I NGHILH ZAWK ANG (CH - 7) by Ahmangaihi violette khiangte

I NGHILH ZAWK ANG

by Ahmangaihi violette khiangte

Chapter - 7

Thawmthaw hak thlak tlem chu bag-ah ka dah lut a, ka mamawh zualpui tak tak chauh a ni ka khung ni. Ka chhungten min tir haw leh mai angem, emaw ka pasalin min lo lam leh thuai angem tih lam chu ka ngaihtuah thui duh rih lo, hahdam taka awm ka duh, ka thaw pik leh tawt lutuk hi khawiah emaw paih bo ka duh a ni ber, buaina lak aṭanga tlanchhiat ka duh ti ila a dik mah ang chu.

Sana ka en chuan dar 4 a ri dawn tawh a, ka nu lo thlen hmaa chhuah ka duh vangin ka hmanhmawh viau bawk. Kawngka chu ka kalh sawk sawk a, hmanhmawh deuhin ka scooty dahna lam ka pan a, ka han start chuan a nung ve mai; mahse, ka han ṭhu rem chiah chu thil dik lo a awm tih ka hre nghal a, ka han en chiang chu a ke a lo thep ve ve chu niin, a mak ka tihzia chu aw...

A ke hniha a thep danah tu emaw tih chawp a ni tih a chiang viau a, ka rinhlelh berkher lah chu. Amah bak rinhlelh tur an awm lo, Alana tih ngei a ni. Ka haw a hlauh vang anih ngei ka ring bawk.

Ding chungin thawk ka han la vang vang a, tih ngaihna dang a awm lo, helaiah taxi tlan hmuh tur a awm ve mai mai lo a, ka tum lui dawn anih chuan kea thui fe ka kal a ngai dawn. Ka nu kha a lo haw mek emaw a nih chuan kawng lakah kan intawk thei tiin ka ngaihtuah rauh rauh a, rilru a buai map mai. Ka kal ang nge, ka ṭhulh leh rih ang tiin ka inkhap buai a, hun lah a ral duak duak mai bawk si, inngaihtuah buai vakna hun pawh ka nei tawh lo.

Kal ka han tum deuh uk a; mahse, ka kal a rem ngang lo anih ka ring min daltu ka nei leh ta. Kan in lampana car sen lo tlan ka han  hmu a, naupangho an lo haw anih hmel e. Kawt aṭang chuan ka lo thlir vang vang a, an lo tlan hnaih takah chuan ka nu pawh a tel ve tih ka han hmu a, ka thil tih tum chu hriattir chi pawh a ni lo ang. 

Kawta motor a rawn din chuan an lo chhuk sap sap a, ka nu chuan min lo en phawk viau mai. "Kal chhuah i tum em ni?" a lo ti he haw a, ka bag chu hnunglamah ka han ak ṭha deuh a, dawt sawi mai chu ṭhaa ka hriat vangin, "Damdawiinah kal ka tum a," ka ti ta ngawt a, naupangho an lo ṭawng ve avangin min zawt zui ta lo.

Inchhunga ka inzui luh hnu chuan cabinet-ah bag chu ka va thukru leh rih a, Rawngbawla lo lut lah chuan mi a han en chik khawp a, ka kalna apiangah chuan min en zui ni berin ka hria. Eirawng lah chu ka la bawl zo der si lo a, ka nuin min zawh hmain ka che ta zung zung bawk.

Ka nu inthlak zo lo let leh chuan, "Mapuia kha tiffin i lo kentir nghal ang chu ka tia, engmah a rawn ken ta si lo a.." tih pahin ka chawhmeh siam chu a lo en a, vawksa ka chhum mek tih a hmuh chuan zawhna mitmengin min en zui a, chhan dan thiam a har khawp mai.

"A la hma tho alawm.." ka'n ti ngawt a, a lo nur nang thung.

"Ka lo haw dawn khan chaw dawh a hun tawh a, a tlai tawh lutuk zawk alawm, duh leh dawr ami lei mai rawh se, deliver thei an awm ṭhin kha.." a ti bal bal a, vawk chaw ka pe tawh em min zawt zui a, chu pawh chu ka la ti chuang lo.

"Ka zuk pe lawk ange," ti a kal mai ka tum chu, "Eirawng kha lo bawl zawk rawh, keiman ka zuk pe ang," a lo ti nghat a, hnial pawh ka hnial ngam lo, a awki aṭang pawhin a lungawi zan lo tih a hriat theih a ni.

Ka nu kal chhuah hnu chuan Rawngbawla chu dawhkan bulah a rawn ṭhu phei a, ka be lo ang ka lo tih rilruk laiin amah zawk a lo ṭawng hmasa a, "Tlan i tum a ni maw?" a ti khauh mai. Phawk zetin ka va melh a, "In pain min lo tir, Williama harh hma chu khawihah mah i kal dawn lo, thil awmzia kan hriat phawt a ngai, " a ti zui a, min melh rum ṭha viau bawk.

"Eng a, engti turin maw Alana'n a lo tirh che?"

"Dang tur chein aniang chu..."

"Nang khan min dang lo ange.." ka aw chu a sehchilh rap a, ka sa deuh phat phat.

"Ka dang khawp ang che, tlanchhiat kha chu tum buai lo zawk rawh, i fihlim tak leh i duh chuan i la chhuak dawn nia," min tihkhum leh salh a, min han tham loh em em zia chu aw.....

"Engthilah chuan nge fihlim ka ngaih a, tihsual ka neih pawh ka va hre lo ve," zam duh bik loin ka en let siah a, ani pawn min melh deuh ngar ngar tho.

"Sangsangi'n a hmu vek che, keiphei chuan ka ring lo hrim hrim che, hmeichhe naupang pawh kutthlak duh i nia lawm.." ro zetin ka lo nui a, he chhungkua tehhrep hi aw, engah nge ka lo inbarhluh tehchai ni.

"I tunu saw kut ka thlak lo, Pathian hmingin thudik anih chu, naupang dawt sawi vanga mi in ring lo anih chuan i thu thu, keichuan insawifiah reng hi ka tum tawh lo, ka duh chuan ka haw ang, nanga min lo dan tur pawh ka ni lo ve," ka ti fak fak a, ka thinrin lutuka ka tawt ṭun mai a, duh ang pawhin ka sawi thei lo zawk a ni.

Rawngbawla chuan eng emaw sawi a tum zuau a; mahse, Sangsangi thawm vangin pindan lam kan hawi rual zawt a, Sangsangi lo phei chu a rawn pawr khawp mai. "Ka thawmhnaw bawm saw i hai a ni maw, ka body mist a buak vek saw, tinge i lo khawih ve ngawt, vawikhatmah lo khawih tawh suh," a rawn ti ṭeu hlar a, he naupang han nasatzia hi chu aw.

Chutih laiin Rawngbawla chuan mitko min lo san khum ralh a, an hahthlak ka ti hluah hluah, mahni ka inhmu te rawih rawih mai a, ka inkhawngaih takzet, a tira ka rilru puthmang te kha ka han ngaihtuah kir a, keima chungah ngei hian a pawi ka ti a ni, ka thiam loh liau liau, ka ngaihtuah tlem luat vang vek a ni.

"A baw tam viau em ni?" thum duta Rawngbawla'n a tih chuan, "A baw zo vek," pakhat chuan a lo ti hmak a, "A dang i lei leh thei reng alawm," Rawngbawla'n a ti ve leh a.

"Ka ui vang a ni bawk lo aw, ka thawmhnawah a nam vek a, rim ngai hlir ka duh hleinem," pakhat chuan a lo ti leh pang pang a, "Min vin suh," Rawngbawla bul angreng zeta a tih takah chuan Sangsangi chu a ngawi hmak a, ka lam lo hawiin min rawn melh rum leh kher.

