BLUE BAYOU (CH - 10) by Ahmangaihi violette khiangte

BLUE BAYOU by Ahmangaihi violette khiangte

Chapter - 10

Ka pa chuan ti hian min hrilh a, "Ringtu nun hi lui kawr tereuh te a tui luang ang a ni a, lui lian zawk panin kawr ruam chheng chhe tak tak zawh a ngai ṭhin, kawng lakah pen bona tam tak a awm a, luipui a fin hmaa dan chah a ni fo bawk. Chutiang chiah chuan sual hian kan tum ram luipui lian zawk kan thlen hmaa min dan chah a tum reng a, a chang chuan kan kawng ni lo lam kan zawh  chang pawh a awm ṭhin" tiin. Kan chhungkaw chunga thil thleng chuan kan nunah nghawng tam tak a nei dawn a; mahse, Pathianah innghat a, lungngai lo turin min hrilh bawk.

Chung thu a sawi laichuan a ṭawng a sak hle a, a chhungrilah natna thuk tak a pai tih pawh ka hrethiam ve a ni. Kan awmdan tur  chu ka ngaihruat thiam lo a, ka nu tel loa kan khawsak dan tur pawh ka suangtuah thiam lo. Ka pa chuan min hnem ve mawlh mawlh a; mahse, kan thil chan chu a hlu em a, eng thil mahin a hnem zo lo a, rilru na a chhawk thei hek lo.

Zan ka mu thei lo a, engmah ka ei thei lo, taksa leh thlarau nun a chau zo a ni ber mai. Ka pa angin Pathian hnenah inhnemna ka hmu lo a, ka inngaihtuah lungpuam chang apiangin demna leh thinurnain ka khat ṭhin.

Eng hian nge uirena hi siam ang tih zawhna ka inzawt a, ka nu kha nu â leh mahni intichhe duh mi a niin ka hre lo va, a thil tih erawh a atthlak hlein ka hre thung. Kawppui ten an ngaihsak loh vanga midang kawp ru ta mai hi uirena chhan tam ber niin an sawi a. Mahse, ka pa erawh Pathian rawngbawltu a ni a, ka nu khan a thlawp ngai miah lo zawk a, he thilah hi chuan ka nu zawk hi ka dem lo thei lo a ni.

Heng thil thleng te hian kan khaw mite beng a thleng vek tawh a, ka pa haw pawh zahna hlirin a lo hmuak ang tih ka hria. Kan inbiak hnuhnun ber ṭum chuan rawngbawla kalchhuak leh mai turin ka hrilh a, a hlimchhawn anih vang leh amah dem tawk an awm avangin ka pa chhungten an remti rih lo thung a, mite rilru hi hriatthiam har ka ti takzet. Ka pa tan chuan kan khua a awm chu a hrehawm duh viau ang tih ka hria, kei phei chuan haw loh hlen tawh mai te ka duh a, mi hmai eng ka hmuh ngam ka ring lo a ni. 

Ka nu nen chuan kan la inbe leh ta miah lo a, ka pi te lamin min lo biak an tum pawhin ka nu vua leh vang te lam reng reng chu ka be duh lo a, tu hnenah mah kan chhungkaw chanchin chu sawi ka duh lo. Ka nu Hlimi pawh ka hrilh lo reng a; mahse, kar khat hnu lawkah ka pi te hnen aṭangin a lo hria a, min lainat deuh nge ni min duat thar khawp a, ka pasal neih hma chu an hnena cheng tura min duh thu te a sawi a, ka nu lam a ṭang lo tih pawh ka hria. 

Zan khat chu ka pindanah rawn kalin min lo  titi pui a, ani pawh uirena lo tuar ve tawh tu tho a ni a, ka nu chu a dem zia thu te min hrilh luam a, U Lizzy pa khan nula la naupang te lakah a uire san a ni awm e.

"Ka nu ngaihzawng kha tlangval ṭha deuh pawh a ni lo a, a hmel pawh ka pa aiin a ṭha lo fe zawk a sin. Pathian ṭih mi pawh a ni lo a, zu in mi leh tlangval lerh ti a sawi huai huai a nia, ka nuin a duh chhan hi mak ka ti!" tiin ka rilru dik tak ka hrilh a.

"I pa zin reng kha a lawm lo ṭhin a, i pa khan a ngaihsak ngai lo niin a hre bawk a, a khawhar lutuk vang a ni mai thei" a tih chuan a dik ka ring a; mahse, ka pa thiam loh chu a ni theiin ka hre lo.

"Hurherhna vang a ni angem?" ṭap ṭiau chungin ka ti leh a, chu erawh rin pawh ka rin phal loh thil a ni, ka nu kha hetiang mi hi ni lo sela ka ti takzet.

"Kawppui ten an ngaihsak loh avanga chhungrila khawharna leh rilru nat rukna an neih laia ngaihsaktu an hmuh hlauh hian thlemna lian tak a ni thei a. Uirena zawng zawng hi mipat hmeichhiat thil mai a ni lo. Midang hmeltha zawk, ṭha zawk lakah mi an uire kher lo. An khawharna hnem thiam zawk, duat thiam zawk, hrethiamtu zawk, an laka inpe zawk leh sex ni kher lo thil danga; an mamawh leh duh ang an kawppui te laka an hmuh loh midangte a an va hmuh vang a ni ve fo. Chuvangin mi tam tak uirena chhan hi hur thil (sex) a ni vek lova, thinlung ruak tih khahna’n a ni ve thei a sin" tiin min chhang a, chhungte hlei hlei chuan ṭah a ti chhuak zual, hun rei tak innei tawh te inkar a ni a, an karah kei ka awm tawh bawk a, ka nu khan ka pa hi a hmangaih miah lo zawkin ka hria a, chu chu ka tan pawm a awl ber bawk.

"I nu chu a uire zawk anih miau avangin ka dem lo thei lo a, kei ngei pawh uiresan ka ni ve a, kei tluka uirena hua hi an awm bik kher lo ang. I pa pawh lainat tak chungin thiam lohna ka nei a, a chhan chu maw nupui ten ka mamawh ber chu innghahna tlak pa a ni, chhungkaw ngaihsak pasal, fate tana pa tha tak kan duh. I pa khan heng zawng zawng hi a tlan san a, a ṭawngṭaina ah a hlan tawp ṭhin a; mahse, Pathian hian a mawhphurhna tlansan tura a duh ka ring lo a sin, a pawi ber chu an inlungrual lohna kha a ni a, sawi dun pawh a nei khat ang, i pa khan hmuh hmaih a nei a, a rawngbawlna hmasa ber tur chu a chhungkua ah a ni, lo ti hmasa sela chuan hetiang hi a thlen ka ring lo" a ti leh dap dap a, keichu naupang mawl mai chauh ka ni, min hlamchhiahtu chu ka hua a, anchhe lawh duh hial tur khawpin a lakah ka thinur bawk.

