I NGHILH ZAWK ANG (CH - 4) by Ahmangaihi violette khiangte

I NGHILH ZAWK ANG

by Ahmangaihi violette khiangte

Chapter - 4

"Naom, i u kha ko teh, ka ṭawng a hre lo em ni?" ka ti vin ṭhat a, Naomi chu a inher a, ka lo ngaichang reng a, Williama pawh a hawi let leh ringawt ṭhin.

Rei dawn ka nghah hnu chuan ka dawhtheihnain a tlin ta lo, hmanhmawh deuhin in chhung lam ka pan a, in hnuai lama ka nu thawm chu ka hre thuak a, zai a play vangin ka au thawm kha a hre lo a ni ngei ang. Step-ah chuan ka pen chho hlawk hlawk a, hah nen, thinrim nen ka sa pup pup thei mai.

In chung zawl ka han thleng chu ka pen tawp chat a, anni pawh an phu ve zuk. Sintex bulah chuan an unauin an lo ding a, min lo en ran, Williama tawlh hnung hrut hrut ka hmuh chuan ka thaw hawk a, chutah Sangsangitê chuan, "Hlau suh William, engtin mah a ti lo ang che," a lo ti pek a, a ṭawng duh dan kher chu ka helh tawk a tling. Ni e, a nau chu engtin mah ka ti dawn lo, a sawi dik, amah zawk hi engtin emaw ka ti dawn khawp, a nu angin min ngai lo eng ang mahsela a pa nupui ka ni ve tlat, mi zah lo viau tur a ni lo.

Ka pan hnai a, a hmaa ka va din rual chuan a chemkawm ken laichu a hum ran mai a, kut thawh mai duh tur hmel a pu te chu ka duh hauh lo. A kut aṭang chuan chemkawm chu ka phihthla nghal sawk a, ka kut lehlamin a darah ka hmer chawt bawk a, ka hmer na deuh maithei, ani pawh a ṭhen sawk mai.

"I awmdan hi ka duh lo tawp mai, naupang tiin ka enliam hram hram che a, kut thawh zawnga i che hi chu ka enliam dawn hlek lo che ania, pot kha i rawn thlak lui ti raw, ka luah rawn thlak i tum em ni?" ka ti khar khar a, ka ṭawng chu a sehchilhin ka khur deuh lek lek.

"Naom, Api zuk ko rawh," tih leh a nau chu nam a rual a, Naomi tlan nghal mai tum chu ka pawt let rang khawp mai. An unau chuan  ka chelhbet ran tawh a, ka lawm lo telh telh, tih ngaihna a vang si, kutthlak em chu ka duh si lo.

"Khatiang kha i ti leh dawn em Rinsang, insawithiam pawh i tum loh danah hian i tilui chiang a ni, han sawi teh?" ka sawi nghal nawk a, "Ana min thlah rawh," a lo ti ṭeu hlar a, ka hmer na tawh khawp mai.

"Ka pheikhawka perek lo ti burtu kha i ni bawk ti raw, min tihnat hi i lo tum reng a ni maw?" Ngeng ngalh hian min melh a, hlau hmel eih pawh a hmelah chuan hmuh tur a awm lo.

"Ṭawng rawh, min thah pawh i pawisa lo a ang riau, i mitmeng te chu, i kawchhungah hian ramhuai a awm em mawni zawk le, naupang khawsak phung tur a ni lo reng reng," Min la chhan loh fo avang chuan, "I sawi dawn nange? Min chhang vat rawh," ka ti vin leh tuarh a. Chutah, "Min thlah rawh misualnu," tih leh ka ban rawn chum a rual a, ka chelhna aṭang chuan a tal pit zui a, tlan chhiat a tum emaw ka tih laiin leia ka chemkhawm paih kha a chhar a, min tin ur ur anih chu, rapthlak ka ti ngang mai!

"I chem kha dah rawh," au ring tak ka ni.

"Ka sat che a ni mai, min tihdan hi apa ka hrilh vek dawn," a ti a, min la melh rum khar khar.

"Engvanga min haw tlat nge maw i nih reuh le, ka tihduhdah awm che ka hre bawk si lo, i mak mange," ka ti teh thlawt a, ka hrethiam lo takzet.

"Naomi kha thlah nghal rawh, anih loh chuan ka sat dawn che," min rawn tin uaih uaih a, thih thaa ṭan tum awm hrimin a che chu a mak, naupang mai mai tih chi ni pawhin ka hre tawh lo.

"Naom, i pa emaw i pi zuk ko rawh?" ka ti hul hak a, tih ngaihna ka hre lo, Rinsangi awm dan hi rawn hmu sela, annin zilh zawk sela a ṭha ang.

Naomi chuan a nau banah a kai sawk sawk a, hmanhmawh deuhin in hnuai lam a pan pui a, Rinsangi erawh a la ter at reng. "Kan nu pawh i ni lo, i thu thuin min awm tir suh," a ti leh reuh a, "I va han nasa tak e aw," tih bak sawi tur ka hre lo, ka en tlawk tlawk ringawt.

"Ramhuai pai min tihte kha ka hrilh vek ang," a la ti zui a, ka beng nek zawk dawn em mawni.

Chutih laichuan inhnuai lamah thawm a awm a, Naomi chuan a pi a au lang lang a, kawt zawl lamah mipa ṭawng thawm a awm bawk. Hmanhmawh deuhin railing lam chu ka pan a, ka zuk hawithlak chuan tui pipe siam ho kha an lo let a, Alana chu koin, "Lo chho teh," ka ti a, engthil emaw a rawn sawi chu ka bengkhawn lem lo, "Hmanhmawh rawh," ka ti leh a, ka kalsawn zui a. Rinsangi lama ka let leh chu ka tum loh dan deuhin a lo awm pek a, min ti hamhaih angreng. A chemkawm a paih a, a kut lehlama a dar chulin a men ṭiau a, a insut faih faih nia! Eng nge a hriat?

"Em em che hian...." ka ti tlawk tlawk. A mitah chuan mittui a tling pam a, hnuai lam bih zuiin min melh duh tawh eih lo.

"In unau chungah hian rilru chhia ka pu ngai lo asin, i awmdan ṭha lo te pawh inchhirna i neih a, i sim dawn anih phawt chuan ka ngaidam thei che a, chutiang ni loa suahsual i chhuah anih erawh chuan ka dawh mai mai dawn lo tih hre thung la, phakar chhuah hlek suh ang che," ka ṭawng mawlh mawlh laichuan step-a lo pen chho thawm ka hria a, step lam chu ka melh vat a, rei vak loah ka nu Ngengpuii leh Naomi an lo lang a, ka nu chu a rawn hawi phawk hle bawk.

"Engthil nge a?" a rawn tih rual chuan Rinsangi chu a lo insut hlawp hlawp a, a tihdan mai mai chuh, thin a tirim leh hlur tawh.

"Engati nge Sangsang?" tia a pi lo kal pheiin a zawh chuan a dar a dawm vang vang a, kei chu min hlauh hmel deuh hian min lo melh a, a han sawi ngam lo der vel em mawni.

