I NGHILH ZAWK ANG (CH - 1) by Ahmangaihi violette khiangte

I NGHILH ZAWK ANG

by Ahmangaihi violette khiangte

Chapter - 1

"Nu, inleng ka nei maithei ania aw," a rawn hawi zawk a, a mitmeng buai deuh nak chu ka hmu hman. "Inkhawm phawt la," a ti a, ka nui tet tet a hmuh chuan, "Alana em ni, a duty dawn nange?" a ti liampuat a, fridge khawngkhar chu hawngin min ngaihsak zui lem lo.

"Duty dawn e, inleng ka sawi chu inleng dang deuh a nia, karthar lamah," ka nu kun lai chu a rawn hawi chhuak leh vut a, "I ti tak tak e lo?" a ti hu a, ka lo bu nghat ringawt. "I pa hrilh zawk la, a thu ber alawm, keite chuan pasal nei lo mahla ka pawi ti vak hleinem," a ti nuah nuah a, ka nu ṭhin hi chu.

"I duh ve deuh tho ti raw?" uang deuh tak chuan ka han ti leh a. "Ka hre nang..." a la ti ṭalh, ka nu hian min duhpui vak lo a, a chhan chu Alana hi pathlawi fa pathum nei tawh a ni a, a iai deuh tlat a ni. "Anih chuan 'aw' ka pawh mai dawn asin, ka pa chu nangman hrilh mai la, an lo len hunah a duh danin lo chhang mai se," ka nu chu a ngawi reng a, a chawhmeh rawn pawrh chu ka lo bansak thuai bawk a, a che chu a muang khawp mai, a inngaihtuah buai mek a ni.

"I nei duh tak tak em ni, a aia ṭha pawh i hmu awm tho si a, pathlawi berkher chu aw...." 

"Aaa...ka nu chu...pathlawi ni lo se ka chang bik kher nang, Doctor ngat a nia, an awmthei viau bawk a, nula tamtakin an ngaizawng ang tih ring tawp rawh, makpa atana awt fe fe pawh an awm ṭeuh ang chu le," zangkhai fea ka tih laiin, "Doctor i duh te chuan ti nge i zir ve mai loh, teacher nih ka duh i ti zawk anih kha," a lo ti zauh a, hmanlai thil a rawn sawi chuan nuih a ti za angreng. Ka naupan deuh laikhan Doctor nih ka tum ṭhin a, class 12 thleng khan science ka la nghe nghe a, a hnuah arts-ah ka inlet leh ta kha a nia; mahse, kan thilsawi lai nena a inpersanzia chu aw.

"Ka pa chuan a duhin ka hria," 

"I pa chuan in duh apiang a phalsak zel che u alawm," 

"Nia.." min lo en zawk a, a tum deuh bur mai.

"Leng tar se min duh tak tak hi i ang ṭhin," ka ti leh chu a lo pawm khawp mai, "Kan bulah awm reng la ka duh alawm, i pasal neih hunah chuan ka khua a har dawn asin, i u ten nupui fel lo deuh an neih phei chuan ka rethei ngawt ang," a'n ti pek a, a thil ngaihtuah tehdaih chu, hei hi ka nu zia ve ania, thil hi a ngaihtuah ngut ngut zel.

"Lungngai suh, kan mo te an sual chuan ka bulah i awm daih dawn alawm, i rethei teuh lo mai," ka ti a, a sawi chhuah changa ka lo thlem dan ngai bawkin ka thlem leh. Ani pawh chuan min chhan dan ngai bawkin, "Makpate ina awm ka duh lo, fapa pahnih ka nei alawm," a ti a, a rilru hi chu hriatthiam a awl thei a nia, ka unaupate hi laktlak deuh se ka ti ṭhin ngawt mai.

Nula kum 35 mi ka ni a, unau zinga naupang ber, nu leh pa leh chhungte dang pawhina an duat rawn ka ni. In chhunga ka tlei tawk vang hi aniang pasal neih hi ka chak ngai lo a, Alana ka tawn leh hma zawng kha chuan len tar mai pawh pawi tih loh chang ka nei ṭhin. Mahse, Alana ka han tawn leh takah hi chuan pasal neiha chhungkaw din te ka chak thar ve a, zep loah chuan ka tlai mah mah ang tih pawh ka hlau a ni, hmeichhia hi kan kum a tam hian fa neih kan harsat sawt ṭhin an tih ka hria a, ka naupang zawk zawk tawh si lo va, chumi hre reng chung chuan Alana'n min sawm pawh khan ka hmin nghal viau a, ka chhungte lamah pawh harsatna a awm lem loin ka hria, ka nu erawh a lung a dam zan lo a, min hnial erawh a tum bik lo ang, ka duh min tih sak loh a nei ngai tlat lo va.

Alana hi High school ṭanga Higher kan kal thleng khan kan senior student a ni ṭhin a, ka ngaihzawng hmasa ber a ni, inṭhenna mumal pawh awm loin kan inkar kha a zuih ral a, a chhan pawh ram dangah lehkha min zir san tak vang a ni a, khang hun laikhan inbiak pawh a har a, mitinin mahni pualin phone-te kan la nei lo a, chanchin inhre lo leh inbe pawp lo ta chu kan inṭhaṭhen a ni zui der a, kan inhmuh leh karah hian kum tam fe a tla hman a ni.

Ngaihzawng dangte neiin zirlai ka chhunzawm ve zel a, han hriatchhuah zawk chang hi chu ka nei ṭhin. MA ka zawh hlim lawk khan hna ka hmu nghal a, kan veng Middle school-ah a ni nghe nghe. Hetia middle school-a ka thawh laihian a chanchin ka hre ve leh chauh a, nupui leh fate a nei tawh a, an chhungkuain Aizawlah an awm a, sawrkar hospital-ah a thawk tih te chu ka hriat chhun a ni. Ngaihzawng nei ve tho ka nih bawk avang leh hun tam a liam tawh vangin han lunglen thar leh ang kha ka nei lem lo a, amah ka hriatreng dan chu a ṭha zawng hlir a ni bawk a, inṭhenna mumal kan nei lo leh a hmasa ber a nihna erawh hi chuan danglam bikna a neih tir a, ngaihzawng hlui sawi chhuah apiangin amah ngawt hi ka ngaihtuah chhuak ṭhin. Naupan lai aṭanga ka ngaihsan leh ka zah ruk ṭhin kha a ni tlat a, a chanchin sawi hi chu nuam ka ti ve em em zel a ni.

Ka ngaihzawng ṭhen tak khan hmeichhe dang nen min kawp avangin chhe takin kan inṭhen a, ka rilru a na ve khawp mai a, a chhan pawh ngaihzawng ka lo neih tawh te nen hian chhe taka inṭhen kan la nei ngai lo a, a hnuhnung ber nena kan tawp dan khan thathona a ti bo vek ti ila a dik ang. Eng emaw chen chu ngaihzawng nei loin ka awm a, min duh der ve tute pawh ka ti beidawng fo ṭhin. Pasal neih loh thlenga ngaihtuahna ka neih tawh hnuah Alana hi a lo lang leh a, a nupui nena an inṭhen hlimhlawtah a ni nghe nghe.

High school reunion kan neih ṭum a ni a, batch khat chauh chu kal thei an tlem vangin batch dang nen kan ti ho a, Alana te pawh an tel ve phah a ni. Chutia hun rei tak hnua kan han inhmu leh chu sawi tur a vang duh khawp mai, be hmasatuah ka ṭang a, ani chuan chiang ngam chiah lo tih hriat tak hian, "I dam maw, eng nge i tih tak zel?" tiin min zawt a, kan inbiak luam hnuah makti lek lek chungin ka kalsan a, hmelhriat satliah hi ka angin ka hria. A hnua ka hriat leh danin ka ṭhiannu Rampuii hnenah, "Ruatsangi a ni em?" tiin a lo zawt a, a hnua min biak leh kha chuan min nuih deuh var var tawh. Hetia kan inhmuh hma lawk hian ṭhiante hnen aṭangin a chanchin ka hria a, a lo kal ve dawn thu min hrilh vanga phur viau pawh ka ni, a nupui nen an inṭhen tih te ka hre zui bawk a, an nuin a uiresan a ni awm e. 

