I NGHILH ZAWK ANG (CH - 2) by Ahmangaihi violette khiangte

I NGHILH ZAWK ANG

by Ahmangaihi violette khiangte

Chapter - 2

Thawhlehniah man an rawn hlan a, chhungte ho nen chaw te kan eikhawm ve laih laih a. Alana ṭhianpa pawh a hmel ka hmu ve ta a, ral aṭang chauha inhria kha kan ni a, ka lo beisei ang aiin a fel a, biak a nuamin rei tak inhre tawh ang mai kan ni. Rampuii phei chuan nui mawi a ti khawp mai a, a be seuh seuh reng. Alana lah chu a ṭhianpa chuan fiamthu thawh nan tak a hmang a, "Pathlawiah pawh thlawi chawhnu tawh te han neih duh," ka bulah tiin a nui kur kur a; mahse, Alana'n, "Nuthlawi ngaizawng lo kan va ang ve," a lo ti zauh a, a nui ṭha duh tawh hauh lo.

Alana min hrilh dan chuan nuthlawi fa pakhat pawm nen an inzui mek a, an ṭhianpa tho man hlanna a lo kal ve chu Puia bialnu u a ni awm e. "Kan mizia a in ang lo hlawm a nia aw, kei hi ka fel ber a, Lalpuia hi chu thawk palai a ni ṭhin, sual kawngah mi a zui thei mai a, fel lamah pawh chuti tho, Marcos-a nena kan inkarah a awm ṭhin," tih angreng chu min hrilh ve luam a, chutih laichuan Marcosa a tih chu Puia nen kawngka bulah an ṭhu a, pakhat a nuih vur vur reng laiin pakhat zawk erawh a mûk deuh run a, kan lam an lo hawi leh zauh ṭhin.

An haw tur chu kawngpui thlengin kan thlah a, "Hawn nghal mai ila, a man kan pe tawh tho a," tiin Puia'n min chhaih zurh zurh a, Motor-a Alana lut tur pawh a lo khi ve suk suk. Zan lamah Bachelor night an hmang ho dawn a, tlangval hawklak rual an ni tawh lo bawk a an ngaihtuahawm lo turah ka ngai.

An kal hnu chuan Rampuii nen kan kawr tur te kan va lam a, zanriah a rawn ei nghal a, zan lamah pawh inbuatsaihnan hun kan hmang a ni ber, kan hmaite kan facial tir a, ka cousin te nen eng eng emaw kan eikhawm laih laih a, kan hlim tlang khawp mai. Chutia, ka mimal thil vela ka buai laichuan hriatchhuah zawk ka nei a, vawiin chu Damien-a a rawn lang hauh lo. Kan hrilh ve thlap a, u Sena pawn a sawm ṭhat leh ngei chu ka ring, ani hi a lo kal duh lo nge, a lo theihnghilh zawk ni?

Ka nu thingpui lum lai chu u Sena awmna ka va zawt a, "A awm reng kha, a chhuak em ni?" a lo ti let hlauh a, u Muanpuia te nen khan an awm ho reng a, an bo rual diak a, a va thlah hlawm em mawni.

U Hruaia leh a ṭhianpa Kimtea an lo lut a, an kut a berh khawp a, ka pa'n ar a puah tir a nih hmel. "Kan zo diam tawh e, kan nula senior kan hralh dawn ta bawk a, a lakluh lam ngaihtuah a ngai," Kimtea'n a rawn ti bawrh bawrh. "Nakumah chuan ka ti ve rup tawh ang," Hruaia'n a lo ti bawk a, kan nui dar dar. 

"Nei rawh u ka ti ka tia, neih an tum hleinem, mi an nghak aniang chu ka ti mai a," uang angreng zeta ka tih chuan, "Nghak e, i kingdom te a ni ve sia, i pasal neih hma chu thu ber ber la kan duh alawm," kut sil pahin Hruaia'n a ti bul bul a, "I lo insum a ni maw chu, i nau a kal liam ang a, i ru thawt thawt mai ang a," Rampuii'n a lo ti ve hlut a, chutih laia inchung lama u Sena chho tur ka hmuh chuan ka au zui a, a lo phei ve mai bawk.

"Khawnge Damien-a, ka hmu miah lo a, a lo bia che em?" ka ti a.

"Bia e, lo phei chu a tum," a ti a, sana ka en chuan zan dar 9 a ri tawh a, a tlai angreng viau tawh.

"Man hlannaah a lo kal ve dawn emaw ka tia," ka tih leh chuan, "A peih i ring em mawni, a rilru te pawh a na ve ang chu," Hruaia'n a lo ti pek a, Kimtea'n a lo zawt fiah zat a, eng mah phei chu a sawi zui duh lem lo.

U Sena chu, "Phone rawh, naktuk te kha lo kal loh a tum ange," ka ti leh a, hmaichhana sawm nawn leh a ngai dawn a ang. "Nuṭa man a ei dawn emaw ka tia, eng mah insawi leh si lo a," u Sena'n a tih chuan ka nu lam kan hawi ṭhap a, "Man ei an tam em alawm, a pawimawh zual pawh za chuang an nia, ka lo hmaih palh reng reng anih kha," a lo ti sam et a, a zia lo ka ti ru khawp mai, ka lo hrilh ve ting tang lehnghal a.

"A lo kal chuang hleinem, a pawi lo," u Sena'n a ti ngawt a, Damien-a chu a lawm lo ru maithei a ni.

Kan inleng te an haw rem ṭan a; mahse, cousin-ho riah khawm kan tum avangin kan la ri laih laih a, a ṭhenin tv an en a, a ṭhenin an thawmhnaw hak tur an lo buaipui a, kan kawr lo ha chhin pawl an awm bawk a, mut tum hmel pawh an pu hlawm lo. Alana'n message min lo thawn a, anni pawh Puia te inah an la awm a, a haw ṭep tawh thu te a lo sawi a, zu in lo turin ka chah ve thlap.

"Ka in lo ang, ka in ngai lohna a rei tawh alawm," a tih vang chuan ngaihṭha deuhin ka awm a, in a thlen huna lo sawi leh turin ka chah bawk.

U Muansangi'n inchung zawlah Barbecue a rawt a, sa kan keng chho ṭeuh a, mipa ho chuan beer te an in a, unau inkawmngeih tak kan ni hlawm bawk a, hunpuia inhmuh khawm te, eng eng emaw tih khawm hi kan nei zing a, a hranga christmas hman te hi ka hreh ṭhin. Chutia Christmas dawn taka pasal ka han nei tur pawh chu an hrethiam vak lo a, "In pa nen in la rawn tel ve zel ang chu, dam chuan tel loh awih loh," u Chhanmawia'n a ti bul bul a, "Kan inah kan ti ho dawn nia," ka ti ve mai bawk a, mi an ui der ve hlawm khawp a, awm an ti nuam zawk mah.

An sa hem a ei theih meuh chuan dar 10 a pel tawh a, kan ei chu kan puar tlang bawk aniang ṭhenkhat chuan mut an duh mai a, u Hruaia hoin an chhukthla sap sap a, kei leh u Sena bakah Rampuii leh u Muansangi te nen kan la awm thung. Ka nu green house bulah ṭhuin kan titi a, thla a eng nuam bawk a, boruak chu a thiang vawt var a, a hahdamthlak hliah hliah bawk.

"Damien-a a lo kal mek," u Sena'n a tih chuan, "Lo zuk hmuak rawh, i lo chhoh pui mai dawn nia, sitting room-ah an mu duh hlawm ang," ka lo ti var a. A kal hnu lawkah ka ṭhutpuite chuan Damiena chungchang chu min zawt a, vawikhat tal kan inngaizawng tawh em tih angreng a ni. Kan la inngaihzawn loh thu leh chuti lam hawia ka en ngai loh thuin ka chhang a.