"Test in neih zawh veleh han haw la, i pa pawn a ngai ang che, rawngbawla a kal chhuah leh hmain i han hmu dawn nia" Nu Hlimin a tih chuan ka phur lo takzet, kan inchhung han rah leh pawh chakna ka nei ta lo, ka pa erawh ka ngaihtuah reng a, amah vang tala haw erawh ka tum.

Ka haw tur thu ka pa hnena ka hrilh chuan "Ka lo nghak ang che, lo hmanhmawh duh suh, i zirlai ngaihsak a, i hmakhua tur atan rilru nei taka i awm a ngai tawh a nia" a rawn ti a, ka nu nen kan inbe tawh em tih min zawh chuan ka thinrim deuh hlur a, "Ka biak chhan tur a awm lo, min duh lo a min chhuah san a lawm, min lo biak tum pawh nisela ka be lo ang" ka ti ṭeu hlar a, ka pa chuan min chhan vak dan a hre lo.

"I nu a la ni tho asin" a ti ringawt a, a aw chu a zawi hle bawk.

Keichuan "Ka nu nih a duh loh vangin a lawm a kal, nu ka nei tawh lo" ka ti leh tawl a, "Huatna khan a eiral mai ang che tih ka hlau a ni, ṭawngṭai tam rawh aw" aw tham chhelin a rawn ti a, rei hi kan inbe thei ngai lo, hnuk a ulh leh mai zel.

Ka muhil thei lo chuan ṭawngṭai ka tuma, ka rilruah chuan zawhna a rawn lut zut zut a, Pathian hian hetiang dinhmuna min dah chhan hi ka hrethiam thei lo a ni, ka chungah chuan pawi a ti lo anih pawhin engah nge a rawngbawltu ka pa chungah a tih si, a chhungte a kalsan laikhan ka pa kha a khua a har lo bikin ka ring lo, a kal dawn apiangin Pathian hnenah a chhungte enkawl turin a dil ṭhin, heng thil hi ka pa khan a phu reng em ni tih zawhna ka inzawt a, Pathian chu ka dem lo thei lo, engkim hi a duh dana thleng a ni si a.

Ṭawngṭai loin khumah chuan ka let thawk a, ka phone-a Awmpuia message hawn loh la awm chu ka melh vang vang a, tunlai chu ani pawh ka be khat a, ka damlo emaw min ti hial a, hrilh chu duh viau mahila uire fanu ka nih thu hrilh chu ka hreh a ni. Engtin nge min lo ngaih ang, engtiang pawhin min ngai dawn sela, a ṭha zawng emaw a chhe zawng pawh ni dawn sela tuna min ngaih ang hian min ngai reng zawk sela, ka chungah rilru dang pu lo sela ka duh ber a ni, ka zep a, biak tam loah ka tlak bawk.

Lehkha ka zir thu hrilhin Phone chu ka dah mai a, rei vak loah a message a lo thleng leh a, a tihdan ngaitein zirtur hlir a rawn thawn a, chhan pawh ka chhang let ta lo, lehkhazir lam chu rilruah a awm thei lo a, khawi lai emaw hmun fian rial engkim ka theihnghilh theihna tur hmuna kal ka duh a, chu erawh thil theih a ni lo ang, mahni chauh pawhin ka thaw a ipik a, eng thil tih mah ka chak hek lo. Ṭah vawng vawng ka duh a; mahse, rilru na em em chung pawhin ṭah chu harsa ka ti lawi a, a chhan pawh huatna a ka khah vang a ni.

Zir mang loin Test chu ka nei a, Awmpuia zarah harsa em em a awm lo, ka haw hun tur pawh a hnai zel a, chutih laiin ka pa chuan zantin min lo biain min ṭawngṭaipui ṭhin a, haw ka hrehna pawh a bo ve telh telhin ka hria. Chhungkua chu ka la nei a, pa pawh ka la nei ve a, kei aia chan chhe zawk dang tam tak an awm tih pawh ka hria, ka zirlai zir theiin ka damṭha a, min ngaihsaktu chhungte ka la nei bawk a, an zarah thlaphanna tur ka nei hek lo. Nu Hlimi lah chuan "I nuin pawisa a thawn lo che anih pawhin i zirna tur chu ka tum mai ang, college hi chu ka zawh tir hrim hrim ang che" tiin min lo hnem ve bawk a, ka pa pawh a han hnem ve fo ṭhin.

Test kan zawh ni chuan Awmpuia te ina len ho an rawt a, midang kianga awm chu nuam ka tih loh vangin ka lo hnial a, mak pawh min ti viau hlawm ang, a chhan chu ṭum dangah chuan a phur ber ber ka ni ṭhin a, ka haw dawn hnaiah phei chuan eng emaw tih ho ka rawt ngei ngei ṭhin.

Gate kan thlen hma deuh chuan Valerie te ṭhian ho lo ding chu kan va hmu a, min lo nuih var var a, Helmet a lo khum vang bawk. "A thiam tawh e law?" ti a Awmpuia ka zawh chuan "Ka hrilh tawh che kha, kar hmasa aṭang khan a khalh tawh a lawm" tiin min lo chhang a, min hrilh lai ka hre miah lo, thil dang hlirin ka ngaihtuahna a luah vang aniang.

"Tunlai chu i mizia a dang riau mai, ka chungah lawm lohna i nei em ni?" a tih chuan, "Lehkha ka zir nasat vang aniang, mut ka kham lo deuh a" tiin dawt ka hrilh a.

"Lo len chu i duh lo tak tak em ni a, kar tawpah haw i tum sia, chawte eikhawm ila kan ti deuh asin" tih pahin ka chal a rawn dek a, damlo emaw min la ti aniang.

"Mut ka chak tawh lutuka" ka tih chuan min nuih var var a, "I chau anih dawn kha, va mu hahdam rawh" a ti ve leh mai a, chumi hnuah taxi stand thlengin Peka nen min thlah bawk.

In ka thleng chu ka inthlak sawk sawk a, mut pawh ka chak lo, ka muhil thei tak tak lo a, ngaihtuahna hahdamthlak loh zet ka nei ṭhin a, chu aichuan inngaihtuah lungpuam hman lo leka awm ka duh a, tih tur ka dap ruai ringawt. Thawmhnaw ka suk laimekin Nu Hlimi a lo haw a, "Ka chhulah bawk a lo awm a, zai ka ngai dawn anih chu" a rawn ti ta mai a, amah phei chu lungngai ang pawhin a lang lo.

"A ṭha lo viau em?" ka ti vat a.

"A ṭha zawk mahin ka hria, cancer ka nih kha ka hlau hman lutuka, bawk satliah hi chu a hlauhawm hleinem, min zai anga, an paih mai dawn a, ka natna tak an hrechhuak hi a lawmawm zawk" a ti leh mai a, ka rilru a buai ru nak thung.

