BLUE BAYOU (CH - 11) by Ahmangaihi violette khiangte

BLUE BAYOU by Ahmangaihi violette khiangte

Chapter - 11

In ka thlen rualin bathroom lam ka pan a, tui vawt chuan ka chhip aṭangin ka inleih bawrh bawrh a, ka awm chhung tawt lutuk mawlh chu a hrehawm, am zet zetin thawk ka la a, awmzia a awm thei chuang lo. Bathroom chhung chu ka melh kual ruai a, a zimin thaw a ti ipik takzet. Kawngkhar lama inher mai ka tum chu ka lu a rawn hai a, bang lamah ka awn phei rawk rawk a, ka bing chuk chuk a ni ber.

"Mate, i inbual em ni?" ka pa lo hawin a rawn tih chuan ṭah a chhuak zual sauh a, chhan pawh ka chhang thei lo. Pindan lama a phei thawm ka hriat veleh kawngkhar chu ka hawng a, kawmchhar lamah chhuakin ka va ding vang vang a, ṭah ka insum theih laiin thawk erawh a sak em em reng a, bawm chhung tawt deuha awm ang mai ka ni.

Chung lam chu ka han thlir vang vang a, van dumpawl leh chhum var te chu ka hmu phe ruai a, chutah ka mit chhingin thawk ka la vang vang a, muang changa thaw chhuak lehin vawi eng emaw zah ka ti nawn a, ka ziaawm phahin ka hria. Ka lung lam fel loh vang nge ka ṭahsat vang zawk ni, hetiang hian ka la awm ngai lo.

"Eng nge kha tah khan i tih a?" ka pa aw ka hriat rualin ka lehhawi vat a, min lo en phawk khawp mai.

"I va huh nasa ve?" hlauthawng hmel ka hmu zui a.

"Ka thaw ṭha thei lo" tih zawngin ka lo chhang. 

"Lo lut teh" a tih chuan ka pan phei vat a, ka banah lo vuanin min kuah lut a, ka ṭah a la chhuak et et reng. Ka pa chuan towel in ka sam te chu min hruk sak a, "I rilru a dam thei hlawl lo anih hi, ka bula awm rih i duh em, hetiang chuan kalsan pawh i ngamawm hleinem, Aizawlah chuan ka lo chhuk ve mai dawn em ni?" a ti ta ngawt a, min ngaihtuah zia chu a awka ah a lang a; mahse, heng thil vanga buaina insiam belh chu ka duh bik lo a, tuna thil thleng chin pawh hian buaina chu min siam tam tawk tawhin ka hria.

"A ngai chuang lo, a buaithlak zawk mai mai ang, nang pawn tih tur i ngah ve tho a lawm" ka ti zawi ṭiak a, ka pa chuan min hnial lo nain a rilru a buai hmel khawp mai. Inthlak ka duh thu ka hrilh hnuah min chhuahsan a, ka inthlak laichuan choka lama a thawm sawt sawt chu ka hria a, rei vak lo hnuah phone in tu emaw a bia a. 

Inthlak pahin ka lo ngaithla ve reng a, ka pi a biain ka hria, "A lo kal tih ka hre miah lo, engmah a sawi lo va, a nu chuan eng nge a lo hrilh, a awm dan a dik lo riauin ka hria" ka pa chuan a ti a, lehlam aṭanga an thil rawn sawi chu rindan ka lo nei thiam a, "A duh loh chuan ti lui lo zawk rawh u, puitling a ni ve tawh a, ani phei chu a rilru a na riau a, a tuar thiam ve vak lo, nakin lamah kan la sawipui zawk dawn nia" ka pa bawk chuan a ti leh a, pawisa chungchang an sawi tih ka hria a, ka pa ṭawng dam dup reng chuan min ti lawm lo lek lek.

Eirawng ka bawl pui lo a, engmah sawi pui pawh ka chak tawh lo, kan rilru a in ang lo em a, min hrethiam lo ni berin ka hria. Ka pa anga rilru tluang ka ni ve lo a, ka natna te pawh ka thup thei ngai lo, huatna ka neih pawhin ka ti lang mai zel a, lungawi lo chunga lungawi hmel put lah ka thei hek lo. Khumah bawkin ka phone chu ka la chhuak a, nizan mut dawna message ka thawn bak kha ka la be leh miah lo a, a message chu pathum lai a awm. Ka inkhawm dawn em tih te min lo zawt a, an ban tawh thu min lo hrilh bawk.  

"Naktukah ka lo chhuk ang" tih chu ka thawn a, a buai deuh aniang a rawn chang mai lo va, a lo chhan chuan zanriah kan eimek a, a message chu ka hrethiam chiah lo, "Inchung tlangval a accident a, kan buai nuai mai" tih hi a ni a, an inchung tlangval kha chu phaiah a awmin ka hre si a, a boral tihna nge mawni!?

"Engtin nge a awm, a boral em ni?" ti a ka zawhna chu a rawn chhang leh lawk lo a, kan chaw eikham hnua ka call pawh chuan a chhang thei lo. Ka pa chu inkhawm turin a chhuak tawh a, keimahin sitting room ah ka ṭhu ngawi reng a, a rehin a reh tlawk tlawk mai.

Awmpuia lo chhan hun ka nghah laichuan khawngkhar kik thawm ka hria, thawm dang nei loin a rawn kik leh ṭhin a, ka chhang mai ngam bik si lo. Thawm dim thei ang berin kawngkhar chu ka pan a, "Tunge?" ka ti hmasa leh te te a, "Keimah i pi Hnuni" a rawn tih takah chuah ka thaw huai  a, ka hawnsak nghal thuai bawk.

Ka pi chu ka nuin pawisa min pe turin a lo tir hi a lo ni a, ka la duh dawn lo tih a hriat vang a ni. Ka pi pawh chu hnar ka la tum ve fan a, "Mai mai a, tlawmah la reng reng suh, i nu chawm leh hrai a lawm maw i nih le, i sen tet aṭang tawhin i nu zawk hi asin thawk chhuaktu chu" min tih khum nek a, nu Hlimi sawi kha a dik tih ka hre ve chiah, chuti taka ka nu lam a ṭang chu mak ka ti a, ka pa hi an lo haw awm mange tiin ngaihdan ka nei bawk.

