BLUE BAYOU (CH - 7) by Ahmangaihi violette khiangte

BLUE BAYOU by Ahmangaihi violette khiangte

Chapter - 7

Thawhṭan tuk a ni a, thawh ka hai chiang khawp mai, ka Alarm ri takngial pawh ka hre lo. Sam pawh khuih hman loin pindan ka chhuahsan a, dawhkan kila Nu Hlimi ṭhu chuan min lo en phawk khawp a, "I buai em?" ka va ti sawk sawk a, eirawng a lo bawl zo diam tawh.

"Engti zia nge, tukin chu kaihthawh in va har em em ve" tih pahin flask min lo chhawp hnaih a, thingpui in pawh ka chak lem lo.

"Lehkha ka zir rei deuh a" ka tih chuan a awih ve mai aniang engmah min zawt zui lo a, nizana kan kalna kha hria sela chuan a sa ve khawp ang le.

"Tlaiah hian i bang har ṭhin em, haw hma theih ni te i nei em?" a tih chuan nilaini a ka ban hma theih tur thu ka hrilh a, min tirh duhna a nei anih ka ring.

"I u chu lo hrilh rih lo la, i haw hma theih niah kan va inentir dawn nia, ka chhul lam hi a fel lo riau a, cancer ka nih te ka ring deuh a, mahni chuan ka zam ve riau mai, i u  phei chu engmah hrilh chi a ni lo ang" a ti ta mai a, min ti hamhaih angreng.

"I va inentir khan engtin nge an lo tih che" ka ti vat a.

"Damdawi min chawh a, test neih te a ngai dawn, ka doctor khan a clinic lama kal turin min ti rih a, ka ṭhian a nia, uluk deuha min en a duh aniang" tiin sana lam a melh vang vang a, a cancer chu ka hlau ru ve takzet.

"Inentir hma i duh chuan ka hman reng asin, ka bang hma thei reng a lawm" ka han ti ṭha leh a, a rang thei ang bera va kalpui chu ṭhain ka hria, tlai palh te pawh a hlauhawm.

"Appointment te ka lo siam leh phawt ang, nilaini chu tinzawn phawt ila" a tih leh laimekin Unaunu a lo tho a, "Tinge min kaihthawh loh, first period ka nei asin" a rawn ti nuah nuah a, nizan thil vang khan ka ngei deuh a, ka lo melh ṭha duh vak lo.

Ka bula a rawn ṭhu lah chu zu ṭhing rim a nam huam a, a sam a thur nasa mai bawk si.  "Eng nge kan hmeh dawn?" tiin a nu chu a zawt a, ka lo ip ru ṭeuh. "Tukin chu kan tho tlai vek, chawhmeh pawh ka siam hman mang lo, eidawnah artui kan kang chawp dawn nia" tih pahin Nu Hlimi chu a tho a, min hnungchhawn rualin Unaunu ke chu ka va tlawh sawk a, a la aiah ṭhat zui.

"I nam nasa lutuk" ka tih chuan a ner nak.

"A hria em?" a rawn ti ru sar sar a.

"I rim kha va ti reh rawh, anih loh chuan a man ang che" ka tih rualin a tho sawk sawk a, "Nu, tiffin ka pai mai ang, ka insiam dawn" tih leh pindan lam pan a rual a, "Kan ei thei reng asin" a nuin a tih pawh chuan a rawn hawi let tawh lo, man chhuah chu a hlau leh hle sia, nizan te khan zuk lam lo ta ila engtin nge a awm ang le.

Nu Hlimi nen chauh chuan chaw kan ei a, hmun te ka seng fel hnuah ka insiam ve chauh a, phone ka en lah chuan message engmah a awm lo, Awmpuia chu message thawn ka tum zuau a, scooty khalh an zir tih ka hriat chhuah rualin ka thinrim thar leh a,  a thawh hma dawn tehlul nen message pakhat pawh a hnutchhiah lo chu ka ngei ru hle bawk.

"Mate, nizan khan engtin nge kan haw, min lo hruai tlatin ka hria.." ka pindan kawngka bul aṭangin a rawn ti a, inthlahrung hmel a pu ve deuh a, mood fuh loh nen ṭha taka biak chu ka thei lo.

"I che ṭhing khawp mai, min ti buai lutuk, zan dangah chuan ka buaipui tawh miah lo ang che" ka lo ti hmak a, a lo nui tet tet.

"A zia lo tawp, ka rilru a na ve deuh a" a tih chuan ka melh rawm a, rilru nat chhan tur a nei em mawni.

"Ka star pa kha maw..." a ti dek dek chu "Nangmah vangin Benja nen kan buai hrep, ani phei chu i ti khawngaihthlak lutuk" ka ti leh hlak a, a star pa chungchang a sawi sek te chu ka lo ning.

"Lallawmtluanga kha lo hruai kher loh tur che ania, aman em ni min phur haw, beisei a lo neih leh ange aw...ani kher rawn hruai..." a la ti zui a, ben hrep ka chak.

"Ani rawn kal lo sela engtin nge i awm ang ni, a lo hruai peih che kha lawm viau zawk ta che, zing lam tawh ah haw te ila duh lo lehnghal a, i nuin hria se chu..." ka melh dan vang chu nge ni pha deuh dui hian min en a,  chutah lo lutin ka khum lam a pan a, a insiam zo tawh aniang bag nen a inṭham at a, sawi duh nei ṭeuh hmel a pu bawk.

"Zan dangah chuan khatiang khan awm tawh miah suh, min ti mangang thei lutuk a, mut pawh ka mu thei hleinem, i nu pawh a damṭhat loh em hi, a rilru ti hah zawngin khawsa ziah lo la, a hrim hrimin nula zanreiah chhuah chu tawhsual i tawk ang tih te a hlauhawm" tih pahin ka insiam mawlh mawlh a, min chhang lem lo.

Rei dawn a ngawih hnu chuan "Ka star pa khan bialnu a lo nei reng a, nizana kan chhuahna ah khan a bialnu te an lo kal ve a, min thlahthlam daih a lawm, ka rilru na khan ka lo in tam deuha, engmah pawh ka hre mumal lo, in lo kal chu ka lawm tawp" a ti leh hnuhnawh a, a lawm tak tak pawhin ka ring lo.

"Benja kha lawmthu hrilh rawh, amah vekin anih kha buaipui che, a muhil ka va kaitho ringawt lehnghal a, a ngaihtuah zia che kha.." ka tih chuan, "Engtin nge a number i neih?" a rawn ti khauh a, ka che chu ka tawp chawt a, ka va lehhawi chuan phawk fein min lo melh a, sawi dan tur ka van ru khawp mai.

"I birthday khan teddy bear min pek tir che kha, chanchin min rawn zawh leh a duh vangin ka number a la a lawm.." ka ti ta ngawt a, tihpui tura min ngen thu kha chu ka zep tlat a ngai.

"Eng nge a lo sawi ṭhin a?"

"I chungchang hlir a ni mai"

"Engtin?" a ti leh a, sawi dan ka thiam loh chuan min ngai kawi ang tih ka hlau a, ṭawngsual ka hlau ru hle.

"Present kha i duhzawng a ni em tih vel a ni mai, kan inbe tam lo, nizan khan i awmna a hria em tih ka va zawt a, kan rawn inthurual a, chu zawng chu..." ka sawilai chuan nur fein min melh a, a ngaihdan anih hmel vak lo.

"Nizana i tih dan kha i la hria em, i tih khawngaihthlak zia kha" ka ti leh hlut a, sawi hun tak a ni.

