BLUE BAYOU (CH - 3) by Ahmangaihi violette Khiangte

BLUE BAYOU 

by Ahmangaihi violette Khiangte

Chapter - 3

Zanriah eikham hlawt a ni a, khua a durin thli a thaw vuk vuk reng a, Awmpuia a lo kal theih loh ka hlau khawp mai, zanin chiah Drama zirna hun kan nei tawh. Tlaiban aṭang khan Tualvungi thusawi tur leh a hla chham te ka zir ve tlauh tlauh a, Dialogue chu han harsa em em a awm lo, chham hla erawh a thlûk dan turah ka buai a, chhiar dan pawh ka thiam meuh lo.

Veranda-ah chhuakin Awmpuia chu ka lo nghak a, ruah a sur chuan a pawi khawp ang le, an veng a hla bawk si a, kawng lakah ruahin a nan hman mai pawh a hlauhawm. Phone ka tum laitakin Nu Hlimin min lo au a, "Inleng i neih dawn chuan Flask-ah thingpui ka dah thar hi aw" a lo ti lang lang a. "Kurtai a la awm em?" ka tih hnu lawkah kawngka bulah a lo lang a, "Fridge-ah sawn tlem a la awm, i duh leh chhang va lei la" a ti a, Kurtai a awm tho chuan lei ngai ka ti lem lo, Awmpuia pawn thingpui hang a duh zawk ka ring.

"A lo kal mek em ni?" a tih chuan "Ka hre lo, nichina ka biak kha chuan chaw an ei dawn chauh a" tiin ka call zui a, a chhang thei lo reng reng, ani pui hi a buai leh tawh nge a lo kal mek zawk ni?

"Ruah a va sur duh hmel ve" nu Hlimin a tih leh chuan van lam ka han hawi a, a dur khup mai a, a sur ngei ka ring.

"A lo kal thei lo maithei a ni, Bawngkawnah daih an awm bawk si a"

"Nangmah pawhin i zir thei mai lo em ni?" a tih chuan ka ner nang nang. Awmpuia a lo kal loh chuan ka nu ka phone mai ang ka ti rilru a, nu Hlimi chu zawh tlak vak a ni lo. Awmpuia a lo kal theih hlauh chuan lemchan laia ka awmdan tur thlengin min zirtir thei dawn a, chu loah a lo len chu ka thlahlel ve reng reng bawk.

Dar 8 rik dawnah pawh a la rawn thleng lo a, ruah hmi a tla ṭan der tawh. Ka call lah chu a chhang thei der lo a, tihngaihna a vang duh khawp mai. Gate lam chu ka thlir deuh reng a, "Thli thawah awm reng suh, hritlang i kai ve mai tur asin" a khat tawkin nu Hlimin a lo ti leh ṭhin. Tlang hrileng a tam a, Unaunu pawh a damṭha vak lo. Keichuan Awmpuia ngawt ka ngaihtuah a, khawchhe hnuaiah chuan lo chhuak duh lo maisela ṭhain ka hria. 

Call leh ka tum lai takin Bike lo tlan thawm ka hria a, rei loteah gate pawnah chuan a rawn ding a, amah ngei a ni. Hawnsak turin ka tlan phei vat a, ruah sur tam hmaa a lo thleng hman chu ka lawm hle bawk. "Kan vengah ruah a sur nasa lutuk a, ka nghak leh phawt a lawm, min lo call em?" a lo ti zung zung a, a phone a lo ak thuk deuh a ni awm e.

A bike chu veranda-ah ka hun tir a, "Ruah a sur hman ang tih ka hlau lutuka, tunlai chu hritlang an tam sia, lo kal lo mai rawh ka rawn ti hman ṭep a, i lo thleng hman chu a tihzia, ka lo mangang deuh a lawm" ti chungin kan inzui lut a, Nu Hlimi nen an inhmu chu nel deuhin an inbia a, ka nu Hlimi hian hmeṭha a tia, a lo len hmasak ṭum pawh khan fel a tih thu te sawiin a fak ve luam tawh.

"Khawiah nge in zir ang, in duh leh Sitting room-ah hian ti ula, kei chu lehkha chhut tur ka nei a" Nu Hlimi tih chuan "Dawhkanah a ni mai" ka lo ti vat a, Choka lamah kan inzui phei thuai bawk.

"Lo ṭhu rawh, script kha ka han la ang e" ka tih laichuan naupang thawnthu bu niawm tak hi a lo phawrh a, ka han ensak chuan 'Tualvungi leh Zawlpala' tih hi a lo chuang kalh a, a bu em em chu zir a ngaih pawh ka ring lo sin le.

Ka pindan ka thlen dawn ṭepah Unaunu lo chhuak nen kan intawk a, "A lo thleng tawh em?" a lo ti ve vat a, zanriah eilaia ka sawi khan a phur khawp a, Awmpuia hi hmuh ve a chak viau ṭhin. "Choka ah a awm" tiin ka kalpel mai a, ka bag nena ka va chhuah leh laichuan choka lama an inbe thawm chu ka hre pha. "Rintei chu a zei awm lo e, in chang lai video-in lo la teh u, ka en ve chak ania" tiin Unaunu chu a nui kar kar a, an bul ka thlen veleh "Zei lo viau mah se a zakzum chuih chuih lo va, a duhna ah chuan a huai ve riau zel" tiin min lo nuih var var a.

"Inzir lai ka lo en dawn" a ti mauh mai a, "A ngai lo, i awm chuan ka thiam thei lo ang" keiin ka ti thung a, kan inhnar nasa mai.

"Lo va tibuai mahta che" a nuin a lo tih takah chuan a kalsawn ta hram a. Tv a en niin ka hria, kan ṭawngzawi em a; kan thawm pawh a hre pha kher lo ang.

"I sawi tur kha han chhiar chhuak hmasa phawt teh" a tih vangin uluk zetin ka chhiar a, a duhna laiah min lo pawtchatin ka lam dan tur min lo hrilh zel a, "A taka i ṭawng dan ang chiahin awki i pe dawn nia" tiin min hrilh bawk. Ka chhiar zawh hnuah kan chan tur ve ve sawiin kan han ti chhin a, ani chu thiam tak a ni, a awki pawh a dikthlup bik a, kan hmel hmu lo tan chuan putar leh tleirawl inkawm kan ang mai thei.

