BLUE BAYOU (CH - 6) by Ahmangaihi violette khiangte

BLUE BAYOU by Ahmangaihi violette khiangte

Chapter - 6

Awmpuian inkhawm banah lo kal a Nu Hlimi chu min dilsak a tum a; mahse, a tepter dawn em a ka hriat vangin lo sawi hmasak a ṭhain ka hria. Tukṭhuan eilai chuan "Nizan chu chhang thlum kan dawng lo a ni maw?" tiin min fiam a, chu chu remchangah lain ka lo sawi chhuak a.

"Zanin tlaiah maw, in va ti chawpchilh ve?" a lo ti vat a.

"Nia, nizan khan lo dil che a tum a, i mu tawh si a, ka kai tho duh ta lo che anih kha" ka tih chuan "Eng nge inhmeh dawn a?"a lo ti leh a, "Ka hre lo, an inluah va hmuh pui ve hrim hrim ka duh a, ka lo haw har lo ang" ka ti zui zat a, tun lai chu Unaunu laka a strict lai a ni bawk si a, a phal loh ka hlau ru khawp mai.

Engtin tak min chhang ang maw ka tih laiin "I kal dawn nia; mahse, ti zen zen lo ula, mipa in a chaw ei fo chu a mawi lo deuh ang" a ti ta hlauh a, ka lawm zia chu aw...thaw a veng huai huai tawh.

U Lizzy lam ka va hawi chu a lo tum deuh bar a, "Keipawh karlehah chaw eina tur ka nei ve a nia" a lo ti zauh a, "Khawiah maw?" a nuin a tih chuan "Muani birthday lawmna ah" a ti zawi sep a, nu Hlimi chuan ṭul lo a tih hmel hle thung a, engmah phei chu a sawi zui lo.

Awmpuia ka va hrilh chuan min lo hruai tur thu a lo sawi a, lo kal har lo turin ka chah bawk. Chawhma lam chu ka inkhawm ve a, ban veleh ka inbual a, ka insiam nghal zung zung a, Awmpuia lo ngah pahin ka nu ka han bia ang ka ti a; mahse, phone a chhang thei miah lo a, ka pa zawk ka call ta ngawt.

A lo chhan rual rualin "Min va phone duh lo ve, i buai viau a mi?" ka han ti thawr a, ka pa aw chu a chhang ṭha khawp mai. "Kan awmna hi signal a chiang lo lutuka, i nu lah chu a biak tlang theih miah loh mai a, in inbia em?" a lo ti let var a.

"Keipawn ka be tlang thei lo, current an nei lo a ni maithei" tiin an follow up boruak te ka zawt zui a. "E...Pathian zarah kan rawngbawlna a kaltluang khawp mai, tun karah camp kan nei leh ang, mi 30 dawnin hming an ziak lut tawh a, a hmasa aichuan camper pawh an tam ka ring, zaikhawm pawh kan tam khawp mai" a lo ti dap dap a, an haw theih hun tur ka zawh chuan a sawi mai thei lo a, ka pa te rawngbawlna hi chu Pathian hnathawh danah a innghat a, a chin tur a sawi lawk theih ngai loh.

"Engtik nge ka nu i biak hnuhnun ber?" ti a ka zawh leh chuan "Camp kan neih dawn zan khan ka bia a, mi a chhang ṭha duh lo lutuka, rei tak pawh kan inbe lo, a dam ṭhat loh thu a sawi a, inentir turin ka ti anih kha, engmah lah chu a rawn sawi leh tawh lo a, a zia deuh tawh em maw ni " a ti bul bul a, tlem chuan mak ka ti ve deuh, tun hnai te hian ka nuin min phone khat riau a, a lo damṭha lo viau nge mawni.

"Lo biak ka tum dawn nia, a ngaihtuah awm loh ang, ṭha deuhin rawng in bawl dawn nia, ka lo ṭawngṭai pui reng ang che u" ka ti ve luam a, hetianga ka chhan hian a lawm thei khawp a, a chhan pawh ka nu hnen aṭanga a dawn ve ngai loh vang anih ka ring.

Ka pa nen kan inbiak zawh hnu lawkah Awmpuian message a lo thawn a, a lo chhuak dawn chiah anih hmel. Hmanhmawh deuhin sitting room lam ka pan a, sofa a Unaunu lo mu chu "Ka kawr hak hi ka inhmeh lo em?" tiin ka va zawt a, min melh thuak hnuah "Ṭhat kha" tih zawngin min chhang a, lungawi lohna a nei emaw tih mai tur a ni. A piah lawka ka va ṭhu pawh chu min be zui lo a, a tum bur reng bawk si a, ka tan pawh biak a nuam meuh lo. 

Minute 20 vel ka nghah hnuah Awmpuia chu a lo thleng a, inkhawm bang tih hriat tak hian a smart thlup a, a kamis pawl lah chu a han inhmeh em em khawp a, kan han inzui chhuak te a hnunglam aṭangin ka en dauh dauh reng, a ke pen dan ringawt pawh ka tan chuan hmuhnawm a tling a, a hnungah zuiin ka nui var var reng.

"Peka a leng chhuak dawn a, zanah chuan inchungte scooty kan hawh dawn nia" kan inphurh chhuah hnua a tih chuan "I inkhawm dawn em?" ka ti vat a.

"Zanin chu inkhawm lo mai ang, inkhawm i duh deuh em ni?" a ti a, lu ka thing nghal sawk sawk, side glass aṭang chuan min lo nuih sak a, a lamah ka tawlh hnai ve sauh a, khaw en lai anih vangin ka kuah ngam lo, a perfume rim a nam chek chek a, mipui tam tak zingah pawh he a rim hi chu ka hre nalh thei ang tih tur khawpin ka chiang tawh. 

"Thil i eipuar tawh em?" a tih chuan engmah ka la ei lo tih ka hre chhuak ve chiah.

"Ban hnuah ka insiam nghal a, engmah ka la ei lo, nang zawk?"

"Keipawh, eitur kan lei phei dawn nia" 

"Pani puri lei ila" a lo nui hawk a, "Sunday ah chuan lei tur a vang awm e" a ti a, ka eichak tehlul nen..

"Vaipa mix i duh em?" a tih leh chuan "Wai wai nen bawl ila, inah kan ei dawn nia, thingpui hang nen.." ka lo ti zung zung a; mahse, thui pawh kan tlan leh hmain pani puri zuar kan va hmu ta hlauh. Awmpuia a din rual chuan phur fahranin ka chhuk a, "Min lo nghak rawh" a tih vangin ka han ding leh rih a, chutih laia thil lei ve midang ho chuan min en duh riauin ka hria. 

"Pui....ka inhnawih paw lutuk em?" ka ti ru sar sar a, ngunthluk fe a min lo thlekin ka mit hnuai chu a rawn tuai zauh a, "Paw lo e, a tawk chiah" a ti ve ngei a, ka zawh ve apiang hian 'A tawk chiah' tih hlir hian min chhang a, engmah hi sawinawi pawh a nei ngai lo.

"Kal ang" tih leh a bana vawn ka rual a, eitur zawrhna lam kan pan phei chu mi mit kan la hle tih ka va hmu a, kei nge Awmpuia zawk an en erawh ka hre lo, hmeichhia an nih vangin Awmpuia zawk ni turah ka ngai.

Hetiang hunah hian ka ze ṭha lo deuh hi a chhuak ṭhin a, insum ka tum ve pawhin nuam tihna riau ka nei ṭhin, a chhan tak erawh thikthu chhiat vang a ni thung a, mi hmuh laia ka ta bik anih zia han tih lan te, han induat tir te hi nuam ka ti riau zel a, hmeichhe dang ten thik ru taka min en ka hmuh hian inrintawkna ka neih phah ṭhin.

"I hawn dawn nge hetah i ei ang?" a tih chuan "Hetah a ni mai, a zawp hman ang" ka ti vat a, engzat nge ka duh min zawt leh te te.