Kan haw dawnah phone number te kan inpe hlawm a, reunion leh hunah kim taka kal leh turin kan inchah bawk a, Alana nen erawh number kan inpe lo, ka dil ngam tlat lo a ni. Ṭhianten a chanchin min ngaihven sak chung chung a, ngaihsak loh hmel taka awm chungin ka bengkhawn ru hle thung. 

Alana chuan fanu pahnih leh fapa pakhat a nei a, a fate chu a nu bulah kolasib-ah an awm a, chutah chuan an in pui pawh a awm a, helaiah amahin a awm rih tih te ka hre thuai a, a nupui ṭhen tak pawh kha kolasib khua tho a ni a, aizawlah an pem tawh tih thlengin min hrilh hlawm a, Alana chu an khaw lamah a haw zing viau bawk an ti a, a fate vang anih hmel.

Reunion kan neih aṭanga kar khat lai a liam hnuah zan khat chu min rawn be hlawl mai, engtin nge ka number a neih pawh ka hre lo. "Hmanni khan inbiakna hun a awm mang si lo a, i chanchin ka hre chak deuh tlat, school-ah ka thawk i ti em ni khah?" tih angreng chu khunkhan deuhin min lo zawt a, a ṭawng danah chuan zakzum leh zei lo tak hi a ang a, a mizia a la ngai rengin ka hria, a dam dup reng.

Kan veng Middle school-a ka thawh thu ka hrilh a, ani pawn a hnathawh te min hrilh ve luam a, engmah la hre lo angin ka awm a, ka lo fak ve luam bawk. Rei dawn kan inbiak hnu chuan, "Kan inhmuh lohna a rei tawh hle mai ti raw?" a rawn ti hlawl a, kei lah chuan, "Kar hmasa lawk khan kan inhmu alawm," ka lo ti ve thung a, "Ni tak, ka sawi zawk chu, a hmanlai tawh angreng," a ti nuah nuah a, kei ka lo nui kar kar.

"Engtikah nge nupui i neih?" tiin ka zawt thut a, a sawi hreh ka rin tehreng nen ṭha deuhin min lo chhang a, a nupui nen chuan medical college-a kal laiin an intawng a, rei pawh inngaizawng loin an innei a nih hmel. "Christmas dawnah mizo awm hoin inhmuh khawmna kan nei a, chumi hnu lawk chuan nau kan pai a, hna pawh ka neih hmain nupui ka neih phah ta alawm, fa pathum kan nei hman a, tunah chuan kan awm hrang leh tawh anih hi," a ti luam a, "In awm hrang rih mai mai em ni, in koh leh te a hnai em?" ti a ka zawh leh chuan, "Kan awm ho tawh lo ang, buaina lian tak a awm a, nakinah kan la inhrilh ṭha dawn nia," a ti ve vat a, a bak chu ka zawt thui duh lem lo.

Chumi zan aṭang chuan kan inbe ta zeuh zeuh a, hunawl a nei vak lo a, min lo biak lai hi a lunglen lai anih te ka ring ṭhin. Zan rei hnuah min lo biak leh hlawl hi a tam a, kei ka menrei ṭhin avangin rei tak tak thlengin kan inbia a, chhun lamah erawh a reh leh veng veng zel. 

Zan khat chu hmanlai thil kan sawi chhuak a, a chhan pawh kan inhmuh ṭuma min hai vang kha a ni. "Min la hriat reng ka ring a, i hmel ka hai loh tehreng nen," tiin ka vui der a."I danglam tawh em alawm?" a tih chuan engtin nge ka danglam chu ka zawt leh hram a.

"I hmelṭha tawh lutuk a, a hma pawh khan i chhia ka ti chuang lo ania, ka hmu thut che kha ka hmahaih bawk a," aw lawi angreng zet hian a ti a, "Min hrechhuak ve ngai em?" ka lo ti zauh a, chu chu a bul ṭanna a ni ta.

Min hriat chhuah fo thu a sawi a, keichuan, eng vanga reh hlen hmiah nge anih ka lo zawt let a, "Inbiak a har bawk si a, phone hmang turin ka chhuak thei bawk si lo, lehkha rawn thawn dawn lahin tih ngaihna a vang si a, ngaihzawng min neihsan tawh te ka ring bawk a, engkim kha a buaithlak a ni," a ti halh a, ka hrethiam viau nain rilru a dam lo ru khawp a, mumal deuha min ṭhen turin ka duh zawk pawh a ni maithei, a hunlai khan laklawh deuhin min awm rei tir a, ngaihzawng ka neih leh pawh khan rilru nuam lo leh inthiam lo reng rengin ka awm phah fo a ni.

"Engati nge pasal i la neih loh?" a ti phawng a, "Ka hmu zo lo va," ti a ka chhang chu a awih lo khawp mai.

"I hmu lutuk ang, duhthlan ngaihna i hre lo zawk a ni ang," a ti nghat a, ka nuih a zatzia chu aw...

Min zawh nawn leh takah chuan ka chanchinte ka hrilh ve a, ka bialpain min kawp vanga kan inṭhen thute pawh tlang deuhin ka hrilh a, kan inbe tam ve tawh a, engmah han sawi hreh ka nei bik lo a, ani bulah ber kher phei chuan sawi hreh tur awmin ka hre lo. Chutia ka chanchin ka han sawi takah chuan ani pawn sawi a tim ta bik lo a, an nupa inṭhen chhan pawh min hrilh ve ta a. 

A sawi danah chuan a nupui hian zu a in ṭhin a, an inngaihzawn laia in tawh a ni nghe nghe. Fate an neih hnu hian a nghei ve ren rawn a; mahse, Alana hriat lohin a lo inru fo a, a petu pawh Alana ṭhian hnai tak a ni. "Ka ṭhianpa nen khan bazar leh khawilai dawr velah emaw an inzui chhuak hi an hmu fo a, ka hmelhriat te hian min hrilh leh nawlh ṭhin, ka ṭhian a nia, eng eng emaw a han tirh lawp lawp chang hi kan nei a, kan nu pawn a inpuihtir nimaiah ka ngai a. Ṭum khat chu kan inluah neitunu hian, 'In inlengten garage kawtah luhna dalin motor an dah ziah a, lo hrilh rawh' a lo ti ringawt mai a, kan nu chhungte an nih ringin kan nu bulah khan ka hrilh a, khang laikhan rinhlelh nachang pawh ka hre lo. Mahse, zankhat ka duty tur chu theihnghilh ka neih vangin ka let leh a, chumi ṭum chuan ka va man chhuak ta alawm, khumpuia an mu lai tak a nia ka va hmuh ni, kan fate lah piandan piah lawkah an awm a, ka insum zo lo teuh asin.

Ka dawp nasa a, ka vau bawk a, kut em chu ka thlak lo. Ka hriat chhuah tak chu kum thum lai min lo bum tawh hi a lo ni a, zu an inpe a, an ruih laiin an lo chesual a, ka duty laite, ka nu tlawha ka zin laite, ka awm loh apiangin an lo khawsa dun ṭhin a, kan inchungte mit pawh an lo ti kham viau tawh zawk a, kan inṭhen hnuah min hrilh hlawm, thil ka hrethiam har lutuk kha a pawi a ni ber mai. Ka ṭhianpa lah chuan ngaihdam min dil mawlh mawlh reng a, tun thleng hian mi a la rawn tlawh a, min haw ṭha duh bawk si lo a, kan nu nen pawh chuan an inkawp zui lo aniang, ngaihzawng dang a neiin ka hria," a ti dap dap a, a aw riah chuan rilru na aw aiin beidawng aw a langin ka hria.

A fate chanchin ka zawt zui a, a nu hoa a lak chhoh dawn thuin min chhang a, a pa a boral tawh vangin a nu hi amah tein a awm a, in ṭha tak an nei bawk a, a nu chuan dawrte siamin an inpui chhuahsan a hreh tlat a, Alana lahin a ngaihtuah em em bawk a, hetiang boruak an han neih takah chuan a nu pawn Aizawl lama awm chu a ṭul a ti ve ta aniang, an in chu midang luahtira, a fapa fin ve turin thu a ti tlu ta anih hmel.