"Hei ai hian a duh che tih hi lo hre hma ta la i duh ve thei mai angem?" Rampuii'n a tih chuan lu ka thing mai a, chutiang zawng takngial pawh chuan ngaihtuahna ka lo la nei ngai lo, ka u ṭhianpa chhe lo ve tak leh a farnu ang taka min duat ve tu angin ka hre mai a, ngaizawng rilru put nachang pawh ka hre lo a ni ber.

U Sena chhuk chu minute tam pawh a liam hmain a lo chho leh a, a guitar a rawn keng a, a hnungah Damiena'n a lo zui bawk. Ka bula chair chu u Sena'n a lo pe vat a; mahse, Damien-a chu hla deuh hleka green house sirah chuan a va ṭhu a, cigarette a phawrh a, bawp khawkher ata ṭhuin van lam a melh vang vang a, in tur a duh em tih u Sena'n a zawh chuan a chak loh thuin a chhang bawk. A mize danglam ta lutuk mawlh chuan awm a ti nuam lo va, biak dan thiam pawh a har a ni.

U Sena guitar perh chu a lai angreng khawp mai a, ka ning deuh chuan, "Damien-a perh tir zawk teh, lunglen i hnawt ṭiau zo dawn," ka lo tih sak a, Damien-a lam ka va hawi chuan muangchang hian a rawn insawn hnai a, ka hma zawnah chuan lo ṭhuin guitar chu a bana, "I zai dawn em ni?" tih pahin min melh ralh a, ka chhan dan tur a hre sa aniang chu a nui suk mai.

"I zaithiam ber alawm" ka lo ti vat a, "I zai ka la hre ngai lo, han zai teh," Rampuii'n a lo ti ve thuai bawk. Eng emaw chen chu guitar a perh a, a hrui chu a herh ṭha leh ṭhin bawk a, "I perh lai vek alawm" a ti nuah nuah a, u Sena rui lah chuan, "Ka aw milin ka dah a nih kha," a lo ti sam et a, kan han nui ho leh rih.

A duh angin a herh dik ta aniang thawk a han la deuh vang vang a, chumi hnuah sap hla mawi ka tih ve em em ṭhin, 'Hopelessly devoted to you' tih hla ngei mai kha hniam reih rawih leh muang fan raih hian a sa ta a, a aw thum leh hritlang aw chhang lek lek inpawlh vang chu a niang a mawi zual a, midang pawn sa nalh an ti ngang mai, eng mah sawi nachang pawh hre loin kan ngaithla ṭhap hlawm.

A thunawn a sa dawn chiah tihah chuan ka phone a lo ri a, Alana a nih vangin ka tho thuai a, a bengchheng deuh bawk nen step lam ka pan a, thim chinah chuan va ṭhuin phone chu ka chhang a, "I mu dawn tawh em? In ka thleng fel tawh e," a rawn ti zawi ruih a, a haw hma lutuk chu mak ka ti angreng.

"Bachelor night in hmang dawn emaw ka tia, i va haw leh hma si ve, eng emaw inti ho lo em ni?" 

"Tih ho chu kan tum a, Marcosa fapa a chesual palh a, a ban ruh a tliak niin ka hria, min haw san leh ta daih si a, Puia nen chauh chuan kan peih ta lo anih hi, zu han inho tih angreng kha kan kalsan ve hlawm tawh a, han tih vak dan pawh a awm chuang lo, thil tih a in ang tawh lo a sawi tur te hi a vang riau tawh mai," a ti chuar chuar a.

"Mu hma daih mai rawh, naktuk atan hahchawlh a ṭha alawm, inneihni chu chauh a na thei ania," ka tih chuan, "Nia, a pawi lo zawk ang, inneih zan atan thahrui khek te pawh a ngai alawm," a ti ve ngei a, ka lo nui hak hak.

"Thahrui i ngah vak hmel nange chu?" ka ti fiamthu a, "I hre mai dawn alawm," a ti veleh zat a, ka nui ka nui mai.

Engtin nge zan lam kan hman dawn ka zawt a, thildang kan buaipui kim tehlul nen kan lawiṭhat zan lam chu kan lo mangnghilh daih mai a, ani pawn sawi nachang a hre bik lo. "Riah chhuah i duh em? Hotel-ah kan kal dawn em niang, nge hmun hla deuh hleka kal i duh?" a tih chuan ngaihdan ka nei thiam lo khawp mai.

"Ina riah pawh ka hreh hran lo, chhungte an ngaihtuah awm angem?" ka ti let vat a, a chhungte kalsan a hreh ka ring deuh a ni.

"Ka nu a awm a, ngaihtuahawm an awm lo ang, mikhual te pawh kan nei a, duh leh zan hnih khat riah chhuah chu a pawi lo, hna hi ka chawl thei rih si lo a, nakinah kum thar lamah honeymoon hmang turin kan la zin chhuak dawn nia," a ti ve luam a, eng mah chu han sawisel tur ka hre lo, ka pawm em em vek mai a ni.

Ka nuin min lo koh avangin phone chu kan dah ta rih a, inhnuaia ka zuk chhuk chuan Blanket ka pindana ka kawl leh kawl loh min lo zawt a, an lo inchan lo a ni awm e. Hmanhmawh deuhin Blanket chu ka han laksak a, ka cousin-te mu tur lah chuan min lo chhaih leh ṭhin a, "Zaninah inziat fai vek rawh, zingah i hman loh thut chuan i chhe duai a ni mai," te an tia, ṭhenkhatin "A ho lutuk, i peih rei tak tak teuh lo," an lo ti bawk a, ṭawngkam zahmawh deuh deuh sawiin an nui hawr hawr hlawm a, ka chhang zui peih hlawm lo.

Inchunga ka han chhoh leh chuan lo chhuk an tum mek hlawm a, u Sena rui kal ṭha thei lo chu Damiena'n a kuah tho a, ka u hi chu a heti leh ṭhin, a limit hi a hre thei lo, buaipui a ngai ziah. A zak lehlamah chuan ka va kuah a, rem lo leh chep zetin Damiena nen kan kuah thla a, Rampuii leh u Muansangi erawh chuan ka pindan lamah min luhsan a, ka u chu a khumah kan va theh thal a ni deuh ber e. A let hual a, a riat nawi niah niah a, biak pawh a hre lo ang tih tur a ni. 

"I riak dawn em?" ti a Damiena ka zawh chuan a ngawi ngul a, "Riak la, naktukah i thawmhnaw i va la zuai ang a, hetah chaw einghal tur anih kha..." min lo melh dan vang chuan a ip deuh zawk mai.

"Ka lo kal dawn tih ka sawi em ni?" a ti hul hak a, min ti dang dawn dawn.

"Eh..lo kal i tum nange a?"

"I hrethiam lo der mai mai ti raw, i u pawn a hrilh tawh che kha," min en run a, chhan dan a vang nek.

"I ti ho em mai, naktuk te chu Big day a nia, ka u ṭhian i nihna ang talin i lo kal ve ang chu,"

"I u ṭhian bak ka ni hleinem, chutiang loa lo kal chhan tur ka nei em ni?" a tih leh chuan ka ngei ta deuh hlek a, ka melh no bik vak lo.

"Awm lo e, i thu thu aw," ti a kal mai ka tum chu ka banah a rawn vuan chawt a, "Min ngei em ni?" a ti a, a inthiam lo leh deuh nge ni nui lui hmel a pu a, a awmdan chu ka mil lo laklawh ta tlat a, a kut chu ka thingthla rang hle bawk.

"Eng rilru pawh lo pu la awmzia a nei lo ang, tih lan hun pawh a nih tawh loh hi, ka u ṭhian angin ka en che a, chutiang chuan ka ngai reng bawk ang che, chhe deuha hriat zui che ka duh lo ania, chuvangin sawi belh nei lo la ka lawm ngawt ang," ka ti fak fak a, a rilru chu a na ve detin ka ring, a hmelah pawh a lang thei.