"Perfume i dah tih ka hre lo a, in thawmhnaw ka lak pahin ka ti baw palh anih dawn kha, khatiang rimte chu sukin a reh mai zel alawm," lawm lo angreng zet a ka tih chuan, "Nangman i su ang," a lo ti vei nghat a, inherin sitting room lam a pan zui bawk.

Ngawirengin eirawng ka bawl zawm a, Rawngbawla ṭhu chu awm ve lo ang hmakin melh pawh ka melh duh lo. Ka nu lo chhoh hnu chuan eirel ka peih zui a, "Ka eichak lo em mai, ka nuam lo deuh bawk nen ka han mu zal rih teh ang," tiin inchung lamah ka chhohsan ta daih a.

Khumah mu chungin ka nu biak ka tum a, phone a la thei mai lo, a dah zawi leh viau anih ka ring, nidangah pawh a heti fo ṭhin. Mahse, minute 20 vel hnuah ka nu chuan min lo call let a, "Aw Mate, in chungah ka lo awm daih a," aw dam diai hian a rawn ti a, ka nu aw chuan min vel lo chauh, ka ngai ngawih ngawih a ni ber.

"Nu, tunlai chu kan chhungkaw boruak hi a nuam lo lutuka, lo haw rih ka chak khawp mai," tih chu ka sawi hmasak ber a ni, min sawm ka beisei ru hle bawk.

"I rilru a hah ka ring reng a, i buai viau loh chuan lo leng chho ṭhin rawh, keimahin in ka nghak a, keipawh ka khua a har alawm," a ti a, ka thil sawi chu a man pha chiah lo a ang.

"Rei deuh awm tura ka lo haw anih pawhin mak lo ti suh aw," ka han ti leh halh a, a hrethiam ta aniang, "Buaina in nei a ni lo maw, i ṭawng dan a va dik lo ve aw," a rawn ti ta vat a, engkim chu hrilh nghal mai ka duh, inbunruahna ka duh ngawih ngawih a ni.

"Mary te chhung hi an huaisar angreng lutuka, a u lah hian min rawn tlawh zut a, mi a tham lo bawk si a, chaldelh deuh deuh hian min ṭawng khum reng a, min vau ziah lehnghal a, Williama nat danah te hian min ringhlel tlat a, Alana lah hian engmah hi a ngaihsak tak tak si lo, inchhungkhur boruak leh a fate awmdan han chik ve pawh a nei lo, a nupui hlui hi a dah lian hlur zawk tein ka hria.." ka ti duah a, ka nu chuan engtin tak ngai ang maw.

"A hrehawm ka ti lutuk, rawn hawsan mai te ka duh rum rum tawh.." ka tih leh laichuan, "Khatiang kha ka rinlawk vang alawm nei lo la ka duh em em ni, i duh em avangin ka hnial lui lo mai mai che a, ka ngaihtuah thleng pha vek asin.." a rawn ti vang vang a, chutih laichuan ka pa ṭawng thawm ka hria a, "Matei em ni?" tiin ka nu chu a zawt bawk.

"Lo haw ka duh a tia, buaina an nei anih hmel hi," ka nuin a tih chuan, "Eng buaina nge a?" a ti leh zat a.

"I pa i be duh em?" ka nuin a rawn tih chuan ka ngawi deuh vang vang.

Ka chhan mai loh vang chuan, "Alana i hrilh ve lo em ni, nupa chuan sawi dun zel a ṭha a nia," a rawn ti leh a.

"Hrilh ve bawk e, nizanah pawh ka hrilh alawm, nizana a ṭawngkam phei chu ka rilru a na lutuk, a fapa hi ka fa anih ve loh vanga rilru hah ve loah mi a ngai a..." ka ngawi deuh vang vang a, sawi chhawn pawh a nuam ka ti lo, minti hrehawm zual.

"Khawi maw ka lo be teh ang?" ka pa'n a tih ri ka hriat vangin ṭawng leh ka tum chu ka ngawi vat a, ka pa'n phone a lo chhang zui a.

"Hrehawm i ti viau em ni?" a rawn ti nghal tawl.

"Ka tuar thei tawh lo.." ka ti tham ṭiak a, ka mittui a luang thla ngiai ngiai bawk. Ka pa chuan min zawh chian ve ka rin laiin, "Chuti anih leh rawn haw daih la a ni mai alawm," a rawn ti hmiah mai a, min ti hamhaih lek lek zawk a ni. Haw lo tura min tih mawlh ka hlau a; mahse, ka hlauh ang engmah a sawi dawn lo tih ka hrethiam nghal a, ka thawl phah huai bawk.

Engtika haw nge ka tum min zawt a, "A remchang hmasa berah a ni mai, ka scooty ke a chhia a, ngawi rengin ka haw ang nge ka hrilh ang tihte ka ngaihtuah chiang phawt anga," tiin ka pa chu ka chhang a, "Ni e, hmanhmawh tut tut lo la a ṭha, pasal ṭhen turin ka duh lo viau na chein tuar hram hram tura intih hi ka duh lo zawk a, tumah hi intihduhdah tir miah lo tur, hrehawm i tih chuan i lo haw vang vang dawn nia," a ti leh charh charh a, chumi hnu chuan ka nuin phone a lo chhang ve leh a.

"Fim tak khan inngaihtuah la aw, i thutlukna apiang chu kan pawmpui zel mai dawn che a keini chuan, nangmah kha i pawimawh ber ania," a lo ti ve leh a, kan inbe zo phone ka dah chiah chu ngaihtuahna a buai map map mai.

Alana chu message thawn ka tum ṭhin a, ka thil type chu ka nawt reh ngun viau bawk. Chutia ka sawi tur ngaihtuaha ka buai laitak chuan ka nu aw ka hria a, "Mapuia'n a lo phone a, Bawihtea chu a harh tawh anih chu," a rawn ti lang lang a.

Khum aṭang chuan thoin pindan kawngkhar ka va hawng a, "A va lawmawm tak, kan chho dawn em?" ka ti nghal vat a, "Insiam rawh, kan vaiin kan chho dawn nia," tiin ka nu chu a kal leh nghal mai a, keipawh chu khawmuang tawh loin ka insiam mawlh mawlh a, chutih laia ka phone lo ri chu Alana call a ni.

Ka lak rual chuan, "Bawiha chu a harh tawh e, ka nu kha ka rawn hrilh zo chiah a,.." zangkhai deuh hian a lo ti a.

"Min lo hrilh zo chiah hei, lo chhoh kan tuma keipawh ka insiam mek," ka tih chuan, "Mahse, a harh chiang lutuk lo ania, biak pawhin mi a la chhang lo a, a nu pawh a hre rih lo.." a ti leh halh a, ka lawm ve hman tawh tehlul nen.

"Engati nge mawni dawn le..?" ka ti vang vang a.

"Aaa...a la harh tir em a, a pangngai leh thuai mai ang, ka nu kha lo hrilhfiah la, naktuk lamah pawh lo kal mah ula a pawi lo ang," a ti leh a, "Zanina lo kal a tum chuk chuk asin, kan vaiin chho ang a tia," ka tih chuan min hnial zui lem lo. "Rba kha a la awm ti raw?" a rawn tih takah chuan ka hrechhuak leh zawk a, "I rawn tir a ni lawm ni?" ka ti deuh nghat a.

"A awm chuan a ṭhat chu, a motor khan in lo kal dawn nia," a ti a, engmah pawh ka sawi leh hmain phone a dah zui daih. Thawk ka la deuh hawk a, engmah hi a lakah hian beisei san theih a awm lo anih hi ka ti rilru nauh nauh a.

Pheikhawk ka bun a, sam te ka khuih leh thuak thuak a, ka inpeih thawkhat viau tawh. A vawh takah tiin kawrlum hak ka rilruk a, ka va inhai buai lak tak chuan pindan kawngkhar rawn nam deuh dat dat thawm ka hria a, ka leh hawi rang khawp mai. "Tu nge ni, lo lut rawh?" tia ka chhan zawh rual chuan a rawn innam hawng a, rin loh deuhin Naomi a lo lang a.