"50 man " ka ti chu a lo chek hlak a, "I ei zo thei ang maw, ka eipui dawn lo che ania" nui lek lek hian a ti a, ka ril a ṭam tawh bawk a, chu aia tam pawh chu ka ei theih ka ring.

"Ka ril a ṭam tawh em a lawm" ka ṭawng no lutuk leh pangchan dan chu ka inten zawk; mahse, ka samah a rawn chul a, "I ei ṭeuh dawn nia" tiin min nuih suk a, vaipa bulah chuan 50 man siam turin a hrilh a, hmeichhe lo awm ve ten a en duh em avang chuan a banah ka chelh ran a, a nuam ru ve takzet. Hetianga han len chhuah a, thil eidun hi nuam ka tih zawng a ni hrim hrim a, dawr changkangah eitur man to tak tak ei lo mahila ka bula awm hian a zir miau a, hmun nuam an sawi te hi chu han chhut chian hian tu emaw vang bak a ni lo tih hi ka ngaihdan a ni.

Pani puri ka ei chhung zawng chu min lo nghak a, ei tir ve ka tum chuan a hnial deuh a, mahse...a inrin loh laiin ka barh thut a, a rin aiin a lo tui aniang pali lai a ei ve a, rin aiin puar a awl zek mai. Thil eipah chuan ka ṭawng mawlh mawlh a, "Eng nge kan chawhmeh dawn, tu tu nge awm ve?" tih ang reng ka zawt a, ka ṭawng tui leh lutuka ka lo intihbuak lek lek ṭhin.

"Peka chiah a awm ang, a nau te an la rawn haw lo. Vawksa rep ka lei a, tukinah Pekan siam a tum a, chaw i lo ei dawn sia, kan lo la khek che" a tih chuan ka nuih var var a, "Ei zo la, kal vat teh ang" a tih chuan ka hmanhmawh phah chuang lo, hun thawl vek vawk neih a len chhuah dun te ania ka chak ni.

"Ka chak chu maw, zingkarah exer la dun ila, vanapa hall kawt vela thingpui in te ka chak" ka la ti siam siam a, "Scooty zirtir tur ka nei sia" a tih chuan "Inrinniah zirtir mai rawh" ka lo ti sam et a, ka sawichhuah takah chuan exer lak dun chu ka chak et et tawh, ngaihtuah ringawt pawhin a nuam dawn tih ka chiang.

"An mahni lam an remchan dan a ni mai, ka lo sawi chhin dawn nia" a tih phei chuan ka phur tawh khawp a, "Dar engzat velah nge kan chhuah ang" tiin ka zawt nghal chung a,  naktuk zing aṭanga ṭan mai ka duh a, exer lak hrim hrim chu ka chak pawh a ni lo, amah nena kan tih dun theih dawn vanga phur viau zawk ka ni.

Pawisa a pek hnuah an veng lam kan pan vang vang a, an inluah kan va thleng chu rin ai takin a lo zau a, bungrua erawh an nei vak lo, ṭhutthleng sei pahnih a awm a, fridge tereuhte leh dawhkan hlaipui nen. Hmeichhe awm lohna in tih chu a hriat deuh a; mahse, hnawk emaw bal a awm lo a, rin aitakin an che fel fai. Peksanga lah chu hmuh tur a awm miah lo a, "A chhuak lawk aniang" Awmpuian a tih takah chuan ka va pan hnai a, a ṭawng leh hmain a hmuiah ka fawp zauh a, "Nghal reuh lutuk" tih pahin min rawn fawp vang vang a, chumi hnuah pindan lam a pan zui a, a va inthlak dawn a niang.

A lo chhuah leh chuan a inthlak fel diam tawh, fridge aṭangin vawksa rep a lo la chhuak a, a che nghal mawlh mawlh a, tih tur min hrilh bawk si lo a, chetpui ngaihna pawh ka hre lo. "Pui...." ka va tih chuan a rawn leh hawi vut a, "Patling i ang lutuk" ka tih chuan a nui ve suk suk. Inchhung sekrek khawih ṭhang tih takah a che felfai thlup a, keia eirawngbawl nen chuan in ang lo tak kan ni.

"Lo chan la" tiin zikhlum lianpui hi dawhkanah a rawn dah a, ka chan laia chaw chhum siam a tum chu "Ka lo ti zawk ang" tih leh thawh ka rual a, "Ka ti thei a lawm, kan buhfai hi a rum hma lutuka, i chhum thiam lo ang" a ti deuh tlat a.

"Buhfai hi a bag in nge kg in i lei?" ka tih chuan "Inchungte ration kan khul a, hlawh ka lak hunah a bag te deuh chu ka lei ang" a ti ve mai a, "Chawhmeh a hautak em?" ka ti leh hram a, a sum dinhmun chu ka zawt dawt hreh a, a lo talbuai erawh ka hlau hle thung, a ṭul anih phawt chuan ka nu pawisa dil sak pawh ka hreh lo.

"Pahnih chauh kan ni rih a, hautak lem lo, chawhmeh phei chu inchungten min pe deuh reng a, ka lei khat lutuk" a tih vang chuan awm a nuam deuh. An inluahna te chu an fel hmel riauin ka hria, Awmpuia sawi dan aṭang chuan mi pangngai tak leh mi hriatthiamna ngah tak an nih ka ring a, inhlawhna an siam sak lehzel nen, an chungah ka lawm ru ve takzet.

"Eng ang chhungkua nge an nih a, engzat nge cheng?" ka ti leh a.

"Chhungkaw member chu pali an nia, an fapa tlangval hi phaiah a awm aniang, Doctor a zir an tiin ka hria, tunah khi chuan pathum chiah an awm, an pa ber khi Ukil a nia, an nu khi chuan bazarah dawr a nei" a sawi laimekin Peksanga a rawn lut hlawl a, "Eheu! Mikhual kan nei elaw?" a lo ti hlut a, Awmpuia chu chahbi dahna a zawt nghal zat bawk.

"Chaw i ei chhuak dawn em ni?" ka lo tih chuan "Dawn teh nang, vawksa hmeh ni te chuan hmun dangah ka eiphal teuh lo, thla khat chuang ka ei tawh hleinem, ka lo la khek ve hram hram che anih kha" a ti ham ham a, hepa hi chu englai mai pawh hian a thawveng em em reng.

"Anih, khawiah nge i kal dawn a?"

"Nula ka va rim ve zuai a nge, chance te i beisei ve awm sia.." meinei zet hian min rawn melh a, kei ka lo ner nak thung.

"A rim tui ram ram hle mai a" tih leh pahin vawksa chhumna cooker chu a va hnim duk duk a, "Sa i va han rawp awm em em ve le?" ka ti chu a nuih a za khawp a, "Nang pawh sa rawp vangin a ni lawm ni i lo kal" tiin a nui hawk hawk.

"Sa ka ngaina ve vak lo" ka tih laiin "Ni dawn tak, nang chuan sa hring i rawp tak ang chu, puar a har awm e..." min han nuih leh chiam a, "I zam lo e" tih leh zikhlum kaua vawm ka rual a, chutah Awmpuia lam hawiin "Rinthangi hi sawm fo chi a ni dawn lo, a thil rawp hi a ṭha lo riau, a la chen da vek palh ang che" a va ti reuh a, a ngaihtuahna mai mai chu a...

"I len hlanin ka lo chen da vek dawn" ka tih rualin Awmpuia a lo hawi zawk a, ka zak leh ram ram.

"Engtin..!?" ring lenglawnga Pekan a lo tih chuan ka chhang duh tawh lo.

"I mawl em mai a, scooty i ken daih ten engtin nge min thlah ang?" ka ti ta daih a, an ṭhian dunin an inmitmei nghal zat a, "Inkhawm ban khan Nu Hriati bulah ka sawi tawh" Awmpuian a lo tih chuan a "Zingah chuan i zirpui dawn ta em?" pakhat zawkin a lo ti a.

