I NGHILH ZAWK ANG (CH - 6) by Ahmangaihi violette Khiangte

I NGHILH ZAWK ANG

by Ahmangaihi violette khiangte

Chapter - 6

"Meng rawh Willie, ka ṭawng i hre thei em? I hriat theih chuan i mit han khap teh," ka sawi ngam si lo a, ka be mawlh mawlh reng.  A hmui a ti che dat dat a, a mitmeng te chu a vai deuh riai tawh. 

"Damdawiinah kan hruai che anga, i dam vat mai ang, hlau reng reng suh aw," tih pahin a ban chu ka chulsak leh ringawt a, keimah zawk chu ka hlauthawng.

Ka nu lo thleng chho lah chu a tha a khur nasa mai, rawn buaipui ngaihna hre loin a ding khawng reng a, "Engtin nge a awm a, a va thi nasa ve..?" a ti khur hlak hlak a, hetia kan muan reng chuan thisen a hloh hnem lutuk dawn.

"Taxi lak vat a ngai, damdawiinah kan kalpui nghal loh chuan a thisen a chhuak nasa lutuk," ka lo ti zung zung a, Sangsangi lah pek chuan, "I tih a ni chiang lutuk, ka rawn hmu vek che ania aw..." a lo la ti ve pang pang a, ka ban phaka ding nise chu ka vai thlu pawp duh ang maw le.

"Ṭawng zawt zawt lo khan taxi han ko rawh.." ka ti vin hlar a, chutah rawn harh deuh zawk niawm tak hian ka nu chuan, "Stand a hla lutuk, nangmah han kal rawh scooty i neih kha.." a lo ti ve vat a, chu chu a ṭha ber tak ang. 

"Lo pawm rawh ka nu, a lu hi a hliam a, tih chet vak chi a ni lo.." ka ti ve ta nghal a, rang deuhin ka nu chu ka bulah a lo ṭhu a, thiam leh thiam loin Naomi'n a lo pui bawk. Kan inhlan fel hnu chuan hmanhmawh baklengin ka tlan thla a, scooty ka han tinung tur te chu ka tha a zawi vek a ni ber, ka thauah min man a, ka tiril te chu a khur ru deuh.

Kawng te chu a thui ka ti, damdawiin thlenpui hman loh mawlh ka hlau a, chutih rualin Alana kan la hrilh lo tih ka hrechhuak bawk. Taxi lak chu a pawimawh hmasa bera ka hriat vangin ka tlan chak sauh sauh a; mahse, kawn ka han thlen chuan taxi ding reng reng hmuh tur a awm lo. Ka scooty chu ka hung rawk rawk a, taxi lo tlan hmasa ber chu ka lo phar chawt a, driver leh passenger te chuan min lo en phawk khawp mai.

"Accident a awm a, emergency....damdawiin pan pui vat a ngai, a serious lutuk..." ka ti zung zung a, driver chu a hamhaih deuh laiin passenger te zawkin an lo hrethiam nghal a, "Taxi dang kan la mai ang, kalpui rawh.." an lo ti vat a, kan in awmna lai hrilhin min zui nghal turin ka ti bawk.

Tlan pah chuan Alana chu ka call a, "Taxi chu i hmu em..?" a lo tih nghal vang chuan an be tawh tih a hriat a, "Kan let mek, casualty-ah lo awm rawh," ka tih laichuan, "Ka awm tawh, lo hmanhmawh rawh u," a lo ti let vat a, a hlauthawng tih chu a aw aṭangin a hriat theih.

"Engtin nge a tluk theih a?" 

"Ka hre lo, ka han hmuh chuan a lo tlu reng tawh.."

"Zuk thleng vat teh u, thisen a hloh hnem lutuk chuan a pawi dawn ania.." a tih bak chu ka scooty tlan thawm leh hnung lama taxi lo tlan thawm nen a hriat hleitheih loh a, phone chu hmet tawpin ka tlan chak sauh bawk. 

Kan zuk thlen chuan Naomi'n pawnah min lo nghak a, kan tlan lut a ni ber. Kan driver khan min lo pui a, ka nu chuan seat hnungah pawmin Sangsangi'n a ṭhutpui bawk a, keini ahmaah Naomi nen kan ṭhu thung. Ka nu chu kawngtluanin a ṭawngṭai a, keipawn rilru ṭawngṭaina ka nei awl lo, kan driver chuan a inhliam dan te min zawt a, ngaihtuahna a mang bawk nen kan chhang mumal lo khawp mai.

Casualty kawtah Alana leh doctor pathum an lo ding a, kan thlen rualin min lo buaipui zung zung a, a pa hnen a han thleng ta chu hlauhthawnna la reh lo mahsela ngaih a ṭha deuh huai a ni. Nurse ho an phe vat vat a, a pa bakah doctor dangten an kil ṭhap bawk a, kan tan va tih ve theih vak a awm lo. "Naupang kha lo va awmpui rawh, an lo mangang a nge," ka nu'n a tih vangin pawnah ka va chhuak a, Sangsangi te unau lo ding chu koin ṭhutna awlah ka ṭhut pui ta rih a.

"A lo harh em?" Naomi a ni.

"Harh chiah lo, zai nghal a ngaih ka ring,"

"A thih vaih chuan aw..." Sangsangi'n a lo ti chu a nau nen kan melh rang khawp mai.

"Ṭawngṭai nasa hle rawh," ka lo ti bul hmuk a, rilru chiai lai a lo ni bawk nen a ṭawngkam chu ka teithei lo.

Chutih laimek chuan ka nu a lo chhuak a, "An zai nghal dawn, a thisen chhuak saw tihtawp vat a ngai a," a rawn ti zawi ṭiak a, inchhungah khan a va ṭap aniang, a mit a sen ram a, a la khur deuh dar dar bawk.

"Ka va lut ve lawk ange.." tih leh thawh ka rual a, ka lut tur chu Doctor pakhat nen kan intawk hlawl. "Alana nupui i ni ti raw, an zai nghal dawn, hlauthawng suh u.." a lo ti zung zung a, chutih laichuan pawn lamah thawm a lo awm a, ka nu tlu an lo bawr deuh laih mai. Rang lutukin ka tlan chhuak leh a, pawna awmve midangho chuan an lo bawihsawm a, ka nu chu a zawi vek, nikhua a hre chiah lo niin ka hria.

 "Api.." tiin Naomi'n a ko mawlh mawlh a, Sangsangi pawh a mangan hmel viau tawh. Alana lo tlan chhuak vein ka nu chu kan han buaipui leh rih a, "Lo awmpui la, William-a ka buaipui phawt a ngai, ka nu chu a zia leh mai ang," tiin doctor a ko a, a doctor koh chuan thil a tifel zung zung a, casualty-ah chuan drip te an khaisak a, kalsan lo tura min tih vangin William-a an nawr chho pawh chu kan zui ve ta lo.

An kal liam hnuah Sangsangi'n a zui ve leh a, Naomi erawh ka bulah a awm thung. Ka nu chu a ṭawngvai niah niah reng a, a chang phei chuan, "Awi ka nu..!!" a ti leh hluai zel a, a ṭap titih ṭhin bawk. Darkar chanve dawn hnuah chuan a rawn harh riai ruai a, thil awmzia kan lo hrilh chuan a hlauthawng khawp mai a, thawh mai a tum lah chu a lu a hai a, amah pawhin a ding thei lo.

