I NGHILH ZAWK ANG (CH - 3) by Ahmangaihi violette khiangte

I NGHILH ZAWK ANG

by Ahmangaihi violette khiangte

Chapter - 3

Meng mang loa bathroom ka lut chu bucket emaw ni hi ka pal a, bathroom chhuatah khup sawh chawrhin ka tlu zui a, ka biangah rawn luang a awm vangin ka hmui chu ka ti che ngam tawh lo. Ka han meng tur pawh chu ka mit ko aṭangin a rawn luang a ni ber, thawk pawh thaw hleithei lo chuan tap ka ban a, ka hmai chu ka phih nghal bawrh bawrh a, engtia rei nge ka phih ang ni. Ka thawmhnaw chu ka hlip sawk sawk a, a rim chu ka hnarah a cham rengin ka hria, ka ṭah lah chu a han chhuak em em khawp a, thin a rim et et bawk.

Towel ka ken luh loh avangin Naomi chu ka au a, min chhang lawk lo. Sangsangi ka au leh a, "Towel min lo pe teh, hmanhmawhin.." ka ti lang lang a, rei vak lo hnuah chuan veranda aṭangin min lo chhang a, "I dahna pawh ka hre lo," a ti maiin ka hria. Ka pindana a awm thu chu vin angreng deuhin ka hrilh a, a kal aniang min chhang loin a reh vang vang a, thlasik lai a ni bawk nen vawt duh tak a ni. A kal chhungin ka lu te chu ka han su leh rih a, sampoo a awm si lo a, inbualna sahbawnin ka su bawrh bawrh tawh. 

"I va rei..." Sangsangi'n a tih ri ka hriat rual chuan kawngkhar chu ka hawng a, kut ka lek chhuak vat a, towel min lo pek pah chuan, "William-a sil a ngai a nia, lo chhuak tawh rawh," a lo ti reuh a. "Engvangin nge khatianga i rawn theh ngawt a, naupang sual leh lutuk.." ka han ti zui hlak a, a nau te an awm ve aniang an phun ser ser thawm ka hria. 

Hmanhmawh duh lem lo chuan ka han intleuh leh zet a, a khat tawkin ka uak leh ṭhin, ka pum lamah min vilh a, ka fai tawh viau a ka hre chung pawhin a rim chu ka la hre reng a, ka dik hleithei lo.

"I zo dawn tawh em?" an rawn tih leh rual chuan ka hawng ve nghal a, ka hma takah an unau thum chuan an lo ding a, ka melh tur viau ang chu. 

"Kalsawn la, William-a mawng kan sil dawn," tih pahin Sangsangi chuan min melh kal a, Williama hmel ka en chuan a mittui a tling pam a, a u Naomi lamah a tawlh hrat hrat a, han hauh nek ka duh laiin eng thil emaw hian min dang tlat a, inbengdaih rih ka ngaiin ka hria.

Bathroom-a an luh hnu pawh chuan ka la ding ve reng a, kawngka bul aṭang chuan an insilfai lai chu ka en a, Naomi'n tuiin a lo phuh a, Sangsangi'n a nau chu a sil thung a, William-a erawh a u dar vuanin a inhup ṭut ṭut a, ka lam a lo hawi leh zawk ṭhin. "I pi khawiah nge?" tia ka zawh chuan, "Kan hre lo," Sangsangi'n a lo ti bul hmuk a, "Dawrah a kal aniang," Naomi'n a lo tih laia a melh zawk pawh chu ka hmu reng a, Sangsangi hi a naute hian an hlau ve hle anih hmel.

"I pi pindan kha tifai ru aw, in thiam loh anih vangin ka pui dawn lo che u a nia," ka ti a, min en dan a dik lo laklawh a, a tir aṭanga ka nem duam reng chuan mi an zah lo telh telh dawnin ka hria.

"A vawt ania..." Williama'n a ti chu, "Awm ṭha la, ka zo vat mai dawn alawm," Sangsangi'n a lo ti hlur a, a nau inhup ṭut ṭut chu ngaithei loin a kut a phih thlaksak sawk a, ka awm vangin Williama chu a zak aniang, keipawh chu ka kalsawn ka ringawt a. Kan pindanah lutin ka va inthlak a, an thawm ka ngaichang ve reng bawk.

Alan-a ka call a, "I lo haw dawn tawh em?" ka va tih chuan, "Ka la hman lo deuh, thil in ei tawh em?" a lo ti var a, kan ei tawh thu ka hrilh laimekin naupang ho lo lut thawm ka hria a, "Williama kha.." tia a rawn ṭawng leh chu, "Lo haw hma tum teh," ka ti ta thlawt a. "Ka nu a awm lo em ni?" a tih pawh chu chhang loin, "A theih anga rangin lo haw rawh, naupang ho nen chiah kan awm a, a buaithlak," ka ti zui a, "Ka rei tawh lo ang," a tih hnuah phone chu ka dah a, mi dang kianga a awm lai a ni si a, chanchin va hrilh chu a ṭha berin ka hre lo a ni.

Pindan aṭanga ka chhuak chu Naomi nen kan intawk hlawl. "Pindan intifai em?" awki pangngai thei ang ber chuan ka ti a. 

"Aw, Auin a tifai mek," tiin min kalsan nal nal a, a pi pindana a lut chu ka enzui reng. Heng naupangte hi engtia enkawl tur nge ka hre ta lo khawp mai, ṭhatnaa hneh theih ka inbeisei kha a ni a, tunah hi chuan a kawng a ping riauin ka hre mai, inlak fekfawn deuh a, thunun viau tur nge mawni tiin ngaihdan ka nei zui a, chu chu a ṭha ber angem ka hre lo, nuhrawn sual nih te hi ka hlawh mai lo'ng maw ka ti.

An awmna pindan kawngkhar chu ka va hawng dek dek a, Room spray rim a nam ram ram mai. Williama pawh a lo mu leh hlan tawh a, a u te pahnih erawh phone en in khum mawng lamah an lo bawk a, ka va dak chu min lo melh rang hle bawk. "I pa a lo haw ṭep," ka tih chuan, "A ho e a," pakhat zawk chuan a lo ti zauh a, ka zirtirtu nihna a lang ka ti mai, naupang ṭawngkam mawi lo hi dawnsawn har ka ti ṭhin.

Pindanah chuan ka lut a, "Sangsang.." ka han ti fiah fak a, a lo hawi leh rang khawp.

"Puitling biakna ṭha deuhin chhan ṭhin tur aw, naupang tê i la nia, i ṭawngkam a mawi lo deuh ṭhin, ṭha taka ka biak che a min chhan ṭhat duh loh chuan ka duat thei dawn hauh lo che ania, in laka ka ṭhat in duh chuan nangni pawh in ṭhat a ngai, mi tu pawh ṭhat leh ṭhat kan inlawm tawn ṭhin tur a ni," ka ti fak fak a, an unau chuan min en ṭhap a, tu man min chhang lo.