"I ṭawng rang deuh a, muang dapin ṭawng rawh" a ti chu harsa ka tih laitak a ni. Ṭawng muan hi ka thiam lo, duh aiin ka ṭawng rang fo mai.

"I thiam bik e, ka ti lem zo vek dawn che a lawm" ka tih chuan "Tualvungi ang tak takin inhmehbel la, a rilru natna te pawh ṭawmpui ve tum la, i pasal chân angin han inngaihtuah chhin teh, hmangaih deuh nei angin han inchan la" ka mitah tak min lo en a, a thutak hle bawk.

"He thawnthu hi Romoe and juliet ang tho a thawnthu lungchhiatthlak a nia, a thawnthu pum hi hmangaihna in a luan chhuak a, i feel theih anih phawt chuan ṭha deuhin i chang thei mai ang, a thawnthuah hian chiang hmasa phawt la a ṭha, i mut dawnah i chhiar chhuak dap dawn nia" tiin a lehkhabu lo ken chu min kawhhmuh a, Love story lungkuai lam hi a ngainat zawng anih ka ring ngai lo. Ka beisei aidaihin a ngai thutak a, Zawlpala nih te chu a inhmeh zual riauin ka hria.

"Ka naupan laiin ka nuin min hrilh ṭhin a lawm, a thawnthu chu ka hre lutuk" tiin Zawlpala ka ngei thu te, an nupa inṭhen chhan leh an tawp dan te pawh amah vang anih thu ka sawi duah a, Zawlpala khan a nupui kha 'Ka farnu' ti tlat lo sela khatiang buaina kha an nei kher lo ang, a tawpa Tualvungi thi ve kher pawh hi ka duh loh dan lutuk a ni.

"Tualvungi lah hian demna a nei miah lo lehnghal a, a tawpah a thih phah lehnghal ania, Zawlpala hi Phunṭiha aipawhin a huatawm zawk" ka han ti leh chu a nuih a za khawp a, "Khatianga i ngaih tlat chuan Tualvungi rilru i ṭawmpui thei nang, Tualvungi i ni dawn a, i Zawlpala anih kha" a tih chuan dik ka ti leh viau tho.

"A buaithlak em mai, Zawlpala ang loin nangmah angin ka ngai mai ang, nangmah chân angah che ka inngai anga, ka rilru a na ngawt ang" ka ti hmarh hmarh a, ka sawi zawh rualin ka hnim ruih a, Awmpuia ka va en chuan min lo la melh ve renga, ka thil sawi dan chu ka duh lo leh hnuhnawh.

"Mahse, ka ngei ve chuang miah lo che" chu thu ka sawi ngawt chhan chu ka hre lo, Awmpuia leh Zawlpala ka hmuhdan chu a inpersan viau bawk.

"Keimah angin ngai rawh, Tualvungi angah in ngai la, kei Zawlpala" zawi deuh tak hian a ti a.

"An thawnthu hi engtin nge i hmuh ve?" ka lo tih chuan a inngaihtuah vang vang.

"Ka hmuh danah chuan sum leh pai aiin hmangaihna a chungnun zia a lantir a, dawt sawi a ṭhat loh zia te pawh. Zawlpala khan a nupui man rosum tak tak a nei a; mahse a hlim phah chuang lo, khatah khan hmangaihna hlut zia a tarlangin ka hria.

Thil pakhat ka lo ngaihtuah mai mai chu, he thawnthu hian kan pi leh pu te rindan a kalpelh nalai a awm a, an thih hnua an thlarau Phengphehlepa an chang ta kha. Kan pi leh pu te kha chuan an thih hnuah mitthi khuaah emaw pialral kai turin an inngai a, zirlaiah pawh kan zir ṭhin kha, Hawilopar an tawn a, lunglohtui an dawn ṭhin, khatiang ngaihdan kha he thawnthuah hi chuan hmuh tur a awm lo" tiin a ngaihdan min hrilh luam a, a thil sawi chu ka lo ngaihtuah phak lo reng reng.

U Lizzy lo phei leh hnuah thingpui ka siam a, ka rin ang tak takin Awmpuia chuan thingpui hâng a duh a, in pahin hmeichhe pahnih chu kan titi bawrh bawrh a, "Naktuk zing chu tho hma ila, ka chei dawn che nia" Unaunu chuan a ti a, a phur khawp mai. "Hmanlai nula lemah ka chang dawn a, inchei vak a fuh lo ang" ka tih laiin "Miin an en dawn che a sin, hmelchhe deuhin va chang la 'Tualvungi chu a hmelchhia' an ti ang che" a ti ve tlat a, Awmpuian 'lehkhabu chhiar chhuak rawh' min ti bawk si a, ka mut hma theih pawh ka ring lo.

Ruah lah chu ka tla tam telh telh a, current a thim zui nen kan thingpui in zawh hnu chuan kan duhtawk ta rih a, sitting room-ah ṭhu phei vein lemchan laia kan awmdan tur te min hrilh leh luam a, U Lizzy a tel ve tawh vangin a thu tak theih tawh loh. Awmpuia chu "Lo leng ve ṭhin rawh, ṭhian inleng a nei ngai miah lo ania" tiin a sawm zui a, a vawikhat hmuhna ah a nel nghal khawp mai, a duhna ah chuan Unaunu hi chu fel ve ṭhin tak a ni.

Dar 10 pelhah ruah chu a han ta chauh a, "Ka haw nghal mai ang, ka chhungten min lo ngaihtuah ka ring" a tih vangin pawn thleng ka va thlah a, gate ka hawnsak hnua pawh a la tlanchhuak mai lo, "Lo kal hma la, kan endun leh dawn nia, a tir aṭanga ruat i ni lo a, ti ṭha vak lo mahla an hrethiam vek ang che" tiin min thlamuan a, ka theihtawka ṭha a tih ka duh, chuti anih loh chuan min nuihzat fe fe an awm leh ngei ang.

"I hman hunah lo leng ṭhin rawh aw, ka chhungte khan an nel ve teh mai che ania" ka tih chuan ka kut a lo vuan vat a, "Ka thlen veleh ka lo bia ang che" zawi tea a tih hnuah a lo kun hniam a, ka hmui a rawn tawk hman awrh ang "I eizo ang e" tih ri vangin ka inthlah hlawk a, ka hawi chhuah rualin Benuih-an min lo kalpel fua mai.

