BLUE BAYOU (CH - 2) by Ahmangaihi violette Khiangte

BLUE BAYOU

by Ahmangaihi violette Khiangte

CHAPTER - 2

"Rinte, in khaw lamah kawi neih theih dan i hria ang em?" Awmpuian a lo tih chuan ka tum bur a, "Noeli zawt mai rawh, thingtlang nula ve tho a lawm a nih" ka lo tihsan a, "Ka chhungte chu ka zawn tir thei ang a; mahse  motor-a inthawn a buaithlak riau a, tunlai hi sumo service a awm lo an tiin ka hria" a ti nuah nuah a, engtin nge maw ka neih theih bik ang le, tumah an inkawibah ngai tawh bawk si lo.

Kan ṭhutna kan pan leh hnuah pawh Noeli te ṭhian ho nen chuan an la dingkhawm a, a changtu tur te chuan a hranpain an zir ho dawn a ni awm e, keini role kha chu a ho tham deuha, zir ve ngai an ti lo aniang.

"Changtunu i sai loh hram beisei ang" tiin ka ṭhiante pahnih chuan min fiam min fiam a, a chet ngeiawm vaih chuan a chalah ka vawm duh hial ang mawle.

Dar 3 pelh hnuah kan bang a, house dang chuan Romeo and juliet te, Original drama te an chang dawn a, kan drama chan tur kan han sawi te chu an nuih a za deuh a; mahse, Romeo and juliet kan chang lo tur chu lawm tak ka ni, Rebeki'n ka bialpa 'Ka Romeo, ka hmangaih' ti a a han ko vel tur chu ka ngaingam lo, a ngaizawng nasa ve ṭhin tih ka hre ru kar a.

"Mahse, a Romeo ni lo mah se, a Zawlpala a ni dawn a lawm, Rinte... thik chi a nih chu, Awmpuia bulah sawi ngei ngei rawh, nangman chang ang che, i chuh loh chuan i thik leh dawn ania, thla te an la anga, Megazine-ah an lang chuai chuai dawn ania" tiin ka ṭhianten min fuihpawrh zui a, nuam ka ti lo telh telh.

"Drama chan hmain Rebeki saw damlo se a ṭha ang" te an ti thul.

"Rinsangpui, changtunu pawh i chang pha nange, changtupa changlotunu i ni dawn elaw?" Lalpeksanga'n a lo tih chuan rum theih tawpin ka melh a, "A takah changtupa changtunu ka ni tho a lawm" ka ti ve ngat a, a hnunga Awmpuia lo kal chuan a rawn hre pha a niang a nui suk suk a; ka darah min lo kuahin min pawt hrang thuai bawk.

"Lo len chu i duh em, a tlai tawh angreng si a...i duh leh.." a sawi zawh hmain "Duh e..." ka lo ti pawr hlar a, a nui leh ringawt tawh.

"Kawngah ka lo han chho ang, lo hmanhmawh rawh" ka tih hnu chuan a bike  lam a pan a, keipawh Kimkimi te rualin ka kal chho a, kawngchho kan kal laichuan kan hnung lamah hmeichhe ṭhenkhat an ṭawng nak nak a, Awmpuia hming an sawi vangin ka lehhawi rang hle bawk. Canteen-a kan hmuh fresher hmeichhe ho kha an ni, "U Noeli nen a inngaizawng emaw ka tia, mahse...vawiina mi kha a bialnu an ti" hmeichhe pakhatin a tih chuan ka khi ve sak a. Mahse, "A bialnu thikthu a chhe lutuk, Awmpuia ṭhian hmeichhe ho chu a ngei vek zel an ti, hmeichhia a biak pawh a phal lo" an tih chuan ka inpetruh nghal ṭeuh a, tu lo sawi kual nge tih chu rindan ka nei thiam mai bawk.

Zawl kan thlen hma deuhin Awmpuian min lo tlan pel a, a hnungah Scooty-in Rebekin a lo zui bawk a, kan hnunga mipa kal hoin an lo au fiam hlut a, tun aṭangin an dem nghal der chu a nia, min hmaizah nachang pawh an hre hlawm lo. Awmpuia min lo nghahna kan thlen rualin bike-ah ka lawn vat a, min thlek huang huang hlawm mai, midang melh duh map lovin hma lam ka melh ngar a, "I ṭha maw?" a tih pawh chuan ka chhang lo, ka lawm lo deuh tlat.

"I va ngawichawi ve?" kan tlanchhuah hnua a tih chuan "Mi Zawlpala i nih hi" ka ti khawl a, a nuih laiin kei ka ṭhu tum bur thung.

"Mahse, ka Tualvungi i nia lawm" a tih pawh chuan ka la nui thei lo reng reng, Rebeki intithei hmel ngawt kha ka mitthlaah a awm.

"In in chuk dawn em?" ka tih chuan "Engah ngawt maw?" tih pahin min lo thlek vat.

"Hmanlai thawnthuah an inchuk ngai lo" tiin a nui hawk hawk a, kei ka lo thaw huai thung, Romeo and juliet-ah khan an infawp ang em le?

Bawngkawn-ah daih an awm vangin rei lenna hun pawh ka nei lo ang, kal kawng ringawt pawhin hun a heh. An in kan thlen chuan kawngka a lo inkalh ṭhiap a, Assam type inchhawng a ni a, an inhnuai chu nupa rekin an luah thu te min hrilh a, an inchhung chu ka rinai takin a nuam a, an chefel fai hle tih chu enthuak pawhin a hriat a; mahse...Awmpuia chuan pindan a nei miah lo.

A mutna ka zawh chuan ṭhutthlenga a mut ṭhin thu min hrilh a, "Mutna ka phah buai peih lo a, ṭhutthlengah ka mu mai zel" a ti sam et a, khawiah nge lehkha a zir ṭhin ang tih te thlengin ka ngaihtuah.