"Min duh lo a min uire san a lawm, a ngaihsak kan ngai tawh lo, a tel lo pawhin kan khawsa ve thei a lawm" ka ti ve pang pang a, ka ṭawngka chuan a sawi awlsam viau a; mahse, ka mamawh zia erawh ka hai lo, ka pa'n tih dan lo hria pawh nisela beisei tur dang a vang khawp.

"Rak rak lo la, la ṭha hle hle rawh, i nu a thiam ka ti hleinem, keini pawn ka hau ve mawlh mawlh a lawm. Tih ah chuan i pa hi inah a awm ngai lo a, hetiang hian kum tluanin a nupui a dah khawhar a, a damloh leh tih ah pawh kan buaipui a ngai zel a, hmanni a a damloh te khan a lo haw ve mai kan ring a, a ngaihsak lo ve bawk em a ni" a tih laichuan rum deuh deuhin ka lo melh a, "Camping an nei laklawh a, ka nu zawkin a be ṭha duh ngai lo, zin ngun mahse, a kar lakah a lo haw ziah a lawm, mipa dang a duh anih pawn ṭha deuhin a ṭhen thei reng, a tih dan hi apa tan a zahthlak lutuk, miten engtin nge an ngaih ang, 'Pathian rawngbawla a kal hlanin a nupuiin a uiresan' an ti dawn asin" ka ti leh tan tan a, ka mittui a rawn hnam a, ka ṭap lek lek.

 

"An ti reng ang chu, nupui fanau a nei tih pawh a hrechang hleinem" a tih leh chuan ka ding hluai a, "Engmah i hre lo" ka ti ṭeu hlar a, ka pi chu ka haw zawk mah tawhin ka hria, a fanu a ṭan duh anih pawhin ka pa chu a sawi chhe bik turah ka ngai lo, tuartu zawk leh phatsan zawka awm chu ka pa a ni a, engmah tihsual a neih ka hre lo, haw khat tih chu chhuanlam tlingah ka ngai lo bawk.

"I va han rapthlak reuh em em ve le, i pi ka nih hi mi zah ta che" a ti leh chu ṭah khum vak mai ka chak, "Kha pawisa chu la rawh, naktukah chhuk i tum a ni lawm ni" tih pahin a inzen rak rak a, "Ka duh lo, pe let leh rawh" ti hmakin pindan lamah ka luhsan nal nal a, a khat tawkin min rawn au leh ṭhin. Rei dawn a awm hnu chuan a beidawng ta aniang kawngkhar inhawng thawm ka hria a, a reh fel hnu chuan ka insehruh chiam a, ka mittui a luang zung zung a, ka dam thei dawn loin ka hria, a tu a te pawh chuan min runluih ni maiin ka hre tawh.

Sitting room a ka va chhuah leh chuan ṭhutthlenga pawisa awm chu ka va hmu a, a zat ka chhiar lo nain sangnga vel anih ka ring, ka khawih duh lo a, ka pa'n a duh leh pe let mai sela ṭha ang, ani duh dan chu an hnial ngam ka ring lo. Ka phone a lo rik vangin pindan lam ka pan vat a, ka va en chuan Peksanga number a lo ni a, ka la rang khawp mai.

"Rinte, keimah" a rawn tih chuan Awmpuia zawk a ni.

"Engti zia nge?" ka lo ti vat a.

"Damdawiinah kan kal a, inchung tlangval kha tunah biak theih lohin a awm mek a, hei a nu hi buaipui a ngai a, pawnah kan la nghak mek" a rawn ti zung zung a, thawm dang a ri nawk nawk a, mi an tam viau aniang.

"Doctor zirlai kha a ni lawm ni, a lo haw nge?" ka tih leh chuan, "Haw lo e, delhi ah a la awm, vai hoin an sawisa anih hmel" a rawn ti leh a, Peksangan a rawn koh avangin rei pawh kan inbe hman lo, "Kan haw hunah ka lo hrilh leh ang che" tiin phone chu a dah a, inkhawm an lo bang zui nen ka pa ṭhian te an lo lut khawm ṭak ṭak a, thingpui ka va lum sak ve thuai bawk.

"Khawia pawisa nge maw ni?" an tih ri chu ka hre pha a, midang an awm ve avangin ka chhang duh lo a; mahse ka pa'n "Matei dah anih dawn hi" a lo ti vat a, thingpui ka va pek laichuan ka hmu tawh lo a, a dahṭha ta anih ka ring.

Ka pa chu ticket min cut sak turin ka ti a; mahse, kan khaw sumo driver a va biak chuan kohhran nu hoin hmun dangah an lo hmang dawn a, a tuk leh lamah a kal thei dawn chauh a, tih ngaihna dang a awm loh vangin a chhuk ni atan chuan ka hauh ta ngawt a, nikhat dang chu ka cham leh mai a ngai dawn a ni.

Unaunu ka call a, chanchin te ka zawt a, ka thlen hlima ka biak khan thawhṭan lama an zai tur thu lo sawi tawh a, a doctor a buai em avangin a lo sawn sak leh rih a, keipawn chuvanga ngaihven rih lo chu ka ni. "Na te a nei em?" ka tih chuan, "Nei em em lo, naktukah lo haw leh nghal mai teh, damlo buaipui hi ka thiam lo lutuk, kan pahnih chuan a zia ang" a rawn ti reuh a, a chang hi chuan ka khawngaih ve ṭhin.

Sumo kal tur a awm loh thu te chu ka hrilh ve a, "A hma thei ang berah aw, in i lo nghah  ringawt pawn awm a nuam ve a lawm" a ti ve ngei a, a tuk leh lama ka haw tur thu ka hrilh chuan a lawm khawp mai a; mahse, eng emaw chen chu an lo inbuaipui a ngai dawn thunga, ngaihtuah an na reuh khawp mai.

Awmpuia nghah pahin khumah ka mu a, ka pa ṭhiante chu an leng rei angreng hle a, Pathian thu sawiin an ti ti bawrh bawrh a, a changin an nui leh dar dar ṭhin, hetiang hian ka haw chhoh hma pawh khan an inkawm khawm deuh reng a, ka pa khawhar tur an rawn hnem ve a, an chungah ka lawm ve takzet.