"I pa a lo haw ṭep, thil ka remfel dawn a, i nau khua a sik leh anih chuan min hrilh dawn u nia," ka ti zui a, ka ṭawng tawp lamah chuan ka awki pawh ka ti nem leh deuh a, an ngaiha sual nih ka hreh em vang a ni ang.

Pindan aṭanga ka chhuak chiah chu Sangsangi ṭawng thawm ka hria a, "A van sual reuh, anu ka hrilh dawn chiang khawp mai," a ti a, kal mai ka tum chu ka ding leh rih.

"Apa bulah a sawi chuan min vaw maithei ania aw.." ti tu chu Naomi a ni.

"Min vaw awm lo em mai, apa'n min tihduhdah a phal teuh lo, a sawi vek tawh kha, min tiduhdah anih chuan a ṭhen leh nghal dawn alawm," Sangsangi'n a ti leh a, ka thil hriat chuan min ti hamhaih ve deuh. Alana'n chutiang ṭawngkam a nei dawn em mawni, a fate hnem nan a lo sawi nge mawni le? Ngaih a ṭha lo dawn dawn mai.

Kan pindana ka luh leh hnu lawkah Nu Ngengpuii a lo haw a, "I pa a lo la haw nange?" a rawn ti lut lawng lawng a, pindan aṭanga ka chhuak chu, "An muhil em ni?" tiin min lo zawt bawk. "Muhil lo e," ka tih hnuah a pindan lam a pan a, a tute nen an inbe ri pawh chu ka hre pha a, ka chungchang an sawi lem lo. Choka lamah pheiin a chawhmeh lo hawn chu ka va dah fel a, a lo chhuak leh chu thingpui a duh em ka lo zawt thuai a, a in zawh chiah thuin min chhang a, a ṭawng tlem ve angreng si a, han biak zawm dan hi ka thiam ṭhin lo.

"Tlai chu eirawng ka lo bawl dawn em niang?" Min rawn melh ralh a, "Maian i bai thiam em?" a tih chuan ka lo aw rang khawp a. "Ka maian lei kha ka thar vak lo a, buh tlem i thlak dawn nia, a chang chawr hi chu buh nen a tui deuh," a ti ve luam a, a la hma deuh nain lo inhmakhua a ṭha ang tiin fridge-a ka dah luh chu ka va la chhuak leh a, ka hik nghal mawlh mawlh bawk.

"Mapuia hi a rawn tlai dawn em ni?" a tih chuan kan inbiak thu leh a lo haw ṭep thu ka hrilh a, ka bula chair-ah chuan lo ṭhu vein ka maian hih lai chu min lo pui a, min en duh riauin ka hria, eng mah sawi lem loin min en leh ṭhin.

A hnu deuhah chuan, "In lei kan tum kha a hrilh tawh che em?" a ti ta khauh a, eng mah chutiang thu ka la hre hauh lo.

"Eng mah a sawi awm ka hre lo, khawia in nge lei in tum a?" ka lo ti deuh hluai a.

"Khûtah, Jail veng lamah daih a nia, a fal angreng lutuk a, ka iai ru khawp mai, a in phei chu concrete in chhawng hnih lai chu a nia, a hmun ber khu a ni, ṭhenawm hnai pawh kan nei lo ang," a ti nuah nuah a, eng mah hre ve lo ta chuan sawi tur ka van ru khawp mai.

"Sak thar em ni?" ka tih chuan, "Ni lem lo, a awm hmasate vai ramah an insawn dawn a, kan lei dawn anih chuan Kolasib-a kan inpui pawh tih ral mai a ngai ang, Mapuia hlawh ringawtin a daih si lo a, loan lak te kha a sawi a sawi a," a tih zawm a, a awmna veng a sawi dan aṭang chuan ka phur lo ve nghal ngawt pek a, khawpuia seilian tih takah hmun fal leh reh lutuk hi ka ngaina lem lo, ka chhungte hnaiha awm loh pawh ka hlau ru deuh.

Dar 3 pelh hretah Alana chu a lo haw a, eirawng ka lo bawl mek a, ka nu erawh inbual turin a lut chiah a, an pa lo haw thawm hriain naupang ho an lo chhuak thuai bawk. Eitur chi hrang hrang a lo hawn sak a, ka rinai takin naupang ho chuan an lo lawm thiam. "Duty ka ngai rih lo i ti ve sia, i kal leh daih a," Sangsangi'n a lo ti nang nang a, Alana chuan a fanu bianga piai zauh pahin, "I nau eng nge a an, i lo awmpui em?" a ti zui a, Sangsangi'n an mutpui reng thu hrilhin a ek pawh a then vek thu te, a nau mawng pawh a sil sak thute a lo hrilh zung zung a. A pa chuan a fak ve hlut a, Sangsangi hmelah chuan intithei hmel ka va hmu thei.

Williama pindana an lut chu an thawm a ri nak nak a, rei vak loah Alana chu lo chhuak lehin ka lam a rawn pan a, "I buai em, tum aiin ka rei a, ka damlo enkawl ṭhinte an lo lut leh a, kei kher min be duh si a, ka awm rei phah alawm le," a ti sawk sawk a, ka bai chawk lai chu hnunglam aṭangin min lo kuah hlun bawk.

"Buai hran lo e, zanah kal i ngai dawn em?" ka tih chuan, "Ngai lo e, naktuk pawh ka la chawl ang, a tuk leh zan aṭangin ka duty ṭan tawh ang," a ti a, ka nghawng a rawn hnim dan dan mai. "I van rimtui ve, eng perfume nge i hman a?" a tih laichuan chhun lama thil thleng kha ka mitthla uar uar a, ka pum a let but but thei.

"Vawiin chu ka zia lo tak tak a ni," a lamah ka inher vat a, zawhna mitmeng ka hmu zui a, ka sawi mai dawn a, ka hreh deuh riau a ni, boruak ka ti chhe mai mai angem tiin ka ngaihtuah.

"Ka nu em ni?" a tih chuan, "Aih, ka nu chu a bazar daih, naupang ho zawk a nia, Williama'n ek a lo cheh a, va buaipui ka tum kha.." ka sawi lai mekin Naomi a lo chhuak a, a u in a rawn zui bawk. Kawngkhar bul aṭang chuan min lo en vang vang a, a nau chu a nam deuh dat a, Alana a hawi ve rual chiah chuan, "Nu, Williama'n zun a cheh leh a nia," Sangsangi'n a rawn ti ta mai a, ka phu deuh zawkin ka hria.

