BLUE BAYOU (CH - 8) by Ahmangaihi violette khiangte

BLUE BAYOU by Ahmangaihi violette khiangte

Chapter - 8

 

"Mawla mawla, engah nge khati khan i tih, inhmuh tir ka duh lo asin, khai aw...min hriat loh a takah..." ka kut lehlamin a darah ka chum dawm dawm a, hnunglam ka va hawi leh ringawt ṭhin. An rawn lang lo a, tlan haw daih chi a ni tawh si lo, Awmpuia khan min hai ka ring lo reng reng.

"Anih ka let leh dawn em ni?" tih pahin a tlan muang deuh a, let leh mai loh chu duhthlan tur dang ka nei lo, hetianga ka haw anih chuan a pawi zawk thei. 

"Awmpuia khan min lo en chiang lutuk, a thinrim ngawt ang" thawk ka la sek sek a, kan tlan chak lutuk vang nge ka hlauhthawn vang zawk ni, ka thinphu a rang dawt dawt.

"Tihian haw mai ila, a rawn biak hunah che i hre lo der mai dawn a lawm" a ti sam et a,  ka ngam teuh lo, Awmpuia berkher phei chu dawt ka hrilh ngam lo hrim hrim, chu loah, min hai ka ring lo.

"A chi loh, let mai ang" hreh zet chungin ka ti a, bike a din rualin ka insiam ṭha sawk sawk a, thaw a ipik lutuka thli thaw te pawh chuan boruak a ti veng lo khawp mai.

"Kan va let leh te chuan in inhauh phah mai mai zawk ang, a lo zawh hunah che 'Ka ni lo, ka chhuak lo' i ti tlat mai dawn a lawm" a ti leh ṭalh a, ka hriat tawh a zawnga mipa fing leh che fel ber, engkim chika ti thlip thlep ṭhin kha ka bum zo lo ang tih ka chiang.

"Min hau lo ang, min hauh leh ka chhang ve mai ang" ka ti thlarawk a, engtin nge ka chhan ang ka hre lo, insawifiah chu a ngai dawn chiang.

"I tih tlat chuan le" tih leh inher a rual a, va hmuh chu ka hreh ru ngang mai, ka insawifiah dan tur mawlh chu ka ngaihtuah a, a thinrim nasa dawnin ka hria a, hrehawm ka ti ru ngawih ngawih tawh. Benja pawh chu hnaih ṭha ngam loin a hnungah ka ṭhu khawng auh a, seat hnungah ka invuan bet ṭung bawk a, kawi kan thlen dawn te chuan ka hlauthawng ruai mai a ni.

Kawi kan va pel chiah chu kan intawk hlawl mai, kan tlan muang ta bawk a Awmpuia nen chuan chiang lutuk tak maiin kan inmelh a, kan inpelh hnuah ka lehhawi vat a, ani pawh a rawn hawi ve chiah bawk. "Ding rawh" ka tih chuan Bike chu a ding ri hrawk a, kan hnunga Scooty pawh chu a lo ding ve chiah a, Bike aṭanga ka chhuk laichuan an lo inhung fel tawh.

Awmpuia chu a rawn pen phei hlawk hlawk a, hmachhawn hreh sateh mahila lo melh duh loh chi a ni tawh lo, ka dinna aṭang chuan zam ru lutuk chungin ka lo thlir a, zam luatah thinphu a rang zaih zaih a, Benja lo nui te chu ka ngei hlur mai.

"Eng nge i tih?" ka bul a rawn thlen ruala a tih chuan ka melh ran ringawt a, pha buai lo zawk ila ṭhain ka hria, phat theih pawh a ni tawh lo.

"Ka lo kal ve" ka ti chu nur fein min melh a, chutah Benja chu thlekin a ner sawk a, keipawh chuan a hnunglam chu ka va thlek ve vat a, Scooty bul aṭangin Valerie'n min lo thlir ve reng bawk.

"Engthil nge tih in tum a?" lawm lo awka ka hre ta chiah a, sawifiah rawh ti niawm tak hian min en chik a, chhan nawi hlek pawh a ngam awm loh.

"Nizanah ka sawi vek tawh kha, ka lo kal ve duh ka tia, ka rawn inhruai tir anih hi" thawk a la hawk a, ka mitah min en ran bawk.

"Thil in ei tawh em?" ka tih chuan min chhang lo, min en run a, inthunun a tum zia pawh chu ka hai lo, a inpetruh nasa.

"Tih tur a awm lo em a, ka lo kal ve mai mai a lawm, thlah pawh ka ngai chuang lo aaa..." ka ṭawng tawplam chu a lawi rat a, sawitur ka haihchham vek, insawifiah dan dang pawh ka hre tawh lo. Chutih laiin Benja chu a lo nui ruh ruh reng a, Awmpuian a va melh veleh a hawisawn a, a rawn hawi let leh ṭhin a, a nuihza insum chu ka ngei khawp, kalsawn tir mai tur nge mawni.

"Min lo zui teh" a ti bul hmuk a, kawng chhak lam pana a kal chu ka zui ve thuai a, a bul ka thlen rual rual chuan ka banah a lo man a, min pawt sawn leh te te.

"Min ti zak hle mai, min ring miah lo em ni, kan thil tih tur hre lo pawh i ni lo a, i rawn kal chu thuhhran mipa te i rawn inhruai tir a, saw pa saw i u ex kha a ni lawm ni" a ṭawngring lo nain a ṭawng a sehchilh nasa hle a, midang chuan an hre pha ve kher lo ang, midang hmuh laia inhauh hi a duh ngai lo.