Nurse ten tho rih lo turin an lo ti vat a, ani'n a tupa chanchin a lo zawt mawlh mawlh bawk. "An zai mek tawh ang, hlauthawng suh u," tiin nurse te chuan an lo ṭawng thlamuan a. "Ka lo han chho dawn nge?" ka tih lah chuan a phal der lo mai. "Mapuia a awm alawm, ka hoin kan kal dawn nia," a ti tlat a, a hlauhthawn vang anih ka ring.

Rei vak loah ka nu phone chu a lo ri a, Mary a ni. Ka nu chuan kan awmna te hrilhin thil awmzia te chu a han hrilh zung zung a. "Pawnah kan lo hmuak ang che u, Naomi pawh hei ka bulah a awm," a tih hnuah Naomi chu a nu te lo va hmuak turin a tir a, damdawiin an lo thleng tawh niawm tak a ni. Keipawh chuan Naomi chu ka zui ve nghal a, rei pawh kan va ding hman lo, Mary leh a nu leh pa bakah a u Rawngbawla kha an lo thleng a, Naomi bulah chuan a pi awmna an zawt nghal thuai bawk.

Casualty-ah lutin ka nu chu an va bia a, an lo chhuak leh rang viau thung. "Inzainaah chuan chho ang u," Naomi piin a tih laiin, "Duati, kan rualin lo kal rawh," tiin Naomi chu a nuin a rawn ko a, Naomi chu a kal rang khawp mai. Mary chuan min lo melh ve zawk a, "Kan lo han chho ange," tih zawng a sawi a, keimah te chuan Casualty-ah ka lut leh ta rih a.

"Ka tho thei ṭep ang...ka luak te hi a chhuak ut ut mai," ka nu chuan a lo ti niah niah a, a thil khailai chu ka lo melh daih thung.

"Khai zawh rak a ngai dawn em mawni le?" ka tih chuan kan piaha nurse chu a ko zui a, "Eng chen nge kan kaltir dawn?j" tiin a zawt a.

"I khai zo hman ang ka pi, inzai chhung a rei dawn alawm," nurse chuan a ti leh mai a, nghah vang vang rih chu a ngai dawn anih hmel.

Kan nghah chhungin ka chhungte ka bia a, kan chanchin te ka va hrilh ve zung zung a, "I u te an lo leng chhuak daih a, i pa nen kan lo kal nghal dawn nia," ka nuin a lo tih chuan rilru a nuam ve huai mai. 

Mahse, Minute 15 hnu velah chuan u Sena'n min lo call a, ka pa nen an lo kal thu a rawn sawi a, ka pa'n zana motor a khalh ngam loh vangin u Sena leng an lo kaw haw anih hmel. Bike-in an lo kal a, inzaina lamah kalpui loin ka nu ka va hmuhpui leh te te a, chumi hnuah ka nu ho chuan kan inzui chho ta hlawm a.

Kan han thlen chuan an lo ṭhu ngui nghiai hlawm, Mary chhungte chuan ka nu chu an lo be luam a, keini erawh min ngaihven lem lo. Ṭhutna a awm loh vangin kan pafa ho chuan bang nghengin kan ding a, ka han melh kual ṭhin a, Mary chhungte chu an lian hlawmin an zahawm ru riau a, an pa ber phei chu a ṭhu tum deuh bur. Naomi chu a pi (Mary nu) malchungah ka lo mu zawi ngiai a, sana ka en chuan lo tlai tawh angreng a, an ril a ṭam tawh ngawtin ka ring. 

Sangsang leh a nu ṭhu dun chuan thil an sawi dun sar sar a, Sangsangi zawk chuan min lo en leh zuk zuk ṭhin a, Mary lo hawi ve pawh chuan min lawm hmel a pu chiah lo, ka awm ve chu a duh lo emaw tih mai tur a ni. Chutih laichuan ka pa'n min lo bia a, "Zanriah in ei la awm si lo a, eitur kan lei dawn em niang?" a ti a. Ka nu chu a ril a ṭam em tih ka zawt ve nghal zat.

"Engmah ka ei chak lo.." tih zawngin min lo chhang a, Naomi ka zawh lah chuan min chhang lo reng reng. A pi malchungah a bawk tlat a, a mittui te a hru zauh zauh a, a rilru nozia ka hriat vangin ka khawngaih ru  viau a ni.

"An duh loh pawhin nang talin zuk ei la, i u Sena'n a kalpui mai dawn che alawm," ka pa chuan a ti leh a, han kalsawn daih chu ka hreh a, engmah tak tak ka ei thei pawhin ka ring lo.

"Inpa nupui hlui a ni lawm ni, a hre vak lo che nge?" u Sena'n a rawn tih chuan, "Hria e," zawi tein ka ti a, "An be bawk si lo che a," a ti zawi leh sup.

"An rilru a chiai viau ang," ti maiin ka chhang a, ka u chuan Mary chhungte chu a va thlek leh vang vang ṭhin.

Chutih laichuan pen ri kan hria a, thawm awmna lam chu kan hawi rual deuh ṭhap a, Rawngbawla lo phei chu ka u pawn palian a ti ngang a niang, "A va chak hmel ve, " a lo ti zauh a. Rawngbawla chuan a theitui bottle ken chu Sangsangi pein a kal hran pui zui a, rei dawn chu an bo dun vang vang.

An lo let leh chuan eitur an lo khai bawr ṭun a, Naomi leh a pi hoin an ei a, ka nu chuan min pek ve a tum nain chips vel ania, ka eichak lem lo. "Kan inah chaw va bar lawk la," u Sena'n a tih pawh chuan ka hnial a, sana chu ka bih khat tawk reng bawk.

An zai rei bawk a, an zai hlawhtling viau aniang OT aṭanga Alana lo chhuak chuan thaw huai hmel a pu, a zaitu doctor pawh lo chhuak ve nghalin a zai ṭhat thu a rawn sawi a, "Dinhmun hlauhawmah a awm tawh lo e, thlamuang deuhin awm tawh rawh u," awki dam diai hian a ti a, rilru hah pawh a dam sawng sawng thei.

MRI leh CT scan te tih leh a ngai dawn tih angreng chu kan hriatthiam ve chhun a ni mai a, Doctor te an fel a, engkim an tihsak zung zung a, Willie-a awmna tur cabin pawh an lo tiruak diam tawh. Ka pa chuan tunge awmpuitu tur a lo zawt a, ka nu chuan awm a han tum rawk a, Alana'n a lo phal awzawng lo. "I taksa a chak lo lutuk, a nuin awmpui rawh se," tih pahin ka lam a lo hawi a, "Naupangho nen hian lo zuk haw pui mai rawh," a ti zui a.

"A harh hun kan nghak dawn lo em ni?" ka tih chuan, "A harh mai lo ang, hei zan a rei dawn, chaw pawh in la ei si lo," a ti chuar chuar a, Naomi ka va en chuan a meng ngui lup tawh a, lo zuk haw pui mai chu a ṭhain ka hria. 