Ka lehhawi vat a, kan inlampana a kal chu ka enzui vawng vawng a, "Tunge a?" Awmpuian a tih chuan "Benja anih saw" tih zawngin ka chhang. Chutih laichuan veranda a thleng tawh a, a phone a phawrh zui zat bawk.

"In chhungte maw?"

"Ni lo e, U Lizzy bialpa a nih saw, bialpa tih ah an ni tawh chiah lo, a la rawn hel ṭhin a" Veranda lam chu kan hawi ve ve a, "Lut nghal rawh aw, ka kal ange" a tih takah chuan a biangah ka han fawhsak zauh a, innuih var var chungin kan in mangṭha bawk.

A tlan chhuah hnu chuan Gate ka khar a, khua lah chu a hnawngin a vawt vura, a hritlan loh hram ka beisei. Chutih laiin kan veranda a ding chuan Unaunu biak a tum aniang a phone a ngaithla ran a, an inko chhuak thei ngut ange maw? Hepa hi chu a beidawng mawh ve ngawt mai. Veranda ka thlen rual chuan ka thlek pah zauh a, min ngaihven lem lo, a tumah a chiang ka ti mai. Be duh lem loin kawngka lam ka pan, ka hawng hman ṭep tih a, "Nangnu kha" a rawn ti thum dut a, ka lehhawi leh rih.

"Hmanni a ka lehkha kha i pe lo a ni maw?" a ti a, min melh nghal run.

"Pe e" 

"I pe lo"

"Ka pe reng"

"Daw vel khanglang suh" min melh dan chu, min la chhuahchhal ngam zuia, min tlawn hliau hliau tur a ni zawk maw le.

"Ka pe chiang em mai a, engtin nge a lo tih chu ka hrilh lo mai ang che" ngeiawm thei ang bera nuih pahin a thil ken chu ka thleksak a, Chocolate a hum ran.

"Pek sak i ngai em?" ka tih chuan "Lo ko rawh, ka phone tlang thei lo" a ti ve leh tlat. 

"Lo lut mai la" 

"I nu a la meng em?" inthlahrung hmel ka hmu zui a, a hlau chiang mai.

"Meng e, U Lizzy pawh a la meng" tiin ka nuih deuh var var.

"I nu a la men chuan ka lo lut lo mai ang, pawnah ka awm tih lo hrilh rawh" a thil sawidan chuan rilru a ti buai tlat, an inbe ṭha deuh anih ka ring. "Ka lo hrilh ang" tiin ka luhsan a, Sitting room aṭanga U Lizzy lo phei chu "Pawnah BJ" ka lo ti vat a, a hrethiam ve mai bawk.

"Ka nuin a hmu palh a nga sin" tih pahin a kalchhuak thuai a, ka ring dik a nih mai hmel e.

Kawngkhar a khar fel awrh ang tihah "I van mawl thei tak, inah lo kal ziah suh ka tih che kha, ka nu a la meng a sin" tih ri ka hre zui a, ngaihthlak ruk chu ka hreh viau nain an inbiak zel dan ka hre chak a, kawngka lam chu ka kal hnaih hret hret.

"Tinge i nu chu i hlauh viau a, ka hrilhfiah mai dawn a lawm" pakhatin a tih laiin "I ti awm ang lo e a" Unaunu chuan a ti pawr hlar a, chocolate an in pe aniang "Hetiang mai mai min pe turin lo kal tawh suh, a pawimawh feah lo chuan inkoh chhuah pawh a chi loh" Unaunu chuan a la ti khar khar.

"Ka ngai che a lawm" mipa zawk chuan a ti leh a.

"Phone pawhin kan inbe thei reng" vin zetin unauin a ti leh.

"I nu hriat loha inngaihzawn aichuan min biak tir mai rawh, ngaihdam pawh ka dil hreh hleinem, min huat chhan dang a nei zawk a mi?" chupa zet chu aw, a ṭanawm thei fu bawk si.

"Nangmah kha inen teh, a duh chein i ring reng reng em mawni..."

"Engtin maw...?"  mipa aw in a tih hnuah thawm a reh dak a, an boruak chu hahthlak ka ti.

"Hei vang hi a lawm inṭhen mai ka duh nachan chu, engtikah mah ka nuin a duh lo ang che, i mizia thleng hian a haw vek, i zah bawk si lo a, nangmah vangin min hau ngun tawh lutuk, ka tan pawh a hrehawm ve asin" Unaunu chuan a sawi uar deuh nain Nu Hlimi ngaihdan tur tho chu niin ka hria.

"Elizabeth, eng emaw hlekah inṭhen sawi reng lo teh aw, i nu chuan min duh lo eng ang mah se ṭhen che ka tum lo" mipa chuan a ti bur mai a, Unaunu plan a fuh dawn lo a ang riau.

"A duh loh zawnga awm hi ka tan a hrehawm a sin..." a vin viau nain chhuanlam a haihchham tih a hriat theih. Mipa zawk lah chuan "Ka be mai ang, keimah vanga a hauh che ka duh bik hleinem" a lo ti khawl a, a be duh tak takin ka ring.

Chutih laichuan pindan aṭangin Nu Hlimi a lo chhuak a, ka lam a lo hawi rualin ka kalsawn vat a, "I u hi a mu tawh em ni?" a tih chuan ka dang a awk deuh tlat, "Ah...a..a inthiar...aniang" ka ti bah nawk a, "I ṭhianpa chu haw ta e law?" a ti zui leh a.

"Ka thlah zo chiah, ruah a sur rei lutuka" ka ti a, a duh aikhan a leng rei tlat a ni, a vawt dawn nasa mai si a, keimah vanga a lo kalna hlatzia ka ngaihtuah bawk a, nuam ka ti viau lawi thung.

"Thingpui chu min lo thlit ve la" a tih vangin choka lam ka pan vat a, "Kurtai a la awm em?" a lo ti chu ka chhang thuai bawk. Mahse le, thingpui pawh ka thli hman lo, vawi lehkhatah kawngkhar a rawn ri rawk rawk a, "A va mak, biak a ṭul lo..haw vat zawk rawh..." Unaunu aw a ni, kawngkhar a ri nghal rawp a, ka tlan phei rang khawp mai.