"Chuti chu ka haw rih lo mai dawn em niang?" ka tih chuan min lo hnial vat a, "I haw kha a pawimawh rih, i pa pawh i han thlamuan ve deuh ang chu, a nghahhlelh tawh em che kha, i u a awm a, damdawiinah pawh rei deuh kan awm lo ang, nang pawh i lo chhuk leh thuai dawn a lawm" a lo ti sam leh et a, sawi awlsam viau mahsela Unaunu kuta kalsan chu ka hreh deuh a, an chhungte te emaw talin lo buaipui sela ṭhain ka hria.

Nu Hlimi ka zawh chuan "An buai hlawm lutuka, an hman leh pek lo ang, mi pawh an rawn tlawh ngai hleinem, kan mo te an fel bawk si lo a, ka nu leh pa boral hnu phei hi chuan kan inpawh tawh vak lo, khi lama i pi te lah i nu vangin kan thu a inhmu hlawm lo a, kei lahin i pa ka ṭan nasa si a, i nu ka han sawisel kha mi an be tui lo deuh aniang" ka ti bawrh bawrh a. Unaunu lo haw pawh chu chanchin a lo hrilh ve thuai a, "Damdawiina riah chu ka van peih lo e, Cabinah tal awm ila" a lo ti reuh a, an ngaihtuah awm dawn riauin ka hria.

Zanriah eilai pawh chuan kan sawi zawm a, "Canbin chu hauh lawk ang aw, anih loh chuan chawhmeh min pe tu tur pawh kan nei dawn hleinem" Unaunu chuan a ti leh a, "Ṭhiante ka nei ve a lawm, kan inpek tir dawn nia" Nu Hlimin a tih chuan hriat chhuah zawk ka nei a, tlemin awm a nuam deuh.

Khuma ka mut hnuah Benja ka text a, nu Hlimi damloh thu leh zai a ngaih thu te, U Lizzy pawh ngaihven deuh a ngaih tur thu te ka va hrilh a, rin ang ngeiin a lo ngaipawimawh a, "Lizzy chuan hrehawm a ti viau lo maw, ka van khawngaih reuh e, a la naupang si, a rilru a hah ngawt ang a" tih angreng a rawn sawi luam a, a Ni in a zai tur thu ka hrilh chuan "Ka lo buaipui vek ang, tunah Lizzy chu a mu tawh em, ka van hmu duh e, ka lo kal dawn ania" a rawn ti lehnghal chuk chuk a, kan inkhap nasa mai.

Sana ka en chuan dar 11 a pel tawh a, ka muhil thei lo chu ka inlet sek a, a khat tawkin thawk ka la leh hluai ṭhin. A pindan lama Unaunu Phone hmang thawm chu ka ngaithla a, a ṭhiante a bia ni ngei tur a ni "Cabina kan awm loh chuan chaw leh chawhmeh te min lo pe dawn nia, anu hian kan chhungte tih buai a duh lo a, zai pui ang tak tak a ni lo a tia, rei vak a ni lo ang, ka ring dawn che ania, nangmah bak rin tur kan nei lo, ka nau an khua ah a haw lawk a ngai a" tih angreng a sawi zat zat a, a ṭhiannu Muani anih ka ring. 

"Nizan khan min lo bem a, ka chhang a lawm" a tawp lama a tih ri chu ka hrechiang khawp mai a, a star pa nen khan an ni nghet ta anih hmel, Benjamina chu ka khawngaih ru khawp mai a, ka ka aṭang chuan hre lo sela a ṭha ang, ka hrilh hreh lutuk tlat tawh.

Thawm a reh hnuah pawh ka mu meng reng a, zan a rei duh dawn riauin ka hria, Awmpuia pawh a tlaivar zin em avangin a mu hma a, ani phei chu a chau ngawtin ka ring. Inriniah ka haw anga, Awmpuia erawh thawhṭan lamah a haw dawn a, anihna takah chuan class chawlh kan nei lo a, nihnih khat bak chu kan cham thei kher lo ang. Keichuan ka pa ka haw chhan ber tur a ni a, ngaihṭha taka a kal theih ka duh vang a ni, thlahtu nei loa a zin chhuah chu ka phal lo bawk.

Tukverh aṭang chuan thla eng a rawn inkap lut riai a, pawn lam chu a lang thiang kuar a, a rehin a lunglen thlak takzet. Pawnah va chhuah a, boruak thinghlim va dawn chu ka chak a, ngaihtuahna vah kual tir aichuan mahni ngei kalchhuah chu thaw pawh a veng deuh mahna. Thawm dim deuhin ka kalchhuak a, pawn light pawh on lem loin veranda ah chuan ka va teikual a, zan chu a reh duk maiin ka hria, motor tlan thawm hriattur a awm zeuh zeuh chauh a ni, thla lah chu a han eng ṭha khawp a, lungleng mi tan chuan thu leh hla ṭha tak tak a ken tel ka ring, ka tan erawh ka mal zia min hriattir tu chauh a ni.

Thla eng thlira ka dah vang vang laichuan ka phone a rawn ri karh a, ka han en chuan Benjamina message a lo ni a, "Eng nge khatah khan i tih a?" tih hi min lo thawn a, gate lam ka va hawi chuan amah niawm tak chu ka va hmu a, a phone a rawn vai eng zauh bawk. Hmanhmawh deuhin ka pan phei a, a bul la thlen rual chuan gate chu hawng turin min lo ti sawk sawk a, ka hawng duh mai lo.

"Lo kal suh ka ti che sia" ka mood a fuh zan lo bawk a, ka aw chu nelawm loh tak a ni.

"Ka muhil thei lo anih hi, i u chu engtin nge a awm?" a tih chuan engthil emaw tak hian min rawn mawlh a, ka thin a ur thar thut a ni ber.

"Tunah chuan a mu tui khawp ang, bialpa thar a neih hlim hi chuan a nun a hlim ṭhin a lawm" ka ti deuh kher a, a mitmeng buai nak ka hmuh chuan "Nichin lawk khan a ṭhiannu nen an inbia a, amah bem tupa a chhan tawh thu a sawi" ka tih zawm leh a, a ruh lang rawta hrilh hi a ṭha zawk ang, unaunu vanga a rilru na hmel hi ka hmu peih tawh lo,  chu loah ka pa min hriatchhuah tir a ni.

A mak lutuk, engmah min zawh belh lo!

Min en vawng vawng a, a mittui a hnam ṭiam ṭiam bawk. Chutah, a inher vut a, a hmai a tuai lai chu ka melh ve reng a, "Benja" ka tih chuan min chhang lo, min hnungchhawn zawngin a ding tlat a, sawi zui tur a vang duh khawp mai.

"I rilru a na dawn tih ka hria a lawm, i hmangaih em a; mahse maw, i mittui kha a phu bik lo asin, i hmangaihna phei chu a phu lo lehzual, a aia hmeichhe fel an tam em mai.." a rawn inher leh vut a, "A phu leh phu loh ka ngaihtuah lo, ka hmangaih a lawm, chu chu tih lan ka duh a a ni mai" a ti fiah fak a, a mit sen rum chuan min melh ngar a, keiin ka en let ve ran bawk.

"I ṭap a ni maw?" kan in en reng a, engtin mah min chhang lo.