"I pi a hman tawh em ni, ka lo chhuk dawn chiah," kawrlum hak pah chuan ka ti zung zung a, a lam ka va hawi chuan kawngkhar bulah a ding zum zat a, a hmel chu a dik lo riauin ka hria.

"I nau a harh chu a lawmawm ngawt mai ti raw?" tiin ka han nuih deuh var var a, min nuih let ve lo chu mak ka ti angreng.

"Lungawi lohna nei te i va ang ve a, i tûm deuh bur maiin ka hria, i u nen in..." ka ṭawng laklawh laitak chuan, "Lo kal ve suh, kan kal chhungin haw ru daih rawh," a lo ti reuh a, ka ṭawng lai chu ka tawp chiang viau a ni.

"Engvang chuan...?" nuihza lek lek hian ka ti a, fiamthu hmel a pu mang reuh si lo a, chu aimah chuan hlauhthawn nei a ang ka ti.

"Engati maw ka haw ruk ang?" ka ti nawn leh vat a, ka aw pawh a chang viau.

Min en deuh ran ran a, a mitmeng mawlh chu a dik lo, eng emaw...ni lo tu emaw a hlau a ni. Chutah, beisei loh lutuk thil a rawn sawi a,  "William-a a thih chuan pu Rba'n a that dawn che," a ti mauh mai.

"Engtin maw i tih?" ka ti hluai a, ka va kal hnaih ruak bawk.

"Tlaiah khan an sawi ka hria a, William-a a thih chuan ka that dawn chiang khawp' a ti che a, a pa pawh a awm ve," a'n ti zui a, ka lo ka hau..!!?

"I pa hriat laiin chuti chuan a sawi a maw?" 

"Aw, damdawiina kan kal hmain apa chu a lo kal a, pu Rba pindana an sawi lai ka hria alawm, apa chuan, 'William-a harh hun nghak rawh, a harh hma chu engtin mah lo ti lo ang che,' a tia, an inhau miah lo," a ti leh ta zel a, ka â deuh riai mai hian ka hria, ka thluak chu a nu bulh a, sawi ve mai tur pawh ka hre lo, ka hrilhhai let der a ni.

"William-a harh mah se nang chu haw daih rawh, an sual em mai, au pawn hnawhchhuah ngei ngei che a tum a, anu leh apa an inngeih tawh bawk sia, au chuan tihduhdah che a tum lutuk," a tih leh pawh chuan chhang loin ka en tlawk tlawk a, "Kan kal hlanin lo haw daih rawh aw," a ti leh reuh a, a rilru natzia chu aw...he inchhunga ka hma ngai ve tak taktu, min duhsaktu awmchhun lah hi heti mai te hi a nia si a, a seilenna tur chhungkuaah hian a rilru thianghlim hi a la hloh ve mai lo ang maw ka ti.

A banah ka va chulsak ringawt a, ka hnuk a ulh ṭun mai. Chutih laichuan ka nuin min lo au a, an inpeih tawh thu a rawn sawi a. Naomi sama chul leh pah chuan, "William-a a harh tawh alawm, engmah hlauh tur a awm lo, i pu Rba chuan i nau chu ka tihnat emaw a ti mai mai a, William-a'n a tluk dan a sawi hunah an hrethiam mai dawn alawm," tiin ka'n ṭawng thlamuan ve leh rih.

"Haw tho tho rawh, an tihduhdah dawn che chu..." a lo la ti ve fan a.

"Haw dawn e, ka haw ngei ngei dawn alawm; mahse, a ruka tlan chhuah chu ka duh lo a, i pa pawh ṭha takin ka hrilh ang," tiin ka tum dan chu ka hrilh ve a, a lungawi aniang chu a hmelah pawh a awm a nuam sawt tih a lang. Hetiang tehhrep hi ni lo ila kan han innufa theih dawn tehlul nen..

Inhnuaiah kan inzui thla a, kawngka bula Rawngbawla mei zu hlat hlat chu ka melh no lo khawp mai. Ka nu chuan, "Engmah lah chu i ei si lo a, i ril a ṭam lo em ni?" tiin kan kalchhuah laichuan min zawt a, lu ka thing mai a, ṭawng tawh loin seat hnungah ka lut nghal bawk.

Kawngtluan chuan ngaihtuahna ka kawm a, Alana'n "Ka nu i lo hrilh dawn nia," a tih pawh kha ka sawi ta lem lo. Ka sira Naomi ṭhu chu ka thlek leh ṭhin a, a lam ka hawi apiangin min lo en ve vat zel a, Sangsangi erawh chuan tukverh lam a hawi deuh reng a, ka nu a ṭawng barh barh thung.

Kan han thlen chuan Mary chhungte an lo awm a, a unaunu leh a pasal chhungte an nih hmel. William-a chu a lo meng a, min melh kual a, min hre lo tih a hmelah a lang a, a u ten an va kil hnaih pawh chuan a en mawl tawp a, a lu chu na a tih vangin a che hleithei lo bawk.

Mary'n thingpui min lo thlitsak diat diat a, William-a lo harh laia a awmdan te a sawi bawk a, "A harh laia awm loh ka hlau lutuk a, zanina a harh chu ka lawm tak tak a ni, heti hi chuan kalsan zawk pawh a ngamawm tawh ang," a ti a, ka nu chu naktuk lama kal turin ka sawm bawk a, ka nu pawn a lo aw ve vat a, Mary chuan in lama haw lawk a duh anih hmel. 

Ka pasal nena an han inbe lai te chu ka ṭhuthmun aṭangin ka lo thlir ve reng a, hrang bik hle a ka lo inngai ṭhin kha ka nihna dik tak zawk a ni tiin ngaihtuahna ka nei a, rilru ka han siamfel takah chuan mahni inthiamna ka nei lian hle tawh a, awm ve lo pawh ni ila an nun a buai phah dawn lo hlein ka hria.

Rei tawk fang kan ṭhut hnu chuan Alana'n haw a rawt a, "I rawn riak dawn em ni?" tia ka nuin a zawh chuan, "Ka inthlak anga, ka chhoh leh mai chu a ngai ang, vil deuh chawt a ngai rih," a ti a, ka hnial lo khawp mai. Zanin hian ka thutlukna ka hrilh anga, min hnial emaw, min hnial lo emaw naktuk lama haw ka rilruk a, ṭha taka min kaltir pawh ka beisei.

Keichu Alana motor-ah ka insawn a, midang zawng chu Rawngbawla motor-in kan hmaah an tlan a, kan tlan chhuah phat aṭangin sawidan tur ka ngaihtuah tawh a, pehhel vak loh mai duh ka duh dan a ni. William-a chungchang sawiin a ṭawng mawlh mawlh a, "Fapa mal a lo ni bawk nen mi a ti hlauthawng hma ṭhin a, han boral ta se tih te thlengin ka ngaihtuah hman a.." a tih laichuan ka lo en reng a, "A dam thuai mai ang, ngaihṭha deuhin awm tawh rawh," ka tih chuan a bu nghat a.

"Ka scooty ke a chhia a, naktukah ka chhungten min lo hruai anga, scooty chu lo awm rih mai rawh se," ka ti chiah chu ka lam a lo hawi vut a, "William-a a harh tawh bawk a, kei chu ka haw ange," ka ti leh zat a, a mitmeng chu a buai nak mai.

"Haw a, eng nge i sawi awmzia?" a tih laia a awki ah chuan ka ṭhawng ve hle anih ka ring.

"Khawsaho zel thei chi kan niin ka hre lo va, in chhungkaw tan pawh ka haw mai hi a ṭhain ka hria, fate kan la nei ve lo bawk a..." motor chu a tlan muang zui a, kawngsir lam a pan nghal bawk.

Motor a din fel hnu chuan seat a ngheng ri dat a, thawk a la deuh vang vang bawk a, a che zia chu ka lo en reng. Chutah, ka lam lo hawiin, "Inṭhen i lo duh ru hle ṭhin a ni maw?" a ti a, chu chu aih tia chhang thei ka ni tawh lo.