Kan inbe zing telh telh a, sawi tur a tam telh telh mai. Min lo biak har deuh hi chuan ngaih a ṭha lo hman zel mai a, a phone call ka dawn tawh hi chuan class lak lai a ni emaw, chaw ei lai a ni emaw ka chhang ngei ngei ṭhin. Chutianga inbe tam ta na na na chu kar loah kan inngaizawng a ni der mai. Ṭhenkhat tan chuan a mak maithei a, ka chhungte ngei pawn mak min tih thu an sawi a ni. Mahse, Alana zawng a danglam a, rawllai d a nihna mai piah lamah kan inkar tawp dan khan thil a ti awlsam zual a, pawm leh chu ka tan thil har lo tak a ni. Rawlthar lian zet zawt, hmelṭha leh nelawm em em ṭhin kha patling fa pathum nei tawh a nihna chauh chu a danglamna niin ka hria. Ka duhna a la awm reng a, tunah phei chuan nunhlui ngaihna zawng zawng leh laklawh taka kan inkar famkim ta lo vangte khan aniang duhna a zual zawk a, a lungleng inhnemna ka ni tih ka hre chungin ka hnar phal chuang lo, a dinhmun ka hre vek a, a fate a ngaiin an hmakhua a ngaihtuah em em bawk a, mipa fel leh ṭha tak, hmeichhe awm khaw lo pakhat vanga vanduai ta maiah ka ngai a, ka lainat ngawih ngawih zawk a ni.

Kum hial kan inzui takah chuan inneih te kan han sawikai chho a, ṭhiante lam aṭang pawhin min nawr tawn ve ve a, ka kum a ngaihtuah ve bawk nen inthlahrung deuh chungin nupuiah min sawm ta kha a nia, min sawm laia a inthlahrunzia mawlh kha. "Ka ṭhen phal si lo che a, hetia kan inzui reng chhung hian i upa ve zel a, a ṭha dang nghah nan i tlai zo vek ang, rilru kan siamfel a ngai a ni, ka dinhmun i hre vek tho a, ka phu lohzia che ka inhre bawk; mahse, tawp leh hni hne tura inngaizawng rual chu kan ni tawh lo alawm tiraw,?" a ti a, kei lah chuan i he lovin ka lo pawm hmiah mai a, ka awlsam lutuk kha mak a ti bawkin ka hria. 

Tichuan, tun hun hi kan lo thleng ta a, palai a lo tir ang a, kan chhungten rem an ruat ang a, inneia chhungkua din chu kan hmabak a ni ta der mai. A fate ka la hmu ve lo a, min hmuhtir chu a tum a, hun ṭha a la awm thei meuh lo. A chhan pawh a fate hi Hostel-ah an awm a, kan inneih hnu hi chuan lak chhuah a rilruk a, chen ho tam loh chuan inhmangaih a har a tih pawh ka pawm zawng tak a ni ve a, ka theihtawka hmangaihpui ve pawh ka duh a ni.

Ka mu deuh chauh tihah ka pindan kawngkhar an rawn kik a, "Tunge?" ka tih rual deuh thawin U Sena a lo lut a, "Thil ka hria a nia aw?" a rawn ti sur sur a, hrethiam lo fea ka lo en laichuan, "Ka nuin min hrilh," a ti a, sawi zawm turin min duh aniang zawhna ngah hmel deuhin min en bawk.

"E, i lo hre ve tawh a ni maw," nui chunga ka tih chuan, "Damien-a hi ngaihtuah ve la," a lo ti let heh a, leh ringawt ṭhin a.

"Eng nge ani chu?"

"I la hre nange, a duh em che hi, nangmah vangin alawm keipawh min kawm mai mai,"

"Awi aa...i ṭhian a ni lawm ni?"

"A duh che ka tih chuan awih tawp rawh, chocolate pawh a lei ziah che hi,"

"Nangman anih kha ei zel," a lo nui huk a, a ṭhianpa Damien-a hian a lo kal apiangin chocolate min pe ziah a, ka ngaina si lo a, a haw hnuah U Sena hian min chhuh nghal daih zel a, amah Damien-a tak chuan a hre ve lem lo.

"Ti nge, hmelṭha i ti lo em ni? A luck teh asin,"

"A luck tho chu, ka ngaihtuah a ngai lo tihna," a rawn kal a, ka mawngah a rawn beng thlawp!

"Doctor-a aikhan a hausa daih zawk asin, tlangval hnahkhat ngat, a la virgin maithei bawk," ka lo ner nang a, "Ka duhpui zawk che," a tih zawm leh zat a, ka lo melh rum khawp mai.

"Ka nu nen kan duhpui che," 

"Nangman nei mai la,"

"Mawli!"

"Anih loh leh nupui nei la, fanu in nei ang a, i la neih tir dawn nia," a lawm vak lo aniang rum zetin min lo melh let a, "Alan-a aiin a ṭha daih zawk, a duat ngawt ang che, tunah pawh kehthei dawma dawm che a tum ṭan ania," ka nui hawk a, "Fel i ti lo em ni?" a tih leh chuan hnialna tur ka hre lo, Damien-a chu fel tak a ni, ka lakah ngat phei chuan uinote fel tak ang a ni, hmeichhe lamah a luck a tih pawh chu ka ring thlap, kan veng nulaho star rawn a ni tih ka hria; mahse, ka u ṭhian a nihna ang bak hi chuan ka en dan a danglam ngai lo.

"Duh zawk daih tur ania, pathlawi.." a ti leh chiah chu, "Pathlawi ti sek lo teh, Demien-a te chu u angin a lawm ka en, u te ṭhian ngaihzawn hrim hrim kha ka duh lo, engkim in inhriatpui emaw a nia nga, ka duh teuh lo mai, chu bakah Alan-a hi a pathlawi vangin iai ngawt lo u la, a chanchin hriatsak ve ni u la chuan in khawngaih dawn lutuka, a pathlawi chhan hi a thiam loh a awm hleinem, a vanduai a nih hi," ka lo ti duah a, ka chhang beidawng deuh a ni ang min en ran a, ka sam a rawn chul ringawt bawk a, "I luhlul si," tih bak chu eng mah a sawi zui lo.

A chhuah hnu chuan Alana ka call a, phone chu rei pawh a rik hmain a lo chhang a, midang ṭawng thawm a ri nak nak mai. "I buai em?" ka tih chuan, "Ward ka fang zo chiah a, buai loh lai tak a ni," a lo ti var a, "Ka nu chu ka hrilh a, palai lo kal phawt rawh se, palai hmel hmuh hmaa rem thu sawi chu an hreh maithei a ni," ka ti zung zung a, "Anih chuan kar tharah ti ang aw, min lo hnar em lo ang chu," nui aw lek lek hian a rawn ti a.

"Lo hnar ta che se la engtin nge i tih ang?" tiin ka fiam zui a. "Inru tur chuan kan upa tawh angreng si a, engtin nge niang aw?" a nui leh a, "Kan lo leng nawn tluk tluk ang a a ni mai," a tih zawm a, chu em chu a thlen ka ring lo, ka pa hi chuan a ngaina a, kan unau hian kan ngaihzawngah a inrawlh ngai lo a, "In duhtak i nei ang a, in thlan fuh loh leh in tan vek ania, a thlang thiam thiam in vannei a ni mai," tiin min hrilh mai zel a, Alana pawh hi a pawm dawn tih a chiang reng tawh. 

Tukṭhuan ei laiin ka u Hruaia'n min fiam zuk zuk a, ani hi u Sena chhang chiah a ni a, inchhangbung kan nih avang hian kan inkawmngeih a, khawi ilo chhuahnaah pawh kan inzui tam viau ṭhin. "A chîah kan dah te kan lo ti ve tawh si a, zawhna a va tam duh dawn ve le, palai lo kal hunah ka awm ve teh ang, thu delhkilh neih ṭeuh a ngai," a ti ve ngei a, ka nuin fiamthua eng thu nge delhkilh a tum a zawh chuan, "Aw, riak tura hruai fo te kan duh dawn asin, ka thawmhnaw su tu ber ania, kartawpah te a lo riak phei ṭhin ang chu," a lo ti roh a, kan nui dar dar. Hepa hi hian ka nu tih loah chuan min ngai ber ang, ka puihna tel lo hi chuan eng mah hi a ti hleithei lo, a leng chhuak tur pawh hi insiampui thlap a ngai ṭhin.

