I NGHILH ZAWK ANG (CH - 8) by Ahmangaihi violette Khiangte

I NGHILH ZAWK ANG

by Ahmangaihi violette khiangte

Chapter - 8

In kan thlen chuan tumah mut nghal tum pawh an awm lo, ka nuin thingpui a lum a, midangho chu sitting room-ah kan ṭhu ṭhap a, u Sena'n Alana call nghal a tum chu ka pa'n a khap deuh reng bawk a, ka u lawm lo chu a tum bur tawh. "Hetiang mai mai tur tih hriata lo neihtir lek loh tur, a phone ka chhuhsak e te a tih khanglan ni," a ti bul bul a, "Naktuka i pute nen ro kan rel ṭha ang, zaninah chuan engmah tih a rem lo," ka pa chuan a ti bur a, keichuan engmah hnialna ka nei lo.

Ka pa chuan khunkhan deuhin thu min zawt a, "Haw leh duhna rilru te i nei anih chuan sawi chiang la, i rawn chhuah dan hi tlan pangngai i ni si lo a, i rilru siamfel veka lo chhuak i ni reng reng em, i pute pawn sum chhuah nghal an duh ka ring ania?" a tih chuan ka inngaihtuah buai tawh lem lo.

"Kan buaina hi sawifel mai theih chi a ni lo a, nakin hunah pawh kan heti reng tho ang, chuvangin let leh lam chu ka rilruah a awm lo," ka ti tlang rawt a, ka pa chu a bu nghat nghat a, a inngaihtuah mûk hmel viau bawk.

"Haw kha a rem tawh lo bur ang, kei chu ka thinrim tak tak ania, a nupui hlui chhungten an chim buai reng bawk si, i tan awm rengna chi pawh anih loh kha," u Sena'n a lo ti leh bâwng bâwng. U Hruaia thung chu a inbengdai tawh a, "Keichu i thu thu a ni mai,    hmun danga hrehawm deuha i awm aichuan i damchhung pawhin ka chawm thei che," a lo ti ve bal bal a, u Sena'n "I hlawh pawh i kham loh kha," a lo tih vangin kan han nui ho leh rih.

Ka nu erawh chuan, "Let tawh lo ang, ngaihngamin min awmtir thei dawn lo reng reng, chu aichuan ṭhen fel hmiah zawk ang u," a ti ve thung a, thingpui no nena a lo phei chu ka bulah a rawn ṭhu zui a, ka chal chu rawn thlekin a chek leh tlat tlat ṭhin. "Kut min thlak lo," ka tih pawh chuan "A tih a ni awm em mai," tiin a awih duh tlat lo a.

"Anih chuan i pute chu sum kan chhuah dawn thu kan hrilh nghal mai dawn nia," tiin ka pa chuan thutlukna a siam a, ka thiltawn te pawh ka han sawi ve luam a, diaper-a min vawm thute, perek ka rah chungchangte leh pot-in min tlak teuhzia te ka han sawi chuan an phul hlut mai. "An mi ang lo chhungkua hle mai, i awm rei thei zawk khawp alawm, tinge engmah i sawi loh, a tirin min hrilh nila i awm rei ka phal teuh lo.." ka nuin a lo ti tlawk tlawk.

Sangsangi vanga Rawngbawla'n min vau dan ka sawi lah chuan ka u te an sa leh zak a, "Pawisak an nei lo hlawm hle mai, rawn tlan haw lo la chuan an that duh mai lo ang che tih a hriat loh, duh pawh ni la i haw tawh lo ang," an ti bur tawh a, Alana te nufa ṭawngkam zawng zawng phei chu hrilh chi pawh an ni lo.

Rei deuh chu kan titi ho a, sana chuan dar 1 a pel thui viau tawh a ni. Ka nu chuan, "Ti rawh, i khum ka siampui ang che, bed sheet thar ka rawn la ang," tiin an pindan lamah min luhsan a, ka pa pawh a tho ve nghal a, keiin kan thingpui in na no vel chu ka seng thung. Sitting room-a ka va let leh chuan ka u te chu an lo titi bawrh bawrh a, u Sena'n Rawngbawla a hmuh tawh thu leh a landan te u Hruaia a lo hrilh a, "South indian film vela misual boss a ang," a ti kher chuan nuih a ti za.

Chutah, Damiena lam a hawi thut a, ani lo ṭhu ngawi reng chu, "Nang hi, haw i la tum nange?" a'n ti pek a, Damiena chu a lo hamhaih hmel khawp mai. A ṭhu ngil hluai a, "Ka va haw ange," a ti a, a tho nghal vut.

"Aw..i duh leh riak la, Sena bulah i mu mai dawn alawm," u Hruaia'n a tih chuan, "A ngai lo, naktuk lamah ka lo phei ang," tiin ka lam lo hawi a, "Muttui u," a ti zawi sup a, "Muttui le," ka tih ve hnuah u Sena nen an inzui chhuak a, an chhuah hnu chuan u Hruaia'n min lo melh ralh ralh mai.

"Eng nge a?" ka ti hu a.

"Damiena hian a la duh che aniang; mahse, bialnu a nei ania, bakah pasal neih lam chu ngaihtuah duh tawh miah suh, len tar a nuam zawk daih ang," a lo tia, kan boruak ipik lutuk karah pawh ka u te bulah hi chuan rilru a hahdam ṭhin, tun dinhmunah ngat phei hi chuan min hmangaihzia leh min ngaihtuahzia ka hre thar a, ka thla a muang hliah hliah a ni.

"Min chawm i inhuam bawka i bulah hian ka awm reng tawh mai ang chu, nupui fel deuh i nei anga, i fate ka awmsak ṭhin dawn che nia.." ka fiamthu ve hlut a, "Nupui neih pawh ka chak ve lo, ka nei anih pawhin ka nu leh pa leh nangmah a duat loh cheu chuan ka ṭhen leh daih duh ang," a ti nuah nuah a, ka melh ra ra a, ani erawh a tum deuh bur.

"Chhungkuaa hlim ho hi a nuam ber, damchhung tawiteah inchhungkhur hrehawm deuha awm ka peih ve lo," a ti leh bul bul a, "Nupui fel deuh i zawng mai dawn alawm, bialnu te pawh i neih ve kha," ka tih chuan, "Nupui turin ka la ngaihtuah lo," a ti leh hmiah a, hepa tak hi chu, ngaihzawng nghet ve deuh a nei a, a thawhna bank manager fanu a ni nghe nghe a, an naupang lutuk tawh bawk si lo, ani lah hian hetiang rilru a la pu chu a ni a, keimah vanga nupui neih a hreh phei chuan a chi loh khawp ang.

Ka nuin min lo koh vangin inchung lamah ka chhoh san a, ka pindana kan han inzuilut chu rilru a hnim ve ruih thei. Ka pindan chu tihfai ngun tih hriat takin bal eih pawh a awm lo, ka nu chuan parda a lo thlak tawh a, ka naupan lai aṭangin a senno ngawt mai hi min zarsak ṭhin a, barbie room ang maiin engkim hi a senno min leisak ṭhin a, a parda  thlakna pawh a senno tho a la ni.

Tukverh ka va hawn laichuan bed sheet a lo phah mawlh mawlh a, "Naktukah i bungrua kan la nghal anga, tlai lamah kan bazar dun anga kawr thar te kan lei dawn nia, lo inngaihtuah lungpuam duh miah lo la, hetah thlamuang deuhin i awm tawh dawn nia," a ti siam siam a, chhan dan pawh ka thiam lo, ka hnuk a ti ulh deuh tlat.

"Ka damchhung hi chuan ka bulah awm reng tawh mai la ka duh. Mate, haw duh tawh miah suh aw, a lo thlem leh che anih pawhin let tawh lo tawp zawk rawh, hrehawm tuar hram hram hi a ngai miah lo ania, fa a ngah tawh bawk si a, haw leh pawh nila neuh neuh a awm leh zel tho ang, mi pangngai an ni pawhin ka hre tawh lo, an sual em mai, an tithlabar lutuk che hi ka lawm lo tak tak ania.." tiin a chet pah chuan min be mawlh mawlh a, ka va puih ve laipawh chuan min en lem lo.

Kan phah zawh hnu chuan, "I chal kha vurin dep ta che, i u Hruaia'n vur a siam ṭeuh alawm," a ti leh hlut a, khumah ṭhu chungin ka lo en ran thung.

"A na tawh vak lo, a reh ve mai ang," ka tih chuan, "Thilin a vawm che em ni?" a ti halh a, ka tihnat dan ka han hrilh lah chuan, "A ti lui aniang, a thinchhe lehnghal anih chu, chutianga a tih duh chuan kut te pawh a la thlak duh hial ang che," a ti zawm leh hlut a.

Ka ngawi deuh vang vang chu min lo ṭhuthnaihin hnai deuhah min lo thlek a, "I rilru tina duh reng reng suh, i tana Pathian ruat anih loh vanga heti ta pawh hi in ni zawk thei ania," a ti leh a, ka nu hi chu aw....kei aipawhin a rilru hi a na daih zawk ang.