"Ruati, eng thil nge in tih a?" ka nu'n a ti chu ka chhan leh hmain thawm dang a lo awm a, step lam kan hawi ṭhap a, Alana te pafa an lo lang ve hlawl bawk.

"In chungah in lo awm ṭhap a ni maw?" a lo ti a, ka hmel a hmuh chian rual chuan hamhaih hmel a pu chawpchilh a, "In hau in va ang ve?" a ti zui zat.

"Ka hre bik lo hei, ka lo zawt mek a," ka nu'n a tih leh laichuan Sangsangi chu a lo insut leh faih a, "Rinsangi chu engati nge?" tih paha a pa lo kal phei chu ṭap pur chungin a lo en a, "Ka hau anih kha," ka lo ti mawl tawp.

"Engati nge i ṭah a, nula i nih tawh kha?" ka pasal chuan ti lehin ka lam a lo hawi zui a, sawifiah turin min duh, a mitmengah a lang reng mai.

"Sangsangi awmdan hi a dik miah lo ania, mi a ngaithei lo tlat, a mi tihdan te hi naupang tiha mawi lo leh awm lo lutuk a ni," tiin in hnuaia ka kal laia pot a lo vawm thlak dan te chu ka sawi zung zung a, ka rilru a na ve deuh aniang chu ka tawt ru ṭun a, Sangsangi inhru mawlh mawlh chu ka va melh leh ṭhin.

"Chutiang chuan i ti em ni?" ka nu'n a tih chuan Sangsangi chuan lu a thing rang nasa mai, "Sawichiang rawh?" a pa chuan a lo ti chang bawl a, chutah ka lam lo hawi leh zetin railing awmna lam chu a kawk a, "Sawtah sawn dah kan ka tum a, a tla palh," a ti mauh mai a, ka lo ner nak.

"I tih palh a nih loh tawp kha, ka rawn chhoh pawhin chemkawmin min ti ur ur a ni lawm ni," ti a ka lo chhang chu min han melh rum leh tawh khawp a, "I duh leh midang pawh kha zawt ve ta che, min rawn puh nghal ringawt anih kha, Naomi te pawn an hmu ve vek," a ti ṭeu hlar a, "Vin suh," tiin a pa'n a lo khap vat.

A pi lam hawiin a men pur a, "A lo chho a, ka darah na deuh deuhin min hmer a, min hau nghal ringawt anih kha," a ṭap chu a ni zui leh der. "Naom, sawi ve ta che," tiin a nau chu a la vin zui a, a ṭah ṭawng zuah zuah te chu ka ngei ru khawp mai.

Alana chuan Naomi chu a va melh a, Naomi lah pek chuan, "A ti tla palh a," a lo ti zawi sep a, ka ngaihdan a ni vak lo. "I tihpalh anih chuan engvanga ka koh che khan lo kal duh lo nge i nih? I tihpalh anih thu pawh i sawi miah loh kha, i awmdanin zir sela chuan..." Alana min en dan vang chuan ka tawp dat a, "Thil thlen dan i hmu ve lo mai mai a ni, chemkawm nen min lo nghak ran anih zawk kha, a tihpalh nise a lo insawifiah thei reng alawm," tiin dar ka kan ak a, "Min sah pawh a hreh reng reng lo ang," ka ti leh kher.

"In hahthlak em mai, nufa innih hi hre ta che u, mi dangin an lo hre ve reu reu ange?" ka nu'n a lo tih vang chuan ka sawi zawm duh tawh lo.

Ka pasal chuan min ring lo hmel a pu lo a, a fanu lam hawiin, "Dawt i sawi em?" a ti leh ngat a, pakhat chuan, "Dawt ka sawi lo, Naomi pawn a sawi vek kha, amah khan ramhuai i pai te min tia, min au khum vak vak," a ti zawt zawt a, a ṭahbelhzia chu aw, nichin lawka a huaisar tehlul nen, mize pahnih a nei anih te ka ring.

"I dar chu a na viau em ni, nula i nih tawh kha, hote teah ṭah tur a ni hleinem," a piin a tih leh chuan Sangsangi chuan a dar a dawm vat a, "Chutin ka hmer na viau lo, a lo awm danin a zir lo em alawm," ka lo ti ve chu ka nu chuan min melh rum hrak mai. 

Alana'n a nu awmdan a hmuh rual chuan, "Khua a tlai dawn, chhuk ang u," tiin min rawn mitmei a, ka eng tih tha mah a tho tawh lo. Ngawi rengin step lam ka pan a, ka kal liam dawn a Alana'n Sangsangi a be ri chu ka hre pha, "Puitling hmaah awki vin hmang tawh lo ang che, dawt i sawi tih ka hria anih chuan a pawi viau ang?" a tih chu chhanna a awm lo.

Inhnuai ka thlen hnu rei vak loah an lo chhuk a, motor-ah kan lut nghal sap sap a, kei a hmaah ka ṭhu a, an pitu chuan tawt deuhin a hnungah an ṭhu a, tumah kan ṭawng tawh lo. Alana'n min biak pawh chuan a rul tawk chauhin ka chhang a, ka nu ngawi reng chuan awm a ti nuam lo takzet.

In kan thleng chu kan nupain pindanah kan lut tlang a, "I thinur viau em ni a?" ti a min zawh chuan tlangtaka sawi pui a ṭhain ka hria. Inbual tuma a inthlak chu, "Lo ṭhu phawt teh, sawi tur a tam," tiin khum lamah ka ko phei a, a lo ṭhu ve mai bawk.

"Sangsangi awmdan hi a dik lo, i enzui a ngai ania, naupang nungchang mawi a nei lo reng reng, hlauh leh hreh nei ang pawhin a awm lo, rilru lamah harsatna eng emaw a nei a nih te ka ring rum rum ania," ka ti a, ka hmuh dan dik tak pawh a ni.

"Engtin chiah nge maw in lo intih le, nang lah chu i lawm lo em em mai bawk si," a ti niah niah a, "Lawm loh lam a ni lo, a awmdan hi a fel lo ka tihna zawk anih chu, min hua anih pawhin ka hrethiam lutuk, a nuhrawn ka nia, a dinhmun pawh ka thlir sak ve bawk alawm, a mizia leh chet dan zawk hi a ni buaina chu, hetiang hi ani ang rual awmdan tur a ni lo," ka ti leh bawrh bawrh a, han sawifiah chiam dan pawh ka thiam lo.

"A luhlul rual hi a ni ve tawh a, tih a har angreng khawp mai, anni ang rual hi chu..."

"Alan, zirtirtu ka nih hi, nitin naupang enkawl hi ka hna a nia, an zia pawh ka hre ve viau asin, Sangsangi hi chu a case a dang," min en deuh vang vang a, a hrethiam zan lo tih a lang.

"Eng i sawina nge?" a ti ta reng a.

"Rilru lam damlohna a nei niin ka hria," a nui deuh lek lek a, "Ka uang lo ania, i chik deuh a ngai a ni, kan chungkaw boruak vang pawh hi a lo ni thei a, a chhan chu engpawh nise a tlai hma hian enkawl a ngai ang," thutak zetin ka ti a, min hnial hmel ka hmu lem lo.