"Ngun deuha ka ngaihtuah hnuah inṭhen hi ka tihmakmawh a niin ka hria," ka ti nghet charh a, hma lam hawia a ner zauh chu ka hmu. A hriatthiam leh zual nan tiin, "Kan nakin hun tur ka ngaihtuah hian kan hlim tlang thei dawn loin ka hria, Sangsangi chauh pawh hi inṭhen chhan tling a ni a, Mary te chhung nena in inkungkaihna lah tihtawp chi niin a lang bawk si lo a, kan hma hun ka thlir hian hetianga nung tur hian ka inphal lo, mahni hi ka inringtawk lo a, ṭhat der takngial pawh ka theih loh hun a awm mai dawn a, nuhrawn sual ni tur anga ka inngaihtuah hian ka duh lo bawk, ka awm reng anih chuan chutiang ka nih hun chu a awm ngei dawnin ka hria a, ka inthiarfihlim mai hi a ṭha tain ka hria," ka ti leh dap dap a, thinrim chunga thilsawi ka ni lo bawk a, a ngai haw bikin ka ring lo.

"Engmah ka hriat loh laiin rilru i lo siamfel vek tawh zawk anih chu, ka chungah lungawi lohna i nei zawk niin ka hria?" a tih chuan, "Keichuan ka hma ka sial a, i rilru tur dawn miah loa thutlukna siam ka ni bawk a, i thinur anih pawhin ka hrethiam viau ang," ka ti leh a, awki vin hman loh hram ka duh vangin ka ṭawngkam chu a dam khawp mai.

"Nia, i hma i sial khawp mai, ka fapa thih leh dam kara a awm laiin inṭhen te i lo ngaihtuah a nia," a nui deuh suk a, "Ka nupui hlui lamte i chhuanlam bawk a, ka theih tawpin nuam lo i tih hlauin ka hnar ṭhin zawk a, naupang pawh an lungawi loh phah reng zawk a nih hi," a ti hluk hluk a, a hrethiam dawn lo a ang, a ruh lang rawta ka sawi mai a ngai dawn anih hi.

"Kan inkar pawh hi inṭhen ka duh chhanah a tel, keichuan fa te neiha nun pangngai tak bak hi beisei ka nei lo. Mahse, nang chuan engkim i nei tawh a, kei min neih chhan pawh hi min hmangaih vang a ni lo a, Mary leh a chhungte tel loa i awm theihzia tih lan i duh vang niin ka hria, anihna takah chuan a uiresan che vangin tlawmah i la a..." ka rawn hawi vut a, "Ṭawng tam suh.." a ti hmuk mai. Ka ngawi deuh ren rawn a, ṭha taka kan sawifel thei lo anih pawhin ka kal lui mai ang tiin rilru ka siam sauh sauh.

"I chhungte bulah eng chhuanlam ber nge i siam dawn a?" a tih laia a aw chu a nelawm loh ngei mai.

"Ka awm theih loh thu ka hrilh mai ang chu," ka tih chuan a lo nui hawk a, "A ni tak ang.." a'n ti halh a, a mak ka ti a ni, ka lungawi lohna hi hresa vek ni mai awmin engmah min zawt hmasa lo a, ka buaina chinfel dan tur a zawngin; min hnemna thu a sawi hek lo. Ka haw remti lo ang taka lang si hian ka awm hi a thlahlel chuangin ka hre lo bawk, kan inkar vang chauh pawh hian inṭhen hi kan ngai takzet a ni.

"I fate hlimna i duh a, keiin ka hlimna ka duh bawk a, kan inṭhen hian kan hlim tlang ber zawk ang, i tan pawh thawk huaina tur anih ka ring, Mary te chhung venthawn i ngai lo anga, i fate an lungawi bawk anga..." ka ṭawng laia, "I rilru a va lo ṭha ve," a rawn tih vang chuan ka sawi zawm lo.

"Ka rilru hi i hmu fiah tak tak lo, rin pawh min ring thei hleinem," tiin tukverh lam ka melh vang vang a, ka rilru a na tawh lo nain ka bei a dawng ngawih ngawih.

"I thlavang ka hauh tamzia te kha hre ve bawk la, nangmah vangin naupangho an ṭap fo bawk, vau te pawh ka tawk zing, i hriat loha thleng hi a awm ve ṭeuh ania, a tuar ber emaw i inti mai mai anih kha," ka va lehhawi laichuan min lo melh reng a, "Tuin nge vau che?" ka tih chuan a ner ringawt a, min chhang duh lo.

"Rawngbawla a ni maw, hepa nen hian ka chungchang in sawi tam awm hle mai, hriat chu ka nei ve alawm," ka ti nghat a, ka huat em em chu ka bulah engmah sawi loa a zep ṭhin hi a ni, keichuan a fate chungchang pawh min ngaihdan tur hre reng chungin ka sawi ṭhin a, nupa kan nih anga kan chinfel dun tur niin ka hria a, ani erawh hi chuan engthilah mah khan min thurualpui ngai lo, khum kan inṭawm chauh hi nupa kan an vena lai a niin ka hria.

"Rawngbawla chungchang phei chu engmah hriat i nei lo," a tih leh takah chuan ka insum duh ta bik lo, "I nupui pawh vau khur khur ngam hi i tan eng nge a nih chu ka hre ve e, hei vang hi aniang chu uiresantu che pawh i hlat theih loh ni..." ka tihkhum sak a, a lawm lo ngang mai.

"Khatiang zawng kha chuan min ṭawngkhum lo la a ṭha ang, sawpa saw mi hlauhawm anih saw hre rawh, Willliam-a hi boral ngat sela chuan e...." a tia, a ngawi dat a, "Min that dawn em ni?" ka lo ti hmanhmawh a, "Kutthlak che a hreh dawn lo, ka dang hram hram zawk a ni," a ti halh a.

"Khai a, dinhmun hlauhawmah ka ding reng ṭhin anih chu a, i bula khawsa zel chi pawh ka ni lo anih chu.." ka ti leh sak a, beidawn hmel fein min en tawh.

"Min nei hi i inchhir awm hle mai," a tih laia a aw chu zawi tak a ni.

"Ka beisei ang chu a ni lo alawm, ka inchhir ka hlauh vangin ania inṭhen ka duh.." ka ti ve leh a, thawk a la deuh hawk a, a ṭhu ṭha zui bawk a, chutah ka beisei loh deuh thil a lo sawi a, "Naktukah ka va dah dawn che nia, zanin chu inngaihtuah phawt ang," a ti zawi ta sup a, beisei tur a awm lo tih a chiang ve hle anih ka ring. 

"Ni teh se.." tih zawngin ka chhang a, um chhuah ka ni dawn lo tala tiin ka inhnem ru bawk.

Kan tlan chhuah hnu chuan kan inbe leh mai lo, ngaihtuahna kan kawm ve aniang ngawi rengin kan ṭhu dun a, kan veng kan thlen hnuah, "I chhungte i be tawh em?" tiin a ṭawng hmasa zawkah a rawn ṭang a, ka biak tawh thu ka hrilh chuan, "Engtin nge an lo chhan che?" a ti leh a.

"Ka pa chuan tumah intihhrehawm tir lo turin min ti," ka ti ṭha ve mai a, ka lam a rawn hawi nain ka en duh lo thung. Kawng chhuka kan tlan laichuan ka phone a lo ri a; mahse, ka bag mawnga a awm vangin ka inhai rei deuh nen a lo tawp hman a, ka u call a ni. Ka call back a, a la leh thei lo lawi a, ka nu leh paten ka biak thu an hrilh anih ka ring. 

"Kum khat em pawh kan la innei lo a, a zahthlak dawn hle mai," ka piaha ṭhu chuan a lo ti leh bauh a, engah nge maw amah ngawt hi a inngaihtuah mai le, ka dinhmun hi a ṭha bikin a ring zawk nge mawni.