"Chutin ka na hran lo, beidawn hnuah alawm ka lo haw, bei a dawng tawh anih chuan rilru a na tawh lo, beidawn hi a lo ṭha aniang," zangkhai deuhin ka ti a, ka chhan dan chuan a ti lawm tih a hmelah a lang. "Ṭawngṭai i duh em?" a tih leh chuan ka hnial lo, a rawn tawlh hnai vat a, ka kut vuanin Pathian hnenah min ṭawngṭaisak a, ka chunga rorel turin Pathian hnenah min kawltir tawp a ni ber. Ka nu hi chu khawvela ka ṭhian ṭha ber leh tawp chin nei loa min duhsaktu a ni a, a fanu neihchhun ni tura ka piang hi vannei ka inti hliah hliah a ni.

Ka nuin min chhuksan hnu chuan ka inbual a, ka thawmhnaw hlui la awm chu a rimtui vak lo chungin ka inthawlh a, mut chhuak reng reng a awm thei lo. Tukverh bulah ka ṭhu reng a, thla eng chuan ka lung a tih len awm reng ka hre lo. Boruak chu a dam ruih a, naktuk lam erawh a rit luk dawnin ka hria, engthil pawh tawngin engpawh thleng dawn sela zam rilru emaw, inchhirna ka nei tur a ni lo tiin rilru ka siam sauh sauh a, lungawi taka engkim hi hmachhawn ka duh a ni.

Ka muhil ta chu ka lo mutui khawp aniang dar 8 tlangah ka harh hlawl mai a, tumah rengin min kaihthawh pawh an lo tum lo. Inhnuaia ka zuk chhuk lah chuan ka pute bakah ka patea teho an lo awm ṭhup a, min hmu chu min lo be nghal sap sap. Ka pa'n chanchin a lo hrilh tawh vangin min zawt thui lo a, min thlamuanin min lo fuih luam hlawm mai.

Ka pa chuan Alana an biak tawh thu a lo sawi a, "A ṭawng nawi angreng khawp a, Duty a ngaih thute a sawi a kha, lo awm turin ka ti ve tlat anih kha," a ti a, kal dan tur an rel zui a, bungrua lak nghal an tum vangin motor lian ken an rel a, keipawh kal ve turin min ti nghe nghe.

U Sena'n kal ve tumin chawlh a lo la ringawt pek a, ka pain a phal leh si lo a, "Ka leng daih teh ang," tiin chaw eikham rual rualin a inkhalh chhuak a, a ṭhianpa dawrah a kal leh dawn aniang. Ka nu nen ka pu Hriata motor-ah kan chuang a, ka pa erawh patea nen bike-in an inphur a, midangho chuan kan hnungah motor lianin min lo zui thung.

A thleng hmasaah kan zuk ṭang a, ka nu Ngengpuii chiah a lo awm a, mak ka tihzia chu aw....!

Alana awmna ka nuin a zawh chuan, "Damlo serious deuh an nei a, a lo la haw lo," a lo ti hem mai a, awm ve ṭulin a hre lo te pawh a ni ang, keichuan pawi tihna ka nei lem lo, a hmel hmuh pawh ka chak lo a ni.

Bungrua kan lak tur thu te kan han sawi chuan, "In va hmanhmawh rum rum ve, nikhat em pawh a la liam hleinem," lawm lo deuhin nu Ngengpuii chuan a ti a; mahse, ka puin sum chhuah kan duh thu te chu dam dap hian a sawi a, nu Ngengpuii chu a inthlahrun hmel viau tawh.

Hmeichhe hoin ka bungrua kan han lak laichuan ka pa leh ka pu hoin an lo ṭhukhawm a, kan tlangval hruaiten bungraw lian an thiar thla zung zung bawk a, kan inthiar zo rang khawp mai. Ka phone kha chu Alana'n a la kawl a, ka han sawi lah chuan, "Dil a ngai lo, a thar kan lei dawn nia," ka nuin a lo ti hmak a, hmu tawh lo sela min duh anih ka ring.

Ka haw dawn chuan ka nu Ngengpuii chuan a ngawichawi khawp mai a, kan kal tur pawh kawt thlengin min lo zui naa sawi a nei tlem khawp mai, ka nuin min lo koh hran daih avangin ka pu nen chuan eng nge an sawi ka hre lem lo. Mahse, kan tlan chhuah hnua min hrilh leh danah chuan inchunga kan awm laikhan ka laka a lawm loh thute a lo sawi ve a ni awm a, "Inṭhen phei chu Alana hian a sawi ri lo hrim hrim a, amah hian a thu thuin thil a ti hmiah hmiah zawk a ni," tiin a lo hrilh bawk.

A lawm lohna a sawi chu naupangho ka hek  thu leh Sangsangi ka mil loh thu vel a ni a, an phal lo chunga ka haw pawh min dem hle a, "A pasal ber pawhin haw a remti lo," a ti nghe nghe. Ka pu erawh chuan tihian a lo chhang thung, "Zan laiah a in a rawn pan a ni a, a awm thei ngang lo a ni ang, hrehawm a tih chuan mo ṭha a ni thei dawn lo a, a inthiarfihlim mai pawh hi a ṭhat zawk kan ring a ni," a ti a, kan lawm loh thu erawh ka pu hian sawi a phal lo a, kan chet dan hian a ti chiang tawk bawk a ti a niang, ka pa pawh a khap hmiah a, ka nu Ngengpuii vuina te pawh an ngaihthlaksak mai niin an sawi a, an chet danah chuan ka lung a awi tawk viau mai.

Ka pu Hriata lah chuan, "Hna kha i lo bang ringawta a pawi em mai a, i peih leh kan dawr saw rawn nghak ta mai che, hlawh ṭha deuh ka lo siamsak dawn che nia, hnathawk kan chhawr nual a, manager angin rawn awm la, a hahthlak vak loh ang," a ti hlauh mai a, a theih chuan a tihzia khawp ang le.

"Eng dawr zawk maw?" tia ka zawh chuan, "Furniture dawr saw maw le, i u Muani a hrisel lo em a, thlaktu a mamawh hrim hrim a," a ti leh a, ka duh thu ka hrilh ve nghal mai bawk.

In kan thlen chuan Rampuii a lo awm a, zingah khan ka nu phone-in ka va hrilh a, "School kal pahin i lo peng kawi dawn nia, min kalpui a ngai hran lo ang," ka ti a, min rawn nang hman lo chiah chiah anih hmel. A hmain thil awmdan ka lo hrilh nial nual tawh a, zawhna erawh a ngah viau. Bungraw remfel pahin eng eng emaw chu ka hrilh belh luam a, ka haw chu ṭha a tih rualin kan che rum rum deuhin a hria a, bungrua pawh la hma mah mah min ti anih hmel.

"Let leh rawh chu ka ti miah lo a; mahse, bungrua hi chu la vut vut lo la a ṭha zawkin ka hre deuh a, i chhungte chu an lawm loh vanglai tak anih dawn vangin lak nghal an duh ngei dawn a, ka hrethiam lutuk tho. Ka ngaihdanah chuan Alana nen pawh han inbe leh te te ula, a awm lai ngeiin la bawk ula a ṭhain ka hria a..." a ti sap sap a, ka chhuah danin a zir lo em a, ka chhungte lahin min hnial lem si lo, ka ngaihtuah chian chuan bungrua chu ka la hma deuhin ka hre ve leh a, kan thiamna tura kan thiam lo thei mai dawn ni tein ka hre deuh a ni.

Rampuii chuan hna ka lo bansan kha pawi a han ti thar leh khawp a, "In innei rei bawk si lo, i lo bang ta kher kher a ni, i inpekna lah an hriatsak mang si lo che a," a ti leh vang vang a, engmah siam ṭhat theih a awm tawh lo bawka tiin inchhir loh hram ka duh, inchhirnain mihring nun a kaihkun hnehzia ka hria a, dinhmun chhe leh chhawnga min siam loh nan inchhir rilru put hi ka duh lo a ni.

"Kan nupa kar kha ṭha mai angin a lang naa dangdaitu kan nei tlat a, keini inṭhen lo ringawt pawh niila nupa hlim kan ni kherin ka ring lo, naupang nen kan inkar a ṭha ta anih loh phei chuan a buaithlak zual zel ang, a nupui hluite lam a thlauhthla thei bawk si lo, an lakah ba a ngah deuh nge mawni a hnar thei miah lo mai a, fate pawh lo nei ila kan hma hun hi a hlimawm dawn loh riauin ka hria, ka pai hma hawt aṭangin thik a ni nghal a, kei lah ka rilru a lo na ve hmanhmawh bawk a, han ngaihtuah thui zel phei chuan fa nei ta ila kan buai chho nek dawn tein ka hria," ka ti ve duah a.

"Pathian remruatah i ngai phawt ang, fa a pek mai loh chhan che pawh a ni maithei a ni," ka ṭhiannu chuan a ti ve leh a, engkim hi Pathian remruat leh a duhdanah ngai mai zel ila a hahdamthlak ber a ni.

