BLUE BAYOU (CH - 9) by Ahmangaihi violette khiangte

BLUE BAYOU by Ahmangaihi violette khiangte

Chapter - 9

Pathianni a ni a, kan inkhawm bang chu biakin chhaka dawr kawtah eitur kan han lei a, seventh day kohhran an nih ka ring, Pathianni ah dawr an hawng ziah a, an eitur siam a tui ṭhin hle bawk. Awmpuia a lo len tur thu ka sawi vangin kan lei tam deuh a, Nu Hlimi hian a ngaina ve bawk a, a lo len tur thu ka sawi hi chuan a phur ve deuh te hian ka hre ṭhin.

In kan thlen hnu lawkah ka pa'n min lo bia a, "Kan boruak a kang vawk mai hei, chawimawina te kan nei dawn asin" a rawn ti hlut a, a lawm zia chu a aw ah pawh a hriat theih.

"Anih chuan tunkar chu in la cham dawn a ni maw, camp chhawng in nei leh dawn em?" ti a ka zawh chuan a hriat rih loh thuin min chhang a, tunah hi chuan haw ve rih phawt sela ka duh, ka nu lungawi hunah te pawh kal leh mai zawk sela.

"Anu chu i be tawh em" ka tih chuan "Nizanah ka bia a, i duh duh hunah lo haw rawh min tia, kan haw theih tawh mai chu ka ring, Pathian thu thu a ni tawh mai" a lo ti let var a, an inbia tih hriat chuan awm a nuam deuh huai.

Kan exam hun tur te min zawt a, internal test kan neih ṭep thu te ka hrilh a, nu Hlimi a dam loh thu leh ṭawngṭai pui a mamawh thu te pawh ka hrilh ve luam mai, ṭawngṭai ka mamawh a ka hriat chang te, ka damloh leh mangan chang apiangin ka pa hi ka hrilh a, min ṭawngṭaipui turin ka chah ziah ṭhin.

"Ka haw hunah lo haw ve zawk ta che, chhungkuaa awm khawm a khat em mai, exam a la hlat tho chuan rawngbawla ka chhuah leh hmain lo haw ta che" a rawn ti a, ka hnial lem lo, ka nu pawh ka ngaihtuah deuh a, haw ve zawk chu ṭhain ka hria.

Kan inbiak zawh hnuah in ka ti fai mawlh mawlh a, Awmpuia message ka thawn bawk. Mahse, chhuat ka nawh zawh hnuah pawh message chu a rawn chhang thei lo a, ka call lah chu Peksangan a lo chhang daih a, Awmpuia awmna ka zawh chuan "Inchhungnu in a tir lawk, a lo haw ṭep ang" a lo ti pek a, eng ti turin nge maw a lo tirh leh ni.

"In inchungte hian chhehchhawlah an hmang a ni ringawt, an tir ngun si" ka tih chuan a rawn nui hawk hawk a, "Lo len chu a tum em, i bulah a sawi lo em ni?" ka tih leh chuan "Sawi ve e; mahse, a hman kher lo maithei a ni, inchungnu khan Chaltlangah Valerie dah turin a tir a, birthday lawmna ah a kal dawn a tiin ka hria, amah kha chuan 'Ka han dah ringawt anga, a haw dawnah ka hruai leh mai ang' chu a tia" a rawn tih chuan ka sa phat.

"Amahin a kal thei lo em ni a, engah nge Awmpuia chu an tirh ziah, chupa pawh chuan a hman loh thu te a sawi ve lo em ni, an tirh apiangin a kal duan duan reng mai" ka lo ti bawrh bawrh a, thin a rim leh hlur tawh.

"I lo hauh phah leh ringawt a nge, tunlai chu a nu a damṭha lo lehnghal a, a nguai thei tehmai a nia, nizanah pawh a nu nen an inbia a, pindanah a inkhunga, ka va luh laikhan a mit a sen rum a, pawisa pawh thawn a tumin ka hria" a tih leh takah chuan ka inbengdai vat a, hetiang thil te hi min hrilh ve ṭhin sela ni tur.

"A lo haw veleh lo kal rawh se aw, hetah thingpui lo in rawh se, eitur kan leikep vek ania" tiin lo hrilh mai turin ka chah a, kan inbiak zawh chuan ka ngaihtuah zui neuh neuh a, a nu te pawisa a thawn ṭhin tih ka hre ngai miah lo, a mamawh hi chu a thawk chhuak ve mai zel a, a chhungte lam hian pawisa a thawn vak lo tih chu ka hria a, amah a thawn ang tih ngaihna ka hre lo a ni.

"I ṭhianpa chu a lo kal dawn em?" nu Hlimin a rawn tih chuan "A lo tlai deuh dawn aniang, in san mai ang u" ka ti vat a, an ril a ṭam tawh bawk si a, lo nghah chi niin ka hre lo. Nu Hlimi chuan thingpui a siam zui a, kan inlaimekin U Lizzy Phone a lo ri a, a off hmak hmak a, a nu nen kan lo mit mei zauh zauh.

Vawi nga lai a rik takah chuan "Tunge ni?" nu Hlimin a lo ti a, "An phone sual aniang, number hlang" Unaunu chuan a ti mai a, kan awih lo ve ve.

"Mimawl deuh te kha a lo ni leh ange, hman zana lo kal ang te kha" nu Hlimin a tih chuan, "Benja te chu, kan inṭhen fel daih tawh" a ti liam puat a, a ṭawngsual tih a inhre miah lo. "I bialpa hlui maw lo ni a?" a nuin a ti ta chiah, rum theih tawp hian a melh zui a, Unaunu pawh a ṭi nghal duk mai.

"Kan ni tawh lo, kal pawh a lo kal ngai tawh lo, kan inbiak lohna pawh a rei..." 

"Mai mai che hian, i bialpa hlui anih reng chu, dawt dawt hian mi bum i tum a, hnar hnuaiah phatna a bo lo tih zawng zawng hi i nei a" a tih leh laichuan lo inrawlh ve ka tum zuau a, "Benja kha.." ka ti chiah chu, "Rintei hi a lawm, ka chungchang lo sawi pui a ching ania, ka be duh tawh lo tih pawh i hre vek a, i lo biak ṭhat a ngai hleinem" tih pahin Unaunu chuan min rawn melh hrawk a, ka ṭawng zawm lo chiang hle.

