BLUE BAYOU (CH - 5) by Ahmangaihi violette khiangte

BLUE BAYOU by Ahmangaihi violette khiangte

Chapter - 5

Ka Phone ah chuan Awmpuia message pathum lai a lo awm a, ka inthiam lo lek lek a ni, "I muhil tawh em?" ka va tih hnu lawkah thlalak min lo thawn a, mawza var a bun lai thlalak hi a ni a, ka ta ang chiah a ni bawk.  "Inchei nan hmang ta che" ka ti a, a lo chhan hmain message dang a lo thleng zut zut a.

"Zanin aṭangin ka ti ṭan dawn em?"

"Engtikah nge i sawi dawn?"

"Muttui tih tal ka thawn dawn ania" tih angreng a ni a, Benuiha chu a insum thei dawn lo a ang riau.

"Awm mai mai rawh, biak a ngai rih lo" tih zawng ka thawn a, ka message chu "Yes, boss" tiin min lo chhang a, a insum thei tak tak pawhin ka ring lo.

Awmpuia message nghah pahin mutna ka siam a, ka mut fel hnu rei vak loah message a lo thleng a, "Ka phelh leh tawh, dam chuan naktuk zanah ka lo leng anga, i nu chu kan dil dawn nia" tiin eng sa nge ka eichak min zawt a, vawksa rep ka rilruah a lang hmasa ber a; mahse, to deuha ka hriat vangin "I duh duh a ni mai, ka ei thei vek" tiin ka chhang a, Pathian ni chu ka nghakhlel viau bawk.

"Naktuk chu eng nge i tih ang?" 

"Motor silna ah ka kal dawn a, ka haw tlai lo ang"

"Peka nen em ni?" 

"Keimahin, Peka chu hmun dangah a thawk ang" 

"Engtin nge in inbiakrem, inchawi ṭawm te insawi em?" ka tih chuan "Ei in ka tum dawn a, an nin inluah man a tum ang" a ti a, a ṭha viauin ka hria, a inthlahrun phah lo deuh ang a, ka tan tak pawh a zia, chaw ka va eidawn lehnghal a.

"Buaina i neih chuan min hrilh rawh aw" ka ti leh a, tih theih ka nei lo chungin a harsatna hriat pui ve zel chu ka duh, zep leh thup awm lo sela tih hi ka duh dan ber a ni. "I hre hmasa ber tawh ang" a tih chuan ka nui var var a, rei vak lo kan inbiak leh hnuah kan in mangṭha a, a muhil nghal a niang a online leh tawh lo. Kei erawh movie enin rei deuh ka meng a, ka muthilh lai tak pawh ka hre lo, ka harh chuan dar 7 a ri tawh a, thawh paha phone ka han en chu Ben-uiha message hlir a ni!!

"I sawi tawh em? I la mu nge?"

"Lizzy a tho tawh em, Present kha engtin nge a tih?"

"I la pe lo em ni?" tih angreng...

"Message en rawh?" tih ringawt pawh pathum lai a awm.

"Ka tho chiah" ka tih hnu lawkah "Min va chhang har em em ve" a rawn ti a, a phili ka ti tak tak a ni.

"A la tho lo, lo za chung suh" ka ti leh mai a, hmai te phih sanin thingpui ka chhuang a, dawhkana ka phone dah chu a ri kurh kurh reng a, a insum thei lo leh lutuk chu ka ngei deuh a, ka en duh lawk lo. Thingpui ka siam zawh hnua ka va en chuan... 

"Engtin nge ni dawn?" 

"Vawiin hi a birthday a nia"

"Ngaihsak ta che, ka wish a ngai a nia, present chu i pe tawh em?" 

"Message chhang har thei lutuk"

"Mawli, a birthday ah ka induhsan thei lo ang" a rawn ti bawrh bawrh a, a hahthlak ka ti...!!

"Nangpa hi mi virpilh chi i nih hi, hei vang hi a nia a duh hleihtheih loh che, cheng chung mai...." ka ti deuh zek a, zingkar mood fuh loh nen message te chu ka type sawk sawk a, puih ka lo tum te chu ka inchhir ṭan der tawh.

"Khatianga min ti dawn anih chuan ka lo kal mai ang, i rintlak loh em mai" a rawn ti a, a lo kal duh leh tak takin ka ring, a mawl thei si. Rang deuhin message chu ka chhang a, "Lo kal a ngai lo, a lo thawh veleh ka pe ang a, ka lo sawipui bawk ang, ka hrilh leh hun che lo nghak rawh" ka ti sawk sawk a, pawnah chhuakin teddy bear chu ka va la lut  a, dawhkanah an hmuh ngei turin ka dah bawk.

"Min fak nasa lutuk suh aw, a chintawk te kha i hre lo a nge, 'Ngaihzawn a nuam ngawt ang, a rinawm dawn em mai' i ti dawn nia" tiin min chah ve ngei a, nuih a ti za....

Rei vak loah Nu Hlimi a lo tho a, dawhkana Teddy bear a hmuh chuan a ban vat a, "I ta em ni?" a tih chuan "Vawiin hi u Lizzy birthday a nia" tiin ka chhang a, engmah dang ka sawi zui lo, ka pek ni turah a ngai a ni chek ang, "I va fel ve, i u chuan a duh ngawt ang" a ti a, hmaiphih turin tui dehna lam a pan mai bawk.

A pindana a luh leh hnuah chaw chhum ka siam a, rei vak loah unaunu a au thawm ka hria a, "Lo tho vat rawh, i nau in thil te te a pe dawn che ania" a ti lang lang a, tu pek nge tih hria sela chu a paih duh hial ka ring.