"Ka leng rei hman tawh lo ang, i thawmhnaw suk ngai lo la la, ka lo su thuai thuai ang" ka bag dahin choka lam pana a kal chu ka zui a, "Engmah suk a ngai lo, ka inbual pahin ka su mai zel a lawm" a tih pawh chuan "Chhuat ka lo nawt ang aw, eirawng bawl pui te i ngai em" ka ti leh thuai a, "Engmah tih a ngai lo" a tih zel vang chuan chet vak ngaihna ka hre lo.

"Eng nge ka tih ang?" ka ti he haw a, puih ka duh vanga zui ka nia, a inthlahrung em mawni!?

"Lo va ṭhu rawh, thingpui ka lo lum ang" a tih chuan che chang loin ka melh reng a, "Eirawng ka bawl pui ang che" ka ti leh hram a, tlai tin a buai ziah sia, chhe te tala puih ve ka duh. Thingpui lum tuma Gas a on laichuan a hnungah ka va dinga, nghet deuhin a kawngah ka kuah zui a, ka kut a lo hum rang hle bawk.

"Vawiin chu ka ngai tlat che" zawi tein ka ti a, "Keipawn.." a tih rualin ka kuah nghet leh sauh. Ka lam hawia a rawn inher chu a hmui ngawt ka lo melh, kan infawh khat zia ka hrechhuak a, inkuahna hun takngial pawh kan nei mang lo.

"Thingpui in zawh ah ka thlah leh nghal ang che, i haw tlai chuan a chi loh ang, midang lo haw hmain ka thlah che a ngai bawk a" a kutin ka sam a lo hui kiang a, ka benga min zeh sak laite chuan a mitah ka en kal a, ka hmuh tirh phat aṭang kha hmelṭha ka la ti hliah hliah reng.

"Eng nge min duh chhan?" ka ti chhuak phawng a, a hrethiam zan lo aniang a hmel a buai nak a, "Min duh chhan ka hre chak e" zawi leh pangchang awka zeta ka tih chuan "I hmelṭha em a lawm" tiin min nuih var var a, hmelṭha min ti chu ka beisei loh lam daih a ni, ka nungchang a duh ka lo ring zawk a.

"Ka mizia hi i duh tel em?" ka tih chuan a bu nghat nghat.

"Min hip vek, nangmah tawp hi ka duh che" ka darah rawn vuanin a lo kun hnai a, fawh rem turin ka lo insiamrem ve sawt sawt. Dimtein min lo fawp a, ka kham lo. Keimah zawk chu dingdihlipin ka han fawp nawn leh a, min dimdawi leh lutuk hi ka duhkhawp lo ṭhin, min fawh te hi a inthlahrung ṭhinin ka hria. 

"Ka van ngai che.." ka sawi zawh rualin a awmah min kuah bet nghal hlun a, a thinphu dup dup chu ka hre thei. "Nupa han ni tawh mai ila ti raw" a ti ve phawng a, a ngaihtuahna ka hlimpui zia chu aw...

"Hei hi kan inluah ni se, kan pahnih chhiahin cheng ila" ka tih chuan "Ka neih hunah che chuan mi in luah loin keimahni inah ngei kan awm zawk ang chu, hna ṭha deuh ka neih hunah ka nei ang che, lo rinawm char char la" thutak zet hian a ti a, a hmel en tuma ka hawi chho chu kan inmelh chiang ngang mai.

"Nangmah zawk hi rinawm viau rawh, midang min neih san daih ka ring, ngaizawngtu i nei thei si..." titau awka taka ka ti leh chu mawi fahran hian min nuih a, "Ka lerh loh zia i hriat kha, ka first love i nia, a awm chhun i ni bawk ang" a ti leh nghat a, rinhlelhna chhe te mah ka nei lo. Ka thikthu a chhe viau nain ka ring em em lawi a, amah han dema, han thinrim khum tur hian a lakah rinhlelhna ka nei ngai lo, hei hi kan inkar a ṭhatreng chhan pawh aniang, inrintawnna kan nei tlat a ni.

Thingpui kan siam dun a, chhang thlum an zawrh bang aniang plate-ah a rawn chhawp hnawk a, "Zan rilṭama eiah" tiin a ṭhen chu min fun sak a, Long chhang leh Jelebi tih angreng a ni a, a ṭhen chu a ut lek lek.

"Chhang siam i thiam tawh si, innei ila thingpui dawr siam ve mai ila" fiamthua ka tih chuan a nuih a za khawp mai, "I dream a hniam lutuk, officer nupui nih i chak zawk lo em ni?" a ti khauh a, chulam chu ka lo ngaihtuah miah lo.

"Ni tak e ti raw, lehkha i thiam thei ropui mai sia, han officer luah mai la" ka tih chuan a nui ve suk suk a, ka han ngaihtuah thui zel a, a nupui nih chu ka chak tawh a ni.

Kan thingpui inna no ka sil laimekin pawn lamah thawm a lo awm a, "Lalawmpuia chu tukinah bawlhhlawh a paih hman lo a ni maw?" ti tu chu hmeichhe aw a ni, a chhungte an lo haw hman chu a pawi ka ti khawp mai a, ka zamin ka phili ruai mai.

Awmpuia lo kalphei chu ka lo melh vat a, "Pitei a nih chu" tih pahin kawngka lam a pan a, "Tinge, bawlhhlawh i paih loh, i nang hman leh pek lo a ni maw?" nutling aw in a tih ri leh "Tukinah bawlhhlawh paih an lo kal lo, naktuk zingah a lo kal ang" Awmpuian a tih ri chu ka hre pha.

"Gas pawh fit nghal rawh ka ti sia, fit lohin i lo han dah tawp a..." nutling aw in a tih leh chuan chhanna ka ngaichang a; mahse, thawm dang awm loin Awmpuia chu a lo lut zui a, "Eirawngbawl hmain ka va thlah ang che" a tih rual deuh thawin hmeichhe pakhat a lo lut a, nu tawi; te deuh, thau lam deuh leh mitmeng lian zet mai a ni, min rawn hmu chu min melh phawk hle bawk.

"Pitei anih hi" a tih chuan ka han nuih ve ngawt a, min nuih let lo chiang kher a sin.