"Ṭah ve ka chak" ka ti zawi leh sep a, min la en reng.

"In inhau em ni?" rei dawn a ngawih hnua a rawn tih chuan lu ka thing vat a, "Thil dang a nia" tih pahin gate chu ka hawng a, bang bula bike a dahna sirah chuan ka va ṭhu ringawt a, ka awmdan a hmuh chuan mak a ti nge ni a che chang lawk lo, ṭhu ve tura ka hui takah chuan muangchangin a rawn ṭhu ve a, bang ngheng chuan kan ṭhu zawi ngiai a, thinlung hliam kan pai ve ve a, kan hliam chhan erawh in ang lo tak a ni.

"Ka hmangaih i tia, engtin nge i chian em em theih?" tih pahin van lam chu ka en vang vang a.

"Sawifiah chi a ni lo, hmangaihna chu hlen chhuah chi a lawm" a ti ve ngei a, a dik ngei erawh ka ring.

"Hlen chhuah anih loh chuan hmangaihna a ni lo i tihna a ni maw?" ka ti leh a, ka ṭawng ring lo khawp mai.

"Nula chuan a beisei ang a hmu lo a ni maw?" a rawn ti bawl a, "Nula chuan a beisak phak bak thil a tawng a lawm" ka ti ve leh a, a lam ka va hawi chuan van lam a lo hawi ve chiah a, "Tlangval hi chuan a hmangaih, hlen chhuah pawh a duh a, an phalsak lo anih hi" tiin a ner sawk a.

"Tlangval chuan beidawn a tum em?" ka tih chuan, "Tlangval chu a beidawng lo ang; a beidawng anih chuan hmangaihna a ni lo tihna aniang" zawi deuh tak hian a ti a, thla eng chu a bia nimaiin ka hria.

Chutah ka lam rawn hawiin chik deuh hian min lo en a, "Eng nge thleng?" tiin min zawt leh a.

"I hriat ve chi loh" ka tih chuan a hmui a pet sawi zauh a, a zial a phawrh zui zat bawk.

"Ka lo zu ve ang" ka ti chuan a zial ṭan ṭhulh meuhin min lo en a, engmah phei chu a sawi lo, zial chu a ṭan a, vawihnih khat a fawh hnuah min rawn pe a, ka lo ban laipawh chuan min la enchik khawp mai. Zial chu ka han fawp vang vang a, meikhu ka hip a, ka thaw chhuak leh mai a, awmzia vak a nei lo.

"A ho hle mai" van lam hawi paha ka tih chuan "Eng nge i duh a?" a lo ti zauh a.

"Tha thona min siam thei thil" ka tih chuan a lo nui a, ka en lem lo a, min en reng tih erawh ka hre thei.

"Zu i in duh em ni?" a tih chuan ka melh vat a, "Awmzia a nei angem?" beisei nei zetin ka ti a, in en chik dun tak kan ni.

"Rei lo te chauh" 

"Rei lo te pawh chu ka thlahlel khawp mai"

"Zu chu i tan a ṭha lo ang" tiin min nuih suk a.

"Ka tana ṭha tur chu ka nu pawn a hria a sin" ka tih chuan a hrethiam lo tih a lang, hrilh kher chu ka duh loh avangin ka ngawi a, ngaih dan a lo nei ve aniang chu a rawn sawi zawm ve leh a.

"Cousin ka nei a, fel tak mai, i bialpa ang maia fel kha a nia, a fel em avangin a che zia engkimin min hek ṭhin a, nuthlawi a ngaizawng a, tuman an duh pui si lo a, ka pu chuan 'Benjamina tan chuan nuthlawi chu a pawi lo a; mahse, Joshua tan chuan a rem lo'  ti a, mihring hi kan mak ti raw, inlaichinna kan neih pui te hian a lawm ka rilru ti na zel ṭhin" a ti nghat nghat a, a thil sawi chhan  leh ka chunga thil thleng chu inpersan tak a ni.

"Benjamin..."

"Benja tih kha ka duh zawk, BJ tih pawh a pawi lo"

"Eng ngati maw?!"

"Benjamin tih chu tlangval fel tak hming a lawm, ka ni hleinem" 

"Keichuan fel ka ti che" 

"Ka lawm e" ka lam hawiin tawi fahran hian a rawn nui a, "Zu chu ka pe lo ang che, Beer i duh em, a rei lo leh zual a, mahse i tan chuan awmzia a nei tho ang" a tih chuan ka lo bu ve sawk sawk.

"Lo kal rawh" ti a a tho chu ka zui ve vat a, bike a kan inphurh chhuah laite chuan ngaihtuahna a bing churh a, ka awm chhung a tawt em em bawk. "I tla ange, min lo kuah rawh" a tih pawh chuan ka hnial lo, ka va kuah ve sawk sawk a, khawi lam nge min pan pui dawn tih lah ka zawt hek lo, ka ringtawk em tih pawh min zawt sela tun dinhmunah hi chuan chhanna ka nei lo ang, zanin hi chuan chutiang lamin ka rilru a luah tlat lo a ni.

Kawtthlerah chuan kan tlan kual zar zar a, khawhmuh a chiang lo ruai a, engkim chu a phe vuai vuai maiin ka hria, Benjamina kawngah nghet deuhin ka vuan a, hlauhna ka nei lo chu mak ka ti hial a ni. Rei dawn kan tlan hnuah veng pakhat kan thleng a, Bike aṭanga chhukin mi tu emaw hi a phone a, "Beer min lo pe rawh, zanin chu ka duh tel lo mai ang" a tih hnuah min rawn melh zawk a, "Eng percent nge i duh?" a rawn ti a,  a ngaihna ka hre lo hle ringawt.

"Alcohol.." a tih pawh chuan ka melh reng ringawt a, "A in nuam deuh tur kha a ni mai" a tih leh hnuah phone chu a dah a, ka bulah lo ding hnaiin "Vawikhatna tur a ni em?" tiin min rawn nuih var var a, "Aw" ka tih rual chuan a lo ṭhen sak a.

"Chahthlak tawp nge i duh, hai deuh chhalh" a tih chuan phawk fein ka melh a, "Luhaia awm chu ka duh reng reng lo, theihnghilh hmak ka duh" ka lo ti fiah fak a, min nuih leh ka rin laiin a nui miah lo. Rei pawh kan nghah hmain mipakhat hi a lo kal a, polythene-a a thil khai chu a rawn pe a, Beer can panga vel lai a ni.

"Khawiah nge in i duh?" a tih chuan "Inah" ka lo ti vat a, engmah a sawi zui tawh lo, bike a ti nunga kan tlan let leh vang vang a, kan kal lam aikhan kan thang rei lo zawkin ka hria. Kan Gate bul kan thlen chuan ka chhuk vat a, "Pakhat chiah ka duh" ka tih vangin a enkual hmasa te te a, "A tui lo a, mahse a reh vek mai ang" tiin pakhat chu min lo pe a, ka lo ban rang khawp mai.