U Lizzy lo tho chu Teddy bear lam ka khawhmuh zauh a, a nui hmel ka hmuh chuan hrilh ka tum uk a; mahse, nu Hlimi a lo kal vangin ka ṭhulh leh rih. 

"A van duhawm em em, hetiang te min leisak nachang i hria a, ka lawm lutuk aw, a soft bawk si, a ṭha chi anih hi..." a ti siam siam a, an han pawm vel te chu Ben-uiha hmuh ah ka it deuh a, a thla ka laksak nghe nghe.

"I duhzawng a ni maw?" ka tih chuan "Duh tehreng mai, khawia mi nge i lei a, a to em?" a lo ti zat a, "A quality aṭang kha a man awm chu i hre mai ang" ka ti ringawt a, a bu ve nghat nghat tho.

"Chhunah va bazar dun ula, thil tui deuh deuh in va ei dawn nia" nu Hlimin a tih chuan kan lo 'yes' dun hluai a, unaunu chuan thawmhnaw leina a dil zui zat a, cheng sang nga lai a pe a, "Rintei pawh kawr i leisak ve dawn nia" a tih chuan ka hnial ve thung. "Vawiin chu birthday neitunu pual a lawm" ka ti ve tlat a, "Hmannia ka kawr leithar kha ka pe ang che, vawi khat chiah ka la ha" unaunuin a ti erawh ka hnial lem lo.

A pindan lamah kan inzui chho a, ka thil pek ni a a ngaih chu a duh hmel bawk si a, ka lakah pawh a inphal zau phahin ka hria, chutiang anih laia ka leisak a nih loh thu hrilh leh chu a huphurh awm lek lek. A pindan kan thlen chuan closet a hawng a, a kawr leithar ngei mai kha lo la chhuakin min pe a, a kut lehlamin teddy bear chu a la kuah hlu hlu reng.

"Enteh, thil ka hrilh che anga, thinrim suh aw, hei chu min la pe rih suh" tih pahin kawr chu ka pe let a, mak tih hmel deuha min en laichuan "Ka leisak che a ni lo" ka ti tawl a, a meng buai nak tawh.

"Eng tin maw i tih?" a nui deuh a, "Kha kha.." tih paha a thil pawm ka kawh chuan "I lei a ni lo em ni?" a ti leh a.

"Ni nang, engloa leisak che anih kha" ka tih leh thawr a, a hrethiam lo aniang "Eng nge a awmzia?" tiin min la nuih var var a.

"Benja anih kha Benja"

"E he! Engtikah?" a ti hluai a, a pawr ta lutuk chuan awm a ti nuam lo rum rum.

"Nizanah pawna ka awm laiin a lo kal a,  'Naktuk a birthday a nia, min lo pek sak rawh' a tia, a haw lehnghal daih"

"Engtik laikhan?"

"Kan mut hma deuh khan, a lo hrilh lo che em ni?" 

"Engmah a sawi lo" teddy bear chu a thlek vang vang a, pawm tawh loin a nghawngah a ṭham a, a duh leh vak tawh lo aniang.

"A inthlahrung ve tawh anih ka ring; mahse, hei i birthday present te a la rawn pe hram che ania, a fel ve..." ka ti dek dek chu "A hneawm eeee.." a tih vangin ka ngawi leh rih.

"Tinge maw a beidawn theih miah loh le, ka hne ngawih ngawih..." a ti vang vang a, sawipui tum chu huphurhawm duh tak a ni.

"A hneawm nain a lawm awm ka ti, a rilru a ṭha tih a lang reng mai, a ngaihzawng lakah a rinawm ngawtin ka ring" ka sawi laichuan a message kha ka hrechhuak a, nui lo turin ka insum hle.

"A lawm awm pawh ka ti ve vak lo e a" ti pahin khum chungah teddy bear chu a theh phei a, a kawr ken lai chu dah luh a tum uk a, min pe hman tih a hrechhuak a niang "Awi a...kha i kawr" tih leh ka lama rawn lek a rual a, a va buaithlak, ka tan pawh lak a nuam tawh bik lo.

"Min pe tak tak suh, i inhmeh em kha" ka han ti ve ngial a, "La mai mai rawh, ka ha tawk vak lo" a ti a, a tum zui bar mai.

Nuam ti lo deuh chungin kawr chu ka la a, a khum lam a pan chu ka en zui vang vang a, teddy bear bawk chu ban lehin a melh rawm rawm a, a hmu Ben-uiha vek tawh aniang chu a ner a ner reuh a, ka hming khan lo pe ila a ṭha zawk ang em tih te ka ngaihtuah; mahse, a tir khan a duh hmel em a, sawipui tum sa ka ni vei nen a remchang dawn riauin ka hria a, chu loah a pe tu pawh a zahawm ve a lawm.

"Enteh, U Lizzy... hepa hi mi rilru nghet tak niin ka hria, hetiang mi hi kawppui ah an ṭha ania, a nghet tlut zel, a bialnu nih a nuam ngawt ang, ngaih ngam deuhin a awm theih dawn a, a duh tawh chu a duh bur mai bawk si a, a hahdamthlak duh ngawt ang" tiin a bulah ka va ṭhu a, Teddy bear chu kan thlek dun vang vang a.

"Bialnu te piancham pawh hre thlap thlap mipa hi an tam lo ania, mi care a thiam dawn lutuk, ngaihzawn nuam chi.."  min lo melh vut a, "Nawm hmel i tih te chuan ngaizawng la" a tih chuan ka lo ip chawih!

"Eng a...?"

"I fak em mai, nangman ngaizawng rawh"

"Awi a..ka duh lo e a" ka ṭawngsual tih ka hre leh hnuhnawh, min ti hamhaih ve em a ni.

"Nang pawn i duh tawp loh kha" a ti ta reng a, a va zia lo e...