Kawngkhar ka va hawng chu min lo en rual zawt a, unaunu hlauthawng hmel chu a khawngaihthlak lek lek, "Heih, inthawm a va na ve, i nu a lo tho ania" ka va ti sa sa a, kei min hmu chu thaw huai hmel an pu. "Kal vat rawh, ka nu a lo thawh chu" tih pahin unaunu chuan a nam rawk rawk a, kawt zawlah innam pheiin an han indinchilh leh rih.

"Min duh tak tak anih chuan min biak tir rawh, hetianga inngaihzawn ruk hi i duh zawk a maw?" 

"Ka duh lo ve ve, chuvang chuan inṭhen ang ka ti reng a lawm"

"Dawt sawi suh, min duh tih ka hria, i nu i hlau mai mai anih kha"

"Hetianga i awm dawn aichuan inṭhen ka duh zawk"

Chuveleh unaunu biangah a dawm a, "Eng nge tihsual ka neih, hman zan kha chu hriatsual palh ania, kan hrilhfiah mai dawn a lawm, ka hmangaih lutuk che Lizzy, inṭhen sawi tawh suh" a ti tlawk tlawk a, a thinrim nge a lungchhia pawh ka hrethiam chiah lo, unaunu chuan a awmah a nam ngar ngar a, pakhatin a biangah a dawm bet tlat thung a.

"Min thlah teh..." a ti chung pawhin a thlah duh mai lo, "Min hmangaih ve em?" a la ti fan a, "Min thlah rawh" tih bak chu chhanna a awm lo.

Kawngka ka khar zo ka han inher chiah chu ka rak chhuak lo chauh, ka hnungah Nu Hlimi a lo ding reng tawh! Awm dawmin thawk ka la chiam a, sawifiah ngaihna a awm lo, a hria tih a chiang reng. 

"Awm sawn teh" a ti bul hmuk a, ka tawlhsawn rang ngang mai. Kawngkhar chu a nam hawng rawp a, a kal chhuak chu a hnungah ka zui thuai bawk. Chutihlaia kawtzawla kan thil va hmuh zet chu aw....

Bj-a chuan a lo fawp lui ngar ngar a, unaunu erawh a tal fat fat. "Elizabeth" ring zeta tih riin a zui a, a pawi zo ta a ni ber. An lampana a nu kal a hmuh veleh U Lizzy chu a lo tlan phei a, mipa zawk erawh a dinna ngaiah a la ding reng. Luhlul hmel fahran hian a hmui a tuai a, nu Hlimi lam a melh ngar bawk.

"Ka koh a ni miah lo ania, haw tir ka tum a..." ṭi dek chunga U Lizzy'n a tih chuan "Lut nghal rawh" nu Hlimin a lo ti vin hlur a, U Lizzy chu a rawn tlan phei nghal hlawk hlawk. Thaw dep dep chungin ka bulah a lo ding a, a lam hawiin "A van zia lo" ka ti zawi sep a. Mahse, "A pawi lo, tisawn inhnawt haw rawh se" tiin ka beisei loh deuhin min lo chhang a, a duhdan tak a nih hmel e.

Kawtlaia ding pahnih chu an inmelh ngar mai a, chutah chiah chuan BJ-a luhlul zia a lang chiang zual. Nu Hlimi lampana lo kalin "Hriatsual palh a ni, keiman ka hrilhfiah vek ang che" a ti a, 'In bengdai rawh' ti niawm takin ban a phar bawk.

Mahse, a thilsawi tum chuan bengkhawn a hlawh lem lo."Khawnge a ngal ruh kan khawng tliak law law a nge" tih ri in a zui a, Nu Hlimi'n hmanrua a dap nghal chung tawh.

"I ngaih ang kha a ni lo ka pi, Lizzy tihnat ka tum lo, buaina engmah ka siam lo ang che u" ti lawm lawm chungin Nu Hlimi hmanraw zawng chu a umzui a, u Lizzy lah chu 'Khap rawh' tih a sawt lo ang, a ner a ner duh chauh.

Gate sir lehlama kan rose kung dona tiang chu a va la lawk a, an intin uaih uaih chu en reng pawh a nuam lo. "Naupang zakthei lo lutuk, zilh loh fa i nih hi" vuak tumin a vai fua fua a, pakhat a lo indang ve zel bawk a, inlamah an rawn in chhawm let leh rih.

"Thil i hriat sual mai mai a nih kha, Lizzy nen hian kan induhtawn a lawm, vawikhatmah kut ka la thlak lo, i tiang kha dah la, ka hrilhfiah ang che" a sawi lai chuan a malah a lo hemsak zawt a, "A na.." a la ti zui a, Ka lo nuiru tet tet. 

"Lizzy.." tiin a rawn lehhawi zawk a, chuveleh a ngal a ri leh thlawp a, nu Hlimi lam a hawi ruala vuak leh a lo tum chu a tiang hmawr a man sak a, "Min cho khanglang e law, khawnge...ṭhenawmpa hoin vuak rawn che sela a ṭha ang, nang uicho fa, i ngal ruh te hi vaw sawm vek rawh se" tiin nu Hlimi a inhrosa kuk kuk a, thil a kal dik lo laklawh si a, Benja chu inthiarfihlim mai sela ka ti a ni, U Lizzy lahin engmah sawifiah a tum si lo.

"Min ngaithla phawt rawh, i fanu hi ka bialnu a nia, khawvela ka hmangaih ber a nih saw, ani i hauh dawn aichuan i duh leh min vaw rawh, pawi ka ti reng reng lo. Mahse, ka hmangaih tih i hre dawn nia" a huaisen ka tih zia chu aw....a â ka ti hle bawk, a bialnu hian a hmangaih ve hlawl si lo va.

"Elizabeth, he mihring hi i ngaihzawng em ni?" Nu Hlimin a ti vin ṭhak a, Unaunu lam ka hawi chu hlauthawng hmel hlir ka hmu. 

"Min chhang rawh" vin zeta a rawn tih leh rualin "Hau tawh suh" BJ-an a lo ti vin ve hluk a, Unaunu chu a ngawi ngal mai.