"Min hau nghal ringawt suh.." ka ti mawl tawp a, ka melh ṭha ngam mang lo. "U Op'  Valerie'n a rawn tih rual chuan min thlah vat a, kochhak lam chu hawiin min rawn melh leh zat a, a lamah ka tawlh hnai hret hret thung.

"Dar engzah thleng nge in zir dawn?" ka ti zawi sep a, ka inthlahrun zia chu aw....

"Nilenga kan zir tur thu ka hrilh che kha" a ti chang bawl a, ka hre lo pawh a ni bik lo.

"Anih chuan ka haw leh mai ang" ka ti chu a lo chek hluk a, "Saw pa rual sawn maw?" tiin a ner leh sawk. Benja chu a va melh a, tui loh hmel fein min melh leh a, kei erawh ka ṭi dak thung.

"Tih palh, Bena saw a remchang em a, min hruai tur dang ka nei bawk si lo a lawm" ka ti niah niah a, "Eng rilru puin nge maw i rawn kal reng reng le?" a tih chuan ka sawi ngam lo; mahse, rindan a nei thiam vek tho ang.

"Rinsangpui, min enthlak i tum ti raw?" a ti leh khauh a, a sawidik chiah. Mahse "Teuh lo" tiin ka chhang a, pha lo thei ka ni lo, tun dinhmunah chuan.

"Lo kal ka duh a, ka rawn in dah tir" tiin ka ṭang ve tlat.

"Chhuanlam siam a ngai lo, lo kal i duh chhan chu ka hria a lawm.." a tih laimekin "U Op, dar 12 a pel tawh a, thil ei phawt mai ang" Valerie'n a rawn ti leh a, Awmpuia chuan a va thlek zawk a, a chhang let lo thung.

"Min lo nghak ang che" a tih chuan phawk fein ka melh a, "Kawngthlang lamah sawn lo va ding rawh" a ti bul leh hmuk a, ka tum bur tawh. Kawngthlang lam a pan chu ka zui veleh a; chutah, Benja dinna lam chu a pan zui a, "I haw thei tawh ang" a va ti bawl a, Benja pawh a hawihai khawp mai.

Min rawn thlek a, "Haw mai rawh, an rualin ka lo haw ang" ka lo ti ve sawk sawk a, "Ka rualin i haw thei reng a lawm" a la ti zui a, ka lo inthlahrun ruk tawh nak alaiin.

"I rualin a haw lo ang, kalsan rawh" Awmpuian a ti leh hmiah, "Kal mai rawh" hmui phuna tiin ka mitmei zawk zawk a, han hriatthiam ve mai awm, "I va ho tak" a ti leh kher a, Awmpuian a melh dan te chu a hmu thiam ve lo em mawni.

"Min kalsan mai rawh, an thil zir hi ka en duh a, keini chu kan haw tlai dawn a lawm" pangngai thei ang berin ka ti a, ka nui ngam ve hlek lo.

"I tih tlat chuan le" a ti ve ta hram a, nuihza insum hmel a la pu reng lawi a, kan mood in an loh hlawm zia chu aw. Chutih laimek chuan Valerie a rawn phei a, "Engtin nge kan inphurh haw dawn?" a rawn ti heu mai a, ngaihdan pawh ka nei thiam lo, kan awmdan a laklawh zo vek.

"Vawiin atan chuan kan duhtawk mai dawn nia, pakhat ka dah chhungin pakhatin min lo nghah mai a ngai ang" Awmpuian a tih chuan ka melh vat a, Benja tlan chhuah tum uk tawh pawh chu a rawn hawi veleh.

"In buai anih kha, i bialnu kha ka lo phur mai ang" a rawn tih chuan thip fahranin ka va melh a, Awmpuia erawh a ngawi reng. Motor a lo tlan zui nen kan ding ngawi ṭhap a, thawm a reh veleh kan inmelh kual a, inthlahrun tawh nak alai chuan keimah vangin an zir rei loh phah dawn a, hrehawm duh tak a ni.

"Sawlai dawr kawtah khan min lo nghak dawn nia" Awmpuian a tih chuan keimah min lo en a, a pawi ka ti lo, a nghaktu zawk nih chu ka duh, ka tel loa a let leh dawn aichuan.

"Thil te eiphawt ila, ka ril a ṭam e" Velerie'n a tih chuan ka lo ner nang a; mahse, Awmpuian min lo en reng avangin ka tawp leh vat a. 

"I lo awm ngam em, dawr kawtah ka va dah lawk ang" a tih laia a hmelah chuan lungawi hmel a la lang lo; mahse, a awki chu a dam dup a, mi inthunun ve thei tak chu a ni.

"Ngam tho e, i rei dawn loh chuan" Benja bawk a lo inrawlh leh a, "Naa...lo chuang mai mai rawh, dawr kawtah chuan ka va drop ang che, inti kual peih mai mai" a lo ti zawt zawt a, "Lo ṭawng suh, i buaina tur a awm lo" Awmpuian a lo ti leh khawl a, a en dan ah pawh a ngaithei loin a cho tih a hriat hliah hliah.

"Dawrah chuan min va dah hmasa mai rawh, U Rintei chu a ṭhianpa nen hian lo awm rih mai sela, keimahin hetah ka awm ngam lo" pangchang fea Valerie'n a tih chuan ka lo thaw huai mai. "Nia, va dah hmasa mai rawh, ka lo awm ang" ka ti ve vat a, Awmpuia chuan min kalsan a hreh hmel khawp a, Benja a melh kher danah eng emaw tak chu a ngaihtuah tih ka hria. 