"Keite chuan bialpa ka neih vang a lawm, ni lo sela chu ka duhzawng tak a nia, mipa rinawm leh hmangaihna la na ho hi an ṭha, ngaihzawng nghet nei chi, mi duat pawh a thiam tih a lang reng" ka ti nghat nghat a, ka sawi mam ve khawp chuan ka hria.

"Ka type a ni ve lo" a ti leh hmak a, sawipui dan a vang a ni.

"Eng ang nge i type ni a?" ka ti ta daih a, a duhzawng sawi sela, a sawi angin Ben-uiha chu awmtir mai ila a ṭha ang.

"Pa deuh ka duh, Lalbena chu a ṭahbelh em mai a, min hmangaih thu a sawi apiangin a mittui a parawl nghal ringawt zel, a thinchhe hlur ringawt a, a nep ru tlat" a ti hmak hmak a, a nihna sa hlir a sawi vangin han hrilh chhawn leh tlak engmah ka hre lo.

"Pa deuh, induh tawk deuh i duh a ni maw?"  ka tih chuan "Min zar chung lo se, ngaihawm tawk tein awm ve sela, hetiang te chuan ṭhiante bulah pawh kan free ve thei hleinem, kan lenchhuah ve pawhin min uap run zel a, midang zinga awm ve chak pawhin min zui zel a tum a, ka ning" a ti bawrh bawrh a, a duh loh zawng a sawi chu mak ka ti deuh a, a mihringa a duh lo hul hual te anih loh chuan bialpa te awmdan tura duhthusam nizawkin ka hria, kan kianga awm reng peih te chu a ṭha zawk hle turah ka ngai.

"A duh hle che tihna a ni mai a lawm, a hmelchhe bawk si lo, han nihpui chiah la chu i thu a awih dawn bawk sia, tuna a zia ṭha lo i tih te hi chu i siam ṭha vek thei ang" a tih leh chuan a ngawi ran a, ka sawi dik a ti ve tho aniang "Ni ve tho" a ti zawi sep a, "Mahse.." a tih leh hluai vang chuan phawk fein ka melh a...

"Ka nu hian a duh lo em a lawm, a rem tawh lo a ni tawp mai" a ti a, chu lam chu keipawn tih ngaihna vak ka hre lo, Lalbena lah a mark a chhe nasa mai si a, U Lizzy rilru hmin thei pawh ni ila nu Hlimi hi a buaithlak dawn, ka sawi pui ngam dawn lo nasa mai si.

"A zia lo e.." ka tih chuan "A buaithlak vek tawh, mawl lui tlat zel lo sela chuan ka nu hian a haw miah lo ang, ka nu phal lo chung rawn luh luih te a tum a, zah nachang a hre bawk si lo, ka nu hriat laiin min hmangaih thu te a sawi a nia, keimah zawk hi ka zak" a lu a thing nawk nawk a, sawipui tawh lo ila ṭhain ka hria, keipawh ni ila ka zak ve ngawt ang.

Nu Hlimin min lo koh vangin ka chhuahsan a, choka a ka va phei chuan "Inentir ka ngai a, tlaiah kalna tur ka nei bawk a, haw har suh u aw, i u kha hmundangah len te a tum a nge, a kalna apiangah zui ve zel la, amahin tla hrang suh se" tih angreng a lo sawi mawlh mawlh a, "Zanah inleng ka nei dawn a, eirawng bawl hma a ngai a lawm, kan haw har lo ang" ka ti ve mai a, Awmpuia bak inleng ka nei ngai lo a, a hre ve tho aniang "A ṭhat chu" a ti a, engmah min zawt zui lo.

Benjamina chu message ka thawn a, "I present chu a duhzawng tak a ni e, hmasawnna a la awm vak lo, ngawi reng khan lo nghak tawp rawh" ka va ti a.

"Ka wish dawn em?" a rawn tih chuan "Zanah, a hun chu ka lo hrilh leh mai ang che" tiin ka chhang a, "Aw le, Boss" a ti chu ka chhang tawh lem lo.

Tukṭhuan eikhamah chhuak turin kan insiam a, U Lizzy'n a nu kalna tur a zawh chuan hmeichhe doctor a hmuh tur thu a hrilh a, a thi a hul ṭan a, insawiselna neuh neuh a nei ṭhin a, tunlai chu doctor a hmu zing khawp mai. Taxi lain kan chhuak rual a, bazarah kan inṭhen a, U Lizzy nen a ṭhiante dawr lam kan pan zui a, a duhzawng kan enkual hnuah dawr changkang deuhah min chawlh pui a, "I duh duh chah rawh" a ti tak nain amah ka thlan tir a, kei aiin a chah huai dawn tih ka hre ve tlat a ni. Rin ang ngeiin man to deuh deuh a chah a, Arbawp te chu Awmpuia ei ve ah ka it khawp a, pawisa ka neih hunah ka la chawlhpui ve ang ka ti rilru a, hetiang thil tuihnai hi a la ei dawn bik lo tih ka hria, awm ve sela ka ti takzet.

"Rinte, Muani te inah kawi lawk ang aw" a tih chuan "I nuin haw hma turin min chah a nia, zanah Awmpuia a lo kal dawn bawk a, haw hma ka ngai" ka ti ve vat a, "Kan rei lo ang, present min pe dawn a, lam pah a kal zuai a ni mai, e chuan...an ṭhenawmah star tawk ka nei a, a awm chuan ka hmuhtir nghal ang che" a ti a, a phur hmel surh surh hle. Lo hnial ve mahila kal tho a tum dawn tih ka chiang a, "Rei miah suh" ka tih leh hnuah ka remti ve ta tho a.