Rampuii school kal tur chu kawt zawl thlengin ka va thlah a, ka luh leh hnuah thingpui ka lum a, an in zawh hnu chuan kan chhungte pawh an ṭin ta hlawm a, ka nuin min chhuahpui a tum bawk nen keipawh ka inbual nghal a, ka insiam chhungin dar 12 a lo pel duai tawh. Ka pa chuan ka scooty kha workshop-ah a kalpui a, a ke thep ringawt anih vangin a lo hawn lehnghal mai ka ring.

Ka nu nena kan bazar dun chu lei tur reng reng ka hre lo, thawmhnaw mawi leh incheina thil reng reng chuan mit an la lo a, duhzawng leh awh takngial pawh ka nei lo a ni ber. Ka nu chuan, "Hei hi i duh em, ha chhin ta che?" a ti mawlh mawlh reng a, a mawi a tih deuh te chu ka ha chhin ve bawk a, ka duh em tih min zawh lah chuan lu ka thing mai zel a, a ning ve tawh ngawtin ka ring.

"Engmah lei a ngai lo, phone chiah ka mamawh rih, ka chhuak khat lutuk a, ka neihsa pawh ka ha seng hleinem," ka tih laiin ani chuan, "Kohhranah te pawh i inhmang leh dawn alawm, nitin dawr nghaka kal chhuah i ngai tawh dawn bawk a, chutiang ami tur chu melh rawh," a ti ve tlat, awh nei lo ta na na na chuan mawi a tih ang ang chu ka la a, kan haw tur chu kan inkhai bawr ve ṭun tho mai.

Tlaia Rampuii lo pengkawi leh chuan Alana nena an inbiak thu a rawn sawi a, "I phone number aṭangin min lo bia a, phone pek let che a duh anih hmel," a ti a, thil dang a sawi em ka zawh chuan, "I ṭhiannu chet duh dan hi chu a mak ngawt mai a tia, ka lo hau deuh titiha a lawm lo aniang, 'Phone chu i hnenah ka rawn dah ang, i lo pe dawn nia,' a tih hnuah a dah hmak a, ka be zui tawh lem lo," a ti a, ka chhungte phone number a nei a, a duh chuan min be thei reng a, Rampuii zawk a bia chu ka hrethiam lo hle.

Zanah ka cousin-te an lo leng khawm a, inchungah ar kan hem a, an ri laih laih reng a, ka let leh lawm te pawh kan ang deuhin ka hria a, nuam erawh ka ti zan lo. Mut mai ka duh thu ka sawi chuan an phal tlat lo a, dar 11 thleng chu ka men pui ve, a ṭhen an riak a, an meng rei khawp aniang zingah pawh an tho tlai a, an chhungten an lo call tluk tluk hlawm.

U Sena office kal tur chuan, "Insiam rawh, i phone chu ka va en pui ang che," a ti teh thut a, "Min lei i tum em ni?" ka tih chuan a nui ruh ruh a, "Pawisa i nei em ni?" ka tih leh pawh chuan a bu mai a, ka nuin "A nei ang, a hlawh zawng zawng a in zo bik nang," a lo ti ve zauh.

Chutia ani teh meuhin phone min lei dawn chuan tiin phur fein ka insiam a, ka nu chu ka pu Hriata dawra ka kal nghal tur thu hrilhin u Sena chu ka zui chhuak a. Damiena te dawr kan va thlen chuan an lo inhawng deuh chauh aniang customer tumah an awm lo a, hnathawk pawh pakhat chauh a lo la awm. 

"Khawi maw, duhthlan tur chu..." ka u chuan a han ti nghal thawr a, mi hman hlui an repair nge mawni hi Damiena'n a lo phawrh nual a, "I duh ber thlang rawh," a ti zui a, Iphone te anih hlawm avangin a man zat ka han zawt te te a, "Man a nei lo," ka uin a lo ti leh hmiah.

"E khai, chutiangte a ṭha dawn em ni, min leisak dawn emaw ka tia?" phawk angreng zeta ka tih chuan, "A thlawna dawn theih laia lei ṭalh thu a awm lo," a lo ti sam et a, Damiena ka va en chuan, "Repair a nih kha, a ṭha vek, ka lo thlansak dawn che em ni?" tih pahin kan lam a lo pan a, pakhat chu a rawn la nghal chat a, "13 hi a ṭha," tih pahin Iphone pakhat chu min pe a, "Hralh tlak loh em ni?" ti a ka zawh chuan a nuih a za khawp mai.

"Ni bik chiah lo," tih pahin phone cover a rawn phawrh zui a, "Ngawi rawh, a cover chu kan lei ang, u Sena'n pawisa a nei alawm," ka ti ve tlat a, ka duh ber ka thlang a, ka u chuan a bat sak leh hram pek, "Installment-in ka rul dawn che nia," a tia, a nui deuh vur vur a, a zuartu lah chuan a hnial eih lo.

Ka Pu Hriata dawr ka va thlen chuan u Muani a lo awm a, ka thawhtur min lo hrilh zung zung a, eitur order na tur te, siam tui deuh leh tui vak lo tih thlengin min lo hrilh a, a duh a sawi zawh hnuah min hawsan hmiah bawk a, ka thawh tur chu pawisa dawn leh inhralh dan ziah fel vel chu a ni mai awm e. Bungraw phur motor a awm a, labour call mai theih an ni bawk a, a awlsam dawn khawpin ka hria. Hnathawk panga an awm a, mipa pahnih leh hmeichhia pathum an ni a, hmeichheho chu sales girl an ni a, mipaho erawh chuan bungraw thiar leh fit ngai ang chi te an lo khawih a, bungraw lian deuh ho erawh a leitute in lamah fit ngai chi te anih vangin labour hran koh an ngai a, team angin an awm ve niawm tak a ni.

Mihran hran siam lakkhawm anih hlawm avangin chung ho chu ka lo dawr an ngai a, ka thawh ni hmasa berah hian pakhat chu ka hmu nghe nghe. Kan nula Zotei chuan, "Center table man to ho saw a siam a nia, a siam tam lo nain hralh a kal ber a, order pawh a siam seng lo, dawr an nei ve a, kan pu hi a duhsak vangin min lo pe ve ṭhin," a lo ti ru sar sar a, chupa chu palian pui, ngo leh hmelṭha deuh mai a ni. Kan thil zawrh ho chu a enkual dan dan a, dressing table ho chu a thlek uluk viau bawk.

"I siam em ni a?" ti a ka va zawh chuan, "Ni lo e, hei chu belkhawm mai mai a ang riau," a ti zawi sup a, "A darthlalang hi lan ṭhat a har anih hi," ka tih chuan a nui deuh suk a, "A tlawm chi a hmang anih dawn hi, a kawngkhar pawh khu a nghet rei lo ang," a ti ve leh a, a dang pawh chu a en kual a, a che chu a dam dup mai.

Ka ṭhutnaa ka let leh chuan, "Pawisa a lo lam dawn em mawni le?" tiin Zotei chu ka zawt a, "Dawn lo ang, a thil siam kan hralh em a lo en ṭhin alawm," a ti a, kan hralh tawh em ka zawh leh chuan pathum chiah kan neih tawh thu leh kan mamawh leh vat tur thu a lo sawi a, "Pu Samua thil chu kan kawl rei ngai lo, thing ṭha chi vek a hmang a, a kut hnu a mawi bawk a, customer feedback pawh a ṭha ber," a ti ru leh sa sa a, a sawi laimekin Pu Samua chu a lo phei a, Zotei nen chuan kan lo nuihsang bawk.

"Coffee i in duh em?" ka tih chuan, "A free a ni em?" tiin min lo nuih let sang a, "Free tehreng mai, Zote...lo laksak te che..." tiin Zotei chu ka melh a, pu Samua chu ṭhutna ka kawhmuh zui a.

"I thilsiam chu pathum chauh kan kawl tawh a, a dang i lo dah belh dawn em?" ka ti nghal zung zung.

"A...hralh zo phawt rawh u," a tih chuan chhan mai dan ka hre lo. Zotei khan kan kawl rei ngai lo a tih kha ka hrechhuak zawk a, "A zo leh vat dawn ania aw.." ka'n ti ve ngawt a, "Pahnih chu siam lai ka nei," a lo tih chuan, "Lo dah la, nge kan lo la ang?" ka ti a, ani chu a ngawi deuh vang vang.

Min chhang dawn lo emaw ka tih hnu chuan, "A zuartu hian duh hi in thlang ṭhin a; mahse, thilsiam te zawk hian a leitu tur hi an thlang a," a rawn ti teh daih a, ka bo deuh hu mai.

Zotei coffe rawn chhawp chu a han tem hlek a, "Hei chu a va tui ve," a tih chuan Zotei a lo khi var var a, a lo luh tirh aṭang khan a en duh ka ti reng a, ka hrethiam ta chauh.

Customer dang an awm vangin ka be hman ta mai lo, ka thawh hlan pawh chuan a ṭhutna ngaiah ṭhuin sana a en leh ṭhin a, mi nghah a nei a nih ka ring. Ka va let leh chuan a coffee pawh a lo in zo tawh a, chutah ka lam lo hawiin, "I pu ka lo hrilh dawn nia, ka zawh hunah a duh lo thlang leh mai rawh se," a ti a, "Ka pu tih engtin nge i hriat a?" nui var vara ka tih chuan, "Chutiang chu ka hre chuang lo, hnathawkte pu a ni ve mai ang chu," a lo ti leh daih a, ka nuih a za angreng.