"Ka hre lo, inrinni te kan ti leh zawk dawn em mawni, nilenga kan zir chuan a thiam hman mai ka ring" Peksanga a lo chek hluk a, "Min ring lo ve khanglang a, JCB pawh ka khalh thiam tih an hre lo mai mai a ni. Mahse, ka peih vak lo, Valerie thil zirtir chu a chakawm loh em mai" a ti bui bui a.

"Tinge  a?" ka lo tih chuan "A thinchhe rapthlak, a hmel en ang ngawt a ni lo, ṭek hmuami a ni ringawt, a rilru te khi a chhe reuh ngawt ang, min hmusit ve deuh tlatin ka hria, a nu leh pa an fel tehreng nen, a u fel tho bawk sia, khi nu te khi an falak anih ka ring tlat" a ti zui a.

"A va huphurhawm duh awm ve" ti a Awmpuia lam ka va hawi chuan a lo nui ringawt a, chu hmeichhe naupang chuan a lo ti duhdah ang tih ka hlau deuh.

Peksanga a len duh vangin chaw kan eihma a, chawei laichuan kan titi bawrh bawrh a, Lalpeksanga chuan vawksa a lo rawp ngang aniang a thau te chu a keih hmak hmak a, a khat tawkin Awmpuian min lo mitmei leh ṭhin. "Inthlahrung suh aw" ti a a han fiam takah chuan Peksanga chu a inthlahrung veleh deuh aniang, sa ti min lo suah sak a, "A Zikhlum kha ka duh zawk mah" ka tih chuan Awmpuian min lo pek belh vat a, chumi hnu chuan engmah ka suak ve hman tawh lo, an pahnih chuan min suahsak mawlh mawlh a, an uang deuhin ka hria. Chaw kan chhum hnem tehlul nen kan eizo deuh thaw a, Peka phei chuan khawrh nga zet a ei a, a chawei kham chu a dul a zut a zut tawh.

Thleng ka sil laiin Games an lo khel dun a, zial an indil zauh thawm chu ka hre pha a, "A thar hi ṭan la" Pekan a tih chuan "Ka zu thiam vak lo a, vawihnih khat fawh hi ka duhtawk" Awmpuian a lo ti a, a zial zuk awm hi ka la hre ngai lo.

"Chhuah pahin scooty chu ka han dilsak mai dawn che nge" Pekan a tih leh chuan "Keimah ka han kal zawk ang, inrinnia zir pawh chu sawi a ngai, Rintein zingkara exer lak a duh a, a ti deuh thut sia...han sawi leh mai loh chuan" tiin ka hming an lam ri a.

"Exer in la dawn maw, ka lo zui ve ang che u, inlak fit ka ngai" Peksangan a tih chuan ka va hawi zawk a, a lo kal ve chuan a nuam lo zo vek dawnin ka hria. Mahse, "Lo kal ve lo mai rawh aw" nuichungin Awmpuian a lo ti hlauh a, "Eee...in inti hrang dawn tlat, zui chi in ni leh lo" Pekan a tih chuan ka lo nui ru pat pat a, kan thleng sil zawh hnuah kuhva min lo ṭheh bawk a, Peka hian kuhva ah loh lai hi a nei mang loin ka hria, eng emaw chang hi chuan ka eisak ve leh zauh ṭhin.

Ka hmanhmawh deuh vangin Peka chhuah hnu lawkah haw ka rawt a, "Lo awm la, inchungah ka han chho lawk ang" a tih chuan ka aw ve mai a, a kal ta chu rin ai takin a rei a, minute sawm dawn chu a han thang awm e.

A lo chhuk leh chu phawk deuhin ka lo en a, "A rem em?" ka lo ti nghal thuai a, "Rem e, kawngah ka dah chhuak tawh" a ti ve mai a, ka zawh loh zawk min chhang daih mai.

"Exer lak chu" ka han ti ṭha leh a.

"E...nu ber khan a sawinawi deuh hlek a; mahse, Valerie khan Inrinnia zir chu a duh zawk a, zing thawh a huphurh deuh aniang" a ti a, tihzia tak a ni. Engmah sawi tawh loin pindan lam a pan a, a inthlak anih ka ring.

"I lo leng nghal dawn em?" a inthlak laia ka va tih chuan, "Rei lote chu ka hman ang, lehkha zir ka duh deuh a" a rawn ti a, pawi ka ti lem lo, a lehkhazir tih buai hi ka hlauh ber a ni.

Perfume a inkap thawm ka hriat vangin ka va bih dak dak a, darthlalang aṭangin min lo   hmu thei chu niin.... lai zetin ka va nuih a, min lo hui zauh mai. Ka va luh rualin ka lamah a rawn inher zat a, ka dara ka sam uaithla chu dimte hian a hui kiang a, min fawp dawna ka hriat vangin a hmui ngawt chu ka lo melh a, ka zam nge ni ka tiril ah min ṭham a, a rawn kun hnaih rual chuan mit ka chhing rang hle bawk. 

Mahse, tum loh deuhin perfume min lo kap a, "A rim a pa em mai, i duhzawng a ni vak lo ang" tih pahin a nui suk a, min fawh a tum lo em mawni.

"Duhhh...." ka ti hluai a, a nihna takah chuan thil dang zawk ania ka duh ni. Ṭha deuh chuan ka kawrah a rawn kap leh a, ka ner hmel aṭang pawh chuan a hrethiam lo em maw ni...

"Ka rimtui em?" a mitah enin ka nuih var var a, ka theihtawpin in lak duhawm ve ka tum a, ka melh no hle bawk.

"Rimtui lutuk, I puar em?" a tih chuan ka bu sawk sawk a, a nui hmel te, a mitmenga min duatna lang te chu hmuh a nuam thlawt a, mahse...

"I hman tawh em ni?" 

"Hman a ni mai" tiin a inher vut a, a perfume ken lai chu a dahṭha zui a, a kawngah chuan ka kuah thawr mai dawn nge mawni. Ka ban hman ṭep tihah a rawn inher a, kut a lo phar hman uk lehnghal. Mahse, a hrethiam ve ta aniang a ban a lo phar a, rang lutukin ka va pawm bet rawk a, min lo kuah hlu hlu mai.

"Kan pahniha kan awmdun hi chuan tumah dang hi kan ngai lo mawle..." a ti a, ka lu ah a khabe rawn nghatin min kuah nghet sauh a, a pangtilum deh chu ka kham mawlh lo.

"Mahse, ka ngaih ang che hian min ngai ve tak tak lo" pangchang aw zetin ka ti a, chutah inla hrang hlekin min lo en a, ka hawi chho ve chu hnai lutukah kan inmelh tawh a, hetianga hnaiah hian a nui mawi zualin ka hria. 

"Ka ngai thei lutuk che a lawm..." a ti zawi deuh sup a, thildang ka ngaihtuah lo reng reng, a hmui ngawt ania ka en ni.

"First love nih hi nuam pawh ka ti lo e a" ka ti chhuak tawl a, a hriatthiam mai ka beisei nen a chhan min zawt leh te te...

Ka insum peih ta lo chuan "I zei lo em mai" ka ti ta ngawt a, a nuih a lo za ngang mai. "Nang i zei a lawm" tiin ka sam a rawn chul a, mit ka chhing leh nghal hmiah a, a hrethiam ta aniang ka hmui bulah a rawn thaw lum ham ham a, "I hmelṭha lutuk" tiin min rawn fawp ta vawng vawng a. Ka lo chhang uar deuh aniang min kuah ṭha sauh sauh a, a nui tur chu ka fawp lui ngar ngar a, ka thlah rualin thawk a la kawk a, "Ka lawm e" tiin ka inher san hmak thung a, ka chhuah san nal nal bawk.

"Rinsangpui..." nuihza aw fea a rawn tih chuan, "Nuam em" ka lo ti ham ham a, a nuih danah a lawm tih ka hre reng.

