BLUE BAYOU (CH - 4) by Ahmangaihi violette Khiangte

BLUE BAYOU 

by Ahmangaihi violette Khiangte

Chapter - 4

"I thlenna a rei tawh em?" ka ti hmasa ber a, zawhna dang ka ngah tehlul nen, a bulah chuan ka zam tlat a, hlauhthawnna hlirin ka khat, dawt min hrilh ka hlau a ni.

"CR ho kan kal hma a, dar 9 rik hmain ka thleng tawh" tiin min thlek vang vang a, ka ngaihtuahna hmuh tlang tum nimai awma chikin min en bawk.

"Ka message...." ka ti hman chiah tih ah "Aw, ka phone ka kawl lo a, roll call zawh ah kan inbe dawn nia, thil hrilh tur che ka nei" a ti nghal thuai a, chutih laichuan midang ho pawh field chhungah an lo kalkhawm sap sap a, "Thinrim suh aw" a tih leh pawh chuan ka lungawi thei rih lo, min hrilh hma chu ka dam thei lo a ni.

House captain anih vangin a hmasa berah  a ding a, keiin hnunglama ka ṭhiante ka zawm ve thung a, kan drama chungchang kha an lo sawi sap sap a, intihsiakah khan pahnihna kan lo ni a, Original drama chang ho kha pakhatna an ni awm e. Kan in line fel hnuah Noeli te ṭhian ho an lo thleng ve chauh a, hmanhmawh deuha an lo tlan phei chu ka lo en ve reng a, min kalh pelh laia kan inmelh thuak bak chu ka inbe zui lem lo, Professor ten rei lo te thu an sawi hnuah Roll call-na kan nei a, chutih laichuan Noeli chu ka bulah a lo kal a.

"I be tawh em?" a tih chuan "Eng atan nge i tih?" phawk lek lekin ka ti a, a lo ngaihven ve chu ka duh tehchiam lo, a hre hmasatu a ni pawh ka lawm lo viau tawh.

"I lo va chhuahchhal leh ngawt lo maw?" tiin a ner sak a, min ngaihdan zet chu! Nizana min ṭawngkhum danah pawh min ngai chhe lailet der anih kha.

"Chhuahchhal chhan tur a awm hleinem, thil sual tih a nei lo va" a lam hawiin ka han ti nghat a, "A hrilh lo che kha i lawm lo tih ka hrereng, thinrimin i lo va tawng leh ang tih ka hlau mai mai maw le, keini chu ṭhian ṭha kan nia, engkim kan inhrilh ṭhin" a ti kher a, an inkar chu kei nena kan inzawmna aipawha a thuk zia min hrilh a tumin ka hria.

"A ṭhat hlauh chu, i theih ang angin lo pui zel rawh" ka lungawi lohna thupin nui hmel ka hmuh a, chhungrilah erawh a tawt ṭun a, a hrethiam tho aniang "Hrilh tur chein ka lo ti ang, a bialnu bula a zep tlat hi a ṭha lo dawn tlat, in inkar a chhiat phah a hlauhawm" a tih leh zet chu ka ngei kher mai.

"Hetiang thil vang mai maia kan inṭhen phah ring duh suh, i ngaih anga rilru te kha chu ka ni lo ania" tiin ka melh ram ram a, ṭhat chhuah hi tum ve viau ṭhin mahila Noeli lakah hi chuan ka ti hleithei lo, ka huat tawk tura ṭawng hi a thiam zawng tak a ni a, min tih thinrim nuam a ti bawk.

A ṭhianten an lo koh tak avangin a kalsawn thuai a, ka dinna piah deuha an dingkhawm chu ka va melh leh ringawt ṭhin. A thil sawi te ka han ngaihtuah let a, kawng ṭhenkhatah chuan a sawi dik ve thoin ka hria, tun dinhmunah hian thinrim emaw huata la tur ka ni lo, hun harsa tak a tawng a, a rilru pawh a hah viau dawn a, hriatthiamna ka neih ve pawh a ngai.

Roll call an zawh hnu chuan kan ṭhutna tur lam kan pan sang sang a, Awmpuia chu ka zawng ru deuh a, CR anih bakah House captain a ni a, an ko phar reng a, Field sira ka zuk hmuh lai pawh chuan a buai hmel leh viau tawh. A thil min hrilh tum ngawt kha ka vei a, engkim zep awm loa min hrilh ka beisei. Mipa ho an intlansiak laichuan kan thlang deuha Peksanga lo kal ka hmu a, ka lo au ringawt pek a, kan bula a lo chhoh chuan han sawi mai tur pawh ka hre lo.

"In inah engzat nge cheng che u?" ka ti tawl a, mipa ṭawngthei tih takah "Pa ber lo awm takah chuan pali, Nu ber a lo luh leh chuan Panga kan ni mai" a ti ham ham a, Awmpuia va awm ve chuan buaina a siam lem lo niin a lang a, thaw a veng ve huai mai.

"Chhuatah a mu mai em ni?"

"Mu lo e, ka nau te inhlawhin ITI ah a riak daih a, an khum a awl a lawm" a ti sam et a.

"Lehkha i ti zir ṭha thei lo a nge aw, tibuai miah suh" ka ti chu a han duh lo khawp a, "Ka duat ve mah nak a laiin, tukinah pawh ka artui ei ai ka pe" a ti a, min melh rum titih.