"Eng nge i u sawi chu a awmzia ni a?" nu Hlimi a ni.

"Ka biak ṭhat pawh ka hre lo e a.." ka ti ve tlat a, Unaunu chu ka melh ve ran bawk, min puh a tum anih teh chuan sawi tur ka nei ve ṭeuh a, a haw tlai vanga kan buai dan te thlengin, chuvang chuan min puh thei bik lo ang. Ka melh dan vang chuan a hrethiam ve a ni chek ang, a thingpui in pahin phone a khawih niap niap a, nu Hlimi thung chuan min la en reng.

"Zawhna min zawta, ka lo chhang mai a lawm, ka be ṭha hran lo" tih leh thawh ka rual a, thingpui no ka sil zawh hnuah pawn lam ka pan nal nal a, veranda bul stepah va ṭhuin gate lam ka la thlir a, Awmpuia nge ka ngaiha ka chhungte zawk pawh ka hre lo, ka khua a har ru veng veng a, ka awm dan chu ka ning em em bawk. Nun tluangtlam tak, hahthlak ru zet si ka neiin ka hria, engthil emaw ngaihtuahna la peng thei thil tih a, boruak dang hip te ka chak a, kan khaw lama haw pawh ka chak thar a, chutih rualin Awmpuia hawsan chu ka hreh viau lawi thung.

Ka ṭhut rei tak deuhah chuan ka mut a chhuak thuai a, Gate inhawng thawm te chu ka mang hriat deuh ruai mai, ka men rual chuan hnai deuhah Awmpuian min lo en a, min lo nuih var var bawk. "E, engtik ah khan nge i lo thlen a, ka lo mu mai mai a" te ka tia, ka ṭawng sual nawk nawk.

"I mut a va chhuak awm ve, ni sa laiah tak i ṭhu lehnghal a" a tih chuan ka ding ve vat a, ka ham zui bai bai.. Mahse, ka khabeah a rawn bawm thut a, phawk lutuka ka en laichuan ka biang a rawn piai leh vak a, min ti hrilhhai ang reng, min naupang chhe lawm ringawt nia.

"Min lo ngai em?"

"Ngai e, i van rei em em"

"Leng rei hman pawh ka ni lo, tih tur pawimawh ka nei a" a tih chuan ka ner nak, zawh pawh ka zawt buai peih lo.

"I ril a ṭam em, thingpui ka insan che ania" tih pahin inchhung lamah kan inzui lut a, "Ṭam lo e" a ti tak nain choka lam ka pan pui a, thingpui ka siam sak zung zung a.

Eng eng emaw sawiin kan titi ve luam a, kan khaw lama haw ka chak thu te pawh ka hrilh a, "Internal test zawh ah i haw thei ang chu, keipawh zan hnih khat riaka haw lak ka tum a lawm" a tih chuan awm a nuam deuh huai, kan haw san bik dawn lo tihna a ni.

"I chhungte an dam ṭha em?" ka tih laichuan chik fahranin ka melh a, "Ka nau chu a zia,  ka nu zawk a damṭha lo a, tukina ka biak kha chuan a tho nuam leh deuh a, a zun thlum a sang deuh a niang" a ti a, chutah chiang zeta min rawn enin "A hmu chak teh mai che a nia" a rawn ti khauh a, ka ka hau mai, a nu bulah min lo sawi tihna em ni?

"I nuin maw, min sawi em ni a?" ka nuih nghal var var.

"Sawi e, kan thlalak pawh ka hmuh a lawm, a takah a hmu chak che a, kum tawpa a lo zin theih hlauh chuan in inhmu dawn nia" a ti zui a, keichuan ngaihtuahna dang ka lo nei hmanhmawh.

"Inkhua ah chuan min la hruai ve zawk la" 

"Kan khua ah maw, langa kal na chi a ni lo" a ti tawl a.

"Kan riak mai dawn a lawm" phur fein ka ti leh.

"Nuam i ti lo ang" a ti a, engah nge maw ka han tih loh tehlul ang le.

"Nuam lutuk ang, ka kal chak tak tak a nia" ka tih chuan nui hmel a pu tawh lo, a rilru a buai hmel khawp mai.

"Hmeichhia i ni bawk sia" a ti leh ringawt a.

"I nu bulah pawh i sawi tawh tho sia.." ka ti a, a sawi tawh chuan eng nge buaina awm tawh chuang ang, tun laiah chuan mite pawn thil pangngai takah an ngai tawh a, kei chuan ka chak takzet.

"Eng lo..." min rawn en ren rawn a, "Mikhual mutna tur pawh a awm lo, nuam i ti lo ang" a ti zawi sup a, ka sawi tur a bo zo vek. 

Inthlahrung deuhin ka nuih a, min nuih let loin ka kut a rawn hum thung a, ka in en leh te te...."I nu a lo zin dawn tho chuan a pawi lo mai, mahse, phone ah min la biak tir ve la" ka mitmeiin ka rawn a, a lo bu ve vat a, ka zep lo, ka thinlung zawng zawngin ka lawm a, ka phur takzet.

"Inneih ka chak tawh e" ka han ti leh ringawt a, chupawh chu ka rilru dik tak a ni, ka hma hunah hian eng thil mah nih tum emaw thawh tum hranpa ka nei ve lo, Awmpuia nupui nih chauh hi ka thil chak a ni bawk, a atthlak chu ka ti; mahse, thil dik a ni miau si.

Amah lah chu a nuih a za khawp a, a thingpui in pahin a nui a nui mai, ka en reng tih a hmuh chuan ka kut chu la kangin a fawp vang vang a, a nui hmel chu a ṭha thlawt a, a mitmeng tlawm hmel tak te chuan min hneh em em bawk, a bula awm thlakhlelh loh lai ka nei lo a, ka ngai em em reng a, nitin a lakah hian ka luangliam thar ṭhin, upa vat vat sela, hun te hi liam duak duak sela, ka pahnih hian awm dun reng thei tawh ila, chutih hunah chuan duhthusam dang a awm thei tawhin ka ring lo.

"Lehkha i zir ṭha em?" a rawn ti teh daih a, kan thil sawi inpersan zia chu aw.