"Nangte hi...." pindan kawngka bulah a rawn dinga, "Eng nge..?" pawr fea ka lo ti chu min han nuih leh rih a, "Kal vat ang, a tlai zel.."  ngaihsam hmel zetin ka ti a, zah lam a lang lo a, inchhirna emaw pawh ka nei chuang lo.

Pawn kan chhuah thlengin a la nui suk suk a, kawngka a kalh fel hnuah ka kut a rawn vuan a, nghet deuhin a hum a, step kan thlen hmain a ding leh rih. A lam ka hawi chu min lo en ran a, "Ka hmangaih che aw" thutak deuh hian a lo ti a, a bianga han fawhsak leh mai ka tum chu ka hmuiah a lo fawp a, amah ngaichangin ka chhang let ta lo, a first love ka ni a, a hmeichhe fawh hmasak ber ka ni bawk a, min dimdawi zia pawh ka laka a awmdanah hian a hriat theih ṭhin.

Kawngpui kan thlen chhoh chuan scooty la thar deuh hi a lo inhung a, "Hei hian em ni inzir dawn?" tih pahin ka thlek kual a, chutih laichuan "U AwP" tih ri ka hria a, hnunglam ka hawi rang khawp mai.

An inchungte veranda aṭang chuan nula pakhat hian min lo thlir reng a, "I lo haw har ang em?" tiin a rawn zawt leh a.

"Haw har vak lo ang" Awmpuian a tih chuan "Lo peng rawh aw, ka pawlte leh i pawlte an inkhel dawn" chu nu chuan a ti leh a, Valerie chu em mawni, khai a....hmeichhe naupang a ni awzawng lo, nula dik tak a ni.. keimah ang rual, sa pan lam leh ngo zet mai, hmelṭha lutuk mai a ni... 

Awmpuian a chhan hma chuan "I bialnu a mi?" zawi te hian a rawn ti a, a nui deuh var var bawk. "Ka en hman pawh ka va ring lo e, zing thawh hma ka ngai riau a" Awmpuian a tih chuan, "Thingpui te i lo inkawi ve ang chu, ka lo lum lawk ang" a ti leh zel a, chu nu mai mai reuh chu, a lo star a ni ngei ngei ang..

"Lo lum rawh, Scooty dah pahin ka lo in haw dawn nia" Awmpuian a lo ti chu ka va melh hraka, ani erawh helmet khumin scooty a ti nung zui a, kan chuan hnu pawh chuan nula chu a la ding reng a, min thlir liam zuiin ka hria.

"Kha nu kha em ni i zirtir tur chuuu...??" a darah ka va beng dat dat a. 

"Aw, Valerie anih kha"

"Nula lerh chi a ni ngei ngei ang, a nuih dan vel te kha..." 

"A lerh em tih pawh ka hre miah lo ania, kan inbe vak ngai lo a" a tih chuan ka awih lo, a rawn biak ṭhat dan teh hawrh kha, a star loh a takah...

"Fimkhur rawh aw, hmeichhe ṭhenkhat hi an nasa a nia, i nelawm viau chuan a zuam ang che, a ngamtlak poh che leh fimkhur a ngai tihna a ni mai, in ngam tir vak pawh a ṭha lo, ngaihzawng nei laichuan hmeichhe dang biak ṭhat vak zel loh tur, ka mitmei veng reng ang che, ka ngaina lo nghal tehmai ania" ka ti khar khar a, ka tui lo zo leh vek tawh, zirtir leh lo tawp mai sela ka ti rum rum, kha nu hmel kha ka ngaina lo, kei aiin a hmelṭha lehnghal a, hetiang chuan ka awm a nuam thei dawn lo tlat.

"I ti ho em mai a, ngaihzawng nghet nei lai ka nih hi" a ti tak nain ka awm a tih nawm phah lem lo. Hmeichhe dang nena nilenga thlahfal chu hreh tak tein ka hreh, a tir kha chuan naupang a zirtir dawn emaw ka lo ti a, kha nu hmel ka hmuh aṭang khan ka rilru a dang hlak a, min mawlh run mai.

"Zirtir lo pawhin inhlawhna dang i hmu tho ang maw le" ka ti leh vang vang a.

"A nu kha ka hmaizah vang a lawm, inneitu te an ni ve a, ni hnih khat bak a ngai nang, a reng rengah tinge i lungkham vak zel, min ring ve ṭhin la..." ka kut a rawn ban a, a kawngah min kuahtir zui a, a thil sawi chu dik ka ti ve reng, mahse...

"Thingpui i in zawhah i haw chauh dawn nia, kha nu lum kha in a ngai lo" ka ti leh ngat a, a nuiin ka hria.

"Nui mai mai suh, bialnu i nei tih hrilh ngei ngei ang che" ka han ti zui leh a, "A hriat vek tawh kha" a tih pawh chuan "In ngaihzawn tir miah suh" ka ti leh kher a, a nui a nui mai.

In kan thlen chuan Nu Hlimin TV a lo en mek a, Awmpuia chu a lo be ve sawk sawk a, keiin thingpui ka lum thuai bawk a, puar deuhin haw sela a ṭha ang, an inchung nula thingpui lum kha va in haw lo bawk sela.

Choka aṭang chuan an titi thawm chu ka hre pha a, zingkara exer kan lak tur thu kha a lo hrilh mek a, "In peih te chuan a ṭha lutuk a lawm, Matei pawn lo tel ve sela, ani hi zan a meng rei thei lutuka, zingah mut a am leh ṭhin si a, in tlan dawn chuan hruai ve tak teh u..." Nu Hlimin a tih chuan ka lo ner nang a; mahse, Unaunu chuan a peih ka ring lo.

Thingpui ka chawh laimekin ka phone a lo ri a, ka nu hnen aṭanga call a ni, ka chhan rualin "Phone tlang i va har ṭhin ve, mi hi inngai lo pafa riau mai" a lo ti vin hlar a, minti hamhaih angreng.

"Apa'n a lo bia che em, kan phone tlang thei bik lo che a lawm, apa pawn biak a tum nasa lutuk che" pangngai taka ka tih laiin, "A tum lo aniang chu vawikhatmah a rawn phone lo, rawn haw te hi a la tum nange, eng em em nge a la tih dawn a?" a ti bak leh hlur a, a dang te chu a awk deuhin ka hria, ruih nei a ang ka ti.

"Camp chhawng an la nei leh dawn anih kha, i biak theih chuan call ve mai la..." ka ti dek dek chu "Ka call awm lo em mai a, sawi ngai hlir a sawi reng a, a lo haw theih loh thu bak a sawi leh lo ang" a lo ti hmak a. "An rawngbawlna chanchin te pawh i zawt ve ang chu, i biak duh loh te chuan a awm a nuam nang, a lung te pawh a leng ve tawh zawk ngawt ang.." ka ti a, ka ṭawng pawh a bung ve lek lek, ka nu hian a ti mah mah deuhin ka hria a, a tira a lawm lo te kha chu ka hrethiam a, tun thlenga a la be ṭha duh lo chu ka ngaihdan a ni vak lo.

"Mi ngaihtuahna nei reng reng lo mai, ka damloh laitak ngial pawhin a rawngbawlna chiah a ngaihtuah, nupui fanau nei anih pawh a hre lo anih kha, tihian khawdangah kohhran nu ho duhsak rawn a hlawh a, nuam a ti khawp a nih hi..." a ti leh zel a, sawipui vak chi pawh a ni lo. "A lo haw ve thei ṭep tawh ang, a ngaihtuah ve lutuk che a lawm, eng nge i an tawh a, i zia deuh tawh em?" ka tih chuan, "Ka dam a ni mai, damlo hman pawh ka ni lo" a lo ti vat a, han dem ve dawn ṭhin mahila ka nu hi chu ka lainat leh tlat ṭhin, heti hian amah tein a awm deuh reng a, kan chhungkaw eizawngtu ber a ni bawk.