"Ka va be ve reng reng a nge," tia a tho zui chu, "Hau vak kher lo la, zilh a mamawh zawk ania," ka ti leh a, min chhang tawh lem lo.

A chhuah hnu chuan thawm a reh vang vang a, ka ngaih ṭha lo deuh chu thawm dim deuhin ka va chhuak, chhak lam pindana an ṭawng ri chu chiang mang lo deuhin ka hre pha a, ka pan hnai thuai bawk.

"I ti lui nge ti lui lo?" Alana aw a ni.

"Khatin vin vak zel lo la, engmah i hrechiang bik pawh a ni si lo," lo titu chu ka nu aw a ni thung.

"Ramhuai i pai te min ti a, hetianga min tih hi i phal a mi?" Sangsangi'n a ti veleh a, a ṭah aw leh ṭuau tawh.

"Phal lo e; mahse, i dik lohnaah chuan ka ṭan lo ang che, i nu a nia, in lakah rilru chhia a pu lo, a thin i ti rim anih chuan ngaihdam i dil ve mai tur a ni, ka sawi awmzia chu i hrethiam em?" Alana aw chu a muangin a nghet charh mai a, chhanna erawh a awm lo thung.

"In sual anih chuan a zilh che u anga, a hau bawk ang che u, in fel erawh chuan a duat hle dawn che u tih hria ula, fel deuhin awm tawh tur aw, i nu hi mi sual a ni lo ania, nangmahni hi inpawimawh, naupang sual chungah tumah an fel thei lo, naupang fel chiahin duat an hlawh ṭhin," a ti leh charh charh a, ka tan chuan a lawmawm ve duh takzet, rilru pawh a dam huaiin ka hria.

Eirawng ka bawl a, ka nu leh Alana lo chhuak pawh chuan engmah an sawi zui tawh lem lo. Alana chu a inbual a, ka nu'n eirawng min lo bawlpui bawk a, ka lakah a lungawi zan lo nge ni kan inbe tam lo khawp mai. Dar 6 bawrah zanriah kan ei a, dawhkan kan kil ho lai pawh chuan kan boruak chu a rit churh mai a, naupang ho lahin chaw an eitlem si a, chung vangte chu aniang ka nu chu a tum bur reng a, a tu te ho thawh hnuah, "Zin san chi pawh inni dawn em mawni?" a ti hlak a.

"Zin i tum em ni?" ka lo tih chuan, "Bungrua a zuk lak a ngai a, kolasib lama kan chhungten an lo pui mai ang, kei ka hman dawn si lo a," Alana'n a lo ti thuai a.

"Kal pui i duh em?" ti a ka zawh leh chuan, "I kal vein naupang tu nge awmpui ang, in inngeih lo nghal ringawt mai si a, ngaihngam pawhin min zin tir dawn hleinem, " a ti leh bul bul a.

"Khatiang chang te kha chu a awm ve ang chu, vei zui chiam tur pawh a awm loh kha,"  Alana'n a tih chuan, "Sangsangi hi ka hruai ve zawk dawn em mawni," ka nu chuan a ti leh hram a, "A pawi hleinem, a chak viau ang," Alana'n a lo ti mai si a, keichuan engmah ka sawi ve tawh lo.

Kumthar ni chu kan inkhawm ho leh dal dal a, zan lam pawh kan nupa chuan kan inkhawm ve a, midangin in an lo nghak thung. A tuk ruai ṭheh niah erawh Alana a duty vangin chhun lam chauh ka inkhawm a, zan lam chu inah meilum aipahin tv kan en a, naupang ho erawh ṭhenawmte nau birthday lawmin an chhuak bo diak a, a khawharthlak angreng. Ka nuin min lo call a, "Lo leng phei ta che u, hei i u ten ar an hem a, an awmkhawm laih laih asin," tiin lengah min lo sawm a, Alana ka hrilh chuan, "Ka chau em mai, mut hma ka duh," a ti tlat a, ka nu chu be lehin kan theih loh thu ka va hrilh a, min lo hrethiam ve khawp mai.

Sangsangi'n kolasib-a a pi a zui tur chu Naomi'n kal ve a chak khawp mai a, a pi chu a dil ṭhin a; mahse, a pi chuan, "I awm loh chuan i nau a khua a har lutuk ang," a ti tlat a, Sangsangi lah a phur em em thung a, tukṭhuan eikham aṭangin a inpeih at tawh.

Naomi titau deuh chu bazar a duh em ka zawt a, min chhang ṭha duh vak lo. "Thil tui deuh kan ei dawn nia, 5D en te i chak em?" ka tih leh takah chuan a phur ta khawp a, "Baskin robbins-ah kal ang aw, Willliama a kal ve dawn em?" a ti ta siam siam a, kan pathuma kan kal tur thu ka hrilh chuan phur deuhin a nau a va ko a, a pi te kalchhuak tur pawh chu a ngaihsak vak tawh lo.

Sangsangite pitu chu dar 10 velah an chhuak a, Alana motor-in driver an ruai a, an lo haw leh hun tur an sawi lo a, ka nu chuan cham rei ve deuh an tum thu chauh a sawi. An liam fel hnu lawkah keipawh ka insiam a, ka insiam zawh chuan Naomi ka ko a, a nau a lo inthlakpui ve mek a, "Kan hman ṭep," a lo ti lang lang a, an ni pahnih hi chu an tihmawh hran lo, ka biak pawh hian ṭha takin min chhang mai zel a, hunte han hmang ho tam deuh ila min ngaina ve thei maiin ka ring a ni.

An inpeih hnua kan han inzui chhuak chu nufa tak tak hi kan angin ka hria, rilru hian a pawm khawp a, a nuam pawh ka ti. Anni unau chu inhnaih chetah kalin ka hmaah an inzui det det a, "Kal chak suh u, motor en ula," tia han hrilh te chu a eng emaw tih nawm ve riau zel.

"Au, khawiah nge kan kal dawn a?" Williama'n a tih chuan, "Ice cream kan lei dawn, hmana kan lo hawn ang che kha," Naomi chuan a ti ve vat a, christmas-ah engmah ka leisak ve lo bawk a, vawiin chu an eichak apiang leisak ka duh.

Ice cream dawrah chuan ka luhpui hmasa ber a, an duh ber ka thlan tir bawk a, a tui pawh an hre khawp mai. "Puarna a tling lo em mai, thil dang eichak in nei em?" tia ka zawh chuan, "Keichu ka ril a ṭam lo," an ti ve ve a, kawngsir footpath-ah chuan in hnaih deuh hian an ding dun a, an ice cream chu an ei mial mial bawk.

"5D va en ila," ka tih leh chuan Williama a phur khawp mai a, Naomi erawh chuan a chak vak lo a nih hmel.

Taxi phar tur ka zawng a, ka melh kual vel laichuan Naomi ṭawng thawm chu ka hria a, "Willie, anu bulah sawi miah suh aw, anih loh chuan min hau hrep ang," a lo ti reuh a, ka va lehhawi zawk a, hnung lam min chhawn avangin ka en tih an hre lo, William-a chuan a chhang lo a, a u Sangsangite lo haw hun tur a zawt let thung a.