"Ka rei lo ang" ka bula a tih hnuah Scooty awmna lam a pan a, Valerie'n a zui thuai bawk. Benja chu a lo inhung ṭha leh a, Bike-a la ṭhu chung chuan a rawn nui suk suk reng a, Awmpuia tlan chhuak tur hmel chuan ka awm a ti nuam meuh lo, min rawn thlek vang vang a, engmah sawi tawh loin a tlan chhuak bawk. An tlan liam thleng chuan ka thlir a, a mi uap nat zia pawh ka hre chawpchilh. Thawk ka la vang vang a, rilru a ipik ṭun lawi a, ka kal chu inchhir tawh tak ka ni, hetianga awm hi ka tum dan a ni lo maw le.

"Heih"

"Eng nge?" a rawn nui vur vur mai.

"A va den ve?" 

"A thinrim a lawm" 

"Anih dawn kha, cool reuh hle mai"

"Mawl deuh deuh khan lo ṭawng ṭhin mah ta che, a insum zia kha i hmu ve reng sia" a lo nui huk a, "Kan awm loh hunah kut a thlak lo ang che maw" a ti leh heu a, lehta mai mai ṭhin a.

"Teuh lo mai, chutiang mi a ni lo, ṭawngkam vin pawn min be ngai lo" ka tih chuan a awih loh hmel khawp.

"Ngawichawi deuh hi a lerh duh nek ania, an rinawm lo duh phian" a rawn ti chu ka lo melh rawm a, "I ngaih ang kha a ni lo, a lerh lo hrim hrim" ka lo ti hlak hlak a, "Aaa...a zia ka en khan a lerh ka ring tlat" a ti leh hram a, ka huat tawk a tling khawp mai.

"I hriat chian loh vang anih chu, ani aia fel ka la hre lo, a rinawm lo ngai lo bawk" ka ti vin deuh hlar a, a lo nui hui ringawt.

"Eng nge i nuih a?" ka tih chuan "Rintawk hmel viau si engah nge i enthlak duk duk?" a tih chuan ka dang lel, eng nge maw ka hriat le, ka a zo tawh aniang!

"I ring tak tak lo chu anih hi hei, hmeichhia kha i thik bawk a, helai thleng thleng kan enthla dun a, i bialpa awmdan ka hmuh khan i dik lo zawk a ang riau" min ti zui a, chhan dan tur pawh ka hre lo e a.

"Ka sawi dik a ni maw?" 

"Ka ring reng tho a lawm, ka thik chhan te chu a hmeichhia khan a ngaizawng em a, ka awm a ti nuam lo mai chauh a lawm, Awmpuia vang pawh a ni lo" ka ti nawi niaih a, ka han inthiam chawp leh rih.

"Induhtawkna nei ve ta che, hetiang te chuan a ning mai ang che, hmeichhe ninawm chi i ang tlat" a rawn tih chuan ka hau chungin ka melh a, zawk zawmah chuan a, ani pawh eng nge anih bik.

"I nihna anih chu" ka ti hmak a, min biak leh pawh chuan ka chhang duh tawh lo. Ka inngaihtuah lungpuam a, keimah ka inthiam chawp bawk a, Valerie'n a duh zia pawh a hre vek a, a Message te pawh ka hmuh pui a, hetianga ka awm hi a hrethiam lo viau tur niin ka hre lo, ka tih awm tak zawk niin ka hria, tu hmeichhia nge hetiangah ngaih ṭha taka awm thei ang ni, min hauh a tum anih chuan ka ṭang ve tlat tawh ang.

Rei vak loah Awmpuiia chu a lo lang a, kan bul a lo thlen hma chuan Benja chu kal turin ka tur sawk sawk a, Awmpuia lo ding chu ban a vai khum zauh hnuah a tlan chhuak a,  Awmpuia pawn a en ve vung vung mai. "Lo chuang rawh" a rawn tih chuan ka tum deuh bar a, nichin anga inthlahrung deka awm kha chu ka tum tawh lo, ka dik lohna ka hre bik lo a ni.

"Thil chu in ei hmasa dawn em?" tih pahin ka va chuang a, "Dawn lo" tih zawngin min chhang a, Tiffin te kha an paiin ka hre sia.

Ngawi rengin kan inphur a, min be lo a, ka be tawh bik hek lo. Dawr kawtah Valerie'n min lo nghak ran a, min lo nuih deuh sang bawk. Ka chhuk hnuah a lawn kai nghal tharh a, an inphur ka hmuh chuan keimahah danglam a awm leh tawh, hmuh nuam ka ti lo, minti hrehawm ngawih ngawih mai a ni.

"Ka rei lo ang, daihlimah lo zuk awm rawh" Awmpuian a tih pawh chuan ka chhang duh lo a, ka melh reng ringawt. Ka chhan tak loah chuan ngawirengin a tlan chhuak a, hnutchhiah bik a ka han ṭang te chu ka tha a  na thar leh a, awm zawka ṭang duh chung siin ka inkhawngaih hlur mai, an inphur liam ka hmuh vang kha anih ka ring.

Dawr sir a ṭhutthleng an siamah chuan ka va ṭhu a, ka ṭah a han chhuak em em khawp a, midang hmuh loh laiin mittui ka hru zauh zauh reng. Rei vak loah nu pakhat lo kalin ka bulah chuan a rawn ṭhu ve a, min be siam siam a, eng nge ka tih a tunge ka nghah tih angreng te min zawt a, ṭha deuh chuan ka chhang let ve a, rei ṭhu loin a tho leh thuai thunga, dawr neitu a niin ka hria.