"Engtin nge ka tih?" a tih chuan "I luak khum, sex hman puiah te i sawm a, zahthlak tak a ni" tiin ka chek tlat tlat a, a lo ner nasa mai.

"Ka ti maw, ka van awih lo e, Benjamina chutiang chuan ka ti a maw, ka van rui awm em em" a tia, a awih loh hmel nasa.

"Ka awm ve lai ngeiin a lawm i sawm, hmeichhia zawk lehnghalin; mahse, Benja khan a hrethiam hlauh che a, i luak khum pawh khan a ten duh miah lo anih kha, duat deuhin a phur haw che a, a hmangaih ve ngawt mai che" ka ṭawng tir lama ka pawr viau laiin a tawp lam chu a zawi hle tawh, a ngaihdan pawh a dan phah ve ngei ka beisei a ni.

"Kha kha a lawm amah kher lo hruai lo la ṭha tur ania, Benjamina ka hmuh chuan ka thinrima ka insum zo ṭhin lo a lawm, tinge i bialpa te kha i lo kalpui zawk mai loh" a tia, zuk ṭap ṭep ringawt chuan, sawi pawh ka sawi buai peih tawh lo, lerh he haw viau si hi feelings a nei lo emaw tih tur a ni.

Chhang duh tawh loin ka insiam zung zung a, chutih laichuan a phone a lo ri a, "Ka lo kal" tih leh tlan chhuah a rual a, a chhuah hnu chuan thawk ka la hluai a, Unaunu hi chuan ka thluak a ti chawmawlh ṭhin, Benja Message leh a thu min chah kha ka hrechhuak uar uar a, chhan let loh hmangaihna an sawi ṭhin chu ka tawng ve lo nain ka mit ngeiin ka hmu a, na ka tihpui bawk.

Hma deuhah College ka thleng a, kawtzawla ṭhutthlengah Awmpuia nghah pahin phone ka khawih a, Kimkimi lo thleng chu a rawn ṭhu ve zawk a, tih tur dang a neih vangin a kalsawn leh vat thung. Peksanga a rawn thleng a, Awmpuia nen an rawn inphur miah lo, Bike a hung lai chu ka thlir reng a, ka lam a rawn hawi veleh ka lo hui a.

"Khawnge?" ka ti hmasa ber.

"Ka chhuah dawn khan a lo haw chiah a, a bal lutuk, an tlu aniang te ka ti mai mai, a sawi ṭha duh vak lo a" a tih chuan "A la rawn kal dawn lo em ni?" ka ti leh vat a.

"A inbual phawt dawn aniang, a rei vak lo ang" a ti liam puat a, a ṭhianten an lo koh vangin zawh zel theih pawh a ni lo. Awmpuia chu Call ka tum zet a; mahse, amah zawkin a rawn call ta hlauh a, ka chhang duh lawk lo, rei dawn ka rik tir hnuah ka chhang a.

"College ah ka awm tawh" ka ti bul hmuk a, ka lawm lo tih chu a hriat hle ang.

"Aw, ka insiam mek a" zangkhai deuhin a rawn ti a, a thawm a ri sawt sawt mai.

Ka chhan tak mai loah chuan "Tiffin i pai em?" a rawn ti leh a, "Pai lo, tukin chu ka mood a fuh lo a, tiffin pawh ka pai peih lo" ka ti a, ka awki pawh a nem ve deuh tawh.

"Engti zia nge?" a tih chuan, "Ka mood a off" ka ti leh tlawng.

"Eng ngati nge i mood a off a?" a nui lek lekin ka hria.

"I message pawh ka dawng lo a, morning wish pawh, i tho hma tho sia, min text lo a" ka ti zung zung a, ka lungawi lohna hi ka zep thei ṭhin lo, hriattir zung zung mai hi ka duh ṭhin.

"Awhaw....nizana ka message i chhang si lo a, i la mutui viau anih ka ring a lawm, kan chhuak hma deuha, inah phone ka charge a,  ka tum aiin kan rei leh si anih hi, tihpalh aw" a rawn ti luam a, a awki chu a damthlup reng.

"I tihpalh tak tak em?"

"Aw tak tak e...." a nui thawm ka hria a, ka rilru pawh a dam leh viau tawh, a lakah hian ka thinur rei thei ngai lo.

"Ti tawh miah suh, nidangah chuan i thawh rualin min hre hmasa ber zel ang che, i message ka dawn loh chuan ka awm a nuam lo zo vek zel" ka ti a, ka pangchan zia chu aw....

"Ka ti tawh miah lo ang" ṭha deuhin a rawn ti a, ka nghah tur thu ka hrilh leh hnuah kan inbiakna kan titawp a, luhsan duh bik loin ka lo la nghak ran bawk. Noeli te ṭhian ho a lo thleng ve hlawl a, min hmu chu min lo nuih var var a, tunlai chu kan boruak a chhe lo bawk a, a hmel hmuh pawh a nuam viau zel. 

"Ṭha maw?" a rawn tih chuan ka bu zauh a, "Inpa i nghak em ni?" a ti leh a, chhan ka tum laimeka "Bike a nei tawh si lo a, Bus-in a lo kal aniang" a tih chuan ka hre chhuak leh chiah, bus-a a lo kal anih chuan a lo thleng har dawn riauin ka hria a, va luhsan rih mai tur nge ni.

"Hawh, luhsan ang" Noelin a tih chuan ka ding hluai a; mahse, tukin kher kher chu a bula ṭhut ka chak a, nghah chu ka tum leh ta zawk.

"Ka'n nghak law law mai ange, a rei tawh lo ang" ka tih vangin min kalsan hlawm a, an kal hnua an thilsawi chu ka hre pha hram a, "Rintei hian a atchhilh khat tlat" min ti a, an nui kar kar hlawm.

Minute 10 dawn ka nghah hnu chuan a rawn lang ta hram a; mahse, ka tum loh dan lutukin ka hmu thung. Gate chhungah a rawn tlan thla vawk vawk a, tu Scooty nge a rawn khalh chu hrechiang tak ka ni. Ban a rawn vai zauh a, min rawn nuih bawk a, ka nui ve hleithei lo.

"Min lo nghak rei em? I lo va lut mai lo a ni" a bul ka thlen ruala a lo tih chuan ka melh vang vang a, "Rei lo" tih chiah ka sawi. Scooty chu ka thlek a, "Valerie'n a ken theih hma chu ka hmang rih ang, tlaiah pawh ka thlah dawn che nia" a ti leh vat a, "Thlah kher pawh ka ngai chuang lo, kei chu haw na a buaithlak loh" ka ti nawi niai a, lo khap sak chu dikin ka hre bik lo a ni.

"Zirtir a har hmel em? A thiam chak dawn em?" tih angreng chu kal pahin ka zawt a.

"A no ve reuh lutuka, a thiam hma lo ang, balance pawh a thiam lo" a ti ve mai a, an inzirdan chu hmuh ka chak ru khawp mai.

"Khawiah maw i zirpui?"

"World bank road ah, midang zir ve pawh an awm nual mai, khung laibawrah khuan motor zirna school te a awm a, exer la pawh an tam" a ti ve luam a.

"Zing tin in kal dawn maw?" ka tih chuan a bu zauh a, "Inrinni chu kan nileng ang" tiin min hrilh bawk.

Chawhnu lamah ruah a sur cherh cherh a, kan professor ṭhenkhat seminar a an kal vangin class kan nei mumal lo a, kan bang hma khawp mai. "I lo leng duh em, ka thlah thei dawn che a" Awmpuian a tih chuan ka hnial lem lo. Kan inphur haw tur chu Peksangan min lo hmu a, Awmpuia chu lo biain a len rih tur thu a hrilh a, "Chance ka pe ang che u" a ti kher a, a awm ve lo tur chu ka lo phur khawp mai.