"Ka hre lo, an awm rei dawn aniang," Naomi chuan a ti mai a, "Apiin a phone a keng daih a, phone en tur a awm tawh dawn lo asin le, apa'n a phone hman a phal ngai bawk si lo, " Williama chuan a ti nuah nuah a.

"Nu...T...i ta i hmang dawn nia, inah a awm reng dawn alawm," Naomi'n a tih chuan keimah min sawina ti ka hrethiam a, ka hming a sawi dan erawh a mak riau, ka hrechiang lutuk lo bawk a, hming lamtawiin engtin emaw a sawi a, TF tih angreng, ka hrechiang chiah lo. Chutih laia Taxi ruak lo tlan chu ka lo phar vat a, naupang ho chu ka au zui bawk.

Taxi-ah pawh chuan an ṭawng dun melh melh a, mi an ngaihsak vak lo a, ka va hawi apiangin an ṭawng zawi deuh ṭhin bawk a, min hmaizah ve nge ni, min hlau deuh hmel an pu a, min en danah pawh min la nel tehchiam lo tih a hriat theih. 

3D, 5D tih vel hi ka ngaina ve lo a, BP su nasa ka lo ni vei nen ka lu te hi a hai hma khawp a, hetiang ka en ve hi chuan ka chau deuh nghulh zel. 5D chhuahna dawr bul lawk chu u Hruaia ṭhianpa te dawr a ni bawk a, chutah chuan ka lo nghak a, an unauin nupakhat leh a fate rualin an lut a, ka nghak rei ang reng, ka nghah chhungin coffee no thum zet ka in hman a, ka puar ul mai.

An lo chhuak chu an rawn khi chhuak var var, ka awmna lam an lo pan ve nghal mai bawk a, nuam an ti tih chu an hmelah a lang reng mai. "A hmuhnawm em?" ka tih chuan, "Williama'n a hlau lutuk a, ka kawr a pawt chhe ṭep alawm, dino khan a seh dawn emaw a tia, a mawl ania," Naomi'n a lo ti zung zung a, "I mawl zawk, ka zun a chhuak ka tia, a cup-ah min zuntir te a tum," pakhatin a lo ti ve hlak a, a zun a chhuak tak tak aniang a ding khawr ṭut ṭut a, rest room lamah ka kalpui leh te te a, a lo tlai deuh ta bawk nen thil dang pawh tih pui tawh loin haw ka rawt a, kan inbul dawrah chips leh eng ilo kamram vel ka leisak leh bawk a, a lungawi ve khawpin ka hria.

Thlen hnu chuan ka inbual a, eirawng bawl ṭan hmain Alana ka be bawk a, a lo haw hma tur thu a lo sawi ve khiah a, ka pa nen an inhmu bawk a ni awm e. "Damlo a rawn kan a, min lo call a, ka han chho alawm, a damlo hming kha ka theihnghilh," a ti bul bul a, ka pa chuan engvanga ko kher nge anih chu ngaihdan ka nei thiam, makpa doctor a nei a, a intithei ve a nih hmel e.

"Chawhmeh eichak i nei em, bawngsa ka lo kang dawn nge?"

"A tui hang hawp a chakawm alawm, lo chhum zawk la," a lo ti then a, Sangsangite pitu pawh an thlen tawh thu a sawi zui a, keiin kan chhuahna lamte ka hrilh ve bawk a, rei tak kan inbe lo.

Naomi tih tur hre lo tei kual sek chu ka au a, "Purun kheh ang," ka tih chuan a lo kal ve mai bawk a. Ka bula a lo ṭhu chu eng eng emaw zawh pahin purun ka kheh pui a, min chhang ve zel a, a sawi thui lo nain zawhna a chhang ṭha duh angreng a, a nu te chhunglam chanchin thlengin ka zawt.

"I nute inah chuan engzat nge cheng, in phei changin tu nge awmpui ṭhin che u?" tih angreng a ni.

"Api leh Pu Rb-a an awm ṭhin, apu chu office a kal a," a ti a.

"Anih i nu inah a awm ve ṭhin em?"

"Awm vak lo, a zin ngun a,"

"I pu Rb-a chu a rui ṭhin em?" min melh zauh a, ka dilchhut viau nain hmeichhe naupang an ni si a, ka ngaihtuah vang zawk a ni.

"A nghei tawh alawm, a rui ngai tawh lo," a ti a, purun chu a kheh zui mawlh mawlh.

"Hostel-a i luh hmain riah phei leh i tum angem?" ka tih chuan, "Ka hre lo, apa'n a phal leh phal loh a ni mai, anu hian min ngai ve sia, " a ti zawi sep a.

"Ka lo dilsak dawn che em niang?" a lo hawi chu ka lo nuihsang a, mak min ti deuh nge mawni tih tur hian min en a, ka tim leh angreng.

Ka zawhna chhangta lo chuan, "Au lo haw hunah kan phei dawn, Apa hi chuan min enkawl hman tak tak lo a, inah a awm tlem sia, anu bula awm hi kan tan a ṭha zawk, apa aiin kan hmakhua a ngaihtuah zawk alawm," a ti leh reuh a, ka ka deuh hau mai. 

"Chutiang a ni dawn em ni?" ka ti let hu, ka aw ah chuan nuihza vak lo aw a tel ang.

"Aw, apa hi chu zanah te hian a chhuak reng a, a hna chiah a ngaihtuah alawm, chaw kan ei te, kan mut te hi a ngaihven lo a, school fee pek bak hi a hre tak tak lo," a ti lehta zel a, naupang rilru atan chuan ka ringhlel lo thei lo, puitling tu emaw ṭawngkam sawi chhawng hi a angin ka hria.

"I pa chuan a ngaihsak lutuk che u alawm, zana min lo biak te hian in mu tawh em tihte min lo zawt ziah a, eng nge chhunah in ei te hriat a duh ṭhin a, chhungkaw chawm nan rim taka hna a thawh a ngai si a, kan vaia kan ei leh intur te, in luah man te leh in school fee tur te a thawh chhuah a ngai a, ngai em em chung cheuin a kal chhuak ṭhin alawm, zan pawh mu lo tein a duty a, a lo haw te hi a chau ṭhin teh asin, ngaihtuah ngai lo ang cheuin ngai reng reng suh u, khawvelah hian nangni aia ngaihtuah a nei lo ang, saw lamah in riah phei a phal loh chhan pawh a ngaih em vang zawk cheu a nia," ka ti sap sap a, Naomi chu a ngawi ran a, rei dawn a ngawih hnuah min lo enin, "Anih, nangpawn i nu i ngai ve ṭhin em?" a ti khauh mai a, minti bangbo reuh khawp mai.

"Engati nge min zawh?" ka tih chuan, "Kan inah i lo awm daih sia, i nu i ngai ve ṭhin lo a mi?" a ti leh a.