Ka phone sana ka en deuh reng a, Benja kha lo inphurh haw tir daih ila ṭha tur ti tein ngaihtuahna ka nei a. Mahse, chutiang chuan ti ngat la chu a sawhkhawk a awm ngei dawn a, ka bialpa nena kan inkar chhe tur anga ka ngaihtuah chuan ka lungchhe zel bawk si a, ka ngaihtuahna ringawt pawn min ti hrehawm.

Rei deuh chu ka nghaka, a lo thleng har reuh khawp mai, ka ril lah chu a ṭam tawh khawp mai a, thingpui a lo han in te anih ka ring thul, Valerie te nufa khan an sawm loh ka ring lo, thil min eisan anih chuan ka rilru a na ngawt ang.

Minute sawm dawn ka nghah leh hnu chuan ka lama a lo tlan phei chu ka va hmu a, ka ṭhutna aṭangin ka tho thuai a. A lo thlen ruala "I ve rei ve" ka tih chuan min chhang let lo chiang hle, min en deuh vang vang a, thil a ei tawh em tih zawh ka tum laitakin "Haw vat ang" a lo ti bul hmuk a, tum bur chungin ka chuang veleh a, biak pawh chu huphurh awm duh tak a ni.

Inbe loin kan tlan leh ngar ngar a, sawi tur ka ngaihtuah nasa ngang mai. Ka sawi tur hre lo chuan a kawngah ka va vuan ringawt a, hria ang pawhin a awm lo, a ngawi reng ringawt. Ka thinin a tuar lo deuh a, "Lo ṭhu hnai rawh, i ṭhu hla lutuka a hrehawm" tih leh ka lama pawh ka rual a, engmah sawi loin a lo tawlh hnai ve leh mai a, a lungawi lo viau aniang, biak takngial pawh min be peih lo.

An in lam min pan pui a, sawisel ka nei lem lo, tunah chuan haw ka chak rih lo a, kan pahnihna sawi ngai kan la nei tlat, hetiang boruak karah chuan inhawsan thei kan ni rih lo, a duh leh min hauin min an khum sela, keipawn eng emaw chu sawi ve ka duh.

An inbul kan thlen rualin ka chhuk vat a, "Lo zuk chhuk rawh" a ti leh tawp a, chahbi a dah dawn aniang an inchungte in lam a pan a, chhuk duh bik loin stepah ka lo la nghak a, a lut rei lem lo. Stepa kan inzui thlak laipawh chuan a la ngawi ta reng a, sawi tur a vang duh takzet. Inchhunga kan luh veleh tui bottle a la a, min rawn pe ringawt a, ka tui a hal hman bawk a ka lo in nghal khawlh khawlh a, ka in zawh ah a dah leh thlap bawk. Ṭhutthlengah ka va ṭhu a, ani dawhkan bulah a ding thung a, min be chuang loin min en leh ringawt ṭhin a, sawi duh nei ṭeuh sawi hreh hmel a puin ka hria.

"Min en reng lo khan sawi rawh" ka ti khawl a, a lungawi lo anih chuan sawi ve mai sela, ngawirenga a awm aichuan ka duh zawk.

"I ril a ṭam em?" a rawn ti chu phawk fein ka melh a, rilru dam tak tak si loa ṭha taka inbiak hi ka duh lo, hauh inring sain ka awm a, a pai ve ṭun tih pawh ka hria.

 "Ṭam lo" tih pahin ka melh ran a, ani pawn min la en ve reng tho.

"I duh chuan min hau la, min ankhum rawh, ka lo kal chhan dik tak i hria a ni lawm ni" thawk a la hluai a, chutah a dinna aṭanga kalsawnin tuidehna lam a pan a, gas a on ri ka hre zui zat bawk.

"Min ngei anih kha, dik tak chuan ka thik a lawm, a rilru puthmang ka hre ve vek a, ngaihngam deuhin ka awm thei lo a ni mai, thlahfal che u ka duh loh vang anih kha, min ngei phah anih pawn a pawi lo" ka ti leh mawlh mawlh a, a rawn kal phei chu chik deuhin ka lo en a, min kalpel leh hmiah thung.

Pindanah a va lut a, a towel rawn la chhuakin hmai te a va phih a, a lo let leh chuan "I bag kha dah rawh, thingpui kan in dawn nia" tiin min kalpel leh a, a awmdan chuan min run hluah hluah, sawi dun ka duh a, sawifel pawh ka duh, hetia a ngawih hian boruak a ti chhe zual mai mai a ni.

"Lalawmpui, ti nge min peh hel reng a?" pindana a lut tur chu a ding dat a, rawn lehhawiin min en vang vang a, "Ka ngei lo che, a tawk tawh, ka ngawih chuan nangpawh ngawi rawh" fiah leh chang zet hian a ti a, ngawih chu ka duh loh dan ber a ni.

"Keimah vangin an hau che a ni maw? Chuvang chuan a mi min biak duh loh" ka tih chuan a ner sak a, "Min ring miah lo hi ka rilru a na khawp mai, sawi tur pawh min ti hre lo" dar a kan ak a, ka ring lo tih chu phat ka duh a, amah ni loin Valerie zawk kha a ni ka buaina chu.

"Valerie zawk kha a lawm, a ngaizawng che a..nang pawn..." ka ti chiah chu, "A ni lo" a lo ti khawl a, ka ṭawng tawp chawt.