Kar a thar a, thawhṭan zanah palai pawh an lo kal ta a, ka pa chuan, "A pu te ho kan lo rawn ve phawt ang e," tiin ṭha takin a lo chhawn a, an haw hnuah ka pu te pawh a be kual a, chhungkaw inhmuhkhawm an rawt chuk chuk bawk.

Kan chhungte lo lengkhawmin an sawi ho laichuan zam a awl ve khawp mai a, ka ni te lah chuan mi an fiam bawrh bawrh a, ka nu chhungte lam erawh an hmin lutuk loin ka hria, ka nuin min tui pui loh vang pawh a ni maithei. Mahse le, a neitu tur berin ka duh ve miau mai si a, duat rawn na na na chu min hnialsak bik lo a, palai an lo kal leh rualin a ni tur te pawh an ruat fel ta vek a, december thla laihawlah Alana nena kan duh dan ang takin min ruat sak a, lung a awi hliah hliah mai a ni.

Kan chhungkua hi khawsak harsa kan ni lo a, khawsa nuam ve tawk tak kan ni ang chu, ka pa te lam hi an hung deuh a, ka nu te lam erawh unau pathum ve tho an ni a; mahse, ka pate lam aichuan an neinung zawk a, ka pasal neihna tur atan pawh an inseng huai khawp mai. Ka pu Hriata (Ka nu te unau zinga upa ber) chuan, "I duh duh ka leisak ang che, i bazar dawnah i lo sawi dawn nia," a ti hmiah mai a, sumdawng hausa a ni bawk a, furniture lam an zawrh vangin hmun dang pan a ngai hek lo ang.

Alana pawn khumte a siamtir a, a hna nen a buai angreng a, va puih vak theih lah a ni lo. Keichuan min  buaipuitu ka ngah a, ka nite leh nutei te bakah ka ṭhiante an awm a, engkim chu kan ti fel zung zung a, ka ute pahnih lahin ka chhawm ṭhat loh mawlh an hlau a, kei aimahin an vei zawk emaw tih tur a ni. Mo kawr pawh a hranpain min order sak a, hawh mai pawh pawi ka tih loh laiin u Hruaia'n, "Damchhungin vawikhat chauh pasal i nei dawn ania, mahni pualin neih ve ngei tur," a ti teh tlat a, ka tan chuan engkim chu pawm a nuam em em vek mai a ni.

Inrinniah ka pu Hriata te chhungin chaweiah min sawm a, u Sena'n min va thlah a, chumi kan kallam chu "Damien-a zin a lo haw a, tlawh kawi lawk ang," a tih vangin zarkawta a dawr kawtah kan ding a, Damiena hian phone dawr a nei a, kan chhungkawho phone hi chu a dawr aṭanga kan lei vek a ni. Kan va thlen laichuan customer an lo nei a, a lo buai angreng khawp mai. Min hmu chu tawi te hian min rawn nuih a, u Sena lah chuan, "Ṭha deuhin be rawh, i pasal neih tur thu ka hrilh khan a rilru a na teh ania, va be rawh," a lo ti ru sur sur a, kan inkarah eng mah a awm lo chungin awm a nuam bik vak lo.

"Khawiah nge in kal a?" ka biak hma chuan a lo ti a, kei min en loin u Sena a en daih thung.

"Ka pu te inah kan kal lawk dawn a, ka thil chah che kha i lo hawn em?" u Sena'n a tih chuan, "Zanah lo ken ka tum a, i duh leh la nghal mai rawh, Ruatbawihi thil pawh a awm," a ti a, min en lem lo chuan a kal sawn nulh a, a awm dan chu min ngei deuh emaw tih tur a ni.

"Min be duh miah lo," ka u bula ka tih chuan,  "A broke ve anih kha," a lo ti mai a, han tih zui vak dan pawh ka thiam lo.

Damiena lo let leh chuan bag dum hi a rawn khai a, a rik dan aṭang chuan zu an inchah tih ka hrethiam a, biak ve ngei pawh a ngaiin ka hria. "Thil min lo hawn em ni?" tiin ka lo nuih var var a, min nuih tawi tek tawk khawp mai. "A chhungah khan a awm," tih zawng a sawi a, ka u lam hawi chuan, "Zanah i awm angem?" a ti zui a, ka u in a chhan laichuan bag chu ka lo hawng a, ka thil tur chu eng tak ni ang maw ka tih rilruk laiin Iphone cover nalh deuh mai hi a lo awm a, lawmthu han hrilh ka tum lah chuan a kal sawn daih a, customer a be bawk nen va biak buai leh theih pawhin a awm lo. 

"Ka lawm e aw, i lo len hunah thil tui deuh ka lo siam ang che," ka ti ve tak nain ban a rawn vai thuak chauh a, rilru nuam lo deuhin kan chhuahsan ta bawk.

Ka pu Hriata te chhungin ka almirah chhawm tur an lo siamtir a, chumi min hmuh duh vanga chaweia min sawm hi an lo ni a, mi hausa fa pawhin hetiang aia ṭha chu an chhawm bikin ka ring lo. "Dawrah lo kal a, dressing table i duh ber i rawn thlang leh dawn nia," tiin ka pi Zuali'n min hrilh bawk a, ka cousin te lah chu an lo phur khawp a, min cheitu tur te min zawt chuk chuk a, thiam an tih ang te pawh min kawhhmuh zung zung mai.

Dar 8 dawnah u Hruaia'n min lo lam a, in kan va thlen chuan kawtah Damiena bike a lo inhung a, inchhung lam erawh an reh ṭhap thung. Ka nu ka au a, choka aṭangin min lo chhawn a, "Khawiah nge midang?" ti a ka zawh chuan, "I pa chu damlo kanin a chhuak anih kha, i u te inchungah an awm," a lo ti lang lang a, u Hruaia erawh nula rim turin a chhuak leh tawh thung. 

Ka pindan lam pan mai ka tum chu, "Thingpui hi han pe lawk ta che" ka nu'n a lo tih vang chuan ka let leh a, "Zu an in em ni?"  ka va ti chu a ner nasa mai, "I u khian a in leh ngei ngei ang," a ti hlak a, eng mah sawi zawm tawh lo chuan thingpui chu ka chawi chho a. U Sena pindan ka han luh chuan computer bulah u Sena a lo ṭhu a, a sen chi hi a lo inchhawp ran a, Damiena erawh khumah ṭhuin tukverh lam a hawi a, u Sena guitar a lo kuah ran bawk a, ka luh rualin a hmet tawp daih thung. Min lo en reng a, thingpui ka va pek pawh chuan min be miah loin a la a, ṭum dang ang chu nise min be luam ang a, min fiam leh bawrh bawrh tawh ang, tunah hian min ngei anih loh vek chuan ka lakah a lungawi lo hle anih ka ring.

"Kal chhuah intum em?" ka u zawk chu ka bia a, "Tum pawh ka hre lo" a ti mai a, Damiena chu ka en leh a, thingpui no a lo bih vung vung a, biak loh chuan awm a ti nuam lo ve tlat mai a, sawi tur lah chu ka van nasa.

"Delhi-ah i kal tih pawh ka lo hre lo va, thil chah che ka duh nen," ka ti ta ngawt, a lo hawi ve vat. "Ka kal leh dawn alawm, eng nge i duh a?" a ti ve ta hram a, a ṭawngkam pawh a nelawm viau.

"Tlereuh vel," phawk deuh hian min en a, "Inneih zungbun em ni?" a ti zui a, u Sena pawh a lo hawi zawk.

"Ni lo, Silver lam, delhi-ah a tlawm deuh a,"

"Rangkachak zungbun a lei dawn lo che em ni?" tiin a nui suk a, a thingpui inpah chuan min melh ran bawk. "Inneih zungbung tur a ni lo, ṭhi ka duh a, mi pek tur," ka ti zawi sep a, min chhang tawh lem lo.

Ka chhuahsan hnuah ka pindan lam ka pan a, rei pawh a liam hmain guitar play thawm leh mipa zai ri ka hria a, Gnat Lalrinchhana sak ngei mai 'Duhaisam tikimtu' tih hla kha zawi angreng deuh hian a sa a, a aw a thum deuh a, zaithiam tak a ni lo nain a aw hi chu nalh ve deuh mai a ni. U Sena zai ri ka hriat ve takah chuan ka nui kar kar a, ka u hi chu zai lai tak mai a ni thung a, tlar khat pawh hi lai loin a sa chhuak thei ngai lo, a aw lah hi a sin tham deuh ṭiak a, a zai nge a be tih pawh hi sawithiam a har ṭhin.