"Tunge a?" a lo ti bul hmuk a, "Ka ṭhiannu a nih hi" Awmpuian a tih chuan "Eng nge a lo tih a?" a ti leh kher a, a ṭawngkam chu nelawm lem loh tak a ni.

"Lengah ka sawm a, vawiin chu kan banghma deuh a" tiin Aawmpuian a chhang a, a ṭawngkam a dam dup reng.

"I bialnu maw?" tih pahin a Pitei chuan min rawn thlek nawn leh a, lo nuih bak chu han tih vak ngaihna ka hre lo.

"Aw" ti a Awmpuian a chhan chuan "Class in tlanbo em ni?" a lo ti leh hmuk a, a nelawm loh sa tehlul nen a rilru a chhiat hmel ka ti.

"I va lo haw hma ve?" Awmpuian a tih takah chuan a hawisawn ve ta hram a, "Dawr bulah mitthi an awm a, kan inkhar hma phah anih hi, customer neih ṭhat ni ber kherah ka ui tak tak a ni" ti nuah nuah chungin pindan lam a pan a, a kalbo ta chu ka lo thaw huai mai.

"Min thlah hman dawn em ni, i Pitei a lo haw hman bawk sia?" anihna takah chuan amah chu ka inthlahrun pui a, a Pitei kha a nelawm loh em a, keichu bus pawhin ka haw thei a, min thlah lo zawk mai sela ṭhain ka hria.

"Ka thlah dawn che nia, ka'n hrilh hmasa phawt a nge" a tih chuan ka kut hru hulin bag ka ak sawk sawk a; mahse, a Pitein a rawn au leh lang lang.

"Thingzai dawrah phuai zuk la rawh aw, gas i ren thiam lo lutuka, thukah chhang pawh kan zel a ngai tawh, dawr an khar hmain zuk kal thuai rawh" a tih chuan Awmpuia hmel chu ka en vang vang a, ka lainat ru ngang mai.

"Zu kal mai rawh, bus-in ka haw mai dawn a lawm" ka ti leh chu hrehawm a tih hmel khawp a, "Min lo nghak mai la, ka rei lo ang" a tih chuan chhan mai dan ka hre lo.

"Ka haw thei tak tak ania, min ngaihtuah suh" ka tih laimekin a Pitei chu a lo chhuak a, "Ka ṭhiannu thlah pahin ka rawn la haw mai ang" Awmpuian a lo ti leh vat. "Rei lo la, ka nuamsam lo ania, i nau lahin ka lo haw har dawn atia, eirawng i lo bawl leh mai loh chuan.." awki dam angreng deuh hian a ti a, chuti chung chuan a hmel a tum bar reng lawi a, ka awm ve vanga insum mai mai anih ka ring, ka ngei ru riau lehnghal a, Awmpuia lakah hian a ṭhat ka ring miah lo.

"Ka lo haw har lo ang" Awmpuian a tih chuan a chhang ta lo a, keilah pek chuan dawhkana ka chhang hawn tur chu theihnghilh hlau lutukin ka va ban a, chuta min lo en dan chuan min ti ṭim sung sung thei, a mitmeng lian zet leh a eyebrow dum huam te chu a rapawm ka ti!?

Pawn kan chhuah hnuah "A van sual hmel em em!" ka ti chhuak phawng a, "A mizia ve anih kha, a ṭawngkam a bul ve a" a ti mai a, chuzawng ka ring zan lo, a rilru a chhiat hmel tlat.

Haw kawngah chuan eng eng emaw ka zawt nual a, an khua chu khawchhak tlangdung lamah a awm a, an chhungkaw chanchin pawh tlem a zawng chu min hrilh tawh. A nu leh pa an la dam a, huan siama eizawng an ni, nau hmeichhia a nei bawk a, a nau chu piantirh aṭanga ṭawngthei lo leh bengngawng a ni a, amah hi chhungkaw innghahna tak tak a ni bawk.

"I putea hian a duat che em?" ti a ka zawh chuan "Duat tehreng mai, inah a awm tam lo a" tiin min chhang a, a pitei a fel em tih ka zawh chuan a ngawi deuh vang vang.

"A thinchhe deuh; mahse, a sual hran lo" a ti leh mai a, ka hrechiang lo chungin rinhlelhna ka nei ru tlat tawh. Inlama a buai dan te ka hre ve reng a, inbiakna hun pawh kan nei ṭha ṭhum lo a, ka biak apiangin eng thil emaw tiin a buai ziah a, lehkhazirna hun pawh a nei mang lo ang ka ti ṭhin kha ania, a Pitei ka han hmuh takah khan an chhiahhlawh chei deuh thawah ka ngai. Ka ngaihtuah tluk tluk a, ngaihtuah tam poh leh rilru a na ru veng veng mai a ni.

In kan thlen chuan Gate bulah kan ding ren rawn a, ka ngaihbel nge hlim lo hmel a pu tlatin ka hria, a nui tak naa a mitmeng erawh a dik zan lo. "Naktuk chu hna ka thawk dawna, zingah message ka chhan loh chuan i lo hre mai dawn nia" tiin min chah thlap a, inrinni apiangin a inhlawh a, a chang chuan zanah te pawh thil thiarin a inhlawh ṭhin. A tumruhna leh taimakna te hi ka ngaisang a, hmeichhia ten mipa ṭha kan tehna ang zawng zawng hi a neiin ka hria, ka mitah hi chuan a ṭha thlawt a, tu mipa dang mah hian a khum theih pawh ka ring lo.

Gate-a ka luhhnuah a inkhalh chhuak a, in lam pan tuma ka inher chiah chu kawngka aṭangin uite a rawn tlan chhuak a, a hnungah Unaunu a lo chhuak ve zat bawk. "Vawiin chu i van bang har ve" a ti liam puat a, pangpar awmna lama uite tlan chu a um thuai bawk a, tu uite nge maw a lo hawn ni?

"Khawi a mi nge?" ti a ka zawh chuan "Muani uite anih hi, ka kawlsak rih dawn a?" phur hmel deuh hian a ti a, han pawm mai a tum chu a dahthla leh rang hle.