"Muttui aw" tiin ka mangṭha a, a tlan chhuak chu a liam thlengin ka thlir a, muang changin in lam ka pan zui bawk.

Ka pindan ka thlen hnuah beer chu ka hawng a, khumah ṭhu chungin ka in a, a tui loh zia chu inhrem nana hman tlak a ni, ka in lui zel a, a chanve pawh ka in hma chuan ka awmdan danglam chu ka hre thei tawh a,  ka luhlul chhuahin ka inlui zel bawk. Ka lem tam telh telh a, ka ngaihtuahna erawh a fim reng a, ka taksa erawh a chawmawlh hle thung a; mahse, engmah ka theihnghilh lo, chu chuan nge ni ka lung a ti chhia a, ka mittui a luang zung zung reng.

Engtik laiin nge ka muthilh pawh ka hre lo, ka harh rualin ka lu rit luk chu ka hria a, ka luak a chhuak em em bawk. Sana ka en chuan dar 5 a pel tawh a, bathroom ah tlan lutin ka va luak bawrh bawrh a, ka nawm phah huaiin ka hria. Khuma ka let leh tur te chu ka pai phei chawn chawn a, ka lu na mawlh chu tawrh a hrehawm, ka luak chhuak lah a reh thei hek lo, khum chunga ka thil in na ruak chu ka va en chiang leh a, Alcohol a lo tam nasa chu niin, 16% lai a awm, ka rim lah chu zu rim a nam huam a, ka pindan chhungah chuan a nam khat vek emaw tih tur a ni.

Ka mu leh chiah tihah ka kawchhung aṭangin min rawn ṭham a, bathroom pawh ka thleng zo tawh lo, ka pindan chhuatah ka luak ṭeuh a, han tihfai pawh chu harsat tak ka ni, Benja khan a rei lo hle khan a sawi si a, hetiang tur hi nge keima lam dik lohna vang zawk ni, ka rin aiin a daih rei daih mai.

Ka chhungten an hriat ka hlauh avangin ka inbual a, chu chuan min ti harh ve deuh a; mahse, pangngai lo tak ka la ni, ka thawh hun dar 6 ah pawh ka la mu zawi reng a, ka rim chu ka thup thei pawhin ka ring lo. Dar 7 vela Nu Hlimin min lo koh chuan ka nawm loh thuin ka chhang a, eirawng a va bawl tain ka hria. Chawein turin U Lizzyn min lo ko leh a, kawngka pawh hawn sak lo chuan min eisan turin ka hrilh a, an ngaih a ṭha lo deuh aniang Nu Hlimi bawk a rawn kal leh a, ka eng nge na te min lo zawt a, "Nizanah ka muhil thei lo a, ka lu a na lutuk, nachhawkna pawh ka ei tawh, min ngaihtuah suh u" tiin ṭha deuhin ka chhang a, ka inthiam lo ru takzet.

An kalchhuah dawn thleng pawhin ka la tho lo a, Awmpuia pawh text-in class ka kal loh tur thu ka va hrilh a, min ngaihtuah khawp mai a, ka thil tih hi hria sela chu min beng duh mai thei a ni, anih loh vek pawhin a rilru ka ti na ngawt ang. Nu Hlimi chu hna ah a kal a, an zai dawn vangin chawlh a dil nghal pawh ka ring, Unaunu erawh college a kal dawn a, an chhuah hunah ka tho ang tiin an thawm chu ka ngaichang ran a, dar 9 velah chuan a reh ṭhuap tawh.

Choka lama ka chhuah laipawh chuan ka pai deuh khat khat a, chaw ei ka han tum te chu ka lem hleithei lo, luak a la chhuak lutuk tlat a ni. Apple pahnih leh nachhawkna nen ka pindan lam bawk chu ka pan leh a, nizana thil thleng te ngaihtuah let neuh neuh chungin ka mu a, nachhawkna chuan min chhawk ve aniang ka lu na chu a reh zui a.

Ka muhil leh pawh ka mutui ta khawp mai, ka mumangah ka nu ka hmu a, min lo be ṭha duh hlek lo mai a, 'Ka fanu i ni tawh lo' te min lo tih khum a, ka harh leh chuan rilru a na thar vawng vawng a, ka lung a leng takzet. Ka pa ka han bia a, "Bethel tlangah ṭawngṭai tuin kan kal a, a hmun te kan sam fai nghal a" tiin a thil tih min lo hrilh zung zung a, kei aichuan a tuar thiam zawkin ka hria a, ka lawm hle bawk.

Dar thum rik hma deuhin Nu Hlimi a lo haw a, a thawm ka hriat rualin ka muhil der vat a, ka muhil leh hman ṭep tih ah pindan kawngkhar a rawn kik a, ka ruih a reh ta bawka tiin keipawh ka tho chhuak thuai a, ka va hawng chiah chu ka phu chiang khawp mai, ka kawngkhar bulah Awmpuia a lo ding reng a, a college bang a lo tlang anih hmel.

"I nuin va kaitho rawh a tia, i lo tho peih em?" a tih chuan ka tawlh hnung det a, ka rim a hriat ka hlau a ni.

"Ka'n inthlak lawk ang aw" a lo bu zauh a, ka pindan chu a rawn thlek paha, "Sitting room ah ka lo awm ang" tiin a kalsawn thuai bawk.

Ka va inphih harh sawk sawk a, ka inthlak zawh hnuah perfume ka inkap a, beer rim chu ka nam tawh loin ka hria, sitting room a ka va chhuah laichuan thingpui a lo in mek a, "I nuam deuh tawh em?" a lo ti var a, damlo viau angah min ngai anih hmel.

"Ka ṭha tawh lutuk" ka ti ve mai a, chutih laichuan nu Hlimi a lo phei a, "Chaw ei ve nghal ang che aw, ka chhum kep ang che" a rawn tih chuan Awmpuia chuan a chhan hreh hmel deuh a, ka lam lo hawiin "Dar engzat ah nge in chhuah ang" tiin min zawt a.

"Zingkarah a niang" ka tih chuan, "Ka thlah hman dawn lo che anih chu" inthlahrun hmel deuh hian a ti a.

"Chaw chu ei ve nghal la, zana lo kal a ngai lo a ni mai a lawm" tih pahin a bulah chuan ka va ṭhu a, nu Hlimin rawn au lehin "Bawngsa nge vawksa i duh zawk?" a rawn ti lang lang a, "Duh zawk pawh ka nei chuang lo" a lo ti ve vat a, ka lo lawm ru khawp mai; mahse, min rawn enchik em avang chuan ka tim ru leh deuh.

"I vung a ang hle mai" a kutin min rawn ban a, ka hmai a rawn deh rual chuan a kut chu ka lo dawm ve vata. 

"I cham rei ang em?" 