Thil kan eizawh hnu chuan a ṭhiannu te in lam chu kan pan a, taxi a kan chuan laichuan ka message tone a lo ri leh ṭhin a, a ngai tein Benjamina bawk a ni. Message chhiar ka tum chu unaunu chuan a lo thlek ve duk duk a, kei lah chuan ka lo thukru deuh ṭut a, min endan chu min ei loh hmel khawp mai.

"Awmpuia em ni?" a tih chuan ka bu zauh a, a rawn bih zui ta bik lo.

"Birthday chu lawm a tum lo em ni a, ka hriat in hlau te a ni lo maw?"

"Vawiinah eng nge a tih a, under cover laktlak loh ve tak chu i ni, report pek nachang pawh i hre lo"

"I hlawh cut i duh zawk a mi?" 

"A chhuak em, inah chuan a awm miah lo ang, a hman tum dan pawh ka hre vek" tih te a ni nawk a, a lo ngaihtuah buai ve nasa....

"Kan chhuak duna, tunah chuan a ṭhiannu te inah kan kal dawn mek" tiin ṭha deuh chuan ka va hrilh a, ka message a chang sa reng aniang rang tawkin a rawn reply a, "Tu a ṭhiannu nge?" tih tlawng a ni.

"Muani.."

"Chaw an eikhawm dawn em ni?"

"Present kan la ringawt dawn?"

"A va ho ve, zanah lo chhuah pui la, a birthday chu ka lo lawmsak ang, cake te a duh em lo zawt la, eng cake nge a duh lo hre nghal bawk rawh" a rawn ti zui duah a, mi lah chu a tir zet zet reuh a.

"Haw hunah chanchin ka lo hrilh ang che, ka buai rih" ka tih hnuah phone chu ka dah a, Unaunu chu birthday lawm a tum em tih ka zawt bawk.

"Lawm chu ka chak lutuk, Muanin an ina lawm a rawt a, ka chhuah theih pawh ka ring lo, kan ina ka tih chuan ka nu a awm ve dawn sia, a nuam dawn lo em a" tiin min chhang a. Benjaminan a bia em tih ka zawh leh chuan a phone a en hmasa te te a, "Vawiin chu a reh ve tlat mai, mak reuh ve" a ti a, a chhan chu ka hre rin ran mai a, a lo la insum ve thei zel e.

A ṭhiannu te in kan thleng chu an phul hlut a, u Lizzy ṭhiannu chuan bag mawi deuh hi a lo pe a, an titi bawrh bawrh a, mi an hrechang ve vak lo. Sofa ah ṭhuin phone bawk chu ka phawrh leh a, Benja chuan "Zanah lo hruai chhuah dan ngaihtuah rawh" a rawn ti leh thawr a, a tihngaihna hria pawh nila ka hman lo hrim hrim, inleng ka nei ve dawn tlat.

"Induh rawh ka tih che kha, hmuh phet tum suh" ka va ti tawl a, a rawn chhang sei khawp mai.

"Induh hi ka zia a ni ve lo, engmah awmzia a awm pawh ka hre lo, hun kan khawh ral mai mai, ka biak loh chhungin midang pawh a lo nei hman thei, ka duh tawh lo emaw a tih te a hlauhawm zawk. Pawisa pawh ka ngaihtuah fel vek tawh ania, chhuanlam siam la, lo hruai chhuak tawp mai rawh, i lo hruai chhuah theih phawt chuan thil ṭha deuh ka pe ang che, tlai deuhah pawh ni se in theih hun lo sawi tawp la, ka lo lam ang che u" a rawn ti duah a, a turin min tur a ni mah tawh.

U Lizzy lah chuan a star pa chungchang a lo sawilai tak a ni lehnghal a, a ṭhiannu chu "Phone teh, ko chho ve rawh" a ti sek sek a,  kei chu ka lo beidawng titih...

"Zanah chuan lo kal la, i birthday lawmna ah kan sawm ve mai dawn a lawm" a ṭhiannuin a tih chuan "Tunlai chu ka nu a strict lutuka, ka chhuak thei tawh lo" Unaunu chuan a ti ve tlat a.

"Anih chuan kar lehah ka birthday kan lawm mai dawn nia, i nu lo dil sa la, chaw ei turin i lo kal ang a" a ṭhiannu chuan a ti leh a, "Rintei saw sawm ve rawh, a tel loin khawiah mah ka chhuak thei lo" Unanuin a tih chuan min lo melh vat a, ka lo nuih ringawt.

"Lo kal pui rawh aw" nui chung hian a lo ti a, "Kan tum dawn nia" ka ti ṭha ve mai a, an phur hmel khawp mai. "Kan lo kal theih chuan Naua chu sawm ve rawh a; ka biak hmain ka star tih lo hrilh sa vek rawh, bo deuha inhmelhriat tir chawp kha ka duh lo ania" U Lizzy'n a tih chuan ka lo zak ru deuh.

"A nau khu star zawk la ni tur, a hmelṭha daih zawk sia" a ṭhiannuin a tih chuan an nui dun hak hak a.  Tu chungchang nge an sawi ka hre lo, "Dodo hi chu a fel over, a polite khat tlat, biak te hi a nuam thei a nia" tiin a sawi zui a, U Lizzy chuan a duh vak lo aniang, "A naupan hmel em mai, a u khu a pa daih zawk" a lo tih san a.

"Nang hi chuan street boy deuh deuh hi i duh zel a, Benjamina te ang deuh hlir" a tih chuan ka lo ṭhu ngil hluai a, "A lo la be ṭhin che em?" a ṭhiannu bawk chuan a ti leh a, chanchin an inhrilh ve mawlh mawlh, "A sim dawn aniang, sim se ka ti ngawt mai, ka hne hman ania aw" unaunuin a tih chuan ka ṭhianpa angah ka lo ngai hman aniang, ka lawm lo ve lek lek.