"Ka neih chhan che chu ka hmangaih vang che ania, kawppui tur atan ka thlang che a, hman aṭangin ka duh tawh che a, engtin nge khatianga mi i ngaih theih le?" a ngawi vang vang a, ka chhang duh tawh rih lo, kan insawi thinrim leh mai ang tih ka hlau.

"Min lo hmangaih bik lo tawp anih hi a, hetiang tur tih hi lo hre lawk ila ṭha tur..." a tih leh kher chu ka helh khawp a, ka va melh nghal rawm mai.

"Ka hmangaih loh hi ka nei lo ang tih ring tawp rawh.." lawm lo fea ka ti chu hre awm pawhin a awm lo. "Miten min sawi duh khawp ang, vawihnih ka hlawhchham dawn chu ania..." a han ti leh a, chhan ngaihna pawh ka hre lo.

"Mi vanduai tur hi kan lo awm aniang...ka theihtawp ka chhuah ve asin maw le.." a tih leh pawh chuan ka en mawl tawp tawh, a thiam lo zawk chan tak hi ka changin ka hria, nuam ka ti bik hauh lo.

"Kan dinhmun hi a harsa em a ni, kan pahnih kar chauh a ni bawk si lo a," ka tih chuan, "Hre lawk lo pawh i ni hleinem, fa pathum nei tawh pasalah i nei a, a harsa dawn tih te chu i hresa turah ka ngai, min hmangaih vangin tuar i huam vek turah ka lo ngai a, kum khat em pawh i tuar thei lo a.." tiin a nui deuh hak a, hnial ka duh viau nain ka tuar chhel lo em mawni tih zawhna ka inzawt a, ka inpawm lo thei bik lo.

"Engmah ka hriat ve hmain inṭhen thlengin thu i lo ti tlu hman ania..." a tlan chak tak em avang chuan a thinrim niin ka hria, ka hlauthawng deuh chu ka ṭhu ngil at a, "Tlan chak suh, sawi tawh rih lo teh ang," ka tih pawh chuan a tlan muan phah chuang lo, steering chu a hmer nghet salh a, a inpetruh ṭun bawk.

A tlan chhak leh sauh a, chhuka kan tlan avangin a hlauhawm duh ngang mai, "I tlan chak duh anih chuan min chhuk tir rawh," ka ti vin ṭhat a, melh pawh min melh loin a tlan thla vuk vuk tawh. Seat ngheng chuan ka invuan ngar ngar a, "Hetianga i awm dawn anih chuan zanin hian ka haw ang," ka ti chiah chu hmalamah ka bu dawrh a, ka hmalamah ka va intauh chawrh. Motor chu a ding zui a, "I na em?" tiin min rawn ngaihven rang khawp a, ka lu te chu a hai chhulh thei, ka chalah tak ka va tauh a, a pawng nghal ṭawlh ṭawlhin ka hria.

"Min khawih suh," tih leh a ban chu paih thlak ka rual a, chhuk ka tum zui bawk. Mahse, kawngkhar chu ka hawng thei hlek lo mai a, thinur lutuka a lam ka va hawi chu, "Ṭhu ṭha rawh, ka tlan chak tawh dawn lo," a lo ti a, motor a tinung zui bawk. Duhthlan tur nei hek lo chu lungawi lo fein ka ṭhu a, ka chal chu a na ngut ngut mai, inṭhen thu sawi hnua ka zui haw leh chu a pawi ka ti, engah nge maw ka haw nghal mai loh zawk ni.

Kan in kan thlen thlak hma deuh chuan Bike lo tlan chho ka hmu a, bullet bike ka hmuh fo tawh a ni, a kalhtu pawh chu Damien-a a ni tih ka hre thei nghal a, a hnunga ṭhu chu ka u a ni ngei ang. "Ka u te..." tiin ka ṭhu ngil hluai a, kan hma lawk an lo thlen chuan ka u chu a lo hawi vung vung a, Damien-a chuan keini kan ni tih a hre lo nge ni a tlan tlang a, ka en zui nasa mai.

Kawt kan thlen thlak rual chuan phone ka phawrh a, chhuah pahin ka call zui bawk, phone chu a ring a; mahse, rei pawh a ri hman lo tihah hnunglam aṭangin ka hmui a rawn hup thut a, a kut lehlamin ka phone chu min chhuhsak zui a, a hmet tawp nghal hmak a, chuti chung chuan min la thlah duh mai lo. Ka hmui a hupna chu phihthlak ka han tum a, ka tal deuh fat fat chung pawhin ka phihthla thei lo.

"Ka nu te an la meng a, engmah sawi lo ang che," ka beng bula a rawn ti chu rapthlak ti fein ka lo melh a, ka hriat ṭhin Alana kha a ang lo, mi dang hlak hi a ang a ni!

Min han thlah chiah chu ka hai chhulh mai, mak ti lutuka ka en laiin ka phone chu a hmet thim hmak a, min pek let a tum lo anih hmel, a kekawr ipteah a ak a, "Lut ang," tih leh min rawn pawh a rual a, ka ṭang deuh nain min pawt kal dawr dawr a, kawngka bul kan thlen hnuah min thlah leh vat thung.

Ka nu leh Sangsangite putu an lo awm a, Naomi chu pindanah a awm anih ka ring. "In va rei ang reng ve," ka nuin a lo ti chu chhan pawh chhang loin inchung lamah ka chhohsan a, pindan ka luh rualin ka luggage ka la a, ka thawnhnaw chu ka khung nghal mawlh mawlh bawk.

Rei loteah Alana chu a lo lut a, "I chal kha dam phawt rawh se, i chhungten kut ka thlak che emaw an ti palh ang," a lo ti pek a, a aw ringawt pawh chu ka haw hlur tawh. "Chu aia chhe zawk chu i ti daih tawh," ka lo tih khum a, min chhang lem lo. Keipawh chu ka insiam mawlh mawlh a, ani erawh a va inbual a, a inbual lai chuan ka phone a dahna ka lo zawng a, bathroom-ah a keng lut nge ni ka hmu zo lo reng reng. Ka scooty a chhia a, zan a rei tawh bawk si a, phone ka neih loh phei chuan ka tan haw ngaihna a awm rih lo, dawhthei taka khawvar hun ka nghah mai a ngai dawn a ni. 

A lo chhuak leh chu, "I chhuak leh dawn tho bawka, zaninah hian min va dah nghal mai rawh," thinrim ang lo tak leh pangngai thei ang berin ka lo ti a, min chhang loin a inha mawlh mawlh thung.

"Ka phone kha min lo pe teh," ka tih leh chuan, "I chal a damfel hma chu i haw lo ang, insawifiah ka peih lo," a ti leh a, ka duh lo hulhual.

"Ka tlu a, ka tauh palh ka ti mai ang, min va dah rawh," ka ti leh chu ka vin viau tawh mai. Muangchang hian pheikhawk a bun a, a chet dan chuan mi run hluah hluah, hetianga luhlul leh ngeng hi a ni tih ka lo hre ngai lo a, ka lo hrechiang lo hle ni tein ka hria.

"Lo mu rawh, naktukah ka lo haw anga ka va dah dawn che nia," a tih leh hnuah min chhuahsana, "Ka phone kha," ti a zui chhuah ka tum chu kawngka a khar hmak a, ka kalh zui hmiah bawk. Ka hrethiam lo ngei mai, engah nga hetianga min tih le, naktukah chuan min dah a tum tak tak pawhin ka ring tawh lo, ka ring lo hulhual zawk a ni.

Khumah ka bawk thlawp a, ka lu a na ngut ngut bawk. Rawngbawla kha awm turin a ti angem tih te ka ngaihtuah a, min dang turin a dah leh duh maiin ka ring. Ngaihtuahna thar ka nei a, hetianga ṭha te tea ka chhuak thei dawn lo anih chuan a tlan pawh ka tlan chhuak tawh mai aniang chu tiin rilru ka siam a, kawngka ka hawng thei lo mawlh chu a ni buaithlak ta chu.