Hmanhmawh lo fein ka inbual a, ka inbual zawh chuan zai ri a awm tawh lo a, ka u te ṭhiandun chu an kalchhuak anih hmel e. Sana ka en chuan dar 9 a la ri lo a, mut nan a la hma bawka tiin ka pindan bathlarah ka va ṭhu chhuak a. Thlasik boruak hi chu ka ngaina a ni, ngaihtuahna te hi harhvang a, Christmas rim a nam ṭan nen, van lamah lah thla a eng bial kulh a, khaw hawi a nuamin a hahdamthlak hliah hliah. 

Chutia, ral pang mualte thlir a ka hawi veng veng laichuan ka phone a lo ri a, beisei lawk ang ngeiin Alana a ni. Ka chhang vat a, "I mu dawn tawh em?" aw zawi ruih a tih ri ka hriat chuan ka ngai ru khawp mai, vawiin chu a buai deuh a, kan inbe mang meuh lo.

"La mu lo deuh, ka mu har lo ang, naktuk inkhawm ni a nia," zangkhai deuhin ka ti a, "Ka ngai che aw, thla a eng teh ania" a lo ti ve bauh a, thla eng a lo thlir ve ni ngei tur a ni.

"Hei ka pindan balcony aṭangin ka lo thlir alawm, min ngai hmana i khawsak pawh ka lo beisei hleinem, damlo na deuh te in nei lo nge?" ka ti zung zung a, "Chawhnu lamah khan mitthi kan nei a, serious deuh pakhat chu a awm," a ti halh a, kan inbiak chang hian a damlo te chungchang hi ka zawt ṭhin a, mi harsa deuh leh damlo na deuh an awm te hian min lo hrilh ve luam zel a, mi lainatna ngah tak a ni tih te pawh ka hre thar a, han sawiselna tur hi ka hmu ngai lo.

"Karleh hian Sangsangi leh Noami an lo chhuak dawn a, ka nu nen kan va hruai dawn a, i lo kal ve duh em?" a rawn tih chuan a ni tur ka lo zawt vat a, "Zirtawpniah" a tih vang chuan rilru a buai nak thung. Zirtawpni chu kan school-in Farewell kan neih ni tur a ni a, tih tur ka kut zala tla a tam si a, ka chawl thei dawn lo tih ka chiang.

"Engtin nge kan tih ang aw, zirtawpni hian farewell kan nei dawn a, ka chawlh a rem dawn lo, lo kal ka duh tehreng nen, naupangte pawh.." min lo pawt chat vat a, "A pawi lo, intibuai duh suh, ka nu nen kan va hruai ang a, in lamah in la inhmu thei tho alawm," a lo ti zung zung a. William-a a chhuak ve dawn em ka zawh chuan, "Ani chu a nuin a hruai rih ang, Christmas thawmhnaw an leisak dawn a ni awm e," a ti zawi deuh ruih a, Alana hian a fate hnenah an nu nena an inṭhen chhan hi a hrilh lem lo a, an ṭhiante zinga inkiltawihna an neih phah a hlau a, an hringtunu huatna tuhsak loh hram a duh bawk a, naupangte rilru tur ka ngaihtuahin keipawn ka dem bik lo.

Zirtawpnia an lo chhuah chuan inrinniah an ina chaw ei phei turin min sawm a, "Lo inring lawk la, tih tur ṭul dangte lo nei lo la," tiin min hrilh lawk thlap a, ka phur viau rualin ka huphurh ru angreng a, a fanu upa zawk hnenah kha chuan a sawi tawh ngei mai a, engtin nge a lo chhan erawh ka hre lo, "Nuhrawn sual neih chu an hlau ve khawp a, an hmuh hunah che erawh an rilru a hlim khawp ang," tiin min hrilh mai a, nitin hnathawka chhuak ka nih ve avang leh amah pawh mi buai tak anih vangte hian inhmuhna hun hi kan nei khat a, zan awl a neih changa a lo leng ve zawk ṭhin hi kan inhmuh chhun a ni ber a, a fala awm dun tih angreng pawh hi kan nei meuh lo. Rei dawn chu kan inbe ve a, chumi hnuah inngai leh inthlahlel deuh chungin kan inmangṭha a, mu turin khum lam ka pan zui bawk.

Karthar lam chu exam zawh kar anih vangin ka buai ve khawp mai, exam zawh niah Rampuii nen puanthan te kan va en dun a, kan lawi kawr tur chu designer lar tak kan ṭhui tir a, mokawr kan order tawh bawk avangin a bak dang chu han inbuatsaih vak ngai pawh kan nei tawh lo. Rampuii'n,"Tunge Alana'n ṭhianah a hman dawn?" ti a min zawh chuan ka hre der lo mai a, zawhna chang pawh ka lo hre lo. A thawhna lamah ṭhian a neih ka ring ringawt a, amah hi ṭhian kawm tam chi a ni lo nge ni a ṭhiante hming hi a lam ri khat khawp a, a ṭhian pakhat chungchang min hrilh lah kha a mi huat ber a ni bawk si.

Zirtawpni a farewell kan hmang chu ka buai em avangin phone pawh ka en hman lawk lo. Chhun thingpui in laia ka en chuan Alana missed call a lo awm a, ka call let thuai bawk. "In kan thleng deuh chiah a, naupangte chu a pi hoin an bazar a, an chhuahna a la rei lo," a lo ti var a, "Naktuk chu ka lo kal dawn maw?" ti a ka zawh chuan, "Ka lo hruai dawn che nia, min lo nghak tawp rawh," a ti leh mai a, ka sa ei duh te min zawt luam bawk a, "Eirawng bawl hmain min lo hruai dawn nia," tiin ka chah ve thlap.

Tlaia ka haw chu kan kawngka bulah Damiena nena kan intawk hlawl mai. "I va haw hma ve," ka ti hlut a, "Nia, naktukah ka zin dawn a, eng maw min chah duh?" a tih chuan, "Ti leh lo mai ang, ka hmanhmawh deuh si a helamah ka lei tawh mai ang," ka ti a, Alana fate thil tur lei ka rilruk a ni.

"Tunlai chu i buai hmel hle mai, min sawm ve te i tum em?" a tih chuan, "Sawm hran i ngai em ni, ka u khan man eiturin a ti hial lo che maw?" uang deuh takin ka ti a. "Man ei kher a ngai lo, eng nge ka leisak ang che?" a ti ri chu a zawi sep sawp viau a ni.

"I duh duh a ni mai," a ner deuh nung a, "In phur bawk si," a ti ringawt a, chutah min melh vang vang a, "Eng man nge ka ei ve ang?" a ti leh a, a phur loh hmel bawk si a, sawipui vak pawh a nuam lo.

"Nuṭa man aniang" a lo bu nghat nghat a, "Lut rawh, i nu a awm, a buai viauin ka hria," tih leh kal a rual a, a bike dahna lam a pan chu ka enzui reng a, engtik aṭang khan nge hetiang rilru hi ka lakah a lo put ang le, ngaihdan pawh ka nei thiam lo, tlangval hmelṭha leh hleitling zet mai a ni a, nula tam takin an ngaizawng tih pawh ka hria a, 'Nupui nei ve tawh rawh' ti a ka fiam ṭhin laite khan min lo duh reng tawh tihna em ni ang? A lo ti lang ṭhin em le ti tein ka ngaihtuah let a, a lo kal chang hian eitur chi hrang hrang hi min lo ken ṭhin a, ka birthday apiangin thil min leisak ziah bawk a, ka u ṭhian a nih vangin min duat ve ni maiah ka ngai a; mahse, ka han ngaihtuah chian takah chuan ngaihbel tur a lo tam khawp mai.

Ka nu bulah Alana te ina chaw ka eitur thu chu ka hrilh a, "A fanu upa zawk kha kum engzat nge ni khah?" a lo ti let khauh a, "Kum 15 chauh, a nau zawk saw kum 13 a ni ve thung a, an te ber saw kum 10" ka ti chuan, "An nula tlangval ṭep tawh anih chu," a ti ban charh a, min huphurh pui tih ka hre reng a, ka sawithui pui duh lo.