"I pawi ka sawi anih chuan min ngaidam dawn nia," a ti zawi ruih a, ka inthiam lo leh ram ram. "A... pawi lam pawh a ni lo, rilru i ti nuam lo ania, i lo kal lo anih phei chuan a nuam lo lehzual ang, farnu te angin ṭha deuhin min thlah thei la ka duh ngawt mai," insum leh ṭawngsual hlau zet chungin ka ti leh a, sawi mai tur a hre bik lo aniang min en ren rawn a, min chhang dawn lo emaw ka tih rum rum hnuah, "Ka lo kal dawn nia, thlah ve ngei che chu a ngai alawm, i liam lai tal ka thlir loh chuan i la awm emaw ka ti palh ang," awmze nei zet hian a ti a, chhan pawh ka chhan leh hma chuan, "Ka va haw phei ange, naktukah kan inhmu dawn nia," tih leh kal a rual a, ka zui ve tak nain pindan pawn ka thlen chuan a kal liam ka hmu hman thuak chauh a, ka nuin a lo be ri pawh chu ka hre pha.

A kal liam tawh ang tihah ka zuk chhuk chauh a, ka nu chuan, "Kan pindanah lo lut lawk la, i pa nen kan kawm lawk duh che," a lo ti teh tlat a, engthil tak chu sawi tum ang maw!?

Ka nu kal chu ka zui a, an pindana kan va luh chuan ka pa chuan a dawhkan kilin lehkhabu a lo bih a, ka thawm a hriat rualin a tarmit chu a la thla thuai a, min ti zam deuh reuh. "Eng nge a?" phawk angreng zeta ka tih chuan, "Ṭawngṭaina nen kan thlah ang che, naktukah hun kan neih tawh loh takin," ka nu chuan a ti mauh mai a, ka nghilh deuh dup maiin ka hria.

"Hetah hian lo ṭhu ve phawt la," ka pa'n a lo tih chuan a dawhkan lam chu ka pan vat a, ka nu erawh khumah a ṭhu thung a, kan lam a lo hawi ran bawk.

Ka pa chuan min han en vang vang a, a nui sang bawk a, kei pawh chu ka nui ve tho. "I pasal nei tur chu kan huphurh ṭhin bawk a, ui deuh chung chein kan hlim tho bawk a, rilru mumal kan va pu lo ve maw le," a han ti a, a nui hmelah erawh a lawmna a hmuh theih thung a, a awmdan chu ka hrethiam khawp mai.

"Min ngai nghal a ni maw, ram hla a kal tur pawh ka nih loh hi," nui chungin ka nu lam ka va melh a, a lo tum deuh bur, chutah..bang lam a hawi a, a mittui a hru zauh mai, ka ngei reuh zia chu aw, minti hlim em em lawi bawk a, ka hnuk te a ulh ve lek lekin ka hria.

"In va ti ho e aw, awm inti nuam lo ania..." 

Ka pa chuan ka nu lam hawiin, "Nizan aṭangin a insut fuih fuih tawh, i nu hian lengtar la a duh tak tak a niang," a ti fiamthu a, ka nu lah chuan, "Kan ngai duh che hi lawm viau zawk ta che, nawr luih ngawng ngawnga pasal nei an tam a sin," a lo ti hluk hluk a, kan lam pawh a lo hawi ṭha duh lo.

"Min nawr lui zawk u la," uang angreng zeta ka tih chuan, "I phur her hawr lutuk a, ka ngei tlat che," a lo ti leh hmak a, ka pa nen kan nui ruh ruh mai.

"Kan ṭawngṭai dawn chuan ti vat teh ang u, Rampuii te an mu duh tawh ang," ka ti a, chutah ka pa chuan a chair a siamrem a, a aw a han thian te te a. "I lo pianhlim khan kan chungkaw member-ah bik nihna i rawn nei nghal a, a chhan chu kan fa tlum ber, kan fanu neih chhun i ni a, kan hmangaih em em bawk che, i nu nen i luchungah kut nghatin Pathian hnenah kan kawltir che a, Pathian zarah kum 30 ral i kai thlengin kan duhthusam fanu i ni a, i awm loh chuan kan inchhung chu a nguai rawih maithei a ni, i u te pawn i awm lo tur hi an huphurh ve khawp ania, nei leh lo la ti rum rumte pawh an awm a," tih pahin ka nu lam a melh zawk a, kei ka lo nui thung.

"Mi chhungkuaah i han lawi dawn a ni a, helaia i awm anga awm theih a ni tawh dawn lo tih hria la, khawsak phung tam takah danglam a awm dawn a, inbengbel thei tura rilru siam a ngai ang, i pasal tur dinhmun kan hria a, kan han huphurh pui viau na chein hmeichhe fel tak i ni a, kan ringtawk tlat che a ni. Dinhmun pawimawh tak i va chelh dawn avangin Pathian bel tlat la, khawi hmunah pawh Pathian nen chuan ngaihtuahawm i ni ngai lo ang, chhungkaw dangah zung i kaih tawh dawn a, i nu leh pa te ta ni tawh loin i pasal ta i ni tawh dawn a, engkimah i pasal zai ngai la, nupui fel leh mo ṭha tak va ni ang che," a ti charh charh a, ka nu chu koin ka hmaah an lo ding dun a, "Ka ṭawngṭai ang a, i nu pawh a duh leh ṭawngṭai ve se la," tih pah chuan ka nu chu a melh a, ka nu thung chuan, "Nangmah ṭawngṭai mai rawh," a lo ti vat a, chutah ka lu chungah kut rawn nghat dunin ka pa zawk chuan min ṭawngṭai sak a, Pathian hnenah min kawltirin min enkawlna zawng zawngah lawmthu te a sawi a, ka nun min hruai sak a, an hmuh phak loha ka awm hunah pawh min veng turin a dil bawk. 

Ka insum ṭang ṭang a, ka hnuk a ulh ru ṭun thung. Ka pa ṭawngṭai zo lah chu a mit a sen ram a, ka nu lah chuti tho, ka pa chuan a han khak ve ngei a, "Pasal nei tur alawm maw a nih le, kan sun dawn a ni hleinem, hlim viau zawk rawh," a ti bul bul a, amah pawh chu a insum hleithei bik lo, a aw a tham ṭuak a, ka hlim vang nge ka rilru nat vang zawk ni, ka mitah chuan mittui a rawn hnam a, ka khap let sak sak tawh.

"Zing thawh i hai ang, han mu dawn rawh," ka pa'n a tih takah chuan ka tho vat a, "A lo ṭap ang e aw, a ṭah vaih chuan ka ṭhulh leh daih dawn ania," ka nu melh pah chuan ka ti zauh a, ka nu chuan, "Kal mai mai rawh, neih loh i hlauh em kha," tih pahin an khum a siam sawk sawk a. "Muttui u," ka tih leh zet hnuah ka chhuah san a, an pindan aṭanga ka chhuak chiah chu thawk ka la vang vang mai. 

Hetiang chungkuaa ka seilian hi vannei ka inti a, ka nu leh pa fa hi ka ni lo ang tih ka hlau ṭhin, ka u te farnu ni tura ka piang hi ka lawm a, ka mipa hmangaih em em Alana ka han nei leh zel dawn a ni a, kei ang a hmeichhe vannei hi an awm bikin ka ring lo, ka nunah hian lungawi lohna sawi tur ka nei lo a, ka nun hman leh tur pawh hetiang tho hi anih ka ring. Pathianin min awmpui anga, ka lungawina tur tawk chu min pek zel ka ring a ni.

Sitting room chu a lo reh ṭhiap a, u Hruaia pawh sofa-ah a lo mutui khawp mai. Kan choka lamah ka phei a, eng eng emaw ka va thlek kual a, chumi hnuah sitting room-ah bawk let lehin ka hawi kual ruai a, ka lung a leng nge mawni rilru a hnim ruih mai. Naktukah chuan ka chhuahsan tawh dawn a ni mai si a, ka tel loa an khawsak dan turte ka ngaihtuah a, min ngai dawn tih ka chiang a, kei tak pawh hian an tel loa khawsak chu harsa ka tih chang a awm ngei ang; mahse, hringnun kaldan a ni miau a, hmeichhe dangte kawng zawh ang kha ka zawh ve a ngai miau si a ni.