Ruah a la tlak ser ser avangin kan huh hman deuh a, an inluah kan thlen chuan dar 2 a la ri lo deuh. "I sam kha lo hru hul rawh" a tih vangin pindana a lut chu ka zui ve vat a, a towel min lo pek chuan ka inhru mawlh mawlh a, chutih laiin a lo inthlak ve thung. Ka en reng laichuan a bana hliam niawm tak inrin chu ka va hmu a, hmun hnih laiah a awm.

"I ban kha engti zia nge?" ka tih chuan, "Ee..tukin a mi anih dawn hi" a ti mai a, ka hrethiam zan lo.

"In tlu em ni?" ka tih leh chuan "Tlu ve deuh lek lek a, min lo ham pilh anih dawn hi" a ti leh mai a, engtin em em nge maw an zirdun ni?

"A tilui a ni lo maw?" min rawn nuih ringawt, "Han inham pilh te chu, i chungah a lo sual vel ange, ka duh miah lo ang" ka ti leh ngat a, "A ti palh aniang" tih leh a kawr min rawn pek a rual a, inthlak ve kher pawh ngai ka ti lo maw le.

"Lo ha rawh, thingpui ka lo siam ang" tih pahin a kalchhuak a, a kal hnu chuan ka inthlak ve sawk sawk a, ka va chhuah leh chuan thingpui a lo chhuang mek a, chhangphut a lo hmet mawlh mawlh.

"Eng nge i siam dawn a?" 

 "Chhangban ka'n kan sak ang che" 

"Ka lo hmet ang" 

"I thiam em ni" ka han melh ralh a, "Hmeichhia ka nih hi, chhang phut hmeh te chu ka thiam lutuk" tih pahin ka va chuh ve tharh a, min pek pahin ka hnarah a rawn tat pek a, tah let ka tum chu a lo indang nasa mai. A khabe ah ka tah sak hram a, a bianga tah leh ka tum chu ka kut a lo man chawt a, hnai takah kan inmelh tawh. 

A rawn kun hnai a, mit ka chhing chiah tihah ka hmuiah a rawn fawp a, uar fea lo chhang letin a nghawngah ka kuah bet chial a, kan infawh tawh azawnga kan la duhthawh ber ṭum a ni, boruak danglam tak a awm a, kan inhiptawnna nasat zia chu kan hre ve vein ka ring. Chutih laichuan a thingpui chhuan a lo so a; mahse, kan la laklawh rih. "Off mai rawh" ka tih chuan a va off sawk sawk a, keiin kut ka va sil ve bawk a, ka kut sil zo pawh min nghak hman tawh meuh lo, ka kawngah rawn vuanin a lamah min pawh her a, duhtawh fein kan am dun a, thawk a rang duh kher mai.

Ka kawngah rawn vuanin tui dehna tlangah chuan min hlang chho a, min rawn hnaih leh rualin a kawngah ka lo kherhbet chial a, ka nghawng a rawn fawh chuan thawk ka la halh a, thawm ka chhuah ṭep, infawh baka thui hi kan kal ngai lo a, hetianga che tur hian ka beisei ngai lo. A hmuiin ka nghawng a rawn nul kual dan dan a, thaw lak a pangngai thei lo, ka thinphu a rang dup dup a, ka lo thaw chhuak leh halh ṭhin.

"Hickey ka siam dawn?" a tih chuan ka sam ka lo hui ṭha ve sawk sawk a, lian deuha siam lo turin ka hrilh bawk. Chuveleh ka tukkhumah rawn dawmin ka nghawngah a fawp ngar ngar a, kan taksa innek nasa lutuk chuan tirilah min ṭham a, tisa thil bak chuan ngaihtuahna a luah tawh lo, a rawn hawi chhuah leh rualin kan hmui a insi leh hmiah a, a bak duhbelhna a awm zel a, kan tawp phal lo ve ve.

Vawilehkhatah kawngkhar inhawng thawm kan hre thut a, "U OP" hmeichhe aw hian a rawn ti lauh a, kan insiamṭha hman meuh lo, ka ṭhutna aṭanga min hlan thlak rualin Valerie a rawn lang hlawl a, phawk lutuk hian min rawn en a, kan awm dan chu hai theih pawh a ni lo ang, min hmutu lah chu a lai khawp mai a, keini lah chuti bawk.

"Ih.. keychain kha ka lei tawh a, i duh thlang la" tih pahin a thil khai chu a lek zauh a, a hawisawn leh vat thung. Min hnungchhawn zawngin dawhkan bulah a va ding a, "Pali ka lei a, pahnih hi chu chahbi spare ah kan hmang dawn nia" a ti leh a, a zak aniang a rawn hawi duh tawh lo a, Awmpuian a va kal hnaih veleh gas lam ka pan a, ka va tinung leh sawk sawk a, an ni pahnih thil en dun chu ka ve melh leh zauh ṭhin.

"I va lei tam ve" Awmpuian a tih laichuan a aw a tham deuh a, aw a thian zui kharh kharh. Chutah ka lam rawn hawiin min rawn nuih sak a, sawi tur pawh ka hre lo. 

"Thingpui in ve nghal rawh aw" a tih vang chuan no ka va la sawk sawk a, Valerie chuan a chhang si lo a, a duh ve ni turah ka ngai.

Thingpui ka siam laichuan dawhkan kilin an lo ṭhu tawh a, kan nula te chu a ti ti siam siam a, a ṭhiannu scooty lei hming sawiin a scooty nge a ṭhiannu ta chu ṭha zawk tih angreng a zawt a, a aw lah chu a han no khawp a, in ti pangchang chi anih ka ring hmiah. "U OP, i bialnu kha em ni?" zawi tea a tih ri chu ka hre pha a, Awmpuian "Nizanah pawh i hmuh tawh kha" a tih chuan, "Tunge a hming khah?" a ti leh sar sar a.

"U Rinte ti rawh?" pakhatin a tih laimekin thingpui chu ka va chawi phei a, nula chuan min lo nuih var var reuh a, biak ve ngei a ngaiin ka hria.

"Scooty khalh zir chu harsa i ti em?" nelawm thei ang bera ka tih chuan "Harsa lo e, U Opa a fel a, a zaidam bawk sia, a zirtir a nuam lutuk, a hma a min zirtirtupa kha chuan min ring ngam lo a, a lo khalh pah zel a, U Opa angin mi pawh a nawr ve peih lo" a lo ti zat zat a, a u Opa chu a ngaihsan hmel riauin ka hria.

"In zir lai chu ka van hmu chak che u ve, min hruai ve ula" ka tih chuan Awmpuia lam a melh vat a, "I tan lo kal a buaithlak ang" ka bialpa chuan a ti deuh tlat, scooty in an inphur thei a, zingkarah an zir bawk si a, kal ve theih pawh a ni chuang lo.

"Miin min enlai chuan ka khalh ngam lo, exer la hoin min en te khan ka zak thei lutuk, ka thinphu a rang vek zel" Valerie'n a lo ti ve bawk a, chutah a u Opa chu en lehin "Inrinni chu anu'n chaw lo einghal rawh se a ti che aw, tlai thlengin kan zir dawn nia, chhun thil eina tur anu ka lo dil anga, thil tui deuh kan eidawn nia" a ti leh zat zat a, a nuisang reng. Awmpuia chuan thingpui a in a, a chhang zui lem lo thung a, chutih laiin ruah a rawn sur tam thut a, current a thim zui nen inchhung chu a thim mup a, ka ṭhianna te chuan bati chhit tur pawh an lo nei lo a, tukverh eng lam hawiin kan ṭhu ngawi ṭhap hlawm.