"Sunday ka cham ang, thawhṭanah emaw thawhlehah ka lo haw ka ring" 

"Keipawh ni hnih chiah ka cham ang, i han damlo vak ange aw, zanah te mu hma ṭhin la, tunlai chu hritlang a tam ania" tiin min en leh vang vang a, chutah lo tawlh hnaiin ka biangah a rawn fawp zauh a, a inlahrang leh chiah chu makti hmel a pu, min rawn hnaih ṭha lehin ka hmai bul chetah a rawn kun a, min fawp leh dawn emaw ka tih laiin a tawlh sawn leh vat thung a, min la enchik khawp mai.

"Zu rim i nam deuh a ka hriat chu" a ti ta mai a, engtin nge a hriat theih le, ka nam tawh pawhin ka hre si lo.

"Ka perfume hi a niang" ka tih chuan a hmel a buai nak a, awih vak lo hmel a pu bawk.

"Alcohol a tel ṭhin a" ka ti ṭha leh a, awm a nuam lo duh khawp mai.

"A hman chi vak loh anih kha" a tih takah chuan ka lo thaw huai a, min man chhuak teuh ther ther tak a ni.

Vawiin lam chanchin te ka zawt a, class an nei mumal vak lo anih hmel, ticket a lak tawh thu te min hrilh a, haw chu a phur hmel riauin ka hria a, ṭum dangah pawh an khaw lama haw hi a phur viau zel a, a chhungte a ngaih ṭhin zia pawh ka hria. "Huana kan kal chuan Fu ka lo hawn sak ang che" phur hmel deuh hian a ti a, Awmpuia te hian huan zau deuh an nei a, thei leh thlai an ngah ṭhin hle bawk.

Dar 4 dawnah U Lizzy a lo haw a, "Naktuk chu ka ṭhianten min lo kalpui dawn ania, an zai hunah che pawh pawisain min lo kan dawn, thawhkhawm an tum" a ti zung zung a, "Engti zia nge, i nu an zai dawn em ni?" Awmpuian a lo tih chuan ka hrilhfiah ve vat a, nu Hlimi eirawngbawl chu kan va pui ve bawk a, nu Hlimi nen chuan lui kal chungchang te sawiin an ti ti bawrh bawrh a, ṭhian dun inkawm hi an ang berin ka hria.

"I lo kal chu a tihzia khawp mai, Rintei hi ka ngaihtuah deuh a, ṭhian lah a kawm tlem bawk si a, nang i lo awm chu ngaih te pawh a ṭha deuh a lawm" nu Hlimin a tih chuan ka lo ip ru ṭeuh a, Awmpuia pawn a hrethiam vak lo tih a lang a, engmah phei chu a sawi lo.

Mahse, u Lizzy lo phei chuan "Rinte, khatiang khan awm phah miah suh, nu leh pa nei lo an tam em mai, nang te chu an inṭhen ringawt a, an boral pawh a ni em hleinem" a rawn ti bawrh bawrh a, zep ka tum ve tehlul nen. A sawi zawm leh hmain ka lo mitmei sawk sawk a, a hriatthiam hnu chuan a inthlahrun hmel khawp a; mahse, Awmpuian min lo en ve reng a, u Lizzy ka mitmei lai pawh chu a lo hmu ve vek a, zawhna a ngah hmel hle bawk.

Zanriah kan eikham hnu chuan veranda ah kan va ṭhu dun a, ka nu leh pa te inṭhen thu chu pangngai thei ang berin ka hrilh a, a chhan erawh ka hrilh lo, an inṭhen thu ka sawi zawng ringawt pawhin ka ṭah a chhuak a, ka aw a khur dar dar reng. Awmpuia chuan zawhna min zawt tlem khawp mai, "An in ko leh angem?" a tih chuan lu ka thing mawl tawp a, "Tu hnenah nge i awm ang?" a ti leh a, ka pa bula ka awm tur thu chu tlang takin ka hrilh bawk.

"Hei vang hi a ni maw, i mizia a dang riau a" a tih chuan ka inpetruh fan fan a, "Ka rilru a na lutuk" ṭap ṭiau chungin ka ti a, min lo kuahin a awmah min pawm bet thlawp a, ka chhungril ipik lutuk chu a puak keh ta mai aniang tih tur a ni, ka ṭap chhuak hlawp hlawp mai, a hma kha chuan rilru na em em chung pawhin ka ṭap hleithei lo a, min hnawhtu a awm tlat ṭhin. 

"Lungngai reng reng suh, i nu pawn hetianga i awm hi a duh lo ang" a tih chuan ka ṭap uar sauh a, hrilh vek thei ila ka ti; mahse, ka ngam ngang lo a ni. Ani chuan ka pa vanga inṭhen ni turah a ngai a, ka pa chu zin chhuak reng ṭhin anih thu te pawh ka hrilh ve tawh a, ka nu chu amah chauh a a awm vanga a khawhar ṭhin thu te thlengin ka hrilh tawh, thudik tak hi hria sela engtin nge a ngaih ang le?

Rei deuh chu ka ṭap a, a kawr awm pawh ka mittui vangin a hnawng vek hman. A mal chunga ka bawh laichuan ka sam a rawn chul hliau hliau a, a kut lehlamin ka kut a vuan tlat bawk. "I haw chuan an in ko leh duh mai thei asin, nupa hi chu an fate vang hian inṭhen hlen a har an tia, nangmah vang chauh pawhin an inṭhen hlen bik lo ang, awm hran duh chang te hi a awm ve a, chuvangin i rilru ti na lutuk suh" tiin min hnem ve a, a sawi ang chu ni tak tak sela ṭha tur; mahse, ka nu leh pa karah chuan ka awm leh awm lohin awmzia a nei lo a, ka nu lahin min ngaihthah zia a ti lang a, han haw pawh ni ila danglam tur chuang a awm lo, keini chhung chu kan kehchhe zo tawh a, engmah siam ṭhat theih a ni tawh lo.

"I pa chu rawngbawla chhuah leh a tum em?" a tih chuan "A kal leh ṭep tawh" zawi tein ka ti a, "In awm dan a ngai deuh reng dawn anih chu, nang pawh helama i awm a ngai a" a tih chuan ka chhang lo. Chawmawlh zetin kawt zawl lam chu ka thlir a, a khat tawkin ka insut leh feih feih ṭhin a, thawm ka chhuah rualin min lo kuah vat zel a, min hnem dan vak a hre lo. 

Mahse, ka thlamuanpui ve takzet, kim lo takin hrilh mahila min tawrhpui a, ka inbunruah nan a awm bawk, ani chauh hi em ni ka kianga awm reng ṭhin tiin ka inzawt hial a ni, ka nu chuan min tlanbo san tawh a, ka pa pawh a kal leh thuai ang, chutih hunah chuan Awmpuia hi ka neih chhun takmeuh a ni dawn a, min kalsan ve mai angem tih thlengin ka ngaihtuah.