"Zir ṭha ve e..." ka ti liam puat a, a lama ka tawlh hnaih rualin ka biang a lo piai leh chiam a, "Ṭha deuhin zir ang che, zirlai i ngaihsak lo dawn tlat, zanah chuan be tlem deuh che ila a ṭha ang" a ti mauh mai a, min ṭhawng zawk a lawm maw le, a kut chu ka pawt thla vat a, "Kan inbiak loh te chuan ka rilru a hah leh vak dawn a, zirlai ka ngaihtuah thei lo fe zawk ang" ka ti chu tihngaihna hriat loh hmel zetin min en a, a nur nang mai.

"U Op, College kan pass hunah in nei ila" mit khap sak sak chungin ka melh a, "Engtin maw min koh?" a lo ti leh daih a, inneih sawi hian min chhang ṭha duh ngai lo.

"U Op ka ti ve zel tawh dawn che" no fahrana "U Op" ka ti zet chu min melh rum teh e.

"I u ka ni lo a, i bialpa zawk  a lawm.." zawite thutak zet hian a rawn ti a, kei ka lo nui kar kar a, chutih laichuan nu Hlimi lo pheiin Awmpuia chu a chhang dahṭhat a rawn chhawp a, engmah sawi loin a kal leh mai bawk.

Thingpui a in zawh hnuah Internal test a pawimawh tur min hrilh a, zir ṭha turin min chah mawlh mawlh a, ani ang lo takin lehkhazir hi ka peih loh zawng tak mai a ni thung a, a bu keu a han ṭhutchilh vel hi chu ka ti thei mai, ngaihtuahna senga zir hi ka ti hleithei lo, Internal test phei chu kan inhrilh thei ṭhin a, amah ka ring ve tawp ṭhin.

"Kan pass tho ang, Internal chu a har lo, External a la hla a lawm" a ti chu a pawm lo khawp a, "Miin an sawi leh sep sep ang che, ṭha deuhin zir rawh" a ti bawl a, min chhan dan kher kher chu ka duh lo. "Min hrilh ka ngai tawh lo" ka ti hmak a; mahse, amah ber hian min hrilh a tum leh nasa dawn tih ka hria, ṭum dangah pawh ka thiam loh min lo zawt hmasa ziah ṭhin. 

Tum bur chungin a haw tur chu ka zui chhuak a, a hmanhmawh bawk si a, a leng rei lo ka tiin ka lawm lo ru takzet, a kalna tur lah ka hre ru ve reng bawk si. "Tunkar chu zan lamah hna ka thawk dawn a, ka biak theih loh chhung chein lo zir ṭha viau rawh" tiin min chah lehnghal a, inthlah nana sawi ah chuan thlum lo ve tak a ni. 

Chumi zan chuan lehkha kan zir ve ve a, ka va text lah chuan "Zir rawh" a rawn ti zel a, biak hleihtheih pawh a ni lo. Keilah chuan ka lo muthilh san daih a, zingah a message pawh ka hmu chauh a, dar 3 thleng a lo zir a ni awm e, Scooty khalh an zir vangin darkar 3 pawh a mu tlingin ka ring lo. Class ah pawh a mu thlu ve lup lup a, kei ka lo inti fel ve thung a, a pawimawh lai te ka lo underline sak thlap a, fel min ti ve khawp. 

Zankhat chu ka pa u Pa Muana nupuiin min lo phone a, ka nu Remi nen hian kan inngaina ve a, ka damloh chang pawhin min lo phone ve vat ṭhin a, chanchin te pawh min lo zawt ve luam zel. Mahse, tun ṭuma min lo phone chuan ka beisei loh deuh thil a rawn sawi a, min ṭhawng hle bawk. "I nu hi lo phone la, lo zilh ve rawh, tlaitin zantin hian Rinawman dawrah a ṭhutchilh a, miin an sawi duh teh a nia" a rawn ti a, Rinawma a tih chu kan khaw tlangval senior ti ila sawn te pawh a nei ve a, nupui a la nei lo thung, Primary school teacher, zu heh deuh mai a ni.

"Engtin nge an sawi a, i bulah em ni an sawi?" ka ti vat a, thinrim lam aichuan hlauhthawnna ka nei lian zawk a, mak a tiin  min ṭhawng hle bawk.

"Hmanniah hna tlanna ah an sawi ka hria a, a tir kha chuan ka awih vak lo a; mahse, hman zana ka dawr kal khan inhnaih deuha an ṭhu dun ka va hmu a, ka va luh hma pawh khan zawitea an titi thawm ka hria a, ka luh veleh an ngawi daih a, ka awm nuam loin i pa Muana pawh ka hrilh a, ani hi chu a ngaih a sam khawp a. Ka va kal hun kha dar 9 rik dawn a ni tawh a, a inṭhuthnaih lutuk kha a dik loin ka hria, nizan ah pawh ṭhenawm te monu hian min zawt leh nawlh a, mi hian an ringhlel fur tawh" a ti leh zel a,  ka bing chuk chuk mai, hrehawm ka ti ngawih ngawih.

"Ka lo zawt chhin ang, a lo ni tak tak anih chuan ka hau hrep dawn, a zahthlak em mai" ka ti ve tlawk tlawk a, thu dik nge mi rin thu mai mai tih chu chiang lo mah se, mi sawisep kai ringawt pawh chu thil zahthlak tak a ni tawh.

"I pa hi engtikah nge a lo haw dawn?" a rawn tih chuan ka sawi chiang thei bik lo. "I pa Muana hi 'Phone rawh' ka tia, 'Mi rin thu mai mai han hrilh ka duh lo, a rilru kan ti hrehawm mai mai, an nupa kar a lawm' a ti tlat a, keichuan chhungte an nih hi chuan kan mawhphurhna ah ka ngai a, chuvang ania ka rawn hrilh vat che ni" tiin a rawn sawi zawm leh a, ka nu chu ka biak vat a ngaiin ka hria.

"Ka hrilh che tih sawi lo la, i ṭhian tu emaw sawi angin sawi mai rawh aw" nu Remin a tih leh chuan ka aw ve mai a, chanchin hrilh leh turin min chah bawk.

Phone ka dah hnu chuan ka nu chu ka call nghal a, a rik chhungte chuan thinphu a rang dup dup a, ka hlauhthawn luatah ka khur ru deuhin ka hria. Rei vak loah call chu a rawn chhang a, "Hello, Mate.." awki dam diai hian a rawn ti a, han sawi ṭan mai dan tur pawh ka hre lo.