"Lo damlo tawh miah suh, ka lo ṭawngṭai pui ziah che ania, i khua a sik leh chuan lo chhuk la, ka inentir pui ang che" ka lo ti ve sawk sawk a, "Ka zia tawh lutuk, ka damdawi ei ka ngeih a niang" a tih chuan a awki pawh a nem ve deuh tawh, ka thingpui siam a laklawh vangin rei kan inbe zui tawh lo a, ka dah dawnah ka pa be turin ka chah ve bawk a, 'Ka be peih dawn em mawni' a la ti hram a, a biak tho chu ka ring.

Thingpui inpahin inkhel kan en a, Awmpuia chuan Liverpool a ṭan bawk a, goal an khung hma bawk a, a lawm hmel khawp mai, "I duh leh en zo law law la" ti a ka sawm chuan "A la rei dawn em mai, zing thawh hma kan ngaih kha" a lo ti mai a, "In inchungte ina i en leh si vaih" a lo ti chu a duh lo khawp, "Lehkha ka zir dawn a lawm" a ti a, ka awih veleh mai bawk.

A haw tur chu gate thleng ka va thlah a, ka luh leh hnuah mu turin ka pindan lam ka pan a, sam ka khuih laimekin ka pindanah Unaunu a lo lut a, a incheidan aṭang chuan chhuah ruk a tum anih hmel e. "Lo muhil suh aw, sawtah ka kal lawk dawn a, tukverh hi min lo hawnsak a ngai ania" a rawn ti leh pek a, ka va han ning zozai tak.

"Khawiah nge i kal dawn?" ka tih chuan, "Muani te inah, kan star pa te kha an leng a, ka va leng ve lawk" a ti a, a phur hmel khawp mai. 

"Mut hma ka ngai asin, zingah exer kan la dawn a, mengrei thei ka ni hleinem" ka tih pawh chuan "I duh leh lo muhil rawh, ka lo phone mai ang che, i fel kha..." tiin min han nuih tlawn a, peih lo pawh nila a ti lui leh dawn tho tho a, ka hnial buai duh ta lo.

Awmpuia chuan min lo be har angreng khawp mai a, a haw aṭang khan darkar chanve zet a liam tawh a, muhil loin ka lo la nghak ve reng a, an in a la thleng lo anih ka ring, ani pui hi an inchungte inah a la leng zawk nge mawni...

Ka call dawn em mawni ka ti rilruk laimekin a message a lo thleng a, "Naktuk zing kha ka thei leh dawn lo a ang, inchung nuin zingkarah zir rawh u a ti deuh tlat a, inrinni nena kan zir chuan tunkar chiah a ngai ang, lo hrethiam rih mai rawh aw" tih hi a lo thawn a, ka hrethiam lo nghal pang mai.

"I sawi ve lo em ni, chhuanlam te siam ta che, zingkara i hman loh thu te hrilh la" ka va ti khawl a, "Valerie hian class kal nana hman a duh a, a hmanhmawh ve tawh aniang" tih zawng hi min lo thawn let a, ka thinrim ru ṭun mai.

"Lehkha ka zir lawk dawn a, nang i zir dawn em?" a rawn tih leh pawh chuan ka chhang duh lawk lo a, ka thil tih tum lawk vek tawh ṭhulh leh hi hrehawm ka ti a, he thilah berkher phei hi chuan ka lawm lo bawk a, Awmpuia chungah tak pawh chuan ka lawm lo.

Rei deuh hnuah "Tunkarah thiam vek ang che u" tih hi ka va thawn a, "Kan lo tum dawn nia Boss, ṭha deuhin ka lo zirtir ang" a rawn ti pek a, 'kan' a ti kher te, 'Ka lo zirtir ang' a ti te chu ka helh a, Phone ka dah tau hmiah bawk.

Ka muhil chu dar 1 bawrah ka harh hlawl a, phone ka en chuan Awmpuia message pakhat a lo awm a, "I muhil tawh em ni, muttui aw" tih te hi a ni a, Unaunu call emaw message a awm hauh lo. Ani hi a lo haw reng tawh em mawni le, ngaihṭha lo deuhin ka tho chhuak a, tukverh lah chu a inkalh ṭha thlap a, a pindan lam ka va en pawh chuan a awm chuang lo.

Ka call a, a chhang thei miah lo mai a, a ṭhiannu phone number lah chu ka nei der lo a, tawh sual a tawk ang tih mawlh ka hlau. Rilru nuam lo deuhin ka pindan lam ka pan a, ka hlauhthawn vang aniang ka mut chhuak a reh hmiah a, ka call nawn tluk tluk chung pawhin min chhang thei chuang lo.

Ka tih ngaihna hre lo chuan Ben-uiha ka call ta ringawt a, ani pawh chuan a rawn chhang har khawp a, ka beidawng hman ṭep tih ah a rawn chhang ve chauh a, a aw aṭang chuan a muhil ka kai tho anih hmel.

"Hello" phak chhelh chhawlh hian a rawn ti a.

"Unaunu awmna i hria em?" ka va ti thawr a, "I lo phone sual aniang" tiin a dah leh hmak.

Ka call nawn leh a, a rawn chhang rang ta viau a, 'Hello' pawh a tih zawh hmain "A la rawn haw lo ania, lo ngaihven mai teh" ka ti sawk sawk a. "Tunge biak i tum a?" a rawn ti let heu, chu pa mai mai chu, ka number a delete a chiang mai.

"Keimah Rintei..."

"Rintei pawh ka hre lo e a, keichu Ben..."

"Mawla, i bialnu Lizzy nau" ka tih takah chuan "E eeee..." a ti deuh hluai a, hahthlak hian a.

"A zan chhuak a la rawn haw lo ania, Muani te inah ka kaldawn atia, i hman chuan min lo ngaihven sak lawk teh" ka han ti ṭha leh a.

"Hman chu ka hman a; mahse...." a ngawi deuh vung vung a, "Bialpa ka nei a tia, an chhuak dun a ni lo maw...?" zawi angreng deuh hian a ti a, chulam ngaihtuah theih pawh a ni rih lo.

"A ṭhiannu number i nei em, biak dan lo ngaihtuah teh, a nuin a hriat chuan a pawi dawn lutuk" ka ti leh vat a, "Muani number chu ka nei" a tih chuan ka thaw huai mai.

"Ka'n be chhin ange" tiin Phone chu a dah a, rei vak lo hnuah lo call lehin, "Hetiang vel hi ka hre peih vak lo asin" a rawn ti bul hmuk a, engti zia nge mawni.

"Engtiang maw?"

"A bialpa thar nen an chhuak dun anih chu" a bung ṭha hmek hmuk khawp mai.

"A va han buaithlak tak, an kalna a sawi em?" ka ti leh a, inthlahrunawm viau mahse, ani bak zawh tur ka hre tlat lo.

"An party mek ang chu"

"Min lo lam sak mai teh a" ka inthlahrun zia chu aw, aw min pawh ka beisei lo reng reng.

"Keimahin ka kal peih lo, tlangval a chhuahpui lehnghal a, ka hmuhdun chuan ka insum thei lo ang" a ti deuh tlat a, tihngaihna a vang duh khawp mai, "Phone la, haw turin ti mai rawh" a ti leh a, a thawm chu a ri sawt sawt a, "An kalna chu ka'n zawt leh hrim hrim ange" tiin phone chu a dah a, keiin Unaunu chu biak ka tum reng bawk a, call a chhan theih loh zel vang chuan ngaih a ṭha lo telh telh a, tawhsual a tawk anih ka ring hmiah tawh.

Bena'n a lo call leh chuan, "An kalna chu ka hria, ka kal dawn a, i duh leh lo kal ve la" a rawn ti a, "Nangman lo hruai haw mai la" ka han ti zet a, an inhruai haw theih chu ka ring zan lo, ani pawh chuan "Min zui duh dawn em mawni" a lo ti ve bauh a.