Haw hma a tum tehlul nen dar 10 pelhah a haw chauh a, in a thlen hnuah pawh khuma mu chungin message kan inthawn a, chhel turin min fuih ve malh malh reng. "Ka awm loh laiin lo ṭap miah suh aw, ka hriat loha i ṭah ka phal lo ania, kan inhmuh leh hma chu lo insum tlat la, i ṭap chak viau anih pawhin min lo call mai dawn nia" thutak fe hian a rawn ti a, hmeichhe rilru no tak ni mahila ka ṭap ngai zen zen lo, ka ṭap anih chuan ka rilru a na hle tihna a ni ṭhin.

"Lo haw har suh aw, ka lo chhuk huna i awm loh chuan ka khua a har dawn ania" tiin ka chah ve thlap a, min mut san a hreh anih ringin ka mangṭha zui bawk. 

Zingkar hma takah kan khaw lampanin kan tlan chhuak a, zan ka mut ṭhat loh avangin ka muthlu kawng tluan a, kan khaw dai kan thlen dawnah ka harh ve chauh nghe nghe. Dawr kawnah ka pa leh nu Remin min lo hmuak a, ka pa hmel chu hmuh a nuamin a ṭawngkam a zangkhai hle a, a cher deuh tih erawh ka hria, a mitkhur pawh a tla ve dawk a; mahse, tun hma ang thoin a la hmelṭha a, a ngainatawm em em bawk.

"I pa Muana te inah chaw kan ei dawn a, an inah i inbual nghal mai dawn nia, i nu Remin tuilum a chhuan sak diam tawh che" a tih vangin inah pawh lut hmasa loin Pa Muana te in lam kan pan a, khawlaia kan mi tawh te lah chuan min lo be bawrh bawrh hlawm a, tu pawh mai chu an hawihhawm em em vek a ni.

Pa Muana te in kan thlen chuan ka inbual nghal a, ka chau bawk a chawei hmain ka muhil leh rih a, chhung inkhawm nei a an ṭawngṭai thawm te chu ka mang hriat deuh riai ruai a, ka harh chian leh meuh chuan dar 8 a lo ri thuak tawh. Inleng kan lo nei nual a, pa ho deuh hlir an ni, ka nu Remin chawei min lo siam sak thuai bawk a, pa ho titi ngaihthlak pahin chaw chu ka bar a, Pathian thu hlir an sawi a, ka pa ṭhian ṭha tak tak te an ni. 

Chutia an titi laia ka pa a lo ṭawng chuan beng ka chhi ve kar a, mak ka tih deuh turin a rawn ṭawng chhuak a. "Ka hriat miah loh laiin 'Dik leh ṭha' ka intihna te kha 'A hmel mawi hliahtu' a lo ni zawk a, fel nih duhna te, mi te hmuha ṭha nih ka duh vangte khan Pathian rawng ka bawl ṭhin, ka nupui ngei pawhin keimahah Pathian hmel a hmu ngai lo a, ka rawngbawlna a thlawp thei hek lo. Mahse, ringtu nun hi harsatna tel lo chuan a lo famkim thei tak tak lo tih hi ka hmu chiang tawh a, harsatna atangin ṭawngṭai dan thar kan zir a, harsatna atangin Pathian thu kan hmufiah thar a, harsatna hi ringtu tan chaw ṭha tak a lo ni." a ti charh charh a, a hmel chu ka va en ṭhin a, ka hnuk a ulh ṭun mai.

Inleng te haw hnu chuan ka pa'n haw a rawt zui a, muangchangin kan inzui chhuak a, tha a za lo duh ngang mai. Ral aṭanga kan in ka va hmuh chuan ka en vang vang a, a thiam ṭhiap a, a chul ruih maiin ka hria. Inchhung kan han lut te chu ṭah a chhuak ngawih ngawih a, insum thei pawh ka awm lo, ka mittui a luang zung zung a, pindan lam ka pan nal nal bawk.

"I mu nghal dawn em ni, ṭawngṭai dun te i duh em?" ka pa'n a rawn tih pawh chuan ka chhang thei mai lo. Rei vak loah lo lutin ka khum tlangah a rawn ṭhu a, kan in en deuh vang vang a.

"I khua a har em?" ka ti chu min nuih ringawt a, ka sam a rawn chul hliau hliau bawk.

"Ka cham rei lo ang, ka hmuh palh ka hlau" ka ti leh halh a, hmu ila engtin nge ka awm ang ka hre lo, ka thinurna a sosang hle anih loh pawhin ka rilru a na vawng vawng dawn, chu chu ka hrechiang a ni.

"I hmu anih pawn ṭha takin i bia aniang chu, nupa kan ni tawh lo ringawt a, nangni erawh nu leh fa in la ni reng a, in inzawmna a chhe ve lo tih hria la, ani pawn a ngai viau tawh che ania, i lo haw hun tur te pawh a ngaihven reng a, a inthlahrung dawn tih pawh hria la, a pasal lah kan hriat chian sa anih kha, a lainatawm zawk khawp asin" a tih chuan mak ti fein ka melh a, ka pa ngaihdan chu ka beisei loh dan lutuk a ni.

"I nu hi ka dem vek thei bik lo a, a tam zawk chu ka thiam loh a ni ve bawk a...." a tih leh chuan ka lo pawt chat vat a "Amah a lawm thiam lo, mi nupui te pawh kum tam fe an pasal te an awm bo chungin an rinawm thei a lawm, nangmah in dem vek suh, nangpawh hmun hrang hrangah i zin kual a, i uire miah hleinem" ka lo ti hlak hlak a, nichina a indemna ṭawngkam te kha ka bengah a la cham a, ka ngaihdan a ni ve lo.

"Engtin nge kan awm ang le, kal leh la ka duh a; mahse...." ka ti vang vang a, ka nu kha kan chhungkaw tan engkim a ni a, kan mamawh engkim ngaihtuahtu a ni, lehkha ka zir theih chhan leh nuamsa taka ka awm theih chhan a ni. 

"Pathian hnenah kan dil anga, engkim min ngaihtuah sak dawn a lawm" ka pa'n a tih pawh chuan beisei tur ka hre lo, kan hma hun ka hmuh dan chu a thim mup a ni ber.

"Ṭawngṭai ang aw" a tih leh chuan ka ngawiran a, chutah ka lu chungah kut nghatin min ṭawngṭai sak a, huatnain min hneh loh nan te, nunkawng dik ka zawh zel theih nan te min dil sak a, a ṭawngṭai zawh hnuah pawh 'Beisei tur a awm lo' ti tu te tih dan entawn lo va, Pathiana innghat tlat turin min hrilh bawk.

Zinga ka harh chuan eirawng a lo bawl mek a, hmai pawh phih loin ka va chet pui sawk sawk a, chawhmeh kan paha a zai rut rut chu hmuh a nuam takzet. Ka nu nen an inhmu tawh em tih ka zawh chuan "Ral aṭangin ka hmu a, min hel deuh niin ka hria" a lo ti a, ka nu chuan a hmu hreh khawp ang chu.

"A ngai viau che khan ka hria asin le" ka tih chuan min lo melh ve zawk a, "Chuvang a lawm" a ti ringawt a, engmah dang a sawi zui lo.