"Aw haw, ka lo thlak sak ang," tih leh Alana chuan kal a rual a, an pafa chuan pindanah an lut leh ta diak a, kei erawh ka la hamhaih viau a ni, tunah mai khan 'Nu' tiin min rawn ko anih kha, min ṭhawng, ka chhungrilah hian engtin emaw tak hian min ṭham a, ka lawm bawk. Naupang hi chu a rilru hneh a har lo, zirtirtu ka ni a, ka hrechiang a ni, an rilru a thianghlim tlat a, han lungawi lo ve deuh ṭhin mah se rei tak an daih ve ngai lo, an lungawi ve leh mai ṭhin reng a ni.

Sangsangi, a tawh khirh ber tura ka ngaih pawn min nu thei tawh anih chuan kan ṭha chho thei maiin ka ring, keipawn an zai ka ngaih ve deuh a ngai a ni, an rilru tur dawn pui chunga tih dan tawk ka thiam a ngai bawk. Lawm ru deuh chungin bai chu ka chawk mawlh mawlh a, ka hlim bawk aniang ka nui leh ringawt ṭhin. Alana lo chhuak leh pawh chu ka lo bengkhawn vat a, pawnah diaper a va paih te te a, a lo let leh chuan, "Na lo tein a khua a sik a, damdawi ka pe a, a kaw ṭha lo ber sawn a ti chau ve anih saw," a lo ti luam a, a kut sil laite chu nui pat pat chungin ka lo melh a, mak min ti hmel a pu.

"Eng nge a, nichina i sawi pawh kha sawi zawm teh?" a tih chuan lu ka thing ringawt, eng mah chu sawi ṭul ka ti tawh lo, ka sawi chuan a va hau emaw a nia nga, naupangte ka chungah an lawm lo leh mai mai zawk ang, heti hian kan ṭha zawk dawn a ang tlat.

"Bathroom-ah khup sawhin ka va tlu pek alawm maw le," tiin ka khup duk deuh ruih chu ka hmuh a, a chek hlak mai.

"I va sawh chiang awm ve aw, an inbual hian an tifai zui ṭhin lo a, i insawh silawng viau ang tih pawh a hlauhawm anih kha," a ti nuah nuah a, ka khup duk lai chu a han hmet vel a, a la na ve deuh nain a tir ang em em kha chu a ni tawh lo a, chet pui pawh a har lem lo.

"I ṭhut leh kal zawngten a na em?" 

"Na lem lo e, ka duk hma ve hrim hrim bawk a, rin aitakin a na lo," ka tih chuan thaw huai hmel a pu a, "Ngai serious vak duh mahta che," ka ti leh chu min rawn pawm chawih mai. "Serious e, i tawm zawng tea a na zel anih chuan engtin nge zanlamah kan awm ang," a ti deuh sar sar a, min ti lai ram ram. Ka hmuiah a rawn fawp zauh a, a nu inbual zo a lo chhuah avangin kan inthlah leh vat thung.

Thim hlimah chaw kan ei a, chawei laichuan in lei tur chungchang kha ka nuin a lo sawi chhuak a, keipawn zawhna ka lo zawt ve mawlh mawlh. "Kan la inbe rem chiah lo a, kan in lei duhte lah chuan mi an lo zawt sek tawh a, ka nu berin thutlukna a siam fel chuan kan lei thei ve nghal a ni mai ang, a fal vang khuan i hreh mai mai a,  ahmun te chu ṭha tak a nia, kawt zawl a nuam si, pangpar leh thlai chinna tur duhthusam a zau a awm a, thei kung te pawh a awm sa nual, he laiah chuan garage pawh kan nei lo a," tiin a nu lam a hawi a, "Tunlaiah chuan mi hausa apiangin khawpawn lam an pan zawk tawh alawm, boruak a hrisel zawk bawk a," tiin a tuihnih leh a, keichuan ngaihdan neih thiam har ka ti ngang mai.

"A fal lutuka, mahni pawn kan awm ngam nang, zan duty i nei ṭhin bawk si a," a nuin a tih chuan, "Mahniin i awm dawn hleinem, hei Ruatbawihi a awm tawh hi, " Alana'n a lo ti then a, ka lam an lo hawi vangin ka lo bu ve nghat.

"Nang hi engtin nge ni ang, chhunah i chhuak lo ang ti raw, naupang kan awmpui tawh dawn anih chuan i hna pawh chawl mai la ka va duh ve," a ti leh ta khauh mai a, Alana pawh a ṭhawng ve deuh aniang a nu chu a melh vat a, sawi mai tur ka hre lo.

"Ran te kan vulh dun ang chu ka lo tia, nitin chhuah ve tho i ngaih chuan ka ko a rit dawn em mai, ka hrisel ṭha tawh si lo," a ti zui niah niah a, ka rilru a hrethiam aniang Alana chuan, "Chulam chu kan sawi ṭha leh dawn nia, eng mah thu tlukna siam vut vut theih a nih loh hi," a lo ti vat a. "Mi i tur sek alawm maw, kan in pui kan hralh dawn anih chuan hmanhmawh a ngai alawm," a nuin a tih leh pawh chuan a sawi zui tawh lem lo, ka hna chu thawk nghet ka ni tawh chungin hlawh a la tam em em lo a, hna nei lo han nih tlawng erawh ka hreh ve deuh a ni.

Chaw kan eikham chuan Sangsangi te unauin an seng a, han puih vak pawh an ngai lo, pakhatin thleng a sil a, pakhatin a lo phiat a, chawhmeh ṭhing ka lo chhuanglum thung a, an tih tur an tih zawhah an pindan lam an pan nalh a, zanriah eikhama han ṭhut khawm pawh an ti ve ngai lem lo aniang ka nu pawh a pindan lamah a lut zui mai a, keini nupa erawh kan bungrua remin kan buai dun viau thung.

Kan mut ve hman meuh chuan dar 10 a lo pel tawh, Alana inbual chhungin bed sheet thar ka lo phah a, a inbual zo lo lutin a hmuh chuan a nui deuh var var a, inha tawh lem loin khumah chuan a mu zui a, kei erawh kawngkhar vel check pahin choka lam light te chu ka va off a, a vawh em avangin ka inbual tawh lem lo a, ka va insil ringawt thung.

Veranda-a ka awm laiin Rampuii nen kan inbe zawk a, ka hna chungchang leh ka pasal nu duhdan te chu ka hrilh ve luam a, ani chuan ka chhungte duhdana awm mai chu ṭha a tih thu a lo sawi a, "Hna thawk turin an tir lui lo zawk che a, i hahdam a ni mai alawm, ka ui viau na chein i chhungkua kha ngaipawimawh ber la a ṭhain ka hria, a mo hmasa kha pawn lamah a tal tam a, a vengthawng deuh tawh te pawh aniang," a lo ti siam siam a, ka rilru pawh a hmîn ve ta deuh.

