BLUE BAYOU (CH - 1) by Ahmangaihi violette Khiangte

BLUE BAYOU

by Ahmangaihi violette Khiangte

Chapter - 1

Zan dar 10 a ri dawn tawh a, U Lizzy leng a la rawn haw thei lo. Hetianga a chhuah ruk chang hian kawngka hawn sak a ngaih vangin ka muhil thei ngai lo a, ka men rei phah ve hrep ṭhin. Minute 10 chiah ka nghak leh ang a, a la rawn Call loh chuan ka muthilh san ang ka ti rilru a, mahse, minute 10 pawh ka nghah tlin hmain Nu Hlimi ṭawng thawm ka hria a, a zan zung tur lo tho a ni ngei ngei ang.

Hlauthawng ru zetin U Lizzy chu ka call a, "I nu a harh.." a ti hman ṭawk ang, "Pawnah ka awm" bung zetin a lo ti a, ka ṭawng leh hmain a off nghal daih!?

Ka va han nghak tawh awm lo....

Ka puansin chuan ka inkhuh sauh sauh a, chuti chung chuan Nu Hlimi thawm chu ka ngaithla pah reng bawk a, Unaunu chu a rawn lut ngam lawk lo ang, min lo call leh ngei dawn tih ka hriat vangin ka Phone chu chu ka ban vat a, a rawn call veleh chiah bawk.

"A mu leh tawh em?" a rawn ti sar sar a, a la mut loh thu ka sawi laimek chuan kawngkhar inhawng thawm ka hria a, "Malsawmtluang, nangmah elaw...?" vin fahrana tih riin a zui bawk.

"I chhuak ru lehpek a ni maw, tunge kha pa kha....i hmel te chu engti zia nge...?"

"I ṭap e law....?"

"Rawn lut nghal rawh" hla deuh hleka ang hlak hlak thawm ka hre zui a, phone a tawp rualin ka ṭhu chhuak ve nghal thuai a, an inman chian theih tehlul nen Unaunu hian a sim duh der si lo a, amah vangin hauh ka tawrh phah ziah mai.

"Dawrah ka kal lawk a lawm..." U Lizzy aw chu a dik lo riauin ka hria, ṭap aw a ang tlat a ni.

"Tu nge gate bula ding saw..?" a nu aw chu a vin khawp mai a, U Lizzy erawh a ngawi reng, rei lo teah inchhung lama an lut thawm ka hria a, "A khawih che em ni, i mit te chu a va sen ve, tu nge anih a....?" Nu Hlimi chu a auin a au a ni ber tawh, khum aṭangin ka chhuk vat a, pindan kawngkhar lam ka pan thuai bawk a, chhuak mai lo a ka va bih chuan sitting room a U Lizzy lo phei mek chu ka va hmu a, a hmel aṭang pawhin a ṭap tih a haitheih loh. 

"Engtin nge a tih che a?" Nu Hlimi chu lo kal phei chuan U Lizzy chu a pawt her sawk a, chuveleh ring fahranin U Lizzy chu a ṭap a, "Ka biangah min hnek" a ti ta mai!

"Eng vangin nge a hnek che?"

"Ka hre lo, a rui lutuka..."  

"I bialpa em ni?" 

"Ni lo..." a ṭap zui hlawp hlawp a, pawnah chuan tunge awm ka hre lo, a ṭhiante birthday lawm turin a kal a, ngaihzawng a nei tih chu ka hria, a sawi ve fo a, a bialpa hi ka la hmuhsak ngai miah lo thung, tu chuan nge kutthlak ang tih ngaihdan pawh ka nei thiam lo.

Chutih laichuan kawngkhar kik thawm a lo awm a, "Mai mai a, lo lut teh se" ti a Nu Hlimi inher tum chu U Lizzy'n a lo man bet a, "Ka hlau ania, hawng tawh suh" a ti nghal chul a, a nu erawh a thinur bawk a, U Lizzy vawnna chu a phih thla rang hle bawk. 

Ka dinna aṭanga chhuakin Sitting room lam chu ka pan a, U Lizzy insut hlawp hlawp chu biak dan vak ka hre lo, ani pawn min ngaihsak loin choka lam a pan a, a hnungah ka zui ve zel bawk. Kawngka inhawng thawm ka hriat rual deuh thawin "I va han zakthei lo ve a, ka fanu kut i lo thlak ngam a ni maw, i kalsawn nghal anih loh chuan Police ka man tir dawn che ania" tih angreng a ri nghal bawrh bawrh a, Nu Hlimin a hliah tlat avangin pawnlama ding chu ka hmu chiang thei lo a, mipa a ni tih zawng ka hria.

"Nu...." ṭap ṭiaua U Lizzy'n a tih laipawh chuan Nu Hlimi chu a la ang bawrh bawrh mai. Pawna mi chuan eng nge a sawi ni "Thlawk bo rang rawh, rawn luh i va tum ngam zawk ve, vawikhat mah a biak pawh lo be leh suh" a ti vin hlur a, pakhat zawk ṭawng thawm hriat tumin ka pan phei rang hle.

"Kut ka thlak miah lo ania, kan insual min lo ṭhelh a, ka vai fuh palh anih kha, pawi ka ti lutuk, tihpalh liau liau a ni" ti tu aw chu ka la hriat ngai a ni lo, Unaunu lam ka va hawi chuan kawngkhar lam a melh ve reng a, a la insut hlawp hlawp reng.

"Elizabeth, ka tihluih a ni lo ania, ka hmu lo che a, ka tihpalh aw, min ngaidam hram teh..." Nu Hlimi phen aṭanga lo ti tu chu ka va thlek a, mipa sam buang deuh, t-shirt var ha a ni, a hmel a lang lo a, a aw aṭang chuan a inthiam lo hle tih a hriat theih thung.

"Kal rawh ka ti che a ni lawm ni..." kawngka bul aṭanga Nu Hlimin nam sawn a tum chu a lo ṭang ve tlat a, "Rei lo te ka be lawk duh, rei lo te chiah..please..." tiin a ṭang tlat a, nu Hlimin a nam viau chung pawhin an innam sawn hleithei lo.