Rei vak loah customer tur niawm tak hmeichhe pakhat hi a lo lut a, sang leh hmelṭha zet mai a ni, "Min lo nghak rei em ka pa, Lily fapa khan min ngen tlat a, a hmuh loh laiin ka lo chhuak ru thei hram alawm," tiin pu Samua chu a rawn be hlut a,  a mak ka ti angreng, a la upa vak pawhin ka hre si lo a, fanu a nei puitling tawh viau bawk si a, fa a nei hma hle aniang, ka ennawn leh pawh chuan ka ringhlel deuh rum rum a ni.

"Bazar kalpui chi pawh i lo ve, hman deuh kalpui tawh la a ṭha ang..." dam deuh thluama pu Samua'n a tih chuan nula chu a lo nui hak a, "Anih chuan kal ila.." tiin pawn lam a pan a, pu Samua tho tur chu, "I fanu chu a va hmelṭha ve?" ka lo ti zauh. Min en deuh run run a, chutah..."Ka fanu a ni lo, ka mo anih kha.." tiin min chhang ta mai a, a kal zui mai bawk nen ka hau chungin ka lo en a, engtia a mo nge mawni ka ti rilru a, a fapa nupui tihna nge mawni, a enga pawh nise an innel hmel hlein ka hria.

"Fapa chuangtlai amah ang tawk nei se..." kan nula pakhatin atih chuan, "Fanu pakhat chiah a nei, a lo hruai ve zeuh zeuh, a la naupang...amah pawh kha a la upa vak lo, a intuaihnum deuh phei chuan a lang naupang lutuk," Zotei'n a lo ti zat zat a. "Hmeichhe lo kal khan 'Ka pa' a rawn tih kha?" ka tih chuan, "Ka hre lo kha nu kha chu, a changin 'Ka u' a tia, a changin 'Ka pu' a ti bawk a," chiang lo deuh hian a lo ti leh a, ka hrethiam ta niai lo, a mo chu anih hmel tih bak chu hriatthiam a har.

Tlaia ka haw chuan Rampuii ka call a, ka number thar va hrilh tuma call ka ni, "Lo phei ka tum, hei i phone pawh ka kawl tawh," a lo ti let var a, engtin nge a kut a thlen ka zawh chuan, "Class ka lak laiin office-ah a lo thleng ve tawp, mi a rawn dah tir anih hmel," a ti a, Alana chet dan ṭhin hi chu aw, mi a tir anih tho chuan engah nge ka hnenah a rawn tirh mai loh le.

Dar 8 dawna Rampuii lo thleng chu ka pindanah ka ko chho nghal a, ka phone ka han hmet eng chu message leh missed call a lo tam khawp mai. Ka chhungte missed call bakah Alana message te a lo awm a, zantir dar 6 leh dar 7 bawra a lo thawn te a ni hlawm. Inhmuha inbiak a duh thu a lo sawi a, a message hnuhnung berah chuan William-a a harh ṭhat tawh thu leh biak theih anih tawh thu te a rawn sawi tel bawk a, chu thu chuan min ti hlim ve leh viau mai, naupangten kan inṭhen an tuar lo tur pawh ka lawm tel bawk.

Ka be duh em tih Rampuii'n min zawh chuan, "Duh loh chhan tur a awm hleinem," ti maiin ka chhang a, tlanchhiat emaw biruk lam hi chu ka rilruah a awm ngai lo, a sawi duh ka ngaithla anga, chhan ṭul te pawh ka chhang anga, sawi ve duh ka neih leh ka sawi ve bawk ang, chu chu ka rilrua a thawh dan a ni.

Rampuii haw hnuah a message te chu ka chhang ve chauh a, William harhfim chu lawmawm ka tih thu leh min biak a duh chuan ka biak theih reng thu ka hrilh a, min chhanna ka nghah chhungin ka lo muhil hman a, ka message a lo chhanna chu zingah ka hmu ve chauh a ni. "I lo kal angem, rawn hmu ve la, Williama nu pawn hmuh ve che a duh a," tih hi a ni a, ka rilru a buai deuh nak a, ka val kher chu a ṭha angem tiin ka inngaihtuah buai a, ngun deuha ngaihtuah hmasak a ṭhain ka hria.

Chhawlhni chu inah ka tawm chawt a, u Muani'n lenpuiah min sawm naa ka chhuak peih meuh lo, zan lam chiah ka inkhawm a, min hmutute lah hian thil hi min lo zawt phawng phawng zel a, mi zinga awm pawh nuam ka ti chiah lo a ni. Alana chuan Rampuii a lo be leh a, "Ngaihdam dil ka ba, William-a chungchanga ka ṭawngkhum dan vang khan a lungawi lo ni berin ka hria," a lo ti a, Rampuii lahin a lo hau nek, "Hetiang mai maiin rawn ti suh, bungrua a lak dawn pawhin dan i tum lo a, awlsam tea lo kir leh thei a ni tawh lo," tiin a lo chhang bawk a ni awm e.

Thawhṭanni chhunah Alana phone call ka dawng a, "Ka off day ania, i hman chuan inhmu lawk ang hmiang?" tiin inhmuh a rawn rawt a, ka awmna hrilhin min pan mai turin ka lo ti ve thung a. "Tlai lamah Williama ka han hmu dawn a, ka lo peng kawi ang," a tih hnuah kan inbiakna kan ti tawp a, a bula sawi tur chu han ngaihtuah lawk vak dan pawh ka thiam lo, a thu sawi dan a zira lo chhan mai a ṭhain ka hria.

Customer kan ngah ni tak anih vangin ka buai ve khawp mai a, dar 3 vela Alana lo kal pawh chu ṭhutna ka lo kawhhmuh a, phone call chhangin ka buaisan rei fu mai. Coffee ka lamsak a, in pahin min lo nghak ve reng a, darkar chanve dawn chu inbe loin kan ṭhu dun awm e.

Williama eng nge a an ka zawt hmasa ber a, "A ṭha, CT scan leh MRI result pawh a ṭha a, a chhuak ve thei ṭep tawh," tiin min chhang a.

"A inhliam dan a sawi thei em?" ka tih leh chuan, "A u te tlan thlain a nektlu a ni awm e," zawi deuh sup hian a ti a, ka ngaihtuah let chuan a dik thei dawn viauin ka hria. "Lo han hmu vat lo la chuan a nunna kan chhan hman kher lo ang," inthlahrun hmel deuh hian a ti zui a, kei chu ka ngawi ran ringawt.

"Sangsangi khan a lo hmu sual aniang, a rawn hmuh che khan a chiai ve deuh pawh a ni maithei, a pu Rba-an min hrilh khan kan inhauh phah hrep a, Mary lahin rin tur ber a hre lo a, a han ringhlel ve deuh dawn dawn che a; mahse, thil awmzia a hriat takah chuan ani pawh a inthiam lo a, hmuh che pawh a duh khawp ania," a ti sap sap a, a thilsawi aimah chuan a thilsawi chhan lam zawk chu ka lo ngaihtuah a, mi tu emawin a chhungkua thil tihsuala mawhphurhna la hi a angin ka hria, chutah tak chuan ka tel ve lohna tur tawpah ka lo intulut ve tih a lang chiang hle bawk.

"Ka hrethiam lutuk alawm, ka ngai haw hran lo e, Williama a ṭha tawh ber chu a lawmawm anih chu," pangngai deuhin ka ti ve a, ka lam a lo hawi chu tawi tein ka nuih bawk.

"I chhungte lakah pawh ka inthlahrung, min ngaihdan tur ka hria a, hmuh pawh a zahthlak dawnin ka hria," a tih leh chuan sawi mai tur ka hre lo.

"Willie-a a chhuah chuan keipawh in lamah ka awm tam thei tawh ang, naupangho hi ka kilkawi deuh an ngai tawh a ni," a ti zawi leh sup a, chutah kher chuan ka thlawp khawp mai, "Ni e, naupangin an mamawh laitak che ania, hetiang rual an nih hian enkawl ṭhat an ngai, enkawlna ṭha an mamawh ngawih ngawih lai anih hi, i hnaah buai viau ṭhin mahla an tan hun insiam hram hram rawh," ka lo ti ve duah a, min lo en leh vang vang mai.

"Kan pahnih hian sawifel tur kan ngah asin maw le, bungrua i lak nghal duh pawh ka ring lo a, kan ina awm kha hrehawm i ti viau em ni?" a ṭawng tawp lam chu a chang deuh lek lek a, mi lah chu a han en chiang khawp a, sawi tim vak pawh ka tum bik lo.

"Nia, lak loh chhan tur a awm lo niin ka hria a, ka chhungten mi an thlawp ve bawk a, kan vaia tana ṭha zawk tur pawh a ni reng reng a..." tiin dam deuh tak hian ka chhang a, a hmelah chuan a ngaihdan a ni lo hle tih a lang a, a tum deuh bur mai hian ka hria.

"Inṭhen hlen i duh tihna ania," a ti deuh nghat a, ka pha lo. "Kan tih makmawhah ka ngai," ka ti ve zat a, kan inen ran mai.