"Dawrah i la awm em?" ka ti hmasa ber a, kan dawr leh kan in hi a inhlat ang reng a, tunah dar 8 a pel tawh a, dar 8 hi zan danga a inkhar hun pangngai a ni.

"La awm e, tunlai chu mi an meng rei a, dar 9 velah ka khar ang" a lo ti var a, midang ṭawng thawm ka han ngaichang deuh a, thawm dang engmah ka hre lo.

"Eng nge min lo call chhan, lehkha i zir nange?" a tih leh chuan "Kan inbe khat em a?" ka ti ṭha ve mai a, zawh nghal tawl chu ka duh a; mahse, thil inzawh nuam a ni bik lo. Ka nu a ni a, ka zahin a thu pawh ka awih em em ṭhin, a aw ka hriat takah phei chuan a ni tak tak lo ang tih ngaihdan ka nei a, rinhlelh a har duh khawp mai.

"Nizanah lo biak che ka tum a, ka nuamsam lo ka tlu zal kha ka lo muhil nghal daih a, tukin pawh dawr ka hawng har lutuk, tunlai chu mut ka kham thei lo a, ka taksa a la chak loh vang aniang" a rawn ti melh melh a, sawi tur a vang duh takzet.

"Inhralh a har em?" tiin ka la pehhel lui zel a, chhungrilah ka tawt ru ṭun thung.

"Har ve deuh tawh, dawr siam kan tam tawh lutuka, kuhva ei hi tam hlauh lo phei sela chu inhralh a har viau ang, midang aiin ka ti tam a, kan khua ah chuan a hralh tam ber chu ka nih ka ring" zangkhai deuh hian a ti leh a. 

"Nangman i khawih vek em ni, pan hnah i roll bawk sia a rah te chu midang kheh tir la" ka tih chuan "Panhnah hi chu ka hnehsawh lutuk, kuhva kawrpui hi ka kheh lawk ṭeuh a, dawra lo leng ho hi ka thel tir ṭhin a, an thel peih bawk a, zankhatah pawh an thel hman ṭeuh zel, i u Rinawm te ho an fel khawp a, min pui nasa a lawm" a rawn ti ta chiah a, u Rinawm hming a rawn sawi rik chuan min vilh zawk a, ka thin a rim nghal hlur mai.

"U Rinawm hi a lo leng ngun a ni maw, mi in an sawi ka hria ania?" ka tih ri chu a ring lo nain a bung ṭha bel bawl hle.

"Awww, ka dawr te chu tlangval hoin ṭhutkhawm nan tak a rawn hmang a lawm, engtin nge chungte i lo hriat a, tunge sawi a?" a rawn ti let vat a, a aw ah chuan insawithiam tum awka ang kha engmah ka hre lo.

"Miin an sawi, an sawi dan phei chuan 'U Rinawman a lenchilh zantin' an tia, an ringhlel che u a niang chu, an sawi sep sep tawh an ti lehnghal" ka ti tlang ta rawt a, zep loah chuan mi sawi ang em chu a nih ka ring bik lo a; mahse, kan khua ang khaw te ah chuan mi sawisep kai hi a awl a, ka nu chuan fimkhur phah nan te hmang sela ka duh.

"A awm ang lo em mai a, i U Rinawma ka'n lo hrilh teh ang, a nuih a za khawp ang chu" a tih leh chuan ka sa zak, ṭawng tumin ka ang zuau a, ka insum nasa khawp mai.

"Lo hrilh leh kher kha a ṭul lo, miin an sawi sep sep tawh chuan be ṭha tawh miah lo la a ni mai, zantin lo len pawh a ngai lo reng reng, apa awm loh lai a ni lehnghal a, dawr pawh rei deuh deuh hawng tawh suh, Apa'n hria se a thinrim ngawt ang" ka insum tehlul nen ka nu chu ka an khum a ni ber. U Rinawma lerh ṭhin zia te pawh ka hre ve reng a, ka nu nena innel taka an awm chu ka duh lo hulhual a, ka pa awm loh vang a ni pakhat.

"Eng nge maw i rawn an chiam chiam chu, mi te i ringhlel reuh em mawni, i duh leh i pa chu chah haw la ti nia, a awm loh vang anih hi miin min sawi peih a min hmuh mawh em em ni, lo thinrim ngam tur pawh a ni reng reng lo, zin bo reng lo sela tuman min sawi peih lo ang, i pa awm loh vangin mi an ring chhe mai mai tih hre ta che" min tih khum hlak hlak a, a lawm lo tih chu hriat theih mah se, kei ang em chuan a vin lo a, a thil sawi pawh chu a dikna chen a awm.

"Mah se, fimkhur tho rawh, u Rinawma lah kha a lerh ropui si..." ka ti leh hram a, ka thikthu chhiat vang aniang duh tawk mai a har.

"Rinsangpui, i mi biak dan hi ka mil lo a nia" a rawn ti fak a, a aw pawh a vin ṭha viau tawh.

"Ka rilru a nuam thei lo anih hi, miin min hrilh lai a ka zah ruk zia i hre lo anih kha" ka tih rual chuan "Zak teh, mahni nu te rinhlelh reng reng, awm ang lo lutuk" a rawn ti leh hlak hlak a, kan sawi zel chuan kan insawi khaw lo zo dawnin ka hria.

"Apa nen in inbia em?" ka ti ta daih a, "Biak theih pawh a ni em ni, biak tum apiangin pawimawh dang a nei zel a lawm, heti reng anih chuan ka la tlan bo san daih ang" a rawn ti let hlar a, rilru nawm loh sa nen ka ṭah a ti chhuak hlur.

"A lo haw ṭep tawh, chawimawina an neih zawh ah lo haw a tum" ka ti leh ngawt a, "A duh leh lo haw malek sela a ni mai a lawm, ka mamawh em em bik hleinem, keimah chauh pawn ka chawm thei lutuk che" min ti leh a, ka ngaihtuahna a vak kuai ruai a, sawi tur pawh ka haihchham zo tawh, thil ni lo lo thlengin ka ngaihtuah.