"Min ngaihdam hma chu ka kal dawn lo, ka awm rei lo ang, ka be lawk duh" chupa aw pawh chu ring ṭha tawh tak a ni.

"I va han zakthei lo em em ve, midang ka pun dawn nge ṭha deuhin i kal dawn" Nu Hlimin a tih laiin "Lizzy...lo chhuak mai teh, min ngaidam la ka kal ang, i nu hian lo luh a phal tlat lo, khawngaihin lo chhuak teh" a la rawn ti lang lang a, U Lizzy hmel chu ka va hmu chiang hle a, a thinrim tih pawh ka hria.

"Benjamin, haw rawh..ka be duh tawh lo che" a ti ve hlak hlak a, thil awmzia ka hrethiam ve ta chiah, a bialpa ngei a ni, kar hnih vel chu an inzui ve tawh. A duh viau khan ka hre si a, eng nge maw thil awmzia hi le!?

"Ka tih luih a ni lo tak tak asin, kut ka thlak ngai lo ang che tih i hriat kha, engtin nge tiang khan....ka pi awm sawn lawk mai teh, ka be ringawt ang....Elizabeth....Liz....i rilru nat ka duh lo, ka tihpalh aw...tihpalh liau liau a nih kha..." chuveleh, nu Hlimin pawn lamah a nam chhuak rawk rawk a, a ṭawng thawm chu a hla tial tial bawk.

Rei dawn chu pawn lamah an la intawng a, kawngka aṭanga ka va thlir laipawh chuan Gate-ah innam chhuah tumin an la inchai fat fat a, chupa luhlul zia chu mak ka ti hial a ni. U Lizzy lah chu inchhungah a tawm tlat a, a bialpa lah chuan a khat tawkin a rawn au reng bawk. "Va chhuak la.." ka tih te chuan min melh rum hlur a, "Ka duh teuh lo mai, ka be tawh lo chiang khawp ang, zah a hre lo ropui si, ka nu a hmuh te chuan haw ve mai awm ania, ka nu zahna pawh a nei lo anih saw" a ti khar khar a, a nuin a man chhuah rual khan rilru dang a pu anih mai hmel e. Unaunu zia ve ania, a nu bula a mark a chhiat aichuan heti hian a ti duh mai ang, a zan chhuak hauh hlau leh chhuanlam tur neih loh vang a ni pakhat.

"Kut a thlak tak tak che em ni?" tiin kawngkhar bul aṭang chuan ka va thlek a, nichin khan 'min hnek' a ti tlatin ka hria.

"Lalmuani bialpa nen an insual hrep a lawm" a ti mawl tawp a, insawifiah vak ngaihna a hre lo.

"A kal tawh em?" a tih vangin pawn lam chu ka va en leh a, a la kal lo nasa, Gate pawnah a ding tlat a, Nu Hlimin Gate vuan chungin a dinchilh mek bawk a, an in melh ran mai.

"A la kal duh lo, i nu saw a thinrim ngawt ang, ṭha deuhin va be mai la ni tur, i nu a thinrim zual mai mai" ka tih pawh chuan "Ka be awm lo em mai, a duh leh ding reng rawh se, ka nu saw va ko teh, mut san daih ang u" a ti a, a pindan lam a pan nal nal bawk. U Lizzy chu ka han thiam lo dawn viau a; mahse, a bialpa rawn chet dan phawr phawr kha a thinrimthlak ve em a, Nu Hlimi hmaizahna a nei miah lo te chu a ṭihbaiawm ka ti riau, hmeichhe hlanga khawsa kan ni vei nen a hlauhawm thei dawn tlatin ka hria.

"Nu, lo lut daih rawh.." ka va tih laichuan ka lam an lo hawi ve ve a, Nu Hlimi erawh a ngawi reng. Gate lam melh lehin "Kal bo vat rawh, rawn kal tawh hlek suh ang che, gate hi rawn pel leh na teh, i ngalruh kha ka khawng tliak dawn ania" tiin a vau khar khar a, chuti chung pawh chuan gate pawna ding chu a tawlh sawn lo reng reng.

Nu Hlimi a lo phei takah chuan ka tawlh lut vat a, a âng thawm ka ngaihthlak peih loh vangin pindan lam ka pan zui a, Unaunu chu a lo inkalh fel hmak tawh. Ngawi rengin khumah ka mu a, ka mu fel awrh tihah "Lo hawng teh" vin zeta tih ri ka hria a, "Zingah min hau mai rawh" ṭap ṭuau a U Lizzy'n a tih ri ka hre bawk.

"Thil awmzia sawi hmasa rawh, kha pa kha tu nge?" Nu Hlimi bawk a ni.

"Min ngaizawngtu anih kha, ka be tawh dawn lo, min ti buai reng a, ka rilru a hah ve tho..." ka unaunu chuan ṭap chungin a la ti zuah zuah.

"Vawikhatmah be tawh lo ang che, khatiang hmelhriat neih te kha hlau ta che, mipa hi i kawm tam leh lutuka, buaina i la nei ang ka ti mawlh mawlh a ni lawm ni, i mu daih tawh emaw ka tia..khawihah nge i lo va chhuah ruk....lo hawng rawh" kawngkhar a ri nghal dawt dawt a, an inhawnsak thawm erawh hriat tur a awm lo.

"Han chhuak leh teh dek....i nasa lo khawp ang tih hre rawh, i la ṭap hluam hluam lehnghal a, ka vuak belhchhah dawn zawk che em mawni..." rei dawn chu a ang thawm hriat tur a awm. U Lizzy'n a hawn duh tak loah chuan phun hluk hluk chungin a kalsawn a, ka mut a chhuah hman tehlul nen min ti harh zo leh ta vek a, naktukah class test kan neih dawn vangin ka mut hma a ngai a sin maw le.