"Min rin loh vang a ni; mahse, demna che ka nei lo, hetiang khawpa min ring ngam lo tura ka siam che hi pawi ka ti, ngaih ngam taka ka awmtir theih loh vang che hian ka indem bawk" ka mitah tak min en chungin a ti a, a aw ri chuan min vilh ngut ngut, a rilru ka tih nat zia chu a aw ah a lang a, a mitmengah a tih tak zia ka hmu thei bawk.

"I tan ka rinawm asin, i hma ah hmeichhe dang an la awm lo a, ka duh hmasak ber i ni a, vawikhatmah ṭhen che emaw midang neihsan tur che hian ngaihtuahna ka la nei ngai lo, ka awmdan eng hian nge rinhlelhna neih tir ṭhin che le..." a ti leh vang vang a, keipawh chu ka rilru a na a, hrehawm ka ti ve ngawih ngawih. Engemaw sawi ka duh a, insawifiah ka ngai hle tih ka hria, ka ring lo hulhual anga min ngai chu ka duh dan a ni lo takzet. 

"Nangmah vang a ni lo ka tih kha, hmeichhe dangin an ngaih melh che hian hrehawm ka ti a lawm, ka rin loh vang che a ni lo" ka ti zawi sep a, ka ṭawng zawi hle tawh.

"Engtin vak nge tisela min tih, hmeichhiain min biak ṭhat a, min ngaihzawn te hian nuam ka ti bikin i ring em ni, i lo hua angem  tih te, i duh loh zawngin ka awm angem tih te hi ka ngaihtuah ve reng ṭhin asin" a tih phei chuan a inthiam lo zual a, a tihdik loh a awm loh zia pawh ka hrechiang.

"Tihpalh" a tih ri chu zawi tak a ni. 

"Nidangah chuan hetiang hian awm tawh suh, inthiam lohna i neih pawh kha ka duh chuang lo, hmeichhe ṭhenkhat chu nangpawn i hriat ve tho kha, nang chu hoteah i chiai vak zel a, hrethiam ṭhin viau che mahila hrehawm ka ti ve tho a nia, thil awm lo buaipuia inhau tur pawh kan ni lo, chuvangin hetiang hian awm tawh suh aw" a tih leh chuan ka bu sawk sawk a, chutah ka lam rawn panin min lo kuah hlun a, a kawngah nghet deuha kuahin a awmah a bei thlam a, thawk ka la vang vang bawk.

"I ril a ṭam tawh em?" ka sam a rawn chul hliau hliau a, a hmel ka han en chuan kan mit a intawng chat a, ka lunga chhe deuh ṭun mai.

"Ih maw....dik tak chuan ka hlauthawng thei lutuka, i rinawm dawn tih pawh ka hre tho a; mahse..." lu a thin vang chuan ka ngawi leh rih.

"Midang ka neihsan che i hlau em ni?" a tih chuan ka bu leh vat a.

"Midang ka neihsan lo ang che tih ka tiam ang che, tun aṭang chuan hlau tawh miah suh, miin ṭha taka min biak laia lo biak chhiat hi a ṭha lo a, a chang hi chuan ka be ṭha mah mah em mawni ka ti ve ṭhin tho a lawm, nang lah hi i lo hlauthawng hman ziah a..." tiin tawi tein min nuih a, dawt leh thu dik lo engmah a sawi lo ang, ka awmdan a sawi pawh chu thil dik tak vek a ni.

"Vawiin kha a pawi viau angem, in zir rei loh phah bawk si a" ka tih chuan, "Pawi viau lo e, zirna hun a la awm a lawm" a ti mai a, a rilru a buai hmel riauin ka hre thung a, Valerie khan a hrethiam nasa mai dawn si a, an hauh phah ang tih pawh ka hlau.

"A nu a hrilh chuan..."

"A hrilh tawh ang"

"A hau che angem?" a nui ringawt a, ka sam rawn hui kiangin dimtein min lo fawp a, ka lo dawh vang vang ringawt.

"Lo ṭhu rawh, thingpui ka va siam ange?" ti a a kal chu ka zui leh vat a, "Keiman ka lo siam ang, va intifai rawh" ka ti ve sawk sawk a, min hnial lem lo.

Thingpui ka siam chhungin a va insilfai a, bathroom aṭanga a lo chhuah leh chuan "A la hma bawk a, Motor silna ah ka va kal teh ang, inrinni hi an buai ve ni ania" a rawn ti a, "Min thlah kher pawh a ngai lo ang" ka ti chu min lo hnial leh vat a, "Scooty a awm a lawm" a ti a, pindan lam a pan thuai bawk.

A inthlak zawh hnuah thingpui kan indun a,  min zawh pawh ka rin tawh lo hnuah Benja chungchang min zawt leh khauh a, a thik ve deuh aniang "I inṭhian ṭha viau em ni, a ngaizawng deuh che a ni lo maw?" a ti mauh mai a, a awm ang lo lutuk chuan nuih a ti za deuh. Mahse, a thutak em avang chuan ka nui ngam bik lo. "Unaunu a atchilh a lawm, a mark tih ṭhat a duh vangin min kalpui peih mai mai anih kha, ka tihpui a la beisei a" tiin ka hrilhfiah a, thik angin a awm lo na a, ngaihṭha zan lo hmel a pu thung.

 

"Mipa a nia, nangpawn i la hrechiang tak tak lo ania, khawiah mah inhruai tir tawh suh, misual tak te pawh a lo ni thei, hriatchian loh hi rin ngawt ṭhin loh tur" a ti fiah fak a, zan reia kan chhuah dun kha hria sela chuan a pawi thui khawp ang le, Benja leh unaunu pawh hrilh an ngaiin ka hria, an lo sawichhuak palh ang tih mawlh ka hlau.