Inhmangaih leh induh tak chunga innei kan ni bawk a, nupa nunah pawh kan inlungrual khawp mai, nupui leh pasal kan nihna anga kan chanvo chu kan inhlan tawn a, zan hun nuam tak kan hmang dun ti ila a dik ber ang chu, hmangaih leh duat takin min kuah a, kan hma hun tur atan duhthu te sam dunin zan hun kan tum tawi a, kan muthilh ve meuh chuan zinglam a ni tawh.

Chhun lamah ka nute kan va tlawh a, ka nu lah chuan min hmuh rualin min lo tir zung zung a, chawhnu pum deuh thaw chu a pangpar pot ka chawi kual sak a, kan haw te chu ka sil ve urh thei. In kan thlen chuan tumah an lo awm lo a, "Wiliama an va dah phei dawn aniang, bazar ringawt an rilruah a awm a, an nu zin hawin a rawn sawm anih kha," Alana'n a tih chuan Mary chu ka nu nen an inkar a chhe lem lo anih ka ring a, zawh chian pawh ka chak viau. 

"In inṭhen tirhin ka nuin engtin nge a ngaih?" ka ti tawl a.

"An inbe lo reng a; mahse, naupang ho vang hian inbiak loh reng theih a ni lo a, Mary a lo piangthar ve bawk nen.." ka lo nui deuh hak a, "Ka nu hi a sakhaw mi ve a, Mary hian a zia a man khawp mai," a ti zauh a, kei chuan a tu pawh mai hi an zia a dang riauin ka hria a, chenpui ṭhan te an nih loh vang a niang.

Inbual nghal mai ka tum laiin ka pasal chuan min lo va luh khalh thurh a, "Inbual dun ang, i hnung ka lo hnawhsak ang che," a ti mauh mai a, tu mah an awm lo bawk tiin ka hnial duh bik lo.

"Hna chu chawl turin min duh deuh em?" ti a ka zawh chuan, "I thu thu a ni mai, ka nawr hran lo che a nia, ka nu hi chuan chawl la a duh a, mahnia awm a zuam vak lo anih hmel, khawhar deuh hian a awm rei ve tawh a," a ti bul bul a, ka chhan mai loh vang chuan lo sawi zawm lehin, "Ka day off ah te hi chuan ina awm dun theih pawh a ṭha khawp mai, chhun lama i chhuah ve leh si chuan kan inhmu khat dawn riau," a ti zawi leh ruih a, rilru ka siam fel thei tain ka hria, an hnathawk lo chiauau ringawt pawh mipa hi chuan an thlahlel ṭhin, ka hlawh aiin kei min thlahlel zawk niin a lang bawk a, a lawmawm tho mai.

Kan inbual zawh hnuah ei ka rel a, chawhmeh ṭhing rin tur a tam vangin han siam duah pawh a ngai lem lo. Sangsangi te pitu pawh an lo thleng thuai a, eng eng emaw an lo khai haw ṭeuh mai. Dawhkanah chuan an dah a, an ri deuh laih laih a, ka nu chu a mo hlui chuan kawr a lo hawn ve niawm tak a ni, a duhzawng a ni chiah lo aniang, "A rawng ziar zuar hi ka ha ngam dawn em mawni, inkhawm pui chi pawh va ni suh," a ti nang nang a, ka va en chuan kawr hring, tle deuh zar mai hi a ni a, a mawi fu mai, silk puan a ni a, a man pawh a tlawm lo ang. Ka nu chuan min hmaizah ve a ni ngei ang, "Ka hak pawh ka ring lo," a ti leh zauh a, min melh zuk zuk mai a, "A mawi lutuk alawm, i inhmeh viau ang," te chu ka tih ve kha, a mo hmasa nen an la induhsak hmel nasa mai si a, khaikhin hlawh mai te pawh ka hlau deuh.

Williama a nu bula a han awm takah chuan a u te pahnih pawh an kal zut reng a, inah an awm hman meuh lo. Ka nu nen kan awm dun chang a tam a, tih tur vang lutuk ber hi hrehawm ka ti ṭhin, Rampuii a lo leng ve zauh zauh a, ka cousin te erawh an reh khawp mai. Chaw eikhawm hi chu an rawt ṭhin a, Alana'n zan lam duty a neih lai anih vangin aw kan la pawh thei lo a, chhunah a lo mu duh ṭhin nen, thil tih khawmnaa tel nuam ti chi a ni lo bawk a, ani phur lo chung chung han kal pui chu ka tan a nuam bik lo.

Christmas hma deuhin Kolasib lama kan inpui chu an hralh fel a, in lei tur an hualsa pawh chu an be nghal thuai bawk a, kum thar hmain zuk chei ṭhat a, kumthar veleha luah luh kan rilruk a, a bang rawng hnawih leh tih tur neuh neuh a tam a, ka nu nen rawng te pawh kan va leidun nghe nghe.

Urlawk zanah chuan naupang an riak bo diak a, ka cousin-te an lo kal avangin bathlar thlang lamah ar kan hem a, kan ri ve laih laih reng. Dar 10 dawna u Sena lo thleng chuan Red Wine a lo keng a, inchhunga in ka phal loh vangin pawnah u Muani hoin an thli a, ṭhenkhat an lo rui sa phual bawk nen kan thawm a ring leh mah mah ṭhin. 

Keimah chauha ka awm chu mi an lainat hlawm khawp a, ngeiawm lek leka min fiam tawk pawh an awm. "In pa chu an nu hlui te inah a kal daih a ni lo maw?" u Muani'n a tih chuan, "Dar 11 velah a lo haw ang, zanin chu damlo na deuh an nei a, a ṭhianpa a pui rih anih kha," tiin ṭha deuhin ka hrilh a, a ṭhianpa Faka nen hian an duty hun an siamrem ṭhin a, naktuk tlai lamah ka nu te ina len kan tum vangin Faka a thleng hma ve thung dawn a ni.

Chutia arsa ei paha kan lo rik laih laih laichuan ka nu zaikhawm bang a lo haw hlawl a, zanlai inkhawm tlang tura a insawi vangin ka hamhaih angreng hle. Min lo thlek thuak a, eng mah sawi lem loin a lut leh mai thung a, midang ho chu bengchheng lo turin ka lo khap zung zung. Mahse, u Hruaia leh a ṭhianpa rui chuan pangpar pot an nek tlu ta hlauh mai a, a keh phawk mai. Kan thawm hriain ka nu chu a lo chhuak zui a, a pot keh a hmuh chuan u Hruaia chu a melh ngur mai a, tu mah chu ṭawng ngam kan awm lo.

"Zu in in e lo, in va rawn la lut ngam zawk ve, mi ina khawsak dan tur a ni em?" a ti khar khar a, u Hruaia ngawt chu a la melh.

"Ka pi, kan in ve lo, keini chu in sain kan lo kal," u Hruaia'n a tih laichuan u Sena a lo nui ruh ruh a, ka nu chuan a lo hmu rang khawp. U Sena lah chuan dispo cup a lo la vuan mek a, ka nu pawh chuan a hai lo khawp mai.