"Apa chu ka lo chah haw ang, a tlai tawh sia nang pawh inkhar tawh rawh" ka tih chuan a awki pawh a nem veleh ta deuh a, Nu Hlimi eng nge a an tih te min zawt a, thla tawpah pawisa min thawn a tum bawk, kan inbiak zawh chuan khumah ka let thawk a, ka nu chu ringhlel phal lo viau mahila awm a nuam chuang lo, ka pa biak ka tum a, call a tlang thei miah lo mai a, zing lamah ka bia ang ka ti ta ngawt a, nu Remi erawh ka be zui ta lo.

Inrinni tuk a ni a, zing hma takah thoin nu Hlimi bazar ka zui a, inlamah U Lizzy'n eirawng a lo bawl ve thung a, hetiang hian kan hman loh chang hi chuan a bawl ve thei mai a, Alu leh Artui bak hi chu a siam ngai lo thung. Nu Hlimin secondhand min thinpui a, Benja pawisa min pek kha ka la nei a, T-shirt pali lai ka lei a; pahnih chu Awmpuia ta tur a ni a, a la thar ṭha bawk a, a duhzawng tak anih ka ring.

"Mabiakin ni zanah min lo bia a, i ṭhian kawm ṭhin te min lo zawt a" Nu Hlimin a tih chuan mak ka ti deuh a, ka nu chuan eng atan nge a zawh le, ka thil han sawi vang khan kha anih ka ring.

In kan thlen hnuah ka pa chu biak ka tum leh a, call chu a tlang a a chhang thei lo thung, chaw kan ei zui mai a, ka phone pawh pindan lamah ka charge daih a, chawei khama ka va en chuan ka pa missed call a lo awm a, ka call let nghal thuai bawk.

"Nichinah i chhang thei lo va, hei kan awmna khua ah current kan nei lo a, phone a thi hmiah a lawm, tukin khan an siam ṭha chiah a" a lo ti a, a aw chhang pawh a hma aichuan a zia tawh.

"In haw thei dawn ta em?" ka ti vat a, "Thawhṭan ni ah kan haw ang, Pathianni hi kan han champui leh lawk anga, thawhṭan tukah chawei khama chhuah kan rilruk a" a tih chuan lawm tak ka ni, thaw a veng huai huai thei.

"A ṭhat hlauh chu, anu pawh a khua a har tawh lutuk, nangpawh inah awm ve tawh rih rawh, in awm dun loh chuan a hrehawm" ka ti zung zung a, "Programme dang a awm leh lo turah ngai.." sawi pawh ka sawi zawh tir hman lo, "Pa, haw tawh zawk rawh, anu a hrisel lo a, a buai thei bawk si, dawr a hawn chuan tlai deuh deuhah chaw a ei a, a khawngaih thlak a sin" ka lo ti hlut a. "Ni e, haw chu ka tum tawh a lawm" a ti ve leh mai bawk a, ka pa a haw anih chuan ngaih ngam takin ka awm thei ang. Kan inbiak zawh veleh ka nu ka han hrilh leh a, engtin vak min chhang lo "A ṭhat chu, a ngaiah an cham rei tawh khawp a lawm" a ti liam deuh puat a, a nghahhlelh erawh ka ring khawp, a chhan pawh a vui nasa thei em a ni.

Ka pa hi Lalthantluanga a ni a, pa lianpui hmelṭha leh zaidam deuh mai a ni, lehkha a zir sang lo a, ka nu anga mahni han inhai kaw zung zung chi a ni lem lo, pa rilru tluang tak leh Pathian ṭih mi a nihna hian a nun a chawi a, a zahawm em em thung. Ka nu erawh hi chu nu taima leh mahni lu zo tak, khawi ilo kal na leh thil tihna ah pawh midang kuta innghat ngai lem lo, mahni inenkawl zo tak an tih ang hi a ni a, chhunna ka ngah a, ka pa hi chu ka chhun meuh lo zawkin ka hria. Thinchhiatah te, mize hrang hrangah ka nu ka chhun a, kan pian leh fuke thlengin a in ang a, 'I nu nulat lai chiah chiah i ni' tih thu hi ka dawng ve fo mai.

Chhunah thawmhnaw bal tlem ka su a, nu Hlimi hian 'Mahni thawmhnaw bal chu kan damlo te emaw kan su thei ngang lo anih loh chuan midang suk tir loh tur' a ti ṭhin a, midang thawmhnaw ka su ngai lo tluk a ni, eng emaw chang hian U Lizzy'n pahnih khat min suk tir zauh hi chu a nei ṭhin. Hma takah ka inbual a, chawhhnu lamah chuan ka awl der der a, Awmpuia erawh motor silna ah a kal a, zingkarah scooty khalh an zir vanga kal thei chauh a ni.

A awl deuh changin message kan inthawn ṭhin a, kan pahnihah hian a uang zawk leh fiamthu thawh ching zawk ka ni a, message hmangin ka va fiam deuh reng. Secondhand ka thinsak thu ka hrilh a, "Ka lo en chhin" a tih chuan ka entir duh lo a, zanah lo leng sela ka duh vang a ni. Tshirt anih thu chauh ka hrilh a, a rawng min zawh pawh chuan ka la hrilh duh lo zel a, "A hma ah nula lem a awm a, mawng langin a ṭhu" ka va ti fiamthu a, "Chutiang a hak chi dawn em ni, miin min en hrek hrek lo ang maw?" thutak deuhin a rawn ti a, ka nui ka nui mai.

"I u ex kha a rawn kal a, bike a rawn sil tir a" a tih chuan mak ka ti deuh.

"Nangman em ni sil sak a?"

"Ni lo e, midangin an sil a, min hre chiang vak lo aniang kan inbe lo, mi chu a rawn thlek leh zuk zuk ṭhin a, ka be duh lem lo a" a tih chuan, "Biak a ngai hleinem, Lizzy hian mi hek nan hman a tum leh daih zel a, lo ti ṭha vak lo ang" ka ti ve mai a, min hek nana a hman dawn aichuan tihpui loh tawp ka duh tawh, an buai buaiin lo buai ve rawh se.

"Zanah chuan i lo kal thei dawn em?"

"Ka lo tum ang, Peka a chhuah dawn loh chuan"

"Aw, a ṭhat hlauh chu, Peka chu chhuak lo turin ka va hrilh ange"

"Hrilh lo e, bialnu a nei ve a, a rim ve duh maithei a ni, keini chu college ah kan inhmu reng thei a lawm" a rawn ti a, a dik ve tho mai.