"Ka inhruai tir tawh lo ang, vawiin ang kha chu ka sim nghal hmak" ka lo ti zung zung a.

"I u khan a duh loh em kha, tihpui a chi loh ang, a mihrang zawk lam i ṭang deuh em mawni, in buai phah mai mai a nge" a tih zawm leh a, chu thilah chuan keipawh inngaihtuah chian ka ngai, ka chhungte zawkin an duh lo anih laia lo sawi pui hi ka tih tur a ni lo maw le; mahse, Benja hi chu han huatpui chhan tur ka hmu lo miau a, ka hriat chinah phei chuan miṭha tak a ni zawkin ka hria.

Phone-in mi tu emaw a bia, "Ka lo kal nghal a ni mai, tlai lam chu ka hman rei zawk a lawm" a tih vang chuan no te chu ka va sil zung zung a, insiam vak a ngai lo bawk a rei kan awm tawh lo. Stepa kan chhoh laichuan ka hma ah a kal a, kawng a chhuak chiah tih ah nutling aw ka hria a, "In scooty zirnaah i bialnu a lo kal a ni maw, Matei khan in inhau a tiin ka hria, chuvang a mi in lo haw hma..." nuiza aw zet hian a ti a, ka han lan ve rualin min lo melh vat a, Awmpuia pawn chhan ngaihna a hre bik lo, Valerie nu chuan min lo nuih vur vur a, ka zak ru khawp mai.

"Motor silna ah ka kal dawn a, in inah chahbi ka lo dah mai ang" Awmpuian a tih chuan Pekan eng nge a tih a lo zawt a, inbe mawlh mawlh chungin inchhungah an inzuilut a, keiin pawnah ka lo nghak thung.

Helmet nena a rawn chhuak leh chu Valerie'n a rawn zui a, "Sunday ah zir leh ila, duh leh U Rintei pawh lo kal ve tawh mai se" tih pahin min rawn melh kher a, ka melh rum lek lek.

"Sunday chu ka hman lo ang, inkhawm banah tih tur a tam ṭhin a" Awmpuian a tih vang chuan ka chhang let duh ta lo a, inherin Scooty lam ka pan nal nal bawk. Chutih laichuan Valerie ṭawng thawm ka hre leh a, "Petrol kan lak tam ve tehreng nen, a zahve pawh kan hmang hman lo ang a, vawiin chu bad day a ni ringawt" zawi angreng deuh hian a ti a, ka va melh rum hrak tawh. Mahse, min en loin Awmpuia a lam a hawi daih a, Awmpuian a rawn kalsan hnu pawh chuan a la ding reng a, min thlir liam a tum a niang.

"A nu khan eng nge a lo sawi a" zawitea ka zawh chuan "Engmah a sawi lem lo" a ti liam puat a, inchhungah khan sawi a neih ka ring tlat a, min hrilh hreh anih ka ring bawk.

"Sunday ah chuan in zir dawn lo tak tak em ni, duh leh zingkar a thawh aiin zirpui mai la" kan tlan chhuah hnuah ka ti leh a, vawiin thila ka inthiam loh em vang a ni, min vengthawng lutuk dawnin ka hria a, awm a nuam mawlh lo.

"Inkhawm a ngai, ka hman leh tlaiah ka rawn leng ang" a lo tih chuan phur tak ka ni. "Hman la...zanah emaw pawh" ka lo ti chung a, "Ka tum dawn nia" a tih chuan a tur ah ka ngai leh hmiah tawh a, a ṭhulh leh si chuan ka rilru a hrehawm leh khawp ang.

Kan thlen chuan Gate ah kan inmangṭha a, inah nu Hlimi chauh a lo awm a, TV en pahin chana a lo kheh mial mial a, Unaunu erawh a leng chhuak anih hmel. Inthlak paha ka phone ka en chuan Message a lo awm vang a, "Engtin nge in awm tak?" tih hi Benjaminan min lo thawn a, ka hrilh duh dawn em mawni.

"Engtin nge awm se min tih, in ka thleng diam tawh" ka ti chu a rawn chhang rang nasa mai.

"In inhau em?" ka nui ringawt.

"Hau lo e" 

"Ka awih lo, hauh loh chi pawh i ni lo" ka ner nang a, min lo ngai chhe ve hle aniang.

"Ka duh zia hriain min hmangaih zual phah sawt" tih hi ka va thawn let a, a rawn chhang ta lawk lo.

Choka a ka chhuah leh hnu feah a rawn chhang a, "Tactic thar anih chu, ka'n ti ve teh ang" a rawn ti pek a, a tih tak tak chuan a mawl ka ti ngawt ang, Unaunu leh Awmpuia chu chhim leh hmar ang vela inpersan an ni a, anni inkar leh keini inkar chu khaikhin chi ah kha ngai lo, Apply buai lo sela a ti fuh zawk ang.

Unaunu lo haw lah chu a rawn hlim haw nasa mai a, a star pa kha a bialnu nen an lo inṭhen a ni awm e, "A bialnu khan ka star tih a hria a, an lo inhauh phah a niang, ka tihbuai hmain a ṭhen vela, ka neih sak hmak anga a ni mai" a ti ham ham a, "A mipa khan a duh ngawt che em ni?" ka tih chuan, "Ka kherh tak tak chuan a awn ruai ruai ang, ka zei zia a la hre dawn a lawm" a ti leh pek a, a zei viau chu ka ring, ngaihzawng pawh 10 chuang zet a nei tawh.