Mary chu a fapa khum bulah a ṭhu chawt a, a awmpui dawn anih ka ring hmiah. A khat tawkin a fapa awm chu a chul leh ṭhin a, a melh tlawk tlawk reng bawk a, ka khawngaih reuh khawp mai. Rei vak lo kan awm leh hnu chuan ka pate'n haw an rawt a, kan zui ve nghal tur thu sawiin ka nu ka sawm nghal bawk a, a lo tho ve mai. Mahse, Sangsangi chuan min zui a tum lo aniang a la ṭhu tlat a, Naomi'n "Au, kan haw dawn ania," a va tih pawh chuan a rawn hawi ṭha duh lo.

"Naupang chu kan inah riak mah se a pawi hleinem, zingah thawmhnaw kan rawn la anga, sawta ṭangin school pawh kal mai rawh se," a puin a lo ti khauh a, Alana chuan hnialna a nei lo nge ni engmah a sawi buai lo a, ka nu nen chuan kan kalsan mai a ngaih hmel.

Pawn thlengin Alana'n min lo zui chhuak a, ka pa nen pawh an inbe luam, "A harh hunah chanchin ka lo sawi dawn nia," tiin ka pa chu a hrilh a, "Ka nu hi lo ngaihven deuh la, zan a mu thei lo maithei a ni," tiin damdawi pek tur min hrilh bawk a, "Zingah ka lo kal dawn nia," tiin ka hrilh ve bawk.

Ka pate tlanliam hnuah taxi kan la a, kan in lampanin kan haw ta vang vang a, ka nu chu a ṭawng meuh lo, a chau hle aniang a seat nghengin a ṭhu zawi nguai a, a muthlu emaw tih mai tur a ni. Kan kawt kan thlen chuan kawngka pawh kan kalh lo tih ka hre ve chiah a, kan buai pheleng khan kalh nachang pawh kan lo hre lo.

"Chaw i ei duh em, ka siam nghal dawn em ni?" inchhung kan luh hnua ka tih chuan, "Engmah pawh ka chak lo, tuilum ka in anga ka mu nghal mai ang," a lo ti a, keitak pawh chuan ka chak bik lo. Ka kawr hmaah lah chuan thi a kai rang nian a, inbual turin ka chhohsan ta rih.

Mahse, ka inbual hma deuhin ka nuin min lo call a, "Hei, i pate pawh an lo thleng deuh chiah a, a ngaihtuahawm loh an tia, in rilru te kha a lo hah ange, kan lo ṭawngṭaipui mawlh mawlh ang che u," damdiai hian a rawn ti a, rilru hah laia ka nu thlamuana hriat hi chu a hahdamthlak hliah hliah zel.

"Ka inbual anga, ka mu nghal mai ang, zing karah han chhoh ka tum a," ka tih chuan, "Keipawh naktukah ka lo kal dawn nia," a lo ti ve leh vat a, zinga inbe turin kan inbiakna kan ti tawp a, ka inbual zui ta bawk.

Ka inbual zo chu mut nghal mai ka tum a, in hnuai lamah thawm ka hriat leh ṭhin avangin ka muhil thei mai lo. Zanlai pelha ka zuk chhuk chuan ka nu chu sitting room-ah a lo mu a, thingpui a in aniang no a lo inchhawp a, a mu nghet angreng si a, kai tho loin puan ka sintir ta ngawt a.

Ka muthilh ve tak chu dar 2 vel anih ka ring,  ka phone riin min kai tho a, Alana anih vangin ka chhang rang hle bawk. "School form leh an bag vel kha lo siam sak la, thawmhnaw hakthlak tlem i dah tel dawn nia.." a rawn ti a.

"A harh tawh em?" ka tih chuan, "Harh lo e, a la ngai reng," a ti zuai ruih a, ka lo hlauhthawng ru deuh.

"Engtik velah nge an harh ṭhin?" ka tih leh chuan, "A in ang lo, a ṭhen hi chu an harh har ṭhin khawp a, vawiin lamah te chuan a harh ve maithei a ni," a ti leh a, a pangngai tihna ni mai turah ka ngai.

"Ka lo kal dawn em?" ka ti chu min lo hnial vat a, "Lo kal duh lo mai rawh, ka nu kha a chak vak lo em mai, inah lo awm zawk ula a pawi lo, naupang pawh tlai banah chauh an lo kal ang," a ti zung zung a, Mary a awm bawk nen ka tih ve theih vak a awm si lo a, chanchin min hrilh reng turin ka chah thung.

Inhnuaiah chhukin naupang thawmhnaw chu ka siamsak a, an awm rei lo tura ka ngaih vangin hak thlak tlem chauh ka dah a,  ka siam peih hnua sana ka en chuan dar 7 a lo ri tawh. Ka nu thawm a reh ṭhiap a, zing lamah a mu ṭha leh nge ni ang aw ti rilru chungin a pindan lamah ka va lut a, khumah a lo la mu tui khawp mai. Chutih laichuan motor thawm ka hria a, naupang thawmhnaw lo lam tur anih ka ring.

An driver an lo tir a, tlangval la naupang te a ni, "Nanai'n water colour lo la nghal rawh min tia," a tih vangin ka zawng leh rih. A khum lu lam cabinet chhungah a lo awm a, ka pek hnu chuan driver chu a chhuak zui a. Nizan lamah chaw kan ei loh vangin chawhmeh ṭhing ka chhuang lum a, ka nuin chaw ṭhing a ei theih loh vangin chaw ka chhum bawk. 

Kan in leh a vel chu a reh ṭhuap a, rilru kaptu a lian bawk nen khua a har duh khawp mai. Tual hnawk te ka va phiat a, vawk chaw pe bawk a, ka inpeihfel chuan dar 9 a pel fel der a, ka nu erawh a la muhil bawrh bawrh mai, a chau ngang a niang. Chaw chu eisan bik loin ka nghak ve ngat ngat a, a lo thawh ve meuh chuan dar 10 a pel tawh.

"Lo ei mai tur alawm, nizanah ka mu ṭha lo a," a ti nuah nuah a, chanchin te ka han hrilh chuan a lo hlauthawng a, "An zai fuh lo a ni ang, a harh har lutuk," a ti hlut a, Alana a call nghal chuk chuk a.

Mahse, a fapa ṭawngkam a hriat hnu chuan a inbengdai ve leh vat a, "Vawiin lamah a harh mai ka ring, lo kal suh mi ti deuh tlat lehnghal a kha, zanin te chu riah pui ka tum a sin maw le," a ti nuah nuah a. "Mary a awm tho a, a pa a awm bawk a, a ngaihtuahawm loh ang, a la harh bawk si lo a, tih theih vak pawh a awm rih chuang lo," tiin ka lo hrilhfiah ve luam a.

Ka nu nen chuan tlaiah kan han chho ta hram a, Alana inthlakna tur te pawh kan keng nghe nghe a, chanchin thar vak an la nei lo. Alana ṭhiante leh Mary chhungte an lo awm nual a, rei pawh ṭhu loin kan inphur haw leh a, pahnih chauha ina kan han awm ṭhin chu a khawharthlak lutuk a, ka nu lah hian mi biak seuh seuh hi a nei lo a, ka biak lahin a rul tawk hian min chhang mai zel a, tih tur a awm loh phei chuan a hrehawm duh viau mai. 

Zantir a ni a, zanriah kan eikham hlim hlawl a ni. Ka nu chu tv hmaah a ṭhu a, kei dawhkan bulah ṭhuin zinga hmeh tur anṭam ka ṭhian a, ruah a sur dawn a ni maithei thli a thaw vuk vuk reng a, kan in bulah thing ding a tam vangin thawm a na angreng a, a khat tawkin a rawn ri leh vuk ṭhin.