Chutih laichuan "Khu..." tih leh din an rual a, an tum ang a ni leh chiah lo aniang "Amah a ni leh lo" ti riin a zui zat a. Mahse, a ṭhiannu zawk chuan tu emaw hi a au a, "Nau-an eng nge a tih a, inah a awm em?" a ti lang lang a.

"Awm ve laitak..." mipa aw in a lo tih chuan "Eng nge a tih?" tiin a zawt leh a, "A awngphah a su mek, nizanah zun a cheh aniang" mipa awin a rawn tih chuan an nui dun hawk hawk a, rei vak loah "Hei...Naua..." a tih leh takah chuan ka tho ta vat a, tukverha ka va dak tur chu U Lizzy'n min lo kawhhmuh thuai a, "Khu pa khu ania, a chhe lo i ti em?" a lo ti sawk sawk a, step-a a chhuk tur a hnunglam chiah ka hmu a, pa tereuhte a ni, Ben-uiha awm thleng vel lek anih ka ring.

Step bula a ding chu U Lizzy ṭhiannu chuan a au leh a, a lo hawi ve zawk a, a hmel chu a chhe hran lo, mahse, Bena ka la duhpui zawk tho tho. Chutih laichuan an inchhunglam aṭangin hmeichhe pakhat hi a lo chhuak a, "Kal vat ta che, tui a liam char char tawh ania, muang chang leh lutuk" a lo ti hlak hlak a, tlangval lo hawi chhoh leh ruala Unaunu lo lai vel chu ka ei lo, ka ngei ru deuh tlat tawh.

Ka message tone a lo ri a, "In haw dawn tawh em?" Benjaminan a lo ti a, "Tunah hian maw, ral aṭangin U Lizzy'n tlangval a chhai mek" ka va ti ngawt pek a, fuh lo tak a ni, minute thum chhungin Message 20 dawn a lo thawn a, chhan pawh ka chhang seng lo.

"Tunge?"

"Ngaihzawng a nei em ni?"

"Zanah ka lo kal dawn, lo hrilh rawh" 

"Ngaihzawng dang nei theiah a lo inngai a ni maw?" tih angreng zawhna hlir a ni, ka bulah a rawn inhrithla ni maiin ka hria.

Dar 3 velah kan haw phei a, unaunu chu phone hmangin a pindanah a tawm chawt a, kei eirawngbawlin ka buai hle thung. Nu Hlimi lo haw lah chu a nuamsam lo aniang "Chaw min lo eisan rawh u" tiin a mu nghal daih a, chutih laiin Benjamina chuan lo len a tum thu ngawt a la rawn sawi a, khap pawn awmzia a awm lo, a phili zo vek tawh.

Thim hma deuhin Awmpuian min lo Phone a, a haw ve chiah a ni awm e. "Chaw eikhamah ka lo kal ang" a tih vang chuan chawei ka siam sawk sawk a, unaunu nen chauh chuan kan kil dun a, Awmpuia te ina chaw ka ei tur thu ka hrilh bawk. 

"I ning ve ṭhin lo maw?" tiin min zawt phawng a, a awihawm loh lutuka nuih pawh a za lo. "Englai mahin ka ning ngai lo, nitin kan inhmu chung pawhin ka ngai hman zel" uar fahranin ka ti a, chu chu ka nihna dik tak a ni, Awmpuia hi chu engtikah mah ka nin theih pawh ka ring lo.

Dar 7 pelh hretah Awmpuia chu a lo thleng a, ṭum dang ang bawkin a hmel hmuh a nuam a, kan han ṭhu dun te chu ka lo melh leh veng veng ṭhin. "Min lo ngai em?" ka lamah thle hnaia a rawn tih chuan ka lo bu sawk sawk a, Unaunu mitmei ven ngai lo sela chuan ka ṭhut hnaih ngam deuh ang.

"I nu chu khawiah nge?" a tih chuan a mut thu ka hrilh a, va kaih thawh mai tur nge mawni. Mahse, Awmpuia chuan "Haw dawnah a ni mai, ka hmanhmawh chuang lo" a tih vangin thingpui ka lum hmasa a, TV en pahin kan in ho a, kan titi mawlh mawlh laichuan "Kar thar aṭangin Scooty zirtir tur ka nei a" a rawn ti chhuak hlawl a. 

"Tu nge?" ka tih chuan "Inchung te nau" a ti mai a, "Hlawh neiin maw?" ka ti leh kher.

"Aw, hlawh neih a ngai lo ka tia; mahse, in neitunu kha a inthlahrung deuh aniang" a ti leh a.

"Tlaiah i hman lo a ni lawm ni?" a hma khan motor silna ah ka kal dawn a ti khan ka hria a, hun a nei dawn em mawni.

"Zingkarah a ni mai, inrinni pawh ka hman ang" a tih chuan ka bu ve nghat a, pawisa thawh chhuahna lam hi chu ka thlawp em em vek.

"Chance ka pe ang che u" tiin U Lizzy'n min thawhsan a, kan pahnih chauh a kan ṭhut takah chuan sawi tur a vang a, a lai ve deuh nge ni a ngawi rauh rauh reng. A lama ka va tawlh hnai chu rang deuh hian min lo kuah a, a bulah chuan thla a muangin ngaih a ṭha hliah hliah ṭhin.

"Vawiin chu i chau em?"

"Chau hran lo e, nang eng nge i lo tih?"

"Unaunu nen inzui chhuak a" ka tih laimekin ka phone a lo ri a, Benjamina leh bawk a ni. Chhang duh loin ka off a, kan inkuah ṭha leh chiah tihah a lo ri nawn leh a, a ti leh tluk tluk dawnin ka hria.