"Nang berin lo let leh i duh si loh chuan tih ngaihna a awm lo anih chu, keichuan ṭhen che ka tum ngai lo," a han ti leh nghat a. 

"Enteh Alan, naupangte hian an nu an mamawh, nu dang an duh lo, ka awm ve ringawt pawh khan an nunphung a tibuai tlat, an sual e ka tih naah ngai lo la; mahse, thui tak thlenga han dawn chuan ka awm loh hi a ṭha zawkin ka hria, Mary nen pawh inzawmna chat thei tawh lo in nei a, nangpawn i hriat chian kha, kei ka awm khan engmah a tidanglam lo a, mahni ka lo intihrehawm ve tho bawk nen, min dem lutuk bik lo mai rawh," ka ti luam a, min thiam lo tura ka duh loh rualin amah pawh inthiam lo bik lo sela ka duh, kan inkawprem ngang lo tih hi kan pawm dun mai a ṭhain ka hre zawk a ni.

"Mary nen chuan kan innei tawh kher lo ang, bungrua la nghal lo la chu rawn hruai leh mai che ka tum a, tunah chuan i chhungte hmai eng hmuh pawh a nuam tawh lo ang, i chhuah dan lah khati kha ania, veng chhung mite sawi sep kan kai zui a, kan inṭhen hlen phei chuan an kumkhaw sawi a tling mai dawn chu anih hi," pawn lam thlir vang vang pah chuan a ti a, eng emaw chenah inthiam lohna chu ka nei ve a, a bula tih lan erawh ka duh lem lo.

Kan ngawih vang vang hnu chuan, "Min nei hi in inchhir tawh viau lo maw?" a rawn ti leh hlawl a, ka lo hamhaih angreng khawp mai. Kan han inen renrawn a, ka chhan ngei a duh anih hmel. 

"Inchhir lo e, nei lo che ni ila chuan ka neih loh vang chea ka inchhir fo zawk ka ring, chutiang inchhirna ka nei lo tur hi ka lawm zawh mah," tia ka chhang chu a hriatthiam loh hmel hle a, sawifiah thiam lo viau mahila keima lamah ka chiang em em thung. Ka first love a ni a, kan inṭhen hmasak chhung zawng khan ka tan a special ber a ni a, ka ngaihluin a chanchin hriat te pawh ka chak ṭhin, inṭhenna mumal awm loa inṭhaṭhen kan nih vang khan ngaihtuah chhuah a awl a, a pathlawi tih ka hriat hnu phei kha chuan ta se tiin beisei ka nei a, hetiang hi kan thleng dun dawn tih hre tura ka nei kha a ṭha zawk mahin ka hria, chuti ni lo sela vawiina ka rilru ang hi ka pu awm si lo a, engmah hi a pawi lo, inchhir lo teh ang, kan hmachhuah tur hre lo a beisei neih aichuan a tawp dan ka han hre hrim hrim pawh hi a ṭha zawk a ni.

Coffee ka lam leh hnu chuan kan ṭhu ngawi dun chawrh chawrh a, a khat tawkin customer ka biak san leh ṭhin bawk. Rei dawn a ngawih hnu chuan, "I chhungte chuan min haw viau em?" a rawn ti leh tawl a, keichuan "An rilru chu a dam zan lo ang, thil nihphung pangngai angin ngai rawh," ka ti leh mai a, a pawm aniang chu a bu deuh nghat nghat a.

A coffee a in zawh chuan rei a ṭhu tawh lo, a phone chhangin a kal tur thu a sawi zui a, ka han ding ve uk nain ka zui chhuak lem lo thung. Ka lainat deuh tlat a, engtin nge an khawsak zui ang tiin ka ngaihtuah rauh rauh bawk. Huat viau ka tum pawhin ka thei der lo, ka lo hmangaih viau em mawni ti tein ka inzawt a, hmangaih viau ni ila let leh duhna rilru ka nei ngei awm si a, chutiang rilru lah chu ka pu hauh si lo, keimah hi ka lo inhmangaih fê zawk anih ka ring, hrehawm tuar turin kan inphal ngang lo a ni, hetiang rilru put hi a ṭha ange maw?

Damiena thil min hrilh bawk kha ka hrechhuak leh a, 'Duhthlan tur hre loa i rilru a chiai anih chuan, i awm nawmna tur leh i hlimpui tur ber thlang rawh' min ti kha nia, ka awm awmna tur ka thlang hi dem ka hlawh viau mai angem, mahni hmasial hi thil pawi a ni angem? Zawhna chhan har tak a ni, mahni inhmangaihna thinlung neite chauhin min hriatthiampuiin ka ring.

A rawn kal ni bak chu kan inhmu leh ta lo vang vang a, eng emaw chang hi chuan a message ka dawng ve leh zauh ṭhin, Williama pawh a ṭha ve zel a, ani pawh a hnaah a buai leh viau tawh anih hmel. Kan inbe khat a, kan inbiak chang pawh hian zawhna tlanglawn deuh eng nge an an tih angreng hi ka zawt a, sawi tur hi a vang tawh hle ṭhin. Ani pawn ka dam ṭha em tih angreng bak hi chu min zawh tur ka hre bik vak lo.

Christmas a hnai a, dawr lam kan lun chho ve bawk nen ka buai ve ṭhin khawp mai a, u Muani'n min lo pui ve tak nain ka awm hi chuan engmah hi a ngaihtuah ṭha peih lo a, "Nangman lo ti la, bonus ka pe ang che," a ti awlsam leh et ṭhin a, hlawh te hi ka lungawi loh an hlau a, ka nu bulah te an lo zawt thul. "Ruatbawihi khan hlawh tlem a inti em, kum thar lamah kan san dawn nia, engmah sawi hreh suh se," tiin ka puin ka nu a lo hrilh nghe nghe a, ka hlawh ṭha ka intih ve tehlul nen.

Nikhat chu beisei loh deuhin Alana ṭhiante nupa an rawn lang hlawl a, an lo luh lai ka lo hmu lo bawk nen minti hamhaih reuh khawp mai. "Center table kan mamawh a, hei hi in dawr em ni?" Hadasi'n a tih chuan ka pute dawr ka nghahsak thu hrilh pahin kan center table neih ho chu ka lo kawhhmuh a, a pasal chuan a man to ber chu a va thlang nalh a, an dawra deliver turin min ti bawk.

"In chanchin ka lo hria a, a pawi ka lo ti tak tak a ni," Hadasi'n a tih chuan, "Ni e tiraw, mihring hian hma hun hi ka hre tlem bawk si," tiin ka nuih var var a, coffee te lamsakin ṭhutna ka kawhhmuh zui a, kan titi ta luam a.

Marcosa'n, "A tir khan kan huphurh pui deuh che a, a fanu upa zawk kha a sual hmel riau khan ka hre mai a, amah tak hi chu a fel asin, " a tih laiin, "A nu zawk kha ka huphurh chi ania kei chu, a fapa lakah khan a thikthu a chhia an ti tlat," Hadasi'n a lo tih zawm a, chutiang lam zawng chuan engmah ka lo la ngaihtuah ngai lo.

"Ka nu kha chu a khirh chi a ni ve a," ka ti mai a; mahse, Hadasi'n a han sawi leh tak zelah chuan a ni mai awm tak e tiin ngaihdan ka nei. Kan inneih hma khan ka nu chuan min nei lo turin a lo ti a, a tute pawh a lo fuihpawrh viau a ni awm e. "Fapa mal, pa tel loa a ṭulpui anih vang leh a mo hmasa a uire vang khan mo neih leh kha a duh tawh lo niin ka hria," Marcosa'n a lo ti ve bawk a, thil ni thei tak a ni a, ka nuin min ngaina thei lo pawh kha mak ka ti ṭhin reng a ni.

An chanchin ka han zawh chuan Marcosa zawkin min lo chhang a, "A buai thei khawp mai, a ṭhianpa nen clinic an hawng thar a, naupangho chu an nu hluite in lamah an awm tam, hmannia Puia nen kan zuk len pawh khan a nu chu a lo zin daih a, Kolasib lamah kar hnih dawn chu a cham tawh a ti," a lo ti a, "Hna hi a atchilh ve tak tak anih dawn hi," beidawng angreng zeta ka tih chuan, "Mipa hi chhungkaw enkawl turin an pawimawh a sin mawle, inchhungkhur an uap ringawt pawh hi kan thlahlel ṭhin ania, fa enkawl kawngah ngat phei chuan pa hi an pawimawh ber asin," Hadasi'n a lo ti ve  a, ka lo thlawp khawp mai.

Coffee an inzawh hnuah min kalsan leh mai a, an kal hnute chuan ka ngaihtuah zui nasa khawp a, Alana mawlh chu a ni, engtia han awm zel nge a tum dawn ni aw, a fate lah chu Mary kutah a dah tawp anih hmel a, hetianga a awm hian a hlim phah dawn em mawni?

