lo a, a piah Bus stand ah ṭhuin ka nghak ta ngat ngat a, an hawn rualin ka lut a tih theih ang. Thingpui ka in a, rei deuh ka ṭhu a, ka beisei erawh ka hmu lo chiang hle. Vawi nga zet ka luh ṭhat hnu pawhin ka hmu ta chuang lo. 

Ina ka haw chuan kan dawhkanah Pangpar leh Chocolate a lo awm a, tu lo dah nge tih ka nu hnenah ka zawt thuai a, 'Hmangaihsanga' a tih chuan ka hnual rawih thung. 

Zirna lam ka hawi tak loah chuan ka nu nen dawr te ka siam ve a, keimah ni tawkah kan buai ve hle ṭhin, ngaihzawng pawh ka buaipui hman lo ka intih laiin Hmangaihsanga a rawn lang awl lo a, inṭhenna mumal nei lo kan ni bawk a, inngaizawng deuh reuhin kan la awm ve ta reng a, mi ka aṭangin nula dang a neih thu hi ka ve leh zauh ṭhin. Eng ka hria nge ni ka la thutak duh ngai der lo a, ka rilru a nat phah ngai hek lo. Ka nutei lah chuan an ṭhenawm tlangval min sawipui a tum ve reng a, chu tlangval chu Coaching kal lai niin tlangval nungchang ṭha leh lehkhathiam thei tak a ni awm e.

Thil kal dik chho chu rilruin a hre ran a, nghah dang ka neih tlat avangin ka nutei tlangval sawi pawh chu ka uksak duh lo a. Mahse, chuti chung chuan ka Phone number a lo pe ta tho a, inhmuh puiah te pawh min rawn sawm nghe nghe. Ka inveng a, ngaihzawng ka neih thu ka chhuanlam zel bawk a, sawi tur tingin Hmangaihsanga a lo awm ve reng bawk nen, kan lehkhathiam tlangval chuan min peih loh san ta niin ka hria.

Kumtin hian Valentine's day a lo thlen tawh chuan kha dawr kha ka va tlawh ngei ngei a, ka hmuh duh va tawng lo mahila rilru hlim takin ka pan a, beidawngin ka haw ngai hek lo. Ka hmu lo chung pawhin ka hlim em em ṭhin, rilru ah a cham tlat a, ka ngaihtuahna pawh chu ka hlimpui thei tlat a ni.

A kum 4 na ah pawh chuan phur takin ka va pan leh a, dawr kawngka bulah chuan Rose par an lo hung far a, pakhat chu ka lei ve nghe nghe, Coffee te in in ka chhuak leh mai a, kawngpui ka kan zet tawh hnuah ka Rose lei kha ka ṭhutna ah ka theihnghilh tih ka hrechhuak a, ka nu hawn ka tum avangin ka let leh ta hram a, chutah chuan beisei lo tak chunga ka beisei ruk em em kha ka va tawng ta a ni! 

Ka hmu chu ka ke pen a tawp chiang hle! Kawngka ah a lo chhuak mek a, kei luh tumin ka pen ve mek bawk a; mahse, ka pen zawm thei ta tlat lo. Ka vel boruak chu a chawl duk mai hian a hriat a, ka lungphu a muang nghal suai suai bawk. A hmel chu kum 2032 kum aikhan a lang naupang zawk a, a hmelṭha hliah hliah bawk. 

Ka en reng laichuan min lo en ve zawk a, "I lut dawn em?" a tih laia a aw chu ka hriat ṭhin ang chiah kha a ni. "Jacob" ka ti thawr, mak ti deuh hian min en a, keiin ka lo nuih var var a, mawl min tih hmel viau nain ka insum thei chuang lo, ka hlim em a; chu chu ka hmelah a lang chhuak a ni mai.

Luh mai nachang pawh hre loa ka la din reng laichuan nula pakhat hi a lo chhuak a, dawr fakna Model ngei kha a ni. An inhmeh ka tih zia chu aw....

Min melh hrek hrek nain ka la nui var var reng, min hnungchawna an kal hnu thlengin ka thlir a, ka thik em tih min zawt awm sela chuan "Teuh lo mai" tiin ka chhang ang, a chhan chu saw tlangval saw ka pasal tur a ni tlat. Ka chhai anga, a tlawm rak thlengin ka kherh dawn a, a fa te nu ka la ni ngei bawk ang, dawt ka sawi emaw ti lo awm miah suh se, amah Jacoba ngeiin min hrilh a, keipawn dawt a ni lo tih tunah hian ka hre ve chauh a ni.

*A tawp ta*

(Yeah...Title thlang tu te duhthu a sam ngei ka beisei, a dang chu phut a phut chhuah a ngai tawh ang, hei chu phur thut thilh tih a nia, ruahmanna engmah a awm lo e.)