Dar 10 dawnah message ka dawng ta hram a, "In kan thleng tawh e, i mut a chhuak tawh em?" a rawn tih chuan chanchin ka lo zawt ve zat a, a chhan pawh naktuk hi haw a tum ni kha a ni a, a insiam tawh em tih takngial pawh ka hre lo.

"Kan la ngaichang rih a, tunah a harh tawh chu an tia, a awmdan a zirin inchungte pawh an chhuk ang" a tih chuan "I insiam tawh em?" ka lo ti leh vat a, a lo mangnghilh anga a che buai viau ang tih te ka hlau.

"Siam tawh e; mahse, ka haw thei kher a nge maw, nu ber khi ven a ngai a, Pa Zuala a zin phei chuan Peka nen kan buaipui viau an ngai ang" a rawn ti a, haw hun a nghah hlelh tehlul nen a pawi ka ti tak tak a ni, an inchungte lah ka khawngaih tho bawk si a, an tlangval chu a boral mai ang tih pawh ka hlau, vairama mizo ten kut a tawrh thu hi ka hre ve fo ṭhin a, rilru a lo na ve ngawih ngawih ṭhin.

"Chanchin lo sawi zel rawh" tiin ka chah a, "Kan meng rei ang" a tih vangin kei pawh ka muhil duh bik lo a, zingah thawh hma ka ngai lo bawk a, men pui ve mahila a pawi lo ang.

A khat tawkin kan in text a, Peka nen an inchungte inah an la awm ve reng a, inleng pawh an tam viau anih hmel, ka chanchin te pawh min zawt ve luam a, ka nu ka hmuh thu ka hrilh chuan min lo call nghal a, ka lak rualin "I ṭap em?" a rawn ti hmasa ber a, "Ṭap lo e" ka tih chuan "Ka ngaihtuah lutuk che a, hmanzan pawh khan ka muhil thei lawk hleinem, haw pawh a nuam dawn lo anih kha tiraw" a rawn ti sap sap a, min ngaihtuah zia chu a aw aṭang pawhin a hriat theih.

"I haw chak ve tawh awm si a, i haw theih loh a va hlauhawm ve, i nu te i hrilh ve em?" ka ti let vat a.

"Hrilh rih lo, a la chiang lo em a, ka haw theih loh pawhin a pawi lo, remchang a awm veleh mai dawn a lawm" a ti sam mai a, ka pa a damṭha em tih min zawt zui a, rei deuh chu kan inbia a, chanchin thar an nei aniang "Ka va lut lawk anga, ka lo be leh ang che" tiin phone chu a dah a, rei pawh ka nghak lo, a lo call leh thuai a.

"A harh ṭha tawh anih chu, naktukah hruai turin a pa a kal ang" a rawn ti ta a, thaw a veng ve huai huai mai.

In a an chhuk hnuah rei lo te chu kan in be leh a, chawei kham lama an chhuah dawn avangin a hmanhmawh thlak lem loh a, ticket pawh kar hmasa khan a hauh lawk diam tawh. A haw huna a tih tur te ka zawt a, "Nikhat te chu huan ka sam pui hman ang, hawn theih ang ang ka lo hawn dawn nia, ser te pawh a awm ang, chawhmeh pawh ka lo hawn ang che u" a ti ve luam a, a chhungte pawn an lo thlahlel tawh ngawtin ka ring.

Dar 12 dawnah kan inmangṭha a, kei chu ka muhil thei lawk lo a, Awmpuia nena kan thlalak te enkualin ngaihtuahna lakpen ka tum a, kan drama chan lai leh college thil tih a kan inzui na ho chu ka gallery ah a tlar dul a, kan lo inzui nasat ṭhin zia te ka hre thar a,  thlalak a awm lo hriatrengna a cham pawh thil tam tak a awm. Vawikhat mah kan la inṭhen lo a, ka tan hian a ṭha em em reng a, mahni inhriat chian phei chuan ka phu lo zawkin ka inhre ṭhin. 

Zinga ka thawh chuan ka pa'n ei a lo rel zo leh diam tawh a, chhuat te nawt faiin a thawmhnaw te ka suk sak a, zinna a a ken ṭhin bag te pawh ka su fai vek a, pawisa kha engtin nge a tih dawn ka zawh chuan "Ka pe let ang, field thlanga kan ram saw ka hralh ṭhen dawn a, i chhuk hunah ka lo thawn dawn che nia" a lo ti ta hlauh a, ka lawm zia chu aw, ka nu pawisa kha hmansak loh hram ka duh a, nakin hun chu ka sawi thei bik lo nain tun dinhmun ah hi chuan ka hnar ngei a ngaiin ka hria, ka pa pawn ka ngaihtuah ang chu a ngaihtuah ve anih ka ring.

Chawei ka siam laimekin ka phone a lo ri a, Awmpuia a nih vangin phur deuhin ka chhang a; mahse, ka beisei loh deuh thil a rawn sawi. "Ka haw rih lo mai dawn anih chu, Peksanga ITI ah a riah thlak a ngai sia, inchungte nufa khi an mahniin an riak ngam lo aniang, an pa te lo haw hma chu ka riah pui a ngai dawn a" a rawn ti a, a aw chu a zawiin a inthlahrun hmel hle bawk.

"Pahnih an ni tho sia" ka ti ringawt a, inchung leh inhnuai mai an ni bawk a, han riah chhoh kher a ngai chu ka hrethiam lo.

"An hlau a niang" a ti deuh tawl a, ka lawm loh pui ru khawp mai, a haw loh phah pawh tih tawh laiin duh aichuan an ti buai deuh ṭhin a ni.

Ka pa'n "Ka lo be ve a nge" a rawn tih vangin phone chu ka pe vat a, "Tunge a hming khah?" tiin min rawn zawt ru sar sar a, "Aw, Pa Tluang, Awmpuia aw...." lehlama miin a rawn tih chuan ka nui ringawt.

"E, Awmpui, Matei chu naktukah a lo chhuk ang, class i kal dawn em, in chawl lo ti raw?" a ti nghal zung zung a, class chawlh kan neih loh thu chu ka hrilh tawh a, a la hriat tho ka ring.