"Lo duat viau rawh, anih loh chuan i chak lo ang" ka ti fiamthu a, kan zirlaipui dangte aipawha min chhaih nasa ṭhintu a ni a, mipa ṭawngduh leh kawm nuam tak, rilru sual pawh nei ve lem lo a ni, a phawk a, a fiamthu duh lutuk erawh a ninawm chang a tam.

"Lo leng ve ṭhin la, a thawmhnaw bal te pawh i lo suk sak ṭhin ang chu, chhuatnawh leh eirawngbawl te pawh kan phal vek" a tih chuan ka nui thut a, a ṭha dawn riauin ka hria, Peka te hi Ramhlun South-ah an awm a, kan inhlat ta lutuk lo bawk a, a awmna hmasa ai kha chuan kan intlawhpawh thei deuh ang chu.

"In inah Awmpuia a lo awm ve dawn a maw?" Mawitein a lo tih takah chuan Peksanga ka mitmei vat a, "Kal tawh rawh" tih pahin ka nam nghal rawk rawk a, kal pahin "Inrinniah aw, suk tur ka lo khawl ang" a rawn ti lang lang a, zawhna ka dawng zui zat bawk.

"A insawn em ni?"

"Sawn e, a college kalna a hla lutuka, inhlawh te a duh bawk sia" tiin ṭha deuhin ka hrilh a, kan inkar leh Awmpuia mimal chanchin hi ka sawi chhuak tam lo a, ka ṭhiante pawh hian college-a kan inzui dan leh an hmuh chin bak hi chu hriat an nei lem lo. Awmpuia chungchang ngat phei hi chu Noeli tluka hrechiangtu an awm lo a, kei aipawhin a la hre tam zel chu anih hi.

Spoon race-ah Mawitei nen kan tel ve tih loh chu a entu lamah kan ṭang a, Kimkimi erawh hmeichhe items-ah chuan a tel fai vek a, Mawitein 'Best girl nih a tum e' a tia, amah phei chuan a duh lo khawp. Hmeichhe volleyball khel en tuma kan chho chu Awmpuia te lo chhuk nen kan intawk hlawl a, kan bul a lo thlen rualin "Tui han lei lawk ang" tih leh min kaih a rual a, a ṭhianten Scooty chahbi an lo pe thuai bawk.

"Ni hlimah awm ta che, i biang a sen vek a lawm" kal paha a tih chuan a kut ka vuan nghet sauh a, "Eng nge min hrilh tur chu?" ka ti khawl a, ka nghak thei meuh tawh lo, min hrilh vek sela, keipawn ka thiam ang tawkin ka fuih anga, hriatthiamna sang tak ka neih hi lantir ve ngei ka duh.

"Peka te inluahah ka insawn a, Putea te inah ka phone ka theihnghilh daih a lawm, tlaibanah ka va lam ang" a ti mai a, helmet a khum laite chuan thildang a sawi beiseiin ka en reng a, "Chuang rawh le" a tih pawh chuan ka che chang lawk lo. 

"Chu zawng chu maw?" thawk ka la halh a, ka duhkhawp loh zia chu aw, zawh kher hi ngai lo se ka ti.

"Tlan pahin ka hrilh ang che" a tih takah chuan ka chuang ve vat a, kan tlan chhuah hnua a thil sawi pawh chu ka la duhkhawp chuang lo.

"Inhlawhna tur ka hmu a, zan lamah bungraw Unload tur ania, inrinni-ah pawh regulara kalna tur ka nei a, Putea te in aṭang chuan thawh a harsa dawn em a, an phal tho bawka ka insawn ta mai" tih zawng a sawi a, ka hmel hmu ngat sela chu a sawi liam mai mai hauh lo ang.

"Chutiang te chu Peksanga phone aṭang pawhin min lo hrilh mai tur a lawm" ka ṭawngkam chu a bul hmek hmuk hle a, side glass aṭangin min lo thlek zawk nghe nghe.

"Ni dawn tak e ti raw... nachang ka hre miah lo.." 

"Min ngaipawimawh vak lo tihna" 

"Teuh nang, nang aia ngaihpawimawh ka nei lo, ka insawn buai angreng lutuka.." a ṭawng chu a zuih ral deuh a, side glass aṭang chuan min lo en leh zawk ṭhin.

"I Putea te chuan an phal tak tak a maw?" 

"Phal ve mai e" 

  

"I puih nasat tehreng nen, i Pitein a uibet lo che em ni?" thil pangngai tak ka sawi nain ka awki a bul hle a, ka thinrim ṭun mai bawk.

"I thinrim em, ka biak loh vang che khan i thinrim tlatin ka hria, kan veng a inhnaih sawt dawn a, hna ka thawh loh zanah te pawh ka lo leng thei tawh dawn ania aw, Peka'n 'Chaweiah sawm rawh' a ti bawk che a, remchangah i lo ei dawn nia" ka kut a rawn ban a, a lamah min pawt hnaiin ka kut chu a hmer vang vang a. "Ka ngaih hman zia che i hre lo anih kha" ring deuh tak hian a ti a, nidang ang chu nise ka lawm leh viau tawh ang; mahse, ka ngaihtuahna chu thildangin a luah ngut ngut a, nuih luih pawh harsa tak a ni.

"Noeli nen in inhlat sawt dawn anih chu" tih pahin kut ka la sawn vat a, ani erawh a ngawi deuh vang vang.

"Tinge Noeli i sawi teh daih a?" a ti a, ka chhang duh bik mai lo.