"Haw vek rawh u, vawikhat mah zu rawn keng lut tawh suh u," tiin ka lam a rawn hawi zui a, "Haw rang rawh u," a ti leh ṭhat a, keimah min tihna emaw tih tur khawpin min melh chik a, min hnawt chhuak em mawni ka ti rum rum hial. Midang chu an tho sang sang a, "Ti ru, Sena te inah phei mai ang u," u Muani'n a tih bak chu ṭawng leh an awm lo.

Keipawh ka tho ve vat a, inchhung kan luh hnu chuan u Sena'n, "Lo phei ve daih ta che, in pa kan hrilh anga, a lo lam mai dawn che alawm," a ti ru sar sar a, min lainat hmel a pu bawk. "Ka nu kha a chhuak leh maiin ka ring, in nghah ka ngai ang," ka ti ve tlat a, Alana pawh a lo haw har tawhin ka ring lo. "A zahthlak e, Ruatbawih...kan lo leng mai mai tawh lo ang, nangmah i lo chhuak tawh mai aniang chu," ti a u Muani min biakna erawh ka chhang lo.

An kal liam hnu chuan phur lo zetin ka lut a,  pindan lam pan tlang mai ka tum chu ka nu lo chhuak ka hmuh vangin ka ding leh rih. "I  u te an ni lawmni?" a ti a, a awki chu a vin lem lo.

"Ni e, a zia lo tak tak a ni.."

"Nidangah chuan ching tawh lo se la, inchhung a ti zahawm lo ṭhin," a shawl bah ṭhat mawlh mawlh pahin a ti a, nichin lawka a landan nen chuan a hrang leh hlak tawh.

"An ti tawh lo ang, an inthlahrung khawp ania anmahni zawk kha" choka lam a pan zui a, keipawh inpetruh ṭeuh chungin pindanah ka lut a, ka thaw huai huai tawh. Alana ka text a, ani lah chuan a lo haw mek thu leh Traffic jam-a a tan thu a lo sawi a, kawn chei fang an tam viau a ni awm e.

Kan ar hemna hnawk vel te chu ka va senghawi leh rih a, ka nu pawh a kal chhuak leh tawh. Chhungkaw group lam aṭangin noti a rawn thleng ṭak ṭak a, fiamthu ti tak deuh deuhin ka cousin-te an lo rak a, min mention laih laih mai.

"Ruatsangi chu lehkha pe thlapa sawm chhuah a ngai ang, thuneitu sang hnena thlen ngai chi,"

"Zanin angah te chuan indah zalen ve deuh la, chhiahhlawh lakthar ang mai, tawm chawt reng mai," 

"I fate pawh an awm chuan loh kha, lo riak phei rawh, kuahlum tur pawh i neih chuan loh kha," tih angreng a ni.

U Hruaia'n, "Mami, i khua a har chuan lo phei rawh, in pa ka lo be dawn em niang?" a rawn ti bawk a, "A lo haw mek, nuam deuh khan lo hmang rawh u, naktuk tlaiah chaw kan lo ei phei ang," tiin ka chhang a, "I nu pot man kha kan lo thawhkhawm ang aw," u Zara'n a ti erawh ka chhang let duh lo, a rui em a, a tha a na leh tawh aniang.

Alana lo thlen laichuan thingpui ka lo chhuang mek a, a rawn hawi phawk angreng khawp mai. "Khawiah nge midang chu, an lo leng i ti emaw ka tia?" a tih chuan ka tum deuh bar a, "Eng nge a awmzia, message-ah khan ka cousin-te an lo kal i ti sia, ka lo ngaihṭha awm viau mai asin," tih leh ka lam rawn pan a rual a, hnung lam aṭanga min lo hlun pahin a thil khai lai chu ka hmaah a rawn lek a, momo la lum vat vat a ni, a han lei tam em em khawp a.

"A va tam ve, kan ei zo seng nang?"

"Aw, midang an awm i ti sia lawm,"

"U Sena'n Wine a lo keng a, pawnah sawn an in pek alawm, u Zara te ho rui sain an lo kal bawk a, Lalhruaia a lo nawi leh pek nen ka nu pot an ti keh a...a zia lo tak tak a ni, ka nuin a haw tir hlawm," a lo chek hlak a, "Ka nu ṭhin hi chu.." a tih laiin, "Eng mah sawi leh chuan pawh a ngai tawh lo, ka u te ho pawh an thiam bik lo, awm khawm hlek tawh chuan in an tum zel a, u Muani te ho lahin khap tum a hnekin a phur phurah an ṭang a, tikhan an lo kal leh hunah awmdan an thiam tawh anga a ṭha mai," ka lo ti duah a.

"A hau leh nek lo maw, an zia an hre awm si lo a..." a ti vang vang a, "A vin angreng," ka tih chuan a ner sawk a, khak duh kher lo turin ka hrilh nawn leh.

"Sawi ve reng reng a ngai, ṭum dangah pawh a ni ziah, thil zuar lo kal te hi, 'Kan duh lo' tih pah hian kut a lo vai khum kher zel a, miin chapo an tih sup sup tawh hi, chhungte pawn hau turin min ti fo alawm, ama lamah erawh han huat tur em em a ti hi a ni ngai bawk si lo a, a buaithlak tak tak a ni," a ti nuah nuah a, "I bulah ka zualko emaw a ti palh ang e, thil dang vang a nih loh chuan ka u te kha chu sawi mam sak an ngai lo a nia," tiin inthlak tura pindan lam a pan chu ka au zui a, min chhang ri ka hre lem lo.

A lo chhuah leh chuan phone a rawn hmang chhuak a, "Naupang ho an mu tawh em?" ti a, a biak chu an nu hlui a ni ngat mai, ka hriat laia a bia chu lawm tur nge lawm loh tur ka hrethiam chiah lo, zep loah chuan ka duh aiin an inpawh, an intlawhpawh nasa si a, engtia zingin nge an inbiak ṭhin ang tih te ka ngaihtuah bawk.

"Naktuk tlaiah chaw eichhuahna tur kan nei a, duh leh naktuk cham rawh se, a bak chu a rem tawh lo ang, nang pawn chintawk nei la a ṭha, in pahnih an kartawn hi ka duh chiah lo a nia, Rinsangi phei chuan i u zia a la lutuk tawh, a ṭawngkam te kha i u ṭawngkam a nih kha, awm dun tam lo teh se," a ti bul bul a, thingpui chawi chunga ka va kal chu min lo ban rang hle bawk.

"Kan nu leh ka nu an awm ang, ka duty ka ring, in theih loh chuan ka nuin a lo lam thei tho alawm," a ti zung zung a, lehlam ṭawng chu ka hre riai ruai a, a sawi tak erawh ka hre pha lo. An inbiak zawh chuan ka biang a rawn fawp zauh a, "In nu em ni?" ka ti chu a duh lo khawp mai.