"Ngai ve tehreng mai; mahse, i pa nen kan innei tawh a, hei hi ka in a ni tawh alawm, nangni pawh ka chhungkua inni tawh a,"

"I nu pawn a ngai ve tho che em?" a ṭawngdan chu meinei deuh taka mi zawt a ni lo a, rilru thianghlim taka min zawt a ni, a nu a ngai tih pawh a hriat reng a, khawhar rukna nei te pawh a ang.

"Ngai lutuk ang, nute chuan an fate an ngai em em zel alawm," a purun kheh a zo a, ka lama lo nawr phei pah chuan, "Keichu kan in hi nuam ka ti ve lo, anu te in saw kan in ni zawk se ka ti, anu hian court-ah dil tawh se, min la daih se ka tia, Au Sangsangi hian a duh lo zel a.." a ti a, a hnuk a ulh ṭepin ka hria, a mitah mittui a de sar a, a meng sen deuh ram bawk.

"I u chuan heta awm a duh a maw?" 

"Anu bula awm a duh lo aniang, Williama nen chuan kan duh, apa hian phal sela chuan sawta school kal kan duh a, Hostel-ah kan awm peih lo zawk a," a ti leh a, hei hi chu Alana sawipui ngei a ṭhain ka hria, Hostel-a awm an lo hreh ngawih ngawih a nih te ka ring a, chumi avanga annu te in lam thlahlel ta pawh an ni thei, ngun taka ngaihtuah ngai thil a ni.

"Tunah chuan innghaktu ka awm tawh a, i pa hman loh chang pawhin ka ngaihsak thei reng dawn che u a, a nuam tawh dawn alawm; mahse, ka bula awm i chak loh hmel bik e...." fiamthu deuh taka ka tih chuan, "Chutiang pawh a ni lo," a ti ve vat a, min chhan dan chuan minti lawm angreng.

"Keichu heta in awm chuan ka lawm viau ang, thil tui deuh deuh eiho te, tv en hote, bazar ho te hi nuam ka tia, khuta kan in thar tur lah kha a nuam dawn bawk si, pindan hran te pawh in nei thei tawh anga, furniture mawi deuh deuh te kan lei anga in pindan ami tur..." min lo pawt chat a, "Mi hausa fa i ni tak tak a mi?" a ti mauh mai a, ka nui ṭep.

"Engati nge?" ka tih chuan, "Au Sangsangi'n Gold digger a ti che a," a tia, ka nui tawp chiang teh e.

"Mahse, gold engmah ka nei lo," tih pahin a mitah ka en ran a, "Au hi chu a sual ve anih hi, a chang chuan amah chauh hi hostel-ah dah daih se ka ti ṭhin a, min hau nasa thei lutuk a, ka lungphu a dik lo vek zel, api pawn i lung a chak lo a tia, inentir a ngai a tia, apa bulah pawh a sawi a, inneih zawhah a tia..min la entir chuang lo," a ti niah niah a, kan thil sawi a inpersan thui leh lutuk a, han sawi zui zel theih pawh a ni lo. 

"Entir vat a ngai a nih chu, i pa chu ka lo hrilh nawn dawn nia?" ka tihsak a, min chhang zui lem tawh lo.

Chumi tlai chuan kan pathum chauhin zanriah kan kil a, ka be deuh reng a, an mut dan tur te ka zawt a, Naomi'n a pi khumah an mut mai tur thuin min chhang a, Williama'n ka phone khawih min dil chuan, "Pindana i luh hma chauh aw, sitting room-ah i khawih thei ang," ka ti a, a bu ve nghat nghat.

Tv kan lo en ho laimekin Alana a lo thleng a,  a inbual chhungin chawhmeh te ka lo chhuansak a, ani inbual hi chu a han inbual rei lo thei khawp a, nikhatah vawi hnih a inbual ngei ngei thung. Chaw a eilai chuan ka ngaimawh deuh thil chu ka sawi chhuak a, "Naupang ho hi Mary-te inah phei tawh lo sela a ṭhain ka hria, helam hi nuam an tih loh phah mai mai thei, an nu kianga an awm tam vang hian nangmah an ngaihdan che a danglam ka hlau, inah i awm tam hman bawk si lo a, i awm lai ang tala hun inhman ho a ṭha bawk ang," ka ti dap dap a, min en deuh vang vang a, engtin phei chuan min hnial hran lo.

"Hna ka chawlh phei chuan ka kutah dah ngam la ka duh," ka ti leh a, a la ngawi reng.

"Hostel-ah an awm anih ngawt loh chuan hetah awm sela a ṭha ang, hetiang chuan annu thlakhlelhna an ngah lutuk dawn a, helam nuam tihna an nei tlem anga, nang i awm tam si lo, thil hrethiam rual an han ni chho ang a, hun hmanpui tam lo zawk na na na chu a rilruah kan lâng ru riau thei ania, kan lakah vuina an la nei mai ang tih te pawh a hlauhawm," ka han ti leh a, a hriatthiam theih dan ber tura ka ngaih angin ka sawi a, ka hriat ang zawng zawng phei kha chu ka hrilh duh lo, a thawkrimin a hah si a, buaina lo belhchhahsak ka duh lo va, inchhungkhur lam hi chu min ring anih phawt chuan ka enkawl ve theih mai ka ring a ni.

"Naomi chuan Hostel-a awm a duh a, Sangsangi hian a rilru a thlak reng a, a chhangin a duh a, a chang leh a duh lo va, Williama hi chu a tihluih theih viau zel," a tih ve takah chuan Naomi chu zawt nawn leh turin ka lo ti vat a, "Hostel-a awm nge a duh, heta kan hnena awm i thlan tir dawn nia," ka ti a, Hostel-a a awm duh anih pawhin keichuan ka hnial hran lo a, a nu bulah awm lo sela ka duh ber, Mary ṭawngkam neih dan tur chu Naomi thil sawi aṭang khan a chiang tawh viau a, a pa lakah a hel titih der chu a nih kha.

Mut hmain a fate mutna lamah a va phei a, a va titi pui ni ngei tur a ni. A lo let leh chuan khumah a rawn inthawlh vat a, "Naomi chuan duhdan vak a nei lo, 'Hetah pawh ka awm duh tho' a ti anih chu, Willie-a zawk hian a nu bula awm a duh a ang," a ti zuai raih a, "A lo sawi em ni?" ka tih chuan, "A pi leh puten an lo sawm a ni awm e, saw lamah a nutei fapate an awm ve bawk a, kawm tur a duh vang te pawh a ni ang," a ti leh halh a, mipa naupang tan chuan a thlakhlelhawm duh khawp ang, keipawn ka hrethiam khawp mai.

Zing hma takah ka tho a, midang an lo thawh chuan thingpui leh a hmeh tur te ka lo chhawp diam tawh. Naomi leh Williama dawhkan rawn kil chu, "Vawiin chu ka chhungte kan va tlawh ho dawn em niang, in kal peih ang em?" ka lo ti var a, an chak vak lo nge ni min en deuh ren rawn a.