"A ngai ngawt ang che" Side glass aṭanga min lo en leh rualin ka hawisawn hmak a, ka lungawi lohna chu thup ka tum tawh lo, ka thil hriat zawng zawng chu sawichhuah vek ania ka duh tawh ni.

"Noeli hi kawmngeih tum ve la, i lakah rilru chhia a pu lo asin, ka bulah phei chuan ka fak thei teh mai che ania" chu thu vang chuan ka ner nang a, khawi lamah mah Noeli hian min fak ka ring lo, nizana a ṭawngkam te kha ka hrechhuak uar uar a, thinrim luatah nuih a za dawn dawn.

"Ka bulah chuan fak ve vak duh suh, engtikah mah kan inkawmngeih chuang lo ang, Noeli leh keimah ah duh ka thlan tir lo che a, chu chu a tawk" ka ti hmak a, ka aw te chu a khur deuhin ka hria, ṭah vak mai ka duh.

"Eng nge i huat chhan ber, min ngaizawng emaw min tibuai pawh a ni si lo a?" 

"Engmah i hrethiam lo anih kha, ka lakah chuan a ngeiawm hluah hluah, in innel lutuk te hi ka bulah intihtheihnan a hmang asin, chutiang rilru a pu anih chuan ṭhian angin a en lo tawp ang che, hnawksak min ti hle ang tih ring tawp rawh" ka ti vin hlak hlak a, engtin tak min chhang leh ang maw ka tih laiin Scooty chu a tidinga, "Lo awm lawk rawh" tih pahin a kal nal nal a, dawr chhunga a luh hnuah pawh ka la inhum ruh ṭeuh reng.

Rei loteah lo chhuak lehin tui bottle case lian deuh hi a lo pu chhuak a, "Ice cream i ei duh em?" a tih chuan lehlam ka hawi leh hmak a, min thlem a tum tih ka hria; mahse, a pawisa lo hman ṭhensak hi nuam ka ti lo, rim taka a thawhchhuah tih ka hre ve reng a, bialnu hautak nih lah ka duh hek lo.

Kan tlan chhuah leh hnu chuan kan inbe lo reng a, thui fe kan tlan hnuah "Noeli chuan sawi a nei em ni?" tiin min zawt khauh a.

"Eng chungchangah" ka ti chang bawl a, sawi chhuak hmasatu a ṭan tir chu ka la tum ve hle.

"Ka chungchang emaw kan pahnih chungchang" a tih chuan za lo zetin ka nui, zawhna atthlak tak a ni.

"Kei aiin a hrechiang fe che a lawm, i chungchang te phei chu ka sawipui a ngai hleinem, in sawi dun ziah a lawm" ka ti ta fak a, ka hria tih a hriatthiam mai ka ring.

"Noeli i ngeih lo hi chu ka hrethiam thei a; mahse, eng ngati nge ka chungah i ṭuan daih hi ka hrethiam lo, Rinte....Noeli nen ka en dan che u a in ang miah lo ania, ani chu ka farnu ang ania, ka naupan tet aṭanga ka kawm tih te pawh i hre vek a, nang chu...."

"Eng nge kei chu...?"

"Nang chu ka bialnu a lawm i nih?" 

"Chuvang chu em ni engmah min hrilh ve ngai loh?" a tlan muang zui a, Side glass aṭang bawk chuan min lo en leh a, "Thil sawi dun in nei ti raw?" a ti ve ta hram a, tunah chuan tlang takin kan sawi dun thei tawh ang.

"Engmah hrilh tlak ka ni ve lo aniang, engkim Noelin a hre hmasa ziah a, Peka te in a i insawn thu pawh kei aiin a hre hmasa zawk a, a hnen aṭanga hriat kha ka tan chuan a tlawm thlak..." 

"Thinrim phahna tur a awm hleinem, ka insawn min pui ringawt a lawm, a haw tur pawh Pekan ania thlah, i ngaih ang em em kha a awm lo maw le..." a ti nuah nuah a, chutih laichuan kan tlanna aṭangin volleyball court a hmuh theih tawh a, sawi zo loa kalsan erawh ka tum lo.

"I kal hmain sawifel ang" ka ti chu min chhang zui lem lo. Field bul kan thlen chuan Scooty a ti dinga, ka chhuk velah daihlim lam ka pan a, tui bottle la tura midang a ko lai chu ka lo nghak ran bawk.

Ka lama a lo kal rualin ka pan phei a, "Min lo zui rawh" tih leh kal pelh ka rual a, zunin awmna field thlang lamah kan inzui thla a, mi hmuha inhauh ka duh loh vang a ni.

"Thil dang a sawi em?" a tih chuan eng emaw ngaihtuah a nei tih ka hria.

"Engkim ka hria" ka ti tawl a, a hmel a buai nak mai.

"Eng nge i hriat chu?" 

"An hnawt chhuak che ti raw?" ka thil zawh chu kei ngei pawhin sawi hreawm ka ti, ka thinrim nge ka lungchhia pawh ka hrethiam lo, hnem ka duh a, chutiang ti thei dinhmunah chuan min dah bawk si lo.

"Teuh lo mai, ka duhthuin ka insawn a lawm" a tih leh takah ka thinrim thar leh.

"Tinge thudik min hrilh chu harsa i tih em em a, engtin nge lo ngai tura min ngaih, i chungah hian ka sual viau em ni, nge keimah vangin an hau zawk che?"