Hetiang inhau thawm te hi chu he inchhungah hian thil pangngai tak a ni ṭhin a, zanin erawh a dan a dang deuh. Zan chhuah ruk leh a ruka thil eng eng emaw tih  hi U Lizzy chin ṭhan a ni a, zan dangah hi chuan ka puihna hmangin a thup sam viau ṭhin, zanin chu a fuh lo vel vek a, mut hma ka ngaihthu ka hrilh khan chhuak lo ve mai sela ṭha tur.

Ka muhil ka harh chuan dar 8 a lo ri der tawh, ka alarm ri takngial pawh ka hre lo. Nizan khan dar 12 thlengin ka meng a, zing karah ka ennawn leh ang ka ti kha ania. Hmanhmawh deuhin ka tho chhuak a, chaw pawh ei loin ka insiam nghal mawlh mawlh a, ka insiam chhung zawng Nu Hlimi a âng a, chawei dawhkan kil pawh a chakawm loh. Ka thawh ve hmain an lo inhau hrep tawh aniang Unaunu chu a tum bur reng a, ka biak pawhin min chhang ṭha duh meuh lo. Nu Hlimin "Tlem tal bar rawh" min ti tak nain ka test neih tur ka chhuan lam a, an nufa inhau kianga awm ve reng hi hrehawm ka ti ṭhin, ka kal tur chu pawisa min pai a, tiffin pawh min lo siam sak diam a, engmah sawi loin ka kal nal nal bawk.

College ka thlen dawn ṭepah Awmpuia'n min lo tlan pel a, CR anih hnu hian vawikhatmah a tlai ngai lo, test tur pawh a thiam leh bik ngawt ang, exam apiangin pakhatna a ni ziah a, class test kan neih chhiah hian kan ṭhu dun thei a, a bula ka ṭhut chang hi chuan ka ti ṭha ve deuh ṭhin, vawiin pawh amah ah ka innghat thui leh viau dawn a, mi sawisep ka hlawh leh khawp ang le. Mahse, hetianga min sawi sep sep tu te ho hian min thik vang tih ka hai bik lo a, hmeichhe tam tak hian a bula ṭhut an chak zia lah ka hai hek lo.

Tualzawl ka thlen chuan a bike a lo hung ṭha mek a, nidang ang thoin a hmel hmuh a nuam a, a bul ka thlen hma aṭangin min lo nuih leh var var tawh. Tuktina hlim hmel a pu reng thei hi thil mak a tling, inchhung lam boruak chhia ka tlansanna leh ka inbunruahna a ni ziah a, a bul thlen tawh hi chuan thaw a veng a, ka mood siam ṭha tu a ni ziah bawk.

"I thleng teuh tawh em a, ka lo ding duh lo mai anih kha" a bul ka thlen rualin a lo ti var a, "Test tur i thiam em?" ka ti hmasa ber.

"Nang zawk?" a tih chuan lu ka thing nar nar a, "Ka bulah i ṭhu dawn nia" a tih zawm zat a.

"Noeli ten min sawi duh leh ngawt ang, zingah ka ennawn hman lo a, ni lo sela chu i bulah ṭhut pawh ka tum lo a sin le..." tiin ka han insawithiam leh te te.

"Engahmah ka ngai lo i tih kha.." nui chunga a tih chuan "A nuam chuang lo a lawm, i ṭhiante ho hian min ngei vekin ka hria..." ka ti a, Noeli hi Awmpuia ṭhian zinga mi, tette aṭanga a kawm a ni a, hetia Awmpuia nen kan inzui hi ka chhuhsak ang maiin a ngai a, a ṭhian hmeichhe dangte nen min rel nasat zia pawh ka hria. Test-na a Awmpuian min hrilh ṭhin te hi an huat tawk a tling a, mi hnena thu sawi kual ṭhintu pawh Noeli leh a ṭhiante an ni ziah a, Awmpuian a la be ṭha reng leh a la kawm tlat hi ka buaina ber a ni.

"Tiffin i pai em? Ka chhungten chawhmeh pai chi engmah an siam lo a" a tih chuan "Canteen-ah kan ei dawn nia" ka ti ve vat a, dinhmun in an na deuh hi kan nei a, lehkhazira kan chhungte kianga khawsa ve ve kan ni, a hausa bik lo a, kei ang thoin thingtlang aṭanga helaia college kal ve tho hi a ni a, ani phei chu a Pocket money tuakin kartawpah a inhlawh ziah ṭhin.

Lehkha a thiam a, mi hlim thei leh nungchang ṭha tak a ni bawk a, professor te duhsak leh a zirlaipui te ngaihsan rawn a ni ṭhin. 2nd semester aṭang khan kan inkawp ṭan a, vawikhat mah inhauh emaw han inṭhen kan la nei ngai lo. 3rd semester aṭang khan CR ah an ruat a, ṭhian a ngahin a tu a te pawh hian an nel em em vek a, inhauhna kan nei ngai lo chungin ka buaina tur tawk hi ka tawng reng thung, a chhan pawh mi zawng zawng te bialpa a nih vang a ni. Ka thîk a, a hriatpui lohin hrehawm ka ti ṭhin a, ka hauh ṭha ngam si lo hi ka nat phah fo mai.

"External exam zawh ah i haw dawn em?" ka tih chuan kar hnih khat vel a haw tur thu a sawi a, ka huphurh nghal pang.

"Noeli a haw ve dawn em?" ka ti zawi sep a, khaw khat an ni te hi ka thik hluah hluah zel, Noeli'n a chanchin sawi tur a hre hnem bik lutuk te thleng hian.

"Ka hre lo le, a haw chu ka ring" a ti liam mai a, an khaw lamah an inkawm leh nasa dawn tih ka hria, an lo let leh hunah Noeli'n a sawi peih leh ngawt ang.

"Mipa hlir kawm rawh, hmeichhia i kawm chuan miin min sawi zel ania... 'A bialpain hmeichhe dang a kawm nasa lutuk, a ngaih a ṭha lo thei ngawt ang' te min tia, min kawp te an ring a, kan zak deuh ṭhin, be suh chu ka ti lo a, mahse...in vengthiam rawh aw" ka ti ve luam a, hetianga ka sawi hian a nui mai zel, chumi hnuah tuna a sawi ang hi a sawi ṭhin....