"Mother-in a duh lo ngawt ang, ui hmul a haw teh ania" kan ṭhenawmnu ui lo hruai ṭhin pawh a sawisel ziah a, a dah let tir duh ngeiin ka ring.

"Lo sawi miah suh, ka pindanah ka thuk ru dawn a lawm" a tih chuan ka ner nak a. Nu Hlimi hmuh loh turah thil thup chu a har khawp ang, ka mihring hrawn tawh a zawnga khirh leh che fel fai ber a ni. Inchhungah luhsanin eirawng ka bawl a, Unaunu lo lut chuan ui chaw tur a siam mawlh mawlh a, a nu lo haw hmain a inthiarfihlim pui thuai bawk. 

Nu Hlimi a lo haw chuan eirel ka lo peih fel chiah a, theibuhfai a lo hawn ṭeuh mai. "Pathum kha i pindanah kawl rawh, thei in ei ṭha duh lo leh lutuka, pek thlap thlap loh che u chuan in dah chhe hman zel" tiin U Lizzy nen pathum ve ve min pe a, chutih laia ui bauh ri a hria chu a hawi phawk khawp a; mahse, a bauh chhunzawm lo hlauh.

Zanriah eikhamah rei lo te ka nu ka han bia a, dawrah mi an tam aniang thawm a ri nawk nawk a, a ṭawng a hriat hleih theih loh. Ka pa erawh ka be tlang thei lo a, tunah chuan camping an neih mek ka ring a, hetiang hunah hi chuan biak buai loh ṭhain ka hria a, a hman hunah min lo be ve mai turah ka ngai.

Lehkha zir ka tum zet a, ka mut chhuak chu ka ham zing khawp mai. Sana lah chun dar 8 a kawk ve êk êk chauh a, muthlu chunga thil chhiar chu beng lehlamah a chhuak nghal zel a ni ber. Pindan bang lehlama mu U Lizzy erawh a ṭawng barh barh reng a, a chang leh a nui ri hawr hawr a, darkar 1 chuang zet chu Phone a hmang tawh.

Ka ning ta deuh chuan intihharh tumin kawtah ka va chhuak a, boruak chu a thiangin thli a thaw heuh heuh a, zanlamah hian pangpar te hian rim an chhuah nasa zual a, gate sira Jamine par chu kawngka bul aṭang pawhin a rim a hriat theih. A kung bulah va kal hnaiin ka han hnim vang vang a, a rimtui zia chu aw....

Awmpuia ka text a, eng nge a tih ka va zawh chuan phuai a sawh mek thu min lo hrilh a, phuai chu eng nge a nih pawh ka hre lo. Thlalak min lo thawn a, thir hmanga siam tereuhte ah hian thing zaina nawr emawni hi a lo hnawh muk ṭan a, a chhang kanna tur a ni awm e.

"Zanin chu sawhchiar kan siam dawn a, ka mut dawnah ka lo hrilh ang che" a tih vangin rei lote chiah kan inbia a, pawn boruak a nawm em vangin ka la lut duh mai lo. Zawitein zai ka play a, pangpar pot bulah ṭhuin van lam te chu ka han hawi kual a, arsi an de sep sep mai. Ngaihtuahna chuan kan khawlam a fangkual a, kan dawrte chep ve ang reng taka ka nu che melh melh tur te chu ka mitthlain ka hmu a, lung a leng ve takzet.

Rei dawn ka ṭhut hnu chuan ka harh vang ta deuh a, parpar rim lah chu a rimtui tehlul nen eng emaw uih hak hi ka hre leh ṭhin a, gate pawn lamah ui ek a awm anih ka ring. Thawh mai tuma ka inbengkang chiah chu thawm mak angreng deuh ka hria a, phun bul bul thawm a ni. Gate lam ka hawi vat a, tu emaw kal liam chiah chu ka va hmu hman a, lo kal tum, ṭhulh leh te pawh a ang. Chutia uluk fahrana gate pawn lam ka va thlek laichuan veilam bang hrulah thawm dang a rawn awm leh a, ka hawi chho hman awrh ang tu emaw hi a rawn ṭum thla chhak a, ka sir maiah a ni, kan inmelh chiang hle bawk.

"E he..nangpa chuh!?

"A va uih.." a ner nawk a, chutah a kut chu phulah a tat nghal nawk nawk a, ui ek a nem pherh a ni chiang mai.

"Eng nge i lo tih dawn a?" min chhang loin a uak zui ṭhat a, a kut chu a la tat fai mawlh mawlh reng.

"Eng nge i lo tih dawn ka tih chuuu..i rawn lut ru lehnghal ah"

"A va han tenawm e aww..." ka lam a rawn hawi a, "Lizzy a mu tawh em?" a tih zawm zat a.

"Mu tawh" ka lo ti buk hmuk.

"Lo min lo koh sak lawk teh" a tih chuan phawk fein ka melh a, Nu Hlimi a hlau lo em mawni?

"A muhil tawh, a nu a la mu lo, a hmuh vaih che chuan a thinrim viau ang" tiin ka han sawiṭhaih a, a ngai pawimawh loh hmel khawp mai. Thawh pahin kan inlam chu a hawi vang vang a, "In hnung lamah tukverh a awm ti raw?" a ti leh ta mai, a va mawl...

"A teuh lo a, inchhunga luh tum reng reng suh" ka lo ti vin hlura, kan in lam chu a la thlek vang vang tho, luh a duh ngang a niang.

"A nau em ni i nih?" ti a ka lam a lo hawi chuan ka bu vat a, "I u chu a la thinrim em, a hrilh che em?" a ti leh a, a huat zia ka hrilh hrep dawn em mawni.

"Ka nuin a hmuh che chuan Police a phone duh ang, U Lizzy pawn a ngei ngawt ang che" a lo chek tlak a, "A la thinrim reng a ni maw?" zawi deuh tak hian a ti a. Unaunu khan a bialpa ang pawh khan a ngai chiah lo kha a nia, he pa hi chuan inngaizawng inhau satliah angah a in ngai anih hi.