"Kan nu chu ka kuah mek hi," tiin min melh run a, ka nuih ringawt.

"Mary u chu tu nge?" a sawidan kha mak ka tih deuh vanga zawt ka ni.

"Kha kha maw, Lalrawngbawla a nia, awm ṭha duh lo ve deuh mai, drugs a vawrh ṭhin a, jail pawh a lut zeuh zeuh, tunlai hi a dry lai aniang an inah sawn a tawm ve chawt a, naupang ho hian an ngaina angreng si a, Sangsangi pawh hian a ṭawngkam lak a nei zauh zauh mai, Williama nen phei chuan inawm tam lo sela ka duh, a nih loh chuan a zia an entawn mai ang, pawisak nei vak lo mi a niin ka hria," a ti dap dap a, han ngaihruat dan vak pawh ka thiam lo. 

"An lo haw dawn maw?" ka tih chuan, "Naktuk chu an awm leh rih ang, keini chawei chhuah kan tum bawk si a," a ti a, "Naupang ho nena kal pawh a pawi lo asin," ka tih chuan lu a thing mât mât a, a fate vang hian ka chhungte lakah a inthlahrung tlat a, ka pa bulah phei chuan, "Naupang an lian tawh a, ka nu a awm bawk a, Ruatbawihi'n a buaipui vak pawh an ngai lo ang," a lo ti kha a nia, kei hi chuan a fate nena inpawh taka awm a, kan in lama chaw va eipui te chu ka phur zawng tak a ni thung a, a hrethiam lo mai mai a ni.

Christmas tuk chu a reh ruih mai hian a hriat a, ṭhenawmte in lam ṭanga zaipawl zai ri chuan khua a ti har zual bawk. Ka chhungte biain chibai ka va buk ve thlap a, nizan lamah u Hruaia te ṭhian hoin an sa chhum an lo ei zo deuh thaw a, ka nu chuan a lawm loh thu a lo sawi bawrh bawrh a, "Inkhawm banah lo tlang nghal mai rawh u," tiin min chah bawk a, ka pa lo ṭawng ve chuan, "Naupang an awm lo i ti em ni? I nu amah chauha kalsan chu a va fuh awm lo ve, lo hruai ve mai ta che u," a lo ti a, kan inbiak zawh hnua ka nu ka zawh chuan a lo hnial rang hle thung a, lenna tur a lo nei niawm tak a ni.

Inneih hma deuh khan kawrthar ka lei nual a, Christmas kawr pawh ka lei hran tawh lem lo, kan nupaa kan hman dun hmasak ber a ni bawk a, phur takin Biak In lam kan pan a, inkhawm ban thleng chuan ka nu chu ka hmu zui tawh lo thung. Alana chuan, "Kohhranah a tal tam ve a, ṭhian a ngah khawp mai, a ngaihtuah awm loh ani chu," a ti sam et a, in kan thlen hnuah inthlakin kan inzui chhuak nghal a, kan in kan va thlen chuan mi an lo awm nual a, thingpui an lo in a, ka pa ṭhiante an ni.

Ka pu Zauva, kan kohhran upa a lo awm ve a, inneih lawmpui nan cheng 2000 min pe teh nawlh a, Alana chu an be bawrh bawrh bawk a, ka nu hoin ar te kan puah a, han inneih fel takah chuan ka nu pawn Alana chu a ngaina ve mai a niang, a be sawm peih viau a ni. 

Zan riah kan ei laichuan naupang chungchang an sawipui a, ka chhungte pawn ka rilru ang tho an lo pu ve a, "In lo kal leh hunah chuan naupang pawh lo hruai tawh rawh u, chhungkua vek kan ni tawh alawm, kan tute an ni ve tawh a, kan hmu chak viau bawk ania," ka pa chuan a ti charh charh a, Alana pawh a lawm ve khawpin ka hria.

An inkhawm kaltur rualin keini pawh kan haw phei a, keini erawh kan inkhawm ve tawh lem lo, Alana hi kohhran lamah a inhmang lutuk lo a, a sawi dan chuan kolasib lama an awm laikhan a inhmang ve deuh a, hetia aizawla a awm hnu hian a hna ten a lo zir deuh bawk nen a tel tam thei ta lo a ni awm e. Zan lamah ei ka rel lawk a, ka nu inkhawm bang a lo haw chuan ka lo inrel zo diam tawh. Ka chawhmeh siam te chu a en dan dan a, a lungawi bawk aniang eng mah a sawi lem lo. Zingah naupang hruai an tum vangin kan mengrei lo a, dar 10 velah kan mu fel der mai. 

Alana leh ka nuin naupang chu va lam an tum a; mahse, an insiam lai mekin kawt kaiah Bolero var a lo ding a, ka va chhuak hmasa ber nghe nghe. Naupang ho an lo chhuk a, 'Apapui' tia an koh driver chu Alana sawi Rawngbawla kha a nih ngei ka ring, pa lianpui, hmai ruhrel hrawl angreng zet, chal arh deuh mai a ni a, a mitmeng aṭang pawhin pa zaidam zawk zawk a ni lo ang tih chu a hriat theih. Min lo en deuh vang vang a, chutih laiin Sangsangi'n motor hnunga an thil dah a lo hrilh mawlh mawlh a, "Min lo hruai leh dawn kha aw, i lo kal loh vaih," ti a an chah chuan, "I nu dil rawh u," ti maiin a lo chang a, lo luh a tum lem lo aniang motor-ah a ṭhu lut leh nghal a, sawm tak ngial pawh ka sawm hman lo. Alana lo chhuak vein naupang ho thil lo hawn chu a rawn khailuh sak a, an thawmhnaw leh dawhthlak tih angreng a ni. 

Naupang ho lo haw chu an ṭawng duh hlawm khawp mai, saw lama an pi leh pu ten an lo duat viau a niang, an pi leh pute thil leisak chu hahipin an sawi a, pocket money lah chu an lo pe hnem angreng a, ka nuin, "Naupangin pawisa kawl loh tur," tiin a chhuahsak hlawm a, an lawm vak lo.

Chritsmas tuk aichuan a khawhar thlak loh ta deuh, inkhawm tura kan han kal ho dal dal te chu a nuam ve riau a ni. Mi biak seuh seuh hi an la nei lo a, ka be lui ve hram hram thung a, ka zawhna chin min chhang tih loh hi chu hmeichhe naupang te hi chuan min be mang meuh lo. Williama erawh a u te aichuan tih a nuam deuh a, a thawhlawm tur ka pe te pawh lawmthu min hrilh ve thlap a, a nungchang a zawiawi bawk nen ka ngaina ber ti ila ka sawi sual lo ang, min lawm lo hmel a pu ngai lo a, a zakzum deuh em aw tih tur a ni thung.