"Rinsangpui, Noeli hnen aṭanga i hriat vangin huat tur i zawng mai mai anih kha" ka mitah min en ran a, a ṭawngkam chu min hmuhdan dik tak a nih ka ring, Noeli vangin huat tur ka zawng angah a ngai a, hetiang ngaihdan a nei anih chuan ka rilru tur pawh a hrethiam ngei ang.

"Engkim ka hre vek tawh, i lo len zan khan kawngka an hawn duh lo che tih pawh ka hria, i Pitei sual zia pawh ka hria, i duh thua chhuak i ni lo a, an hnawt chhuak zawk che anih kha, Noeli bulah engkim i hrilh a, ka bulah chuan i zep tlat a, a inngaihpawimawh loh thlak khawp mai. Ka bula sawi aiin Noeli bula sawi kha a ṭangkai zawk aniang, kei chu i tan hnawksak ka nia, Noeli te chuan a pui thei che a lawm ti raw...." ka sawilaia min en dan chu hmuh hrehawm tak a ni, a ṭawng lo a, a mit a la sawn hek lo.

"Kei chu i thuruk pawh i hrilh duh loh a hminga i bialnu ve mai ka nia, Noeli te chu i ṭhiannu engkim i hrilh ngam ania, ka thik hi a awm asin, thikthu chhia min ti anih pawhin ka dinhmun angah hi chuan hmeichhe dang pawh an thikthu a chhe vek ang, i ṭhiannu lah chuan buaina thlensaktu che ang chauhin min hmu a, ngaihsak ve ngai miah lo che angah min puh bawk" ti lui zetin ka nui a, ka nuih a za hauh lo, ka ṭah a chhuak hluah hluah zawk.

"Ka ngaihsak lo che em ni, engmah min hrilh ngai lo a, ka bulah chuan hlim hmel i pu reng a, hetiang chung hian engtin nge ka puih ve ang che, i buaina hrethiam tur pawhin eng nge hriat ka neih ve, ka hriat ve meuh te chuan Noelin tih tur ṭul zawng zawng a ti vek tawh a lawm..." ka insut hlawp hlawp a, mahse ka mittui a tla thei hauh lo, ka chhungril lamah zawk ka na a ni.

"Tinge engmah min hrilh ve duh loh, i bialnu angin min en tak tak lo ti raw?" ka zawhna chu min chhang lo sela ka duh zawk mah, ka beisei ang chhanna ka dawn loh ka hlau.

Min en reng ringawt vang chuan "Min chhang rawh" ka ti leh lawi a, eng thil nge sawi tura ka beisei ni, ka rilru a nu but a, duhkhawp lohna hlirin ka khat a ni ber.

"Thikthu chauhin i rilru a luah a nih kha, thil awm lo i thik a, Noeli hnena ka hrilh vangin i thinrim bawk a; tunah te chuan i hre vek tawh a lawm, eng nge ka sawi tawh ang, i rilruah Noeli bak a awm chuang hleinem" a ṭawngkam tin chuan min vilh ngut ngut, thikna chu ka nei ngei a, chutih rualin chhan erawh ka nei ve bawk a, a laka ka pawimawh lo leh chuang ta riaua ka inhriat vang a ni, engah nge a hmuh thiam theih miah loh le!?

"Noelin min hrilh lai khan engtin nge ka ngaih i hria em, ka rilru a na ve a sin, nanglah chu i reh hmak a, nileng zankhuain min be lo a...." sawi pawh ka sawi zo thei lo, ka khabe te chu a khur dar dar a, ka insehruh ṭun mai.

"Hre lo la ka duh vangin ka hrilh lo che a nih kha" a rawn ti chu hamhaih lutukin ka melh a, min chhang beidawng chiang hle.

"Ka lo hre vek sia, ka tihpalh anih chu, Noeli sawi ka hriat a nia, a zep zo lo aniang, ka hre lo der leh mai dawn em ni?" ka awki chu a ngeiawm a, a huat tura sawi ka ni.

"Ka tan hrilh che a nuam hleinem, hetiang hian i awm dawn tih ka hriat vang zawkin a lawm ka hrilh loh che" a thinrim viau ka rin laiin thinrim awka pakhat mah a lang lo, kei ka pawngpawrh leh sauh thung a...

"Noeli bula i sawi laiin ka bulah chuan sawi a harsa bik a maw, Noeli chu i tan eng nge a nih a, a lo hnem thiam viau che a niang maw, ka tan pawh min hrilh ve beisei hi a zahthlak zawk a lawm le...."

"Rinsangpui.." a ti vin hluk a, a awki pawh a san ve ta.

"Noeli nen chuan in in ang thei lo tih hre rawh, i bulah hetiang thu sawi hi ka duh ngai lo, tunah pawh hre lo la ka la duh reng..." a ti a, chu thu chu eng nge a awmzia!?

"Engvangin, tinge ka hriat chu i duh lo em em...?" a aia vin mahin ka ti leh a, ka au khum a ni mah zawk ang.

"Nang chu ka bialnu a lawm i nih, ka ṭhian i ni lo, i bula ka sawi hreh chhan hi hrethiam ve ta che, phu lo che anga inngaih hi ka duh lo, i hmuhah lan mawi ka duh a, i ngaihsan nih pawh ka duh; mahse....a theih loh anih hi...." chu ṭawngkam zet chu! Ka beisei loh lutuk a ni, ngaihtuah pawh ka ngaihtuah phak lo. Hnunglam a hawi vat a, kalsawn loin a la ding reng thung a, sawi tur engmah ka hre tawh lo, ka rilru chu a mang duk a, ka mittui a luang zung zung bawk.