Motor tlanchhuak thawm a awm har khawp mai a, inhnuaiah thil an sawi ho anih te ka ring rum rum. Tukverha ka va dak chuan ka beisei ang ngei thil ka va hmu a, Rawngbawla nen rawn chhuakin an inbia, Alana tlan chhuah hnuah Rawngbawla chu inchhung lamah a let leh a, rei deuh hnuah pawh a rawn chhuak leh tawh lo, a riak dawn anih ka ring.

Hlauhthawnna ka nei reng a, kawngka min hawnsak turin tumah chu ka au ngam lo, in hnuai lawkah min thah pawh hreh lo a awm tih ka hre reng a, kawngka chu a lo hawng ang tih ka hlau zawk mah a ni. Sana ka en zing khawp mai, dar 12 a hnai a, khaw var hun mawlh chu ka nghakhlel. Muthilh lah chu ka ngam der si lo a, zan a rei duh khawp ang le.

Rei dawn khuma ka mut hnu chuan ke pen thawm ka hria a, a pen thawm a zawih deuh vangin ka nu a nih ka ring nghal ngawt. Rang deuhin kawngkhar bulah ka va ding a, ka awmna pindan lam a lo pan tih pawh ka hria, a lo kal hnai zel a, kawngkhar bulah chuan lo dingin a rawn pawt deuh dat a, "Ka nu, nangmah em ni?" ka tih chuan min chhang lo.

"Pawn lamah khan a inkalh," ka ti leh vat a, chu veleh a ri deuh rak rak a, ka han hawng chiah chu beisei loh deuhin Sangsangi ka hmu hlawl mai.

"Nang elo?" phawk angreng deuha ka tih chuan, "Apiin han hawnsak rawh a tia," ti maiin min chhang a, inherin a kal nghal nal nal bawk.

Ngaihṭha zan lo chuan Sangsangi kal chu ka zui a, tv thawm leh Sangsangi ṭawng thawm ka hre zui a, an meng rei ka ti viau mai. Step-a ka chhuk thlak laichuan choka aṭanga ka nu lo phei nen kan innang hlawl a, ka hmel a hmu chu a phawk hle a, "Engati nge i chal chu?" a ti a, mi dang hriat a duh lo emaw tih turin a ṭawng zawi a, ka chal ka han khawih chuan a lo pawng luau tawh.

"Motor-ah ka intauh alawm maw le?" 

"Hetah lo kal teh," tih leh choka lama inher a rual a, ka zui ve mai bawk a; mahse, kan ṭhutfel hnu lawkah mit nuai chat chat chungin Naomi a lo phei a, "Ka ril aṭam," a lo tih vangin dawhkana chhangthawp chu ka lo khawhmuh a, ka bulah a lo ṭhu ve mai bawk nen ka nu chu a la ngawi ran a, Naom-i'n chhangthawpa Jam a tat lai chu kan en dun ran bawk.

"Rawngbawla saw a riak ve dawn elo?" rei deuh kan ngawih hnua ka tih chuan, "Zingah naupang thlah a ngai a, riak mai rawh se ka ti anih kha?" tiin min chhang a.

Ka ner deuh a hmuh chuan, "Mapuia'n haw i tum tih a sawi a," a tih zawm leh zat bawk.

"Nia, naktukah ka va dah ang che min tia," ka ti ve mai a, ka awki pawh a pangngai khawp mai. Ka chhan dan chu a duhzawng a ni lo tih hriat fe hian min melh a, "Tunlai hmeichheho hi eng emaw hlekah hian inṭhen incho ar zel mai," a ti nghat a, chutih laichuan Naomi pawn min lo en ve vat a, han insawifiah vak pawh ka tum tawh lem lo, thu kan titlu tawh tih hrilh mai chu a awlsam dan ber a ni.

"I phone min lo hmantir teh a?" ka nu lam hawia ka tih chuan, "Khawnge i phone?" a lo ti bul hmuk a, Alana'n a lak thu ka sawi ve leh mai bawk a, "Khatianga i haw anih chuan i chhungten engtin nge an ngaih ang, ni lo lo te khan mi an ngai ange," a ti teh daih a, ka chhang mai lo.

"Mapuia'n haw a rem ti rih lo anih hmel kha," a ti leh a.

"I phone chu ka lo hmang lawk ang, ka chhungten min lo hruai mai rawh se," tia ka chhang leh chu min melh thip viau tawh.

"I pasal berin a remtih loh chuan engah nge chhuah chu i tum luih ṭalh a, i haw anih chuan kan ko tawh kher lo ang che.." chu ṭawngkam chu ka helh khawp a, a mita en let ran chung chuan, "Koh ka ngai dawn lo, inṭhen kan tum," ka ti bawl a, Naomi chuan nuam a ti vak lo aniang a tho hna hna a, sitting room lama a phei hnuah thawm a reh zui dak a, min ngaithla ṭhap anih hmel.

"Hmeichhia chu pasalte thua awm mai ṭhin tur, mo nih awmzia pawh hi in hre tawh hlawm lo anih hi, mi zah derna chang lah i hre si lo.." a tih chuan, "Tuar ngar ngar tura min beisei anih chuan ka thei bik lo, amah ka hrilh tawh a, ani pawn min dang lo a, ka harsatna pawh min zawt lem lo, ka sawi a a pawm mai anih kha," tiin ka chhang a, ka duh dan chuan phone min hmantir sela zanina haw nghal mai ka duh.

"I zuau lutuk bawk a ni, i pasal hi mi pasal te anga awm awl mai mai a ni lo va, a ngaihsak reng hman hleinem che, fa pathum a neih bakah a hna lah thawhrim a ngai em em a, in lamah nangin a fate i lo rikrap ve reng bawk a.." ka ṭhu ngil deuh hluai a, "Naupang laka ka sual viau hi ka hre miah lo ania, Naomi leh William-a lakah phei chuan harsatna ka nei miah lo zawk a, Sangsangi hian mi a ngaina lo a, a chimawm em em bawk a; mahse, vawikhat pawh kut ka la thlak ngai hleinem," ka ti ve duah a, he thuah kher hi chuan thiam ka inti ve khawp.

"Inpa bulah i hek mawlh mawlh reng alawm, rilru doctor hnena hruai tur tein i lo ti a ni awm a, a nu te ina kal te i lo khap bawk a, Mapuia fing hlauh lo phei sela chu i thuhnuaia min dah i tumin ania ka rin ni..." min tih khum leh nghat a, chutiang zawnga thu an lo la chu mak ka ti kher mai, Alana kha ṭha takin ka hrilh si a, min lo dawnsawn dan chu ka beisei loh lam daih a ni.

"Ih e Ka nu, ka lo awm tirh phat aṭang khan min en dan hi a dik lo tawh, mi sualah min siam hi in duh zawk ni tein ka hria, ka rawn lawi tukah i tunuin ek awmna diaper-a min vawm te kha, boruak chhia kan neih nghal ka duh loh vangin ka sawi duh lo mai mai anih kha, helaia kan awm thlak dawn a pot-a a rawn vawm thlak te kha ka hriatsual a ni reng reng lo, ka pheikhawka perek lo vit burtu pawh kha Sangsangi hi a ni tih ka chiang, Alana nen hian thil hi chik ve ni ula chuan ka sawi hi a dik tih in hre mai tur a nia, mi in ring duh ngai lo a, ka sawi apiang kha hekna angin in ngai zel a, hetiang chuan engtin nge kan khawsak ho reng theih ang ni.." ka ti ve ta sak sak a...

Chutih laichuan hnung lamah thawm a lo awm a, "I pheikhawkah perek ka vit bawk lo e aw, ka vit lai min hmu a mi a?" Sangsangi'n a rawn ti pawr hlur mai.