Chutia Anṭam ka then mawlh mawlh laichuan ka phone a lo ri a, Alana hming ka zuk hmuh chuan chanchin thar an nei anih ka ring nghal ngawt. "A harh tawh em ni?" ka ti nghal tawng a, min chhang mai lo, pawn lamah a awm tih hriat tak hian pawn lam thawm hriattur a awm a, kal pahin min bia a ni maithei.

"Hello..."

"William-a kha engtin nge a tluk a?" a rawn ti bul deuh hmuk a, a ngaihna ka hre lo khawp mai.

"Ka han hmuh chuan step-ah a lo mu reng tawh a, a tukkhum vaw zawng takin a tlu aniang.." 

"A tukkhum a sawh tih te chu a hriat reng alawm, engtin nge a tluk theih..?" a aw nelawm loh lutuk chuan min ti bangbo deuh riau a, ka chungah lawm lohna a nei nge mawni ka ti!

"Ka hrethiam chiah bik lo, an unau khan inchungah an awm a, a u te lo chhuk hnu khan a rawn chhuk ve ta mai lo a, ka han chho khan khatiang khan ka han hmu a.." tiin ka thil hmuh dan chu kimchang takin ka hrilh a, min chhang loin a ngawi leh vung vung a, a rilru a hah ṭan anih hmel.

"Hlauthawng suh, a dam leh mai ang, naupang chu Pathian hian a venghim..." sawi pawh ka sawi zo hman lo, "I fa anih loh vangin i hlauthawng ve lo anih dawn kha.." a rawn ti bawl mai a, a mi ṭawngkhum dan chuan min deng dawt a ni ber, sawi mai tur pawh minti hre lo.

Thawk ka han la deuh kawk a, tho nghalin veranda lam ka pan hlawk hlawk. "Eng nge i sawi kha, engtin nge khatiang khan min tih theih a?" ka aw chu a seh chilhrap mai.

"Ka ṭawngsual anih chuan tihpalh, ka rilru a hah deuh a ni e.." a ti nghat a, a awki te chu ngaihdam min dil pawh a angin ka hre lo, ka rilru a na thar et et a, ka insum thei lo reng reng.

"I awmdan kha ka hrethiam lutuk che, i rilru a hah a, i chau tih pawh ka hai lo; mahse, tuna i thil rawn sawi kha chu i rilru diktak a ni zawkin ka hria, engtia awm turin nge min beisei, a nu ka nih loh vangin ka lo hahdam veng veng bik emaw i ti em ni, ngaihtuah reng reng cheu in helaiah ka lo awm ve bawk asin.." ka ti a, ka ṭawng tawp lamah phei chuan ka hnuk a ulh ṭun.

"Dah phawt ang....." tih zawng chuan min chhang lehta nghal a, ka la dah duh lo nasa.

"Hetianga min ti dawn anih chuan maw..." ka ti a, ka aw a lawi rut bawk nen ka sawi zawm thei mai lo. Lehlama mi lah chuan eng nge a hriat teh hrep ni, "Min hrethiam anih chuan dah ta che.." a lo ti leh bawl a, thin a sa phat bawk nen call chu ka hmet tawp rang khawp mai.

Ka rilru chu a nu bulh a, ngaihtuahna lah a vak thui, eng eng emaw ka ngaihtuah kual a, ka pasal ṭawngkam chu nidanga a tih ṭhin dan nen ka han hmehbel kual a, min lo dah hrang hle ṭhinin ka hre tawh. Naupang laka kut sil tura min ti mai te, mi a chhan let tawh dan te, ka thil sawi a awih mai ngai lo te leh tuna naupang a riah chhuah tir ta mai te pawh hi, heng thil thleng zawng zawngah hian nupui mawhphurhna min lo pek lohzia a tilangin ka hria, chu chu tun maia min ṭawngkhum dan khan a ti fiah zual bawk.

Rei deuh chu pawnah ka ding a, ka call lehnghal dawn em mawni ka tih rilruk rauh rauh laiin ka nu a lo lang a, "Anṭam saw i chhum nghal dawn em?" tiin min lo zawt a. "Ka la ṭhian zo lo deuh," tih pah chuan ka lut ve nghal a, ka awm dan chu mak a ti aniang min lo thlek uluk viau mai.

Ngawirengin ka che zung zung a, ka nu pawh dawhkan kilin a ṭhu ve reng a, ka anṭam thenna ka paih tur te chu uluk fe hian min lo en a, "I nuamsam vak nange?" tiin min zawt ta reng bawk.

"Nuam e, i duh leh min mut san daih rawh, hei hi ka chhum zo anga keipawh ka mu ang," ka tih chuan a tho ve mai bawk a, mu loin sitting room-ah a va ṭhu rih thung.

Gas bulah dingin ka thil chhuan chu ka vil ran a, ngaihtuahnaah thil dang a leng thei lo reng reng. Engtia han awm zel tur nge tih te thlengin ka ngaihtuah kual a, heti ringawt hi   chuan eng ang chhungkua nge maw kan han din ve ang le, a fate lahin min ngaina thei hlawl si lo a, anin khatiang rilru a put leh lek phei chuan...

Chutia ka lo inngaihtuah buai laimek chuan kawta motor ding thawm ka hria a, tukverh aṭanga ka va thlek chuan car sen hi a lo ding a, naupang an lo haw em maw ni ka ti rilru. Gas chu ka sim a, va chhuah ka tum chiah chu kawngkaah Rawngbawla kha a rawn pen lut hlawl a, a hnung lam ka thlek chuan tuman an lo zui lo.

"Lo leng rawh, naupang an lo kal ve nange?"  ka lo ti chu min en run run a, "Kal ve lo..." ti maiin min chhang a, inchhung lam a melh kual zui a, "Ka nu chu sitting room-ah sawn a awm," ka lo ti leh vat a.

"Thingpui lumsa i nei em?" tih pahin ka thil chhuan lam chu a melh leh a, "Awm e, a thlum nge a hang i duh?" ka tih laichuan dawhkan kilin a lo ṭhu fel tawh. "A hang.." tiin min chhang a, chutih laiin ka nu chu kan ṭawngthawm hriain a lo phei ve bawk a,  "Eng nge i lo tih dawn a?" a rawn ti deuh tlawng.

"I nuamsam lo an tia, a lo ngaihven mai mai che.." aw thum duta Rawngbawla'n a tih chuan, "Ka ṭha viau tawh, damdawiinah i kal em ni?" tiin ka nu chuan a zawt a.

"Tlaiah khan ka kal a, zan lam chu ka kal lo.." ka nu chuan a thlek uluk khawp a, a ngaithei bik vak lo niin ka hria.

Thingpui hang va chhawp pahin ka nu chu a duh ve em ka zawt a, a duh loh thuin min chhang a, "Tv hmaah ka va tlu zal mai mai ange, Bawla engtikah maw Sangsangi te chu an lo haw dawn?" sitting room lam pan leh pah chuan a ti a, pakhat chuan "Ka hre lo, an la haw chak rih lo aniang," a lo ti thum leh dut a, a thingpui in pah chuan gas bula ka ding chu min rawn melh kur mai.

Ka hawisawn vat a; mahse, min lo biak vangin ka lehhawi leh vat thung.