Hun nuam tak chu kan hmang ho ve a, engkim tak meuh hi thil thar a ni a, rin lawk dan thiam a harin inhmakhua dan vak pawh hi ka thiam ṭhin lo. Ka nihna anga lan tawp duh mi ka ni ṭhin a, chu erawh ka pasal nu leh a fate lakah ka tilang hreh leh lawi a, ka theihtawpin nelawm leh ngainatawm nih ka tum ti ila a dik ang chu. 

Chumi tlaia ruai kan ṭheh zo kan haw leh chuan insuk tur tlem ka dah chu ka su a, machine-a ka nuai chhungin pindanah phone ka va charge a, Rampuii nen rei lo te kan inbe bawk. Bathroom luhna bik pheikhawk kan neih avangin hetia pindana ka luh chhung hian ke lawngin ka lut a, ka va chhuak lehin bathroom kawngka bul maia ka pheikhawk dah va bun ka tum chu ka rak ṭhat mai! 

Ka ke hnuai chu a thip zawk a, ka khai kang rang viau bawk, ka han en chuan perek hmawr a lo bet ran a, ka rap tlum chiang viau a ni, na em em phei chu ka la hre lo a, han phawi nghal mai erawh ka ngam lo, a thip deuh veng veng a, ka pheikhawk lah chu ka keah a tang chat a, dawhkan lamah ka bai phei a ni ber.

Alana ka au chul a, pawnah motor a tihfai lai a ni a, naupangho nen an awm a, ka au ri a hre lo aniang min chhang thei lo reng reng. Ka pheikhawkah vuanin vawi leh khatah ka'n pawt thla hlawk mai a, a thip zawk. Perek chu inchi chanve vel anih ka ring, ka ke hnuai pawh a thi ser ser mai. Chutah, chhuat ka han rap leh tur chiah chu a na ta vawt vawt mai a, a tira na mai lo ka tih kha ka la phawi loh vang a niang chu ka han phawi takah chuan kal zawngin a na ngawt ngawt tawh. Ka nu lo lut lah chuan min melh zawk a, ka bai deuh tih chu a hmu lo nge ni min zawt lem lo a, thingpui thliin dawhkan a kil a, min ngaihven hmel a pu lo.

"Perek ka rap alawm maw le," tih paha dawhkana perek ka va dah chu, "Khawi a mi nge, inah perek kan kawl hleinem, khawlaia mi i rap tang a ni lo maw?" a lo ti mai si a, chutah chuan mak tihna ka nei ta chiah a ni.

"Bathroom slipper ania ka bun, nichin mai pawh khan ka la bun a, pindana ka luh dawn khan ka phelh chauh kha a nia, ka va bun leh tur khan ka rap teh thut a, a mak hle mai!" ka ti a, ka rilru a buai map. 

"Pindana ka awm chhung khan mi an lo lut em mawni?" ka ti leh rawk a, ka nu chuan min melh phawk khawp mai. "Eh, chu...mi tih anih i ring e lo?" phawk angreng zeta a tih vang chuan ka inthiam lo leh deuh a, "Khawi ami nge mawni ka rah ni?" ka ti niah niah ringawt.

Chutih laia Alana lo lut chu, "Pem thar damdawi kha han la rawh, hei innu hian parek a rap palh anih hi," a lo ti nghal thuai a, Alana chu a bucket khai lai nen a lo phei rang khawp. "Khawi a mi nge i rah a?" tih leh ka ke chu rawn en a rual a, thi dal angreng deuh hi a luang ve ngiai a, a thip tawh lutuka ka rap ngam ta meuh lo.

"Kan silfai dawn nia," tiin ka pasal chu a che zung zung a, damdawi leh a tuamna turte a rawn la a, tuilumin min silsak thlap bawk a, Naomi leh a nau lo lutin min lo kil ve ran bawk. Ka ke a tuam mawlh mawlh laia Sangsangi lo lut chuan tui no sen a rawn keng lut a, ka rilru dik lo kal sual laklawh nge ka ringhlel ta tlat mai nia, a chhan pawh a tuino ken chu pindana ka luh hma lawk khan ka la hmang a, tunah a lo keng lut anih si chuan ka kalsawn hlanin bathroom-ah a lut tihna a ni, ka ngaihtuahna zet chu aw, sawi chhuah chi a ni der si lo a.

"Tikhan lo chawl der der rawh, Sangsangi te unauin insuk chu an tleuh thiam alawm," Alana'n a ti pawh chu ka chhang mai lo, choka lama Sangsangi phei chu a au zui a, "Hei, i nu ke a na a, Naomi nen insuk kha tleuh mai rawh u aw," a ti a; mahse, ka nuin a lo chhang let thung, "Ka ti mai ang, an tleuh fai zo lo ang," bul angreng taka a rawn tih chuan rilru a nuam duh vak lo. 

Ka chet hleihtheih tak lohah chuan sitting room-ah ka ṭhu chawrh chawrh a, ka nu lah chuan insuk a tleuh bakah hmun te a rawn phiat a, a nuam lo ru tak tak a ni. Alana hna kaltur insiam a hun tawh vangin pindanah ka insawn a, a insiam pahin min be mawlh mawlh a, "I ke ana bawk si a, in i lo nghak mai ang a, duh leh ka nu hoin naktuk chu naupangte nen picnic hisapin kan zuk kal a nge," a tih chuan ka bangbo hu mai.

"Eng maw in tih dawn?" 

"In chu kan zuk en ang, rawng an hnawih ṭan dawn alawm," a tih chuan ka hrechhuak leh chiah.

"I night dawn sia, i chau lutuk ange, ka theih hunah te kal zawk ila," ka ti niah niah a, a ngai ho angreng khawp mai, "Zan hnih thum tlaivar chang kan ngah alawm, kan lo haw har lem lo ang, chawhma vel bak chu kan thang nang, chawhnu lamah ka mu hlek hman ang," a ti liam puat a, in lama lo awm bik chu ka hreh ru hle thung.

"Min lo thlah duh suh, mu mai mai rawh," a tih tlat avangin ka thlah ta lo a, naupangte pawh an pi hoin an inkhawm diak a, mahni a awm reng chu khua a har a, Rampuii lah a inkhawm ve tho si a, biak tur ka hre lo chuan movie ka en a, ka entui angreng fu. An inkhawm bang thawm ka hriat rualin ka chhuak phei a, thei leh thei loin ka va bai phei suih suih a, mi hi an bengkhawn lem ṭhin lo a, an mahni tlei tlei hian an tlei vek a, va biak lumlam vak hi an har ṭhin.