"Ka insiam mek a, ka kal ṭep tawh, i damṭha maw?" Awmpuian a lo ti let var a, "Ka dam ṭha e, tunlai inhlawhna tur te a awm em?" tiin a zawt zui a, Awmpuia chungchang hi vawikhat chu ka hrilh tawh a, a biak ṭhat danah chuan a duhzawng tak a nih ka ring.

"Test kan neih vang khan ka chawl ve rih a, zawn chuan a awm veleh mai zel, nang zawk rawngbawlin i chhuak leh hnai em?" Awmpuian a lo tih chuan an kalna tur a lo hrilh leh vat a, ka pa chu a nui suk suk reng a, hmuh a nuam takzet.

Chawei ka siam chhung zawngin an lo inbia a, ka pa chuan a fuih mawlh mawlh a, ruihtheihthil laka insum a pawimawh zia te,  a nu leh pa tana chhuanawm tak nih tum tur tein a fuih a, pafa inbia te pawh an ang. Pakhat lah chuan thu a awih hmel khawp mai a, mak ka tih deuh chu zam awka emaw han ṭawng nawi deuh pawh a nei miah lo chu a ni, hetiang thilah hian a puitling leh tlat ṭhin, mize zawiawi leh inthlahrung chi tak anih vang hian zakzum hle turah an ngai ṭhin a; mahse, a hun leh hmun a zira awm dan a hre riau zel a, mipa smart tak tih hian a sawifiah ber ang, kan CR a kan thlan chhan pawh a ni.

Tukṭhuan kan eilai chuan Awmpuia chungchang chu kan sawi zawm a, keipawn ka fak ve luam a, "An harsa viau a ni maw?" ti a min zawh chuan "A nu leh a nau khi an hrisel lo lutuka, a huan chauh khi eizawnna an nei a, Awmpuia hian pawisa inthawn tir a duh lo a lawm" tiin ka chhang a. Kan dinhmun a hetih takah chuan keipawn pawisa thawh chhuahna ka ngaihven tur thu te ka hrilh bawk a, "Awmpuia pawh inhlawh chawpin lehkha a zir a, thil zawrh tur te ka ngaihtuah ve ang" ka tih chuan, "I rilru ti hah duh mahta che, keiman ka ngaihtuah mai dawn a lawm, programme ka lo siam laklawh tawh si a, tun ṭum chu ka han kal veleh phawt anga, a bak chu kal ve tawh lo mahila a pawi lo" a ti a, ka pa Masangan a Furniture workshop ah helper turin a lo sawm a ni awm e, tun hma deuh pawh khan an ti dun fo a, ṭhian inzui chawt ṭhin an ni.

"Kan khua a awm i hreh lo em ni?" ka tih chuan, "Hreh lah lo ve a, kal chhuak thei pawh ka nih tawh loh hi, rawngbawlna te chu kan awmna hmun apiangah kan chhunzawm thei a lawm" zangkhai deuhin a ti a, engmah han hnial tur ka nei lo, ina a awm theih chuan ka lawm zawk mah a, a khawhar tur erawh ka ngaihtuah viau thung.

Nu Hlimi chanchin min zawt a, vawiin hi an inzai ni tur a ni a, dar 10 ah an zai ṭan dawn a, vawiin chu an chanchin ka ngaihchan tur thu te ka hrilh a, chawei kham veleh unaunu ka call bawk. Phone a lo chhan chuan "A la lut lo deuh, putea te pawh an awm ve a, ka ṭhiante pawh an lo kal mek" a lo ti zung zung a, "I rilru a hah ange, kan lo ṭawngṭai pui reng ania" tiin ka ṭawngthlamuan ve a, Benja nen an inhmu lo nge ni engmah a sawi lo a, 'Ka lo ngaihven ang' a ti khan ka hre si a, Bena chuan theihnghilh a ni maithei.

A khat tawkin ka phone deuh reng a, darkar khat dawn an zai a, a bawk lai an paih te chu thlalak min lo thawn ve a, tereuhte ni tura ka ngaih kha rin aitakin a lo lian a, hre hma lo phei sela chu hlauhawm tham tak anih ka ring. "A muhil rih a, na a tih hmel lutuk, a rum reng mai. Cabin ah kan awm a; mahse, putea ten chaw min lo pe ang" a tih chuan awm a nuam deuh huai a, a ṭhianten cheng sang li lai an pek thu te min hrilh bawk a, a thil rawn sawi chuan ka ngaihtuahna a ti thui khawp a, ṭhianṭha neih hlutzia te ka ngaihtuah a, Unaunu ṭhian kawm tam lutuk hi a nu nen kan hau fo a; mahse, vannei ka ti ru hle tawh. Keichuan chutianga ṭhian ṭha han tih tur chu ka nei mang lo a, ka ṭhian hnai ve ber te pawh Mawitei leh Kimkimi an ni mai a, inbe zing tak kan ni lo lehnghal a, chhiat ṭhata han pur tur ang chi ṭhian ka neih loh zia te ka hrechhuak a, Awmpuia bak hi chu mimal thil deuh han sawipui tur pawh ka lo nei lo.

Tlaiah Nu Remi lo kalin ka thlai hawn tur te a rawn dah a, ka pa'n kan huana tumbu min laksak bawk a, satha ip chanve hmawk a ni. Zing thawh hma a ngaih loh nan ka insiam peih sa diam a, Awmpuia bulah min lo hmuak turin ka chah bawk. Tlai lama kan thlen dawn vangin class pawh kal hmasa turin ka hrilh a, last period a nei lo bawk a, a lo kal theih mai ka ring a ni.

"I lo thlen dawn hnaihah min lo phone dawn nia" a rawn ti ve mai bawk a, chawhmeh ka hawn sak tur thu ka hrilh lah chuan "A ngaih pawh ka ring chiah lo hei, inah eirawng ka bawl lo a, Pa zuala cham chhung chu inchungah ka ei ang" a lo ti leh zel a, an tlangval chu damdawiinah an lo admit daih a, an awm rei dawn a ang khawp mai.