Zirlai dang an lo lan tak avangin Field lamah kan inzui phei a, min be lo a, ka be bik hek lo, biak ka tum laimekin Prof ten an lo ko a, hmanhmawh deuhin Pavilion lamah a chho a, Volleyball khelhna lam aṭanga ka ṭhiante lo chhuk ka han hmu zui nen keipawh ka kalsawn ve thuai a. Chumi hnuah chuan ral aṭanga a che tla ka hmu tih loh chu ban dawnah kan in kalpel thuak a, biak duh viau mahila sawi tur ka van tlat tawh.

Ka inchhir ni berin ka hria, min hrilh duh loh chhan kha khatiang thil anih ka ring phak lo a, lo ring thiam ni ila sawi chhuaktuah ka ṭang hauh lo tur. Kan haw lamah chuan kawng chhoa kan kal laiin Peksanga scooty-ah an lo inphur chho a, "Nu-i bye..." Peksangan a tih chuan ka nuih tawi tak a, biak hman lohin an tlan liam zui mai bawk.

Zan lamah pawh kan inbe lo a, a phone a kawl tawh em tih takngial pawh ka hre lo, a tuk lamah chuan chawhnuah a lo kal chauh a, a buai lutuka; han biak falna hun a awm lo reng reng. Tlai ban dawnah chuan ka lo nghak rilru deuh a; mahse, ral aṭangin Noeli nen an inzui lai ka va hmu fuh a, rilru na ru deuh chungin ka hawsan ta kha a nia. Chumi zan pawh chuan a message emaw call ka dawng lo a, chu chuan kan inkar chu a hrilhfiah viau a ni. Min be duh lo tih ka hriat takah chuan ka na thar a, ka inngaihtuah lungpuam leh ringawt ṭhin. Chutih laiin Noeli message ka dawng lehta nghal a....

"Chhuahchhal suh ka ti mawlh mawlh che a, ka thurawn che i zawm duh lo anih kha, mipa rilru tur ngaihtuah ve ta che, a retheihna leh buaina zawng zawng a bialnu hnenah a hrilh vek thei hleinem, ṭhiante leh ngaihzawng te chu khaikhin chi an ni ngai lo, min thik tawh lo khan fel deuhin awm tum tawh rawh" a rawn ti duah a, ka chhang lo nain ka ngaihtuahna a luah ngut ngut a, Awmpuia chuan engtin nge min sawi ang tih ngawt chu ka ngaihtuah. 

Week closing kan neih niah Noeli chu ka zawt tawl a, a tir chuan a sawi ṭha duh vak lo, chhunah Refreshment kan sem laiin a lo kal a, "Ka hrilh che ang a, a aiah min pek belh ang" a ti ta hlauh a, ka hnial lo chiang khawp mai.

"Break kan mamawh a tia; mahse, a ngai lutuk che, nimina kan va len pawhin ka sawipui a, i chanchin sawi chu nuam a ti ve a lawm, a chhuang ve che a, kan college-ah nang aia hmelṭha tih a nei miah lo" a ti luam a, awih chi nge pawh ka hre lo, ani thil min dil hian a phuah chawp mai mai nge mawni!?

"Min la rawn be miah lo a, a thinrim em lo maw?" ka tih chuan "Thinrim lo ang, in Break ve zawk te hi a ngai a lawm, thawk lak in mamawh anih kha" a ti sam mai a, in break chu ka mamawh ve pawhin ka hre lo, chu aichuan inbiak ṭhat leh vat ka duh.

"Mipa chuan chapona an nei tih hre reng tawh rawh, rethei te pawh nise an bialnute chung en theih a awm an duh ber, a ṭhiante pawh kawmngeih tum ve tawh la, i hmuh apiang thik zel tawh suh, kei ang te...min han thik leh vaih teh..." tiin min la vau zui a, hahthlak hian a...

"Ka thik mai mai lo che, in inhriatna a rei tawh a, vawikhatmah a la ngaihzawn loh che kha, keite chu a First love asin ka nih" ka ti ve ngat a, kan han inmelh rum leh rih.

"Min thik loh chuan a ṭhat chu, dik tak chuan i ei awm loh thei em a ni, i mitmeng a lian si, Awmpuia kan biak ve hlekin nelawm loh deuh deuh hian min lo melh hman ziah a, i ngeiawm thei teh mai ania" a ti chu ka hnial ve leh a, "I ṭawngkam a ngeiawm daih zawk, ṭawng fek fek i ching" ka ti chu a nuih a za em em lehnghal a.

"Kei aichuan an inchung nula te saw i thik tawh zawk dawn nia..Awmpuia a be ṭha thei lutuk" tih paha kal mai a tum chu ka pawt let rang khawp mai.

"Tu maw...?" ka ti leh hluai a.

"An inah i la kal lo tak, kan junior a mi, Peksangan a lo phurh ve ziah kha" a tih pawh chuan ka la hre thei chuang lo, "Nakinah ka la hmuhtir ang che, in Break rei lo ula a ni mai" a ti liam puat a, a kal chu ka enliam ta ringawt a, rilru a tibuai nek mai.

Hall chhunga kan luh har vangin a hma lam ṭhutna kan chang lo a, Awmpuia hmel lah ka hmu hek lo. Red house chu inelna pumpuiah pathumna kan ni a, class ṭan leh hmain nikhat chawlh min pe bawk a, vawiina kan in hmu lo anih chuan weekend chhung nen inhmuh loh chhung a rei dawn khawp mai. Ban hnuah chuan Gate pawnah Mawitei nen kan lo dinga, Awmpuia lo chhuak ka hmuh chuan ka be hreh deuh riau a, ka lam a lo hawi rualin ka hawi sawn thuai bawk.