"Ṭhian te an be chhe ringawt ngai lo, ka bialnu i ni tih an hre vek a lawm, i tan ka rinawm bawk a, kan inṭhen phahna tur engmah ka ti ngai lo" nelawm deuhin a ti a, a sawi ang chiah hian a awm ṭhin bawk si a, keimah zawk hi ka inthiam lo leh nge nge ṭhin.

"Min ngai em?" tiin thildangah ka pakai ta daih a.

"Nitin kan inhmu a lawm" a tih chuan ka duhkhawp lo nasa.

"Zanah te min ngai ve lo em ni?"

"Nilengin kan awmdun a, in ngaihna hman a awm lo e..." a ti a, min nuih var var bawk.

"Keichuan ka ngai tho che" tiin ka tum zui bar a, ka lawm nan min ngaihthu sawi ve mai sela ni tur.

"Kartawpah ka ngai ṭhin che" a tih erawh chuan min ti lungawi leh thlap, a thil sawi hotea ka titauh ang chiah hian a thil sawi hote hmangin ka dam leh ṭhin a, ka mood thlak danglam tu hi chu a ni ve chiang a lawm. Ka darah min lo kuahin Classroom lam min pan pui a, thîkna mitna min en tu hmeichhe ho te chu kalpelin sang takah ka hawi a, ka intithei hmel hi an sawizui ngei pawh ka ring.

Tlar hmasa berah kan ṭhu dun a, test kan ṭan phat aṭangin ziah tur a lawi ka hre lo, nizan lama ka thiamsa zawng zawng kha an bo zo vek a, ka hriat pawlh leh nuaih tawh. Awmpuia thung chuan ziah tur a ngah lutuka hawi pawh a hawi chhuak hman mang lo, sir lam leh hnung lam aṭangin an lo ko sek a, a lo ko tu apiang chu ka lo melh rum thul. Paper a lam belh veleh ka hmuh theih turin a paper chhan sa chu a lo dah rem a, ka duhtawka ka copy hnuah midang ka hrilh chhawng veleh a, a zara pass ve hram hram tia min sawi hi ka nihna ania; mahse, miin an sawi hi chuan ka haw em em thunga, abikin Noeli te ṭhian hoin an sawiin.

Chhunah Canteen-ah kan chawl a, chaw ka pai hnem vangin chawhmeh a lei a, kan ṭhian mipa ṭhenkhat ten min lo zawm ve bawk. Awmpuian min ngaihsakna a tihlan deuh hi chuan mipa ho hi an nuih a za ṭhin a, min chhaih nan tak an hmang a,  Nu-i/ Pa-a tiin kan class mipa ho hian min ko fiam ṭhin. 

Bike a rawn keng ṭhin na a kan inphur khat khawp mai, a putea bike a rawn khalh ṭhin hi a ṭawng ve deuh tawh a, kan college panna kawngah hian chho ulh deuh a awm avangin pahnih chu min zo lo a, min thlah dawn pawhin kawng chhakah lo han nghah a ngai ṭhin a, chumi ka peih loh vang chuan ka inthlahtir ngai meuh lo.

Tlai banah CR ho an inhmuhkhawm dawn avangin Gate bul thleng min lo thlah a, eng eng emaw sawia kan din dun laichuan Noeli te ṭhian ho an lo chho ve a, a tih dan ngaitein Awmpuia chu a rawn chhaih leh pek a, "Star tu che ka hria, bialnu a nei ka lo tia, i single hun an hauh sa aw" nui har har chungin a ti a, keia lo meng rum ve te chu engteh ualah a ngai lo.

Min kalpelh hnuah "Be ṭha tawh suh, ti nge i lo nuih, ka huat turin a sawi kher anih kha" ka ti pang pang a. "A mizia ve anih kha, engahmah ngai suh, haw duh lo la, an chhaih tawh lo mai ang che" a tih pawh chuan ka rilru a dam thei lo, "Ka awmlai chuan be tawh suh" ka ti zui hram a, aw min pawh ve mai bawk. Mahse, a biak loh phah dawn lo tih ka hria, mi biakchhiat emaw biak duh lo hi hrehawm a ti ṭhin a, mi pawisawi a hlau tlat zel, hei hi Awmpuia mizia chiang taka ka hriat a ni.

Ka kalsan hnuah taxi ka la a, in lam ka pan vang vang a, ka thlen chuan dar 3 a pel awrh a, ka Nu Hlimi office kal pawh a la bang lo. Nu Hlimi hi ka nu cousin an pa te unau an ni a, a pasal nen an inṭhen hnuah pasal dang nei loin a fanu hi a ṭulpui a, sawrkar office pakhatah LDC hna a thawk mek bawk. U Lizzy hi kei aiin kum khatin a upa a, lehkha a thiamin mizorama college ṭha ber pawlah a kal a, in khata khawsa chung si hian kan nunphung a inthlauin miziaah pawh danglamna tam tak kan nei, ani hi chu mihausa fanu nimai awma mawi a ni.

Tlai lam eirawngbawltu ka nih vangin ka inthlak zawhah ka che nghal zung zung a, U Lizzy lo haw lah chu a pindanah a tawm tlat a, a thawm aṭang chuan phone a hmangin ka hria. "Ka chhuak thei tawh lo, ka nu a strict lutuk, nizanah Benja vangin kan buai hrep a, chhuah ruk ngam pawh a ni tawh lo" a ti lang lang a, a khat tawkin a nui leh hak hak ṭhin.

Bawlhhlawh paih tuma pawn ka va chhuak chu tum loh deuh ka va hmu a, nizana lo kal kha niin ka hria! Gate a lo hawng fel chiah a, min hmu chu a phu zuk lehnghal a; mahse, a tum a ṭhulh phah chuang lo.

"I u a awm em?" a tih chuan "Awm lo" ka ti chang bawl a, Nu Hlimin a rawn hmu ang tih mawlh ka hlau.