"Peka a lo la haw dawn lo em ni?" ka tih chuan "Class pawh a kal mumal lo, chawhnu lamah a haw daih zel, leivung paih motor a khalh a, a thawmhnaw rawn lakbelh te a la tum, kartawp lamah chuan a rawn haw theih ka ring a, a naute pawh an lo haw ve tawh ang" a ti a, a rei dawn lo anga a sawi vang chuan awm a nuam ve deuh.

Muthilh hma ka duh tehlul nen ka muhil leh thei lawk lo a, kan boruak tawn vang te pawh a ni maithei zan mut ka harsat a, chhun lamah ka mut a chhuak viau zel lawi a, ngaiah ka nei ṭanin ka hria. Dar 3 pelh thlengin ka meng a, ka pa'n min lo kaihthawh chuan dar 8 a ri lek lek tawh. Chaw kan eilaiin ka chuanna tur Driver khan ka pa a lo call a, kan khaw piah lawkah kawng an siam avangin a kal tlang theih dawn loh thu a rawn sawi a, kan hel mai a ngai dawn anih hmel.

"I full dawn em?" ti a ka pa'n a zawh chuan "Amah bak kha passanger ka nei lo, hauh lawk ho khan niminah min lo chhuksan daih a, haw tur chu an awm nual, bungraw phurh tur te pawh ka ngah ang, ka motor hi siam a ngai bawk a" a rawn ti luam a, mahni chauha han chuan chu ka hreh deuh a; mahse, ka pa chuan "Kawng nuam zawkah in tlan dawn a lawm, kan khaw kawng aiin a zau zawk a, kawngpui pawh a ṭha daih zawk, in thleng har vak lo ang" a ti sam mai a, a sawi danah chuan kan khua chu helin kan tlan ngai lohna kawng lamah kan kal dawn a, a thui deuh dawn bakah darkar 2 vel zetin ka rei phah dawn a, Awmpuia pawn min chang hmanin ka ring ta lo.

Ka insiam laichuan khua a rawn dur a, thli a tleh tel lehta nghal a, ka pa lah chuan "Khua a va nuam lo ve mawle, a sur har dawn lo a ang riau, i ṭhulh leh rih mai dawn em mawni" a ti leh ṭhin a. Mahse, kan driver berin engmah a rawn sawi si lo a, keimah chauh passenger a neih vang te chuan ṭhulh san ka hreh a, kawng a ṭhat tho chuan harsatna a awm lo turah ka ngai.

Dar 9 leh a chanve velah sumo chu kan kawtah a lo ding a, kan driver chu kan kohhran ṭhalai pawlah pawh inhmang tak, tlangval fel ti a kan hriat a ni a, mi lah chu a be bawrh bawrh a, "A vawt maithei, in ha lum sa deuh rawh" tiin ka bag te chu min hlan sak zung zung a, seat hma a ṭhu turin min hrilh bawk.

Ka pa nena kan han in mangṭha tur chu sawi tur a vang duh khawp mai, "Mut i kham loh hmel em mai muthilh te kha tum rawh" tih pahin motor kawngkhar bulah a rawn ding a, engthil emaw hian min mawlh a, ka hnuk a ulh ṭun mai a ni.

"Kan chawlh hunah ka lo bia ang che, i phone lo chhang thei rawh aw" ka tih chuan a bu nghat nghat a, kan Driver chu biain "Ramsang, hmanhmawh ngai a awm lo bawk a muangchangin tlan rawh u, khua hi a ṭhat loh hmel si a, fimkhur viau ula" tiin a chah zui a, chumi hnuah "Pawisa chu ka lo thawn vat ang che, i rilru lo ti hah suh aw" awki dam dup hian a ti a, a hmel chu en rei pawh a nuam lo, min ngaih hmel riauin ka hria, khawhar lo ang taka lan tum mah se engmah ka hai bik lo a, ka kalsan hnua a awm dan tur te pawh ka ngaihtuah.

Kan tlan chhuah dawn chuan "Tluang deuhin in thleng dawn nia" a ban rawn vai pahin a ti a, tukverhah dakin ka va enzui vawng vawng a, kan tlan liam hma chu a kal sawn lo, a lan theih tawp kan thlen hnu chuan thawk ka la vang vang a, ka ipik leh ṭun tawh. "I pa chuan a ngai dawn hle mai che a" u Ramsangan a tih chuan "A khua a har ve ngawt ang" zawitein ka ti a, kan chungchang an hre vek tawh a, min zawt lo sela ka ti takzet.

Khawchhung kan hel dawn avangin ka nu te awmna lam kan tlan pelh a ngai a, min hmuh ka hlauh vangin chhimveng kan thlen chuan ka ṭhu hniam daih a; mahse, ka nu chu kawtah a lo ding aniang "I nu saw a rawn hawi nasa ania" u Ramsangan a tih chuan ka hawichhuak ve vat a, kan lo tlanpel deuh chiah a, ka hmu hman lo hlauh mai.

"Kan kalna tur kawng chu a thui viau em?" ti a ka zawh chuan "A inthlau angreng; mahse, an kawng a ṭha alawm, rulngan pa ang zar a ni mai, tlan a sawt viau ang" a ti sam mai a, Awmpuia chu message thawnin min chang leh lo mai turin ka hrilh a, "Zanah em ni in lo thlen dawn" a rawn tih chuan engmah ka sawi lawk thei lo. Taxi ka lak mai tur thu ka hrilh a, "I lo thlen dawnah lo sawi tho rawh, ka hman ka ring" a ti leh erawh ka hnial bik lo.

Thui pawh kan thlen hmain khua a rawn eng a, kan khaw lamah erawh a sur ngei ka ring, ral aṭang pawhin kan khaw chung vel chu a la dur ṭha khawp mai. U Ramsanga chuan min be deuh reng a, ka zirna lam leh kan lawina kohhran chungchang te min zawt a, rinai takin keipawn ka nel a, ngaihtuahna ka kawm hman meuh lo. Dar 11 velah chuan kawngpui zau deuhah kan tlan tawh a, 'Rulngan pa ang zar' a tih chu a sawi dikin ka hria, kan tlan chak a, motor nena han intawh chang pawhin kan intlan pel zung zung a, tlang mawi tak tak thlir tur a awm bakah ka la kal ngai lohna khua te kan tlanpel a, a man hla zawk khawpin ka hria.