Vawt ka tih deuh avangin Awmpuia kawrlum hak tur ka va zawng a, ruah a sur reng chuan ka haw tlai phah ang tih pawh ka hlau. Ka va chhuah laichuan nula zawk chu a ṭawng mawlh mawlh a, "In infawp chiang mai, ka hmu hman thuak che u" tiin ka bialpa chu a lo fiam reuh a, a nghal hmel zek.

"Engmah kan ti lo, kut kan sil a lawm, chhangphut kan hmet a" Awmpuian a tih pawh chuan "Awihawm loh e, i hmui pawh a sen" a ti leh zel a, a nui har har chu ka va thlen phei rualin a tawp daih a, ka awm ve takah chuan a ṭawng duh ta vak lo a, ka mitmei a veng ve aniang.

Rei vak loah ruah chu a rawn han a, kan inleng chuan haw mai a la tum lo aniang a phone bihin a la ṭhu ve ngar ngar a, keini pahnih erawh Peksanga chungchang sawiin kan titi a, Awmpuian inbual khat a tih thu a sawi chuan ka nuih a za khawp a, kar khatah vawihnih khat chauh a lo inbual ṭhin ni awm tak a ni, ka lo nuihpui bawk bawk laichuan "A ṭawp e, zakkha rim te a nam ṭhinin ka hria" Valerie'n a rawn ti ve khauh a, amah lah chu a ner nang nang a, Awmpuia nen kan lo nui tawi dun khawp.

"In an luahna hi a rei tawh em?" ti a ka zawh chuan "Rei vak lo, u Opa awm hma phei chuan an luah ṭawp thei lutuka, kan hnawtchhuak hman ṭep" a ti leh zel a, sawi zui dan avang duh khawp mai.

A nuin a rawn koh takah chuan peih loh hmel deuhin a tho a, a chhuah dawnah Awmpuia chu rawn au lehin "Naktuk chu kal hma ang aw, kan haw hma tawh dawn nia" a rawn ti a, "I thawh hma theih phawt chuan" Awmpuian a ti leh mai a, a kal liam hnu lawkah Peksanga a rawn haw a, step-ah an intawk hmanin ka ring.

"I va leng rei ve, kha nulain rawn rim che a tum a, i awm si lo a a haw leh tawh" ka lo ti fiamthu a.

"Valerie kha maw, a awihawm loh em mai a, ka rawn bia a, mi pawh a chhang duh lo, min kal pel hmak" ei loh hmel fein a ti a, a chanchin a sawi dan kha hria se chu a lawm lo ve khawp ang.

"Chaw ei ve nghal la" tiin min sawm a, keichuan haw mai ka duh tawh thung, ka nu Hlimi a damsam si lo a, chaw eichhuak thei pawh ka ni rih lo.

Dar thum rik dawn ah min thlah a, inah pawh lo lut kawi tawh loin a inkhalh haw a,   ka chhungte pawh an lo haw ve ve tawh. Nu Hlimi chu ṭhutthlengah a lo mu bam a, Unaunu erawh a pindanah a awm a, "Chaw lo chhum rawh, alu ka lo kang ang" a lo ti lang lang a; mahse, a rawn chhuah chuan ka lo kang hman tawh a, ani chet hun nghah hi chu khawtlai phah na mai mai a ni.

"Bena chu lawmthu ka va hrilh kha" a tih chuan ka lo phur ve khawp a, "Engtin nge a lo chhan che" ka ti sawk sawk.

"A rawn inngaitlawm vel lutuka, ka ei lo, a ṭawngkam thlum lutuk te hi ka ning tlat, i tan chuan engpawh ka ti ang a ti zawt zawt a, min thlah tura ka tihin a zawm duh chuang lo" a ti leh pek a, han sawi phur pui hi a har ṭhin.

Nilaini tlai chu hma deuhah ka haw a, in ka thlen chuan Nu Hlimi pawh a lo inpeih diam tawh, taxi a ko a, a ṭhiannu clinic lam kan pan vang vang a, kalkawngah te chuan a ṭawng ṭha peih meuh lo a, a chauh hmel ngawih ngawih reng. Min hrilh danin kan doctor hmuh tur chu a lehkha zirpui ṭhin a ni a, high school an kal laiphei chuan inkawp chawt; bestfriend ti a insawi ve ve ṭhin an ni awm e. "Pauline-i chu lehkha a thiam thei lutuka, an hausa bawk si a, class 10 kan pass hnu khan phaiah a kal daih a, tun hnaiah facebook aṭangin kan inbe leh chauh a lawm, mi hi a ngai ve ṭhin lutuka, remchangah chawei turin kan la sawm dawn nia" a ti a, Nu Hlimi hian ṭhian a neih vak ka hre lo a, hna a a kal bak hi chu inlamah a tawm chawt a, kohhran lamah pawh a inhmang lem lo a, a fanu hi chuan chhun lo ve tak a ni.

Clinic kan va thlen chuan mi an lo tam deuh a, waiting room-ah ṭhuin a luh theih hun kan nghak ve rih a, ka rilṭam deuh vang nge ni ka tui a hal huam a, tui in tur lah chu an chhawp lo nge ni ka hawi kual ngial pawhin ka hmu lo. "Tui ka va lei lawk ange" tiin ka thawhsan a, pawn ka chhuak chiah chu tum loh deuh ka va hmu a, min rawn kalpel thuak mai.

"Ben...." ka tih hman chiah tih ah a rawn lehhawi a, a kal lehnghal nal nal a, min hre lo der em mawni.

Dawrah tui ka va lei a, hmanhmawh deuh chuan ka let leh a, ka thlen phei hmain chupa bawk chu ka va hmu leh.. kawngka bulah dingin inchhunglam chu a bih duk duk a, a hnungah ka va beng ri dawm. Phawk lutukin a rawn lehhawi a, min hmuh rualin thaw huai hmel a pu a, thil tih ruk tum te pawh a ang.

"Eng nge hetah i tih?" a tih chuan "Nang zawk?" ka lo ti vat a, hmeichhe doctor awmna ah eng nge tih a tum ve ni.

"Enteh, counter-a hmeichhe ṭhu kha min va koh sak teh, 'Benja a lo kal a, pawisa a mamawh' va ti tawp rawh, a lo hrethiam mai ang, Doctor kha a awm ve chuan 'BJ a lo kal' i ti dawn nia" a ti reuh a, a chhungte tihna nge mawni! Inchhung lam ka va thlek chuan Counter ruak chu ka va hmu a, nichina hmeichhe ṭhu kha Doctor room-ah a lut anih ka ring.

"A awm loh saw"

"Va lut rawh, doctor bulah a awm ang"

"Nangmah va lut ve mai la, i chhungte em ni?"

"Ka lut thei lo, Ni Pawlin min hmuh chuan a pawi dawn lutuk" a ti tlat a, va ko rawh min ti bawk sia.

"Tu nge ni Pawli chu?"

Chutih laimek chuan counter-a ṭhu kha a lo chhuak a, Bena luh tum uk chu a rawn back chhuak leh rawk rawk a, "Karei, min hmu teuh ther ther" tih pahin ka hnungah a rawn ding rawk rawk a, ka va thlek chuan Doctor hmeichhe pakhat hian counter a ṭhu chu a lo be mek a, Nu Hlimin a va pan ve mek bawk.