"Nichin lawk khan a lo lutin ka hria" a hmelah chuan lawm lo hmel a lang a; mahse, ani lawm lo hmel aichuan Nu Hlimi lawm lo hmel ka hlau daih zawk.

"A chhuak leh tawh" kawngka ah ka ding vat a, "Khawihah nge a kal?" vin angreng zeta a tih hnuah min han melh rum zui a, a zakthei lo ka ti ru khawp mai.

"Ka nu a lo haw ṭep ania" ka tih pawh chuan "Lo ko lawk teh, ka lo lut lo mai ang" a ti teh ṭalh a, ina luh tir aichuan kohsak mai chu ṭha zawkin ka hria, a kal sawn duh leh chuang lo ang.

Hmanhmawh deuhin inchhungah ka tlan lut a, U Lizzy ka va hrilh nak chuan min lo vin let nek a, "Kawngka va kalh rawh, i rawn luh tir vaih chuan a pawi khawp ang" a ti khar khar a, a pindan aṭanga ka chhuah hnuah kawngkhar a kalh zui daih a, va hnar sak chu chakawm loh tak a ni. Mahse, Sitting room ka thlen rualin chupa chu a lo lut fel reng tawh.

"Heih, tinge i lo luh ngawt, ka nu a lo haw mek ania" ka thil sawi chu hre awm pawhin a awm lo, min lo kalpel vut a, min pelh hnuah "Khawiah nge a awm?" a ti leh a, ka tih ngaihna hre lo chuan U Lizzy pindan lam ka kawhhmuh ta ngawt a, a kal dan reng reng chu ka ṭih zawng tak a ni, hlauh emaw zah nei hmel a pu lo.

Choka aṭangin an thawm ka lo ngaithla a, chupa chuan kawngkhar hawng turin a ngen nasa mai, "Inbe lawk ang, nangmah vangin zan pawh ka muhil thei lo, i tel loin ka awm thei lo tih hriat vangin i induh anih kha, min biak duh loh chuan ka â mai ang, vawikhat chiah min ngaidam rawh, a bak chu ka nawr lui tawh lo ang che" a ti mawlh mawlh a, a pindan chhung aṭangin U Lizzy pawh a pawr ve hle.

"I hmel ka hmu peih lo, ka kham lutuk, hetiang hian i awm dawn tih hria ila ka kawp lo chiang khawp ang che" a ti tan tan a, a mipa aw zawk erawh a dam angreng viau thung.

"Ka inthiam loh zia i hre lo anih kha, ka hmangaih che a, engtin nge kut ka thlak duh che i rin theih, i tel loin ka awm thei lo, min ṭhen anih chuan ka intihlum mai ang" a tih te chuan ka lo ṭim sung sung thei.

Unaunu lah chuan "Duh leh va intihlum daih rawh, engah mah ka ngai lo" a lo tihsan hmiah a, a beidawnthlak zawk khawp.

"Min hmangaih ve miah lo em ni?" chupa aw chu a beidawn hmel ngawih ngawih tawh, a awki a zawi sawt hle a, a rilru a na viau a niang "Lizzy..." zuai raih hian a ti leh a. "Thlawk bo rawh" vin fahrana U Lizzy'n a tih hnu chuan thawm dang a awm lo, a reh ṭhuap a, rei vak lo hnuah mipa insut ri  hraih thawm ka hria a, U Lizzy bialpa chu a ṭap niin ka hria.

Ka lo ngaihchan reng laichuan a lo chhuak a, a mit chu a sen deuh rum a, a ṭap tak tak anih hmel. Min melh eih loin kawngka lam a pan a, Gate a hawng thawm pawh ka hre pha. A chhuah hnu lawkah Nu Hlimi a lo thleng a, an inhmu hman lo aniang chu engmah min zawt lo a, buaina a punlun ka hlauh vangin ka sawi duh bik lo, zep loah chuan khapa kha khawngaihna ka nei ru tlat a, U Lizzy'n a hnar dan kha a rawng mah mahin ka hre bawk.

"I u a la haw nange?" Nu Hlimi'n a tih rual deuh thawin Unaunu chu a lo lang a, a nu chawhmeh lo hawn te chu a rawn phawrh sak zung zung a, Fridge a dahluh pahin a nu chu a be siam siam a, nichin maia thil thleng kha chu hre awm pawhin a lang tawh lo. Pheikhawk thar a mamawh thu te, an college-ah incheina a san thu te a sawi melh melh a, a mamawh min dil tawh hi chuan kei ngei pawh hian tihsak loh hrehawm ka ti ṭhin, khawngaihthlala taka mi thil dil hi a thiam a, ṭul a tih vak loh chang pawhin a nu hian a tihsak leh nge nge zel.

Zanriah eikhamah ka pa nen kan inbia a, ni thum dawn chu kan inbe tawh lo, Revival team pakhata ah secretary nihna a chelh a, Pathian rawngbawlin a kal chhuak deuh reng ṭhin a, ka biak laipawh chuan chhim lam khaw pakhatah a awm a, camping nei turin an lo inbuatsaih mek a ni. "Aizawl lamah in lo kal dawn hnai em?" ti a ka zawh chuan thingtlang lamah hun an la hman tur thu a sawi a, ka nu a lungawi em tih ka zawhna erawh min chhang nawi deuh. Tunhnai hian ka nu hi a hrisel lo riau a, ka pa pawh zinchhuak lo turin a duh ṭhin; mahse, Pathian rawngbawltu a ni a, heng harsatna te hian a rawngbawlna a dal tir ngai lo, chhungkua a a mawhphurhna kalsanin a rawngbawlna lamah a inpum pek ṭhin a, miten min ngaihdan leh kan inchhung khur boruak chu inpersan tak a ni.