"Midangin an lo hmuh hma chein chhuak leh vat rawh, tun ang huna lo kal te i tum reng reng, luhruk te i la tum zui a.." ka vin khar khar laiin a phone a lo en daih a, U Lizzy a call aniang, a han ngaithla ren rawn a, a inpetruh nghal ṭalh ṭalh.

"A be duh lo che anih kha.." ka tih leh chu ka lam a rawn hawi thut a, "Lut la, va ko teh, a lo chhuah hma chu ka kal dawn lo tih hrilh rawh" a ti a, min vin ve ringawt nia.

"Gate bulah hian ka lo awm ang" tih paha a lo ṭhut hniam rual chuan a uih nghal huk a, hnar ka lo hup rang khawp.

"A hriat viau e law?" phawk fahran hian a ti a, kei ka lo bu sawk sawk.

"A va pawi e" tih pahin jasmine par chu a va hrawm nawk nawk a, mai mai a... a ban puamah ka lo bensak zawt a, a kut a la sawn rang khawp mai.

"A la nam em?" ka hmai bul chetah a kut a rawn lek a, a uih zia chu, pum a let but a, ka uak nghal ṭhat ṭhat.

"I ṭawp em mai a, rawn lek hnai reng reng suh" ka melh rum al a, a kut chu a la hnim zui lehnghal, uih a ti ve tho a niang ner nawngin a thle sawn a, luak ala tum zui...

"I va han ṭawp mai mai tak, ka'n luhsan daih teh ang che" bang lampana a kal laichuan ka tho vat a, "Hrilh rawh" a rawn tih pawh chuan ka hawi let duh tawh lo. Mahse, inchhung ka luh hnuah U Lizzy chu ka hrilhsak ta tho a, ani lah chu a lo thinrim em em khawp a, "Ka chhuak awm lo" a ti bur a, koh sak ka tum lem lo bawk a, ka hrilh chu ka duhtawk viau a ni.

 Ka pindanah ka luh hnu chuan phone-a an inbe thawm ka hria a, "Haw nghal rawh, vawikhatmah rawn kal tawh suh, ngaihdam in dil a ṭul tawh lo, ka ngaidam ang che, mahse....min lo be tawh suh" tih angreng sawiin unaunu chu a ṭawng ring khawp mai.

"I duh leh zankhua pawhin ding rawh, ka rawn chhuak chuang lo ang" a ti deuh hmak a, Ben-uiha chuan kalsawn a tum lo tak tak aniang.

Lehkha ka zir a, rei vak loah chuan U Lizzy thawm pawh a reh zui a, Awmpuia min lo biak hun nghah pah nen a khat tawkin phone ka bih leh ṭhin. A message ka dawn ve meuh chuan dar 11 a ri thuak tawh, "Ka'n inbual lawk ange, i mut a la chhuah loh chuan min lo nghak la, week laia zirtur kan inhrilh dawn nia" tih angreng a lo sawi a, zirlai chungchang sawi dun aichuan inkawm mai mai ka lo chak asin le.

Awmpuia inbual ka nghah chhungin ka lo muhil hman lek lek, U Lizzy ṭawng thawmah ka harh hlawl a, "Mawl lutuk, ka va han hne zozai tak" a ti vin hlak hlak a, a pen thawm ka hre zui zat bawk. Ka pindan kawngka hawnga ka va dah chuan parda a keu lai ka va hmu a, tukverh darthlalang chhanah chuan a bih kual duk duk a, a hmu a niang, "Ka vawm chawrh dawn em mawni" a ti zui hlak a, nuih an ti za deuh.

"A haw duh nange?" ka va tih chuan "A mawl ania aw, ka nu ka hrilh dawn zawk em mawni?" a ti niah niah a, Ben-uiha pawh chuan a tlawmla ve tawh lo em mawni?

U Lizzy lah chu a chhuak duh der mai si lo va, luhlul leh luhlul an inrunluih a ni ber. Han inbe ṭha sela chuan an mizia pawh a in ang dawn khawpin ka hria, an inkawprem nek maithei a ni. Pakhata lah khan a han atchhilh hmel em em khawp a, hetianga min atchilhtu neih te chu a nawm dawn tehlul nen, keini ve chu duh ang pawhin inkawmna hun kan nei thei lo ania. Awmpuia hi min hmuh tumin lo kal ve sela chuan engtiang takin nge ka hlim ang, bangah te lo lawn liamin, lo luh ruk te han tum ve sela chuan....

Ka ngaihtuah zawng ringawt pawhin nuam ka ti, vawiina a thil sawi te kha ka ngaihtuah let a, officer nih a tum thu a sawi lai mawlh kha. A nupui ka nih chuan Officer nupui ka ni anga, hmeichhe dang te chuan min thik nasa dawn hian ka hria. Suangtuahna ka nei thui sawt hle a, a chhan pawh a tumruh zia te, lehkha a thiam theih zia te ka hria a, a tum phawt chuan a hlawhtling dawn tih ka chiang a ni, keia tih tur chu lo thlawp a, a tana rinawm zawng a ni mai. Hmeichhiate kan vanneih zia hi chu aw, lehkha thiam thei lo viau mahila pasal lehkha thiam thei leh hlawhtling tak kan la nei tal a, hmeichhia a ka lo piang hi vannei riauin ka inhre tawh, mipa ni ila chu ka laktlak dawn loh riauin ka hria.

"I mut a chhuak tawh em?" a rawn tih chuan sana ka en vat a, a tlai viau tawh, lehkha zir phei chu ka peih tawh lovang.

"Chhuak ṭan der e, i la zir dawn maw?" 

"Rei lo te ka chhiar ang, i duh leh mit mut san la, note ka lo siam sak dawn che nia" a ti a, ka laktlak loh zia hi chu hai lo ve tak a ni.

"Mut hmain rei lote inkawm lawk ila, weekend-ah ka ngai ṭhin che i tih kha" beisei nei fahrana ka va tih chuan "Ka ngai che a lawm, i bula awm ka chak" a ti ve ngei a, ka ngai nghal vawng vawng.