"Mahse, rei lo te tal lo kal tum rawh, i kawr tur hi i lo la anga, i haw leh vat dawn a lawm" ka ti zui ṭalh a, pek ka chak tawh em a tin a ni.

"Awle, mahse..karthar aṭang chuan zanah ka chhuak thei tawh lo ang, lehkhazir kan ngaih tawh kha" a ti leh a.

"I thu ber a lawm Pa-a" emoji nui lai lem a rawn thawn a, a ṭhiante pawn Pa-a ti a koh an ching a, ka koh ve hian a nuih a za tlat zel a, ṭhianten Nu-i tia min koh hian ka lo lawm ve ve em em thung a, nupa kan nih hunah pawh 'Dear' ti loin Pa-a tih ngata ka koh ka ring.

Zanriah eikhamah chhuat ka nawt fai a, sitting room a u Lizzy mu lah chu a mu hnawk leh lutuk a, "Tho teh, ka ti fel duh" ka va ti sek a, min nin hmel khawp mai. Nuts a ei a, a ti tla nuaih bawk a, ka phiat nawn sek ringawt. "Tihian nang chu i duh duh hunah inleng i nei a, anu hian a hau ngai tawp si lo che a, kei chuan ṭhiante pawh ka hruai haw ngam ngai lo ania" a ti nuah nuah a. "Awmpuia ang hlir ṭhian nei la chu a hau bik lo ang che" ka ti ve kher a, a ṭhiante an phawkphawhraw thei em a ni, zu heh hmel deuh deuh, khawi lam Gangster nge an nih ang tih mai tur hi an ni ṭhin a, mipa ṭhian lah hi a ngah phian a, amah aia upa hlir a kawm ṭhin.

"Benja nen in la inbia em?" a rawn tih chuan  ka ner nang a.

"Lo be tawh hlek suh" a ti zui hlak a, ka melhrum lek lek. 

"A thil pek che pawh i la ei tuam tuam kha" ka ti chu a duh lo ve khawp a, "Ka ui ei mai mai anih hi" a ti ve tlat a, nuih ti za zawk hian.

Dar 7 velah Peksangan Message min lo thawn a, "Pa-a kha rawn haw har suh se aw, i lo chelh reng ange, chhuah lawk ka ngai a, ani pawn chaw a la ei lo ania" tih hi a rawn thawn a, chuti anih chuan lo hrai puar phawt a ṭhain ka hria, Peksanga chuan lo nghak ve mai rawh se, zan rei tak tak thlengin a leng ziah tho a, ngaihpawimawh a ngai vakin ka hre lo.

A lo thlen hmain dawrah ka va kal a, noodles man to chi te ka va lei a, noodles chhum hi ka thiam ve zawng tak a ni a, Awmpuia pawn tui a ti ve viau ṭhin. In tur lam ka en laimek chuan tu emaw hian ka sam a rawn pawt zauh a, ka lehhawi chiah chu ka chal a rawn tuk lawlh a, Benuiha lek chu lo niin.

"Eng nge i rawn tih?" 

"Saw tah khan kan intawk a, koh pawh i hre thei lo" a ti a, phone ka en phei char char a, ka intawh lai awm pawh ka hre lo.

"Lo len i tum e law, Nu Hlimi a la meng ania aw" ka tih chuan, "Tum hran lo e, ka lo kal ve mai mai" a tia, rawn koh chhuah a tum tih ka chiang.

"Eng nge i lei a?" tih pahin ka thil lei chu a rawn thlek a, "Min lo lei ve" a ti leh reuh a.

"Pawisa i nei daih zawk a lawm" tiin ka melh ran ran.

"Ka out a, ka retheih lai tak, Cigarette pakhat a ni mai" tih leh min nam a rual a, theitui ka lei leh anih chuan ka pawisa kenin a daih tawh lo hrim hrim.

"Thil dang lei ka la ngai, ka pawisa kenin a daih tawh lo" ka tih chuan a ding dat a, ka khawngaih leh deuh chuan "A loose in la mai rawh, 20 man vel" ka ti ṭha leh a, a ner ringawt.

"Cigarette loose aichuan ice cream a ni mai" a ti zui leh a, feezer lam a pan nal nal bawk. Chocolate ice cream 20 man chi hi a rawn la a, ṭha deuh chuan ka pek sak ve mai bawk a,  ka haw tur lah chu min la rawn zui zel reuh a, lo kal a tum tak tak aniang.

"Rawn len i tum elaw...?" ding meuhin ka hnunga a kal chu ka va thlek a. 

"Tum deuh tho e" tih pahin ice cream a ei mawlh mawlh.

"Rawn leng lo ang, buaina a awm phah mai mai" 

"Ka rim tur pawh i ni lo a, i thu lo em mai a" min tia, mawla....

"I rim tur sawn i rim a duh hlawl hleinem, hrethiam ve ta che" ka ti leh, pen nga vel a hla ah kan ding a, a ice cream lah chu an han eitui hmel khawp a, a hahthak ka ti...

"Rawn kal reng reng suh, haw rawh..." tih leh inher ka rual a, chak deuhin ka pen phei hlawk hlawk a, a pen thawm a ri sawt sawt a, ka va lehhawi chuan a rawn kal chak ve tih ka va hmu nghal a, ka tlansan daih dawn em mawni.

Gate bul kan thleng rual deuh thaw a, "Enteh, lo lut suh, i duh leh heta ṭang hian call la a fuh zawk ang" tih pah a nam let mai ka tum chu a theih awzawng loh, a ding khawng lah a, ice cream lah chu a ei far zawih zawih a, tui hmel hliam hliam tak a ni.

"Lizzy nu saw ka ni ṭhian a lawm" a tih chuan ka hrechhuak veleh zawk a, remchang lak a tum tih ka chiang; mahse, a zia phian mai thei a ni.

"A lo vaw leh nek maithei che ania aw" ka tih chuan engvakah a ngai lo, "Lut ila" a ti zui a; mahse, chutih laitak chuan Scooty a rawn tlan phei a, kan zawnah a rawn ding zui zat a, keini pahnih lo ding dun chu mak a tih hmel khawp mai.

"Vawiinah ka hmuh che kha, mi te biak ve tur a lawm" Benjaminan lo tiin a darah a va hnek sak kher a, phawr phawr ṭhin a.