An lo kal hnai zel a, ka hmu lo der a ni mah tawh. Mahse, amah zawkin min lo be hmasa ta hlauh a, "Engin nge in haw dawn?" a tih chuan a lam ka hawi rang hle. "Bus-in a niang" ka ti zawi sep a, a hmelah chuan lungawi lo hmel ka hmu tawh lo a, a nui lo tih mai chauh a ni.

"Thil remfel kan la ngai a, haw har suh u" a tih leh chuan lu ka bu zauh a, engmah sawi tawh loin a kalsawn a, kan awmdan chu a la chiang lo riau in ka hria, rilru a la nuam thei zan lo.

"A biak danah che pawh a pangngai vek kha, inṭhen insawi loh chuan tikhan in ṭha leh mai ang" ka ṭhiannu chuan a ti a, a sawi awlsam khawp mai, Peka te ina a insawn chungchangah kan inhnial thu ka hrilh a, kan buaina tak erawh ka hrilh lo, tun ṭum hi an hriat theiha kan inhauh vawikhatna a ni a, Mawitei phei hi chuan min thiam lo zawk mah a, be hmasa turin min nawr reng bawk.

Dar 4 pelhah in ka thleng a, Nu Hlimi eirawngbawl ka pui nghal a, hall chhung boruak ka zo lo deuh nge ni ka lu a rit luk a, ka sil ṭhem ṭhum mai. Zanriah eikham hnu chuan sitting room-ah ka mu zal a, ka lung a leng deuh riau a, ka phone lah chu a reh tlawk tlawk reng. Lehkha ka zir peih lo a, TV pawh ka en ṭha peih chuang lo, ka eng tih tha mah a tho lo a, Awmpuia bakin rilru a luah hek lo.

Ka insum zo lo chuan message ka va thawn ta nge nge a, rei vak loah a Call ka dawng zui a, chhang turin choka lam ka pan thuai bawk. "Chaw i ei tawh em?" zawi deuh tak hian a rawn ti a, kan eikham chiah thu ka hrilh chuan "Ka lo kal lawk ang, ka lo thlen dawnah ka lo hrilh ang che, pawnah i lo chhuak dawn nia" a ti hlauh mai a, a lo kal chhan tur zawhna chang pawh ka hre lo, ka aw sawk sawk a, inthlak turin pindan lam ka pan thuai bawk.

Ka thawmhnaw ka thlak a, sam te khuih ṭhain hmai hnawihte ka intat ve mawlh mawlh a, hmel hlim lo hmuhtir chu ka tum tawh lo hle. A lo thlen hmain pawnah ka lo nghak ran tawh a, phone ka en deuh reng. A lo kalna a hla ta lo bawk a, ka nghak rei lem lo, gate bul a lo thlen rualin ka pan phei thuai a, "Ka lo lut lo mai ang, thil ka lo pe lawk dawn che" a tih vangin Gate pawn lamah ka chhuak ve a, a inbual zo chiah a niang a rimtui hle bawk. Ka bula a lo din rual chuan a thil rawn ken chu min pe zauh a, ka han en chuan beisei loh deuhin mawza a lo awm a, Jelebi leh chhangthlum dangte nen....

"Vawiinah bazarah kan kawi a...mawza kha a in ang ka lei a, ka ta chu ka haw hunah thlalak ka lo thawn ang che" a ti a, a lai ve deuh nge ni a hawisan leh vat a, a hmel chu enin ka nui var var tawh.

"Ka van lawm..." tih paha a kut ka va vuan chu a lo hum vat a, nghet lutukin a hmer vang vang bawk.

"Hmanni kha... tihpalh aw..." thutak deuhin ka ti a, "Sawi tawh lo ang" a tih chuan ka pawm thlap.

"Jelebi te hi i siam em ni?" 

"Nizana ka siam anih kha, vawiin khan lo ken sak che ka tum a, ka pack vek tawh a, ka theihnghilh daih a lawm maw le" a ti nuah nuah a, a hmel hmuh a nuamin a ṭawngkam a mawi bawk si a, a lam hawiin ka khi var var reng.

"Sunday-ah chaw i lo ei duh em?" tiin min zawt a, ka chhungten an phal chuan duh loh chhan tur ka nei lo, an phal ngei pawh ka ring, chu loah a awmna thar chu hmuhpui ve ka chak a, a bula hun hman tam pawh ka duh.

"Nu Hlimi ka lo dil phawt ang aw, a phal chu ka ring, min dil pui ve ang a" ka ti zung zung a, an in nel tho bawk a, Awmpuian a dil chu a ṭha zawkin ka hria.

"Umm, a pawi chuang lo..." a tih hnuah sana a en zauh a, "Lut leh tawh rawh, keipawh naktukah hnathawh tur ka nei a, ka mu hma ang" tih pahin Gate lamah min kai phei a, a kut chu ka thlah ui ru ngang mai. Min thlah a tum laiin ka lo hum ṭha sauh sauh a, hnai deuha in en chungin kan innuih var var bawk.

"Ka ngai lutuk che" ka ti chhuak tawl a, "Keipawn" a tih chuan lung a awi hliah hliah a, ka ngai zual sauh maiin ka hria.