Tlaiah ka u Hruaia'n min lo lam a, "Christmas tree lei teh ang, vur awmsa ang kha ka duh," a tih vangin bazar lam kan pan a, dawr pawh an la hawng fur hlawm. A duh ang tak lah chu a han lian khawp a, keiin taxi ka lak phah tawp a, in kan thleng chu ka nuin a lo la hau zui, "Kan nei reng a, a thar lei a ngai hleinem, chei chhung a rei lo ropui si," a lo ti hlak hlak a. 

"Kum tin a ngai in hmang reng a, in nin ve tawh ka rin nen," ka u chuan a ti duh lek a, zanriah eikham aṭangin ka nu nen kan chei a, nuam erawh kan ti leh viau thung.

Christmas tree kan lo chei mawlh mawlh laichuan ka u te ṭhianho an lo lut a, min lo puih pahin kan inkawm ho a, an ṭhianho an lo len hi chuan kan ri le lu ṭhin. Thingpui an lam a, ka nu nen kan buai deuh avangin kan ngaihsak mai lo. Rei minti ta deuh aniang Damiena chu a tho nulh a, a va thli dawn aniang choka lam a pan a, "Va thlitsak mai rawh," ka nuin a lo ti nghal chuk. Hmanhmawh deuhin keipawh chu ka tho a, choka ka va thlen chuan no a lo chhawp dal tawh, "Khawi keiman," tia va puih ka tum chu min lo nam sawn pahin flask a ban a, ka han chuh leh pawh chuan min lo namsawn zel mai.

"I mak ṭalh e, lo va ṭhu teh," ka tih lah chuan, "I buai kha, ka ti thei reng alawm," a ti ve tlat a, pui ta lo chuan a thingpui thli lai chu ka en reng ringawt a, a han thlikhat hlawm em em khawp a.

"I zin dawn hnai em?" a lo hawi vut a, "Kartawpah, min chah duh i nei em ni?" a lo ti var a.

"Nei lem lo e," ti maia ka chhang chu min rawn thlek vung vung mai.

"Eng nge ni a?" ka tih chuan, "Zin suh i ti dawn emaw ka tia," ka ti teh daih a, ka bo angreng.

"Engah chuan maw?"

"Aa...ka hre chuang nang" a nui suk a, thingpui no pakhat chu lain a han lem ri khalh a, 'Va sem rawh,' min ti niawm takin min mitmei bawk.

No chu lain ka va sem hlawm a, chokaa ka va let leh chuan a dinna ngaiah a lo la ding reng. Tray ka dah laichuan, "Chocolate i ngaina lo a ni maw?" a lo ti khauh a, "Engtin nge i hriat?" ka tih chuan, "Ka zak e a, sawi ve mai tur che ania, zantin deuh thaw ka pe che a," tiin a ner nung.

"I ṭhianpa sawn min dil ziah," nui chungin ka ti a, a nui ṭha ve duh vak lo.

"Ka lei tawh lo chiang ang, ka pe dawn lo reng reng," tih pah a jacket a zen chuan a ri deuh rak rak a, "Chocolate i ak elo?" ka ti chu min lo en rang khawp mai.

"I ta tur a ni lo," a tia, ka lo nui hak.

"I bialnu ta tur a ni maw?"

"Bialnu ka nei lo," kal mai ka tum chu min lo chhan dan vang chuan ka ding leh rih, "Ṭhenawm piaha nula nen khan.." tih paha ṭhenawm te in lam ka kawk tur chu ka kut a lo hum chawt a, "Engmah a awm lo," a ti bawl a, ka kut chu a thlah leh mai bawk a.

"Engati nge, in ṭha reng emaw ka tia?" tiin ka han zawt leh hram a.

"Ka lo len ngun em hi," tia min lo chhang erawh ka hrethiam zan lo.

"Eng a..?" ka ti let hu a, mawl min tih hmel deuhin min rawn melh.

"Nula dang rim rim te chuan tu nge min ngaithei ang ni.." a ti bul deuh hmuk a, ka lo ka hau mai.

"Keite chu,...nula ka nih loh hiii.." a lo chek hlak a, "I van hrethiam lo thei tak, ka tan chuan a in ang vek," a ti zawi deuh sup a, engmah pawh ka sawi leh hmain a kal nal nal a, no ka va khawm laite chuan min en dan chu a dang riauin ka hre tawh, ani pui hian min lo la duh ru reng em mawni ka ti rilru a, ka u vang chauha lo leng fo chu a ang tawh tlat lo, min duh ṭhin tih ka hriat vang nge mawni ka ngai hê deuh tlat tawh.

Rei deuh thleng an leng a, kan christmas tree te chu uang deuhin thla an lakpui a, urlawk zan hman dan turte an rel bawk a, pawisa an nei hlawm bawk nen an hisap  hrawl ngang mai. Charity ride neihte an rawt a, keipawh chu tel ve turin min sawm a, ka nuihsan mai mai thung. Dar 11 dawnah haw an rawt a, Damiena haw tur chuan kawngka bula console table-ah chuan thil a dah zauh a, min lo en kher bawk.

An chhuah hnua ka va en chuan chocolate a lo awm a, nuihza angreng deuh chuan ka la a, ka u lo luh hmain pindan lamah ka chhopui zui a, ei phei chu ka eichak lem lo. Ka intihfai zawh hnua mut ka tum laitakin message ka dawng a, Damiena message a ni. "Console table-ah khan ka dah, zanin chu ka lei laklawh tawh a, a tawp nan lo la rawh," tih hi a lo thawn a, chhan dan a vang duh nek.

Tih ngaihna vak hre hek lo, chocolate thlalak chu ka va thawn ringawt a, "I fel e," tih zawngin min la chhang zui a, keiin ka chhang let tawh lo thung.

Urlawk zan chu ka pute in lama hman ho an rawt vangin inkhawm ban veleh kan chhungin kan kal a, ngaihzawng nei ho erawh rei an awm hlawm lo. U Muani hoin ka pi zufang um kan kaitho a, a thlum tui nasa mai bawk nen hai chhalh khawpin kan hawp a, mut chhuak lamah a thawk zui a, kan eitur siam te pawh ei hman loin kan chatthla diak a, tum loh deuhin kan riak ho ta ringawt a, zingah mahni in lam panin kan haw hna hna hlawm.

In ka va thlen chuan u Sena pawh a lo tho ve chiah a, "Zanin cu program dang lo nei tawh su, hetah hmang ho ang, in chungah ar kan hem dawn nia," a lo ti bul bul a, u Hruaia'n a hman loh tur thu a lo sawi ve zat bawk. Inkhawmnaah hian ka nu nen kan inzui mai zel a, ṭhianten pasal an nei hlawm tawh a, nula ka ni ve tawh lo bawk nen aia naupang deuh te zinga awm chu ka hreh a, ka nu hi ka zui deuh chawt tawh mai a ni.

Zana kan inkhawm bang chu ka u te ṭhianho nen in kan thleng rual a, inthlak hmain thingpui lum turin min tir bawk. Thingpui  ka thlitsak hnu chuan inchungah ka chhohsan a, phone ka en chuan Alana message leh missed call a lo awm a, call let lem loin a message zawk chu ka chhang a, ka inkhawm thu ka va hrilh deuh tlawng.

Rei vak loah a lo call a, ka han chhang chu, "Ruatbawih," a rawn ti zawi ruih mai a, engti zia nge mawni!?

"I duty nange?" ka tih chuan, "Naktuk zan aṭangin ka night ang," a ti mai a, sawi tur vak pawh ka hre lo.

"In hmang nuam em?" ka ti leh ngawt a.

"Naupang an awm lo a, ka nu nen chauh kan nia, a khawharthlak khawp mai," a rawn ti a, chutih laichuan a nuin a au ri ka hre zui a, pindan kawngkhar a va hawnsak bawkin ka hria.

Phone a la dah loh vang chuan an inbe ri chu ka hre pha a, a nu chuan, "Naktukah naupang an lo haw dawn kha aw, Mary'n chaw ei a rawn tum lehnghal a, he nu hi i ti ngampa mah mah ania, an thu thua awm tur kan ni hleinem, kan ba pawh i tlak tawh a ni lawm ni," a ti vin khar khar a, "Ka lo be mai ang," Alana'n a tih chuan, "Hruai leh te kha i tum ange, in awmdan hi ka duh miah lo ania," pakhat chuan a ti zui hlak a, kawngkhar khar riin a zui bawk.

"Ruatbawih," a rawn tih leh chuan ka chhang mai lo. Aw ka thian kharh a, "Min lo hrethiam rawh aw," a rawn ti leh ringawt a, eng ber hrethiam tura min duh ka hre lo.

"Hetiang tehnuai hi kan nia, keima thiam loh vek a ni," a ti halh a.

"Hrethiam e, keichu min lo ngaihtuah duh tawh suh," ka tih chuan, "Nia, biahthu inhlan thei dinhmunah pawh kan din tawh loh hi," a ti bung deuh nghat a. 

"Ni e, kan inkar hi chu theihnghilh ila, keini pawh inbe fo lo zawk teh ang," ka ti ve leh zat a, a ngawi deuh vang vang mai. A ngawih rei tak em avang chuan phone call chu ka hmet tawp a, rei dawn chu khumah chuan ka mu zawi reng a, ngaihtuahna a mang viau bawk. Chutih laichuan ka phone chu a lo eng leh zak a, Alana bawk a ni.