"Tu nge a?" Awmpuian a tih chuan "Benja kha" ka ti mawl tawp a, phone chu hmet tawpa kuah lehmai ka tum chu hamhaih deuh hian min lo en a, "Tu Benja?" a ti chang fak a, ka ṭawng sualin ka hria.

"U Lizzy ex kha"

"Enga tinge a lo call che a?"

"U Lizzy a be thei lo aniang" ka ti ringawt a, a meng nur nasa mai.

"U Lizzy birthday ania, lo chhuahpui dan ngaihtuah teh a tia, mahse....unaunu hian hmuh a duh tlat lo a" tiin ka han hrilhfiah a, a hma pawh khan ka hrilh ve nual tawh a, a hrethiam ve mai ang chu ka tih laiin "Engtin nge i phone number a neih?" a ti leh khauh a, a lawm loh hmel hle bawk.

"Hman zanah kawtah kan inhmu a, U Lizzy'n a call a chhang duh lo aniang, chanchin vel min zawh a duh a, ka lo pe ve tawp anih kha, hetah a lo kal ṭha ngam tawh lo a..." ka ti leh a, keipawh chu thil tisual insawithiam tum hi ka ang tawh.

"A va ṭul lo ve le..." tiin min melh vang vang a, keipawn ṭul lo ka ti ve takzet, ka lo pe te kha ka inchhir ve riau tawh a, Awmpuian min ngaih dik loh phah te pawh ka hlau.

"I chhungten an duh loh em chu, lo be ṭha bik mahta che" awki pangngai zawka a tih takah chuan ka ngawi reng a, a lamah tawlh hnaiin ka va kuah sawk sawk a, ani pawn ṭha deuhin min lo kuah let a; mahse...ka phone bawk chu a lo ri leh...!!

"Ka van ning..."

"Chhang mai rawh" a lo tih vang chuan ka la va ta hram a, "Hello.." ka ti chiah tih ah "I va la thei lo em em ve, kawtah kan awm tawh a nia" a rawn ti ta mai, engmah kan chhuah tur thu pawh ka sawi lo !?

"Kan lo chhuak thei lo, haw leh rawh u" ka ti chang bawl a, "A duh lo em ni a?" a rawn ti vin leh chiam a, teh vak vak ṭhin a.

"Hrilh pawh ka hrilh lo, beisei duh tawh lo mai rawh" ka ti tawl a, Awmpuia a awm ve vanga sawi chhuak a ni ber, ka inthlahrun vang a ni pakhat bawk.

"Naui leh...ka pui ang che i ti a ni lawm ni...?" 

"Tih ngaihna a awm lo a nih hiiii..." keipawh chu ka awki a sang ta viau a, Awmpuian min lo thlek ka hmuh chuan ka insum leh vat thung. "A mu tawh, zanin chu a chhuak thei lo, zan dangah sawn mai rawh.." ka han ti ṭha leh a, ka ṭawng zawi ta deuh.

"A va mak e aw, anih chuan lo chhuah tir lawk teh, kan lo kal laklawh tawh" pakhat chuan a la ti tlat a, "A theih loh, haw mai rawh u" ka tih pawh chuan "Ka lo nghak ang" a ti leh zel a, a tih ngaihna tak pawh ka hre tawh lo.

Ka ṭawng leh hmain Phone chu a dah daih a, rang deuhin kei ka tho chhuak a, kawngka hawnga ka dah chhuah chuan Gate a lo lut tur chu ka va hmu a, min lo hmu ve nghal thuai bawk. Zaizir hian eng emaw hi a rawn sawi a, gate lam a kawk leh zauh ṭhin a, eng nge a sawi ka hre thei lo, rang deuhin kawngkhar chu ka khar a, a khar fel chiah tih ah ka phone chu ka lo ri leh a.

"Eng ngeeee?"

"A muhil tawh tak tak em, kai tho lawk mai la" ngenna awka ka hria a; mahse, helai hmunah ber kher chuan a tih chi loh ang, nu Hlimin a man leh chuan a pawi thui dawn.

"Zan dangah a ni mai a lawm..." ka tih laiin "Nangmah tal kha lo chhuak lawk teh" a rawn ti leh a, a va buaithlak thei.

"Ka hman bik lo, inleng ka nei" ka sawi zawh rualin "A rei lo ang, eitur ka lo keng ṭeuh a, lo la lawk rawh, i ta tur pawh a awm?" a ti leh zel a.

Kawngka ka hawn leh laichuan Gate ah a chhuak a, rei loteah thil engemaw khai chung hian a lo lut leh a, mahse...thui a rawn kal lo. "Tah khan dah la, kal mai rawh" ka ti chu  a duh lo nasa mai a, "In lo chhuah hma chu ka kal lo ang" a ti ram hmuk a, em em ṭhin a.

"I buaithlak em mai, min tibuai tel ve zel lo teh...i duh leh" sawi pawh ka sawi zo hman lo ka bulah Awmpuia a lo ding a, a hmel ka hmuh rual chuan ka ṭawng tawp chawt a, phone a rawn ban chu ka lo pe rang hle bawk.

"Hello...." lehlam a ngaichang nge ni a ṭawng ring lo, chutih laiin "A bialpa chu i ni maw....?" lehlama mi chuan a lo ti a, pawn lama a ṭawng thawm chu ka hre pha.

"Ni e.." Awmpuian a tih chuan "Lo inrawlh buai ve duh suh" tiin phone chu a dah hmak a, keini pahnih chu hamhaih deuhin kan inmelh a, ka bialpa lawm lo hmel chu ka hai lo, insawifiah turin min duh tih pawh ka hria.

"Nangmah a sawina che a ni lo, U Lizzy zawk anih kha, vawiinah U Lizzyn star a neih thu ka lo hrilh a, chupa chu i ni emaw a ti aniang" ka lo ti zung zung a, nur fe a min la melh vang chuan ka hlauthawng ru hle tawh.