Mite chuan chhungkaw hlim tak ni turah min ngai a, anihna takah chuan ka pa rawngbawlna hi kan chhungkaw boruak ti nuam lotu a ni mah zawk a, ka nu nen an inkar a hlat phah a, sum leh pai lamah hmasawnna kan nei thei hek lo. Ka nu dawrte aṭanga kan sum hmuh chu kan eibel ber a ni rih a, khawsak nuam zawk zawk lo tak kan ni. Ṭhenawm khawveng te chuan ka nu hi an dem ṭhin a, a pasal rawngbawlna a ṭawiawm ṭha duh lo an ti fo va, kawng lehlamah chuan ka nu pawh hi nu rilru sehhel ve tak a ni bawk. Hetianga miin an sawi chang hian ka pa chungah a lawm lo a, inchhung khur tana a thawhhlawk zia te leh kan mamawh engkim thawkchhuaktu anih thu hi a sawilang fo a, inhnialna a chhuak leh nge nge ṭhin.

"Rinte, ka fanu neih chhun i ni a, i nu nena in hmakhua hi ka ngaihtuah ber a ni tih i hre dawn nia, Pathianin a rawngbawl turin min ko tlat mai si a, ka chhungkua kalsanin midang te tan ka pen chhuah a ngai a, amaherawh chu in nufa hian Pathian hnenah ka kawl tir che u a, kan zavaia tana ṭha turin engkim min ruahman sak ang tih hi ring ula, eng dinhmunah pawh Amah rinchhanin A hnenah intulut zel rawh u, khawvel nawmsakna aichuan thihhnu piah lamah kan chan tur hi thlir ula, heng retheihna leh lungngaih khawharna zawng zawng te hi vana kan lawmman tur ngaihtuah chuan eng tham mah a ni lo, ṭawngṭai tam la, i nu pawh i ṭawngṭai sak ṭhin dawn nia, ka kal dawn khan a lungawi vak lo a, kan pahniha kan awm lo hi a khua a har tih hria la, ṭawngkam nem takin lo be ṭhin rawh" a ti dap dap a, a awki ah chuan hrehawm a ti ve tih pawh ka hria, ka rilru chu a mang deuh riau a, an pahnihah hian ṭan zawk ka nei ngai lo, chutih rualin ka pa hi ka nu kiangah awm thei se ka duh ru hle thung a, ka nu khawhar lutuk hi ka lainat vang a ni.

Kan inbiak zawh hnu chuan ka nu chu ka han call a; mahse, a phone a chhang thei hauh lo, dar 7 bawr chauh a la nih vangin dawr a la khar lo anih ka ring. Nu taima leh thawkrim ngang a ni a, zing aṭanga zan rei dawn thlengin a buai ṭhin, eirawngbawltu lah chu a nei mang si lo a, amah tea a khawsa tur chu ka lainat zual khawp mai.

Ka nu min lo call hun nghah pahin Awmpuia ka text a, lehkha a zir em tih angreng ka va zawt a, "Suji ka kang mek" a tih chuan ka khawngaih ru khawp a. Tlai ban aṭang khan eng eng emaw tiin a la buai char char a, biak hleihtheih pawhin a awm lo. 

"I zo ṭep tawh em?" ka tih leh chuan "Ka mengrei deuh ang, Pitei a nuamsam lo a, dawrah gas te han dah chhoh ka la ngai a" tiin min lo chhang a, a Pitei hian thingpui dawr a nei a, Awmpuia hian a pui nasa a, a chhang hi chuan an chhiahhlawh chei riaua hriat chang te ka nei. Hmeichhe tih tur awm tak tak hi a ti ve vek a, thlengsil leh eirawngbawl chenin a ti vek ṭhin tih Noeli hnen aṭangin ka hre tawh.

"I buai bawk sia, lehkhazirna hun i nei awm ṭhin lo ka ti" ka vei ruk rauh rauh ṭhin a ni, lehkha a zir thu a sawi hi ka hre khat khawp mai,  heti hian pakhatna a ni thei ziah tho a, mi Special ve tak chu a ni.

"Mut dawnah rei lo te chu ka chhiar ang, zing thawh hma ka ngai a, meng rei hman pawh ka ni lo" a message ka chhan leh hmain ka nuin min lo call a, rang deuhin Phone chu ka chhang a.

"In ka thleng chiah a, ka phone ri pawh ka lo hre reng reng hleinem, chaw in eitawh em?" a lo ti zung zung a. Eng nge a an ka zawh chuan "Ka lu a la na reng, damdawi ka ei a, tunah tak chuan min chhawk rih" a ti leh mai a, mu hma tura ka tih lah chuan panhnah buaipui a ngaih thu a sawi a, eirawng pawh a bawl ve dawn chauh anih hmel e.

Ka pa chungchang sawi ka tum dek dek chu "Mi ngaihtuahna pawh a nei lo, keini aichuan thlaraubo a vei zawk a lawm, nupui te damsam lo pawh engah mah a ngai hleinem" a ti bawrh bawrh a, han sawi zui zel chi pawh a ni lo.

"Kuhva rah i kheh tho chuan panhnah chu midang khawih tir la, kan ṭhenawm nau te pawh khan an Roll peih reng kha" tiin ka chah a, kan dah hma chuan inenkawl ṭha turin ka han chah leh zet a, a buai em avangin rei pawh kan inbe lo. Ka pa ka biak chang hian a dinhmun ka hrethiam em em ṭhin a, ka nu ka biak lah hian a lainat ṭhin bawk si a, ral khat aṭangin rilru an ti hrehawm ve hle mai a ni.

"Suji i eichak em, naktukah ka lo pai dawn che em niang?" a message chhiar pahin ka nui sak a, eitur lamah hian min duhsak ve ṭhin khawp mai.

"Lo pai la, tiffin ka lo pai kep ang che"

"Alu chop nen ka lo pai ang, chaw lo keng ṭeuh rawh" ka ngaihtuahna ah chuan thildang daih a awm a, naktuk hi kan ban hma ni a ni a, an ina len ka chak a ni, a chhungte an awm dawn lo tih ka hria a, a tih tur ṭul te va tihpui ila, eirawngbawl hmanin ka haw veleh ang a, a ṭha dawn riauin ka hria.