A message ka en chuan, "Min ngai ve ngai miah lo tih ka hria, keipawn ka tibuai lo ang che, hlim deuhin i lo awm dawn nia, i sawi ang khan i theihnghilh vek zawk teh ang, min hmangaih lotu vanga lungngaih hi ka duh tawh bik lo e," tih hi a lo thawn a, ka ṭhu chhuak hluai a, chhan ka han tum ut ut a, inhnialna a siam mai mai tiin ka chhang duh leh ta lo.

Chuta ṭang chuan a reh ta vang vang a, ka number pawh a delete a ni maithei, status emaw a display picture tih angreng hi ka hmu tawh ngai lo a, a rilru a siamfel ve thei ta anih ka ring. Mi ka aṭangin a chanchin hi chu ka hre ve leh zauh ṭhin a, damdawiina an hmuh thu vel hi a ni ṭhin a, ka hmelhriatte lah hian ka hriat duh an ring aniang chu min hrilh leh hlawl ṭhin.

A ngaitein dawrah ka kal nitin a, a hahthlak lem loh nain chawlh ni ka nei meuh lo. Zantin hian Damiena a lo leng a, dawra mi rawn tlawh zawk te pawh a nei ṭhin a, a lo kal chang lah hian eitur eng eng emaw hi min lo kensak a, min rim tih chu hai theih pawh a ni tawh lo, ka chhungte lah hian an han hrethiam khawp a, zana a lo len chang pawh hian ka inlengah an ngai hmiah a, u Sena pawn ngaihsak loin a len chhuahsan daih ṭhin. Chutia min lo rim ta na na na chu hawihhawm taka ka lo chhawn a ngai a, hmelhriat ṭha leh min hrechiang em em tu a lo ni bawk nen ka tan lo biak chhiat theih a ni bik lo.

Tlaikhat chu dar 3 pelh hretah a lo thleng a, "Dawrah i kal nange?" tia ka lo zawh chuan, "Dawr bulah mitthi an awm a, kan inkhar hma ringawt, kan haw rual dawn nia," a ti a, ka ban har dawn thu ka hrilh pawh chuan, "Ka lo nghak ang che," a ti deuh tlat a, a ṭhu ve ta reng mai.

Zotei te ṭhianho lah chuan hmelṭha an lo ti khawp a, zial lei tura a chhuah zawk hlan te chuan min chhaih sap sap a, "A pian a nalh bawk si, in inhmeh lutuk," a tih te chuan chhan ngaihna pawh ka hre lo. Damiena lo let leh hnu chuan thingpui ka chahsak a, ka pu call-in ka ban hma tur thu ka va hrilh bawk a, nidang aiin darkar khat chuang zetin ka bang hma.

Chumi zana Damiena'n min lo biak chuan khunkhan deuh hian thil a rawn sawi a, a thutak em avang chhan nawi viau theih a ni lo. "A hma aṭangin ka rilru chu i hre tawh a, tuna ka rilru puthmang pawh i hai ka ring lo, i tana hun khawhral ka ui tihna ni loin nghah chhuah tur i awm dawn em tih tal hi min hrilh thei la ka ti, kan kum a tlem tawh lo a, keipawh nupui neih hun tak ka ni tawh a, i thei rih mai lo anih pawhin ka nghak thei ang che, kum hnih thum a ngai anih pawhin a pawi ka ti lo a, ngaihṭhatna tur min pe la ka duh ber, 'Min nghak rawh' tih chauh pawh sawi la a pawi lo, a bak engmah ka zawh belh lo ang che," inthlahrun hmel deuh hian a rawn ti a, ngaihdan takngial pawh ka nei thiam lo, kawppui neih leh hi ka rilruah a awm lo hrim hrim zawk a ni.

Ka chhanna a duh tlat avang chuan heti hian ka chhang a, "Nang chu ka u ang chiahin ka en che a, hei bak hi chu ka pelh theih ka ring lo, min hrethiam la min nghak duh lo mai rawh, ka ti khawtlai mai mai zawk dawn chein ka hria, keichuan pasal ka neih leh theih pawh ka ring tawh lo, chuvangin unau emaw, ṭhian angin awm zawk ang," ngenngawl angreng zetin ka ti a, min ngaihsakna leh min duhnaah hi chuan ka lawm ve takzet a; mahse, ka rilru lam hi buaina zawk chu a ni, mi dang nena inlaichinna siam leh hi ka chak lo a, pasal neih leh phei chu ka hreh viau zawk a ni.

"Ka hrethiam e, ka nawr lui lo ang che," tiin min chhang ta kha a nia. Ka u Sena lah chuan tukṭhuan ei lai laiin, "A vawihnih nan Damiena i hnar a ni maw?" a ti heu mai a, ka chhungte pawh an hamhaih hmel khawp mai.

"Pasal nei leh thuai sela min ti deuh em ni?! fiamthua ka tih chuan, "Mi dang chu ka duhpui tawh kher lo che anga; mahse, Damiena kher hi chu i tan a ṭha thlawt a nia, a duhna che a rei tawh a, i thlawi hnuah pawh a la iai miah lo che a, eizawnnaah buaina a awm lo a, in dang tur a ni bawk a, a bulah chuan i nuamsa ang, ani aia ṭha an awm ka ring lo," a ti duah a, ka nu pawh chuan a lo thlawp ve nge ni, "Damiena hi chu in ṭhian zingah a nungchang a mawi berin ka hria," a lo ti ve bawk.

U Hruaia thung chuan, "Pasal neih neih a ngai tawh lo, a ho mai mai," a ti sam et a, ka pa erawh chuan sawi a nei ve lem lo.

Damiena fel leh deuhna chu, ka hnar chiang viaua ka hriat laiin danglam awm miah loin mi a la be thei a, zana lo len pawh a sim phah chuang lo. A lo len chang pawh hian thil han sawi ruk ser ser hi a nei ngai lo a, ka chhungte a kawm bawrh bawrh a, ka pa nen phei chuan football an tui dun a, inkhel awm zanah phei chuan ka pa hian a hming a lam fo a, "A lo leng dawn nange?" tiin min zawt fo mai.

Hun a kal ve zel a, kar loah kum a vei leh dawn reng tawh, ka khawvel chu zim viau ṭhin mahsela han lungawi lohna emaw hrehawm han tih tur ka nei hran lo a, ka chhungte lahin ka khawhar te, ka inkiltawih te an hlau a, min duatin min ngaihsak em em reng. Ka u te mawlh hi ka fak a ni, tun hma zawng aiin mi an duat zual a, thawmhnaw leh eng i lo min leisak te an ching a, u Hruaia bialnu phei hi chuan min be ṭha ṭhin khawp a, cosmetics lam a zuar nge mawni company product ṭha deuh deuh hi ka nu nena kan ta tur a lo thawn ṭhin a, hmeichhe fel tak a niin ka hria.

Min hêl deuh chawt reng chu Damiena nen pawh kan inzui tam a, inneihna leh khawhar ina kan kal ṭum te pawhin kan inthurual mai zel a, kan vengah phei chuan kan inngaizawng emaw ti tawk an awm a, min lo chhaih leh zauh ṭhin. Damiena hian a chhungte a hrilh nge mawni mi kâ aṭanga ka hriat danin a nu hian 'Kan mo hual,' tiin min lo sawi a, min iai miah lo a ni awm e. Damiena te unau hi mipa pahnih an ni a, amah hi a upa zawk leh an dawr enkawltu ber hi a ni a, a buai ṭhin bawk a, a hunawl neih chhun hi chu ka in lamah a rawn hmang zo a ni deuh ber.

Christmas te pawh kan inah kan hmang ho leh a, ka cousin te lah chuan duh mai turin min nawr tawh hlawm a, an khawngaih deuh tlat a ni. "Pasal nei lo a awm a ṭha lo, nakinah chuan i u ten nupui an la nei anga, mo te bulah nuam i ti lo ang, i nu leh pa hian an dampui reng dawn lo che a, pasal i nei lo anih pawhin fa tal neih a ngai, anih loh chuan i tar hunah a hrehawm dawn," tiin u Muani'n min zilh deuh reng bawk.

"Alana hi i la beisei ru deuh em ni?" ti a min zawh chuan ka pha rang khawp a, chutiang rilru chu vawikhat mah ka pu leh tawh lo, ka phurna ka hloh ti ila ka awmdan chu a hrilhfiah chiang berin ka ring.

Kum a thar a, a ngai ang bawkin dawrah ka ṭhu leh a, hetiang hian kumtin ka chhiar chho dawn tih te ka ngaihtuah chuan nin thut chang ka nei ṭhin, khawharna ka nei ve reng a, ka palzam lui ve hram hram bawk. 

Damiena delhi a a zin vangin kar hnih dawn chu kan inhmu tawh lo a, phone-ah kan inbe zeuh zeuh thung. 

Nikhat chu Rampuii'n min lo tlawh a, "Alana nen in inbe ngai em?" a tih chuan kan la inbiak leh miah loh thu ka hrilh a, chutah ka beisei loh deuh thil a lo sawi a. "A thawhna damdawiinah ka cousin nurse a thawk thar ve a, doctor Alana chu nurse pakhat nen an inngaizawng a ti," tiin min hrilh a, ngaihtuahna a ti kal thui ve reuh khawp mai. Mary nen an inhruai leh mai kha ka lo beisei zawk a, ngaihzawng dang a nei chu engtin nge an ngaih hlawm ve ang aw ka ti rilru a.