Ka mut a chhuah deuh avangin ka ṭhutdan ka siam rem a, "Nizanah ka mu har lutuka, muthilh ka'n tum ange" ka tih chuan "Thingpui in dawnah ka kaitho mai dawn che nia, muhil rawh" a lo ti ve vat a, kawngchhia a insawh a awm lo bawk a ka muhil hma khawp mai, mumang hrang hrang ka nei a, ka mumangah chuan ka pi leh ka nu hian min lo hau a, ka pa lah chuan  pianthar ka ngaih thu sawiin min lo zilh hrep a, Awmpuia lahin min lo haw em em bawk a, ka rilru na chu ka lo ṭap chiam a, thawm ka chhuah a niang U Ramsangan ka darah min lo sawi a, harh chiang tak ka ni.

Ka hawi chhuah chuan khua a lo dur hle a, chhum a zing phui mup bawk. "Ruah a sur elaw" phawk fea ka tih chuan "Dai anih chu, heng laiah hian dai a tam ania" a lo ti var a, sana ka en chuan dar 1 a lo pel tawh. "I ril a ṭam tawh em" a tih chuan "Zing chaw ka ei a, motora ka chuan hi chuan engmah ka eiṭha peih lo" ka ti mai a, "Anih chuan tlai lamah thingpui kan in chauh dawn nia" a tih chuan ka hnial lem lo.

A vawh deuh avangin seat hnunga ka puan dah chu ka han la chhuak a, ka insin hlun a, "Nichin khan khua a ṭhat tehreng nen" ka ti niah niah a, chhum zing nasa lutuk chuan khawhawi a ti zim a, thui tak pawh a hmuh theih loh.

"He khua hi khawṭha hnuaiah ka la tlanpel lo reng reng, he lama ka tlan apiang hian chhum azingin ka hria; mahse, zan lamah deuh hlir ka la tlan a" a lo ti bul bul a, ka han hawi chhuak ṭhin a, khua awm ang reng reng ka hmu lo. Chutih laichuan motor chu a tlanmuang deuh thut a, kan seat chu a hniam nghal sawt hian ka hria, ka bula mi pawh a lo chek hlak a.

"Spare ka keng lo asin maw le" a tih chuan phawk fein ka melh a, a ke a thep anih hmel.

"Kan thleng ṭepin ka hria, khua ah kan pump tir dawn nia" a ti zui a, kan rei duh dawn hian ka hria, hetiang chuan kan thleng har khawp ang.

Rei dawn kan tlan leh hnuah khua kan lut a, ka rin aidaihin chu khua chu a lian, ruah a sur zo hlawt aniang kawngpui chu a huh hneh hle a, boruak a vawt hle bawk. Khawchhungah chuan kan tlan phei zar zar a, rei lo teah workshop kawtah kan ding a, U Ramsanga a chhuk hnu pawh chuan ka la chhuk mai lo, a kalna lam ka va en chuan mipa pakhat nen an lo inbe mek a, motor siamna dawr lian deuh mai a ni.

Muangchangin ka chhukthla a, "A chhungah lo va ṭhu mai rawh" U Ramsangan a tih vangin dawr chhunglam chu ka pan a, mi ṭhenkhat hian meilum an lo aimek a, hmeichhe awmchhun chuan ṭhutna min lo kawhhmuh thuai bawk.

Ka ṭhu fel deuh chauh tih ah chuan "I kawrkilh kha a chhia anih kha" ka epa ṭhu hmeichhia chuan a rawn ti a, ka en chuan a lo tla lek lek a, engmah pawh ka sawi hmain "Mi kawr dik lo lai hi hmu thei viau suh" pakhat chuan a lo ti zauh a, "Ka siamṭha chak thei em alawm" tiin hmeichhia chu a nui pat pat a, ka lam a rawn hawi vangin ka lo nuih ve mai bawk. Pawna mipa awm kha rawn lut vein "Rochhingpui khan mi kawr chhe lai a hmu thei ania aw, inkhawmna ah pawh mi kawr siamṭhat dan hlir a lawm a ngaihtuah ṭhin, thusawi pawh a hre ngai lo ang" a rawn ti lut bawrh bawrh a, "Va siam mai mai teh Motor siamtu thinchhepa" hmeichhia chuan a lo ti let hlak a, chupa chuan a duh lo khawp.

"Puanṭhuitu luhlul an tih luai luai che hi aw, i duh dan tê chauhin i ṭhui ṭhin an ti, an design an sawi pawhin an sawi loh danin i ṭhui ziah" a lo tih chuan "Awih awm loh em mai a, ka ṭhuisak lungawi lo an la awm lo" hmeichhia chuan a ti ve tlat a, "Hmanni a ka kekawr ṭhui zuih tur ka tih pawh i ṭhui arh daih kha" mipa zawkin a tih chuan ka nui chhuak ṭep a ni, an pahnih chuan an inmelh rum dun hle a, lo nuih chi pawh a ni lo.

Ka phone a rawn ri a, Awmpuian kan thlen chin te min lo zawt a, "Engkhua nge pawh ka hre lo, workshop ah kan awm mek a" ka tih laiin "Chhumzinna khua ah kan awm ti rawh, he khua ve hi chhum a zing reng mai a ni" hmeichhe khan a lo ti a, ka chhan hmain "Ruah a sur ve em" Awmpuian a rawn ti leh a, "A sur chiah lo, a han leh tawh zawk aniang" ka ti nawi naih a, ruah sur kan nang hman lo a ni mah zawk ang.

Chutih laichuan mipa pakhat hian mipa naupang hmelṭha deuh hi a rawn kailut a, ka hma a ṭhu hmeichhia chu a nu aniang a rawn pan chat a, hmeichhia chuan a lo pawm ve vat a, Awmpuia chu "Kan tlan chhuah leh hunah ka lo hrilh ang che" tiin kan inbiakna ka ti tawp a, mipa naupang te chuan min lo en duh khawp mai. "I va hmelṭha ve, tunge i hming?" tiin ka nuih var var a, fiah mang lo deuh hian min chhang a, "Het" a pa niawm tak chuan a lo ti vat a, "Khatin sawi ziah chu, Chhuanthiltitheia fapa i ni ziah lo" a nu'n a lo ti ve bawk a, pawn lam melh pahin "Sawpa sawn ni lo lo hian a ko a" tiin a phun zui hlak a, chumi hnua "What is your name?" a pa'n a lo tih chuan, "My names sis Diego Rosangzuala" a lo ti reuh a, a ṭawng fiah lo reuh khawp a, a duhawm viau bawk.