"Anih chuan ka lo kal ve mai dawn nia, pawisa i nei em, kawl lai ka nei miah lo a, bank-ah chuan ka nei a, taxi lak a lo ngaih thut chuan kan rul leh mai ang che" ka ti zung zung a, a neih thu a rawn sawi chuan ka tho ve ta vat a, kan gate bula ka lo nghah tur thu ka hrilh bawk.

Ka insiam a, a lo thlen hma a lo awm hman tumin ka chhuak ru ṭhem ṭhem a, pawn lah chu a thim mup a, ka hlau deuh reuh. Ka phone light ka ti eng a, thawm dim fein gate lam ka pan a, gate hawn rik chi pawh a ni lo, Nu Hlimin min hre chhuak ang tih mawlh ka hlau, dim thei ang berin gate chu ka hawng a, kawngpui lah chu a reh hian a reh tlawk tlawk a, a rawn rei hrep ang tih pawh ka hlau.

Minute 20 dawn ka nghah hnuah pawh a la rawn thleng lo, mahni chauha kawnglaia din chu nuam ka ti lo hle a, luhsan leh mai tur nge ni. Phone ka phawrh a, ka call chu a la thei lo phawt, a lo tlan mek a ni maithei. Unaunu ka call leh a, a ngaite bawkin a ring tawp leh ṭhak a, ani hi khawi lai emaw ah a chatthla a ni ngei ang, a chhe ber chu ka dawn duh lo a, ngaih tih ṭhat ka la tum ve hram hram a ni.

Motor lo tlan a awm vangin gate lam ka hawi vat a, min tlan pelh hnu chuan ka thaw huai a, hetia din reng chu a ṭha dawn lo tiin luh leh mai ka tum a; mahse, Bike thawm niawm tak ka hriat vang chuan ka ding leh rih a, ka lampana bike rawn tlan phei chu tlan chak fua fua tak a ni, ka bulah chuan a rawn ding ri hrawk a, helmet a khum vangin a hmel ka hmu thei lo.

"I mawl em ni, thawm dim ta che" ka lo ti vin khar khar a, a bike a la ri vut vut a, engtin nge min chhan pawh ka hre lo.

A bike hnunga ka ṭhu tur chuan a ke lam ka melh zauh a, chapal tereuhte hi a lo bun a, a ke artui lam a chuang duai mai, a hmuh hmasak ber a bun aniang, a hmanhmawh awm mange ka ti.

"Pheikhawk pawh i bun hman nange?" a hnunga ṭhut pahin ka ti a, a bike hnung han san zia chuh, hnunglama inchelh ringawt chi a ni lo. A lamah ka zuk awn deuh a, ṭi deuhin a hnungah ka nam a, ka innem khalh a ni ber.

"I inring em?" a tih hnuah a inher kual pawp a, ka lo inring lo nasa, ka kang vawk a, Bike tlan rualin ka thal thla nghal tawp a, min tlansan nal nal mai.

"Chupa mai mai chuh..." ka va han kham tak, hla deuh hleka a ding chu rum theih tawpin ka va melh a, a back light a rawn ti eng zak zak a, min rawn thlek laipawh chuan ka la ṭhusawp nuaih a, ka va han zui chak lo mai mai tak.

"Hmanhmawh ta che..." a rawn tia, lo let leh pawh zuk tum lo chuan, 'I na em?' te pawh han tih awm. 

Thinrim ru ṭeuh chungin ka tho a, "Inchelh nghet rawh ka tih mawlh mawlh kha, zan a rei tawh, tlan chak a ngai" a lo ti zuah zuah a. "Inchelh nghet rawh i ti lo, i inring em i tia nih kha" ti pawr hlar chungin ka kekawr bal chu ka bengfai zui a, ka mawngte chu a sil awng deuhin ka hria.

"Inchelh nghet viau tawh rawh,...kha..." ka ṭhutfel leh rualin a Bomber jacket chu a rawn pawt parh a, ṭha deuh chuan ka lo vuan a, "Ka tla leh anih chuan ka pawt thla ve nghal tawh ang che" tiin ka vau khar khar.

Chak tawkin a tlan chhuak a, kan kalna lam tur ka zawh pawh chuan a ṭawng thawm ka hre lo, a bike chu a bengchheng leh lutuka, kawi thum kawi li vel aṭang pawhin a thawm a hriat ang, a tlan danah pan tur lam a hria anih ka ring a, ka zawt buai duh ta lo.

Rei lote kan tlan hnuah petrol pump kan thlenga, petrol a nei lo aniang a pan nghal zat a, a din rualin ka chhuk ve zat bawk. A bike thawm a reh rualin zan reh zia pawh a hriat theih chauh a lawm le.. A helmet chu a phelh a, a sam lah chu a han thur khawp a, a thophang hmel erawh a fel hmel phian, ner fea ka lo thlek chu tilui zet hian second khat vel min rawn nuih a, ka han melh rum leh rih.

"Khawi lamah nge kan kal dawn a?"

"World bank road ah"

"A va han hla em em?"

"Hla e, ho angreng khawp mai, amah ni kher lo sela chu ka kal peih teuh lo" a ti bul bul a, a pawttuin a zir deuh aniang, a hmanhmawh em mai.

"I chalpal bun chu a" ka sawirualin a thlek ve vut a, "Ka pheikhawk ka su daih a lawm, ka ṭhianpa nau ta anih hi" a tia, pawiti hmel pawh a pu lem lo. Ka la en reng vang chuan "Hisap vel suh" a rawn ti fahran a, a teh ngawt a, eng nge hisap tur awm!?

Petrol an thun sak laichuan a indap kual rak rak a, ka lo en reng laichuan za note pahnih chuar zet hi a phawrh chhuak a, "A daih em?" ka lo ti nghal vat a, 500 chu ka keng ve a, haw lama taxi lak nana ka tih a ni.

"Daih..." a tih chuan ka thaw huai, "A dang i la nei em, zanah chuan taxi lakna a to maithei" ka sawi laichuan a rawn meng lian kawk a, ka lo hlauthawng hman...

"Sangkhat ka keng" a tih chuan thawk ka la hluai, "Lo hmang phawt ang, ka rul leh thlap ang che" ka han ti a, "Aman min rul ang" a tih chuan ka nui ringawt, remchang lo lak tum a ni chiang mai.

"Vawt te i ti lo em mawni?" ka ti leh a, a kekawr hak chu a ni, Boxer chu a ni chiah lo a; mahse, a bul ṭha mah mahin ka hria.

"Vawt e, ka inhak lum em hi" a jacket a pawt zauh a, jacket te chu a ha ve tak na a, a kekawr mawlh chu.

"Kekawr tlawn te hak tur a lawm" ka tih takah chuan dar a kan ak a, "Ka su a lawm" a ti leh a, eng nge a awmzia ni ngai.

"Kekawr pakhat chiah i nei em ni a, pheikhawk pawh.." ka sawi zawh hma hmain "Tun dinhmunah chuan ni e, chuang vat teh" tih pahin a inher hmak a, engti khawsakin nge maw a khawsak le?

Kan tlan chhuah leh hnu chuan world bank road lam kan pan vang vang a, Bike chuang khat tih takah ka ṭang ṭeuh a, ka kawng te chu a kham ut ut tawh, inbe loin kan tlan char char a, a vawt bawk si a, hnar a thip duh khawp mai.

Zero point kan thlen chuan a ding dat a, a jacket ka vawnna chu a rawn pawt thla hmak a, a Phone a dap aniang. Rei lo teah a tu emaw a call a, "Khawi laiah tak maw" tiin a zawt a, a helmet chu phelhin min kentir zui a, U Lizzy ṭhiannu a bia aniang "Hmeichhe dang chu nise ka lam lo chiang viau ang, ka out lai a ni lehnghal a, petrol pawh nei loin ka chhuak ania, lo hre ve mai mai rawh" a ti vin hluk hluk a, 'Ka out' a tih thu chu ka lo ngaihtuah zui a.