Zanah chuan helhhawlh deuh reuhin ka awm a, Alana pawh ka va be sek a, ani thung chuan, "Ka hrilh hlawm tawh a, an hmu chak ve khawp che ania, engtin nge an koh dawn che min zawt a, kan inneih hma chu 'Nu Ruatte ti rawh u' ka lo ti ngawt a, a pawi i ti em?" a ti mauh mai a, pawi tih lam pawh a lang lo, min koh dan tura an lo buai chu ka nuih a za angreng khawp a, an rilru buai dan tur te pawh ka ngaihtuah ve rauh rauh a, ka khawngaih zawk angreng.

"Hria la ka duh chu ka fate nu ni turin ka nei lo che a, ka nupui ni tura nei che ka ni tih hi, an ni laka mawhphurhna la turin ka phut lo che a, chuvangin engmah huphurh suh aw, i rilru te kha i lo ti hah ang e, eng mah rilru hahna tur a awm lo ania," a ti sap sap a. Kei chuan, "I nupui ka nih chuan i fate pawh ka fate an ni ve mai dawn alawm, nupa kan nih angin kan fate laka mawhphurhna chu kan hlen dun zawk dawn nia," ka ti ve thung a, "Nang hi chu i fel ngawt mai, ka tawng lo ang che tih hi ka hlau ṭhin," a ti ri chuan lung a ti awi ve takzet.

A tukah chuan chawhnu dar 2 bawrah min lo hruai a, kal pahin silver dawrah ka kawi pui a, Sangsangi te unau ta turin silver ṭhi leh locket butterfly lem hi ka leisak a, 'Zungbun en nghal teh ang' a tih vangin kan han en leh rih a, an in kan thlen chuan dar 3 a ri hnai thuak tawh. 

A nuin min lo chhawn a, a tute chu an ṭhenawm nulain thingpui in turin a sawm a, an kal thu a lo sawi zung zung a, thingpui ka duh em tih min lo zawt thuai bawk. Kan inchibai miah lo a, min hmu chu a lawm nge lawm lo hriat tumin ka enchik khawp mai. A nui lo nain a ṭawng mawlh mawlh reng a, a ṭawngkam a nem hran lo a, mi erawh a lawm lo hran pawhin ka hre lo. Ka hna chungchangte min zawt a, ṭha takin ka chhang ve mai a, ka hlawh zat min zawt erawh chuan minti hamhaih deuh.

"Ka la hlawh tam vak lo, ka thawhna a la rei lo bawk a," ka tih chuan, "Pension i nei ve em?" a ti leh khauh a, ka neih loh thu ka sawi hnu chuan a ngawi deuh vang vang a. Mahse, thil dang sawipui ka tum laitak chuan, "I bansan hreh em?" a lo ti zauh a, ka bangbo khawp mai.

"Ti nge, bansan a ngai dawn em ni?" ka ti let vat a, "Aaa..eng lo a nia" a ti niah niah a, chutah ka lam lo hawiin, "Alana hi a hah si a, zingah te hian a lo haw ve chauh a, hna i thawh ve chuan a lo haw rualin in inkalsan emaw ania nga, a ṭha dawn lo riauin ka hria, inchhungkhur luah lum thei la ka duh deuh a," a ti ta a, ka ngaihtuahna a buai nak a, chhan mai dan ka hre lo, ka hna ban san chu ngaihtuah pawh ka lo la ngaihtuah ngai loh thil a ni a, kawng leh lamah chuan a sawi chu dik ka ti ve riau bawk a, thutlukna siam awlsam tak erawh a ni lo ang.

"Alana hlawh hi kan kham tawk viau tho a, keiin pension ka nei bawk a, pawisa mamawh ngawih ngawihte kan ni lo bawk nen..." a tih leh laimekin Alana inthlak zo a lo chhuak a, nu Ngengpuii chu a ngawi zui daih a, a hnua a ṭawng leh pawh chuan thildang daih a sawi tawh. Alana chuan thingpui min siamsak a, "Bawihtei te chu va ko la," tiin a nu chu a hrilh bawk.

A nu chhuah veleh ka lam lo panin min rawn fawp vawng vawng a, ka hamhaih lutuk chuan chhan ve nachang pawh ka hre lo. Ka hmui chu a rawn tuai zauh a, "Hahdam deuhin awm rawh," tih pahin a thingpui ken laichu min pe a, a hmel chu a nung sar maiin ka hria, a mitmengah pawh a phurzia a lang a, hmuh a nuam viau a ni.

Thingpui kan lo inlai mek chuan ṭawng nak nak thawm a lo awm a, kawngka lam chu ka lo thlir reng tawh. Rei vak loah hmeichhe naupang ria chum bat kan tih ang chi kha a lo lut a, min hmuh vang chuan a lai leh deuh aniang a tawi hrat a, a hnunga lo kal te chu a han nghak leh rih a, a pa'n "Lo lut ta che Naom," ti a a koh pawh chuan hreh deuh hmel a pu a, ka lo nuih rual chuan a inher a, a let leh ringawt mai.

"A zak deuh anih kha," Alana'n a tih chuan, "Va ko rawh, a khawngaihthlak," tih leh thawh ka rual a, Alana pawh chu a lo tho ve nghal a, kawngkhar lam a pan laichuan a nu te lo lut tur nen an intawk a, "Eng nge in va ei a?" tiin Alana chuan a lo zawt a, lo chhangtu chu Sangsangi a ni, "Thil tui deuh deuh," tih leh ka lam lo hawi a rual a, kum 15 mi ah chuan a pumrua a lianin a nula tituai tawh a, a pa dar a chen zan tawh.

"Ruatbawih.." Alana'n a rawn tih rual chuan ka pan phei ve vat a. 

"Sangsang, Noam... chibai ru le," Alana'n a tih leh rualin kut ka phar nghal a, Sangsangi chuan min lo chibai a, min enchik khawp mai. Naomi nen kan inchibai laichuan, "In van nula tawh em em, in hmelṭha dun bawk si," tiin ka nuih var var a, min chhang zui lem lo chuan a pa chu phone hman a dil a, Alana'n a pek hnuah a u chu a hui zauh a, pindan lamah an kal tain ka hria.

"I pi lo pui ta che u," ti a an pa'n a koh zui pawh chuan an chhang lo, "Tu nge biak an tum a?" tiin Alana chuan a nu lam a melh a, "A nu an be dawn aniang chu ka ti mai, ka bazar pui an duh lo va," tiin nu Ngengpuii chuan a lo chhang a, Alana lo hawi chuan tawi tein min nuih a,  inthlahrung hmel a pu bawk.

"Ka lo pui ang che," ti a va puih ka tum chu, "Lo awm mai mai rawh," a lo ti deuh hmuk a, engmah chu ka khawih pui ngam lo. "Ti ve duh suh, Sangsangi te unau khan sa an ei duh lo a, alu kan an duh ka ring, duh dan tê an nei a, ka nu khan a ti mai dawn nia," tiin Alana chuan sitting room lamah min ko phei a, ka awm a nuam zan lo, ka khawr ru deuh ṭut mai a ni.

"William-a chu ka hmu chak reuh hle mai a," a bula ṭhut paha ka tih chuan, "Remchangah kan ko haw dawn nia, an bazar zawh lamah," a ti sam mai a, a nupui hlui nen chuan an la inpawh hmel riauin ka hria a, naupang vang a ni tih ka hriat vangin ka ngai haw lem lo thung.

Khum an siam zo tawh em ka zawt a, a lak theih mai tawh thuin min chhang a, ṭhianah tu nge a hman dawn ka zawh chuan, "Lalpuia, ka naupan lai ṭhian a nia, phai lamah a awm rih a, kar tharah a lo haw ang," tiin min chhang a, man hlan dawn niah a lo haw dawn niawm tak a ni.

Rei vak loah Sangsangi kha a lo chhuak a, a phone ken lai chu a pa lo pek pahin, "Anuin lo riak phei ve rawh u a tia, apu ten kawr min lei ve an duh a, i pa dil rawh an ti," a lo ti reuh a. "I pi hoin bazar ula, in duh duh in lei dawn alawm," a pa'n a tih chuan, "Api aiin anuin thil nalh a hre zawk, api chuan kan duhzawng pawh ṭhing a ti zel alawm," a ti leh zat a, "Kan ngaihtuah dawn nia," ti a a pa'n a chhang chu a lungawi pui vak lo aniang a ner nung a, ka lam a lo hawi pawh chuan min melh rum deuhin ka hria.