"Eng nge in tih a?" ka lam a rawn hawi a, "Dawrah ka va kal lawk, noodles ka chhum sak ang che" tih pahin ka thil khai chu ka lek kang a, ka nuih var var a; mahse, min nuih let lo reng reng.

"In pahnih khan maw?" a meng nur deuh a, min hau duh mai tur hmel a pu bawk.

"Teuh nang a, sawtah kan intawk ringawt" tiin ka lo insawithiam ve vat a; chutah, Benja lam chu hawiin a chal a ti chuar tap a,    a Ice cream ei dan chu ṭawp a ti ve tho aniang.

"Ti rawh Bro...lut ang u" pakhat lah chuan a lo ti ve sek. Awmpuia chuan min rawn en a, zawhna nei hmel a pu a, luhpui chi a ni em tih a ngaihtuah ve anih ka ring. "Hei lo len a tum ve ringawt a, U Lizzy phalna pawh a la si lo" ka tih chuan a hrethiam tih a lang.

"Kal ang" tih leh ka dara rawn kuah a rual a, "Lawk lawk..." pakhatin a lo tih vang chuan kan ding leh rih.

"I ṭhianpa angin min sawi rawh aw, ka tlatlum vak lo a" tiin a nui hui a, kei ka lo ner nang nang. Awmpuia nen chuan hnai deuhah an in en ran a, Benja ngaihsam lutuk hmel leh Awmpuia hmel ah chuan ṭhian ni thei hmel an pu lo. 

Awmpuia chuan a chhang duh dawn lo emaw ka tih hnuah "Ka sawi lo ang" a ti bawl a, Benjamina chu a nui tawp chiang khawp.

A ice cream chu a tep chap chap a, "Serṭawk ang mai" a ti zawi deuh sup a, ice cream chung chang nge a sawi pawh ka hre lo. Kalsan mai kan tum chu a thil rawn sawi vang bawkin kan ding leh. "I bialnu min lei sak anih hi, tui khawp mai" a rawn ti pek a, ka ngei zia chu aw.....

Awmpuia chuan ka lam a rawn hawi vat a, ka dara a la kuah vangin kan taksa a insi chet a, inmelh hnai tak kan ni. "I lei a maw?"  zawi deuh tak hian a ti a, awm a nuam lo ru kher mai.

"Dawrah a rawn lut a, min lei rawh a ti tlat a lawm" ka tih chuan thawk a la deuh hluai a, Benjamina lah pek chuan "A la lei ve ngai lo che a ni maw, lawm lohna tham anih chu, i va ti ho ve" tih pahin min rawn melh rum hrep a, gate chhung lam a pan nal nal bawk.

"I be ṭha tawh dawn lo emaw ka tia, ka hrilh chiang chein ka hria" ka mitah min en ran a, insawifiah dan a vang a ni.  "Ka be ṭha lo, dawrah a rawn kal ve a, ka ruala lo luh theih a beisei mai mai anih kha" ka tih chuan min ring hmel emaw thinrim hmel a lang lo a, a beidawn hmel riauin ka hria.

"Ṭhiana i siam hi a pawi thui thei ang aw, fimkhur teh" a ti fiah fak a, "Ṭhian kan ni lo" ka ti ve tlat thung, kan ni lo tak tak miau a.

"Eng nge maw a hriat le, a la rawn kal tluk tluk em ni a" tiin kan in lampana Benja kal chu a thlek a, "Saw ti reng saw, tuman kan lawm lo chung pawhin a rawn kal leh zel a lawm, a biak dan aṭang che khan i hrethiam lo em ni, mi a nel lui tlat a, an hauh hrep pawhin a haw duh chung lo" ka ti leh halh a.

Chutih laichuan Benja chuan veranda a thleng phei tawh, a rawn lehhawi vut a, min rawn hui lehta nghal a, "I ṭhian anga a insawi chuan nu Hlimin a ngei phah maithei che a ni" ka ti zawi sep a, Awmpuia chu a ngawi reng.

 

"Kal ang" tih pah a a kal chu ka zui ve vat a, Benjaminan veranda ah min lo la nghak ve reng bawk a, ka va thlen rual chuan "Lut hmasa ru" a lo ti vat a, Awmpuia chuan a chhang lo, a kal pel nghal hmiah a, a hnunga zui ka tum chu Benjaminan min lo nam kiang rawk rawk a, Awmpuia lut chu a zui nghal zat bawk.

Kan va lut chu ka ṭi ru dek mai, "Choka lamah hian" ti a ka au chu an hre lo nge ni Sitting room lam an pan, "E he....!" u Lizzyn a tih ri chu ka hre pha, ka thil khai chu dawhkanah ka dah sawk sawk a, hmanhmawh deuhin ka va phei ve a, Unaunu chuan min lo en phawk khawp mai,  'Eng nge a awmzia?' ti niawm tak hian min en a, lu ka lo thing ringawt. Benjamina lah chu Awmpuia bul chetah a ṭhu a, ṭhian dun lo leng chu an ang viau tawh, Awmpuia zawk chu a ṭhu tum deuh bur a, Benja erawh phur hmel tak a ni, Unaunu lam hawiin a nui suk suk reng.

"Eng nge i lo tih dawn?" tiin Unaunu chuan a melh rum kha kha a, "Ka lo leng" pakhat chuan a ti teh tlawng a, Unaunu chu a lawm loh hmel khawp mai. Awmpuia chu ka va melh a, choka lama koh phei daih tur em mawni.

"Haw leh vat rawh, ka nu a awm ania, a lo chhuah hmain kal vat rawh" Unaunu bawk a ni.

"Ka leng rei dawn lo, buaina ka rawn siam pawh a nih loh hi" Benjaminan a tih laimekin nu Hlimi a lo chhuak a, "Mate, Electric bill kha.." a rawn ti chu a ding chawt a, a ṭawng tawp chiang hle. Makti tih hriat fein kan inleng te chu a melh a, hun kallai a chawl ta emaw tih mai turin a reh. Benja chu a ṭhu kun deuh tlat a, nu Hlimi lam a hawi duh ṭhak lo.

 "Hepa chu, engtin nge i la rawn kal ngam a?" insum tih hriat zeta nu Hlimin a tih chuan a rawn hawi chhuak ve hram a, engmah sawi loin nu Hlimi chu a melh ta ran a, hlau hmel vak pawh a pu lo, zah der hmel phei chu pu lo tak a ni.