"Sunday-ah tal hian lo leng thei la ka ti" ka han ti leh a, "Sunday chu tihtur a tam thei lutuka, in veng hla viau lo sela chuan ka lo leng hman tur ania" a ti a, hre ve reng tan chuan han ngen luih vak theih a ni ṭhin lo.

"Naktukah hna thawh i ngai sia, nangpawh mu har suh, exam a la hla a lawm" ka tih hnuah kan in mangṭha a, phone ka dah zet tawh hnuah "Ka hmangaih che" tih ka va thawn leh a, "Duati" tih thu a rawn thawn chu ka ennawn tluk tluk a, ka muhil leh thei lawk lo. A lehkhazir tihbuai ka hlauh vangin muthilh ka tum a, U Lizzy pawh a muhil thei bik lo aniang a khat tawkin a ṭawng thawm ka hre leh ṭhin. 

Zingah chuan ka harh hma khawp a, harh tawh chuan mut reng hi ka peih ṭhin lo. U Lizzy ui lah chu pawn chhuah a chak a niang a bauh reng a, Nu Hlimin a man phah ngei ang. Hmanhmawh deuhin Unaunu pindan lam ka pan a, a uite-in min lo hmu chu a mei a hem vat vat a, U Lizzy a lo harh ve chiah bawk. "A zun a chhuak a niang, pawnah kai chhuak mai teh" a tih vangin ui chu ka kaichhuak a, kawtah va zun tir ka tum chu kawngkhar ka hawn rualin tum lo deuh ka va hmu a, min ti hamhaih angreng.

Kan veranda-ah ban nghengin a lo muthlu pek a nih chu....!? A haw lo tak tak...!?

"Hei, engah nge khalaiah i riah ngawt?" Nu Hlimi a tho hmasa ang tih a hlauhawm ngei mai.

"Heih....tho vat rawh.." a hnungah ka va pet dat dat a, a la harh thei lawk lo.

"Ben-uih..."

"Tho rawh, tho rawh...haw vat rawh, ka nuin a hmuh vaih che chuan aw, 'i ngal ruh ka khawng tliak ang' a tih che kha" ka khupin a hnungah ka va do sawk a, a rawn hawi chho chu a phak chual a, a meng hleithei lo.

"Lizzy a tho tawh em?" a ti hmasa ber.

"Tho lo, a hmu duh chuang lo ang che, an lo thawh hmain haw vat zawk rawh" 

"Va kai tho mai teh a.." a la ti cheu.

"I mawl em mawni le, a duh lo che tih hrethiam ve mai la...." beidawng zetin ka melh a, muang fahrana a lo din chhuah takah chuan a sa a ṭha vei phian a, a hmel ner nawng reng erawh hmuh a ninawm, a balh hmel bawk si.

"Kha i uih pawh a reh tawh kha, va haw tawh rawh, nidangah chuan lo kal duh tawh miah suh" 

Uite en pahin "Ka lo kal awm em mai a, min lo ning ve vak suh" a ti bawl a, mai mai hian a... 

"I thu thu, i beidawng haw ziah anga a ni mai a lawm" tih pahin ui chu ka kaisawn ta daih a, pangpar hunna bula phulah ka va kai phei a, a zun a lo chhuak tak tak aniang rei nghah pawh a ngai lo. Uite a zun zawh chuan luhpui lehnghal mai ka tum a, Mawliana chu kawngka bulah a lo ding tlat a, min dal zawng tak lehnghalin.

"Hei hi lo pe rawh aw..." tih paha a lehkha min pek chu phur lo deuhin ka laksak a, han keu pharh mai ka tum chu "Chhiar hlek suh" a lo ti vin hlur a, ka khup leh zal zal.

"Pe ang che" a ti nghat a, ka chhang duh lem lo. Ngawi rengin gate lampana a kal chu ka enliam a, hnup hnup mai a, a khawngaihthlak zawk a lawm le, U Lizzy te ang a han duh ve hluah hluah chu a ni sia. A kal liam veleh a lehkha min pek chu ka en a, ngaihdam dilna thu hi thui fahranin a ziak a, a hawrawp lah chu chhiar har khawpin a chhia.

"Ka hmangaih lutuk che" tih thu lah chu vawi li lai a ziak a, a bak zawng chu a inthiamloh thu leh a ngaihdam hma chu a lo nghah reng tur thu vel a ni, a tawp lamah Unaunu vanga a mittui a tlak thu a ziak tel a, ka lo zak ru deuh.

Engpawh chu nise a tum a ruh em mai tiin pek sak ngei ka tum a, mawl ti viau mahila ka ṭan ve riau a lawm. Mipa hmangaihna vanga an han zawr hnup hi chu an hmuhnawm tlat, Unaunu tan ka duh vang pawh ni hran loin a duhsak awm ka ti a ni ber.

Inchhunga kan luh fel hnuah uite chu a e leh lawi a, a zun lai te khan ek law law tur ania, zing kara ek then ka peih lo a sin maw le. "I chhungten ek hun bi an siam lo che a ni maw, piberin a hmuh vaih che chuan a pawi dawn teh ania, Ben-uiha ang mai..." ka lo tih laimekin U Lizzy a lo lang a, "A e ania, nangman thian rawh, pum pai a ti nuam lo" ka lo ti zung zung a, Ben-uiha lehkhathawn chu ka pe nghal thuai bawk.

"A lo kal leh elaw, zing zingah, awm ngaihna a van hre lo tak e aw..." a ti vang vang a, a ninawm ve duh khawp ang.

"Nizan khan a haw reng reng lo, veranda ban nghengin a lo ṭhu tlaivar anih dawn kha" ka ti a, a muhil tih kha chu ka sawi duh lem lo.

"Khamawm em mai a, a ṭhiante bulah sawi a ngai anih hi" a ti nuah nuah a, lehkha chu a bih thuak a, chhiar pawh a chhiar zo hman lo ang ui ek then nan a hmang daih! A ngai ho mai bawk si a, tihngaihna hre loin ka enliam ta ngawt chu ania, a zia lo ka ti ru angreng.