"A pasalin zu a heh bawk si a, a hlim rei pawh ka ring lo" ka ti leh phawng a, ka ring lo tak tak reng bawk.

"Rei deuh a hlim theih nan kan ṭawngṭai sak dawn nia" a tih chuan ka lo ner nang a, "Tunah pawh a hlim ka ring lo" ka ti leh a, min chhang tawh lo nain a ngaihtuah zui ve aniang a ngawi ta reng a, a awm ka ti nuam lo zo dawna ka hriat vangin sawipui vak loh a ṭhain ka hria.

Pindana a lut chu a rawn chhuak leh ta lawk lo a, ngaihven tura ka va kal chuan a phun bul bul thawm ka hria a, pindan kawngkhara ka va dah laichuan ṭhingṭhiin chhuatah a lo ṭawngṭai a, engtiang pawhin mite chuan lo ngaiin amah ngei pawh a inhmuh dan dang mahsela; kei hi chuan ka pa hmelah hian Pathian hmel ka hmu reng ṭhin, tun dinhmun ngei pawh hian ka hmuh dan a la danglam chuang lo.

Ka pa'n inkhawm loh a phal loh avangin ka han inkhawm ve hram a, nu Remi te inah thingpui in in ka pengkawi bawk. Ka haw hma lawkin ka school kalpui ṭhin leh kan khua a ka kawm ve ber ni bawk Hruaizeli a lo kal a, "Lo chhuak lawk teh" a rawn tih vang chuan hmanhmawh deuhin ka chhuak a, "Engtikah nge i chhuk leh dawn, i cham rei dawn em?" tih ang reng min lo zawt a, ka pa nen engmah kan la sawi fel lo a, kei chuan chhuk leh nghal mai pawh ka pawiti lo.

"Naktukah emaw a tuk leh lam pawh a ni mai thei" ka tih laiin "I pi te inah chho lawk ang" a lo ti leh a, makti fea ka en takah chuan "I Nu in 'Min lo koh sak teh' a tia, i pi te inah a nghak mek che" a tih zawm leh a, a thilsawi chuan min vilh deuh zawk a, ka thinrim lo a, ka rilru a na tlat thung.

Ka loh ka tum zeta; mahse, kum tawpah chauh ka haw tawh dawn a, a hmel han hmuh ve ngei chu ṭhain ka hria, eng rilru nge a put a, a hlim nge hlim lo tih te pawh hmuh ka duh. "Tu tu nge awm, Rinawma a awm ve em?" ti a Hruaizeli ka zawh chuan "I pi leh i putea nupui nen an awm, U Rinawma chu a ka hmu lo" a ti mai a, Rinawma a awm anih chuan ka chho lo ang ka ti rilru hman a, an pahnih a hmuh dun chu ka thei lo ang, an hmuh laia ka ṭah theih mai ka ring.

Hmanhmawh deuhin tlangveng lamah kan chho a, Hruaizeli chuan min be reng tak nain ka chhang mumal lo, ngaihtuahna a kal ding leh lutuka, ka nu hmuha ka awm dan tur te, engthil nge min lo zawh ang a, engtin nge ka chhan ang tih te ka ngaihtuah a, thil dang a leng meuh lo. Ka pi te in kawt kan thlen chuan kawngka biang nghenga ka nu ding chu ka va hmu a, ka thinphu te chu chawp leh chilhin a rawn a rang a, ka zam deuh riau mai.

"Lo kal rawh mate.." a tih hnuah inchhung lam a hawi a, "Lanpui, Rintei lo siam kep rawh" tiin Pite Lani a hrilh a, inchhunga ka va luh chuan Pitein thingpui a lo siam mek a, "A thlum nge a hang i duh" a lo tih chuan "Ka in tawh" ka lo ti bul hmuk a, min melh hrek hrek mai.

"Hetah lo kal teh" ka nuin a rawn tih leh chuan sitting room lam ka pan a, a bulah pawh ṭhu duh loin a ep chiah ah chuan ka ṭhu a; mahse, a rawn insawn hnai leh vat a. Min en dan chuan awm a ti nuam lo takzet, ka huat ruk zia a hre lo nge ni hlim hmel a pu tlat a, a nui hmel chu tuna ka hmuh duh loh ber a ni.

"Tunkar i cham dawn em?" a tih chuan "Naktukah ka chhuk ang" rang zetin ka ti a.

"I va cham rei lo ve aw" a ti deuh vang vang a, tur fea melh pahin "Apa thlah tur chiahin ka lo chho" ka ti leh a, min en reng a, a nui hmel chu a ral riai riai bawk.

"I pa bulah chuan ka lo sawi tawh a, pawisa ka rawn thawn ziah dawn che ania aw, lo lungngai miah suh, thlatin ka rawn thawn ang che" a tih chuan sawi tur pawh ka hre lo, Pathianin min lo ngaidam sela; min uire san tu puihna hi dawn ka duh lo a ni, min hringtu ngei pawh ni mahse.

"A ngai lo, engmah thawn ka ngai lo" ka tih chuan "Ka thawn loh chein engtin nge i khawsak ang ni, i pa lah a zin bo leh daih dawn a, hlawh neia rawngbawl a ni ve hleinem" a ti nuah nuah a, thinrima sawi chu a ni lo a; mahse, ka haw zo vek tawh.

"Ngaihtuah ka ngai lo, a ṭul chuan ka inzuar mai ang, ka mamawh chu ka thawkchhuak thei" ka tih khum sak a, ka sawi zawh rual rualin ka inchhir, ka nu mitah chuan lungngaihna ka hmu a, rilru nat hmel takin min en bawk.

"Insawithiamna tur engmah ka nei lo, ngaihdam dil thei pawh ka ni lo, ka duh thu a chhuak ka nia; mahse, i pa nen hian ka haw miah lo che u, nang phei chu ka rila rah, ka fanu i nia, ka ngaihsak reng dawn che a, i mamawh pawh tihsak zel che ka duh, i nu Hlimi pawh ka hrilh kha, i mamawh chu ka rawn tum vek ang ka ti a, an lo huphurh che ka hlauh vang ania" a ti sap sap a, eng emaw han sawi leh chu ka duh a; mahse, ka hrawkah min hnawh tlat a, thawk lak pawh har tak a ni.

"Tunah pawisa i mamawh em?" a tih leh chuan ka ding hluai a, "I hnen aṭangin engmah ka duh lo" ka ti chhuak thei hram a ni, ka hnuk a ulh nge ka chiai zo ni, a kawchhung a sa pup pup a, ka thaw a hah hluah hluah. Hmanhmawh lutukin ka tlan chhuak a, "Mate.." ti a min rawn au zui chu ngaihsak loin ka tlan hlawk hlawk a, ka pite in lan theih lohna chin ka thlen chuan ka ṭhu hnawk a, ṭah hawm hawm mai ka chak; mahse, ka thei lo, thawk ka la kawk kawk a, ka thinphu rang lutuk chu a puak mai dawn emaw tih tur a ni.

(End of chapter - 10)