"Hetiang em em a mihring zakthei lo leh huaisar hi ka la tawng ngai lo ve, chhungte i nei em, an zilh ve ngai lo che em ni?" Nu Hlimi chu a beidawng ve ta deuh aniang, tih ngaihna hre lo deuhin Benja chu a en a, pakhat lah chuan insawifiah teh a la tum a, "I ngaih ang kha ka ni lo, hmeichhia kut ka thlak ngai lo, Lizzy leh lek phei chu tihnat ka duh lo" a la ti ve fan a, a khawngaihthlak zawk khawp.

"Engpawh nise haw phawt mai teh, vawikhat mah rawn kal leh tawh suh ang che" tih chhanna chu a duh ang chhanna a ni lo tih a chiang.

"Min dang thei chuang lo ang" a ti bawl mai a, boruak dai ṭan kha a chhem alh thar leh a ni ber.

"Engah nge maw ka han theih loh ang le, i ngam chuan rawn kal leh teh dek, jail-ah ka thawn liam tawh khawp ang che" a thinrim lutuk vang nge ni Nu Hlimi aw chu a khur dar dar tawh.

"Engmah tihsual ka nei lo, Lizzy'n min hmangaih chhung chu ka lo kal ang, min duh lo pawh nila pawi ka ti teuh lo mai"  Benjamin-a zet chu aw, hetiang zawnga dawr chi a ni lo asin maw le.

"Elizabeth, kan inngaihzawng lo i ti a ni lawm ni, dawt i sawi a ni maw?" Nu Hlimin a tih laiin "Ani lamah ṭuan suh, keimah vanga thinrim i nia, Lizzy'n tihsual a nei lo" Benja chuan a ti leh a, Unaunu chuan sawi nei ve sela a fel nimai tur.

"Nangkha lo ngawi rawh, Malsawmtluang...i ṭawng thei lo em ni?" tiin U Lizzy chu a melh ngar a, Unaunu chu a khur deuh em mawni. Ka dawhthei lo chuan a nakah ka va nghawk sawk a, "Sawi ve ta che" ka lo ti ve khar khar a, zanin hian inchingfel law law sela ṭhain ka hria, a ṭhen duh anih pawhin tun hi a hun tak aniang.

"Hlau miah suh, i nu hi kan inhmangaih tih hrilh rawh" Benjamina'n a tih veleh a inhumruh a, "I zakthei lo lutuk, ka nu zah lo tu hi ka duh reng reng lo, vawi engzah nge ka hrilh tawh che, min tibuai tawh suh" a ti vin ta chiam a, Benjamina hamhaih hmel chu ka va hmu chiang khawp mai.

"Lizzy.." zawi tein a ti a, a hmel chu en pawh a nuam lo, ka lainat takzet tawh.

"I hria maw chu, a duh lo chung i ti buai anih zawk chu" pawr fea Nu Hlimin a tih leh pawh chuan a hawisawn tawh lo, unaunu ngawt a en a, a rilru a na tih a mitmengah a lang a, muangchang leh chawmawlh hmel zetin kan lam a lo pan bawk.

"Va hnaih hlek suh" ti a Nu Hlimin a pawhna chu a thing thla sawk a, U Lizzy ngawt a nia a la en ni.

"Hlauh a ngai lo, i duh phawt chuan ka hruai haw ang che...tunah pawh..." a sawi zawh hmain "Ka duh lo che, lo kal hnai tawh suh" hlauh hmel lutuka U Lizzy tawlh hnung chu ka hrethiam lo!? "Nu...haw tir rawh" tiin a insut nghal hlawp hlawp a, keimah zawk chu ka lo hamhaih, heti em em chu thil dik a ni lo, a ti lutuk deuh a ni.

"Kal rawh, haw vang vang rawh, tuman kan lawm lo che, rawn kal leh tawh reng reng suh" tih pahin Nu Hlimin a nam phei dawt dawt a, tun ṭum chu sim phah sela ka ti takzet. Tualzawl aṭanga a rawn hawi leh chuan a biang a hru zauh a, mipa ṭap lai ka hmuh vawikhatna a ni a, ka rilru a lo natpui ve ngawih ngawih. Gate-a an innam chhuak lai chu ka thlir ve reng a, a luhlulna khan a rilru a lamlettir ngei ka beisei, chu chu atan a ṭha zawk ngei ang.

Inchhunga Unaunu lut chu ka zui ve vat a, chokaah pheiin tui vawt a va inkhawlh khawlh a, a mittui a hru mawlh mawlh bawk, a rilru a na ve nge tho anih ka ring. "A khawngaihthlak reuh e ti raw; mahse...i tan ṭhenna hun ṭha a ni ve bawk si a, khatiang lo deuh kha ni thei sela ṭha tur, i nu..."

"A phu tawk chiah anih kha, sawi mawlh mawlh pawhin awmzia a awm hleinem" a lo tih vang chuan ka sawizawm lo chiang hle.

Phun hluk hluk chungin nu Hlimi a lo lut a, U Lizzy chu a rawn hau nghal tawn tawn a, "Khati khawpa ngampa tur chuan awm a awm a ni mai, i pha kual mai mai a ni, tun chinah chuan fimkhur hle tawh ang che, ka duh loh zawnga i khawsa leh anih teh chuan  hnawhchhuah che ka pawiti dawn hlek lo ania" tiin a vau zui a, Unaunu chuan dek pawh a ti ngam tawh lo. A nu a ngawih veleh a pindan lam a pan a, an thawm a han reh fel chu hnar a hlit phawi ang hlauh a ni.

Mu turin ka insiam a, khuma ka mut hnuah phone pawh ka en ve leh chauh a, Awmpuia message pathum lai a awm. A thlen tawh thu leh a mut tawh thu vel a ni a, khua a vawh vangin mengrei lo turin min chah bawk. "I muhil em?" ti a ka va zawh chuan min lo la nghak a nih hmel. "I chhiar nghal em ni, vei run duh suh, i theihnghilh leh ka hrilh ru mai dawn che a lawm" a ti reuh a, a thu chu ka thiam mai a, lem han chan tak erawh ka zei viau lo ang, ka zam viau maithei bawk.

"I haw hma a mipa lo kal vang khan kan buai nuai a" tiin thil awmzia te chu ka hrilh ve luam a, "A va zia lo ve, nangpawh fimkhur rawh aw" tiin min lo chhang a, a hrethiam chiah lo a niang.