"Sangsangi nen in lo insual a ni maw?" a ti mauh mai a, ka helh teh e.

"Naupang sual thu va awm suh, chutiang chuan a sawi em ni zawk a?" ka tih laia ka aw chu a chang viau.

"Alana fate hian an ngaina lo riau mai che," zawi deuh tak hian a ti leh a, hepa hi ṭawngkam ṭhaa chhawn chi a ni dawn lo tawp mai ka ti rilru nghal a, ka melh rum nghal rawm bawk.

"Fahrawn an nih vangin i lo tiduhdah hlauh ange aw, ahma khan hrilh lawk che ka duh tawh a, ka tute hi ka chhan teh ania, an chungah lo ṭha viau rawh.." za lo zetin ka lo nui a, min en dan ka hmuh chuan ka nui  tawi hle thung, a ṭawngkam mai ni lo; a mitmei hmang chuan min vau a ni ber e.

"I tu te hi an fel phawt chuan duat ka duh, ka tum ve viau bawk ania.." hlau lo ang tak chuan ka han ti a, zep loah chuan ka ṭih ru ngang mai, a palianin a hmel a bumro bakah pawisak nei lo tak chi a niin ka hria, Alana khan damdawi a tih ṭhin thu a sawi kha ka hre reng a, a thin ka tirim vaih anih chuan kut min thlak hreh pawh ka ring lo.

"Williama pawh kha nangmah hian..." a tih leh laimekin ka nuin a lo au a, "Bawla, helamah lo ṭhu phei ve rawh," a lo ti lang lang a, a sawi zawm ta lo, thawh pah chuan min la melh ngur a, a thil sawi tum pawh kha ka ring thiam riai ruai a ni.

Sitting room lama a ṭhut phei veleh chuan pawnah ka chhuak a, ka u Sena ka han call nghal a, a lo chhan rual rualin a awmna ka lo zawt nghal. "Damien-a te inah ka lenga, an balcony-ah kan ṭhu ho mai mai, ka haw ṭep e," a lo ti luam a.

"I hman chuan lo leng thla teh a, ka nu nen chiah kan awm a, mipa inleng kan nei bawk si a, min lo awmpui lawk rawh," ka ti ta ngawt a. Tu nge lo leng min zawh chuan Mary u anih thu ka hrilh a, damdawiinah khan a hmuh tawh vangin a lo hre ve mai a, min ngainat loh thu leh damdawi ti ṭhin anih thu tlang deuhin ka hrilh bawk.

"Ka lo kal dawn nia; mahse, ka lo lem hman hlek a, a pawi lo ang maw?" a ti a, ka nu a awm vangin a inthlahrung a ni. "Pawi lo e, lo kal tawp rawh, khawmuang loin lo kal nghal rawh aw," ka ti leh sawk sawk a, a lo kal nghal dawn anih hmel e.

Sitting room lam thawm chu a reh ang reng a, ṭhu dun reng chungin an inbe tlem khawp mai, a khat tawk chuan an ṭawng ve leh zauh ṭhin a, an ṭawng thawm aichuan tv thawm chu a ring mah zawk. Tui in tura ka nu lo phei lah chuan, "Mut mai ka duh tawh asin maw le..a ṭhu ve reng a," a ti nuah nuah a, a hlau ve deuh em mawni zawk ni.

"La mu rih suh, haw phawt rawh se.." ka lo ti chu min melh rulh a, min chhang lem lo thung. Tui a in zawh hnua a va ṭhut leh chuan an inbe ve luam a, animal planet lam an en niang ramsa chungchang an sawi a, Rawngbawla chuan haw mai a la tum lo ang.

Minute 20 dawn a liam leh hnuah Bike thawm ka hre ta a, ka chhuak rang hle bawk. Ka u chu Damiena nen an lo kal hi a lo ni a, a tihzia angreng. Damiena hi chuan zu hi a rui ve ngai lem lo a, a in pawh hian a tem ve hlek ringawt a, vawikhatmah a rui hi ka la hmu ngai lo.

"A la awm em?" ka uin a lo ti nghal thawr. Ṭawng zawi turin ka lo khap vat a, Damiena erawh a lo nui ruh ruh. "A lem sek hi a tam ṭhin ania," a lo ti fiamthu a, a lo kal hrim hrima ka lawm tawk viau mai, awm a tinuam ve em em tho a ni.

Dawhkan kilin kan ṭhu ho a, thingpui ka thlitsak nghal bawk a, Williama chungchang te pawh ka hrilh ve luam a. Rei pawh kan ṭhut hmain sitting room-a awmte chu an lo inzui phei a, Rawngbawla chu ka lo en ve kar tawh, ka u te pahnih ṭhu ve chu mak a ti deuh niin ka hria. Ka nu chuan, "Aw haw, i u te an lo leng a ni maw," a lo ti ve hlut a, Damiena zawkin lo chibaiin, "Kei chu min hre lo ang a," a tih chuan ka nu chuan a thlek deuh hu a, "Ka hmu tawh tlat chein ka hria," a ti ban charh a.

"Ruatbawihi te inneihni khan ka bulah i ding a," Damiena'n a tih chuan ka nu chuan a hrechhuak ve leh vat. 

Rawngbawla kal chhuak tur chu, "Anih Bawla muttui aw," tiin a au zui a, Rawngbawla chu a rawn hawi let zawk a, engtin phei chuan a chhang lo. A motor tlanchhuak thawm a awm hnuah ka nu chu thingpui ka thlit ve leh a, ka u chuan "Khawilam mi nge?" tiin a lo zawt kher a, hre reng chunga zawt a ni, a zawt chhan pawh ka hria.

"A...kan chhungte anih kha," ti maiin ka nu chuan a chhang a, ka lo duhkhawp lo deuh nen, "Mary u anih kha, ka nu a rawn kan a," ka lo tih zawm a, ka nu chuan min lo en tak nain ka en let ve lem lo.

"Anih chu a.." ka u chuan a ti nghut a. "Naupang vang hian kan la intlawhpawh tam ve a," ka nu'n a tih leh chuan ka u chu a lo nui suk suk a, thil dang a sawi leh ka hlau chuan mitmeiin ka lo khap vat bawk.

"I u te an awm tho a, ka mut san mai ang che chu..." ka nuin a ti chu ka lo aw rang tawh khawp mai. Bathroom-ah a lut leh te te a, chumi hnuah mu turin min kalsan a.

Ka u chuan zawhna min zawt nghal mawlh mawlh, "An intlawhpawh nasa viau elo? An nu hlui kha a uire i ti bawk sia?" a tih chuan sawi pawh nuam ka ti chiah lo, dar ka kan uk a, a hrethiam ve mai aniang a ner nung.

"Chuti anih chuan Ṭhiana, i thil hriat kha a dik vek ang a?" a'n ti zui a.

"Eng maw?" ka tih chuan a ṭhianpa lam a melh zauh.

Damiena chuan, "Alana nen hian mutual friend kan nei a, ka lo zawt mai mai a, a sawi dan chuan a doctor zirna senso velah khan annu chhungten an pui viau a tia, a sawi dan tak phei chuan, 'An nu zawk hi uire mahse an inla hrang thei vak lo ang, a car te pawh hi a puzawn hlui leisak' a tia," a ti teh duah a, chung thil chu ka lo la hre ngai hauh lo.