Pindan lama a let leh hnu chuan Alana lamah ka inher vat a, "Kan inneih tur thu i hrilh laiin engtin nge an lo chhan che?" ka ti tawl a, ka zawhna chhan chu a hrethiam khawp aniang, "I awm a nuam mang nange?" nui chung hian a rawn ti a, ka lo bu nghat nghat.

"Naupang â mai an la nia; mahse, an rilru te hi a lian ve tawh khawp a, hriatthiam an ngai rih khawp mai," a ti a, thu khuh deuh takin a sawi naa ka duh ang chhanna erawh ka hmu thung. "An lungawi vak lo ang tih chu ka rindan sa ania, mi an ngaina thei lo ang tih ka hlau riau mai," ka ti zawi sep a, chutah ka darah min lo kuahin a lamah min pawt hnai salh a, "Tuin nge nang hi haw rei thei ang che, ka hmeichhe hriat tawh ah chuan i zaidamin i nun a nem ber ang, an hrechiang che ang a, an la ngaina em em ang che; mahse, i dawh hram hram rih chu an ngai dawn, tleirawl luhlul rual an ni chho a, thunun pawh an har ṭan, hei vang tak hian nu an mamawh zual a, nang i awm dawn vang hian ka lawm teh ania," a ti sap sap a, a hmelah chuan lawm hmel ka hmu a, a mitah min rintawkzia a lang bawk.

A phone-ah an suit hak tur an thlan te min hmuh tir a, keipawn kan mo kawr ṭhui te ka hmuh ve bawk a, kan hlimin kan phur dun khawp mai. Chutih laichuan a nuin tui a so tawh thu a lo hrilh a, inbual turin min thawhsan ta nghal a. 

Tih tur a awm bawk si lo a, ṭhut ngawt ngawt chu nuam ka tih loh vangin an bathlar thlanglamah ka zuk hawi kual a, pangpar pot te a lo inhung ve dal a, ka nu Ngengpuii chuan pangpar a ngaina ve hle ni tur a ni. Ka nu hian pangpar a tuipui khawp a, kan inchung zawlah green house te a siam a, a hralh chhuak nasa ve hle ṭhin. Nu Ngengpuii chu hrilh ka chak riau a, ka nu nen pawh an inngaina dawnin ka hria, an tuizawng a in ang anih hmel tlat.

Choka lama va kal nghal mai ka tum chu Sangsangi lo chhuak tur nen kan intawk a, "Sangsang, exam-te chu i chhang ṭha em, i pass hmel dawn em?" ka lo ti zung zung a, nuisanga ka zawh laiin rum theih tawp hian min lo melh a, ka inchhir ru angreng.

"Zirtirtu ka nia, i zirlaiah pawh ka pui thei maithei che a ni," awki pangngai deuh chuan ka ti leh a, chuta min lo chhang chu a awki a chang fal mai. "Govt school nen kan zir dan a in ang lo hrim hrim, middle school-ah i thawh kha, min zirtir thei lo sa," a ti reuh a, min ti hrilhhai zawk khawp.

"Khawnge apa kha?" a tih chuan a inbual thu ka lo hrilh vat a, chuveleh inchung lam chu a va bih thuak a, a lo inher leh chuan ka mitah min en kal a, "Anu a lo haw leh dawn, apa nena in inneih hi kan duh lo vek, William-a pawn i bula awm a duh lo, i lo awm chuan anu bula awm hlen a tum a, nangmah vang vek," a ti hmarh hmarh mai a, chhan dan pawh ka thiam lo, ka rilru chu a na ve hman ṭep a; mahse, naupang mai an la ni a, ka hriatthiam rih an ngai tiin ka inhrilhru a, ka dawh theih erawh a ngai dawn khawp mai.

"I nu chuan lo haw leh a tum thu a sawi em ni?" ka ti tawl a, a fate bulah sawi a nei em mawni ka ti rilru a, naupang hian eng chin nge an hriat ang ni.

"Aw, a lo haw dawn, i lo ngaihtuah ve pawh a ngai lo, nuhrawn kan hrawn dawn aichuan anu bulah kan phei vek dawn, i sual chuan api pawn in hi chhuahsan a tum," a ti leh ta mai a, rilru a buai nak mai, a thinrim a inhritla ve tih chu ka hrethiam a; mahse, ngaihtuah a ti thui viau si a ni.

"Enteh Sangsang, in unau chungah hian sual ka tum hleinem, ngainat che u ka duh zawk a, nu sual ka ni dawn miah lo ania," a rilru hneh tum tak chuan ka han ti leh a, chhungril lamah erawh ka tawt ru ṭun a, a pi chungchang a sawi dan mawlh kha a ni.

"I van zak lo," tih chiahin min chhang a, ka nuih ringawt, tih vak dan ka hre lo.

"I lo awm lui dawn a ni maw..?" tiin min melh haw a, buaithlak ka ti riau mai.

"I pa'n a la hrilh chiang ang che u, thil awmzia in la hre thuai mai ang, i nu leh pa te hi innei leh thei an ni tawh lo va, chuvang alawm i pa hi ka neih dawn chauh ni, tunah chuan in la naupang em a, hriatthiam a har rih ang, nakinah chuan in pawm thiam lutukin ka ring," ka ti sap sap a, awki vin emaw nelawm loh takin ka be lo a, ka theitawpa zaidamin a ni ka sawi ni.

"Ka nu awm lo che em mai, i zak thei lo," a ti deuh hlak a, chhan pawh ka chhan leh hmain a let nal nal a, pindan kawngkhar a khar ri bur thawm chu ka hre pha. Thawk ka la deuh vang vang a, tun aṭanga hetiang han nih chu hmabak a ko dawn mange ka ti rilru a. Mahse, Alana sawi ang khan an heti reng lo turah ngai i la, kan inchenchilh hunah chuan an rilrute pawh a dang ve maiin ka ring.

Alana inbual zawh hma chu bathlarah ka lo ding a, ka lut hreh ta tlat pek alawm maw le. Rei a inbual lo a, Towel nena a lo phei ka hmuh rual chuan ka lut ve vat a, "I ning tawh em, chaw kan ei hma dawn nia, zanin chu ka lo len hman zan alawm," a lo ti var a. A chapal bun ka en chuan, "Bathroom chapal i neih a ngai anih kha, khatiang kha chu tih huh a chi vak loh, a chhe awlsam ania," ka ti a, a lo nui deuh suk suk.

"A nuam dawn e, nupui fel leh khirh deuh, a bu ang thlap thlap i ang dawn riau," uang deuh hian a ti a, "Ka enkawl uluk viau ang che, chet fel thlap thlap a ngai ang," nui chunga ka tih chuan ka biangah a rawn fawp zauh a, lungawi hliah hliah hmel a pu a, keipawh chu ka awm a nuam leh viau tawh, ka pasal tur berin min hmangaih a, min mamawh ngawih ngawih bawk a, a bak a awm chuang lo, beisei hi nei sang lutuk lo i la, kan hun tawn zelah hian hlimna tur lam thlir thiam i la a ṭha ber a ni.

Chawei hma chuan an pafa hoin Potato smiley an kang a, keiin nu Ngengpuii hmarcha rawt chu ka lo ṭhutchilh ve bawk a, Naomi ṭawng barh barh ri chu ka ngaithla ve reng bawk. A pa bulah chuan Hostel-ah an awm leh dawn em tih a zawt a, a pa chuan, "I duh leh duh loh a ni mai, i u chu awm tawh lo mah se a pawi lo a, nang chu awm leh la a ṭha zawk maithei," a ti charh charh a.

"Duh duh eitur awm se chu ka awm chak reng," Naomi'n a tih laiin, "Kei chu ka awm tawh dawn lo," Sangsangi'n a lo ti hmak a. "Nang chu kan bulah i awm dawn alawm, tuition kalna tur ṭha deuh kan zawng dawn nia," a pa'n a tih chuan, "Anuin driver ka rawn hruai tir ṭhin ang che a ti," a ti leh zat a, an pafa chuan an inmelh ran a, "I nu hnenah eng mah va dil tawh suh, i ṭhiante pawh thlah ngai loin an kal mai," a pa'n a tih chuan a fian ken lai a dah tau hmak a, bathroom lam a pan daih bawk.