"Benja pawn kherh ngar ngar che a tum kha, tu nge zei zawk ang che u le" ka lo ti zauh a, "Khapa khan ka bialpa angin a lo insawi zel a, ka star pa bulah pawh ka pha nasa lutuk, ka hmu leh anih chuan a chak lo ang" a ti hlak hlak a, a nu lo pheiin kan ṭawng a lo hre pha leh sia, "Tu maw chak lo ang" a rawn tih chuan a ngawi zui hmak a, pindan lam a pan nghal nal nal.

Zanriah eikhamah thawmhnaw tlem ka su a, Awmpuia erawh a la haw lo, a khat tawkin Message kan inthawn a, ṭhahnem a ngai lutuk hi ka khawngaih ṭhin, a chhungte pur tur an awm si lo a, anihna takah chuan keini aipawhin an khawsak a harsa zawk a, chuvangin a mamawh a thawhchhuah ngei ngei a ngai a, khawngaih viau mahila ka pui thei bik si lo, hetia lo support hi ka tih theih chhun a ni, vawiin lama ka inchhir em em chhan pawh kha a ni tel a, a inhlawhna ah ka tibuai a ni ber a, an inluahna te an ni lehnghal, lawm loin lo ngai haw viau sela chu harsatna lian tak tawk thei a ni, a tir khan chutiang chu ka ngaihtuah thleng pha lo a, hetia ka ngaihtuah let hnu hian hrehawm ka ti telh telh.

Choka a tui ka in laiin U Lizzy a lo phei a, min melh zawk hnuah pawn lam a pan a, a hmanhmawh em avang chuan ka va thlir zui a, Gate lam a pan nal nal mai. Thawm dim deuhin ka chhuak a, Gate bula a ding chu ka va thlir vang vang bawk. Han koh mai ka tum lai chuan Gate pawn aṭangin thil an rawn vawm lut a, Unaunu chuan a chhar hnuah a vawm chhuak leh rawk a, lehlam ami in a rawn vawm luh leh chuan eng nge anih ka la hre lo, thil dum a niin ka hria.

Vawithum ve ve an invawm tawn zak zak hnuah Unaunu chuan a zak zeh ta hmak a, lo inherin a rawn kalsan nal nal bawk.

Phawk fea ka lo en lai chuan "Saw mihring saw ka kham lutuk" a ti bak hlur a, engmah pawh ka zawt hman lo a lut nal nal. Gate lam chu ka va thlek ngial a, a thim deuh avangin tumah ka va hmu pha lo a, Benuiha bak a nih ka ring lo, thil a rawn pe anih hmel.

Awmpuian a haw tawh thu a rawn sawi a, Peka erawh bungraw thiarin a inhlawh a, amah chiahin a awm anih hmel e. Leng tura sawm ka chak khawp a; mahse, Sunday ah lo len a tum tho a tiin ka sawm hreh a, hahchawlh ve te pawh a duh ka ring. Nu Hlimi TV en na bulah ka va ṭhu ve reng a, ka tai a na uarh mai a, ka period dawn tih ka hre ru rauh rauh bawk.

Sana ka en chuan dar 7 a pel awrh a, thil thlum ka eikhat ta deuh a, chocolate ei ka chak viau mai, Pads kawlsa ka nei tam lo bawk a, zanina ka period chuan naktuk sunday a ni si a, kan vengah dawr inhawng a awm leh dawn lo a, va lei sa mai a ṭhain ka hria. Nu Hlimi ka hrilh chuan "ORS min lo lei nghal la" a lo ti var a, ka thil leina tur te pawh min pe tel nghe nghe.

Muangchang angreng deuhin ka kalchhuak a, Gate ka va hawng chu ka phu chiam pek!  Lalbena chu Gate sirah a lo ṭhu sawp nuaih a, min lo thlek nasa mai. A tum zawk ka ni lo aniang chu a ner nung a, eng nge a tih ka zawh lah chuan min chhang lawk lo a,  thinrimna a nei emaw tih tur a ni.

"Heih, nichin a mi kha nangmah i ni em?"

"Eng nge a sawi?" phawk fein a rawn ti a, anih ngei hmel e.

"Saw mihring saw ka kham lutuk a ti" ka ti chiah chu a ṭhu khawng auh a, thawk a la deuh hluai.

"Engthil nge i pek a?" ka tih chuan "Nuts chi hrang hrang, kan nih laikhan a duh thei lutuk a, vawiinah ka niin a lo hawn ṭeuh a lawm" tih pahin zial a ṭan a, "Khawiah nge i kal dawn?" a ti zui zat a.

"Dawrah ka kal dawn?"

"Lo ṭhu ve zawk la"

"Ka hman lo"

"Rei lo te inkawm lawk ang, keipawh ka haw ṭep" a tih chuan ka khawngaih ve leh deuh a, ṭhu lem loin bang ngheng chuan ka va ding a, a rawn tho ve ṭuah ṭuah a.

"Enteh, ahma khan min duh reng a, amah zawkin mitmei min hmuh hmasa bawk si a, tuna min duh lo lutuk hi eng nge a chhan ni ang?" a ti phawng a, khawngaihthlak hian a.

"I zei lo aniang chu" ka ti chu a pawm lo nasa.

"Zei te chu zei reng e... hetiang baka zei" a ti bul bul a, an inngaihzawn laia an awmdan te pawh minti hre chak.