Ka pindana kan han chhoh chuan an lo mu fel tawh a, Alana pawn min mutsan tawh aniang message a chhang thei tawh lo a, kei erawh ka mut a chhuak lo khawp mai. Zan tlai tawh takah ka inbual a, ka harh zual ting mai bawk a, ka muthilh ve meuh chuan zing lam a ni tawh. 

Rampuii'n min lo kaitho a, awltu ka ngah bawk a zing kar aṭangin mahni ngawt ka inbuaipui a, ka nu pawh nizan lam nen chuan a in ang ta lo, a phe buai zar zar a, ka cousin-te a tir kual a, u Hruaia a vin phar reng bawk a, min ngai awm hmel a pu tawh lo bawk a rilru a nuam huai mai. Keini chu tukṭhuan eikhamah kan insiam nghal a, Alana pawh ka be hman mang lo, Puia a phei tawh tih a rawn sawi a, min hruai turin a lo kal dawn tih thu te chu message-in min lo hrilh a, chu chu kan inbiak chhun a ni.

Puia chu dar 10 pelhah a lo thleng a, "Zanin chu kan ṭhianpa te huanah in riak dawn aw, in duh chen chen in cham dawn nia," nui hui chung hian a ti a, kan insiamna bulah a lo ṭhu ve reng a, kan beautician te chu a incheitir pah bawk a, a hnawih ve nawk nawk a, amah a ngo sa bawk nen a hawi paw heu reng. Inneih inkhawm chu dar 11 a ṭan tur a ni a, mo inchei hi chu an inpeih hman tak tak lo tih ang zawng zawng kha kan nei a, kal dawn ṭepah pawh kan ka inhnawih mawlh mawlh mai.

Puia car lo kenah chuan pangpar a bawr luih mai a, Alana fate chei anih thu min hrilh chuan rilru a ti hlim veng veng mai a ni. Kan kal dawn thlengin ka nu chu a la insiam a, "Kal liam phawt rawh u, kan lo zui nghal dawn che u nia," an tih vangin kan kalsan a, Biak In kan thlen chuan mi an lo ṭhahnem viau tawh. U Hruaia leh u Sena'n kawngka bulah min lo nghak a, tu zawkin nge min hruai lut dawn ka zawh chuan, "Keiman," an lo ti ve ve a, ka pa kan han nghak leh rih a, anni pawh an lo thleng har lo. Mahse, ka pa chuan, "I u ten an hruai lut dawn che nia," a ti mauh mai a, tum loh deuh chuan ka u te pahnih kut vuan chungin ka lut a, mo hi mipa pahnihin an hruai luh ngai ka la hre lo a, keizawng ka vanneihna zel a ni.

Inneih hunserh chu a rei lem lo, nupa ni turin Pathian hmaah thu kan tiam dun a, mittui nen hnukulh ṭun chungin chhechhamna zungbun kan inbuntir a, damchhunga inhmangaih a, inthlah leh tawh ngai tawh lo turin tisa leh thlaraua pumkhat kan lo ni ta a ni. Hun kan hman zawh hnu chuan thla lakhonate kan nei a, a hahthlakin a hlimawm em em bawk. Moneitu lamin photo booth te an lo siam a, Biak In tualah cake lianpui an lo hung bawk a, Alana'n a thawhpui te buatsaih a nih thu min hrilh a, a tam zawkin an rawn ṭawiawm thei lo a ni awm e.

Refreshment pawh ei mumal hman loin thlalak lamah kan buai a, in lamah programme an siam ve leh bawk nen hmanhmawh deuhin kan haw a, in kan thlen hnu maiah mo hruai tur an lo thleng chawpchilh a, han khawmuan lehna hman pawh kan nei tawh lo. Ka kal tur chu hnuk a ulh ṭun reng a, a chhan pawh ka nu vang a ni, ka insiamna bulah min ṭhutchilh chawt a, a mittui a hru zauh zauh reng a, kalsan pawh a nuam lo. Kan chhuah dawn te chuan kawngkhar bulah dingin min lo thlir reng a, motor-a ka luh hnua ka va lehhawi pawh chuan lungngaih hmel zetin min lo thlir a, 'Ka kal leh duh lo' pawh ti ila a phal mai duhin ka ring.

Alana te in lamah mo lawmna programme kan hmang a, an chhungte an tam vak lo a, a tam zawk chu ka lam aṭanga kal te an ni a, ka chhungte chuan min thuam mawi khawp mai, beisei phak bakin thilpek kan dawng hnem a, Sangsangi te unau pawh an hlim ve viauin ka hria, ka hmu tam lo a, ka hmuh chhunah chuan an ṭhiante nen an inzui a, lungawi lo hmel a pu lo niin ka hria. Alana nu pawn lawmthu thusawina te a nei a, ka chhungten min ṭawiawm dan chu awhawm a tih thute a sawi ve luam a, ka pa pawh rei vak lo chu a ding ve, ka nu erawh a zak nge ni an sawm chhuak zo lo a, "A pa sawi kha ka ring mai ang," a ti deuh tlat a, an nuihpui dar dar hlawm.

Khualkhua aṭanga lo kal haw leh tur te an awm ve avangin chaw kan ei hma khawp mai. Chawei khamah mikhual te kan han vai liam leh zet a, chumi hnu chuan kan riahna tur Alana ṭhiante huan lam kan pan a, Puia leh Rampuii'n min zui ve bawk a, huan neitute erawh kan hmaah an kal tawh a, kan mamawh tur te pawh nimin lamah an lo dah tawh niawm tak a ni.

Alana chu a chau deuh a, "Puipunna a tel hi ka zo ṭhin lo, thlasik lai a ni hlauh zawk a azia, lu a tina bur thei alawm le," a ti bul bul a, "Nachhawkna i ei duh em?" ka tih chuan thlen huna a ei tur thu a sawi a, kei chu ka ke a kham viau e tih lohah chuan han chauh em em ka nei lo a, nuam ka ti hle zawk a ni.

Rei tawk fang kan tlan hnu chuan a ṭhiante huan chu kan zuk thleng a, kawngpui aṭang pawhin a hla lem lo. Kawt zawla motor kan hun laichuan inchhung aṭangin nupa niawm tak hi an lo chhuak a, mipa chu Marcosa kha a ni, a lo zuitu pawh a nupui anih ngei ka ring.

"Puia a tlan muang a ni maw, kawng in bo emaw kan ti hman alawm," hmeichhia chuan a lo ti var a, "Thlen hmain an insawh silawng ang tih te a hlauhawm ve a," tiin Puia chu a lo nui ruh ruh a, Marcosa thung chuan Motor hunna lai tur a lo kawhhmuh a, chutih laiin Alana'n kan thawmhnaw bag te a lo la chhuak a, inchhung lamah kan inzui lut thuai bawk.

In chu a zau hran lo a, a nuam tawk hle thung, hmeichhia zawk khan inchung lamah pindan a awm thu te min lo hrilh zung zung a, Rampuii nen kan han enkual a,    sawisel tur a vang khawp mai, pindan lah chu an lo chei ve nasa mai a, choka lamah leh eitur an lo chhawp ṭeuh a, kan mamawh tur ang chu an lo ngaihtuah kim viau a ni. Alana'n ṭhian a nei mang lo ni a ka hria kha ka ringsual tain ka hria.

"A vawh deuh chuan mei a chhem theih ania," tiin Marcosa chuan inhnung lamah min hruai chhuak a, chutah chuan inte thuk awmna a lo awm a, kan thlang lam chu vaimim hmun a ni a, tui luang ri te a hriat theih a, chhak lamah thinghmun a awm bawk a, zan lamah chuan a vawt duh khawp ang le, a hmun a hnawng angreng a, fur lai a ni lo hlauh chu a zia.