"Ka va ko dawn em ni?" ka tih chuan "Ngai lo.. ngai lo, Ni Pawli a awm saw" a lo ti leh a, ni Pawli chu Doctor Pauline-i a sawina anih hmel, ka Ni a ti maw!???

"Doctor saw i ni maw?" phawk lutukin ka melh a, min chhang lem lo. Inchhung lam chu a va thlek leh a, "A kal e" tih leh luh a rual a, ka zuilut ve thuai bawk. Counter a hmeichhe ṭhu kha a va bia a, nu Hlimi ka hmuh loh vang chuan ka hawi kual ruai a, Doctor kha a zuilut anih ka ring.

Benjamina lam ka va hawi leh chuan an lo inbe mek a, ka pan hnai ve leh vat a, pawisa a dil a ni ngei ang, "Tam tham deuh ti teh, ka ṭhiante ta ka ba nual" a tih ri chu ka hre pha.

Nula chuan "Amah dil phawt rawh, engtia rei nge i haw tawh loh, i sam te chu i va han zuah sei em em, i hmelchhe zo vek a lawm kha" a lo ti bawrh bawrh a, "A lo chhuak leh hman ang e, min pe vat teh" tiin pakhat chuan a lo tur bawk.

An bula ka va din laichuan pawisa tam tham fe hi nula chuan a pe a, "A damṭha lo i ti dawn nia" Benjaminan a tih chuan ka lo thlek chiam a, pawisa chu a ak ṭha sawt sawt mai.

"I chhuah chhan kha kan hre vek ania aw, i ti khawngaih thlak thei em mai, leng tar ṭhak sela i duh em mawni" nula chuan a ti leh a, chutah nuisang chungin nula chu a en a, "An inṭhen hma chu ka haw dawn lo, pasal neih loh a intiam hunah ka haw chauh ang" a ti reuh a.

"I duhpui loh pawn ṭha deuhin hrilh ve mai ta che, fa ang tak takin a en ve che a, a ngaihzawng apiang i hnawh bo sak zel a, a puitling zia lo em mai, a chang leh i awm bo san thul, a khawhar te tal hnem ve la" nula chuan a ti leh vang vang a, Benja chuan chhang tawh loin ka lam a lo hawi a, "I inentir dawn em ni?" a lo ti vat a.

"Nu Hlimi zawk, a lut mek aniang" ka tih chuan, "Ka pi zawn maw?" a lo ti let heh a, ka ner nak.

"I pi zawn chu a ni lo deuh ang a" 

"Kal ang, i hlawh ka pe ang che" tih pahin min kuah chhuak rawk rawk a, "Eng hlawh maw, pawisa hlawh duh vangin ka pui lo che, pek ka ngai lo" ka ti phei mawlh mawlh a, pawn kan thlen rualin pawisa kha a rawn phawrh leh a, min pek a tum tak tak.

"Ka duh hleinem"

"Ka ba che a lawm"

"Ka ṭhing chuang che em ni?"

"La mai mai rawh, ka phal lai anih hi" tih leh sangkhat chu min pek a rual a, ka hnar ve tak nain ka kutah a hmehbel lui tlat a, a hnar hleihtheih loh.

"In aṭangin i tlanbo a ni maw?" ka tih chuan, "Tlanbo hran lo e, ka haw lo rih mai mai" a ti liampuat a, an thil sawi kha hriatchian ka chak deuh a, kan innel ve tawh bawk a a sawi duh mai ka ring.

"Doctor Pauline-i kha i ni maw?" a lo bu zauh a, an hausak ka ring ru reng a ni.

"In pahnih chiahin em ni inchen a?"

"Ni e, kan indang dun a"

"Chhungte dang i nei em?" inthlahrung deuhin ka ti leh a, dilchhut min tih ka hlau ru deuh.

"Nei ve e le" a ti sam et a, nu leh pa a nei lo nge maw ni.

"Khawnge i nu leh pa te, an boral tawh em ni?" min en dan vang chuan "Ngaih loh lamah ngai lo a, i ni nen chauha in cheng chu a mak" ka ti leh tawl a.

"Fahrah a lawm ka nih" a ti tlawng a,  fa lak tih na nge le!?

"Anih tinge i ni a nih daih a" ka tih chuan a lo nui vur vur.

"Ka pa nau a nia, ka ni a lawm" a tih takah chuan ka hrethiam ta kuar, falak a ni loh tihna.

"I pa chu a boral tawh nge, nupui dang a nei zawk" 

"Eng atan nge min zawh a, i hrilh dawn em ni" meinei zet hian min melh zui a, lawm lo hmel pawh a pu chuang lo, a la nui hui reng.

"U Lizzy maw, hrilh dawn pawh ka hre nang..ka hre..." ka sawi zawh hma hma chuan, "Hrilh rawh, a pawi hleinem, min lo sawi khawngaihthlak dawn nia" a lo ti leh reuh a, lehta mai mai ṭhin a.

"Eng nge ka sawi vak chuan ang?" 

"Aw..ka chanchin a ni mai a lawm.." thil hriat chhuah nei niawm tak hian bang lamah min pawt phei a, "Fahrah ka nih thu te hi lo hrilh la, ni Pawli rokhawmtu tur ka ni bawk a, In law te hrawn tur an awm lo, duhtawka nuamsain a awm thei ang" a ti zawt zawt a, min ti hamhaih zawk.

"Awii..i nasa em mai a" ka ti hluai a, a zia lo ka ti.

"A fuh dawn lutuk tlat, lizzy te chu.."

"I nu leh pa te an boral tawh em ni" ka ti vat a, a bu nghat nghat mai.

"A van zia lo ve..." 

"A ho lutuk, ka tet lai daihin a lawm, ka nu phei chu a hmel pawh ka hre lo hrim hrim, ka sen laiin pasal min um san daih a lawm" a ti leh a, a ngaih hoh hmel khawp.

"I nu chu a la dam tih na a ni maw?" ka tih chuan, "Dam ka ring, a chanchin pawh ka hre lo" dar a kan ak a, zawhna ngah hmel deuhin min en bawk.

"I van khawngaihthlak reuh tak.." ka tih chuan a lo ner nung a, a beisei loh dan deuhin ka chhang a niang.

"Engtin nge i sawi ang?" a ti leh a, huiha...hepa hian Lizzy bak ngaihtuah a nei lo a niang.

"I ni Doctor ania lawm le, in awmtheih hmel em mai, sawi khawngaihthlak dan che pawh ka thiam lo e a, chu loah U Lizzy te chuan mipa hausa a ngaisang a lawm, insawi khawngaihthlak a fuh lo zawk" ka lo ti ve duah a, tum loh deuh hian ka ṭawng ve ṭeuh zel, hrilhfiah zel hi a ngai reuh a, a phili chung zel bawk si.

"Ni dawn tak e" a ti ve bauh a, ṭawng leh ka tum laitakin Nu Hlimi a lo chhuak a, a bag a hai vangin a lo hawi lo a; mahse, Benjamina erawh a kal nal nal thunga, Nu Hlimin a hmu hman lo hlauh.

"Hetah i lo awm daih a ni maw, ka zawng ka zawng che a lawm" a tih chuan a result ka lo zawt vat a, "Kal nawn leh a ngai dawn, keimahin ka ti thei tawh mai ang, class i ṭhulh phah zel chuan a ṭha lo ang" a ti a, damdawi pawh a chawh belh lem lo. Test result hmuh phawt a ngai dawn anih hmel.

"Kan kal tlai sia, i va lut hma thei zawk ve" ka tih chuan a nuisang a, "Min ngaipawimawh ve anih kha, ka luh hun nghak ila chu kan la rei khawp ang, Pauline-i hi chu hetiang te te ah hian a fel ṭhin a lawm" a ti a, nuam a tih hmel khawp mai.