"Lo inrawlh ve lo mai teh," ti a ka lo chhang chu, "Dawtin min puh ziah suh, i pheikhawk pawh ka khawih lo hrim hrim," a ti ṭeu leh hlar a, "No sen i lo keng lut kha ka hmu che, i no rawn ken kha bathroom-a ka hman lai a nia, i rawn la tih ka hria, nang bak lo lut an awm lo," ka tih takah chuan a chiang bawk aniang min en run run a, hawisawn mai ka tum chu a thil lo sawi vang chuan phawk fein ka melh a, rilru a ti buai map mai.

"No kha Api lo lakchhuah asin," tiin min chhang nia.

Ka nu chu ringhlel zetin ka va melh a, "A dik em?" ka ti zawi sep a, "Eng nge khatia mi en vak, chutiang mai mai ka ti lo ang e," tih pahin ka hnung lam a hawi a, Sangsangi chu lawm loh hmel fein a va en a, hnunglam ka hawi chuan Rawngbawla pawh a lo ding ve reng tawh. Lam ṭang ka nei lo tih ka inhria a, insum ka ngai tiin mahni ka inkhap bawk a, hlauhthawnna ka neih te kha thinurnain a rawn thlak vang aniang haw bak chu ka rilruah a awm tawh lo.

"Zing ka nghak lo mai teh ang," tia ka tho chu, "Chhuak ringawt suh, i pasalin a thlah dawn reng che chu,.." ka nu chuan a lo ti hlut a, pindan lam pan ka tum chu, "Va dang rawh," ka nuin a tih ri ka hria.

"Engati maw?" Rawngbawla'n a lo ti thum dut a, inher meuhin ka en leh rih.

"Haw chi a la ni lo, hliam te a neih saw, a pindanah khan han kalhkhum leh zawk la a ṭha ang," ka nu chuan a ti leh ta zel a, pawn lam pana tlan thut tur nge tih ka ngaihtuah laimeka Rawngbawla lo ṭawng dan vang chuan ka ṭhulh leh thung.

"Ka dang dawn teuh lo, keite chuan chhuak daih se ka duh alawm," a ti a, a lam ka va hawi chuan za lo zet hian min lo nuih bawk. "I duh leh haw rawh, tuman kan dang lo ang che," min ti zui a, lawmthu hrilh tak hi ka nap, a ṭawngkam ka la ngei loh awmchhun a ni hial ang chu.

Khawmuan chi a ni tawh lo tih ka hria, ka nu rawn tho chhuak chu rang tawkin kawngkhar lam ka pan san a, "Ruati..." a rawn tih rual chuan pawn ka rap fel hman tawh. Vawthlep leh ka mutkawr chauh ka inbel a, kutlawng takmeuh a chhuak ka ni. Thla a en deuh ruih avangin kawng chu hmuh a har lem lo a, ka kal chak viau mai, zan reh lai a ni a, ka hnung lama awm kalsan ka duh em vang aniang hma lam pan chu hlauhna ka nei lo, chutih rualin ka thinphu chu a rang hle lawi a, awm dawm chungin ka pen chak sauh sauh bawk.

Kawi thum vel ka kal tawh tihah chuan thawm ka hria a, kan in lam aṭanga motor lo tlan chho thawm a ni. Ding meuhin ka leh hawi a, kawng kawia a lo eng chho chu ka zuk hmu bawk a, chutah chuan hlauhthawnna ka nei chawpchilh a, Rawngbawla khan a rilru a thlak a ni mai ang a tih ngaihtuahna ka nei, ka nu khan eng emaw sawiin min rawn um tir a nih te ka ring bawk a, ka ngaih a ṭha thei lo. 

Rang deuh chuan kawng sir lamah ka kal thla a, a awih angreng bawk si a, malpui tiat vel thingkung dingah ka inpawm bet ṭai a, ka awmna aṭang chuan kawng chu a lang chiang thei viau mai. Thawm chu a rawn hnai zel a, an tlan muan danah min zawng tih chu hairual a ni lo. Thaw dep dep chungin ka zawna a lo tlan lai chu ka lo thlir a, a liam hnuah pawh ka kal mai ngam lo, khi lai lawkah kan han innang maiin ka ring a ni.

Eng emaw chen chu ka han ngaichang a, a rawn let dawn lo nge maw ni, ngaihtuahna pangngai nei tan chuan thui tak ka la thleng hman dawn lo tih a hriat mai ka ring. Thawm a reh tak tlawk tlawk siah chuan ka awmna aṭang chuan ka chhuak chho a, let leh rih lam chu rilruah a awm tawh lo, phal takin min kaltir a, ka nu Ngengpuii lahin hliam nei chunga ka haw a hlau em em bawk a, chuvangin min nghaisak emaw lam chu an tumin ka'n ring lo ngawt a, kan han innang anih pawhin a sawi anga awm mai te pawh a ṭha ang tiin ngaihtuahna ka nei bawk, min hruai let a tum loh hram ka beisei a ni.

Hmanhmawh deuh chuan ka pen chho leh ta a, ka kalchak bawk a, in awmna ka thleng thuai a, tumah ka tawk lo chu ka lawm ru khawp mai. Ka ke a nat deuh avangin minute thum vel chu ka chawl a, a bak chu chawl leh tawh loin ka kal hlawk hlawk a, vawikhat chu bike ka tawk a, a khalhtu chuan min thlek vung vung chungin min tlan pel a, a bak chu kawn ka thlen thlengin tumah ka tawk leh tawh lo.

Kawnah chuan duty niawm tak hi an lo ṭhu bial laih a, mipa hlang an nih vangin va pawh chu ka hreh ru khawp mai. Zan laia hmeichhia mahni chauha ka va lang hlawl chu anni pawn mak an lo ti aniang ding meuh hian pahnih chuan min lo en a, ka hawnna tur a la hla si a, an puihna dil mai loh chu duhthlan tur dang a awm chuang lo. 

Ka va pan hnai a, ka thlen hma deuh aṭang chuan, "Phone min hman tir lawk thei em?" tiin ka va be hmasa a, "Khawi lamah nge i kal dawn a, buaina i tawk em ni?" pakhatin a lo tih chuan ngaih a ṭha huai tawh.

An bul ka thleng chu min lo en chik khawp mai a, "I va hah hmel ve, hliamte i nei elo?" tiin pakhat chuan hnai deuhah min lo thlek a, "Car sen kha i um em ni?" pakhatin a lo ti ve zat bawk.

"Buaina chhete ka tawk a, ka hawna tur ka thui deuh a, in phone min lo hmantir lawk mai teh u," ka tih leh laitak chuan motor thawm a rawn awm a, ka kalna tur kawng lam aṭanga lo tlan chho a ni a, a rawng aṭangin tu nge tih ka hai lo.

Ka bula ding pa chu inhliahtur tumin a phenah ka ding vat a, "E khai, hlau reng reng suh," a lo tih chuan rilru a nuam huai huai mai, midang pahnih te pawh kha an lo ding ṭha vat a, kei chu min din hliahin motor lam chu an thlir ṭhap a, motor pawh chuan kan lam a lo pan ve mek bawk.

"Keiman ka'n bia ange?" tiin a upat hmel ber khan a va pan a, Motor pawh chu kan piah maiah chuan a lo ding a, Rawngbawla lo chhuk chu thil awmzia a va zawt nge ni an thil sawi ka hre pha lo a, ka bula ding pakhat chuan a va pan ve bawk nen a naupan hmel ber nen chauh chuan kan ding tawh. "I bialpa em ni?" tia min zawh chuan a nih lo thu ka hrilh vat a, "Hlau duh reng reng suh, engtin mah a rawn ti lo ang che," a tih leh chuan ka bu ringawt a, ṭhutna min kawhhmuh thuai bawk.

Rei vak loah chuan kan lampanin an lo inzui phei a, "Thlah che a tum a, i kal hreh chuan Zuala'n a thlah mai dawn che nia," a patling zawk khan an lo ti a, an hnunga Rawngbawla lo kal chu ka va thlek deuh vang vang.