"Eng nge rawn tih leh i tum, ka inchhung te i rawn dai lut lehnghal a, mi i va han zah lo em em ve maw le" a thinrin viau aniang nu Hlimi aw chu a sehchilh viau tawh.

"Ka ṭhianpa ka lo zui..." Benjaminan a tih rual deuh thawin "I ṭhian ka ni lo" Awmpuian a lo ti khawl a, Benja ner hmel ah chuan pawi a tih hmel khawp a, Awmpuia lam hawiin a melh deuh vang vang bawk. 

"Buaina rawn siam leh i tum vaih a nge, hman zana i rawn khawsak dan te kha, mi zahpah lo leh eng emaw zawnga i awm leh anih vaih chuan..." Benjaminan a lo pawt chat vat a, "Kha kha ka inthiam loh em avangin a lawm ka lo kal, ngaihdam dil tur leh ka inchhir thu sawi turin" a lo ti sawk sawk a, a sawi awlsam angreng khawp mai.

"Eng a ni....?" nu Hlimin a ti let hu a, a hamhaih nge a awih loh vang zawk ni, phawk lek lek hian Benjamina chu a melh a, a fuh thei dawnin ka lo hre hman pek a, mah se.....

"Lizzy hi ka hmu chak lutuk a, harhfimin ka lo kal" a lo ti leh daih a, a va han mawl tak, ngaihdam kha dil mai mai sela ni tur.

"I va han zak thei lo uchuak ve leh, sawi awm leh mawi pawh i hre lo anih hi" nu Hlimin a ti let erh a, thawm a reh zui tlawk tlawk mai.

Awmpuia chu ka ko a, "Choka lamah ka awm dawn, lo phei rawh" ka tih chuan Benja chu a en renrawn a, eng nge maw a hriat ni "Phei ila" tiin Benja chu a sawm a, Benjamina chu a tho rang khawp mai.

Ka pathum chuan kan inzui phei a, dawhkan kan kil laia unaunu phun hlak hlak thawm chu kan hre pha a, "Inleng dang awm laiin i ti vak a, Awmpuian nuam lo a tih hmel em kha, insum ve deuh ṭhin rawh" tiin a nu chu a khak a, "I lo be leh tawh em ni?" a nuin a tih chuan a pha leh vat a, chutih laiin Benja chuan zial a lo ṭan mek thung.

"I zu ve duh em?" tiin Awmpuia chu a zawt a, Awmpuian lu a thin chuan "Serṭawk i ang ka ti, a tirah chuan a thlum a, a hnuah a kha tlat ṭhin" a tih khum kher a, a ner zui nang bawk.

"Nang ni ila chu ka haw tawh ang" Awmpuian a tih chuan a lo nui huk a, "Ka leng rei lo ang, nuam ka ti hran hleinem" a ti sam mai a, a zial chu a zu sek sek a, a pak khu hlat hlat reng.

"Ngaihdam kha dil ṭha ve mai mai la ṭha tur ania, i mawl thei em mai" ka lo ti khar khar a, u Lizzy lo phei chu ka lo melh vat bawk. Eng khaw sawi set set loin Benjamina tukkhumah a rawn nam bu lawp a, "Rawn chhuak teh" a tih hnuah pawn lam a pan nal nal nal a, Benja chu a lawm mah zawk emaw tih tur a ni, nui vur vur chungin kawngkhar lam a hawi a, a muang chang reuh khawp mai.

"Min haw viau rih mahse a makpa ka la ni dawn a lawm, nang aiin ka hmasa lo ang tih a sawi theih loh" tiin Awmpuia chu a hrilh a, Awmpuia pawn a nuih ringawt tawh. Benja kal chhuah hnu chuan kan in en ran a, "I ril a ṭam em, noodles ka chhum ang che aw, chaw nen i ei dawn nia" ka ti sawk sawk a, thawh nghal mai ka tum chu  "Thu lawk teh" a lo tih vang chuan ka ṭhu ṭha leh a.

"Inrawlh tawh lo ang che, hei hi ka sawi tawp na a ni bawk ang" a ti chang bawl a, min ti hamhaih deuh. "Chutin, ka inrawlh hleinem" ka ti vat a, "An ni vanga buai kha ka duh lo, khapa kha buaipui tham a nih kha, i pui anih chuan i la buai phah viau ang" a ti leh a, a landan chu min vau hi a ang ber. Ngawi rengin Noodles chu ka va siam a, U Lizzy lo lut lah chuan ka biakna pawh chhang loin pindan lam a pan a, rei loteah a nu nen an inhau thawm ka hria a, ka inleng pawh chuan nuam a ti lo ang, a ngaithla ve reng a, engmah phei chu a sawi tawh lo.

Thil kan ei zawh hnuah a haw a, gate thleng ka va thlah a, a tlan liam hnuah a kawr kha ka pe lo tih ka hrechhuak leh chauh a, amah pawh chuan a lo theihnghilh ve tho a,  college ka ken sak tawh mai aniang chu. Zanah ka mu hma a, Pathianni pawh ka inkhawm veleh thlap a, inkhawm banah u Lizzy ṭhiante an lo len avangin pindanah ka tawm chawt a, Awmpuian lehkha a zir vangin kawm tur an vang khawp mai. Mawitei leh Kimkimi bak hi chu han kawm vak ka nei lo a, an ni pawh hi thuruk zawng zawng sawi pui tur khawpin ka pawh lo a, Awmpuia hi ka best friend te pawh a tih theih ang chu.

Thawhṭan tuka ka tho chu ka pa'n min lo phone hma khawp mai a, "I nu chanchin i hre tawh em?" a rawn ti phawng a, a awki chu a dik lo riauin ka hre bawk.

"Eng chanchin?" hlau thawng ru deuhin ka ti a, ka nu Remi khan a han bia anih ka ring, ka lo khap hman lo chu pawi ka ti.

"I nu chu Rinawma nen an tlan dun anih chu, i pa Muanan min lo hrilh zo chiah" a rawn ti ta mai a, chu thu chuan min deng dawt a ni ber, ka chawmawlh zo vek a, ka pa hnenah chuan sawi tur reng ka hre lo, kei ang thoin a hrilhhai ve dawn tih pawh ka hria, ka hnem thei lo a, ka chiai ruai mai a ni.

(End of chapter - 9)