Ka nu chu thingpui a duh em ka zawt a, "In tawh lo ang, mut lum hnua thawh a peihawm tawh loh," a ti teh tlawng a, thlit ka tum uk tawh chu ka ṭhulh leh. Williama tv en lai chu a au zui a, "Ka bulah mu rawh aw," tiin a sawm a, "I phone ka khawih ang," Williama'n a lo ti ve zat a, Sangsangi te unau erawh ka chhuah rual khan an pindan lam a pan nghal a, an ṭawng thawm erawh hriat tur a awm a, ka ke a na vei bawk nen ka va ngaihven ta lo ngawt a, an mengrei reuh khawp mai. Mut hmun aṭangin an thawm ka ngaithla ve pah reng a, dar 12 dawnah pawh an la ṭawng a, phone an kawl em mawni ka ti rum rum.

Ka ngaichang a talangin ka muhil thei lawk lo a, ka muthilh chuan dar 2 a ri tawh ang. Thawh ka hai chiang khawp a, ka harh meuh chuan dar 8 a lo pel tawh a, ka chhungte chuan chaw an lo ei fel der tawh. "Min lo kaitho mai lo a," ka tih chuan, "I mu thei lo anih ka ring a, i khua te a sik em?" ka nu chuan a lo ti ve khauh a, min ngaihsakna awka han hriat chu a nuam ve reng mai.

Ka zia viau thu ka hrilh a, ka ke erawh a vung deuh ul tawh a, choka thlenpui pawh a har lam mah a ni. Naomi chu a piin chawei min siamsak turin a tir a, ngawi rengin a rawn siam mial mial a, ka phone min laksak tura ka tir erawh a lawm vak loin ka hria, a ner zauh lai ka hmu hman. Kan pindan lam a pan a, Phone keng chunga a lo let leh pawh chuan min en ṭha duh vak lo. Alana ka call zui a, "Chaw lo ei rawh u, ka hman ṭep e," a lo ti zung zung a, a buai lai a niang a biak rei hman loh.

Mahni eina takngial pawh ka han tifai thei lo chu a ni a, mo thar tirhah inthlahrun a na duh teh e. Ka pasal lo haw pawh chu ka lo ṭha en vel a ni ber. Chaw a bar hlek a, an insiam zui mai a, naupang ho lah chu an phur khawp a, eitur pai tur mawlhin a rilru a kap a, Williama lahin a nerf gun lian zet chu ken a tum bawk a, a piin a vin khar khar reng.

Ka kal ve chak khawp mai a, motor-a lo ṭhut mai mai a pawi ka ti lo maw le. Alana lah chuan, "Lo mu hahdam la, a la ṭawp angreng si a, nidangah i kal mai dawn nia, i ke pawh a dam har lo ang, lo dim rih rawh," a ti sam mai zel a, ka lungawi ve leh mai bawk. Mahse, an han kal liam chu ka ruak huai mai a, ka chhungrilah hian mal intihna ka nei ru rauh rauh a, hetiang hian ka la awm ngai lo, ka chhungte ka ngai a, ka u te leh ka cousin te thlengin ka ngai fai vek a ni ber. Ka nu ka va bia a, pangpar pek tur leiṭha leiin a lo chhuak daih a, ka nu lehzel a han biak theih loh chu rilru a hnîm veng veng mai a ni.

Ka mu chawrh chawrh a, pang a kham deuh hunah ka ṭhu a, ka mu leh ṭhin a, a ninawm tih piah lam a ni e. Dar 1 rik dawnah ka chhungte chu an lo haw a, an chau deuh nge ni nuam ti hmel an pu hlawm lo. Ka pasal pawh a inbual zo a mu nghal hmak a, heti reng anih dawn chuan hna ban chu ka ngai takzet zawkin ka hria, chhungkaw boruak ka han thlir a, nu uapna an mamawh zia ka hai bik lo a, ka pasal tan hahchawlhna ka siam a ngai hle bawk, rilru ka siamfel a, ka dam zan tih chu keimaha a thawh dan a ni.

A tuk lamah chuan ka nu leh naupang ho an kal leh a, pangpar an keng thla nual bawk a, an piin a lo chhawr deuh aniang chu an kal peih tawh loh thu chawei laiin an sawi sap sap a, "Inrinniah kan kal leh dawn nia, pangpar te kha damdawi pek nghal an ngai ang," a piin a tih chuan Sangsangi a lo ner nang a, "Inrinni chu ka lo kal ve thei tawh ang," ka ti chu min chhang hlawm lo. Alana lo haw chu inrinnia kal ve ka tum thu ka lo hrilh a, a lo aw ve mai bawk a, chumi kar chu in lamah ka tawm chawt thung.

Inrinni a ni a, kan chhungin in thar lamah chuan kan kal a, rawng pawh an lo hnawih zo diam tawh a, a thar vuk mai. Ka beisei aidaihin a lian a, pindan awl a tam bawk si a, naupang ho pawn pindan hran ṭheuh an nei thei dawn anih hmel. Kan nupa room tur chu inchungah a awm a, bathlar zau deuh a nei bawk a, kawt zawl lah a zau ṭhain huan lamah thei kung puitling sa a awm nual a, a fal deuh nain duhthusam a ni. Inchung zawl ka han en chuan pangpar an lo hung nual tawh a, pot ruak leh lei nawi tih angreng hnawm hnawk a la tam a, ka nuin pangpar chinna tur raise bed te a siam bawk a, Sangsangi te unau nen kan pui a, kan buai ve khawp.

Alana leh hnathawk ten ram tui pipe na tur a buaipui laiin kawt zawlah thing hnawk te chu ka lo hal a, khawnvartui a awm si lo a, a alh ṭha duh lo khawp mai. Hnathawk pakhat lo kal chuan, "Rawnga kan pawlh bang thinner a awm asin, inchhungah sawn bang chhak lamah kan dah," a lo ti hlauh a, bai suih suih chungin ka va la a, ka hal alh hluah a, inchung lam aṭangin Williama'n min lo thlir dauh dauh bawk.

Ka hal zawh hnua thinner bur dah let ka va tum chu step ka rap chiah tihah engthil emaw hi chunglam aṭangin a rawn tla ri dawp mai a, ka hmaah tak a rawn keh darh chuai a, ka tlu ṭhelh nghe nghe. Rang zetin ka han hawi chho a, tumah ka hmu lo, step-a pot tla darh chu ka en vut a, tlem a tlemah ka thi lo chauh, pen khat pawh pen leh hman ila chuan min tlak ngei ang.

Chutah, inchunglam ka han hawi leh chuan Sangsangi pil zawk chu ka han hmu hman a,  a ti lui tih ka chiang ta khawp mai, ka sa nghal bulh mai a, rang lutuka thoin Sangsangi chu ka au zui bawk. "Lo dak teh, ka hmu che ania, pot hi i rawn thlak em ni?" ka ti vin tuarh a, Naomi leh Williama chiah an rawn lang a, Sangsangi erawh a rawn lang duh eih lo, ka thinur zual sauh a, henu hi engtin emaw tih a ngai, enliam chi a ni dawn hauh lo mai.

End of chapter - 3