"Aizawla kal tur maw in nih?" naute pain a rawn tih chuan ka lo aw vat a, "I thirthang kam kha va en rawh, a awkin ka hria" an nuin a lo tih vangin a kalsawn thuai a, bang phen aṭang chuan "A awk chiang chaih chaih hle mai" a rawn ti lang lang a, rei loteah thirthanga sazu tang va va hi a rawn keng chhuak a, "A rim ka hriat loh danah tukina awk anih dawn hi" a ti a, mipa naupangin "Anu kan talh dawn a mi?" a nu bula a tih chuan kan bula midang ṭhu chu an lo nui huk a, "I ei chak em ni D-a?" a pa'n a rawn tih chuan a lo aw rang khawp mai.

"Hei chu a eitlak loh tlat, i pa Ziona pek ang che kha a ni lo a" a pa'n a tih laiin a nu chu a lo nur nasa mai a, "In ti vir zo vek tawh, ei hreh pawh a nei tawh lo, Tangkawngsa te in lo eitir thul" a ti hlak hlak a, chutih laichuan U Ramsanga te an lo lut a, an pump zo tawh aniang chu "Kan kal thei e" a rawn ti a, a man pek a han tum chu Motor siamtu thinchhepa khan "Boruak kan hralh ngai lo" a lo ti bul hmuk a, min ti hawihai khawp mai.

Chutia a man an lak duh tak loah chuan lawmthu te kan inhrilh ve luam a, ruah a rawn tla ṭan leh bawk nen khawmuang tawh loin kan tlan leh ta vang vang a, "An fel hle mai a, ka chawl ngai miah lo a, nidangah chuan hriat tawh tur anih kha" U Ramsangan a ti chu ka thlawp khawp mai. Kan tlan leh tawh thu chu Awmpuia ka hrilh a, u Lizzy ka call bawk. Inah tumah an awm loh avangin mahnia ka riah a ngai dawn a, ka hreh ru angreng khawp mai a, U Lizzy lahin "Naktuk zingah min lo thlak dawn nia, inbual ka duh" a rawn ti a, class chu ka la kal theih loh hmel, a nu chanchin ka zawh pawh chuan "A ṭha lutuk" a ti leh mai a, a rin tlak loh hi ka hlau ṭhin.

Thingpui ina ka din laiin thli a thleh chiam mai a, rei deuh chu ka chawl leh a,  Aizawl kan thlen meuh chuan dar 7 a ri tawh a; mahse, Awmpuian min lo hmuakin kan inah min thlah thlap a, leng rih tura ka sawmna pawh a hnial lo a, kan han inhmuh leh takah chuan ka ngaihzia te ka hre thar a, rilru no lai tak a ni bawk nen ka pangchang ve khawp a, a mal chungah ka mu zawi ngiai reng.

Ka pa ka call a, in ka thlen tawh thu te hrilhin rei lo te kan inbia a, kan khaw lamah ruah a sur avangin ani pawh a hma khawp mai. Pawisa pawh kha ka pi te inah a lo han dah tawh a, ka piin engtin nge a lo chhan ka zawh lah chuan "Engvak a sawi lo" a ti mai a, zep erawh a neih ka ring. Mahse, hriat belh lo mahila pawi ka ti hran lo, min ti hrehawm zual mai mai dawn a.

"Nangmahin i awm ngam ang maw?" Awmpuian a tih chuan "Tinge, i lo riak ve chak em ni?" ka ti fiamthu a, "Chak e; mahse, a chi bawk si lo va" a ti a, kei ka lo nui kar kar.

"Anih chuan min hawn mai la" uang fea ka tih leh chuan "Chakawm khawp mai, ka hawn mai dawn che em mawni" tiin a nui ve suk suk a, a khabe ka han khawihsak laichuan chiang deuhin min lo en a, "Ka awm loh laiin i ṭap em?" thu tak deuh hian a ti a, a kawngah ka lo pawmbet nghal sawk sawk a.

"Nangmah bak hi inhnemna tur ka nei lo anih hi, ṭhian ṭha pawh ka nei lo" ka aw chu zawi tak a ni.

"Mawitei te...kimkimi te pawh..." a tih chuan, "An ni pawh an hla a lawm" ka ti leh halh a, ka tana a hlut zia chu a hriatthiam ve ka ring.

"Anih chuan ka bulah engkim sawi la, ka lo hnem dawn che nia" tiin min rawn kuah hlu hlu a, ka kut la kangin a fawp vang vang bawk.

A phone a rawn ri a, a chhan laichuan an inchungnu a bia tih ka hria a, a haw har loh tur thu a hrilh hnu lawkah an rawn call leh a, ruah sur hma a haw turin a rawn hrilh a, pawn lamah chuan khua a dur leh viau tawh aniang thli a thaw ri vuk vuk a, keilah chuan haw tir ka la phal mang lo a, ruahin a dan phei chu ka hlauhpui viau tho. A haw dawn chuan tukverh a check hmasa te te a, "Kawngka kalh ṭha la, i muthilh theih loh chuan min lo phone dawn nia" a ti a, a awm a nuam chhiah lo aniang min en leh vang vang ṭhin a, min haw san a hreh ve anih ka ring, 

Veranda thleng chauh ka thlah a, a kal tur chu kan han inpawt let leh rih, tumah min hmu thei an awm lo bawka a ti aniang veranda engah chuan lungchim zetin min fawp a, a thinphu dup dup chu ka hre thei. "Kal tawh rawh Pa-a" ka tih chuan a nui suk a, "Muttui aw Nu-i" min ti ve ngei a, lungngawi hmel zetin a kal bawk. Thlir liam tum a ka la din laichuan a rawn lehhawi leh a, flying kiss min rawn pe zauh a, ban vai meuhin ka lo nuih let a, a liam hnu chuan ka ngai zui vawng vawng mai.