"Thil tui deuh deuh te kan va ei dawn nia, ka chhungten an hmu ve chak bawk che u a, in lo kal duh angem?" ka tih leh chuan, "Min hria ami?" Naomi'n a lo ti khauh a, lu ka lo bu nghat.

"Va leng phei tak rawh u, ina tawm reng chu a ninawm duh em mai, kan in a vawt bawk si a, i nu te in chu a lum nuam deuh alawm," pa ber lo thoin a rawn tih vang chu nge ni hreh hmel an pu lem lo a, ka nu call-in kan len tur thu chu ka va hrilh thuai bawk.

Ka nu chuan, "Chhun thil ei hmanin in lo kal dawn nia, i u Sena chhuah rualin thingpui hmeh tuihnai deuh te ka va lei hmasa ang, workshop-ah a bike ka va lakchhuah pui lawk ange," a lo ti zung zung a, u Sena hi sawrkar office pakhatah mi ai a kal ve rih a, hna nghet a zawng pah reng bawk a, a hlawh a tam bawk si lo, a lakluh aiin a hmanchhuah hi a tam zawk a, amah pawh a la inchawm zo meuh lo a ni. U Hruaia thung erawh bank-ah a thawk mek a, a hlawh a tam ang aiin chhungkua hian kan chhawr lo a, inchhungkhur ngaihtuahna tak tak an neih loh vang nge ni ka u te pahnih hi hnemhnan pui vak tur an awm lo. Ka pa hlawh leh ka hlawh kha kan rin a ni mai ṭhin a, ka nu hian pangpar a hralhna aṭangin a la lut ve nual bawk a, chawm hlawm kan awm lo bawk a, khawsak nuam pangngai tak kan ni ve ṭhin.

Alana ka insiampui leh te te a, "Chaw in ei a ngem?" a tih chuan kan haw har loh tur thu ka hrilh a, "I nuin a lo sawm leh tho ang che u, in ei duh leh ka lo lam haw dawn che u nia, chanchin lo sawi la," a lo ti awlsam et a, min sawm ngei chu ka ring.  A kal tur pawh kawt thlengin ka thlah a, taxi-a a kal chu ka khawngaih angreng, ka scooty kha hmang an awm loh chuan la phei ila a ṭhain ka hria, a car awm loh chhunga a lo hmanah tal pawh.

Dar 11 pelh hret-ah kan chhuak a, in kan va thlen chuan ka nu pawh a lo thleng hlim hlawl a, dawhkanah pangpar pot a lo hung khat leh ṭun tawh. Naupang a hmuh chuan a lo be hlut a, "Mipatê hian a pa a chhun a nih hi, hei hi a té zawk kha a ni em, a hmelṭha reuh mange, a u a lo kal ve nange?" a ti zung zung a, a chibai nghal thuai bawk.

Eng nge a lei ka zawh chuan, "Cake ur mai ila ka tia, lei tur a vang lutuk a," a ti a, naupang eitur, chips leh theitui vel chu a lei ṭeuh a, cake ur a thiam bawk a, ei lohna a lo rei leh deuh tawh nen ka hnial lo khawp mai.

Eitur kan buaipui hmain green house-ah kan han chho a, naupang te pawn nuam an ti vein ka hria, strawberry rah ningnawi awm te chu an lo a, an nui ve hak hak reng. Kan chhuk leh hnuah ka nu nen cake ur turin kan buatsaih zung zung a, naupangte erawh tv en pahin ṭhutthlengah an mu dar dar a, Williama phei chu a lo muhil daih a, ka nu'n, "A thla a muang khawp anih kha, kai tho duh suh," nui chungin a lo ti a, thingpui in tur pawhin kan kai tho duh ta lo.

"Ka rin ai daihin in innel hmel hi a, an fel riau alawm hei, an nu tak tak te pawh i ang alawm," tia ka nu min fiamna chu ka nuih liam mai a, a bulah hi chuan boruak chhe lam hi thlen loh hram ka duh a, Sangsangi awmdan te kha hria se zawng a khu leh ruai tawh ang chu, mi hi a ngaihtuah em em reng a, hrehawm ka ti em tih ringawt pawh hi min zawt zing tawh.

Dar 2 velah u Sena a lo haw hlawl a, "Pi te an zin a, tih tur a awm si lo a, ka lo haw daih," a rawn ti lut phawr phawr a, a ṭawng thawmah Williama pawh a lo harh a, an pahnih chuan thingpui ka siamsak nghal a. U sena hi chuan naupang a ngaina bawk a, a be sawm peih khawp mai, Williama pawn a ngaina ve nghal reng a, thingpui in pahin an inbe bawrh bawrh reng.

"Damiena'n a lo be tawh che em?" Tv hmaa ka ṭhut laia a rawn tih chuan kan la inbiak leh loh thute, a hmel pawh ka hmuh leh tawh lo thute ka lo hrilh a, hman deuha an lo len khawm lah khan a rawn tel ve si lo a, Mizoramah a awm lo anih te ka ring kha ania.

"Delhi-ah a chhuk leh tawh, ka lo haw mai mai tawh lo ang a tih kha, a la na ve khawp mai," a'n ti zui a, a teh tawl ṭhin hian.

"Hmeichhe ṭhian i ngah kha, tih pui ta hlawm che," ka tih chuan a lo ner nak a, "Tihpui lam pawh a ni lo, hmuzo lo pawh a ni bik lo va, ngaizawngtute chu a nei ve reng alawm," a ti leh a, mi hi a puh deuh reuh ni tein ka hria.

"A leng senior reng anga ti nia," ka ti leh chu min chhang zui tawh lo.

Dar 3 pelhah kan haw a, Alana pawh ka va hrilh leh thlap a, ka nuin naupang eitur a lei ho kha min khai haw tir a, in thlen tirh aṭangin an ei mial mial a, zanriah an ei peih pawh ka ring lo. Ka eirawng bawl lah chu ka luak a chhuak ut ut reng a, vawksa rep rim te chu a thang riau hian ka hre mai a, tui dehnaah ka va uak leh ringawt ṭhin. 

Ka inchhut neuh neuh a, a hun ve tawh tho chuan ka hria, a lo nih ngat chuan tiin ka phur ru khawp mai a, ka luak rawn chhuak leh ṭhin pawh chuan ngaih a ti ṭha telh telh mai a ni. Eirawng ka bawl sawk sawk a, Naomi chu auin, "Damdawi dawrah ka va kal lawk dawn a, lo chhuak miah suh u," ka tih hnuah ka kalchhuak zui a, kan awmna aṭang hian damdawi dawr chu hnaite a ni.

Test kit chu panga lai ka lei a, chiang lo leh lang fiah thei lo chi a awm ṭhin tih ka hriat vangin a in ang loin chi thum ka lei bawk a, ka let leh lam chu pheikhai a zang duh khawp mai. Kawngka bulah Naomi a lo ding a, ka thil lei chu mak ti deuh hian a lo en a, "Eng nge a, i damlo a mi?" phawk angreng deuh hian a ti a.