"Pasal em ni?" tia min zawhna chu, "Ni lo," ti maiin ka chhang leh a, chutah Rawngbawla chu lo kal hnaiin, "Ka zuk dah ang che," a lo ti bul deuh hmuk a, duhthlan tur ka nei ta bawk nen zui loh mai chu ka duh zawk a ni.

Duty-ho chu, "Phone min hmantir ula, ka chhungte ka inhruaitir mai ang," ka ti ta zawk a, pakhat chuan a phone a lo phawrh vat a, u Sena'n ka sim hlui a hman vangin a number ka la hre hlauh a, a vanneihthlak khawp mai. 

Number chu ka call a, a tlang nghal mai bawk, mi dangho chuan min lo nghak ṭhap a, ka u chu a muhil tawh nge mawni phone a chhang thei mai lo. "A tlang thei nange?" pakhatin a lo tih chuan ka call nawn leh zat a, rei vak lo a rik hnuah a lo chhang ta a, a aw ka han hria chu ka thaw huai huai mai a ni.

"Min lo hruai nghal rawh," tiin ka awmna ka sawi nghal zung zung, "Ka lo kal nghal ang, tu nen nge in awm, hei hi tu phone nge?" tih angreng chu min lo zawt ve mawlh mawlh a, kan inhrilhfiah leh rih. Duty-te chu biak a duh thu a rawn sawi a, keiin phone neitu chu ka lo pe ve vat a, "Ka farnu ania," a tih ri te chu ka hre pha. Phone min lo pek leh chuan, "An bulah khan lo awm reng rawh aw, kan lo thleng har lo ang," a rawn ti a, a hmanhmawh hmel khawp mai. 

Kan inbiak zawh chuan Rawngbawla chu ka va en a, "Ka chhungte an lo kal dawn a, thlah ka ngai lo," pangngai deuh chuan ka ti a, "Kan lo nghahpui dawn nia," a naupan hmel ber khan a lo ti ve bawk a, 'Kalsan rawh' a tihna tluk a ni, an ngaih a ṭha vak lo aniang Rawngbawla chu an en deuh ṭhap a. 

"Anih chuan a ṭhat chu," tia a inher chu kan la en zui reng, muang changin a motor lam a pan a, ngaihtuahna a ti buai ve reuh khawp mai, min thlah tumin min lo zui tak tak em mawni le tiin ka inzawt ru a, zanina a awm dan hi chu ka beisei loh dan hlir a ni. Chutih rualin ka lam ṭanga, ka hmakhaw ngaitu a ni lo tih erawh ka chiang a, a duh ber pawh ka chhuah kha a ni miau a, a chet dan pawh chu awm tih ve na chen chu ka nei a ni.

Ka u nghah pahin duty-ho bulah chuan ka ṭhu ve ngar ngar a, thil awmzia min zawt ṭhin a, ka sawi thui duh mang si lo a, anni lahin min zawh luih an hreh ve tho bawk. Kan in awmna ka sawi chuan, "Lo awm thar te kha in ni maw?" tiin min zawt a, ka pasal pawh an lo hria a, an dilchhut dawn chuan ka sawi thui leh duh lo a, ngaihdan tawk erawh an neih tho chu ka ring.

Rei tawk fang kan nghah hnua ka pa car lo tlan ka va hmu chu ka tho rang khawp mai. Tlan chunga va pan ka ni bawk a, motor chu ka hmaah a rawn ding ri hrawk a, ka u lo chhuk lah chu thil ṭha lo thleng ang mai hian a rawn hmanhmawh a, ka bul a rawn thlen rualin min rawn pawm chawt a ni ber. "Khawi maw?" tih pahin min thlek dun dun a, hnunglam ka va hawi chuan an vaiin an lo kal hi a lo ni a, beisei loh takin Damien-a pawh a lo tel a, motor a rawn khalhsak anih hmel.

"Min ti hlauthawng lutuk alawm," ka nu chuan a lo ti chul a, "A chal hi.." ka uin a lo tih chuan min thlek huang hlawm. "Ka tauhna anih hi.." ka han ti dek dek chu, "Dawt sawi a ngai lo," u Hruaia'n a lo ti bawl a, ka ṭhawng ve bawk nen hrilhfiah tur a tam dawn khawp mai.

Ka pa chuan duty-ho chu a va bia a, mipaho chuan an zui hlawm a, chutih laiin ka nu nen car-ah kan lo ṭhu lut thung a, ka nu chuan thil awmzia min zawt nghal mawlh mawlh, "Nakinah kan sawi dawn nia," ka ti chung pawh chuan, "Hetianga i rawn tlan chhuah danah thil fel lo a awm tih a chiang reng, tuin nge kutthlak che, ka rilru a na em mai a.." a ti tlawk tlawk a, ka awm dan ka han chhut chuan ka chhuak rum rum leh ka  phili lutuk chu ka inthiam lo deuh dawn dawn a, amaherawh chu ka chhungte kha an chin ka hre lo em a, thil thleng zel turah ngaih ṭha thei tawh hek lo, a rang a ranga haw kha ka duh ta kha a ni a, ka tisual bik lo turah ka inngai, ka chhungte ka ti chiai ve vek erawh keima fel loh vang liau liau a ni.

Ka pate lo let leh chu an rawn ri lut bawrh bawrh a, zawhna an ngah lutuka ka chhang seng meuh lo. U Hruaia'n ka nu a pawm a, seat hnungah u Sena ho chuan tawt deuhin kan inhnawh a, ka u te pahnih lah chu an han inhrosa leh chiam ṭhin. "Zingah Alana chu kan ko anga, sum kan chhuah nghal ang," u Hruaia'n a ti pawng pawng a, "Hahdamtir ve phawt ula maw le, kein kawn a rawn tlan thleng anih hmel kha," ka pa'n a lo ti hluk hluk a, ka nuin min lo hau bawk. 

Alana'n ka phone min laksak thu ka sawi chuan ka u te an han thinur ṭha leh a, kan inkhap leh ṭhin nain kan phul leh hlut ṭhin bawk a, ṭawng hun pawh kan inchan meuh lo. 

U Sena'n a sawi danin zan tirah min hmu turin an lo kal a, kan lo chhuah vek avangin kan in bulah an ṭhu reng a, ka nu te thleng hmasa kha an lo be bawk a, ka nu chuan, "An pa nen an khawtlai dawn aniang," tiin a lo hrilh a, leng lut tur pawhin a sawm lo a ni awm e. Ka u chuan kawngah kan intawk tih a hria a, lo let leh pawh an tum ut ut a, kawnah khan dingin min lo call zing viau bawk a nih hmel, ka chhan loh vangin an ngaih a ṭha lo viau bawk a, chutia Alana'n ka phone a lak thu a hriat takah chuan ka u chu a thinur khawp mai a, "Kan lo let leh lo chu a pawi ngawt mai, lo let ila chu ka hawpui nghal tur che ania," a ti leh vang vang ṭhin.

Thui fe kan tlan hnu chuan kan driver chu a lo hawi a, tui bottle min lo pek chu ka lo ban thuai bawk. A mi hrang ber a lo ni bawk nen engkim a hre ve vek si a, a rilru puthmang tur ka ngaihtuah chuan ka zak deuh lek lek a, a thu min rawn erawh rilru ka siam fel phahna anih vangin a chungah ka lawm viau thung a ni. 

Beidawn a pawi loh thu kha min hrilh a, a mak ngawt mai, beidawn hi hlawhchhamna ang chauhin ka lo hre ṭhin a; mahse, khatiang zawng khan ka lo ngaihtuah ngai lo, beidawn chu bungthar kan kai theih nana rahbi hmasa ber a lo ni a, engkim tawpna a ni lo a, a lo hlauhawm reng reng loh, thil ṭha zawk beiseina kan neih theih nan mahni hi beidawn kan inphalsak zawk tur a lo ni.

End of chapter - 7