"Nula em ni a la nih a, i rualpui anih hmel sia, a la naupan hmel bawk si" ka ti leh zat a.

"La nula e mawle, tinge maw pasal neih a tum reng reng loh ni, a hmelṭhat tehlul nen" a ti vang vang a, a chhan awm ang chu rin dan ka nei.

Nu Hlimi chuan haw kawngah tihian min hrilh zawm a, "Pauline-i te chhung chu chhungkaw hung deuh an ni a, mi awmthei tak tak vek an ni, Politics lamah an inhmang nasa a, a unau te pawh sawrkar officer lian tak tak an ni nawk a, an hmeichhe ho sawn sumdawn an thiam bawk a, Pauline pawn clinic lam a buaipui nasat em hi. Mahse, sawti khawpa an hausa chung sawn mi fel leh inngaitlawm tak chhungkua an nia, an veng mite rengin an fak, missionary chawm an ngah thu te pawh an sawi ka hria. Hmanni deuh khan an vengah ka va kal a, an inah ka peng kawi a, a lo indang daih tawh a, a pa zawk thingpui ka va inpui ta ngawt a" tiin min hrilh a, chutiang khawpa khawsa nuam an nih laia Benjamina a indan pui chhan chu hriat ka chak a, Nu Hlimi chuan a la hre ve lo tlata ka hriat vangin ka pehhel ta rih.

"Amahin maw a indan? Hmeichhia mahnia indan chu, pasal a nei bawk si lo" dilchhut leh awmze nei fe hian ka zawt a, Benja chungchang chu sawichhuah loh hram ka tum bawk.

"A u fapa kha a indan pui niawm tak a ni, kan ṭhian pakhatin min hrilh dan chuan a pa sawn tlem lai deuh khan a ro a sem a, an inti lungawi vak lo a ni awm e. A u fapa a indan pui a, kha naupang kha a awm duhna an thlan tir a, Pauline-i bula awm a thlang anih hmel. An naupang ber te chhungin inpui an chang thung a, a lungawi anga a haw veleh mai ka ring, pasal neih a la tum loh hmel tlat, chawei turin ka sawm a, a la buai rih lutuka, nakinah ka damṭhat deuh hunah lo ei sela a ṭha ang" a ti zui luam a, Benja chungchang a sawi tih hria se chu aw, a makti hmel tur pawh ka mitthla thiam mai.

In kan thlen hnuah ka nu ka han bia a, a aw chu danglam riauin ka hria a, hmanni deuha ka biak pawh khan rui aw deuhin min lo chhang tawh a, zawh ngawt chi niin ka hre si lo. A inkhar hun tur ka zawh lah chuan min chhang nawi khawp a, "Dar 9 ah te hi chuan ka la buai thei lutuk, mi pawh an mengrei vek tawh, zan lama kan am ve loh chuan zing karah mi an tho hma tawh tak tak lo" te a tia, dawr a hawng rei dawn a tihna anih mai hmel. Ka pa chungchang ka sawi dek dek chu "Rawn haw tawh malek sela a ni mai a lawm" a lo ti pawr hlur a, keipawh chu ka thinrim ve ṭun tawh.

"Engah nge khatianga i tih vak vak zel, ṭha deuhin engmah i sawipui theih loh, inbe ṭha ve tawh em em rawh u" ka ti vin ve hlak hlak a, a rawn inthlahrung veleh deuh chuan "Pawisa i mamawh em?" tiin min zawt daih a, Nu Hlimin pocket money min pe ṭhin a, semester laklawh ah hi chuan ka mamawh tam ngai lo a, a theih hram chuan chah loh ka tum ve ṭhin.

"Nu Hlimi hi a dam ṭha lo ve deuh a, a chhul lam a niin ka hria, vawiin pawh kan va inentir a" tiin chanchinte ka hrilh ve a,  "Pasal nei leh sela ṭha tur" a lo ti teh daih a, kan inbiak zawh hnua ka ngaihtuah zui chuan Nu Hlimi pasal nei leh lo chu pawi ka ti thar a, a chungah thil ṭha lo thleng ta sela U Lizzy awm dan tur te ka ngaihtuah a, minti hlauthawng ruai mai.

Zanah chuan thim hlimah kan mu diak a, mut pahin lehkhabu ka chhiar a, Awmpuia ka be pah reng bawk. Zing thawh hma a ngaih vangin dar 10 velah kan inmangṭha a, kei erawh zan rei deuh thlengin ka meng a, zing lam erawh ka tho hma hle thung. College ka thlen chuan a lo la thleng ve lo a, Mawitei leh Kimkimi an lo thlen tawh vangin kan luhsan a, First period chu a rawn nang lo chiang khawp mai, Professor chhuah dawnah a lo thleng chiah a, tun hmain class a tlai ngai lo, handout xerox tur a ngah a, class awl ah pawh a bo vang vang a, classroom ah lah hian note copy in a buai a, zingkara an scooty zir hi a fuh lo a ni ber, thawhhma a ngaih avangin zan a meng rei thei si lo a, zan lamah pawh a inhlawh loh phah ṭhak aniang.

Chawhnu class a kan ṭhutdun laichuan chanchin ka zawt a, "A thiam deuh tawh em, tunkarah in zo hman dawn em?" ka tih chuan, "Kar leh lam pawh kan la tih ka ring, a thiam thei lo lutuka, a zir hi chu a peih viau a, a tlaw chi a ni ve aniang" a ti mai a, inrinni ah an zir nileng dawn a, rei tak a ngaih chu ka ring tawh lo.

Last period kan neih loh vangin Peksangan lengah min sawm a, Mawitei leh Kimkimi te nen kan inzui haw hlawm a, noodles te leiin an inluahah kan chhum ho a, kan awmkhawm hi chuan nuihna tur a tam ṭhin a, kan hlim ve dar dar viau ṭhin. Kan haw dawn ṭepah inchungnu a lo chhuk a, chawhmeh leh chhang tih angreng a rawn pe ṭeuh a, Awmpuia chu "Ka jacket lak thar khi i duh ber lo thlang rawh" tiin a hrilh bawk a, a duhsak hmel khawp mai.

"A va inthlahrunawm duh awm ve, zuar phawt la, i hralh theih loh ka lo la zawk ang" Awmpuian a tih chuan "Lo la mai mai rawh, tlaiah miin an lo thlang dawn" a ti ve tlat a, nu thau lam leh nelawm hmel deuh mai a ni.

"Nakinah ka lo chho dawn nia, ka ṭhiante thlah pahin" Awmpuian a tih leh pawh chuan, "E, thlang tur an lo kal ṭep tawh, an la fai vek ang" a ti leh zel a, a hnial theih tak loah chuan an inzui chho a, rei fe a han thang a, a lo chhuk har ka ti lutuk chuan kawngka lam chu ka melh sek a, ka ṭhiante lah chuan mi an fiam a, Peksanga a phawk bawk si a, a ṭawng dan te chuan ka awm a ti nuam zan lo.

"An nula te hian a hope deuh a, a nu lah khian makpa chei taktein a rawn chei a, an be ṭha nufa teh ania, i dinhmun a nghing thei tlat" tih angrenga min fiamna chu nuihpui har tak a ni.

A lo chhuk chuan jacket dum nalh deuh hi a lo keng thla a, kan lo ensak ve vat a, amah phei chu lawm ang pawhin a lang lem lo. Peksangan a ha chhin a, a man a zawh lah chuan a han to ṭha khawp a, "Hak pawh a zahthlak dawn a lawm, ka thawmhnaw neih tawh ah a la to ber ang" a ti a, nuam a tih loh hmel riauin ka hria.