"Hei hi maw?" Test kit chu ka phawrh a, "Naupai leh pai loh test-na a nia, ka inringhlel ve deuh a, ka han test a nge aw?" nuichunga ka tih chuan min en ran chungin lu a bu zauh a, bathroom lam pana ka kal chu min lo zui ve zel bawk.

Kit chu pathum ka la chhuak a, pahnih dang erawh ka la rai loh palh hlauha kawl ṭhatah ka ti a, pathumah chuan a chian theih mai ka ring. Chutia ka buai mawlh mawlh laichuan, "Naute chu a awm emmm?" kawngkhar pawn aṭang chuan a lo ti reuh a, ka nui kar kar.

"Ka en dawn mek e aw,"

"Engtin nge i en dawn a?"

"Hei...test kit-ah hian ka zun tlem ka far ang a, rin sen pahnih a lan chuan ka rai tihna a ni mai," nui chung chuan ka ti a.

"Rin sen pahnih chu a lang em?" a lo ti leh.

"Lo nghak lawk.." tiin ka che zui mawlh mawlh a, ka zun a chhuak mang bawk si lo a, ka nghak rei angreng khawp mai, pakhat lah chuan, "A lo lang tawh em?" a lo ti ve sek a, ka han nui leh ringawt ṭhin.

"Lo lang se i ti em?" tia ka zawh chuan, "Kan unau a ni ve dawn ti raw, kan pa a in ang em?" a rawn ti reuh a, ka nui huk...

"In ang chiang mai, i thisen zawmpui tur a nia, i lawm nge lawm vak lo le..?" min chhan dan ngaichangin beng ka chhi ran a, a ngawih deuh vung vung hnuah, "Lawm, mipa ni se..." a lo tia, a ṭawngkamin min tih lawmzia chu aw, ngaihtuahna lah a kalthui narawh e.

Ka test result ka han en chuan rin pakhat fiah lo deuh chauh a lang a, a khawi mah chuan ka rai thu min hrilh hlawm lo. Bei ti dawngah tal tiin pakhat chuan ka han test ṭha leh ngat a, chutah phei chuan eng rin sen mah a lang lo, minti hrilhhai angreng zawk khawp.  "I zo dawn tawh em?" Naomi'n a lo tih chuan ka tho sawk sawk a, chawp leh chilhin ka phurna a bo vek mai.

"Aaa..Na-i...naute chuh...a la awm rih lo a nih hmel hi," ka ti ban charh a, "Ti nge?" a rawn ti chu chhan dan a vang angreng.

"A la hun lo aniang," ka ti ringawt a, "Engtikah nge a hun ang?" a lo ti leh khauh a, chu zawhna kher chu aw. "Ka hre lo le, hei chu Pathian thu thu ania, a ṭul a tih hunah a lo awm mai turah ngai ang aw.." ṭha deuh chuan ka ti a, kawngkhar chu hawngin ka chhuak zui bawk. Chik deuh hian min lo en a, a nuam duh vak lo, ka zak nge ka inthlahrung pawh ka hrethiam chiah lo.

"I en ve chhin duh em?" ka ti chu a lo aw vangin test kit chu ka hmuh a, a hman dan te, a result lo lan dan tur te chu ka hrilh a, a hrethiam ve aniang chu a bu ve nghat nghat a, la rai rih lo mahila ka lawmna tawk chu ka hmu ta thoin ka hria, Naomi hian chungkua tak tak kan nihzia a nemnghetin ka hria a, ka chunga a rilru chuan ka thinlung a hneh a ni ti ila a dik ber ang chu, lung a ti awi ve takzet a ni.

Rampuii ka call a, ka in test chungchang chu uang deuh hian ka va hrilh a, ani lah pek chuan, "Thawhrim deuh a la ngai anih chu, kan doctor-a lah a night ngun bawk si a, a service a chhe awm mange, hmanhmawh nachang te a hre ve ngut angemaw chu.." tiin a nui hawr hawr a, ka nuih a za vak tawh lo.

"Ka rai vat thei lo ang tih ka hlau riau, a hmaa ka hlauhthawn sa a nia, fa pahnih pathum neih ve duh phei chuan pasal neih tlai hi a lo fuh lo anih hi, nangpawn nei vat la a ṭha ang.." ka ti a, "In lo neih loh tak leh kha pathum in inchhawp sa tho alawm nangni te chu, i hnung ka rawn zui ang a, pathlawi fa nei tawh neih ve mai te a nia ka rilruk ni, fa neih ka lo chak ve em em hleinem," a ti a, kan ngaihdan inpersan zia chu aw.

"Pasal i han nei chiah anga i la hrethiam mai, nupa min phuar nghettu chu fate hi an nia, mipa rilruah hian an nupui te aiin an fate an lian zawk mah ania aw, kan pasalten fa hmasa an lo neih phei chuan lâng bik riaua inhriat a awl lutuk, fa ka hrinsak ve thei lo ang tih hi ka hlau ngawih ngawih, zung ka kaih ve thei loh anih chuan ka mal dawnin ka inhria," ka ti duah a, ka la ngaihtuah ngai loh thil te a ni ka sawichhuah ni; mahse, ka hlauhthawn leh ka rilru dik tak a ni thung.

"Lungngai lo la, a la hma alawm, in inneihna pawh a la rei lo va, beidawng nghal mahta che, i pai ve vat mai ang.." thutak deuhin a rawn ti ta a, keichuan, "Ka kum i hriat kha, ka naupang tawh lo, ka hlauthawng sa reng tawh alawm," ka ti ve thung a, min rawn hnem mawlh mawlh mai, kei aia upa naupai a hriat hnem thu te a sawi a, lungngai lo turin min hrilh mawlh mawlh a, rilru pawh a nuam ve leh deuh.

Chumi zan chuan mut hmunah ka pasal chu ka sawipui a, "Fa hi nei thei lo ta ila engtiangin nge i ngaih ang?" ka ti tawl a, ka thil sawi chu mak a ti deuh aniang min en rang khawp mai. 

"Eng nge min zawh chhan?" a ti khauh a, zawh chhan dang vak pawh ka nei chuang lo, a rilru ka hre chak a ni ber.

"Vawiinah ka in ringhlelh a, test kit te ka va lei chuk chuk a; mahse, ka lo rai lo a," ka tih chuan min lo kuah nghal hlun a, "Hun a la tam alawm, lungngai reng reng suh," Rampuii sawi ang chiah khan a ti ve a.

"Ka upa tawh sia, ka pai ve thei lo mai ang tih ka hlau," zawi deuh taka ka tih leh chuan, "Fa neih duh vangin ka nei hleinem che, nangmah ka duh vangin alawm ka neih che, lo pai thei lo pawh ni la engmah a danglam chuang lo ang, damchungin ka bulah awm la ka duh ber, fa te chu hei pathum lai kan nei tawh a, ka duh belh lo tihna ni loin nei thei lo pawh ila ka vui lem lo ang," a ti charh charh a, min hnem tuma sawi a ni tih ka hre nain ka rilru chu a na ru hle lawi a, ani chuan a duhkhawp a hmu tawh a, kei ang hian a duh ve ngawih ngawih lo ni a ngaihna te ka nei.