"Haw mai in tum em ni?" Alana'n a tih chuan, "Thingpuite in ho phawt ang u," tiin ka lo chelh ve vat a, inchhunga kan luh hnuah hmeichhe ho chuan thingpui kan lum a. In neitunu Hadasi chuan an thil dahna leh bungraw awm ang te min kawhhmuh zung zung a, tui lumna a awm lo chu a inthlahrung a, bel lian deuh min kawhhmuh pahin, "Gas-ah hian in chhuang mai dawn nia, intihbuak palh a hlauhawm si a, inpa i chawi thlak tir mai dawn nia," a ti  a. Rampuii thung chuan kan awmna chu nuam a ti vak lo aniang, "In riak ngam dawn em ni? A fal e..." a ti leh ṭhin a, innei thar ten hmunfal kan thlakhlelhzia a hre lo mai mai a ni.

"Helai hnaiah midang awm an awm em?" ti a Hadasi ka zawh chuan, "Huan nei ve chu an awm a, ka pa ram hi a zau angreng a, saw lai deuhah sawn an awm," a ti a, "In riak tawh ngai em?" ti a ka zawh leh chuan, "Riak fo e, a hlauhawm loh ania, tu mah helaia lo kal an awm ngai lo, mahni pawn ka awm tawh alawm," a ti hem mai a, mahnia awm chu ka hlauhzawng tak a ni, Alana nen ni dawn lo i la chu ka ṭih ve viau maithei.

"Mahniin i riak a maw?" Rampuii'n a lo ti hlut a, kan ṭhiannu chuan nuisang hian, "Thinrim lai ania, eng mah hlauh a awm lo," a ti sam et a, engtia rei nge kan cham dawn Rampuii'n min zawh leh chuan ka sawi thei lo, zan hnih khat a nih ka ring ve ngawt a, awm rei theih pawh a ni lo ang, Alana nen hna kan nei ve ve a, in lam pawh an ngaihtuahawm dawnin ka hria.

Thingpui kan va chawi phei laichuan Puia hoin an lo nui ham ham a, mei an zuk vangin sitting room chu meikhuin a bawh paw chuk a, han khap mai ka tum laiin Marcosa chauhin a lo zu si a, ka khap ta em lo. Mahse, a nupui zawk chuan a lo khap a, "I awm a nat leh tawh kha mei zu reng suh," tih leh an pa zial ken lai chu laksak a rual a, a pasal chuan a melh rum deuhin ka hria.

Thingpui in pahin huan chungchang te chu kan zawt a, huan enkawltu an awm lo niawm tak a ni. "Ka pa hian hlawhfa nen a enkawl a, kumtin hian thlai hi a tuh ṭeuh ṭeuh a, an seng awm pawh ka hre ngai lo, vaimim hi chu kan ei ve zeuh zeuh a, a bak thei leh thlai dang hi chu miin an ru zo zel a, kawngpui a hnaih lutuk hi a fuh lo, thil a bo duh riau, sangha dil te pawh siam a tum a, 'I chang chuang lo ang' tiin kan khap anih kha," Marcosa'n a tih chuan rilru a nuam lo ru khawp a, ruk ru an kal ṭhin anih chuan a him dawn em mawni.

"Puia, Rampuii nen riak ve u la, inhnuai leh inchungah kan mu mai dawn alawm," ka ti ta ngawt a, an lo duh lo nasa.

"Ngawi rawh, i ṭhiannu awm ka ti nuam lo ang," Puia'n a tih laiin, "Ka duh lo e a, in interek fal reng dawn si a, in lo haw hunah ka lo riahpui zawk ang che," Rampuii'n a ti ve thung a. Chutih laia Puia'n "Hmun fal hi ka hlau," a lo ti zauh chu Marcosa nupuiin a lo helh khawp. "I riak zeuh zeuh tih ka hre kar ania," a lo ti zauh a, Puia chuan mitmeiin a lo khap ve ngei a, Alana leh Marcosa an lo nui ruh ruh mai.

"Thim hnuah in haw chauh dawn nia," Alana'n a tih vangin an la awm ve rih a, in hnung lama thukah khan mei chhemin kan aikhawm laih a, Puia'n vaimim a rawh a, kan vilpui ṭhap a, an vaimim chin lah chu sweet corn hlir a ni, a la no deuh a, Puia rawh pawh chu a la eng ṭha mang lo.

Fiamthu ho deuh deuh sawiin mipaho chu an titi a, hmeichheho chuan hunpui hman dan tur te relin hman ho kan lo rawt hlut a, kan titi tui ve khawp. Chutih laia Lalpuia thil sawi vang chuan kan ngawi ṭhap a, ani lah pek chuan, "Min han hrilh teh u, experience in nei ve ve tawh a, ka hre ve chak ania, inneih rei hnu hian a buaithlak ka ring tlat, fate neih tawh phei chuan engtin nge in tih? Insawm dan bik riau te a awm em, in bulah in fate an mu ve kur ang a, a rem lo awm ṭhin e ka ti," tiin a nui hui a. 

"Engtia in sawm chi nge, in inhrilh lawk ṭhin em?" a la ti tak deuh deuh a, a ṭhiante pahnih chuan an chhang ṭha duh lo. Alana'n, "Marcosa zawt rawh," a tih laiin Marcosa'n, "I hre zawk ang, chhang rawh," a lo ti ve thung a, chutah Alana chuan, "Hadasi'n chhang rawh se," tih pahin Hadasi lam a rawn melh a, Rampuii nen kan lo nui kar kar reng.

"Aw, sawi vak a ngai hleinem, 'Lo la muhil suh' te an tia, kan hrethiam ve mai zel alawm," Hadasi'n a ti chiah chu ring theih tawpin Puia'n a lo nuih a, "I duh leh Ngaihawmi zawt la ti nia," Hadasi'n a tih leh rualin Puia hnung a ri nghal thlawp.

"Chutiang chuan i ti ṭhin a maw....'Lo la muhil suh' tih chu in nupa code a ni maw?" nui ruh ruh chunga Puia'n Marcosa a en chuan zial a lo ṭan san daih a, "A ngai insawi tluk tluk em ni?" Puia bawk chuan a ti leh. 

"Sawi tluk tluk lo ve" Marcosa'n a ti chiah chu an nuin a lo melh rum hrawk a, chutah "Sawi duah a ngai hleinem, an duh te chuan an rawn dap rawk rawk mai alawm," Marcosa'n a tih zawm leh a, Puia nui tur chu a bula ṭhu chuan engtin emaw a lo ti aniang a hma lamah a bu dawrh a, kan tuibel chhuan lai a bawh thlu a, kan ri nghal hlut a, hmeichhe ho phei chu kan tlan chhuak rang khawp mai. Intea kan va luh leh chuan mei chu a lo mit daih a, chhuatah tui a baw zuih a, mipa ho chu an thawmhnaw a paw phual mai a, boruakah vut duk a leng chum chum bawk.

Alana lo chhuak chu choka lamah ka luhpui a, a kawr hma chu puanin ka hruksak mawlh mawlh a, a tih ngaihna a awm lo a sam thlengin a paw phuk a, inbual law law sela a ṭhain ka hria. Ani thung chuan, "Haw fel phawt sela ka inbual ang," a ti ve tlat a, pawna kan va chhuah leh chuan Marcosa te nupa pawh a lo insilfai mek a, Rampuii erawh kawngka bula ṭhu anih vangin a tlanchhuak rang a, a bal ve vak lo. Puia mawlh chu a ni, belmang te a kai a, a thaw khu luih luih lo chauh a ni.

An intihfai hnu chuan haw mai an rawt a, han chelh chu kan la tum ve viau nain kan ṭhiante nupa chhan fasen an nei a, "A ni hnenah kan dah ringawt a, a lo call ṭep tawh ang," tiin an hmanhmawh riau a, rei pawh awm tawh loin min hawsan a, an kal hnu chuan a reh ṭhiap tawh.