"Hetiang baka zei chu eng nge?" a lo hawi vut a, "Mut dun puiah chuan min sawm lo a, a beisei tih chu ka hrereng; mahse, a dik thei lo, kan innei mai dawnin ka hre lo va, lo rai ta se engtin nge ni ang..." a ti vang vang a, ngaihtuahna a ti buai nuai.

"U Lizzy'n mut dun a beisei a maw?" ka ti a, min ti hrilhhai a lawm maw le.

"I hrethiam ve chuang lo ang; mahse, mipa chuan kan hrethiam" a ti nghat a.

"I try em ni a?" ka tih chuan lu a thing rang khawp.

"I u ania, tih mualphona a ni chuang lo bawk a ka hrilh dawt ang che, tum ila chu ka thei ang; mahse, a rai ka hlau a lawm" a ti leh reuh a, a awmzia ka la hrethiam chiah lo.

"Rai ta se i nei duh dawn lo tihna em ni?" ka tih chuan min melh run run a, thawk a la leh hluai.

"Duh leh duh loh pawh hriatna hman a awm hleinem, kar hnih chhung chauh kan inzui a, hetiang hian ka hmangaih dawn tih pawh ka la hre lo va, kan inneih ka ring hleinem" a tih takah chuan ka hrethiam ve riai ruai tawh.

"Nupui neih hma a sex hman i duh lo a ni maw..?" ka ti a, a ṭawngkam aṭang chuan ka sawi dik ngei pawh ka ring, chutiang anih chuan ka ngaisang ngawt ang.

"Chutiang lam a ni teuh lo, a ni tho a, a ni vak lo" a tia, min ti bang bo.

"Engvang maw...?" ner fea ka tih chuan, "Fahrah ka ni tih ka hrilh che kha, sawn thlak ka duh hleinem, keimah anga fahrah turin ka fate ka siam lo ang, nupui neih hma a fa neih ka tum lo" a ti ta khauh a, chu zawng ka lo beisei loh lam daih a ni.

"Mahse, chu chu a duh loh chhan che a ni dawn em ni?" ka ti ṭha leh a, a mizia lam zawk hi Unaunu buaina niin ka hria.

"Ka hre tawh bik lo, min lo ngai pa vak lo thei a, chu chu i hrilh thei ang em, sex lamah chuan ka laktlak viau ang" ka lo nui phuh ṭhawt a, "Insawitir chi pawh a ni leh lo" a ti leh lawi a, a mangang deuh ruaiin ka hria, puih dan a vang bawk si.

"Puih dan che pawh ka hre lo, amah saw inhawng ve deuh sela chu tih dan a awm tur ania, a nu saw i ti hel tlat bawk si a, ka tan pawh lo tihpui che hi a nuam lo ve riau a" ka tih chuan a pawm ve hmel khawp mai.

"Engtin nge nangni, in inhau lo tak tak maw?" a tih chuan ka lo nuih var var.

"Awmpuia chu a fel a lawm, ka chunga a thinrim viau pawhin min hau mai ngai lo, vawiin pawh kha amah a inthiam lo a, ka ring lo kha a indem phah a; mahse, ka ring lo ni a a ngai kha ka tan a hrehawm, a nun ka ti chep zo tein ka hria" ka ti ve sap sap a.

"Ti nge a indem a, i thiam lo zawk fe a lawm le" a tih leh chuan, "A mizia a lawm, mi inthlahrung chi leh mi pawisawi duh miah lo chi ania, awka vin takngial pawh min hman khum ngai lo, a fel lutuk hi ka lainat zawk ṭhin, nang angin a hausa ve lo a, a zirna tur pawh inhlawha a tuak ṭauh ṭauh a ngai a, lehkha a thiam thei a sin aw, kan college ah pawh pakhatna a ni ziah ṭhin, hmeichhe ho hian an ngaizawng nasa thei lutuk a, chuvang ania ka thik thu a chhiat em em ni" ka ti leh luam a, Awmpuia chinchin ka sawi danah chuan ka chhuan zia pawh a hriat theih ka ring.

"Eng nge a thawh ṭhin a?" 

"A rem rem a ni mai, Motor silna ah te a inhlawh a, a changin ban khur te an lai a, zanah mi dawr bungrua te an thiar a, inhlawhna awm ang ang chu a thawk thei vek, vawiin pawh kha Scooty khalh zirtirin a inhlawh anih kha" ka tih leh chuan mak tih hmel deuh hian min en a, "A va cool ve" a ti tawl a, ka nuih ringawt thung.

"Mahse, a vannei a lawm, i duh em hi, hetiang hian i u hian min duh ve sela chu ban khur te pawh ka lai hreh bik teuh lo" a ti ve ngei a, Awmpuia nena khaikhin chi an nih loh zia a hre lo aniang.

"Ani te chu a mamawh em vang ania, inhlawh ngai loin duh duh nei ve thei sela chuan khitah a awm tawh ang" ka ti leh halh a, a zial rawn pawrhin ka duh ve em tih min zawt a, ka lo hnar vat a, ka rei lutuk dawna ka hriat vangin "Ka kal dawn, haw tawh rawh, helaiah awm reng zel suh" ka ti sawk sawk a.

 "Ka zu zo anga, ka haw ang" a tih vang chuan nghak tawh loin ka kalsan a. Dawr chu a hla lo a; mahse, ka let leh lamah chuan a lo awm tawh lo a, a thilsawi te kha kha ngaihtuah let leh ṭhin a, misual leh awmherh tak chu a ni lo tih ka chiang tawh, a rilru pawh a tluan hmel viauin ka hria a, Unaunu tan pawh ka duhpui thlap a, duh let ve sela ka ti hle bawk.

(End of chapter - 8)