"Chhang zel duh mah ta che, a lungawi lo laklawh anih kha, enliam mai mai rih rawh," Nu Ngengpuii'n a tih chuan, "He nu hi a luhlul lutuk, thunun zawh loh rual a la ni lo, strict deuh hlek chu a ngai a ni," a lo ti bul bul a. "Ani ang rual kha chu an ni ṭhin alawm, en dan thiam an ngai ania," ka ti chu min pawmpui leh viau thung. "Hostel-a awm chi a ni lo, nu leh pa bulah awm se la a ṭha, hetiang rual hi chu chhungte kianga awm an ngai, an nungchang siam hun lai ania," a lo ti ve luam a, nu Ngengpuii erawh a ngawi reng.

Chawei kan peih hnuah Sangsangi chu a lo chhuak chauh a, chaw kan han kil te chu kan inmelh hrek hrek hlawm a, hmeichhe naupang pahnih te chu an chawei a tui lo dun hle anih ka ring, an sik neuh neuh mai. "Pa, engtikah nge William-a kan hruai dawn?" Naomi'n a tih chuan, "A hruai theih veleh," tih zawngin a pa chuan a chhang a, "Christmas hmang law law rawh se, hetah chuan buai a ti tam mai mai alawm," an piin a lo ti chu an duh vak lo aniang, "Christmas chu chungkuaa hman ho tur i ti ṭhin sia," Sangsangi'n a lo ti a, tuman an chhang zui lo. 

Zanriah eikham chuan an che ve rak rak a, Alana nuin engmah ka tih ve a phal si lo a, an pitua chaw eina an tifel lai chu sitting room aṭangin ka va thlek leh ṭhin. An inbe tam lo lutuk leh an inbiak dan ṭhin chu ka ngaimawh ru hle a, ka awm hunah chuan boruak dang thei se la ka duh ru hle bawk. 

"Phei hma i la, naupang ho an awm si a keipawh ka leng rei hman kher lo ang," Alana'n a tih chuan ka hnial lem lo. A insiam zui a, rei lo teah rawn inpeihin kan kal tur thu chu a nu bulah a hrilh a, keipawh chuan ka mangṭha ve luam a, nu Ngengpuii chu,  "Ka nuin pangpar a ngah a, remchangah ka lo la ken dawn che nia," ka ti a, "Ka buaipui peih leh tawh vak lo, phur a zo tawh," ti maiin min lo chhang a, kan chhuak tur pawh chu min lo thlah tawh lem lo.

Kan haw kawngah chuan a nu mizia te min hrilh luam a, "A ṭawngkam hi a bung ve a, a nelawm loh mah mah ṭhin a, i lo hrethiam lo palh ang e, keipawh hian ka hau zing, a sim thei lo, a ṭawngkam thiam loh vang hi a ni pakhat a, huata lak chi loh aw, a han vin deuh hlak hlak ṭhin nain a rilru a chhe hran lo ania, a thinrim rei ngai lo bawk a," tih angreng a sawi chuan ka hriatthiam thu leh inthlahrung duh lo turin ka lo hrilh ve a, ka nu pawh hian ze mak deuh a nei ve a, mi hi a hau bawrh bawrh a, a thinrim rei tak tak ngai lo thung a, ka nu ang tho a ni ve anih ka ring, hetiang mize nei ho hi an rilru a tluang phian zel a, thil zep ṭit ṭet reng ho aichuan an bulah awm a nuam zawkin ka hre ṭhin.

In kan thlen chuan u Sena leh ka pa'n TV an lo endun a, EPL khelh zan a ni a, an khelh hma deuh hi chuan ka pa hi a inkhawm lo leh ringawt zel. "Lo en ve rawh u, Sena nen  motor silah kan inchawi ania, naktuk zing chu a sil ngei a ngaih hmel," ka pa'n a lo ti zung zung a, Alana chu ṭhutna a lo kian sawk sawk bawk a, "A va hmuhnawm awm ve," ti a Alana ṭhu chu a lo hrilhfiah zung zung bawk.

Ka nu awmna ka zawt a, a inkhawm thuin u Sena'n min lo chhang a, "I va eipuar maw?" a tih chuan, "Puar lutuk, nu Ngengpuii chu bai siam a thiam tak tak a ni," ka ti ve hlut a, Alana nui suk chu ka va hmu zui a, ka pa bulah ṭhu chungin inkhel a thlir ve dauh dauh a, a ngainat zawng anih erawh ka ring lo khawp.

Ka nu inkhawm bang a lo haw hnuah thingpuite kan in ho a, Alana chu rei a ṭhu tawh lo, "Naupang mut hmain ka phei ang e..." a tih vang chuan chelh khawtlai loin ka va thlah a, a tuk lamah a duty dawn avangin a mut hma tur thu a sawi a, "Kan inbe dawn nia, keipawh ka mu har lo ang," ka ti ve vat a, a kal liam thlengin ka thlir zui bawk.

Inchhunga ka lut leh chu ka nuin chanchin min lo zawt zung zung a, "An fel hmel em, a nuin a lo be ṭha che em, a mizia te a ṭhat hmel em?" a ti duah a, ka pa'n a lo melh no lo khawp mai.

"A nu kha chu a ṭawng bung ve a; mahse, in zia a in ang riauin ka hria, ṭawngkam nelawm vak loh chi, rilru ṭha ang kha," ka tih chuan ka nu chu a ner nung a, "Ka ṭawng bung pawh ka hre lo, ka ṭawngkam te chu a nelawm reng alawm le," a ti nang nang a, hetia tih hi chu duh lo ve thei tak a ni.

"A fate chuan an lo 'Nu' nghal lo che maw?" ti a u Sena lo nui kur kur chu ka melh vat a, "Min nu mai pawh ka ring lo," tih zawngin ka chhang a.

"Inneih hmaa in 'Nu' tir chu a ṭhing em mai," a tih leh chuan, "Min duh vak lo, min ngaina har ang, a upa ber phei kha chuan min ngei deuh tlat," ka ti ve ngawt a, ka nuin a lo la fuh mai mai khawp a, ka sawi sual chiang teh e. "Kha kha alawm ka hlauh ruk ni, naupang â enkawl nuam rual kan tih ang kha an ni tawh lo va, sawtiang rual chu an harsa dawn, ngawiteh...hrehawm i ti dawnin ka hria, i thlir thiam lo mai mai a ni, i hmakhua hi ka ngaihtuah thui si, eng mah hi i hrethiam si lo," a ti bawrh bawrh a, a rilru a hah hmel leh viau tawh.

"Kan inchenchilh anga a zia ve mai dawn alawm," ka tih pawh chuan, "A teuh lo, an hel sa anih chuan neuh neuh a tam viau ang, i la ṭahpui mai maiin ania ka rin ni, nei leh lo daih mai la ka ti," a sawi laimek chuan ka pa'n a lo khak a, "Ṭhulh leh se ka duh, a hunlai alawm, inneih hnua buai te a hlauhawm zawk," a ti leh zel a, u Sena erawh a nui mai mai.

Keichuan heti hian ka chhang a, "Nuhrawn an hrawn dawn tih an inhre ve a, an hlauthawng ve alawm, puitling zawkin kan dawm thiam a, kan hriatthiam viau an ngai, an rilrute pawh a chiai ve ang, nu leh pa karah an awm si lo a, an nu an ngai bawk a, kawng leh lamah chuan an khawngaihthlak khawp asin. Ka awmpui hunah pawh tih an har deuh maithei a; mahse, inngainat tir ngei ngei ka tum, nuhrawn sual an nei lo tih an hriat hun a awm dawn alawm," ka ti nghat nghat a. Ka nu chuan luhlul min ti nge mawl minti zawk ni min melh tlawk tlawk a, a lawm thei mawlh lo. Ka hrethiam tho mai, nu leh fa inkar a ni miau a, ka nu min hmangaihna leh min ngaihtuahzia te, kei pawhin ka mamawhna a sanzia te ka hriat hian Alana fate kha ka hrethiam zual tlat a, an nu ai chu awh zo lo mahila theihtawp chhuah a, nuhrawn ṭha tak nih ka duh a ni.

(End of chapter - 1)