"I be ngun viau a ni maw?" a aw chu a vin lo nain a bung ṭha hmek hmawk hle.

"Teuh nang...." ka ti hluai a, a awih loh hmel hle thung.

"I ngaih ang kha engmah a awm lo ania, min lo biak chhan chu U Lizzy vang chauh a nia, a chanchin min lo zawt ṭhin ringawt a lawm" ti a ka insawifiahna pawh chu a pawm hmel loh.  "I u chuan a duh lo a ni lawm ni" a ti chang fak a, ka chhang ṭha ngam tawh mang lo.

"I u in a duh lo tih hrerengin i be ṭha a maw, nge i lo tihpui zawk" a ti khar khar a, min en dan chu hrehawm ka ti ngawih ngawih, hetianga thinrim hian min be ngai lo a, a lungawi lo hmel ringawt pawh chu hmuh a hrehawm.

"Min pui rawh a ti tlat a, a khawngaih thlak ve lutuka..." ka ti dek dek chu "Engvanga khawngaih nge i nih?" a lo ti ram leh hmuk a, chhan vak ngaihna pawh ka hre lo.

"Tinge...min hauh daih a.." ka ti tham ṭiak a, ka ṭah a chhuak nghal hlur.

"Zep miah loin han sawi teh, thil thup i nei em?" min rinhlelh hmel takah a tih chuan lu ka thing sawk sawk a, "Engmah ka zep lo, thudik vek a lawm ka hrilh che" min chhang loin kawngkhar a hawng a, pawna ding chu a va hmuh chuan a khar leh vat a, chutah ka lam lo hawiin beidawn hmel zet hian min melh a, "Hetiang turah hian ka ngai lo che asin maw le, i tih loh tawp tur i ti anih hi" tih zawng a sawi a, ka phone chu ka kutah rawn hmeh belin a ṭhutna lam a pan a, ka zui ve thuai bawk. A ṭhu leh mai dawn emaw ka tih laiin a helmet a la a, kal a tum ta mai!?

"I haw dawn e law...thinrim nghal ringawt lo  teh...." a banah ka vuan chawt a, "Zan dangah ka lo leng ang" a tih pawh chuan ka la chelh bet tlat a, "Tih palh, ka be ṭha tawh lo ang" a tih laimekin phone bawk chu a lo ri leh a, chhan tumna ka nei tawh lo. 

"Ka va bia a nge" a tih chuan "Engtin nge i tih dawn?" ka ti nghal hlut a, "Ka hre lo" tih leh kawngka lam pan a rual a, ka zui rang hle bawk. Pawna kan chhuah laichuan gate bulah a lo la ding a, min hmuh rualin min lo pan ve vat a, Awmpuia chu kal hmasa zawkah ṭangin a pen phei hlawk hlawk a, boruak a dik dawn loin ka hria.

"In hauhpui miah suh aw, kan buai ve na tur a awm lo ania" a ti phei mawlh mawlh a, engtin mah min chhang lo.

Mahse, a bul kan thlen hma deuh chuan "Hi..." Benja chuan a lo ti lauh a, Awmpuia zawk chu a biain ka hria. Kan indinchilh rualin min lo thlek a, ka hma a Awmpuia ding chu en kanin sir lamah ban a rawn vai zauh a, "Phone chhang ta che" a tih chuan ka hma a ding chuan thawk a la hawk a, Ben-uiha chuan ka mitmei pawh a hrethiam lo, thil awmzia a man lo hrim hrim a ang zawk.

 Chutah ding ngil lehin Awmpuia chu a melh ve ta chauh a, "Nangmah elaw?" a han ti ngawt pek a, Awmpuia chuan a chhang lo chiang hle.

"Spy nu....kha in thil hi la ta che, i cup cake tur pawh a ka lo keng tel ania" tiin min rawn thlek leh a, Awmpuia hnungah ka la ding lui tlat a, a thil khai pawh chu ka ban ngam lo.

"Eng nge maw i hriat reuh le" ti a lo kal hnaih a tum chu Awmpuian a lo nam let dawt a, "Rintei hi lo tibuai tawh suh" a ti nghal khawl a, Benja pawh chu a hamhaih ve deuhin ka hria.

"Ka ti buai em ni.....!!" a nui hak a, "Enteh ṭhiana, i hriatsual aniang" tiin dar a kan ak a, cho hmel zetin Awmpuia chu a melh bawk.

"Kal ang..." tih paha Awmpuia ka han nam chu a lo la kal duh awzawng lo, "Tuna aṭang chuan a puih che ka remti tawh lo, chuvangin lo be tawh lo ang che" a ti chang leh bawl a, ka lo inthlahrung ru deuh; mahse, ka bialpa a ni miau a, lo khak emaw sawisel neih ka tum chuang lo, Benjamina hmuh lai phei chuan thil tih chi a ni lo ang.

"Hlawh ka pe tih a hrilh lo che em ni, khai a.....ka ngaizawng emaw i lo ti e law....in va han buaithlak e aw..." Benjamina vin lutuk chu ka melh rum hlur a, ka lam lo hawiin a ner nawng a, "Kha, i u chu lo pe rawh" tih leh a thil khai chu min pek a rual a, hnar hman pawh a ni lo. A inher uk tawh tih ah a rawn lehhawi leh a, "I bialnu anih kha, nei vek rawh" a rawn ti leh kher a, kal pah chuan a phun phei bul bul a, a lungawi lo ve ngang aniang.