"Naktuk chu ka lo pui dawn che em niang, i thawmhnaw te ka suk sak ang che" message chu a en har deuh a, minute 10 dawn hnuah "Lo len i chak a ni maw?" tiin min lo zawt a, kan inah chuan vawi hnih a lo kal tawh a, an inah ka la kal ve lo thung.

"Midang an awm dawn em?" ka ti leh te te a.

"Dawn lo e, an lo haw tlai thei lutuk, i duh chuan i lo leng dawn nia" a rawn ti chu ka phur khawp a, vawikhatmah min la sawm ngai lo. Fianriala inkawm tih angreng aichuan a chenna va hmuhpui hrim hrim chu ka duh a, a khawsak dan te pawh hriat chian leh zual ka duh.

Awmpuia nen hian inbem tih velin bul kan ṭan ve lo a, ṭhian aṭanga hetianga inzui chho ta hi kan ni. Ka hmu tirh aṭangin hmelṭha ka ti a, ka nel nghal em em bawk. Lehkha a thiam theihna te, a hmelṭhatna leh a nungchang te hian a ti langsar a, kan college hmeichhiaah chuan hre lo kan awm lo ang. Ka star ruk ve em em ṭhin laiin zan khat chu a message ka dawng hlawl a, Sport kan neih lai a ni nghe nghe. "I tlan chak em?" tih hi min lo zawt hlawl a, ka cher vang hian sport thei viau turah min lo ngai hlawm a ni awm e.

Keichuan "High jump chu ka ti ve ṭhin" tiin ka chhang a, 1st semester kan nih lai a ni a, khami hnu aṭang khan kan inbe ve ta zeuh zeuh a, keimah zawk hi hnaih hmasa tuah ka ṭang ṭhin. A fel a, biak a nuamin a nelawm a, midang aiin min be ṭha bika ngaih chang pawh ka nei ṭhin. Khang hunlai khan ngaihzawng a neih kan ring ṭheuh a; mahse, a ngaihzawng hmasa ber ka ni tih tun hnuah ka hre ve chauh a, min duh chhan erawh tun thlengin ka la hre thei lo, a duh phawt chuan kei aia hmelṭha leh nalh tak tak duhthlan tur a nei a, kan inngaihzawn ṭan dan pawh kha ṭhianten min dem vang ni berin ka hria.

Ka mut dawn thlenga a la buai vangin ka mut san a, zinga ka thawh pawh chuan a message a lo awm leh reng tawh. Nizan chu Unaunu pawh a mu hma aniang a tho hma ve tehmial a, tunlai chu online shopping a atchilh a, a nu nen kan eirawngbawlna bulah lo ṭhuin a duhzawng min enkualpui a, "Inchah ṭawm ang" te a ti thul. Inhak ṭawm a rawt ve tak nain hak ka chang ve mang dawn loin ka hria, chu loah thawmhnaw man to leinan pawisa ka nei ve lo.

"Thawmhnaw thar i lei dawn chuan i thawmhnaw ṭhenkhat kha Rintei pe ve rawh, college a kal ve tho a, u zawk i nih angin i ngaihtuahpui ve a ngai ania" a nuin a tih chuan a phur deuh hlut a, "Lo kal rawh, hak tawh loh ka nei nual a lawm, ha chhin rawh" tiin min pawt sawk sawk a, incheina ngaisang mi a ni bawk a, ani thawmhnaw hlui te hi chu ṭha tak tak a ni hlawm a, ka thawmhnaw neih ṭhat ve deuh ho pawh hi a ta ka rochun te an ni hlawm.

A pindanah lutin a thawmhnaw hlui te chu ka va ha kual a, kei aia a thau deuh vangin ka thawl deuh ṭhin a, chuti chung chuan min pek ang ang hi chu ka la vek mai zel, kan ṭhenawmah hian puan ṭhui thiam a awm a, a thlawnin min fit sak ṭhin a, hei vang hian Unaunuin thawmhnaw a ngen chang pawhin ka lo phur pui ve em em ṭhin, a thawmhnaw hlui ka chan phah thei miau a.

"Enteh, ka ṭhiante ka tihpui ang che i duh em, hausa deuh deuh mipa ṭhian ka ngah ania" a tih chuan "Bialpa ka nei" ka lo ti vat a, Awmpuia a lo len khan a awm ngai lo a, a thlalak chu ka hmuh tir tawh.

"Lehkha thiam thei deuh kha maw, thil a lei sak ve tawh che em?" a tih chuan ka nuih a za deuh tlat a, Awmpuia chuan thilpek min pe ngun viau a; mahse, eitur hlir a ni, Jelebi leh chhang thlum dang te...

"Mipa hausa tih vel hi chu ka mil ve vak lo, ka zawlpui ngaihzawn ka duh zawk, thil pek te phei chu pek let ve theih loh chuan a inthlahrunawm duh" ka tih laiin  "Hmeichhia te chuan pek ve chiam a ngai hleinem, mipa tihtur a lawm" a ti sam et a, a  thil pek dawn tawh ho te chu min hmuh zui a, Perfume leh tlereuh man to tak tak vek an ni.

"Hei hi Benjamin-a min pek anih hi, a ruk nge pawh ka hre lo e a" tih pahin Silver ṭhi hrawl zet hi a rawn lek chhuak a, locket nalh deuh a inkhai bawk.

"A hausa lo em ni?" ka tih chuan "A chhungte pawh ka hre lo, a ṭhiante inah a riak kual nasa; mahse, bike nalh deuh a nei, len chhuah pui ringawt chi" nui pat pat chungin a ti a, a ngaih hoh hmel khawp mai.

"Engtin nge i duh vak loh hi ṭha deuha i biak theih le, i nih pui ve tho bawk sia" ti a ka chhang chu a nuih a zat hmel khawp a, "Keite chu ka zei a lawm, min lo be tu ho hian ka ngaizawng emaw an inti ṭheuh hlawm a, Benja pawn min bem a, ka chhang miah hleinem, ka bialpa angah a lo inngai ve ringawt a lawm" a ti a, mipa ṭhian a ngah ka ti reng a ni.