"Thli a tam si a, kan mu lum zo lo mai ang a," ka tih chuan, "Inchung lam khi a phui ṭha deuh aniang a lum hup mai, rizai a tam a, kan thuah ṭeuh mai dawn nia," tiin min chhang a. Inbualna tur tui ka lum a, duh huna in mai turin thingpui pawh flask-ah ka dah sa a, eitur a duh em ka zawh chuan a la puar thu a sawi a, keichuan a ril a ṭam leh mai ka ring. Fridge chu hawngin ka va thlek kual dan dan a, frozen foods tih angreng chu a tam khawp mai.

Sitting room-a Alana ṭhu chuan phone a hmang niin ka hria, a fate a bia a ni maithei, "Willie-a chu a pi bulah mu mai sela, naktukah i pa Chhuanate an haw chauh dawn alawm, a tuk lehah kan lo haw ang, nikhat kan la cham dawn a, kan lo haw hunah kan bazar dawn nia," a ti bul bul a, Sangsangi anih ka ring.

"I pi chu ka lo bia ang e," a tih ri ka hre leh a.

"William-a chu phei tawh lo zawk mai rawh se, kan lo haw har dawn hleinem," a ti zui zat a, a nu chuan engtin nge a lo chhan ni, "Duh leh naktukah kan lo chho dawn nia, min lo nghak rawh se," a tih zawm leh a, tih tur pawimawh a awm em mawni ka ti rilru a. Keipawh chuan ka chhungte ka la be miah lo a, ka nu biak ve a ṭhain ka hria.

Ka phone ka ban a, ka nu number chu ka call a, a lo chhan rual chuan, "Hruaia te ṭhianhoin ar kan an tum a, an bengchheng lutuk hei, engtikah nge in lo haw dawn?" a rawn ti lang lang a, "Naktuk kan cham ka ring a, kan lo kir hun tur ka chiang rih lo, ka lo hrilh leh ang che," ka tih laiin u Sena aw ka hria a, "Damien-a kha inneihnaah a lo kal ve kha i hmu em?" a rawn ti a, ka lo hrechang lo reng reng, thlalak lai pawh khan ka hmu lo a, a lo kal ve tih takngial pawh ka hre lo.

"Chaw a lo ei ve em?" ka tih chuan, "Ei lo, inkhawm ban khan a haw daih aniang," a ti leh a, ka nuin min lo chhang lehin, "Thang rei suh u, mo thar tirhah awm bo daih a mawi lo, mikhual te pawh an nei ve ang," a lo ti a, chu chu ngaihpawimawh ṭha ka ti ve khawp mai a, zanin bak chu riak chhuak lo mahila a pawi lo ang, a inthlahrunawm dawn tlat.

Ka nu nena kan inbiak zawh hnu lawkah Alana chu a lo phei a, tui a so tawh em tih min lo zawt a, "So chiah lo a, a sa ṭha viau tawh ang," ka tih chuan ka bel chhuan lai chu a va en a, "A tawk mai hi," tih leh suan a rual a. Bual ina a lut tur zui pah chuan eng nge an lo sawi ka zawt a, "Willie-a a damṭha lo a, vawiin lamah a nu a zin bawk si a, awm rih mai rawh se ka ti anih kha," a ti a, engtin nge a nat dan ka zawt leh thuai a.

"A mu reng a, eng mah pawh a ei duh lo a ti, a hritlang sa reng reng a," a ti mai a, thla kan lak laikhan a pi bulah kalin a zui det det reng a, in lamah lah khan ka hmu zui lo a, a lo na viau em mawni.

"A ngaihtuahawm angem?" ka tih leh chuan, "Ngaihtuahawm loh ang, a pi bulah a awm alawm, a u te an awm bawk a, kei chu min ngai vak lo ang," a ti leh mai a, a tui bel ken lai lak paha chhuah leh mai ka tum chu ka banah a rawn man a, min pawt let rang khawp mai.

"Inbual rual ila, tui lum hi a tam tho asin," a ti zawi sup a, bucket chu ka en a, tui ren thiam lo tih takah ka inbualna pawh a daih ka ring lo, "Ngawi rawh, ti hmasa la, i zawhah ka inbual mai ang," tia kal leh mai ka tum chu min la vuan tlat.

Phawk angreng zeta ka en laichuan, "Zanin chu aw," a ti a, a nui suk mai.

"Eng a?" ka hrethiam a, ka nuih a zat em vang a ni.

"Kan nupa code tur anih chu," a nui ve hawk a, kei ka lo lai ru nasa. "Inbual thuai rawh, tui ka'n lum ange," tiin a awmah ka beng thawk a, ṭha deuh chuan min thlah ve mai bawk a, kan chhuah hnua a faifuk rat rat chu nui chungin ka ngaithla reng a, rilru a hlim veng veng mai a ni.

Rei a inbual lo a, a lo chhuah hnu chuan inchung lamah a chho tlang a, a chhoh hnu rei lo teah min lo au a, a thawmhnaw a zawng buai a ni maithei. Ka han chhoh ve chuan, "Hetah hian heater a awm a, ka lo la thla dawn nge?" a lo ti var a, "La thla duh lo mai rawh, pindanah kan ai duh zawk ang," ka ti a, a thawmhnaw hak tur a hai buai pawh chu ka va pui vat a, keipawn ka hakthlak tur te ka la chhuak nghal a, khua a thim ta bawk nen mahnia inhnuaia awm bik chu ka ngam mang lo, Alana chu ka inbual chhunga choka a lo awm turin ka hrilh a, min hnial bik lo.

Ka chhuk leh hnu rei vak loah a lo chhuk a, ka tui chhuan lai chu min lo suan sakin bual inah min va siam sak thlap a, lawmthu sawinan a biangah ka fawp zauh. "A vawt ania, inbual rei lo la, hritlan te a hlauhawm," a tih hnuah min chhuahsan a, ka inbual rei lo thiam lo, darkar chanve chuang zet chu ka inbual awm e. Ka chhuah hma deuh chuan a phone hmang thawm ka hria a, a aw aṭang chuan a thinrim emaw tih mai tur a ni.

"A damlo tih i hre reng alawm nangpawn, inneih niah kher zin pawh kha eng nge a ṭulna, ngaihsak ber awm ziazang khan rawn ṭawng reng reng suh, ka nuin a buaipui a, i lo ngaihtuah a ngai lo," a ti hluk hluk a, a nupui hlui a ni ngat mai.

"Mary, naupang vangin ṭhat ka chhuah hram hram anih hi aw, ka duhdan angin awm thei ila chuan i hmu leh tawh hauh lo zawk ang," a ti leh a, thawm chu a reh deuh vang vang a, rei dawn hnuah a che thawm ka hre chauh a, "Thingpui ka lo thlit dawn che em?" a tih riin a zui zat bawk.

"Lo thli la," ka ti ve mai a.

"A thlumin em ni?" a tih leh chuan a hâng ka duh thu ka hrilh a, ka hmanhmawh ve viau tawh.

"Vawiin kha i nalh teh ania, ka chhungte  pawh khan hmelṭha an ti khawp mai che," a tih ri ka hriat chuan ka nui var var a, a hnua a lo ṭawng leh chuan bual in kawngka bul maiah a ding tawh, "I lo chhuak dawn tawh em?" zawi deuh sup hian a rawn ti a, "Ka hman ṭep," tih pahin ka intleuh nghal sawk sawk.

Ka va chhuah laichuan dawhkan bulah dingin thingpui no a lo dawm mek a, a vawt lutuka ka hik mup mupin ka hria. Ka thingpui tur chu min lo pe vat a, "Makeup i hman loh khan i lang young zawk daih anih kha," tiin min lo nuih a, hriat a nuam ṭhin, ka lakah hian fakna ṭawngkam a ui ngai lo.

"Heater chu i on em?" ka tih chuan a on tawh thu a sawi a, thingpui no keng chung chuan kan inzui chho a. Kan mutna tur pindan chu a zau lo nain a nuam tawk khawp mai, khum lian ve deuh a awm a, chhaklam tukverh bulah dawhkan te leh  hrui hmanga siam chair pahnih a inhung a, chair-ah chuan rose var a lo inkhawi bawk a, a romantic ruih mai a ni.