"I chhungte an lo mu hman em?" ka tih chuan thawk a la ri ka hria a, mahse ka ṭawng leh hmain "An lo mu vek tawh a, keipawh ka mu nghal a lawm" tiin min chhang a. Mahni a zir leh ka duh vangin ka mangṭha zui a, lehkhabu pawh chu ka han chhiar dawn ṭhina, rilruah thil dang a leng meuh lo, nichina thil thleng vang khan thaw a ipik ṭun a, min ti hah hlui mai.

Zingah chuan hma takah ka tho a, ka chhungte erawh dar 8 dawnah pawh an la rawn tho chhuak lo. Eirawng ka bawl a, tiffin te ka siam zawh hnuah ka va kai tho chauh a, tukṭhuan kan han kil ho te chu boruak a dang a, tumah kan ṭawng ṭha peih lo. Ka chhuah dawn chuan ban veleh a haw nghal turin min chah a, U Lizzy laka a strict deuh hian min khap tel ve zel a, a zilh chang pawhin 'In' tih hi a ni ta ṭhin a, ka tih awm ve si lo hi min hmer tel a ngai a, thin a rim ve ṭun zel.

Tuk dang ang lo takin Awmpuia a rawn tlai a, a lo thlen chuan Hall-ah kan lut fel diak tawh. Ka bula a lo ṭhu chu chik deuhin ka lo en a, a hmel chu a hlim lo riauin ka hria. A tlai chhan ka zawt hmasa ber a, "Bus-in ka lo kal" tih zawngin min chhang a, "I bike a chhia em ni?" ka tih lah chuan "Chhe lo e, ka ta a ni hleinem" a ti leh mai a, a Putea'n a hmang anih ka ring.

"I hritlang em?" a chal ka dawm sak vut a, a khua chu a sik lo. Amah pawn "Ka ṭha, ka hritlang lo" a ti a; mahse, a hmela dik lo awm chu ka hai der si lo. Ngaihṭha lo deuhin ka va thlek leh ṭhin a, ka en changa a nui hmel te chu a danglam riauin ka hria.

A Pitein a hau anih ka ring deuh a; mahse, chutiang zawhna han inzawh chu mipa tan chhan nuam anih ka ring lo a, ngaihtuahna erawh a buai ru khawp. Rei vak loah Backstage a kal turin an lo ko a, "Ka han kal ange" ti a thawh mai a tum chu a banah ka lo vuan a, "Vawiin chu Ka Zawlpala i nih kha aw" tiin ka nuih var var a, a bu ve nghat mai, "Ka lo let leh vat ang" a tih hnuah a kal a; mahse...chawhma chhung zawng chu a rawn let tawh lo. 

Chhunah Refreshment an siam a, chuti chung chuan kan ṭhian ho chuan tiffin kan pai tho a, hall chhung step zau laiah kan kil khawm laih a, hetianga tiffin ei ho hi a nuam ve riau zel. Awmpuia ka pai kep vangin ka han nghak ru deuh a, stage-ah drama channa tur ṭhutthleng an rem chu ka hmu leh zauh ṭhin. A lo kal kal har bawk si a, midang an ril a ṭam tawh si, "Nghak lo mai ang u" an tih vangin kan eisan ta ngawt a, rilru a nuam miah lo.

Kan ei zo ṭep tih ah a rawn lang hlawl a, "I va rei em em ve" ka lo ti chu min nuih ringawt a, ka bula lo ṭhut pahin Frooty min pe zui a, a chanai min pe anih ka ring. "Ka nei a lawm, nangman in rawh" ti a pek let ka tum chu "I ta tur anih kha" tiin kan tiffin eibang a ei zawm leh mai bawk a, vawiin ang em em a mize cool hi ka la hre ngai lo, nawm loh rukna a nei tih a hriat reng.

A chaw ei zo chu tui bottle ka lo pe nghal thuai a, ka ngaihsakna lantir chu ka tum ve hle. A sam ka chulsak lahin midangin min lo chhaih hman zel a, uchhuak nih te pawh ka hlawh ta ve ang. Programme ṭan hma deuh chuan zunram thiar turin kan inzui chhuak a, hmeichhe zunin pawnah dingin min lo nghak ran a, zunin chhung aṭang chuan pawn lama Noeli nen an inbe thawm ka hre pha a, an thil sawi chuan beng a verh rang hle bawk.

"Inluah tur chu i duh tak tak em?" Noeli'n a ti a, "Ka la sawi chiang thei lo, ka duh thut maithei" Awmpuian a tih chuan ka bangbo khawp mai, inluah hran a tum tihna em ni? Engmah a sawi si lo va!

"Hostel-ah awm thei la ṭha tur" Noeli a ni.

"Inluah a ṭha zawk a lawm, ka hautak vak dawn lo a" 

"Engtin chiah nge an hauh che a, Petrol man i dil ngai pawh a ni si lo, tlangval i nia, eng emaw hlekah an hau reng che a, ka thinrim tlat" Noeli'n a ti leh bawrh bawrh. "Min hau ka tih loh kha, Pitei a phun ringawt a lawm; mahse, awm hran chu a ka duh, inhlawh te ka duh a" tiin Awmpuia'n a chhang a, Bike chungchang vangin a Pitei nen an inhau a ni ngei ang, thil engmah min hrilh loh laia Noeli zawkin a hriatpui chu a lawm lo khawp mai a, ka zawt tawl mai dawn nge mawni?

"Ka ṭhiante pawh ka lo zawn tir ang" Noeli'n a tih leh chuan chhuah ka tum uk a, Awmpuia ṭawng thawm ka hriat vangin ka ding leh rih. "Hmunmawia kha i hria em, a nu pawh kan khaw chhuak kha, Motor silna a enkawl a, hmannia kan inhmuh khan min sawm a, class banah ka inhlawh thei dawn a" tiin tu emaw chanchin a sawi a. Noeli'n "Rintei i hrilh ve em?" a tih takah chuan ka ngaithla uluk sauh a, chhanna ri ka hre lawk lo.

"Tinge i hrilh ve mai loh, a mawl si, i buai tih te hi a hrethiam ve lo aniang, in ina a lo leng te kha ṭha ka ti miah lo, hruai haw tawh miah suh, tikhan i Pitein a thinrim changin a sawi chhuak leh anga..." ka hau chungin an thilsawi chu ka ngaithla a, ka va leng kha a pawi ang tih ngaihtuahna nachang pawh ka hre lo.