"Inhau tawh lo ang, engkim kan inhrilh tawh dawn nia" ka mitah tak min en chungin a ti a, a thutak zia pawh a hmelah chuan a hmuh theih. Lo kun hniamin ka hmuiah a lo fawp zauh a, min endan mawlh chu tawrh a har a ni, min duh ve takzet tih ka chiang a, midang thikna hlira ka lo khat ṭhin te kha ka indem thar a, thil atthlak tak niin ka hre tawh.

"Nangpawh mengrei suh aw, ni sa kan tuar nasa si" tih pah a Gate min hawn sak a tum chu tu emaw hian a rawn su dawt a, kan lehhawi rual zawt a, a ngai te tein Ben-uiha bawk a ni.

"Son of a Biscuit" tih leh gate chu hawn a rual a, eng chu nge maw a va tih leh dawn ni, a thil khai lah chu Teddy bear niin ka hria!?

"Engah nge maw a rawn kal ziah le, Nu Hlimin a hnawt haw leh ngei ngei ang..." 

"Hman zana mi kha e law...?" 

"Nih saw, a beidawng duh lo reng reng, a â deuh aniang" kan veranda-a Ben-uiha ding chu kan thlir dun a, a Teddy bear a lo phawrh mek a, luh a tum lo nge ni kawngka sirah chuan a dah a, a phone a hmet pah mual mual bawk.

"A duh ve ngang anih dawn saw, luh pui i ngai em?" Awmpuian a tih chuan a ngaih loh thu ka hrilh mai a, Ben-uiha lam a en leh vangin hlauhawmah a ngai anih ka ring a, "A ho lutuk, engah mah ngai duh suh, keipawh ka mu nghal ang, i thlen veleh min lo be dawn nia" ka ti zung zung a, Gate chhung ka luh hnuah a tlan liam chu ka thlir zui a.

Kan in lam hawi leh chuan Ben-uiha a lo phei ve mek a, 'Ka rawn hneh zo ta vek e' ti niawm hrim hian a rawn phei thauh thauh a, zah nei ve hmel pawh a pu lo. Min kalpel ṭha ve mai dawn emaw tih laiin min su her lawih a, "Heih..!??." ka tih rualin a rawn lehhawi ve zat bawk. "Keng lut rawh" tiin veranda lam a kawk zauh a, leh ngawt hian, mi lah hi a tir ve ziah a!

"I ngam leh va pe la" 

"I hmingin pe mai rawh, 'ka leisak che' ti la, a birthday present anih kha" a tih chuan ka bangbo khawp mai.

"U Lizzy birthday maw?"

"Naktuk zawk, ka pek tih hrilh duh kher suh" a ti leh zel a, a va han buaithlak thei.

"A rukin ka lo hrilhsak ang che" ti a kalsan mai ka tum chu "Leh lawk" a lo tih vangin ka ding leh rih.

"A duh i ring em?" a tih laichuan hlauthawng hmel a lang, "Duh ang" ka ti sam mai a, a rilru a la buai hmel viau thung.

"A duh vak loh chuan i leisak angin sawi la, a lo duh viau chuan ka leisak tih i hrilh dawn nia" ka ṭhen sak a, a chiang lo reuh ka ti, heti khawpa a atchilh chung pawh hian a duhzawng a hriatsak lo ania.

"A duhzawng pawh i hre lo a ni maw?" 

"Tinge, a duh loh i ring em ni?"

"Ring chuang lo e, a duh turah ngai rawh" a hmel landan chu a dik lo telh telh a, a confi hlawl lo a ang. Veranda lam chu a hawi vang vang a, "I sawi ang chuan ka lo ti mai ang" ka tih hnuah pawh a la ding reng a. Chutah ka lam lo hawiin "Min lo pui la, thil ṭha deuh ka lei ve ang che" a ti teh thlawt a, min ti hamhaih zawk khawp.

"Engtia puih maw?" ka ti let ha a, "Lo kal teh" tih leh min pawh a rual ta mai, gate pawn lamah min pawt chhuak dawr dawr a,  ka ṭang ve tak nain a chak leh lutuka, ka hlau hman dawn dawn....

"Zep miah loin engtin nge ka chungchang a sawi" gate pawn kan thlen hnua a tih chuan ka ner nang a, ngaihdan te pawh neih thiam ve tawh awm.

"Zep miah lo a ka sawi chuan nuam i ti leh si lo ang"

"Anih chuan sawi lo mai rawh, naktukah i lo chhuahpui thei ang em, zanah pawh a pawi lo" a ti zung zung a, a va mawl.....

"Zanah kan chhuak ngai lo" ka ti chu a awih loh hmel khawp a, keipawn ka hrechhuak leh hnuhnawh, Unaunu chu a chhuak ru ziah tak a lawm...

 

"I mak reuh e, i duh viau em ni a...?" a chiang reng nain mak ka ti em a ni, hman zana thil thlen hnuah kha chuan a inlamlet vang vang ka ring ania.

"Duh viau, ka awmdanah hian i hre ve mai lo a mi..." a ti bul hmuk a, huiha....

"I atchhilh tlat anih hi" ka ti leh chu min melh rum deuh a, "Ka atchhilh kher lo, ka hmangaih zawk a lawm" a ti ve tlat. A inlak pa hmel tehreng nen hmangaihna a la na vei phian a, mize dangdai ve tak chu a ni.

"A hmangaih ve bawk si lo che hi buaina a nia, tinge i nawr luih ngawng ngawng reng, tlawmah te i la ve lo em mawni....?" 