"Tunah lah naupang pawh Mary te in lamah an awm ania, damdawiinah lah Alana leh a nupui hlui, engtin nge hetianga i awm duh le, inpa nupui hlui unaupa vangin min rawn ko thul...i awmdan ka hmuh hian ka lawm miah lo ania aw..." ka u chuan a ti bul bul a, ka ngaihtuahna a buai deuh bawk nen chhang loin ka ṭhu ngawi ngul a, thil kal kual dan chu ka chhut leh ṭan tawh.

"I lo haw daih duh em?" ka u in a tih chuan ka melh mawl tawp a, Damiena'n a lo khap vat thung.

"Chutiangin an ti ngawt ngai lo, rilru fima ngaihtuah chi anih chu.." tih pahin Damiena chuan min lo thlek a, "Ka ṭhianpa Puia khan naupangin an ngaina lo che tih angreng kha a sawi tel a, buaina in nei em lo ang chu ti raw?" tiin min zawt zui a.

"A upa ber hi a nia min ngaina lotu tak chu, a naute pahnih hi chuan min ngaina vein ka hria," ka ti zawi sep a, thil zawng zawng erawh sawi a fuh lo, ka u hian a dawngsawng thiam pawhin ka ring lo a ni.

"Nang chu ni ila ka ṭhen daih ang," ka u bawk a ni.

"A mak sek," Damiena'n a lo ti hluk a.

"Hmeichhia hian inṭhen hi in hreh ngawih ngawih zel a, hrehawm deuh hian mi inah in awm reng peih a," ka u chuan a ti leh hram.

"Kum khat em pawh kan ka innei lo a, rilru siamfel zung zung chi a ni lo alawm," ka tih chuan min en vung vung a, "Thil zep i nei tlat hian ka hre ṭhin, damdawiina kan lo kal zan te khan in awmdan kha a nawm loh hmel ka tia, i chuang riau khan ka hre mai a, i pasal lah a lo nep em em bawk si.." a ti leh duah a, ka nuin a hre phak ang tih ka hlau khawp mai.

Ka hnuk a ulh deuh tlat a, ka mit a rawn vai deuh ruai bawk. "Khatiang kha sawi reng lo teh, min hnem zawk ta che..." tih pahin mittui ka hru zauh a, a lo ner nung thung.

"Ruatbawih, nupa nih tawh chuan thawh lawka haw ringawt ṭhin hi a ṭha lo, ngun deuhin ngaihtuah la, i theih loh tawp a thlen hunah emaw, inchhira let leh i duh dawn lo tih i chian hma chu haw duh miah suh, a chang chuan beidawn hi a ṭha ania, i beidawng anih loh chuan tum lui ṭang ṭang mai rawh," Damiena'n a tih chuan a dikin ka hria, tunah hi chuan inṭhen ngaihtuah thei ka ni lo, chhiat kan tawk mek a, ka pasal pawh a mangang a, chutih laia tlanchhiatsan chu ka thei bik lo a ni. 

Inchhir hi ka hlau a, ka siam ṭhat theih tawh loh, pawi ka tih vawng vawng tur thil tih hi ka hlau a ni, an hun liam tawh vanga inchhir ngai lo te hi mi awhawm ber an niin ka hre bawk.

Ka u te haw tur chu pawn thlengin ka va thlah a, ka u pawh a ruih a reh hman aniang bike khalh a tum uk a, Damiena nen kan lo hnial rang khawp mai. An tlan chhuah hmain kawngsirah a va zung leh te te a, chutia bike bula Damiena nen kan lo din laichuan sawi duh nei niawm tak hian min en leh ṭhin a, "Eng nge ni?" ka tih chuan a rawn ding hnai deuh a.

"Harsatna i neih anih chuan min lo hrilh hreh bik lo la, i man pawh ka ei a, i u ve tho ka nih hi aw.." nelawm deuh hian a ti a, ka lo nui mai thung.

Ka u lo let leh lah chuan, "Hrehawm i tih chuan i lo haw daih dawn nia," a ti leh pek a, "Kal mai mai rawh, ka nu te bulah engmah sawi a ngai lo ania, an rilru a lo hrehawm phah palh ange," tiin ka chah a, "Sawi awm chu ka hria alawm, a hrilh chi nang," a ti ve mai bawk a, an tlan chhuak chu ka thlir zui vawng vawng a, ka rilru pik lutuk pawh a zia ta deuh.

Khuma ka mut hnuah Alana chu text message ka thawn a, "Rawngbawla kha a rawn kal a, mi a rawn vau ringawt mai a, ka lawm vak lo ania, i kamkhat lo anih chuan i chungah pawh ka lawm bik lo ang," ka ti a.

Rei vak loah lo chhangin, "Engtikah nge a lo kal a, engtin nge a vau che?" tih a rawn thawn let a, "Naupang ho thlavang a hauh a ni ber, mi a zah lo mah mah, eng ka ti pawh ni loa mi vau ringawt kha ka lungawi lo," tia ka chhang chu a rawn chhang let tawh lo a, a en tih erawh a hriat a, sawi tur engmah a nei lo nge mawni, minti lawm lo zual hle bawk.

Zing ka tho chu eirawng ka bawl sawk sawk a, ka nu lo tho chu damdawiina kal a duh em ka lo zawt thuai a, "Duh reng e, ka bp te check tir pah ka duh bawk a," a ti a. Mahse, kal tuma chaw kan eihma tehlul nen tukṭhuan kan eikham hnu lawkah Alana a rawn thleng a, a chau tawngkhawng aniang a hmel a pawr fap a, a mitmeng aṭangin a chau hle tih a hriat theih. 

"Mu phawt la, tlai lamah i kal leh dawn nia," tiin chawei ka siamsak nghal a, a eitlem angreng viau mai. 

A chawei kham chu a inbual nghal a, keiin a thawmhnaw hakthlak a lo hawn te chu ka lo su bawk a, pindana ka han chhoh leh chuan a lo mu tawh a, mu chungin phone a lo la khawih thung. "Naupang ho chu engtin nge, an la cham rih dawn em ni?" ka tih chuan, "Tlaiah an lo haw ang, Mary nu leh pa te an zin dawn a, lo haw se a ṭha," a ti a, min en lem lo.

"Williama nu chu thlak te a ngai lo em ni?" 

"A ngaih pawh ka ring lo,"

"I zawt lo em ni, keipawh ka awm thei tho asin,"

"Haw tir ka tum pawn a duh lo va, a harh hma chu kalsan a tum lo, nangpawh ina i awm loh chuan ka nu a ngaihtuahawm, vawk in vulh hnem bawk si," a ti leh mai a, a phone dahin puan a sin ṭha a, a mit a chhing zui bawk.

"Tikhan i tia, ngaihsak lo angah mi i ngai leh si ange," ka ti chiah chu a rawn meng leh rang khawp mai.

"Ngaihdam ka dil tawh che kha.." a ti hmuk a, thawk ka lo la hak.

"Khatiang thil i sawi hnuah ngaihdam min dil leh ringawt tur a ni em ni, i rilru puthmang kha a nia ka duh loh chu..." ka ti vin ve chiam a, a rawn ṭhu chhuak chu ka lo en ve kar bawk.

"Ngaihdam dil bak chu eng nge i duh a, Rawngbawla pawh ka khak tawh kha, ka chau lutuk, min mut tir mai mai teh..." a tih hnuah a mu leh hmak a, sawi ngaihna pawh ka hre lo, lungawi lo chunga ka ngaihṭha awm mai mai a ngai leh dawn a ang.