A biak zawh hnua bike a ti nung leh chu a helmet lo pek ka tum a, "Ka khum peih tawh lo, lo keng mai rawh" a tia, "Engtin nge ka invawn ang" ka lo ti let hlar a, "A va ninawm tak, chuang zei lo ropui si" ti nuah nuah chungin a khum a, a hnung lamah ka lo melh rum hrep a, a tlan chhuah rualin ka ding zawk mai.

"Mawla!"

"Ṭhu nghet ta che, rawn kun la, min rawn vuan rawh" 

"Tlan chak tawh suh, min han thlauh leh na teh aw.." a hnungah ka beng ri dawp a, chumi hnuah ka han vuan ṭha leh a, ka thinrim a rin ut ut tawh, U Lizzy thleng chuan ka haw hlur a, amah vang vek a ni.

Thui vak lo kan tlan leh hnu chuan in pakhat awmna kan thleng a, kawng aṭang pawh chuan Music play thawm a ri dup dup a, kawng sirah bike leh car a inhung far bawk a, min an tam hmel viau mai. Hmanhmawh deuhin kan chhuk a, mi pawh ngaihsak loin a kal nghal daih a,  ka umzui rang hle.

"Heih, a awm tih i chiang em?"

"Chiang chiang"

"I ṭhing reuh si..." ka ti hlak a, hnunglam aṭang phei chuan a inchei dan chu a ṭhing ngawih ngawih, a chapal lah chu a...

Kawngka bul kan thlen chuan a ding dat a, "Min lo zui rawh" a tih hnuah a lut zui a, pawna lo awm ve mipa ṭhenkhat chuan min lo enchik khawp a, Bena chu zui loh chi pawh a ni lo, ka hlau deuh riau.

Inchhung ka va lut chu a lo thim ruih a, Benja chu ka zawng nghal ruai a, ka piah lawka a hawi vual vual chu ka va hmu a, a bul ka thlen rualin a jacket hnungah ka vuan a, a kalna apiangah ka zui kual a ni ber. Thil pakhat mak ka tih deuh chu hmeichhia an tam hle a, a ṭhen an lam a, rui  chatthla niawm tak te pawh an awm nawk mai.

"Inṭhen  hrang ila zawng ang" a rawn tih chuan "Teuh lo teuh lo..." ka lo ti sawk sawk a, keimahin ka kal hrang ngam teuh lo.

Mi ṭhenkhat dinna lamah chuan pheiin hmeichhe lam ho chu a va kuai her sawk sawk a, zawn tak tein a zawng, a rilru a hah hmel ta riauin ka hria a, a hawiher te reng reng chu a phi ruai tawh. U Lizzy a duh hneh dan em em hi chu aw, hetiang hmuna zawn a ngai te hi engtin nge a ngaih ve ang le, a hnualsuat phah lo chu a ni phawt mai a, a rilru pawh a thlak duh mai ka ring lo.

Chutia kan hawi kual laichuan bangkil lam deuha hmeichhe lam chuan ka mit a la chat a, hnunglam min chhawn nain a kawr hak aṭang chuan Unaunu ngei a ni. Benja chu ka kawhhmuh vat a, rang lutukin a pan phei a, ka zui ve zat bawk. An bul ka thlen ve hma chuan an inpawt her sawk a, midang lamin min lo nek ve reng bawk nen ka kal sawt thei lo a, mi kar aṭanga ka va en chuan an inbia tih ka hmu thei a, U Lizzy chu a nuiin ka hria.

An bul ka thleng chu phawk fein min lo en a, "I leng rei lutuk, khua a var ṭep tawh hi" ka thinrim bawk a, ka vin ṭha khawp mai.

"Eng nge a awmzia, in pahnihin in lo kal e law" nui chunga a tih chuan, "Kal mai loh ten, phone i chhang thei bawk si lo, i nuin a man chhuak teh che nih chuan..." ka hauh laiin Benja zawk chu a melh daih a, "Eng nge hepa hi i rawn hruai kher a, min thlahtu tur ka nei reng a lawm maw le" tiin a nui hak a, Benja chuan engmah a sawi lo, U Lizzy chu a melh ran a, lungawi lo hmel a pu bawk.

"Haw nghal ang" tih leh pawh ka rual a, "Ngawi rawh, ka bag...ka ṭhiante pawh..."tiin a lehhawi leh rih. A ṭhiante emaw ni hi a va bekbawr sar sar a, chutah kan lam lo hawiin eng emaw hi an sawi a, inrawn khawm te pawh an ang deuh.

"Rinbawih, Lawmtluanga inphurh tir leh la, in hnungah kan lo zui ang che u" a tia, a sawi pah chuan a ṭhiante zu no chu a la a, a in nghal pawp pawp a, ka dawhtheihna in a tlin tawh lo.

A lamah a pen phei rawk rawk a, a banah pawtin ka kalpui hmawk hmawk a, a ruih zia chu aw, kal pawh a kal ngil hleithei lo, chuti chung chuan a la ṭang ve ṭung a, a ṭan apiangin na deuhin ka hmer a, zep loah chuan ben hrep mai ania ka chak ni. 

"Benjamin, engah nge Lalrini i lo hruai a, ka nau i lo biak ṭhat hi ka duh reng reng lo ania, hria ang che...min hnaih vak duh suh" a ti phei lawng lawng a, ka va lehhawi chuan Benja chu kan hnungah a lo kal a, engtin mah a chhang let lo.

Bike dahna kan thleng chu ka vawnna a paih thla sawk a, "Ka ṭhiante ka Bye lawk dawn" tiin let leh mai a tum a; mahse, Benja lo phei nen an intawk chat a, hnaih deuhah an i dinchilh ran a, Unaunu rui lutuk chu a ding bu luk luk reng.

"Bike ah i chuang thei ang em?" Benja'n a tih chuan "Ka luak i ti chhuak" a lo tih khum pek a, Benja pawh a ner ve sawk.

Chutih laichuan a ṭhiante kha an lo chhuak a, "Lizzy engtin nge i haw dawn?" hmeichhe pakhat chuan a rawn ti lang lang a, mipa pahnih leh hmeichhe pakhat an ni.

"Rinpui, min lo thlah" pangchang aw fea U Lizzy'n a tih chuan "A ṭul lo, Taxi kan la dawn" pawr tawkin ka lo ti a, Benjamina pawh a hmai zahawm, helai thleng thleng amah vangin a lo kal a, Unaunu em em chu a.

"Bena, lo pawt lui rawh" ka tih chuan a che ve vat a, U Lizzy dar tawn tawnah vuanin ka lamah a rawn nawr phei a, Unaunu zet chu... "Min thlah rawh, Benjamin, i zawng kut kha la sawn rawh, min tawk hlek suh" a lo ti chul a, Benja chuan a thlah duh bik lo. A  rawn nawr phei dawt dawt a, pakhat lah chuan a lo sual let titih a, ka va kek dak awrh dawn em mawni, ngam i la chu aw.....A chak lo ang maw le.

"I nu vuak i duh em ni, tunah dar engzat nge ri tawh, kan rawn hruai peih che hi lawm hle ta che" ka lo ti ve pang pang a, ka lam rawn hawiin "Ka haw dawn reng, in rualin ka haw peih lo a ni mai, in ngaihsak pawh ka ngai lo e" min tih khum sak a, lo kal malek ila ṭha tur.

"Min thlah rawh" Benja vawnna aṭangin a tal chhuak a, hnung lama a kal tur chu Benja chuan a kawngah a lo man a, a pawm bet ta hmiah bawk.

"A tawk tawh Lizzy, haw a hun tawh" vin zeta a tih laichuan ka khawngaih ru takzet.

"Pawt lui rawh, duh lo mahse a haw a ngai" ka lo ti ve sawk sawk a.