"Eng nge tlawma lak tur awm?" a lo ti heh a, a man thiam hlawl lo.

"Mi pangngai chu i ang viau sia.." a incheidan chu ka thlek kual dan dan a, tawnzau var chungah kamis dum a ha a, cargo kekawr a khup chen vel a ha bawk a, pheikhawk hrawl leh balh hmel zet a bun bawk. 

Ka ner chiah chu "Min en vak vak suh" tih pahin ka chalah a rawn nam sawk a, min nam thlu lo chauh!?

"Ka va han pui awm lo che" tih leh kal ka rual a, mahse...gate ka thlen hmain min pawt let dawr dawr a, "Hlawh ka pe dawn che a lawm" te chu a la ti tak deuh deuh a.

"Puih dan che ka hre lo, i mawl bawk si, a duh hlawl lo che tih hi hrethiam ve ta che" ka kham ta deuh bawk a, ka vin viau tawh.

"A bulah min lo fak la, ka duh zia te hi lo hrilh la, hmeichhia chu an rilru a nem a, an ṭhianten an sawi pawh an awih hma, i lo sawi chuan a awih ngei ngei ang" a ti nghat nghat a, hahthlak bet bet tak a ni.

"Hmeichhe rilru i hre hlawl lo anih hi, ṭhiante sawi ringawt kan duh bik lo, duhzawng kan nei ve vek, mipa induhtawkna nei miah lo te hi kan duh ngai lo, min zar rengtu phei chu kan hne mai ṭhin" ka ti ta sak sak a, han ṭan ve deuh ṭhin mahila U Lizzy'n a duh loh chhan hi chu hriatthiamna chen ka nei.

Min en run run hnuah "I hriat hmel riau, nangte hi i zei dawn tlat" tiin min nuih vur vur a, tlanchhiat san daih tur nge mawni, buaina min siam dawn tlatin ka hria!?

"Min tihpui la, pawisa ka pe ang che" a ti leh mauh mai, chhan pawh ka chhan hmain a wallet a phawrh a, zanga tlang pathum hi a lo lek chhuak a, "Min lo fak phawt la, a bak chu i tih ṭhat dana zirin a pung ang" a ti nghat nghat a, pawisa chu min rawn hmehbel nghal chawt chawt!

"Lehkha i la zir em?" ka tih chuan "Ka chawl rih" a ti liampuat a. 

"Chawl rih chu eng tihna nge, pawl engzah thleng nge i zir?" ka ti leh te te a, a mawl em em dan hi ka hrethiam thei lo.

"College ka kal ve" deuh teh thlawt a, zo loin a bang anih ka ring.

"Chhungte i nei em?" ka ti leh a, Nu Hlimin 'Zilhlohfa ang mai' a tih vang khan ka ringhlel ve deuh.

"Nei ve nual" ka zawhna chu ṭul a ti bik vak lo aniang a ner nawng a, a hmel chu chik taka en chuan hmelchhia ti a sawi tur a ni lo, a nungchangin a zir lo em mai pawh a ni.

"Kha i pawisa hi ka duh lo, fel deuhin han awm phawt la, nakinah ka la pui ang che" tih pahin a pawisa chu ka pe let leh a, hnual rawih hmel a pu. Pawisa ka pe let chung pawh chuan "Min pui la ka duh tak tak asin" a la ti fan a, ka khawngaih leh tlat ṭhin.

"Tips ka hrilh ang che" ka ti ta ngawt a, chhete chuan pui ve mahila a pawi loin ka hria, a bak chu Unaunu ngaih dan dan a ni tawh ang chu.

"U Lizzy chuan mipa mi virpilh chi a duh lo a, mipa induhtawk ve tak hi a duh zawng ania" a rilru a hnual loh nan "Thilpek a lawm a, i tlereuh pek pawh kha a la nei reng" ka tih zawm a, a nui ve suk mai.

"Hmeichhia chuan ngaihsak reng kan duh a; mahse, ka sawi tawh ang khan, min atchilh lutuk ang hi chu kan ning hma a, chutih rualin min ngaihsak vak lo anga an lan hian kan khua a har leh ṭhin. Tunah hi chuan i duhzia leh i atchhilh zia a hre vek tawh a, mak a tih tur takin han ngaihsak lo thut mai la, a rilru i la peng thei zawk ang. A bulah chuan ka thiam ang angin ka lo fak ang che. Mahse, ka sawi ang hian awm hmasa phawt rawh" ka ti duah a, min chhang miah lo.

"I hrethiam em?" ka tih chuan a bu ve mai bawk a, hrethiam hmel pawh a pu chhuang lo.

"Number in pe ang, tih dan tur kan sawi dawn nia" a tih vangin ka phone number ka pe a, "A chhuah dawnah min lo hrilh zel rawh" a tih pawh chuan ka aw ve leh mai a, ka puih a duh tak tak anih chuan ka thusawi zawm ṭha turin ka chah bawk. A hmel han en mai chuan tihmawh leh luhlul tak angin a lang na a; belhchiana thuawih thei tak leh thuhnuai awlsam chi tak niin ka hria.

"Be lo la, Message pawh thawn rih suh" ti a ka chah leh hnuah ka luhsan a, a Teddy bear pawh chu ken luh sak loin a awmna ngaiah ka kalsan a, zingah han hmu ve phawt sela; chumi hnuah sawi ka nei ve chauh ang. Benja chuan ka thu a zawm ṭha anih phawt chuan awmzia a neih ngei pawh ka ring.

 

(End of chapter - 4)