Inhnuaia ka chhuk chuan ka nu chu a lo insiam fel at mai a, "I han kal dawn em ni?" ka tih chuan, "Mapuia a lo haw leh daih sia, keimahin ka han kal mai ang chu ka ti, vawk chaw kha i lo chhum anga, a pek lam chu ka rawn ti dawn nia," a ti zung zung a, buhfai thlak zat tur te min hrilh leh luam hnuah a kalchhuak a, in tihfel ṭul a awm rih lo bawka chhun lam chu inhnuaiah ka awm deuh chawt a ni ber.

Dar 1 pelhah ka nu chuan min lo call a, Alana a tho tawh em tih min lo zawt a, a la thawh loh thu ka hrilh chuan, "Chaw ei nghal law law rawh se, vawksa emaw bawngsa kha lo kang la, tiffin i lo ken tir dawn nia," a rawn ti a, "Awm tlang i tum em ni?" ka tih chuan, "A lo thlen hunah ka rawn haw ve nghal ang, vawk chaw pawh lo pe leh law law mai rawh aw," a ti leh mai a, vawk chaw pek hi chu nuam ka tih vangin ka hnial lo khawp mai; mahse, tiffin keng tura a ti chu a tan anih loh hmel riauin ka hria a, Mary tan anih ka ring ringawt.

Engmah phei chu ka zawt buai duh lo a, phone kan hnuah pawh ngaihtuah zawm loh hram ka tum a, inngaihtuah buai a, mahni inkhawngaih leh ringawt ṭhin hi ka sim a ngai ni tein ka hria, hetiang thil vanga ka rilru hi chawh buai loh hram dan ka ngaihtuah zawk a ngai, anih loh chuan rilru ṭha ka pu thei lo vat dawn tih ka hria a ni.

Vawk chaw ka chhum zawh hnu chuan in chungah ka chho a, a la hma deuh nain eirawng ka bawl ṭan ta tho a, ka ril a ṭam viau nain engmah eichak ka nei lo. Ka pum lah chu a ri a ri mai a, ṭam hnemah tiin thingpui ka insiam a, ka in dawn chauh tihah ka pasal chu a lo chhuk a, a duh ve em ka lo zawt thuai a.

"Duh lo mai, sa lo siam teh aw....." a ti a, fridge a hawng zui zat bawk.

"Eng sa nge i ei chak a?" ka tih chuan, "Chak pawh ka nei hran lo, ka nu khan tiffin lo kensak rawh a rawn tia," a ti sam mai a, ka phur lo angreng khawp mai.

"Mary maw...a nu te chu an zin tawh em ni?"

"Zanin an tiin ka hria,"

"A nute'n an pe ngai lo em ni?" min lo melh vut a, "Engati nge keiin ka siamsak kher a ngaih a?" ka ti leh zat.

"Eng nge i awmzia, mi hrang ang a ni tawh alawm, William-a a awmpuia, tiffin vawikhat ken sak chauh te chu tih theih loh tur a awm em ni?" Ka lo melh tlawk tlawk a, engtia tam nge min tih beidawn a tum le.

"Mi hrang anih thu chu sawi duh lo zawk teh, ka tan leh i tan tunge anih chu kan hriat kha, 'Mary, Mary...' in ti reng a, a eitur siam turin min ti thul, a chhungte pawh an awm reng a, ka siamsak kher a ngaih chhan hi ka hre lo ania aw..." ka aw chu a ring viau tawh, ka rilru lah chu a han na em em khawp a, engkim takmeuh hian min tilungawi lo.

"Anih chuan keiin ka siamsak dawn em ni?" pawr zeta a rawn tih chuan, "I duh leh siamsak rawh," ka ti vin ve hlak a, kan inmelh rum dun khawp mai.

"Engatinge rilru kawi hi i put tlat a?" min ti zawmah lehnghal a.

"Hetiang rilru hi engati nge min puttir tlat ni, i hah a, i chau tih chu ka hria, ṭha taka lo chhawn che pawh ka duh; mahse, in ti ve mah mah tawh a ni, nizan lawkah a unaupain min vau a, mumal tak pawhin min sawipui i tum lo, i thiam loh vek zawk anih hi.." ka thingpui no chu ka chawi lawk a, tui dehnaah ka va leih bawrh a.

"I va mak mange aw.." a lo ti leh chu melh pawh ka melh peih tawh lo.

"Tiffin chu ka lo siam dawn nia, nidangah erawh ka ti nawn tawh lo ang," ti a chet zui mai ka tum chu, "Siam a ngai lo," a lo ti leh hmuk a, ka sa pup pup mai, ka thinur takzet.

"Ka siam chak lo e, an hausak em kha, a duh leh lei mai sela ti nia.." ka ti ta hmak a, ka inhrosa a ni ber.

"William-a nu angin en ve mai ta che, ka nupui hlui a nihna i hre lian hlur anih kha, mi hrang a ni hleinem," thawk ka lo la hawk a, a chhangin mi hrang, a changin mi hrang a ni lo, engtia ngai turin nge maw min beisei ni.

"William-a nu a nihna hi ka hre hliah hliah zawk asin, ka hriat duh zawk chu eng atan nge min neih, i fate enkawl turin min duh lo a, kei aichuan kawng engkimah i ring zawk a, chhungkua ang reng in la ni, hetah hian eng nge ka lo tih ve, in awmpui ang tur chauhin em ni min neih a?" ṭah hmuam ṭeuh chungin ka ti a, beidawng zetin ka melh tlawk tlawk.

"I duh duh dan khan awm teh, nangmah chauh i inngaihtuah anih hi," tia min inhersan chu ka la na ngang mai, ka apron hren lai ka pelh sawk sawk a, "Ka haw dawn," tih leh in chung lam pan ka rual a, he chhungkuaah hian ka leng ve lo tih chu ka rilrua a thawh dan a ni, a tua te mah hian min mamawh lo va, ka awm ve hi an duh lo vek zawkin ka hre tawh.

Mahse, pindana ka lut tur chiah chu min rawn pawt her sawk a, "Eng maw tih i tum a?" pawr fahrana tih pahin min rawn hnaih nghal ruak mai.

"Kan inaha ka haw dawn, ka chhuahsan dawn che u," 

"I haw lo ang,"

"Ka haw ang," 

"Chhuak rawh ka ti che anih loh chuan i chhuak lo khawp ang, han tum lui na teh," tiin min la vau zui a, chhan pawh ka chhan leh hmain pindanah min nam lut rawk rawk.

"Min kaltir mai zawk teh, i fate nena in mamawh ngawih ngawih chu in duh leh ko haw zawk rawh u," ka ti vin leh chiam a. Rinsangi ṭawngka pawh ka hre kham zozai tawh, ka chhuak lo anih chuan a nu a lo let theih loh thu a sawi fo kha maw le.

"Ṭawng ṭawng lo mai teh, min uiresantu khi ka dam chhungin ka ko haw lo ang, i ngaihtuahna kha a tak emaw ti vek suh, keipawn hetiang tehhrepa inkungkaih hi ka duh bik hleinem, ka ning ve ngawih ngawih asin.." a tih chuan awih lo zetin ka melh a, ning ngawih ngawih anga a insawi te phei chu ka awih lo hulhual a ni.