Chawhma chu inchhung sekrek ka khawih a, ka chhungte lah chu uite vangin an inhnial reng a, a tawp a tawpah U Lizzy'n a va dah leh ta ngawt a, a kal hlan te chuan Nu Hlimi chu a phun reng a, ui hmul a zawng kual thul. A naupan laiin uiin a seh tawh a, tun thlengin ui hi a huat phah a ni awm e. 

Thawmhnaw bal te ka sufai a, chawhnu lamah chuan tv en pahin kan mu der der a, ka bialpa reh lutuk mawlh chuan ngaihtuahna a luah. Mi ina awm ve ve si kan khawsak phung a inthlau a, ka nuamsa bik hi Awmpuia ka lainat phah ṭhin. Zinga a message ka chhanna pawh a la en lo a, tunah chuan a pocket money tuakin hna a thawk mek anga, mi hnuaiah hah taka hna a han thawk tur te chu ka mitthla a, hnuk a ti ulh ṭun thei.

Tlaiah min lo call a, zan lama a inhlawh leh tur thu a rawn sawi a, an lungrem tur a lo thleng dawn a, chumi thiar chuan a inhlawh leh dawn a ni awm e. "I chau em?" ka lo ti vat a, chu erawh chiang sa reng a ni.

Mahse, "Chau lo e, vawiin chu kan hna a awl deuh a" tiin zangkhai takin min lo chhang a, han inhnaih ila chu kan induat ve thei deuh ang maw le.

Zan dar 10 velah a haw chauh a, a chau ve ta deuh aniang a mu hma a, mut hmunah rei deuh chu message kan inthawn a, naktuk lamah a inkhawm dawn em tih ka zawhna chu a rawn chhang ta miah lova, a muhil anih ka ring. U Lizzy leh a bialpa vangin ka muhil leh thei lawk lo, Ben-uiha kha inhnung lam tukverh bulah a ding tlat a, bang chhan aṭangin unaunu chuan a va tawng ṭhin a, an thawm a ri rei khawp mai.

Ka muhil ṭep tawh tihah U Lizzy chu a lo lut a, "A haw ta em ni?" ka tih chuan "A niang" tih zawngin min chhang a, a rilru a hah hmel hle bawk.

"I duh leh thei ngang lo em ni a, ngaihdam a dil nasa mai che sia, ngaihdam leh chi a ni lo em ni?" ka ti ta ngawt a, a mipa hian a duh hneh em a, chance pek leh pawh a awm ve riauin ka hria.

"Duh tawh nang, ninawm lamah a kal tlat, ka nuin a duh lo nasa bawk sia, ngaihzawn leh ngam chi pawh a ni tawh lo, heti hian rawn ti vak vak lo sela chuan a zia deuh tur ania, tunah te chuan ka nu'n min hauh phah hrep ang, ka ngam tawh lo" a ti ve duah a, a sawi dik ve reng.

"Hnar a har hmel sia.." ka ti leh a, ka beidawn pui deuh a ni, tunah pawh an inhnar hleithei meuh lo chu a nia.

"Ka be ṭha leh rih dawn em mawni ka ti deuh a, ka ṭhen chhan kha a ngaithiam lo tlat, tihian han be ṭha deuh ila, ṭhen dan ṭha zawk ka ngaihtuah mai ang" a ti leh chu han sawipui vak dan ka hre lo. "I tih dan dan" ka ti ta ngawt a, a chhuah hnu chuan ka ngaihtuah zui neuh neuh a, Unaunu sawi ang tak khan inṭhen chhan ṭha tak an mamawh a ni.

Zinga Awmpuia nen kan inbiak chuan a farnu damloh thu min lo hrilh a, "Nizanah a khua a sik hluah a, vawiinah an inentir ang, a na a sawi thei bawk si lo a, a damloh ve hlek chuan damdawiina kal nghal zel a ngai" a ti a, a aw aṭang pawh chuan a rilru hah tur zia chu a hriat theih.

A inkhawm dawn em ka zawt a, "Inkhawm chu ka duh, chanchin ngaihchan ka duh bawk sia, chawhma chauh ka inkhawm ang" a ti a, chhanchin a hriat veleh a min hrilh nghal turin ka chah bawk.

Ka nu Hlimi hian Pathianni a inkhawm loh hi a phal lo a, kan dam phawt chuan kan inkhawm ve ngei ngei ṭhin. Chawhma leh chawhnu kan inkhawm a, kan ban hnuah Awmpuia pawh ka be leh chauh a, a nau chu a lo zia viau tawh a nih hmel. "A khawsik pawh a reh a, an haw lehnghal ang,  damdawi te an lo chawh a" zangkhai deuh hian a ti a, awm a ti nuam ve huai mai.

Zan lam chu a buai vangin kan inbe mang lo, mut dawnah Jelebi ka eichak em tih min lo zawt a, chhang thlum hi ka ngaina khawp a, college-ah min lo ken sak fo ṭhin. Noeli message ka dawng ve tehnawlh a, Drama channa a hak tur kawrfual an ṭhui tir dawn hi a lo nia, ka duh ve em tih min lo zawt a, kan lan chhung a rei dawn lo ema pawisa sen nan chuan ho ka ti deuh tlat.

"Ka nei sa a" tiin ka va chhang a, "A ṭhat chu, mahse...inkawibah tur kan nia, nalh deuh a hak chi loh" a rawn ti leh a, kei aiin nalh loh a hlau daih zawk ang chu.

Thawhṭanni Class banah item nei tur ho chu kan inhmu khawm a, Lalpeksanga lah chu Vahui lemah a chang dawn a, a sawi tur zirin a au luah luah reng a, hmeichhe ṭhenkhat chu a thla lem tur siamin an buai hle bawk. Education Class a mi, mipa lian leh hmelchhe ve zet chu Phunṭia lemah a chang dawna, a changtunu tur Rebeki lah chuan a han ngaithei lo khawp a, chupa lah chuan a thusawi dan tur a zawt ve sek a, an inhau vel chu hmuhnawm tak a ni.