"Pakhat tal neih ka duh," ka'n ti leh ngawt a, engmah sawi loin ka biangah a rawn fawp a, min kuah hlu hlu a, rei vak loah a muhil zui mai bawk. A muhil hmel chu ka en reng a, ngaihtuahna a vak kual nasa ngang mai. Fa nei ve ila chuan nuhrawn chauh ni tawh loin a fate nu tak tak ka han ni ve anga, Sangsangi te unauin min en dan pawh a dang ve tawh tur tein ka ngaihruat a, ka muhil thei lawk lo.

Ka nute chu kar hnih dawn an cham a, an cham chhungin Naomi leh Williama te nen nitin kan inawm a, chhuna eitur han siam ho te, tv en hote leh bazar hote chu kan nitin hun hman dan a ni. Ṭum khat ka nuin min rawn tlawh bawk a, naupang eitur a lo kensak ṭeuh a, naupangte pawn an nel khawp mai. Naomi nen pawh kan inngaina telh telhin ka hria, eichak a neih te hian min dil mai zel a, a pi leh apa'n ei an phal vak loh nepnawi te hi ka leisak fo a, a thil min dil ang han tihsak loh hi ka hreh ṭhin, inngainatir ka duh luat vang te pawh a ni ang chu.

Kar hnih zen zawn an cham hnuah Sangsangite pitu pawh an lo haw ta a, motor lianin bungrua an lo phur haw ṭeuh a, a zana zanah in thar lamah kan zuk dah lut hlawm a, kan buai nghal chuk a ni ber. Kan in luah laichu a neitute hnenah kan insawn tur thu kan hrilhlawk tawh avangin luahtur dang an awm leh reng tawh a, keini pawh a ranglama inthiar chhuah kan rilruk a, kan insawn ni atan sawrkar chawlh kan nghak bawk a, ka u ten min rawn puih an duh vang a ni.

Sangsangi lo haw chu a zia a zawi angreng khawp a, a mi en dan pawh a dang deuh. Engmah sawi lem lo hian min en leh vung vung ṭhin a, ka melh veleh a hawisawn daih a, mi pawh a be tam lem lo. Naomi nena kan innel ṭan leh kan inbe ṭha deuh hi min enchik ni berin ka hria, chaw eilai te hian min lo en leh kur zel a, kei lahin a nau ka duatna hi ka tilang ve deuh bawk a, a chhan pawh min nel ve sela, Naomi ang hian ka duat dawn tihte hrethiam sela ka duh vang a ni.

Ka hna chu ka chawlhsan ta a, fa neih lam ka rilruah a lian bawk nen ka lo pai ve thei hlauh anih chuan inlama hun hman ka duh zawk ka ring a, rilru a dam khawp mai, ka nu ang deuh hi ka ni ve a, fate tan hun hmang ral ila, chhungkaw hlim tak din ila, ka nun pawh nupui ṭha tak angin hmal ral ila, damchhung tawiteah chu baka thlakhlelh tur dang a awmin ka hre lo. Ka nu pawh hian u Sena a pai tirh hian a hna a bansan a, ani phei chu sawrkar office-ah hna nghet a neih lai a ni nghe nghe.

February thlaah intharah chuan kan insawn thla ta a, ka u ten min lo pui a, pa berin hna a chawl ve thei si lo a, ka nu hoin kan buai ṭhin khawp mai. Fa ka awh thu ka sawi vang kha aniang Alana hian min care zual a, a duty loh zan hi chu kan bawhpelh meuh lo, chuti chung chuan rilru ti hah loh tur leh fa nei lo pawh ni ila a lungawi tur thu hi min hrilh ziah thung a, min hnemna a ni tih hre mahila neih a duh thu sawi sela ka lawm zawkin ka ring.

Zan khat a duty loh zan chuan inah kan awm kim ṭhap a, naupang ho mu tur chu pindana an luh hnuah pawh an bengchheng angreng khawp a, hmeichhe naupang pahnihte chu an inhau ni maiin ka hria. "Va ngaihven teh," ka nu'n a rawn tih chuan Alana chu a tho vat a, kei erawh thingpui siam turin choka lamah ka phei a, pindan lam thawm chu a reh nghal mai bawk a, Alana phun bul bul thawm bak chu hriat tur a awm lo.

Thingpui ka va chawi phei laichuan, "Williama khan damdawi a ei lo tlatin ka hria," ka nu chuan a lo ti zauh a, "Ka va zawt ange," tih leh kal ka rual a, an pindan kawngkhar hawn mai ka tum chu an ṭawng thawm vang chuan ka tawp leh rih.

"Nau ka duh belh lo, nei tawh suh u," pawr angreng zeta titu chu tudang ni loin Sangsangi ngei a ni.

"I nau ve lo anga a ni mai alawm," Naomi'n a lo ti zat a.

"Pai pawh a la pai lo e a, ngawi mai mai rawh" Sangsangi bawk.

"Hmanniah a pai ṭep, ka enpui vek," Alana a lo nui hawk a, Sangsangi a lo ṭeu khawp mai.

"I mawl anih kha, engmah i hrethiam ve lo, i â em mai..." a ti bawng bawng a, a pa'n a lo khap chung pawh chuan, "Naute an neih chuan apa'n keini aiin a duat dawn, ka hre vek, keini chu fahrawn kan nia..." a ti ta reuh a, a pa chuan a beng nge a pen zawk ni, "A naaa.." tih riin a zui nghal.

"I ṭawngkam hi ka helh ṭhin khawp mai Rinsang, i rilru te hi a chhe zek mai a, sim hmak ang che," ka pasal chu a lungawi lo hle tih a hriat theih. Sangsangi insut faih riin a zui a, "Lo kal teh.." a pa'n a tih leh chuan, "Min kuah bawk suh," a lo ti ṭeu hlar a, ngaihthlak pawh a nuam lo.

Kalsawn mai ka tum tawh laichuan, "Khawvelah hian nangni aia duat che u ka nei lo, ka nei bawk hek lo ang, keimahah chuan number 1 alawm innih," ka pasalin a tih ri chu ka hria a, chutah Sangsangi lo ṭawng lehin, "Nu ITF-i'n fa pawh nei se min duat zawk dawn em?" a ti a, keimah min sawina em mawni le?

"Duat zawk dawn, nangni aia duat ka nei dawn lo," ka pasal ṭawngkam kher kher chu aw, naupang bulah lehnghal.

"I duat zawk lo tak tak ang maw? I duat leh si vaih aw?" Sangsangi leh bawk.

"Duat zawk lo ang, ka duat ber ang che u," thawk ka la hawk a, ka zawi nghulh mai hian ka hria, thawk a pik a, ka rilru te chu a na deuh dawn dawn mai, hetiang rilru hi put ka duh ngai loh tawp kha a ni.

"Nu ITF-i chu eng tihna nge?" Alana'n a tih chuan, "Ka sawi peih lo," tih riin a zui a, Naomi zawkin lo chhangin, "Intifel tihna," a lo ti zauh a, ka pasal nui hawk hawk ri chu ka hria!

(End of chapter - 4)