"I nin chu ka ring lo, inlakhran pawh i duh tak tak lo, fate vang i tia, theih loh chhan dang i nei aniang," ka lo ti let leh salh.

"I duh duhin ngai rawh; thudik chu i la hre mai dawn alawm, ka la duh emaw i ti zawk em mawni, an chhungkaw lak aṭanga hran hlak ka duh vangin alawm ka neih che," chu thu chuan min deng dawt a ni ber, chu chu maw min neih chhan ni a, min hmangaih vanga min nei a lo ni lo a maw?

A nupui hlui chu lo duh tawh lo pawh ni tehreng sela kei ve hi engati nge, a chhan leh vangah hian ka tel ve miah lo tihna maw? Anih chuan kei chu.....ka mittui a rawn luang zung zung a, ankhuma chhan let leh ka duh tehlul nen engmah ka sawi thei tawh lo, ka hnuk a ulh tlat a, ṭah hawm hawm mai ka duh.

"Ṭap lo teh.." tih leh min rawn pan a rual a, ka lo ding sawn rang khawp mai, khum bula tukverh bulah chuan ka va ding a, thlanglam hawiin mittui ka hru zauh zauh reng.

"Hetianga awm lo hian engahmah ngai lo angin awm zawk la a ṭha asin maw le, Mary bulah pawh i rilru a tih buai phak lohzia te lantir zawk tur ania, engahmah ngai lo anga i awm chuan ka tan pawh a nuam zawk ang,   hetianga kan awm te hi an hriat ka duh miah lo ania, an hriat chuan min nuihzat duh maithei a ni.." hnunglam aṭang chuan a ti mawlh mawlh a, engtin mah ka chang let tawh lo, hmanrua chauh ka ni tiin ka inhrilh ru mawlh mawlh a, ka ngaihtuahna te chu a ruak ngawih ngawih, beidawnga min siam tur hian hun a duh rei mah mah zawk a lo nih hi.

A insiam chhung zawng pawh chuan tukverh lam hawiin ka ding a, min be mawlh mawlh reng. "Eirawng chu bawl rawh aw, ka nu a lo haw dawn a, chaw te kha i lo ei lo ange.." insiam paha a tih pawh chuan ka la ngawi reng.

"Lo haw miah suh aw, inṭhen ka duh lo ania," awki damdiai hian a ti leh a, eng atan nge awm sela min la duh le ka lo ti rilru a.

A insiam zawha a phone lo ri chu a nu call a niang, "Ka lo kal dawn chiah a, i duh leh lo chhuak ve nghal mai rawh, hmun dangah pengkawi loin i lo haw tlang dawn nia," a ti luam a, a biak zawh hnu chuan ka bulah lo kalin min rawn kuah deuh hlun a, ka lo ṭang ru ṭun mai.

"Inhau tawh lo teh ang," a ti zawi deuh sup a, ka biangah a rawn fawp zauh bawk. Ka chhan loh vang chuan min en vang vang a, "Ka kal dawn ania," a tih leh pawh chuan ka chhang chuang lo, ngawi rengin a kal chhuak a, rei vak loah kawt aṭangin a lo hawi chho a, min rawn en deuh vang vang a, a tlan chhuak pawh chu ka thlir mawl tawp tawh.

A tlan liam hnu chuan u Sena biak ka tum a, a chhang thei hlek lo mai a, min rawn hruai sela ka duh tehlul nen, kan inṭhen dawn emaw, ṭhen dawn lo emaw tun dinhmunah hi chuan haw bak duh ka nei lo, hma hun chu ka hre lo va; mahse, tuna ka rilru chu he in chhuahsan chauh hi ka ni, ka chau zo, engkim hi ka ning hluah hluah a ni.

Call leh ka tum laitak chuan a lo call back a; mahse, ka u ni loin Damiena a ni. "Engati nge, khawiah nge u Sena?" ka tih chuan, "Nizanah khan a phone a theihnghilh a, a la rawn bang lo aniang, ban paha a lo lam chu ka ring," zangkhai deuh hian a rawn ti a, ka rilru chu a buai ru map.

"A va pawi tak," ka ti ringawt a.

"Va pe turin min duh deuh em?" a rawn tih chuan chu em chu ka tih tir hreh, "Ngai lo mai, zanah ka be mai ang," ka ti chuai raih a.

"I aw a va dik lo ve, thil thleng a awm em ni?" a tih chuan ka chhang mai lo.

"In nau chu a ṭha lo deuh nge, min hrilh hreh lo la, ka lo ṭawngṭaipui ve cheu a nia," a rawn tih leh takah chuan ka rilru no a rawn chhuak a, ka ṭap titih ringawt mai a, a zia lo kher mai.

"A ṭha lo viau elo, ka lo kal dawn em ni, khawiah nge i awm a?" a rawn ti hlut a, insum a har a ni.

"Damien, min lo hnem teh.." ka ti ta thlawt a, tu emaw talin min hnem sela ka ti, ka rilru dam lo mah se, ka awm a nawm phah ka ring.

"Engtin nge ka hnem ang che?" zawi deuh taka a tih chuan, "Haw ka duh, ka haw duh a; mahse, hetiang thlen ngai lo hian ṭha tlang thei ila ka duh zawk fe bawk si a, ka rilru hi a mumal lo i ti em?" hnuk ulh ṭeuhin ka ti a, ani chu a ngawi deuh vang vang.

Rei dawn a ngawih hnu chuan, "Haw i duh a, haw aia duh zawk fe i nei bawk a ti raw?" nghet charh hian a ti a, chu thu chuan min vilh ngut ngut, ka rilru dik tak a ni, heti reng anih dawn chuan haw ka duh ngei a, mahsela....hetiang lo hian awm ho thei dawn ila chu awm ka duh lawi si a, duh thlang thei lah ka ni der si lo.

"Mi beidawng hmel hi ka hmu tawh, an mitah chiang takin a lang ṭhin, nang chu i ṭap a, i inkhawngaih fo a; mahse, vawikhatmah i la beidawng ngai lo. I tleirawl tirh aṭangin ka hria che a, i ngaihzawng hmasa i ṭhen laite pawh ka hria. Inhnemna i mamawh lo, inbunruah zawng a ni i mamawh chu, lam ṭang tumah i nei lo anih pawhin nangmah kha i inṭan tlat tur a ni," a ti charh charh a, a thil sawi chu hrethiam vek lo mahila engtin emaw riau hian min hneh a, min lo hrechiang viau em mawni tiin ka inzawt bawk.

"Inchhir leh ka hlau a, inchhir leh mai mai tur chuan ka upa tawh lutuk; mahse, ka beidawng a ni," ka ti halh a, thutlukna siam ka ngai tih ka inhriat vang a ni.

"Duhthlan tur hre loa i rilru a chiai anih chuan, i awm nawmna tur, i hlimpui tur ber thlang ang che, khawvelah hian duhthusam a awm tak tak lo. I beidawn hun a lo thleng anih pawhin pawiti suh, beidawn chhan tur hi tam tak a awm reng a ni, engmah lo atana hun khawhral aichuan beidawn chu a ṭha fe zawk a.." a ngawih deuh vang vang hnuah...

"Chuan, i beidawnna chu hawisanin bung thar i kai thei tawh tihna a ni ang," a ti zawi ruih a.

End of chapter - 6