Alana chuan chair chu a va la a, ka hmaah lo ṭhuin khuma ka ṭhu chu min en vang vang a, "I ke kha ka lo hem sak ang che," a tih chuan ka zam ṭan a ni der. 

"I hit vek alawm le," tih pahin ka ke phah chu a tuai hauh hauh a, a kut chu hemin ka ke chu a hmer leh vang vang ṭhin a, chhunlama kan thil tih vangin ke a kham bawk a nuam duh ve tak a ni.

"Naktukah em ni kan haw ang?" ti a ka zawh chuan, "Ka nu khan chhungte ho thlah ve turin min duh deuh a, naktuka haw chu pawi i ti em?" a lo tih let khauh a, ka lo chhang rang khawp. "Riah bo reng chu a nuam lo zawk, zingkarah pawh haw mahila a pawi lo," ka ti zung zung a, a duh dan pawh anih hmel.

"Zing kar em em a ngai lo ang, rei deuh i mu phawt dawn nia," mit min siai sak pahin a rawn tho a, ka bulah lo ṭhuin ka kut chu a rawn hum a, meilum bulah inngheng rialin kan ṭhu tawh. "Mei lum hi chu thawhsan a har a nia," a tih laia a lam ka va hawi chu kan mit a intawng chat a, eng mah sawi lehna hman a awm tawh lo, kan hmui a insi chawih a, min pawmbet chial tawh. "Heater kha.." ka tih rualin a tho leh vut a, hmanhmawh deuhin a va off a, a lo let pah chuan a kawr a phelh a, ka bul a rawn thlen leh rualin ka bathrope chu a rawn pawt phelh mawlh mawlh a, kan han infawp leh chu thaw lak a rang duh ngang mai.

Ka nghawng a fawhna vanga thawk ka la leh halh ṭhin te, tisa chakna vanga a rum deuh ham ham ri leh kan chet zawnga kan khum chik ri te bak chu thawm dang a awm lo, ngaihtuahna chu a nu but a, kan thil duh erawh kan inhriatchian sak hle lawi a, nupui ka nihna anga ka tihtur pawh phur tak chunga hlen chhuah ka tum a ni. Ka hmuia a rawn fawh leh laichuan a darah ka vuan a, ka lo ṭham na deuh nge ni ka kut chu lasawnin a nghawngah min kuah tir a, ka zei lo lutuk chu ka zak ru lek lek. Mahse, min lo hrethiam khawp a, min dimdawiin min ngaichang thiam hle bawk. 

Thawk leh khatah hian thawm a rawn awm thut a, kan tawp chiang khawp mai. "I phone anih chu!" phawk angreng zeta ka tih laiin "Ri mai mai rawh se," tih leh min fawh a rual a, ka nghawngah a fawp thla dan dan a. Mahse, a phone chu a ri tawp thei lo, a ri zo a, a rawn ri ṭha leh a, ngaihtuahna a la peng hneh viau lehnghal.

"Va chhang mai rawh, thil pawimawh a niang," ka ti ta ngawt a, damdawiin lam te an nih ka ring deuh, doctor hi chuan emergency thil an ngah a, call chhan loh chu a fuh lo tlat a ni.

Peih loh hmel zeta a thawh laichuan ka lo inkhuh ṭha sawk sawk a, phone a chhang lai chu ka lo en ve reng bawk a, a biak danah chuan damdawiin lam nge a chhungte tih ka chiang thei mai lo, "A va buaithlak e aw, casualty lamte ka lo bia ang e, ka ṭhianpa pawh a duty alawm, a lo hmuak dawn che u nia, ka rawn thleng har lo ang," a ti a, a awah chuan a chiai deuh emaw tih tur a ni.

"Eng thil nge?" ka lo tih chuan, "William-a maw le, a luak chiam a, a khawsik a sang bawk a ti," tih pahin a inha nghal sawk sawk  a.

"A va zia lo ve aw, eng vang nge mawni dawn le?" tiin keipawh chu ka tho ve nghal a, "I lo awm ngam awm si lo a," a tih chuan, "Teuh nang, ka lo kal ve ang chu," ka ti hluai a, "Insiam thuai rawh, kawr lum deuh ha la," tih pahin ka bag a rawn theh phei rawk a, a hmanhmawh lutuka chet pawh min ti khawr zo, ka hmuh hmasak ang ang chu ka inbel a, jeans kekawr chungah kawrhma pum fual zet ka ha a, ka hnawk deuh ṭup a; a dang zawn kualna hun ka nei tawh tlat lo. Alana kal chu hmanhmawh deuhin ka umzui a, kal pah chuan ka be mawlh mawlh.

"Damdawiinah an kal dawn chiah maw?"

"I nu chauhin em ni kalpui a?"

"Sangsangi te an mu tawh nge?"

Ka zawhna chu, "Aw, a niang," tih angrengin min chhang a, motor-a kan ṭhu lut chu tlan chhuah nghal mai a tum a, "Ngawiteh, i fim lo riauin ka hria, thawk te han la rih lawk rawh," tiin ka lo khap a, Second li nga vel bak chu a din phah chuang lo. Chak deuhin kan tlan chhuak a, thinphu a la pangngai lo bawk nen thawk a hah ru ṭun mai a, han khap em chu ka inthlahrung ve bawk si a, "Fimkhur rawh," tiin ka hrilh deuh reng.

Damdawiin kan thlen chuan Casualty-ah an lo awm a, Alana nu bakah an chhungte an lo awm ve nual a, an mikhual te an nih hmel e. Mi an lo be ṭha khawp a, Alana nu erawh a tupa buaipuiin casualty chhungah a awm a, Alana lut chu ka zui ve lem lo. Pawn aṭangin kan lo thlir a, a fapa lo entu doctor nen chuan an inbe mawlh mawlh a, an awmdanah chuan thil serious lutuk a awm lo niin a lang a, awm a nuam deuh huai a ni.

Rei vak loah a lo chhuak a, "A santen a nih hmel, admit loin inlamah kan enkawl thei ang," a lo ti a, Nurse pakhatin a lo koh vangin a lut leh thuai bawk. An chhungte khan min lo fiam a, "Lawiṭhat zanah a va chhangchhiatthlak ve le, pathlawi chu an buaithlak dawn riau mai," nu pakhat chuan a lo ti fiamthu hlut a, an chhungte a ni bawk a tiin, "Ni e tiraw, lawiṭhat zan lam pawh rilruah a awm thei lo," ka lo ti fiamthu ve a; mahse, ka sawi zawh rualin ka inchhir nghal der. "Tun dinhmuna chutiang te lo sawi, zahpuiawm mai mai mange," ti hluk ri ka hria. Ka lehhawi rualin nu Ngengpuii'n min lo kalpel thuak a, puan pawm luk chunga a kal chu ka en zui vawng vawng a, a bula ding pawh chu a hamhaih ve hmel khawp a, sawi tur a vang duh khawp mai.

"Ruatbawih, hei hi lo la teh," Alana'n a tih ri ka hriat vangin ka lehhawi vat a, a damdawi khai lai chu min lo pe a, thisen chaw an khai sak dawn aniang bur thum lai a awm. William-a pawm chung chuan ka bula ding nu kha a bia a, "Kal ang u, ka nu kha a kal tawh elo?" tiin a zawt a, nutling chuan a kal tawh thu a lo hrilh vat a.

"Ka patea nupui ka nu Thani anih hi," Alana'n a tih chuan kan han inchibai leh rih. Khawmuang tawh loin motor dahna lam kan pan a, "I nu kha chu hriatthiam a ngai a nia, i rilru te a lo nuam lo palh ang e," nu Thani'n a tih chuan ka nui ringawt a, awm erawh nuam lo duh tak a ni.