Gate-a a chhuah hnu chuan ka lo thaw huai huai a, zep loah chuan an insual mai ang tih ka lo hlau hman a, chutiang kan tawng lo chu ka lawm hle bawk. Mahse le, ka bula ding chuan zawhna a la ngah hle aniang "Sawifiah rawh, eng nge a awmzia?" a ti leh ta mai a, englai nge a hriatthiam loh le, Benjamina khan a ti chiang tawh viauin ka hre sia!?

"Eng maw ka sawifiah ang" bangbo fea ka tih chuan "Hlawh a pe che em ni?" a ti leh nghat a, ni dawn tak....

"Pe nang....ih....amah kha chuan pawisa ka pe ang che min tia, ka dil lo.....engmah min la pe lo..." ka ti bah nawk a, pawisa chungchang kha chu ka sawi dun tak na a, ka puih chhan ber erawh a ni lo, khawngaih vang liau liaua pui ka ni.

"Hlawh ka pe ang che a ti a, nangin i lo aw mai a maw?" 

"Chuvang a ni lo, pawisa vang te chuan ka pui teuh lo mai"

"Anih eng vang nge...?!"

"Ka khawngaih vang zawkin a lawm.." ka ṭawng sual leh ta "Eng vanga khawngaih nge i nih, i nu leh i u pawn an haw viau a ni lawm ni" a ti fiah fak a, ka tisual let der mai, Awmpuia thlirna aṭang pawhin thil tih awm loh tak, ka tih a mawi lo thil a ni.

"Ka hre tawh bik lo, lo pui lo tawp ila ṭha tur" ka ti ta ngawt a, a bak insawifiah dan tur ka hre lo.

"Pawisa i mamawh em ni?" rang lutukin lu ka thing a, "Min hrilh hreh suh" a tih pawh chuan "Chutiang a ni lo" tiin ka la ṭang tlat a, pawisa vanga pui ka ni lo takzet.

"Anih chuan vawikhatmah be tawh lo ang che aw, khatiang mi kha nel chi an ni lo, i rilru a nem tih a hria a, hman ṭangkai che a tum anih kha, i chhungten hria se an lawm hauh lo ang, nidangah chuan ti tawh miah suh, i chhungte kalh zawnga i awm chuan i tan a pawi zawk ang, thu awih rawh aw" a ti nghat nghat a, beisei loh deuhin a awka chu a dam a, lungawi tak hmel chu a pu chuang lo.

Ka samah lo chulin tawi te hian min nuih a, a, chumi hnuah min kalsan a, kan thil tum lawk pawh engmah kan ti ta lo. Inchhunga ka luh leh hnu chuan Benja thil lo ken chu ka phelh a, cup cake leh doughnut tih ang reng a ni, ei pawh ka chak lo, Awmpuia ngawt chu ka ngaihtuah a, ka awm a nuam thei lo, a kal dawna a hmel kha ka mitthla ah a cham a, a lungawi leh lungawi loh ka hre thei tlat lo a ni.

Rei dawn hnuah a message ka dawng a, in a thlen tawh thu chiah a rawn sawi a, an ina chawei chungchang kha engmah a rawn sawi lo a, kan ṭhulh tihna em mawni!?

"Muttui aw, zingah kan inbe dawn nia?" tih hi ka va thawn a, rei lo teah lo chhangin "Kha pa kha lo be ṭha tawh miah suh, pawisa i mamawh anih chuan min hrilh dawn nia" a rawn ti a.

"Pawisa vang a ni lo ka tih kha" ka va ti leh a.

"Pawisa vang anih chuan ka inthiam lo viau ang, tihsak theih che ka nei tam lo mai thei a; mahse, i tan chuan theihtawp chhuah ka inhuam a, i hrereng dawn nia" a rawn ti leh a, a message chuan min ti hnim ruih a, a rilru ka ti nain niin ka hria. Message thawn tawh loin ka call a, a lo chhang ve vat a.

"Bena kha pawisa vanga pui ka ni lo tak tak, i rilru ti hrehawm suh, harsatna ka nei anih phawt chuan nangmah ka hrilh hmasa ber ang che, chuan.....ka hmangaih lutuk che" a sawi ve kher pawh ka beisei loh laiin "Keipawn ka hmangaih che" a rawn ti let ve a, mit chhingin thawk ka la vang vang....

"Kum hi kal duai duai sela ti raw, kan retheih hun hi kalpel vat ila...." zawi ruih hian a rawn ti a. 

"Nia, kan duhthusam ang khan awm thei tawh ila.."  

"La rei dawn mah se lo nghak tawp rawh, i nghak chhuak ngei ngei ang" a ti ve ngat a, ka ringhlel lo, beiseina sang tak ka nei a, ka nghah chhuah ngei pawh ka ring. Chutih rualin hlauhthawnna pakhat erawh ka nei...

"Nupui dang nei daih ta la...." ka tih chuan "Teuh lo mai, ka duhthusam hi chu nangmah nen vek a ni, i tel lo chuan engtikah mah ka puitlin lo ang, i tel ve zel a ngai" thutak zet hian a ti a, a thil sawiin min tih lawm zia chu aw....

Rei deuh kan inbia a, inkhawm bana a lo kal leh tur thu sawiin kan inmangṭha zui a, phone ka dah hnuah pawh ngaihtuahna a luah zui renga, ka tel ve emaw tel ve lo emaw Awmpuia hi chu hlawhtling sela, dinhmun sang takah ding sela, ani a hlawhtling anih phawt chuan ka duhthusam te kha a puitling ta ah ka ngai thei ang, eng dinhmunah pawh ding ila ani a hlim loh chuan ka hlim thei bik lo anga, a lungngaihna pawh ka lungngaihna a ni ve bawk ang, kan inkara inzawmna awm hi chu danglam bik takin ka ngai a, inngaizawng satliah mai kan ni lo, keini pahnih hi chu Soulmate diktak kan ni.

(End of chapter - 5)