Awmpuia chhanna ka ngaihchan laimekin "Engmah Rintei lo hrilh suh, a rilru a hah mai mai ang" zawi tein a ti a, chu chu ka duh loh dan lutuk a ni, engmah min hrilh duh loh vang hian ka rilru a hah daih zawk ang.

"An lut tawh a nia, tunge i la nghah?" Noeli bawk a ni.

"Rintei a zung a, lo va lut rawh" Awmpuian a tih hnu chuan inbe thawm ka hre tawh lo, rang deuhin ka chhuak a, min hmuh rualin ka bag min lo pe vat a, "Lut ang le"a tih laia a hmel landan chu a la ngaireng. Hlim hmel a pu lo a, a lungngai hmel erawh a thup tlat thung a, a bana ka vawn pawhin engmah a sawi lo, a ngawichawi hle ringawt.

Ka ṭhiante bulah min ṭhutpui a, rei vak loah programme neih dan tur an lo puang a, drama chang hnuhnung ber tur kan ni. Ṭhut pahin ka chan tur ka chhiar melh melh a, a khat tawkin Awmpuia chu ṭawngthluk ka va zawt leh zauh ṭhin. Ka biak chuan ṭha deuhin min chhang a, "I zam em?" tiin min zawt bawk. A hun a hnaih takah chuan ka zam thar a, ka chesual palh ang tih mawlh ka hlau, inkawibah kha lo ti mai mai zawk ila ṭha tur.

Green house ten Romeo and juliet an chang a, an chang thiam khawp mai, Snow white lemchangte erawh an nawi deuh a, a tawpa a changtute inchuk zauh erawh an lawm dar dar hle a, changtunu leh changtupa lem chang chu inngaizawng ve tho an niin ka hria. Kan inbuatsaih chhungin white house ten stage an luah lum a, Original drama an chan vangin mipui lam thawm a ṭha khawp mai a, an nui dur dur reng. An thawm a ṭhat em vang chuan ka zam phah lehzual a, kan lem chan tur lah a lungchhiatthlak nasa mai si a, boruak kan siam hleithei lo ang tih ka hlau.

Ka insiam zo chu stage luh dawnah min lo nghak ṭhap a, "A confi ve hmel lutuk" Noeli'n a lo ti zauh a, a ṭawngkam chu ka inrintawk phah hlauh thung, a hmuh laia chet chhiat ka duh lo miau a ni.

Ka beisei aidaihin ka chang ṭha a, a chhan pawh Awmpuia vang a ni ber. A hmel ka en apiangin ka rilru a na a, Zawlpala angin ka en lova, ka bialpa, ka duh em em Awmpuia bak chu amahah hmuh dang ka nei hek lo. A mood-ah ka cheng deuh aniang a tawpah phei chuan ṭah tak tein ka ṭap a, ka mittui luang te pawh a tak tak vek a ni. Keimah vangin Awmpuia khua a har a, keimah vanga thi ang a ka han chan chuan a kianga zal ve chu thil awlsam tak a ni. Hmangaihna vanga khawharna te, Tualvungi'n Zawlpala thih thu a hriata ruala a rilru tur pawh ka hrethiam ta kuar a, Tualvungi tawpna pawh chu ka dem thei tawh lo. Chham hla tlem ka theihnghilh a; mahse... ka hnuk a ulh tak tak avangin ka thup mawi ve hlauh thung a, kan zawh hnuah pawh min fak ve liam liam mai. 

Kan Drama chang zo kan inthlak laiin Kimkimi'n min lo ko a, "Pawnah Awmpuian a nghak che" a tih vangin hmanhmawh deuhin ka chhuak a, Hall sira min lo nghahna ka va thlen chuan Ice cream min lo leisak hi a lo nia, "I ṭap thlem nan" tiin min lo nuih var var bawk.

"Ka ṭap tak tak asin" ka tih chuan "Ka hria" a ti nghat a, kan zirna ah kha chuan khati lutuka ṭap turin min ti lo a, ka lo ṭap uar deuh a ni mai thei.

"Drama-ah bak chuan ṭah awih miah loh" tiin min en vang vang a, fianriala awm ni ila chu ka kuah ngei ang. Noeli nena an thil sawi kha zawh ka duh viau a, a thup chhan vang khan ka zawt hreh bawk si.

"Tlang deuhin engkim sawi dun ang aw" ka ti chhuak phawng a, zawhna ngah hmel deuha min en laichuan "Ka hmangaih che" zawi tein ka ti a, Noeli bula a sawi kha min hrilh sela ka duh ber, engkim a chhia a ṭha zawng zawng a sawipui theih nih ka duh.

"Keipawn ka hmangaih che" thutak zetin a ti ve a, min hmangaih thu hi message-ah chiah min la hrilh a, ka hmaichhanah ngei a han sawi chu ka lai a, a nuam ru veng veng bawk.

Hall-ah kan luh leh hnu chuan ka kut a vuan deuh reng, a phone a bih emaw ka tih chhungin a lo muthlu lup lup a, vawikhat mah a muthlu emaw a muhil hmel ka la hmu lo a, class-ah takngial pawh a muthlu ngai lo. A muhil lai chu thla ka laksak a, a khat tawkin ka en leh ṭhin, ka lamah pawt hnaiin ka dar ka nghen tir a, engti zia nge mawni a bengchhen tehlul nen, nizanah a mu ṭha lo hle anih ka ring.

Dar 4 velah kan bang thei chauh a, ka thiante pahnih nen Awmpuia bus kan chan puia, in ka thlen meuh chuan khua a tlai viau tawh. Nu Hlimi'n eirawng a lo bawl a, U Lizzy'n chhuat a lo nawt hliau hliau a, a nu tih lawm a tum changa a tihziah dan a ni. Kan Drama chang lai video te chu kan en ho a, min fak ve luam a. Awmpuia chu changthiam an ti dun khawp a, "Engtin nge maw a han duh theih che ni, a hmelṭha bawk si, a fel bawk si, lehkha a thiam bawk si, engti hmuhin nge a hmuh che le!?" U Lizzy'n a ti chu ngei lamah a kal meuh lo, ka intithei zawk mah.