Rampuii'n min lo tlawh hnu lawkah hian an chanchin dang ka hre leh a, Hadasi hnen aṭangin a ni. Side table leia a lo kal ṭum chuan, "Alana fanu kha a chiang chiah lo anih kha, an class ami hmeichhe pakhat lu ah lungin a chhua, a thih phah ṭep alawm, chu nu chu phaiah an kalpui a, Alana te pawn pawisa an seng ṭeuhin ka ring," a ti a, Sangsangi chu psychiatrist an pan pui bawk a ni awm e.

Kar thum dawn a cham hnuah Damiena pawh a lo haw a, wallet mawi deuh mai hi min lo hawnsak a, an chhungte lam innei tur an awm vang leh dawra a buai vangin kan inhmu tam lo hle thung. Zan mut hnu hian reels nuihzatthlak deuh deuh hi min lo thawn ṭhin a, keipawn han thawn ve zauh chang ka nei a, chutiang chuan thil sawi dun lem loin ka inbe pawp ve reng ṭhin a, a reh tak tak thei lo a ni ber.

February thla tir a ni a, tuk khat ka u Sena zing tho chu a irhfiak a reh thei hlek lo mai a, a zu in hnathawh a nih kan ring ber. Rampuii shool kal tur rawn pengkawi chuan ser tui a in tir a, chuti chung pawha a reh theih loh vang chuan damdawiinah kan han hruai a, an lo jection a, a ngeih khawp mai, an jection zawh hnu chuan a reh hmiah mai a, zu in tawh lo tura a lo ti erawh a ui ngang aniang chu a ner a ner a, "Tak deuh deuh lo talin ti se," a la ti tak ṭalh a, luhlul ve tak a ni.

Kan haw dawn chuan Rampuii'n a cousin hmuh pui lawk turin min sawm a, ward-ah kan han chho dun a, Alana a duty lo tihte pawh ka han hre chawpchilh a. Rampuii cousin chuan thil min lo hrilh luam a, "Inneih an tum hnai deuh a; mahse, Alana nu khan Zorami hi a hna bansan turin a duh deuh a, Zorami'n a duh bik si lo a, palai pawh an kal leh rih lo, Zorami chuan, 'Fanu sual deuh a nei a, ka hreh leh deuh' a ti bawk a; mahse, a duh hneh ve em a an inneih mai chu ka ring," tih angreng a lo sawi luam a, Zorami a tih chu min kawhhmuh bawk a, nula hmelchhe lo tak mai a ni. Ka kawng zawh hnu a rawn zawh ve dawn chu a ni a, ka natna ṭhinah khan a rawn nat ve loh hram ka beisei.

Zan khat chu u Sena ka room-ah a lo lut a, "Enteh Mate, zu hi ka nghei thei bawk si lo a, ka dam rei ka ring miah lo," a rawn ti pek a, "Nghei la a ni mai alawm," lawm lo fea ka lo tih chuan, "A har ve em a ni, ka khur hlum ṭhak thei ang chu," a la ti tak deuh deuh a, a melh pawh ka melh ṭha peih lo.

Ka mutna sirah chuan lo mu vein ka phone khawih lai chu a rawn bih duk duk a, "Ka awm loh hunah tuin nge enkawl ang che aw, Hruaia hi chuan a duat ve reng che a; mahse, nupui a nei anga, fate a neih hunah chuan a ngaihsak nep awm che si a, engtin nge kan tih ang aw..?" a ti leh vang vang a, ka va melh deuh hrawk, ani lah chu inchung lam hawiin a inngaihtuah veng veng a, rei deuh a ngawih hnuah, "Damiena hi nei mai la a ṭha ang a," a rawn ti leh bauh a, ka va melh leh chuan min lo en kur tawh.

"Min tirh bona zawng i va ang zawk ve?" ka ti nghat a.

"A teuh lo, chutiang a ni lo nasa, i nawmsakna tur ka ngaihtuah alawm, Damiena pawh ka hrilh vek tawh, a tihrehawm dawn miah lo che, lalnu ang maiin a enkawl dawn che alawm," a ti leh hlut a, nuih a ti za angreng, ka u hi chu huat hleihtheih si loh hian a awm thiam tlat ṭhin.

"Engtin nge lalnu ang chuan min enkawl anga?" 

"Chaw kan hlir a hmehpui chein ka ring," a uang bawk sia, a ngeiawm bawk si.

"Aw... a duhna che a rei tawh em mai, atan ka rawn palai angah ngai la, vawikhat chauh chu chance han pe ve teh, anih loh chuan a nghah chhung chein a leng tar takngial ang," tih pahin ka ban a rawn vuan a, min nawr nge min ngen zawk ni.

"A tih tir che em ni?" ka tih chuan, "Teuh nang, ani te chu mi dawhthei ania, a nghak ngat ngat dawn che; mahse, ka ṭhianpa a nia, ka khawngaih ve alawm maw le," a ti leh halh a, a thutak viau nain ka lo nuihsan mai mai thung.

A tuka Damiena'n min lo biak chuan, "Tlaiah ka lo thlah ang che, i uin chaweiah min sawm a, eng nge a birthday present-ah leisak ila ṭha ang?" tiin min lo zawt a, ka u piancham chu ka lo theihnghilh chiang khawp mai.

"Haw pahin t-shirt kan leisak dawn nia," ka ti a, kan inbiak zawhah cake ka order nghal a, ka nu pawh ka va hrilh ve nghe nghe, ani chuan a lo hre reng a, "Vawksa ka lo chhum dawn nia, lo bang hma deuh rawh," a lo tisam et a.

Dar 3 dawnah Damiena a lo thleng a, rei pawh awm loin bazar lamah kan inzui chhuak nghal a, t-shirt bakah cap te kan va leisak a, ka cake order erawh chaw eikham velah a lo thleng chauhin ka ring. In ka va thlen chuan ka nuin kan cousin-te a lo sawm hlawm a, present nen an lo kal ṭak ṭak a, u Sena lo haw pawh a rawn khi lut hui mai. A ṭhiante lah chuan thil maksak deuh deuh an pe hlawm a, hmeichhe underpant thehlep deuh a dawng tel lehnghal a, a kekawr ipteah lawr tutin a ak a, kan nuihpui dar dar hlawm. 

A rui deuh bawk nen chaw eilai lah chuan fiamthu a thawh reng a, Damiena nen chuan nupa kawpchawi niturin mal te min sawm thul. Damiena chu a lo inthlahrung deuh aniang, "I ti ho em mai a," a ti leh ṭhin a, a nui ṭha duh vak lo, a khat tawkin min lo melh leh ṭhin a, "Bem rawh, ka sawifel vek tawh," ka u lah chuan a ti sek mai a, ka ngei ru tak tak a ni.

Chaw kan eikham hnu chuan mipaho chu sitting room-ah an ṭhu hlawm a, Damiena erawh ka hmu mai lo, zial zuin a chhuak a ni maithei. Hmun ka phiat zo chu, "Ruatbawih, bawnghnute a awm miah lo mai a, dawrah va lei lawk ta che," ka nuin a lo tih vangin kawngkhar lam ka pan nghal a,  Damiena lo lut tur nen kan intawk hlawl.

"Khawiah nge i kal dawn a?" tiin kawng min lo kian vat a, "Lo kal rawh, dawrah kal ang," tih pah chuan ka pawt nghal dawr dawr a, kawt kan thlen hnuah ka thlah chauh. Min rawn melhin a nui deuh suk a, engmah phei chu a sawi lo. 

Min hnaih deuhah a lo kal a, ka kut chu a vuan chak deuh nge mawni a rawn tawk leh zuau ṭhin a, kan kut innawk tur chu a melh zauh zauh tih pawh ka hria.

"Aw le.." ka han ti hluai chu min rawn melh vut a, ka ding zui bawk nen chawpchilh deuhin a ding ve a, kan inen ran mai.

"I hmanhmawh loh chuan min nghak dawn nia," ka ti deuh tlawng, a mitmeng chu a buai nak a, a hamhaih hmel hle bawk.

"Kum khat emaw, kum hnih vel pawh a ngai maithei, i duh tak tak ang maw?" ka sawi zawh rual rualin "Aw, duh e," a tia, a bu nghat nghat a.

"Anih chuan min lo nghak rawh," tiin dawr lam ka pan zui a, ka va lehhawi leh chuan a la ding reng, min lo nuih var var a, a nui hmelah chuan a lawm tih a hriat hliah hliah.

"Khatah khan min lo nghak rawh ka ti hleinem, lo kal ta che," ka tih chuan a nui hawkin ka hria, chutah chak deuhin a rawn pen phei a, ka bul a lo thlen chuan a lai leh deuh nge mawni hnunglam a hawi leh zet a, chu velah a kut chu ka lo vuan a, "Min nghak loin ka rualin i kal dawn nia," ka ti ta a.

A tawp ta...