"Inrinni chu ka lo kal ve ang chu, taxi in ka lo kal anga, tlaiah min thlah veleh mai anga" ka tih chuan hnial hreh hmel deuhin min en a, "Kal ve ngei ngei rawh Rinte, nilenga thlahfal ngam chi a ni lo, Valarie khian a melh tai ka tih kha" Peksangan a lo ti phawr phawr a, Awmpuian mitmeia a khap zauh chu ka va hmu a, awm a nuam lo lehzual.

Dar thum pelh ah kan haw a, in ka thlen hnua kan inbiak leh pawh chuan kal mawlh chu ka la dil a, "A ho em mai, ni a sa thei bawk si a, keini kan tlan kual daih dawn a, i tan a ninawm dawn lutuk, Peka thil sawi te kha chu ngai thutak mah ta che, naupang thil ka zirtir mai mai a lawm, thik chi pawh a ni lo" a ti mai a, naupang anga a hmu tlat chu ka hrethiam lo, ka awm nawm nan a sawi ve mai mai a ni.

Zanah Benjaminan min lo be leh hlawl a, "I nu kha Ni Pawli ṭhian a lo ni reng a lawm, a eng nge na a, ka ni hian a sawi ṭha duh vak lo a; mahse, ka bialnu nu a ni tih ka hrilh a, mak a ti a sin aw" a rawn ti hlut a, a bialnu angin a sawi veleh tawp nia.

"A chhul lam niin ka hria" ka tih laiin "I hman chuan lo chhuah pui teh a, thil ei ho ang u, ka treat dawn che u nia, hlawh pawh ka pe leh ang che" a lo ti zung zung a, han tihpui leh chu ka hreh riau tawh lehnghal a, hnar rih a ṭhain ka hria.

"Amah sawm rawh, keichuan engmah ka ti duh tawh lo, ka tan a nuam bik lo a" ka tih pawh chuan "Vawikhat chiah, i lo hruai theih chuan thil ṭha deuh ka leisak ang che" a ti leh zel a, keiin ka hnial lui ve ngar ngar thung.

Zirtawpni tlaibanah Awmpuian min thlah a, inah lo lut kawiin thingpui te ka lumsak a, dawhkan kila kan titi dun laichuan message a dawng leh ṭhin a, a en hnuah a dah mai zel a, keipawh chuan ka zawt zui lem lo. Mahse, bathrooma a luh lawk hlan chuan message dang a lo thleng a, Valerie tih hming ka hmuh takah chuan ka lo ensak a, tum loh deuh thil ka tih chuan a dik lo ang ka rinhlelh ang thil ka hmu a ni mah zawk.

"Kan thlalak kha ka ṭhiante ka hmuh a, ngaizawng rawh min ti ve ringawt ania, couple in ang lutuk min tia" tih thu chuan min ti ṭim sawk, an inbiakna chu ka en zel a.

"U OP i mu tawh em, zingah ka lo kaitho ang che"

"U OP lehkha i zir em, tuition te min pe peih em" tih ang reng a ni nawk a, message chu tawi te tein a chhang ve a, Tuition pek a sawi pawh chu a zirlai chhuanlamin a lo hnar a, a chhan loh a awm nual bawk. Awmpuia chhan danah chuan huat tur chi ka hmu lem lo a; mahse, Valerie ṭawngkam erawh ka lawm hauh lo, ka pawi a khawih pha tlat a ni.

Bathroom aṭanga a lo chhuah rual chuan "Enteh" tih pahin a phone chu ka lo hmuh sawk sawk a, Message a hmuh chuan a ner ve lek lek.

"Engtin nge i chhan dawn?"

"Delete daih rawh"

"I chhang dawn lo em ni?"

"Chhan chhan a ngai lo" 

"Ka ngei a nia" ka ti leh ngawt a, ka bulah lo ṭhuin message chu a delete zui a, a kut lehlamin ka kut a hum tlat bawk.

"A ngaizawng che anih kha" ka tih chuan ka lamah a rawn thle buk a, "Ka ngaizawng ve lo, engah mah ka ngai lo" a ti fiah fak a, amah a huat theih si loh, lawm lohna hlirin ka khat bawk si.

"Naktukah chuan min hruai ve rawh" ka ti leh a, ngen tak tein ka ngen tawh, kal ve a, Valerie chu ka mitmei tala vau ka duh.

"Rei lote chauh kan zir tawh ang, lo ngaithei hram hram mai rawh aw, awm nawm loh phah nan hmang lo la, keichuan nangmah chiah a lawm ka duh che, min ring la" a awka ah chuan sawmna ka hria, ka ring ngei a; mahse tih a awm tlat.

"Ben hrep ka chak" ka tih chuan a lo nui suk a, "I van duhawm tak" tih pahin ka sam a lo chul a, "Ka mitah en rawh" a tih chuan en chiang tak ka ni.

"Hetianga ka en ang che hian tu mah ka en ngai lo, ka mitah chuan i hmelṭha ber, nangmah chiah ka duh che" zawi leh thu tak deuh hian a ti a, chumi hnuah lungchim zetin min fawp bawk.

A haw hnu chuan ka ngaihtuah tluk tluk a, engtin nge an inzirtir ang tih mawlh chu a ni, kha nu te khan a nuih var var reng ang em, Scooty an han khalh dun ang a, inngheng chial ten an ṭhu dun anga, Awmpuian a nuih let ve ṭhin ang em, no deuh deuha a biak chang tein engtin nge a chhan ang, a melh no ang em? Ka bialpa chuan nui hmel a pu reng nge; lawm vak lo chungin a en ṭhin ang? Ka ngaihtuah nasa lutuka ka hah zo.

Mut hmunah pawh chu ngawt chu ka vei, Awmpuia lehkhazir chhungin ka lo inngaihtuah leh chiam a, a lehkhazir zoin min lo biak chuan an kal hun tur ka lo zawt a, chawei khamah an kal anga, tlai ah daih an haw dawn anih hmel. Kal ve chu ka dil ngam ta lo a, an haw hun min lo hrilh turin ka chah thung. Chutih laimek chuan nutling ṭawng thawm ka hria a, "OP, naktuk chu tiffin kan lo siam dawn e aw, pawisa in pai bawk anga, dawrah thil tui deuh in ei dawn nia, tlaiah chaw lo ei haw bawk la" ti tu chu an inchungnu ngei a ni, vel tak chuan a.

An inbiak mawlh mawlh hnuah thawm a reh a, "Nuam awm hle mai a" ka lo ti zauh a, "Ni a sa thei lutuk, Scooty ka nawr nileng deuh thaw ang" a rawn tih chuan ka inthlahrung leh deuh. A hlawh zat tur ka zawt a, hlawh chu a tam phian a, chu chuan tlemin min hnem ve.

Kan inbiak zawh hnu chuan ka ngaihtuah zui leh chiam a, tiffin an pai anga, khawi lai hmun fianrialah emaw an ei dun anga, puan te pawh an phah mai thei, ka suangtuahna a Awmpuia nen kan picnic dan ang chiahin ka mitthla a, kan la tih dun loh kha an ti dun dawn bik ania, chu mai a ni lo; dawrah thil an ei dawn, nilengin an awmdun dawn a, chu nula te chuan nuam a ti vel khawp ang.

Lungawi lo lutuka ngaihtuahna ka kawm laichuan ka phone a lo ri leh a, mahse ka tum loh zawk a ni.

"Eng nge Benuih?"