"Nimin tlai khan a ṭap tlatin ka hria" ka ti chu a ner sawk a, "A over a nih kha, mi virpilh chi a nia lawm, hetiang a ni dawn tih hria ila ka be ṭha miah lo ang" a ti hlak hlak a, a sawi dik ve tho chuan ka hria, kha pa chet dan kha chu a lutuk deuh.

"Kut a thlak tak tak che em?" ka tih leh chuan "He laiah hian min nghawk sawk" tiin a biang a khawih a, ngaihruat dan pawh ka thiam chiah lo, pakhat lah khan a pha nasa mai si a.

College ka thleng tlai deuha, ka thlen chuan First period an lo ṭan hman a, chu zawng aia ka awm ti nuam lo tu chu Awmpuia bulah Noeli a lo ṭhu at a, tlar hmasa berah an ṭhu dun lehnghal a, Awmpuia'n ṭhutna min lo ken a tum nain ka kal pel ve hmak. Lawm lo zet chungin an hnungah ka ṭhu a, class lak chhung zawngin an mahni ngawt chu ka ngaihven a, Noeli'n a biak apiangin ka lo inhumruh bawk.

Class a zawh veleh ka tho tharh a, Awmpuia lo ding ve chiah chu a banah ka va vuan a, "I lo pai em?" ka ti chu Noeli'n min lo thlek rang hle.

"Tunah i ei duh em ni?" a lo ti var a.

"Nakinah a ni mai, banah chuan aw, in inah ka lo len dawn kha" tiin ka nuih var var a, Noeli ner deuh chu ka hmu ru reng bawk.

"Lalawmpui, banah drama chang tur in thlang dawn a ni lawm ni?" Noeli'n a tih chuan "Eng Drama?" ka lo tih khalh a, "I lo kal hmain kan sawi zo vek tawh?" a ti kher a, min chhan dan chu ka ngei ang reng. Zawhna mitmengin Awmpuia zawk chu ka melh a, "Professor khan week-ah Drama intihsiak a tel dawn a tia" a tih chuan rilru a buai nak a, a chang turin an beisei em mawni, Sir Muanpuia kha Red house a ni ve a, Awmpuia hi kan captain a ni bawk a, Noeli lo phur ve viau chhan erawh ka hre lo.

Kan chhuah hnuah ka zawt chiang leh a, "Rei lo te aniang, nang pawh i awm ve a ngai a lawm, Drama chang turin ruat che ka lo tum a" a ti hem mai a, chu zawng ka zah zawng tak a ni, mipui hma a inlan chi pawh ka ni lo, ka zei dawn lo nasa mai si.

Class dawt leh ah chuan kan ṭhu dun ta a, kan test result te pawh an puang a, a ti ṭha pawlah ka ṭang ve a, hnung lama ṭhu ho chuan min rel leh pekin ka ring. A suji min ken sak lah chu nidanga a siam aiin a tui a, ka ei ṭeuh mai. Canteen-a kan ṭhut laichuan Fresher hmeichhe ho an lo lut a, ka bula ṭhu chu an melh hrek hrek a, a nui ru leh pat pat ṭhin. Awmpuian an lam a hawi veleh a inmitmei a, min melh fuh rualin an hawisawn leh ṭhin bawk. Ka ngei deuh vangin Awmpuia chu ka be buai char char a, amah an hria anih chuan bialnu a nei tih pawh an hriat ngei ka beisei.

Hmeichhe pakhat a lo hawi leh rual chuan Awmpuia kut chu ka vuan vat a, min lo en phawk em em khawp a, "Mi hmuh laichuan a zahthlak" Awmpuian a lo ti chu ka han melh rum leh rih.

"Kan hma a mi te khuan an en reng che a, ka lawm lo" ka tih chuan a nui sak a, "Tute nge an nih pawh ka hre lo" ti chungin hmeichhe ho ṭhutna lam chu a zuk thlek a, kan junior te an nia, a hriat chu ka ring bik lo.

A kut ka thlah hnu chuan "Banah ka duat ang che" a ti ve ngei a, Drama vel a buai pui dawn chuan an ina ka len hman pawh ka ring leh tawh lo.

Dar hnih pelh ah class kan zo a, common room ah house meeting nei turin kan kal khawm a, keipawh ka ṭhiante Kimkimi leh Mawitei bulah ṭhuin dawhsana Awmpuia leh leader dangte che vel chu kan thlir dauh dauh a, paper-ah thil ziakin a buai khawp mai. Chutih laiin a Assistant Zoremi leh a ṭhiante an lo kal kual a, drama chang thei tur an zawng kuala, ka ṭhiante pahnih lah chuan chan ve an chak a, Awmpuia chu an va au zurh zurh reng.

"Kan in ruat tawp loh chuan a buaithlak dawn a, mahni mawhphurhna ah ngaih vek tur, hming kan lam apiang in lo kal chhuak zel dawn nia" Zoremi'n a tih hnuah hming an lo lam a, Kimkimi pawh a tel ve nghe nghe. Ka hming an rawn lam rual chuan Awmpuia'n min lo hui vat a, ka tho hreh chu Mawitein min lo nam thawh teh a tum a, tum loh lutukin la kal ve ta chu a nia. Kan drama chan tur lah chu Tualvungi leh Zawlpala thawnthu a ni a, Awmpuia chu changtupa ber tur anih laiin kei chu naupang inkawibah tur zinga mi ka ni.

Ka tui loh sa tehlul nen Noeli ṭhiannu Rebeki chu changtunu lemah a chang dawn a, 'A sam a sei ṭha sia, a inhmeh dawn lutuk' tiin Noeli te ṭhian ho an phur khawp mai. Noeli erawh keimah ang tho a inkawibah tur zingah a tel a, changtunu nih a chak dawn tehlul nen. Kimkimi lah chuan "I Awmpuia saw Rebeki Zawlpala a ni daih dawn ania, a role saw chuh rawh" a lo ti ve chhen a, nuih a za duh vak lo.

End of chapter - 1