Ruah a sur cherh cherh a, ka chau bawk a Awmpuia pawh nghak zo loin ka lo muhil daih a, ka harh chuan ni a lo eng ut tawh. U Lizzy call lah chu a lo tam khawp mai a, chaw ei loin thingpui ka in a, ka insiam zui mai a, ka va thlen chuan a lo tum lian viau tawh. "Rei lo te tal class kal ka ngai, chawhnu ah ka lo kal leh ang" tiin a insiam sawk sawk a, ka nu Hlimi pawh a lo harh ṭha viau mai, na a nei em ka zawh pawhin a ṭhat thu min lo hrilh a, eitur min lo kawhhmuh thuai bawk.

Chhunah Doctor-in a rawn en a, "Zankhat dang riak leh la, i chhuak thei tawh ang" a lo ti a, in lamah indim viau turin a chah thung a, "A hlimchhawna indim hi a pawimawh ania, ei in te ti ṭha leh i ṭha leh thuai mai ang" zangkhai deuh hian a ti a, zankhat tal chu riah pui ve a ṭhain ka hria. U Lizzy chu text in amaha riah a hreh em tih ka va zawt a, "Muani ka sawm mai ang" a lo ti then a, leng chhuak miah lo turin ka chah zui a, a nu rilru ti hah zawnga a awm leh ka hlau a ni.

Awmpuian class a kal avangin kan inbe mang lo a, a kal dawnah min lo biak leh a haw tawh thu min lo hrilh chu kan inbiak chhun a ni. U Lizzy'n chaw min lo pe ve ngei a, dawra mi a rawn lei anih hmel, keichuan tui ka ti viau a, a nu erawh chuan a ei hleithei lo a, a mawm a ti deuh aniang, gas a awm avangin artui ka chhum sak a, thingpui nen pum thum lai a ei a, "Ka chhuah hma chu nangmah awm tawh mai rawh" a tih chuan a sawi chhan ka hrethiam a, unaunu kha a laktlak vak lo anih ka ring.

Kan in eipuar hnu chuan zungram ka ṭhiar pui a, tih tur em em a awm tawh loh avangin Awmpuia ka text a, chaw an ei tawh em tih angreng ka va zawt a, a rawn chhang har khawp mai. Call ka tum laitakin Mawitein min lo call a, "Awmpuia nen hian in ṭha em?" a rawn ti teh hlawl a, a chhan ka zawh chuan "In ṭhat leh ṭhat loh ka hre phawt duh" a ti tlat a, kan ṭhat thu chu ngaihṭha lo deuh chungin ka hrilh a, min zawh chhan ka zawt let bawk.

"Hmeichhia a rawn phur ziah a, an inphur haw leh ziah bawk a, an sawi sep sep mai, in inṭhen emaw ti te an awm a, i lo kal ngai lo te hi in inṭhen vang anih an ring a lawm" a tih chuan ka hamhaih deuh a, 'Hmeichhia a rawn phur ziah' a tih tak chu ka hrethiam lo, Valerie em mawni dawn le?

"An inchungte nau kha a ni lo maw, tunlai hian chhiat a tawk ve a" tiin an hnena a khawsak rih thu te ka hrilh a, Valerie nu chiah kha a la hmu a, a lo hre lo anih ka ring.

"An inchung nula pawh nise an inzui nasa teh ania, canteen ah pawh an ṭhu ho ziah" a tih leh takah chuan ka awm a nuam lo ru hle tawh, "Ka lo zawt chhin ang" ka ti ram hmak a, ka lawm lo nghal pang mai.

"Engmah la sawi suh, i lo kal hunah emaw sawi chauh rawh" a tih pawh chuan "Ka'n be hrim hrim a nge?" tiin phone chu ka dah a, Awmpuia chu ka call zui zat a; mahse, a rawn chhang thei hauh lo.

Message thawn ka tum lah chuan nichin maia ka message thawn kha a lo en tawh a, a rawn chhang let chuang bawk si lo a, min ti lawm lo khawp mai, "I buai viau em ni, biak che ka duh ania" tih chu ka va thawn leh a, chu lah chu rang deuhin a rawn en a, engmah a rawn sawi chuang lo.

Ka call ṭha leh a, a ring ral leh ṭhak a, message bawk thawn lehin "Eng nge i awmzia?" ka va ti tawl a, a en reng a, min chhang duh miah lo mai a, ka thinrim lutuk chu ka sehruh ṭun a, mi a seen zone hmak hmak danah eng emaw a awm anih ngei ka ring.

Lungawi lo lutuka phone ka en laichuan status a rawn nei a, Valerie nena an thlalak a ni a, an inchungte in ni ngei tur a ni, sofa ah an ṭhu dun a, phone kengtu chu valerie zawk a ni nghe nghe a, Awmpuian lehkhabu a keu mek bawk. Caption ah chuan tuition an inpek thu leh a zirtirtupa strict thu a rawn dah a, heart emoji var nen. A phone a khawih sak tih chu ka hria a, ka bialpa chuan ka call leh message te chu a hre ve lo nge chunu chuan a hrilh duh lo zawk ni.

Call duh tawh loin phone chu ka dah hmak a, rei deuh hnua ka en leh chuan a message a lo awm a, "I buai em?" tih hi a rawn thawn a, a status kha hmuh tur a awm tawh lo a, ka call zozai te kha a hmu lo nge maw ni.

"I buai zawk em?" ka va tih chuan "Ka mu chiah" tih zawng hi min rawn thawn a, lungawi thei lo reng reng.

"Vawikhatmah Valerie kha i phone khawih tir tawh suh" ka ti leh tawl a.

"Status kha i lo hmu hman elaw, a uang ve anih kha, ka delete leh tawh" a rawn ti mai a, ka sawi zel chuan kan inhnial mai ka hlau a, thikthu tih chhiat loh hram hram ka duh tawh avangin ka insum a, keimah vanga hrehawm a tih pawh ka hlau, a chang chuan a nun hi ka ti chep ve riauin ka hre ṭhin a, an scooty zirna a ka kal aṭang khan hetiang ngaihdan hi ka nei a, a ṭul tawpkhawk anih loh chuan ka inrawlh tawh lo ang tiin rilru ka siam bawk.

(End of chapter - 11)