Mahse, ka message a chhang thei miah lo a, ka chhungten an fak dan ka va hrilh pawh chu zan thlengin a chhang lo a, zan rei lamah phei chuan thin a rim hlur tawh. A tuk sawrkar chawlh a nih vangin sport kan chawl rih a, nileng deuh thawin biak ka tuma, call takngial pawh a chhang thei lo. Noeli'n chanchin a hriat ka han ring ringawt a, va zawh chu ka hreh ve tumhrang a, midang biak tur ka hre chuang bawk si lo.

Zan rei lamah chuan ka insum zo loin Noeli ka va be ta tawp a, "Awmpuia i bia em?" thukhuh deuhin ka va ti a, message a en rang khawp mai.

"Bia e, tinge..?" a lo ti vat a, min zawh let ka ring reng a ni, ka thikah a ngai leh pek aniang, ṭum khat chu ka khak tawh a, eng emaw hlek va zawh hi chuan a chhan min zawt let ziah.

"A rilru a hah em a, in veng a in ang bawk sia, lo ngaihven deuh la ka ti mai mai" pehhel deuhin ka ti a, chhimbudawia sawi chhuahtir dan ka zawng a ni ber.

"Ka pui reng a lawm, Peksanga pawh ka biak sak vek anih kha, inluah hran aichuan Peka te bulah awm sela ṭha zawk ang" a ti ta mai a, thil awmzia chu ka hrethiam riai ruai.

"Peka te ina a awm theih chuan a ṭhat hlauh chu, i lo puia a lawmawm" zep loah chuan ka lawm chiah lo a ni, ka rilru a buai nuaih a, hetiang thil te phei hi chu midang ka aṭanga hre tur ka ni lo, rilru put dan tur pawh min ti hre lo zo.

"Ka ṭhian a nia, ka pui ve ang chu... nang aichuan ka ṭangkai deuh zawk a nih hi ti raw?" a message chu chhang loin ka en reng a, Awmpuia chu ka call hmasa leh te te.

A la chhan theih loh vangin Noeli bawk chu ka text leh a, "I be thei em?" ka va ti leh tawl a, "Be thei rih lo, a Putea te inah a Phone a theihnghilh a, a la lam lo aniang" a tih chuan ka thaw huai a, tunah chuan a chhuah chhan a ni hriat ka duh ni.

"Engvanga chhuak nge a nih a, a pitei nen an inhau em ni?" ka va ti chu min lo call vat a, ka lak rualin "Engmah a hrilh lo che a ni maw, i va han bo ve, in ina a lo len zan khan a pitein a hau hrep a sin, kawngka pawh an hawnsak duh hleinem, garage-ah a riah phah a, nangmah vang vek anih hi aw, a tih tur ṭul zawng zawng kalsanin a lo kal tih hre rawh, ama duhthua chhuak pawh a ni lo, an hnawtchhuak anih hi. Lehkha zirkep i ngai pawh tih tawh nak alaiin lemchan mai mai te chu mahniin zir ve mai tur a lawm" a rawn ti bawrh bawrh a, ka nghilh dupin ka hria, thawk pawh ka thaw mang lo.

"Ka dah dawn" ka ti zawi sep a, engmah ka hriat belh ngam tawh lo, amah ngei biak ka duh.

"Nangmah vang hian mi ei loh a hlawh nasa tawh, over viau zel suh" a rawn ti leh hlak a, "Min mawhpuh vek suh" tih bak chu thil dang ka sawi thei rih lo, ka thaw a ipik a, ngaihtuahna a chiri nuai mai.

"Mawhpuh loh theih i ni hleinem, a rilru a hah ve ṭhin a sin, inlamah nuamsain a awm ngai lo a, lehkhazirna hun pawh a nei lo, heti chung hian Mark score nan i lo hmang ve reng ania, a ṭhiante chuan kan ei miah lo che, a dinhmun pawh i hriatthiam pui ngai lo. A rilru a hah chang pawhin i bulah chuan a phur reng a ngai, anih loh chuan i ringhlel ziah a lawm, hlim lo deuh anga a lan chuan ngaihzawng dang a nei emaw i tia, i dawp vel thul, nangmah vang hian depression a nei ang tih ka hlau ṭhin" 

Noeli ṭawngkam tin chuan min vilh ngut ngut. "Noel, engmah i hre lo" ka tih chuan a rawn nui hak a, "Awmpuia hi hmusit miah suh, i duh tak tak anih chuan ngaihsak ve rawh, i laka a inthlahrung lutuk te hi engti zia nge, a rilru hahna te pawh a hrilh ngam ngai lo che a nia, i bula a la nui thei te hi mak ka ti zawk ngawt asin, nizana kan buai laite kha eng nge i lo tih ve...?" a zawhna chu ka hre lo, engmah ka hre lo, a ṭawngkam tin chu min demna hlir a ni, insawifiah dan tur pawh ka hre lo.

Ka hnuk a ulh ṭeuh a, engmah sawi tawh loin phone chu ka dah a, mit ka chhin rualin ka biangah mittui a luang zung zung bawk. Library-a amah chauha a lo ṭhu laite ka mitthla a, khawhar hmel deuh ang khan a lang ṭhin a, min hmuh rualin hlim hmel a pu ziah a, khangte kha min thlakhlelh vangah ka lo ngai a, a tan phurrit ka lo ni reng ṭhin tihna em ni!?

Ka muhil thei lo a, Peksanga chu call ka tum ut ut ṭhin; mahse, ka lakah a thup miau mai si a, a rilru hahna va belhchhah leh chu ka hreh a ni. Khawvar dawnah ka muhil ve chauh a, ka harh leh har lo. Ka tihtur ka ti sawk sawk a, tukṭhuan pawh ei loin Sport-na tur lam ka pan a, a hmun ka va thlen chuan Field sir Pavilion bula a ding chu ka va hmu a, ani pawn min lo thlir reng tawh. A ban a rawn vai zauh a, min lo nuih var var bawk.

Ka kal hnai zel a, a nui hmel chu nidang ang thoa hmuh nuam leh ngainatawm a ni; mahse, a tak a ni lo, a lem vek a ni. He a hmelṭha tak chauh hi em ni ka lo hmuh ṭhin? Eng ngati nge hetiang nuihmel chiah hi min hmuhtir le? Engah nge a lungngai hmel chu ka lakah a thup? 

Eng angti nge.....engvang nge?

(End of chapter - 3)