"Naktuk chuuu"

"I va hman awm ve, kan hman ve lo"

"Ka hman ang chu, in tan te chuan.."

"Amah zawt rawh"

"Ka be ngam lo" huiha...a pawr ve theih tehreng nen, Unaunu bulah lah a duap zul zel bawk sia.

"I mood a va ṭha awm lo ve, tak takah...i u i lo hruai theih loh pawn nangmahin lo kal mai la, pawisa ka neih laihian thil ka lo treat ang che, thil tui deuh eipahin intihpui dan tur thar rel ila" a rawn ti ham ham a, mahni lo maha buai ve nak a laiin midang inngaizawng tur buaipui hman pawh ka ni lo.

"Ka hman lo" ka ti zet a; mahse, ngaihtuah chhuah zawk ka nei. A ṭha tak ang, ka puih a beisei nasa bawk a, min pui ve zuai sela a ṭha ang.

"Benjamin, khutah min kalpui lawk teh" ka ti teh hluai a, "Tehreng, khawihah maw?" a rawn ti ve zat a, rin aiin sawm a awl.

"World bank road ah"

"Thil tui deuh a awm em ni?"

"Awm lo, chawei khamah kan kal dawn nia, lo hman har suh aw, a pawimawh a nia" ka ti sawk sawk a, min hnial loin a lo aw ve leh mai a, kan inbe zo chu ka awm a nuam huai huaiin ka hria.

Zingah chuan hma lutukah ka tho a, ka tihtur ka ti zung zung a, ka chhungte thawh ve hmain ka insu zo diam a, eirawng ka bawl zawh ah chhuat ka nawt a, chawei hmain ka tih tur chu ka zo der. Nu Hlimin bazara ka peih ve em tih min zawh chuan ka ṭhiannu Mawitei damlo kan lawk ka ngaihthu ka hrilh a, engmah min zawt zui tawh lo.

Bena ka call a, ani lah chu a lo la mu pek a, kan han inkaitho leh rih. "Inchei a ngai em?" a rawn tih chuan inchei lo turin ka hrilh a, ral aṭangin kan thlir ringawt dawn a, min lo hmuh palh a hlauhawm a, an mit la thei tura inchei chu ṭhain ka hre lo, keipawh chuan t-shirt leh jogger pants ka ha mai a, khung lai bawra cheng anga lan chu a ṭha berin ka hria.

Ka inpeih hnuah pawh chuan a lo kal thei lawk lo a, Nu Hlimi leh unaunu pawh bazar tura an chhuahna a rei leh fu tawh, an lo haw hman ang tih pawh ka hlau ta mah. Sana chuan dar 11 a kawk va va tawh a, Benuiha chuan call pawh a chhang thei lo reng reng, ka tum lawk anga thil ka tih theih loh hi chuan hrehawm ka ti ngawih ngawih zel a, ka chungrilah hian min mawlh tlat ṭhin.

Vawi sawm vel ka call hnuah a rawn chhang ta hram a, "Pawnah ka awm" a rawn tih vang chuan ka chhuak nghal vat a, Gate pawn a lo ding chu ka va hmu pha.

"I va han rei em em" a inchei dan chu ka thlek a, khua a lum tehreng nen leather jacket te zuk ha chuan. Pheikhawk man to hmel leh lawk ṭha zet a bun a, a sam lah chu chung lamah a hui pial thlup a, hmanlai deuh tawh a sap street boy te pawh a ang a lawm le.

"Eng nge kan tih dawn?"

"Kal pahin ka hrilh ang che" tih leh a bike a lawn ka rual a, a tlan chhuah rualin ka ding leh zawk, ka han tla teuh em em lehnghal a, mood a ti uih leh zo vek.

Tlan paha kan tih tur ka hrilh chuan a nuih a han za em em khawp a, "In danglam bik vak loh hi" tiin a nui hawk hawk. "Ral aṭang chauhin kan thlir ang, inhmuh tir miah loh tur, an hmuh phak lohah zel kan awm a ngai ang" tiin ka hrilh lawk thlap a, sawinawi engmah a nei lo. 

World bank road kan thlen chuan dar 12 a ri hnai tawh a, ni a sa ṭha vawl vawl khawp mai, kawng lah chu a han khu em em khawp a, Mask ken nachang te lo hria ila ṭha tur. "Tlan pahin kan zawng phei dawn nia" a tih vang chuan kawngsir lamah mit ka len kual a, ani pawh a tlan chak lutuk bik lo. Mahse thui pawh kan tlan hmain rala an lo tlan phei chu ka va hmu a, Benjamina darah bengin "Let rawh, let rawh" ka ti chul a, a inher mai dawn emaw tih laiin a la ding tak deuh deuh.

"Inher rawh" hmanhmawh deuh chuan a inher a, kawi kan thleng ṭep tiha ka lehhawi chuan an ding tih ka va hmu thei a, Awmpuia chu Scooty bulah dingin a lo nawr mek a ni. Benjamina pawh chuan a hmu ve aniang a ding dat a, hnunglam chu kan thlir dun vang vang a, chutia kan en reng laichuan inphurin an lo tlan pheina lamah khan an tlan let leh a, a hmeichhia zawk chuan a khalh a, an tlan muang khawp mai.

"Kan thil tih dan hi a ho em mai" a rawn tih chuan "Ho awzawng lo, i thil tih ṭhin aikhan a ho lo fe zawk" ka lo ti pawng pawng a, chutih laichuan kan mi enthlak te pawh an ding veleh chiah a, tihdan tur an inhrilh mek a niang. Rei vak lo an din hnuah an tlan liam a, hmuh tur an awm tak loah chuan ka hnim ru veng veng a, ka awm dan chu a hrehawm hluah hluah.

"Kan zui leh dawn em?" Benjan a tih chuan zui veleh ngei ka duh.

Rei lo te kan nghak a, an rawn tlan phei leh mai lo, "An tawm dun a ni ngei ngei ang" pakhat lah chuan a lo ti ve sek a, lung a ti zing zual. 

"Kal tawh ila"

"A lo let ṭep tawhin ka ring, kan intawk thut ang tih a hlauhawm" 

"Min hre teuh lo em mai"

"Hria ang, Awmpuian min hai teuh lo" ka tih  chuan "A hre awm lo che em mai a" a lo ti leh kher a.

"Mit del a ni hleinem, tlan pel thuak pawh ni ila min hre ngei ngei ang" ka ti ve tlat a, chuti maia min hai theih ka ring lo a ni, keipawh ni ila ka hai lo chiang ang.

Mahse le, "Kan hria ang chu" tih leh tlan chhuah a rual ta mai, kawi khat kan pel awrh ang tih ah an lo let kan va tawk lehta nghal a, ka ṭhutna a san avangin birukna reng reng a awm lo, mihur bike chuang anga bawh mai tur nge ni. 

Kan intlan pel thuak a, ka va lehhawi chuan min hre lo anih hmel, thawk ka la hluai a; mahse, Benuiha pek chu a inher leh a, a va tlan pel leh thuak a, Valerie balance a ti buai deuh aniang an ding chu ka va hmu thuak a, kan tlan chak leh lutuka Awmpuia kha a rawn hawi em ka hmu hman lo.

"Mawla, tlan haw nghal rawh" ka tih laiin a inher leh a, chak tawkin a vung phei tawh. Scooty chuan kawi an lo thleng ve chiah a, Awmpuia chu a chuang tawh lo, a lo vawn pui laimek a ni, kan tlan pel leh fua a, ka va lehhawi laichuan Awmpuian min lo thlek  vung vung a, min hria tih ka chiang!? 

(End of chapter - 7)