"Min thlah rawh, Lawmtluang, min ti buai reng lo zawk teh, ka kham lutuk che, ka nun tih hrehawm i duh a mi, min duh tak tak anih chuan min ti buai tawh suh" a tih khum bian bian mai a, a rui bawk a, sawi awm leh awm loh pawh a hre lo.

"Duh lo mahla ka hruai haw tho ang che" pakhat chuan a ti ve tlat a, chu chu a pawimawh ber a ni, a ruih a reh anga, a haw lo anih chuan pawi a ti dawn lutuk.

 

Mahse, buaina kan nei ta tlat, a ṭhiante kha lo kalin rawn chhan an tum ta mai a, pakhat phei chuan Benja chu a rawn nam deuh sawk a, mahse ka va inrawlh nghal vat a, a nau ka nih thu te ka hrilh hnu chuan an hrethiam a, Benja erawh an la melhrum hle thung. 

Hmeichhe pakhat chu "Taxi koh tur in hria em?" tiin ka lo zawt tawl a, a lo hre bik si lo, tun ang hunah chuan taxi a vang nasa mai si a, engtin nge kan inphurh haw dawn ni.

"Lo chelh teh, Bike hman tur kan zawng ange" Ben-an a tih vang chuan ka che ve vat a, U Lizzy bana ka va chelh chu min lo melh tur khai a, ka duai duh bik lo, "I haw duh loh chuan i nu ka hrilh vek dawn, i awmdan hi a ni em em lo, hmeichhe khawsak phungah chuan zahthlak tak a ni, nangmah vanga kan buai zia te hi i hria em, Benjamina muhil ka va kai tho ringawt a sin, a rawn kal peih hlauh zawk a, ni lo sela chu i chan a chhe khawp ang" tiin ka hau mawlh mawlh a, dar zat te ka han hrilh takah chuan a meng khup lap a, ṭah chhuak hmel a pu bawk.

"Engtin nge kan haw dawn?" a tih chuan thawk ka han la hluai a, "Buaithlak lutuk, Bena khan a va ngaihtuah dawn anih kha, tu nen nge in kal reng reng" tiin ka zawt zui a, "Rinpuia te nen khan, lo kal kher lo ula chuan min thlah dawn asin le" a tia, hahthlak hian a.

Benjamina lo let leh chu mipakhat hian a lo zui phei a, "Lizzy ka phur anga, ani hian a phur mai ang che" a tia, ka beng bulah "1000 pek a ngai a, a rui vak lo a, a hlauhawm loh" a han ti zui a, chupa chu pa te lam deuh hi a ni a, misual hmel a pu lem lo, a hmel en pawhin a rui vak lo tih chu a hriat theih.

"Ka scooty ka va la lawk ange" a tih chuan ka bu ve mai a, Bike a ni lo chu ka lawm hle bawk.

Benja chu enin "In inphur thleng thei ang maw, in thlauh ang tih a hlauhawm" ka ti chu a duh lo ve khawp a, "Ka phuar bet dawn" a lo ti hem mai a, a jacket a phelh nghal sawt sawt. Unaunu bike chuang tur chu ka lo pui vat a, a ṭhutfel hnuah Benja chuan a Jacketin a kawngah a mah si chetin a phuar a, Unaunu pawh a awmṭha duh angreng viau mai, Benja hnungah a bei thlam a, a awmah a kut a suih bet tlat bawk.

Ka ngaih a han ṭha hman dawn viau a; mahse, Unaunu chuan "Mi tenawm i nih hi, mi hneawm, mi khamawm.." a lo la ti hlak hlak a, Benjamina nui hmel chu hmuh a hrehawm duh hle, a chhan chu a rilru a na tih a lang tlat, ka lam hawiin a rawn nui sak a, a mit sen ram chu ka hmuh hmaih lo, a rilru a na tih ka hria.

"Mawh sawi teh, eng nge min duh viau chhan, ka hmelṭha viau a mi, nge sex min hmanpui i duh vang?" te chu a la ti ham ham a, ka lo khap leh rih.

"Ṭawng ṭawng lo khan ngawi hle hle rawh" ka tih pawh chuan "Ani em, aww...i duh chuan kan hmang dun dawn nia; mahse, vawi khat chauh, chuan min thlah hmak ang, i duh em?" a ti leh sek sek a, Benja biangah dawmin a lamah a kuai her a, "I duh em sawi rawh?" a ti mawlh mawlh a, Benjaminan a en dan chuan rilru a ti na zawk a, duh ngawih ngawih, hmangaih ngawih ngawih tih hi a hriat a, a kut a vawn sak lai te chu ka en rei duh lo, ka khawngaih tlat.

"I tan chuan engpawh ka huam, chutiang khawp chuan ka duh che, sex vang a ni lo, ka phut miah lo tih i hre dawn nia, ka hmangaih che a, min hnar reng mahla ka hmangaih tho ang che, i rilru i thlak hma chu ka beidawng lo bawk ang" Benjaminan a tih ri chu ka hre pha, a aw chu a zawiin a dam dup a, an lam ka va hawi chuan a mittui a hru zauh a, U Lizzy lo nui hawk hawk chu beidawng zetin ka lo melh a.

"Kan ṭhian ho chuan Laltenawma kan ti che, in ninawm ve eee.." a tih rualin a uak zui ṭhat a, Benjamina kutah a luak anih chu, va buaipui ka tum uk a, mahse pakhat zawk chuan a kut pawh la sawn loin a dawh ringawt a, duhtawka a luak hnuah Benja hnungah chuan a bei a, "Tlan tawh rawh" tiin a hrilh zui bawk. 

Scooty a lo thlen chuan ka chuang kai vat a, "Tlan hmasa ru" Benjaminan a tih vangin kan tlan hmasa a, kan hnungah min lo zui chu a khat tawkin ka va en leh ṭhin, ngaihtuahna a kal thui khawp mai a, hemi te pahnih hi in kawprem se ka tihna leh tih lohna a inzat reng tawh a, Benjamina tan hian U Lizzy hi tling lo zawk hlein ka hria. Benjamina chu chiang takin ka hre lo a, a khawsak dan leh a chawrchhuah na lah ka hre hek lo. Mahse, a hmangaihna thuk zia ka hmuh khan U Lizzy chuan phu lo ka ti a, midang ṭha zawk tawng sela ka ti a ni.

Kawng tluangin chutiang ngawt chu ka ngaihtuah a, in kawt kan thlen chuan gate bulah kan lo nghak a, rei loteah an lo thleng ve mai bawk, Unaunu chu ka lo buaipui sawk sawk a, chutih laiin Benja chuan min phurtupa chu pawisa a lo pe a, ka 500 ken kha pek ka han tum ve nain a la duh lo a, "I luhpui thei ang em, ka lo luh ve a ngai em?" tiin min zawt a, "A ngai lo, let leh thuai zawk rawh" ka lo ti vat a, Nu Hlimi a lo harh palh anih chuan a pawi dawn.

"I hritlang deuh ania, a kut te kha a hit lutuk" a tih chuan ka nuih ringawt a, a la ngaihtuah hmel khawp mai.

Gate a kan luh thlengin a la ding a, thawm dim thei ang berin Unaunu chu ka kuah lut a, a nu harh a hlau ve aniang a ngawi kar a, a pindan kan thlen hnuah pawh ka tih ang angin a awm a, a thawmhnaw te ka thlak tir a, a luak a chhuah thu sawiin khumah a let bam a, in a thleng ta bawka tiin ka ngaihsak zui duh tawh lo, ka pindan lamah ka let san a, a thawm a reh danah a muhil zui niin ka hria.

Ka muhil thei lo chu ka inlet sek a, khua a var ṭep tawhin ka ring, Benjamina kha ka ngaihtuah deuha, "I thleng tawh em, U Lizzy chu a mu fel tawh e?" tih hi ka va thawn a, rei vak lo hnuah "Ka hmangaih tih i lo hrilh dawn nia" tih hi a lo thawn let a.

Hepa hi zawng, a beidawng  ve ngai dawn lo anih hi.

(End of chapter - 6)