William-a chu motor seat hmaah a piin a ṭhutpui a, keini nu Thani leh an lo kalpui pa pakhat Alana'n Pa Chhuan ti a a koh nen chuan seat hnungah kan ṭhu a, nu Ngengpuii chu a ṭawng mang lo reng reng, Alana'n a biak chuan bung deuh deuhin a chhang a, "A nu bulah dah tawh lo ang che," a ti hmiah bawk a, a lungawi lohna chu keimah vang a ni lo ang tiin ka ngaihtuah neuh neuh a, min bia sela ka awm nawmna tur sawi se ka ti khawp mai. Chutih laiin nu Thani'n min lo be seuh seuh thung a, keipawn eng eng emaw ka zawt ve luam a, anni chu Kolasib lamah an awm a, inneih min hmanpui tura lo zin an ni a, naktuk hian haw leh mai an tum bawk.

In kan thlen chuan Sangsangi te unau an lo la meng a, an pafa hoin pindanah an inzui lut diak a, kei erawh nu Ngengpuii'n, "Thingpui lo lum rawh," a tih vangin choka lamah ka phei thung. Pindan lamah chuan an ri nak nak reng a, thingpui ka siam zawh hnuah ka va luh ve chuan khumah an lo ṭhu ṭhap a, chanchin te pawh ka va zawt ve luam a. William-a chu drip an lo khai sak a, a pa chuan, "A khawsik a zia tawh a, a luak tawh lo bawk a, a khaw ṭha lo pawh a zia mai ka ring, han ngaichang deuh ila," tiin min lo hrilh zung zung a, "I nu Thani te kha an la mu dawn lo em mawni le?" nu Ngengpuii'n a tih chuan, "Lo va phei rawh," tiin Alana'n a nu chu a tir phei a, chumi hnuah a fanute pahnih chu, "Nangni pawh mu dawn rawh u, naktukah i pi hoin in va bazar dawn nia," a ti zui a.

"Kan duh lo, a pi hoa bazar aichuan nutei kan sawm mai ang," Sangsangi'n a lo ti hmak a, a pa chuan a melh rum khawp mai.

"Mu ang Naom," ti a Sangsangi tho chu a nau pawn a zui ve nghal a, kei erawh khum bulah ka la ding reng. 

"Kan let tawh lo mai dawn nia," Alana'n a tih chuan, "A pawi lo; mahse, kan thil te kha engtin nge niang?" ka ti let vat a, "Hman veleh ka zuk la dawn nia, a bo lo ang," a ti zawi sup a, a fapa chu a thlek vang vang bawk.

"An unauah chuan a hmelṭha ber anih hi a, a hmel a pa riau mai bawk a, a chhun bik tlat che," tih paha William-a sam ka zuk chul chu min lo en ve kar a, eng mah phei chu a sawi lo, a pa lam a melh a, tui a lam zui a, side table-a tui chu ka lo bansak vat a.

Rei deuh chu ka ṭhutpui ve, William-a chu a thlan hluam a, a vawt a tih thu a sawi reng bawk. "I duh leh lo va mu la, a men chhung chu ka'n awmpui a nge, ka lo mu har lo ang," Alana'n a tih vang chuan kan pindan lamah ka pheisan a, ka luh hnu rei vak loah nu Ngengpuii ṭawng thawm ka hria a, "Ka bulah mu rawh aw," ti a a tupa a be thawm a ni.

Alana nghah pahin kan bungrua te chu a theih ang ang ka remfel a, midang an mut tawh vangin thawm neih ka hlau si a, han inhun ṭhat vak theih pawh a ni lo. Rei angreng zet ka nghah hnu pawh chuan Alana chu a la rawn phei lo a, sana ka en chuan dar 12 a hnai kuar tawh. Ka puante chu almirah ah ka rem lut zel a, a zual pui chu ka zo a, bungraw lian ho erawh zinga remfelah ka dah thung. 

Phone khawih pahin ka tlu zal a, engtik laiin  nge ka muthilh reng ka hre lo, ka harh leh chuan Alana chu ka bulah a lo mu tawh a, a muttui hmel khawp mai. Sana ka en vat a, zing lam dar 4 leh minute 15 chiah chiah a ni, puan ka sin ṭhattir a, a awmah ka va kuah chial a, a mutui bawk aniang a harh eih lo, nimin lam kha chau a inti em a, taksa leh rilru hah reng rengin a hun a hmang ṭhin tih ka hre ve reng a, ka theihtawka duat  ve pawh ka chak, chutiang ti thei tur dinhmuna chuan ka ding tawh tih te ka rilruah a rawn lang a, a muhil hmel chu ka thlir leh ṭhin.

Zinga ka harh chuan an lo tho vek tawh a, hetiang em em a thawh hai hi ka nei khat khawp mai. Alana chuan, "I chauh ka ring a, ka kai tho duh lo che anih kha," a ti sam et a, ka zia lo tak tak a ni, mo thar tukah lehnghal. William-a chu a lo zia viau tawh a, khawsik a nei tawh lo a, a luak tawh lo bawk a, a inthiar zing deuh tih chauh a ni tawh. A piin a duh lo chungin diaper a hrentir a, an inti ṭap pur mai a, a u te lahin an lo chhan ve nasa mai bawk nen an pituin an inhau hlak hlak reng.

Tukṭhuan eikham hnuah kan mikhual te pawh an haw ta diak a, Alana lah chu damdawiin lam aṭangin an lo phone a, "Ka lo haw har lo ang," tiin hmanhmawh deuhin a kal chhuak a, chhun thil ei hman pawhin a lo haw chuang lo. Inte ka infai a, Sangsangi te unau pindanah an tawm tlat bawk si a, in chu a reh ruih mai a, a khawharthlak reuh khawp mai. Kan present dawn ho kha kan la hawn loh vangin Sangsangi te unau sawm ka rilruk a, naupang hian present bawm hawn hi nuam an ti ṭhin si a, an phur zawng tak anih ka ring a ni.

William-a mut pindan lam ka pan lai chuan an nui kar kar ri ka hria a, kawngka bulah dingin thawm chu ka han ngaithla chiang a, "Au, dah rawh u, lal au ka hnek dawn che," Williama'n a ti ri ka hria a, a ṭap aw lek lek. Kawngkhar ka pawt hawng chu an lo hawi ṭhap a, "Eng nge in tih a?" ka tih chuan tuman min chhang lo.

"Present bawm min lo hawn pui peih em?" nuisangin ka ti leh a, min la chhang chuang lo. Sangsangi leh Naomi chu an inmelh zauh a, zawi tein a inbe bawk.

Ka va kal hnai chu rim uih deuh vat vat hi ka hria a, "Willie, i piin i diaper a thlak tawh  em?" ka ti vat a, William-a ṭap deuh lek lek chuan min ti hamhaih viau a ni. "Au, apa kha khawiah nge?" tiin a u Sangsangi lam a melh a, "A tlanbo," pakhat lah chuan a lo ti hmak a, min rawn melh rum nghal rawm mai.

"I diaper chu ka lo thlaksak ang che aw, bathroom-ah i kal thei ang em?" tiin William-a chu ka bia a, "Aih, apa ko rawh u," a ti leh ṭiau a, "Ka ti thei alawm Willie, ka pawm phei che ang a, insil nghal te pawh i ngai ang," tih leh a puan sin lai chu hlim ka rual a, diaper awzawng a lo hreng tawh lo. Chuti chung chuan a la insilfai lo tih a lang reng lawi si.

"Khawiah nge i diaper?" ka tih rual chiah chuan, "Kha.." Sangsangi'n a lo ti ri ka hria a, a lam ka hawi tur chiah chu engthil emaw hian ka hmaiah a rawn vawm a, a rim ka hriat rualin ka ṭe ṭhat a, ka per sawn rang hle bawk. 

Hmeichhe naupang pahnih nui ri ka hre zui a, chu erawh ka ngaihsak hman lo, ka biang,  ka mit ko leh chalah te chuan ek a kai luai a, thawk pawh ka thaw ṭha thei lo, ka pum a let but but a, men pawh meng hleithei lo chuan sitting room lamah ka tlan chhuak a, ka uak phei tuarh tuarh a, bathroom pawh ka thleng zo lo ṭhelh a ni.

(End of chapter - 2)