Sir Muanpuia'n Script min lo sem hlawm a, tichhin tura min tih vangin a pawimawh lo ho zawng chu mipui ṭhutna lamah kan kal dial a, Awmpuia a ṭawng apiangin student dangte chuan an lo au fiam ṭhin a, a zak ve deuh ṭhinin ka hria. Keini lah chu Kimkimi nen tlar hmasa berah kan ṭhu a, Awmpuia chu a khat tawkin a lo hawi leh ṭhin.

"Rinsangpui, kha laia i ṭhut te chuan Zawlpala'n Tualvungi a chhai ngam hleinem" Peksanga'n a rawn ti chu an nuih dar dar a, "Ni e, Nu-i a hnung lamah va insawn rawh" tiin midangin min lo fiam bawk.

"Hrik inensak mai mai te chu a ho em mai" ka lo tihsan a, lan khat naah hrik an inensak dawn miau a ni. Mahse, Awmpuia'n pawm titiha Rebeki sam a han khawih vel te chu hmuh a nuam hauh lo, kan Tualvungi seng sung lah chuan no zet zetin a melh lehnghal a, ka lo ip ru ṭun reng mai.

Kar tluanin tlai banah Drama kan zir a, inkawibah tur ringawt kan ni chungin kan tel ve zel a ngai. Rebeki Dialogue thiam thei lo lutuk chu min ti sawt lotu a ni, chham hla phei chu an zirtirna lamah kan lo thiam vek hman a, a theihnghilh a piangin kan lo sawipui dual dual thei tawh. 

Week ṭan hma ni a kan enho leh ṭum chuan an thawmhnaw hak tur nen an ti chhin dawn a, inkawibah tur ho pawn kan chan dan tur takin ka ti chhin a, kawi pawh Sir, Muanpuian a lo ngaihtuah fel diam mai. "Nui ula, hlim hmel deuh khan rak chul rawh u" min tia, Noeli nen kan inmelh dun ralh ralh a, kan innuih lo ve ve. Vanneihthlak deuhin kawi kaptu lamah ka ṭang a, Noeli kawi chhawn tak chu ka va kap tlu sak sak a, chutah chiah chhan nuih a za, a lawm lo hmel hmuh chu a nuam ve tlat. 

"Kha zawng kha a ni mai, Tualvungin Zawlpala a va zawn dawnah in lo chhuak anga, in inkawibah lai a lo bia ang che u" tiin min hrilh a, kan lan hun chu minute thum vel chauh a ni. Eng eng emaw sawiin kan titi hlawm a, Awmpuia puan ven tur te kan ensak bawk a, chutih laiin Noeli chu kawi chhawngin a lo ṭhu sawp nuaih a, a kawi chhawn lai chu va kah tluk sak mawlh a nia ka chak ni.

"Ṭan tawh ang ule" an tih hnuah kawi pakhat chu ka va kap leh hram a, tum loh deuhin Noeli kapah tak ka va kap a, a ṭhu chip rang teh e. A kap hup chungin a ding chip chawih a, a nat thu chu a sawi ngam lo, mahse, a na viau a niang, a bula ding Chhuani banah a hmer ngar ngar a, kei Mawitei hnunglamah ka tawlh phei zal zal bawk.

"A ṭhu kak em anih kha" ka ti chu Mawitei nuih a za khawp a, ṭhutna lampana Noeli chhukthla chu kan nuih ru tet tet.

Reivak loah, a changtupa ber a lo chhuak a, kawr ha lo leh puan khup chen vel veng chunga Awmpuia lo chhuak chu an lo au dur dur a, a pian han nalh zia chu aw, thahrui a ngah hmelin a changtupa hliah hliah a, ka lam hawi a rawn nui ṭhin te chu hmuh a nuam takzet. Mahse le, lan khatna an chang ṭan dawn chiah tih ah Rebeki a lo chhuak a, a ṭawng hleithei der lo, a aw chu a tham chhel a, a khuh nasa mai bawk. 

"Naktip a ni tawh a, i âwm a nat chuan a va buaithlak awm ve maw le" Sir Muanpuia'n a ti leh ngawt ṭhin a, "Tih ni ah chuan a khuh puak vel chiah ang, a chi loh reng reng, thlak mai ang u" Peksanga'n a lo tih chuan "Noeli'n chang mai rawh se, min zirpuitu ber ania, a thiamsa vek a lawm" Rebeki'n a ti ta mai! Ka ṭhu ngil hluai a, ka hma a ṭhu Noeli chuan min lo melh ve kher bawk, a nui hmel chu ka ngei hlur, a intihtheih hmel hrep lehnghal.

"Sir, kan thlak dawn chuan Rintein chang sela, Zawlpala tur nen an inhmeh a lawm" Peksanga'n a tih rualin ka ṭhu hniam leh vat a, chutih laichuan "Rintei chan tir rawh u" midangin an lo ti ve sap sap a, Awmpuia lam ka han en hmasa ber thung.

"Noeli aiin Rintei in duh zawk em ni?" Sir, Muanpuian a tih veleh phur loh hmel deuhin ka lo ner a, "Noeli chan tir rawh u" ka ti ve ngat a, a chang ang tih chu hlau ru tak ka ni.

"Duh zawk daih e, a tir aṭanga Awmpuia duhdan a lawm, tiraw Pa-a" Peksanga'n Awmpuia lam hawia a tih chuan Awmpuia chu ka melh vat a, a lo bu nghat mai!?

Chutah, Sir chuan min lo melh vang vang a, "Rinte, i chang thei mai em, hei Rebeki'n a thei dawn lo tlat" a rawn ti lauh a, "Lo kal rawh" tiin Awmpuian min lo hui ve mek bawk.

"Ka thiam pawh ka ring lo, zirna hun a awm tawh mang si lo" ka ti niah niah a, ka lai deuh tlat. Mahse, Awmpuia chuan "Ka zirtir ang che, zan khatah i thiam hman vek ang" nuisangin a lo ti a, a tir aṭanga a duh dan a ni tih ka lo hre miah lo. Ka han ding chhuak chu min lo chhaih nak nak a, "Nu-i leh Pa-a chuh..ehhh..." tiin an nui dar dar hlawm.

(End of chapter - 2)